#Local_News
Published-6 May 2023

ရန်ကုန်တိုင်းဒေသကြီး၊ ကမာရွတ်မြို့နယ်၊ လှည်းတန်းမှတ်တိုင်အနီးတွင် ခရီးသည်တင် YBS 61 ဘတ်စ်ကားက အမျိုးသမီး ၁ဦးကို ဝင်တိုက်ခဲ့၍ ပွဲချင်းပြီးသေဆုံးခဲ့ကြောင်း ကမာရွတ်မြို့နယ်ဒေသခံများထံက သိရသည်။

ကမာရွတ်မြို့နယ်၊ အင်းစိန်လမ်းမကြီး၊ လှည်းတန်းမှတ်တိုင်အနီးတွင် ဦးထွန်းလင်းခြံဘက် မှ လမ်းတစ်ဖက်သို့ဖြတ်ကူးစဉ်မေလ ၆ ရက် နံနက် ၉ နာရီကျော်က YBS 61 ကားက ဝင်တိုက် မိခဲ့ခြင်းဖြစ်ကြောင်း သိရသည်။

"မီးပွိုင့် နီးနီးလေးမှာဖြစ်တာ။ ယာဉ်တိုက်ခံရပြီးပွဲချင်းပြီးသေဆုံးသွားတာ။ ဂုတ်မှာလည်း ဒဏ်ရာနဲ့။ ကားရှေ့ဘီးထဲ ခါးဝင်သွားတာလို့လည်းသိရတယ်"ဟု ကမာရွတ်မြို့နယ် ရပ်ကွက်နေပြည်သူများထံက သိရသည်။

သေဆုံးသူအမျိုးသမီးမှာ တောင်ဒဂုံမြို့နယ်မှ အသက်၁၈ နှစ်အရွယ်ဟုသိရပြီး ရုပ်အလောင်းကို ရန်ကုန်ဆေးရုံကြီးသို့ ကမာရွတ်မြို့နယ်လူမှုကူညီရေးအသင်းကပို့ဆောင်ပေးခဲ့ကြောင်းသိရသည်။

YBS 61ယာဉ်လိုင်းသည် ဆူးလေနှင့် လှိုင်သာယာအနောက်ပိုင်း တက္က သိုလ်သို့ ပြေးဆွဲနေသည့်ယာဉ်လိုင်းဖြစ်ကြောင်း သိရသည်။

#ymg/pl
#Yangon-Media-Group

#World_Health
Published 7 May 2023

လေထုညစ်ညမ်းမှုသိသိသာသာမြင့်မားတဲ့ မြို့ကြီးတွေမှာ ပန်းနာရင်ကြပ်ခံစားရသူအရေအတွက် ရာခိုင်နှုန်းများကြောင်း မက်ကာဘီ KSM သုတေသနနဲ့ဖန်တီးမှုစင်တာက ဆိုပါတယ်။

ရင်ကြပ်ရောဂါက ကလေးတွေရော လူကြီးတွေမှာပါ ဖြစ်ပွားနိုင်ပြီး ကလေးတွေမှာ အဖြစ်အများဆုံးနာတာရှည်ရောဂါ ဖြစ်ပါတယ်။

အစ္စရေးလ် ဟိုင်ဖာအရှေ့ဘက်မှာ ရင်ကြပ်လူနာအများဆုံးရှိပြီး မက်ကာဘီမှ လူ ၁၅ ရာခိုင်နှုန်းမှာ တွေ့ရှိရပါတယ်။

သတ္တု၊ ဓာတု၊ အမိုးနီးယား၊ ဆာလ်ဖိတ်၊ နိုက်ထရိတ်တို့မှ အမှုန်များဟာ အလွန်သေးငယ်ပြီး အသက်ရှူလမ်းကြောင်းထဲ နက်ရှိုင်းစွာဝင်ရောက်သွားပါတယ်။

လေထုညစ်ညမ်းမှုမြင့်မားတဲ့ အခြားမြို့တွေမှာ ရင်ကြပ်ရှိသူ ၁၁ ရာခိုင်နှုန်းခန့်ရှိနေပါတယ်။

စက်မှုမြို့ဟိုင်ဖာမှာ ညစ်ညမ်းလေတွေက အရှေ့ဘက်သို့ တိုက်ခတ်သွားကာ အိမ်နီးချင်းနိုင်ငံတွေထံ သက်ရောက်စေပါတယ်။

၂၀၁၈ ခုနှစ် ကျန်းမာရေးဝန်ကြီးဌာနရဲ့ ထုတ်ပြန်ချက်အရ ဟိုင်ဖာမှာ ရင်ကြပ်ကြောင့် ဆေးရုံတက်ရတဲ့ကလေးအရေအတွက်ဟာ အခြားလူများထက် ၂ ဆကျော်ပိုများနေပါတယ်။
ဂျေရုဆလမ်နဲ့ ဂိုလန်ဟိုက်စ်တို့လို လေထုညစ်ညမ်းမှုနည်းတဲ့ မြို့တွေမှာတော့ ရင်ကြပ်ဝေဒနာသည်နည်းပါးပါတယ်။

လေထုညစ်ညမ်းမှုဟာ ပန်းနာရင်ကြပ်ဖြစ်စေတဲ့ တစ်ခုတည်းသောအကြောင်းအရင်း မဟုတ်ဘဲ မျိုးရိုးဗီဇ၊ နေထိုင်စားသောက်မှုပုံစံ၊ ပတ်ဝန်းကျင်သက်ရောက်မှုတို့ကလည်း ရင်ကြပ်ရောဂါမှာ ပါဝင်ပတ်သက်နေကြောင်း မက်ကာဘီKSM အကြီးအကဲ ဒေါက်တာ'တယ်လ်ပါတာလွန်'က ရှင်းပြခဲ့ပါတယ်။

