#LocalNews
Published - 28 August 2022

ပြည်တွင်း၌ ဆန်လက်ကျန်အခြေအနေမှာ မိုးစပါးသစ်မထွက်ပေါ်မီအချိန်ထိ ဖူလုံပိုလျှံသည့်ပမာဏဖြစ်ပြီး ပြည်တွင်းစားသုံးမှုအတွက် ဆန်လက်ကျန်ဖူလုံမှုရှိကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက သတင်းထုတ်ပြန်သည်။

ပြည်တွင်းမှထွက်ရှိသည့် လယ်ယာထွက်သီးနှံများအပါအဝင် အခြေခံစားသောက်ကုန်များကို ပြည်ပသို့တင်ပို့ရာတွင် ပြည်တွင်းစားသုံးမှုပိုလျှံမှသာလျှင် ပြည်ပတင်ပို့မှုအား ခွင့်ပြုပေးခြင်းဖြစ်ကြောင်း၊ ယင်းအပြင် ပြည်ပသို့ဆန်တင်ပို့ရာတွင်လည်း ပြည်တွင်းဖူလုံမှုကို ဦးစားပေးတွက်ချက် ချန်လပ်ပြီးမှသာလျှင်စီစစ်၍ စနစ်တကျ တင်ပို့ခွင့်ပြုနေကြောင်း သိရသည်။

ပြည်တွင်း၌ ပြီးခဲ့သည့် ၂၀၂၁ ခုနှစ်တွင် မိုးစပါးစိုက်ဧက ၁ ဒသမ ၅ သန်းခန့်ရှိပြီးစပါးထွက်ရှိမှုမှာ တင်းသန်းပေါင်း ၁၀၈၈ ရှိပြီး နွေစပါးစိုက်ဧကမှာ ၂ သန်းရှိကာ တင်းသန်းပေါင်း ၂၁၃ သန်းထွက်ရှိခဲ့သည့်အတွက် စုစုပေါင်းစပါးတင်းသန်းပေါင်း ၁၃၀၁ သန်း ထွက်ရှိခဲ့ကြောင်း ဖော်ပြချက်အရ သိရသည်။

ပြည်တွင်းရှိ လူဦးရေ ၅၅ သန်းစားသုံးရန်လိုအပ်ချက်မှာ ဆန်တန်ချိန် ၉ ဒသမ ၄၀၂ သန်းဖြစ်သည့်အတွက် ပြည်ပတင်ပို့မှုပမာဏမှာ ၂ ဒသမ ၈၈ သန်းခန့်ဖြစ်ကြောင်း၊ ယင်းအပြင် ၂၀၂၂ ခုနှစ်အတွင်း သြဂုတ်လကုန်ထိ ပြည်ပတင်ပို့မှုပမာဏမှာ ဆန်တန်ချိန် ၁ ဒသမ ၃၃၈ သန်းနှက့် ဆန်ကွဲတန်ချိန် ၀ ဒသမ ၈၀၈ သန်းသာဖြစ်သည့်အတွက် သြဂုတ်လကုန်တွင် ပြည်တွင်း၌ ဆန်လက်ကျန်တန်ချိန် ၃ ဒသမ ၆၃၅ သန်းခန့်ရှိကြောင်း သိရသည်။

အဆိုပါဆန်လက်ကျန်များသည် စက်တင်ဘာလမှ ဒီဇင်ဘာလအထိ ၄ လစာပြည်တွင်းစားသုံးရန်လိုအပ်ချက်ပမာဏမှာ ဆန်တန်ချိန်၃ ဒသမ ၁၃၄ သန်းသာဖြစ်ကြောင်း သိရသည်။

ယင်းအပြင် စက်တင်ဘာလကုန်တွင် ယခုနှစ်မိုးရယသီစိုက်ပျိုးသည့် မိုးစပါးစိုက်ဧက ၁၅ သန်းမှာစတင်ထွက်ပေါ်လာမည်ဖြစ်၍ ပြည်ပသို့ ဆန်တင်ပို့မှုပုံမှန်အတိုင်း တင်ပို့နိုင်သည့်အပြင် ပြည်တွင်းစားသုံးမှုအတွက်လည်း စိုးရိမ်စရယမရှိကြောင်း ရှင်းလင်းပြောကြားထားသည်။

Ymg/STH
#Yangon_Media_Group

Published 28 Aug 2022

အီလွန်မတ်စ်ရဲ့ စပေ့စ်အိတ်စ် SpaceX ဂြိုဟ်တုဟာ အမေရိကန်ရဲ့ တီ-မိုဘိုင်းလ် T-Mobile ဆဲလ်ဖုန်နှင့် လာယ့်နှစ်ကစပြီး တိုက်ရိုက်ချိတ်ဆက်တော့မှာဖြစ်ပါတယ်။ အဲဒါကြောင့်  ဆဲလ်ဖုန်းဆက်သွယ်ရေးတာဝါတိုင်တွေ မရှိတဲ့နေရာတွေအထိ ဆက်သွယ်ပြောဆိုနိုင်တော့မယ်လို့ ကုမ္ပဏီနှစ်ခုက ပြီးခဲ့တဲ့ ကြာသပတေးနေ့က ကြေညာပါတယ်။

လက်ရှိ ဆဲလ်ဖုန်းအပေါ်မှာပဲအခြေတည်ဆောင်ရွက်မယ့် ဝန်ဆောင်မှုအသစ်ဟာ ကမ္ဘာပတ်လမ်းကြောင်းထဲမှာရှိနေတဲ့ စပေ့စ်အိတ်စ်ရဲ့ ထောင်ပေါင်းများစွာသော စတားလင့်ခ် Starlink ဂြိုဟ်တုတွေကို အသုံးပြုမှာဖြစ်ပါတယ်။  ၂၀၂၃ နှစ်ကုန်ပိုင်းမှာ စာမက်ဆေ့ပိုတဲ့စနစ်ကို စတင်အသုံးပြုမှာဖြစ်ပြီး အဲဒီနောက် အသံဖြင့် ဖုန်းဆက်သွယ်ပြောဆိုခြင်းနှင့် ဒေတာ ဝန်ဆောင်မှုတွေ ဆက်လက်အသုံးပြုနိုင်မယ်လို့ မျှော်မှန်းထားကြပါတယ်။

