Published 30 April 2022

ရုရှားရဲ့ နိုဗာတက်ခ်ကုမ္ပဏီက ပိုလန်မြို့ဒါဇင်ခန့်ကို ဓာတ်ငွေ့ထောက်ပံ့မှု ဗုဒ္ဓဟူးနေ့က စပြီး ရပ်ဆိုင်းလိုက်ပါတယ်။ ပိုလန်အစိုးရက ရုရှားအပေါ်ကန့်သတ်ပိတ်ဆို့မှုတွေလုပ်တာကို ရုရှားက ပြန်လည်တုန့်ပြန်အရေးယူမှုအနေနှင့် ယခုလို  ဓာတ်ငွေ့တွေရပ်တန့်ခဲ့တာပါ။

အဲသလို ရပ်တန့်မှုကြောင့် ပိုလန်က အဲဒီမြို့ရဲ့ဒေသခံတွေဟာ သူတို့ရဲ့ နေ့စဉ်ပုံမှန်ဘဝတွေအပေါ် ပြတ်တောက်မှု ဖြစ်စေ တယ်လို့ ညည်းညူနေကြပါတယ်။

ပိုလန်နိုင်ငံ အလယ်ပိုင်းက ဇာဂိုရိုးလ်မှာရှိတဲ့ လူနေအဆောက်အအုံတွေ၊မူကြိုကျောင်းတွေ၊ စာကြည့်တိုက်တွေနှင့် အစိုးရရုံးတွေမှာ သဘာဝဓာတ်ငွေ့တွေကို ဖြတ်တောက်ပစ်ခဲ့ပါတယ်။

Source CMG

#WorldBoxing
Published 30 April 2022

ကိုယ်ခံသိုင်းပညာထွန်းကားရာ ထိုင်းနိုင်ငံရဲ့ ဘန်ကောက်မြို့တော်က ကုန်းတံတားတစ်ခုအောက်မှာ တကယ့်ဘဝ မြေအောက်လက်ဝှေ့ပွဲတွေ ပုံမှန်ကျင်းပလျက်ရှိပါတယ်။

#Yangon_Media_Group

Published 30 April 2022

ရုရှားသမ္မတဗလာဒီမာပူတင်ကို ကမ္ဘာကြီးက ဆက်ဆံပြောဆိုနိုင်မှာမဟုတ်ဘူးလို့ အမေရိကန်ကပြောပါတယ်။ အင်ဒိုနီးရှားက ပူတင်နှင့် ယူကရိန်းခေါင်းဆောင် ဗိုလိုဒီမာဇီလင်စကီးကို နိုဝင်ဘာမှာကျင်းပမယ့် G20ထိပ်သီးအစည်းအဝေးကို ဖိတ်ကြားထားတယ်လို့ပြောကြားပြီးနောက် အိမ်ဖြူတော်က ယခုလိုတုန့်ပြန်တာဖြစ်ပါတယ်။

“ G20 အစည်းအဝေးကို သမ္မတပူတင်တက်ရောက်မှာကို သူ့အနေနှင့်ဆန့်ကျင်တယ်ဆိုတာကို သမ္မတ(ဘိုင်ဒင်)က လူသိရှင်ကြား ပြောကြားခဲ့ပြီးပါပြီ။ ယူကရိန်းတွေတက်မှာကို ဒါမှမဟုတ် G20 တက်ရောက်ဖို့ ဖိတ်ကြားတာကို  ကျွန်မတို့ကြိုဆိုပါတယ်” လို့ အိမ်ဖြူတော် သတင်းထုတ်ပြန်ရေးမှူး ဂျနီဖာဆက်ကီက သတင်းထောက်တွေကိုပြောပါတယ်။

Source AFP

#DailyNews
Published -30 April 2022

၁။ အခုရက်ပိုင်းအတွင်း နေကြတ်၊လကြတ်ခြင်းများ ဖြစ်ပေါ်မည်

၂။ ကလေးမြို့တွင် ချင်းစစ်ဘေးရှောင်ပြည်သူ ၂၀၀ ခန့်ခိုလှုံနေကြရပြီး စားနပ်ရိက္ခာလိုအပ်မှုရှိ နေ

