#Local_News
Published_ 11 May 2023

ပြင်ပရွှေပေါက်စျေးဟာ မေလ ၁၁ ရက်နေ့ မနက်ပိုင်းမှာ သိန်း၃၀ နဲ့ ၇၀၀ ၀န်းကျင်ပေါက်စျေးရှိနေပြီး ရန်ကုန်တိုင်းရွှေအသင်းကတော့ ၂၃သိန်း ၉ သောင်းကျော်ရည်ညွှန်းသတ်မှတ်ထားပါတယ်။ မေလ ပထမအပတ်ထဲက ပြင်ပရွှေပေါက်စျေး သိန်း ၃၀ အထက်မှာရှိနေတဲ့အတွက် စျေးအမြင့်ပိုင်းစံချိန်တင်ရောက်ရှိနေတယ်လို့ ရန်ကုန်ရွှေလုပ်ငန်းရှင်တွေက ပြောပါတယ်။

#Local_News #ပြင်ပရွှေပေါက်စျေး #ရန်ကုန်ရွှေအသင်း
#YMG #Yangon_Media_Group

#Local_News
Published-11 May 2023

အားအလွန်ကောင်းသောဆိုင်ကလုန်းမုန်တိုင်း“မိုခါ" စစ်တွေမြို့အနီးမှ မေလ ၁၄ ရက်တွင် ဖြတ်ကျော်နိုင်မည်ဟု မိုးလေဝသနှင့် ဇလဗေဒညွှန်ကြားမှု ဦးစီးဌာနက ခန့်မှန်းထားသည်။

ယနေ့ မေလ ၁၁ ရက် မြန်မာစံတော်ချိန် မွန်းလွဲ ၁၂ နာရီခွဲအချိန်က တိုင်းထွာချက်များအရ ဘင်္ဂလား ပင်လယ်အော်အရှေ့တောင်ပိုင်းတွင် ဖြစ်ပေါ်နေသော ဆိုင်ကလုန်းမုန်တိုင်း (Cyclonic Storm) “မိုခါ(MOCHA)” သည် မြောက်-အနောက်မြောက်ဘက် သို့ ဆက်လက်ရွေ့လျားခဲ့ပြီး၊ မြန်မာနိုင်ငံ၊ ကိုကိုးကျွန်းမြို့(Coco Island)၏ အနောက်-အနောက်တောင်ဘက် ရေမိုင်(၃၄၅)မိုင်ခန့်၊ ဟိုင်းကြီးကျွန်းမြို့ (Hainggyigyun)၏ အနောက်-အနောက်တောင်ဘက် ရေမိုင်(၄၆၀) မိုင်ခန့်၊ စစ်တွေမြို့ (Sittwe)၏ တောင်-အနောက်တောင်ဘက် ရေမိုင်(၅၈၀) မိုင်ခန့်၊ အိန္ဒိယနိုင်ငံ၊ နီကိုးဘားကျွန်း(Nicobar Islands)၏ အနောက်-အနောက် မြောက်ဘက် ရေမိုင်(၄၄၅)မိုင်ခန့်၊ ပို့ပလဲယား(Port Blair)၏ အနောက် ဘက် ရေမိုင်(၂၈၅)မိုင်ခန့်နှင့် ဘင်္ဂလားဒေ့ရှ်နိုင်ငံ၊ ကော့ဘဇားမြို့(Cox’s Bazar) ၏ တောင်-အနောက်တောင်ဘက် ရေမိုင် (၆၃၀)မိုင်ခန့်အကွာ ပင်လယ်ပြင် ကို ဗဟိုပြုနေကြောင်း သိရသည်။

ဆိုင်ကလုန်းမုန်တိုင်း(Cyclonic Storm) “မိုခါ(MOCHA)”၏ လက်ရှိအခြေ အနေမှာ ဘင်္ဂလားဒေ့ရှ်-မြန်မာကမ်းရိုးတန်းသို့ ဦးတည်ရွေ့လျားနိုင်သည့် အခြေအနေရှိသောကြောင့် လိမ္မော်ရောင်အဆင့်ဟု သတ်မှတ်ထားကြောင်း၊ အဆိုပါ ဆိုင်ကလုန်းမုန်တိုင်း(Cyclonic Storm) “မိုခါ(MOCHA)”သည် မြန်မာစံ တော်ချိန် (၁၂:၃၀)နာရီအချိန်တွင် မြောက်လတ္တီကျု(၁၁.၆)ဒီဂရီနှင့် အရှေ့လောင် ဂျီကျု (၈၇.၉)ဒီဂရီတွင်ရှိပြီး၊ ဗဟိုချက်လေဖိအား (၉၉၈)ဟက်တိုပါစကယ်နှင့် အမြင့် ဆုံးလေတိုက်နှုန်းမှာ တစ်နာရီလျှင် (၄၅)မိုင်နှုန်းခန့် ဖြစ်ကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာန က ခန့်မှန်းထားသည်။

အဆိုပါ ဆိုင်ကလုန်းမုန်တိုင်း(Cyclonic Storm) “မိုခါ(MOCHA)”သည် မြောက်-အနောက်မြောက်ဘက်သို့ ဆက်လက်ရွေ့လျားနိုင်ပြီး၊ နောက်(၁၈)နာရီအတွင်း အားကောင်း သော ဆိုင်ကလုန်းမုန်တိုင်း(Severe Cyclonic Storm) “မိုခါ(MOCHA)” အဖြစ်သို့ လည်းကောင်း၊ မေလ ၁၂ ရက်တွင် မြောက်-အရှေ့မြောက်ဘက်သို့ တဖြည်းဖြည်း ကွေ့ကာ ဘင်္ဂလားပင်လယ်အော်အလယ်ပိုင်း၌ အားအလွန်ကောင်းသောဆိုင်ကလုန်း မုန်တိုင်း (Very Severe Cyclonic Storm) “မိုခါ(MOCHA)” အဖြစ်သို့လည်းကောင်း ၊မေလ ၁၄ ရက်တွင် ဘင်္ဂလားဒေ့ရှ် နိုင်ငံ အရှေ့တောင်ပိုင်းနှင့် မြန်မာနိုင်ငံ၊ ရခိုင်ကမ်းရိုးတန်းမြောက်ပိုင်းကမ်းခြေကို ဘင်္ဂလားဒေ့ရှ်နိုင်ငံ၊ ကော့ဘဇားမြို့(Cox’s Bazar)နှင့် မြန်မာနိုင်ငံ၊ ကျောက်ဖြူမြို့ (Kyaukpyu)တို့ကြား စစ်တွေမြို့(Sittwe)အနီးမှ ဖြတ်ကျော်ဝင်ရောက်နိုင်မည်ဟုလည်းကောင်း ခန့်မှန်းထားကြောင်း သိရသည်။

