#Local_News
Published-5 January 2023

ပတ်စ်ပို့သက်တမ်းကုန်ဆုံးသည့် ထိုင်းနိုင်ငံရောက် မြန်မာနိုင်ငံသားများကို လာမည့် ဇန်နဝါရီ ၇ ရက်မှစတင်ပြီး ရက်ချိန်းတိုကင်ယူစနစ်ဖြင့် ထုတ်ပေးမည်ဖြစ်ကြောင်း ဘန်ကောက်ရှိ မြန်မာသံရုံးမှ အသိပေးထုတ်ပြန်ထားသည်။

အဆိုပါ ရက်ချိန်းတိုကင်ယူစနစ်ကို အပတ်စဉ် စနေနေ့တွင် နံနက် ၉ နာရီမှ ၁၂ နာရီအထိ ကိုယ်တိုင်လာရောက် ထုတ်ယူသည့်စနစ်ဖြင့် ထုတ်ပေးသွားမည်ဖြစ်ပြီး၊ ကိုယ်စားလှယ်များစေလွှတ်ခြင်း၊ နိုင်ငံကူးလက်မှတ် သက်တမ်းကျန်ရှိသူများကို ရက်ချိန်းတိုကင်များ ထုတ်ပေးမည်မဟုတ်ကြောင်း ဖော်ပြထားသည်။

ယင်းအပြင် ရက်ချိန်းတိုကင်များထုတ်ပေးရာတွင် ၂၀၂၂ ခုနှစ်အတွင်း သက်တမ်းကုန်ဆုံးသွားသည့် နိုင်ငံကူးလက်မှတ်များကိုသာ ပထမဦးစားပေး ထုတ်ပေးသွားမည်ဖြစ်ပြီး အဆိုပါ သက်တမ်းကုန်ဆုံးသူများ ပြီးစီးမှသာ နှစ်အလိုက် လအလိုက် သက်တမ်းကုန်သူများကို အစဉ်လိုက် ဆက်လက်ဆောင်ရွက်ပေးမည်ဖြစ်ကြောင်း သိရသည်။

သံရုံး၌ လက်ခံဆောင်ရွက်ပေးလျက်ရှိသည့် နိုင်ငံကူးလက်မှတ်အမျိုးအစားများမှာ ထိုင်းနိုင်ငံတွင် အလုပ်လုပ်ကိုင်နေသည့် မြန်မာနိုင်ငံသားများကိုင်ဆောင်သည့် PJ အမျိုးအစားနိုင်ငံကူးလက်မှတ်များ၊ ပြည်ပ၌ ပညာသင်ကြားလျက်ရှိသည့် မြန်မာနိုင်ငံသားကျောင်းသားများကိုင်ဆောင်သည့် PE အမျိုး အစားနိုင်ငံကူးလက်မှတ်များ၊ ပြည်ပ၌ ပညာသင်ကြားလျက်ရှိသည့် မြန်မာသံဃာတော်များကိုင်ဆောင်သည့် PR အမျိုးအစားနိုင်ငံကူး လက်မှတ်များ၊ထိုင်းနိုင်ငံတွင်မှီခိုဗီဇာဖြင့်နေထိုင်လျက်ရှိသည့် မြန်မာနိုင်ငံသားများကိုင်ဆောင်သည့် PT အမျိုးအစားနိုင်ငံကူးလက်မှတ်များ၊ မြန်မာနိုင်ငံသားသင်္ဘောသားများကိုင်ဆောင်သည့် PS အမျိုးအစားနိုင်ငံကူးလက်မှတ်များစသည်တို့ကို ဘန်ကောက်မြို့ရှိ မြန်မာသံရုံးအနေဖြင့် သံရုံး၌ကြိုတင်ရက်ချိန်း ရယူပြီးပါက ဖော်ပြပါနိုင်ငံကူးလက်မှတ်များ၏ သက်တမ်းတိုးလုပ်ငန်းများကိုနေ့ချင်းပြီး ဆောင်ရွက်ပေးနေခြင်းဖြစ်ကြောင်း သိရသည်။

#ymg/sth
#Yangon_Media_Group

#Local_News
Published-5 January 2023

၂၀၂၃ ခုနှစ် ယနေ့ ဇန်နဝါရီလ (၅) ရက်တွင် ၉၂ တစ်လီတာ ၂၀၀၀ အောက်သို ပြန်လည်ကျဆင်းလာကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

ဇန်နဝါရီလ (၄) ရက်နေ့တွင် စက်သုံးဆီဈေးနှုန်းမှာ ၉၂ တစ်လီတာ ၂၀၉၅ ကျပ်၊ ၉၅ တစ်လီတာ ၂၁၆၀ ကျပ်၊ ဒီဇယ်တစ်လီတာ ၂၃၆၀ ကျပ်နှင့် ပရီမီယံဒီဇယ်တစ်လီတာ ၂၄၄၀ ကျပ်ဖြစ်ပြီး ယနေ့တွင် ၉၂ တစ်လီတာ ၁၉၇၅ ကျပ်၊ ၉၅ တစ်လီတာ ၂၀၄၅ ကျပ်၊ ဒီဇယ်တစ်လီတာ ၂၂၂၅ ကျပ်နှင့် ပရီမီယံဒီဇယ်တစ်လီတာ ၂၃၀၅ ကျပ်အနည်းငယ်ကျဆင်းခဲ့ကြောင်းသိရသည်။

