#Daily_News
Published_ 23 June 2023

၁။ မြို့ပြရောဂါဖြစ်သည့် သွေးလွန်တုပ်ကွေးရောဂါ ယခုနှစ်တွင်ကျေးလက်၌အဖြစ်ပိုများလာ

၂။ နိုင်ငံခြားငွေကြေးရောင်းဝယ်ခြင်းကို Online Trading စနစ်ဖြင့်ဆောင်ရွက်နေ၊ တစ်ဒေါ်လာ ကို ၂၉၂၀/၂၉၂၂ကျပ် ဗဟ်ိုဘဏ် သတ်မှတ်

၃။ ဒုတိယအကြိမ် ဉရုချောင်းရေကြီးမှုဖြစ်ပွားပါက ကယ်ဆယ်ရေးလုပ်ငန်းများ ကြိုတင်ပြင်ဆင်ထားပြီးဖြစ်ဟုဆို

၄။ စွမ်းအင်သစ်သုံးကားများအတွက် ဘက်ထရီများပြန်လည်အသုံးချသုံးစွဲရေးကဏ္ဍကို တရုတ်ဆက်လက်မြှင့်တင်သွားမည် .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Time #Daily_News #YMG

#Local_News
Published_23 June 2023

ရှမ်းပြည်နယ်(တောင်ပိုင်း)၊ ရွာငံမြို့နယ်တွင် ဇွန်လ ၂၁ ရက်နေ့ နံနက်အစောပိုင်းက ၁၂ဘီးကားပေါ်၌ နွားချေးများဖုံးပြီး တရားမဝင် သယ်ဆောင်လာသည့် ငွေကျပ်သိန်း ၄၂၀၀ ကျော်တန်ဖိုးရှိ ထိန်းချုပ်ဓာတုပစ္စည်း(ကဖင်း) ၁ တန်ကျော် သိမ်းဆည်းရမိကြောင်း မြန်မာနိုင်ငံရဲတပ်ဖွဲ့မှ သိရသည်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ရှမ်းပြည်နယ်(တောင်ပိုင်း)၊ ရွာငံမြို့နယ်၊ မြို့ကြီးရှာဖွေစစ်ဆေးရေးစခန်းတွင် ဟံမြင့်မိုရ်ဘက်မှ ရွာငံဘက်သို့ အောင်ကိုကိုဦး မောင်းနှင်ပြီး ဟေမာန်သိန်းလိုက်ပါလာသည့် NISSAN ၁၂ ဘီး မော်တော်ယာဉ်ကို သတင်းအရရှာဖွေရာ အခုလိုဖမ်းဆီးရမိခဲ့ခြင်းဖြစ်ကြောင်း ရဲတပ်ဖွဲ့ရဲ့ ထုတ်ပြန်ချက်မှာဖော်ပြထားသည်။

အဆိုပါ တရားမဝင်သယ်ဆောင်လာသည့် ထိန်းချုပ်ဓာတုပစ္စည်း(ကဖင်း) ၁ တန်ကျော်၏ ဒေသကာလတန်ဖိုးမှာ မြန်မာငွေကျပ်သိန်း ၄၂၀၀ ကျော်တန်ဖိုးရှိပြီး စစ်ဆေး ဖော်ထုတ်ချက်အရ အဆိုပါ ထိန်းချုပ်ဓာတုပစ္စည်း(ကဖင်း)များအား မန္တလေးတိုင်းဒေသကြီးမှ ရှမ်းပြည်နယ်သို့ သယ်ဆောင်ခြင်းဖြစ်ကြောင်း သိရသည်။

ပြစ်မူကျူးလွန်သူများကို ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန် သူများအား ဆက်လက်စစ်ဆေးဖော်ထုတ်လျက်ရှိ​ကြောင်း မြန်မာနိုင်ငံရဲတပ်ဖွဲ့မှ ထုတ်ပြန်ထားသည်။

#ymg/ynzw #Local_News #သိန်း၄၂၀၀ကျော်တန်ဖိုးရှိဓာတုပစ္စည်း(ကဖင်း) ၁ တန်ကျော်ဖမ်းဆီး
#Yangon_Time

