#DailyNews
Published_ 27 March 2023

၁။ဗန်းမော်ဆရာတော်ဘုရားကြီးထိုင်းနိုင်ငံဘန်ကောက်တွင်(၁၄)ရက်ကြာဆေးကုသမှုခံယူနေ

၂။သင်္ကြန်ကာလ YBS ယာဉ်လိုင်းအချို့ရပ်နားထားမည်

၃။ ဆန်ကို အကန့်အသတ်စနစ်(Quota)နဲ့ ပြည်ပပို့ရန်ပြောင်းလဲသတ်မှတ်

၄။အသက်(၇၃)နှစ်ထိတိုင် ကြိုးတန်းလမ်းလျှောက်ချင်သေးသည့် ပြင်သစ်ကြိုးတန်းလမ်းလျှောက်သမား... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

Published 27 March 2023

အလီဘာဘာတည်ထောင်သူ ဂျက်မားဟာ တရုတ်နိုင်ငံကိုပြန်လည်ရောက်ရှိလာပြီး ပြည်ပနိုင်ငံတွေမှာ တစ်နှစ်ကျော် နေထိုင်ခဲ့မှုကို အဆုံးသတ်ခဲ့ပါတယ်။ တရုတ်နိုင်ငံကို ဂျက်မားပြန်လာတာကို တရုတ်စီးပွားရေးလုပ်ငန်းတွေကို အလေး အနက်ထားလာတဲ့သဘော ထင်ဟပ်နေတယ်လို့ လုပ်ငန်းရှင်အသိုက်အဝန်းကရှုမြင်ထားကြပါတယ်။

တရုတ်ရဲ့ ပုဂ္ဂလိကလုပ်ငန်းတွေကို (၂)နှစ်ကြာ ဥပဒေအရနှိမ်နှင်းမှုတွေပြုလုပ်အပြီးမှာ တရုတ်ရဲ့ လူသိအများဆုံး လုပ်ငန်းရှင် ပြန်လာခြင်းဟာ ပုဂ္ဂလိကလုပ်ငန်းတွေအပေါ်စိုးရိမ်ပူပန်မှုတွေကို ဖြေဖျောက်ပေးရာမှာ အထောက်အကူဖြစ် စေကောင်းဖြစ်စေနိုင်ပါတယ်လို့ ရိုက်တာက သတင်းရေးသားပါတယ်။

တရုတ်နိုင်ငံရဲ့ ဆိုရှယ်မီဒီယာတွေမှာ ဂျက်မားပြန်လည်ရောက်ရှိလာတာတွေကို မတ် ၂၇ ရက်နေ့ တနင်္လာနေ့ မနက်က စပြီး ပြောဆိုရေးသားမှုတွေ တွေ့လာကြရတာဖြစ်ပါတယ်။ အဲဒီနောက် အလီဘာဘာကပိုင်ဆိုင်တဲ့ ကျောင်းတစ်ကျောင်း ကို သူသွားရောက်ခဲ့တဲ့သတင်း တောင်တရုတ်နံနက်ခင်းသတင်းစာက ဖော်ပြကာ အတည်ပြုပေးခဲ့ပါတယ်။

အင်္ဂလိပ်စာဆရာတစ်ဦးဖြစ်တဲ့ ဂျက်မားဟာ  ဉာဏ်ရည်တုနှင့်မောင်းနှင်တဲ့  ChatGPTလိုမျိုးကိစ္စတွေကို ကျောင်းမှာ ဆွေးနွေးခဲ့ပါတယ်။ အဲဒီအပြင် သူဟာ တစ်နေ့နေ့မှာ စာသင်တဲ့အလုပ်ပြန်လုပ်ဖို့ မျှော်လင့်ထားတယ်လို့လည်း အဆိုပါ ယွန်ဂူကျောင်းရဲ့ တရားဝင် WeChat အကောင့်ကနေ ဖော်ပြထားပါတယ်။

အဲဒီကျောင်းကို ဂျက်မားနှင့် အခြားသော အလီဘာဘာတည်ထောင်သူတွေက သူတို့ရဲ့ ဇာတိမြေ ဟန်ကျိုးမှာ ၂၀၁၇ခုနှစ်တုန်းက တည်ထောင်ပေးခဲ့ကြတာဖြစ်ပါတယ်။

မားဟာ တရုတ်ကို ပြီးခဲ့တဲ့အပတ်ကတည်းက ပြန်ရောက်လာတာဖြစ်တယ်လို့ အဲဒီအကြောင်းသိသူနှစ်ဦးက ရိုက်တာ သတင်းဌာနကိုပြောပါတယ်။

တရုတ်သမ္မတ ရှီကျင့်ဖျင်ရဲ့ လက်ရုံး ဝန်ကြီးချုပ်အသစ် လီရှန်းက ဂျက်မား တရုတ်ပြည်မကြီးကိုပြန်လာခြင်းဟာ လုပ်ငန်းရှင်တွေအကြား စီးပွားရေးအရစိတ်ချယုံကြည်မှုတွေတိုးပွားလာစေမှာကို အထောက်အကူပြုလိမ့်မယ်ဆိုတာ အသိအမှတ်ပြုလက်ခံထားကြောင်းနှင့် ပြီးခဲ့တဲ့နှစ်ကတည်းက သူက ဂျက်မားကို ပြန်လာဖို့ခေါ်နေတာဖြစ်ကြောင်း အဲဒီ အကြောင်းသိတဲ့ သတင်းအရင်းအမြစ်(၅)ခုက ရိုက်တာကိုပြောပါတယ်။

