Published 18 Sept 2022

ဂူးဂဲလ်Google က ဒေါ်လာ နှစ်သိန်းခွဲကို ဝေခွဲမရဖြစ်သွားသည့် ဆိုက်ဘာလုံခြုံရေးပညာရှင်တစ်ဦးထံ မှားယွင်းစွာ ပေးချေခဲ့ခြင်းမှာ လူသား၏ အမှားကြောင့်သာဖြစ်တယ်လို့ ဂူးဂဲလ်ရဲ့ပြောရေးဆိုခွင့်ရှိသူက ပြောပါတယ်။

ယူဂါလက်ဗ် Yuga Labs မှာအလုပ်လုပ်တဲ့ လုံခြုံရေးအင်ဂျင်နီယာတစ်ဦးဖြစ်တဲ့ သူ့ကိုယ်သူ “ဟက်ကာ” လို့ အမည်ပေးထားတဲ့ ဆမ်ကာယီဆိုသူထံ ဂူးဂဲလ်က ဒေါ်လာ ၂၄၉၉၉၉ ကပေးပို့ခဲ့ပါတယ်။ သူ့ရဲ့ ဘဏ်စာရင်းထဲ ငွေလွှဲခဲ့တာဖြစ်ပြီး  ဘာကိုမှလည်း ရှင်းလင်းဖော်ပြထားခြင်းမရှိဘူးလို့ သူက တွစ်တာမှာ ရေးခဲ့ပါတယ်။  သူဟာ သုံးပတ်တိတိ ဆက်သွယ်ဖို့ကြိုးစားခဲ့ပေမယ့် ဂူးဂဲလ်ဆီက ဘာမှ တုန့်ပြန်ချက်မရခဲ့ဘူးလို့ သူကပြောပါတယ်။

တစ်ခါတစ်ခါမှာတော့ သူဟာ ဂူးဂဲလ်လို ကုမ္ပဏီတွေအတွက် bug တွေလိုက်ရှာဖမ်းရတဲ့ ပရောဂျက်တွေလုပ်ခဲ့ဖူးပေမယ့် သူ့အနေနှင့် လတ်တလောသူလုပ်နေတဲ့ ပရောဂျက်တွေနှင့် ဒီငွေပေးချေတာကို ဆက်စပ်စဉ်းစားယူလို့မရဘူးလို့ သူက ဆက်ပြောပါတယ်။

ငွေပေးချေမှုဟာ မှားယွင်းမှုတစ်ခုသာဖြစ်ပြီး ကုမ္ပဏီအနေနှင့် အခုအဲဒီအမှားကို ပြန်ပြင်နေပါပြီလို့ ဂူးဂဲလ်ရဲ့ ပြောရေးဆိုခွင့်ရှိသူက ပြောပါတယ်။

“ ကျွန်တော်တို့ရဲ့ အဖွဲ့ဟာ လူသားရဲ့မှားယွင်းမှုကြောင့် မဆိုင်တဲ့သူဆီ ငွေပေးချေခဲ့တာပါ” လို့ ကိုယ်စားလှယ်တစ်ဦးက အင်န်ပီအာရ်သတင်းဌာနကိုပြောပါတယ်။

“ အခုလို ခပ်မြန်မြန်ဆက်သွယ်ပေးတဲ့အတွက် မှားယွင်းလက်ခံမိခဲ့တဲ့သူကို ကျေးဇူးတင်ပါတယ်” လို့ သူကပြောပါတယ်။

သောကြာနေ့ကျမှ ဂူးဂဲလ်ဆီက တုန့်ပြန်မှုကြားရတယ်လို့ ကာယီကပြောပါတယ်။

“ ဂူးဂဲလ်က တကယ်ဆက်သွယ်လာတဲ့အတွက် အခု ကျွန်တော် ဘဏ်ကိုသွားပြီး ငွေတွေပြန်ပို့ပေးပါမယ်” လို့ ကာယီက MarketWatch ကိုပြောလိုက်ပါတယ်။

