#World_News
Published 20 June 2023

OceanGate Expeditions မှ ထိန်းချုပ်မောင်းနှင်တဲ့သင်္ဘောဟာ တနင်္ဂနွေနေ့မနက်ပိုင်းက စတင်ဆင်းသက်ခဲ့ပြီး ၂ နာရီမကြာမီမှာပင် ရေမျက်နှာပြင်နဲ့ အဆက်အသွယ်ပြတ်တောက်သွားခဲ့ကြောင်း အမေရိကန်ကမ်းခြေစောင့်တပ်ဖွဲ့က တွစ်တာမှာ ပြောကြားခဲ့ပါတယ်။

သင်္ဘောပေါ်ပါလာသူတွေထဲမှာ ဗြိတိန်လေယာဉ်မှူးတစ်ဦးလည်း ပါဝင်တယ်လို့ယူဆရပြီး ဒီမတိုင်ခင်က သူဟာ လေ့လာရေးခရီးမှာပါဝင်မယ့်အကြောင်း ဆိုရှယ်မီဒီယာမှာ တင်ခဲ့ပါတယ်။

ကနေဒါလေ့လာရေးသင်္ဘော'ပိုလာပရင့်စ်'ဟာ ကိပ်ကော့ဒ်အရှေ့ဘက် မိုင် ၉၀၀ ခန့်အကွာမှာ ရေငုပ်ဆင်းသက်သွားရင်း အဆက်အသွယ်ပြတ်သွားခဲ့ပြီးနောက် လေယာဉ်တစ်စင်းစေလွှတ်ကာ လူ ၅ ဦးကိုရှာဖွေနေခဲ့ကြောင်း အမေရိကန်ကမ်းခြေစောင့်တပ်က တနင်္လာနေ့မှာ ထုတ်ပြန်လိုက်ပါတယ်။

ကနေဒါကမ်းခြေစောင့်တပ်ကလည်း လေ့လာရေးနေရာသို့ လေယာဉ်တစ်စင်း၊ သင်္ဘောတစ်စင်းစေလွှတ်ကာ ကြိုးပမ်းရှာဖွေနေကြောင်း ဆိုပါတယ်။

တိုက်တန်းနစ်ဆိုက်နေရာသို့ ရေငုပ်လေ့လာရေးခရီးဟာ လောလောဆယ်ဆောင်ရွက်နေဆဲဖြစ်တယ်လို့ OceanGate Expedition က သူတို့ဝက်ဘ်ဆိုက်မှာ ဖော်ပြထားပါတယ်။

ရေငုပ်သင်္ဘောကို တိုက်တန်လို့အမည်ပေးထားကာ မီတာ ၄ ထောင်အထိ ရေငုပ်ဆင်းသက်နိုင်ပြီး သင်္ဘောသား ၅ ဦးအတွက် ၉၆ နာရီအချိန်ရတယ်လို့ ကုမ္ပဏီကပြောထားပါတယ်။

ရေငုပ်သင်္ဘောမှာပါတဲ့ သင်္ဘောသားတွေနဲ့ သူတို့ရဲ့မိသားစုဝင်တွေကို အလုံးစုံအာရုံစိုက်ထားကြောင်း OceanGate Expeditions ရဲ့ပြောကြားချက်ကို CBS News နဲ့ အခြားမီဒီယာများက ဖော်ပြခဲ့ကြပါတယ်။

နယူးဖောင်းလန်းမှာ နှစ် ၄၀ အတွင်း အဆိုးရွားဆုံးဆောင်းတွင်းကြောင့် ဒီတာဝန်က ၂၀၂၃ ခုနှစ်အတွင်း တိုက်တန်းနစ်ဆီသို့ ပထမဆုံးလူသားကိုယ်တိုင်သွားရောက်တဲ့ ဖြစ်စဉ်ဖြစ်နိုင်ဖွယ်ရှိတယ်လို့ အသက် ၅၈ နှစ်ရှိ လေယာဉ်မှူးက ပြောပြခဲ့ပါတယ်။

ရေငုပ်သင်္ဘောနဲ့ အဆက်အသွယ်ပြန်ရဖို့ အစိုးရအဖွဲ့အစည်းတွေနဲ့ ပင်လယ်ရေနက်ကုမ္ပဏီတွေထံမှ အကူအညီများစွာရရှိတဲ့အတွက် အထူးကျေးဇူးတင်ရှိပါတယ်လို့ OceanGate က ဖော်ပြခဲ့ပါတယ်။

