#WorldHealth
Published 2 May 2022

လူလတ်ပိုင်းတွေမှာ တစ်ညကို ၈ နာရီအိပ်စက်သင့်တယ်ဆိုတဲ့အယူအဆက သွေဖီလာပြီဖြစ်ကြောင်း သိပ္ပံပညာတွေ့ရှိချက်အရ သိရှိရပါတယ်။

ကိမ်းဘရစ်ခ်ျတက္ကသိုလ်မှသုတေသီများက တစ်နေ့ကို ၇ နာရီအိပ်စက်ခြင်းဖြင့် ကျန်းမာရေးညီညွတ်စေပြီး မှတ်ဉာဏ်ချို့ယွင်းခြင်းကို ကာကွယ်ပေးနိုင်ကြောင်း အကြံပြုလိုက်ပါတယ်။
အသက် ၃၈ နှစ်မှ ၇၃ နှစ်ကြား အင်္ဂလန်လူမျိုးသန်းတဝက်ခန့်ကို လေ့လာခဲ့ပြီးနောက် အခုလို ထုတ်ဖော်လိုက်တာဖြစ်ပါတယ်။

တစ်နေ့ကို ၇ နာရီထက် ပိုအိပ်/လျှော့အိပ်တဲ့သူတွေက တွေးခေါ်စဉ်းစားနှုန်း၊ အာရုံကြောတုန့်ပြန်မှု၊ မှတ်ဉာဏ်နဲ့ ပြဿနာဖြေရှင်းနိုင်စွမ်းတို့မှာ ဆိုးရွားလာကြောင်း စစ်ဆေးရရှိခဲ့ကြပါတယ်။

ဒီမတိုင်ခင်ကတော့ အနှောင့်အယှက်မရှိဘဲ ၈ နာရီနှစ်နှစ်ခြိုက်ခြိုက်အိပ်စက်ခြင်းက ကျန်းမာရေးအတွက်အကောင်းဆုံးဖြစ်ကြောင်း မှတ်ယူခဲ့ကြပါတယ်။

ဒါပေမဲ့ အိပ်ချိန်နည်းလွန်းသူတွေနဲ့ အိပ်ချိန်များလွန်းသူတွေအနေနဲ့ နှစ်ခြိုက်စွာမအိပ်ရပါက မှတ်ဉာဏ်ချို့ယွင်းလာနိုင်တဲ့အခြေအနေရှိနေပါတယ်။

ဦးနှောက်လုပ်ဆောင်နိုင်စွမ်းနဲ့ ဦးနှောက်မှအညစ်အ‌ကြေးများစွန့်ထုတ်ခြင်း၊ ဇီဝဖြစ်စဉ်ဆောင်ရွက်ခြင်း၊ ကိုယ်ခံအားထိန်းသိမ်းခြင်းတို့အတွက် ဦးနှောက်အနားပေးရာမှာ အိပ်စက်ခြင်းက အရေးပါနေပါတယ်။

လူလတ်ပိုင်းတွေမှာ ညဘက်ကို ၆ နာရီမှ ၉ နာရီကြားအိပ်စက်သင့်ပြီး ဦးနှောက်ဖွံ့ဖြိုးဆဲကလေးတွေမှာ ၁၂ နာရီလောက်အထိ အိပ်ဖို့လိုအပ်ပါတယ်။

လူလတ်ပိုင်းတွေနဲ့ လူကြီးတွေမှာ စတင်အိပ်ပျော်ဖို့ ဆက်လက်အိပ်မောကျနေဖို့ ခက်ခဲတာမျိုးတွေရှိတတ်ပါတယ်။

ဒါကပဲ မှတ်ဉာဏ်ချို့ယွင်းလာကာ အသက်ကြီးလာတဲ့အခါ စိတ်ရောဂါအခြေအနေတွေ ပေါ်ပေါက်လာတတ်ပါတယ်။

Uk Biobank က လူနာများကို ၁၀ နှစ်တာစောင့်ကြည့်လေ့လာခဲ့ပြီး Nature Aging ဂျာနယ်မှာဖော်ပြခဲ့ရာ အိပ်ချိန်မလုံလောက်သူများနဲ့ အလွန်အကျွံအိပ်တတ်သူတွေဟာ ဦးနှောက်လုပ်ဆောင်နိုင်စွမ်းများထိခိုက်ကြပြီး ၇ နာရီအိပ်စက်သူတွေကတော့ ဦးနှောက်ကျန်းမာရေးအကောင်းဆုံးသူတွေဖြစ်နေပါတယ်။