“ယခုလုပ်ငန်းရဲ့ အရေးကြီးတဲ့အချက်က ခင်ဗျားတို့ရဲ့ဆဲလ်ဖုန်းတွေဟာ ကမ္ဘာပေါ်မှာ သုံးလို့မရတဲ့နေရာ မရှိစေရဆိုတဲ့ အဓိပ္ပါယ်ပဲဖြစ်တယ်”လို့  တက္ကဆပ်က စပေ့စ်အိတ်ချ်ရဲ့ စတားဘေ့စ် Starbase အဆောက်အဦမှာကျင်းပတဲ့ အခမ်းအနားမှာ မတ်စ်က ကြေညာသွားပါတယ်။

ယခုဝန်ဆောင်မှုဟာ အသက်တွေကို ကယ်တင်နိုင်မယ်လို့ပြောပြီး တောင်တက်သမားတစ်ဦး ပျောက်ဆုံးသွားပြီး အကူအညီ တောင်းဖို့ ဖုန်းခေါ်လို့မရတဲ့အခါမျိုးကို သူက ဥပမာပေးသွားပါတယ်။

“ လူတွေ ပျောက်ဆုံးသွားပြီး တကယ်လို့ အကူအညီတောင်းတဲ့ ဖုန်းသာခေါ်ဆိုလို့ရမယ်ဆိုရင်ဘ ကြေကွဲစရာအဖြစ်တွေ ကျွန်တော်တို့ နောင်မှာ ဖတ်ရတော့မှာမဟုတ်ပါဘူး” လို့ သူကဆက်ပြောပါတယ်။

ဂြိုဟ်တုအင်တာနက်တွေဟာ နှစ်ပေါင်းများစွာကတည်းက ရှိနေပြီးသားဖြစ်ပါတယ်။ ဒါပေမယ့် လက်ရှိမှာ အသုံးပြုသူတွေဟာ စတားလင့် တာမင်နယ်လို့ စက်ပစ္စည်းတွေလိုအပ်နေပါသေးတယ်။

“စတာလင့်တာမင်နယ်မှာရှိတဲ့ လှိုင်းအကျယ်လိုမျိုး ဖြစ်မှာမဟုတ်ဘူး။ စတားလင့်က စာရိုက်ပို့လို့ရတယ်။ပုံပို့လို့ရတယ်။ ဆဲလ်ဇုန်ထဲ လူများများစားစားမသုံးရင် ဗွီဒီယိုနည်းနည်းသုံးလို့ရတယ်” လို့ မတ်စ်က ပြောပါတယ်။

ဝန်ဆောင်မှုအသစ်ဟာ ဈေးနှုန်းနိမ့် ပက်ကေ့ချ် ဝယ်ထားသူတွေအတွက် လစဉ်သုံးခ အနည်းငယ်ကောက်မှာဖြစ်ပေမယ့် ဆဲလ်ဖုန်းရဲ့ သုံးစွဲမှုအစီအစဉ် Planအတော်များများအတွက် အခမဲ့ဖြစ်ပါလိမ့်မယ်လို့  တီမိုဘိုင်းရဲ့ စီအီးအို  မိုက် စီဗတ်က ပြောပါတယ်။

ကောင်းကင်ထဲ ဆဲလ်လျူလာ တာဝါတိုင်တွေ ထောင်ရတယ်ဆိုတာ အများကြီးပဲ ။သိပ်ခက်ခဲတယ်” လို့ သူက ပြောပါတယ်။

ဂြိဟ်တုအင်တာနက်ဈေးကွက်မှာ ယှဉ်ပြိုင်မှုဟာ လျင်မြန်စွာပဲ အရှိန်မြင့်မားနေပါတယ်။ အမေဇုန် Amazon တည်ထောင်သူ ဂျက်ဘီဇော့က ဂြိုဟ်တုပေါင်း ၃၂၀၀ လွှတ်တင်ဖို့ ရည်ရွယ်ထားတဲ့အကြောင်း မကြာသေးခင်က ကြေညာထားပါတယ်။

တရုတ်ကလည်း ကွာဝမ်းလို့ခေါ်တဲ့ ဂြိုဟ်တု တစ်သောင်းသုံးထောင် အတွဲကြီးကို လွှတ်တင်ဖို့ အစီအစဉ်ရှိပြီး ဥရောပ သမဂ္ဂကလည်း ၂၀၂၄ ခုနှစ်အရောက်မှာ ဂြိုဟ်တု ၂၅၀ လွှတ်တင်ဖို့ ဆန္ဒရှိနေပါတယ်။

လာမယ့်နှစ်မှာ စမ်းသပ်အသုံးပြုမယ့် ဝန်ဆောင်မှုဟာ အမေရိကန်ပြည်ထောင်စု တစ်နိုင်ငံတည်းကန့်သတ်ထားမှာဖြစ်ပေမယ့် သူ့ကုမ္ပဏီအနေနှင့် ပင်လပ်ရပ်ခြားဈေးကွက်တွေကို အပြန်အလှန် roaming သဘောတူညီချက်တွေနှင့် တိုးချဲ့ဖို့ မျှော်လင့်ထားတယ်လို့ စီဗတ်က ပြောပါတယ်။

Source: AFP

#SpaceX

#T-Mobile

#Satellites_Cell_Phones

Published 28 Aug 2022

နစက ဥက္ကဋ္ဌနှင့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ဖိတ်ခေါ်တဲ့ ငြိမ်းချမ်းရေးဆွေးနွေးပွဲသို့ ဒုတိယအကြိမ်တက်ရောက်ဖို့အတွက် ရှမ်းပြည် ပြန်လည်ထူထောင်ရေးကောင်စီ RCSS/SSA ဥက္ကဋ္ဌ ဗိုလ်ချုပ်ကြီး ယွက်စစ်

နှင့်အဖွဲ့ဝင်တွေဟာ ယနေ့ ဩဂုတ် ၂၈ ရက် နေ့လည် ( ၁၂ )နာရီအချိန် တာချီလိတ်လေဆိပ်မှတဆင့် တပ်မတော်လေယာဥ်ဖြင့် နေပြည်တော်သို့ထွက်ခွာသွားခဲ့ပါတယ်။