မြန်မာနိုင်ငံအနေဖြင့် နေ့စဉ်စက်သုံးဆီရည်ညွှန်းဈေးနှုန်းကို စင်ကာပူ (MOPS) ဈေးနှုန်းအပေါ် အခြေခံပြီး တွက်ချက်ခြင်း ဖြစ်သောကြောင့် (MOPS) ဈေးကျဆင်းလျှင် ပြည်တွင်းစက်သုံးဆီ ဈေးကျဆင်းပြီး (MOPS) ဈေးတက်လျှင် ပြည်တွင်းစက်သုံးဆီ ဈေးတက်ကြောင်း သိရသည်။

ရန်ကုန်၊ မန္တလေးအပါအဝင် နေပြည်တော်၊ တိုင်းဒေသကြီးနှင့်ပြည်နယ်များတွင် ရည်ညွှန်းလက်လီဈေးနှုန်းဖြင့် ရောင်းချပေးနေကြောင်း စက်သုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်မှုကော်မတီမှ သိရသည်။

#ymg/sth
#Yangon_Media_Group

#Local_News
Published_5 January 2023

တောင်ကိုရီးယားနိုင်ငံသို့ EPS စနစ်ဖြင့် မြန်မာလုပ်သား ၄၈ ဦးကို ယနေ့(ဇန်နဝါရီလ ၅ ရက်)တွင် စေလွှတ်ခဲ့ကြောင်း ဆိုလ်းမြို့၊ မြန်မာသံရုံးကထုတ်ပြန်ထားသည်။

အစိုးရပြည်ပအလုပ်အကိုင်အေဂျင်စီ EPS စနစ်ဖြင့် Re-entry ကုန်ထုတ်လုပ်သား ၄၅ ဦး၊ Re-entry စိုက်ပျိုး/မွေးမြူရေး လုပ်သား ၃ ဦးကို ၂၀၂၃ ခုနှစ်အတွက် ပထမဦးဆုံး စေလွှတ်ခဲ့ခြင်းဖြစ်ကြောင်း သိရသည်။

လက်ရှိတွင် မြန်မာလုပ်သား ၅၀,၀၀၀ နီးပါးတောင်ကိုရီးယားနိုင်ငံတွင်လုပ်ကိုင်နေကြောင်းလည်း သိရသည်။ တောင်ကိုရီးယားအစိုးရမှ ကိုဗစ်ကာလအလွန်တွင် မြန်မာအလုပ်သမားများကို တရားဝင်ပြန်လည်လက်ခံနေပြီး သြဂုတ်လတွင် ၁၂၉၃ ဦး၊ စက်တင်ဘာလတွင် ၉၇၈ ဦး၊ အောက်တိုဘာလတွင် ၁၁၆၉ ဦး၊ နိုဝင်ဘာလတွင် ၇၂၈ ဦး၊ ဒီဇင်ဘာလတွင် ၅၉၉ ဦးစေလွှတ်ခဲ့ပြီးဖြစ်ကြောင်း သိရသည်။

ကိုဗစ်ကာလအလွန်နောက်ပိုင်းတွင် ပြည်ပသိုသွားရောက်လုပ်ကိုင်သူများပြားလာပြီး ထိုင်းနိုင်ငံသိုသွားရောက်သူဦးရေမှာ အများဆုံးဖြစ်ပြီး တရားမဝင်သွားရောက်သူမှာ အများဆုံးဖြစ်ကြောင်း သိရသည်။

#ymg/sth
#Yangon_Media_Group

#Local_News
Published_ 5 January 2023

စစ်ကိုင်းတိုင်းဒေသကြီး၊ အင်းတော်မြို့အနီး တွင်အင်အား(၄.၇)ရစ်တာစကေးအဆင့်ရှိ ငလျင်ထပ်လှုပ်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန မြေငလျင်ဌာနခွဲမှ သိရသည်၊၊

၂၀၂၂ခုနှစ်အတွင်း စစ်ကိုင်းတိုင်းတွင်မြေငလျင်အများဆုံးလှုပ်ခတ်ခဲ့ပြီး ယခု၂၀၂၃တွင်လည်း စစ်ကိုင်းတိုင်းတွင် မြေငလျင်လှုပ်ခတ်မှုများရှိလာခြင်းဖြစ်သည်၊၊

ငလျင်နှင့်ပတ်သက်၍ ထုတ်ပြန်ချက်တွင် ၂၀၂၃ ခုနှစ်၊ ဇန်နဝါရီလ (၅) ရက်နေ့၊ မြန်မာစံတော်ချိန် (၁၂)နာရီ၊ (၂၁)မိနစ်၊ (၂၅)စက္ကန့် အချိန်တွင် ကသာမြေငလျင်စခန်းမှ အနောက်မြောက်ဘက် (၁၈)မိုင် ခန့်အကွာ၊ မြန်မာနိုင်ငံပြည်တွင်း (အင်းတော်မြို့၏ မြောက်-အနောက်မြောက်ဘက် (၈)မိုင်ခန့်အကွာ)၊ မြောက်လတ္တီတွဒ် (၂၄.၃၃) ဒီဂရီ၊ အရှေ့လောင်ဂျီတွဒ် (၉၆.၀၉) ဒီဂရီ၊ အနက် (၁၀)ကီလိုမီတာကို ဗဟိုပြု၍ အင်အားရစ်(ခ်)တာစကေး (၄.၇) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားကြောင်း တိုင်းထွာရရှိကြောင်းဖော်ပြထားသည်၊၊