အိပ်ရေးပျက်တဲ့သူတွေက ဦးနှောက်ကအဆိပ်အတောက်တွေကို ဖယ်ရှားနိုင်ခြင်းမရှိပါဘူး။
ညဘက်မှာအိပ်ရေးဝအောင်အိပ်ဖို့က အရေးကြီးဆုံးဖြစ်ကြောင်း၊ အသက်အရွယ်ရလာတာနဲ့အမျှ အိပ်ရေးဝအောင်အိပ်ဖို့ခက်ခဲလာကြောင်း အာရုံကြောပညာရှင်'ဘာဘာရာဆာဟာကီယန်'က ဖော်ပြထားပါတယ်။

Source: DailyMail
#Yangon_Media_Group

#WorldMedical
Published 2 May 2022

ကမ္ဘာပေါ်မှာ အကြီးမားဆုံးကာကွယ်ဆေးထုတ်လုပ်ရေးကုမ္ပဏီဖြစ်တဲ့ အိန္ဒိယနိုင်ငံမှ Serum Institute ဟာ ပြည်တွင်းဖြစ်အက်စ်ထရာဇန်နီကာကာကွယ်ဆေးထုတ်လုပ်မှုများကို ရပ်ဆိုင်းလိုက်ပြီဖြစ်ကြောင်း အမှုဆောင်အရာရှိချုပ်က ဧပြီ ၂၂ ရက်နေ့ကကြေညာလိုက်ပါတယ်။

Serum Institute က အက်စ်ထရာဇန်နီကာကွယ်ဆေးကို ကိုဗီရှီးလ်(Covishield)အမှတ်တံဆိပ်ဖြင့် ဆေးပေါင်း ၁ ဘီလီယံကျော်ထုတ်လုပ်ထားပြီးဖြစ်ပြီး ဆင်းရဲနွမ်းပါးတဲ့နိုင်ငံတွေအတွက် ကာကွယ်ရေးထောက်ပံ့ရေး ကိုဗက်စ်အစီအစဉ်မှာလည်း အဓိကထောက်ပံ့နေခဲ့တာဖြစ်ပါတယ်။
အခုဆိုရင် တစ်ကမ္ဘာလုံးမှာကိုဗစ်ကာကွယ်ဆေးဝယ်လိုအား လျော့နည်းလာတဲ့အခြေအနေတွေ့မြင်နေရပါတယ်။

အိန္ဒိယနိုင်ငံက ဆေးဝါးထုတ်လုပ်တဲ့နေရာမှာ နာမည်ရနိုင်ငံတစ်နိုင်ငံဖြစ်ပြီး ကိုဗစ်ကူးစက်မှုကာလအတွင်း နိုင်ငံထဲရှိလူဦးရေ ၁.၄ ဘီလီယံကူးစက်ခံရတာကြောင့် ပြည်တွင်းကာကွယ်ဆေးအလုံအလောက်ရရှိရန် ပြီးခဲ့တဲ့နှစ်က ပြည်ပသို့ ကာကွယ်ဆေးတင်ပို့မှု ကန့်သတ်ထားခဲ့ပါတယ်။

နိုဝင်ဘာလကစတင်ပြီး ကာကွယ်ဆေးတင်ပို့ခြင်းတွေ ဆက်လက်လုပ်ဆောင်ခဲ့ပါတယ်။
ကာကွယ်ဆေးပေါင်းသန်း ၂၀၀ ခန့် လက်ဝယ်ရှိနေတယ်လို့ အကြီးအကဲဖြစ်သူ'အက်ဒါပူနာဝယ်လာ'ကပြောပြပါတယ်။

"ဒီဇင်ဘာကစတင်ကာ ထုတ်လုပ်မှုတွေရပ်ဆိုင်းထားပါတယ်။ လိုချင်တဲ့သူတွေကိုလည်း အလကားတောင်ပေးဖို့ ပြောထားပါတယ်" လို့ ပြောကြားခဲ့ပါတယ်။

