#DailyNews
Published -5 May 2022
၁။ လာအို-မြန်မာချစ်ကြည်ရေးတံတားပြန်ဖွင့်လျှင် ပို့ကုန်ယာဉ်များ နေ့ချင်းပြန် သွားခွင့်ရနိုင်မည်။
၂။ အမျိုးသားစာကြည့်တိုက်(ရန်ကုန်)တွင် ကလေးငယ်များအတွက် အပတ်စဥ်စနေနေ့တိုင်း ပုံပြောအစီအစဥ်နှင့် ဆေးရောင်ခြယ်ခြင်းများ ဆောင်ရွက်နေ။
၃။ နေ့စဉ်မိုးလေဝသသတင်း။
၄။ ကုန်ကျစရိတ်သက်သာ၍ သဘာဝပတ်ဝန်းကျင်နှင့်ကိုက်ညီသည့် လျှပ်စစ်သုံးဘီးယာဉ်များ ဆူဒန်တွင်တွင်ကျယ်လာ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။
#Yangon_Media_Group
#HealthTechnology
Published 05 May 2022
အယ်လ်ဇိုင်းမားရောဂါနဲ့ အခြားအာရုံကြောဆိုင်ရာလက္ခဏာများကို ရှာဖွေတွေ့ရှိနိုင်မယ့် စမတ်ဖုန်းအက်ပ်(Smartphone app)တစ်ခုကို သိပ္ပံပညာရှင်များက တီထွင်ထုတ်လုပ်လိုက်ပါတယ်။
အဆိုပါအက်ပ်ဟာ ဖုန်းရဲ့ဆယ်လ်ဖီကင်မရာကနေ မျက်လုံးထဲကသူငယ်အိမ်အရွယ်အစားပြောင်းလဲပုံကို စစ်ဆေးပြီးနောက် လူတစ်ယောက်ရဲ့အသိဉာဏ်လက္ခဏာအခြေအနေကို အကဲဖြတ်ပေးနိုင်တယ်လို့ ကယ်လီဖိုးနီးယားဆန်ဒီယေဂိုတက္ကသိုလ်မှ သုတေသီများက ပြောကြားခဲ့ပါတယ်။
အယ်လ်ဇိုင်းမားရောဂါဟာ အသက် ၆၅ နှစ်အထက်သက်ကြီးရွယ်အို သန်းပေါင်းများစွာမှာ ဖြစ်ပေါ်နေတဲ့ရောဂါဖြစ်ပြီး အဆိုပါရောဂါကို အလွယ်တကူစမ်းသပ်သိရှိနိုင်မယ့် နည်းလမ်းမရှိသေးပါဘူး။
"ဒီအက်ပ်နဲ့ပတ်သက်ပြီး လုပ်စရာတွေကျန်သေးတယ်ဆိုပေမယ့် ဓာတ်ခွဲခန်းတွေမှာ စမ်းသပ်စစ်ဆေးရတဲ့ အာရုံကြောစနစ်ကို အိမ်မှာတင်စမ်းသပ်လို့ရမယ့် နည်းပညာရရှိတော့မှာကို စိတ်လှုပ်ရှားမိပါတယ်" လို့ စာတမ်းပြုစုသူ'ကောလင်းဘယ်ရီ'က ပြောပြပါတယ်။
မျက်လုံးသူငယ်အိမ်က မျက်လုံးအလယ်မှာရှိတဲ့ အနက်ရောင်အဝိုင်းလေးဖြစ်ကာ အလင်းရောင်ဝင်လာစေပြီး မြင်လွှာကို ထိန်းညှိပေးတာဖြစ်ပါတယ်။
သူငယ်အိမ်အရွယ်အစားက လူတစ်ယောက်ရဲ့အာရုံကြောလုပ်ဆောင်ပုံတွေကို သိရှိစေနိုင်ကြောင်း သုတေသနလုပ်ငန်းတွေ စမ်းသပ်ဖူးပါတယ်။
ဥပမာအားဖြင့် လူတစ်ယောက်က ခက်ခဲတဲ့ဦးနှောက်သိရှိနိုင်မှု အလုပ်မျိုး ဒါမှမဟုတ် အမှတ်မထင်အသံမျိုးကြားရတဲ့အခါ သူငယ်အိမ်အရွယ်အစားကျယ်လာတတ်ပါတယ်။
