#World_Military
Published 3 August 2023

ပစိဖိတ်ဒေသမှာ အသာစီးရဖို့အတွက် ဒုံးကျည်များနဲ့ ဒုံးပျံများကို ဓာတုပစ္စည်းများဖြင့် ရောနှောရန် အမေရိကန်တာဝန်ရှိသူများ ဆန္ဒရှိနေပါတယ်။

ဒီအတွက် အမေရိကန်တပ်တွေက တရုတ်နိုင်ငံထက် ပိုမိုကွာဝေးစွာ ပစ်ခတ်နိုင်ရန် ရှေ့တန်းပစ်ဒုံးကျည်လက်နက်များ အကွာအဝေးကို မြှင့်တင်ဖို့ ရည်ရွယ်နေပါတယ်။

လက်ရှိထက် ၂၀ ရာခိုင်နှုန်းလောက်အထိ အကွာအဝေးပိုရောက်ရှိရန် ပင်တဂွန်နဲ့ ကွန်ဂရက်တို့က ပိုမိုအားကောင်းတဲ့ တွန်းကန်အားနဲ့ ပိုမိုပေါ့ပါးတဲ့ ဒုံးကျည်ထိပ်ဖူးများ အသုံးပြုရန် ပြင်ဆင်မှုတစ်ရပ်ကို ရှာဖွေနေကြောင်း အမေရိကန်အရာရှိ ၂ ဦးနဲ့ ကွန်ဂရက်လက်ထောက် ၂ ဦးတို့က ရိုက်တာသတင်းဌာနကို ပြောကြားခဲ့ပါတယ်။

ဒုံးကျည်ထိပ်ဖူးထဲက ပေါက်ကွဲပစ္စည်းတွေ အစားထိုးရန် အသုံးပြုတဲ့ ဓာတုဒြပ်ပေါင်းတွေ စီစဉ်၊ ချဲ့ထွင်ထုတ်လုပ်ရန် အနည်းဆုံး ဒေါ်လာ ၁၃ သန်းလျာထားကြောင်း အထက်လွှတ်တော်က ထုတ်ပြန်ခဲ့ပါတယ်။

ဒီမိုကရက်ဆန်တဲ့ အထက်လွှတ်တော်နဲ့ ရီပတ်ဘလစ်ကန် အောက်လွှတ်တော်တို့ကြား နောက်ဆုံးအဆင့် ရန်ပုံငွေကိစ္စ ညှိနှိုင်းရန် လိုအပ်နေသေးပေမယ့် တရုတ်ကို ဟန့်တားဖို့ကတော့ နှစ်ဖက်စလုံးမှ ယေဘုယျအားဖြင့် သဘောတိုက်ဆိုင်ပါတယ်။

အင်ဒို-ပစိဖိတ်အကွာအဝေးနဲ့ တရုတ်ရေတပ်ရဲ့ အင်အားတို့ကြောင့် အကွာအဝေးပိုရောက်တဲ့ သင်္ဘောပစ်ဒုံးကျည်တွေ အမေရိကန်အနေနဲ့ လိုအပ်လာပြီလို့ မိုက်ခ်ဂယ်လာဂါက ရိုက်တာကို ပြောကြားခဲ့ပါတယ်။

ကွန်ဂရက်လွှတ်တော်က နောက်ဆုံးအတည်ပြုချက်ကို ဆိုင်းငံ့ထားကာ CL-20 လို့ခေါ်တဲ့ ဓာတုပစ္စည်းများကို အသုံးပြုပြီး လက်ရှိလက်နက်များမှာ အကွာအဝေးပိုရောက်အောင် ထပ်ထည့်သွားရန် အစီအစဉ်ကို ပင်တဂွန်က အဆိုပြုမှာဖြစ်ပါတယ်။

ကာကွယ်ရေးဝန်ကြီး 'ကက်သလင်းဟစ်ခ်'ရဲ့ တောင်းဆိုချက်အတိုင်း ကာကွယ်ရေးဌာနအတွင်း စွမ်းအင်သုံးပစ္စည်းများအတွက် အထက်လွှတ်တော်မှ ဘဏ္ဍာငွေရုံးခန်းဖွင့်လှစ်ရန် လျာထားကြောင်း သိရပါတယ်။

အမေရိကန်လက်နက်တိုက်မှ ပေါက်ကွဲဓာတုပစ္စည်းများ ပြန်လည်ပြင်ဆင်အားဖြည့်ခြင်းအတွက် ကုန်ကျစရိတ် ဒေါ်လာဘီလီယံပေါင်းများစွာ ရှိနိုင်ကြောင်း နိုင်ငံတကာမဟာဗျူဟာမြောက်လေ့လာရေးမှ လက်နက်ပညာရှင် 'တွမ်ကာရာကို'က ပြောပြခဲ့ပါတယ်။

နှစ်စဉ်ကာကွယ်ရေးဥပဒေမူကြမ်းအနေနဲ့ ပင်တဂွန်ဟာ လက်ရှိလက်နက် ၃ မျိုးမှ ပေါက်ကွဲမှု ဒါမှမဟုတ် တွန်းကန်မှုမျိုး ပြောင်းလဲနိုင်တဲ့ CL-20 ထိန်းချုပ်အစီအစဉ် လုပ်ဆောင်ရန် လိုအပ်ပါတယ်။

Source: Reuters #World_Military #ဒုံးကျည်အကွာအဝေးပိုရောက်စေမည့်ဖောက်ခွဲရေးပစ္စည်းများဖန်တီး #Yangon_Times

