#LocalNews
Published 30 March 2023

၂၀၂၂-၂၀၂၃ ခုနှစ်၏ ဘဏ္ဍာနှစ်အတွင်း ပင်လယ်ရေကြောင်းမှ အများဆုံးကုန်သွယ်မှုပြုလုပ်ထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ဖော်ပြထားသည့် ကုန်သွယ်မှုစာရင်းများအရ သိရသည်။

ယခုဘဏ္ဍာနှစ်၏ ဧပြီလ ၁ ရက်မှ ဇန်နဝါရီလအထိ ကိုးလတာကာလအတွင်း ပင်လယ်ရေကြောင်းမှ ကန်ဒေါ်လာ ၈ ဒသမ ၉၄ ဘီလီယံ ပို့ကုန်ဝင်ငွေရရှိထားပြီး နယ်စပ်ကုန်သွယ်ရေးလမ်းကြောင်းမှ ၅ ဒသမ ၀၃ ဘီလီယံရရှိထားကြောင်း သိရသည်။

ယင်းအပြင် သွင်းကုန်တင်သွင်းမှုမှလည်း ပင်လယ်ရေကြောင်းမှ ကန်ဒေါ်လာ ၁၂ ဒသမ ၅၉ ဘီလီယံရရှိထားပြီး နယ်စပ်ကုန်သွယ်ရေးလမ်းကြောင်းမှ ကန်ဒေါ်လာ ၁ ဒသမ ၈၉ ဘီလီယံရရှိထားခြင်းဖြစ်သည်။

ပင်လယ်ရေကြောင်းမှ ဥရောပနိုင်ငံများနှင့် အာရှနိုင်ငံများသို့ တင်ပို့ခြင်းဖြစ်ပြီး နယ်စပ်ကုန်သွယ်ရေးလမ်းကြောင်းမှာ တရုတ်၊ထိုင်း၊ အိန္ဒိယနှင့် ဘင်္ဂလားဒေ့ရှ်သို့ တင်ပို့ခြင်းဖြစ်ကြောင်း သိရသည်။

ရေကြောင်းဖြင့်တင်ပို့ခြင်းတွင် ပို့လိုသည့်မည်သည့်နိုင်ငံကိုမဆိုပို့နိုင်ခြင်း၊ စရိတ်သက်သာပြီး ကုန်များများတင်ပို့နိုင်ခြင်း စသည့်အားသာချက်များ​ကြောင့် ​ကုန်သည်များက ရေ​ကြောင်းကုန်သွယ်​မှုကိုပိုမိုလုပ်​ဆောင်ကြခြင်းဖြစ်သည်။

ymg/ppk
#ပင်လယ်ရေကြောင်း #ကုန်သွယ်မှု
#YMG #Yangon-Media-Group

#LocalNews
Published 30 March 2023

ထိုင်းနိုင်ငံသို့ လာရောက်ရန် ဗီဇာကြိုတင်လျှောက် ထားစရာမလိုပဲ ဝင်ရောက်ခွင့်Visa Free (၄၅) ရက်ပေးထားရာမှ ယခုဧပြီလ (၁) ရက်မှစ၍ အခမဲ့ဗီဇာ (Visa Free) (၁၄) ရက်သာနေထိုင်နိုင်မည်ဖြစ်ကြောင်း ဘန်ကောက်မြို့ရှိ မြန်မာသံရုံး၏ ထုတ်ပြန်ချက်အရ သိရသည်၊၊

ထုတ်ပြန်ချက်တွင် ထိုင်းနိုင်ငံသို့ ၂၀၂၂ ခုနှစ် ၊ အောက်တိုဘာလ ၁ ရက်နေ့မှ ၂၀၂၃ ခုနှစ် ၊ မတ်လ ၃၁ ရက်နေ့အတွင်း လာရောက်ကြသော နိုင်ငံအသီးသီးမှ နိုင်ငံသားများနှင့် ပတ်သက်၍ အခမဲ့ဗီဇာ (Visa Free) သဘောတူညီမှုရရှိထားသော နိုင်ငံသားများ (မြန်မာနိုင်ငံအပါအဝင်) သည် ၄၅ ရက်အထိ နေထိုင်နိုင်ပြီး ၊ ဆိုက်ရောက်ဗီဇာ (Visa on Arrival) ရရှိထားသော နိုင်ငံသားများသည် ၃၀ ရက်အထိ နေထိုင်ခွင့်ရရှိခဲ့ကြောင်း၊၊

၂၀၂၃ ခုနှစ်၊ ဧပြီလ ၁ ရက်နေ့မှစ၍ ယခင်အတိုင်း အခမဲ့ဗီဇာ (Visa Free) ဖြင့် ၁၄ ရက်သာ ခွင့်ပြုမည်ဖြစ်သောကြောင့် ရက်ရှည်နေထိုင်လိုသူများအနေဖြင့် ထိုင်းသံရုံး (ရန်ကုန်) ၌ ဗီဇာလျှောက်ထား၍ လာနိုင်ကြောင်း အသိပေးထားသည်၊၊

ymg/tthl
#ထိုင်းနိုင်ငံ #Visa Free
#YMG #Yangon_Media_Group

#LocalNews

Published 30 March 2023

ရာသီဥတုပူ၍ ရေဆင်းကူးရာမှ ဘီလူးချောင်းအတွင်း လူငယ်တစ်ဦးရေနစ်သေဆုံးသွားကြောင်း ရွှေလွိုင်ကော်(ကယား)ပရဟိတအသင်းမှ သိရသည်၊၊

မတ်လ(၂၉)ရက်က ဒေါနိုးကူးတံတား(ဘီလူးချောင်း)တွင် သူငယ်ချင်းများဖြင့်ရေဆင်းကူးရာမှ အသက်(၁၅)နှစ်အရွယ်ရှိ မောင်အောင်ဘုန်းမြင့် ရေနစ်ပျောက်ဆုံးသွားခဲ့သည်၊၊

မတ်လ(၃၀)ရက်တွင် ရုပ်အလောင်း ပြန်လည်ရှာတွေ့ခဲ့ကြောင်းကို" ဖြစ်သွားတာကမနေ့က သူငယ်ချင်းတွေနဲ့ရေလာချိုးရင်းဖြစ်သွားတာ၊ဝိုင်းရှာကြတယ်၊၊ ဖြစ်သွားတဲ့နေရာနဲ့သိပ်မဝေးတဲ့နေရာမှာပဲဒီနေ့သူ့(ရုပ်အလောင်း)ကိုပြန်ရှာတွေ့ခဲ့တယ်၊၊