Source UPI

#Google

#Hacker

#Sam_Curry

#World_Health
Published 18 September 2022

လေ့လာချက်တစ်ခုအရ ဆိုရှယ်မီဒီယာတွေမှာ ဆယ်ကျော်သက်မတိုင်ခင်အရွယ်ကလေးတွေမှာပါ သက်ရောက်မှုရှိလာပြီး အသက် ၁၀ နှစ်အရွယ်ကလေးတွေဟာ တစ်ပတ်အတွင်း တစ်ညတာအိပ်ချိန်နီးပါးလောက် အိပ်ရေးပျက်လာကြကြောင်း ဖော်ပြထားပါတယ်။

လေ့လာမှုပြုခဲ့တဲ့ ကလေးတွေထဲက ၇၀ ရာခိုင်နှုန်းလောက်ဟာ တစ်နေ့ကို ၄ နာရီမျှ ဆိုရှယ်မီဒီယာအသုံးပြုကြပြီး ၂ နာရီလောက်က မအိပ်ခင်မှာ အသုံးပြုကြတာဖြစ်ပါတယ်။

The Times UK မှတင်ပြချက်အရ ကလေးအများစုအသုံးပြုကြတာတွေက TikTok ၊ YouTube နဲ့ Snapchat တို့ ဖြစ်ပါတယ်။

လေ့လာချက်အရ ကလေးအများစုဟာ လုံလောက်တဲ့အိပ်စက်ခြင်းမျိုး မရရှိကြပါဘူး။

တစ်ပတ်အတွင်း အိပ်ချိန် ၈ နာရီမှ ၉ နာရီလောက်အထိ အိပ်ချိန်ဆုံးရှုံးနေကြတယ်လို့ သုတေသီများကဆိုပါတယ်။

လက်ကိုင်ဖုန်းနဲ့ အခြားဖန်သားပြင်များမှ ထွက်လာတဲ့အလင်းပြာတွေဟာ ခန္ဓာကိုယ်တွင်းက တစ်နေ့တာလည်ပတ်မှုဖြစ်စဉ်ကို ထိခိုက်စေပြီး အိပ်ချိန်ကိုနှောင့်နှေးစေပါတယ်။

မအိပ်ခင် လက်ကိုင်ဖုန်းကို တစ်နာရီ ၂ နာရီလောက် အသုံးပြုသူတွေဟာ အိပ်ပျော်ဖို့ခက်ခဲလေ့ရှိပါတယ်။

TikTok နဲ့ Instagram တို့လို အရာတွေက ကလေးတွေရဲ့အိပ်စက်ခြင်းနဲ့ စိတ်ခံစားချက်တွေကို သက်ရောက်နေတယ်ဆိုတာ သုတေသီတွေက ယုံကြည်နေကြပါတယ်။

အသက် ၁၀ နှစ်အရွယ်ကလေးတွေ ဆိုရှယ်မီဒီယာအသုံးပြုခြင်းရဲ့နောက်ကွယ်က အဓိကအကြောင်းအရင်းတစ်ခုဟာ ဆိုရှယ်မီဒီယာပေါ်မှာ အကြောင်းအရာတစ်ခုခုကို မသိလိုက်မှာကို စိုးတာပါပဲ။

မူလတန်းအရွယ်ကလေးတွေဟာ တစ်ညကို ၉ နာရီမှ ၁၁ နာရီအိပ်ချိန်ရှိသင့်ပေမယ့် လေ့လာမှုပြုခဲ့တဲ့ကလေးတွေထဲက ၂ ယောက်သာ ထိုပမာဏအတိုင်း အိပ်ချိန်ရရှိခဲ့ပါတယ်။

