#WorldHealth
Published 05 May 2022

အိုမီခရွန်မျိုးဗီဇကွဲက နောက်လအနည်းငယ်အတွင်း ကူးစက်မှုလျော့နည်းသွားမယ်လို့ ခန့်မှန်းရပေမယ့် ဒယ်လ်တာမျိုးဗီဇကွဲ ပြန်လည်ထွက်ပေါ်လာနိုင်ကြောင်း ဘန်ဂူရီယန်တက္ကသိုလ် (BGU)မှ သုတေသီများက ဖော်ပြလိုက်ပါတယ်။

၂၀၁၉ နှစ်ကုန်ပိုင်းမှာ ပထမဆုံးတွေ့ရှိခဲ့တဲ့ ကိုရိုနာဗိုင်းရပ်စ်က အယ်လ်ဖာဖြစ်ပြီး အဲဒီနောက် ဘီတာ၊ ဂမ်မာ၊ ဒယ်လ်တာနဲ့ အခုနောက်ဆုံး အိုမီခရွန်တို့ ပေါ်ပေါက်ခဲ့ပါတယ်။

ဒယ်လ်တာမျိုးဗီဇကွဲကြောင့် သူအရှေ့မှာပေါ်ထွက်ခဲ့တဲ့ မျိုးဗီဇကွဲတွေ ပျောက်ကွယ်သွားစေခဲ့ပေမယ့် အိုမီခရွန်ပျံ့ပွားနေချိန်မှာတော့ ဒယ်လ်တာပျောက်ကွယ်သွားခြင်းမရှိသေးကြောင်း ပရော်ဖက်ဆာ'အေရီယယ်ကုရှ်မဲရို'နဲ့ ဒေါက်တာ'ကယ်ရင်ယာနစ်ဗ်'တို့က ဖော်ပြလိုက်ပါတယ်။

PCR test နဲ့ rapid test တွေတောင် ခွဲခြားခြင်းမလုပ်နိုင်တဲ့ မျိုးဗီဇကွဲတွေကို ခွဲခြားသိရှိနိုင်အောင် ဓာတ်ခွဲခန်းအဖွဲ့က ရေဆိုးနဲ့စမ်းသပ်စစ်ဆေးရတဲ့ စမ်းသပ်နည်းတီထွင်ခဲ့ပါတယ်။

အဆိုပါ ဓာတ်ခွဲခန်းမှာ ရေဆိုးအဏုဇီဝနည်းပညာ၊ အဏ္ဏဝါအဏုဇီဝဂေဟပညာ၊ အဏုစိတ်ပိုးမွှားအမျိုးမျိုး ရှာဖွေရေးအပြင် စက်မှုဇုံထုတ်ရေဆိုးမှ ဇီဝစမ်းသပ်စစ်ဆေးနည်းပညာများ ပါဝင်ပါတယ်။

၂၀၂၁ ဒီဇင်ဘာမှ ၂၀၂၂ ဇန်နဝါရီလအတွင်း ဘီယာရှီဘာရေဆိုးမြောင်းစနစ်ကို လေ့လာခဲ့ကြရာ အိုမီခရွန်နဲ့ ဒယ်လ်တာမျိုးဗီဇကွဲတို့ကြား အပြန်အလှန်လုပ်ဆောင်ပုံတွေကို တွေ့မြင်ခဲ့ကြပါတယ်။

အိုမီခရွန်က သူ့ဘာသာသူပျောက်ကွယ်သွားတဲ့အချိန်မှာ ဒယ်လ်တာကထပ်မံပေါ်ထွက်လာနိုင်တယ်လို့ သိရှိခဲ့ကြပါတယ်။

"SARS-CoV-2 က လှည့်ပတ်ကူးစက်နေတာဖြစ်ပြီး မျိုးဗီဇကွဲအသစ်များအဖြစ် ဆင့်ကဲပြောင်းလဲနိုင်ပါတယ်။ အခုမတိုင်ခင်အထိကတော့ အသစ်ပေါ်ထွက်လာတဲ့မျိုးဗီဇကွဲက သူ့ရှေ့ကမျိုးဗီဇကွဲကို လွှမ်းမိုးကူးစက်နေခဲ့ပါတယ်" လို့ ဖော်ပြထားပါတယ်။

