#LocalNews
Published_ 23 March 2023

သင်္ကြန်တွင်းမှာ မြို့တွင်းစားသောက်ဆိုင်တွေပုံမှန်ထက်အရောင်းပါးနိုင်ပေမယ့်လည်းခရီးသွား site နေရာတွေက စားသောက်ဆိုင်တွေရောင်းအား ကောင်းလာနိုင်ခြေရှိတယ်လို့ မြန်မာနိုင်ငံစားသောက် ဆိုင်လုပ်ငန်းရှင်များအသင်းထံမှ သိရပါတယ်၊၊

#YMG#Yangon_Media_Group

#LocalNews
Published_ 23 March 2023

၂၀၂၄ အာရှအမျိုးသမီး ယူ-၂၀ ပြိုင်ပွဲ ခြေစစ်ပွဲ (ဒုတိယအဆင့်) အုပ်စုမဲခွဲရာ မြန်မာလက်ရွေးစင်အမျိုးသမီး ယူ-၂၀ အသင်းအုပ်စု (ခ)တွင် ကျရောက်ခဲ့သည်။

ခြေစစ်ပွဲ ပထမအဆင့် အောင်မြင်ထားကြသည့် တရုတ်၊ ဩစတြေးလျ၊ ဗီယက်နမ်၊ မြန်မာ၊ အီရန်၊ နီပေါ၊ တရုတ် (တိုင်ပေ)၊ လက်ဘနွန် အမျိုးသမီး ယူ-၂၀ အသင်းများကို ယနေ့ မတ်လ ၂၃ ရက်က မလေးရှားနိုင်ငံ ကွာလာလမ်ပူမြို့တွင် အုပ်စုမဲခွဲပွဲခဲ့ရာ မြန်မာအမျိုးသမီး ယူ-၂၀ အသင်းအနေဖြင့် အုပ်စု (ခ)တွင် တရုတ်၊ နီပေါ၊ တရုတ် (တိုင်ပေ) အသင်းတို့နှင့်အတူ ကျရောက်‌ခြင်းဖြစ်သည်။

အုပ်စု (က)တွင် ဩစတြေးလျ၊ ဗီယက်နမ်၊ အီရန်၊ လက်ဘနွန်တို့ ကျရောက်နေပြီး ၂၀၂၄ အာရှအမျိုးသမီး ယူ-၂၀ ပြိုင်ပွဲ ဒုတိယအဆင့် ခြေစစ်ပွဲစဉ်များကို ၂၀၂၃ ခုနှစ် ဇွန်လ ၃ ရက်မှ ၁၁ ရက်ထိ ကျင်းပရန် စီစဉ်ထားသည်။

၂၀၂၄ အာရှအမျိုးသမီး ယူ-၂၀ ပြိုင်ပွဲကို ဥဇဘတ်ကစ္စတန် နိုင်ငံက အိမ်ရှင်အဖြစ် လက်ခံကျင်းပမည်ဖြစ်ပြီး ပထမ၊ ဒုတိယနှင့် တတိယရသော အသင်း သုံးသင်းမှာ ၂၀၂၄ ဖီဖာ အမျိုးသမီး ယူ-၂၀ ကမ္ဘာ့ဖလား ခြေစစ်ပွဲ အောင်မြင်မည်ဖြစ်ကြောင်း သိရသည်။

ymg/mt
#Yangon_Media_Group

#LocalNews
Published_ 23 March 2023

စစ်ကိုင်းတိုင်းဒေသကြီး၊မုံရွာမြို့၊ အေးသာယာရပ်ကွက်၊ ချင်းတွင်းမြစ်ကမ်းအနီးရှိ ယာတဲ၌ ဖောက်ခွဲရေးလုပ်ငန်းများလုပ်မည့် ဦးဆောင်သူ ရဲရင့်ကျော် (ခ)စွန်ရဲ (၃၃)နှစ်အပါအဝင် အဖွဲ့ဝင်များဖြစ်သည့် ကျော်ဆန်းဦး (၂၀) နှစ်၊ ကိုကိုအောင်(ခ)တစ်ထောင်(၁၉)နှစ်၊ ဝေယံထက်(ခ)ဇီးကွက်(၁၈)နှစ်၊ စိုးစိုး(ခ) မောင်စိုး (၃၇)နှစ်၊ နေလင်းအောင်(ခ) ဥသြ (၁၇)နှစ်၊ ကောင်းခန့်ဇော်(ခ)ကောင်းစိန် (၁၈)နှစ်၊ ကျော်ရဲသူ(ခ)ကျားလေး(၁၇)နှစ်၊ အောင်ဇော်ထက်(ခ)ကိုကောင်း(၂၃) နှစ်၊ ရာပြည့်(၁၈)နှစ်နှင့် အကြမ်းဖက်သမား များအား ကူညီထောက်ပံ့ပေးနေသည့် ကြည်မင်း (၄၈)နှစ်၊ ခင်နှင်းစိုး(၄၅)နှစ်၊ ကိုမြင့် (၅၅)နှစ်နှင့် စိုးစိုး (၄၅)နှစ်၊ စုစု ပေါင်းတရားခံ ၁၄ ဦးအား လက်လုပ် သေနတ်မျိုးစုံ ၇ လက်၊ လက်လုပ်စိန်ပြောင်း ၅ လက်၊ လက်လုပ်မိုင်း ၁၉ လုံး၊ ကျည် မျိုးစုံ ၁၇၆ တောင့်၊ အခြားဖောက်ခွဲရေး ဆက်စပ်ပစ္စည်းများနှင့်အတူ ဖမ်းဆီးရမိ ခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ယင်းတို့ကို ဖေဖော်ဝါရီ လ ၁၅ ရက်၊ နံနက်ပိုင်းက ဖမ်းဆီးရမိစဉ် ဓားစာခံအဖြစ် ဖမ်းဆီးချုပ်နှောင်ထားသည့် အရပ်သား အမျိုးသား ၂ ဦး၊ အမျိုးသမီး ၁ ဦး နှင့် ကလေးငယ် ၁ ဦး တို့ကိုလည်း လုံခြုံရေးတပ်ဖွဲ့ဝင်များက ကယ်တင်နိုင်ခဲ့ကြောင်း သိရသည်။

