#Local_News
Published_ 31 March 2023

မတ်လ ၂၅ ရက်နေ့ မနက်ပိုင်းကစပြီး တိုက်ပွဲတွေဖြစ်ပွားနေတဲ့အတွက် အဲဒီလမ်းမှယာဉ်သွားလာမှုတွေကို ပိတ်ဆို့ထားတာဖြစ်ပါပြီး မတ်လ ၃၁ ရက်နေ့ မနက်ပိုင်းကနေလက်ရှိအချိန်အထိတော့ ယာဉ်သွားလာမှုတွေ ပုံမှန်အတိုင်းပြန်ဖြစ်နေပြီးလို့ အလင်းသစ်မြဝတီပရဟိတအသင်း တာဝန်ခံက ပြောပါတယ်။

#Local_News #ခေတ္တပိတ် #မြဝတီအာရှလမ်းမကြီး
#YMG#Yangon_Media_Group

#Local_News
Published_ 31 March 2023

မော်လမြိုင်မြို့နယ်မှာ ကားနဲ့ဆိုင်ကယ်တို့ တိုက်မိမှုဖြစ်ပွားခဲ့ပြီး ကလေးငယ်တစ်ဦး အပါအဝင် ၂ဦးသေဆုံးခဲ့တယ်လို့ ကျန်းမာချမ်းသာလူမှုကယ်ဆယ်ရေးအဖွဲ့(မော်လမြိုင်)ထံက သိရသည်။

မတ်လ ၃၀ရက်နေ့ ညနေပိုင်းအချိန်က မော်လမြိုင်မြို့ အုတ်ဖိုလမ်းမကြီးမှာ ကားနဲ့ဆိုင်ကယ်တိုက်မိမှုဖြစ်ပွားကြောင်း အကြောင်းကြားချက်အရ အသင်းက သွားရောက်ကူညီခဲ့ကြောင်း သိရသည်။

"ရပ်ထားတဲ့ ရေသန့်ပို့တဲ့ကားကို ဆိုင်ကယ်က ဝင်တိုက်မိတာ၊ ဆိုင်ကယ်မောင်းတဲ့ကောင်လေးကတော့ နေရာမှာပဲ ပွဲချင်းပြီးသေသွားတယ်၊ ကလေးကတော့ ဆေးရုံပို့ရင်း လမ်းမှာသေဆုံးသွားတာပါ"လို့ အသင်းက ပြောသည်။

အဆိုပါ ယာဉ်တိုက်မှုဖြစ်စဉ်မှာ ကလေးငယ်တစ်ဦးသည် ဦးခေါင်းထိခိုက်လက်ထိခိုက်(အနီရောင်အဆင့်)ဒဏ်ရာရရှိခဲ့ပြီး ဆိုင်ကယ်မောင်းနှင်လာသူသည် နေရာမှာပင် ပွဲချင်းပြီးသေဆုံးခဲ့ကြောင်း သိရသည်။

ယာဉ်တိုက်မှုဖြစ်စဉ်အတွင်း သေဆုံးလူနာတစ်ဦးနဲ့ ကလေးငယ်တို့ကို မော်လမြိုင်ဆေးရုံကြီးသို့ ရာမညအရေးပေါ်ကယ်ဆယ်ရေးအဖွဲ့က ကူညီပို့ဆောင်ပေးခဲ့ကြောင်းသိရသည်။

#ymg/ppk #Local_News #မော်လမြိုင် #ကားနဲ့ဆိုင်ကယ်တိုက်မိ
#YMG #Yangon_Media_Group

#Local_News
Published_ 31 March 2023

မန္တလေးမြို့၌ လူသတ်ဓားပြတိုက်မှု ကျူးလွန်သူ ၄ ဦးအား ဖမ်းမိခဲ့ပြီးနောက် ၂ ဦးကို ၄င်းတို့သိမ်းဆည်းထားသည့် လက်ပစ်ဗုံးနှစ်လုံးအား ယမန်နေ့ညက လိုက်လံပြသခိုင်းစဉ် ပြန်လည်ခုခံသဖြင့် လုံခြုံရေးအဖွဲ့က သေနတ်ဖြင့် ပစ်ခတ်ရှင်းလင်းခဲ့ရာ ၂ ဦးစလုံး နေရာ၌ပင် သေဆုံးခဲ့ကြောင်း သိရသည်။

ဓားပြမှုဖြင့် ဖမ်းမိသူ ၄ ဦးအား စစ်ဆေးရာမှ ဖောက်ခွဲရန် ဗုံးနှစ်လုံးအား သိမ်းဆည်းထားကြောင်း သိရသဖြင့် မတ် ၃၀ ရက်၊ ယမန်နေ့ ညပိုင်းက ဖမ်းမိထားသူ အမျိုးသား ၂ ဦးအား လုံခြုံရေးအဖွဲ့များက ခေါ်ဆောင်ကာ ပြည်ကြီးတံခွန်မြို့နယ်၊ (ဋ) ရပ်ကွက်၊ ၁၃၁ လမ်း၊ ၄၈ နှင့် ၄၉ လမ်းကြားရှိ သစ်ပင်တစ်ပင်အောက်သို့ သွားရောက်ရှာဖွေခဲ့သည်ဟု သိရသည်။

