#Health_Matters
Published - 7 Jan 2023

- နိုင်ငံတကာကပ်ရောဂါ အရန်အသင့်ရှိရေးနေ့ ဘာကြောင့်သတ်မှတ်ရတာလဲ??

#Yangon_Media_Group

#Local_News
Published_ 7 January 2023

ရန်ကုန်စီးပွားရေးတက္ကသိုလ်၏အာမခံလုပ်ငန်းဆိုင်ရာမဟာဘွဲ့(Master of Insurance)သင်တန်းအတွက်ဝင်ခွင့်လျှောက်လွှာများခေါ်ယူနေကြောင်း အဆိုပါတက္ကသိုလ်မှထုတ်ပြန်လိုက်သည်၊၊

(၂၀၂၃-၂၀၂၄)ပညာသင်နှစ်အတွက် အဆိုပါ မဟာဘွဲ့သင်တန်းကိုခေါ်ယူထားခြင်းဖြစ်ပြီး ဇန်နဝါရီလ(၁၀) ရက်မှ(၂၄)ရက်အတွင်း လျှောက်လွှာများကို ရန်ကုန်စီးပွားရေးတက္ကသိုလ်(ကမာရွတ်နယ်မြေ)တွင် လျှောက်ထားနိုင်မည်ဖြစ်သည်၊၊

အာမခံလုပ်ငန်းဆိုင်ရာ မဟာဘွဲ့(Master of Insurance)သင်တန်းတက်လိုသူများအနေဖြင့် တက္ကသိုလ်တစ်ခုခုမှဘွဲ့ရများ၊ သင်တန်းအတွက် အာမခံလုပ်ငန်း၊ ဘဏ်လုပ်ငန်း၊ ဘဏ္ဍာရေးဆိုင်ရာလုပ်ငန်းတစ်ခုခုတွင် လုပ်ငန်းခွင်အတွေ့အကြုံအနည်းဆုံးလုပ်သက်(၂)နှစ်ရှိပြီးအခြားသော သင်တန်းများတက်ရောက်နေသူများ မဖြစ်ရဟု သတ်မှတ်ထားသည်၊၊

သင်တန်းအတွက် ရေးဖြေစာမေးပွဲကို ဇန်နဝါရီ(၂၉) ရက်တွင် ရန်ကုန်စီးပွားရေးတက္ကသိုလ်(ကမာရွတ်နယ်မြေ)၌ ကျင်းပမည်ဖြစ်ပြီး ရေးဖြေဝင်ခွင့်ရသူများ လူတွေ့စစ်ဆေးရွေးချယ်သွားမည်ဖြစ်ကြောင်း သိရသည်၊၊

#ymg/tthl
#Yangon_Media_Group

#World_News
Published 7 January 2023

ဆိုရှယ်မီဒီယာပေါ်မှာ Oreo ဘီစကစ်က ဟာလာထုံးတမ်းနဲ့ မညီတဲ့ စားစရာဖြစ်တယ်ဆိုတဲ့ တိုင်ကြားမှုများနဲ့ ပတ်သက်ပြီး ယူအေအီးရာသီဥတုနှင့် ပတ်ဝန်းကျင်ထိန်းသိမ်းရေးဝန်ကြီးဌာန(MoCCAE)က ရှင်းလင်းထုတ်ပြန်လိုက်ပါတယ်။

ဆိုရှယ်မီဒီယာပေါ်မှ အကြောင်းအရာတွေထဲမှာ ယူအေအီးမှာရောင်းချတဲ့ Oreo ကွတ်ကီးတွေက ဟာလာဖြစ်/မဖြစ် အငြင်းပွားနေကြတာဖြစ်ပါတယ်။

ဒီလိုပျံ့နှံ့ရိုက်ခတ်လာတဲ့ အကြောင်းအရာများနဲ့ ပတ်သက်ပြီး ဝန်ကြီးဌာနက ဖြေရှင်းခဲ့တာဖြစ်ပါတယ်။