၂၀၂၃ ခုနှစ်၊ ဇန်နဝါရီလ (၃)ရက်နေ့ကလည်း ရခိုင်ပြည်နယ် (အမ်းမြို့၏ တောင်-အရှေ့တောင်ဘက် (၁၇)မိုင်ခန့်အကွာ)၊ မြောက်လတ္တီတွဒ် (၁၉.၅၅) ဒီဂရီ၊ အရှေ့လောင်ဂျီတွဒ် (၉၄.၁၃)ဒီဂရီ၊ အနက် (၄၃)ကီလိုမီတာကို ဗဟိုပြု၍ အင်အားရစ်(ခ်)တာစကေး (၃.၇)အဆင့်ရှိ မြေငလျင်တစ်ခု လှုပ်ရှားခဲ့ကြောင်းလည်း သိရသည်၊၊

#ymg/tthl
#Yangon_Media_Group

#Local_News
Published_ 5 January 2023

အင်းစိန်မြို့နယ်၊ ဖော့ကန်ရပ်ကွက်ရှိ ဈေးဝယ်စင်တာ Mart တစ်ခုတွင်ဈေးဝယ်နေစဉ်မူးမေ့လဲကျ၍ ဦးခေါင်းဒဏ်ရာရရှိခဲ့သည့်အမျိုးသမီး(၁)ဦးအား မြန်မာနိုင်ငံကြက်ခြေနီအသင်းမှ အင်းစိန်မြို့နယ်၊ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်၊၊

ဇန်နဝါရီလ (၃)ရက်နေ့ညနေပိုင်းက ရန်ကုန်တိုင်းဒေသကြီး၊ အင်းစိန်မြို့နယ်၊ ဖော့ကန်ရပ်ကွက်ရှိ Mart တစ်ခုတွင်ဈေးဝယ်နေစဉ်မူးမေ့လဲကျ၍ ဦးခေါင်းဒဏ်ရာရရှိခဲ့ခြင်းဖြစ်သည်၊၊

အဆိုပါ အမျိုးသမီးအား အင်းစိန်မြို့နယ်ကြက်ခြေနီ အသင်းခွဲမှ ကြက်ခြေနီစေတနာလုပ်အားရှင်များက ဦးခေါင်းဒဏ်ရာရှေးဦးပြုစုနည်းအတိုင်း ရှေးဦးပြုစုဆောင်ရွက်ပေးပြီး အင်းစိန်မြို့နယ်ပြည်သူ့ဆေးရုံသို့ အသင်းခွဲပိုင်လူနာတင်ယာဉ်ဖြင့် ပို့ဆောင်ကူညီပေးခဲ့ကြောင်း သိရသည်၊၊

ကြက်ခြေနီစေတနာလုပ်အားရှင်များ အနေဖြင့် ထိခိုက်ဒဏ်ရာရသူ၊ အရေးပေါ်နဲ့ သာမန်အခြေအနေတွေမှာဆေးရုံသို့ အချိန်မီပို့ဆောင်ပေးရမည့်သူများကို ရှေးဦးပြုစုခြင်းနှင့်အရေးပေါ်လူနာတင်ယာဉ် ပို့ဆောင်ခြင်းများကို နေ့စဉ်ကူညီဆောင်ရွက်ပေးလျက်ရှိကြောင်းလည်း အင်းစိန်မြို့နယ်ကြက်ခြေနီအသင်းခွဲမှ ထုတ်ပြန်ထားသည်၊၊

#ymg/tthl
#Yangon_Media_Group

#Local_News
Published_ 5 January 2022

မြန်မာ-တရုတ်နှစ်နိုင်ငံ နယ်စပ်ဂိတ်လမ်းကြောင်း သုံးခုကို ဇန်နဝါရီ ၈ ရက်တွင် ပြန်လည်ဖွင့်လှစ်ပေးသွားမှာဖြစ်ကြောင်း ဒီဇင်ဘာ ၅ ရက်တွင် တရုတ်သံရုံးကထုတ်ပြန် ကြေညာထားပါတယ်။