#Local_News
Published-23 June 2023

မလေးရှားနိုင်ငံတွင် အလုပ်လုပ်နေသူ မြန်မာအမျိုးသား ၁ ဦး လုပ်ငန်းခွင် စက်ရုံထဲတွင် အသက်ရှူကြပ်၍သေဆုံးခဲ့ကြောင်း နှလုံးလှပရဟိတလူငယ်များသွေးလှူရှင်အဖွဲ့ (ကွာလာလမ်ပူ-မလေးရှား)မှ သိရသည်။

ကွယ်လွန်သူအမျိုးသား (ဦးအောင်ဝင်း)မှာ အသက် ၅၁ နှစ်အရွယ်ရှိပြီး အဆုတ်ရောဂါဖြင့်အသက်ရှူကြပ်၍ ၎င်းလုပ်ကိုင်နေသည့်စက်ရုံထဲတွင် သေဆုံးခဲ့သဖြင့် ကွယ်လွန်သူ၏ မိတ်ဆွေများမှ နှလုံးလှပရဟိတအဖွဲ့ကို​ အကူအညီတောင်းခံလာခဲ့ကြောင်း သိရသည်။

"ကွယ်လွန်သူရဲ့နောက်ဆုံးခရီးကို ဇွန်လ ၂၂ရက် ကြာသပတေးနေ့ မွန်းလွဲ ၁နာရီက ကွာလာလမ်ပူ-ချဲရတ်သုသာန်ကို ​ကွယ်လွန်သူရဲ့ မိတ်ဆွေသူငယ်ချင်း‌တွေနဲ့ အတူ ကျွန်တော်တို့ နှလုံးလှအဖွဲ့က ကုသိုလ်ယူ ပို့ဆောင်သဂြိုလ်ပေးခဲ့ကြပါတယ်"ဟု နှလုံးလှပရဟိတအဖွဲ့မှ တာဝန်ရှိသူပြောကြားထားသည်။

ကွယ်လွန်သူသည် မြန်မာနိုင်ငံ၊ ရန်ကုန်တိုင်း​ဒေသကြီး၊ ဒဂုံမြို့နယ်၊ (၁၆ )ရပ်ကွက် မနော်ဟရီလမ်းမှဖြစ်ကြောင်းနှလုံးလှပရဟိတလူငယ်များသွေးလှူရှင်အဖွဲ့ ( ကွာလာလမ်ပူ-မလေးရှား )က သိရသည်။

#Local_News #လုပ်ငန်းခွင်စက်ရုံတွင် အသက်ရှူကြပ်၍သေဆုံး
#Yangon_Times/BM

#Local_News
Published_ 23 June 2023

ဆီးဂိမ်းပြိုင်ပွဲများ၌ ဗိုဗီနမ်အားကစားနည်းဖြင့် ရွှေတံဆိပ်ဆုများရရှိခဲ့ပြီး ဦးခေါင်း၌ ဝေဒနာခံစားနေရသည့် အားကစားမယ် မပပဝင်းအား ဆေးကုသမှု ခံယူနိုင်ရန် ဇွန် ၂၂ ရက် နံနက်ပိုင်းက ရန်ကုန်မြို့ရှိ တပ်မတော်ဆေးရုံ ခုတင် (၁၀၀၀) သို့ ပို့ဆောင်ပေးခဲ့ကြောင်း သိရပါတယ်။

မပပဝင်းသည် ဦးခေါင်းဝေဒနာကို ၂၀၁၄ ခုနှစ် (၃) ကြိမ်မြောက် အရှေ့တောင် အာရှဗိုဗီနမ်ပြိုင်ပွဲအတွက် စခန်းဝင်နေချိန်၌ စတင်ခံစားခဲ့ရခြင်းဖြစ်ကာ ပြိုင်ပွဲအပြီးတွင် အဆက်အသွယ်ပြတ်တောက်သွားခဲ့တာ ဖြစ်ပါတယ်။