MoCCAE ရဲ့ထုတ်ပြန်ချက်ထဲမှာ "Oreo ဘီစကစ်က ဝက်သားနဲ့ အရက်ပါတယ်ဆိုပြီး ဟာလာမဖြစ်ဘူးလို့ လတ်တလောသတင်းတွေ ထွက်ပေါ်နေပါတယ်၊ ဒီကိစ္စက မမှန်ကန်ဘူးဆိုတာကို အသိပေးချင်ပါတယ်၊ ဒီဘီစကစ်မှာ တိရိစ္ဆာန်ကရတဲ့ အဆီ၊ ပစ္စည်းတွေမပါဝင်ပါဘူး" လို့ ဖော်ပြထားပါတယ်။

ဓာတ်ခွဲခန်းမှာလည်း အတည်ပြုစမ်းသပ်ထားပြီးဖြစ်ကြောင်း ဖော်ပြထားပါတယ်။

ပြည်ပမှတင်သွင်းတဲ့ အစားအစာအားလုံးဟာ လုပ်ထုံးလုပ်နည်းအစီအစဉ်များအတိုင်း အစားအသောက်ဘေးကင်းစိတ်ချရေး အမြင့်ဆုံးစံနှုန်းများ သတ်မှတ်ချက်များနဲ့အညီ တိုင်းတာဆောင်ရွက်နေကြောင်း ဝန်ကြီးဌာနက အတည်ပြုလိုက်ပါတယ်။

အဘူဒါဘီစိုက်ပျိုးရေးနှင့် အစားအစာဘေးကင်းစိတ်ချရေးအာဏာပိုင်တွေကလည်း အလားတူထုတ်ပြန်ရာမှာ "အမေရိကန် မွန်ဒဲလက်စ်နိုင်ငံတကာကုမ္ပဏီက ထုတ်လုပ်တဲ့ကွတ်ကီးတွေမှာ ဟာလာမဟုတ်တဲ့ပစ္စည်းတွေ ပါဝင်တယ်ဆိုတဲ့ အထောက်အထားမျိုး ခိုင်လုံစွာမတွေ့ရဘူး" လို့ ဖော်ပြခဲ့ပါတယ်။

ဟာလာဆိုတဲ့ အာရေဗျစကားလုံးဟာ လက်သင့်ခံနိုင်တယ်ဆိုတဲ့ အဓိပ္ပာယ်ရပါတယ်။

မွတ်ဆလင်ဘာသာမှာ သွေးသားနဲ့ အရက်သေစာတို့ စားသောက်ခြင်းကို လက်သင့်မခံဘဲ ဟာလာမဖြစ်ဘူးလို့ သတ်မှတ်ကြပါတယ်။

မွန်ဒဲလက်ဇ်ကုမ္ပဏီက သူတို့ဝက်ဘ်ဆိုက်မှာ ထုတ်ပြန်ထားရာမှာ Oreo က ကမ္ဘာအနံ့ကိုတင်ပို့နေတာဖြစ်ပြီး ပြင်ပအဖွဲ့အစည်းတွေကနေ ဟာလာအသိအမှတ်ပြု ရရှိထားပြီးဖြစ်ကြောင်း ဖော်ပြထားပါတယ်။

"ဈေးကွက်တစ်မျိုးနဲ့တစ်မျိုးအလိုက် စားသုံးသူတွေရဲ့ လိုအပ်ချက်များနဲ့ကိုက်ညီအောင် ထုတ်လုပ်ထားပါတယ်၊ ကိုရှာ ဟာလာတို့လို ဘာသာရေးအရ လိုအပ်ချက်ကွဲလွဲမှုများအတိုင်း ထည့်သွင်းစဉ်းစားရပါတယ်" လို့ ထုတ်ပြန်ထားပါတယ်။