စီးပွားရေးနှင့် ကုန်သွယ်ရေးဆက်ဆံမှု၊ ပြည်သူလူနေမှုဘဝ အကျိုးစီးပွားများကို ပိုမိုကောင်းမွန်စွာ ဝန်ဆောင်မှုပေးနိုင်ရန်၊ မြန်မာ-တရုတ် နှစ်နိုင်ငံနယ်စပ်ဒေသ ချစ်ကြည်ရင်းနှီးစွာ ကူးလူးဆက်ဆံ ပူးပေါင်းဆောင်ရွက်မှုကို မြှင့်တင်ရန်အတွက် တရုတ်နိုင်ငံက ဇန်နဝါရီ ၈ ရက်နေ့မှစ၍ တရုတ်-မြန်မာ နယ်စပ်ဂိတ်လမ်းကြောင်း ဖြစ်တဲ့ ရွှေလီနယ်စပ်ဂိတ် ကျယ်ဂေါင်နန်းတော်ဂိတ်၊ ကုန်ပစ္စည်းစခန်း၊ တရုတ်-မြန်မာဈေးစတဲ့ လမ်းကြောင်းသုံးခု၌ လူ၊ ကုန်ပစ္စည်း ဖြတ်သန်းသွားလာမှုကို ပြန်လည်ဖွင့်လှစ်မှာ ဖြစ်တယ်လို့ ဆိုပါတယ်။

ပြည်ဝင်ပြည်ထွက်တဲ့ ကုန်ပစ္စည်းယာဉ်များနှင့် မောင်းနှင်သူများဟာ ကုန်ပစ္စည်း စခန်းလမ်းကြောင်းမှ ဝင်ထွက်ရမှာဖြစ်ပြီး ပေကျင်းစံတော်ချိန် ၈ နာရီမှ ၂၃ နာရီ (ည ၁၁) အထိဖြစ်ပါတယ်။

အစိုးရဝန်ထမ်းနှင့် အတူလိုက်ပါတဲ့ ယာဉ်များသည် နန်းတော်ဂိတ်လမ်းကြောင်းမှ ဝင်ထွက်ရမည်ဖြစ်ပြီး ပေကျင်းစံတော်ချိန် ၈:၀၀ နာရီမှ -၂၁:၃၀ နာရီအထိ ဖြစ်ပါတယ်။

အခြားလူပုဂ္ဂိုလ်နဲ့ အသေးစားအိမ်စီးကား၊ နှစ်ဘီးဆိုင်ကယ်၊ အီလက်ထရောနစ် ဆိုင်ကယ်များမှာ တရုတ်-မြန်မာဈေးလမ်းကြောင်းမှ ဝင်ထွက်ရမှာဖြစ်ပြီး ပေကျင်း စံတော်ချိန် နံနက် ၈:၀၀ နာရီမှ -၂၁:၃၀ နာရီအထိဖြစ်ကြောင်း ထုတ်ပြန်ချက်မှာ ဖော်ပြထားပါတယ်။

လက်ရှိတွင် တရုတ်နိုင်ငံရွှေလီနယ်စပ်ဂိတ် စီမံအုပ်ချုပ်သည့်ဌာနက နှစ်ဦးနှစ်ဖက် လူပုဂ္ဂိုလ်သွားလာမှု၊ ကုန်ပစ္စည်းဖြတ်သန်းမှု ပြန်လည်ဖွင့်လှစ်ရန်အတွက်ပြင်ဆင်မှုများ ဆောင်ရွက်နေတယ်လို ဖော်ပြထားပါတယ်။

#ygm_mnn
#Yangon_Media_Group

#World_Business
Published 5 January 2023

တွစ်တာပိုင်ရှင်'အီလွန်မက်စ်'က ကုန်ကျစရိတ်‌တွေကို အကြီးအကျယ်လျှော့ချပစ်နေတာကြောင့် တွစ်တာဝန်ထမ်းအချို့ဆိုရင် အိမ်သာသုံးတစ်ရှူးစက္ကူတွေကို ကိုယ့်ဘာသာယူလာကြရပါတယ်။

ဒီဇင်ဘာ ၂၉ ရက်နေ့မှာ New York Times ဖော်ပြချက်အရ တွစ်တာဟာ ရုံးနေရာငှားရမ်းခ‌အတွက် ဒေါ်လာသန်းချီပေးနေရတာကိုလည်း ရပ်တန့်လိုက်ပြီလို့ သိရပါတယ်။

ဆီအာတယ်ရုံးနေရာ ငှားရမ်းခကို ဆက်မပေးတော့တာကြောင့် နှင်ထုတ်ခံရမယ့်အခြေအနေဖြစ်လာပါတယ်။

ဂိတ်စောင့်နဲ့လုံခြုံရေးဝန်ထမ်းများကို လျှော့ချခဲ့ကာ ဝန်ထမ်းတွေဟာ ကိုယ့်အိမ်သာသုံးစက္ကူနဲ့ကိုယ် ယူလာကြရပါတယ်။

ဝန်ထမ်းတွေက လစာပိုပေးဖို့ သပိတ်မှောက်ခဲ့ပြီးနောက် ဆန်ဖရန်ဆစ္စကိုရုံးချုပ်မှာ ဂိတ်စောင့်အလုပ်တာဝန်တွေကို ဒီဇင်ဘာလက ရပ်ဆိုင်းခဲ့ပါတယ်။

ဂိတ်စောင့်များမရှိတာကြောင့် ရုံးချုပ်မှာ ဖရိုဖရဲဖြစ်ကုန်ကြပါတယ်။
သန့်စင်ခန်းများညစ်ပတ်ပြီး အနံ့အသက်များထွက်နေကြောင်း ဖော်ပြထားပါတယ်။

ရုံးအဆောက်အအုံရဲ့ အလွှာ ၄ လွှာကိုပိတ်လိုက်ကာ ဝန်ထမ်းတွေဟာ အလွှာ ၂ လွှာမှာပဲ အလုပ်လုပ်ကြရပါတယ်။