ဖမ်းဆီးရမိသူများ၏ ထွက်ဆိုချက်အရ ဓားစာခံအဖြစ် ဖမ်းဆီးခံထားရသည့် အမျိုးသား ၁ ဦးသည် မုံရွာမြို့ပေါ်၌ ထောင်ထားသည့်မိုင်းများကို တွေ့ရှိသဖြင့် ဖြုတ်ယူခဲ့သောကြောင့် ကလေးငယ် ၁ ဦးအပါအဝင် မိသားစုတစ်စုလုံးကို ဖမ်းဆီးထားခြင်းဖြစ်ကြောင်း၊ ထို့အပြင် ကျန် အမျိုးသား ၁ ဦးမှာ ငွေကြေးတောင်းခံနိုင်ရန်အတွက် ပြန်ပေးဆွဲထားခြင်းဖြစ်ကြောင်း စစ်ဆေးသိရသည်ကို နစက အနေဖြင့် အထက်ပါအတိုင်း ထုတ်ပြန်ခြင်း ဖြစ်ကြောင်း သိရသည်။

ယင်းတို့အနေဖြင့် ပြီးခဲ့သည့် ဇန်နဝါရီလ က အများပြည်သူနှင့် သက်ဆိုင်သောနေရာများဖြစ်သည့်မုံရွာမြို့၊ ထန်းတောကျွန်းဆွယ် ရပ်ကွက်၊ အင်းဖြတ်လမ်းတွင် လက်လုပ်မိုင်းတစ်လုံး၊မုံရွာမြို့၊ စက်မှုဇုန်လမ်းဆုံတွင် လက်လုပ်မိုင်း ၃ လုံး တို့ဖြင့်လည်းကောင်း၊ ဖေဖော်ဝါရီလက မုံရွာမြို့၊ အလယ်ရပ်ကွက်၊ ပြည်ထောင်စုလမ်းနှင့် ကျောက္ကာလမ်းထောင့်ရှိ ယာဉ်ထိန်းရုံးကိုလက်လုပ်မိုင်း ၂ လုံးဖြင့် လည်းကောင်း၊ ပစ်ခတ်ဖောက်ခွဲခဲ့ကြောင်း၊မတ်လ ၁၂ ရက်က မုံရွာမြို့၊ ရွှေဂုံးရပ်ကွက်၊ အင်းစပ်လမ်းတွင် လက်လုပ်မိုင်း ၂ လုံး ကိုလည်းကောင်း အသီးသီး ဖောက်ခွဲခဲ့ကြောင်း သိရသည်။

၎င်းအပြင် ၂၀၂၂ ခုနှစ် နိုဝင်ဘာလက မုံရွာမြို့၊ နန္ဒဝန်ရပ်ကွက်နေ ဦးဂျစ်တူး ဆိုသူအား ဒလန်ဟုစွပ်စွဲ၍လည်းကောင်း၊၂၀၂၃ ခုနှစ် ဇန်နဝါရီလက မုံရွာမြို့နယ်၊ ကတို့ကုန်းကျေးရွာနေ ဦးကျော်မိုး ဆိုသူအား ဒလန်ဟုစွပ်စွဲ၍ လည်းကောင်း၊ဖေဖော်ဝါရီလက ရေဦးမြို့နေ နက်တူး ဆိုသူအား ဒလန်ဟုစွပ်စွဲ၍ လည်းကောင်း ဖမ်းဆီးသတ်ဖြတ်ခဲ့ကြကြောင်း စစ်ဆေးပေါ်ပေါက်ခဲ့ကြောင်း သိရသည်။

ထို့အပြင် ၎င်းတို့ ထောင်ထားသည့် မုံရွာမြို့ပေါ်ရှိ ပြည်ထောင်စုလမ်းနှင့် ဘိုးဘွားရိပ်သာအဝိုင်းအနီး လမ်းဘေးဘယ်ညာတွင် လက်လုပ်မိုင်း ၇ လုံး၊ ဗိုလ်ချုပ်လမ်းပေါ်ရှိ “စိမ်းရောင်စုံ” ဘီယာဆိုင်အနီးတွင် လက်လုပ်မိုင်း ၂ လုံးထောင်ထားကြောင်း ဖော်ထုတ်သိရှိရသဖြင့် လုံခြုံရေးတပ်ဖွဲ့ဝင်များက သွားရောက်၍ လုံခြုံရေးအဖွဲ့က ရှင်းလင်းနိုင်ခဲ့ကြောင်းလည်း သိရသည်။

ဖမ်းဆီးရမိသူများ၏ ထွက်ဆိုချက်အရ ကြည်မင်း၊ ခင်နှင်းစိုး၊ ကိုမြင့်နှင့် စိုးစိုးတို့က မုံရွာမြို့နယ် အတွင်းဖောက်ခွဲဖျက်ဆီးမှုများ ပြုလုပ်နိုင်ရန် အတွက် လိုအပ်သည့် ဖောက်ခွဲဖျက်ဆီးရေး ဆက်စပ်ပစ္စည်းများကို မုံရွာမြို့ပေါ်ရှိ ဈေးဆိုင်များမှ သွားရောက်ဝယ်ယူပေးခြင်း၊ အကြမ်းဖက်သမားများအတွက် ရိက္ခာများ စုဆောင်းပေးခြင်း၊ ၎င်းတို့နှင့် ပုဂ္ဂိုလ်ရေးအရ မကျေနပ်သူများကို ဖမ်းဆီးရန် ဒလန်ဟုပြော၍ သတင်းပေးခြင်းများကို လုပ်ဆောင်ခဲ့ကြကြောင်းလည်း ဖော်ထုတ်သိရှိရကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

ymg/mt
#Yangon_Media_Group

#LocalNews
Published_ 23 March 2023

ရန်ကုန်သင်္ကြန်ပွဲတော်အတွက် ရေကစားစရာပစ္စည်းများ စတင်ဝင်ရောက်နေပြီး အရောင်းသွက်နေသည့်အတွက် ပစ္စည်းပြတ်နေကြောင်း ကစားစရာပစ္စည်းရောင်းချသည့် ဆိုင်များမှသိရသည်။

ယခင်နှစ်က ယခုလိုအချိန်တွင် အရောင်းအဝယ်အေးခဲ့ပေမယ့် ယခုနှစ်တွင် ပြန်လည်အရောင်းအဝယ်ဖြစ်လာကြောင်း ရန်ကုန်မြို့ ၂၄ လမ်းအတွင်း ရေကစားစရာရောင်းချသည့်ဆိုင်များကို မေးမြန်းချက်အရသိရသည်။

ယခုနှစ်တွင် လူကြိုက်များသည့် မျက်နှာဖုံး၊ ရေပြွတ်၊မျက်မှန်၊ ပန်းကုံး၊ရေဖလားအစရှိသော ရေကစားပစ္စည်းများ အရောင်းသွက်လာကြောင်းသိရသည်။

