#Local_News
Published_ 16 February 2023

ဖေဖော်ဝါရီလ ၁၆ ရက်နေ့ မနက်ပိုင်းမှာ ကမ္ဘာ့ရွှေဈေး တစ်အောင်စကို ၁၈၈၃ ဒေါ်နဲ့ဈေးဖွင့်လာပြီး ဈေးပြန်ကျလာပါတယ်။ ပြည်တွင်းဈေးကွက်ပြင်ပပေါက်ဈေးကတော့ ၂၈ သိန်း ၅ သောင်းကျော်ပေါက်ဈေးရှိနေပြီး ဈေးနှုန်းအကျဘက်မှာရှိနေတယ်လို့ ရန်ကုန်ရွှေဈေးကွက်အတွင်းက စုံစမ်းသိရှိရပါတယ်။

#Yangon_Media_Group

#Local_News
Published_ 16 February 2023

မဟာဝိဇရစေတီတော်ရှိ အရံစေတီတော်တွေကို ရွှေပြန်ချဖို့ရှိပြီး ရေစိမ့်နေတဲ့ ရင်ပြင်တော်ကိုပြန်လည်ပြုပြင်သွားဖို့ရှိတယ်လို့ စေတီတော်ဂေါပကအဖွဲ့ထံမှ သိရပါတယ်၊၊

#Yangon_Media_Group

#Local_News
Published_ 16 February 2023

ဖေဖော်ဝါရီလ ၁၆ရက်နေ့ ဒီနေ့မနက်ပိုင်း ၇နာရီခွဲအချိန်ခန့်က ရှမ်းပြည်နယ် မိုင်းပြင်းကိုဗဟိုပြုပြီး အဲ့ဒီမြိုရဲ့အရှေမြောက်ဘက် ၁၈ မိုင်ခန့် အကွာမှာ ပြင်းအား ၄ ဒသမ ၅ အဆင့်ရှိတဲ့ ငလျင်တစ်ခုလှုပ်ခတ်သွားတယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာန ကသိရပါတယ်။

#Yangon_Media_Group

#DailyNews
Published_ 16 February 2023

၁။ ဒီနေ့မနက် ရှမ်းပြည်နယ်မှာ ပြင်းအား ၄ ဒသမ ၅ အဆင့်ရှိမြေငလျင်တစ်ခုလှုပ်ခတ်

၂။ မဟာဝိဇရစေတီတော်၏ အရံစေတီ(၂၄)ဆူကို ရွှေပြန်ချမည်၊ ရေစိမ့်နေသည့်ရင်ပြင်တော်ကိုပြုပြင်မည်

၃။ ရန်ကုန်ရွှေပြင်ပပေါက်ဈေး ၂၈ သိန်း ၅ သောင်းကျော်ရှိနေပြီးဈေးနှုန်းအကျဘက်မှာရှိနေ

၄။ နှစ်တစ်ရာသက်တမ်းရှိ ရှေးဟောင်းသစ်ပင်အား စောင့်ကြည့်ထိန်းသိမ်းရန်အတွက် နေရာပြောင်းရွှေ့စိုက်ပျိုး ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_ 16 February 2023

YBS ယာဉ်စီးခတွေကို စီးနင်းတဲ့မှတ်တိုင် အကွာအဝေးအပေါ် မူတည်ပြီးကျပ် ၂၀၀ မှ ၄၀၀ ကြား တောင်းခံဖို့သတ်မှတ်ထားပြီး ပိုမိုတောင်းခံပါက အရေးယူသွားဖို့ရှိတယ်လို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှု ကော်မတီ YRTC မှ သိရပါတယ်၊၊