"လေထုအရည်အသွေးနဲ့ ရာသီဥတုပြောင်းလဲမှုတို့က လူတွေအားလုံးအပေါ် သက်ရောက်မှုရှိပါတယ်။ ဒါကြောင့် ကမ္ဘာတဝှမ်း ကျန်းမာရေးမြှင့်တင်မှုဗျူဟာများရဲ့ အဓိကအစိတ်အပိုင်းတစ်ခုဖြစ်ရပါမယ်" လို့ ပြောကြားခဲ့ပါတယ်။

ရင်ကြပ်ထဖောက်တဲ့အခါ အသက်ရှူလမ်းကြောင်းကျဉ်းသွားပြီး အချွဲပိုမိုထလာပါတယ်။

ဒီအခြေအနေတွေက လေထုညစ်ညမ်းတဲ့အခါ ပိုမိုဆိုးရွားစေပါတယ်။

WHO ထုတ်ပြန်ချက်အရ ၂၀၁၉ မှာ ရင်ကြပ်ရောဂါကြောင့် လူပေါင်း ၂၆၂ သန်းခံစားရပြီး ၄၅၅,၀၀၀ သေဆုံးထားပါတယ်။

Source: The Jerusalem Post #World_Health #ပန်းနာရင်ကြပ်ခံစားရသူများ
#YMG #Yangon_Media_Group

#Local_News
Published_ 6 May 2023

သဘာဝဘေးအန္တရာယ်ဖြစ် ပေါ်လာပါက ကူညီကယ်ဆယ်ရေးလုပ်ငန်းများအတွက် ကြိုတင် ပြင်ဆင်ထားရှိကြောင်း ရန်ကုန်တိုင်းဒေသကြီး အစိုးရအဖွဲ့က သိရသည်။

တောင်တရုတ် ပင်လယ်နှင့် ဘင်္ဂလားပင်လယ်အော်တို့တွင် လေဖိအားနည်းရပ်ဝန်းများဖြစ် ပေါ်ပြီး မြန်မာနိုင်ငံအတွင်းဝင် ရောက်လာနိုင်ကြောင်းခန့်မှန်းရရှိသည့်အတွက် ရန်ကုန်တိုင်းဒေသကြီး၊ သဘာဝဘေးအန္တရာယ်ဆိုင်ရာ စီမံခန့်ခွဲမှုအဖွဲ့၏ပထမဆုံး အစည်းအဝေးကို မေလ ၅ ရက်က ပြုလုပ်ခဲ့ခြင်းလည်း ဖြစ်သည်။

ယင်းအစည်းအဝေးတွင်ရန်ကုန်တိုင်း စစ်ဌာနချုပ်တိုင်းမှူး ဗိုလ်ချုပ်ဇော်ဟိန်းက ကူညီကယ်ဆယ်ရေးလုပ်ငန်းများအတွက် တပ်ရင်း၊ တပ်ဖွဲ့များက ကြိုတင်ပြင်ဆင်ထားပြီးဖြစ်ကြောင်း ထည့်သွင်းပြောကြားခဲ့ခြင်း ဖြစ်သည်။

သဘာဝဘေးအန္တရာယ်ကျ ရောက်သောနိုင်ငံများတွင်ပါဝင်သည့် မြန်မာနိုင်ငံအနေဖြင့် ရေဘေး၊ လေဘေး၊ မီးဘေး၊ ကမ်းပြိုဘေးနှင့် မိုးကြိုးဘေးများကို ရာသီအလိုက်နှစ်စဉ်ကြုံတွေ့နေရ၍ ဖြစ်ပွားပေါ်ပေါက်လာပါက ပျက်စီးဆုံးရှုံးမှုနည်းနိုင်သမျှလျော့နည်းစေရန်အတွက် ကြိုတင်ကာကွယ်ရေး ဆိုင်ရာ လုပ်ဆောင်ချက်များ၊ ရှာဖွေကယ်ဆယ်ရေးအပါအဝင် တုံ့ပြန်ဆောင်ရွက်ရေး၊ ပြန်လည် ထူထောင်ရေးဆိုင်ရာလုပ်ငန်း စဉ်များကို အစီအစဉ်အတိုင်း ဆောင်ရွက်နိုင်ရန် လိုကြောင်းလည်း တိုင်းဒေသကြီးအစိုးရအဖွဲ့က ပြောဆိုထားသည်။

#ymg/pl #Local_News #သဘာဝဘေးအန္တရာယ် #ကူညီကယ်ဆယ်ရေးလုပ်ငန်းများ
#Yangon_Media_Group

#Local_News
Published 6 May 2023

ရန်ကုန်တိုင်းဒေသကြီး၊ ကြည့်မြင်တိုင်မြို့နယ် ရတနာပုံလမ်းနှင့် အထက်ကြည့်မြင်တိုင်လမ်းထောင့်တွင် သစ်ပင်လဲကျမှုဖြစ်ပွားပြီး အငှားယာဉ်ပေါ်၌ပိခဲ့သောကြောင့် ယာဉ်မောင်းဒဏ်ရာရရှိခဲ့ကြောင်း  ရောင်စဉ်မဲ့လူမှုကူညီရေးအသင်းက သိရသည်။

ဖြစ်စဉ်မှာ မေလ ၆ ရက် မွန်းလွဲ ၁နာရီ ၃မိနစ်ခန့်က ကြည့်မြင်တိုင်မြို့နယ်၊ ဈေးကြီးအရှေ့ရပ်ကွက်၊ ရတနာပုံလမ်းနှင့်အထက်ကြည့်မြင်တိုင်လမ်းထောင့်တွင် သစ်ပင်အမြစ်ဆွေးမြေ့၍ လဲကျမှုဖြစ်ပြီး အငှားယာဉ်ကိုပိနေခဲ့ကြောင်း သိရသည်။