ဆိုင်ကလုန်းမုန်တိုင်း(Cyclonic Storm) “မိုခါ(MOCHA)”သည် ဘင်္ဂလားဒေ့ရှ် နိုင်ငံ အရှေ့တောင်ပိုင်းနှင့် မြန်မာနိုင်ငံ၊ ရခိုင်ကမ်းရိုးတန်းမြောက်ပိုင်းကမ်းခြေ ကို ဘင်္ဂလားဒေ့ရှ်နိုင်ငံ၊ ကော့ဘဇားမြို့(Cox’s Bazar)နှင့် မြန်မာနိုင်ငံ၊ ကျောက်ဖြူမြို့(Kyaukpyu)တို့ကြားမှ ဖြတ်ကျော်စဉ် အမြင့်ဆုံးလေတိုက် နှုန်းမှာ တစ်နာရီလျှင် မိုင်(၉၀)မှ မိုင်(၁၀၀)ခန့်အထိ တိုက်ခတ်နိုင်ကြောင်း ၊မုန်တိုင်းဖြတ်ကျော်စဉ် မုန်တိုင်းဒီရေမှာ ရခိုင်ပြည်နယ်၊ စစ်တွေခရိုင်၊ မောင်တော ခရိုင်တို့ရှိ မြစ်ဝ၊ မြစ်လက်တက်များအတွင်း (၁၀)ပေမှ (၁၄)ပေခန့်အထိနှင့် ကျောက်ဖြူခရိုင်ရှိ မြစ်ဝ၊ မြစ်လက်တက်များအတွင်း (၇)ပေမှ (၁၀)ပေခန့် အထိ မြင့်တက်လာနိုင်ကြောင်း ခန့်မှန်းထားသည်။

#ymg/pl #Local_News #ဆိုင်ကလုန်းမုန်တိုင်း“မိုခါ" #စစ်တွေမြို့အနီး
#YMG #Yangon_Media_Group

#Local_News
Published_ 11 May 2023

မြန်မာနိုင်ငံကြက်ခြေနီအသင်းအနေဖြင့် ဆိုင်ကလုန်းမုန်တိုင်း မိုခါဝင်​ရောက်လာပါကဘေးသင့်နိုင်သည့်ပြည်သူများ၊ထိခိုက်လွယ်သူများကိုဘေးကင်းရာအရပ်သို့ကူညီရွေ့ပြောင်းပေးခြင်း၊ထိခိုက်ဒဏ်ရာရသူ များကိုရှေးဦးပြုစုကုသပေးခြင်း၊ ကယ်ဆယ်ရေးပစ္စည်းများထောက်ပံ့ပေးခြင်းများဆောင်ရွက်သွားမည်ဖြစ်ကြောင်း သိရသည်၊၊

မြန်မာနိုင်ငံကြက်ခြေနီအသင်းသည် ရပ်ရွာလူထု သဘာဝဘေးအန္တရာယ်များ ရင်ဆိုင်ကြုံတွေ့လာရပါက အရေးပေါ်ကူညီကယ်ဆယ်ရေးလုပ်ငန်းများ လျှင်မြန်စွာတုံ့ပြန်ဆောင်ရွက်နိုင်ရေးအတွက် ကြိုတင်ပြင်ဆင်မှုများ ဆောင်ရွက်ထားကြောင်း၊ အသင်း၏ ဘေးအန္တရာယ်ဆိုင်ရာစီမံခန့်ခွဲမှုဌာနသည် မိုးလေဝသနှင့် ဇလဗေဒညွန်ကြားမှုဦးစီးဌာနနှင့် အနီးကပ်ချိတ်ဆက်မှုများပြုလုပ်ကာ နေ့စဉ်ထုတ်ပြန်သည့် သတင်းအချက်အလက်များအား စောင့်ကြည့်လက်ခံပြီး မြို့နယ်များသို့ အချိန်နှင့်တပြေးညီ ဆက်သွယ်အကြောင်းကြားလျှက်ရှိပြီး အသင်းတွင် ကြက်ခြေနီအရေးပေါ်ကွပ်ကဲရေးစင်တာထားရှိပြီး စင်တာတွင် တာဝန်ရှိဝန်ထမ်းများက အ‌ရေးပေါ်အခြေအနေများကိုစောင့်ကြည့်ကာ လုပ်ငန်းများဆောင်ရွက်လျက်ရှိသည်ဟုဆိုသည်၊၊

အသင်း၏ ဝယ်ယူဖြည့်တင်းရေးနှင့် ထောက်ပံ့ပို့ဆောင်ရေးဆိုင်ရာ စီမံခန့်ခွဲမှုဌာနကလည်း ဆိုင်ကလုန်းမုန်တိုင်း မိုခါ (MOCHA) ကြောင့် ထိခိုက်နိုင်ရှိသော အိမ်ထောင်စုများအတွက် ထောက်ပံ့ပစ္စည်းများ စောလျှင်စွာထောက်ပံ့နိုင်ရေးအတွက် မြို့နယ်များရှိ ပစ္စည်းသိုလှောင်ရုံများတွင် ထောက်ပံ့ပစ္စည်းများအား အဆင်သင့် ကြိုတင်သိုလှောင်ထားကြောင်း၊

ပြည်ထောင်စုနယ်မြေ(နေပြည်တော်)၊ တိုင်းဒေသကြီးနှင့် ပြည်နယ်အသီးသီးရှိ မြို့နယ်ကြက်ခြေနီ အသင်းခွဲများမှ ကြက်ခြေနီစေတနာလုပ်အားရှင်များကလည်း ဆိုင်ကလုန်းမုန်တိုင်း မိုခါ (MOCHA) ဝင်ရောက်လာပါက ချက်ချင်းတုန့်ပြန်နိုင်ရန် ကြိုတင်ဇာတ်တိုက်လေ့ကျင့်မှုများကို ဘေးအန္တရာယ်စီမံခန့်ခွဲရေးဦးစီးဌာန၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မီးသတ်တပ်ဖွဲ့များ၊ ကျေးရွာသူ/သားများနှင့်အတူ ပူးပေါင်းဆောင်ရွက်လျှက်ရှိသည်ဟုဖော်ပြထားသည်၊၊