#Yangon_Media_Group

#World_News
Published 16 February 2023

၂၀၁၈ ခုနှစ်တုန်းက ထိုင်းနိုင်ငံရဲ့ လှိုဏ်ဂူထဲရောက်ရှိနေချိန် ရုတ်တရက်မိုးကြီးရေလျှံတာကြောင့် ဂူထဲရေတွေဝင်ပြီးပိတ်မိခဲ့သွားခဲ့ရာ ကယ်ဆယ်ရေးကြိုးပမ်းမှုတွေကြောင့် နှစ်ပတ်အကြာမှာ ခက်ခက်ခဲခဲနဲ့ ပြန်လွတ်မြောက်လာခဲ့တဲ့ တောဝက်လူငယ်ဘောလုံးအသင်းထဲက အသင်းခေါင်းဆောင်က ဗြိတိန်က ဘောလုံးအကယ်ဒမီတစ်ခုမှာ တက်ရောက်နေရင်း ရုတ်တရက်ကွယ်လွန်သွားခဲ့ပြီလို့ ၎င်းရဲ့ဆရာတစ်ဦးက ဖေဖော်ဝါရီလ ၁၅ ရက်မှာ ပြောကြားလိုက်ပါတယ်။

နိုင်ငံတကာရေငုပ်ပညာရှင်တွေနဲ့ ထိုင်းရေတပ် ရေငုပ်တပ်ဖွဲ့ဝင်တွေရဲ့ တစိုက်မတ်မတ်ကြိုးစားပမ်းစားကယ်ထုတ်မှုတွေကြောင့် ထိုင်းဂူထဲပိတ်မိနေတဲ့ တောဝက်ဘောလုံးအသင်းအကြောင်း ကမ္ဘာတဝန်းက စိတ်ဝင်တစားစောင့်ကြည့်နေခဲ့ကြပြီး ဒွမ်လို့ သိသူများပြားတဲ့ ဒူအမ်ပတ်ခ်ျပရွမ်သပ်က ၎င်းတောဝက်ဘောလုံးအသင်းရဲ့အသင်းခေါင်းဆောင်ဖြစ်ပါတယ်။

လက်ရှိမှာတော့ အသက် ၁၇နှစ်ရှိပြီဖြစ်တဲ့ ဒွမ်ရဲ့ သေဆုံးရတဲ့အကြောင်းရင်းကို ရှင်းရှင်းလင်းလင်း မသိကြရသေးပါဘူး။

၎င်းတို့အားလုံးကို စာသင်ကြားပေးခဲ့ဖူးတဲ့ ထိုင်းနိုင်ငံမြောက်ပိုင်း၊ ချင်းရိုင်ခရိုင်က သံဃာတော်တစ်ပါးက ဒွမ်ကွယ်လွန်ကြောင်းသတင်းကို ဆိုရှယ်မီဒီယာကနေ မျှဝေထားခဲ့တာဖြစ်ပါတယ်။

ဒူအမ်ပတ်ခ်ျပရွမ်သပ်က ဘဝတစ်ပါးကိုကူးပြောင်းသွားပါပြီ၊ နောင်ဘဝမှာလည်း သူရဲ့တပည့်တစ်ဦးအဖြစ် ပြန်လည်မွေးဖွားလာဖို့ မျှော်လင့်ပါကြောင်း ဆရာတော်ဆူပတ်ပွန်မေသီဂိုက ၎င်းရဲ့ဖေ့ဘွတ်မှာ ရေးသားဖော်ပြခဲ့ပါတယ်။

၎င်းကွယ်လွန်မှုသတင်းကို ဒွမ်ရဲ့အဘွားဆီက ကြားသိခဲ့ရတာဖြစ်ပြီး ဒွမ်က ဗြိတိန်နိုင်ငံမှာ မတော်တဆမှုတစ်ခုကြုံတွေ့ရပြီး ကွယ်လွန်သွားတာလို့သာသိရကြောင်း ဆရာတော်က ဆိုပါတယ်။

ဗြိတိန်နိုင်ငံ၊ လက်စတာရှိုင်းယားက ဘရွတ်ခ်ဟောက်စ်ကောလိပ်ဘောလုံးအကယ်ဒမီကျောင်းမှာ ဒွမ်ပညာသင်ဆုနဲ့ တက်ရောက်နိုင်ဖို့ကူညီပေးခဲ့တဲ့ ထိုင်းအမျိုးသားဘောလုံးအသင်းရဲ့ခေါင်းဆောင်ဟောင်းလည်းဖြစ်၊ နည်းပြဟောင်းလည်းဖြစ်တဲ့ ကီယာတီဆုခ်စီနာမွမ်ကတော့ ယဉ်ကျေးပြီးကြင်နာတတ်တဲ့ ဒွမ်က သူရဲ့နိုင်ငံအတွက် ကစားသမားကောင်းတစ်ဦးဖြစ်ချင်တဲ့ စိတ်ကူးအိပ်မက်ရှိသူဖြစ်ကာ သူရဲ့အိပ်မက်တွေကို အကောင်အထည်ပေါ်လာဖို့ကို မျှော်လင့်ထားခဲ့ပေမယ့် အခုအခါမှာတော့ ကောင်းစွာအနားယူပါတော့ ဒွန်ရေလို့ ၎င်းရဲ့အင်စတာ ဂရမ်မှာရေးသားထားခဲ့ပါတယ်။