Source: WION
#Yangon_Media_Group

#Local_News
Published_7 January 2023

ရန်ကုန်တိုင်းဒေသကြီးအတွင်းရှိသည့် သဘာဝဓာတ်ငွေ့ (CNG) အရောင်းဆိုင်များ၏ ဖွင့်လှစ်ချိန်ကို တစ်နာရီထပ်တိုးဖွင့်လှစ်ပေးသွားမည်ဖြစ်ကြောင်း CNG အရောင်းဆိုင်များမှ ကြေညာထားသည်။

ယခင်က CNG ဆိုင်တွေကို နေ့စဉ် မနက် ၅ နာရီမှ ည ၉ နာရီအထိ ဖွင့်လှစ်ခြင်းဖြစ်ပြီး ယခုအခါ အချိန်တစ်နာရီထပ်တိုးပြီး နေ့စဉ် ည ၁၀ နာရီထိ တိုးမြှင့်ဖွင့်လှစ်ပေးသွားမည်ဖြစ်ကြောင်း သိရသည်။

ရန်ကုန်တိုင်းအတွင်း ပြေးဆွဲနေသည့် CNG သုံး ဘတ်စ်ကားလိုင်းများ၊ အငှားယာဉ်များ အဆင်ပြေစေရန်အတွက် ယခုလိုအချိန်တိုးမြှင့်ပေးခြင်းဖြစ်ကြောင်း သိရသည်။ လက်ရှိတွင် လျှပ်စစ်မီးအချိန်ကြာမြင့်စွာပြတ်တောက်မှုကြောင့် CNG အရောင်းဆိုင်များတွင် ဂတ်စ်လုံလောက်စွာမရရှိသည့်အတွက် YBS ယာဉ်လိုင်းများသည် အချိန်ကြာမြင့်စွာ CNG ဂတ်စ်တန်းစီစောင့်ဆိုင်းနေရသည့်အတွက် ယာဉ်အစီးရေလျှော့ချပြေးဆွဲနေရသလို CNG တက္ကစီယာဉ်မောင်းများသည်လည်း အခက်အခဲများရှိနေကြောင်း သိရသည်။

လက်ရှိတွင် ရန်ကုန်တိုင်းအတွင်း CNG အရောင်းဆိုင် ၄၁ ဆိုင်ရှိသည့်အနက် အရောင်းဆိုင် ၄၀ ကို ဖွင့်လှစ်ကာ တစ်ရက်လျှင် CNG ကုဗပေ ၁၈ သန်းကျော် ရောင်းချပေးနေကြောင်း သိရသည်။

#ymg/sth
#Yangon_Media_Group

#Local_News
Published_ 7 January 2023

မကွေးတိုင်းဒေသကြီး၊ ပွင့်ဖြူမြို့နယ်တွင် (၃၀)မဂ္ဂါဝပ်ရှိသည့် 'ကြီးအုံကြီးဝ' နေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံဖွင့်လှစ်လိုက်ကြောင်း မြန်မာနိုင်ငံဆိုင်ရာ တရုတ်သံရုံးမှ သိရသည်၊၊

အဆိုပါ ဓာတ်အားပေးစက်ရုံကို တရုတ်နိုင်ငံ Power China Resources Limited မှ ရင်းနှီးမြှုပ်နှံတည်ဆောက်ပေးခဲ့ပြီး'ကြီးအုံကြီးဝ' နေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံ လျှပ်စစ် ဓာတ်အားလိုင်းချိတ်ဆက်ဓာတ်အားလွှတ်အောင်မြင်ခြင်း ဂုဏ်ပြုဧည့်ခံပွဲအခမ်းအနားကို ဇန်နဝါရီလ(၅) ရက်တွင် ကျင်းပခဲ့သည်၊၊