မေ ၂၀ ရက်နေ့တွင် ကျင်းပခဲ့သည့်ငြိမ်းချမ်းရေးဆွေးနွေးပွဲသို့တက်ရောက်ခဲ့ပြီးနောက် ယခုဒုတိယအကြိမ် ငြိမ်းချမ်းရေးဆွေးနွေးပွဲပြုလုပ်ရန်ထပ်မံသွားရောက်ခြင်းဖြစ်ပြီး ၊အဖွဲ့ဝင်တွေဟာ  ထိုင်းနိုင်ငံ ချင်းမိုင်မြို့မှတဆင့်

တာချီလိတ်မြို့ မြန်မာ-ထိုင်းချစ်ကြည်ရေးတံတားအမှတ်( ၂)မှတဆင့် ယနေ့နံနက် ၁၂ နာရီအချိန်၌ ဝင်ရောက်လာခဲ့ပြီး နေပြည်တော်သို့ ထွက်ခွာသွားခြင်းဖြစ်ပါတယ်။

 ဥက္ကဋ္ဌ ဗိုလ်ချူပ်ကြီး ယွက်စစ်နှင့်အဖွဲ့ဝင်များကို တာချီလိတ်တပ်နယ်မှ ဗိုလ်မှူးကြီးမင်းမင်းထွန်း၊ TBC-မြန်မာ မှဦးဘိုလေးနှင့်တာဝန်ရှိသူများက ကြိုဆိုနုတ်ဆက်ခဲ့ကြပြီးရှမ်း၊အာခါ၊လားဟူ၊ပအိုဝ့် တိုင်းရင်းသားများနှင့်ပြည်သူများက ငြိမ်းချမ်းရေးဆွေးနွေးပွဲကိုကြိုဆိုထောက်ခံကြောင်းစာတမ်းပါ ဗီနှိုင်းပိုစတာများကိုင်ဆောင်ပြီး တာချီလိတ်မကြိုဆိုခဲ့ကြပါတယ်။

Ymg/ys-tcl

#Myanmar_Politics

#RCSS/SSA

#Myanmar_NCA

#LocalNews
Published - 28 August 2022

ပို့ကုန်ကြေညာလွှာ (ED) ထုတ်ယူပြီးသည့် ကုန်ပစ္စည်းများကို ED ထုတ်ယူသည့်နေ့မှ ၁၀ ရက်အတွင်း ပြည်ပတင်ပို့ရန် အကောက်ခွန်ဦးစီးဌာနက ညွှန်ကြားထားကြောင်း သိရသည်။

အကောက်ခွန်ဦးစီးဌာနမှ မြဝတီကုန်သွယ်ရေးဇုန်သို့ စာပေးပို့ညွှန်ကြားခြင်းဖြစ်ပြီး နိုင်ငံခြားသုံးငွေကြီးကြပ်ရေးကော်မတီ အစည်းအဝေးတွင် ယင်းကဲ့သို့ဆုံးဖြတ်ခြင်းဖြစ်ကြောင်း စာတွင် ဖော်ပြထားသည်။

အဆိုပါညွှန်ကြားချက်သည် တရုတ်-မြန်မာ မူဆယ်နယ်စပ်ကိုလည်း ရောက်ရှိပြီး နယ်စပ်အားလုံး အကျုံးဝင်ကြောင်း နယ်စပ်ကုန်သည်တစ်ဦး၏ ပြောပြချက်အရ သိရသည်။

ယခင်က ပို့ကုန်ကြေညာလွှာ ထုတ်ယူပြီး ရက် ၃၀ အထိ နေလို့ရသော်လည်း ရက် ၃၀ အတွင်း မတင်ပို့တာတွေလည်းရှိသည့်အတွက် ယခုလို တင်းကျပ်လိုက်ခြင်းဖြစ်နိုင်ကြောင်း ကုန်သည်များက သုံးသပ်ထားသည်။

Ymg/STH
#Yangon_Media_Group

#LocalNews
Published_28 August 2022

တရားမဝင်မြန်မာများတင်လာသည့်ယာဉ်တစ်စီး ထိုင်းနိုင်ငံအတွင်း တိမ်းမှောက်၍ လေးဦး သေဆုံးကာ ကိုးဦး ဒဏ်ရာရခဲ့ကြောင်း သိရသည်။

အဆိုပါ ယာဉ်သည် ဘုရားသုံးဆူဂိတ်နှင့် ထိုင်းနိုင်ငံ Sangkhla Buri ခရိုင်ကို ဆက်သွယ်ထားသော အဝေးပြေးလမ်း ၃၂၃ ပေါ်တွင် ယနေ့ သြဂုတ်လ ၂၈ ရက် နံနက်ပိုင်းက တိမ်းမှောက်ခဲ့ခြင်းဖြစ်ပြီး ယာဉ်မောင်းနှင့် ယာဉ်အကူယူဆရသူနှစ်ဦး ထွက်ပြေးလွတ်မြောက်သွားကြောင်း ထိုင်းနိုင်ငံသတင်းများကို ကိုးကား၍ မြန်မာရွှေ့ပြောင်းလုပ်သားများအရေး လိုက်ပါဆောင်ရွက်နေသူများကဆိုသည်။

ယာဉ်ပေါ်တွင် တရားမဝင် မြန်မာ ၁၃ ဦးအနက် ၄ ဦးသေဆုံးခြင်းဖြစ်ပြီး ၉ ဦးက ဒဏ်ရာရရှိခဲ့ခြင်း ဖြစ်ကြောင်း၊ သေဆုံးခဲ့သူများမှာ အသက် ၁၄ နှစ်ခန့်အရွယ် ယောကျ်ားလေးတစ်ဦးအပါအဝင် အမျိုးသား ၃ ဦးနှင့် အမျိုးသမီးတစ်ဦးဖြစ်ပြီး လက်ရှိတွင် မည်သူမည်ဝါ မသိရသေးကြောင်း သိရသည်။

လက်ရှိတွင် ဒဏ်ရာရရှိသွားသော မြန်မာနိုင်ငံသား ၉ ဦးကို Sangkhla Buri ဆေးရုံသို့ပို့ဆောင်၍ ဆေးဝါးကုသမှုခံယူနိုင်ရန် လုပ်ဆောင်ထားကြောင်းလည်း သိရသည်။