ဒါပေမယ့် ဝန်ကြီးချုပ်လီရဲ့ ကြိုးပမ်းအားထုတ်မှုကြောင့် ဂျက်မားပြန်လာတာ သေချာသလားဆိုတာကိုတော့ ရိုက်တာက ချက်ခြင်းတပ်အပ်မပြောနိုင်သေးပါဘူး။

အလီဘာဘာရော တရုတ်နိုင်ငံတော်ကောင်စီရော ပြီးတော့ တရုတ်အစိုးရအဖွဲ့ဆီကရော ယခုကိစ္စအပေါ် မေးမြန်းချက်ကို ပြန်လည်ဖြေကြားခြင်းမရှိသေးကြောင်းလည်း ရိုက်တာသတင်းဌာနကရေးသားပါတယ်။

Source: Reuters

#အလီဘာဘာတည်ထောင်သူဂျက်မားတရုတ်ပြည်ပြန်ရောက်

#ဂျက်မားတရုတ်နိုင်ငံပြန်လည်ရောက်ရှိ

#YangonMediaGroup

#LocalNews
Published_ 27 March 2023

မတ်လ၂၅ ရက်နေ့က ဖြစ်ပွားခဲ့တဲ့တိုက်ပွဲများကြောင့်ခေတ္တာပိတ်ထားတဲ့ ထိုင်းမြန်မာချစ်ကြည်ရေးတံတားအမှတ်(၁)၊(၂)ကို မတ်လ ၂၆ရက်နေ့က ပြန်ဖွင့်ပေးလိုက်ပြီဖြစ်တယ်လို့ မြဝတီမြို့ဒေသခံတွေကပြောပါတယ်။

#YMG#Yangon_Media_Group

#LocalNews
Published_ 27 March 2023

ရခိုင်ပြည်နယ်၊ ကျောက်တော်မြို့နယ်၌ ခရီးသည်တင်ယာဉ်နှင့် အိမ်စီးကားတစ်စီးတို့ လမ်းကွေ့တစ်ခု၌ မျက်နှာချင်းဆိုင်တိုက်မိခဲ့သဖြင့် အိမ်စီးကားပေါ်မှ ယာဉ်မောင်း နေရာတွင်သေဆုံးခဲ့ကြောင်း သိရသည်။

မတ် ၂၆ ရက်၊ ညနေ ၄ နာရီခွဲက ကျောက်တော်မြို့နယ်ဘက်မှ မောင်းနှင်လာသော ခရီးသည် ၄၀ ဦးဝန်းကျင် လိုက်ပါစီးနင်းလာသည့် ရွှေရည်ဆုဝေ ခရီးသည်တင်ယာဉ်နှင့် ကျောက်တော်မြို့နယ် အပေါက်ဝ ကျေးရွာဘက်မှ မောင်းနှင်လာသော တိုယိုတာ အမျိုးအစား အိမ်စီးကားတို့ ကျောက်တော်မြို့နယ်ရှိ ကွမ်းအုံချောင်းကျေးရွာအနီး၌ မျက်နှာချင်းဆိုင် တိုက်မိခဲ့ကြောင်း ဒေသခံကူညီရေးအဖွဲ့တစ်ခုမှ အသင်းသားတစ်ဦးက ဆိုသည်။

"မျက်နှာချင်းဆိုင်တိုက်မိပြီး ခရီးသည်တင်ယာဉ်က လမ်းပေါ်ကို တုံးလုံးကြီးမှောက်လဲသွားတယ်။ အိမ်စီးကားက ခေါင်းပိုင်းတစ်ခြမ်းထိပြီး ကားပေါ်က ယာဉ်မောင်းကတော့ ပွဲချင်းပြီး သေဆုံးပါတယ်” ဟု ကျောက်တော်အခြေစိုက် ဖြူစင်မေတ္တာ ပရဟိတအဖွဲ့မှ အသင်းသားတစ်ဦးက ဆိုသည်။

ခရီးသည်တင်ယာဉ်မှာ လမ်းပေါ်သို့ မှောက်လဲကျခဲ့သော်လည်း ယာဉ်ပေါ်ပါ ခရီးသည် အမျိုးသမီးနှစ်ဦးသာ ပွန်းပဲ့ဒဏ်ရာရရှိခဲ့ကြောင်း သိရသည်။

ယာဉ်တိုက်မှုကြောင့် သေဆုံးသူယာဉ်မောင်းအား ကျောက်တော်ဆေးရုံရှိ ရင်ခွဲရုံသို့ ပို့ဆောင်ထားကြောင်းလည်း သိရသည်။

ymg/ppk
#Yangon-Media-Group

#LocalNews
Published_ 27 March 2023

ကျေးရွာအုပ်စု အုပ်ချုပ်ရေးမှုး ၂၂ ဦး အား နိုင်ငံတော်စီမံအုပ်ချုပ်ရေးကောင်စီဥက္ကဋ္ဌက မတ်လ ၂၇ ရက်တွင် ရဲဗလတံဆိပ် ချီးမြှင့်လိုက်ကြောင်းနစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