"အငှားယာဉ်ပေါ်ကို လာပိနေတော့ ယာဉ်မောင်းဒဏ်ရာရခဲ့ပါတယ်။ ဒဏ်ရာကြီးကြီးမားမားတော့မဟုတ်ပါဘူး။ မှန်ကွဲစစင်တဲ့ ဒဏ်ရာပဲရတာပါ"ဟု ရောင်စဉ်မဲ့လူမှုကူညီရေးအသင်းမှ သိရသည်။

ယင်းဖြစ်စဉ်နေရာသို့ ကြည့်မြင်တိုင်မြို့နယ်မီးသတ်စခန်းမှ မီးသတ်တပ်ဖွဲ့ဝင်များ၊ ပရဟိတအဖွဲ့ဝင်များပူးပေါင်း၍ ရှင်းလင်းရေးလုပ်ငန်းများ ဆောင်ရွက်ခဲ့ကြောင်းလည်း မီးသတ်ဦးစီးဌာနကသိရသည်။

#ymg/pl #Local_News #ကြည့်မြင်တိုင် #အငှားယာဉ်ပေါ်သစ်ပင်ပိမှုဖြစ်
#YMG #Yangon-Media-Group

#Local_News
Published_ 6 May 2023

ရန်ကုန်မှာရှိတဲ့သုသာန်တွေက ရေခဲတိုက်တွေမှာမီးပျက်တာကြောင့် လုံလောက်တဲ့ အအေးပမာဏမရတဲ့အတွက် ရုပ်အလောင်းတွေကို နေ့ချင်းပြီးသဂြိုလ်ဖို့စီစဉ်နေရတယ်လို့ နာရေးကူညီမှုလုပ်ကိုင်နေသူတွေက ပြောသည်။

အခုရက်ပိုင်းမှာ သေဆုံးသွားတဲ့ ရုပ်အလောင်းအများစုဟာနေ့ချင်းပြီး သဂြိုလ်နေရပြီးတော့အဓိကရုပ်အလောင်းသိမ်းဆည်းတဲ့ သုသာန်ရေခဲတိုက်က လျှပ်စစ်မီးပုံမှန် အပြည်အဝ မရတာကြောင့် အရင်လိုသုံးရက်ခန့်ထားဖို့ မလွယ်ကူကြောင်း သိရသည်။

“စည်ပင်ကရေခဲတိုက်မှာ သုံးရက်ပေးမထားတာမဟုတ်ဘူးပေးထားတယ်။ ရေခဲတိုက်ကမီးပျက်လို့မအေးဘဲဖြစ်နေတာ။ လိုအပ်တဲ့အအေးပမာဏရအောင် ရေခဲဝယ်ပေးရတယ်လို့ကြားတယ်”ဟုမိတ်ဆွေကောင်းနာရေးကူညီမှုအသင်းက အသင်းဝင်တစ်ဦးက ပြောသည်။

ငွေကြေးတက်နိုင်သူတွေအနေနဲ့ရုပ်အလောင်းတွေကိုသုံးလေးရက်ကြာအောင်ထားဖို့သုသန်ရေခဲတိုက်နဲ့ညှိနှိုင်းဆောင်ရွက်နိုင်သော်လည်း နွမ်းပါးသူများအတွက် နေ့ချင်းပြီး သဂြိုလ်နေရသည်။

ရန်ကုန်တွင်မြို့တော်စည်ပင်လက်အောက်ခံ မီးသဂြိုလ်စက်လေးခုရှိပြီး နေ့စဉ်သေဆုံးသူရုပ်အလောင်းများကို တာဝန်ယူသဂြိုလ်ပေးနေကြောင်း သိရသည်။

ရန်ကုန်တွင် လျှပ်စစ်မီးပျက်တောက်မှု အချိန်ကြာမြင့်လာတာနဲ့အမျှ နေစဉ်လူမှုစီးပွါးရေးထိခိုက်မှုများမြင့်တက်နေကြောင်း သိရသည်။

#ymg/ppk #Local_News #သုသာန်ရေခဲတိုက် #နေ့ချင်းပြီးသဂြိုလ်
#YMG #Yangon-Media-Group

#Local_News
Published_ 6 May 2023

ရခိုင်ပြည်နယ်မှ နေရပ်စွန့်ခွာသူများပြန်လည်နေရာချထားရေးနှင့်ဘဝရပ်တည်ရေးတို့တွင်ကုလသမဂ္ဂအဖွဲ့အစည်းများ၊ နိုင်ငံတကာအဖွဲ့အစည်းများနှင့်ထိရောက်စွာ ပူးပေါင်းဆောင်ရွက်မည်ဖြစ်ကြောင်း ကုလသမဂ္ဂအဖွဲ့အစည်းများ၊ နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်ရေးလုပ်ငန်းကော်မတီ ဥက္ကဋ္ဌ၊ နိုင်ငံခြားရေးဝန်ကြီးဌာန၊ ဝန်ကြီး ဦးသန်းဆွေက ပြောကြားခဲ့ပါတယ်။

ရခိုင်ပြည်နယ်တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးဗဟိုကော်မတီ၏ လုပ်ငန်း ကော်မတီတစ်ရပ်ဖြစ်သော ကုလသမဂ္ဂအဖွဲ့အစည်းများ၊ နိုင်ငံတကာ အဖွဲ့အစည်းများနှင့် ပူးပေါင်းဆောင်ရွက်ရေး လုပ်ငန်းကော်မတီ၏ (၁/၂၀၂၃) ညှိနှိုင်း အစည်းအဝေးကို မေ ၅ ရက်၊ နံနက်ပိုင်းတွင် နိုင်ငံခြားရေးဝန်ကြီးဌာန၊ ဧရာဝတီခန်းမ၌ ကျင်းပရာ၌ ပြောကြားခဲ့တာဖြစ်ပါတယ်။