"ဒီဆေးတွေနဲ့ ဘာလုပ်ရမှန်းမသိတာနဲ့ ထုတ်လုပ်မှုတွေရပ်ဆိုင်းဖို့ မှာထားလိုက်ပါတယ်။ မဟုတ်ရင် ပစ္စည်းရက်စွဲလွန်ကုန်မှာပါ"

ကိုဗီးရှီးလ်ကာကွယ်ဆေးကို ထုတ်လုပ်ပြီး ၉ လအတွင်းထိုးနှံဖို့ အိန္ဒိယဆေးဝါးကွပ်ကဲရေးကခွင့်ပြုထားပါတယ်။

အခုကိစ္စမှာ ကိုဗီးရှီးလ်တစ်မျိုးတည်းကိုသာ ထုတ်လုပ်မှုရပ်ဆိုင်းတာဖြစ်ပြီး အမေရိကန်ဆေးဝါးကုမ္ပဏီနိုဗာဗက်ဇ်ရဲ့ ခွင့်ပြုချက်နဲ့ထုတ်လုပ်တဲ့ ကိုဗိုဗက်ဇ်ကိုတော့ ထုတ်လုပ်နေပါသေးတယ်။

ပြီးခဲ့တဲ့နှစ်ဝက်လောက်ကတည်းက ကမ္ဘာတဝန်း ကိုဗစ်ကာကွယ်ဆေးထုတ်လုပ်မှုနှုန်းက လိုအပ်တဲ့ပမာဏထက် ပိုများနေခဲ့ကြောင်း နိုင်ငံတကာဆေးဝါးထုတ်လုပ်ရေးအဖွဲ့အစည်းက AFP ကို ပြောကြားခဲ့ပါတယ်။

ကမ္ဘာပေါ်မှာ ကာကွယ်ဆေးမထိုးရသေးတဲ့လူ ဘီလီယံနဲ့ချီပြီးကျန်ရှိနေကာ အများစုက ဖွံ့ဖြိုးဆဲနိုင်ငံတွေကလူတွေဖြစ်ပါတယ်။

ကူးစက်မှုတတိယမြောက်အများဆုံး အိန္ဒိယနိုင်ငံမှာ လူဦးရေ ၁.၈၇ ဘီလီယံကျော်ဟာ ကာကွယ်ဆေးနှစ်ကြိမ် ထိုးပြီးပြီဖြစ်ပါတယ်။

Source: The Straits Times.
#Yangon_Media_Group

Published 01 May 2022

စစ်ပွဲကြောင့် လောင်စာဆီတွေ ပြတ်တောက်မှာစိုးရိမ်မှုတွေကြောင့် ယူကရိန်းနိုင်ငံ ကိဗ်မြို့တော်က ဓာတ်ဆီဆိုင်တွေမှာ မော်တော်ယာဉ်တွေဟာ တန်းစီပြီး ဓာတ်ဆီထည့်နေကြပါတယ်။  

ဒါကိုနားလည်မှုပေးရမယ်။အနစ်နာခံမှုတစ်ချို့လုပ်ရမယ်။သိပ်မကြီးကျယ်ပါဘူးလို့ ကားထဲမှာ ဓာတ်ဆီထည့်ဖို့ စောင့်ဆိုင်းနေတဲ့ ဗစ်တယ်လီကပြောပါတယ်။

Source AFP

Published 1 may 2022

ရီးယဲလ်မက်ဒရစ်အသင်းဟာ ၃၅ကြိမ်မြောက် လာလီဂါဆုဖလားကြီးကို ဧပြီ ၃၀ရက် စနေနေ့ ဆွတ်ခူးသွားပါတယ်။ Espanyol အသင်းကို လေးဂိုး-ဂိုးမရှိနှင့် အနိုင်ယူပြီး ဗိုလ်စွဲသွားတာဖြစ်ပြီး ဒါဟာ နည်းပြ “ကာလို အန်ဆက်လိုတီ”ကို အဓိက ဥရောပလိဒ်ငါးခုစလုံးအနိုင်ရသွားတဲ့ ပထမဆုံးနည်းပြ ဖြစ်သွားစေခဲ့ပါတယ်။