ထိုသို့ ရှာဖွေစဉ် ဖမ်းမိထားသူ တစ်ဦးက လက်ထိပ်ခတ်ထားသည့် လက်ဖြင့် လုံခြုံရေးအဖွဲ့ဝင်တစ်ဦး၏ သေနတ်အား လုကာ ပြန်လည်ခုခံရန် ကြိုးစားသဖြင့် သေနတ်ဖြင့် ပစ်ခတ်ခဲ့ပြီး၊ ကျန်ဖမ်းမိထားသူတစ်ဦးမှာလည်း လက်ပစ်ဗုံး၏ ကလစ်အား ဖြုတ်၍ ဖောက်ခွဲရန် ကြိုးစားသဖြင့် သေနတ်ဖြင့် ပစ်ခတ်ခဲ့ရာ နှစ်ဦးစလုံး နေရာ၌ပင် သေဆုံးခဲ့ကြောင်း လုံခြုံရေးအဖွဲ့က သိရသည်။

အဆိုပါ ဓားပြမှုဖြင့် ဖမ်းဆီးရမိသူ အမျိုးသား ၄ ဦးမှာ အမရပူရမြို့နယ်၊ ကျေးရွာတစ်ရွာတစ်ရွာတွင် ဓားပြတိုက်ကာ နေအိမ်၌ရောက်ရှိနေသူ အိမ်ရှင်၏ မောင် တော်စပ်သည့် ဒုရဲမှူးတစ်ဦးကို သတ်ဖြတ်ကာ ရွှေထည်နှင့်ငွေများ လုယက်သွားခဲ့မှု၊ မန္တလေးရှိ နာမည်ကြီး ဒေါ်တောမုန့်တီဆိုင်အား ဓားပြတိုက်ကာ ရွှေထည်များ လုယက်မှု၊ ချမ်းအေးသာစံမြို့နယ်၌ ဖွင့်လှစ်ထားသည့် စိန်ကျော်မိုး ရွှေသန့်စင်နှင့် မီးလင်းရွှေရောင်းဝယ်ရေး ဆိုင်ရှေ့တို့တွင် ငွေကျပ်သိန်းထောင်ချီ လုယက်ခဲ့သဖြင့် ဖမ်းဆီးထားခြင်း ဖြစ်သည်။

#ymg/ppk #Local_News #မန္တလေး #ဓားပြ၄ဦး #သက်သေခံပစ္စည်း #YMG
#Yangon-Media-Group

#Local_News
Published_ 31 March 2023

ပုဂံသဗ္ဗညုဘုရား ပြုပြင်ထိန်းသိမ်းရေးကိုတရုတ်နိုင်ငံမှ နိုင်ငံတော်အဆင့်အဖြစ်မြှင့်တင်ဆောင်ရွက်နေပြီး ပြုပြင်ထိန်းသိမ်းရေးလုပ်ငန်းများကိုလုပ်ငန်းကျွမ်းကျင်သောရှီအမ်းပြည်နယ် ယဉ်ကျေးမှုအမွေ အနှစ်ထိန်းသိမ်းရေးဌာနကိုတာဝန်ပေးထားကြောင်းသိရသည်၊၊

မြန်မာနိုင်ငံကိုလာရောက်သည့် တရုတ်ပြည်သူ့သမ္မတနိုင်ငံ ၊ယဉ်ကျေးမှုနှင့်ခရီးသွားလာရေး ဝန်ကြီးဌာန ဒုတိယဝန်ကြီး H.E Mr. Qun Li ၏ ပြောကြားချက်အရသိရခြင်းဖြစ်သည်၊၊

တရုတ်နိုင်ငံယဉ်ကျေးမှုနှင့် ခရီးသွားလာရေး ဝန်ကြီးဌာန ဒုတိယဝန်ကြီးအဖွဲ့သည်မတ်လ(၃၀) ရက်တွင်မြန်မာနိုင်ငံသို့လာရောက်ခဲ့ပြီး သာသနာရေးနှင့် ယဉ်ကျေးမှုဝန်ကြီးဌာန၊ဒုတိယဝန်ကြီးဒေါ်နုမြဇံ ဦးဆောင်သောအဖွဲ့နှင့် သဗ္ဗညုဘုရားကြီး ပြုပြင်ထိန်းသိမ်းမှုအပါအဝင်ယဉ်ကျေးမှုအမွေအနှစ်ထိန်းသိမ်းရေးပူးပေါင်း ဆောင်ရွက်ရန် ကိစ္စများကိုတွေ့ဆုံဆွေးနွေးခဲ့သည်၊၊