#photo_BP
ymg/mt
#Yangon_Media_Group

Published 28 Aug 2022

မန်ဟန်တန်အိမ်နီးချင်းတစ်ဦးကို အဓမ္ဓကျင့်တယ်လို့ ဒီတစ်ပတ်စောစောပိုင်းက စွပ်စွဲခံထားရတဲ့ တောင်ဆူဒန်သံတမန်တစ်ဦး ဟာ သူ့အပေါ်စွဲချက်ကို ရှောင်တိမ်းပြီးနောက် သူ့နိုင်ငံကို ထွက်ပြေးသွားခဲ့ပါတယ်။

အသက်၄၆နှစ်အရွယ်ရှိတဲ့ ချားလ်ဒစ်ကင် အိုင်မင်းအိုလီဟာဟာ ပြီးခဲ့တဲ့ တနင်္ဂနွေ မွန်းလွဲပိုင်းက  သူနေထိုင်တဲ့ ဝါရှင်တန်ဟိုက်စ်အိမ်ရာမှာနေတဲ့ အသက်၂၄နှစ် အရွယ် အမျိုးသမီးတစ်ဦးကို သူမတိုက်ခန်းထဲ အတင်းဝင်သွားပြီးနောက် အဓမ္မပြုကျင့်ခဲ့တယ်လို့ စွပ်စွဲခံခဲ့ရပါတယ်လို့ ရဲကပြောပါတယ်။

စွပ်စွဲသူက နယူးယောက်ရဲဌာနကို ဖုန်းဆက်တိုင်ကြားပြီးနောက် အိုလီဟာကို အချုပ်ထဲထည့်ခဲ့ပါတယ်။ ဒါပေမယ့် သူဟာ ကုလသမဂ္ဂ သံတမန်တစ်ဦးဖြစ်တဲ့အတွက် အမေရိကန် ဥပဒေအရ သံတမန်ကင်းလွတ်ခွင့်အရ အကာအကွယ်ရရှိထားတဲ့ အတွက် သူ့ကို အရေးယူမှုတစ်စုံတစ်ရာမလုပ်ဘဲ ပြန်လွှတ်ပေးလိုက်ရပါတယ်။

တောင်ဆူဒန်နိုင်ငံခြားရေးနှင့် နိုင်ငံတကာပူးပေါင်းဆောင်ရွက်ရေး ဝန်ကြီးဌာနက အိုလီဟာ အာဖရိကကို ပြန်ရောက်လာပြီလို့ ကြာသပတေးနေ့က သတင်းထုတ်ပြန်အတည်ပြုပါတယ်။

“နယူးယောက်မြို့ဒေသခံတစ်ဦးကို အဓမ္မပြုကျင့်မှုတစ်ခုမှာ ကျွန်ုပ်တို့ သံတမန်ပါဝင်ပတ်သက်ခဲ့တဲ့အတွက် စိတ်မကောင်း ဖြစ်မိပါတယ်” လို့ သတင်းထုတ်ပြန်ချက်မှာ ဖော်ပြထားပါတယ်။

နိုင်ငံခြားရေးနှင့် နိုင်ငံတကာဆက်ဆံရေး ဝန်ကြီးဌာနခေါင်းဆောင်ပိုင်းက မေးမြန်းခံနေရတဲ့ သံတမန်ကို  ချက်ခြင်းပြန်ခေါ်ဖို့ ဆုံးဖြတ်ခဲ့ပြီး အထူးကော်မတီတစ်ခုက စုံစမ်းစစ်ဆေးမှုအပြည့်တစ်ခုလုပ်ဖို့ ရွှေ့ဆိုင်းထားပါတယ်။

“ အမေးခံနေရဲ့ သံတမန် အခု တောင်ဆူဒန်ကို ပြန်ရောက်ပြီး သူ့တာဝန်တွေကို ဆိုင်းငံ့ထားလိုက်ပါပြီ” လို့ သတင်းထုတ်ပြန်ပါတယ်။

အကယ်၍မန်ဟန်တန် အစိုးရရှေ့နေတွေက သူ့အပေါ် တရားစွဲရင် အဲဒီသူကို တရားခံပြန်လွှဲပေးမှာလားဆိုတာကိုတော့ ဝန်ကြီးဌာနက ပြောမထားပါဘူး။

“ ခရိုင်ရှေ့နေရုံးဟာ ဒီကိစ္စကို တက်တက်ကြွကြွ စုံစမ်းဖော်ထုတ်နေပါတယ်”လို့ မန်ဟန်တန်ခရိုင်ရှေ့နေရုံးရဲ့ ဒုတိယညွှန်ကြားရေးမှူး အီမီလီတူတဲလ်က သတင်းထုတ်ပြန်ပေးပါတယ်။

တောင်ဆူဒန်ဟာ ၂၀၁၁ခုနှစ်ကတည်းက နိုင်ငံရဲ့ အမျိုးသမီးများနှင့် မိန်းကလေးငယ်များရဲ့ အခွင့်အရေးတွေကို ကာကွယ်ရေး အပြင်းအထန် လုပ်ဆောင်ခဲ့ပါတယ် လို့လည်း တောင်ဆူဒန်နိုင်ငံခြားရေးဝန်ကြီးဌာနက ပြောပါတယ်။

အဲဒီနိုင်ငံငယ်ကလေးဟာ ညှင်းပန်းနှိပ်စက်မှု၊အဓမ္မပြုကျင့်မှုနှင့် လိင်စော်ကားမှုတွေဟာ ၂၀၂၀မှာအဆုံးသတ်ခဲ့တဲ့  (၇)နှစ်ကြာ ပြည်တွင်းစစ်ကြားထဲမှာ ကျယ်ကျယ်ပြန့်ပြန့်ရှိခဲ့တာဖြစ်တယ်လို့ ကုလသမဂ္ဂသတင်းအချက်အလက်အရ သိရပါတယ်။

Source: NY Post

#South_Sudan

#Charles_Dickens_Imene_Oliha

#UN_Envoy_Rape_case

#Local_News
Published_ 28 Aug 2022

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ နှင့် နိုင်ငံရေးပါတီများအစုအဖွဲ့၏အလုပ်အဖွဲ့တို့ တွေ့ဆုံဆွေးနွေးပွဲကို ဩဂုတ် ၂၇ ရက် နံနက်ပိုင်းတွင် နေပြည်တော်ရှိ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုဗဟိုဌာန အစည်းအဝေးခန်းမ၌ ကျင်းပခဲ့ပါတယ်။