ဘီလူးချောင်းမှာတော့ နှစ်စဉ်ရေနစ်သေဆုံးသူများ ရှိပါတယ်ခင်ဗျ"ဟု ရွှေလွိုင်ကော်(ကယား) ပရဟိတအသင်းမှ တာဝန်ရှိသူတစ်ဦးက အခုလိုပြောပြခဲ့သည်၊၊

မောင်အောင်ဘုန်းမြင့် အသက်၁၅နှစ် ၏ အလောင်းကိုရှာဖွေတွေရှိခဲ့ပြီး လွိုင်ကော်ဆေးရုံကြီးရင်ခွဲရုံကို ပို့ဆောင်ပေးခဲ့ကြောင်း ရွှေလွိုင်ကော်(ကယား) ပရဟိတအသင်းမှသိရသည်၊၊
ymg/tthl
#ရာသီဥတု #ဘီလူးချောင်း #ရေနစ်
#YMG #Yangon_Media_Group

#Local_News
Published 30 March 2023

ယခုနွေရာသီကာလတွင် နေ့/ညအပူချိန် မြင့်မားလာခြင်းကြောင့်လျှပ်စစ်ဓာတ်အားသုံးစွဲမှု မြင့်တက်လာခြင်း ၊ မဟာဓာတ်အားလိုင်းများ ဖောက်ခွဲဖျက်ဆီးခံရခြင်းများကြောင့် ဓာတ်အားထုတ်လွှတ်လျော့နည်းနေကြောင်း YESC မှထုတ်ပြန်ထားသည်။

အခုလို ဓာတ်အားထုတ်လွှတ်မှုနှင့် သုံးစွဲမှုမမျှတခြင်းကြောင့် နိုင်ငံတော် ဓာတ်အားစနစ်အတွင်း ဓာတ်အားပြတ်တောက်မှု မပြတ်စေရေးအတွက် အရေးပေါ်ဝန်အားလျော့ချခြင်းနှင့် အလှည့်ကျဝန်အားလျော့ချရခြင်းများ ပြုလုပ်၍ ဓာတ်အားဖြန့်ဖြူပေးနေရကြောင်း ရန်ကုန်လျှပ်စစ် ဓာတ်အားပေးရေး ကော်ပိုရေးရှင်းမှ ထုတ်ပြန်ထားသည်။

ဒါကြောင့် ရန်ကုန်တိုင်းအတွင်းရှိ အများပြည်သူအုပ်စုတွင် ရောနှောဓာတ်အားသုံးစွဲနေသည့် စီးပွားလုပ်ငန်းများအနေဖြင့် လာမည့် ဧပြီလ ၃၀ရက်နေ့အထိ ညနေ ၅ နာရီမှ ည၁၁ အတွင်း ဌာနမှဖြန့်ဖြူးသည့်လျှပ်စစ်ဓာတ်အားဖြင့် လုပ်ငန်းမဆောင်ရွက်ဖို့ထုတ်ပြန်ထားကြောင်းသိရသည်။

ကန့်သတ်ချိန်အတွင်း လုပ်ငန်းဆောင်ရွက်သည်ကို တွေ့ရှိပါက အုပ်ချုပ်မှု နည်းလမ်းအရ အရေးယူ ဆောင်ရွက်သွားမှာဖြစ်ကြောင်း ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းမှ သတိပေးထုတ်ပြန်ထားသည်။

ymg/ynzw
#အပူချိန် #လျှပ်စစ်ဓာတ်အား #ဖောက်ခွဲဖျက်ဆီး
#YMG #Yangon_Media_Group

#LocalNews

Published 30 March 2023

မတ်လ ၃၀ ရက်နေ့ မနက်၉ နာရီဝန်းကျင်ခန့်က ရှမ်းပြည်နယ် ကျောက်မဲမြို့နယ်၊ပြည်ထောင်စုလမ်းမကြီးပေါ်ရှိ ဂုတ်တွင်းအဆင်းတွင် ကျောက်မီးသွေးတင်ဆောင်လာသည့် ကုန်တင်ကားတစ်စီးဘရိတ်ပေါက်ကာ အခြားကုန်တင်ကားနှစ်စီးအား ဝင်တိုက်မူဖြစ်ပွားခဲ့ကြောင်း ကမ်းလင့်လက်များလူမူကူညီရေးအသင်းမှသိရသည်။

ယာဉ်တိုက်မူကြောင့် ထိခိုက်ဒဏ်ရာရရှိသူ ယာဉ်မောင်းတစ်ဦးသာရှိကြောင်း အဆိုပါအသင်းတာဝန်ခံက YMG ကိုပြောသည်။

ယာဉ်တိုက်မူဖြစ်ပွားခဲ့သည့် ကုန်တင်ကားဟာ ကျောက်မီးသွေးများသယ်ဆောင်လာသည့် ကားဖြစ်ပြီး ဂုတ်တွင်းအဆင်း ကျော်မဲရေကန်အောက်ကွေ့တွင် ဘရိတ်ပေါက်ကာ လမ်းပေါ်ရှိအခြားကုန်တင်ကားနှစ်စီးကြားသို့ရောက်ရှိပြီး သုံးစီးတိုက်ခဲ့တာဖြစ်ကြောင်းသိရသည်။

ယာဉ်တိုက်မူကြောင့်အဆိုပါဂုတ်တွင်းအဆင်းလမ်းပေါ်တွင် မနက်၉နာရီခန့်ကတည်းက လမ်းပိတ်ဆို့နေပြီး လက်ရှိနေ့လည်၁နာရီခန့် အချိန်အထိ လမ်းမပွင့်သေးသည့်အတွက် ခရီးသွားပြည်သူများ အနေဖြင့် လမ်းရှင်းလင်းပြီးမှ သွားလာကြဖို့ အဆိုပါအသင်းမှသတိပေးထားကြောင်းသိရသည်။
ymg/ynzw
#ကျောက်မဲမြို့နယ် #ကုန်တင်ကား #တိုက်မူဖြစ်ပွား
#YMG #Yangon_Media_Group

Published 30 March 2023

အမေရိကန်စစ်တပ်ရဲ့ စစ်ရဟတ်ယာဉ်နှစ်စီး  ကင်တပ်ကီပြည်နယ်မှာ လေ့ကျင့်မှုတွေလုပ်ဆောင်စဉ် တစ်စီးနှင့်တစ်စီး  တိုက်မိပြီး ပျက်ကျခဲ့တဲ့အတွက် အနည်းဆုံးလူ (၉) ဦးသေဆုံးခဲ့တယ်လို့ သတင်းများကဖော်ပြပါတယ်။