ဆိုရှယ်မီဒီယာတွေအသုံးပြုခြင်းရဲ့ ဘေးထွက်ဆိုးကျိုးတွေထဲမှာ လုံလောက်တဲ့အိပ်ချိန် မရရှိတာပါပဲ။

ဆိုရှယ်မီဒီယာ သိပ်ပြီးအသုံးမပြုတဲ့ ကလေးတွေကို ရှာဖွေကြည့်ရာမှာ မရှိသလောက်ကို ရှားပါးနေပါတယ်။

မိဘတွေအနေနဲ့ သူတို့ကလေးတွေကို ဆုံးမသင့်ပေမယ့် ကလေးတွေ ဖုန်းအသုံးပြုနေတဲ့အချိန်မှာဆိုရင် မိဘစကားနားထောင်လေ့မရှိဘူးလို့ လေ့လာတွေ့ရှိရပါတယ်။

Source: WION
#Yangon_Media_Group

#World_Technology
Published 18 September 2022

မနာမကျင်ဘဲနဲ့ မိနစ်ပိုင်းအတွင်း ကိုယ်တိုင်အသုံးပြုနိုင်တဲ့ တက်တူးကပ်ခွာကို သိပ္ပံပညာရှင်များ တီထွင်လိုက်ပါတယ်။

အမေရိကန် ဂျော်ဂျီယာရှိ ပညာရှင်များတီထွင်လိုက်တာဖြစ်ပြီး အဆိုပါတက်တူးကပ်ခွာတွေကို အလွန်သေးငယ်တဲ့ အပ်ငယ်များဖြင့် ပြုလုပ်ထားကာ တစ်ခုချောင်းစီဟာ မီလီမီတာခန့်သာရှည်ပြီး မင်ရည်ပါဝင်ပါတယ်။

ဒီအပ်တွေက အရေပြားကိုဖောက်ကာ မင်များစိမ့်ဝင်သွားပြီး တက်တူးပုံပေါ်လာစေပါတယ်။

တက်တူးထိုးတဲ့အခါ အရောင်ထည့်သွင်းထားတဲ့ အပ်ချွန်ချွန်နဲ့ အရေပြားအပေါ်ဆုံးအလွှာကို ကြိမ်ဖန်များစွာဖောက်ရတာကြောင့် အလွန်နာကျင်ပြီး ပြီးစီးဖို့နာရီနဲ့ချီ ကြာမြင့်တတ်ပါတယ်။

အပ်သေးလေးတွေကတော့ အရေပြားပေါ် တစ်ခါဖိလိုက်ရုံနဲ့ သွေးမထွက်စေဘဲ မိနစ်ပိုင်းအတွင်း မင်စိမ့်ဝင်နိုင်ပါတယ်။

တက်တူးကပ်ခွာနည်းပညာက ဆေးပညာပိုင်းဆိုင်ရာအတွက် ဖန်တီးခဲ့တာဖြစ်ပြီး အမာရွတ်ဖုံးအုပ်ရန်၊ ကင်ဆာဓာတ်ရောင်ခြည်ကုထုံး၊ ရင်သားခွဲစိတ်အပြီး နို့သီးခေါင်းပြန်လည်ထွက်ပေါ်ရန် အသုံးပြုနိုင်ပါတယ်။

ဒါ့အပြင် ဆီးချို၊ ဝက်ရူးပြန်၊ ဓာတ်မတည့်မှု စတဲ့ရောဂါအခြေအနေတွေရှိတဲ့ လူနာတွေမှာ လက်ကောက်ကွင်းအစား အဆိုပါတက်တူးကို အသုံးပြုနိုင်ပါတယ်။

"ဒီနည်းလမ်းက ဆေးဘက်ဆိုင်ရာအတွက်သာမက အသုံးပြုရလွယ်ကူတာကြောင့် တက်တူးအလှထိုးလို့လည်း ရနိုင်ပါတယ်" လို့ ပရော်ဖက်ဆာ'မာ့ခ်ပရူစ်နစ်ဇ်'က ဆိုပါတယ်။