ဆွေးနွေးပွဲသို့ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ ဥက္ကဋ္ဌ ဒုတိယဗိုလ်ချုပ်ကြီးရာပြည့်နှင့် ညှိနှိုင်းရေးကော်မတီဝင်များ၊ နိုင်ငံရေးပါတီများအစုအဖွဲ့၏ အလုပ်အဖွဲ့ခေါင်းဆောင် ရှမ်းတိုင်းရင်းသားများဒီမိုကရက်တစ်ပါတီဥက္ကဋ္ဌ ဦးစိုင်းအိုက်ပေါင်းနှင့် အလုပ်အဖွဲ့ကိုယ်စားလှယ်များ တက်ရောက်ကြပါတယ်။

ထို့နောက် ဖွဲ့စည်းပုံအခြေခံဥပဒေ(၂၀၀၈ခုနှစ်) မှ ပြင်ဆင်လိုသည့်အချက်များနှင့်စပ်လျဉ်း၍ နိုင်ငံရေးပါတီများအစုအဖွဲ့၏အလုပ်အဖွဲ့မှ အဆိုပြုချက်များအပေါ် ညှိနှိုင်းရေး ကော်မတီမှ လေ့လာဆန်းစစ်တွေ့ရှိချက်များအား တစ်ချက်ချင်းစီ ရှင်းလင်းဆွေးနွေးပြီး တက်ရောက်လာသူများက အဆိုပြုချက်များနှင့် စပ်လျဉ်း၍ ၎င်းတို့၏သဘောထားအမြင်ကို အပြန်အလှန် ဆွေးနွေးညှိနှိုင်းကြပါတယ်။

ယင်းနောက် ညှိနှိုင်းရေးကော်မတီက ဂျာမနီနိုင်ငံ၏ဖက်ဒရယ်စနစ်ကျင့်သုံးနေမှုအပေါ် လေ့လာတွေ့ရှိချက်များကို ရှင်းလင်းဆွေးနွေးပြီး ဖွဲ့စည်းပုံအခြေခံဥပဒေ (၂၀၀၈ ခုနှစ်) ပါ ဇယား-၁၊ ဇယား-၂ တို့မှ ဥပဒေပြဋ္ဌာန်းရန် ကျန်ရှိနေသည့် ဥပဒေပြုခွင့်ရ စာရင်းများ နှင့်ပတ်သက်၍ ရှင်းလင်းတင်ပြခဲ့ကြပါတယ်။

ygm_mnn
#Yangon_Media_Group

#Local_News
Published_ 28 Aug 2022

နေရောင်ခြည်စွမ်းအင် အရင်းအမြစ်များ ပေါကြွယ်ဝသည့် နိုင်ငံဖြစ်သဖြင့် နေရာင် ခြည်စွမ်းအင်သုံး ဓာတ်အားပေးစက်ရုံများကို အကောင်အထည်ဖော် တည်ဆောက်သွားမယ်လို့ နစကလျှပ်စစ်စွမ်းအားဝန်ကြီးဌာနဝန်ကြီး ဦးသောင်းဟန် က ပြောကြားခဲ့ပါတယ်။

ဝန်ကြီးသည် ဩဂုတ် ၂၇ ရက်တွင် သာစည်မြို့နယ်ရှိ မဂ္ဂါဝပ် ၂၀ ရေပေါင်းဆုံ နေရောင်ခြည်စွမ်းအင်သုံး ဓာတ်အားထုတ်လုပ်ရေးစက်ရုံစီမံကိန်း၊ ကျောက်ဆည်မြို့နယ်ရှိ မဂ္ဂါဝပ် ၃၀ ဘဲလင်းနေရောင် ခြည်စွမ်းအင်သုံး ဓာတ်အားထုတ်လုပ်ရေး စက်ရုံစီမံကိန်းနှင့် ရေပေါင်းဆုံပင်မဓာတ်အားခွဲရုံတို့ကို သွားရောက်ကြည့်ရှု စစ်ဆေးခဲ့ပါတယ်။

ဝန်ကြီးက ဆိုလာစီမံကိန်းများတွင် Tracking System တပ်ဆင်ထားခြင်းကြောင့် လျှပ်စစ်ဓာတ်အားပိုမိုထုတ်လုပ်နိုင်သည်ကို တွေ့ရှိရသဖြင့် ဆိုလာ Tracking System နည်းပညာကို အသုံးပြုတည်ဆောက်သွားရန် လိုအပ်ကြောင်း၊ ကုမ္ပဏီအသီးသီးမှ စီမံကိန်း မြေနေရာများနှင့်ပတ်သက်၍ သက်ဆိုင်ရာများနှင့် ပေါင်းစပ်ညှိနှိုင်းနေမှုကို အမြန်ဆုံး ပြီးပြတ်အောင် ဆောင်ရွက်သွားရန် မှာကြားပါတယ်။

ပြည်သူများ လိုအပ်နေသော လျှပ်စစ်ဓာတ်အားလိုအပ်ချက်ကို ဖြည့်ဆည်းပေးနေခြင်းဖြစ်သည့်အတွက် လက်ရှိတည်ဆောက်လျက်ရှိသည့် နေရောင်ခြည်စွမ်းအင်သုံး ဓာတ်အားထုတ်လုပ်ရေးစက်ရုံ စီမံကိန်းများကို သတ်မှတ်အချိန်အတွင်း အချိန်မီပြီးစီးအောင် အလေးထားဆောင်ရွက်သွားဖို့ တိုက်တွန်းခဲ့ပါတယ်။

ထို့နောက် ဝန်ကြီးနှင့်အဖွဲ့ဝင်များသည် နေရောင်ခြည်စွမ်းအင်သုံး ဓာတ်အားထုတ်လုပ်ရေးစက်ရုံစီမံကိန်းများ၏ လုပ်ငန်းခွင်များအတွင်း တည်ဆောက်ရေး လုပ်ငန်းများဆောင်ရွက်နေမှုနှင့် ရေပေါင်းဆုံဓာတ်အားခွဲရုံအတွင်းရှိ ဓာတ်အားထိန်းချုပ်ခန်းနှင့် Switch Yard အတွင်း ဓာတ်အားပို့လွှတ်ဖြန့်ဖြူးပေးနေမှုတို့ကို လှည့်လည်ကြည့်ရှု စစ်ဆေးခဲ့ကြောင်း သတင်းရရှိပါတယ်။

ygm_mnn
#Yangon_Media_Group

#Health_Tips
Published 28 August 2022

ကိုယ်အလေးချိန်လျှော့ခြင်းနဲ့ပတ်သက်ပြီး အရေးအကြီးဆုံးသတ်မှတ်ချက်က ခန္ဓာကိုယ်ကလောင်ကျွမ်းနိုင်တဲ့ ကယ်လိုရီထက် လျော့နည်းစွာ စားသုံးဖို့ပါပဲ။