စစ်တပ်ပြောရေးဆိုခွင့်ရအမျိုးသမီး နွန်ဒစ်အယ်လ်သာမန်းကတော့ သေဆုံးဒဏ်ရာရသူတွေအကြောင်းမသိရသေးဘူးလို့ပြောကြောင်း နယူးယောက်တိုင်းမစ်သတင်းစာက ရေးသားပါတယ်။ဒါပေမယ့် ဒေသဆိုင်ရာ မီဒီယာတွေက အနည်းဆုံးလူ (၉)ဦးသေဆုံးခဲ့တယ်လို့ရေးသားကြတယ်လို့ ဒေးလီမေးလ်သတင်းစာကဖော်ပြပါတယ်။

ပြည်နယ်အပ်ချုပ်ရေးမှူး အန်ဒီဘက်ရှီရာက တွစ်တာမှာပြောကြားရာမှာ သေဆုံးထိခိုက်မှုတွေရှိလိမ့်မယ်လို့ သူမျှော်လင့်ထားတယ်လို့ဆိုပါတယ်။ ပြည်နယ်ရဲတပ်ဖွဲ့နှင့် ပြည်နယ်အရေးပေါ်စီမံခန့်ခွဲမှုဌာနက တာဝန်ရှိသူတွေဟာ အခင်းဖြစ်ပွားတဲ့နေရာကို သွားရောက်နေကြပြီလို့သိရပါတယ်။

ဗုဒ္ဓဟူးနေ့ (မတ်လ၂၉)ရက် ည ၁၀နာရီခန့်မှာ HH60 Black Hawk ရဟတ်ယာဉ်နှစ်စီးဟာ  ကင်တပ်ကီပြည်နယ်၊ ထရစ်စီရင်စုမှာမှာ လေ့ကျင့်ပျံသန်းနေရင်း တစ်စီးနှင့်တစ်စီးတိုက်မိကြတာဖြစ်ပါတယ်။

တပ်သားတွေနှင့် သူတို့ရဲ့မိသားစုတွေကို စောင့်ရှောက်မှုတွေပေးဖို့ အာရုံစိုက်နေပြီး ပျက်ကျမှုကို စုံစမ်းစစ်ဆေးနေတယ်လို့လည်း ပြောရေးဆိုခွင့်ရအမျိုးသမီး သာမန်းကပြောပါတယ်။

ရဟတ်ယာဉ်တွေပေါ် လူဘယ်နှစ်ဦးလိုက်ပါသွားသလဲဆိုတာလည်း သတင်းထုတ်ပြန်ခြင်းမရှိသေးပါဘူး။

ထရစ်စီရင်စုက ထောင်မှူးတစ်ဦးဖြစ်တဲ့ အမ်းစ် ဟူးချ်က ဒေသဆိုင်ရာ ရေဒီယိုဌာနတစ်ခုကိုပြောကြားရာမှာ သူဟာ ပျက်ကျတဲ့နေရာနှင့် မိုင်ဝက်ခန့်ဝေးကွာတဲ့နေရာမှာရှိနေပြီး တိုက်မိတဲ့အသံကြီးလိုမျိုးကျယ်ကျယ်လောင်လောင် အသံကြီးကြားလိုက်ရတယ်လို့ဆိုပါတယ်။

အဆိုပါရဟတ်ယာဉ်နှစ်စီးဟာ အမှတ်၁၀၁ လေကြောင်းချီတပ်မရဲ့လက်အောက်မှာပျံသန်းနေတာဖြစ်ပါတယ်။

Source: NY Times/Daily Mail

#Blackhawk ရဟတ်ယာဉ်နှစ်စီးတိုက်မိပျက်ကျ

#အမေရိကန်စစ်တပ်ရဟတ်ယာဉ်နှစ်စီးတိုက်မိပျက်ကျ

#YangonMediaGroup

#World_Politics
Published 30 March 2023

ထိုင်ဝမ်သမ္မတ 'ဆိုင်အင်ဝမ်' ဟာ အမေရိကန်မှာ ခရီးတစ်ထောက်ဝင်ရောက်ရန်အတွက် ဗုဒ္ဓဟူးနေ့က နယူးယော့ခ်သို့ရောက်ရှိလာပါတယ်။

အမေရိကန်အောက်လွှတ်တော်ဥက္ကဌ 'ကီဗင်မက်ကာသီ'နဲ့တွေ့ဆုံခဲ့ရင်တရုတ်က လက်တုန့်ပြန်မယ်လို့ ခြိမ်းခြောက်ထားပြီးနောက် ပြင်ပဖိအားတွေက ကမ္ဘာကြီးနှင့်သူတို့ထိတွေ့ဆက်ဆံနေမှုကိုတားဆီးလို့ရမှာမဟုတ်ဘူးလို့ သူမက သန္နိဋ္ဌာန်ချထားတယ်လို့ ပြောပါတယ်။

ဆိုင်အင်ဝမ်နဲ့မတွေ့ဆုံဖို့ အမေရိကန်တာဝန်ရှိသူများကို အကြိမ်ကြိမ်သတိပေးထားသလို အခုလိုတွေ့ဆုံခြင်းဟာ ထိုင်ဝမ်ကျွန်းရဲ့ ကိုယ်ပိုင်သီးသန့် နိုင်ငံဖြစ်ချင်တဲ့ဆန္ဒကို ထောက်ခံအားပေးတယ်လို့ တရုတ်ကမြင်နေပါတယ်။

ဩဂုတ်လက အမေရိကန်အောက်လွှတ်တော်ဥက္ကဌ 'နန်စီပယ်လိုစီ' ထိုင်ပေသို့သွားရောက်စဉ်က တရုတ်ဟာ ထိုင်ဝမ်အနီးမှာ စစ်ရေးပြမှုများပြုလုပ်ခဲ့ပါသေးတယ်။

ဆိုင်အင်ဝမ် နိုင်ငံခြားခရီးသွားနေစဉ် တရုတ်ရဲ့လှုပ်ရှားမှုတွေကို စောင့်ကြည့်နေကြောင်း ထိုင်ဝမ်လက်နက်ကိုင်တပ်ဖွဲ့များက ပြောကြားခဲ့ပါတယ်။

ဆိုင်အင်ဝမ်က ဂွာတီမာလာနဲ့ ဘီလစ်ဇ်တို့ကို ခရီးစဉ်သွားရောက်မှာဖြစ်ပြီး ထိုင်ဝမ်ကို သံတမန်ရေးအရ အသိအမှတ်ပြုတဲ့ နိုင်ငံအနည်းစုထဲက နိုင်ငံတွေဖြစ်ပါတယ်။

စနေနေ့မတိုင်ခင်အထိ နယူးယော့ခ်မှာ ရှိနေမှာဖြစ်ကာ အမေရိကအလယ်ပိုင်းကနေ အပြန်လမ်းမှာ လော့စ်အိန်ဂျလိစ်ကိုလည်း ဝင်ရောက်လည်ပတ်မှာဖြစ်ပါတယ်။