ထို့ပြင် မပပဝင်း၏ ခင်ပွန်း ဦးသီဟမှာ ဒလမြို့နယ်ထွေအုပ်ရုံး၌ ယာဉ်မောင်း အဖြစ် တာဝန်ထမ်းဆောင်နေစဥ် အရက်အလွန်အကျွံသောက်သုံးပြီး ဇွန် ၁၇ ရက်ကကြိုးဆွဲချ သေဆုံးခဲ့ကာ မပပဝင်းမှာလည်း လက်ရှိအချိန်တွင် ဦးခေါင်းဝေဒနာ ခံစားနေရဆဲ ဖြစ်ကြောင်း သိရပါတယ်။

ထို့ကြောင့် ဇွန် ၂၂ ရက် နံနက်ပိုင်းတွင် ရန်ကုန်တိုင်း အားကစားနှင့် ကာယပညာ ဦးစီးဌာနမှတာဝန်ရှိသူများက မပပဝင်းထံသွားရောက်တွေ့ဆုံ၍ တပ်မတော်ဆေးရုံ ခုတင်(၁၀၀၀)၌ ဆေးကုသမှုခံယူနိုင်ရန် လူနာ တင်ကားဖြင့်သွားရောက် ခေါ်ဆောင်၍ ပို့ဆောင်ပေးခဲ့ကြကြောင်း သိရပါတယ်။

မပပဝင်းသည် ၂၀၁၃ ခုနှစ် မြန်မာနိုင်ငံတွင် အိမ်ရှင်နိုင်ငံအဖြစ် လက်ခံကျင်းပခဲ့တဲ့ (၂၇) ကြိမ်မြောက် အရှေ့တောင်အာရှအားကစားပြိုင်ပွဲ၏ ဗိုဗီနမ်အားကစားနည်းဖြင့် နှစ်ယောက်တွဲ(အပြ) အတွဲလိုက်ပြိုင်ပွဲတွင် ရွှေတံဆိပ်ဆု၊ ၂၀၁၃ ခုနှစ် (၂)ကြိမ်မြောက် အရှေ့တောင်အာရှဗိုဗီနမ်ပြိုင်ပွဲတွင် ကြေးတံဆိပ်(၁)ခု၊ အရှေ့တောင်အာရှအကြို အားကစားပြိုင်ပွဲတွင် ရွှေတံဆိပ်(၁)ခုနှင့် ၂၀၁၄ ခုနှစ် (၃)ကြိမ်မြောက် အရှေ့တောင်အာရှ ဗိုဗီနမ်ပြိုင်ပွဲတွင် ရွှေတံဆိပ်(၁)ခုတို့ရရှိခဲ့သူ ဖြစ်ပါတယ်။

#ygm_mnn #Local_News #ဆီးဂိမ်းရွှေတံဆိပ်ဆုရှင် မပပဝင်း #ဆေးကုသမှုခံယူနိုင်ရန်ဆေးရုံသို့ပို့ဆောင်
#Yangon_Time

#World_Health
Published 23 June 2023

နှလုံးနဲ့ ဦးနှောက်ကျန်းမာရေးအပေါ် အရက်ရဲ့ဆိုးကျိုးသက်ရောက်မှုတွေအကြောင်း လေ့လာချက်အများအပြား တွေ့ရှိထားပါတယ်။

ဒါ့အပြင် အလွန်အကျွံသောက်သုံးခြင်းဖြင့် ကြွက်သားများ အလျင်အမြန်ကျုံ့သွားနိုင်တယ်လို့လည်း အိစ်အန်ဂလီယာတက္ကသိုလ်က လေ့လာတွေ့ရှိထားပါတယ်။

အရက်အများအပြားသောက်သုံးခြင်းကလည်း အရိုးငြမ်းကြွက်သားကို ထိခိုက်စေပြီး အရွယ်မတိုင်ခင်ရင့်ရော်ခြင်း ပိုဖြစ်စေနိုင်ပါတယ်။

ယူကေရှိ လူသန်းတဝက်ထံမှ ကျန်းမာရေးနဲ့ နေထိုင်မှုပုံစံအချက်အလက်များကို စုဆောင်းကာ အသက် ၃၇ နှစ်မှ ၇၃ နှစ်ကြား လူပေါင်း ၂ သိန်းနီးပါးကို လေ့လာခဲ့ပါတယ်။