မြန်မာနိုင်ငံဆိုင်ရာ တရုတ်သံအမတ်ကြီး Mr. Chen Haiက လတ်တလောနှစ်ပိုင်းတွင် တရုတ်ကုမ္ပဏီများက မြန်မာနိုင်ငံ၌ လျှပ်စစ်စီမံကိန်းများစွာ တာဝန်ခံတည်ဆောက်ခဲ့ကြောင်း၊ ယခုအကြိမ် မြန်မာနိုင်ငံအလယ်ပိုင်း မကွေးတိုင်းဒေသကြီး ပွင့်ဖြူမြို့နယ် ကြီးအုံကြီးဝ နေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံ လျှပ်စစ်ဓာတ်အားလိုင်းချိတ်ဆက် ဓာတ်အားလွှတ်အောင်မြင်ခြင်းသည် မြန်မာနိုင်ငံ သက်ဆိုင်ရာဒေသများတွင် လျှပ်စစ်ဓာတ်အားလိုအပ်သည့်ပြဿနာအား ထိရောက်စွာ ဖြေရှင်းပေးပြီး ဒေသတွင်း လူမှုစီးပွားဖွံ့ဖြိုးတိုးတက်မှုကို မြှင့်တင်မည်ဖြစ်ကြောင်း ပြောကြားသည်၊၊

ပြည်ထောင်စုဝန်ကြီး ဦးသောင်းဟန်က လက်ရှိတွင် တရုတ်ကုမ္ပဏီများ မြန်မာနိုင်ငံ၌ နေရောင်ခြည်စွမ်းအင်သုံး လျှပ်စစ်ဓာတ်အားပေးစီမံကိန်းများ ဖော်ဆောင်ရန် ကြိုးပမ်းလျက်ရှိကြောင်း၊ မြန်မာနိုင်ငံ အလယ်ပိုင်း မကွေးတိုင်းဒေသကြီး ပွင့်ဖြူမြို့နယ် ကြီးအုံကြီးဝ နေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံသည် လျှပ်စစ်ဓာတ်အားလိုင်းချိတ်ဆက် ဓာတ်အားလွှတ်အောင်မြင်ခဲ့ပြီး နှစ်စဉ်ပျမ်းမျှပို့လွှတ်သည့် လျှပ်စစ်ဓာတ်အားပမာဏသည် ကီလိုဝပ်နာရီပေါင်း သန်း ၆၀ ကျော်ရှိကာ ဒေသတွင်းလူမှုရေးနှင့်စီးပွားရေး ဖွံ့ဖြိုးတိုးတက်မှုအား ထိရောက်စွာမြှင့်တင်ပေးမည်ဖြစ်ကြောင်း ပြောကြားခဲ့သည်။

#ymg/tthl
#Yangon_Media_Group

#World_Technology
Published 7 January 2023

မျက်ရည်အိတ်ထဲမှာထည့်ရတဲ့ ပလပ်ငယ်လေးအသုံးပြုခြင်းဖြင့် နေ့စဉ်မျက်စဉ်းခပ်နေစရာ မလိုတော့ပါဘူး။

ဆန်စေ့အရွယ်လောက်သာရှိတဲ့ နည်းပညာမြင့်ပလပ်ပစ္စည်းလေးဟာ မျက်လုံးထဲမှာ ၃ လတိုင်အောင် ရောင်ရမ်းခြင်းဆန့်ကျင်ပေးတဲ့ ဆေးတွေထုတ်ပေးနေမှာဖြစ်ပါတယ်။

ဒီပစ္စည်းလေးကို မျက်လုံးထဲမှာ ချောမွေ့စေမယ့်မျက်ရည် အလုံအလောက်မထွက်နိုင်တဲ့ မျက်ရည်ခမ်းခြောက်ဝေဒနာကို ကုသပေးဖို့ထုတ်လုပ်ထားတာဖြစ်ပါတယ်။

မျက်ရည်ဟာ အရည်အများစုပါဝင်ပြီး အဆီဓာတ်အနည်းငယ်လည်း ပါဝင်ပါတယ်။

မျက်တော်ခတ်လိုက်တိုင်း မျက်ရည်တွေက မျက်ကြည်လွှာပေါ်မှာ ပျံ့နှံ့သွားကာ သန့်ရှင်းစွတ်စိုစေပါတယ်။