နိုင်ငံတော်အစိုးရအနေဖြင့် ရခိုင်ပြည်နယ်မှ နေရပ်စွန့်ခွာသူများကို ရှေ့ပြေး စမ်းသပ်စီမံကိန်း (Pilot Project) ဖြင့် ပြန်လည်လက်ခံရန် ကြိုးပမ်းဆောင်ရွက် လျက်ရှိကြောင်း၊ နေရပ်စွန့်ခွာသူများ ပြန်လည်ဝင်ရောက်လာပါက ၎င်းတို့၏ လူမှုဘဝ တည်ငြိမ်ရေးအတွက် ဆောင်ရွက်ပေးရန် အရေးကြီးတယ်လို့ ဆိုပါတယ်။

ဆက်လက်၍ အပြည်ပြည်ဆိုင်ရာပူးပေါင်းဆောင်ရွက်ရေး ဝန်ကြီးဌာန၊ ဝန်ကြီး ဦးကိုကိုလှိုင်က ရခိုင်ပြည်နယ်တွင်း လူသားချင်း စာနာထောက်ထားမှု အကူအညီပေးရေး ကိစ္စရပ်များ အဆင်ပြေချောမွေ့မှုရှိစေရေး သက်ဆိုင်သူ အားလုံးအကြား ပူးပေါင်း ဆောင်ရွက်ရေးနှင့် ယင်းကဲ့သို့ ဆောင်ရွက်ချက်များကို နိုင်ငံတကာ အသိုက်အဝန်းမှ သိရှိရေး ဆောင်ရွက်ရန် လိုအပ်တယ်လို့ ဆိုပါတယ်။

လုပ်ငန်းကော်မတီဒုတိယဥက္ကဋ္ဌနှင့် ကော်မတီဝင်များက ရခိုင်ပြည်နယ်တွင် သက်ဆိုင်ရာ ဝန်ကြီးဌာနများအလိုက် လက်ရှိလုပ်ငန်းဆောင်ရွက်နေမှုများနှင့် တိုးတက်မှု အခြေအနေများ၊ ရှေ့ပြေးစမ်းသပ်စီမံကိန်း (Pilot Project) ဖြင့် ပြန်လည်လက်ခံရန် ဆောင်ရွက်လျက်ရှိသည့် အခြေအနေများနှင့် ဝန်ကြီးဌာနများအကြား ညှိနှိုင်းပေါင်းစပ် ဆောင်ရွက်ရသည့် လုပ်ငန်းများကို ဆွေးနွေးခဲ့ကြပါတယ်။

ရခိုင်ပြည်နယ်တွင်း အကူအညီများ ပေးအပ်ရာ၌ အသိုက်အဝန်းများအကြား ခွဲခြားမှုမရှိ မျှတစွာပေးအပ်ရေးသည် အရေးကြီးကြောင်း နိုင်ငံခြားရေးဝန်ကြီး ဦးသန်းဆွေက ဆိုပါတယ်။

#ygm_mnn #Local_News #ရခိုင်ပြည်နယ် #နေရပ်စွန့်ခွာသူများ #ကုလသမဂ္ဂ
#YMG #Yangon_Media_Group

#Local_News
Published_ 6 May 2023

အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံဖြိုးတိုးတက်စေဖိုရည်ရွယ်ပြီး ကုန်သည်စက်မှုအသင်းချုပ်မှ UMFCCI MSME Fair 2023 Fashion Show ပွဲကို မေလ ၇ ရက်နှင့် ၈ ရက်နေ့များတွင် ရန်ကုန်မြို့ရှိ Lotte Hotel မှာကျင်းပသွားမှာဖြစ်ကြောင်း ကုန်သည်စက်မူအသင်းချုပ်မှသိရသည်။

ပြပွဲတွင် MSMEs လုပ်ငန်းရှင်များ၏ ပြည်တွင်းဖြစ် ထုတ်ကုန်ပစ္စည်းများ၊ ဝန်ဆောင်မှုများကို ပြခန်းပေါင်း ၁၂၀ ကျော်ဖြင့် ဖွင့်လှစ်ပြသသွားမည်ဖြစ်ပြီး အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်စေရန်နှင့် ဈေးကွက်အခွင့်အလမ်းများရရှိစေဖို့ရည်ရွယ်ထားကြောင်း သိရသည်။

အဆိုပါပြပွဲတွင် စီးပွားရေးဆိုင်ရာ နည်းပညာ၊ အသိပညာဗဟုသုတများ ရရှိနိုင်မည့် စကားဝိုင်းဆွေးနွေးပွဲအစီအစဉ်များ၊ အသိပညာပေး ဆွေးနွေးပွဲများကိုလည်း ထည့်သွင်းကျင်းပသွားမည့်အပြင် MSMEs လုပ်ငန်းရှင်များ၏ ထုတ်ကုန်ပစ္စည်းများအလိုက် ပစ္စည်းများ ခင်းကျင်းပြသပုံ၊ တီထွင်ဆန်းသစ်မှု၊ ထုတ်ပိုးမှုပုံစံ၊ ဝန်ဆောင်မှုအပေါ် မူတည်၍ MSME Outstanding Award ဆုချီးမြှင့်မည့် အစီအစဉ်များထည့်သွင်းထားမှာဖြစ်ပြီး အဆိုပါပြပွဲကို ၀င်ကြေးအခမဲ့ဖြစ်၀င်ရောက်ကြည့်ရူနိုင်ကြောင်း ကုန်သည်စက်မူအသင်းချုပ်ကထုတ်ပြန်ထားပါသည်။

#ymg/ynzw #Local_News #MSME #ရိုးရာဝတ်စုံ #Fashion Show
#Yangon-Media-Group

#Local_News
Published_ 6 May 2023

မန္တလေးတိုင်းဒေသကြီး၊ မန္တလေးမြို့၊ အမရပူရမြို့နယ်၊ ယဉ်တော်ကျေးရွာ၊ စစ်ကိုင်း-မန္တလေးကမ်းနားလမ်း ဘေးရှိ DENKO စက်သုံးဆီအရောင်းဆိုင်ကို အမည်မသိသူများက ဓားပြတိုက်ခဲ့ကြကြောင်း သိရသည်။