#Local_News
Published_ 3 August 2023

ရန်ကုန်မြို့ သာကေတမြို့နယ် မြင်တော်သာလမ်းမကြီးနှင့် ဘုရားလမ်းထိပ် ဓာတ်တိုင်ပေါ်ရှိ Wifi ကြိုးကို တက်ရောက်ပြင်ဆင်ရာမှ အမျိုးသား သုံးဉီး ဓာတ်လိုက်မှုဖြစ်ပွားခဲ့သည်ဟု သာကေတမြို့နယ် လူမှုကူညီရေး အဖွဲ့ထံက သိရသည်။

အဆိုပါ ဖြစ်စဉ်သည် ယမန်နေ့ ဩဂုတ် ၂ ရက်နေ့  ညနေ ၄ နာရီအချိန်ခန့်က ဖြစ်ပွားခဲ့ခြင်းဖြစ်ပြီး၊ Wifi ကြိုးတပ်ဆင်သည့် အမျိုးသားသုံးဉီး အသက်အန္တရာယ်မရှိသော်လည်း ခြေလက်ကျိုးခြင်း ၊ အရေပြား မီးလောင်ကျွမ်းခြင်းနှင့် အခြားထိခိုက်ဒဏ်ရာ အနည်းငယ်ရရှိခဲ့ကြောင်း သိရသည်။

ယင်းအမျိုးသား သုံးဉီးကို သာကေတမြို့နယ် လူမှုကူညီရေးအဖွဲ့ မြေပြင်အရေးပေါ်ဆေးကုသမှု ပြုလုပ်ပြီးနောက် အခြားလူမှုူညီရေးအဖွဲ့ နှစ်ဖွဲ့က သဃ်န်းကျွန်းစံပြဆေးရုံကြီးသို့ပို့ဆောင်ပေးခဲ့ကြောင်း သိရသည်။

#Local_News #ဓာတ်တိုင်ပေါ်ရှိWifiကြိုးကိုတက်ရောက်ပြင်ဆင်ရာမှဓာတ်လိုက်မှုဖြစ်
#Ymg/my
#Yangon_Times

#World_Health
Published 3 August 2023

လက်သည်းများဟာ ခန္ဓာကိုယ်ရဲ့ အလှအပရေးရာ အင်္ဂါရပ်တစ်ခု ဖြစ်ရုံသာမက ခန္ဓာကိုယ်အတွင်းမှာ ဖြစ်နေတဲ့အရာတွေကိုလည်း ဖော်ပြပေးနေပါတယ်။

ကျန်းမာရေးပြဿနာများဖြစ်တဲ့ ဗိုက်တာမင်ချို့တဲ့ခြင်းနဲ့ အခြားနာတာရှည်ရောဂါများကို ဖော်ပြနေပါတယ်။

ဒါကြောင့် အခြားခန္ဓာကိုယ် အစိတ်အပိုင်းတွေကဲ့သို့ပင် လက်သည်းတွေရဲ့ ကျန်းမာရေးဟာလည်း အရေးကြီးတယ်လို့ ဆိုရမှာဖြစ်ပါတယ်။

လက်သည်းခြေသည်းတွေကို အရေပြားဆဲလ်တွေနဲ့ ပြုလုပ်ထားကာ ကီရာတင်လို့ခေါ်တဲ့ မာကျောတဲ့အရာပါဝင်ပါတယ်။

ကျန်းမာတဲ့အခါ လက်သည်းတွေက ပန်းရောင်သမ်းနေပြီး အာဟာရချို့တဲ့တဲ့အခါမျိုးမှာ အရောင်ဖျော့လာပြီး ခြောက်သွေ့ကြွပ်ဆတ်လာပါတယ်။

လက်သည်းကျန်းမာရေး မကောင်းတဲ့လက္ခဏာတွေကတော့..

လက်သည်းပုံသဏ္ဍာန်မမှန်ခြင်း - လက်သည်းထိပ်နဲ့ဆန့်ကျင်ဘက်ကို ကွေးနေတယ်ဆိုရင် သံဓာတ်ချို့တဲ့တဲ့ လက္ခဏာဖြစ်ပြီး လက်သည်းထိပ်အောက်မှာ ကွေးသွားတယ်ဆိုရင် အသက်ရှူလမ်းကြောင်းနဲ့ နှလုံးပြဿနာဖြစ်နိုင်ပါတယ်။

လက်သည်းကွာခြင်း - အကာအကွယ်ပေးတဲ့ ကီရာတင်အလွှာများ ထိခိုက်တဲ့အခါ လက်သည်းကွာတတ်ပြီး ဒါဟာ အိုမီဂါ-၃ ဖက်တီးအက်ဆစ်ချို့တဲ့တာဖြစ်ပါတယ်။

အိုမီဂါ-၃ ဖက်တီးအက်ဆစ်ပါဝင်တဲ့ အစားအစာတွေဖြင့် ခြောက်သွေ့နေတဲ့ လက်သည်းများကို စိုစွတ်စေနိုင်ပါတယ်။

လက်သည်းဝါခြင်း - လက်သည်းဝါခြင်းဟာ ဆီးချို၊ အသက်ရှူလမ်းကြောင်း၊ အသည်းပြဿနာများရဲ့ အစောပိုင်းလက္ခဏာဖြစ်ပြီး မှိုရောဂါကြောင့်လည်း ဖြစ်နိုင်ပါတယ်။

လက်သည်းကြွပ်ဆတ်ခြင်း - အမျိုးသမီးတွေမှာ အဖြစ်များပြီး ဒီလိုဖြစ်ရတဲ့ အကြောင်းအရင်းများစွာ ရှိပါတယ်။

အစားအစာထဲမှာ ကယ်လ်စီယမ်နဲ့ ပရိုတိန်းမလုံလောက်ခြင်းက လက်သည်းကြွပ်ဆတ်အားပျော့တာမျိုး ဖြစ်လာစေပါတယ်။