အသက်ကြီးလာတာနဲ့အမျှ မျက်လုံးကနေ အရည်ထုတ်လုပ်မှုနည်းလာပြီး မျက်ရည်ခမ်းခြောက်ခြင်း ဖြစ်လာကြပါတယ်။

အအေးမိဖျားနာအတွက် သောက်ရသည့်ဆေးများ၊ သွေးပေါင်ချိန်တိုးခြင်းအတွက် ဆေးများမှာ မျက်ရည်ခမ်းခြောက်တတ်တဲ့ ဘေးထွက်ဆိုးကျိုးရှိပြီး ဆီးချိုရောဂါအခြေအနေနဲ့ တီဗီ၊ ဖုန်း စတဲ့ဖန်သားပြင်ကို အချိန်ကြာမြင့်စွာကြည့်ရှုခြင်းဖြင့်လည်း ဖြစ်တတ်ပါတယ်။

မျက်ရည်ခမ်းခြောက်သူတွေမှာ ဆေးညွှန်းနဲ့အသုံးပြုတာမဟုတ်တဲ့ မျက်စဉ်းဆေးတွေလောက်ဖြင့် မလုံလောက်ပါဘူး။

ဒီအခြေအနေကို မကုသဘဲထားလိုက်ရင် မျက်ကြည်လွှာပွန်းပဲ့ခြင်း၊ အနာဖြစ်ခြင်း၊ အမြင်အာရုံဆုံးရှုံးခြင်းတို့ ဖြစ်စေနိုင်ပါတယ်။

အခုထုတ်လုပ်လိုက်တဲ့ပစ္စည်းကတော့ မျက်စဉ်းခပ်ဖို့မလွယ်ကူတဲ့သူတွေအတွက် နည်းလမ်းတစ်ခုဖြစ်လာနိုင်ပါတယ်။

၁ မီလီမီတာသာရှိတဲ့ ပလပ်ပစ္စည်းလေးကို ဆီလီကာပါဝင်တဲ့ ကုန်ကြမ်းဖြင့်ပြုလုပ်ထားပြီး ကျွမ်းကျင်သူက မျက်ရည်အိတ်ထဲထည့်ပေးရပါတယ်။

ထိုပစ္စည်းလေးက မျက်ရည်တွေကို ထိန်းသိမ်းပေးထားကာ နာကျင်ခြင်းကို ချက်ချင်းသက်သာစေမှာဖြစ်ပါတယ်။

၃ လကြာပြီးနောက် ပလပ်လေးကိုဖယ်ရှားရမှာဖြစ်ပြီး လိုအပ်ပါက ထပ်မံကုသထည့်သွင်းရမှာဖြစ်ပါတယ်။

Source: Daily Mail
#Yangon_Media_Group

#Local_News
Published_7 January 2023

ရွှေဒင်္ဂါးပြားတစ်ကျပ်သားလျှင် ငွေကျပ် ၂၅ သိန်းနှုန်းဈေးဖြင့် ရောင်းချနေကြောင်း နစက၏ သတင်းများအရ သိရသည်။

၂၀၂၃ခုနှစ်၊ ဇန်နဝါရီ ၄ ရက်တွင် ကျရောက်သော (၇၅)နှစ်မြောက်စိန်ရတုလွတ်လပ်ရေးနေ့အထိမ်းအမှတ်အဖြစ် တစ်ကျပ်သား၊ငါးမူးသားရွှေဒင်္ဂါးများကိုဆင်ဖြူတော်ပုံဖြင့် အသစ်သွန်းလောင်းကာ ဇန်နဝါရီလ ၅ ရက်မှစတင်၍ ရန်ကုန်၊နေပြည်တော်နှင့် မန္တလေးတို့ရှိ မြန်မာ့ကျောက်မျက်ရတနာရောင်းဝယ်ရေးလုပ်ငန်း၏ အရောင်းဆိုင်များတွင် ရောင်းချပေးနေခြင်းလည်း ဖြစ်သည်။