နိုင်ငံ့တာဝန်များကို စွမ်းစွမ်းတမံထမ်းဆောင် ခဲ့ကြသူများအား ဂုဏ်ထူးဆောင်တံဆိပ်များကို ချီးမြှင့်အပ်နှင်းခြင်း ဖြစ်ကြောင်းနှင့် တပ်မတော်ဆိုင်ရာ စွမ်းရည်သတ္တိဂုဏ်ထူးဆောင်တံဆိပ်(သူရဲကောင်းမှတ်တမ်းဝင် တံဆိပ်)နှင့်မြန်မာနိုင်ငံရဲတပ်ဖွဲ့ဆိုင်ရာစွမ်းရည်သတ္တိဂုဏ်ထူးဆောင်တံဆိပ်(ရဲဗလတံဆိပ်)တို့ ဖြစ်ကြောင်း ထုတ်ပြန်ချက်တွင် ဖော်ပြထားသည်။

တပ်မတော်တိုင်ရာ စွမ်းရည်သတ္တိဂုဏ်ထူးဆောင်တံဆိပ်(သူရဲကောင်းမှတ်တမ်းဝင် တံဆိပ်ကို)ကို ကာကွယ်ရေးဝန်ကြီးဌာနက ဗိုလ်ကြီးတစ်ဦး၊မြန်မာနိုင်ငံရဲတပ်ဖွဲ့ဆိုင်ရာစွမ်းရည်သတ္တိဂုဏ်ထူးဆောင်တံဆိပ်(ရဲဗလတံဆိပ်)ကို မြန်မာနိုင်ငံရဲတပ်ဖွဲ့ ရဲမှူးတစ်ဦး၊ရဲအုပ်တစ်ဦးနှင့် ရဲတပ်ကြပ်တစ်ဦး၊မီးသတ်ဦးစီးဌာန ဦးစီးအရာရှိတစ်ဦး အပါအဝင် စစ်ကိုင်းတိုင်းဒေသကြီးမှ ကျေးရွာအုပ်စု အုပ်ချုပ်ရေးမှုး ၂၁ ဦး ၊ပဲခူးတိုင်းဒေသကြီးမှ ကျေးရွာအုပ်စု အုပ်ချုပ်ရေးမှုး တစ်ဦး၊ကာကွယ်ရေးဝန်ကြီးဌာနမှ ၁၀ ဦးတို့အား ချီးမြှင့်ကြောင်း ထုတ်ပြန်ချက်တွင် ဖော်ပြထားသည်။

ymg/mt
#Yangon_Media_Group

#LocalNews
Published_ 27 March 2023

ဒီမိုကရေစီအပေါ်သဘောထားကွဲလွဲမှုကြောင့် လုပ်ဆောင်လာသောအကြမ်းဖက်တိုက်ခိုက်မှုကို မည်သည့်နိုင်ငံအစိုးရကမှ ခွင့်ပြုမည်မဟုတ်ကြောင်း ယနေ့ မတ်လ ၂၇ ရက်တွင်ကျင်းပသော(၇၈)နှစ်မြောက် တပ်မတော်နေ့ စစ်ရေးပြအခမ်းအနား၌ တပ်မတော်ကာကွယ်ရေးဦးစီးချုပ်ဗိုလ်ချုပ်မှူးကြီး သတိုးမဟာသရေစည်သူသတိုးသီရိသုဓမ္မ မင်းအောင်လှိုင်က မိန့်ခွန်းအတွင်း ထည့်သွင်းပြောကြားခဲ့သည်။

နစက တာဝန်ထမ်းဆောင်ချိန် အစပိုင်းတွင် ဆူပူမှုများသာ ကြုံတွေ့ခဲ့ရသော်လည်း အကြမ်းဖက်သူများက အရပ်သားနှင့် စစ်ရေးပစ်မှတ်မဟုတ်သော အခြားသောနေရာများကိုပါ ရည်ရွယ်ချက်ရှိရှိ ပစ်မှတ်ထားပြီး တိုက်ခိုက်လာတာကို တွေ့ရှိရကြောင်း၊ ဒီမိုကရေစီအပေါ် သဘောထားကွဲလွဲမှုကြောင့် လုပ်ဆောင်လာသောအကြမ်းဖက်တိုက်ခိုက်မှုကိုမည်သည့်နိုင်ငံအစိုးရကမှ ခွင့်ပြုမှာမဟုတ်တဲ့အပြင် ဒီမိုကရေစီကိုအကြမ်းဖက်နည်းလမ်းဖြင့်လည်း ရရှိနိုင်မှာ မဟုတ်ကြောင်းယင်းကဆိုသည်။