ယင်းသို့တွေ့ဆုံစဉ် တရုတ်ပြည်သူ့သမ္မတနိုင်ငံအစိုးရယဉ်ကျေးမှုနှင့် ခရီးသွားလာရေး ဝန်ကြီးဌာန ဒုတိယဝန်ကြီးက မြန်မာ့ယဉ်ကျေးမှုအမွေအနှစ်များ ထိန်းသိမ်းရေးကို ဆက်လက် ကူညီဆောင်ရွက်ပေးရန် တရုတ်ပြည်သူ့ သမ္မတနိုင်ငံဘက်မှ စီစဉ်ဆောင်ရွက်ပေးမည် ဖြစ်ပါ ကြောင်း၊ သဗ္ဗညုဘုရား ပြုပြင်ထိန်းသိမ်းရေးကို နိုင်ငံတော်အဆင့်အဖြစ် မြှင့်တင်ဆောင်ရွက်နေ ပြီး လုပ်ငန်းကျွမ်းကျင်သော ရှီအမ်းပြည်နယ် ယဉ်ကျေးမှုအမွေအနှစ်ထိန်းသိမ်းရေးဌာနကို တာဝန်ပေးထားပြီး မိမိတို့ ယဉ်ကျေးမှုနှင့် ခရီးသွားလာရေးဝန်ကြီးဌာနမှ ကြီးကြပ်ပေးနေပါကြောင်း တရုတ်သမ္မတကြီး ရှီကျင့်ဖျင်က အာရှယဉ်ကျေးမှုအမွေအနှစ်ကာကွယ်ထိန်းသိမ်းရေးအတွက် မြှင့်တင်ဆောင်ရွက်ရန် အဆိုပြုထား၍ မြန်မာနိုင်ငံကိုလည်း ပါဝင်ပူးပေါင်းရန် ဖိတ်ခေါ်ပါကြောင်း ဆက်လက်၍လည်း နှစ်နိုင်ငံချစ်ကြည်ရေးနှင့် ယဉ်ကျေးမှုအမွေအနှစ်မြှင့်တင်ရေးတွက် ကူညီ ပူးပေါင်းမှုများ ဆောင်ရွက်သွားမည်ဖြစ်ကြောင်း ပြောကြားခဲ့သည်၊၊

အဆိုပါတွေ့ဆုံမှုတွင် သာသနာရေးနှင့် ယဉ်ကျေးမှုဝန်ကြီးဌာန ဒုတိယဝန်ကြီး ဒေါ်နုမြဇံက ပုဂံယဉ်ကျေးမှုအမွေအနှစ်ဒေသရှိ သဗ္ဗညုဘုရား ပြုပြင်ထိန်းသိမ်းရေးအတွက် နားလည်မှု စာချွန် လွှာကို ၂၀၁၇ ခုနှစ် မေလတွင် လက်မှတ်ရေးထိုးခဲ့ပါကြောင်း၊ သဗ္ဗညုဘုရား ပြုပြင်ထိန်းသိမ်းရေး ပဏာမ သဘောတူညီချက်ကို ၂၀၁၇ ခုနှစ် မေလ(၂၅) ရက်နေ့တွင် လည်းကောင်း၊ သဘောတူ စာလွှာ Exchange Letter ကို ၂၀၁၈ ခုနှစ် စက်တင်ဘာ(၂၂) ရက်နေ့တွင် လည်းကောင်း၊ သဘောတူညီချက်ကို ၂၀၁၉ ခုနှစ် ဇွန်လ (၁၂)ရက်နေ့တွင် လည်းကောင်း လက်မှတ်ရေး ထိုးခဲ့ပါကြောင်း၊ တရုတ်နိုင်ငံအစိုးရ အကူအညီဖြင့် ပုဂံကမ္ဘာ့အမွေအနှစ်ဒေသ သဗ္ဗညုဘုရား ပြုပြင်မွမ်းမံရေးစီမံကိန်း လုပ်ငန်းစတင်ခြင်းအခမ်းအနားကို ၂၀၂၂ ခုနှစ် ဇန်နဝါရီ လ(၁)ရက်နေ့ တွင် ကျင်းပပြုလုပ်ခဲ့ပါကြောင်း သဗ္ဗညုဘုရား ပြုပြင်ထိန်းသိမ်းရေးအတွက် တရုတ်ပြည်သူ့ သမ္မတနိုင်ငံမှ ပညာရှင်များသည် ထိန်းသိမ်းရေးလုပ်ငန်းများ ဆောင်ရွက်ရန်အတွက် ကွင်းဆင်း လေ့လာခြင်း၊ ယာယီရုံးခန်း၊ အလုပ်ရုံ၊ သိုလှောင်ရုံနှင့် ဝန်ထမ်းအိမ်ရာများ တည်ဆောက်သည့် လုပ်ငန်းများ ဆောင်ရွက်လျက်ရှိပါကြောင်း၊ သဘောတူညီချက်အတိုင်း ဆက်လက်၍ သဗ္ဗညု ဘုရား ပြုပြင်ထိန်းသိမ်းပေးမည်ကို သိရှိရသဖြင့် ကျေးဇူးတင်ပါကြောင်း၊ ပုဂံယဉ်ကျေးမှုဒေသ တစ်ခုလုံးအား အဆင့်မြင့် နည်းပညာဖြင့် စဉ်ဆက်မပြတ် စောင့်ကြည့် ထိန်းသိမ်း ကွပ်ကဲသည့် စနစ် တပ်ဆင်မှုလိုအပ်သဖြင့် ကူညီဆောင်ရွက်ပေး စေလိုပါကြောင်း၊ ပုဂံယဉ်ကျေးမှုအမွေအနှစ် ဒေသရှိ အနော်ရထာနန်းတော်အား အဆင့်မြှင့်တင်ရေးနှင့် ခင်းကျင်းပြသရေးတို့အတွက် ဆက်လက်ကူညီဆောင်ရွက်စေလိုပါကြောင်းနှင့် ရခိုင်ပြည်နယ်မြောက်ဦးဒေသအား ကမ္ဘာ့အမွေ အနှစ်ဒေသအဖြစ် စာရင်းတင်သွင်းရေးဆိုင်ရာ ကူညီဆောင်ရွက်ရန် အတွက် လက်မှတ်ရေးထိုးရန် ၂၀၁၈ခုနှစ် ဇွန်လမှစ၍ ဆောင်ရွက်ခဲ့သော်လည်း ကိုဗစ်(၁၉) ကမ္ဘာ့ကပ်ရောဂါကြောင့် ယနေ့ထိ လက်မှတ်ရေးထိုးနိုင်ခြင်း မရှိသေးသဖြင့် ဆက်လက် ဆောင်ရွက်သွားရန် ဖြစ်ပါကြောင်း ဆွေးနွေး ပြောကြားခဲ့သည်။