အချို့အစားအစာတွေက အများကြီးစားသုံးရင်တောင် ကယ်လိုရီအနည်းငယ်သာရရှိပြီး ကိုယ်အလေးချိန်ကျစေပါတယ်။

အချို့အစားအစာတွေကတော့ အချိန်ကြာရှည်စွာ ဗိုက်ပြည့်နေပြီး သိပ်မစားဖြစ်တော့ပါဘူး။

ပရိုတိန်းများပြားစွာစားသုံးခြင်းကလည်း အစာစားချင်စိတ်ကို လျော့နည်းစေနိုင်ပြီး ကြွက်သားထုထည်များလာပြီးတော့ ကိုယ်အလေးချိန်ကျစေနိုင်ပါတယ်။

ကယ်လိုရီလျော့နည်းစွာပါဝင်ပြီး စားသုံးသင့်တဲ့အစာတွေကတော့...

(၁) ငါး

ငါးက ပရိုတိန်းကြွယ်ဝပြီး အိုမီဂါ-၃ ဖက်တီးအက်ဆစ်ပါဝင်တာကြောင့် ပြည့်ဝဆီအလွန်နည်းပါးပြီး အိုင်အိုဒင်းလည်းပါဝင်တာကြောင့် သိုင်းရွိုက်ဂလင်းလုပ်ဆောင်ချက်ကို ကောင်းမွန်စေပါတယ်။

ကျန်းမာရေးအဖွဲ့အစည်းများက တစ်ပတ်ကို ငါးနှစ်ကြိမ်ခန့် စားသုံးသင့်ကြောင်း အကြံပြုထားပါတယ်။

(၂) အသီးအနှံအမျိုးမျိုး

အဟာရနဲ့ ဗိုက်တာမင်ဓာတ်ရရှိတဲ့နေရာမှာ အမျိုးမျိုးသောသစ်သီးဝလံတွေကြား ကွာခြားချက်သိပ်မရှိပါဘူး။

ပန်းသီးစားသုံးထားရင် အချိန်အတော်ကြာ ဗိုက်ပြည့်နေပြီး အစာချေရာမှာ အကူအညီပေးတဲ့ အမျှင်ဓာတ်တစ်မျိုးကို ထောက်ပံ့ပေးပါတယ်။

လိမ္မော်သီးက ဗိုက်တာမင်-စီ ပေါကြွယ်ဝဆုံး အစားအစာဖြစ်ပြီး ရှောက်သီး၊ သံပရာသီးအမျိုးတွေက ကိုလက်စ်ထရောနဲ့ သွေးတွင်းသကြားဓာတ်တို့ကို ထိန်းညှိပေးနိုင်ပါတယ်။

(၃) ကြက်ဥ

ကြက်ဥက ပရိုတိန်းကြွယ်ဝပြီး တစ်နေ့တစ်လုံးတော့ စားသုံးသင့်ကြောင်း အကြံပြုထားပါတယ်။

မနက်စာစားတိုင်း ကြက်ဥထည့်သွင်းစားသောက်ရင် တစ်နေကုန် အဟာရပြည့်ဝနေစေမှာဖြစ်ပါတယ်။

(၄) ဒိန်ခဲ

ဒိန်ခဲပျော့က နို့ထွက်ပစ္စည်းဆိုပေမယ့် ကိုယ်အလေးချိန်မတက်စေပါဘူး။

ဒိန်ခဲကို ကြက်ဥဖြင့်တွဲဖက်စားသုံးခြင်းကလည်း ဗိုက်ပြည့်နေစေမှာဖြစ်ပါတယ်။

(၅) ပဲအမျိုးမျိုး

ပဲတွေက အဟာရဓာတ်အလွန်ပြည့်ဝပြီး အသားဓာတ်အစားထိုး စားသုံးနိုင်ပါတယ်။

အစာချေစနစ်ကို နှေးစေတဲ့အတွက် ဗိုက်ပြည့်နေစေပြီး သကြားဓာတ်အလွန်အမင်းကျဆင်းခြင်းနဲ့ တက်ခြင်းတို့ကို ကာကွယ်ပေးနိုင်ပါတယ်။

(၆) ဘယ်ရီသီးများ

စတော်ဘယ်ရီနဲ့ ဘယ်ရီသီးတို့မှာ သဘာဝဒြပ်ပေါင်းများစွာပါဝင်ပြီး ကိုယ်အလေးချိန်လျှော့ဖို့ အထိရောက်ဆုံးအစားအစာဖြစ်ပါတယ်။

အသီးတွေကို အနီရောင်ဖြစ်စေတဲ့ အန်သိုဆိုင်ယာနင်ဓာတ်က ကိုယ်အလေးချိန်ကို ထိရောက်စွာလျှော့ချပေးနိုင်ပါတယ်။

Source: The Jerusalem Post
#Yangon_Media_Group

#Local_News
Published_ 28 Aug 2022

ကျန်းမာရေးဝန်ကြီး ဒေါက်တာသက်ခိုင်ဝင်းသည် ထိုင်းနိုင်ငံ ဘန်ကောက်မြို့ Bangrak Medical Center Building ၌ ကျင်းပသည့် ပြည်သူ့ကျန်းမာရေး အရေးပေါ် အခြေအနေများဆိုင်ရာ အာဆီယံစင်တာ အတွင်းရေးမှူးရုံး ဖွင့်ပွဲအခမ်းအနားသို့ တက်ရောက်ခဲ့ကြောင်း သိရပါတယ်။