ယခင်က ပုံစံဟောင်းရွှေဒင်္ဂါးများကိုလည်း အဆိုပါ ဆင်ဖြူတော်ပုံဖြင့် အသစ်သွန်းလောင်းထားသည့် ရွှေဒင်္ဂါးပြား များနှင့် အတူရောင်းချပေးနေခြင်း ဖြစ်ကြောင်း၊ ဇန်နဝါရီလ ၅ ရက်ကမြန်မာ့ကျောက်မျက် ရတနာရောင်းဝယ်ရေးလုပ်ငန်း၏ ရွှေတစ်ကျပ်သား ပေါက်ဈေးမှာ ၂၅ သိန်းဖြစ်သောကြောင့် တစ်ကျပ်သားရွှေဒင်္ဂါးတစ်ပြား၏ တန်ဖိုးမှာ အလျော့တွက်လက်ခ အပါအဝင် ၂၅ သိန်း ၈ သောင်းကျပ်ဖြစ်ကြောင်း သိရသည်။

မည်သည့် ရွှေအလေးချိန်ရှိ ရွှေဒင်္ဂါးပြားများကို ဝယ်ယူစေကာမူ တစ်ကျပ်သားဈေးမှာ ၂၅ သိန်း ဖြစ်ပြီး အလျော့တွက်လက်ခများမှာ ကွာဟသွားကြောင်း၊ ငါးမူးသား ရွှေဒင်္ဂါးတစ်ပြားလျှင် အလျော့တွက်လက်ခ ၄၂၀၀၀ ကျပ် ၊တစ်မတ်သားရွှေဒင်္ဂါးတစ်ပြားလျှင် အလျော့တွက်လက်ခကျသင့်ငွေ ၂၂၀၀၀ ကျပ် သတ်မှတ်ထားခြင်း ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published_7 January 2023

ထိုင်းခရီးသွားများ ပိုမိုဝင်ရောက်နိုင်ရေးအတွက် လေကြောင်းပျံသန်းမှု အကြိမ်ရေတိုးမြှင့်ရန် စီစဉ်နေကြောင်း ဟိုတယ်နှင့်ခရီးသွားလာရေးဝန်ကြီးဌာနက သိရသည်။

ပြီးခဲ့သည့် ၂၀၂၂နှစ်အတွင်းက မြန်မာနိုင်ငံသို့ ထိုင်းနိုင်ငံသား ခရီးသွားဝင်ရောက်မှုမှာ သောင်းကဏန်းခန့်သာရှိခဲ့ရာမှ ယခုနှစ်စပိုင်းတွင် တရုတ်နိုင်ငံထက် ထိုင်းနိုင်ငံမှဝင်ရောက်သည့် ခရီးသွားအရေအတွက် ပိုလာကြောင်းလည်း သိရသည်။

ယင်းကြောင့် ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီးဒေါက်တာဌေးအောင်နှင့် မြန်မာနိုင်ငံဆိုင်ရာ ထိုင်းနိုင်ငံသံအမတ်ကြီး H.E Mr. Mongkol Visitstump တို့တွေ့ဆုံပြီး ၂ နှစ်နိုင်ငံအကြား လေကြောင်း ပျံသန်းမှု အကြိမ်ရေးတိုးမြှင့်ရန် ဆွေးနွေးခဲ့ကြကြောင်းလည်း သိရသည်။