ဆိုင်ကလုန်းမုန်တိုင်း မိုခါ (MOCHA) ဝင်ရောက်လာပါက ဘေးကင်းသောနေရာများသို့ရွေ့ပြောင်းစေနိုင်ရန် စုရပ်နေရာများသတ်မှတ်ခြင်း၊ ထိခိုက်လွယ်သူများအား ဘေးကင်းရာအရပ်သို့ ပြောင်းရွေ့ပေးခြင်း၊ မြို့နယ်များနှင့် ကျေးရွာများအတွင်း အသိပညာပေးလိုက်လံနှိုးဆော်ခြင်း၊ လက်ကမ်းစာစောင်များဖြန့်ဝေခြင်းနှင့် မုန်းတိုင်းအန္တရာယ်မကျရောက်မီ၊ ကျရောက်နေချိန်နှင့် ကျရောက်ပြီးချိန်များတွင် လိုက်နာဆောင်ရွက်ရမည့် အချက်များအား ဗီနိုင်းများကပ်ကာ အသိပညာပေးခြင်း၊ ဆိုင်ကလုန်းမုန်တိုင်း မိုခါ (MOCHA)ကြောင့် ထိခိုက်ဒဏ်ရာရရှိသူများကို ရှေးဦးပြုစုပေးခြင်း၊ စိတ်ပိုင်းဆိုင်ရာအားပေးကူညီခြင်းနှင့် ဆေးအကူအညီလိုအပ်သူများကို ဆေးရုံသို့ပို့ဆောင်ပေးခြင်းတို့ကို စီစဉ်ဆောင်ရွက်ထားပါသည်။ ဆိုင်ကလုန်းမုန်တိုင်း မိုခါ (MOCHA) ဝင်ရောက်ချိန်တွင်လည်း ရပ်ရွာလူထုအား ချက်ချင်းကူညီဆောင်ရွက်ပေးနိုင်စေရန် မြို့နယ်များတွင် ကြက်ခြေနီစေတနာလုပ်အားရှင်များအား လေ့ကျင့်သင်ကြားပေးထားပြီး အဆင်သင့်ရွေးချယ်ထားကြောင်း၊

အသင်းသည် နိုင်ငံတော်အဆင့် သဘာဝဘေးအန္တရာယ်ဆိုင်ရာ စီမံခန့်ခွဲမှုလုပ်ငန်းများ အကောင်အထည်ဖော်ဆောင်ရာတွင် နိုင်ငံတော်၏အရန်အင်အားအဖြစ် ရှေ့တန်းမှ ပါဝင်ဆောင်ရွက်လျက်ရှိပြီး၊ ဖြစ်ပေါ်လာနိုင်သည့် ဘေးအန္တရာယ်အမျိုးမျိုး၏ အကျိုးဆက်များကို လျှော့ချရန်နှင့် အချိန်နှင့်တစ်ပြေးညီ တုန့်ပြန်ဆောင်ရွက်နိုင်ရေးကို စဉ်ဆက်မပြတ်ဆောင်ရွက်လျှက်ရှိကြောင်းသိရသည်၊၊

#ymg/tthl #Local_News #ကြက်ခြေနီများကူညီရွေ့ပြောင်းပေးမည်
#YMG #Yangon_Media_Group

#Local_News
Published-11 May 2023

ရှမ်းပြည်နယ်၊ ကလောမြို့နယ်ရွှေဖုန်းမင်းကျေးရွာတွင် မိုးသည်းထန်စွာရွာသွန်း၍ နယ်ခြားချောင်းရေလျှံမှုဖြစ်ပွားပြီး ရွှေတူးဖော်သည့် လုပ်သားများနေထိုင်သော ယာယီတဲအိမ်(၇၃)လုံးခန့် ရေနစ်မြှပ်မှုဖြစ်ပွားကြောင်း မြန်မာနိုင်ငံမီးသတ်တပ်ဖွဲ့က သိရသည်။

မေလ ၁၁ ရက် နံနက် ၈ နာရီ ၁၀မိနစ်ခန့်က မိုးသည်းထန်စွာရွာသွန်းမှုကြောင့် ကလောမြို့နယ်နှင့် မန္တလေးတိုင်းဒေသကြီး၊ သာစည်မြို့နယ်ကြားရှိ နယ်ခြားချောင်းရေလျှံမှုဖြစ်ပွားကာ ရေနစ်မြုပ်မှုဖြစ်ခဲ့ကြောင်း သိရသည်။

ယင်းကြောင့် အဆိုပါနေရာသို့ ကလောမြို့နယ်မီးသတ်စခန်းမှ မီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များနှင့် သက်ဆိုင်ရာအဖွဲ့အစည်းများ ပူးပေါင်း၍ ကူညီကယ်ဆယ်ရေးလုပ်ငန်းများ သွားရောက်ဆောင်ရွက်လျက်ရှိကြောင်း မီးသတ်တပ်ဖွဲ့သတင်းထုတ်ပြန်ချက်အရသိရသည်။

#ymg/pl #Local_News #မိုးသည်းထန်စွာရွာသွန်း #ကလော #ယာယီတဲ အိမ် ၇၀ ကျော်ရေနစ်
#YMG #Yangon-Media-Group

#Local_News
Published_ 11 May 2023

မြန်မာနိုင်ငံက စိုက်ပျိုးထွက်ရှိတဲ့ ပြောင်းဆံတွေ ဝယ်ယူတင်သွင်းဖို့ ကမ်းလှမ်းချက်အပေါ် ဘင်္ဂလားဒေ့ရှ်နိုင်ငံဘက်က အကြောင်းပြန်ကြားခြင်း မရှိသေးဘူးလို့ မြန်မာနိုင်ငံပြောင်းလုပ်ငန်းအသင်း တာဝန်ရှိသူတစ်ဦးက ပြောပါသည်။

လက်ရှိ ဘင်္ဂလားဒေ့ရှ်နိုင်ငံထံ မြန်မာ့ပြောင်းတန်ချိန် (၂၀၀၀) ကို စမ်းသပ်တင်ပို့ထားပြီး ၎င်းတို့ဘက်က လက်ခံနိုင်တဲ့ အရည်အသွေးအတိုင်း ရောက်ရှိသွားပြီဟု သိရသည်။