ရန်ကုန်သင်္ကြန်ပွဲတော်ကို ဧပြီလ ၁၂ ရက်နေ့မှ ၁၅ ရက်နေ့အထိ ကျင်းပသွားမှာဖြစ်ပြီး နေပြည်တော်ကောင်စီနေပြည်မှာလည်း လမ်းလျှောက်သင်္ကြန် ထည့်သွင်းဖို့စီစဉ်နေကြောင်း ပြန်ကြားရေးဝန်ကြီးဌာနကထုတ်ပြန်ထားပါသည်။

yng/ynzw
#Yangon_Media_Group

#LocalNews
Published_ 23 March 2023

အမှတ်(၃)အဆန် လူစီးအမြန်ရထား လက်လုပ်မိုင်းဖြင့် ဖောက်ခွဲခံရ၊ ခရီးသည် ၂ ဦးဒဏ်ရာရခဲ့ကာ ရထားစက်ခေါင်း၏ လေကာမှန်များ၊ စက်ခေါင်းနောက်ကပ်လျက် ရိုးရိုးတန်းလူစီးတွဲ၏ အတက်အဆင်းပေါက် တံခါးမကြီး၊ပြတင်းပေါက် နှစ်ပေါက် ၊ အစုန်လမ်းပေါ်မှ ကွန်ကရစ်ဇလီးဖားတုံးအသစ် (၃)တုံးတို့ ပျက်စီးခဲ့ကြောင်း သိရသည်။

မန္တလေးသို့ ပုံမှန်ထွက်ခွါလာသော အမှတ်(၃)အဆန် လူစီးအမြန်ရထားသည် မတ်လ ၂၁ ရက် ညနေ ၃နာရီ ၄၅မိနစ်တွင် ပဲခူးတိုင်းဒေသကြီး၊ အုတ်တွင်းမြို့နယ် ဇေယျဝတီဘူတာနှင့် ညောင်ခြေထောက်ဘူတာ အကြား မိုင်တိုင်အမှတ် (၁၄၂/၉-၁၀)အား ဖြတ်သန်းခုတ်မောင်းစဉ် အထက်ပါအတိုင်း ဖောက်ခွဲခံခဲ့ရကြောင်း၊ဦးခေါင်းနှင့်လက်တို့တွင် မိုင်းစထိမှန် ဒဏ်ရာရရှိခဲ့သည့် ခရီးသည် အမျိုးသား(၂)ဦးတို့၏ ၎င်းတို့အား ကျွဲပွဲဆေးရုံ၌ ဆေးကုသမှုခံယူလျက်ရှိကြောင်းသိရသည်။

မိုင်းဖြစ်စဉ်ကြောင့် အမှတ်(၃)အဆန် လူစီးအမြန်ရထားသည် ၂ နာရီခန့်၊ အမှတ်(၆) အစုန် လူစီးအမြန်ရထားသည် ၅ နာရီ ၃၀ မိနစ်ခန့်နှင့် အမှတ်(၄)အစုန် လူစီး အမြန် ရထားသည် ၃ နာရီ ၃၀ မိနစ်ခန့် နီးစပ်ရာဘူတာများတွင် စောင့်ဆိုင်း ကြန့်ကြာခဲ့ရသဖြင့် ရထားစီးခရီးသည် စုစုပေါင်း (၃၀၀၀)ဦးခန့်လမ်းခရီး၌ အခက်အခဲများစွာ ကြုံတွေ့ခဲ့ရကြောင်း သရသည်။

ပို့ဆောင်ရေးနှင့် ဆက်သွယ်ရေးဝန်ကြီးဌာန၊ မြန်မာ့မီးရထားအနေဖြင့် နိုင်ငံအနှံ့ရှိ ပြည်သူ လူထု ကုန်ကျစရိတ်သက်သာစွာဖြင့် ခရီးသွားလာမှု၊ ကုန်စည်ပို့ဆောင်မှုများ အဆင်ပြေစေရေးအတွက် ရည်ရွယ်၍ အမြန်လူစီးရထားခရီးစဉ် (၁၈)ခု၊ စာပို့ရထားခရီးစဉ် (၁၂)ခု၊ လူစီးကုန်တင် ရထားခရီးစဉ် (၈)ခုတို့နှင့် ရန်ကုန်မြို့ပတ်နှင့် ဆင်ခြေဖုံးရထားခရီးစဉ် (၃၀)ခု၊ စုစုပေါင်း ရထား ခရီးစဉ် (၆၈)ခုတို့နှင့် ကုန်ရထားခရီးစဉ်များကို နေ့စဉ် စီစဉ်ပြေးဆွဲပေးလျက်ရှိကြောင်း အဆိုပါ ဌာန စာရင်းများအရ သိရသည်။

ရန်ကုန်-မန္တလေး ရထားလမ်းပိုင်း၌ အမြန်ရထား(၄)စင်း၊ စာပို့ရထား(၂)စင်းနှင့် လူစီးကုန်တင် ရထား (၂)စင်းတို့ကို နေ့စဉ်ပြေးဆွဲပေးလျက်ရှိရာ လက်ရှိအခြေအနေအရ အခြေခံပညာကျောင်းများ အတန်းတင် စာမေးပွဲပြီးစီးပြီဖြစ်၍ ပြည်သူများသည် မိသားစုအလိုက် ခရီးဝေးသွားလာခြင်း၊ ဘုရားဖူးခရီးစဉ်များ သွားလာခြင်းတို့ဖြင့် ရထားများအားလုံးတွင် ခရီးသည်များ တွဲဆိုင်းအပြည့် လိုက်ပါ စီးနင်းလျက်ရှိကြောင်းလည်း သိရသည်။