ယနေ့ မေလ ၆ ရက်နံနက်၂နာရီခွဲခန့်အချိန်တွင် DENKOစက်သုံးဆီအရောင်းဆိုင်၏ ပန့် ကိုင်ဝန်ထမ်းနှင့် လုံခြုံရေးဝန်ထမ်းအမျိုး သားနှစ်ဦး ရှိနေစဉ် အမည်မသိအမျိုးသားသုံးဦးက ဆိုင်ကယ်၂စီးဖြင့် ရောက်ရှိလာပြီး ဆိုင်ကယ်ဆီပြတ်သွားသောကြောင့် ဆီထည့်လိုကြောင်း ပြော ကားခဲ့ပြီး အနီးသို့ အရောက်တွင် ဆီပန့်ကိုင်ဝန် ထမ်းအမျိုးသား၏ လည်ပင်းကို ညှစ်၍ဓါးဖြင့်ထောက်၍ လက်ယာဘက်နဖူးထိပ်ကို ဓါးနှောင့်ဖြင့် ထုကာလက်ပြန်ကြိုးတုတ်ထားခဲ့ကြောင်း သိရသည်။

အလားတူ လုံခြုံရေးဝန်ထမ်းအမျိုးသားကိုလည်း လက်ပြန်ကြိုးတုတ်ပြီး ယင်းတို့နှစ်ဦးကို ဆိုင်မန်နေဂျာရုံးခန်းပြခိုင်းကာ ဆိုင်မန်နေဂျာအား ဓားပြ၍ ခြိမ်းခြောက်ပြီး ကာ ရုံးခန်းအတွင်းရှိ မီးခံသေတ္တာ အတွင်း စက်သုံးဆီရောင်းရ ငွေ(၂၅၆)သိန်း ၊ CCTV အောက်စက်(၂)လုံး ၊ မန်နေဂျာ၏ Vivo V-9 အမျိုးအစား ဆင်းကတ်ပါ အမဲရောင် လက်ကိုင်ဖုန်း(၁)လုံးနှင့် ဆီဆိုင်ပိုင် REDMI 9A အမျိုးအစား ဆင်း ကတ်ပါ ခဲရောင် လက်ကိုင်ဖုန်း(၁)လုံးတို့ကို ယူဆောင်၍ ၎င်းတို့ စီးလာသည့် ဆိုင်ကယ်ဖြင့် စစ်ကိုင်း-မန္တလေးကမ်းနားလမ်းအတိုင်း ကန်တော် ကြီး ပတ်လမ်းဘက်ကို မောင်းနှင်ထွက် ပြေးသွားခဲ့ခြင်း ဖြစ်ကြောင်း သိရသည်။

အဆိုပါ ဖြစ်စဉ်အတွင်း ဆီပန့်ကိုင်သည့် အမျိုးသား ဝန်ထမ်းနှင့် မန်နေဂျာအမျိုးသားတို့တွင် ဒဏ်ရာ အနည်းငယ်ရရှိခဲ့ကြကြောင်းလည်း သိရသည်။

#ymg/pl #Local_News #မန္တလေး #အမရပူရ #DENKO စက်သုံးဆီအရောင်းဆိုင်
#YMG #Yangon_Media_Group

#Local_News
Published_ 6 May 2023

အခု ၂၀၂၃ ခုနှစ်အတွင်း မလေးရှားနိုင်ငံက မြန်မာလုပ်သားခေါ်ယူမှုဟာ မရှိသလောက်နည်းပါးနေတယ်လို့ မြန်မာနိုင်ငံ ပြည်ပအလုပ်အကိုင် ဝန်ဆောင်မှုလုပ်ငန်းရှင်များအဖွဲ့ချုပ် (MOEAF) သတင်းတွေအရ သိရသည်။

မလေးရှားဘက်က မြန်မာလုပ်သားခေါ်ယူမှုဟာ ပြီးခဲ့တဲ့ ၂၀၂၂ ခုနှစ် နှစ်ကုန်ပိုင်းကစလို့ နည်းပါးလာခဲ့တာဖြစ်ပြီး ၂၀၂၃ ခုနှစ်မှာတော့ မရှိသလောက် နည်းပါးလာခဲ့ကာ အခုနောက်ပိုင်း မြန်မာလုပ်သားတွေထက် နီပေါ၊ ဘင်္ဂလားဒေ့ရှ်နိုင်ငံတို့က လုပ်သားခေါ်ယူမှုက ပိုများကြောင်း အသင်းကသိရသည် ။

၂၀၂၂ ခုနှစ်တုန်းကလည်း အေဂျင်စီတချို့ကနေ အလုပ်ခေါ်စာအသစ်နဲ့ မြန်မာလုပ်သားခေါ်ယူမှုတွေရှိခဲ့ပေမယ့် အလုပ်ခေါ်စာတစ်ခုကို လုပ်သား ၇၀ လောက်သာ ခေါ်ယူမှုရှိခဲ့ခြင်းဖြစ်သည်။

မြန်မာနိုင်ငံက အလုပ်သမားအများစုဟာ ထိုင်းနိုင်ငံကို အများဆုံး သွားရောက်ကြပြီး မလေးရှားနိုင်ငံကတော့ ဒုတိယအများဆုံးသွားရောက်ကြခြင်းဖြစ်သည်။

မလေးရှားသို့ မြန်မာအလုပ်သမား စေလွှတ်ရာမှာ ဝန်ဆောင်ခစရိတ် တစ်ဦးကို လေယာဉ်လက်မှတ်ခတွေအပါအဝင် စုစုပေါင်း အမေရိကန်ဒေါ်လာ ၈၅၀ တရားဝင် သတ်မှတ်ထားကြောင်း သိရသည်။