အဖြူစက်ပေါ်ခြင်း - လက်သည်းမှာ အဖြူကြောင်းလေးတွေ ပေါ်တယ်ဆိုရင်တော့ ဖျားနာခြင်း၊ အသည်း နှလုံး ကျောက်ကပ်ရောဂါ၊ သံဓာတ်ချို့တဲ့ခြင်း စတဲ့လက္ခဏာတွေ ဖြစ်ပါတယ်။

အရောင်ပြောင်းခြင်း - ဘက်တီးရီးယားကူးစက်မှု ဖြစ်တဲ့အခါ အစိမ်းနုရောင်လေး ပြောင်းသွားတတ်ပြီး လက်သည်းအောက်မှ အတွင်းသား အပြာရောင်ပြောင်းသွားရင် အဆုတ်ရောဂါဖြစ်တတ်ပါတယ်။

နီညိုရောင်တွေဆိုရင်တော့ ဖောလစ်အက်ဆစ်၊ ပရိုတိန်း၊ ဗိုက်တာမင်-စီတို့ ချို့တဲ့တဲ့ လက္ခဏာဖြစ်ပါတယ်။

လက်သည်းအသွင်အပြင် - လက်သည်းပေါ်မှာ ဒေါင်လိုက်အကြောင်းတွေ ပေါ်လာရင် သံဓာတ်ချို့တဲ့ခြင်း၊ ဗိုက်တာမင်နဲ့ အာဟာရဓာတ်များ မစုပ်ယူနိုင်ခြင်း၊ ကျန်းမာရေးညံ့ခြင်းတို့ ဖြစ်ပေါ်တတ်ပါတယ်။

#World_Health #ကျန်းမာရေးလက္ခဏာများ
Source: India Today

#Local_Sport
Published_ 3 August 2023

လက်ရှိမန်ယူအသင်းနည်းပြ အဲရစ်တန်ဟက်ကို ပြီးခဲ့တဲ့နွေရာသီမှာမခန့်အပ် မီအသင်းမှ ထွက်ခွာဖို့စဉ်းစားခဲ့တယ်လို့ တိုက်စစ်မှူး မားကပ်ရပ်ရှ်ဖို့ဒ်ကဖွင့်ဟပြောကြားခဲ့ပါတယ်။

ရပ်ရှ်ဖို့ဒ်ဟာ သူ့ရဲ့ကစားသမားဘဝသက်တမ်းတစ်လျှောက် ဂိုးသွင်းအနည်း ဆုံးရာသီကိုတန်ဟက်ခ်မရောက်မီ ရင်ဆိုင်ကြုံတွေ့ခဲ့ရပါတယ်။တန်ဟက်ခ်ကိုင်တွယ်တဲ့ ပထမရာသီမှာတော့ သူရဲ့ကစားသမားဘဝတစ်လျှောက် လက်ရှိအချိန်ထိ ခြေစွမ်းအကောင်းဆုံးရာသီတစ်ခုဖြစ်ခဲ့ပြီး ပြိုင်ပွဲစုံမှာဂိုး၃၀အထိ အံ့အားသင့်ဖွယ် သွင်းယူနိုင်ခဲ့ပါတယ်။လက်ရှိအချိန်မှာ ရပ်ရှ်ဖို့ဒ်ဟာအသင်းနဲ့ကာလရှည်စာချုပ်သစ်တစ်ရပ် လက်မှတ်ရေးထိုးခဲ့ပြီး မန်ယူအသင်းရဲ့ လစာအမြင့်ဆုံးကစားသမား ဖြစ်လာခဲ့ပြီးအသင်းရဲ့ အဓိကကစားသမားအဖြစ်လဲ ခိုင်ခိုင်မာမာရပ်တည်နိုင်ခဲ့ပါတယ်။

ဒါပေမဲ့တန်ဟက်ခ်မရောက်ခင်မှာ အသင်းက ထွက်ခွာဖို့အထိ စဉ်းစားခဲ့ကြောင်းရက်ရှ်ဖို့ဒ်က အခုလို ထုတ်ဖော်ပြောဆိုခဲ့တာဖြစ်ပါတယ်။

"အရာရာဟာ အကြောင်းတရားတစ်ခုကြောင့် ဖြစ်ပေါ်ခဲ့တာပါ။"နည်းပြကြီးဟာ အသင်းကို အချိန်ကိုက်ရောက်ရှိလာခဲ့တာဖြစ်ပြီး အလုပ်ဖြစ်ခဲ့ပါတယ် ။သူရောက်ရှိလာတာဟာ ကျွန်‌ ‌‌ေတာ့်ရဲ့စွမ်းဆောင်ရည်ကို လွှမ်းမိုးမှုရှိခဲ့ပြီး အခုလိုခြေစွမ်းကောင်းတွေရရှိပိုင်ဆိုင်ခဲ့တာပါ။ အခုကျွန်တော် ဂိုးတွေသွင်းယူရတာ၊ဂိုးဖန်တီးမှုပြုလုပ်ရတာနဲ့ တိုက်စစ် ဧရိယာထဲမှာ တစ်ဖက်အသင်းကို ခြိမ်းခြောက်ဖို့ကြိုးစားရတာတွေကို ပျော်ရွှင်နေပါတယ် "ရပ်ရှ်ဖို့ဒ်ကပြောကြားခဲ့ပါတယ်။

#Local_Sport #နည်းပြတန်ဟက်ခ်ကိုမခန့်အပ်မီအသင်းမှထွက်ခွာရန်စဉ်းစားခဲ့
#Yangon_Times