သူတို့ရဲ့ခန္ဓာကိုယ်အချိုးအစား၊ အခြားအကြောင်းအရာများနဲ့ ယှဉ်ကြည့်တဲ့အခါ အနည်းအကျဉ်းသာသောက်တတ်သူတွေထက်စာရင် အရက်အလွန်အကျွံသောက်သူတွေက ကြွက်သားပမာဏနည်းပါးသွားတာ တွေ့ရှိရတယ်လို့ နိုဝစ်ချ်ဆေးတက္ကသိုလ်မှ ဒေါက်တာ'ဂျိန်းစကင်နာ'က ပြောကြားခဲ့ပါတယ်။

တစ်နေ့ကို ၁၀ ခွက်နဲ့အထက် သောက်သုံးသူတွေမှာ ဒီလိုပြဿနာမျိုး ဖြစ်လာကြောင်း တွေ့ခဲ့ကြပါတယ်။

အရက်သောက်သုံးခြင်းနဲ့ ကြွက်သားထုထည်တို့နဲ့ပတ်သက်ပြီး လူတွေမှာတစ်ချိန်တည်းမှာပဲ တိုင်းတာစမ်းသပ်ရာမှာ တိုက်ရိုက်ဆက်စပ်နေတာမျိုးတော့ သေချာမသိရဘူးလို့ ဒေါက်တာကဆိုပါတယ်။

အသက်ကြီးလာတာနဲ့အမျှ ကြွက်သားဆုံးရှုံးလာခြင်းကြောင့် အားနည်းယိုင်ယဲ့လာခြင်းက အသက်အရွယ်အလတ်ပိုင်းနဲ့ အကြီးပိုင်းတွေမှာ အရက်အလွန်အကျွံသောက်သုံးခြင်းကို ရှောင်ရှားဖို့ နောက်ထပ်အကြောင်းအရင်း ဖြစ်လာပါတယ်။

#Source: India Today #World_Health #အရက်အလွန်အကျွံသောက်ခြင်းသည်ကြွက်သားများကိုလျင်မြန်စွာကျုံ့သွားစေ #Yangon_Times

#World_News
Published 23 June 2023

အမေရိကန်သမ္မတ'ဂျိုးဘိုင်ဒင်'နဲ့အတူ ကြာသပတေးနေ့က သတင်းစာရှင်းလင်းပွဲပြုလုပ်ရာမှာ အိန္ဒိယဝန်ကြီးချုပ်'နာရန်ဒရာမိုဒီ'က ယင်းအစိုးရလက်အောက်မှာ လူနည်းစုအပေါ် ခွဲခြားဆက်ဆံမှုများမရှိကြောင်း ငြင်းဆိုလိုက်ပါတယ်။

ဒါပေမဲ့ လူ့အခွင့်အရေးအဖွဲ့များနဲ့ နိုင်ငံခြားရေးဌာနတို့ကတော့ ဒီလိုခွဲခြားမှုတွေရှိနေတယ်လို့ တိုင်ကြားထားကြပါတယ်။

ဘိုင်ဒင်က အိမ်ဖြူတော်မှာ မိုဒီနဲ့တွေ့ဆုံပြောကြားစဉ် လူ့အခွင့်အရေးနဲ့ အခြားဒီမိုကရက်တစ်အကြောင်းတွေ ဆွေးနွေးခဲ့တယ်လို့ ဆိုပါတယ်။

အိန္ဒိယနိုင်ငံရှိ မွတ်ဆလင်တွေနဲ့ အခြားလူနည်းစုများရဲ့ အခွင့်အရေးနဲ့ လွတ်လပ်စွာပြောဆိုခွင့်အကြောင်း မြှင့်တင်ဖို့အတွက် မိုဒီအနေနဲ့ ဘယ်လိုအတိုင်းအတာတွေ ပြုလုပ်ရန်ဆန္ဒရှိသလဲလို့ ရှင်းလင်းပွဲမှာမေးမြန်းရာ မိုဒီက မြှင့်တင်ဆောင်ရွက်ရန် မလိုအပ်ကြောင်း ပြောကြားခဲ့ပါတယ်။