ပြီးခဲ့သည့်၂၀၂၁ ခုနှစ်၊ ဖေဖော်ဝါရီ (၁)ရက်မှစ၍ မြန်မာ့မီးရထားလမ်း ကွန်ယက်တစ်ခုလုံးအနေဖြင့် ရထားလမ်းနှင့် ရထားဘူတာ နယ်မြေအတွင်း ဗုံးထောင်၊ မိုင်းခွဲဖျက်စီးခြင်း(၁၀၉)ကြိမ်၊ ရထားတံတားများကို မိုင်းခွဲဖျက်စီးခြင်း (၃၇)ကြိမ်၊ ဘူတာများကိုမီးရှို့ဖျက်စီးခြင်း(၁၁)ကြိမ် ဖျက်ဆီးခံခဲ့ရပြီ ဖြစ်ကြောင်း သိရသည်။

ymg/mt
#Yangon_Media_Group

#LocalNews
Published_ 23 March 2023
အသက် (၁၅) နှစ်အောက် လူငယ်ဘောလုံးပြိုင်ပွဲ ( FIFA-MFF U15 Youth League 2023) ကို ယခုနှစ် မေလပထမပတ်တွင် အထက်မြန်မာပြည်ဇုန်နှင့် အောက်မြန်မာပြည်ဇုန်အဖြစ် ရန်ကုန်မြို့နှင့် မန္တလေးမြို့များတွင် ကျင်းပပြုလုပ်ရန် စီစဉ်ဆောင်ရွက်လျက်ရှိကြောင်းမြန်မာနိုင်ငံ ဘောလုံးအဖွဲ့ချုပ်က သိရသည်။

အဆိုပါ ပြိုင်ပွဲများကို မြန်မာနိုင်ငံ ဘောလုံးအဖွဲ့ချုပ်အနေဖြင့် လူငယ်မျိုးဆက်သစ်များ ဘောလုံးလှုပ်ရှားမှုများတွင် ပါဝင်လာရေး၊ ပြည်တွင်း လူငယ်ပြိုင်ပွဲများ စဉ်ဆက်မပြတ် ကျင်းပနိုင်ရေး၊ မျိုးဆက်သစ် လူငယ်ကစားသမားများ ပေါ်ထွက်လာရေး၊ FIFA, AFC, AFF လူငယ်ပြိုင်ပွဲများတွင် မြန်မာ့လက်ရွေးစင် လူငယ်အသင်းများ အောင် မြင်မှု ရရှိရေးရည်ရွယ်၍ ကမ္ဘာ့ဘောလုံးအဖွဲ့ချုပ် လမ်းညွှန်ချက်များအတိုင်းကျင်းပရန် စီစဉ်ခြင်းဖြစ်ကြောင်း သိရသည်။

ပြိုင်ပွဲတွင် စုစုပေါင်း အသင်း ၂၄ သင်း ပါဝင်ယှဉ်ပြိုင်မည်ဖြစ်ပြီး အထက်မြန်မာပြည်ဇုန်( မန္တလေး)တွင် မန္တလေးတိုင်းဒေသကြီးမှ ၂ သင်း၊ စစ်ကိုင်းတိုင်း ဒေသကြီးမှ ၂ သင်း၊ မကွေးတိုင်းဒေသကြီးမှ ၁ သင်း၊ နေပြည်တော်ကောင်စီမှ ၁သင်း၊ ရှမ်းပြည်နယ်မှ ၃ သင်း၊ ချင်းပြည်နယ်မှ ၁သင်း၊ ကယား ပြည်နယ်မှ ၁ သင်း၊ ကချင်ပြည်နယ်မှ ၁ သင်း၊ အောက်မြန်မာပြည်ဇုန် (ရန်ကုန်)တွင် ရန်ကုန်တိုင်းဒေသကြီးမှ ၃ သင်း၊ ပဲခူးတိုင်း ဒေသကြီးမှ ၂ သင်း၊ ဧရာဝတီတိုင်းဒေသကြီး(ပုသိမ်)မှ ၂ သင်း၊ တနင်္သာရီတိုင်းဒေသကြီးမှ ၁သင်း၊ မွန်ပြည်နယ်မှ ၂ သင်း ၊ ရခိုင်ပြည်နယ်မှ ၁ သင်း၊ ကရင်ပြည်နယ်မှ ၁ သင်း ပါဝင်ကြမည် ဖြစ်ကြောင်း သိရသည်။

တိုင်းဒေသကြီးနှင့် ပြည်နယ်များတွင် ပြိုင်ပွဲဝင်လိုသည့် အသင်းအရေအတွက် သတ်မှတ်ထားသည်ထက် ပိုမိုနေပါက ခြေစစ်ပွဲ ကစားရမည်ဖြစ်ကြောင်း၊ပြိုင်ပွဲကို အပတ်စဉ် စနေနှင့် တနင်္ဂနွေများတွင် ကျင်းပမည်ဖြစ်ပြီး ပြိုင်ပွဲကာလမှာ ပထမအကျော့ ၃ လ၊ ဒုတိယအကျော့ ၃ လ စုစုပေါင်း ၆ လ ကြာ မြင့်မည်ဖြစ်ကြောင်း သိရသည်။

ပြိုင်ပွဲဝင် အသင်းများ မှတ်ပုံတင်ရမည့် ကာလကို ၂၀၂၃ ခုနှစ်၊ မတ် ၃၁ ရက် နောက်ဆုံးထား သတ်မှတ်ထားပြီး မြန်မာနိုင်ငံဘောလုံးအဖွဲ့ချုပ် FIFA-MFF U15 Youth Leagueဌာနသို့ ဆက်သွယ် မှတ်ပုံတင်နိုင်ကြောင်း၊ပြိုင်ပွဲဝင်ခွင့်ရ အသင်းများကို တစ်သင်းလျှင် ကျပ် သိန်း ၁၀၀ ထောက်ပံ့သွားမည်ဖြစ်ပြီး ပထမဆုရအသင်းကို ကျပ် သိန်း ၅၀၊ ဒုတိယဆုရအသင်းကို ကျပ် သိန်း ၃၀၊ တတိယဆုရအသင်းကို ကျပ် သိန်း ၂၀ ၊ ဆုဖလားနှင့် ဆုတံဆိပ်များ ပေးအပ်ချီးမြှင့်သွားမည်ဖြစ်ကြောင်း မြန်မာနိုင်ငံ ဘောလုံးအဖွဲ့ချုပ်က ထုတ်ပြန်ထားသည်။

ymg/mt
#Yangon_Media_Group

#LocalNews
Published_ 23 March 2023

ထိုင်းနိုင်ငံ၊ လာ့တ်ချဘူရီခရိုင်၊ ဘန်ဖယ်မြို့နယ်၊ ဝတ်ကဲ့ယောက်ကျေးရွာအနီး၌ လိုင်းကားပေါ်တွင် လိုက်ပါလာသည့် အထောက်အထာ;မဲ့ မြန်မာနိင်ငံသား(၄၃)ဦးကို ထိုင်းနိုင်ငံ သက်ဆိုင်ရာ ရဲတပ်ဖွဲ့က ဖမ်းဆီးမိခဲ့ကြောင်း သိရသည်။