#Local_News
Published 3 August 2023

မြန်မာနိုင်ငံနှင့် ရုရှားနိုင်ငံတို့က ပူးတွဲဥက္ကဋ္ဌအဖြစ် တာဝန်ယူဆောင်ရွက်နေ သည့်အာဆီယံအပေါင်း အကြမ်းဖက်မှုတန်ပြန်တိုက်ဖျက်ရေးဆိုင်ရာ ကျွမ်းကျင် လုပ်ငန်းအဖွဲ့၏ အကြမ်းဖက်မှုတိုက်ဖျက်ရေးဆိုင်ရာ ပူးပေါင်းစားပွဲတင်လေ့ကျင့်ခန်း (Table Top Exercises) ဖွင့်ပွဲအခမ်းအနားကို ယနေ့ဩဂုတ် ၂ရက် နံနက်ပိုင်းတွင် နေပြည်တော်ရှိ Park Royalဟိုတယ်တွင် ကျင်းပပြုလုပ်ရာ အာဆီယံအပေါင်းနိုင်ငံ ၁၂ နိုင်ငံမှတပ်မတော်အရာရှိ ကြီးများတက်ရောက်ခဲ့ကြပါတယ်။

ညှိနှိုင်းကွပ်ကဲရေးမှူး(ကြည်း၊ ရေ၊ လေ) ဗိုလ်ချုပ်ကြီးမောင်မောင်အေး ဖွင့်ပွဲအခမ်းအနားသို့ တက်ရောက်၍ မိန့်ခွန်းပြောဖွင့်လှစ်ခဲ့တယ်လို့ နစကရဲ့သတင်းထုတ်ပြန်ချက်အရသိရပါတယ်။

ယင်းနောက် မြန်မာ-ရုရှား ပူးတွဲဥက္ကဋ္ဌများ ဦးဆောင်ကာ လေ့ကျင့်ခန်းအစီအစဉ်အတိုင်း ဆက်လက်ဆောင်ရွက်ခဲ့ကြပါတယ်။

မြန်မာနိုင်ငံနှင့် ရုရှားနိုင်ငံတို့ သည် အာဆီယံအပေါင်း အကြမ်းဖက်မှုတန်ပြန်တိုက်ဖျက်ရေးဆိုင်ရာ ကျွမ်းကျင်လုပ်ငန်းအဖွဲ့၏ အလှည့်ကျ ဥက္ကဋ္ဌအဖြစ် ၂၀၂၁ ခုနှစ်မှ၂၀၂၃ ခုနှစ်အထိ တာဝန်ယူဆောင်ရွက်လျက်ရှိပြီး အာဆီယံနိုင်ငံများနှင့် ဆွေးနွေးဘက်နိုင်ငံများ၏ တပ်ဖွဲ့ဝင်များအကြား ထိတွေ့ ဆက်ဆံမှု၊ နားလည်မှု၊ ယုံကြည်မှု၊ ချစ်ကြည်ရင်းနှီးမှုနှင့် ဒေသတွင်းအကြမ်းဖက်မှု တိုက်ဖျက်ရေးလုပ်ငန်းစဉ်များကို အဖွဲ့ဝင်နိုင်ငံများအကြား ပူးပေါင်းဆောင်ရွက်နိုင်ရေးအတွက် တက်ကြွစွာ ဆောင်ရွက်လျက်ရှိကြောင်းလည်း သတင်းထုတ်ပြန်ချက်မှာဖော်ပြထားပါတယ်။

ယင်းအပြင် ညှိနှိုင်းကွပ်ကဲရေးမှူး(ကြည်း၊ရေ၊လေ) ဗိုလ်ချုပ်ကြီး မောင်မောင်အေးသည် ညနေပိုင်းတွင် ပူးပေါင်း စားပွဲတင်လေ့ကျင့်ခန်း (Table Top Exercises)ကို တက်ရောက်လာတဲ့ ရုရှားတပ်မတော်အရှေ့ပိုင်းစစ်ဒေသမှ ဒုတိယအကြီးအကဲဖြစ်သူ ဒုတိယဗိုလ်ချုပ်ကြီး Mikhail NOSULEVဦးဆောင်သောကိုယ်စားလှယ်အဖွဲ့အား ဘုရင့်နောင်ရိပ်သာဧည့်ခန်းမ ဆောင်၌လက်ခံတွေ့ဆုံခဲ့ပါတယ်။

တွေ့ဆုံစဉ် နှစ်နိုင်ငံ တပ်မတော်နှစ်ရပ်ကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှု တိုးမြှင့်ရေးဆိုင်ရာကိစ္စရပ်များကို ရင်းနှီးပွင့်လင်းစွာ ဆွေးနွေးခဲ့ကြကြောင်းသိရှိရပါတယ်။

#ymg/knl #Local_News #အာဆီယံအပေါင်း အကြမ်းဖက်မှုတန်ပြန်တိုက်ဖျက်ရေး #Yangon_Times

#Local_Sport
Published_ 3 August 2023

ရန်ကုန်ယူနိုက်တက်အသင်းက နည်းပြချုပ်အသစ်အဖြစ် ခန့်အပ်လိုက်တဲ့ ဂျာမနီလူမျိုးနည်းပြ ဂတ်ဇီစီဟာ ဩဂုတ် (၃) ရက် ညနေပိုင်းမှာ ရန်ကုန်မြို့သို့ ရောက်ရှိ လာမယ်လို့ သိရှိရပါတယ်။

သူဟာ ဩဂုတ် (၄) ရက်မှစတင်၍ အသင်းကို ကိုယ်တွယ်သွားတော့မှာဖြစ်ပါတယ်။ နည်းပြသစ် ဂတ်ဇီစီဟာ သူ့ရဲ့မြန်မာလိဂ် ပထမပွဲအဖြစ် လာမယ့် ဩဂုတ် (၇) ရက်မှာ ကချင်ယူနိုက်တက်အသင်းနဲ့ စတင်တွေ့ဆုံမှာပဲဖြစ်ပါတယ်။