တက်တူးထိုးဖို့အတွက်ဆိုရင်လည်း အပ်အသေးလေးတွေက ကုန်ကျစရိတ်၊ နာကျင်မှုနဲ့ တက်တူးဆရာတို့ မလိုအပ်တော့ပါဘူး။

တက်တူးကပ်ခွာက အပ်လေးတွေဟာ သဲမှုန်ထက်တောင် သေးငယ်ပြီး တီဗီဖန်သားပြင်ပေါ်မှ ပစ်ဇယ်မှုန်လေးတွေလို စုစည်းသွားကာ ရုပ်ပုံပေါ်လာစေတာဖြစ်ပါတယ်။

ဥပမာအားဖြင့် နံပါတ်တွေ၊ စာလုံးတွေ၊ ကြယ်ပုံတွေ၊ နှလုံးပုံတွေနဲ့ QR ကုဒ်ပုံတွေကိုတောင် အသုံးပြုနိုင်ပါတယ်။

ဒါ့အပြင် အမည်းပျော့ရောင်မင်နဲ့ဖော်ထားတဲ့ တက်တူးဆိုရင်ပုံမှန်အားဖြင့် မမြင်သာဘဲ ခရမ်းလွန်ရောင်ခြည်နဲ့တွေ့မှ ပေါ်လာတဲ့ မင်အမျိုးအစားလည်းပါဝင်ပါတယ်။

အခုမင်က သာမန်တက်တူးတွေလို တသက်လုံးစွဲတဲ့မင်ဖြစ်ပြီး ယာယီမင်ဖြင့်အသုံးပြုနိုင်အောင် လေ့လာနေကြပါတယ်။

ဆေးဘက်ဆိုင်ရာအတွက် ဆေးပညာရှင်အာဏာပိုင်များထံမှ အသိအမှတ်ပြုဖို့ လိုအပ်ပေမယ့် အလှအပဆိုင်ရာ တက်တူးအတွက်တော့ ဆိုင်တွေမှာ ရောင်းချနိုင်မှာဖြစ်ပါတယ်။

ထိုအတွက်ကုန်ကျစရိတ်ကို သေချာမသိရသေးပေမယ့် ကပ်ခွာတစ်ခုအတွက် တစ်ဒေါ်လာအောက်သာ ကျသင့်နိုင်ဖွယ်ရှိပါတယ်။

ဒီနည်းလမ်းက တက်တူးဆရာတွေရဲ့ အလုပ်အကိုင်ဖြစ်တဲ့ တက်တူးထိုးခြင်းတွေကို လုံးဝအစားထိုးဖို့တော့မဟုတ်ကြောင်း၊ မနာမကျင်ဘဲ အလွယ်တကူထိုးချင်တဲ့သူများအတွက် ရည်ရွယ်တာဖြစ်ကြောင်း ပရော်ဖက်ဆာ'ပရူစ်နစ်ဇ်'က ဆိုပါတယ်။

Source: Daily Mail
#Yangon_Media_Group

#World_Development
Published 17 September 2022

၂၀၁၂ ခုနှစ်က တရုတ်ကွန်မြူနစ်ပါတီရဲ့ ၁၈ ကြိမ်မြောက် အမျိုးသားကွန်ဂရက် ပြုလုပ်ပြီးနောက်ပိုင်း လွန်ခဲ့တဲ့ ၁၀ နှစ်အတွင်း တရုတ်နိုင်ငံရဲ့ ဆန်းသစ်တီထွင်မှုအပေါ် ရင်းနှီးမြှုပ်နှံခြင်းဟာ တိုးမြင့်လာခဲ့ပြီး ကမ္ဘာ့ဆန်းသစ်တီထွင်မှုညွှန်းကိန်းမှာလည်း တရုတ်နိုင်ငံဟာ ဆက်တိုက်ဆိုသလို တက်လာခဲ့ကြောင်း အင်္ဂါနေ့ကထုတ်ပြန်လိုက်တဲ့ နိုင်ငံတော်စာရင်းအင်းရုံးမှ နောက်ဆုံးတင်ပြချက်အရ သိရှိရပါတယ်။