မက်ကာသီနဲ့ ကယ်လီဖိုးနီးယားမှာ တွေ့ဆုံဖို့မျှော်မှန်းထားပေမယ့် တရားဝင်အတည်မပြုရသေးပါဘူး။

ကမ္ဘာကအသိအမှတ်ပြုခံရဖို့အရေးကို ဘယ်လိုပြင်ပဖိအားမျိုးကမှ ဖိနှိပ်မထားနိုင်စေရဘူးလို့ ဆိုင်အင်ဝမ်က ထိုင်ဝမ်ကမထွက်ခွာမီ အပြည်ပြည်ဆိုင်ရာအဓိကလေဆိပ်မှာ ပြောကြားသွားပါတယ်။

ဒီမိုကရေစီအရေးနဲ့ လွတ်လပ်ခွင့်လမ်းကြောင်းပေါ်မှာ မဆုတ်မလျော့လျှောက်လှမ်းသွာပြီး ကမ္ဘာသိအောင်ပြုလုပ်မှာပါ၊ ဒီလမ်းခရီးက ခက်ခဲကြမ်းတမ်းပေမယ့် တစ်ဦးတည်းကျန်မနေပါဘူး" လို့ ဆိုသွားပါတယ်။

အမေရိကန်ရှိ ထိုင်ဝမ်ရဲ့ တရားဝင်လုပ်မထားတဲ့ သံရုံးကတော့ ဆိုင်အင်ဝမ် နယူးယော့ခ်သို့ရောက်ရှိလာတာကို အတည်ပြုလိုက်ပြီး ဒီကိုရောက်ရှိနေစဉ်အတွင်း သတင်းစာရှင်းလင်းပွဲတွေ မိန့်ခွန်းတွေ ပြုလုပ်သွားမှာမဟုတ်ဘူးလို့ ဆိုပါတယ်။

နိုင်ငံအများအပြားက ထိုင်ဝမ်ကို အသိအမှတ်မပြုကြတော့ဘဲ တရုတ်ဘက်ကိုသာ ဦးတည်လာကြပါတယ်။

တရုတ်ကတော့ ထိုင်ဝမ်ကျွန်းဟာ တရုတ်တစ်သွေးသားတည်းမူဝါဒမှာ ပါဝင်တာကြောင့် အခြားနိုင်ငံတွေနဲ့ ဆက်ဆံခွင့်မရှိဘူးလို့ဆိုထားကာ ထိုင်ဝမ်ဘက်က ငြင်းဆိုထားပါတယ်။

ဆိုင်အင်ဝမ်သာ မက်ကာသီနဲ့တွေ့ဆုံမယ်ဆိုရင် တရုတ်ဘက်က ပြန်လည်တုန့်ပြန်ဖို့ အတိုင်းအတာတွေ သေချာပေါက်ချမှတ်သွားမယ်လို့ တရုတ်နိုင်ငံ ထိုင်ဝမ်ရေးရာရုံး ရဲ့ ပြောရေးဆိုခွင့်ရှိသူက ပြောကြားခဲ့ပါတယ်။

Source: Reuters
#ထိုင်ဝမ်သမ္မတ #အမေရိကန် #တရုတ်
#YMG #Yangon_Media_Group

#Local_News
Published_ 30 March 2023

ရန်ကုန်-ပုဂံ အမြန်ရထားခရီးစဉ်တွေကို မူလကပြေးဆွဲပေးနေတဲ့ နေ့ရက်နဲ့အချိန်တွေအစား ပြန်လည်ပြောင်းလဲပြေးဆွဲ ပေးနေပြီဖြစ်ကြောင်း မြန်မာ့မီးရထားကနေသိရသည်။

မူလက ရန်ကုန်-ပုဂံ အစုန် ၊ အဆန်ရထားတွေကိုအပတ်စဉ် သောကြာနေ့နဲ့ တနင်္ဂနွေနေ့တွေမှာ ပြေးဆွဲပေးနေရာက ယခုရက်ပိုင်းများကစတင်ပြီး အပတ်စဉ်အင်္ဂါ နဲ့သောကြာနေ့တွေမှာ ပြန်လည် အချိန်ပြောင်းပြေးဆွဲပေးနေကြောင်းသိရသည်။

ရန်ကုန်ကနေ ပုဂံ ကိုပြေးဆွဲပေးနေတဲ့ အမှတ် ၆၁ အဆန်ရထားဟာ ရန်ကုန်ဘူတာမှညနေ၄နာရီ ၁၅မိနစ်မှာထွက်ခွာပြီး ပုဂံဘူတာကိုနောက်နေ့မွန်းတည့် ၁၂နာရီတွင် ရောက်ရှိမှာဖြစ်ကာ ပုဂံကနေ ရန်ကုန်ကို ပြန်ထွက်မယ့်အမှတ် ၆၂ အစုန်အမြန်ရထားက ပုဂံဘူတာကနေ ညနေ၄နာရီ၁၅မိနစ်မှာထွက်ခွာပြီး ရန်ကုန်ဘူတာကို နောက်တနေ့မွန်းတည့် ၁၂နာရီမှာရောက်ရှိမည်ဖြစ်ကြောင်းသိရသည်။

လမ်းခရီးမှာ ဘူတာ၂၃ဘူတာ ရပ်တန့်မှာဖြစ်ပြီး သာယာဝတီ၊ လက်ပံတန်း၊ မင်းလှ၊ အုတ်ဖို၊ ကြို့ပင်ကောက်၊ ဇီးကုန်း၊ နတ်တလင်း၊ ပေါင်းတည်၊ ပုတီးကုန်း၊ သဲကုန်း၊ ဆင်မြီးဆွဲ၊ ရွှေတံခါး၊ အောင်လံ၊ ဆတ်သွား၊ တောင်တွင်းကြီး၊ မြို့သစ်၊ နတ်မောက်၊လေးအိမ်၊သာမြှား ၊ ပင်ချောင်း၊ ကျောက်ပန်းတောင်း၊ ငါ့မင်းမေး၊ စုတည်ဘူတာ များဖြစ်သည်။

ymg/ppk
#Yangon-Media-Group

#Local_News
Published 30 March 2023

ယခင်နိုင်ငံတော်အေးချမ်းသာယာရေး နှင့် ဖွံ့ဖြိုးရေးကောင်စီလက်ထက်က ပြဌာန်းထားသည့် နိုင်ငံရေးပါတီများ မှတ်ပုံတင်ခြင်းဥပဒေအရ တည်ရှိနေသောပါတီများသည် လက်ရှိ ဥပဒေအသစ်အရ မှတ်တင်ရမည့် သတ်မှတ်ကာလကျော်လွန်သွားပြီဖြစ်တာကြောင့် အလိုလျောက် ပါတီဖျက်သိမ်းပြီးဖြစ်သော်လည်း ပါတီတည်ထောင်လိုသူတွေအနေဖြင့် နိုင်ငံပါတီများ မှတ်ပုံတင်ခြင်းဥပဒေပုဒ်မ ၃ အရပြည်ထောင်စု ရွေးကောက်ပွဲကော်မရှင် ကထုတ်ပြန်ထားသည်။