အစ္စရေးလ်နိုင်ငံရှိ လူဦးရေအများစုမှာ ကိုဗစ်ကာကွယ်ဆေး ၁ ကြိမ်ကနေ ၄ ကြိမ်အထိ ထိုးနှံထားပြီးဖြစ်သလို အရင်မျိုးဗီဇကွဲတွေကူးစက်ထားခဲ့ပေမယ့် အိုမီခရွန်မျိုးဗီဇကွဲက အစ္စရေးလ်မှာအမြစ်တွယ်နေပြီဖြစ်ပါတယ်။

သူတိုရဲ့သုံးသပ်ချက်အတိုင်းဖြစ်လာပါက ဒယ်လ်တာမျိုးဗီဇကွဲ ကူးစက်မှုကြီး ပြန်လည်ပေါ်ထွက်လာနိုင်သလို အန္တရာယ်ရှိမျိုးဗီဇကွဲအသစ်တစ်မျိုးပေါ်ထွက်လာနိုင်ချေ ရှိနေပါတယ်။

အိုမီခရွန်ကူးစက်မှုများ လျော့နည်းလာပြီဖြစ်တာကြောင့် အစ္စရေးလ်အစိုးရနဲ့ ကျန်းမာရေးဝန်ကြီးဌာနတိုက ကိုဗစ်ကန့်သတ်ချက်အများစုကို ဖယ်ရှားလိုက်ပြီဖြစ်ပါတယ်။

ဒယ်လ်တာမျိုးဗီဇကွဲက ကိုယ်ခံအားနည်းတဲ့သူတွေကြားမှာ ဆက်လက်တည်ရှိသေးတာကြောင့် နောက်ထပ်ကူးစက်မှု လှိုင်းဖြစ်လာမှာ စိုးရိမ်နေရကြောင်း 'ကုရှ်မဲရို'က သတိပေးလိုက်ပါတယ်။

Source: The Jerusalem Post
#Yangon_Media_Group

Published 4 May 2022

ကွန်ဂရက်က ယူကရိန်းအကူအညီတွေပိုပေးဖို့အတွက် အတည်ပြုပေးဖို့  ဧပြီ(၃)ရက်က တင့်ကားဖျက်ဒုံးကျည်တွေထုတ်လုပ်နေတဲ့ အယ်လာဘားမားပြည်နယ်၊ ထရွိုင်းမှာရှိတဲ့  လော့ဟိဒ်မာတင် လက်နက်စက်ရုံကို အမေရိကန်သမ္မတ ဂျိုးဘိုင်ဒင်ကသွားရောက်စဉ် ထပ်မံပြောကြားခဲ့ပါတယ်။

“တတိယကမ္ဘာစစ်အန္တရာယ်မဖြစ်စေအောင် ကျွန်တော်တို့မပါဘဲ ယူကရိန်းပြည်သူတွေ သူတို့ကိုယ်တိုင်ခုံခံကာကွယ်နိုင်ဖို့ ခင်ဗျားတို့ဖြစ်အောင်လုပ်ပေးနေကြတယ်”လို့ ဘိုင်ဒင်က စက်ရုံမှာ မိန့်ခွန်းပြောပါတယ်။ ယူကရိန်းကိုကူညီဖို့အတွက် ဥပဒေကြမ်းခပ်မြန်မြန်ြအတည်ပြုပေးဖို့ ဘိုင်ဒင်က တောင်းဆိုလိုက်ပါတယ်။

Source AFP

#WorldArt
Published 04 May 2022

အီရတ်နိုင်ငံမှ ပန်းချီဆရာမ'ဝစ်ဂျ်ဒန်အယ်လ်မာဂျက်'က ဘဂ္ဂဒက်မြို့ရှိကွန်ကရစ်နံရံတွေမှာ နံရံဆေးရေးပန်းချီများရေးဆွဲပြီး မြို့တော်ကိုအလှဆင်ပေးနေပါတယ်။