ခရီးသည်နဲ့သင်္ဘောအမှုထမ်းပေါင်း ၂,၂၂၄ ဦးပါလာတဲ့ တိုက်တန်းနစ်သင်္ဘောဟာ ၁၉၁၂ ခုနှစ်မှာ အင်္ဂလန်မှနယူးယော့ခ်သို့ ခရီးဦးထွက်လာရင်း ရေခဲတုံးကြီးနဲ့တိုက်မိကာ နစ်မြုပ်ခဲ့တာကြောင့် လူပေါင်း ၁,၅၀၀ ကျော်သေဆုံးခဲ့ရပါတယ်။

လျှပ်စစ်ပိုင်း ဒါမှမဟုတ် ဆက်သွယ်ရေးပိုင်းမှာ ပြဿနာရှိတယ်ဆိုရင် ရေပေါ်ပြန်တက်လာပြီး မျောနေလိမ့်မယ်လို့ လန်ဒန်ကောလိပ်တက္ကသိုလ်မှ ပင်လယ်အင်ဂျင်နီယာပရော်ဖက်ဆာ 'အယ်လီစတဲဂရိတ်ဂ်'က ပြောပြခဲ့ပါတယ်။

ရေငုပ်သင်္ဘော ရေငုပ်စဉ် ပကတိအကောင်းတိုင်းရှိနေဆဲဆိုရင် တိုက်တန်သွားခဲ့တဲ့ ရေအနက်အတိုင်းသွားနိုင်မယ့် သင်္ဘောက အနည်းငယ်သာရှိနေပါတယ်။

Source: France24 #World_News #တိုက်တန်းနစ်လေ့လာရေးခရီးစဉ် #ရေငုပ်သင်္ဘောပျောက်ဆုံးနေကာ ရှာဖွေရေးပြုလုပ်နေ #YMG #Yangon_Media_Group

တရုတ်သမ္မတရှီကျင့်ဖျင်ဟာ ဘေဂျင်းကိုရောက်ရှိနေတဲ့ အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်နှင့် ဇွန်၁၉ ရက် ညနေပိုင်းက တွေ့ဆုံခဲ့ပါတယ်။ တွေ့ဆုံရာမှာ တစ်နိုင်ငံနှင့်တစ်နိုင်ငံအပြန်အလှန်ဆက်ဆံရေးအတွက် အပြန်အလှန်လေးစားမှုနှင့်ရိုးသားမှုကို ရှီက အလေးပေးပြောဆိုခဲ့တယ်လို့ CCTVက သတင်းထုတ်ပြန်ပါတယ်။

ဘလင်ကန်ဟာ တရုတ်ကွန်မြူနစ်ပါတီ ဗဟိုကော်မတီ နိုင်ငံခြားရေးရာကော်မရှင်ညွန်ကြားရေးမှူး ဝမ်ယီနှင့် နိုင်ငံတော်ကောင်စီဝင်နှင့်နိုင်ငံခြားရေးဝန်ကြီး  ချင်းကန်တို့နှစ်ဦးနှင့် အရင်တွေ့ဆုံဆွေးနွေးခဲ့ပါသေးတယ်။

Source CCTV +

#US_China_Relations

#Xi_Blinken

#World_Soccer
Published 19 June 2023

အာဂျင်တီးနားကမ္ဘာကျော်ဘောလုံးသမား'လီယွန်နယ်မက်ဆီ'ဟာ ဗုဒ္ဓဟူးနေ့က တရုတ်ပြည်မှ ပရိသတ်များနဲ့ လူငယ်ကစားသမားများကို အားပေးစကားပြောကြားခဲ့ကာ အခြားအရာများထက် အားကစားကို ပိုမိုချစ်မြတ်နိုးရန် အရေးကြီးကြောင်း အလေးပေးပြောကြားသွားပါတယ်။

#World_Soccer #လူငယ်ကစားသမားများအတွက်မက်ဆီအားပေးစကားပြော
#YMG #Yangon_Media_Group