လက်ရှိ နိုင်ငံရေးပါတီများမှတ်ပုံတင်ခြင်းဥပဒေအရ ပုဒ်မ ၃ အရ နိုင်ငံရေးပါတီတည်ထောင်ခွင့်နှင့် မှတ်ပုံတင်ခြင်းလျှောက်ထားသည့်ပါတီ ၁၃ ပါတီရှိပြီး ပုဒ်မ၂၅ အရ လျှောက်ထားသည့်ပါတီ ၅၀ လျှောက်ထားသည့်အတွက် စုစုပေါင်း နိုင်ငံရေးပါတီ ၆၃ ပါတီရှိပြီးဖြစ်ကြောင်း ပြည်ထောင်စုရွေကောက်ပွဲကော်မရှင်ကထုတ်ပြန်ထားသည်။

အဆိုပါ ပါတီများတွင် ပြည်ထောင်စုတစ်၀န်းလုံတွင်စည်းရုံးမည့်ပါတီ၁၂ပါတီနှင့် တိုင်းဒေသကြီးသို့မဟုတ် ပြည််နယ်တစ်ခုအတွင်း၌သာစည်းရုံးမည့်ပါတီ၅၁ ပါတီဖြစ်ကြောင်းသိရသည်။

ယင်း ပါတီများအား မှတ်ပုံတင်ခွင့်နိုင်ရေး ဆက်လက်ဆောင်ရွက်သွားမှာဖြစ်ကြောင်း ပြည်ထောင်စုရွေးကောက်ပွဲကော်မရှင်ကထုတ်ပြန်ထားသည်။

ymg/ynzw
#နိုင်ငံရေးပါတီ #ရွေးကော်ထုတ်ပြန်
#YMG #Yangon_Media_Group

#World_Health
Published 30 March 2023

ကင်ဆာကို စောစီးစွာတွေ့ရှိနိုင်မယ့် ကုသနည်းကို စမ်းသပ်နေကြပြီဖြစ်ပါတယ်။

ကင်ဆာလူနာတွေမှာ အောင်မြင်စွာစမ်းသပ်ခဲ့ပြီးနောက် ကင်ဆာအကျိတ်မဖြစ်ခင် တစ်နှစ်အလိုလောက်ကတည်းက ခန့်မှန်းသိရှိနိုင်မယ့် သွေးစစ်နည်းတစ်ခုကို ယူကေတလျှောက်ရှိ ဆေးရုံတွေမှာ စတင်အသုံးပြုနေပါပြီ။

"အခြားနည်းပညာတွေထက် အကျိတ်ပေါ်မလာခင်မှာပဲ ပိုမိုစောစီးစွာသိရှိနိုင်ပါတယ်" လို့ ဇာဓာတ်ခွဲခန်းတည်ထောင်သူ' အရှစ်ထရစ်ပါသီ'က ပြောပြခဲ့ပါတယ်။

"သွေးစစ်ဆေးနည်းဖြင့် အစောကတည်းက တွေ့ရှိနိုင်ရုံမက ကင်ဆာအမျိုးအစားနဲ့ ဘယ်နေရာမှာဖြစ်မလဲဆိုတာကိုပါ ပြောပြနိုင်ပါတယ်" လို့ ဆိုပါတယ်။

ကင်ဆာမရှိသူအယောက် ၅၀၀ နဲ့ ကင်ဆာရောဂါသည် ၅၀၀ တို့ကိုစမ်းသပ်ခဲ့ရာ အနည်းဆုံး ကင်ဆာ ၂၅ မျိုးကနေ အကျိတ်ဖြစ်ပေါ်နိုင်ချေတွေကို တိကျစွာခန့်မှန်းနိုင်ခဲ့ပါတယ်။

မှားယွင်းပြီး ရောဂါတွေ့ရှိတာမျိုး၊ မတွေ့ရှိတာမျိုး မဖြစ်ခဲ့ပါဘူး။
ကင်ဆာကို အစောပိုင်းအဆင့်ကတည်းက သိရှိတာမျိုးက ကင်ဆာကုသရေးအတွက် အလွန်အထောက်အကူဖြစ်ကြောင်း လန်ဒန်မှ အစာအိမ်အူလမ်းကြောင်းအထူးကု ဒေါက်တာ'ရှရစ်ဖ်ရောက်ဖ်'က ပြောကြားခဲ့ပါတယ်။

၁ ကုဗစင်တီမီတာရှိတဲ့ အကျိတ်ဖြစ်ပေါ်ဖို့ ကင်ဆာဆဲလ်ပေါင်း ၁ ဘီလီယံခန့်လိုအပ်ပါတယ်။

ကင်ဆာရောဂါရှာဖွေခြင်းအတွက် ယခင်က တီထွင်ထုတ်လုပ်ထားတဲ့ သွေးစစ်ဆေးမှုအများစုကို သွေးမှတစ်ဆင့် သွားလာနေတဲ့ အကျိတ်ဆဲလ်များကို တွေ့ရှိရန် ပြုလုပ်ထားတာဖြစ်ပါတယ်။

ထရစ်ပသီရဲ့အဆိုအရ ထိုနည်းလမ်းဟာ မှားယွင်းတဲ့လက္ခဏာများပြနိုင်ပြီး အကြောင်းမှာ သွေးနမူနာတိုင်းက ထိုဆဲလ်များကို ဖြစ်ပေါ်စေမှာမဟုတ်တာကြောင့် ဖြစ်ပါတယ်။

သူတို့အောင်မြင်ခဲ့တဲ့နည်းလမ်းအရ အခြားကုမ္ပဏီတွေက သွေးထဲက အကျိတ်ဆဲလ်အပိုင်းအစတွေကို ရှာဖွေနေတာဖြစ်ပြီး ထိုအကျိတ်ဆဲလ်အများစုက ကင်ဆာအစောပိုင်းအဆင့်တွေမှာ မတွေ့ရသေးကြောင်း ရှင်းပြသွားပါတယ်။

ယခုရှာဖွေနည်းလမ်းကတော့ အစောပိုင်းကင်ဆာအဆင့်တွေကို တွေ့ရှိနိုင်ရုံမက ပင်မစတမ်ဆဲလ်တွေ ကင်ဆာမဖြစ်ခင် ၁၈ လအကြိုကတည်းက သိရှိနိုင်မှာဖြစ်ပါတယ်။

