#DailyNews
Published - 1 August 2022

၁။ စားအုန်းဆီကို အနံ့ရောနှော၍ မြေပဲဆီအဖြစ် ရောင်းချခြင်းအား အရေးယူပေးရန် တင်ပြထား

၂။ ရှားရှားပါးပါးဆေးဝါးကလွဲ၍ အခြားဈေးကြီးသည့်ဆေးများကို အခမဲ့ထုတ်ပေးနေဟုဆို

၃။ ခရီးစဉ်အကွာအဝေးလိုက် ၄၀၀ ကောက်ခံခြင်းဖြစ်ပြီး ၅၀၀ ၊ ၁၀၀၀ ကောက်ခံပါက အရေးယူမည်

၄။ ကွန်တိန်နာထဲတွင် ရက်ပေါင်း(၄၀)ပိတ်မိနေခဲ့သည့် ခွေးမလေး ပနားမားလေဆိပ်တွင် အမှုထမ်းဆောင်လျက်ရှိ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Politics
Published 1 August 2022

အမေရိကန်အောက် လွှတ်တော်ဥက္ကဌ'နန်စ်ပယ်လိုစီ'ဟာ တနင်္ဂနွေနေ့မှာ အာရှ ၄ နိုင်ငံခရီးစဉ်ကို စတင်ထွက်ခွာခဲ့ကြောင်း အောက် လွှတ်တော်ရုံးက ကြေညာခဲ့ပါတယ်။

ထိုခရီးစဉ်အတွင်း အစကသွားရောက်လည်ပတ်မယ်လို့ အသံထွက်ခဲ့တဲ့ထိုင်ဝမ်ကိုတော့ ထည့်သွင်းဖော်ပြထားခြင်းမရှိပါဘူး။

တရုတ်တို့က ယင်းတို့ပိုင်ဆိုင်ကြောင်း အဆိုပြုထားတဲ့ ကိုယ်ပိုင်အုပ်ချုပ်ခွင့်ရထိုင်ဝမ်ကို 'ပယ်လိုစီ'သွားရောက်လည်ပတ်မယ့် သတင်းတွေနဲ့ပတ်သက်ပြီး အလေးပေးစောင့်ကြည့်နေခဲ့ကြတာလည်း ဖြစ်ပါတယ်။

ဥက္ကဌ'နန်စီပယ်လိုစီ'ဦးဆောင်တဲ့ ကွန်ဂရက်လွှတ်တော်ကိုယ်စားလှယ်အဖွဲက စင်္ကာပူ၊ မလေးရှား၊ တောင်ကိုရီးယား၊ ဂျပန်အပါအဝင် အင်ဒိုပစိဖိတ်ဒေသသို့ သွားရောက်နေကြောင်း ဖော်ပြခဲ့ပါတယ်။

သမ္မတရာထူးဆက်ခံခွင့်မှာ တတိယမြောက်နေရာမှာရှိနေတဲ့'ပယ်လိုစီ'ဟာ အဆိုပါနိုင်ငံတွေထံ သွားရောက်လည်ပတ်ဖို့ဖော်ပြထားပေမယ့် အခြားနိုင်ငံတွေကို ဝင်ဦးမှာလားဆိုတာကိုတော့ မဖော်ပြထားပါဘူး။

အဆိုပါ ခရီးစဉ်ဟာ အင်ဒိုပစိဖိတ်ဒေသအတွင်း အပြန်အလှန်လုံခြုံရေး၊ စီးပွားရေး ပူးပေါင်းဆောင်ရွက်ရေးနဲ့ ဒီမိုကရက်တစ်စိုးမိုးအုပ်ချုပ်ရေးတို့ကို အလေးပေးသွားမှာ ဖြစ်ပါတယ်။

ကိုယ်စားလှယ်အဖွဲ့ထဲမှာ အောက်လွှတ်တော်နိုင်ငံခြားရေးကော်မတီဥက္ကဌ'ဂရီဂေါ်ရီမိခ်စ်'လည်း ပါဝင်ပါတယ်။