မတ်လ ၂၂ ရက်က ဘန်ဖယ်ရဲစခန်းမှ ရဲတပ်ဝင်များပါဝင်သော ပူးပေါင်းအဖွဲ့အနေဖြင့် ဘန်ဖယ်မြို့နယ်၊ ဝတ်ကဲ့ယောက် ကျေးရွာအနီး၊ဘန်ဖယ်-ဒံနိမ်စဒွက်လမ်းမပေါ်ရှိ ကီလိုမိုင်တွင် ၁၁ တွင် ခရီးသည်တင်ယာဉ် လိုင်းကားတစ်စီးကို ရပ်တန့်စစ်ဆေးရာ အထက်ပါအတိုင်း ဖမ်းမိခဲ့ခြင်း ဖြစ်ကြောင်း သိရသည်။

အဆိုပါ ခရီးသည်တင်ယာဉ်မောင်းမှာ ထိုင်းနိုင်ငံသား အသက် ၆၅ နှစ် အရွယ် ဖိုင်ဘွန်ဆိုသူဖြစ်ကြောင်း ၊ ကားပိုင်ရှင်၏ စေခိုင်းချက်အရ အဆိုပါ မြန်မာနိုင်ငံသားများအား နခွန်ပထုံခရိုင်၊ ဘန့်ဖဲ့ယို့မြို့နယ်မှတစ်ဆင့် လာ့ချဘူရီခရိုင်၊ ဒံနိမ်စဒွက်မြို့နယ်ရှိ အုန်းသီးဂိုဒေါင်သို့ သွားရောက်အလုပ်လုပ်ကိုင်ရန် ပို့ဆောင်ပေးရခြင်းဖြစ်ကြောင်း ထိုင်းရဲတပ်ဖွဲ့ထံ ဖြောင့်ချက်ပေးခဲ့ကြောင်း သိရသည်။

ယခုအခါ ဖမ်းမိသော မြန်မာနိုင်ငံသားများနှင့် ခရီးသည်တင်ယာဉ်မောင်းတို့ကို ဘန်ဖယ်ရဲစခန်းသို့ ပို့ဆောင်ထားကာ ထိုင်းနိုင်ငံ၊ ဥပဒေအရအရေးယူမည်ဖြစ်ကြောင်း သိရသည်။

ymg/mt
#Yangon_Media_Group

#LocalNews
Published_ 23 March 2023

မြန်မာနိုင်ငံတွင် သဘာဝရေအရင်းအမြစ်ကြွယ်ဝသည် ဆိုသော်လည်း အချို့နေရာဒေသများတွင် သောက်သုံးရေအခက်အခဲ မလုံလောက်သည့် ပြဿနာများရှိနေကြောင်း၊ အထူးသဖြင့် အပူပိုင်းအညာဒေသ၊ မိုးခေါင်ရေရှားဒေသတချို့တွင် နွေရာသီကာလ၌ သောက်သုံးရေအခက်အခဲများရှိနေသည်အပြင်အဆိုပါ ကျေးလက်ဒေသများ၏ အဓိကစီးပွားရေးလုပ်ငန်းဖြစ်သည့် စိုက်ပျိုးရေးနှင့် မွေးမြူရေး လုပ်ငန်းများတွင်လည်း ရေအခက်အခဲကြောင့် လူမှုစီးပွားဘဝအဆင်မပြေမှုများရှိနေကြောင်း နစက ဥက္ကဌက ပြောသည်။

မတ်လ ၂၂ ရက်က နေပြည်တော်ရှိ မြန်မာ အပြည်ပြည်ဆိုင်ရာ ကွန်ဗင်းရှင်း ဗဟိုဌာန-၂ (MICC-II)၌ ကျင်းပပြုလုပ်ခဲ့သည့် ကမ္ဘာ့ရေနေ့ ၂၀၂၃ အခမ်းအနားအတွင်း အမျိုးသားအဆင့် ရေအရင်းအမြစ်ကော်မတီဥက္ကဋ္ဌ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က အထက်ပါအတိုင်း ပြောကြားခဲ့ခြင်း ဖြစ်သည်။

ယခုနှစ် ကမ္ဘာ့ရေနေ့ ၂၀၂၃ အတွက် အထူးပြုအကြောင်းအရာ “Theme” မှာ ရေဆိုင်ရာလိုအပ်ချက်များ ဖြည့်ဆည်းရေးကို ရည်မှန်းချက်ထားသည့် “အရှိန်အဟုန်မြှင့်ရှေ့သို့ ကြိုးပမ်းပြောင်းလဲ ဆောင်ရွက်ခြင်း ” “ Accelerating Change ” ဖြစ်ကြောင်း၊ရေညစ်ညမ်းမှုသည် သဘာဝကြောင့် ဖြစ်နိုင်သကဲ့သို့ လူများ၏ ပယောဂ များကြောင့်လည်း ဖြစ်နိုင်ခြင်းကြောင့် သန့်ရှင်းသည့်ရေအရင်း အမြစ်ဖြစ်အောင် ထိန်းသိမ်းကြဖို့နှင့် ညစ်ညမ်းသည့် ရေမဖြစ်အောင် သတိပြုကြရန် အရေးကြီးကြောင်း ယင်းက ဆိုသည်။

မြန်မာနိုင်ငံတွင် မြစ်ချောင်းများ၊ အင်းအိုင်များ၊ သဘာဝရေထွက်များစသည့် ပုံစံအမျိုးမျိုးဖြင့် ရေချိုအရင်းအမြစ်များ များပြားခြင်းကြောင့် တစ်ကမ္ဘာလုံး ရေချိုပိုင်ဆိုင်မှု၏ ၁ ဒသမ ၇ ရာခိုင်နှုန်းရှိသည်ဟု သိရသည့်အတွက် ရေချိုပေါများသော နိုင်ငံဟုဆိုရမည်ဖြစ်ပါကြောင်း၊ အချို့နိုင်ငံများတွင် ရေချိုမလုံလောက်သဖြင့် ပင်လယ်ရေငန်ကို ပြုပြင်သုံးစွဲရတာမျိုး၊ စွန့်ပစ်ရေဆိုးကို ပြန်လည်ပြုပြင်သုံးစွဲနေရခြင်း မျိုးများရှိနေသည်ကိုလည်း ၎င်းက ထည့်သွင်းပြောကြားခဲ့သည်။