Source: NY Post #ကင်ဆာအကျိတ် #ကင်ဆာရှာဖွေရေးနည်းလမ်းသစ်
#Yangon_Media_Group

#World_Health
Published 30 March 2023

အမှောင်ထုထဲမှာ မျက်စိမှိတ်လိုက်တဲ့အခါ မြင်နေရတဲ့အရောင်က အနက်ရောင်မဟုတ်ဘဲ မီးခိုးရောင်အရိပ်သာ ဖြစ်နေပါတယ်။

လူတွေရဲ့ဦးနှောက်က အမြင်အာရုံကရတဲ့ အချက်အလက်တွေကို လုပ်ဆောင်တဲ့အခါမှာ အရောင်ကွဲပြားခြားနားချက်က အလင်းရောင်ထက် များစွာအရေးပါနေပါတယ်။

အမှောင်ထုက ကျွန်ုပ်တို့မြင်နေရတဲ့ အလင်းဆုံးအရောင်နဲ့ ဆက်စပ်နေပါတယ်။

ဥပမာအားဖြင့် ကြယ်တွေရဲ့အရောင်ခြားနားခြင်းကြောင့် ညဘက်ကောင်းကင်က မီးခိုးရောင်အရိပ်ထက် ပိုမိုနက်မှောင်သလို မြင်နေရပါတယ်။

လေ့လာချက်များမှာတော့ နောက်ခံအရောင်လိုက်ဖက်ညီမှုဖြင့်သာ သိပ္ပံပညာရှင်များ သုံးနှုန်းကြပြီး မျက်လုံးတွေက အလင်းကိုဘယ်လိုတုန့်ပြန်လဲဆိုတာနဲ့ အမှောင်ထုကို ဘယ်လိုကျင့်သားရလဲဆိုတာတွေနဲ့ ဆက်စပ်နေပါတယ်။

အရောင်ခွဲခြားသိရှိမှုကို ဦးနှောက်ရှိ အာရုံကြောချိတ်ဆက်မှုများနဲ့ မျက်ကြည်လွှာတို့မှ သိရှိတာဖြစ်ပြီး မီးခိုးရောင်က အမြဲတည်ငြိမ်နေတာတော့ မဟုတ်ပါဘူး။

အိပ်နေတုန်း မျက်လုံးမှိတ်ထားတာ ကြာလာတာနဲ့အမျှ မီးခိုးရောင်က တဖြည်းဖြည်းအရောင်ဖျော့လာပါတယ်။

Source: The Jerusalem Post #World_Health #မျက်လုံးမှိတ်
#World_Health #ဘာရောင်လဲ

Published 29 March 2023

မန္တလေးမြို့၊ ချမ်းအေးသာစံမြို့နယ်၊ ရှိ “စိန်ကျော်မိုး ရွှေသန့်စင်နှင့် မီးလင်းရွှေရောင်းဝယ်ရေး”အပါအဝင် အခြားနေရာများတွင် ဓားပြတိုက်လူသတ်မှုကျူုးလွန်ခဲ့သူတွေကို ယနေ့ မတ်လ ၂၉ ရက် ဗုဒ္ဓဟူးနေ့က ဖမ်းဆီးရမိခဲ့တယ်လို့ သိရပါတယ်။

၂၀၂၃ ခုနှစ်၊ မတ်လ ၂၇ ရက် ၁၇၁၅ နာရီခန့်တွင် မန္တလေးမြို့၊ ချမ်းအေးသာစံမြို့နယ်၊ အောင်နန်းရိပ်သာအနောက်ရပ်ကွက်၊ အကွက်အမှတ်(၅၇၅)၊ ၈၅ (A)လမ်း၊ ၃၁x ၃၂ လမ်းကြားရှိ “စိန်ကျော်မိုး ရွှေသန့်စင်နှင့် မီးလင်းရွှေရောင်းဝယ်ရေး” ဆိုင်ရှေ့၌ရွှေဆိုင်ဝန်ထမ်း ၂ ဦးမှ ငွေကျပ်သိန်း ၁၅၀၀ အား စိန်သရဖူ ရွှေသန့်စင်လုပ်ငန်းသို့ပို့ဆောင်ရန် Hijet ယာဉ်ပေါ်သို့ တင်ဆောင်နေစဉ် အမျိုးသား  ၃ ဦးဟာ မော်တော်ယာဉ် ၁ စီးဖြင့် ရောက်ရှိလာပြီး ပစ္စတိုသေနတ်ဖြင့် ၂ ချက် မိုးပေါ်ပစ်ဖောက်ကာ ငွေကျပ်သိန်း ၁၂၀၀ အား ဓားပြတိုက် လုယက်ယူဆောင်သွားခဲ့ပါသည်။ ထိုဖြစ်စဉ်ကို  လိုက်လံဖော်ထုတ်ရာမှ အခြားသော ဓားပြမှုများကိုပါ ဆက်လက်ဖော်ထုတ်ရခဲ့ခြင်းဖြစ်တယ်လို့ နစကရဲ့ သတင်းထုတ်ပြန်ချက် အရသိရပါတယ်။

ဓားပြတိုက်လုယက်မှုကျူးလွန်ခဲ့သည့် တရားခံ ကျား ၄ ဦးအားSigsauer ပစ္စတို ၁ လက်၊ Glock ပစ္စတို ၁ လက်၊ ခြောက်လုံးပြူး ၁ လက်၊ ၉ မမကျည်၄၃ တောင့်၊ ဓားပြတိုက်လုယက်မှုတွင် ပါရှိသွားသည့် ငွေကျပ် ၈၃၅ သိန်း ၊ ဘိန်းဖြူဟုယူဆရသော ဖြူဝါရောင်မှုန့် ၂၂၈၀ ဂရမ်၊ WY စာတမ်းပါ ပန်းရောင်စိတ်ကြွရူးသွပ်ဆေးပြား ၁၈၀,၀၀၀ ပြားနှင့် ဓားပြတိုက်လုယက်မှု ကျူးလွန်ရာတွင် အသုံးပြုခဲ့သည့်မော်တော်ယာဉ်တို့နှင့်အတူ ဖမ်းဆီးရမိခဲ့တာဖြစ်ပါတယ်။