၃။ မိုးလေ၀သ သတင်း

၄။ ဘန်ကောက်မြေအောက်လက်ဝှေ့ပွဲ ဘဝအစစ်အမှန်သရုပ်ပြနေ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#WorldBusiness
Published 30 April 2022

တွစ်တာလုပ်ငန်းစဉ်များအကြောင်းကို အီလွန်မတ်ဝေဖန်ခဲ့တာနဲ့ပတ်သက်ပြီး ဝန်ထမ်းအမြောက်အများ ထွက်ခွာသွားနိုင်တဲ့အခြေအနေနဲ့ ဝန်ထမ်းများမကျေမနပ်ဖြစ်ခြင်းတို့အပေါ် ကုမ္ပဏီစီမံခန့်ခွဲသူများအနေနဲ့ ဘယ်လိုကိုင်တွယ်ဖြေရှင်းရမလဲဆိုတာကို သောကြာနေ့ကကုမ္ပဏီတစ်ခုလုံးအစည်းအဝေးပြုလုပ်ခဲ့ရာ အမှုဆောင်အရာရှိချုပ်'ပါရက်ဂ်အာဂရာဝယ်လ်'အနေနဲ့ ဝန်ထမ်းတွေရဲ့မကျေနပ်မှုကို ဖြေရှင်းဖို့ကြိုးပမ်းခဲ့ရပါတယ်။

Tesla အမှုဆောင်ချုပ်'အီလွန်မတ်'က တွစ်တာလူမှုကွန်ရက်ကုမ္ပဏီကို ဒေါ်လာ ၄၄ ဘီလီယံဖြင့်ဝယ်ယူဖို့ သဘောတူခဲ့အပြီးမှာ တွစ်တာ app ထဲက အကြောင်းအရာစံသတ်မှတ်ချက်တွေအကြောင်းနဲ့ အချက်အလက်လုံခြုံရေးဆိုင်ရာ ပေါ်လစီမူဝါဒချမှတ်ရေး ထိပ်သီးအမှုဆောင်အရာရှိတစ်ဦးတို့ကို ထပ်ခါထပ်ခါ ဝေဖန်တိုက်ခိုက်ခဲ့ပါတယ်။

အဲဒီလိုဝေဖန်မှုအပြီးမှာ ကုမ္ပဏီအနေနဲ့ အစည်းအဝေးခေါ်ယူပြုလုပ်ခဲ့တာဖြစ်ပါတယ်။

အဆိုပါအစည်းအဝေးပွဲကြီးကို ရိုက်တာသတင်းဌာနကလည်းတက်ရောက်ခဲ့ပြီး အမှုဆောင်အရာရှိများရဲ့ပြောကြားချက်အရ ဝန်ထမ်းအင်အားဆုတ်ယုတ်လာမှုကို ကုမ္ပဏီက နေ့စဉ်အကဲဖြတ်လေ့လာသွားမှာဖြစ်ကြောင်း၊ ဒါပေမဲ့ ကုမ္ပဏီကို'မတ်'ဝယ်ယူခြင်းက ဝန်ထမ်းဆက်လက်ထိန်းသိမ်းရေးကို ဘယ်လိုသက်ရောက်မလဲဆိုတာကိုတော့ ပြောပြလို့မရသေးကြောင်း သိရှိရပါတယ်။

'မတ်က ကုမ္ပဏီဘုတ်အဖွဲ့နဲ့ အမှုဆောင်များရဲ့လစာကို အများအပြားလျှော့ချသွားဖို့ စီစဉ်နေပေမယ့် အတိအကျတော့ မသိရှိရသေးပါဘူး။

'အီလွန်မက်စ်'ကတွစ်တာပိုင်ရှင်အဖြစ် မသတ်မှတ်ရသေးခင်အထိ အလုပ်အကိုင်လျှော့ချဖို့ကိစ္စတွေကို ပြုလုပ်သေးမှာမဟုတ်ဘူးလို့ သတင်းအရင်းအမြစ်တစ်ခုက ဖော်ပြထားပါတယ်။