‘‘စမ်းသပ်တင်ပို့တဲ့ အနေအထားက အောင်မြင်တယ်လို့ ပြောလို့ရတယ်။ အရည်အသွေးကလည်း လက်ခံနိုင်တယ်။ ဆက်ပြီးတော့ ဝယ်မယ်/မဝယ်ဘူး။ ဒီလမ်းကြောင်းအတိုင်းပဲဆက်ပြီး တင်ပို့ရမလားဆိုတာကတော့ဝယ်ယူမယ့် ဘင်္ဂလားဒေ့ရှ်ကုန်သည်ဘက်က တုံ့ပြန်မှုမလာသေးဘူး’’လို့ ပြောသည်။

မြန်မာ့ပြောင်းဆံတွေ ဘင်္ဂလားဒေ့ရှ်ဈေးကွက်ကို တင်ပို့ရောင်းချဖို့ ၂၀၂၀ ပြည့်နှစ်ကတည်း စီစဉ်ဆောင်ရွက်ခဲ့ပေမယ့် ကိုဗစ်-၁၉ ကပ်ရောဂါ၊ ၂၀၂၁ ခုနှစ် ဖေဖော်ဝါရီ နိုင်ငံရေးအပြောင်းအလဲတွေကြောင့် ယခုအခါမှ ပြန်လည်စီစဉ်ရခြင်းလည်း ဖြစ်သည်။

လက်ရှိ မြန်မာ့ပြောင်းဆံတွေကို ဒေသတွင်းနိုင်ငံတွေရဲ့ လိုအပ်ချက်ရှိမှုကြောင့် ဝယ်လိုအားရှိနေဆဲဖြစ်ပြီး ဈေးနှုန်းအတက်အကျက ဝယ်လိုအားနဲ့ ရောင်းလိုအားအပေါ်သာ မူတည်နေကြောင်းသိရသည်။

လက်ရှိမှာ ဖေဖော်ဝါရီလကစတင်ကာ ပြောင်းဆံတင်ပို့ရောင်းချမှုတွေ ပြုလုပ်နေပြီး ထိုင်းနိုင်ငံက အများဆုံးဝယ်ယူထားကာ တရုတ်၊ ဗီယက်နမ်၊ အိန္ဒိယ၊ ဖိလစ်ပိုင်စတဲ့ ဒေသတွင်းနိုင်ငံတွေဆီလည်း တင်ပို့ရောင်းချလျက်ရှိနေသည်။

#ymg/ppk #Local_News #မြန်မာ့ပြောင်း #ဘင်္ဂလားဒေ့ရှ်
#YMG #Yangon-Media-Group

#Local_News
Published_ 11 May 2023

မြောက်ဥက္ကလာပမြို့နယ်၌ YBS ယာဉ်တစ်စီးအား ကုန်တင်ယာဉ်တစ်စီးက မိုးရွာနေစဉ် အရှိန်မထိမ်းနိုင်ဘဲ စလစ်ဖြစ်ကာ နောက်မှဝင်တိုက်ခဲ့သဖြင့် ကုန်တင်ယာဉ်ပေါ်ပါ ၂ ဦးအနက် ယာဉ်မောင်းမှ ဒဏ်ရာများရရှိခဲ့ကြောင်း သိရသည်။

ရန်ကုန်တိုင်း၊ မြောက်ဥက္ကလာပမြို့နယ်၊ သုဓမ္မာလမ်းနှင့် သန္တာလမ်းထိပ်၌ မေ ၁၁ ရက်၊ နေ့လည် ၁၁ နာရီ ၁၇ မိနစ်ခန့်က မှတ်တိုင်တွင် လူအတင်အချလုပ်နေသည့် YBS 19 ယာဉ်အား သံတိုသံစများ တင်ဆောင်လာသော ကုန်တင်ယာဉ်တစ်စီးက အရှိန်လွန်ကာ နောက်မှဝင်တိုက်မိခဲ့သဖြင့် ကုန်တင်ယာဉ် ယာဉ်မောင်းမှာ ခေါင်းခန်းအတွင်းညပ်မိပြီး ဒဏ်ရာများရရှိခဲ့ကြောင်း သိရသည်။

"မိုးကလည်း ရွာနေတာပါတယ်၊ ကုန်တင်ယာဉ်ပေါ်မှာက သံတိုသံစတွေ တင်လာတာဆိုတော့ ဝိတ်ကလည်း တော်တော်များတယ်။ အရှိန်လည်းပါ လမ်းကလည်း ချော်နေတာဆိုတော့ နောက်ကနေ ဝင်စောင့်မိသွားတာပါ။ YBS က လူအတင်ချလုပ်နေတော့ ရပ်ထားတာ" ဟု ထာဝရအလင်းတန်း ပရဟိတအသင်းမှ တာဝန်ရှိသူတစ်ဦးက ပြောသည်။

အထက်ပါဖြစ်စဉ်တွင် ကုန်တင်ယာဉ်ပေါ်စီးနင်းလိုက်ပါလာသူ နှစ်ဦးအနက် အသက် ၅၃ နှစ်အရွယ်ရှိ ယာဉ်မောင်းအမျိုးသားမှာ ယာဉ်၏ ခေါင်းခန်းအတွင်း ညပ်မိပြီး ညာဘက်ပေါင်ရိုးကျိုး ဒဏ်ရာများရရှိကာ ထာဝရအလင်းတန်းပရဟိတအသင်းမှ မြောက်ဥက္ကလာပဆေးရုံကြီးသို့ ပို့ဆောင်ပေးခဲ့ရကြောင်း သိရသည်။

#ymg/ppk #Local_News #မြောက်ဥက္ကလာပ #ကုန်တင်ယာဉ်က YBS ကို နောက်မှဝင်တိုက်
#YMG #Yangon-Media-Group

#Local_News
Published_ 11 May 2023

ဧရာဝတီတိုင်း၊ လပွတ္တာမြို့နယ်၊ ဓနိဆိပ်ကျေးရွာအုပ်စု၊ ပိန္နဲကုန်းကျေးရွာရှိ လိမ္မော်ချောင်း(၄)ခွဆုံ၌ ယနေ့မွန်းလွဲပိုင်းက မုန်တိုင်းရှောင်များ လိုက်ပါလာသည့် ငါးဖမ်းစက်လှေနှင့် ခရီးသည်တင်‌ရေယာဉ်လိုင်း စက်လှေတို့ တိုက်မိမှုဖြစ်ပွာခဲ့ကြောင်း ကူညီကယ်ဆယ်ဆောင်ရွက်ပေးခဲ့သည့် ပရဟိတအသင်းထံမှ သိရသည်။