၂၀၁၈ ခုနှစ်၊ ဇွန်လတုန်းက အသက် ၂၅ နှစ်အရွယ် လက်ထောက်နည်းပြတစ်ဦးနဲ့ အသက် ၁၁ နှစ်ကနေ ၁၆ နှစ်ကြား ထိုင်းလူငယ်လေးတွေ လေ့ကျင့်ရေးပြီးတဲ့နောက် ထမ့်လုံလှိုဏ်ဂူထဲသွားလည်ခဲ့ပြီးနောက် ဂူထဲရေမြင့်တက်လာချိန်မှာ ပိတ်မိသွားခဲ့တာပါ။

ပိတ်မိပြီး ကိုးရက်ကြာတော့မှာ ၎င်းတို့ကို လှိုဏ်ဂူဝကနေ ၂မိုင်ခွဲမျှအကွာ ဂူအတွင်းနေရာမှာ ခြေရာခံမိပြီး ကယ်ဆယ်ရေးက ခက်ခဲရှုပ်ထွေးတာကြောင့် နောက်ထပ်ခြောက်ရက်ကြာပြီးမှ ၎င်းတို့ကို ဂူထဲကနေစပြီး သယ်ထုတ်နိုင်ခဲ့ကြပါတယ်။

ကယ်ဆယ်ရေးလုပ်နေရင်းမှာလည်း အငြိမ်းစားထိုင်းရေငုပ်သမားတစ်ဦး တာဝန်ထမ်းဆောင်ရင်း သေဆုံးခဲ့ရပါသေးတယ်။

ကယ်ဆယ်ရေးအောင်မြင်ခဲ့ပြီးနောက် ၎င်းတို့အားပေးတဲ့ မန်ချက်စတာယူနိုက်တက်အသင်းရဲ့ ကစားပွဲတစ်ခုကို တက်ရောက်အားပေးဖို့ ဖိတ်ကြားခံခဲ့ရသလို ၎င်းတို့ဖြစ်ရပ်မှန်ဇာတ်လမ်းအကြောင်း စာအုပ်တွေ၊ မှတ်တမ်းရုပ်ရှင်တွေနဲ့ ရုပ်ရှင်ဇာတ်ကားတွေလည်းထွက်ရှိထားခဲ့ပြီး မကြာသေးခင်ကလည်း"Thai Cave Rescue" ဆိုပြီး Netflix ရဲ့ဇာတ်လမ်းတွဲလည်း ထွက်ရှိထားခဲ့ပါတယ်။

Source: Reuters

#Yangon_Media_Group

#Local_News
Published-16 February 2023

ရန်ကုန်တိုင်းဒေသကြီးအတွင်း ပြေးဆွဲနေသော တစ်ဦးပိုင် YBS ယာဉ်များအနေဖြင့် အများပိုင်ကုမ္ပဏီ အောက်သို့ ပြောင်းလဲခြင်းမပြုပါက ယာဉ်လိုင်းပြေးဆွဲခွင့် ပိတ်သွားမည်ဖြစ်ကြောင်း YRTC က သိရသည်။

ယင်းကဲ့သို့ ပြောင်းလဲရန် လာမည့် မေလ ၃၁ ရက်ထိ သတ်မှတ်ပေးထားပြီး သတ်မှတ်ရက်အတွင်း အများပိုင်ကုမ္ပဏီကို ဝင်ရောက် ပြောင်းလဲခြင်းမရှိပါက YBS ယာဉ်လိုင်းပြေးဆွဲခွင့် ပိတ်သွားမည်ဖြစ် ကြောင်း၊ ယင်းကဲ့သို့ဆောင်ရွက်ရခြင်းမှာ ယာဉ်စည်းကမ်းလမ်းစည်းဖောက်ဖျက်မှုများနှင့် အခြားအုပ်ချုပ်မှုဆိုင်ရာ ကိစ္စရပ်များအတွက် ထိန်းချုပ်လိုက်ခြင်းဖြစ်ကြောင်းလည်း YRTC ၏ တွဲဖက်အတွင်းရေးမှူး ဦးလျန်ကျင့်မန်က ပြောသည်။