'ပယ်လိုစီ'က စင်္ကာပူသို့ တနင်္လာနေ့မှာရောက်ရှိမှာဖြစ်ပြီး ၂ ရက်နေထိုင်မှာဖြစ်ကြောင်း နိုင်ငံခြားရေးဝန်ကြီးဌာနရဲ့ပြောကြားချက်အတိုင်း CNA ရုပ်သံက တင်ပြခဲ့ပါတယ်။

တနင်္လာနေ့မွန်းလွဲအချိန်မှာ စင်္ကာပူရှိ အမေရိကန်ကုန်သည်ကြီးများအသင်းက ဧည့်ခံပွဲဖြင့်ကြိုဆိုသွားမယ်လို့ ဝက်ဘ်ဆိုက်မှာ ဖော်ပြထားပါတယ်။

အမေရိကန်အရာရှိများ ထိုင်ဝမ်သို့လည်ပတ်ခြင်းဟာ ထိုင်ဝမ်ကျွန်းနိုင်ငံရဲ့လွတ်လပ်ရေးလိုလားခွင့်ကို အားပေးအားမြှောက်ပြုရာ ကျတယ်လို့ တရုတ်တို့က ယူဆထားပါတယ်။

အမေရိကန်က ထိုင်ဝမ်နဲ့တရားဝင်သံတမန်ဆက်ဆံရေး မရှိပေမယ့် ကိုယ်ပိုင်ကာကွယ်ရေးအတွက် ဥပဒေအရထောက်ပံ့ ကူညီခွင့်ရှိနေပါတယ်။

ဒါကြောင့် 'ပယ်လိုစီ'လည်ပတ်မယ့်ခရီးစဉ်က ထိုင်ဝမ်အပေါ် အမေရိကန်တိုရဲ့ ထောက်ပံ့ကူညီမှုကို ပြသနေရာရောက်ပါတယ်။

ရီပတ်ဘလစ်ကန်ခေါင်းဆောင်ဖြစ်ခဲ့တဲ့'နယူ့ဂင်ဂရစ်ချ်'က ၁၉၉၇ ခုနှစ်မှာ ထိုင်ဝမ်ကျွန်းကို နောက်ဆုံးသွားရောက်ခဲ့တဲ့ အောက်လွှတ်တော်ဥက္ကဌဖြစ်ပါတယ်။

အမေရိကန်အနေနဲ့ တရုတ်တို့ရဲ့တစ်သွေးတစ်မိန့်စည်းမျဉ်းအား လိုက်နာသင့်ပြီး တရုတ်တို့ကို စပြီးပြဿနာရှာသူတွေအနေနဲ့ အရေးယူခံရမယ်လို့ တရုတ်သမ္မတ'ရှီကျင့်ဖင်'က အမေရိကန်သမ္မတ'ဂျိုးဘိုင်ဒန်'ကို သတိပေးထားပါတယ်။

'ဘိုင်ဒန်'ကလည်း ထိုင်ဝမ်နဲ့ပတ်သက်တဲ့ အမေရိကန်မူဝါဒပေါ်လစီဟာ ပြောင်းလဲခြင်းမရှိဘဲ ထိုင်ဝမ်ကျွန်းရဲ့တည်ငြိမ်အေးချမ်းမှုကို ပြုပြင်ပြောင်းလဲဖို့ တဖက်သတ်ကြံစည်နေခြင်းကို ပြင်းပြင်းထန်ထန်ကန့်ကွက်ကြောင်း 'ရှီ'ကို တုံ့ပြန်သတိပေးခဲ့ပါတယ်။

ပြီးခဲ့တဲ့ရက်ပိုင်းအတွင်း 'ရှီ'နဲ့'ဘိုင်ဒန်'တို့ ဖုန်းဖြင့်ဆွေးနွေးပြောဆိုပြီးနောက် ထိုင်ဝမ်တို့က အမေရိကန်နဲ့ လုံခြုံရေးပူးပေါင်းဆောင်ရွက်မှုများကို ပိုပြီးအလေးအနက်ထားဆောင်ရွက်သွားမှာဖြစ်ကြောင်း ထိုင်ဝမ်နိုင်ငံခြားရေးဝန်ကြီးဌာနက သောကြာ့နေမှာ ကြေညာခဲ့ပါတယ်။