အဆိုပါနှစ်သင်းဟာ ပထမအကျော့ပွဲစဉ်တွင် တိုက်စစ်မှူး ဆိုင်လာရဲ့ တစ်လုံးတည်းသော သွင်းဂိုးနဲ့ ရန်ကုန်အသင်းက အနိုင်ရရှိခဲ့ပါတယ်။

#ygm_mnn #Local_Sport #ရန်ကုန်ယူနိုက်တက်နည်းပြချုပ်
#Yangon_Media_Group

#World_Health
Published 3 August 2023

ဒီမန်ရှာနဲ့ နှလုံးရောဂါတို့အပေါ် အစားအစာစားသုံးခြင်းရဲ့ သက်ရောက်မှုနဲ့ ပတ်သက်တဲ့ လေ့လာမှုအသစ်ကို ဒေါက်တာ'မိုင်ယာရို့စ်မန်း'က သုတေသနပြုခဲ့ပါတယ်။

ကြက်ဥအနှစ်မှာပါဝင်တဲ့ လက်စီသင်က ဒီမန်ရှာလို့ခေါ်တဲ့ မှတ်ဉာဏ်ချို့ယွင်းခြင်းကို လျော့ကျစေနိုင်တယ်လို့ Clinical Nutrition အမေရိကန်ဂျာနယ်မှာ ဖော်ပြခဲ့ပါတယ်။

စမ်းသပ်မှုအတွက် လူပေါင်း ၃,၂၂၇ ဦးနဲ့ ဒီမန်ရှာခံစားနေရတဲ့ လူပေါင်း ၂၅၀ ဦးတို့ကို နှစ်ပေါင်းများစွာ လေ့လာခဲ့ပါတယ်။

သူတို့ရဲ့ စားသောက်မှုတွေကို ခွဲခြမ်းစိတ်ဖြာခဲ့ကာ လက်စီသင်ပါတဲ့ အစားအစာကို နေ့စဉ်စားသောက်ခြင်းဖြင့် ဒီမန်ရှာဖြစ်နိုင်ချေကို သိသိသာသာ လျှော့ချပေးနိုင်ကြောင်း တွေ့ရှိခဲ့ပါတယ်။

လက်စီသင်က ဦးနှောက်နဲ့ မှတ်ဉာဏ်ပိုင်းရှိ အာရုံကြောလှုပ်ရှားမှုမှာ အဓိကအစိတ်အပိုင်းဖြစ်ပြီး စားသောက်ကုန်လုပ်ငန်းတွေမှာလည်း အသုံးပြုကြပါတယ်။

လက်စီသင်ပါဝင်တဲ့ အဓိကရင်းမြစ်တွေက အသည်း၊ ကြက်ဥ၊ အခွံမာသီးအမျိုးမျိုး၊ ပဲပိစပ်၊ ပဲအမျိုးမျိုးတို့ဖြစ်ပြီး ကြက်သား၊ ငါး၊ အချို့သောချောကလက်တွေမှာလည်း တွေ့ရတတ်ပါတယ်။

အသည်းကတော့ ခန္ဓာကိုယ်ထဲမှာ အဆိပ်အတောက်တွေကို ဖြိုခွဲတဲ့အင်္ဂါဖြစ်တာကြောင့် တကယ်တမ်းကျန်းမာရေးနဲ့ မညီညွတ်ဘဲ ကြက်ဥနဲ့ ပဲပိစပ်တို့ကသာ လက်စီသင်အားထားရာ အစားအစာတွေ ဖြစ်ပါတယ်။

ကြက်ဥတွေဟာ နှလုံးရောဂါဖြစ်ရတဲ့ အကြောင်းအရင်းမဟုတ်ဘဲ လွန်ခဲ့တဲ့နှစ် ၁၀၀ လောက်က မှားယွင်းစွာယူဆခဲ့တာသာဖြစ်ကြောင်း ရို့စ်မန်းက ဖော်ပြခဲ့ပါတယ်။

နှလုံးရောဂါဖြစ်ရတာတွေက ကာဗိုဟိုက်ဒရိတ်တွေနဲ့ စက်မှုလုပ်ငန်းထုတ်အဆီတွေကြောင့် ဖြစ်ပါတယ်။

နောက်ထပ်လေ့လာချက်မှာတော့ တစ်နေ့ကို ကြက်ဥ ၂ လုံးစားပေးခြင်းဖြင့် နှလုံးရောဂါကို ကာကွယ်နိုင်တယ်လို့ တွေ့ထားပါတယ်။

ကြက်ဥထဲမှာပါတဲ့ လက်စီသင်က ခန္ဓာကိုယ်ထဲက သွေးလှည့်ပတ်မှုကို ကောင်းမွန်စေတာကြောင့် ဖြစ်ပါတယ်။

#World_Health
Source: The Jerusalem Post #ဒီမန်ရှာရောဂါဖြစ်နိုင်ချေကို လျှော့ချ

မာရဝိဇယဗုဒ္ဓရုပ်ပွားတော်မြတ်ကြီးအား ရဟန်း၊ ရှင်လူ အများပြည်သူများ ဖူးမြော်ကြည်ညိုနိုင်ရေးအတွက် ဩဂုတ်လ ၈ ရက်နေ့မှစ၍ ၁၆ ရက်နေ့အထိ လုံခြုံရေးအရ လိုအပ်သည့် စစ်ဆေးမှုများဆောင်ရွက်ကာ အခမဲ့ဝင်ရောက်  ဖူးမြော်ခွင့်ပြုပေးသွားမှာဖြစ်တယ်လို့သက်ဆိုင်ရာက ယနေ့ဩဂုတ်၂ရက်နေ့တွင် သတင်းထုတ်ပြန်ပါတယ်။