ဖွင့်ပွဲအခမ်းအနားသို့ ထိုင်းနိုင်ငံ၊ ဒုတိယဝန်ကြီးချုပ်နှင့် ပြည်သူ့ကျန်းမာရေးဝန်ကြီး၊ အာဆီယံ အထွေထွေအတွင်းရေးမှူးချုပ် H.E. Mr. Lim Jock Hoi နှင့် ဖိတ်ကြားထားသော အာဆီယံနိုင်ငံများမှ ကျန်းမာရေးဝန်ကြီးများ၊ ဒုတိယဝန်ကြီးများနှင့် တာဝန်ရှိသူများ တက်ရောက်ကြပါတယ်။
အခမ်းအနားတွင် ထိုင်းနိုင်ငံ၊ ဒုတိယဝန်ကြီးချုပ်နှင့် ပြည်သူ့ကျန်းမာရေးဝန်ကြီး H.E. Mr. Anutin Charnvirakul က အဖွင့်အမှာစကားပြောကြားပြီး ဂျပန်နိုင်ငံ ကျန်းမာရေး၊ အလုပ်သမားနှင့် ဖူလုံရေးဝန်ကြီး H.E. Mr. Katsunobu KATO က ပေးပို့သည့် အထိမ်းအမှတ် အဖွင့်အမှာစကား ဗီဒီယိုကို ပြသပါတယ်။

ထို့နောက် ပြည်သူ့ကျန်းမာရေး အရေးပေါ် အခြေအနေများဆိုင်ရာ အာဆီယံစင်တာ အတွင်းရေးမှူးရုံး စတင်ဖြစ်ပေါ်လာပုံ အထိမ်းအမှတ် ဗီဒီယိုကိုပြသ၍ ဖွင့်ပွဲအခမ်းအနားကို ဒုတိယဝန်ကြီးချုပ်နှင့်အတူ တက်ရောက်လာကြသည့် အာဆီနိုင်ငံများက ကိုယ်စားလှယ်များက စက်ခလုတ်နှိပ်၍ ဖွင့်လှစ်ပေးကြပါတယ်။

ပြည်သူ့ကျန်းမာရေးအရေးပေါ် အခြေအနေများဆိုင်ရာ အာဆီယံစင်တာ အတွင်းရေးမှူးရုံး၊ ASEAN Center for Public Health Emergency and Emerging Diseasesကို ဂျပန်နိုင်ငံအထောက်အပံ့ဖြင့် ဖွင့်လှစ်နိုင်ခဲ့ခြင်းဖြစ်ပြီး အာဆီယံနိုင်ငံများ၏ ပြည်သူ့ကျန်းမာရေး အရေးပေါ် ဆိုင်ရာအခြေအနေများကို တုံ့ပြန်ဆောင်ရွက်နိုင်ခြင်း၊ ကူးစက်မြန်ရောဂါဖြစ်ပွားမှုများ ကာကွယ်၊ ထိန်းချုပ်၊ ကုသရေး လုပ်ငန်းများအတွက် အာဆီယံနိုင်ငံများအချင်းချင်း ပိုမိုနီးကပ်စွာ ပူးပေါင်းဆောင်ရွက်နိုင်ခြင်း၊ အာဆီယံနိုင်ငံများအတွင်း ပြည်သူ့ကျန်းမာရေးဆိုင်ရာ သတင်းအချက်အလက်များဖလှယ်နိုင်ခြင်း၊ သင်တန်းများဖွင့်လှစ်ပို့ချနိုင်ခြင်းတို့ကို ဆောင်ရွက်နိုင်မှာဖြစ်ပါတယ်။

ဝန်ကြီးသည် ထိုင်းနိုင်ငံ၊ ဒုတိယဝန်ကြီးချုပ်နှင့် ပြည်သူ့ကျန်းမာရေးဝန်ကြီး H.E. Mr. Anutin Charnvirakul နှင့် တွေ့ဆုံရာတွင် မြန်မာ-ထိုင်း နှစ်နိုင်ငံကျန်းမာရေးစောင့်ရှောက်မှုလုပ်ငန်းများ ပိုမိုပူးပေါင်း ဆောင်ရွက်ရေး၊ နှစ်နိုင်ငံ နယ်စပ်ဒေသများ၌ ကိုဗစ်-၁၉ ရောဂါအပါအဝင် ကူးစက်ရောဂါများ ကာကွယ် တားဆီးထိန်းချုပ်ရေး လုပ်ငန်းများကို ပိုမိုမြှင့်တင်ဆောင်ရွက်ရေး၊ ထိုင်းနိုင်ငံမှ ကိုဗစ်-၁၉ ရောဂါကာကွယ် တာဆီးထိန်းချုပ်ရေးလုပ်ငန်းများအတွက် မြန်မာနိုင်ငံသို့ လှူဒါန်းမည့် ဆေးနှင့်ဆေးပစ္စည်းများ၊ ဓာတ်ခွဲခန်းသုံး ပစ္စည်းများ၊ ကိုဗစ်-၁၉ ရောဂါ ကာကွယ်ဆေးများ ဆိုင်ရာ၊ နှစ်နိုင်ငံပူးပေါင်း ဆောင်ရွက်သွားမည့် ကိစ္စရပ်များနှင့် ပတ်သက်၍ ဆွေးနွေးခဲ့ကြောင်း သိရပါတယ်။

ygm_mnn
#Yangon_Media_Group

#World_Health
Published 28 August 2022

နာကျင်ကိုက်ခဲမှုသက်သာစေတဲ့ ပါရာစီတမောဆေးတွေကို အိမ်တိုင်းလိုလိုမှာ မြင်တွေ့ရနိုင်ပါတယ်။

ဒါပေမဲ့ တန်ဆေးလွန်ဘေးဆိုသလို လိုအပ်တာထက် ပိုပြီးသောက်မိရင်တော့ အသက်အန္တရာယ်ရှိလာနိုင်ပါတယ်။

ဘယ်လောက်ပဲ နာကျင်ကိုက်ခဲသည်ဖြစ်စေ သောက်ရန်ညွှန်းထားတဲ့ ပမာဏထက် ပိုပြီးမသောက်မိစေဖို့ NHS က သတိပေးထားပါတယ်။

ခေါင်းကိုက်ခဲခြင်း၊ ဝမ်းဗိုက်မအီမသာဖြစ်ခြင်း၊ ကိုယ်ပူခြင်းစတဲ့ ဝေဒနာတွေအတွက် ပါရာစီတမောက အကောင်းဆုံးဆေးဖြစ်ပါတယ်။

သူက ခန္ဓာကိုယ်ထဲက နာကျင်မှုကိုခံစားရစေတဲ့ အာရုံကြောများကို ပိတ်ဆို့လိုက်တာဖြစ်ပြီး ဒီဆေးတွေကို ဘယ်လိုသုံးစွဲရမလဲဆိုတာကို NHS က လမ်းညွှန်ထားပါတယ်။