Source: Reuters
#Yangon_Media_Group

#World_Health
Published 1 August 2022

မယ်လာတိုနင်(Melotonin)ဟော်မုန်းရေရှည်သုံးစွဲခြင်းက ကျန်းမာရေးပြဿနာအမျိုးမျိုးဖြစ်ပေါ်နိုင်ပြီး အသိဉာဏ်စွမ်းရည်ကျဆင်းကာ ရေရှည်မှာ စိတ်ကျန်းမာရေးပြဿနာများဖြစ်ပေါ်နိုင်ကြောင်း ကျွမ်းကျင်သူများက သတိပေးလိုက်ပါတယ်။

အခုဆိုရင် အမေရိကန်ရှိ အရွယ်ရောက်ပြီးသူ ၂ ရာခိုင်နှုန်းလောက်က မယ်လာတိုနင်ကို ပုံမှန်သုံးစွဲနေကြပြီး ပြီးခဲ့တဲ့နှစ် ၂၀ အတွင်း ၅ ဆများလာတာဖြစ်ပါတယ်။

JAMA ဂျာနယ်မှာဖော်ပြထားရာမှာ အမေရိကန်မှလူတွေဟာ မယ်လာတိုနင်ကို ဆေးပြင်းအားများများနဲ့ ရေရှည်အသုံးပြုနေကြပြီး မောပန်းခြင်း၊ မူးဝေခြင်း၊ ခေါင်းကိုက်ခြင်းနဲ့ ကျန်းမာရေးနောက်ဆက်တွဲဆိုးကျိုးများဖြစ်ပေါ်လာနိုင်ကြောင်း အိပ်စက်ခြင်းနဲ့ စိတ်ကျန်းမာရေးကျွမ်းကျင်ပညာရှင်များက ဖော်ပြထားပါတယ်။

အခြားနိုင်ငံတွေနဲ့မတူတာက အမေရိကန်မှာ အမေရိကန်မှာ မယ်လာတိုနင်ကို FDA က ထိန်းချုပ်ထားတာမဟုတ်သလို အွန်လိုင်းကနေရော ဆေးဆိုင်တွေမှာပါ ဆေးစာမပါဘဲဝယ်ယူရရှိနိုင်ပါတယ်။

အိပ်စက်ရာမှာ အကူအညီဖြစ်စေပြီး ဘေးကင်းစိတ်ချရတဲ့ဆေးအဖြစ် ရောင်းချနေကြကာ ၂၀၁၇ ခုနှစ်က ဒေါ်လာ ၃၃၉ သန်းဖိုးရောင်းချခဲ့ရပြီး ၂၀၂၀ မှာတော့ ၈၂၁ သန်းအထိ ရောင်းချလာရပါတယ်။

အလွန်အကျွံသုံးစွဲတဲ့အခါ နောက်ဆက်တွဲဆိုးကျိုးများ အနည်းငယ်သာတွေ့ရှိကြောင်းယူဆနေကြပါတယ်။

"ဆေးဆိုင်မှာအလွယ်တကူဝယ်ယူနိုင်တယ်ဆိုတာက ဘေးဥပါဒ်မဖြစ်ဘူး၊ ဇီဝကမ္မဖြစ်စဉ်ကြီးကြီးမားမားမဖြစ်ဘူးလို့ ဆိုလိုတာမဟုတ်ပါဘူး" လို့ မင်နီဆိုတာ မိုင်ယိုဆေးပညာကောလိပ်မှ ဒေါက်တာ'နေမာကိုဗက်ဆင်'က ပြောပြပါတယ်။

မယ်လာတိုနင်ဆေးတွေရဲ့ ရေရှည်ဘေးထွက်ဆိုးကျိုးတွေကို သိပ်ပြီးမသိကြတာကြောင့် ကမ္ဘာ့နေရာအနှံ့အပြားမှာ ဈေးကွက်မတွင်ကျယ်ကြပါဘူး။