"ကျွန်ုပ်တို့ရဲ့အစိုးရနဲ့ ဖွဲ့စည်းပုံအခြေခံဥပဒေအရ ဒီမိုကရေစီဆောင်ကျဉ်းနိုင်တယ်ဆိုတာကို သက်သေပြခဲ့ပြီးပါပြီ။ မျိုးရိုးဇာတ်၊ ဘာသာရေးကိုးကွယ်မှု၊ ကျားမခွဲခြားဆက်ဆံတာတွေ မရှိပါဘူး" လို့ မိုဒီက သတင်းထောက်တွေကို ပြောကြားခဲ့ပါတယ်။

လူ့အခွင့်အရေးနဲ့ ဘာသာရေးလွတ်လပ်ပိုင်ခွင့် တိုင်ကြားချက်တွေထဲမှာတော့ မွတ်ဆလင်၊ ဟိန္ဒူဒါလစ်၊ ခရစ်ယာန်နဲ့ အခြားဘာသာရေးလူနည်းစုများအပေါ် ဆက်ဆံမှုများအပေါ် နိုင်ငံခြားရေးဌာနက စိုးရိမ်နေရကြောင်း ဖော်ပြထားတဲ့အပြင် သတင်းထောက်များကို ဖိနှိပ်ထားခြင်းကိုလည်း ဖော်ပြထားပါတယ်။

ဘိုင်ဒင်ရဲ့ ဒီမိုကရက်တစ်ပါတီမှ ဥပဒေပြုအမတ်များနဲ့ လွှတ်တော်အမတ်များက ဟိန္ဒူအမျိုးသားရေးဝါဒီ BJP ပါတီ ၂၀၁၄ ခုနှစ်ကတည်းက အာဏာရခဲ့တဲ့ မိုဒီကို ထိုကိစ္စနဲ့ပတ်သက်ပြီး လူသိရှင်ကြားတင်ပြရန် တိုက်တွန်းလိုက်ပါတယ်။

ဆန္ဒပြသူဒါဇင်ခန့်က ကြာသပတေးနေ့မှာ အိမ်ဖြူတော်အနီး စုရုံးခဲ့ကြပါတယ်။

"သတင်းစာရှင်းလင်းပွဲအတွင်း ဘာလို့သူ့ကိုဒီမေးခွန်းဦးဆုံးမေးရလဲဆိုတာကို မိုဒီအနေဖြင့် စဉ်းစားသင့်ပါတယ်။

အိန္ဒိယမှာ အခွင့်အရေးချိုးဖောက်မှုတွေရှိတယ်ဆိုတာ အားလုံးသိပါတယ်" လို့ အိန္ဒိယအမေရိကန်မွတ်ဆလင်ကောင်စီရှိ ဆန္ဒပြသူ'အာဂျစ်ဆာဟီ'က ပြောကြားသွားပါတယ်။

သူ့အစိုးရလက်အောက်မှာ ဘာသာရေးခွဲခြားမှုမရှိဘူးဆိုတာ မိုဒီလုံးဝလိမ်ညာနေတာဖြစ်ကြောင်း၊ ဘာသာရေးလူနည်းစုများအတွက် အိန္ဒိယဟာ ဒုက္ခတွင်းကြီးဖြစ်နေကြောင်း အိန္ဒိယလူနည်းစုများအပေါ် တိုက်ခိုက်မှုများအား စောင့်ကြည့်အစီရင်နေသည့် ဟိန္ဒူဗာအဖွဲ့တည်ထောင်သူ'ရာကစ်ဟာမိဒ်နိတ်ခ်'က ပြောသွားပါတယ်။

အမေရိကန်အနေနဲ့ တရုတ်ကိုတန်ပြန်ရန် အိန္ဒိယက အရေးကြီးတဲ့အခြေအနေဖြစ်နေပြီး နှစ်နိုင်ငံကြား စီးပွားရေးဆက်ဆံမှုကြောင့် ကမ္ဘာ့ဒီမိုကရေစီနိုင်ငံကြီးရဲ့ လူ့အခွင့်အရေးတွေကို ဝေဖန်ဖို့ခက်ခဲနေပါတယ်။