#Daily_News
Published_ 19 June 2023

၁။ ပေါင်ထားသည့်မြေများကို လိမ်လည်ရောင်းချမှုများရှိနေသဖြင့် သတိပြုရန်လိုဟုဆို

၂။ မိုခါရံပုံငွေဘောလုံးပွဲမှရရှိသည့်ကျပ်သိန်း၉၅၀ကျော်ကို မိုခါမုန်တိုင်းဒဏ်သင့်ဒေသများ ပြန်လည်ထူထောင်ရေးတွင် အသုံးပြုမည်

၃။ ဖျာပုံမြို့အနီး အင်အား ၅.၁ အဆင့်ရှိ ငလျင်လှုပ်ခတ်ခဲ့

၄။ လီယွန်နယ်မက်ဆီနှင့် အာဂျင်တီးနားအသင်းအား တရုတ်ဘောလုံးပရိသတ်များမှအားရဝမ်းသာ ကြိုဆိုခဲ့ကြကာ လူငယ်ကစားသမားများအတွက် မက်ဆီအားပေးစကားပြောကြား .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

#World_Politics
Published 19 June 2023

အမေရိကန်နိုင်ငံခြားရေးဝန်ကြီး 'အန်တိုနီဘလင်ကန်'ရဲ့ တရုတ်ခရီးစဉ်ဒုတိယနေ့နဲ့ နောက်ဆုံးနေ့ဖြစ်တဲ့ တနင်္လာနေ့မှာ တရုတ်ထိပ်သီးသံအမတ်'ဝမ်ယိ'နဲ့ တွေ့ဆုံခဲ့ပြီး ဗျူဟာကျပြိုင်ဘက်တွေအဖြစ် သဘောထားကွဲလွဲမှုတွေကနေ ပဋိပက္ခအထိဖြစ်မလာအောင် ဦးတည်ဆွေးနွေးခဲ့ကြပါတယ်။

သံတမန်နှစ်ဦးဟာ ပေကျင်းမြို့ ဒေါင်ယူထိုင်ပြည်နယ်ဧည့်ရိပ်သာမှာ တရုတ်နဲ့အမေရိကန်အလံများရှေ့မှောက် လက်ဆွဲနှုတ်ဆက်ကြပြီး သူတို့ရဲ့ကိုယ်စားလှယ်အဖွဲ့များနဲ့အတူ အစည်းအဝေးခန်းမသို့ သွားရောက်ခဲ့ကြပါတယ်။

ထိုနေ့နှောင်းပိုင်းမှာပဲ ဘလင်ကန်အနေနဲ့ တရုတ်သမ္မတ'ရှီကျင့်ဖင်'နဲ့လည်း ဆက်လက်ဆွေးနွေးသွားဦးမလားဆိုတာကို အားလုံးကစောင့်ကြည့်နေကြကြောင်း သတင်းရင်းမြစ်တစ်ခုက ဆိုပေမယ့် နိုင်ငံခြားရေးဌာနကတော့ အတည်မပြုသေးပါဘူး။

အမေရိကန်နိုင်ငံခြားရေးဝန်ကြီးတစ်ဦးအနေဖြင့် ၅ နှစ်အတွင်း တရုတ်ကိုပထမဆုံးအကြိမ် လာရောက်လည်ပတ်တာဖြစ်ပြီး တနင်္ဂနွေနေ့က တရုတ်နိုင်ငံခြားရေးဝန်ကြီး'ချင်ကန်'နဲ့တွေ့ဆုံကာ ပွင့်လွင့်ပြီးအပြုသဘောဆောင်တဲ့ ဆွေးနွေးမှုများကို ၇ နာရီခွဲကြာတဲ့အထိ ပြောကြားခဲ့ကြပေမယ့် ထိုင်ဝမ်အရေး၊ ကုန်သွယ်ရေး၊ လူအခွင့်အရေး၊ ဖန်တနိုင်းထုတ်လုပ်မှုမှာ တရုတ်မှအမေရိကန်သို့ ကုန်ကြမ်းပစ္စည်းစီးဆင်းမှုတွန်းအားပေးရေး စတဲ့ကိစ္စအရပ်ရပ်တွေမှာတော့ တိုးတက်အောင် မဆွေးနွေးနိုင်ခဲ့ပါဘူး။