#Yangon_Media_Group

#DailyNews
Published _ 17 September 2022

၁။ ပြည်ပအလုပ်အကိုင်ရှာဖွေရေး အေဂျင်စီနာမည်များ အသုံးပြုပြီး လိမ်လည်နေမှုများအပေါ် ထိန်းချုပ်နိုင်ရန် လိုအပ်နေ

၂။ ပြည်တွင်းဘုရားဖူးလုပ်ငန်းများ မကြာမီပြန်လည်လည်ပတ်တော့မည်ဟုဆို

၃။ ရွှေဈေးနှုန်းထပ်ကျဖို့ ရှိနေဟု YGEA ဥက္ကဋ္ဌပြော

၄။ နှစ်စဉ်ကမ္ဘာ့ဆန်းသစ်တီထွင်မှု ညွှန်းကိန်းတွင် တရုတ်အဆင့်များစွာ ခုန်တက်... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Politics
Published 17 September 2022

အမေရိကန်နဲ့ တောင်ကိုရီးယားတို့က မြောက်ကိုရီးယားရဲ့ ယခုလအတွင်းကြေညာခဲ့တဲ့ ပထမဆုံးနျူကလီးယားဆိုင်ရာဝါဒနဲ့ပတ်သက်ပြီး တင်းမာမှုတွေနဲ့ မတည်ငြိမ်မှုများ ဖြစ်လာနိုင်တယ်လို စက်တင်ဘာ ၁၆ ရက်နေ့မှာ ရှုတ်ချလိုက်ပါတယ်။

မြောက်ကိုရီးယားကို ဟန့်တားတုံ့ပြန်နိုင်ရန်အတွက် ဗျူဟာမြောက်စစ်ရေးလေ့ကျင့်မှုများ ဆက်လက်ဖြန့်ကျက်ဆောင်ရွက်သွားမယ်လို့ အမေရိကန်က ကတိပြုလိုက်ပါတယ်။

၂၀၁၈ နောက်ပိုင်း EDSCG အဖွဲ့ရဲ့ ပထမဆုံး ဒုဝန်ကြီးများအဆင့်အစည်းအဝေးပွဲပြုလုပ်ပြီးနောက် ပူးတွဲထုတ်ပြန်ကြေညာလိုက်ကာ တောင်ကိုရီးယားကို ကာကွယ်မယ့် အမေရိကန်ရဲ့ကတိကဝတ်ကို ထပ်လောင်းပြောကြားခဲ့ပြီး မြောက်ကိုရီးယားဘက်က ကျူးလွန်လာတဲ့ နျူကလီးယားတိုက်ခိုက်မှုမှန်သမျှ ပြတ်ပြတ်သားသား တုံ့ပြန်ဆောင်ရွက်သွားမယ်လို့ ပြောကြားခဲ့ပါတယ်။

ထုတ်ပြန်ချက်ထဲမှာ မဟာမိတ်အနေအထား ပိုမိုခိုင်မာစေရန် နှစ်နိုင်ငံစလုံးရဲ့ နိုင်ငံ့အင်အားအစိတ်အပိုင်းအားလုံးကို အသုံးချပြီး ဆက်လက်ကြိုးပမ်းသွားမယ်လို့ ကတိပြုထားပါတယ်။