ကမ္ဘာ့မြေမျက်နှာပြင်၏ ၇၁ ရာခိုင်နှုန်းသည် ရေများဖုံးလွှမ်းလျက်ရှိသော်လည်း အဆိုပါရေပမာဏ၏ ၉၆ ဒသမ ၅ ရာခိုင်နှုန်းခန့်သည် ပင်လယ်၊ သမုဒ္ဒရာများ ဖြစ်ပါကြောင်း၊ ကျန်ရှိသည့် ၃ ဒသမ ၅ ရာခိုင်နှုန်းခန့်သာ ရေချို၊ ပြန်လည် ပြည့်ဖြိုးမြဲရေဖြစ်ပြီး ထိုအထဲတွင် ဝင်ရိုးစွန်းများတွင်ရှိသည့် ရေခဲတောင်၊ ရေခဲပြင်များသည် ၆၈ ရာခိုင်နှုန်းနှင့် မြေအောက်ရေ ၃၀ ရာခိုင်နှုန်းခန့် ရှိနေသည်ကို လေ့လာ သိရှိရပါကြောင်း၊ ထို့ကြောင့် မြေပြင်ပေါ်တွင်ရှိသည့် ရေအားလုံး၏ သုညဒသမ ၅ ရာခိုင်နှုန်းလောက်သာ ရေချိုဖြစ်ကြောင်း နိုင်ငံတကာ အချက်အလက်များအရ သိရသည်။

ymg/mt
#Yangon_Media_Group

#World_News
Published 23 March 2023

ကယ်လီဖိုးနီးယားကို ပြင်းပြင်းထန်ထန် တိုက်ခတ်လာတဲ့ ဆောင်းတွင်းမုန်တိုင်းက ဗုဒ္ဓဟူးနေ့မှာ အနောက်တောင်သဲကန္တာရပြည်နယ်များသို့ ပျံ့လွင့်လာပြီး ဆန်ဖရန်ဆစ္စကိုနဲ့အနားတဝိုက်မှာ မုန်တိုင်းကြောင့် သစ်ပင်များပြိုလဲရာမှ အနည်းဆုံး လူ ၅ ဦးသေဆုံးခဲ့ကြောင်း အာဏာပိုင်များက ဖော်ပြခဲ့ကြပါတယ်။

ကယ်လီဖိုးနီးယားမှာ အင်္ဂါနေ့က မိုးရွာခြင်း၊ လေနဲ့ တောင်ဆီးနှင်းများ ကျဆင်းလာခြင်းကြောင့် ဓာတ်အားလိုင်းများပြတ်တောက်ခဲ့ပြီး အိမ်ခြေနဲ့စီးပွားရေးလုပ်ငန်း ၉၂,၀၀၀ ကျော် လျှပ်စစ်မီးများ ပြတ်တောက်ခဲ့ပါတယ်။

ဗုဒ္ဓဟူးနေ့လယ်အထိ ရေကြီးနေတာကြောင့် လူပေါင်း ၁၄,၀၀၀ ခန့်ကို ထွက်ပြေးခိုင်းထားပါတယ်။

မိုးရွာသွန်းမှုကြောင့် ချောင်းများ ကမ်းပါးများ လျှံတက်ခြင်း ဒါမှမဟုတ် မုန်တိုင်းအားလျော့ပြီး ကမ်းပါးပြိုကျခြင်းဖြစ်စဉ်တို့မှာ ပြည်နယ်တစ်ဝန်းရှိ လူပေါင်း ၄၈,၀၀၀ နီးပါး ကုန်းမြင့်နေရာများပေါ်သို့ ထွက်ပြေးရန်အသင့်ရှိနေဖို့ သတိပေးထားကြောင်း ကယ်လီဖိုးနီးယားအရေးပေါ်ဝန်ဆောင်မှုရုံးမှ ပြောရေးဆိုခွင့်ရှိသူ'ဒီယာနာခရော့ဖ်ပယ်လာယို'က ပြောကြားလိုက်ပါတယ်။

မကြာသေးမီက ကမ်းပါးပြိုကျမှုကြောင့် ရေများမြင့်တက်လာခဲ့တဲ့ ဆန်ယော်ကွင်းဗယ်လီက တူလဲကောင်တီဒေသရှိ လူပေါင်း ၁၂,၀၀၀ ခန့်ကို မဖြစ်မနေထွက်ပြေးဖို့ အမိန့်ထုတ်ထားပါတယ်။

မြစ်လေထုဆုတ်ယုတ်လာခြင်း၊ သမုဒ္ဒရာမှ ရေငွေ့သိပ်သည်းလာမှု၊ မိုးနှင့်ဆီးနှင်းထူထပ်ခြင်းတို့ကြောင့် မုန်တိုင်းဖြစ်လာရတာဖြစ်ပါတယ်။
ဒီဇင်ဘာနောက်ပိုင်း အနောက်ကမ်းရိုးတန်းကို ၁၂ ကြိမ်မြောက်မုန်တိုင်းဝင်ခဲ့တာဖြစ်ပြီး မိုးရွာသွန်းခြင်းနဲ့အတူ လေပြင်းများတိုက်ခတ်ကာ အချို့နေရာများမှာ အပျက်အဆီးအများဆုံး ဖြစ်ခဲ့ပါတယ်။

ကယ်လီဖိုးနီးယားပင်လယ်အော်တလျှောက် အင်္ဂါနေ့က လေပြင်းများတိုက်ခတ်ကာ သစ်ပင်ပြိုလဲပြီး လူထိခိုက်တာကြောင့် ဆန်ဖရန်ဆစ္စကိုမှာ ၂ ဦး၊ အုတ်ခ်လန်းမှာ ၁ ဦး၊ ကွန်ထရာကော့စ်တာကောင်တီမှာ ၁ ဦး၊ ဆန်မက်တီယိုကောင်တီမှာ ၁ ဦးတို့ သေဆုံးခဲ့ကြောင်း ဒေသတွင်းမီဒီယာများက ဖော်ပြထားကြပါတယ်။

အနည်းဆုံးလူ ၂ ဦးက ကားထဲမှာသေဆုံးခဲ့ကာ တစ်ဦးက တဲထဲမှာသေဆုံးခဲ့တာဖြစ်ပါတယ်။

ယခုဆောင်းတွင်းရာသီဥတုဆိုးကြောင့် ကယ်လီဖိုးနီးယားတလျှောက်မှာ မုန်တိုင်းကြောင့်သေဆုံးသူ ၂၀ ကျော်ရှိခဲ့ပါတယ်။