"အကြမ်းဖက်သမားများရဲ့အဖျက်အမှောင့်လုပ်ရပ်တွေကြောင့် ပျက်စီးဆုံးရှုံးမှုများဟာ အစိုးရတစ်ရပ်အတွက် နစ်နာဆုံးရှုံးမှုမဟုတ်ဘဲ နိုင်ငံတော်ရဲ့ ရှေ့ဆက်လျှောက်လှမ်းမယ့် အမျိုးသားအကျိုးစီးပွားများ နစ်နာဆုံးရှုံးခြင်းဖြစ်တာကို နားလည်သဘောပေါက်ဖို့ လိုအပ်မှာပဲဖြစ်တယ်။တို့တပ်မတော်အနေနဲ့ အစိုးရက ချမှတ်ထားတဲ့ရှေ့လုပ်ငန်းစဉ် (၅) ရပ်နဲ့အညီ “နိုင်ငံတစ်ဝန်းရှိ ပြည်သူများရဲ့လူမှုစီးပွားဘဝလုံခြုံရေးအတွက် ပြည်ထောင်စုတစ်ဝန်းလုံးတည်ငြိမ်အေးချမ်းရေးနဲ့ တရားဥပဒေစိုးမိုးမှု အပြည့်အဝရရှိရန်အလေးထား လုပ်ဆောင်သွားမှာပဲ ဖြစ်တယ်။ အဲလိုလုပ်ဆောင်ရာမှာ NUG နဲ့ အကြမ်းဖက်အဖွဲ့အစည်းတွေ၊ ၎င်းတို့ကို ပံ့ပိုးနေတဲ့ EAO အဖွဲ့အစည်းအချို့ကို ပြတ်ပြတ်သားသား အရေးယူဆောင်ရွက်သွားမှာဖြစ်ကြောင်း ပြောကြားလိုတယ်။ဒါ့ကြောင့် ဒုတိယအကြိမ် အရေးပေါ်သက်တမ်းကာလမှာအရေးကြီးတဲ့ မြို့နယ်တွေကို စစ်အုပ်ချုပ်ရေးအမိန့်များ တိုးမြှင့်သတ်မှတ်ပြီး ထိန်းချုပ်ဆောင်ရွက်လျက်ရှိတယ်။ ဒါဟာ ပြည်သူများကို ထိန်းချုပ်ကန့်သတ်ခြင်းမဟုတ်ဘဲ ဒေသခံပြည်သူလူထုအကျိုးစီးပွားကို ထိခိုက်ပျက်စီးအောင် ဆောင်ရွက်နေကြတဲ့အကြမ်းဖက်သမားများရဲ့ လုပ်ဆောင်ချက်တွေကို ထိရောက်စွာထိန်းချုပ်နိုင်ဖို့ပဲဆိုတာ ထည့်သွင်းပြောကြားလိုတယ်"ဟု ၎င်းက ပြောသည်။

မြန်မာနိုင်ငံအနေဖြင့် အာဆီယံအဖွဲ့ဝင်နိုင်ငံဖြစ်သောကြောင့် အာဆီယံနှင့် ဆိုင်သော အရေးကိစ္စများကို အာဆီယံစိတ်ဓာတ်၊ အာဆီယံအမြင်၊ အာဆီယံပဋိညာဉ်တို့နှင့်အညီ ဆောင်ရွက်သွားမည်ဖြစ်ကြောင်း၊ပါတီစုံဒီမိုကရေစီစနစ် လမ်းကြောင်းကို လျှောက်လှမ်းရာတွင် လက်နက်ကိုင်ပဋိပက္ခ ချုပ်ငြိမ်းရေးသည် တစ်နိုင်ငံလုံးထာဝရငြိမ်းချမ်းရေးရရှိရေး တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ပါသဘောတူညီချက်များအပေါ် အခြေခံ၍ ဖြစ်နိုင်သမျှလုပ်ဆောင်ရန် ဖြစ်ကြောင်းလည်း ပြောကြားသွားသည်။

"နိုင်ငံတော်ကာကွယ်ရေးတာဝန်တွေကို အသက်၊ သွေး၊ချွေးတွေ ပေးဆပ်ပြီးထမ်းဆောင်နေတဲ့ တို့တပ်မတော်သားတွေဟာငြိမ်းချမ်းရေးကို အလိုလားဆုံးအဖွဲ့အစည်းပဲဖြစ်တယ်"ဟု လည်း နစက ဥက္ကဌ ထည့်သွင်း ပြောဆိုသည်။

၂၀၂၂ခုနှစ်ကို ငြိမ်းချမ်းရေးနှစ်အဖြစ် သတ်မှတ်ခဲ့ပြီးနောက် ပြည်တွင်းလက်နက်ကိုင်ပဋိပက္ခများ ချုပ်ငြိမ်းရေး၊ ရေရှည်တည်တံ့ခိုင်မြဲတဲ့ ထာဝရငြိမ်းချမ်းရေး တည်ဆောက်နိုင်ရေးအတွက်တိုင်းရင်းသားလက်နက်ကိုင် အဖွဲ့အစည်းတွေရဲ့ ခေါင်းဆောင်များအား တွေ့ဆုံဆွေးနွေးနိုင်ရန် ကိုယ်တိုင်ကိုယ်ကျ ဖိတ်ခေါ်ကမ်းလှမ်းခဲ့ကြောင်း၊ ယင်းသို့ ဖိတ်ခေါ်ခဲ့ရာတွင် လက်ရှိအချိန်ထိ NCAလက်မှတ်ရေးထိုးပြီးဖြစ်သော တိုင်းရင်းသားလက်နက်ကိုင်အဖွဲ့၇ ဖွဲ့ နှင့် လက်မှတ်ရေးထိုးခြင်းမပြုရသေးသော တိုင်းရင်းသားလက်နက်ကိုင်အဖွဲ့ ၃ ဖွဲ့၊ စုစုပေါင်း ၁၀ ဖွဲ့တို့မှ ကိုယ်စားလှယ်များနှင့် တွေ့ဆုံဆွေးနွေးလျက်ရှိပြီး နိုင်ငံရေးအရ တည်ငြိမ်အေးချမ်းစွာ လျှောက်လှမ်းနိုင်မည့် ရလဒ်များကိုလည်း ဖော်ဆောင်နိုင်ခဲ့ကြောင်းလည်း သိရသည်။