ထိုင်းနိုင်ငံသံအမတ်ကြီး H.E Mr. Mongkol Visitstump က ကိုဗစ်အလွန်ကာလတွင် နှစ်နိုင်ငံခရီးသွားလုပ်ငန်းပူးပေါင်းဆောင်ရွက်ရေးဆိုင်ရာ တိုးမြှင့်လုပ်ဆောင်နိုင်ရေးနှင့် မြန်မာနိုင်ငံသို့ ထိုင်းခရီးသွားဧည့်သည်များလာရောက်ရာတွင် ကျန်းမာရေးအာမခံဝယ်ယူထားရှိရေးတို့အတွက် ပြောကြားခဲ့ကြောင်း၊ မြန်မာနိုင်ငံဘက်က ထိုင်းစီးပွားရေးလုပ်ကိုင်သူများအနေဖြင့် မြန်မာနိုင်ငံသို့ ပိုမိုလာရောက်ရင်းနှီးမြှုပ်နှံပူးပေါင်းဆောင်ရွက်ရေးတို့ကို ဆွေးနွေးထားကြကြောင်းလည်း သိရသည်။

မြန်မာနိုင်ငံ၏ ခရီးသွားပြပွဲများ၊ ခရီးသွားလုပ်ငန်းနှင့်ဆက်စပ်သောကဏ္ဍများလုပ်ဆောင်ရာတွင် ထိုင်းနိုင်ငံအနေဖြင့် ဟိုတယ်နှင့်ခရီး သွားလာရေးဝန်ကြီးဌာနနှင့် တိုးမြှင့်ပူးပေါင်းဆောင်ရွက်သွားရန်လည်း အစီအစဉ်များ ရှိကြောင်း၊ မြန်မာ- ထိုင်း နှစ်နိုင်ငံအကြား ကုန်သွယ်ရေး၊ ရင်းနှီးမြှုပ်နှံမှုနှင့် စီးပွားရေးပူးပေါင်းဆောင်ရွက်မှုဆိုင်ရာတို့ကိုလည်း ဆွေးနွေးထားသည့်အပြင် ကိစ္စများကို ဆွေးနွေး ထားကြောင်း သိရသည်။

#ymg/mt
#Yangon_Media_Group

#World_Health
Published 7 January 2023

မာဆာချူဆက် အမျိုးသမီးဆေးရုံမှ ဒေါက်တာ'ခါလစ်ရှာ'ဦးဆောင်တဲ့ သုတေသနအဖွဲ့ဟာ ကင်ဆာအကျိတ်တွေကို ဖယ်ရှားပေးပြီး ကိုယ်ခံအားကိုကြာရှည်တည်မြဲစေမယ့် ကာကွယ်ဆေးကို တီထွင်လိုက်ကာ ကင်ဆာပြန်မဖြစ်စေရန် ကာကွယ်ပေးနိုင်မှာဖြစ်ပါတယ်။

ဦးနှောက်ကင်ဆာအကျိတ်ရှိနေတဲ့ ကြွက်များမှာ ကင်ဆာဆဲလ်ကိုသေစေနိုင်တဲ့ ကာကွယ်ဆေးနဲ့ စမ်းသပ်ခဲ့ပြီး ရလဒ်ကောင်းများရရှိခဲ့ပါတယ်။

"တီထွင်တဲ့စိတ်ကူးက ရှင်းရှင်းလေးပါ၊ ကင်ဆာဆဲလ်တွေကို ကင်ဆာသေစေနိုင်တဲ့ ကာကွယ်ဆေးအဖြစ် ပြောင်းလဲလိုက်တာပါ" လို့ ဒေါက်တာ'ရှာ'က ပြောပြပါတယ်။

"မျိုးဗီဇပြုပြင်ပြောင်းလဲလိုက်ပြီးတော့ ကင်ဆာဆဲလ်အဖြစ်ကနေ အကျိတ်ဆဲလ်တွေကို သေစေပြီး ကာကွယ်ပေးနိုင်တဲ့ ကိုယ်ခံအားအဖြစ် လှုံ့ဆော်ပေးလိုက်တာပါ"

အခြားသုတေသီတွေနဲ့ မတူတဲ့နည်းလမ်းက အကျိတ်ဆဲလ်အရှင်တွေကို အသုံးချတာဖြစ်ပြီး ဦးနှောက်အနှံ့ကနေ အကျိတ်ဆဲလ်တွေရှိတဲ့နေရာကို လိုက်ပါသွားတာဖြစ်ပါတယ်။