ကနဦးတင်ပြချက်များအရ ဆန်ဖရန်ဆစ္စကိုမှာ သစ်ပင်ပြိုလဲမှုပေါင်း ၇၀၀ ကျော်ဖြစ်ထားသလို အထပ်မြင့်အဆောက်အအုံတွေမှ ဖန်ကွဲစများနဲ့ အစအနများလွင့်စင်ထွက်လာကြပါတယ်။

လူတွေရဲ့လုပ်ရပ်ကြောင့် ရာသီဥတုအပြောင်းအလဲများဖြစ်ပေါ်လာကြောင်း ကျွမ်းကျင်သူများကဆိုလိုက်ကာ အရင်နှစ်တွေတုန်းက မိုးခေါင်ခြင်းနဲ့ တောမီးလောင်ကျွမ်းခြင်းများ ဖြစ်ပေါ်ထားတဲ့ ပြည်နယ်တစ်ခုမှာ အခုဆိုရင် ရေလျှံတဲ့ဆောင်းတွင်းဖြစ်လာခဲ့ပါတယ်။

မိုးအကြီးအကျယ်ကျခြင်းကြောင့် ရေကုန်ခမ်းနေတဲ့ ရေလှောင်ကန်များ ရေပြည့်လာပြီး တောင်ပေါ်ဆီးနှင်းတုံးများ ဖြစ်ပေါ်လာပါတယ်။

ဗုဒ္ဓဟူးနေ့မှာ မိုး၊ ဆီးနှင်း၊ လေတို့ ပြေလျော့သွားပြီး နီဗားဒါး၊ အရီဇိုးနား၊ ကော်လိုရာဒို၊ နယူးမက္ကဆီကိုနဲ့ ယူတာပြည်နယ်တို့ကို မုန်တိုင်းဖြတ်သန်းသွားပါတယ်။

Source: Reuters
#YangonZ_Media_Group

#LocalNews
Published_ 23 March 2023

Facebook လူမူကွန်ယက်တွင် လူအကြည့်များသည့် Ghost Hunters အဖွဲ့သည် မတ်လ ၂၂ရက်နေ့ ညက ဗိဿနိုးမြို့ဟောင်းကို ဝိဉာဉ်ရှာဖွေရိုက်ကူးရေး လုပ်စဉ်အဖမ်းခံရကြောင်း အဆိုပါအဖွဲ့ ရိုက်ကူးထုတ်လွှင့်နေသည့် ၂၆ မိနစ်ကြာသည့် တိုက်ရိုက်ရုပ်သံမှတ်တမ်းအရသိရသည်။

အဆိုပါတိုက်ရိုက်လွှင့်နေသည့်ရုပ်သံမှတ်တမ်းမှာ မတ် ၂၂ နေ့ည ၁၀ နာရီဝန်းကျင့်ခန့်က ထုတ်လွှင့်ခဲ့တာဖြစ်ပြီး ကြည့်ရူသူ ၁သိန်းကျော် ရှိခဲ့သည်။ရိုက်ကူးထုတ်လွှင့်နေစဉ် ယူနီဖောင်းဝတ်ဆင်ထားသည့် အာဏာပိုင်များက အချက်ပေးခရာများမူတ်သည့်အသံကိုလည်း ရုပ်သံမှတ်တမ်းတွင်တွေ့ရှိရသည်။

အဆိုပါ Ghost Hunters အဖွဲ့သည် မြန်မာနိုင်ငံအတွင်းရှိ သရဲခြောက်သည်ဆိုသောနေရာများကို သွားရောက်ပြီး ရိုက်ကူးထုတ်လွှင့်နေသည့် အဖွဲ့လည်းဖြစ်ကြောင်းသိရသည်။အဖမ်းမခံရစဉ် လူမူကွန်ယက်တွင် မကျွတ်မလွတ်သေးသည့် သမိုင်းထဲကနာမည်ကြီး ဗိဿနိူးဘုရင်မကြီးနှင့်အစောင့်အရှောက်များဆိုပြီး ၎င်းတို့၏တရားဝင် လူမူကွန်ယက်စာမျက်နှာတွင် ဖော်ပြထားသည်။

အဆိုပါရုပ်သံမှတ်တမ်းကိုကြည့်လိုပါ Ghost Hunters Myanmar Facebook စာမျက်နှာတွင်ဝင်ရောက်ကြည့်ရူနိုင်သည်။
yng/ynzw
#Ghost Hunters Myanmar
#Yangon_Media_Group

#LocalNews
Published_ 23 March 2023

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် နှင့် ရုရှားဖက်ဒရေးရှင်းနိုင်ငံ၊ ရှေ့နေချုပ် H.E. Mr. Igor Krasnov ဦးဆောင်သည့် ကိုယ်စားလှယ်အဖွဲ့တို့ မတ်လ ၂၂ ရက်က နေပြည်တော်ရှိ နိုင်ငံတော်စီမံ အုပ်ချုပ်ရေးကောင်စီဥက္ကဋ္ဌရုံး၊ သံတမန်ဆောင်ဧည့်ခန်းမ၌ တွေ့ဆုံ၍ ဥပဒေရေးရာများကို ဆွေးနွေးခဲ့ကြကြောင်း သိရသည်။

မြန်မာနိုင်ငံနှင့် ရုရှားနိုင်ငံတို့အကြား သံတမန်ဆက်ဆံရေး ဆိုင်ရာ တိုးတက်ကောင်းမွန်မှုအခြေအနေများ၊ ဥပဒေရေးရာကိစ္စရပ်များတွင် ပူးပေါင်း ဆောင်ရွက်မှုများ တိုးမြှင့်ဆောင်ရွက်သွားမည့်အခြေအနေများ၊ မြန်မာနိုင်ငံမှ ဥပဒေ ပညာရှင်များ ရုရှားနိုင်ငံတွင် ဥပဒေပညာရပ်များ သင်ကြားပေးမည့် အခြေအနေများနှင့် ရုရှားနိုင်ငံမှ ဥပဒေရေးရာကျွမ်းကျင်သူများက မြန်မာနိုင်ငံတွင် ဥပဒေနှင့်ပတ်သက်၍ လာရောက်သင်ကြားပေးမည့် အခြေအနေများ၊ စစ်ဘက်ဥပဒေများ သင်ကြားနိုင်ရေးအတွက် မြန်မာနိုင်ငံမှ သင်တန်းသားများစေလွှတ်သွားမည့် အခြေ အနေများ၊ မြန်မာနိုင်ငံတွင် ရုရှားဘာသာစကားသင်တန်းများ ဖွင့်လှစ်လျက်ရှိမှုနှင့် ရုရှားနိုင်ငံတွင် မြန်မာဘာသာစကားသင်တန်းများ ဖွင့်လှစ်သင်ကြားလျက်ရှိမှု အခြေအနေများနှင့် နှစ်နိုင်ငံအကြားပူးပေါင်းဆောင်ရွက်မှုများ ပိုမိုတိုးတက်အောင် ဆောင်ရွက်သွားမည့် အခြေအနေများနှင့်ပတ်သက်၍ ဆွေးနွေးခဲ့ကြခြင်းဖြစ်ကြောင်း သိရသည်။