မေ ၁၀ ရက်၊ မွန်းလွဲ ၁ နာရီဝန်းကျင်ခန့်တွင် အထက်ပါစက်လှေနှစ်စီးတိုက်မိခဲ့ခြင်းဖြစ်ပြီး ခရီးသည်တင်ရေယာဉ်လိုင်းမှ စက်လှေမှာ နစ်မြှုပ်သွားခဲ့ကြောင်း စုံစမ်းသိရသည်။

တိုက်မိခဲ့သည့် စက်လှေနှစ်စီးမှာ လပွတ္တာမြို့နယ်၊ ကိုင်းသောင်ကျေးရွာအုပ်စု၊ ဝါးတောကျေးရွာမှ မုန်တိုင်းရှောင်ဒေသခံ ၇၀ နီးပါးတင်ဆောင်လာခဲ့သည့် ငါးဖမ်းစက်လှေနှင့် ပိန္နဲကုန်းကျေးရွာမှ ဒေသခံ ၆ ဦးတို့အား တင်ဆောင်လာသည့် သိန်းသန်းကြွယ်အမည်ရ ခရီးသည်တင်လိုင်း စက်လှေအသေးတို့ဖြစ်ကြောင်း သိရသည်။

"မုန်တိုင်းရှောင်တွေ တင်လာတဲ့ ငါးဖမ်းစက်လှေက လူဝိတ်ပါတော့ ဖြည်းဖြည်းပဲမောင်းလာတာ။ အဲ့တာကို အရှိန်နဲ့မောင်းလာတဲ့ သိန်းသန်းကြွယ် လိုင်းစက်လှေအသေးက ချောင်းဆုံမှာ ဇွတ်ဝင်တိုက်တာ။ လိုင်းစက်လှေလေးက အသေးဆိုတော့ သူဝင်တိုက်ပြီးသူပဲ မြှုပ်သွားတယ်။ ကံကောင်းလို့ လူသေတာမရှိပေမယ့် စားသောက်ကုန်တွေနေမယ်၊ လှေပေါ်ပါလာတဲ့ ကုန်တွေတော့ အကုန်နစ်ကုန်တယ်" ဟု ကူညီဆောင်ရွက်ပေးခဲ့သည့် ပရဟိတအသင်း၏ တာဝန်ရှိသူတစ်ဦးကပြောသည်။

စက်လှေတိုက်သည့်ဖြစ်စဉ်ကြောင့် သိန်းသန်းကြွယ်စက်လှေမှာ နစ်မြှုပ်ခဲ့ပြီး နစ်မြှုပ်ခဲ့သည့် စက်လှေအ‌သေးမှ ခရီးသည်များ သေဆုံးမှုမရှိသော်လည်း လှေပေါ်တွင် တင်ဆောင်လာသည့် ကုန်ပစ္စည်းများ နစ်မြှုပ်‌ဆုံးရှုံးခဲ့ရကြောင်း သိရသည်။

#ymg/ppk #Local_News #လပွတ္တာ #ငါးဖမ်းစက်လှေ #ခရီးတင်စက်လှေနစ်မြှုပ်
#Yangon-Media-Group

#Local_News

Published_ 11 May 2023

ဘင်္ဂလားပင်လယ်အော်တွင်ဖြစ်ပေါ်နေသည့် ဆိုက်ကလုန်းမုန်တိုင်းအရှိန်ကြောင့် ရခိုင်ပြည်နယ်တွင် သဘာဝဘေးကြုံတွေ့ပါက အနီးစပ်ဆုံးဒေသများမှလူမှုကူညီရေးအဖွဲ့များမှ အားဖြည့်ရန်ကြိုတင်ပြင်ဆင်ထားကြောင်း သိရသည်၊၊

ရခိုင်ပြည်နယ်အတွင်းရှိ မီးသတ်တပ်ဖွဲ့ဝင်များ၊ လူမှုကူညီရေးအဖွဲ့များနှင့်အတူ အနီးစပ်ဆုံးဒေသများဖြစ်သည့် ပြည်၊ မကွေး၊ ဧရာဝတီတိုင်းက လူမှုကူညီရေးအဖွဲ့များတက်ပြီး ကူညီနိုင်အောင်စီစဉ်နေသည် ဟုဆိုသည်၊၊

"ရခိုင်ပြည်နယ်အုပ်ချုပ်ရေးဌာနကလည်း ပြင်ဆင်ထားပါတယ်၊၊ ရခိုင်မှာဖြစ်တာကြိမ်းသေပြီဆိုရင် ကျွန်တော်တို့လူမှုကူညီရေးအဖွဲ့ဝင်တွေအနေနဲ့ ရခိုင်နဲ့အနီးဆုံးဒေသက ပြည်တို့၊ မကွေးတို့၊ဧရာဝတီတိုင်းတို့က အဖွဲ့ဝင်တွေကိုနောက်ချန်အင်အားဘယ်လောက်ချန်ထားမလဲ ရခိုင်ကိုဘယ်လောက် တက်ကူညီမလဲစသဖြင့် ချိတ်ဆက်ဆောင်ရွက်နေပါတယ်၊၊ လောလောဆယ် ကျွန်တော်နဲ့သိတဲ့ ရခိုင်အခြေစိုက်လူမှုကူညီရေးအဖွဲ့ကတော့ နှစ်ဖွဲ့ရှိတယ်၊၊ သူတို့က အဓိကပေါ့၊၊ မီးသတ်တပ်ဖွဲ့ဝင်တွေလည်း ကူညီကယ်ဆယ်ဖို့အသင့်ပြင်ထားတယ်"ဟု ဦးမောင်rescue ပြည်သူ့ကယ်ဆယ်ရေးမှဦးမောင်က ပြောသည်၊၊

မြန်မာတစ်နိုင်ငံလုံးရှိ မြန်မာနိုင်ငံလူမှုကူညီရေးအဖွဲ့များဖြင့် ချိတ်ဆက်ပြီးဆောင်ရွက်သွားမည်ဖြစ်သည် ဟုဆိုသည်၊၊

မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ မေလ(၁၄)ရက်တွင် ဘင်္ဂလားဒေ့ရှ်နဲ့ မြန်မာနိုင်ငံကျောက်ဖြူမြို့ကြားမှ ဆိုက်ကလုန်းမုန်တိုင်းမိုခါဖြတ်ကျော်ဝင်ရောက်မည်ဖြစ်ပြီး စစ်တွေ၊ မောင်တော၊ ကျောက်ဖြူဒေသတို့တွင် ဒီရေများမြင့်တက်ခြင်း၊ လေတိုက်နှုန်းမိုင်(၉၀)(၁၀၀)ဖြင့် မုန်တိုင်းဖြတ်ကျော်ဝင်ရောက်ခြင်းများရှိနိုင်ကြောင်း သိရသည်၊၊

#ymg/tthl #Local_News #ရခိုင်နှင့်အနီးဆုံးဒေသ #လူမှုကူညီရေးအဖွဲ့ #ရခိုင်ကိုအားဖြည့်ကူညီရန် #YMG #Yangon_Media_Group

#Local_News
Published_ 11 May 2023

ရခိုင်ပြည်နယ်၊ ပေါက်တောမြို့နယ်အတွင်း သဘာဝဘေးအန္တရာယ်ကျရောက်လာပါက အိမ်သုံး ၅ ဂါလံဆံ့ရေပုံးကို အသုံးပြုပြီး အရေးပေါ်ကယ်ဆယ်ရေးပစ္စည်းအဖြစ် အသုံးပြုပုံကို မေလ ၁၀ ရက် နေ့ကသရုပ်ပြ ခဲ့ကြောင်း မြန်မာနိုင်ငံမီးသတ်တပ်ဖွဲ့ဌာနချုပ်မှ သိရသည်။

မုန်တိုင်းကာလအတွင်း သောက်သုံးရေရရှိနိုင်ရေးအတွက်(၅)ဂါလန်ဆံ့ပုံးများဖြင့် အိမ်တိုင်းတွင် ရေသိုလှောင်ထားရှိနိုင်ရန်လည်း အသိပညာပေးနှိုးဆော်ခဲ့ကြောင်း သိရသည်။

မိုးလေဝသနဲ့ဇလဗေဒညွှန်းကြားမှုဦးစီးဌာနရဲ့ မေလ ၁၁ရက်နေ့ထုတ်ပြန်ချက်အရ အားကောင်းသော် ဆိုက်ကလုန်းမုန်တိုင်းမိုခါသည် မေလ ၁၄ ရက်နေ့တွင် အားအလွန်ကောင်းကာ ဘင်္ဂလားဒေ့ရှ်နိုင်ငံ အရှေ့ တောင်ပိုင်းနှင့် မြန်မာနိုင်ငံ၊ ရခိုင်ကမ်းရိုးတန်းမြောက်ပိုင်းကမ်းခြေကို ဘင်္ဂလားဒေ့ရှ် နိုင်ငံ၊ ကော့ဘဇားမြို(Cox’s Bazar)နှင့် မြန်မာနိုင်ငံ၊ ကျောက်ဖြူမြို(Kyaukpyu) တိုကြားမှ ဖြတ်ကျော်ဝင်ရောက်နိုင်ကြောင်း ခန့်မှန်းထားသည်။

ဘင်္ဂလားဒေ့ရှ်နိုင်ငံ၊ ကော့ဘဇားမြို့(Cox’s Bazar)နှင့် မြန်မာနိုင်ငံ၊ ကျောက်ဖြူမြို့(Kyaukpyu)တိုကြားမှ ဖြတ်ကျော်စဉ် အမြင့်ဆုံးလေတိုက်နှုန်းမှာ တစ်နာရီလျှင် မိုင်(၉၀)မှ (၁၀၀)ခန့်အထိ တိုက်ခတ်နိုင်သည်ဟု ခန့်မှန်းထားပါသည်။

မုန်တိုင်းဖြတ်ကျော်စဉ် မုန်တိုင်းဒီရေမှာ ရခိုင်ပြည်နယ်၊ စစ်တွေခရိုင်၊ မောင်တော ခရိုင်တိုရှိ မြစ်ဝ၊ မြစ်လက်တက်များအတွင်း (၁၀)ပေမှ (၁၄) ပေခန့်အထိနှင့် ကျောက်ဖြူခရိုင်ရှိ မြစ်ဝ၊ မြစ်လက်တက်များအတွင်း (၇)ပေမှ (၁၀)ပေခန့် အထိ မြင့်တက်လာနိုင်ကြောင်းမိုးဇလမှထုန်ပြန်ထားသည်။

#ymg/ynzw #Local_News #အိမ်သုံး ၅ ဂါလံ ရေပုံး #အရေးပေါ်ကယ်ဆယ်ရေးပစ္စည်း
#YMG #Yangon-Media-Group

#Local_News
Published_ 11 May 2023

ဝံသာနုပါတီတည်ထောင်ခွင့် လျှောက်ထားခဲ့ရာတွင် နိုင်ငံရေးပါတီများ မှတ်ပုံတင်ခြင်း ဥပဒေ ပုဒ်မ (၆)ပါ ပြဋ္ဌာန်းချက်များနှင့် ညီညွတ်ခြင်းမရှိကြောင်း တွေ့ရှိရသဖြင့် ပါတီတည်ထောင်ခွင့် လျှောက်ထားချက်ကို ပြည်ထောင်စုရွေးကောက်ပွဲကော်မရှင်(UEC)က ငြင်းပယ်လိုက်ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ထုတ်ပြန်ချက်တွင် တည်ထောင်ခွင့်ပြုရန် ကျန်ရှိသည့် ၈ ဖွဲ့အနက် ဝံသာနုပါတီ၏ လျှောက်ထားချက်အပေါ် သက်ဆိုင်ရာဝန်ကြီးဌာနများ၏ စိစစ်ပြန်ကြားချက်များအရ နိုင်ငံရေးပါတီများ မှတ်ပုံတင်ခြင်း နည်းဥပဒေပါ ပုံစံ(ဂ)ဖြင့် ငြင်းပယ်လိုက်ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။