#Yangon_Media_Group

Published 4 May 2022

ဥရောပအကြီးအကဲ အာဆူလာဘွန်ဒါလီယင်က ရုရှားရဲ့ရေနံတွေကို ဥရောပက ဖြည်းဖြည်းချင်းရပ်ဆိုင်းသွားမယ့် အစီအစဉ်တွေကိုကြေညာသွားပါတယ်။ ဥရောပသမဂ္ဂက ယူကရိန်းကျူးကျော်မှုနှင့်ပတ်သက်ပြီး ရုရှားကို အပြစ်ပေးဖို့ နည်းလမ်းတွေရှာနေတဲ့အလျောက် ရုရှားကို ဖိအားအမြင့်ဆုံးပေးလို့ရသလောက်ပေးသွားမယ်လို့ဆိုလိုက်ပါတယ်။ အဲဒီအပြင် ရုရှားရဲ့ အကြီးဆုံး နိုင်ငံပိုင်ရုပ်သံလိုင်း(၃)ခုကိုလည်း ပိတ်ပင်ဖို့ စီစဉ်ထားတယ်လို့လည်း သူကဖြည့်စွက်ပြောပါတယ်။

Source AFP

Published 4 May 2022

တရုတ်နိုင်ငံ ရှန်ဟိုင်းမှာရှိတဲ့ ဘိုးဘွားရိပ်သာတစ်ခုမှာနေသူတစ်ဦးကို အသက်ရှင်နေလျက်နှင့် ရေခဲတိုက်ကို မှားပို့မိတဲ့ ဖြစ်ရပ်တစ်ခု ဖြစ်ပွားခဲ့တယ်လို့ တရုတ်နိုင်ငံပိုင်မီဒီယာက သတင်းထုတ်ပြန်ပါတယ်။ ရှန်ဟိုင်းမှာ ကိုဗစ်-၁၉ ရောဂါကူးစက်မှုပျံ့နှံ့ပြီး ကာလကြာ လော့ခ်ဒေါင်းချထားနေရပြီး သက်ကြီးရွယ်အိုပြုစုရေးနှင့် ကျန်းမာရေးစောင့်ရှောက်မှုတွေ အပင်ပန်းဆုံးလုပ်ဆောင်နေရတဲ့အချိန်မှာ အဲဒီကိစ္စ ဖြစ်ပေါ်ခဲ့တာပါ။

မြူနီစပါယ်အစိုးရက ထိုကိစ္စဖြစ်ပွားခဲ့တာကို အတည်ပြုလိုက်ပြီး စုံစမ်းစစ်ဆေးမှုတွေ ပြုလုပ်နေပြီလို့ ဒေသဆိုင်ရာ မီဒီယာ တစ်ခုက သတင်းရေးသားပါတယ်။

အဲဒီဘိုးဘွားရိပ်သာက ဖြစ်ရပ်အတွက် တောင်းပန်လိုက်ပါတယ်။ ဒါပေမယ့် အဲဒီမှားယွင်းမှုကြောင့်  တရုတ်ပြည်သူတွေအကြား ကျယ်ကျယ်ပြန့်ပြန့် စိတ်ဆိုးဒေါသဖြစ်မှုတွေနှင့် ရှုတ်ချအပြစ်တင်မှုတွေဖြစ်သွားစေတာကို ဆိုရှယ်မီဒီယာတွေမှာ ပြောဆိုသုံးသပ်နေတာတွေအရ သိရပါတယ်။

(အဲဒီဖြစ်ရပ်ကိုရိုက်ကူးထားပြီး ဆိုရှယ်မီဒီယာမှာပျံ့နှံ့ခဲ့တဲ့ရုပ်သံကို

https://t.me/yangonmediagroup/7464   မှာကြည့်ရှုနိုင်ပါတယ်)

အဲဒီအမှားကြောင့် လူလေးဦးကို ရာထူးမှထုတ်ပယ်လိုက်ပါတယ်။ အဲဒီသူတွေဟာ  ဘိုးဘွားရိပ်သာက ညွှန်ကြးရေးမှူးအဆင့် ရှိသူတစ်ဦးနှင့် ခရိုင်မြို့ပြရေးရာရုံးနှင့် လူမှုဖွံ့ဖြိုးတိုးတက်ရေးရုံးတွေက အရာရှိ(၃)ဦးတို့ဖြစ်ပါတယ်လို့ တရုတ်ဗဟိုရုပ်သံ အရ သိရပါတယ်။

ခရိုင်မြို့ပြရေးရာရုံး ညွှန်ကြားရေးမှူးကို ထပ်မံစုံစမ်းစစ်ဆေးမှုတွေပြုလုပ်နေပြီး ထျင်းလို့အမည်ရတဲ့ ဆရာဝန်ရဲ့ ဆေးကုသခွင့် လိုင်စင်ကိုဖျက်သိမ်းပစ်လိုက်ပါတယ်။တစ်ဦးချင်းစီကို ပြည်သူ့လုံခြုံရေးကိစ္စနှင့် အမှုဖွင့်ထားပါတယ်။