ယင်းတွေ့ဆုံပွဲတွင် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်နှင့်အတူ ကောင်စီတွဲဖက်အတွင်းရေးမှူး ဒုတိယ ဗိုလ်ချုပ်ကြီး ရဲဝင်းဦး၊ အပြည်ပြည်ဆိုင်ရာပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီး ဦးကိုကိုလှိုင်၊ ဥပဒေရေးရာဝန်ကြီးဌာန ပြည်ထောင်စုဝန်ကြီး ၊ ပြည်ထောင်စုရှေ့နေချုပ် ဒေါက်တာ သီတာဦးတို့ တက်ရောက်ကြပြီး ရုရှားဖက်ဒရေးရှင်းနိုင်ငံ၊ ရှေ့နေချုပ် H.E. Mr. Igor Krasnov နှင့်အတူ မြန်မာ နိုင်ငံဆိုင်ရာရုရှားဖက်ဒရေးရှင်းနိုင်ငံ သံအမတ်ကြီး H.E. Dr. Nikolai LISTOPADOV နှင့် ကိုယ်စားလှယ်အဖွဲ့ဝင် များ တက်ရောက်ခဲ့ကြကြောင်း သိရသည်။

ymg/mt
#Yangon_Media_Group

#World_Health
Published 23 March 2023

သဘာဝဘယ်ရီသီးတစ်ခွက်နဲ့ ညီမျှတဲ့ အေးခဲခြောက်သွေ့တဲ့ ဘလူးဘယ်ရီးသီး ၂၅ ဂရမ်နေ့စဉ်စားသုံးခြင်းဖြင့် ကိုယ်ကာယလှုပ်ရှားမှုကို တိုးတက်စေကာ လေ့ကျင့်ခန်းပြုလုပ်စဉ်မှာလည်း ခန္ဓာကိုယ်အဆီကို ပိုမိုလောင်ကျွမ်းစေကြောင်း လေ့လာတွေ့ရှိခဲ့ပါတယ်။

ဘလူးဘယ်ရီသီးက စွမ်းအင်အတွက် ဖက်တီးအက်ဆစ်ဖြိုခွဲမှုဖြစ်စဉ်ကို မြှင့်တင်ပေးတဲ့အကြောင်းအရာနဲ့ ပတ်သက်ပြီး ကယ်လီဖိုးနီးယားပိုလီတက်ခ်နစ်ပြည်နယ်တက္ကသိုလ်နဲ့ ဂွန်ဇာဂါတက္ကသိုလ်တို့မှ သိပ္ပံပညာရှင်များက စမ်းသပ်ချင်ခဲ့ကြပါတယ်။

ဘလူးဘယ်ရီမှာ အန်သိုဆိုင်ယာနင် ဓာတ်တိုးဆန့်ကျင်ပစ္စည်းပါဝင်တာကြောင့် အဆီဖြိုခွဲမှုကို အားပေးတာဖြစ်နိုင်ပါတယ်။

ကျန်းမာသော အမျိုးသားစက်ဘီးစီး ၁၁ ဦးကို ကျန်းမာရေးနဲ့ပတ်သက်ပြီး မေးမြန်းခဲ့ကာ မိနစ် ၄၀ ကြာစက်ဘီးစီးခိုင်းခဲ့ပါတယ်။

စက်ဘီးစီးရင်း ၁၀ မိနစ်ကြာတိုင်း လက်ထိပ်သွေးဖောက်ကာ နမူနာယူခဲ့ပါတယ်။

သူတို့ဟာ အချိန်နှစ်ပတ်တိုင်အောင် နေ့စဉ် အန်သိုဆိုင်ယာနင် ၃၇၅ ဂရမ်ပါဝင်တဲ့ အေးခဲခြောက်သွေ့သော ဘလူးဘယ်ရီအမှုန့် ၂၅ ဂရမ်စားသုံးစေခဲ့ပါတယ်။

မိနစ် ၂၀ ကြာစက်ဘီးစီးပြီးနောက် အဆီဖြိုခွဲခြင်း ၁၉.၇ ရာခိုင်နှုန်းများပြားကာ မိနစ် ၃၀ ကြာပြီးနောက် ၄၃.၂ ရာခိုင်နှုန်း၊ မိနစ် ၄၀ အကြာမှာ ၃၁.၁ ရာခိုင်နှုန်း အသီးသီးမြင့်တက်သွားပါတယ်။

နောက်ဆုံးကောက်ချက်အရ အားကစားသမားတွေဟာ ဘယ်ရီသီးစားပြီးနောက် အဆီပိုမိုလောင်ကျွမ်းသွားပါတယ်။

ဒါ့အပြင် ဘလူးဘယ်ရီဟာ ကြွက်သားကိုပြန်လည်ပြေလျော့စေပြီး ခန္ဓာကိုယ်ကနေ လေ့ကျင့်ခန်းကို ပိုမိုတာရှည်ပြုလုပ်နိုင်အောင် စွမ်းအင်ထုတ်လုပ်ပေးပါတယ်။

အဆီဖြိုခွဲရာမှရတဲ့စွမ်းအင် နည်းပါးသွားတဲ့အခါ ခန္ဓာကိုယ်က ကာဗိုဟိုက်ဒရိတ်ကရတဲ့ ဂလိုင်ကိုဂျင်ကိုအသုံးပြုပြီး ဂလိုင်ကိုဂျင်လျော့ကျလာတာနဲ့အမျှ ပိုမိုပင်ပန်းလာစေပါတယ်။

ဒါ့အပြင်ဘလူးဘယ်ရီစားပြီးတဲ့အခါ နွမ်းနယ်ခြင်းကိုဖြစ်စေတဲ့ လက်တိတ်ပမာဏလျော့ကျစေပြီး လေ့ကျင့်ခန်းကိုရေရှည်ပြုလုပ်နိုင်ပါတယ်။

Source: NY Post
#Yangon_Media_Group