ယခုအခါ မာရဝိဇယဗုဒ္ဓရုပ်ပွားတော်မြတ်ကြီးအား ဗုဒ္ဓါဘိသေက အနေကဇာတင်၍ဗုဒ္ဓါ ဘိသိက်သွန်းလောင်းပူဇော်ခြင်း၊ ကျောက်စာရုံစေတီတော်များအား ရွှေထီးတော်တင်လှူပူဇော်ခြင်းနှင့် ရေစက်ချအောင်ပွဲမင်္ဂလာ ကုသိုလ်တော် မဟာမင်္ဂလာ အခမ်းအနားများပြုလုပ်ရာတွင် အသုံးပြုခဲ့သည့် မဏ္ဍပ်တော်များနှင့် အသုံးအဆောင်ပစ္စည်းများကို  ပြန်လည်သိမ်းဆည်းခြင်း  လုပ်ငန်းများကို ဆောင်ရွက်လျက်ရှိနေတဲ့အတွက် ဝင်ရောက်ဖူးမြော်ခွင့်မပေးနိုင်သေးတာဖြစ်တယ်လို့လည်းသိရပါတယ်။

မာရဝိဇယဗုဒ္ဓရုပ်ပွားတော်မြတ်ကြီးနှင့် ဗုဒ္ဓဥယျာဉ်တော်အတွင်း ဘုရား၊ ကျောင်း၊ကန်၊ သိမ်၊ ဇရပ်၊ တံတား၊ ဥယျာဉ်များ ပြည့်စုံစွာဖြင့် ထည့်သွင်းတည်ဆောက်ထားရှိပြီး၊ဘုရားဖူးလာပြည်သူများအနားယူနိုင်ရန်နှင့် ရုပ်ပွားတော်မြတ်ကြီးအား စိတ်အေးချမ်းသာစွာ ဖြင့်ဖူးမြော်ကြည်ညိုနိုင်ရန် ဂန္ဓကုဋိတိုက်များ၊ သုဓမ္မာဇရပ်များ၊ ရေပန်းရင်ပြင်၊မာရဝိဇယကျောင်းတော်၊ အဂ္ဂါဓိပတိ သသာနာ့ဗိမာန်တော်ကြီးနှင့် ဘုရားဖူးလာမိဘပြည်သူများအနေဖြင့် ဗုဒ္ဓရုပ်ပွားတော်မြတ်ကြီးအား လာရောက်  ဖူးမြော်ချိန်တွင် ပိဋကတ်သုံးပုံတော်လာ အဋ္ဌကထာဋီကာကျမ်းစာများကို တစ်ပါတည်းလေ့လာ နာယူကြည်ညိုနိုင်ရေး၊ စကျင်ကျောက်ချပ်များပေါ်၌ ခေတ်မီစက်ကိရိယာများ အသုံးပြုပြီး ပါဠိအက္ခရာ၊Romanize Language တို့ဖြင့် ကျောက်စာတော်များထွင်းထု၍ ကျောက်စာ ရုံစေတီ ၇၂၀ကိုလည်း ထည့်သွင်းတည်ဆောက်ထားရှိကြောင်း သတင်းထုတ်ပြန်ချက်မှာဖော်ပြထားပါတယ်။

Source ymg/knl

ရှေးလူမျိုးစုရန်ပွဲများ အဆုံးသတ်ခြင်း အထိမ်းအမှတ်ဖြစ်တဲ့ ဆယ်ဘိုင်ဘာပွဲတော်မှာ အရောင်အသွေး တေးဂီတအကမျိုးစုံပါဝင်ကြပြီး တူအာရက်လူမျိုးထောင်ချီ ရောက်ရှိလာကြပါတယ်။
Published 2 August 2023
#World_Culture
#အယ်လ်ဂျီးရီးယားကန္တာရအိုအေစစ်

#Daily_News
Published_ 2 August 2023

၁။ ၂၀၂၃ ခုနှစ်အတွင်း ဗိုလ်တထောင်စေတီတော်တွင် လုံးတော်ပြည့်ရွှေသင်္ကန်း ကပ်လှူပူဇော်မည်

၂။ မုန်တိုင်းငယ်အရှိန်ကြောင့် မိုးသက်လေပြင်းကျရောက်ခြင်းနှင့် မိုးကြီးခြင်းများဖြစ်ပေါ်နိုင်

၃။ နိုင်ငံ့ဂုဏ်ဆောင် မြန်မာစကိတ်သမားနှစ်ဦး ပြည်တော်ပြန်ရောက်ရှိ

၄။ အယ်လ်ဂျီးရီးယားကန္တာရ အိုအေစစ်တွင်ကျင်းပသည့် ရှေးဟောင်းပွဲတော်သို့တူအာရက်လူမျိုးအများအပြားလာရောက် .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

၂ ဩဂုတ်၊၂၀၂၃

အထွေထွေရွေးကောက်ပွဲတွင် ဒုတိယရရှိခဲ့သည့် ဖွေထိုင်းပါတီသည် ရွေးကောက်ပွဲအနိုင်ရ ရှေ့သို့ Move Forward Party MFP ဟာ ဘုရင်နှင့်တော်ဝင်မိသားစုအပေါ်ဝေဖန်သူတွေကို အပြစ်ပေးအရေးယူသည့် ဥပဒေများကို ပြင်ဆင်ရေးအပေါ် ဆက်လက်ရပ်တည်ထားတာကြောင့်  MFP ကို ထားရစ်ခဲ့ကာ ယင်း၏ကိုယ်ပိုင်ညွန့်ပေါင်းအစိုးရဖွဲ့စည်းပါတော့မယ်။