နှစ်နိုင်ငံဆက်ဆံရေး တည်ငြိမ်စေရန် နှစ်ဖက်စလုံးမှ ဆန္ဒရှိကြောင်းထုတ်ဖော်ခဲ့ကြပြီး ဆက်လက်ဆွေးနွေးဖို့ရန်အတွက် ချင်ကန်က ဝါရှင်တန်သို့ သွားရောက်လည်ပတ်ဖွယ်ရှိတယ်လို့ သဘောတူခဲ့ကြကာ ရက်အတိအကျတော့ မကြေညာသေးပါဘူး။

တရုတ်နိုင်ငံသို့ ဘလင်ကန်လာရောက်စဉ် တိုးတက်အောင်မြင်မှုရရှိမယ်လို့ မမျှော်လင့်ထားပေမယ့် နှစ်နိုင်ငံဆက်ဆံရေးမှာ အခြေခံအကျဆုံးအနေအထားကိုတော့ ဆက်လက်ထိန်းသိမ်းနိုင်ဖို့ မျှော်လင့်ကြောင်း တရုတ်အစိုးရပိုင် Global Times က တနင်္လာနေ့မှာ ဖော်ပြထားပါတယ်။

ပြဿနာများကို အစည်းအဝေးအနည်းအကျဉ်းမျှဖြင့် ဖြေရှင်းနိုင်မှာမဟုတ်ပေမယ့် စတင်ဆွေးနွေးမှုများက အောင်မြင်ဖို့လမ်းစဖြစ်လာနိုင်ကြောင်း အမေရိကန်အရာရှိများက ဆိုပါတယ်။

အမေရိကန်လေပိုင်နက်မှာ တရုတ်သူလျှိုပူဖောင်းလို့ သံသယဖြစ်စရာအရာဝတ္ထုတွေ့ရှိပြီးနောက် ဘလင်ကန်ရဲ့ခရီးစဉ်ဟာ ဖေဖော်ဝါရီလက ရွှေ့ဆိုင်းခဲ့ကာ ထိုနှစ်နိုင်ငံကြား ဆက်ဆံရေးယိုယွင်းလာခြင်းက ကမ္ဘာ့ဘဏ္ဍာရေးဈေးကွက်၊ ကုန်သွယ်ရေးအတိုင်းအတာများ၊ လမ်းကြောင်းများ၊ ထောက်ပံ့ရေးကွင်းဆက်များအပေါ် သက်ရောက်နေပါတယ်။

တရုတ်နဲ့ အမေရိကန်ကြား ထိပ်သီးဆက်ဆံရေးနဲ့ပတ်သက်ပြီး ထိုင်ဝမ်က အသေးစိတ်အကြောင်းအရာတွေကို အနီးကပ်လေ့လာနေပါတယ်လို့ ထိုင်ဝမ်ဝန်ကြီးချုပ်'ချန်ချင်ဂျန်'က သတင်းထောက်များကို ပြောကြားခဲ့ပါတယ်။

တရုတ်-အမေရိကန်ဆက်ဆံရေးဟာ ထိုင်ဝမ်အရေးကိစ္စနဲ့ပတ်သက်ပြီး လတ်တလောနှစ်များအတွင်း ပျက်စီးလာကာ တစ်နေ့နေ့မှာ စစ်ရေးအရထိပ်တိုက်ရင်ဆိုင်ရမှာကို စိုးရိမ်ပူပန်နေကြပါတယ်။

အမေရိကန်အရာရှိတွေက ဆွေးနွေးမှုမှာ ကြီးကြီးမားမားတိုးတက်မှု မရရှိပေမယ့် လာမယ့်လများအတွင်း ဘဏ္ဍာရေးဝန်ကြီး'ဂျဲနတ်ယယ်လန်'နဲ့ ကူးသန်းရောင်းဝယ်ရေးဝန်ကြီး'ဂျီနာရေမွန်ဒို'တို့ရဲ့ ခရီးစဉ်များအပါအဝင် နှစ်နိုင်ငံအစည်းအဝေးများဖြစ်လာရန် လမ်းစဖြစ်လာနိုင်တယ်လို့ ကျွမ်းကျင်သူများက မျှော်မှန်းထားပါတယ်။

Source: France24 #World_Politics #တရုတ်နိုင်ငံသို့ အမေရိကန်နိုင်ငံခြားရေးဝန်ကြီးလာရောက်
#YMG #Yangon_Media_Group