နိုင်ငံရေးပါတီတည်ထောင်လိုသူများက ယင်းတို့တည်ထောင်လိုသော ပါတီအမည်ကိုဖော်ပြ၍ ပြည်ထောင်စုရွေးကောက်ပွဲကော်မရှင်သို့ လျှောက်ထားလျက်ရှိကြရာ ယနေ့အထိ ပါတီတည်ထောင်ခွင့် လျှောက်ထားလာသည့်အဖွဲ့ ၁၃ ဖွဲ့ရှိပြီး၊ ယင်းသို့လျှောက်ထားသည့် အဖွဲ့များအနက် နိုင်ငံရေးပါတီ ၅ ပါတီကို တည်ထောင်ခွင့်ပြုပြီးဖြစ်ကြောင်း၊ ကျန်ရှိသည့် ၈ ဖွဲ့အနက် ဝံသာနုပါတီ၏ လျှောက်ထားချက်အပေါ် ငြင်းပယ်ထားကြောင်း၊ ကျန် ၇ ပါတီတည်ထောင်ခွင့် ကို ဆက်လက်စိစစ်နေကြောင်း သိရသည်။

နိုင်ငံရေးပါတီများမှတ်ပုံတင်ခြင်း ဥပဒေ ပုဒ်မ ၆ တွင် "(က) ပြည်ထောင်စုမပြိုကွဲရေး၊ တိုင်းရင်းသားစည်လုံးညီညွတ်မှုမပြိုကွဲရေး၊ အချုပ်အခြာအာဏာတည်တံ့ခိုင်မြဲရေး ကို ထိန်းသိမ်းစောင့်ရှောက်ရေး။ (ခ) တရားဥပေဒစိုးမိုးရေးနှင့် အေးချမ်းသာယာရေးကို ထိန်းသိမ်းစောင့်ရှောက်ရေး။ (ဂ) ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေကို လေးစားလိုက်နာရေး။ (ဃ) လူမျိုးရေး သို့မဟုတ် ဘာသာရေး သို့မဟုတ် လူတစ်ဦးခြင်း သို့မဟုတ် လူအများနှင့် ပတ်သက်၍ ပဋိပက္ခဖြစ်ပေါ်စေနိုင်သည့် သိက္ခာနှင့် ကိုယ်ကျင့်တရားကို ထိခိုက်စေနိုင်သည့် ရေးသားမှု၊ ဟောပြောမှု သို့မဟုတ် စည်းရုံးလှုံ့ဆော်မှုမပြုလုပ်ရေး။ (င) ဘာသာရေးကို နိုင်ငံရေးအတွက် အလွဲသုံးစားမပြုလုပ်ရေး။ (စ) နိုင်ငံခြားတိုင်းပြည်တစ်ခုခု၏ အစိုးရ သို့မဟုတ် ဘာသာရေးအဖွဲ့အစည်း သို့မဟုတ် အခြားအဖွဲ့အစည်းတစ်ခုခု သို့မဟုတ် ပုဂ္ဂိုလ်တစ်ဦးဦးထံမှ ငွေကြေး၊ ပစ္စည်း၊ အခြားအထေက်အပံ့ကို တိုက်ရိုက်ဖြစ်စေ၊ သွယ်ဝိုက်၍ဖြစ်စေ ရယူသုံးစွဲခြင်း သို့မဟုတ် ယင်းတို့၏ သြဇာခံယူခြင်း မပြုရေး။"ဟု ပြဋ္ဌာန်းထားသည်။

ယင်းပြဌာန်းချက်များကို စောင့်ထိန်းလိုက်နာမည်ဖြစ်ကြောင်း ခံဝန်ချက်ကို ပုဒ်မ ၅ အရ လျှောက်ထားသည့် လျှောက်လွှာတွင် ဖော်ပြရမည်ဟု ပြဌာန်းထားခြင်းလည်း ဖြစ်သည်။

#ymg/ynzw #Local_News #ဝံသာနုပါတီ #UEC
#YMG #Yangon-Media-Group

#World_Politics
Published 11 May 2023

ပါကစ္စတန်ဝန်ကြီးချုပ်ဟောင်း 'အင်မ်ရန်ခန်း'ကို မေလ ၉ ရက်နေ့က အစ္စလာမာဘတ်တရားရုံးမှာ ဖမ်းဆီးခဲ့ပြီးနာရီပိုင်းအကြာမှာပဲ ဆန္ဒပြလူစုလူဝေးကြီးက ရာဝယ်ပင်ဒီရှိ အမျိုးသားစစ်ဌာနချုပ်ဂိတ်ပေါက်တွေကနေ တွန်းဝင်လာကြပါတယ်။

၁၉၄၇ ခုနှစ်က ပါကစ္စတန်ပေါ်ပေါက်လာချိန်ကစပြီး မြို့တော်အစ္စလာမာဘတ်ရဲ့ အာဏာစင်္ကြံများအပေါ် အုပ်စိုးမှုအပိုင်းကျဆင်းနေခဲ့ပါတယ်။

အဲဒီနောက် နိုင်ငံပိုင်အသံလွှင့်ဌာနက လူကြိုက်များတဲ့ တူရကီဒရာမာကားမထုတ်လွှင့်မီ အကျပ်အတည်းများကို ထပ်ခါထပ်ခါဖော်ပြခဲ့ပါတယ်။

အင်မ်ရန်ခန်းရဲ့ PTI ထောက်ခံသူအများစုပါဝင်တဲ့ ဆန္ဒပြသူတွေဟာ လူသန်း ၂၃၀ ကျော်ရှိတဲ့ ယင်းတို့နိုင်ငံအပေါ် ပါကစ္စတန်စစ်တပ်ရဲ့ ရပ်တည်ခိုင်မာမှုများကို တိုက်ခိုက်ရန် ဖော်ထုတ်ခဲ့ကြပါတယ်။

စစ်တပ်က ပါကစ္စတန်ကို ပြီးခဲ့တဲ့ ၇၅ နှစ်အတွင်း တိုက်ရိုက်အုပ်ချုပ်ခဲ့တာ နှစ် ၃၀ ကျော်ရှိပါပြီ။

အရပ်သားအစိုးရလက်အောက်မှာပင် စစ်ခေါင်းဆောင်များက အာဏာကို လုံးဝချုပ်ကိုင်ထားကြပါတယ်။