ymg/mt
#Yangon_Media_Group

#LocalNews
Published_ 27 March 2023
အင်းလေးဒေသ၌ ရေပေါ်သင်္ကြန်ကို ယခုနှစ်တွင် ပြန်လည်ကျင်းပသွားမည်ဖြစ်ကြောင်း မြန်မာနိုင်ငံခရီးသွားလုပ်ငန်းရှင်များအသင်းကသိရသည်။

ရှမ်းပြည်နယ်(တောင်ပိုင်း)၊ ညောင်ရွှေမြို့နယ်၊ အင်းလေးဒေသ နန်းပန်ကျေးရွာအနီးရှိ ရေပြင်တွင် ၂၀၁၉ ခုနှစ်တွင် ပထမဦးဆုံးအကြိမ် စတင်ကျင်းပခြင်းဖြစ်ပြီး၊ပြည်တွင်း ပြည်ပခရီးသွားဧည့်သည်များ အများဆုံးလာရောက်လေ့ရှိကြောင်း သိရသည်။

ကိုဗစ်ကာလအလွန်ယခုနှစ်မှပြန်လည်ကျင်းပခြင်းဖြစ်ရာ ပွဲတော်စည်ကားနိုင်သော်လည်းခရီးသွားဝင်ရောက်မှု နည်းပါးနိုင်ကြောင်းခရီးသွားလုပ်ငန်းရှင်အသင်းကခန့်မှန်းထားသည်။

ရေပေါ်သင်္ကြန်ပွဲတော်တွင် အင်းလေးကန်ရေပြင်ပေါ်၌ လှေသမ္ဗန်များ၊ ဖောင်များဖြင့် အတာရေ စင်ပက်ဖြန်းကြမည့် ရေပေါ်သင်္ကြန်ပွဲ၊ မြန်မာ့ရိုးရာ အတာသင်္ကြန် ယိမ်းအကအလှများနှင့် တိုင်းရင်းသားရိုးရာ အကပြိုင်ပွဲအစီအစဉ်များ အစရှိသည့် အစီအစဉ်များပါဝင်ပြီး မဟာသင်္ကြန်အကြိုနေ့မှ နှစ်ဆန်းတစ်ရက်နေ့အထိ ကျင်းပပြုလုပ်သွားမည် ဖြစ်ကြောင်း သိရသည်။

ymg/ppk
#Yangon-Media-Group

#LocalNews

Published_ 26 March 2023

မတ်လ ၂၆ ရက်နေ့ ည ၇နာရီ၀န်းကျင်ခန့်က ပဲခူးရွှေမော်တောဘုရားပွဲကျင်းပအတွင်းမှ ပင်လယ်ဓားပြ ရဟတ်စင်ပြုတ်ကျမူဖြစ်ပွားခဲ့ကြောင်း တူညီရှင်မေတ္တာရှင်ပရဟိတအသင်းမှသိရသည်။

ရဟတ်စင်ပြုတ်ကျမူကြောင့် လူငယ်အမျိုးသမီး တချို့အပါအ၀င် လူ၁၁ ဦးထိခိုက်ဒဏ်ရာရရှိခဲ့ကြောင်း အဆိုပါအသင်းတာ၀န်ခံက YMG ကိုပြောသည်။

အဆိုပါထိခိုက်ဒဏ်ရာရရှိသူ လူနာ ၁၁ ဦးကို ပဲခူးမြို့ဆေးရုံကြီးပို့ဆောင်ပေးခဲ့ကြောင်း တူညီမေတ္တာပရဟိတအသင်း မှသိရသည်။

ymg/ynzw
#Yangon_Media_Group

#World_News
Published 27 March 2023

သောကြာနေ့နှောင်းပိုင်းက မစ္စစ္စပီမှာ အင်အားပြင်းမုန်တိုင်းတစ်ခုတိုက်ခတ်သွားကာ လေဆင်နှာမောင်းကြီးအနည်းဆုံးတစ်ခု ဖြစ်ပေါ်ခဲ့တာကြောင့် အဆောက်အအုံရာနဲ့ချီ ပျက်စီးသွားခဲ့ပြီး အနည်းဆုံးလူ ၂၅ ဦးသေဆုံးကာ အလာဘာမာမှာတော့ ၁ ဦးသေဆုံးခဲ့ပါတယ်။

လေဆင်နှာမောင်းက မြေပေါ်မှာ တစ်နာရီခန့်ရှိခဲ့ပြီး မိုင် ၁၇၀ လောက်အထိ လမ်းတလျှောက်ဖျက်ဆီးသွားခဲ့ကြောင်း မစ္စစ္စပီဂျက်ဆန် အမျိုးသားမိုးလေဝသဌာနမှ မိုးလေဝသပညာရှင်'နီကိုလတ်စ်ပရိုက်စ်'က ပြောကြားခဲ့ပါတယ်။