သူငယ်အိမ်အရွယ်အစားတိုင်းတာဖို့အတွက် သူငယ်အိမ်တုန့်ပြန်မှုစမ်းသပ်နည်းဖြင့် ကျန်းမာရေးစောင့်ရှောက်မှုအဖွဲ့တွေက စမ်းသပ်ပေးလေ့ရှိပါတယ်။
ဒီစမ်းသပ်ချက်ကို ဓာတ်ခွဲခန်းနဲ့ဆေးခန်းတွေမှာသာ ပြုလုပ်နိုင်ပြီး အကုန်အကျများတဲ့ပစ္စည်းနည်းပညာများ လိုအပ်ပါတယ်။
အခုလေ့လာချက်မှာတော့ ပိုမိုလွယ်ကူပြီး ဈေးသက်သာစေမယ့် စမ်းသပ်နည်းကို တီထွင်ခဲ့ကြတာဖြစ်ပါတယ်။
အက်ပ်အသုံးပြုရာမှာ စမတ်ဖုန်းက အနီအောက်ရောင်ခြည်ကင်မရာကနေ သူငယ်အိမ်ကိုဖတ်ရှုပြီး မီလီမီတာအရွယ်အစားအထိ အသေးစိတ်တွက်ချက်ပေးပါတယ်။
OnePlus 8 Pro, iPhone X နဲ့နောက်ပိုင်း iPhone များ၊ Samsung Galaxy S8 နဲ့နောက်ပိုင်းစီးရီးတွေမှာ အနီအောက်ရောင်ခြည်ကင်မရာများ ပါဝင်ပြီး မျက်နှာဖတ်ရှုစစ်ဆေးရာမှာ အသုံးပြုလေ့ရှိပါတယ်။
ဒါ့အပြင် ဒီအက်ပ်ကို လူကြီးသူမတွေပါ အလွယ်တကူအသုံးပြုနိုင်အောင်စီစဉ်နေပါတယ်။
ကင်မရာချိန်ရာမှာ တိကျမှန်ကန်အောင် ညွှန်ကြားချက်ပေးတဲ့ လုပ်ဆောင်ချက်တွေလည်း ပါဝင်ပါတယ်။
အခုဆိုရင် သက်ကြီးရွယ်အိုတွေမှာ သိရှိနိုင်မှုစွမ်းရည်ချို့ယွင်းမှုတွေကို ရှာဖွေဖို့နဲ့ အယ်လ်ဇိုင်းမားရောဂါအစောပိုင်းအဆင့်တွေကို ရှာဖွေရာမှာ ဘယ်လောက်အထိ ထိရောက်မှုရှိသလဲဆိုတာတွေကိုသိရှိဖို့ စမ်းသပ်နေကြပါတယ်။
Source: DailyMail.
#Yangon_Media_Group
#WorldHealth
Published 05 May 2022
အိုမီခရွန်မျိုးဗီဇကွဲက နောက်လအနည်းငယ်အတွင်း ကူးစက်မှုလျော့နည်းသွားမယ်လို့ ခန့်မှန်းရပေမယ့် ဒယ်လ်တာမျိုးဗီဇကွဲ ပြန်လည်ထွက်ပေါ်လာနိုင်ကြောင်း ဘန်ဂူရီယန်တက္ကသိုလ် (BGU)မှ သုတေသီများက ဖော်ပြလိုက်ပါတယ်။
၂၀၁၉ နှစ်ကုန်ပိုင်းမှာ ပထမဆုံးတွေ့ရှိခဲ့တဲ့ ကိုရိုနာဗိုင်းရပ်စ်က အယ်လ်ဖာဖြစ်ပြီး အဲဒီနောက် ဘီတာ၊ ဂမ်မာ၊ ဒယ်လ်တာနဲ့ အခုနောက်ဆုံး အိုမီခရွန်တို့ ပေါ်ပေါက်ခဲ့ပါတယ်။
ဒယ်လ်တာမျိုးဗီဇကွဲကြောင့် သူအရှေ့မှာပေါ်ထွက်ခဲ့တဲ့ မျိုးဗီဇကွဲတွေ ပျောက်ကွယ်သွားစေခဲ့ပေမယ့် အိုမီခရွန်ပျံ့ပွားနေချိန်မှာတော့ ဒယ်လ်တာပျောက်ကွယ်သွားခြင်းမရှိသေးကြောင်း ပရော်ဖက်ဆာ'အေရီယယ်ကုရှ်မဲရို'နဲ့ ဒေါက်တာ'ကယ်ရင်ယာနစ်ဗ်'တို့က ဖော်ပြလိုက်ပါတယ်။