ရှန်ဟိုင်းမြို့မှာ ငါးပတ်ဆက်တိုက်မြောက် လော့ခ်ဒေါင်းချထားခံရပြီးနောက် အဲဒီမှားယွင်းမှုဖြစ်ခဲ့တာပါ။ ကိုဗစ်ကူးစက်မှု အသစ်တွေဟာ နေ့စဦ်ထောင်ဂဏန်းရှိနေပါတယ်။ ကူးစက်မှုတွေနှင့်အနီးကပ်ထိတွေ့မှု  အားလုံးအပေါ် တင်းကြပ်တဲ့  ကန့်သတ်မှုတွေနှင့် မလုပ်မနေရ သီးသန့်ခွဲထားမှုတွေကြောင့် မြို့ရဲ့ ၂၅သန်းသော လူဦးရေအတွက် ဖရိုဖရဲဖြစ်နေစေပါတယ်။

ယခုနောက်ဆုံးကိုဗစ်လှိုင်းမှာသေဆုံးသူ ၄၀၀ကျော်ထဲက အများစုဟာ ရောဂါအခံရှိကြတဲ့ သက်ကြီးရွယ်အိုတွေ ဖြစ်ကြပါတယ်။ အချို့ဘိုးဘွားရိပ်သာတွေက သေဆုံးတာတွေကို အကြောင်းမကြားကြဘူးလို့လည်း သတင်းတွေထွက်နေပါတယ်။ အခုဖြစ်ခဲ့တဲ့သူဟာ ကိုဗစ်ကူးစက်ခံထားရသူ ဒါမှမဟုတ် ကာကွယ်ဆေးထိုးထားပြီးသားသူလား ဆိုတာလည်း မသဲကွဲပါဘူး။

“ ဒါဟာလူသတ်မှုပဲ” လို့ စိတ်ဆိုးမာန်ဆိုးပို့စ်တွေကြားထဲမှာ ဝေးဘိုဆိုရှယ်ပလက်ဖောင်းသုံးသူတစ်ဦးက ပို့စ်ရေးသားပါတယ်။ “ မြို့ရဲ့လျှို့ဝှက်အကြပ်အတည်းက ပိုဆိုးလာနေပြီ” လို့သူကရေးပါတယ်။

အဲဒီရိပ်သာရှိတဲ့ ပူတူအိုမြို့ရဲ့ မြို့ပြရေးရာဌာနက ဒီဖြစ်ရပ်ကို အရေးတကြီးကိုင်တွယ်နေပြီး စစ်ဆေးမှုတွေပြီးရင် ထုတ်ဖော်ပြောကြားမယ်လို့ဆိုပါတယ်။

“ ဒါဟာ ရောဂါကပ်ဘေးနှင့်ဘာမှမဆိုင်သလို ဒါဟာ ပုံမှန်ဖြစ်နေက လျစ်လျူရှုမှုနှင့် တာဝန်ပေါ့ဆမှုလည်းမဟုတ်ဘူး။ ဒါဟာ သေစေနိုင်လောက်တဲ့ အကြီးအကျယ်တာဝန်ပျက်ကွက်မှုဖြစ်တယ်လို့ ဂလိုဗယ်တိုင်းမ်ရဲ့ အယ်ဒီတာချုပ်ဟောင်း မစ္စတာဟူရှီကျင်းက ဝေးဘိုမှာ ရေးသားထားပါတယ်။

 Source Straits Times

#Ukraine_Crisis
Published 04 May 2022

ဥရောပသမဂ္ဂက ရုရှားရေနံတင်သွင်းခြင်းကို အရေးယူပိတ်ဆို့ဖို့ပြင်ဆင်နေချိန်မှာပဲ ယူကရိန်းအရှေ့ဘက်ရှိ ပစ်မှတ်များကို ရုရှား‌က အင်္ဂါနေ့ကတိုက်ခိုက်ခဲ့ကြကာ မာရီယူပိုလ်ဆိပ်ကမ်းမြို့ရှိ ယူကရိန်း နောက်ဆုံးခံတပ်တည်ရှိရာ သံမဏိစက်ရုံကိုဦးတည်ပြီး ဒုံးကျည်များပစ်ခွင်းခဲ့ပါတယ်။