"ကုမ္ပဏီရှယ်ယာရှင်တွေနဲ့ သစ္စာစောင့်သိရမယ့် အကြောင်းတွေကိုကြားရတာ စိတ်ကုန်လာပါပြီ။ အရောင်းအဝယ်သဘောတူညီမှုအပြီးသတ်ပြီးသွားရင် ဝန်ထမ်းအများအပြားအလုပ်ဆုံးရှုံးရနိုင်တဲ့အခြေအနေကို ဘယ်လိုသဘောရပါသလဲ" လို့ တွစ်တာဝန်ထမ်းတစ်ဦးက အစည်းအဝေးပွဲမှာ အသံကျယ်ကျယ်နဲ့မေးမြန်းခဲ့ပါတယ်။

'အာဂရာဝယ်လ်'က တွစ်တာအနေနဲ့ ဝန်ထမ်းတွေကိုအမြဲတမ်းဂရုစိုက်ပြီး ဆက်လက်ပြီးလည်းအလေးထားသွားမှာဖြစ်တယ်လို့ ဖြေကြားခဲ့ပါတယ်။

"တွစ်တာအဖွဲ့အစည်းကြီးက တစ်ကမ္ဘာလုံးနဲ့ သုံးစွဲသူတွေအပေါ်သက်ရောက်မှုတွေကို ဆက်လက်အလေးထားသွားမှာဖြစ်ပါတယ်"

တွစ်တာကို 'အီလွန်မတ်'ဝယ်ယူဖို့ စိတ်ဝင်စားနေကြောင်း သတင်းမထွက်ခင်ကတည်းက အခြေအနေနဲ့ယှဉ်ရင် ဝန်ထမ်းအင်အားဆုတ်ယုတ်လာမှုပြောင်းလဲသွားခြင်းမရှိဘူးလို့ အမှုဆောင်အရာရှိများကပြောပြပါတယ်။

တွစ်တာမှ ဥပဒေရေးရာထိပ်သီးပုဂ္ဂိုလ်'ဗီဂျာယာဂက်ဒီ'က တွစ်တာမှာလုပ်သက်ရင့်နေသူဖြစ်ပြီး ဆီလီကွန်ဗယ်လီဒေသတဝိုက်မှာ လေးစားခံရသူတစ်ဦးဖြစ်ပါတယ်။

အခုရက်ပိုင်းတွေမှာ 'မက်စ်'က အဆိုပါအမျိုးသမီးကိုပစ်မှတ်ထားကာ တွစ်တာကနေဝေဖန်တိုက်ခိုက်ခဲ့တာဖြစ်ပါတယ်။

ဝန်ထမ်းတွေက 'မတ်'ရဲ့အပြုအမူကြောင့် တွစ်တာလုပ်ငန်းကြီးမတည်မငြိမ်ဖြစ်မှာကို စိုးရိမ်နေကြပြီး နောက်အပတ်အတွင်း နယူးယော့ခ်မြို့မှာကြော်ငြာကိစ္စပြုလုပ်ဖို့ရှိနေရာ စီးပွားရေးထိခိုက်လာမှာကို စိုးရိမ်နေကြပါတယ်။

အမှုဆောင်မဟုတ်တဲ့ဝန်ထမ်းတွေအတွက် လျော်ကြေးကိုလည်း ကန့်သတ်ထားတာကိုသတိထားမိကြောင်း ဝန်ထမ်းတစ်ဦးက ရိုက်တာကိုပြောပြခဲ့ပါတယ်။

အစည်းအဝေးပွဲအတွင်း 'အာဂရာဝယ်လ်'က ခေါင်းဆောင်အသစ်လက်ထက်မှာ အပြောင်းအလဲဖြစ်ဖို့ မျှော်လင့်ထားသင့်ကြောင်း၊ လာမယ့်နှစ်တွေမှာ ကုမ္ပဏီကပိုမိုကောင်းမွန်လာနိုင်ကြောင်း ဝန်ထမ်းတွေကိုအကြံပြုခဲ့ပါတယ်။

Source: Reuter
#Yangon_Media_Group

#WorldHealth
Published 30 April 2022

အက်စ်ပရင်ဆေးကို နေ့စဉ်သောက်သုံးနေရတဲ့ အသက် ၆၀ အထက်လူကြီးတွေကို ဆရာဝန်တွေက သတိပေးလိုက်ပါတယ်။