"တစ်ဦးချင်းပိုင်ယာဉ်တွေက စည်းကမ်းမဲ့တဲ့နေရာမှာ အများဆုံးဖြစ်ပါတယ်။ ယာဉ်စီးခကောက်ခံတာ၊ ကျော်တက်တာ၊ ပြိုင်လုမောင်းတာတွေကအစ အဓိကစည်းကမ်းမဲ့တာဖြစ်တဲ့အတွက်ကြောင့် တစ်ဦးချင်းပိုင်ယာဉ်အားလုံး မေလ ၃၁ရက် မှာ အများပိုင် company ပိုင်ဖြစ်ဖို့ ဆောင်ရွက်သွားတာဖြစ်ပါတယ်"ဟု ယင်း ကပြောသည်။

ရန်ကုန်တိုင်းဒေသကြီးအတွင်း YBS ယာဉ် စီးရေ ၃၄၀၀ ကျော်ဖြင့် နေ့စဉ် ခရီးသွားပြည်သူ ၁ ဒသမ ၄ သန်းခန့်ကို သယ်ယူပို့ဆောင်ပေးနေကြောင်း သိရသည်။

#mt/ymg
#Yangon Media Group

#Local_News
Published_ 16 February 2023

ထိုင်းနိုင်ငံ၊ စမွတ်ပရကန်ခရိုင်၊ ဘန်ပူမြို့နယ်တွင် နေထိုင်သော မြန်မာနိုင်ငံသား ဘိုမိုးဟိန်းကိုသတ်၍ ဆွဲကြိုးနှင့်လက်စွပ်များယူဆောင်သွားသူဟု ယူဆရသူလေးဦးကို ဖေဖော်ဝါရီလ ၁၅ ရက်တွင် ထိုင်းအာဏာပိုင်များက ဖမ်းဆီးခဲ့ကြောင်း ဒေသတွင်း သတင်းများအရ သိရသည်။

သံသယရှိသူများအားလယောင်မြို့တွင် (၂) ဦး၊ ဘန်ဖလီမြို့တွင် (၂) ဦး၊ စုစုပေါင်း (၄) ဦးဖမ်းမိခဲ့ခြင်းဖြစ်ကြောင်း၊ ယခုအခါ ထိုင်းနိုင်ငံဥပဒေအရ အရေးယူရန် ဘန်ပူနယ်မြေရဲစခန်း၌ လူသတ်မှုဖြင့် အမှုဖွင့်ခံထားရကြောင်း သိရသည်။

ဖမ်းမိထားသော ၄ ဦးလုံးမှာ မြန်မာနိုင်ငံသားများဖြစ်ပြီး အလုပ်ရှာရန် ပေးထားသည့် ထိုင်းဘတ်ငွေ ၁၀,၀၀၀ ကို ဘိုမိုးဟိန်းက လိမ်လည်သွားသည့်အတွက်ကြောင့် ဖြေရှင်းရင်းက ကျူးလွန်မိခဲ့သည်ဟု ဖမ်းမိသူများက ထွက်ဆိုထားကြကြောင်း သိရသည်။

အဆိုပါ သေဆုံးသူမှာ သူ၏ နေအိမ် တိုက်ခန်းအတွင်း ရင်ဘတ်၊နောက်ကျောတို့တွင် ထိုးသွင်းဒဏ်ရာများရကာသေဆုံးနေခဲ့ခြင်း ဖြစ်ကြောင်း၊ထိုင်းနိုင်ငံအတွင်း ကာလရှည်ကြာစွာ အခြေချနေထိုင်ကာ မြန်မာ နှင့် ကမ္ဘောဒီးယား နိုင်ငံသားများအတွက် အလုပ်အကိုင်ရှာဖွေ ပေးနေသော ပွဲစားတစ်ဦးဖြစ်ကြောင်းလည်း သိရသည်။