ပြည်နယ်ထောက်ပံ့ရေး၊ ထိခိုက်ခဲ့တဲ့နေရာများမှ ဒေသခံပြန်လည်ထူထောင်ရေးလုပ်ငန်းစဉ်များအတွက် သမ္မတ'ဂျိုးဘိုင်ဒင်'က နိုင်ငံတော်အကူအညီများပေးအပ်ရန် အမိန့်ပေးခဲ့ကြောင်း အိမ်ဖြူတော်က ထုတ်ပြန်ခဲ့ပါတယ်။

ကာရိုးလ်၊ ဟမ်ဖရေးစ်၊ မွန်ရိုး၊ ရှာကီခရိုင်များမှ မုန်တိုင်းသင့်ပြည်သူများအတွက် ထောက်ပံ့ငွေများ ပေးအပ်သွားမှာဖြစ်ပါတယ်။

မစ္စစ္စပီအနောက်ပိုင်း လူဦးရေ ၁,၉၀၀ ခန့်ရှိတဲ့ မုန်တိုင်းဒဏ်အခံရဆုံး ရိုးလင်းဖော့ခ်မြို့မှာ အိမ်တွေကြေမွပျက်စီးသွားကာ သစ်ပင်များပင်စည်ကနေ ပြတ်ထွက်ကုန်ပြီး မော်တော်ကားတွေ လွင့်ထွက်ကုန်ပါတယ်။

ရိုးလင်းဖော့ခ်သို့ လေဆင်နှာမောင်းချဉ်းကပ်လာတာကို မြင်တွေ့လိုက်တဲ့ 'မိုက်ကယ်ဆာစီ'က ပိတ်မိနေတဲ့လူတွေကို ကူညီကယ်ဆယ်နေပါတယ်။

"ကယ်ဆယ်ရေးလုပ်နေစဉ်အတွင်း တစ်နေရာကနေ တစ်နေရာသွားလိုက်ရင် အကူအညီတောင်းသံ အော်ဟစ်သံတွေ ကြားနေရပါတယ်၊ ကျွန်တော်တို့က အဖွဲ့ငယ်လေးတွေခွဲပြီး အပျက်အစီးတွေကြားထဲကနေ လူတွေကိုရှာဖွေကယ်ဆယ်နေပါတယ်" လို့ ရိုက်တာသတင်းဌာနကို ပြောကြားသွားပါတယ်။

မိသားစုတစ်စုဆိုရင် ရေချိုးခန်းထဲမှာ ပုန်းအောင်းရင်း သီသီလေးလွတ်မြောက်သွားကာ ကျန်တဲ့အိမ်နေရာတွေကတော့ ပျက်စီးသွားပြီး အိမ်ခေါင်မိုးမှာ ကားတစ်စီးရောက်ရှိနေခဲ့ပါတယ်။

လူနေ ၃၀၀ ခန့်ရှိတဲ့ ဆေးလ်ဗားမြို့မှာ လူတွေက အိမ်အတွင်းခန်းတွေမှာ ပုန်းခိုနေရင်း လေဆင်းနှာမောင်းဖြတ်သန်းသွားခဲ့ပါတယ်။

'ကက်သရင်းရေး'က "ကျွန်မ ဘုရားသခင်အကြောင်း စဉ်းစားလိုက်တယ်၊ အိမ်မှာတစ်ယောက်တည်းရှိနေတုန်း ဘုရားပညတ်တော်ဆယ်ပါးကို လိုက်နာတယ်လို့ တိုင်တည်ခဲ့ပြီး ကိုယ့်ကိုယ်ကိုထိန်းသိမ်းခဲ့ပါတယ်" လို့ ပြောပြခဲ့ပါတယ်။

အခြားအိမ်တွေက နောက်တွဲအခန်းတွေပျက်စီးသွားခဲ့ပေမယ့် သူ့အိမ်နောက်တွဲကတော့ ရှိနေဆဲဖြစ်ပါတယ်။
အုပ်ချုပ်ရေးမှူး'တိတ်ရိဗ်စ်'က ဆေးလ်ဗားမြို့ကို စနေနေ့ကရောက်ရှိခဲ့ကာ အရေးပေါ်အခြေအနေထုတ်ပြန်ခဲ့ပါတယ်။

သမ္မတ'ဂျိုးဘိုင်ဒင်'က မစ္စစ္စပီထံမှ ပုံရိပ်တွေဟာ ဝမ်းနည်းကြေကွဲဖွယ်ရာဖြစ်ရကြောင်း ဖော်ပြခဲ့ကာ ပြန်လည်ထူထောင်ရေးအတွက် ဖက်ဒရယ်အစိုးရမှ အပြည့်အဝထောက်ပံ့ကြောင်း ထုတ်ပြန်လိုက်ပါတယ်။

ရိုးလင်းဖော့ခ်ရှိ အမျိုးသားကာကွယ်ရေးလက်နက်တိုက်အပါအဝင် နေရာ ၃ နေရာမှာ အရေးပေါ်ခိုလှုံရေးနေရာများကို မစ္စစ္စပီတာဝန်ရှိသူများက နေရာချပေးထားပါတယ်။