ငွေကြေးတည်ငြိမ်အောင်ထိန်းသိမ်းရာမှာ အရေးပါတဲ့ ဆေခရက်မင်တိုရှိ ဒေတာစင်တာကို ဒီဇင်ဘာလက ပိတ်ပစ်ခဲ့ပါတယ်။

ဆေခရက်မင်တိုမှ စင်တာသာလည်ပတ်နေရင် အခြားဒေတာစင်တာများ အလုပ်မလုပ်သည့်တိုင်အောင် ကွန်ပျူတာအလုပ်များကို ထောက်ပံ့ပေးနိုင်မှာဖြစ်ပြီး ပြဿနာတွေဖြေရှင်းနိုင်မှာဖြစ်ကြောင်း ကုမ္ပဏီအတွင်းပိုင်းနဲ့ကျွမ်းဝင်သူ ၃ ဦးက ပြောပြသွားပါတယ်။

တွစ်တာမှာ အရင်ကဝန်ထမ်း ၇,၈၀၀ ရှိရာကနေ လက်ရှိ ၂,၀၀၀ ခန့်သာရှိပါတော့တယ်။
ဝန်ထမ်း‌နဲ့ ကုန်ကျစရိတ်တွေ လျှော့ချလိုက်တာကြောင့် ဒေါ်လာ ၃ ဘီလီယံလောက် သက်သာသွားတယ်လို့ 'အီလွန်မက်စ်'က ပြောခဲ့ပါတယ်။

လုပ်ငန်းက ဟိုးအောက်ကို အရှိန်နဲ့ထိုးကျနေပြီး ထိန်းလို့သိမ်းလို့မရတော့ကြောင်း၊ တွစ်တာကနေ ဝင်ငွေ ၃ ဘီလီယံနဲ့ ငွေသားနဲ့တင် ၁ ဘီလီယံဝင်နိုင်တဲ့ အခြေအနေရှိကြောင်း ပြောကြားသွားပါတယ်။

Source: WION
#Yangon_Media_Group

#Local_News
Published_5 January 2023

မြို့တော်အင်္ဂါရပ်နှင့် မညီညွတ်သည့်အတွက် မြို့တွင်းပြေးဆွဲနေသည့် YBS ယာဉ်လိုင်းများရှိ စီးပွားရေးကြော်ငြာများကို ဖယ်ရှားရှင်းလင်းပြီးဖြစ်ကြောင်း YRTC မှ တွဲဖက်အတွင်းရေးမှူး ဦးလျန်ကျင့်မာန်က ပြောသည်။

အဆိုပါကြော်ငြာစတေကာများကို ဖယ်ရှားရန်အတွက် တိုင်းဒေသကြီးအစိုးရအဖွဲ့မှ ညွှန်ကြားထားခြင်းဖြစ်ကြောင်း သိရသည်။ ယခင်က ကုန်လမ်းပို့ဆောင်ရေးညွှန်ကြားမှု ဦးစီးဌာနမှ ကြော်ငြာခယူ၍ YBS ယာဉ်များတွင် ကြော်ငြာစတေကာများ ကပ်ခွင့်ပေးခဲ့ခြင်းဖြစ်ကြောင်း သိရသည်။

YBS ယာဉ်ပေါ်ရှိ စီးပွားရေးကြော်ငြာစတေကာများကိုသာ ဖယ်ရှားခြင်းဖြစ်ပြီး မှတ်တိုင်လမ်းညွှန် စတေကာနှင့် ကိုဗစ်ကာကွယ်ရေးအသိပေး စတေကာတွေကို ဆက်လက်ကပ်ခွင့်ပြုထားကြောင်း သိရသည်။

လက်ရှိတွင်လည်း YBS စီးခရီးသည်တွေအနေဖြင့် ယာဉ်ပေါ်တွင်လုံခြုံမှုရှိစေရန်အတွက် ယာဉ်လိုင်းများတွင် အရေးပေါ်အကြောင်းကြားနိုင်သည့် Telematics စနစ်ကို တပ်ဆင်ထားကြောင်းသိရသည်။ ယာဉ်ပေါ်တွင် အရေးပေါ်တစ်ခုခုဖြစ်ခဲ့ပါက ယာဉ်မောင်းမှ ခလုတ်နှိပ်လိုက်ခြင်းနှင့်တပြိုင်နက် Control Center မှ သိရှိနိုင်ပြီဖြစ်ကြောင်းလည်းသိရသည်။

ရန်ကုန်မြို့တွင်း နေ့စဉ်ယာဉ်လိုင်းပေါင်း ၁၁၆ လိုင်း၊ ယာဉ်အစီးရေ ၃၂၅၀ ပုံမှန်ပြေးဆွဲပေးနေပြီး ခရီးသည် ၁ ဒသမ ၄ သန်းဝန်းကျင်ကို ဝန်ဆောင်မှုပေးနေခြင်းဖြစ်ကြောင်း သိရသည်။