#ymg/mt
#Yangon_Media_Group

#Local_News
Published_ 16 February 2023

ထိုင်းနိုင်ငံမဲဆောက်တွင် MOU လုပ်သား ၄၅ ဦးကို တင်ဆောင်၍ ဘန်ကောက်သို့ မောင်းနှင်စဉ် ယာဉ်တိမ်းမှောက်မှုဖြစ်စဉ်မှ သေဆုံးခဲ့သော မြန်မာ MoU လုပ်သားများအတွက်လျော်ကြေး သိန်းတစ်ထောင်ခန့်ရရှိခဲ့ကြောင်း မြန်မာရွှေ့ပြောင်းအလုပ်သမားများ အရေးလုပ်ဆောင်နေသူများထံမှ သိရသည်။

ထိုင်းနိုင်ငံ၊ တတ်ပြည်နယ်၊ ဒေါက်လွတ်၊ မဲဆောက်လမ်းတွင် နိုဝင်ဘာလ ၂၉ ရက် ည ၉နာရီခန့်အချိန်က တိမ်းမှောက်ခြင်းဖြစ်ပြီး အများအပြားဒဏ်ရာ ရခဲ့ကြကြောင်း၊ ယင်းတွင် သေဆုံးခဲ့သည့်ပအိုဝ်တိုင်းရင်းသား ၂ ဦးအတွက် မော်တော်ယာဉ် အာမခံနစ်နာကြေးမှ အသက်ဆုံးရှုံးမှုဖြင့် ထိုင်းငွေ 1050000 ဘတ် (မြန်မာငွေ ကျပ်သိန်း ၁၀၀၀ ခန့်) ရရှိခဲ့ခြင်းဖြစ်ကြောင်း သိရသည်။

သေဆုံးသည့် မိသားစုဝင်များက ရှမ်းပြည်နယ် ပင်လောင်းမြို့နယ်မှ တစ်ဆင့် မြဝတီသို့လာရောက်ကာ ဖေဖော်ဝါရီလ ၁၄ ရက်က မြဝတီ အမှတ် ၁- တံတား၌ နယ်စပ်ဖြတ်ကျော် Border Pass စာအုပ် လျှောက်ကာ ဖေဖော်ဝါရီလ ၁၅ ရက် နေ့လယ်ပိုင်းက တံတားအဝင်ပေါက်၌ ကိုဗစ်ကာကွယ်ဆေးထိုးနှံ၍ မဲဆောက်သို့ ထွက်ခွာသွားခဲ့ခြင်း ဖြစ်ကြောင်း သိရသည်။

#ymg/mt
#Yangon _Media_Group

#Local_News
Published_ 16 February 2023

နစက အစိုးရတာဝန်ယူနေတဲ့ ကာလအတွင်းမှာ လူသတ်မီးရှို့ဖောက်ခွဲရေးဖြစ်စဉ်တွေဟာ သိသိသာသာကျဆင်းလာတာမရှိသေးဘူးလို့ နစက ဥက္ကဌက မြန်မာ့အသံနှင့် ရုပ်မြင်သံကြား ၇၇ နှစ်မြောက် အခမ်းအနားမှာ ပြောဆိုလိုက်ပါတယ်။

ဒီလိုလုပ်ရပ်တွေကြောင့် လူငယ်တွေလမ်းမှား မရောက်စေဖို့နဲ့ အတွေးအခေါ်မှန်ကန်လာစေဖို့ ပြန်ကြားရေးဝန်ကြီးဌာနအနေနဲ့လုပ်ဆောင်ဖို့ သူကတိုက်တွန်းထားပါတယ်။

ဒီလိုလုပ်ရပ်တွေက တိုင်းပြည်တည်ငြိမ်အေးချမ်းမှု စည်းလုံးညီညွှတ်မှုကို မလိုလားတဲ့ ပြည်ပနိုင်ငံကြီးတွေရဲ့ သွေးထိုးလုပ်ဆောင်မှုကြောင့်ဖြစ်တယ်လို့လည်း ဆိုပါတယ်။