အမှုကိုစုံစမ်းဖော်ထုတ်တဲ့အခါ “စိန်ကျော်မိုး ရွှေသန့်စင်နှင့် မီးလင်းရွှေရောင်းဝယ်ရေး” ဆိုင်မှာတပ်ဆင်ထားတဲ့  CCTV မှတ်တမ်းများအရ အဲဒီ အမျိုးသား ၃ ဦးဟာ ဓားပြတိုက်လုယက်ယူဆောင်သွားသည့် ငွေကြေးတွေကို  ယာဉ်အမှတ်၊ YGN-5D/2975 Nissan March (အနက်ရောင်)ဖြင့် သယ်ဆောင်ထွက်ခွာသွားကြောင်းတွေ့ရှိခဲ့ရပါတယ်။အဲဒါကြောင့်  အဆိုပါ ယာဉ်အား စုံစမ်းစစ်ဆေးရှာဖွေ ခဲ့ရာ ပြည်ကြီးတံခွန်မြို့ နယ်၊ ၅၁ လမ်း၊ ၁၃၅ x ၁၃၆ လမ်းကြားရှိခြံဝင်းအတွင်း ဆက်စပ်တရားခံ တင်စိုးနှင့်ကျော်တင်ဦး(ခ) ငပိန်တို့ ၂ ဦးအား ဓားပြတိုက်လုယက်မှု ကျူးလွန်ရာတွင် အသုံးပြုခဲ့သည့် မော်တော်ယာဉ်နှင့်အတူဖြစ်စဉ်ဖြစ်ပွားပြီး နာရီပိုင်း အတွင်း ဖမ်းဆီးရမိခဲ့ခြင်း ဖြစ်ပါတယ်။

အဲဒီနောက် မတ်လ ၂၈ ရက် ညပိုင်းတွင်ချမ်းမြသာစည်မြို့နယ်၊ ချမ်းမြသာစည်တောင်ရပ်ကွက်၊ ရွာလမ်း၊ အကွက်အမှတ်၊ ၈၆၂တွင် တရားခံ ဆန်းဝင်း အား ဖမ်းဆီးရမိခဲ့ပြီး အမရပူရမြို့ နယ်၊ မြစ်ငယ်မြို့၊ဓနုံးကျေးရွာ၌ ဖမ်းဆီးရန်ကျန် တရားခံ ကျော်နိုင် ၏ နေအိမ်မှ Sigsauer ပစ္စတို ၁ လက်၊Glock ပစ္စတို ၁ လက်၊ ခြောက်လုံးပြူး ၁ လက်၊ ၉ မမကျည် ၄၃ တောင့်၊ ဓားပြတိုက်လုယက် မှုတွင် ပါရှိသွားသည့် ငွေကျပ် သိန်း ၆၀၀ ၊ ဘိန်းဖြူဟုယူဆရသောဖြူဝါရောင်မှုန့် ၂၂၈၀ ဂရမ်နှင့် WY စာတမ်းပါ ပန်းရောင်စိတ်ကြွရူးသွပ်ဆေးပြား၁၈၀,၀၀၀ ပြားတို့အား သိမ်းဆည်း ရမိခဲ့ပါတယ်။

ဖမ်းဆီးရမိတရားခံ ဆန်းဝင်း ၏ ထွက်ဆိုချက်အရ ပြည်ကြီးတံခွန် မြို့နယ်၊၁၄၂ လမ်း၊ ၆၁ x ၆၂ လမ်းကြား၌ တရားခံ တင်စိုး(ခ)ရခိုင် အား ဓားပြတိုက်လုယက်မှုတွင် ပါရှိသွားသည့် ငွေကျပ် ၂၃၅ သိန်းနှင့်အတူ ထပ်မံဖမ်းဆီးရမိခဲ့တယ်လို့ သိရှိရပါတယ်။

ဖမ်းဆီးရမိ တရားခံများ၏ ထွက်ဆိုချက်အရ အကြောင်းမဲ့လုပ်ကြံသတ်ဖြတ်မှု ၁ ကြိမ်နှင့် ဓါးပြတိုက်လုယက်မှု ၃ ကြိမ်ကျူးလွန်ခဲ့ကြောင်း သိရှိရသည်။

၂၀၂၃ ခုနှစ်၊ ဖေဖော်ဝါရီလ ၂၅ ရက်တွင် ဆန်းဝင်းခေါင်းဆောင်၍ တင်စိုး(ခ) ရခိုင်၊ တင်စိုး၊ ကျော်တင်ဦး(ခ)ငပိန်၊ ဖမ်းဆီးရန်ကျန်တရားခံများဖြစ်သည့် တမောင်း၊ ကျော်နိုင် တို့သည် ညောင်ပင်ကုန်းကျေးရွာ၊ (ဋ)ရပ်ကွက်ရှိ ဒေါ်ခင်လတ်ဆိုသူအမျိုးသမီးတစ်ဦး ၏ နေအိမ်အားဝင်ရောက်ဓားပြတိုက်လုယက်ခဲ့ကြောင်း၊ ထိုသို့ ဓားပြတိုက် လုယက်နေစဉ်ဒေါ်ခင်လတ် ၏မောင်ဖြစ်သူ ဒုရဲမှူး ဝင်းမင်းသန့် ရောက်ရှိ လာပြီး ၎င်းတို့အားလုံးထွေးသတ်ပုတ်ဖမ်းဆီးခဲ့သဖြင့် တရားခံ ဆန်းဝင်း မှ ပစ္စတိုဖြင့် ၃ ချက်ပစ်၍လုပ်ကြံသတ်ဖြတ်ကာ နေအိမ်အတွင်းမှ ရွှေဆွဲကြိုး ၁ ကုံး၊ ရွှေလက်ကောက် ၃ ကွင်း၊ရွှေလက်စွပ် ၄ ကွင်း၊ ငွေကျပ်သိန်း ၃၀၀ နှင့် ဒုရဲမှူး ဝင်းမင်းသန့် ကိုင်ဆောင်သည့်ခြောက်လုံးပြူး ၁ လက်တို့အား ဓားပြတိုက် လုယက်ယူဆောင်သွားခဲ့ကြောင်း၊ဓားပြတိုက် လုယက်ယူဆောင်လာသည့် ရွှေထည်ပစ္စည်းများအား ချမ်းအေးသာစံမြို့နယ်၊ အောင်နန်းရိပ်သာအနောက် ရပ်ကွက်ရှိ “စိန်ကျော်မိုးရွှေသန့်စင်နှင့် မီးလင်းရွှေရောင်းဝယ်ရေးဆိုင်”သို့ သွားရောက်၍ ငွေကျပ်သိန်း ၈၀ ဖြင့် ရောင်းချခဲ့ကြောင်း သိရှိရပါတယ်။