အာဇော့ဗ်စတယ်လ် သံမဏိစက်ရုံကြီးထဲမှာ သီတင်းပတ်အတော်ကြာအောင် စစ်ဒဏ်လူးလိမ့်ခံခဲ့ရတဲ့ ယူကရိန်းအရပ်သားတွေဟာ ကုလသမဂ္ဂနဲ့ ကြက်ခြေနီအဖွဲ့များ အကူအညီဖြင့် ယူကရိန်းအစိုးရအုပ်ချုပ်ရေးမြို့ဇာပိုရစ်ဇ်ဇီယာသို့ ပြီးခဲ့တဲ့ရက်ပိုင်းအတွင်းက ဘေးကင်းစွာလွတ်မြောက်ရောက်ရှိသွားခဲ့ပါပြီ။

ယူကရိန်းကို ပင်လယ်နက်ကနေဖြတ်တောက်ပြီး တောင်ဘက်နဲ့အရှေ့ဘက်တို့ရှိ ရုရှားထိန်းချုပ်ရေးနယ်မြေများကို ချိတ်ဆက်ရန်အတွက် ရုရှားတို့က မာရီယူပိုလ်မြို့ကို အဓိကပစ်မှတ်ထားနေခဲ့တာဖြစ်ပါတယ်။

ယူကရိန်းအရှေ့ဘက်ဒေသများဖြစ်တဲ့ ဒိုနက်စ်နဲ့လူဟန့်စ်နယ်မြေတွေကို ဖေဖော်ဝါရီ ၂၄ ရက်နေ့ကျူးကျော်မှု မစတင်မီရက်ပိုင်းများအတွင်း ရုရှားကျောထောက်နောက်ခံပြု ခွဲထွက်ရေးသမားများက ထိန်းချုပ်လိုက်တာ ဖြစ်ပါတယ်။

ရုရှားက ဒိုနက်စ်ကိုအင်္ဂါနေ့က ထပ်မံတိုက်ခိုက်ခဲ့ရာ အရပ်သား ၂၁ ဦးသေဆုံးပြီး ၂၇ ဦးဒဏ်ရာရရှိခဲ့ကာ ပြီးခဲ့တဲ့လကတည်းက ဒီဒေသမှာ တစ်နေ့အတွင်း သေဆုံးသူအများဆုံးအရေအတွက်ဖြစ်ကြောင်း အုပ်ချုပ်ရေးမှူး 'ပက်ဗ်လိုကိုင်ရီလန်ကို'က ပြောကြားခဲ့ပါတယ်။

လူဟန့်စ်မှာလည်း ဗုံးကျဲတိုက်ခိုက်ခြင်းများ ပြင်းထန်လျက်ရှိပြီး အရပ်သားများထွက်ပြေးလွတ်မြောက်ဖို့ လမ်းမမြင်ကြောင်း၊ ဒီဒေသမှာ ဘယ်မြို့မှ ဘေးကင်းလုံခြုံမှုမရှိတော့ကြောင်း အုပ်ချုပ်ရေးမှူး'ဆာဟီဟိုင်ဒါ'က ဆိုပါတယ်။

ရုရှားတပ်ဖွဲ့တွေက ပင်လယ်နက်ဆိပ်ကမ်းမြို့အိုဒက်ဆာအနီးရှိ စစ်လေယာဉ်ကွင်းတစ်ခုကိုဒုံးကျည်များဖြင့် ပစ်ခတ်ခဲ့ကာ အမေရိကန်နဲ့ဥရောပမဟာမိတ်နိုင်ငံတွေက ယူကရိန်းကိုထောက်ပံ့ထားတဲ့ ဒရုန်းများ၊ ဒုံးကျည်များနဲ့ လက်နက်ခဲယမ်းများကို ဖျက်ဆီးနိုင်ခဲ့ကြောင်း ရုရှားကာကွယ်ရေးဝန်ကြီးဌာနက အသိပေးခဲ့ပါတယ်။

ယူကရိန်းဘက်က တုန့်ပြန်ပြောဆိုရာမှာတော့ အိုဒက်ဆာကိုချိန်ရွယ်လာတဲ့ဒုံးကျည် ၃ စင်းကို ဖြတ်တောက်တားဆီးနိုင်ခဲ့ကြောင်း ပြောကြားလိုက်ပါတယ်။