#ymg/tthl #Local_News #ပုဂံသဗ္ဗေညု #ရှီအန်းပြည်နယ်
#YMG #Yangon_Media_Group

#Local_News
Published_ 31 March 2023

မဟာသင်္ကြန်ပွဲတော်တွင် မြန်မာ့ရိုးရာယဉ်ကျေးမှုနှင့် ဆန့်ကျင်၍ ကြမ်းတမ်းစွာရေကစားခြင်း၊ ထိပါးနှောက်ယှက်ခြင်းများ အပါအဝင်ရှောင်ကြဉ်ရမည့်အချက်များကို သာသနာရေးနှင့်ယဉ်ကျေးမှုဝန်ကြီးဌာနက ထုတ်ပြန်လိုက်ကြောင်း သိရသည်၊၊

အဆိုပါ ထုတ်ပြန်ချက်တွင် မဟာသင်္ကြန်ပွဲတော်ကျင်းပရခြင်း၏ ရည်ရွယ်ချက်များအဖြစ် မြန်မာ့ဓလေ့ထုံးတမ်းအစဉ်အလာနှင့်အညီ ရိုးရာမပျက် ဆက်လက်ထိန်းသိမ်းရန်ဆိုသည့်အချက် အပါအဝင် ရည်ရွယ်ချက်လေးချက်ကို ဖော်ပြထားသည်၊၊

မဟာသင်္ကြန်ပွဲတော်တွင် ရှောင်ကြဉ်ရမည့်အချက်များအဖြစ်
(၁) မြန်မာလူမျိုးများ၏အမြင်တွင် မတင့် တယ်သည့်နေထိုင်မှု၊ ပြုမှုများကို ရှောင်ကြဉ်ရန်၊

(၂)ရုန့်ရင်းကြမ်းတမ်းစွာပြောဆိုခြင်းမှ ရှောင်ကြဉ်ရန်၊

(၃)သူတစ်ပါးအားဒဏ်ရာ အနာတရဖြစ်စေပြီး အန္တရာယ်ဖြစ်စေမည့်ကြမ်းတမ်းသည့်ရေကစားမှု၊ ထိပါးနှောက်ယှက်မှုများရှောင်ကြဉ်ရန်၊

(၄) တစ်ဦး(သို့မဟုတ်)အဖွဲ့အစည်းများ၏ဂုဏ်သိက္ခာ ထိခိုက်စေသည့် သံချပ်ထိုးခြင်း၊ သီဆိုခြင်း၊ လှုပ်ရှားဆောင်ရွက်ခြင်းများရှောင်ကြဉ်ရန်၊

(၅)ယဉ်ကျေးမှုလွန် အဝတ်အစားများဝတ်ခြင်းမှရှောင်ကြဉ်ရန်၊

(၆)ရိုးရာယဉ်ကျေးမှုသင်္ကြန်ပွဲတော်၏တန်ဖိုးလျော့စေသည့် အပြောအဆို၊အဝတ်အစား၊အစားအစာ၊ အကအခုန်များအလွန်အမင်းလိုက်စားပြုမှုခြင်း၊

(၇) အရက်သေစာကိုသိက္ခာကျလောက်အောင် သောက်စားမူးယစ်ခြင်းများရှောင်ကြဉ်ရန်လိုအပ်ကြောင်း သာသနာရေးနှင့်ယဉ်ကျေးမှုဝန်ကြီးဌာန၏ ထုတ်ပြန်ချက်အရ သိရသည်၊၊

#ymg/tthl #Local_News #ယခုနှစ်သင်္ကြန်ပွဲတော် #သံချပ်များ
#YMG #Yangon_Media_Group

Published 31 march 2023

မြန်မာနိုင်ငံတော်ဗဟိုဘဏ်က အမေရိကန်ဒေါ်လာလဲလှယ်နှုန်းထားများကို ပြင်ဆင်ပြောင်းလဲဖို့ အစီအစဉ်မရှိဘူးလို့ နစကရဲ့ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက မီဒီယာတွေကိုပြောပါတယ်။ အဲဒီအပြင် အချို့သော နိုင်ငံခြားဘဏ်တွေက မြန်မာနိုင်ငံက ငွေကြေးအဝင်အထွက်တွေကို လက်မခံတော့ဘူးဆိုတဲ့ကောလဟလ သတင်းတွေကိုလည်း ငြင်းဆိုလိုက်ပြီး မြန်မာနိုင်ငံဟာ နိုင်ငံခြားဘဏ်တွေနှင့် လက်တွေ့မှာ ပုံမှန်လည်ပတ်ဆောင်ရွက် နေဆဲဖြစ်တယ်လို့လည်း ဗိုလ်ချုပ်ဇော်မင်းထွန်းက အတည်ပြုပြောကြားခဲ့ပါတယ်။