#ymg/ppk #Local_News #မလေးရှား #မြန်မာလုပ်သား
#YMG #Yangon-Media-Group

#World_Military
Published 6 May 2023

ရုရှားဘက်မှ အဓိကကြေးစားတပ်ဖွဲ့ကြီးဟာ ယူကရိန်းအရှေ့ဘက်မြို့ဘက်ခ်မွတ်ကနေ ဆုတ်ခွာမယ့်အကြောင်း သောကြာနေ့က ကြေညာလိုက်ပါတယ်။

ဒါပေမဲ့ လာမယ့်အပတ် ရုရှားမှာ ဒုတိယကမ္ဘာစစ်အောင်ပွဲနေ့အထိမ်းအမှတ် မပြုလုပ်မီ ဘက်ခ်မွတ်ကိုသိမ်းပိုက်ရန် အဆိုပါတပ်ဖွဲ့က နေရာပြန်လည်အားဖြည့်ဆောင်ရွက်နေတာဖြစ်ကြောင်း ယူကရိန်းဘက်က ပြောကြားလိုက်ပါတယ်။

ဝက်ဂ်နာကြေးစားအဖွဲ့ခေါင်းဆောင် 'ယက်ဗ်ဂျနီပရီဂိုဇင်'က သူ့တပ်သားတွေဟာ လက်နက်ခဲယမ်းပြတ်လပ်နေပြီး လာမယ့်ဗုဒ္ဓဟူးနေ့မှာ ဘက်ခ်မွတ်မှာရှိတဲ့ သူတို့နေရာကို ရုရှားစစ်တပ်က လွှဲပြောင်းရယူပေးဖို့မျှော်မှန်းထားကာ ဒါဟာ ဘက်ခ်မွတ်ကို အပြီးသတ်သိမ်းပိုက်ရန်ကြံနေတဲ့ ရုရှားအတွက် အထိနာစေနိုင်ပါတယ်။

"ကျွန်တော့တပ်သားတွေအနေနဲ့ လက်နက်ခဲယမ်းမရှိဘဲနဲ့ အလဟဿသေဆုံးတာမျိုး အဖြစ်မခံနိုင်ပါဘူး" လို့ ပရီဂိုဇင်က ပြောကြားလိုက်ကာ သမ္မတပူတင်နဲ့ စစ်ဘက်ခေါင်းဆောင်များထံ တပ်ဆုတ်ခွာမယ့်အကြောင်း စာရေးသားလိုက်ပါတယ်။

မေလ ၉ ရက်နေ့မှာ မြို့ကိုသိမ်းပိုက်ဖို့ ဝက်ဂ်နာအဖွဲ့ရည်မှန်းထားတာကို သိလျက်နဲ့ အစိုးရအဖွဲ့က လကနက်ထောက်ပံ့မှုတွေကို အချိန်ဆွဲထားတယ်လို့ ကြေညာခဲ့ပါတယ်။

မနာလိုဖြစ်တာနဲ့ပဲ ရုရှားပြည်သူတွေအတွက် ဘက်ခ်မွတ်အောင်ပွဲ မယူချင်ဘူးဆိုရင်လည်း ယင်းတို့ကိစ္စပင်ဖြစ်ကြောင်း ပြောကြားခဲ့ပါတယ်။

ရုရှားပိုင် RIA သတင်းဌာနရဲ့ ဖော်ပြချက်အရ ရုရှားကာကွယ်ရေးဝန်ကြီး 'ဆာဂျီရှိုဂူ'က ဝက်ဂ်နာအဖွဲ့လိုအပ်တဲ့ လက်နက်အားလုံးကို သေချာပေါက်ရရှိစေရန် လက်ထောက်ဝန်ကြီးတစ်ဦးကို ညွှန်ကြားထားပါတယ်။

ယူကရိန်းရဲ့ဒွန်ဘတ်စ်ဒေသရှိ မြို့တွေကိုသိမ်းပိုက်ရန်အတွက် ရုရှားက ဘက်ခ်မွတ်မြို့ကို အရေးကြီးနေရာအဖြစ် သတ်မှတ်ထားပေမယ့် အခုထက်ထိ ထိန်းချုပ်ဖို့ဝေးကွာနေဆဲ ဖြစ်ပါတယ်။

ဘက်ခ်မွတ်တိုက်ပွဲဟာ အပြင်းထန်ဆုံးတိုက်ပွဲဖြစ်နေပြီး နှစ်ဖက်စလုံးမှ အကျအဆုံးထောင်ပေါင်းများစွာ ရှိထားပါတယ်။

Source: Reuters #World_Military #လက်နက်ထောက်ပံ့မှုမရ #ဘက်ခ်မွတ်မြို့မှဆုတ်ခွာ
#YMG #Yangon_Media_Group

#Local_News
Published_ 6 May 2023

ကုန်းလမ်းသွားလာရေးခက်ခဲသည့်ဒေသများသို့ လေကြောင်းနှင့် ရေကြောင်းလိုင်းများ တိုးချဲ့ပြေးဆွဲနိုင်ရေး ဆောင်ရွက်ရန်နစက ဥက္ကဌက မေလ ၅ ရက်က ပြုလုပ်သည့် နယ်စပ်ဒေသနှင့်တိုင်းရင်းသားလူမျိုးများ၏ ဖွံ့ဖြိုးတိုးတက်မှုအကောင်အထည်ဖော်ရေး ဗဟိုကော်မတီလုပ်ငန်းညှိနှိုင်းအစည်းအဝေးအတွင်း ပြောကြားခဲ့သည်။