PCR test နဲ့ rapid test တွေတောင် ခွဲခြားခြင်းမလုပ်နိုင်တဲ့ မျိုးဗီဇကွဲတွေကို ခွဲခြားသိရှိနိုင်အောင် ဓာတ်ခွဲခန်းအဖွဲ့က ရေဆိုးနဲ့စမ်းသပ်စစ်ဆေးရတဲ့ စမ်းသပ်နည်းတီထွင်ခဲ့ပါတယ်။
အဆိုပါ ဓာတ်ခွဲခန်းမှာ ရေဆိုးအဏုဇီဝနည်းပညာ၊ အဏ္ဏဝါအဏုဇီဝဂေဟပညာ၊ အဏုစိတ်ပိုးမွှားအမျိုးမျိုး ရှာဖွေရေးအပြင် စက်မှုဇုံထုတ်ရေဆိုးမှ ဇီဝစမ်းသပ်စစ်ဆေးနည်းပညာများ ပါဝင်ပါတယ်။
၂၀၂၁ ဒီဇင်ဘာမှ ၂၀၂၂ ဇန်နဝါရီလအတွင်း ဘီယာရှီဘာရေဆိုးမြောင်းစနစ်ကို လေ့လာခဲ့ကြရာ အိုမီခရွန်နဲ့ ဒယ်လ်တာမျိုးဗီဇကွဲတို့ကြား အပြန်အလှန်လုပ်ဆောင်ပုံတွေကို တွေ့မြင်ခဲ့ကြပါတယ်။
အိုမီခရွန်က သူ့ဘာသာသူပျောက်ကွယ်သွားတဲ့အချိန်မှာ ဒယ်လ်တာကထပ်မံပေါ်ထွက်လာနိုင်တယ်လို့ သိရှိခဲ့ကြပါတယ်။
"SARS-CoV-2 က လှည့်ပတ်ကူးစက်နေတာဖြစ်ပြီး မျိုးဗီဇကွဲအသစ်များအဖြစ် ဆင့်ကဲပြောင်းလဲနိုင်ပါတယ်။ အခုမတိုင်ခင်အထိကတော့ အသစ်ပေါ်ထွက်လာတဲ့မျိုးဗီဇကွဲက သူ့ရှေ့ကမျိုးဗီဇကွဲကို လွှမ်းမိုးကူးစက်နေခဲ့ပါတယ်" လို့ ဖော်ပြထားပါတယ်။
အစ္စရေးလ်နိုင်ငံရှိ လူဦးရေအများစုမှာ ကိုဗစ်ကာကွယ်ဆေး ၁ ကြိမ်ကနေ ၄ ကြိမ်အထိ ထိုးနှံထားပြီးဖြစ်သလို အရင်မျိုးဗီဇကွဲတွေကူးစက်ထားခဲ့ပေမယ့် အိုမီခရွန်မျိုးဗီဇကွဲက အစ္စရေးလ်မှာအမြစ်တွယ်နေပြီဖြစ်ပါတယ်။
သူတိုရဲ့သုံးသပ်ချက်အတိုင်းဖြစ်လာပါက ဒယ်လ်တာမျိုးဗီဇကွဲ ကူးစက်မှုကြီး ပြန်လည်ပေါ်ထွက်လာနိုင်သလို အန္တရာယ်ရှိမျိုးဗီဇကွဲအသစ်တစ်မျိုးပေါ်ထွက်လာနိုင်ချေ ရှိနေပါတယ်။
အိုမီခရွန်ကူးစက်မှုများ လျော့နည်းလာပြီဖြစ်တာကြောင့် အစ္စရေးလ်အစိုးရနဲ့ ကျန်းမာရေးဝန်ကြီးဌာနတိုက ကိုဗစ်ကန့်သတ်ချက်အများစုကို ဖယ်ရှားလိုက်ပြီဖြစ်ပါတယ်။
ဒယ်လ်တာမျိုးဗီဇကွဲက ကိုယ်ခံအားနည်းတဲ့သူတွေကြားမှာ ဆက်လက်တည်ရှိသေးတာကြောင့် နောက်ထပ်ကူးစက်မှု လှိုင်းဖြစ်လာမှာ စိုးရိမ်နေရကြောင်း 'ကုရှ်မဲရို'က သတိပေးလိုက်ပါတယ်။
Source: The Jerusalem Post
#Yangon_Media_Group
Published 4 May 2022
ကွန်ဂရက်က ယူကရိန်းအကူအညီတွေပိုပေးဖို့အတွက် အတည်ပြုပေးဖို့ ဧပြီ(၃)ရက်က တင့်ကားဖျက်ဒုံးကျည်တွေထုတ်လုပ်နေတဲ့ အယ်လာဘားမားပြည်နယ်၊ ထရွိုင်းမှာရှိတဲ့ လော့ဟိဒ်မာတင် လက်နက်စက်ရုံကို အမေရိကန်သမ္မတ ဂျိုးဘိုင်ဒင်ကသွားရောက်စဉ် ထပ်မံပြောကြားခဲ့ပါတယ်။