-ymg/knl

#Local_News
Published_ 31 March 2023

မန္တလေးတိုင်းဒေသကြီး တောင်သမာန်အင်း ကန်ပတ်လမ်းအနီးတွင် မွေးကင်းစကလေးငယ် စွန့်ပစ်ခံရပြီး သေဆုံးနေလျက်တွေရှိကြောင်းလူငယ်အားမာန်ပရဟိတအသင်းမှသိရသည်။

မတ်လ ၃၀ရက်နေ့ မနက်၉နာရီခန့်က တောင်သမာန်အင်း ကန်ပတ်လမ်းမှာ မွေးကင်းစကလေးအလောင်းကိုလာရောက်စွန့်ပစ်ထားကြောင်း ရပ်ကွက်နေပြည်သူများက လူငယ်အားမာန်ပရဟိတအသင်းကို ဆက်သွယ်အကြောင်းကြားသည့်အတွက် ကူညီဆောင်ရွက်ပေးခဲ့ကြောင်း အသင်းတာ၀န်ခံက YMG ကိုပြောသည်။

မွေးကင်းစကလေးငယ်မှာ ၂ ရက်သားခန့်ရှိပြီဖြစ်ပြီး ချက်ကြိုးတန်းလမ်းဖြင့်လာရောက်စွန့်ပစ်တာဖြစ်ကြောင်း သိရသည်။ရပ်ကွက်နေပြည်သူများ၏ ပြောကြားချက်အရ ကလေးငယ်ကို အမည်မသိအမျိုးသားတစ်ဦးကဆိုက််ကယ်ဖြင့် လာရောက်ကာပလတ်စတစ်အိတ်ဖြင့် လာစွန့်ပစ်သည်ကိုတွေ့ကြောင်း သိရသည်။

စွန့်ပစ်ခံရပြီး သေဆုံးနေသည့် ကလေးငယ်၏ ရုပ်အလောင်းကို အမရပူရမြို့ နယ် လူငယ်အားမာန် လူမှုကူညီရေးအသင်းက ကောက်ယူ သယ်ဆောင်ပြီး ပိုးမွှားများသန့်စင်ပေးကာ တောင်အင်းမြောက်အင်းသုသာန်တွင်ကောင်းမွန်စွာ သင်္ဂြိုဟ်ပေးခဲ့ကြကြောင်း သိရသည်။

Photo: လူငယ်အားမာန် လူမှုကူညီရေးအသင်
ymg/ynzw
#တောင်သမန်အင်း #မွေးကင်းစကလေးငယ် #ရုပ်အလောင်းတွေ့ရှိ
#YMG #Yangon_Media_Group

#Local_News
Published_ 31 March 2023

ယခုလအတွက် အောင်ဘာလေထီလက်မှတ် ကျပ်၁၀၀၀တန်ရောင်းရငွေမှာ ကျပ်သန်းပေါင်း ၅၂၁၄ကျော် ရရှိကြောင်း ပြည်တွင်းအခွန်များဦးစီးဌာန အောင်ဘာလေသိန်းဆုဌာနခွဲမှသတင်းထုတ်ပြန်ထားသည်။

၂၀၂၃ခုနှစ် ဧပြီလ ၁ရက်နေ့တွင်ကျင်းပမည့် (၄၉)အောင်ဘာလေထီလက်မှတ်များကို"က" အက္ခရာမှ "ဆ" အက္ခရာအထိ စုစုပေါင်းအက္ခရာ (၇)လုံးတွင်းထီစာအုပ်ပေါင်း (၅၂၁၄၃၀) ရောင်းချခဲ့ကြောင်းအဆိုပါအောင်ဘာလေသိန်းဆုဌာနခွဲမှသိရသည်။

ထီလက်မှတ်များရောင်းရငွေများမှ ၇၀ ရာခိုင်နူန်းကိုဆုငွေအဖြစ်ပြန်လည်ချီးမြှင့်ပေးမှာဖြစ်ပြီးချီးမြှင့်ပေးမည့် ဆုငွေမှာ (၃၆၅၀.၀၁၀)ဖြစ်ကြောင်းသိရသည်။

ဆုမဲအရေအတွက်မှာရောင်းရငွေ ၇၀ ရာခိုင်နူန်းပေါ်အခြေခံတွက်ချက်ထားခြင်းဖြစ်ပြီးထီဖွင့်ပွဲတွင်ဝေဝေဆာဆာပဒေသာဆုမဲစနစ်မှရောင်းမကုန်ထီလက်မှတ်များထွက်ပေါ်လာပါက အဆိုပါဆုမဲတန်ဖိုးစုစုပေါင်းအား အခြားသင့်လျော်သောဆုမဲများအဖြစ်ပြန်လည်ဖွင့်လှစ်ပေးသွားဖြစ်ကြောင်းထုတ်ပြန်ထားသည်။
ymg/ynzw
# အောင်ဘာလေထီ #ကျပ်သန်းပေါင်း ၅ထောင်ကျော်
#YMG #Yangon_Media_Group