သူတို့ရဲ့စမ်းသပ်နည်းက ကြွက်တွေမှာ လုံခြုံစိတ်ချထိရောက်ပြီး ကုသနည်းဖြစ်လာဖွယ်ရှိနေပါတယ်။

နောက်ထပ်စမ်းသပ်ထုတ်လုပ်မှုတွေ ပြုလုပ်ဖို့လိုအပ်သလို လူသားဆဲလ်တွေနဲ့ လူနာရဲ့ရောဂါအခြေအနေအတိုင်း ချောမွေ့စွာလုပ်ဆောင်နိုင်ဖို့ ကြိုးစားနေကြပါတယ်။

သုတေသနလုပ်သမျှတွေထဲမှာ နည်းပညာပိုင်းမြင့်မားတယ်ဆိုရင်တောင် လူနာတွေကိုတော့ မျက်ခြည်အပြတ်မခံပါဘူးလို့ ဒေါက်တာရှာက ဆိုပါတယ်။

သူတို့ရဲ့စမ်းသပ်နည်းကို အစိုင်အခဲအကျိတ်များအတွက်ပါ အသုံးချနိုင်ပြီး နောက်ထပ်စစ်ဆေးမှုများအတွက်လည်း အာမခံထားပါတယ်။

Source: The Jerusalem Post
#Yangon_Media_Group

#Local_News
Published_6 January 2023

ရန်ကုန်-မော်လမြိုင်ရထားလမ်းပိုင်းမှာ တစ်ပါတ်ကို သုံးကြိမ်ခန့် RBE ရထားစတင်ပြေးဆွဲပေးနေတယ်လို မြန်မာ့မီးရထားကနေ သိရပါတယ်။

#Yangon_Media_Group

#World_Animal
Published 5 January 2023

တရုတ်ပြည်မှ ပန်ဒါထိန်းသိမ်းရေးနှင့်သုတေသနစင်တာဟာ ၂၀၂၂ ခုနှစ်က ပန်ဒါကြီးများအတွက် ကမ္ဘာ့ပထမဆုံး DNA စမ်းသပ်ကိရိယာကို စမ်းသပ်ခဲ့ပါတယ်။

#Yangon_Media_Group

Published 6 Jan 2023

အာရှပစိဖိတ်ရဲ့အနာဂတ်ကို ဒေသတွင်းနိုင်ငံတွေကပဲ ကိုယ်တိုင်ဆုံးဖြတ်ရလိမ့်မှာဖြစ်ပြီး အခြားပြင်ပအဖွဲ့တွေ ဆုံးဖြတ်လို့ မရဘူးလို့ ဖိလစ်ပိုင်သမ္မတ ဖာဒီနန်ရိုမူအာဒက် မားကိုစ်ဂျုနီယာက ပြောပါတယ်။ ဗုဒ္ဓဟူးနေ့က  တရုတ် ရုပ်သံ CGTN နှင့် အင်တာဗျူးအစီအစဉ်မှာ ဖိလစ်ပိုင်သမ္မတက ပြောဆိုခဲ့ခြင်းဖြစ်ပါတယ်။

သမ္မတမားကိုစ့်ဟာ တရုတ်သမ္မတ ရှီကျင့်ဖျင်ရဲ့ ဖိတ်ကြားချက်အရ တရုတ်နိုင်ငံကို အင်္ဂါနေ့မှကြာသပတေးနေ့အထိ (၃)ရက်ကြာ လာရောက်ခဲ့တဲ့ ခရီးစဉ်အတွင်း ဘေဂျင်းမြို့မှာ ရုပ်သံအင်တာဗျူးရိုက်ကူးခဲ့တာပါ။

Source CCTV+

#Philippines_China

#Ferdinand_Romualdez_Marcos_Jr

#Asia_Pacific_Politics