ဖက်ဒရယ်အရေးပေါ်စီမံခန့်ခွဲရေးအေဂျင်စီ (FEMA)မှ ညွှန်ကြားရေးမှူး'ဒင်းခရစ်ဝယ်လ်'က မစ္စစ္စပီသို့ တနင်္ဂနွေနေ့မှာ သွားရောက်ခဲ့ပါတယ်။

မုန်တိုင်းဒဏ်ကြောင့် မစ္စစ္စပီ၊ အလာဘာမာ၊ တန်နက်ဆီတို့မှာ နေထိုင်သူ ၂၆,၀၀၀ ခန့်ဟာ စနေနေ့ညနေအထိ လျှပ်စစ်မီးမရရှိဘဲဖြစ်နေပါတယ်။

Source: Reuters
#Yangon_Media_Group

#World_Health
Published 27 March 2023

ကျယ်လောင်သောသီချင်းသံများ၊ အင်ဂျင်သံများနဲ့ တာယာပွတ်ဆွဲသံတို့က လူတွေရဲ့ သွေးပေါင်ချိန်ကို မြင့်တက်စေနိုင်ပါတယ်။

လူစည်ဆူညံနေတဲ့လမ်းမဘေးမှာ နေတဲ့သူတွေဟာ သွေးတိုးရောဂါဖြစ်လာနိုင်ပြီး ပိုပြီးဆူညံလေ ပိုပြီးသွေးတိုးဖြစ်နိုင်လေ ဖြစ်ပါတယ်။

ထိုလူတွေမှာ နှလုံးဖောက်ခြင်း၊ လေဖြတ်ခြင်း၊ နှလုံးရပ်ခြင်းတို့ဖြစ်ပေါ်လာနိုင်ပါတယ်။

အဆိုပါတွေ့ရှိချက်တွေကြောင့် ဆူညံသံကန့်သတ်ခြင်းနဲ့ တိတ်ဆိတ်စွာမောင်းနှင်ရန် တွန်းအားပေးဖို့ ပြည်သူ့ကျန်းမာရေးပေါ်လစီအတွက် သတိပေးစရာဖြစ်လာပါတယ်။

မူလကသွေးတိုးမရှိတဲ့ ယူကေမှ လူပေါင်း ၂၄၀,၀၀၀ ကျော်ကို သုတေသီများလေ့လာခဲ့ကြပါတယ်။

၈ နှစ်ကြာပြီးနောက် ထိုလူတွေမှာ သွေးတိုးဖြစ်လာသလားဆိုတာနဲ့ သူတို့နေထိုင်တဲ့ပတ်ဝန်းကျင်က ဆူညံသံတွေနဲ့ ဆက်စပ်နေလားဆိုတာကို လေ့လာခဲ့ကြပါတယ်။

ဆူညံသံပိုများတာနဲ့အမျှ သွေးတိုးရောဂါပိုဖြစ်လာနိုင်ကြောင်း တွေ့ရှိခဲ့ကြပါတယ်။

ဆူညံသံရော လေထုညစ်ညမ်းမှုရောခံစားရတဲ့ လူတွေမှာ သွေးတိုးရောဂါဖြစ်နိုင်ချေအများဆုံးရှိနေပါတယ်။

ဆူညံသံနဲ့ သွေးတိုးရောဂါဆက်စပ်မှုကြား လေထုညစ်ညမ်းမှုပါ ပါလာရင်ပိုဆိုးနိုင်တာကို အံ့အားသင့်ခဲ့ရကြောင်း ပီကင်းတက္ကသိုလ်မှ ပရော်ဖက်ဆာ'ကျင်ဟောင်'က ပြောကြားလိုက်ပါတယ်။

ယူကေရှိ အရွယ်ရောက်ပြီးသူ ၃ ယောက်မှာ ၁ ယောက်နှုန်းက သွေးတိုးရောဂါရှိနေပြီး သွေးတိုးဆိုတာက လေဖြတ်ခြင်းနဲ့ နှလုံးဖောက်ခြင်းကိစ္စတွေရဲ့ တဝက်ကျော်မှာ ပါဝင်ပတ်သက်နေပါတယ်။

ဒီအခြေအနေက လက္ခဏာမပြတတ်သလို တဝက်ကျော်လောက်က ရောဂါရှိမှန်းမသိတာကြောင့် ကျန်းမာရေးပြဿနာကြီး ဖြစ်နေပါတယ်။

ဆူညံသံလျှော့ချရန်အတွက် လမ်းကောင်းမွန်အောင်ပြုလုပ်ခြင်း၊ မြို့ပြလူနေပုံစံ၊ တိတ်ဆိတ်တဲ့ယာဉ်များရင်းနှီးမြှုပ်နှံလာခြင်းတို့ ပြုလုပ်ရန် သုတေသီများက အကြံပြုလိုက်ပါတယ်။

Source: Daily Mail.
#Yangon_Media_Group

#World_Health
Published 27 March 2023

မက်ဒီတာရေနီယန်စားသောက်ပုံစံလိုမျိုး အစားအစာထဲမှာ သံလွင်ဆီထည့်စားခြင်းဖြင့် အမျိုးသမီးတွေမှာ ရင်သားကင်ဆာဖြစ်နိုင်ချေကို ၃ ပုံ ၂ ပုံလျှော့ချပေးနိုင်ကြောင်း လေ့လာချက်အသစ်မှာ တွေ့ရှိထားပါတယ်။