#World_News

Published 31 March 2023

အပြာကားသရုပ်ဆောင်မင်းသမီး 'စတော်မီဒန်နီယယ်စ်'ကို နှုတ်ပိတ်နေပေးဖို့ 'ဒေါ်နယ်ထရမ့်' လျှို့ဝှက်ငွေပေးတဲ့ကိစ္စအကြောင်း စုံစမ်းစစ်ဆေးပြီးနောက် မန်ဟက်တန်ဂျူရီတရားသူကြီးတစ်ဦးက ထရမ့်ကို စွဲချက်တင်လိုက်ပါတယ်။ 

အခုအချိန်ဟာ သမ္မတရာထူးအတွက် နောက်ထပ်အရွေးချယ်ခံဖို့ပြင်ဆင်နေတဲ့ အချိန်ဖြစ်သလို ရာဇဝတ်မှုစွဲချက်တွေနဲ့ ရင်ဆိုင်နေရတဲ့ ပထမဆုံးအမေရိကန်သမ္မတဟောင်းလည်း ဖြစ်လာပါတယ်။ 

ထရမ့်ဟာ စီးပွားရေးဆိုင်ရာလိမ်လည်မှုနဲ့ ပတ်သက်တဲ့ အမှုပေါင်း ၃၀ ကျော်ကိုရင်ဆိုင်နေရကြောင်း CNN က ကြာသပတေးနေ့က ဖော်ပြခဲ့ပါတယ်။ 

ထရမ့်ကတော့ သူ့မှာလုံးဝအပြစ်မရှိကြောင်း၊ ၂၀၂၄ သမ္မတရွေးကောက်ပွဲကို လက်လျှော့မှာမဟုတ်ကြောင်း ဆိုပါတယ်။ 

ဒါ့အပြင် ဒီမိုကရက်တစ်ဦးဖြစ်တဲ့ ဘရက်ဂ်ဟာ ထရမ့်ရဲ့ပြန်လည်ရွေးကောက်ခံရန် အခွင့်အရေးတွေကို ထိခိုက်ဖို့ကြိုးစားနေတယ်လို့လည်း စွပ်စွဲလိုက်ပါတယ်။ 

အပြာကားမင်းသမီးဒန်နီယယ်စ်'ရဲ့ နာမည်အရင်းက 'စတက်ဖာနီကလစ်ဖို့ဒ်'ဖြစ်ပြီး ၂၀၀၆ ခုနှစ်က ထရမ့်နဲ့ ပျော်ပါးဖူးတဲ့အကြောင်း ရေငုံနှုတ်ပိတ်နေရန်အတွက် ငွေများလက်ခံရရှိခဲ့ကြောင်း ပြောကြားခဲ့ပါတယ်။ 

ထရမ့်က ဥပဒေရေးရာကာကွယ်ရေးအတွက် ထောက်ခံသူများထံမှ ငွေကြေးကောက်ခံခဲ့ပါတယ်။ 

နောက် ၄ ရက်အကြာမှာ အဖမ်းခံရလိမ့်မယ်လို့ မတ်လ ၁၈ ရက်နေ့က မှားယွင်းစွာ ခန့်မှန်းခဲ့ပြီးနောက်ပိုင်း စည်းရုံးရေးတွေကနေ ဒေါ်လာ ၂ သန်းကျော် ရရှိထားပါတယ်။ 

စစ်တမ်းကောက်ယူချက်အရ ၂၀၂၄ ရီပတ်ဘလစ်ကန်ထဲမှာ ထိပ်ဆုံးမှာရှိနေတဲ့ထရမ့်ဟာ ပြိုင်ဘက်အချို့ထံမှ ထောက်ခံစကားတွေ ရရှိထားပါတယ်။ 

ဒီလိုကိစ္စတွေဖြစ်ပျက်နေတာဟာ ဒီတိုင်းပြည်ကိုပြိုကွဲသွားစေလိမ့်မယ်လို့ ဒုသမ္မတဟောင်း'မိုက်ခ်ပန့်စ်'က ဆိုပါတယ်။ 

အိမ်ဖြူတော်က ဘာမှပြောကြားခြင်းမရှိပေမယ့် ဒီမိုကရက်တွေကတော့ ထရမ့်လည်း ဥပဒေပြင်ပမှာ ရှိမနေဘူးလို့ဆိုလိုက်ပါတယ်။ 

ထရမ့်ကိုဝေဖန်သူတွေရော ထောက်ခံသူတွေအနေနဲ့ တရားဥပဒေအတိုင်း ငြိမ်းချမ်းစွာ ဆက်လက်လုပ်ဆောင်သွားဖို့ တိုက်တွန်းလိုပါတယ်လို့ အထက်လွှတ်တော်မှ ထိပ်သီးသံအမတ်'ချက်ခ်ရှုမာ'က ဆိုပါတယ်။ 

မကြာမီရက်အတွင်းမှာ ထရမ့်အမှုကိုဖွင့်သွားဖွယ်ရှိပြီး ထရမ့်အနေနဲ့ မန်ဟက်တန်ကို လာရောက်ရမှာဖြစ်ပါတယ်။ 