ပြည်တွင်းမှသစ္စာဖောက်တွေနဲ့ ပြည်ပြေးတွေဟာ နိုင်ငံတော်အလုံးစုံပျက်ဆီးအောင် ဆောင်ရွက်နေဆဲဖြစ်တယ်လို့ ဆိုပါတယ်။

တိုင်းရင်းသားလက်နက်ကိုင်အဖွဲ့တွေကိုလည်း တစ်ဖတ်သတ်အပစ်အခတ်ရပ်စဲပေးထားပြီး NCA လမ်းကြောင်းပေါ်ကနေ တွေ့ဆုံဆွေးနွေးရေးလုပ်ဆောင်ရန် ဖိတ်ခေါ်ထားတာတွေလည်း ရှိပါတယ်။

ဒါ့ကြောင့် နိုင်ငံပိုင်ရုပ်သံတွေအနေနဲ့ လူငယ်တွေလမ်းမှားမရောက်စေဖို့ အသိပညာပေးအစီစဉ်တွေ လုပ်ဆောင်ဖို့နစကဥက္ကဌက တိုက်တွန်းထားပါတယ်။

အကြမ်းဖက်လုပ်ရပ်တွေကြောင့် စိုးရိမ်ပူပန်ပြီးရှောင်တိမ်းနေကြတဲ့ပြည်သူတချို့ကိုလည်း ပြန်လာဖို့ဖိတ်ခေါ်ကြောင်း တိုက်တွန်းထားပါတယ်။

#ymg/ynzw
#Yangon_Media_Group

#Local_News
Published_ 16 February 2023

၂၀၂၂ _ ၂၀၂၃ ခုနှစ်အတွင်း ကျေးလက်အမျိုးသမီးများအတွက်အသက်မွေးကျောင်းလုပ်ငန်းများ ပြန်လည်ထူထောင်ဖို့ဆောင်ရွက်နေတယ်လို့ လူမှုဝန်ထမ်းကယ်ဆယ်ရေးနဲ့ပြန်လည်နေချထားရေးဝန်ကြီးဌာနပြည်ထောင်စုဝန်ကြီး ဒေါ်သက်သက်ခိုင်ကပြောပါတယ်။
နေပြည်တော်ကောင်စီနယ်မြေနဲ့ရခိုင်ပြည်နယ်အတွင်း Quick Win Projet အနေနဲ့ဆောင်ရွက်ထားတာဖြစ်တယ်လို့ဆိုပါတယ်။

မြန်မာနိုင်ငံနိုင်ငံလုံးဆိုင်ရာ အမျိုးသမီးများကော်မတီအနေနဲ့ အမျိုးသမီးများ ဖွံ့ဖြိုးတိုးတက်ရေးဆိုင်ရာအမျိုးသားအဆင့် မဟာဗျူဟာကိုရေးဆွဲရန် လုပ်ငန်းအစီစဉ်များချမှတ်ထားတယ်လို့လည်း ဆိုပါတယ်။

မြန်မာနိုင်ငံဟာ အမျိုးသမီးများနည်းမျိုးစုံခွဲခြားဆက်ဆံမှုပပျောက်ရေးဆိုင်ရာ ကုလသမဂ္ဂကွန်ဗန်းရှင်းကို ၁၉၉၇ ခုနှစ်က လက်မှတ်ရေးထိုးထားပြီး အစီရင်ခံစာတွေ ပေးပို့ထားပါတယ်။ အမျိုးသမီးများကိုအကြမ်းဖက်မှုပပျောက်စေဖို့အတွက် Hotline နံပတ် 1566 ကို ဆက်သွယ်တိုင်ကြား နိုင်ပါတယ်။

#ymg/ynzw
#Yangon_Media_Group

#World_Health
Published 16 February 2023

အမေရိကန်မှာ ကလေးတွေအသုံးပြုလေ့ရှိတဲ့ မိတ်ကပ်တွေနဲ့ အသားအရေထိန်းသိမ်းရေးပစ္စည်းတွေထဲမှာ ခဲနဲ့ အက်စ်ဘတ်စ်တို့စ်လိုမျိုး ကင်ဆာဖြစ်စေတဲ့ ဓာတုပစ္စည်းများပါဝင်ကြောင်း အမေရိကန်ကိုလံဘီယာတက္ကသိုလ်မှ လေ့လာချက်အသစ် တွေ့ရှိခဲ့ပါတယ်။