ဖွေထိုင်းပါတီခေါင်းဆောင် ချိုနန်ဆရီကောက  MFP ညွန့်ပေါင်းကနေ ထွက်ပြီး ကိုယ်ပိုင်ညွန့်ပေါင်းအဖွဲ့ ဖွဲ့စည်းမယ်ဆိုတာကို ယနေ့ ဩဂုတ်၂ရက်နေ့မှာကြေညာခဲ့တာဖြစ်ပါတယ်။

ပါတီနှစ်ခုသည် အစိုးရဖွဲ့ရန် ကြိုးပမ်းရာတွင် MFP မှ ဖွဲ့စည်းထားတဲ့  ရှစ်ပါတီ မဟာမိတ်အဖွဲ့တွင် အဓိကပါဝင်သူတွေဖြစ်ကြပါတယ်။ MFP ကအောက်လွှတ်တော် ၁၅၁ နေရာနှင့် ဖွေထိုင်းက၁၄၁ နေရာရရှိထားပါတယ်။ ယင်းတို့ရဲ့ မဟာမိတ်အဖွဲ့ဟာ အောက်လွှတ်တော်အမတ်နေရာ ၅၀၀နေရာ တွင် ၃၁၂ နေရာရရှိထားတာဖြစ်ပါတယ်။

MFP သည် ယင်းရဲ့ ခေါင်းဆောင် ပီတ လင်ဂျာရွန်ရတ် Pita Limjaroenrat ကို  ဇူလိုင် ၁၃ ရက်က ၀န်ကြီးချုပ်အဖြစ် အဆိုပြုခဲ့ပြီးနောက် အောက်လွှတ်တော်နှင့် အထက်လွှတ်တော်နှစ်ရပ်ပေါင်းမဲပေးခဲ့ရာမှာ အများစုမဲဖြင့် အနိုင်မရရှိဖြစ်ခဲ့ရပါတယ်။  အဲဒီနောက်  ညွန့်ပေါင်းအစိုးရဖွဲ့စည်းရာတွင် ဖွေထိုင်းက ဦးဆောင်ခွင့်ရခဲ့ပါတယ်။

ခန့်အပ်ခံရသော အထက်လွှတ်တော်အမတ်အများစုနှင့် အခြားပါတီများမှ ရွေးကောက်ခံအမတ်အများအပြားသည် ရာဇ၀တ်ကျင့်ထုံးဥပဒေ ပုဒ်မ ၁၁၂ ဖြစ်တဲ့  the lese majeste law ကို ပြင်ဆင်ပြောင်းလဲရေးအပေါ် ပြင်းပြင်းထန်ထန် ကန့်ကွက်ခဲ့ကြပါတယ်။

ဖွေထိုင်းခေါင်းဆောင်က MFP သည် လိုအပ်သောပါလီမန်ထောက်ခံမှုမရပြီးနောက်တွင် ရှစ်ပါတီမဟာမိတ်အဖွဲ့က အစိုးရတစ်ရပ်ဖွဲ့စည်းနိုင်ရေးအတွက် အခြားပါတီများနှင့် အထက်လွှတ်တော်အမတ်များ၏ ထောက်ခံမှုကို ပိုမိုရယူရန် ဖြူထိုင်းကို တာဝန်ပေးအပ်ခဲ့တယ်လို့ ဗုဒ္ဓဟူးနေ့ကပြုလုပ်တဲ့ သတင်းစာရှင်းလင်းပွဲမှာ ပြောပါတယ်။

“ပုဒ်မ ၁၁၂ ကို ဘယ်လိုပြောင်းလဲတာမျိုးမဆို လက်မခံဘူးဆိုပြီး သူတို့ကပြောကြတယ်။ တချို့ပါတီတွေဆိုရင်  Move Forward နဲ့ အတူ အစိုးရအဖွဲ့ထဲပါဝင်မှာမဟုတ်ဘူးလို့တောင်ပြောကြတယ်” ဟု ဒေါက်တာ ချိုနန်က ပြောပါတယ်။

အဲဒါကြောင့် ဖွေထိုင်းပါတီဟာ  ရှစ်ပါတီ မဟာမိတ်အဖွဲ့မှ နှုတ်ထွက်ပြီး ယင်း၏ ကိုယ်ပိုင် ၀န်ကြီးချုပ်လောင်းအဖြစ်  သာရက်တာ သာဗီဆင် Srettha Thavisin ကို  လွှတ်တော်သို့ အမည်စာရင်းတင်သွင်းမယ်လို့  ဗုဒ္ဓဟူးနေ့ နံနက်ပိုင်းက Move Forward နှင့်တွေ့ဆုံ ပြောကြားခဲ့တာဖြစ်ပါတယ်။

“ဖွေထိုင်းနဲ့ မစ္စတာ သာရက်တာ တို့ဟာ ပုဒ်မ ၁၁၂ ကို ဆက်လက် ထိန်းသိမ်းထားမှာဖြစ်ပြီး အစိုးရသစ်ရဲ့  ညွန့်ပေါင်းအဖွဲ့ထဲမှာ  ရှေ့သို့ပါတီ MFPပါဝင်မှာမဟုတ်ဘူး” လို့  ဒေါက်တာ ချိုနန်က ဆက်လက်ပြောကြားခဲ့ပါတယ်။