ကောက်ပဲသီးနှံနဲ့ သတ္တုခဲယမ်းတင်ပို့ဖို့ အရေးပါတဲ့ ပင်လယ်နက်ကို ယူကရိန်းတို့အသုံးပြုခွင့် မရအောင် ရုရှားတို့ကြိုးပမ်းလာတာဖြစ်ပြီး မြို့တော်ကိဗ်ကို မသိမ်းပိုက်နိုင်ခဲ့တဲ့နောက် ယူကရိန်းအရှေ့ဘက်နဲ့ တောင်ဘက်ကဒေသတွေကို ရုရှားတို့အင်အားသုံးတိုက်ခိုက်လာကြတာတွေ့ရပါတယ်။

ရုရှားဟာ အနောက်နိုင်ငံတွေရဲ့စီးပွားရေးပိတ်ဆို့မှုများဖြင့် ထိုးနှက်ခံနေရပြီး အခုလည်း ဥရောပသမဂ္ဂက ရုရှားရေနံလုပ်ငန်းနဲ့ဘဏ်များကို ပစ်မှတ်ထားကာ ဒဏ်ခတ်ပိတ်ဆို့မှုအသစ်တွေပြုလုပ်သွားဦးမှာပါ။

အဆိုပြုတင်သွင်းထားတဲ့ ပိတ်ဆို့မှုအသစ်တွေကို ဗုဒ္ဓဟူးနေ့မှာ အတိအကျဆွေးနွေးသွားဖို့မျှော်မှန်းထားကြပါတယ်။

ကျူးကျော်စစ်ဆင်နွှဲလာတာ ၁၀ ပတ်ကျော်ကြာလာတဲ့ အချိန်မှာ ရုရှားဘက်ကနောက်ဆုတ်ဖို့အရိပ်အယောင်မတွေ့ရဘဲ သေဆုံးသူထောင်နဲ့ချီပြီး ယူကရိန်းမြို့များ ပျက်စီးကြေမွသွားခဲ့ကာ ယူကရိန်းနိုင်ငံသား ၅ သန်းခန့် စစ်ဘေးမှထွက်ပြေးတိမ်းရှောင်နေရပါတယ်။

ရုရှားနိုင်ငံရဲ့ ဒေါ်လာ ၁.၈ ထရီလီယံစီးပွားရေးကြီးဟာလည်း ၁၉၉၁ ခုနှစ် ဆိုဗီယက်ပြည်ထောင်စုပြိုကွဲပြီးနောက်ပိုင်း အကြီးမားဆုံးဆုတ်ယုတ်ချည့်နဲ့လာခဲ့ပါတယ်။

"ဥရောပသမဂ္ဂရဲ့ အရေးယူပိတ်ဆို့မှု တင်သွင်းချက်တွေအပေါ် မကျေမနပ်ဖြစ်ပြီး ရုရှားစစ်တပ်က အခုလို ဒေါသတကြီးတုန့်ပြန်တိုက်ခိုက်ခဲ့ကြတာပါ။ သူတိုမှာ စစ်ရေးပစ်မှတ်တိတိကျကျမရှိဘဲ ပစ်ခတ်တိုက်ခိုက်နေတာအသိသာကြီးဖြစ်ပါတယ်" လို့ ယူကရိန်းသမ္မတ'ဗိုလိုဒီမီယာဇယ်လန်စကီ'က ပြောကြားသွားပါတယ်။

ကုလအကူအညီဖြင့် အရပ်သားများလွတ်မြောက်အောင်ဆောင်ရွက်နေတဲ့ကြားထဲက ရုရှားတို့ကအပစ်အခတ်ခေတ္တရပ်စဲရေးကို ချိုးဖောက်ကာ ဒုံးကျည်တွေနဲ့ပစ်ခတ်နေခဲ့တာဖြစ်ပြီး သံမဏိစက်ရုံထဲမှာ အရပ်သား ၂၀၀ ကျော်ကျန်ရှိနေကာ မာရီယူပိုလ်မြို့ထဲမှာ အရပ်သား ၁ သိန်းခန့်ကျန်ရှိနေသေးကြောင်း မြို့တော်ဝန်'ဗာဒင်ဘွိင်ချန်ကို'က ပြောဆိုခဲ့ပါတယ်။

Source: Reuters.
#Yangon_Media_Group