လူကြီးတစ်ယောက်အနေနဲ့ ၂၄ နာရီအတွင်း ပါရာစီတမော ၅၀၀ မီလီဂရမ်ပါဝင်တဲ့ ဆေးပြား ၈ ပြားအများဆုံးသုံးစွဲနိုင်တယ်လို့ ဆိုပါတယ်။

ဒါဟာ တစ်ကြိမ်သောက်ရင် ဆေး ၂ လုံးနဲ့ ၂၄ နာရီအတွင်း ၄ ကြိမ်သောက်တဲ့ နှုန်းထားဖြစ်ပါတယ်။

ဆေးတစ်ကြိမ်နဲ့ တစ်ကြိမ်ကြား အနည်းဆုံး ၄ နာရီခြား သောက်သုံးသင့်ပါတယ်။

ပါရာစီတမောကို ရေရှည်သောက်သုံးလို့ ဘေးကင်းပေမယ့် ညွှန်းထားတဲ့ပမာဏထက်တော့ ပိုပြီးမသောက်သုံးသင့်ပါဘူး။

ပါရာစီတမောကို အလွန်အကျွံသောက်သုံးမိရင် ပြင်းထန်တဲ့ဘေးထွက်ဆိုးကျိုးများ ဖြစ်တတ်ပါတယ်။

အလွန်အမင်း နာကျင်ကိုက်ခဲလွန်းလိုဆိုပြီး ပုံမှန်ထက် နှစ်ဆလောက်ပိုသောက်တာမျိုး မပြုလုပ်သင့်ပါဘူး။

မတော်တဆ တစ်ပြားနှစ်ပြားလောက် ပိုသောက်မိပေမယ့် ၂၄ နာရီအတွင်း ၈ ပြားထက်မများဘူးဆိုရင်တော့ သိပ်ပြီးဘေးမဖြစ်စေပါဘူး။

လူနာမှတ်တမ်းများအရ ဆေးအလွန်အကျွံသောက်မိတဲ့အထဲမှာ ပါရာစီတမောက အများဆုံးဖြစ်လေ့ရှိတယ်လို့ သိရပါတယ်။

ပါရာစီတမောဆေးလွန်ရင် အသည်းထိခိုက်ပြီးတော့ အသက်အန္တရာယ်အထိပါ ဖြစ်စေနိုင်ပါတယ်။

ဆေးလွန်ပြီးနောက် နာရီအနည်းငယ်အကြာမှာ ဖျားနာချင်သလို ဖြစ်လာပါတယ်။

အသည်းမှာ အဆိပ်အတောက်ဖြစ်ပြီး ညာဘက်နံရိုးနားမှာ အောင့်လာပြီးနောက် အရေပြားနဲ့ မျက်လုံးတို့မှာ အဝါရောင်ပြောင်းလာကာ အသည်းရောင်အသားဝါလက္ခဏာ ဖြစ်လာတတ်ပါတယ်။

ညွှန်းထားတဲ့ပမာဏထက်ပိုပြီး သောက်မိရင် အရေးပေါ်ဌာနသို့ အလျင်အမြန် သွားရောက်ကုသသင့်ပါတယ်။

Source: The Sun
#Yangon_Media_Group

#Local_News
Published_ 28 Aug 2022

ထောက်ရှာပင်-ကန်းနီရေနံမြေရှိ တွင်းအမှတ် ၃၁၃ မှ သဘာဝဓာတ်ငွေ့ တစ်ရက်လျှင် ကုဗပေ ၁ ဒသမ ၅ သန်းခန့် ထွက်ရှိနိုင်မည်ဖြစ်ပြီး ထွက်ရှိလာမည့် သဘာဝဓာတ်ငွေ့များကို စက်မှုလုပ်ငန်းများနှင့် လျှပ်စစ်ဓာတ်အား ထုတ်လုပ်ခြင်းလုပ်ငန်းများ အသုံးပြုသွားနိုင်မည်ဖြစ်ကြောင်း သိရပါတယ်။

စွမ်းအင်ဝန်ကြီးဌာနဝန်ကြီး ဦးမျိုးမြင့်ဦးသည် မကွေးတိုင်း ဝန်ကြီးချုပ် ဦးတင့်လွင်၊ တာဝန်ရှိသူများနှင့်အတူ မြန်မာ့ရေနံနှင့် သဘာဝဓာတ်ငွေ့လုပ်ငန်း လက်အောက်ရှိ ထောက်ရှာပင်-ကမ်းနီရေနံမြေတွင်းအမှတ် ၃၁၃ သို့ ရောက်ရှိကြပြီး တွင်းတူးဖော်ရေးလုပ်ငန်း ဆောင်ရွက်နေမှုများကို ကြည့်ရှုစစ်ဆေးခဲ့ပါတယ်။

ဝန်ကြီးက နစကဥက္ကဋ္ဌ၏ လမ်းညွှန်ချက်အရ ရေနံနှင့်ရေနံထွက်ပစ္စည်းများ ပြည်ပမှတင်သွင်းမှု လျှော့ချနိုင်ရေးနှင့် ပြည်တွင်းထုတ်လုပ်မှုတိုးတက်ရေး စီမံချက်နှင့်အညီ ရေနံမြေများမှ ရေနံတိုးတက်ထုတ်လုပ်နိုင်ရေးသည် ဝန်ကြီးဌာန၏ အဓိကလုပ်ငန်းတာဝန်ဖြစ်တယ်လို့ ဆိုပါတယ်။

ရေနံမြေများသည် ရေနံစိမ်းနှင့် သဘာဝဓာတ်ငွေ့များကို ကိုင်တွယ်လုပ်ကိုင်နေရခြင်းကြောင့် မီးဘေးအန္တရာယ်ကင်းဝေးစေရေး ဂရုပြုဆောင်ရွက်ရန်နှင့် လုပ်ငန်းခွင်ဘေးအန္တရာယ် ကင်းရှင်းရေးအလေးထား ဆောင်ရွက်သွားရန်၊ ဝန်ထမ်းများနှင့်ရေနံမြေ လုံခြုံရေးကို အလေးထားဆောင်ရွက်သွားရန် မှာကြားခဲ့ကြောင်း သတင်းရရှိပါတယ်။

ygm_mnn
#Yangon_Media_Group