ထရမ့်ရဲ့ရှေ့နေတွေဖြစ်တဲ့ ဆူဆန်နက်ခယ်လီစ်နဲ့ ဂျိုဆက်တာကိုပီနာတို့က တရားစွဲချက်တွေကို အပြင်းအထန်ချေပသွားမယ်လို့ ဆိုပါတယ်။ 

ဘရက်ဂ်ဟာ ပြီးခဲ့တဲ့နှစ်ကလည်း ထရမ့်လုပ်ငန်းမှ အခွန်လိမ်လည်မှုနဲ့ပတ်သက်ပြီး အောင်မြင်စွာတရားစွဲဆိုနိုင်ခဲ့ကာ ရာဇဝတ်ဒဏ်ငွေ ဒေါ်လာ ၁.၆၁ သန်းဆောင်ရတဲ့အထိ ဖြစ်ခဲ့ပါတယ်။ 

နယူးယော့ခ်တရားရုံးချုပ်မှ တရားသူကြီး'ဟွမ်မာချန်'က ဒီအမှုကို ကြီးကြပ်သွားဖို့ရှိပါတယ်။ 

Source: Reuters
#နယူးယော့ခ်တရားရုံး #ရာဇဝတ်မှု #အမေရိကန်သမ္မတ
#YMG #Yangon_Media_Group

#World_Health
Published 31 March 2023

ကျန်းမာတဲ့ ခန္ဓာကိုယ်ဖြစ်နေအောင် အိပ်စက်ခြင်းက အရေးကြီးဆုံးအရာတွေထဲက တစ်ခုဖြစ်ပါတယ်။

လူတစ်ယောက်ဟာ ကောင်းမွန်တဲ့အိပ်စက်မှု ပုံမှန်ရှိနေမယ်ဆိုရင် ရောဂါအများစုကင်းဝေးနေမယ်လို့ ကျွမ်းကျင်သူများက ယူဆနေကြပါတယ်။

နှစ်ခြိုက်စွာအိပ်ပျော်ဖို့အတွက် အိပ်ခန်းလုံလောက်စွာ မှောင်နေဖို့ကလည်း အရေးကြီးပါတယ်။

အိပ်စက်ခြင်းကိုဖြစ်စေတဲ့ မယ်လာတိုနင်ဟော်မုန်းထွက်ရှိမှုကို မီးအလင်းရောင်တွေက ပိတ်ဆို့ထားပါတယ်။

ဒါ့အပြင် အိပ်နေစဉ် မျက်လုံးအကာတပ်ထားတာနဲ့ ပတ်သက်ပြီး သက်ရောက်မှုများကိုလည်း ဖော်ပြလိုက်ပါတယ်။

- အိပ်နေစဉ် အလင်းရောင်တွေ မဝင်စေခြင်းဖြင့် နေ့ဘက်အချိန်အတွင်း မှတ်ဉာဏ်စွမ်းရည်နဲ့ နိုးကြားမှုကို တိုးတက်စေတာကြောင့် မျက်လုံးအကာဖြင့် အလင်းရောင်မဝင်အောင် တပ်ဆင်အိပ်စက်နိုင်ပါတယ်။

- အထူးကြပ်မတ်ဆောင်တွေမှာရှိတဲ့ လူနာတွေဟာ အလင်းရောင်တွေနဲ့ ဆူညံသံတွေ အမြဲကြုံတွေ့နေရတာကြောင့် မျက်လုံးအကာတပ်ပြီးအိပ်မယ်ဆိုရင် REM အိပ်စက်ခြင်းအဆင့်မှာ ကြာကြာရှိနေမှာဖြစ်ပါတယ်။

- ဈေးကွက်မှာရောင်းချနေတဲ့ မျက်လုံးအကာအများစုက ကူရှင်ပါပြီးနူးညံ့တာကြောင့် ဝတ်ထားသူကို စိတ်ပြေလျော့စေမှာဖြစ်ပါတယ်။

- မျက်လုံးအကာက အလင်းရောင်ကိုကာထားတဲ့အပြင် မျက်လုံးကိုတည်ငြိမ်စေကာ လျင်မြန်စွာအိပ်ပျော်စေနိုင်ပါတယ်။

ဒါပေမဲ့ အခြားအခြေအနေအမျိုးမျိုးကြောင့် အိပ်မပျော်တဲ့လူတွေမှာတော့ မျက်လုံးအကာက အသုံးမဝင်နိုင်ပါဘူး။

အသက်ကြီးလာခြင်း၊ အလုပ်ကြောင့် အိပ်ချိန်မမှန်ခြင်းတို့ကလည်း မယ်လာတိုနင်ကို ထိခိုက်စေပါတယ်။

ဒီလိုအခြေအနေမျိုးတွေမှာတော့ မယ်လာတိုနင်ပါတဲ့ အိပ်ဆေးတွေကို အိပ်ချိန်အနီးသောက်သုံးခြင်းဖြင့် အိပ်စက်ခြင်းစက်ဝန်းကို အကူအညီဖြစ်စေနိုင်ပါတယ်။

Source: India Today
#မျက်လုံးအကာ #အိပ်စက်ခြင်း #အထောက်အကူ
#YMG #Yangon_Media_Group