အိန္ဒိယဟာ ၂၀၁၄ ခုနှစ်က ကမ္ဘာ့လွတ်လပ်ပိုင်ခွင့်ညွှန်းကိန်းမှာ အဆင့် ၁၄၀ ရှိရာကနေ ယခုနှစ်မှာ အနိမ့်ဆုံးအဖြစ် ၁၆၁ သို့ကျဆင်းသွားခဲ့ပြီး ၅ နှစ်တာကာလအတွင်း ကမ္ဘာလုံးဆိုင်ရာအင်တာနက်ပိတ်ပင်မှု အများဆုံးနိုင်ငံဖြစ်နေပါတယ်။

လူများစုဟိန္ဒူလူမျိုးများရှိရာ အိန္ဒိယမှာ မွတ်ဆလင်လူနည်းစုတွေကို ကာကွယ်ခြင်းက အရေးပေးဖော်ပြရမယ့်အကြောင်းအရာဖြစ်နေကြောင်း အမေရိကန်သမ္မတဟောင်း'ဘာရက်အိုဘားမား'က CNN နဲ့အင်တာဗျူးမှာ ပြောကြားခဲ့ပါတယ်။

Source: Reuters #World_News #ဘာသာရေးခွဲခြားဆက်ဆံမှုများရှိနေ
#YMG #Yangon_Time

#World_Science
Published 23 June 2023

ရာသီဥတုဖောက်ပြန်ခြင်းက လူသားတွေမှာသာ အခက်အခဲပြဿနာတွေ ပေါ်ပေါက်တာမဟုတ်ဘဲ ခွေးတွေဟာလည်း အပူချိန်မြင့်မားခြင်းဒဏ်ကို ခံစားနေရတာကြောင့် သုတေသီများက စိုးရိမ်ပူပန်နေကြပါတယ်။

ကမ္ဘာကြီးဟာ ပူနွေးလာပြီး ရာသီဥတုဖောက်ပြန်နေတာကြောင့် ခွေးကိုက်မှုအကြောင်းအရာများနဲ့ အပူချိန်မြင့်တက်လာခြင်းတို့ကြား ဆက်စပ်မှုကို ဟားဗတ်ဒ်တက္ကသိုလ်က လေ့လာဖော်ပြလိုက်ပါတယ်။

ဘေးပတ်ဝန်းကျင် အခြေအနေများကလည်း နေ့စဉ်ခွေးကိုက်မှုနှုန်းကို သက်ရောက်နေသလားဆိုတာကိုလည်း လေ့လာခဲ့ကြကာ Scientific Reports ဂျာနယ်မှာ ဖော်ပြခဲ့ပါတယ်။

"အိုဇုန်းပမာဏ၊ အပူချိန်မြင့်လာတာနဲ့အမျှ လူတွေကို ခွေးကိုက်မှုနှုန်းက မြင့်တက်လာပြီး ခရမ်းလွန်ရောင်ခြည်မြင့်မားခြင်းနဲ့ ခွေးကိုက်မှုနှုန်းမြင့်မားခြင်းတို့ကြား ဆက်စပ်မှုကိုလည်း လေ့လာခဲ့ပါတယ်" လို့ ရှင်းပြထားပါတယ်။

ပိုင်နက်ကာကွယ်ခြင်း၊ ရင်းမြစ်အကန့်အသတ်ဖြင့်သာရရှိခြင်း၊ မိတ်လိုက်ခြင်းအတွက်ယှဉ်ပြိုင်ရခြင်း၊ အဖွဲ့ဝင်များကိုကာကွယ်လိုခြင်းစတဲ့ အခြေအနေများကြား ရန်လိုတတ်တဲ့ အပြုအမူတွေ မကြာခဏမြင်တွေ့ရပါတယ်လို့ ဖော်ပြထားပါတယ်။

အပူချိန်မြင့်မားခြင်းကြောင့် လူသားများကြား ရန်လိုမှုတိုးများစေသလို မျောက်၊ ကြွက်တို့မှာလည်း အလားတူအပြုအမူမျိုး မြင်တွေ့ခဲ့ကြပါတယ်။