“တတိယကမ္ဘာစစ်အန္တရာယ်မဖြစ်စေအောင် ကျွန်တော်တို့မပါဘဲ ယူကရိန်းပြည်သူတွေ သူတို့ကိုယ်တိုင်ခုံခံကာကွယ်နိုင်ဖို့ ခင်ဗျားတို့ဖြစ်အောင်လုပ်ပေးနေကြတယ်”လို့ ဘိုင်ဒင်က စက်ရုံမှာ မိန့်ခွန်းပြောပါတယ်။ ယူကရိန်းကိုကူညီဖို့အတွက် ဥပဒေကြမ်းခပ်မြန်မြန်ြအတည်ပြုပေးဖို့ ဘိုင်ဒင်က တောင်းဆိုလိုက်ပါတယ်။
Source AFP
#WorldArt
Published 04 May 2022
အီရတ်နိုင်ငံမှ ပန်းချီဆရာမ'ဝစ်ဂျ်ဒန်အယ်လ်မာဂျက်'က ဘဂ္ဂဒက်မြို့ရှိကွန်ကရစ်နံရံတွေမှာ နံရံဆေးရေးပန်းချီများရေးဆွဲပြီး မြို့တော်ကိုအလှဆင်ပေးနေပါတယ်။
#Yangon_Media_Group
Published 4 May 2022
ဥရောပအကြီးအကဲ အာဆူလာဘွန်ဒါလီယင်က ရုရှားရဲ့ရေနံတွေကို ဥရောပက ဖြည်းဖြည်းချင်းရပ်ဆိုင်းသွားမယ့် အစီအစဉ်တွေကိုကြေညာသွားပါတယ်။ ဥရောပသမဂ္ဂက ယူကရိန်းကျူးကျော်မှုနှင့်ပတ်သက်ပြီး ရုရှားကို အပြစ်ပေးဖို့ နည်းလမ်းတွေရှာနေတဲ့အလျောက် ရုရှားကို ဖိအားအမြင့်ဆုံးပေးလို့ရသလောက်ပေးသွားမယ်လို့ဆိုလိုက်ပါတယ်။ အဲဒီအပြင် ရုရှားရဲ့ အကြီးဆုံး နိုင်ငံပိုင်ရုပ်သံလိုင်း(၃)ခုကိုလည်း ပိတ်ပင်ဖို့ စီစဉ်ထားတယ်လို့လည်း သူကဖြည့်စွက်ပြောပါတယ်။
Source AFP
Published 4 May 2022
တရုတ်နိုင်ငံ ရှန်ဟိုင်းမှာရှိတဲ့ ဘိုးဘွားရိပ်သာတစ်ခုမှာနေသူတစ်ဦးကို အသက်ရှင်နေလျက်နှင့် ရေခဲတိုက်ကို မှားပို့မိတဲ့ ဖြစ်ရပ်တစ်ခု ဖြစ်ပွားခဲ့တယ်လို့ တရုတ်နိုင်ငံပိုင်မီဒီယာက သတင်းထုတ်ပြန်ပါတယ်။ ရှန်ဟိုင်းမှာ ကိုဗစ်-၁၉ ရောဂါကူးစက်မှုပျံ့နှံ့ပြီး ကာလကြာ လော့ခ်ဒေါင်းချထားနေရပြီး သက်ကြီးရွယ်အိုပြုစုရေးနှင့် ကျန်းမာရေးစောင့်ရှောက်မှုတွေ အပင်ပန်းဆုံးလုပ်ဆောင်နေရတဲ့အချိန်မှာ အဲဒီကိစ္စ ဖြစ်ပေါ်ခဲ့တာပါ။
မြူနီစပါယ်အစိုးရက ထိုကိစ္စဖြစ်ပွားခဲ့တာကို အတည်ပြုလိုက်ပြီး စုံစမ်းစစ်ဆေးမှုတွေ ပြုလုပ်နေပြီလို့ ဒေသဆိုင်ရာ မီဒီယာ တစ်ခုက သတင်းရေးသားပါတယ်။