မတ်လ ၁၂ ရက်တွင် တရားခံ ဆန်းဝင်းနှင့် ဖမ်းဆီးရန်ကျန် တရားခံတမောင်း တို့သည် ချမ်းအေးသာစံမြို့နယ်၊ သီရိဟေမာအနောက်ရပ်ကွက် ရှိ“ဒေါ်တောမုန့်တီဆိုင်” သို့ သွားရောက်၍ ဆိုင်ပိုင်ရှင် ဒေါ်မာလွင်အား လက်နက်ဖြင့် ခြိမ်းခြောက်ကာ ရွှေဆွဲကြိုး ၁ ကုံး၊ ရွှေလက်ကောက် ၁ ကွင်းနှင့်ရွှေလက်စွပ် ၁ ကွင်းတို့အား ဓားပြတိုက်လုယက်ယူဆောင်ခဲ့ကြောင်း၊ ဓားပြတိုက်လုယက်ယူဆောင်လာသည့် ရွှေထည်ပစ္စည်းများအား … ချမ်းအေးသာစံမြို့နယ်၊အောင်နန်းရိပ်သာ အနောက်ရပ်ကွက်ရှိ “စိန်ကျော်မိုးရွှေသန့်စင်နှင့် မီးလင်းရွှေရောင်းဝယ်ရေးဆိုင်” သို့ သွားရောက်၍ ငွေကျပ်သိန်း ၄၀ ဖြင့် ရောင်းချခဲ့ကြောင်းသိရှိရပါတယ်။

ဖမ်းဆီးရမိတရားခံများ၏ ထွက်ဆိုချက်အရ ဆန်းဝင်း သည် ဓားပြတိုက် လုယက်ယူဆောင်လာသည့် ရွှေထည်ပစ္စည်းများအား “စိန်ကျော်မိုးရွှေသန့်စင်နှင့် မီးလင်းရွှေရောင်းဝယ်ရေးဆိုင်”သို့ သွားရောက် ရောင်းချစဉ် ဆိုင်အတွင်း၌ ငွေစက္ကူများအားဆာလာအိတ်ဖြင့် ထည့်ထားသည်ကို တွေ့ရှိခဲ့သဖြင့် ၎င်းဆိုင်အား ဓားပြတိုက်ရန် စီစဉ်ခဲ့ပြီး ဓားပြတိုက်လုယက်ရာတွင် အသုံးပြုရန် Nissan (အနက်ရောင်) လိုင်စင်မဲ့ယာဉ် ၁ စီးအား ဝယ်ယူခဲ့ကြောင်းနှင့် တရားခံ ကျော်တင်ဦး(ခ)ငပိန်သည် ရွှေဆိုင်ဝန်ထမ်းများငွေစက္ကူများသယ်ယူမည့်အချိန်ကို ကြိုတင်စောင့်ကြည့်လေ့လာ၍ မတ်လ ၂၇ ရက်နေ့တွင် ဓားပြတိုက်လုယက်ခဲ့ခြင်းဖြစ်ကြောင်းဖော်ထုတ်သိရှိရပါတယ်။

တရားခံ ဆန်းဝင်း သည် ၁၉၉၄ခုနှစ်တွင် တာချီလိတ်မြို့၌ တရားမဝင်ရှေးဟောင်းပစ္စည်း ရောင်းဝယ်ပြုလုပ်မှုဖြင့်တာချီလိတ်မြို့မရဲစခန်းတွင် ဖမ်းဆီးခံခဲ့ရပြီး ကျိုင်းတုံအကျဉ်းထောင်၌ ထောင်ဒဏ် ၃နှစ် ကျခဲ့ကြောင်း၊ ၂၀၀၂ ခုနှစ်၊ ဇန်နဝါရီလတွင် ကလောမြို့၊ မြို့အဝင်စစ်ဆေးရေးဂိတ်၌ဘိန်းမဲ ၅ ပိဿာနှင့်အတူ ဖမ်းဆီးခံခဲ့ရကာ ထောင်ဒဏ် နှစ် ၃၀ ထပ်မံကျခဲ့ပြီး ၂၀၁၉ခုနှစ်၊ ဧပြီလ ၁၇ ရက်တွင် လွတ်ငြိမ်းချမ်းသာခွင့်ဖြင့် ပြန်လည် လွတ်မြောက်လာခဲ့သူဖြစ်ကြောင်း သိရှိရပါတယ်။

တရားခံတင်စိုး(ခ)ရခိုင်သည် ၂၀၀၃ ခုနှစ်တွင် မူးယစ်ဆေးဝါးမှုဖြင့် ကချင်ပြည်နယ်၊ မိုးညှင်းမြို့မရဲစခန်း၌ ဖမ်းဆီးခံခဲ့ရပြီး မြစ်ကြီးနားအကျဉ်းထောင်တွင်ထောင်ဒဏ် ၇ နှစ်ကျခံခဲ့ရကာ ၂၀၀၉ ခုနှစ်တွင် ပြစ်ဒဏ်စေ့သဖြင့် ပြန်လည်လွတ်မြောက် လာခဲ့သူဖြစ်ကြောင်းလည်းထပ်မံသိရှိရပါတယ်။

ဓားပြတိုက်လုယက်မှုကျူးလွန်ရာတွင်အသုံးပြုခဲ့သည့် ပစ္စတို ၂ လက်နှင့်ခဲယမ်းများအား ၂၀၂၂ ခုနှစ်၊ ဒီဇင်ဘာလခန့်တွင်ဖယ်ခုံမြို့နယ်၊ လအိကျေးရွာသို့ သွားရောက်၍ ဖမ်းဆီးရန်ကျန် တရားခံ မောင်ဆန်း ထံမှငွေကျပ် ၁၀၂ သိန်းဖြင့် ဝယ်ယူခဲ့ခြင်းဖြစ်တယ်လို့လည်း သတင်းထုတ်ပြန်ထားပါတယ်။

ဓားပြတိုက်လုယက်ယူဆောင်သွားသည့်ရွှေထည်ပစ္စည်းများအား ထုခွဲရောင်းချရာ၌ တရားမဝင်လက်ခံဝယ်ယူခဲ့သည့် “စိန်ကျော်မိုးရွှေသန့်စင်နှင့် မီးလင်းရွှေ ရောင်းဝယ်ရေးဆိုင်”ကိုလည်း တရားဥပဒေအရ ထိရောက်စွာအရေးယူဆောင်ရွက်သွားမည်ဖြစ်ကြောင်းနှင့် ဓားပြတိုက်လုယက်မှုတွင် ပါဝင်ကျူးလွန်ခဲ့သည့် တရားခံပြေး ၂ ဦးကိုလည်း ဆက်လက်ဖော်ထုတ်၍ အမြန်ဆုံးဖမ်းဆီးနိုင်ရေးဆောင်ရွက်သွားမည်ဖြစ်ကြောင်းလည်း သိရှိရပါတယ်။

-ymg/knl

#မန္တလေးရွှေဆိုင်ဓားပြတိုက်မှုတရားခံများမိ

#စိန်ကျော်မိုး ရွှေသန့်စင်နှင့် မီးလင်းရွှေရောင်းဝယ်ရေးရွှေဆိုင်ဓားပြများဖမ်းမိ

#YangonMediaGroup