ထိုအတွက်လည်း သိပ္ပံပညာရှင်များက သိရှိအောင်ကြိုးစားနေကြပါတယ်။

အမျိုးသားကျန်းမာရေးအဖွဲ့အစည်းကတော့ ထိုဆေးတွေဟာ မှတ်ဉာဏ်ချို့တဲ့ခြင်းနဲ့ အသက်တိုခြင်းတို့ဖြစ်နိုင်တယ်လို့ သုံးသပ်နေပါတယ်။

အိပ်ပျော်စေရန်အသုံးပြုရင်း အလွန်အကျွံဖြစ်သွားတဲ့အခါ နောက်ပိုင်းကျရင် အသိဉာဏ်စွမ်းရည်ကျဆင်းခြင်းနဲ့ စိတ်ပိုင်းဆိုင်ရာပြဿနာများဖြစ်ပေါ်လာနိုင်တယ်လို့ အချက်အလက်များတွေ့ရှိထားပါတယ်။
FDA ခွင့်ပြုချက်ဖြင့် ရောင်းချခြင်းမဟုတ်တာကြောင့် သတ်မှတ်ထားတဲ့ပမာဏထက် ပိုမိုများပြားစွာသုံးစွဲသူတွေရှိနေနိုင်ပါတယ်။

လူကြီးမှာပဲဖြစ်ဖြစ် ကလေးမှာပဲဖြစ်ဖြစ် အိပ်မပျော်ခြင်းအတွက် ရေရှည်ဆေးဝါးသုံးစွဲတာမျိုးကို အကြံမပြုကြောင်း လော့စ်အိန်ဂျလိစ် ကယ်လီဖိုးနီးယားတက္ကသိုလ်မှ ပရော်ဖက်ဆာဒေါက်တာ'ဂျန်နီဖာမာတင်'က ပြောကြားခဲ့ပါတယ်။

ကလေးတွေလက်လှမ်းမီတဲ့နေရာတွေမှာ မယ်လာတိုနင်ဆေးတွေကို မထားသင့်ပါဘူး။
ဒါပေမဲ့ လုံးဝအသုံးမဝင်တာမျိုးမဟုတ်ဘဲ ခရီးကပင်ပန်းလာတဲ့အချိန်မျိုးမှာ အိပ်စက်ချိန်ပြောင်းလဲဖို့လိုလာရင်တော့ အသုံးဝင်နိုင်ပါတယ်။

ဒါ့အပြင် အိပ်မပျော်လို့မဖြစ်တဲ့ညမျိုးတွေမှာလည်း ရံဖန်ရံခါအသုံးပြုနိုင်ပါတယ်။

Source: DailyMail.
#Yangon_Media_Group

#World_Wildlife
Published 1 August 2022

ကျူးကျော်ဝင်ရောက်လာတဲ့ အမေရိကန်ဖားနဲ့ သစ်ညိုမြွေမျိုးစိတ် ၂ ကောင်တို့ကြောင့် ၁၉၈၆ ခုနှစ်မှ ၂၀၂၀ အတွင်း ကမ္ဘာတဝန်းမှာ ဒေါ်လာ ၁၆ ဘီလီယံဆုံးရှုံးမှုဖြစ်ပေါ်ခဲ့ပါတယ်။

အကြောင်းကတော့ အဆိုပါမျိုးစိတ်တွေကြောင့် ကောက်ပဲသီးနှံပျက်စီးခြင်း၊ လျှပ်စစ်ဓာတ်အားပြတ်တောက်ခြင်းများပါ ဖြစ်ပေါ်ခဲ့ကြောင်း ကြာသပတေးနေ့က ဖော်ပြထားပါတယ်။

lithobates catesbeianus လို့ခေါ်တဲ့ အညိုရောင်နဲ့ အစိမ်းရောင်ရှိဖားမျိုးစိတ်ဟာ အလေးချိန် ၂ ပေါင်ကျော်ရှိပြီး ဥရောပမှာ အများဆုံးထိခိုက်ပျက်စီးစေပါတယ်။

boiga irregularis လို့ခေါ်တဲ့ သစ်ညိုရောင်မြွေကတော့ မာရီယာနာကျွန်းနဲ့ ဂွမ်ကျွန်းတို့အပါအဝင် ပစိဖိတ်ကျွန်းတွေမှာ ထိန်းမနိုင်သိမ်းမနိုင်ပေါက်ဖွားနေကြပါတယ်။