ပါကစ္စတန်မှ ခရစ်ကတ်ကမ္ဘာ့ဖလားဆုရအသင်းခေါင်းဆောင် အင်မ်ရန်ခန်းဟာ နိုင်ငံရေးလောကထဲဝင်ရောက်လာကာ ဧပြီ ၂၀၂၂ မှာ ပါလီမန်မှာ အယုံအကြည်မရှိမဲဖြင့် ဝန်ကြီးချုပ်အဖြစ်မှ ဖယ်ရှားခံရပြီး မကြာမီမှာ အာခံမှုတွေမြင့်တက်လာပါတယ်။

ခန်းဟာ ၂၀၂၂ ခုနှစ်နိုဝင်ဘာလမှာ သူ့ကိုဒဏ်ရာရစေအောင် ပါကစ္စတန်စစ်ထောက်လှမ်းရေးအရာရှိဗိုလ်မှူးချုပ် 'ဖေဆယ်နာဆီယာ'က လုပ်ကြံသတ်ဖြတ်ရန်ကြိုးပမ်းခဲ့တယ်လို့ စွပ်စွဲနေခဲ့ပါတယ်။

မေလ ၉ ရက်နေ့က ခန်းဟာ အကျင့်ပျက်ခြစားမှုကြားနာပွဲသို့ တက်ရောက်နေစဉ် အစ္စလာမာဘတ်တရားရုံးအတွင်း မှန်အတားအဆီးများကို ချိုးဖျက်ဝင်ရောက်လာပါတယ်။
ပါကစ္စတန်လက်နက်ကိုင်ထိန်းသိမ်းရေးသမားများက တွန်းလိုက်ဆွဲလိုက်ဖြင့် အင်မ်ရန်ခန်းဟာ အကျဉ်းထောင်သို့ရောက်ရှိသွားပါတယ်။

ခန်းကတော့ သူ့ရဲ့လုံခြုံရေးအတွက် စိုးရိမ်ကြောင်းပြောကြားကာ အဂတိလိုက်စားမှုစွဲချက်များကို ငြင်းဆိုလိုက်ပါတယ်။

မေ ၉ ရက်နေ့ကတည်းက ဆန္ဒပြမှုအတွင်း အနည်းဆုံးလူ ၅ ဦးသေဆုံးကာ ပန်ဂျပ်ပြည်နယ်တစ်ခုတည်းမှာပင် လူ ၁ ထောင်ကျော်ဖမ်းဆီးခံရပါတယ်။

စစ်တပ်က အပြင်းအထန်ဖြိုခွဲခဲ့ပေမယ့် ဆန္ဒပြမှုများဆက်လက်ဖြစ်ပေါ်နေပြီး တိုင်းပြည်အာဏာက ယဲ့ယဲ့သာကျန်ပါတော့တယ်။

ခန်းကိုထောက်ခံသူတွေက ပါကစ္စတန်လမ်းမတွေမှာ ဆက်လက်ဆန္ဒပြနေကာ သူတို့ရဲ့ခေါင်းဆောင်ကို မလွှတ်မချင်း ဆက်လက်ဆန္ဒပြသွားမယ်လို့ အခိုင်အမာဆိုနေကြပါတယ်။

Source: WION #World_Politics #ပါကစ္စတန်ဝန်ကြီးချုပ်ဟောင်းအင်မ်ရန်ခန်း #ဆန္ဒပြမှုများအပြင်းအထန်ဖြစ်ပွား‌
#YMG #Yangon_Media_Group

#Local_News
Published-11 May2023

သဘာဝဘေး ဖြစ်သည့် မုန်တိုင်းအန္တရာယ်ကျရောက်လျှင် သယ်ယူပို့ဆောင်ရေးအတွက်အရေးပေါ်အသုံးပြုနိုင်ရန်Truckယာဉ် အစီး၅၀၊ Mini Busအစီး ၅၀၊ Light Truck ၁၀ စီး တို့ကိုအရန်သင့်စီစဉ်ထားကြောင်း YRTC က သိရသည်။

ယနေ့ မေလ (၁၁)ရက်နေ့ နံနက် ၆နာရီခွဲ အချိန် တိုင်းထွာချက်များအရ ဘင်္ဂလားပင်လယ်အော်အရှေ့တောင်ပိုင်းတွင် ဖြစ်ပေါ်နေသောအားကောင်းသောမုန်တိုင်းငယ်(Deep Depression)သည် မြောက်-အနောက်မြောက်ဘက်သို့ ရွေ့လျားခဲ့ပြီး၊ ပိုမိုအားကောင်းလာကာ ဆိုင်ကလုန်းမုန်တိုင်း(Cyclonic Strom) “မိုခါ(MOCHA)”အဖြစ်သို့ ရောက်ရှိခဲ့ပြီးဖြစ်ကြောင်း မိုးလေဝသနှင့် ဇလဗေဒ ညွှန်ကြားမှု ဦးစီးဌာနက ထုတ်ပြန်ထားသည်။

ယင်းမုန်တိုင်းသည် မြန်မာနိုင်ငံ၊ ကိုကိုးကျွန်းမြို့(Coco Island)၏ အနောက်-အနောက်တောင်ဘက် ရေမိုင်(၃၆၅)မိုင်ခန့်၊ ဟိုင်းကြီးကျွန်းမြို့(Hainggyigyun)၏ အနောက်-အနောက်တောင်ဘက် ရေမိုင်(၄၇၅)မိုင်ခန့်၊ စစ်တွေမြို့(Sittwe)၏ တောင်-အနောက်တောင်ဘက် ရေမိုင်(၆၁၅)မိုင်ခန့်၊ အိန္ဒိယနိုင်ငံ၊ နီကိုးဘားကျွန်း(Nicobar Islands)၏ အနောက်-အနောက်မြောက်ဘက် ရေမိုင်(၄၁၅)မိုင်ခန့်၊ ပို့ပလဲယား (Port Blair)၏ အနောက်-အနောက်တောင်ဘက် ရေမိုင်(၂၈၀)မိုင်ခန့်နှင့် ဘင်္ဂလားဒေ့ရှ်နိုင်ငံ၊ ကော့ဘဇားမြို့(Cox’s Bazar)၏ တောင်-အနောက်တောင်ဘက် ရေမိုင် (၆၆၅)မိုင်ခန့်အကွာ ပင်လယ်ပြင်ကို ဗဟိုပြုနေကြောင်း သိရသည်။

#ymg/pl #Local_News #YRTC #Truck #မော်တော်ယာဉ်အစီးရေ ၁၀၀
#Yangon_Media_Group