#ymg/sth
#Yangon_Media_Group

#World_Science
Published 5 January 2023

လူ့ဆံပင်တွေက ပတ်ဝန်းကျင်ရှိညစ်ညမ်းမှုန်များကို စုပ်ယူနိုင်စွမ်းရှိကြောင်း ဘယ်လ်ဂျီယံအခြေစိုက် NGO အဖွဲ့အစည်းတစ်ခုက ဆိုပါတယ်။

ထိုအဖွဲ့အစည်းမှဦးဆောင်ပြီး Dung Dung လို့အမည်ပေးထားတဲ့ ဆံပင်ပြန်လည်အသုံးချရေးစီမံကိန်းဟာ စွန့်ပစ်ပစ္စည်းများပြန်လည်သုံးစွဲရေးနည်းဗျူဟာ ဖော်ထုတ်ခြင်းနဲ့ စီးပွားရေးမှာ မည်ကဲ့သို့အသုံးချနိုင်မလဲဆိုတဲ့ နည်းဗျူဟာတွေအတွက် ရည်ရွယ်ပါတယ်။

လူ့ဆံပင်တစ်ကီလိုဂရမ်ဟာ အဆီနဲ့ ဟိုက်ဒရိုကာဗွန် ၇ လီတာကနေ ၈ လီတာအထိ စုပ်ယူနိုင်ကြောင်း တွေ့ရှိထားပါတယ်။

သိပ္ပံပညာရှင်များရဲ့အဆိုအရ လေထုညစ်ညမ်းမှုကိုဖြစ်စေတဲ့ အဆီနဲ့ ဟိုက်ဒရိုကာဗွန်တို့ကို စုပ်ယူနိုင်တဲ့အပြင် ရေထုညစ်ညမ်းခြင်းနဲ့ ဆီယိုဖိတ်ခြင်းတို့မှာပါ အသုံးပြုနိုင်ပါတယ်။

ထိုစီမံကိန်းပူးတွဲတည်ထောင်သူ 'ပက်ထရစ်ယန်ဆန်'က သူတို့ထုတ်ကုန်ပစ္စည်းတွေဟာ စံချိန်စံနှုန်းမီကြောင်း၊ တခြားကမ္ဘာဂြိုဟ်တွေက လာတာမဟုတ်ကြောင်း ရှင်းပြပါတယ်။

လေ့လာချက်အရ လူသားဆံပင်ဟာ နိုက်ထရိုဂျင်ကြွယ်ဝပြီး ဓာတ်မြေဩဇာအဖြစ် အသုံးပြုနိုင်ပါတယ်။

ဆံပင်တွေကို လှူဒါန်းရာကနေပဲ ရရှိတာကြောင့် အကန့်အသတ်နဲ့သာရရှိနေပေမယ့် ကမ္ဘာတဝှမ်းမှ ကုမ္ပဏီတွေကတော့ အသုံးဝင်ပုံအမျိုးမျိုးကို စမ်းသပ်နေကြပါတယ်။

ဆံခြည်တစ်မျှင်က သူ့အလေးချိန်ရဲ့အဆ ၁၀ သန်းမျှ အလေးချိန်ကို စုပ်ယူထားနိုင်ကြောင်း၊ အဆီနဲ့ ဟိုက်ဒရိုကာဗွန်တို့ကို စုပ်ယူနိုင်ရုံမက ကီရာတင်အမျှင်ဓာတ်ပါဝင်တာကြောင့် ရေမှာပျော်ဝင်ပြီး ကျုံ့နိုင်ဆန့်နိုင်ကြောင်း တရားဝင်ဝက်ဘ်ဆိုက်မှာ ဖော်ပြထားပါတယ်။

Source: WION
#Yangon_Media_Group

#Local_News
Published_ 5 January 2023

၂၀၂၃ ခုနှစ် အတွက် ရန်ကုန်ပြည်သူ့ဆေးရုံကြီး အထူးကုပြင်ပလူနာဌာနတွင် လူနာများပြသနိုင်ရန်အချိန်ဇယားအသစ်ထုတ်ပြန်လိုက်ကြောင်းသိရသည်၊၊

အဆိုပါအချိန်ဇယားအသစ်တွင် ရန်ကုန်ပြည်သူ့ဆေးရုံကြီး အထူးကုပြင်ပလူနာဌာနအချိန်ဇယား(၁)၊(၂)ဆိုပြီး နှစ်မျိုးထုတ်ပြန်ထားသည်၊၊

ရန်ကုန်ပြည်သူ့ဆေးရုံကြီး အထူးကုပြင်ပလူနာဌာနအချိန်ဇယား (၁)တွင် တနင်္လာနေ့မှသောကြာနေ့အထိ နေ့အလိုက်ကုသနိုင်မည့်ဝေဒနာရှင်များကိုဖော်ပြထားပြီး တနင်္လာနေ့တွင်ခွဲစိတ်ဆောင်(၁)၊ ဆေးကုသဆောင်(၁)၊ အစာအိမ်နှင့်အူလမ်းကြောင်းဌာန၊ နှလုံးဆေးကုသဌာန၊ သွေးရောဂါဌာနပြသနေသူများ မနက်(၈)နာရီမှ(၁၂)နာရီအတွင်းပြသနိုင်ပြီး နေ့လည်(၁)နာရီမှ(၃)နာရီအထိ နှလုံးသွေးကြောခွဲစိတ်ကုဌာန၊ မှတ်ဉာဏ်လျော့ပြင်ပဌာနစသည်ဖြင့် ပြသနိုင်မည်ဖြစ်သည်၊၊