သူတို့ကို ဒုတိယကမ္ဘာစစ်တုန်းက အမေရိကန်တပ်သားများက စတင်တွေ့ရှိခဲ့တာဖြစ်ကြောင်း သုတေသီ'အစ္စမေးလ်ဆိုတို'က ပြောပြပါတယ်။

မြွေတွေကပွားများလွန်းတဲ့အတွက် လျှပ်စစ်ဓာတ်အားပေးပစ္စည်းများအပေါ် ဖြတ်သန်းသွားလာကြတာကြောင့် ဓာတ်အားပြတ်တောက်ခြင်းများ ဖြစ်ပေါ်ခဲ့ပါတယ်။

ထိုမျိုးစိတ်တွေအတွက် အကုန်အကျခံပြီး ရွှေ့ပြောင်းခိုင်းတာမျိုးမဖြစ်ရအောင် ထိန်းချုပ်ထားဖို့လိုအပ်လာကြောင်း ချက်သမ္မတနိုင်ငံ ဘိုဟမ်မီယာတောင်ပိုင်းတက္ကသိုလ်မှ ဒေါက်တာဘွဲ့ရကျောင်းသား'ဆိုတို'က ပြောပြခဲ့ပါတယ်။

"အခုအချိန်မှာ သတ္တဝါမျိုးစိတ်ရောင်းဝယ်ခြင်းများပြုလုပ်နေကြပြီး ဒီလိုအထူးဆန်းဆုံးမြွေမျိုးစိတ်ကို အားလုံးကလိုချင်နေကြပါတယ်၊ ရောင်းဝယ်ဖို့တားမြစ်ထားတဲ့စာရင်းကို အစဉ်မပြတ်ပြုပြင်ထိန်းသိမ်းသင့်ပါတယ်" လို့ ရိုက်တာကိုပြောကြားခဲ့ပါတယ်။

အဆိုပါကုန်ကျစရိတ်ကိန်းဂဏန်းတွေကို ကျူးကျော်မျိုးစိတ်များနဲ့ ဆက်စပ်ကုန်ကျစရိတ်များကိုပေါင်းစည်းပြီး ခန့်မှန်းချက်များနဲ့နှိုင်းယှဉ်ကာ တွက်ချက်ထားတာဖြစ်ပါတယ်။

Source: Reuters.
#Yangon_Media_Group

Published 31 July 2022

တရုတ်ပြည်သူ့လွတ်မြောက်ရေး တပ်မတော်(PLA)ရဲ့ စစ်နယ်တိုင်းကြီး (၃)တိုင်းဟာ  ပင်လယ်ဝါ၊ အရှေ့တရုတ်ပင်လယ်နှင့် အခြား တရုတ်ရေပိုင်နက်တွေမှာ တကယ်စစ်ပွဲပုံစံ ရေကြောင်းစစ်ရေးလေ့ကျင့်မှုတွေကို အရှိန်မြှင့်ပြုလုပ်ခဲ့ပါတယ်။

အဲဒီလိုလေ့ကျင့်မှုဟာ စစ်ပွဲအတွက် တိုက်ပွဲဝင်  အဆင်သင့်အနေအထား အသင့်ပြင်ဆင်ထားခြင်းဖြစ်တယ်လို့ CCTV က ပြောပါတယ်။

တရုတ်တပ်မတော် မြောက်ပိုင်းစစ်နယ်တိုင်း ရေတပ်ဟာ ပင်လယ်ဝါထဲမှာ လက်တွေ့ပစ်ခတ်ပြီး လေ့ကျင့်မှုတွေပြုလုပ်ခဲ့ကြပါတယ်။ အလားတူ အရှေ့ပိုင်းစစ်နယ်တိုင်းကလည်း အရှေ့တရုတ်ပင်လယ်ထဲမှာ ရေတပ်သင်္ဘော အုပ်စုနှင့်အတူ ပစ်ခတ်တိုက်ခတ် လေ့ကျင့်ခဲ့ကြပါတယ်။ တောင်ပိုင်းစစ်နယ်တိုင်းကလည်း အလားတူ စစ်ရေးလေ့ကျင့်မှုတွေကို ပြီးခဲ့တဲ့ရက်များအတွင်း ပြုလုပ်ခဲ့ကြပါတယ်။