နှလုံးရောဂါနဲ့ နှလုံးသွေးကြောပိတ်ခြင်းအန္တရာယ်ကို ကာကွယ်ဖို့ အက်စ်ပရင်ကို နေ့စဉ်သောက်ကြတာက ထုံးတမ်းတစ်ခုလိုဖြစ်နေပါပြီ။

ဒါပေမဲ့ အမေရိကန်မှ ထိပ်သီးဆေးပညာရှင်အဖွဲ့က အက်စ်ပရင်သောက်လေ့ရှိတဲ့အကျင့်ကို ပြင်ဆင်ဖို့ အကြံပြုနေကြပါတယ်။

အက်စ်ပရင်က ခန္ဓာကိုယ်တွင်းသွေးကြောပေါက်ခြင်းဖြစ်နိုင်ကြောင်း သတိပေးလိုက်ပါတယ်။
နှလုံးရောဂါမျိုးရိုးလိုက်တဲ့ အသက် ၄၀ မှ ၅၉ နှစ်ကြားလူမျိုးတွေသာ အက်စ်ပရင်ကိုနေ့စဉ်သောက်သုံးသင့်ကြောင်း အမေရိကန်ရောဂါတိုက်ဖျက်ကာကွယ်ရေးအဖွဲ့(USPSTF)က ဆိုပါတယ်။

အသက် ၇၅ နှစ်ကျော်တဲ့လူကြီးတွေမှာတော့ ဆေးရဲ့အာနိသင်အကျိုးက အနည်းငယ်သာသက်ရောက်နိုင်တာမို့လို့ မသောက်သုံးသင့်တော့ပါဘူး။

ကိုယ်တွင်းသွေးစိမ့်ထွက်ခြင်းက အသက်ကြီးလာတာနဲ့အမျှ ဖြစ်နိုင်ချေများလာတာကြောင့် အသက်ကြီးသူတွေမှာ အက်စ်ပရင်ရဲ့သက်ရောက်မှုက ဆိုးကျိုးသာပိုမိုဖြစ်ပေါ်စေနိုင်ပါတယ်။
ဒီလိုညွှန်ကြားချက်က အခုမှအက်စ်ပရင်စတင်သုံးစွဲသူတွေအတွက်သာ ရည်ညွှန်းတာဖြစ်ပါတယ်။

သုံးစွဲနေကျသူတွေကတော့ ဆရာဝန်များနဲ့မတိုင်ပင်ဘဲ သုံးစွဲခြင်းကိုမရပ်တန့်သင့်ပါဘူး။
၂၀၁၉ ခုနှစ်က ယူကေလေ့လာမှုတစ်ခုမှာ အက်စ်ပရင်က ကိုယ်တွင်းသွေးကြောပေါက်ခြင်းအန္တရာယ် ၅၀ ရာခိုင်နှုန်းနီးပါးပိုများစေကြောင်း တွေ့ရှိခဲ့ကြပါတယ်။

အက်စ်ပရင်သုံးစွဲသူတွေမှာ နှလုံးသွေးကြောဆိုင်ရာပြဿနာတွေကိုလျှော့ချပေးနိုင်ပေမယ့်လည်း သွေးယိုစိမ့်ခြင်းအန္တရာယ်ကလည်း အလားတူဖြစ်နိုင်ချေရှိနေပါတယ်။

အက်စ်ပရင်သုံးစွဲဖို့ကို လူနာနဲ့ဆရာဝန်ဆွေးနွေးတိုင်ပင်သင့်ပြီး သွေးယိုစိမ့်နိုင်တဲ့အန္တရာယ်နဲ့ ချိန်ညှိပြီးဆုံးဖြတ်ရမှာ ဖြစ်ပါတယ်။

အနာသက်သာစေတဲ့ဆေးလည်းဖြစ်တဲ့ အက်စ်ပရင်ဟာ ရင်သားကင်ဆာ၊ အူမကြီးကင်ဆာ၊ ဆီးကျိတ်ကင်ဆာ၊ အစာအိမ်ကင်ဆာဖြစ်နိုင်ချေတွေကိုလည်း လျှော့ချပေးနိုင်တယ်လို့ ယူဆထားကြပါတယ်။

Source: New York Post.
#Yangon_Media_Group