ရီးယဲလ်မက်ဒရစ်ဟာ ကစားကွင်းထဲက ပရိဿတ်ပေါင်း ရှစ်သောင်းနီးပါးရှေ့မှောက်မှာ ဆုဖလားကြီးကိုလက်ခံခဲ့တာဖြစ်ပါတယ်။ ရီးယဲမက်ဒရစ်အောင်ပွဲနှင့်အတူ ပျော်ရွှင်စွာ အောင်ပွဲခံနေကြတဲ့ ပရိဿတ်တွေရဲ့ မြင်ကွင်းတွေကို ရုပ်သံအဖြစ် စုစည်းဖော်ပြပေးလိုက်ပါတယ်။

Source AFP

Published 1 May 2022

အွန်လိုင်း ပစ္စည်းပို့ဆောင်ပေးသူ(ယာဉ်မောင်း)တွေဟာ အိမ်ပေါက်ဝအထိ မှာယူတဲ့ ပစ္စည်းတွေ ပို့ဆောင်ပေးတဲ့အခါ စိန်ခေါ်မှုတွေ အများကြီးနှင့်ကြုံနေကြရပါတယ်။ အချိန်တွေရှည်ကြာတာ၊အလုပ်တွေပိတာ၊လုံခြုံရေးပူပန်ရတာ၊ရန်စောင်တဲ့ ဝယ်သူတွေ၊ ပြီးတော့ ပုလင်းထဲမှာပဲ အပေါ့သွားကြရတာတွေ...။

အခု သူတို့မှာနောက်ထပ်စိန်ခေါ်မှုတစ်ခုရှိလာနေကြပြန်ပါတယ်။ သူတို့ထဲက တော်တော်များများမှာ ဖြစ်နေကြရတာပါ။ ပစ္စည်းမှာသူတွေက သူတို့ကိုအသုံးချပြီး ဆိုရှယ်မီဒီယာတွေပေါ်မှာ views တွေနှင့် likes တွေများများရအောင်လုပ်နေကြ တာတွေဖြစ်ပါသတဲ့..။

အွန်လိုင်း ပစ္စည်းပို့တဲ့(ယာဉ်မောင်း)သူတွေ(၅)ဦးမှာ (၁)ဦးနီးပါးဟာ ပစ္စည်းမှာသူတွေရဲ့ အသုံးချခြင်းခံနေကြရပါတယ်။ သူတို့ကို တစ်တော့ ဒါမှမဟုတ် အခြားဆိုရှယ်မီဒီယာတွေမှာ challenge လုပ်ဖို့ trend လုပ်ဖို့ သုံးနေကြတာဖြစ်တယ်လို့  ပစ္စည်းပို့သူယာဉ်မေင်းတွေအတွက် လမ်းကြောင်းစီစဉ်တဲ့ ဆော့ဖ်ဝဲပြုလုပ်တဲ့ Circuit ကုမ္ပဏီရဲ့ လတ်တလော စစ်တမ်းအရ သိရပါတယ်။

အဲဒီလေ့လာမှုစစ်တမ်းကို အမေရိကန်ပြည်ထောင်စုက ပစ္စည်းပို့ယာဉ်မောင်း ၈၄၈ဦးနှင့်ပြုလုပ်ခဲ့တာဖြစ်ပါတယ်။ အဲဒီအထဲက ၄၀၉ ဦးဟာ အစားအသောက်ပို့သူများဖြစ်ပြီး ကျန်၄၃၉ ဦးကတော့ အခြားပစ္စည်းတွေပေးပို့ကြတာပါ။

လေ့လာမှုအရ ပစ္စည်းပို့သူတွေအားလုံးရဲ့ ၁၄.၃ ရာခိုင်နှုန်းဟာ လက်တွေ့မကျတဲ့ ပစ္စည်းပို့ဆောင်ဖို့တောင်ခံမှု အများကြီးနှင့် ကြုံနေကြရပါတယ်။ ၁၂.၇ ရာခိုင်နှုန်းဟာ သူတို့ပစ္စည်းအားလုံးကို အချိန်အတိုင်းမပေးပို့နိုင်တာနှင့်ကြုံကြရတယ်လို့ သိရပါတယ်။