၂၀၀၉ ခုနှစ်မှ ၂၀၁၈ ခုနှစ်အတွင်း အမေရိကန်မြို့ကြီး ၈ မြို့ရှိ ခွေးကိုက်မှုများကို လေ့လာခဲ့ကြပြီး လူသားတွေကိုကိုက်ခဲ့တဲ့ဖြစ်ရပ် ၆၉,၅၂၅ ခုကို သုံးသပ်ခဲ့ကြပါတယ်။

ပူပြင်းတဲ့နေ့တွေမှာ ခွေးကိုက်မှုပိုမိုအဖြစ်များပြီး အားလပ်ရက်တွေနဲ့ မိုးရွာတဲ့နေ့တွေမှာတော့ လျော့နည်းနေပါတယ်။

ရန်လိုတာဟာ ခရမ်းလွန်ရောင်ခြည် ထိတွေ့မှုများပြီး စတီးရွိုက်ပမာဏမြင့်မားတာနဲ့ ဆက်စပ်နေပါတယ်။

ကောက်နုတ်ချက်ကတော့ ကြွက်တွေနဲ့ လူသားတွေမှာ သုတေသနပြုလုပ်ခဲ့ရာကနေ ဖြစ်ပါတယ်။

အနံ့ပြင်းတဲ့အိုဇုန်းက အလွန်ဓာတ်ပြုမှုဖြစ်ပွားကာ အသက်ရှူလမ်းကြောင်းရှိ ဓာတ်တိုးဖိစီးမှုကို ဖြစ်ပေါ်စေပြီး တိရိစ္ဆာန်တွေရှိ အဆုတ်လုပ်ဆောင်ချက်တွေကို ပြောင်းလဲစေတယ်လို့ မှတ်ချက်ပြုခဲ့ပါတယ်။

အဆုတ်ရောင်ရမ်းပြီးတော့ ပြင်ပအမှုန်တွေကနေ ဖိစီးတုန့်ပြန်မှုကြောင့် အပြုအမူကိုသက်ရောက်စေပြီး ဦးနှောက်လုပ်ဆောင်ချက်အပေါ်လည်း တိုက်ရိုက်နေတယ်လို့ သုတေသီများရှင်းပြသွားပါတယ်။

ကမ္ဘာကြီးက အပူချိန်ဆက်လက်မြင့်တက်နေတာကြောင့် တိရိစ္ဆာန်တွေအပေါ် အရေးတကြီးဂရုစိုက်ဖို့ လိုအပ်နေပြီဆိုတာကို ဒီလေ့လာချက်က ဖော်ပြနေပါတယ်။

Source: India Today #World_Science #ခွေးများရန်လိုသည့်အပြုအမူတို့ကြားဆက်စပ်မှု
#YMG #Yangon_Time

အာဖဂန်စားဖိုမှူးမှ လက်ဖက်ရည်အိုးဖြင့်ချက်ပြုတ်သည့် သိုးသားစွပ်ပြုတ်ဟင်းလျာအား စိတ်အားထက်သန်စွာချက်ပြုတ်ရောင်းချလျက်ရှိ

အာဖဂန်အချက်အပြုတ်တစ်ခုဖြစ်တဲ့ ချိုင်နက်ဟင်းလျာကို ကျွမ်းကျွမ်းကျင်ကျင်ချက်ပြုတ်နိုင်တဲ့ နောက်ဆုံးကျန်ရှိစားဖိုမှူးတွေထဲကတစ်ဦးက ကာဘူးလ်စားသောက်ဆိုင်ထဲမှာ သိုးသားအတုံးများ၊ အဆီများကို ရွှံ့စေးမီးဖိုပေါ်ရှိ လက်ဖက်ရည်အိုးငယ်ခန့် ၂၀၀ ထဲမှာထည့်ပြီး ချက်ပြုတ်နေပါတယ်။

#World_Business #လက်ဖက်ရည်အိုးဖြင့်ချက်ပြုတ်သည့်သိုးသားစွပ်ပြုတ်ဟင်းလျာ
#Published 22 June 2023
#Yangon_Time

တရားမဝင် ကျားဖောင် ငါးဖမ်းလုပ်ငန်းများ များပြားလာ၊ တိုင်းဒေသကြီးအဆင့် ကွင်းဆင်းစစ်ဆေးမှုတွေ ပြုလုပ်နေ