ကျန်နေ့ရက်များတွင်လည်းကုသနိုင်မည့် ဌာနနှင့် သတ်မှတ်အချိန်များကို ရန်ကုန်ပြည်သူ့ဆေးရုံကြီး၏ Yangon General Hospital Page တွင် အသေးစိတ်ဖော်ပြထားသည်၊၊

ယင်းအပြင် သက်ဆိုင်ရာလူနာဆောင်များတွင်သွားရောက်ပြသရမည့် ရန်ကုန်ပြည်သူ့ဆေးရုံကြီး အထူးကုပြင်ပလူနာဌာနအချိန်ဇယား (၂)တွင်လည်း ဦးနှောက်နှင့်အာရုံကြောခွဲစိတ်ကုသဌာန၊ ကင်ဆာရောဂါဓာတ်ရောင်ခြည်ကုသဌာန၊ ကင်ဆာရောဂါဆေးသွင်းကုသဌာန၊အကြောအဆစ်ရောဂါဌာန၊ သွား၊ အရေပြား၊ အဏုမြူရောင်ခြည်စသည့်ဌာနများတွင့် နေ့အလိုက်အချိန်အလိုက်ကုသနိုင်မည့် အချိန်ဇယားများကို ဖော်ပြထားကြောင်း သိရသည်၊၊

#ymg/tthl
#Yangon_Media_Group

#World_Health
Published 5 January 2023

နှစ်ပေါင်းများစွာ ရေဓာတ်ထိန်းသိမ်းပြီးနေလာတဲ့သူတွေဟာ နာတာရှည်ရောဂါဖြစ်နိုင်ချေ အလွန်နည်းကြောင်း အမေရိကန်အစိုးရထောက်ပံ့ပေးတဲ့ လေ့လာချက်တစ်ခုမှာ ဖော်ပြခဲ့ပါတယ်။

တစ်နေ့ကို ရေ ၈ ခွက်သောက်ခြင်းဖြင့် အကျိုးကျေးဇူးများရစေပြီး အိုမင်းရင့်ရော်ခြင်းကို လျော့စေနိုင်ကြောင်း သုတေသီများက အကြံပြုထားပါတယ်။

ရေသောက်နည်းတဲ့အခါ ခန္ဓာကိုယ်ထဲမှာ ဆိုဒီယမ်များလာပြီး နှလုံးဖောက်ခြင်း၊ လေဖြတ်ခြင်းတို့ကဲ့သို့ နာတာရှည်ရောဂါများ ဖြစ်ပေါ်နိုင်ပါတယ်။

အရင်ကလေ့လာမှုမှာလည်း ရေဓာတ်ထိန်းသိမ်းခြင်းဖြင့် သက်တမ်း ၁၅ နှစ်မျှ အသက်ပိုရှည်စေနိုင်ကြောင်း တွေ့ရှိခဲ့ဖူးပါတယ်။

ရေဓာတ်နည်းခြင်းဖြင့် ဒီအင်န်အေထိခိုက်ရောင်ရမ်းခြင်း၊ အိုမင်းရင့်ရော်မြန်ခြင်းတို့ ဖြစ်ပေါ်နိုင်ပါတယ်။

ရေကိုလိုအပ်တဲ့ပမာဏအထိ တိုးမြှင့်သောက်သုံးနိုင်ကာ ဖျော်ရည်၊ အသီးအနှံတို့ကနေလည်း ရေဓာတ်ရရှိစေပါတယ်။

အိုမင်းရင့်ရော်ခြင်းကို ကာကွယ်ဖို့အတွက် လိုအပ်တဲ့ရေပမာဏကိုတော့ အတိအကျ မပြောထားပါဘူး။

အမေရိကန်ကျန်းမာရေးညွှန်ကြားချက်အရတော့ တစ်နေ့ကို ရေ ၃ လီတာသောက်သုံးသင့်တယ်လို့ မှာကြားထားပါတယ်။

ရေဓာတ်ခန်းခြောက်ခြင်းဖြစ်တဲ့အခါ ရေတိုပြဿနာတွေအနေနဲ့ မူးဝေခြင်း၊ ပင်ပန်းခြင်း၊ ခေါင်းကိုက်ခြင်းတို့ဖြစ်ပေါ်နိုင်ပြီး ရေရှည်မှာ ဝမ်းချုပ်ခြင်း၊ ကျောက်ကပ်ကျောက်တည်ခြင်း၊ အရေပြားခြောက်သွေ့ခြင်းတို့ ဖြစ်ပေါ်နိုင်ပါတယ်။

သွေးပမာဏလျော့နည်းပြီး သွေးပေါင်ချိန်ရုတ်တရက်ထိုးကျတဲ့အခါ အောက်ဆီဂျင်ပြတ်ပြီး သတိလစ်သွားနိုင်ပါတယ်။

ဒါပေမဲ့ ရေသောက်များလွန်းရင်လည်း အန္တရာယ်ရှိနိုင်ပြီး ဆဲလ်တွေမှာ ရေဖောင်းကားလာနိုင်ပါတယ်။