ပစ္စည်းမှာသူတွေက ပစ္စည်းပို့သူတွေကို တစ်တော့ခ်ကပေးဖို့ နှင့် ဆိုရှယ်မီဒီယာမှာ ပို့စ်တင်ချင်လို့ တစ်ခုခုလုပ်ပေးဖို့ အကူအညီ တောင်းတာတွေကြောင့် နေ့စဉ် မှာသူတွေဆီ အချိန်မီရောက်ဖို့ အလျင်စလိုဖြစ်နေကြရတဲ့ သူတို့ အတော်များများဟာ အချိန်ဇယားတွေ နှောင့်နှေးတာမျိုးကြုံနေကြရတယ်လို့ဆိုပါတယ်။အထူးသဖြင့် ကပ်ဘေးကာလအတွင်း အွန်လိုင်းကနေ ဈေးဝယ်တာတွေများလာတဲ့အခါမျိုးမှာ သူတို့ရဲ့နေ့စဉ်အလုပ်တွေက ပိုပိုပိလာနေတာဖြစ်ပါတယ်။

ပစ္စည်းမှာသူတွေက သူတို့ အွန်လိုင်းမှာတင်ဖို့အတွက် အမေဇုန်ရဲ့ ပစ္စည်းပို့ယာဉ်မောင်းတွေကို အိမ်ရဲ့ လုံခြုံရေးကင်မရာရှေ့မှာ တစ်တော့် ကပေးခိုင်းတာတွေ ပိုပိုများလာတယ်လို့ VICE က ဖေဖော်ဝါရီလတုန်းက သတင်းဖော်ပြခဲ့ပါတယ်။အွန်လိုင်းဗွီဒီယိုတစ်ခုမှာဆိုရင် ပစ္စည်းပို့သူတစ်ဦးဟာ  "Teach Me How to Dougie” နှင့်ကပေးနေရပါတယ်။ အမေဇုန်ရဲ့ တရားဝင်တစ်တော့ခ်အကောင့်က အဲဒါကို "Poppin' and lockin' while box droppin.'လို့ အသံအနေအသံထားနှင့်ပို့စ်တင်ခဲ့ပါတယ်။

Source Insider

#WorldHealth
Published 1 May 2022

ဟမ့်ရှိင်းယားဒေသမှ 'ဟယ်ရီမာတာဒင်း'ဆိုသူဟာ သူ့ရဲ့စိတ်ကျန်းမာရေးအခြေအနေကို တိုးတက်ကောင်းမွန်လာအောင် ကြိုးစားချင်နေခဲ့ပြီး ၂၀၁၆ ခုနှစ်ကစတင်ကာ သူ့ရဲ့ကျင်ငယ်ရည် နေ့စဉ်သောက်သုံးနေခဲ့ပါတယ်။

'မာတာဒင်း'က သူစွန့်ထားတဲ့ကျင်ငယ်ရည်ကို လအနည်းငယ်ကြာအောင် သိမ်းဆည်းပြီးမှသောက်တဲ့အပြင် မျက်နှာကိုလည်း သုတ်လိမ်းလေ့ရှိတာကြောင့် သူ့ရဲ့ညီမဖြစ်သူက ရွံရှာမုန်းတီးနေတယ်လို့ ဆိုပါတယ်။

'မာတာဒင်း'က သူ့ရဲ့ကျင်ငယ်ရည် ၂၀၀ မီလီလီတာကိုနေ့စဉ်သောက်သုံးခြင်းဖြင့် စိတ်အေးချမ်းတည်ငြိမ်လာကာ ချက်ချင်းယူပစ်သလို သက်သာသွားခဲ့ကြောင်း ပြောပြပါတယ်။

ဒါ့အပြင် တစ်ခါတလေမှာ စွန့်နေတဲ့ကျင်ငယ်ရည်ခံယူပြီး မျက်နှာပေါ်ပက်ဖျန်းခြင်းဖြင့်လည်း ငယ်ရွယ်နုပျိုပုံပေါ်နေစေကြောင်း ဆိုခဲ့ပါတယ်။

ကျင်ငယ်ရည်ဟာ ရေဓာတ် ၉၀ ရာခိုင်နှုန်းပါဝင်ပြီး ကိုယ်ခံအားချို့တဲ့ခြင်းအခြေအနေကနေ နာတာရှည်ရောဂါများအထိ ဝေဒနာအတော်များများပျောက်ကင်းစေတယ်လို့ ထောက်ခံပြောဆိုသူတွေရှိနေပါတယ်။

ဒါပေမဲ့လည်း ကျင်ငယ်ရည်သောက်သုံးခြင်းက ကျန်းမာရေးကောင်းကျိုးတွေရရှိစေတယ်ဆိုတဲ့အထောက်အထားမျိုး မတွေ့ရသေးကြောင်း ဆေးပညာရှင်များကသတိပေးထားပါတယ်။