နိုင်ငံတော်ကို တရားဝင် အခွန်ဆောင် လိုင်စင်ရယူပြီး လုပ်ကိုင်ဆောင်ရွက်ခွင့်ရတဲ့ ကျားဖောင်လုပ်ငန်းဟာ ပျှမ်းမျှ သုံးထောင်ခန့်သာရှိပေမယ့် အမှန်တကယ် ပင်လယ်ပြင်အတွင်းမှာတော့ တရားမဝင် ကျားဖောင်နဲ့ ငါးဖမ်းနေတာဟာ ၅၀၀၀ နဲ့ ၇၀၀၀ အကြား ရှိနေတယ်လို့လည်း ဆိုပါတယ်။
#Local_News
#Published_ 22 June 2023
#Ymg/myn
#Yangon_Times

#Local_News
Published _22 June 2023

ရန်ကုန်တိုင်းဒေသကြီး၊ ကျောက်တံတားမြို့နယ်၊ ဆိပ်ကမ်းသာလမ်း၌ ယနေ့ဇွန်လ ၂၂ ရက် နံနက်က သေဆုံးနေသော အိမ်ခြေမဲ့တစ်ဦး၏ ရုပ်အလောင်းကိုတွေ့ရှိခဲ့ရကြောင်း သိရသည်။

"ရပ်ကွက်ကအကြောင်းကြားတာ၊ ဆိပ်ကမ်းသာလမ်း အပေါ်မှာ တိုက်အမှတ် ၂၀၅ ရဲ့ လှေကားမှာတွေ့တာ။ မျက်နှာမှာ ဒဏ်ရာနည်းနည်းရထားတယ်။ သူက အသက် ၄၀ ကျော် နီးပါးရှိပြီ။ အိမ်ခြေမဲ့ပါ"ဟု ရပ်ကွက်နေသူတစ်ဦးပြောသည်။

ရုပ်အလောင်းကို လင်းလက်လူမှုကူညီရေးအသင်းကသယ်ယူ၍ ရန်ကုန်ဆေးရုံကြီးသို့ ပို့ဆောင်ထားကြောင်းသိရသည်။

#ymg/ynzw #အိမ်ခြေမဲ့အမျိုးသားတစ်ဦးသေဆုံးနေ
#Yangon_Times/BM

ငါးပိ အဓိကစားသုံးသည့်ဒေသများက မှာယူမှုနည်းပါးနေတာကြောင့် ငါးပိရောင်းအားကျဆင်း

အဓိစားသုံးတဲ့မန္တလေး၊ စစ်ကိုင်းတိုင်းအထက်ပိုင်းက မှာယူမှုမရှိတော့တဲ့အတွက် အရောင်းအ၀ယ်နည်းပါးနေတာပါ (((())))ဦးထွန်းစိန်
ငါးပိ၊ ငါးခြောက်၊ ငံပြာရည်ထုတ်လုပ်ရောင်းဝယ်သူများ အသင်းအတွင်းရေးမှူး

#Local_News
#Published_ 22 June 2023
#ymg/ynzw
#Yangon_Time

မြိုင်ကြီးငူစစ်ဘေးရှောင်စခန်းအတွင်း စစ်ရှောင်ဉီးရေ ၅၀၀၀ ခန့်အထိရှိနေ၊ စားနပ်ရိက္ခာများ အရေးပေါ်လိုအပ်နေ

စစ်ရှောင်ဉီး ၄၀၀၀ ကျော်အတွက် စားနပ်ရိက္ခာဟာ အဓိက အရေးပေါ်လိုအပ်ချက်တစ်ခုဖြစ်တယ်လို့ အေးလင်းမြတ်ရှင် စစ်ရှောင်စခန်း(စခန်းတာဝန်ခံ) ကိုထွန်းမြိုင်ကပြောပါတယ်။

#Local_News #စစ်ရှောင်ဦးရေဟာယခင်နှစ်ထက်ယခုနှစ်လျော့နည်းလာ
#Published_ 22 June 2023
#Yangon_Time