၂၀၂၃ မှာ အကောင်းဆုံးအစားအစာအဖြစ် မက်ဒီတာရေနီယန်အစားအစာကို သတ်မှတ်ထားကာ အီတလီ၊ ဂရိအပါအဝင်နိုင်ငံတွေမှ စိုက်ပျိုးတဲ့အစားအစာများ ပါဝင်ပါတယ်။

လူတစ်ယောက်အနေနဲ့ ငါး၊ ဟင်းသီးဟင်းရွက်၊ အသီးအနှံ၊ ပဲအမျိုးမျိုးတို့ကို အများအပြားစားသုံးသင့်ပြီး အသားလျှော့စားသင့်ပါတယ်။

လေ့လာမှုပြုလုပ်ရာမှာတော့ သံလွင်ဆီတွေ မြေပဲတွေပါဝင်တဲ့ မက်ဒီတာရေနီယန်စားသုံးတဲ့ အမျိုးသမီးတွေနဲ့ အဆီလျှော့စားတဲ့ သာမန်စားစရာစားသုံးသူအမျိုးသမီးအဖွဲ့ကို နှိုင်းယှဉ်ခဲ့ကြပါတယ်။

သံလွင်ဆီသန့်ပါဝင်တဲ့ မက်ဒီတာရေနီယန်စားစရာတွေကို စားသုံးတဲ့ အသက် ၆၀ မှ ၈၀ ကြားအမျိုးသမီးတွေမှာ ရင်သားကင်ဆာဖြစ်ပွားနှုန်းက သာမန်စားသုံးတဲ့အဖွဲ့ထက်စာရင် ၆၈ ရာခိုင်နှုန်းလျော့နည်းခဲ့ပါတယ်။

စမ်းသပ်ချက်များအရ သံလွင်ဆီသန့်စားသုံးခြင်းက ရင်သားကင်ဆာကာကွယ်ရာမှာ အဓိကကျနေကြောင်း စာတမ်းပြုစုသူဒေါက်တာ'မီဂွယ်မာတီနက်ဇ်ဂွန်ဇာလက်ဇ်'က ပြောကြားသွားပါတယ်။

ဒီရလဒ်တွေကို အတည်ပြုနိုင်ရန် စမ်းသပ်ချက်အများအပြားဖြင့် ရေရှည်လေ့လာရဦးမှာဖြစ်ပါတယ်။
ကျန်းမာရေးအကျိုးကျေးဇူးရရှိတာက သံလွင်ဆီကပဲရတာလား ဒါမှမဟုတ် အခြားအစားအစာနဲ့ တွဲစားလို့ရတာလားဆိုတာကိုတော့ သုတေသီတွေ မဆုံးဖြတ်နိုင်သေးပါဘူး။

ကာကွယ်ခြင်းကသာ ကင်ဆာမဖြစ်စေရန် အကောင်းဆုံးနည်းလမ်းဖြစ်ကြောင်းလည်း ဒေါက်တာကအကြံပြုထားပါတယ်။

လက်ရှိလေ့လာချက်ကတော့ ရင်သားကင်ဆာဖြစ်ပွားသူ ၃၅ ဦးသာရှိထားပြီး စမ်းသပ်ခံအားလုံးက မီးယပ်ဆုံးထားပြီးဖြစ်ကာ နှလုံးသွေးကြောရောဂါများ ဖြစ်နိုင်ချေများသူတွေဖြစ်ပါတယ်။

မက်ဒီတာရေနီယန်အစားအစာမှာပါဝင်တဲ့ အရွက်၊ ငါး၊ သံလွင်ဆီတို့က နှလုံးသွေးကြောရောဂါဖြစ်နိုင်ချေကို လျှော့ချနိုင်ဖွယ်ရှိပြီး စားသုံးရန်ဘေးကင်းတဲ့အပြင် ရင်သားကင်ဆာကိုပါ ကာကွယ်နိုင်ဖွယ်ရှိနေပါတယ်။

Source: The Jerusalem Post.
#Yangon_Media_Group

#Local_News
Published_ 26 March 2023

အခုနှစ်အတွင်း မြန်မာကျောင်းသား၊ကျောင်းသူ (၁၅၀)ဦးကို အိန္ဒိယနိုင်ငံရဲ့တက္ကသိုလ်တွေမှာ ပညာသင်ကြားနိုင်ဖို့ Scholarshipပညာသင်ဆုပေးသွားဖို့ရှိတယ်လို့ India Education Fair ပွဲမှ သိရပါတယ်။India Education Fairပွဲကို အိန္ဒိယနိုင်ငံသံရုံးနဲ့ SAPE Events and Media Ltd ပူးပေါင်းကျင်းပခဲ့တာဖြစ်ပြီး မတ်လ(၂၄)ရက်မှ(၂၅)ရက်အထိရွှေဘုံသာလမ်းရှိ India Centerမှာကျင်းပခဲ့တာဖြစ်ပါတယ်၊၊

#YMG#Yangon_Media_Group