ယင်းကနယ်စပ်ဒေသများတွင် ပညာရေးကဏ္ဍအားနည်းသည်ကိုတွေ့ရပြီး နယ်စပ်ဒေသနှင့် ကျေးလက်ဒေသများရှိကျောင်းများ အဆောက်အအုံနှင့် ဥပဓိရုပ်ကောင်းမွန်ရေး ဦးစားပေးဆောင်ရွက်ရန်နှင့် သင်ထောက်ကူပစ္စည်းများနှင့် ဝန်ထမ်းရေးရာပြည့်စုံရေးအတွက် ဖြည့်ဆည်းဆောင်ရွက်ပေးသွားရန်၊ ဆက်သွယ်မှုရရှိနိုင်ရေးဆောင်ရွက်ပေးရန်၊ တစ်နိုင်ငံလုံး ဆက်သွယ်ရေးလွှမ်းခြုံမှုရရေးလုပ်ဆောင်ရန်၊ ကုန်လမ်းသွားလာရေးခက်ခဲသည့် နေရာဒေသများသို့ လေကြောင်းလိုင်းနှင့် ရေကြောင်းလိုင်းများ တိုးချဲ့ပြေးဆွဲနိုင်ရေး ဆောင်ရွက်ပေးသွားရန် တို့ကို ပြောကြားခဲ့ကြောင်း နစက သတင်းထုတ်ပြန်ရေးအဖွဲ့က သိရသည်။

၎င်းအပြင် နယ်စပ်ဒေသနှင့် တိုင်းရင်းသားလူမျိုးများဖွံ့ဖြိုးရေးတက္ကသိုလ်နှင့် သင်တန်းကျောင်းမှ သင်တန်းသားများအား ကျေးလက်အုပ်ချုပ်ရေးနှင့်ဒေသဖွံ့ဖြိုးတိုးတက်ရေးလုပ်ငန်းများကို စနစ်တကျ လုပ်ကိုင်ဆောင်ရွက်နိုင်စေရေးလေ့ကျင့်ပျိုးထောင်ပေးမှသာ တိုင်းရင်းသားလူငယ်များသည် မိမိဒေသအကျိုးအတွက် အုပ်ချုပ်ရေးပိုင်းနှင့် ဒေသဖွံ့ဖြိုးရေးလုပ်ငန်းများတွင် ပါဝင်ဆောင်ရွက်နိုင်မည်ဖြစ်ကြောင်းလည်း ပြောကြားခဲ့သည်။

နစက တာဝန်ယူချိန်မှစ၍ နယ်စပ်ဒေသနှင့် တိုင်းရင်းသားလူမျိုးများ၏ ဖွံ့ဖြိုးတိုးတက်မှုအကောင်အထည်ဖော်ရေးဗဟိုကော်မတီ ကို အဖွဲ့ဝင် ၂၂ ဦး၊ လုပ်ငန်းကော်မတီကို အဖွဲ့ဝင် ၃၇ ဦးဖြင့် ပြင်ဆင်ဖွဲ့စည်းခဲ့ကာ နယ်စပ်ဒေသနှင့် တိုင်းရင်းသားလူမျိုးများ၏ ဖွံ့ဖြိုးတိုးတက်မှုအကောင်အထည်ဖော်ရေး ဗဟိုကော်မတီအနေဖြင့် လုပ်ငန်းတာဝန် ၆ ရပ်ကို အကောင်အထည်ဖော်နေခြင်း ဖြစ်ကြောင်း သိရသည်။

အခြေခံပညာအဆင့်တွင် ၂၀၂၂-၂၀၂၃ ဘဏ္ဍာရေးနှစ်အထိ နယ်စပ်ဒေသနှင့် တိုင်းရင်းသားလူငယ်များ ဖွံ့ဖြိုးရေး သင်တန်းကျောင်း ၄၇ ကျောင်း ဖွင့်လှစ်ပြီး ကျောင်းသား၊ ကျောင်းသူ ၃၃၀၀၇ ဦး ပညာသင်ကြားပေးနိုင်ခဲ့ကာ အဆင့်မြင့်ပညာကဏ္ဍတွင် ၂၀၂၂-၂၀၂၃ ဘဏ္ဍာရေးနှစ်အထိ ပြည်ထောင်စုတိုင်းရင်းသားလူမျိုးများ ဖွံ့ဖြိုးရေးတက္ကသိုလ်အနေဖြင့် ကျောင်းသား၊ ကျောင်းသူ ၁၄၀၅၈ ဦးတို့ကို မဟာပညာရေးဘွဲ့၊ မဟာဒဿနပညာရေးဘွဲ့၊ ပညာရေးဘွဲ့၊ ဆရာအတတ်ပညာဒီပလိုမာ၊ အလယ်တန်းဆရာအတတ်ပညာ၊ အထူးမူလတန်းဆရာ အတတ်ပညာ၊ မူလတန်းဆရာအတတ်ပညာများအား သင်ကြားလေ့ကျင့်မွေးထုတ်ပေးနိုင်ခဲ့ကြောင်း သိရသည်။