Environmental Research and Public Health ဂျာနယ်မှ စစ်တမ်း ၂၀၀ ကျော်ကောက်ယူခဲ့ရာ ၇၉ ရာခိုင်နှုန်းသောမိဘတွေက သူတို့ရဲ့ အသက် ၁၂ နှစ်နဲ့အောက်ကလေးတွေဟာ ကလေးအတွက်ကြော်ငြာထားတဲ့ မိတ်ကပ်နဲ့ အလှကုန်ပစ္စည်းများကို အသုံးပြုကြကြောင်း ဖြေကြားခဲ့ကြပါတယ်။

ဒီပစ္စည်းတွေထဲမှာ ခဲ, asbestos, PFAS, phthalates နဲ့ formaldehyde တို့လို အဆိပ်အတောက်ဓာတုပစ္စည်းများပါဝင်ကြောင်း အစောပိုင်းလေ့လာမှုတွေမှာလည်း သတိပေးထားပြီးဖြစ်ပါတယ်။

ထိုအဆိပ်သင့်ဓာတုပစ္စည်းတွေဟာ ကလေးငယ်များအတွက် အန္တရာယ်များ လှပါတယ်။

ထိုဓာတုပစ္စည်းတွေကို ဘယ်လိုပဲထည့်သွင်းထားသည်ဖြစ်စေ ကင်ဆာ၊ အာရုံကြောဆိုင်ရာပြဿနာများ၊ အခြားပြင်းထန်သော ကျန်းမာရေးအကျိုးဆက်များနဲ့ ဆက်စပ်နေပါတယ်။

မိတ်ကပ်နဲ့ အလှကုန်ပစ္စည်းများ အသုံးပြုခြင်းအတွက် ဖြစ်လာနိုင်တဲ့ အန္တရာယ်များကိုသိရှိစေရန် အရေးကြီးတယ်လို့ သုတေသီများ ရေးသားခဲ့ကြပါတယ်။

လေ့လာမှုပြုလုပ်ခဲ့တဲ့ ကလေးတွေထဲမှာ ၅၄ ရာခိုင်နှုန်းက မိတ်ကပ်ကို အနည်းဆုံးလစဉ်အသုံးပြုကြပါတယ်။

၁၂ ရာခိုင်နှုန်းက နေ့စဉ်လိမ်းခြယ်ကြပြီး ၂၀ ရာခိုင်နှုန်းကတော့ လိမ်းတဲ့အခါတိုင်း ၈ နာရီထက်ပိုကြာမြင့်စွာ လိမ်းထားရပါတယ်။

ကလေး ၃ ပုံ ၁ ပုံလောက်က အလှကုန်ပစ္စည်းကို မတော်တဆမျိုချမိတာမျိုးရှိကြောင်း သိရပါတယ်။

အရေပြားထိတွေ့မှုအပြင် လက်ကနေ ပါးစပ်ကိုထိမိတဲ့အနေအထားမျိုးတွေမှာ မတော်တဆမျိုချမိတတ်ကြောင်း၊ ကလေးရဲ့အရွယ်အစား၊ ကြီးထွားမှုနှုန်း၊ ကိုယ်ခံအားစနစ်တို့ကြောင့် ဒီအဆိပ်အတောက်တွေကို ပိုပြီးခံစားရတတ်ကြောင်း လူထုကျန်းမာရေးသိပ္ပံပရော်ဖက်ဆာ'ဂျူလီဟာ့စ်မန်း'က ပြောပြခဲ့ပါတယ်။

အဆိပ်သင့်ဓာတုပစ္စည်းတွေပါဝင်နေတာတောင် ကလေးတွေအတွက် အလှကုန်ပစ္စည်းများကို ရောင်းချခွင့်ရနေပါတယ်။

ဒီလေ့လာတွေ့ရှိမှုကနေ အလှကုန်လုပ်ငန်းတွေအနေနဲ့ ကလေးတွေကို အဆိပ်သင့်ဓာတုပစ္စည်းတွေကနေ ကာကွယ်ပေးဖို့လုပ်ဆောင်ရာမှာ အကူအညီဖြစ်စေရန် မျှော်မှန်းရပါမယ်။

Source: The Jerusalem Post
#Yangon_Media_Group