Source: CCTV Plus

#China_ PLA_combat_ready_drill

#China_Taiwan_Tension

#China_US_Pelosi_Visit

Published: 31 July 2022

ဖိလစ်ပိုင်သမ္မတဟောင်း ဖီဒဲလ်ဗယ်ဒက်ဇ်ရာမို့စ်ဟာ ဒီကနေ့ ဇူလိုင် ၃၁ ရက်၊ တနင်္ဂနွေနေ့မှာ ကွယ်လွန်ခဲ့ပြီး ကွယ်လွန် ချိန်မှာ သူဟာ အသက် ၉၄နှစ်အရွယ်ရှိပြီဖြစ်ပါတယ်။

သူဟာ မားကို့စ်ရဲ့အစိုးရကနေ စွန့်ခွာ ဘက်ပြောင်းခဲ့တဲ့အတွက် လူတော်တော်များများရဲ့ သူရဲကောင်းဖြစ်ခဲ့သူပါ။ အဲဒီတုန်းက သူဟာ ဖိလစ်ပိုင်ရဲတပ်ဖွဲ့ကို ဦးဆောင်နေသူဖြစ်ပြီး ၁၉၈၆ခုနှစ် လူထုအုံကြွမှုမှာ အာဏာရှင်မားကို့စ် ပြုတ်ကျစေဖို့သူ့ရဲ့ဘက်ပြောင်းမှုက တွန်းအားဖြစ်ခဲ့ပါတယ်။

အခြာတစ်ဖက်မှာလည်း မားကို့စ်အာဏာရစဉ်အတွင်း စစ်အုပ်ချုပ်ရေးဥပဒေထုတ်ပြန်ခဲ့ရာမှာ ပါဝင်ခဲ့တဲ့ သူ့ရဲ့ အခန်းကဏ္ဍကို မေ့မရနိုင်သူတွေလည်းရှိနေခဲ့ကြပါတယ်။

၁၉၉၂ခုနှစ် အထွေထွေရွေးကောက်ပွဲမှာ ကပ်နိုင်ခဲ့ပြီးနောက်  ရာမို့စ်ဟာ မားကို့စ်ကို ဖြုတ်ချခဲ့တဲ့ ပြည်သူ့အာဏာခေါင်းဆောင် ကော်ရာဇွန်  အကီနိုနေရာကို အစားထိုးရောက်ရှိလာပြီး သမ္မတဖြစ်လာခဲ့ပါတယ်။အဲဒီတုန်းက သူဟာ ထောက်ခံမဲ ၂၃ရာခိုင်နှုန်းလျော့လျော့ရရှိခဲ့ပေမယ် သူ့ရဲ့သမ္မတသက်တမ်းမှာ ငြိမ်းချမ်းတည်ငြိမ်မှုနှင့် စီးပွားရေးဖွံ့ဖြိုး တိုးတက်မှုရရှိခဲ့တာကြောင့် လူထုထောက်ခံမှု ၆၆ ရာခိုင်နှုန်းအထိ ရရှိခဲ့သူလည်းဖြစ်ပါတယ်။

သမ္မတဟောင်းရာမို့စ်ကွယ်လွန်တာသိရလို့ အထူးကြေကွဲဝမ်းနည်းရတယ်လို့ သမ္မတဖာဒီနန်မားကိုစ်ဂျူနီယာရဲ့ သမ္မတရုံး ပြောရေးဆိုခွင့်ရပုဂ္ဂိုလ် ထရီဇီခရုခ် အိန်ဂျယ်ကပြောပါတယ်။

Source: Reuters

#Fidel_Valdez_Ramos_died

#Philippine_Former_President_Ramos

#Philippine_Politics