ပြည်ထောင်စု တိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ် ရန်ကုန်နဲ့ စစ်ကိုင်းတို့တွင်လည်း ကျောင်းသား၊ ကျောင်းသူ ၄၇၀၁ ဦးတိုကို ဝိဇ္ဇာဘွဲ့၊ သိပ္ပံဘွဲ့၊ AGTI ၊ B.Tech ဘွဲ့များရရှိအောင် သင်ကြားလေ့ကျင့်ပေးခဲ့ပြီး ဝန်ကြီးဌာန ၁၉ ခု၊ ပြည်ထောင်စုရာထူးဝန်အဖွဲ့နှင့် ပြည်နယ်နှင့်တိုင်းဒေသကြီး စည်ပင်သာယာရေးအဖွဲ့များတွင် နိုင်ငံ့ဝန်ထမ်းများအဖြစ် တာဝန်ထမ်းဆောင်လျက်ရှိနေပြီဖြစ်ကာ သက်မွေးပညာကဏ္ဍအနေဖြင့် ၂၀၂၂-၂၀၂၃ ဘဏ္ဍာရေးနှစ်အထိ နယ်စပ် ဒေသတိုင်းရင်းသားလူငယ်များ စက်မှုလက်မှုပညာသင်တန်းကျောင်း ၉ ကျောင်းဖွင့်လှစ်၍ သင်တန်းသား ၆၀၇၇ ဦးကို ဆောက်လုပ်ရေး၊ စက်ပြင်၊ လျှပ်စစ်၊ ဂဟေ၊ မော်တော်ယာဉ်စက်ပြင်၊ လက်ကိုင်ဖုန်းပြင်၊ အလူမီနီယံ၊ EFI အင်ဂျင်သင်တန်းများ ပိုချပေးနိုင်ခဲ့ပြီး အလုပ်အကိုင်ရရှိရေး ဆောင်ရွက်ပေးနိုင်ခဲ့ပါကြောင်း၊ ထို့ပြင်အမျိုးသမီးအိမ်တွင်းမှု သက်မွေးလုပ်ငန်းပညာသင်တန်းကျောင်း ၄၇ ကျောင်းမှာ သင်တန်းသူ ၉၅၀၂၂ ဦး သင်ကြားလေ့ကျင့်ပေးခဲ့ပြီး ပုဂ္ဂလိကအထည်ချုပ်စက်ရုံများနှင့် ကိုယ်ပိုင်လုပ်ငန်းများတွင် လုပ်ကိုင်ဆောင်ရွက်နေကြပြီဖြစ်ကြောင်းလည်း သိရသည်။

#ymg/pl #Local_News #လေကြောင်းနှင့် ရေကြောင်းလိုင်း #တိုးချဲ့ပြေးဆွဲ
#YMG #Yangon_Media_Group

#World_Health
Published 6 May 2023

အစားအစာဟာ လူတွေရဲ့နှလုံးကျန်းမာရေးအတွက် အဓိကအခန်းကဏ္ဍမှ ပါဝင်ပေမယ့် သတင်းမှားများကြောင့် လူမှုကွန်ရက်မီဒီယာတွေမှာ အငြင်းပွားစရာများဖြစ်လာကာ မသင့်လျော်တဲ့အစားအစာတွေကို ဦးတည်လာစေပါတယ်။

DASH စားသောက်ပုံစံဟာ နှလုံးကျန်းမာရေးအတွက် အကောင်းဆုံးဖြစ်ကြောင်း အမေရိကန်နှလုံးအဖွဲ့အစည်းက ဆိုပါတယ်။

မက်ဒီတာရေးနီးယန်း၊ DASH စားသောက်ပုံစံ၊ ငါးစားသုံးခြင်းနဲ့ သက်သက်လွတ်စားသုံးခြင်းတို့ဟာ နှလုံးကျန်းမာရေးနဲ့ကိုက်ညီတယ်လို့ ဖော်ပြထားပါတယ်။

မကြာသေးမီကာလတွေမှာ စားသောက်မှုပုံစံ များပြားလာပြီး လူမှုကွန်ရက်ပေါ်က သတင်းမှားတွေဟာ စိုးရိမ်စရာအခြေအနေရောက်နေတယ်လို့ ကယ်လီဖိုးနီးယား စတန်းဖို့ဒ်တက္ကသိုလ်မှ ပရော်ဖက်ဆာ'ခရစ္စတိုဖာဂါ့ဒ်နာ'က ဖော်ပြခဲ့ပါတယ်။

နှလုံးကျန်းမာရေးအတွက် သင့်လျော်တဲ့ စားစရာနဲ့ စားသောက်ပုံစံ ၁၀ မျိုးကို ဖော်ပြပေးလိုက်ပါတယ်။

- အသီးအနှံ ဟင်းသီးဟင်းရွက်အမျိုးမျိုး

- သန့်စင်ပြီးအစေ့အဆန်အစား အကြမ်းစားသုံးခြင်း

- သမားရိုးကျဆီထက် အပင်မှရသည့်ဆီများအသုံးပြုခြင်း

- အပင်၊ ပင်လယ်စာတို့မှရသည့် ကျန်းမာရေးပရိုတိန်းများစားသုံးခြင်း

- သကြားနဲ့ဆား အတတ်နိုင်ဆုံးလျှော့ချခြင်း

- အယ်လ်ကိုဟောကန့်သတ်လျှော့ချခြင်း

- အဆင့်ဆင့်ထုပ်ပိုးထားသောစားစရာများ လျှော့ချခြင်း

စားသောက်ပုံစံအမျိုးမျိုးကို ခွဲခြားလေ့လာခဲ့ရာမှာ DASH (သွေးတိုးရပ်တန်ပေးမည့်စားသောက်ပုံစံ)နည်းလမ်းက အကောင်းဆုံးဖြစ်နေပါတယ်။

DASH စားသောက်ပုံစံက ဆား၊ သကြား၊ ဆီ၊ အရက်၊ အဆင့်ဆင့်ထုပ်ပိုးစာများ နည်းပါးစွာပါဝင်ကာ ဟင်းသီးဟင်းရွက်၊ အသီးအနှံ၊ အစေ့အဆန်၊ ပဲများ မြင့်မားစွာပါဝင်ပါတယ်။

ဒါ့အပြင် ပိုတက်ဆီယမ်၊ ကယ်လ်စီယမ်၊ မဂ္ဂနီဆီယမ်တို့ကြွယ်ဝစွာပါဝင်ကာ သွေးပေါင်ချိန်ကိုထိန်းညှိစေပါတယ်။

Source: India Today #World_Health #DASH #နှလုံးကျန်းမာရေး #အသင့်လျော်ဆုံးအစားအစာ #YMG #Yangon_Media_Group