ကွန်ဖူးမင်းသားကြီး'ဘရုစ်လီ'ဟာ ထိုအခြေအနေမျိုးကြောင့် သေဆုံးခဲ့တာဖြစ်နိုင်တယ်လို့ ယူဆနေကြပါတယ်။

ရေသောက်နည်းပြီး သွေးထဲမှာဆိုဒီယမ်များလာပါက ဇီဝဖြစ်ပျက်မှုမြန်ဆန်လာနိုင်ချေရှိတယ်လို့ တွေ့ရှိထားပြီး နှလုံးဖောက်ခြင်း၊ လေဖြတ်ခြင်း၊ နှလုံးသွေးကြောကျဉ်းခြင်း၊ အဆုတ်ရောဂါ၊ ဆီးချို၊ မှတ်ဉာဏ်ချို့တဲ့ခြင်းတို့ ဖြစ်ပေါ်နိုင်ပါတယ်။

Source: Daily Mail
#Yangon_Media_Group

Published 4 JKanuary 2023

(၇၅)နှစ်မြောက် စိန်ရတုလွတ်လပ်ရေးနေ့အထိမ်းအမှတ် ဂုဏ်ပြုညစာစားပွဲနှင့် ဂုဏ်ပြုဖျော်ဖြေပွဲ အခမ်းအနားကို ယနေ့ညနေပိုင်းတွင် နေပြည်တော်ရှိ နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌရုံး ဥပစာမြက်ခင်းပြင်၌ ကျင်းပခဲ့ပါတယ်။

ဂုဏ်ပြညစာစားပွဲသို့ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်နှင့်ဇနီးဒေါ်ကြူကြူလှ၊ ဒုတိယဥက္ကဋ္ဌ ဒုတိယဗိုလ်ချူပ်မှူးကြီးစိုးဝင်းနှင့်ဇနီးဒေါ်သန်းသန်းနွယ်၊နစကအဖွဲ့ဝင်တွေ၊  ဒုတိယသမ္မတ(ငြိမ်း) တွေဖြစ်ကြတဲ့ ဒေါက်တာစိုင်းမောက်ခမ်းနှင့် ဦးဉာဏ်ထွန်း၊နိုင်ငံတော်အကြီးအကဲဟောင်းများရဲ့  မိသားစုဝင်များ၊ ပြည်ထောင်စုအဆင့်ပုဂ္ဂိုလ်တွေ၊  အငြိမ်းစားဗိုလ်ချုပ်ကြီးနှင့် ဒုတိယဗိုလ်ချုပ်ကြီးတွေ၊ ပြည်ထောင်စုဝန်ကြီးများနှင့် ဇနီးများ၊ တိုင်းဒေသကြီးနှင့် ပြည်နယ်ဝန်ကြီးချုပ်တွေ၊ တပ်မတော် အရာရှိကြီးတွေ၊ တိုင်းမှူးတွေ၊ နိုင်ငံခြားသံရုံးများမှ သံအမတ်ကြီးများ နှင့်သံရုံးတာဝန်ခံတွေ၊ ဂုဏ်ထူးဆောင်ကောင် စစ်ဝင်တွေ၊ စိန်ရတုလွတ်လပ်ရေးနေ့ အထိမ်းအမှတ်ဂုဏ်ထူးဆောင်ဘွဲ့ရရှိကြသူတွေးNCA စာချုပ်လက်မှတ်ရေးထိုးထားသည့် တိုင်းရင်းသားလက်နက်ကိုင် အဖွဲ့အစည်း များမှ ကိုယ်စားလှယ်တွေနှင့် NCA စာချုပ် လက်မှတ်ရေးထိုးထားခြင်းမရှိသေးသည့် တိုင်းရင်းသားလက်ကိုင်အဖွဲ့ အစည်းများမှ ကိုယ်စားလှယ်တွေ၊ နိုင်ငံရေးပါတီများမှဥက္ကဋ္ဌများနှင့် ကိုယ်စားလှယ်တွေနှင့် ် အထူးဖိတ်ကြား ထားသည့် ဧည့်သည်တော်တွေ တက်ရောက်ခဲ့ကြတယ်လို့ နစကရဲ့သတင်းထုတ်ပြန်ချက်အရသိရပါတယ်။

ညစာစားပွဲကျင်းပနေစဉ်အတွင်းမှာ ဆုရရှိခဲ့ကြတဲ့ ဂုဏ်ပြုယာဉ်တွေနှင့် လေထီးခုန်ဂုဏ်ပြုခဲ့ကြသူတွေဟာ ဆုတွေ လက်ခံရယူခဲ့ကြပါတယ်။

အဲဒီနောက် ဂုဏ်ပြညစာစားပွဲအပြီးမှာ ဗိုလ်ချူပ်မှူးကြီးနှင့်တက်ရောက်လာသူတွေဟာ လွတ်လပ်ရေးနေ့ဂုဏ်ပြု ပဒေသာကပွဲကို ဆက်လက်ကြည့်ရှုခဲ့ကြတယ်လို့ သတင်းထုတ်ပြန်ချက်မှာဖော်ပြထားပါတယ်။

-ymg/knl