မြောက်ကိုရီးယားကို ဟန့်တားတုံ့ပြန်ဖို့နဲ့ ဒေသတွင်းလုံခြုံရေးတိုးမြှင့်နိုင်ရန် မဟာဗျူဟာမြောက်စစ်ရေးလက်နက်များကို အချိန်နဲ့တပြေးညီ ထိရောက်စွာ ဆက်လက်အသုံးချနိုင်ရေးအတွက် တောင်ကိုရီးယားနဲ့ ပူးပေါင်းဆောင်ရွက်မှုကို ပိုမိုအားကောင်းလာအောင် အမေရိကန်က ကတိပြုလိုက်ပါတယ်။

ဇူလိုင်လတုန်းက F-35A တိုက်လေယာဉ်များ ပူးတွဲလေ့ကျင့်ခဲ့ကြပြီး အမေရိကန်ကတိကဝတ်ကို ပြသတဲ့အနေနဲ့ USS Ronald Reagan Carrier Strike Group ကိုလည်း နေရာချသွားဦးမှာဖြစ်ပါတယ်။

EDSCG ကိုယ်စားလှယ်အဖွဲ့က အမေရိကန်ရဲ့ B-52 ဗုံးကျဲလေယာဉ်ကို ကြည့်ရှုစစ်ဆေးခဲ့ပြီး နှစ်နိုင်ငံအနေနဲ့ လေ့ကျင့်ရေး၊ အချက်အလက်မျှဝေရေးတို့ကနေ အသင့်အနေအထားဖြစ်နေဖို့ကို မြှင့်တင်နိုင်ရန် ကြိုးပမ်းသွားမှာဖြစ်ပါတယ်။

မဟာမိတ်တွေရဲ့ ဒုံးကျည်တုံ့ပြန်မှုစွမ်းရည်နဲ့ အနေအထားကိုလည်း တိုးတက်အောင်ပြုလုပ်ဖို့ ကတိပြုခဲ့ကြပါတယ်။

ပြီးခဲ့တဲ့အပတ်က မြောက်ကိုရီးယားက သူတို့ကိုယ်သူတို့ကာကွယ်ရန် နျူကလီးယားတိုက်ခိုက်မှုများ အသုံးပြုခွင့်ကို တရားဝင်ပြဌာန်းခဲ့ပြီး ခေါင်းဆောင်'ကင်မ်ဂျုံအန်း'က သူတို့ရဲ့နျူကလီးယားသတ်မှတ်ချက်ကို ပြင်ဆင်သွားမှာမဟုတ်ဘဲ နျူကလီးယားကင်းစင်ရေးဆွေးနွေးမှုများကိုလည်း တားမြစ်ကြောင်း ပြောကြားခဲ့ပါတယ်။

၂၀၁၈ ခုနှစ်တုန်းက အမေရိကန်သမ္မတဟောင်း'ဒေါ်နယ်ထရမ့်'က 'ကင်မ်ဂျုံအန်း'ကို နျူကလီးယားလက်နက်များ စွန့်လွှတ်ဖို့ မဖြောင်းဖျနိုင်ခဲ့ဘဲ မြောက်ကိုရီးယားအနေနဲ့ ၂၀၁၇ နောက်ပိုင်း နျူကလီးယားစမ်းသပ်မှုကို ဆက်လက်ပြုလုပ်ရန် ပြင်ဆင်နေပုံရတယ်လို့ စောင့်ကြည့်သူများက ဆိုပါတယ်။

နျူကလီးယားစမ်းသပ်မှု ပြုလုပ်ပါက အစိုးရတစ်ခုလုံးရဲ့ ပြင်းထန်တဲ့တုံ့ပြန်မှု ဆောင်ရွက်ရလိမ့်မှာဖြစ်ကြောင်း၊ နှစ်နိုင်ငံအနေနဲ့ ဖြစ်လာနိုင်တဲ့အရာတွေအတွက် အသင့်ပြင်ထားရမှာဖြစ်ကြောင်း အမေရိကန်နဲ့ တောင်ကိုရီးယားတို့က ထပ်မံအတည်ပြုပြောကြားခဲ့ပါတယ်။

Source: CNA
#Yangon_Media_Group