#World_Health
Published 19 June 2023

အခုအချိန်မှာ လူပြောအများဆုံး စားသောက်မှုပုံစံက သွေးအမျိုးအစားပေါ်မူတည်တဲ့ စားသောက်မှုပဲဖြစ်ပါတယ်။

ကျန်းမာရေးကောင်းကျိုးအမြင့်မားဆုံး ရရှိဖို့အတွက် မိမိရဲ့သွေးအမျိုးအစားပေါ်မူတည်ပြီး အစားအသောက်ကို ရွေးချယ်စားသောက်ရမှာဖြစ်ပါတယ်။

လူတွေစားသောက်လိုက်တဲ့ အစားအစာတွေက သွေးအမျိုးအစားပေါ်မူတည်ပြီး ဓာတုနည်းအရ ကွဲပြားစွာဓာတ်ပြုကြပါတယ်။

ထိုနည်းလမ်းအတိုင်း စားသောက်မယ်ဆိုရင် ယေဘုယျကျန်းမာရေးကို ကောင်းမွန်စေပြီး နာတာရှည်ရောဂါဖြစ်နိုင်ချေကို လျော့နည်းစေမှာဖြစ်တယ်လို့ အကြံပြုထားပါတယ်။

အဓိကသွေးအမျိုးအစားတွေက အေ၊ ဘီ၊ အေဘီ၊ အို တို့ဖြစ်ပြီး စားသုံးသင့်တဲ့အစားအစာတွေက တဖြည်းဖြည်းနဲ့ ဆင့်ကဲပြောင်းလဲလာပါတယ်။

အိုသွေးအမျိုးအစားက ရှေးအကျဆုံးဖြစ်ပြီး ၄ သောင်းဘီစီခန့်က စတင်ခဲ့ဟန်တူကာ ကာဗိုဟိုက်ဒရိတ်နည်းပါးပြီး ပရိုတိန်းမြင့်မားတဲ့အစားအသောက်များ စားသုံးသင့်ပါတယ်။

အေသွေးအမျိုးအစားကတော့ အိုသွေးနောက်ပေါ်ပေါက်လာခဲ့ဟန်ရှိကာ အပင်အခြေပြုစားစရာတွေ စားသုံးသင့်ပါတယ်။

ကိုယ်အလေးချိန်လျှော့ချရာမှာ ဒီလိုစားသောက်မှုပုံစံပေါ်လည်း မူတည်နေပါတယ်။

ဘီသွေးပိုင်ရှင်များကတော့ အသားနဲ့ နို့ထွက်ပစ္စည်းများ စားသုံးပေးသင့်ပါတယ်။

အေနဲ့ဘီသွေးရောစပ်နေတဲ့ အေဘီသွေးကတော့ ပေါ်ပေါက်တာ နှစ် ၁ ထောင်မပြည့်သေးကာ ကြက်ဆင်သား၊ တိုဖူး၊ ပင်လယ်စာ၊ ဟင်းသီးဟင်းရွက်တို့ စားသုံးသင့်တယ်လို့ အကြံပြုထားပါတယ်။

ဒီလိုမျိုးရွေးချယ်စားသုံးပေးခြင်းဖြင့် ကျန်းမာရေးနဲ့မညီညွတ်တဲ့ အစားအစာတွေကိုဖယ်ရှားပေးကာ အကျိုးရှိတဲ့ရလဒ် ထွက်ပေါ်စေနိုင်မှာဖြစ်ကြောင်း အက်စ်တာ CMI ဆေးရုံမှ ဒေါက်တာ'အက်ဒ်ဝီနာရာဂျ်'က ဆိုပါတယ်။

ဒီစားသောက်မှုပုံစံအတိုင်း စားသောက်လို့ ကျန်းမာရေးအကျိုးကျေးဇူးရရှိတယ်ဆိုတဲ့ သိပ္ပံနည်းကျအထောက်အထားတော့ မရှိသေးဘူးလို့ အက်စ်တာ RV ဆေးရုံမှ ဒေါက်တာ'ဆူမီတာဘစ်ဝက်စ်'က ပြောပြလိုက်ပါတယ်။

Source: India Today #World_Health #သွေးအမျိုးအစားပေါ်မူတည်၍ရွေးချယ်စားသောက်ရ
#YMG #Yangon_Media_Group