#Local_News
Published 31 March 2023

 သဘာဝဓာတ်ငွေ့ရည် (Liquefied Natural Gas -LNG) ကနေ လျှပ်စစ်မီးပေးသည့် LNG သင်္ဘောကြီး ရန်ကုန်မြို့ သီလဝါဆိပ်ကမ်းကနေ ပြန်လည်ထွက်ခွာ သွားပါပြီလို့ သိရသည် ။

 ရန်ကုန်မြို့ကို မီးပေးဖို့အတွက် အဆိုပါ MT CNTIC VPOWER ENERGY သင်္ဘော သည်၂၀၂၀ ပြည့်နှစ်ဧပြီလအတွင်း မလေးရှားနိုင်ငံကနေ ရန်ကုန်မြစ်ဝသို့ ရောက်ရှိလာပြီးနောက်LNG (Liquefied Natural Gas) ဖြင့် သာကေတရှိ ဓာတ်အားခွဲရုံကို မဂ္ဂါဝပ် ၄၀၀ နဲ့ သန်လျင်ရှိ မဂ္ဂါဝပ် ၃၅၀ ဓာတ်အားပေး စက်ရုံတွေကို ဓာတ်အား ချိတ်ဆက်ပို့လွှတ်ကာ  လျှပ်စစ်ဓာတ်အားလိုအပ်ချက် ဖြည့်ဆည်းရန် ပံ့ပိုး လုပ်ဆောင်ခဲ့သည်။

အဆိုပါ သင်္ဘောကြီးသည် ၂ နှစ်နဲ့ ၄လကျော်အကြာ မတ်လ၃၀ ရက်နေ့မှာတော့ ရန်ကုန်သီလဝါဆိပ်ကမ်းကနေ ပြန်လည်ထွက်ခွါသွားပြီ ဖြစ်ပါသည် ။

ymg/ppk

#LNG ဂတ်စ် #လျှပ်စစ်ဓာတ်အား #သင်္ဘောကြီး #ရန်ကုန်
#YMG #Yangon_Media_Group

#Local_News
Published 31 March 2023

မြန်မာရေလုပ်သား ငါးဦးပါ ငါးဖမ်းလှေတစ်စီးကို မလေးရှားရေပိုင်နက်တွင် မလေးရှားပင်လယ်ရေကြောင်းထိန်းသိမ်းရေးအေဂျင်စီ(မလေးရှားပင်လယ်ရေကြောင်းပို့ဆောင်ရေးအေဂျင်စီ) က မတ်လ ၂၉ ရက် ညအချိန် ဖမ်းမိခဲ့ကြောင်း သိရသည်။

ပီနန်းပြည်နယ် ရေကြောင်းညွန်ကြားရေးမှူးဌာနမှ ပုံမှန်လှည့်ကင်းဆောင်ရွက်နေစဉ်ဒေသတွင်း ဒေသခံ C အတန်းအစား ငါးဖမ်းသင်္ဘောတစ်စင်းကို မလေးရှားရေကြောင်းကင်းလှည့်သင်္ဘောမှ တွေ့ရှိခဲ့ရာက အထက်ပါအတိုင်း ဖမ်းမိခဲ့ခြင်း ဖြစ်ကြောင်း သိရသည်။

Perak ၊ Pantai Remis အခြေစိုက်ဒေသခံ ငါးဖမ်းစက်လှေကို Muka Head ၏ အနောက်မြောက်ဘက် ရေမိုင် ၃၂ ဒသမ ၇မိုင်တွင် စစ်ဆေး ထိန်းသိမ်းခဲ့ပြီး ယင်းလှေ၏ ရေယာဉ်မှူးတစ်ဦး အပါအဝင် မြန်မာနိုင်ငံသား ငါးဦးကိုတွေ့ရှိရသောကြောင့်လှေပေါ် လိုက်ပါသူများအား စစ်ဆေးရာ တရားဝင် သက်သေခံအထောက်အထား၊ စာရွက်စာတမ်း အထောက်အထား တစ်စုံတစ်ရာမရှိကြောင်း သိရသည်။

ယင်းကြောင့် လှေလိုင်စင် စည်းကမ်းဖောက်ဖျက်ကြောင်း တွေ့ရှိခဲ့ရသည့်အတွက် ယင်းတို့အားလုံးကို မလေးရှား ပင်လယ်ရေကြောင်း စုံစမ်းစစ်ဆေးရေး အရာရှိထံ မလွှဲပြောင်းမီ Batu Maung Limbongan ဆိပ်ခံတံတားတွင် ဖမ်းဆီး ထိန်းသိမ်းထားကြောင်း၊အရင်က ဖမ်းဆီးခြင်း နှင့် သတိပေးချက်များကို လိုက်နာခြင်းမရှိသူများဖြစ်နေပါက ပြင်းပြင်းထန်ထန် အရေးယူသွားမည် ဖြစ်ကြောင်းလည်း မလေးရှား ရေကြောင်းသွားလာရေးက အသိပေးထားသည်။

ymg/mt
#မြန်မာရေလုပ်သား #ငါးဖမ်းလှေ #မလေးရှား #ရေပိုင်နက်
#YMG #Yangon_Media_Group