ဒီအလေ့အထဟာ အီဂျစ်ကနေပေါ်ထွက်လာတယ်လို့ ယူဆထားကြပြီး ရေဓာတ်လျင်မြန်စွာခန်းခြောက်နိုင်တဲ့အပြင် ဘက်တီးရီးယားတွေဝင်ရောက်နိုင်တယ်လို့ ရှင်းပြထားပါတယ်။

နာမည်ကြီးအဆိုတော်'မက်ဒေါနား'နဲ့'ကက်ရှာ'တို့ဟာလည်း ကျင်ငယ်ရည်သောက်တယ်လို့ အရင်ကအဆိုပြုဖူးပါတယ်။

လွန်ခဲ့တဲ့ ၆ နှစ်ခန့်က 'မာတာဒင်း'ဟာ ကျန်းမာရေးအတွက်အကျိုးရှိစေတဲ့စာအုပ်ကိုဖတ်ပြီးနောက် ကျင်ငယ်ရည် စတင်သောက်သုံးခဲ့တာဖြစ်ပါတယ်။

"စပြီးသောက်လိုက်တဲ့အချိန်မှာ ဒီလောက်ထိရောက်မှုရှိမယ်လို့ မထင်ထားခဲ့ပါဘူး။ ဦးနှောက်တွေနိုးကြားလာပြီး စိတ်ဓာတ်ကျခြင်းပျောက်ကင်းသွားပါတယ်" လို့ ဆိုပါတယ်။

'မာတာဒင်း'အတွက် ကျန်းမာရေးအကျိုးကျေးဇူးရရှိခဲ့ပေမယ့် မိသားစုမိတ်ဆွေတွေကြား ရှုတ်ချခံခဲ့ရပါတယ်။

သူ့ရဲ့မိသားစုဝင်တွေဆိုရင် အစကတည်းကရွံရှာပြီး လက်မခံခဲ့ဘဲ ညီမဖြစ်သူဆိုရင် စကားတောင်မပြောတော့ပါဘူး။ 'မာတာဒင်း'က အစားလျှော့စားနေခဲ့ပြီး တစ်နေ့ကိုတစ်နပ်သာစားခဲ့ပါတယ်။

"လအနည်းငယ်ကြာသိမ်းထားတဲ့ ကျင်ငယ်ရည်သောက်လိုက်ရင် မျက်နှာငယ်ရွယ်နုပျိုစေပြီး မျက်နှာမှာပွတ်လိုက်တယ်ဆိုရင် ချက်ချင်းကိုသိသာလာပါတယ်။ ကျွန်တော့်အတွက်တော့ အရေပြားထိန်းသိမ်းရေးအလှကုန်တွေမလိုအပ်ဘဲ ငယ်ရွယ်နုပျိုနေစေတဲ့လျှို့ဝှက်ချက်ဖြစ်ပါတယ်" လို့ ဆိုပါတယ်။

ဝါဝစ်ခ်ရှိင်းယားမှ အထွေထွေရောဂါကုဒေါက်တာ'ဂျက်ဖ်ဖော်စတာ'က ကျင်ငယ်ရည်ဟာ ရေဓာတ် ၉၀ ရာခိုင်နှုန်းပါဝင်တဲ့ စွန့်ပစ်ပစ္စည်းဖြစ်ပြီး ကျန်တာကတော့ အမိုးနီးယား၊ ဘက်တီးရီးယားတွေနဲ့ အခြားစွန့်ပစ်ပစ္စည်းတွေဖြစ်ပါတယ်။

ကျင်ငယ်ရည်သောက်သုံးခြင်း ဒါမှမဟုတ် သုတ်လိမ်းခြင်းကလည်း ကျန်းမာရေးကောင်းကျိုးရရှိစေတယ်ဆိုတဲ့ အထောက်အထားမတွေ့ရကြောင်း၊ ပိုဆိုးတာက သောက်တယ်ဆိုရင် ရေဓာတ်အလျင်အမြန်ခန်းခြောက်စေပြီး ဘက်တီးရီးယားတွေဝင်ရောက်လာနိုင်ကြောင်း သတိပေးသွားပါတယ်။

Source: DailyMail
#Yangon_Media_Group