ဗုဒ္ဓဟူးနေ့ နံနက်ပိုင်းက MFP နှင့် ဆွေးနွေးမှုသည် အပြုသဘောဆောင်သော အငွေ့အသက်များဖြင့် ကျင်းပခဲ့တာဖြစ်တယ်လို့လည်း သူကဆက်ပြောပါတယ်။

"ဖွေထိုင်းဟာ  လုံလောက်တဲ့ မဲများ (ပါလီမန်တွင်) ရရှိဖို့  ကြိုးစားမှာ ဖြစ်ပြီး MFP ဟာ အတိုက်အခံအဖြစ်ရှိသွားလိမ့်မယ်” လို့လည်း သူကပြောပါတယ်။

ညွန့်ပေါင်းထဲပါမယ့်ပါတီတွေအမည်ကို ကြာသပတေးနေ့မှာ သူကြေညာပေးမှာဖြစ်ပါတယ်။

ဖွေထိုင်းဦးဆောင်တဲ့အစိုးရအနေနှင့်အခြေခံဥပဒေကိုပြင်ဆင်ရေးဆွဲမှာဖြစ်တယ်။ဘာဖြစ်လို့လဲဆိုတော့ အစိုးရဖွဲ့စည်းရာမှာ အတားအဆီးဖြစ်နေတာကြောင့်ပါ။ ပြီးရင် အစိုးရဟာ အာဏာကိုပြည်သူ့ထံပြန်အပ်ပြီး ရွေးကောက်ပွဲအသစ်တစ်ခုကျင်းပပေမယ်လို့လည်း ဒေါက်တာချိနန်ကပြောပါတယ်။

MFP ရဲ့ အကျိုးရှိမယ့်မူဝါဒတွေကို ထောက်ခံမယ်လို့လည်းသူကကတိပေးပါတယ်။ တကယ်လို့ MFPက မစ္စတာ သရက်တာကို မဲမပေးခဲ့ရင်လည်း သူ့အနေနှင့်ကိစ္စမရှိပါဘူးလို့ ဒေါက်တာချိုနန်ကပြောပါတယ်။

“ ဖွေထိုင်းဟာ နိုင်ငံကို အကျပ်အတည်းကနေ ဆွဲထုတ်မှာဖြစ်တယ်” လို့ ဒေါက်တာချိုနန်ကပြောပါတယ်။

Source: Bangkok Post

#ThailandPolitics

#Local_News
Published_ 2 August 2023

ပြည်ပနိုင်ငံများသို့ အလုပ်သမားပို့ဆောင်နေသော အလုပ်အကိုင်ရှာဖွေရေးအင်ဂျင်စီ (၂၅)ခုကို စည်းကမ်း ဖောက်ဖျက်သဖြင့် လုပ်ငန်းလိုင်စင်အား ရာသက်ပန်ပိတ်သိမ်းလိုက်ကြောင်း အလုပ်သမားဝန်ကြီးဌာနက သိရသည်။

ယင်းသို့ ရာသက်ပန် ပိတ်သိမ်းကြောင်း ကြေညာချက်ကို အလုပ်သမားဝန်ကြီးဌာနက ဇူလိုင်လ နောက်ဆုံးပတ်အတွင်း ထုတ်ပြန်ခဲ့ခြင်းဖြစ်သည်။

ပိတ်သိမ်းခံရသော အလုပ်အကိုင်အေဂျင်စီ (၂၅)ခုသည် သက်ဆိုင်ရာနိုင်ငံများအလိုက် လုပ်ငန်းခွင်များသို့ သတ်မှတ်ကာလအတွင်း မပို့ဆောင်နိုင်ခြင်း၊ ငွေကြေးပိုမိုကောက်ခံခြင်းတို့ကြောင့်ဖြစ်ကာ၊ ယင်းအပေါ်အလုပ်သမားများက တိုင်ကြားမှု ရှိလာခြင်းကြောင့် အရေးယူရခြင်းဖြစ်ကြောင်း သိရသည်။

“သတ်မှတ်ကာလမှာ မပို့နိုင်ရင် ယာယီပိတ်သိမ်းတာမျိုးလုပ်တယ်။ ရာသက်ပန်ပိတ်တယ်ဆိုတော့ အဲ့ဒီ အေဂျင်စီတွေက စည်းကမ်းသတ်မှတ်ချက်ကို တော်တော်လေး ဖောက်ဖျက်ထားလို့ဖြစ်မယ်။ ဥပမာ တရားဝင်လိုင်စင်တင်ထားတဲ့ အေဂျင်စီဆိုပေမယ့် အကြောင်းအမျိုးမျိုးကြောင့် ငွေယူပြီးထွက်ပြေးတာမျိုးတွေ ပေါ့။ ဘယ်နှစ်ဦးဆိုတာထက် တစ်ဦးလိမ်လည်း တိုင်ကြားခံရရင် ပိတ်သိမ်းတာဘဲ”ဟု အေဂျင်စီနှင့် နီးစပ်သူတစ်ဦးက Yangon Times ကိုပြောသည်။

လိုင်စင်ရ အလုပ်အကိုင်ရှာဖွေရေး အေဂျင်စီများအနေဖြင့် စည်ကမ်းမလိုက်နာပါက ၃ လ(သို့) ၆လ (သို့) ၁ နှစ် စသဖြင့် ယာယီလိုင်စင်ပိတ်သိမ်းမှုများရှိပြီး၊ ရာသက်ပန် လိုင်စင်ပိတ်သိမ်းခြင်းဖြစ်လည်း အရေးယူမှုများရှိ ကြောင်း သိရသည်။

#Ymg/my #Local_News #စည်းကမ်းဖောက်ဖျက်၍လုပ်ငန်းလိုင်စင်ရာသက်ပန်ပိတ်သိမ်း
#Yangon Times