အဲဒီဘိုးဘွားရိပ်သာက ဖြစ်ရပ်အတွက် တောင်းပန်လိုက်ပါတယ်။ ဒါပေမယ့် အဲဒီမှားယွင်းမှုကြောင့် တရုတ်ပြည်သူတွေအကြား ကျယ်ကျယ်ပြန့်ပြန့် စိတ်ဆိုးဒေါသဖြစ်မှုတွေနှင့် ရှုတ်ချအပြစ်တင်မှုတွေဖြစ်သွားစေတာကို ဆိုရှယ်မီဒီယာတွေမှာ ပြောဆိုသုံးသပ်နေတာတွေအရ သိရပါတယ်။
(အဲဒီဖြစ်ရပ်ကိုရိုက်ကူးထားပြီး ဆိုရှယ်မီဒီယာမှာပျံ့နှံ့ခဲ့တဲ့ရုပ်သံကို
https://t.me/yangonmediagroup/7464 မှာကြည့်ရှုနိုင်ပါတယ်)
အဲဒီအမှားကြောင့် လူလေးဦးကို ရာထူးမှထုတ်ပယ်လိုက်ပါတယ်။ အဲဒီသူတွေဟာ ဘိုးဘွားရိပ်သာက ညွှန်ကြးရေးမှူးအဆင့် ရှိသူတစ်ဦးနှင့် ခရိုင်မြို့ပြရေးရာရုံးနှင့် လူမှုဖွံ့ဖြိုးတိုးတက်ရေးရုံးတွေက အရာရှိ(၃)ဦးတို့ဖြစ်ပါတယ်လို့ တရုတ်ဗဟိုရုပ်သံ အရ သိရပါတယ်။
ခရိုင်မြို့ပြရေးရာရုံး ညွှန်ကြားရေးမှူးကို ထပ်မံစုံစမ်းစစ်ဆေးမှုတွေပြုလုပ်နေပြီး ထျင်းလို့အမည်ရတဲ့ ဆရာဝန်ရဲ့ ဆေးကုသခွင့် လိုင်စင်ကိုဖျက်သိမ်းပစ်လိုက်ပါတယ်။တစ်ဦးချင်းစီကို ပြည်သူ့လုံခြုံရေးကိစ္စနှင့် အမှုဖွင့်ထားပါတယ်။
ရှန်ဟိုင်းမြို့မှာ ငါးပတ်ဆက်တိုက်မြောက် လော့ခ်ဒေါင်းချထားခံရပြီးနောက် အဲဒီမှားယွင်းမှုဖြစ်ခဲ့တာပါ။ ကိုဗစ်ကူးစက်မှု အသစ်တွေဟာ နေ့စဦ်ထောင်ဂဏန်းရှိနေပါတယ်။ ကူးစက်မှုတွေနှင့်အနီးကပ်ထိတွေ့မှု အားလုံးအပေါ် တင်းကြပ်တဲ့ ကန့်သတ်မှုတွေနှင့် မလုပ်မနေရ သီးသန့်ခွဲထားမှုတွေကြောင့် မြို့ရဲ့ ၂၅သန်းသော လူဦးရေအတွက် ဖရိုဖရဲဖြစ်နေစေပါတယ်။
ယခုနောက်ဆုံးကိုဗစ်လှိုင်းမှာသေဆုံးသူ ၄၀၀ကျော်ထဲက အများစုဟာ ရောဂါအခံရှိကြတဲ့ သက်ကြီးရွယ်အိုတွေ ဖြစ်ကြပါတယ်။ အချို့ဘိုးဘွားရိပ်သာတွေက သေဆုံးတာတွေကို အကြောင်းမကြားကြဘူးလို့လည်း သတင်းတွေထွက်နေပါတယ်။ အခုဖြစ်ခဲ့တဲ့သူဟာ ကိုဗစ်ကူးစက်ခံထားရသူ ဒါမှမဟုတ် ကာကွယ်ဆေးထိုးထားပြီးသားသူလား ဆိုတာလည်း မသဲကွဲပါဘူး။
“ ဒါဟာလူသတ်မှုပဲ” လို့ စိတ်ဆိုးမာန်ဆိုးပို့စ်တွေကြားထဲမှာ ဝေးဘိုဆိုရှယ်ပလက်ဖောင်းသုံးသူတစ်ဦးက ပို့စ်ရေးသားပါတယ်။ “ မြို့ရဲ့လျှို့ဝှက်အကြပ်အတည်းက ပိုဆိုးလာနေပြီ” လို့သူကရေးပါတယ်။
အဲဒီရိပ်သာရှိတဲ့ ပူတူအိုမြို့ရဲ့ မြို့ပြရေးရာဌာနက ဒီဖြစ်ရပ်ကို အရေးတကြီးကိုင်တွယ်နေပြီး စစ်ဆေးမှုတွေပြီးရင် ထုတ်ဖော်ပြောကြားမယ်လို့ဆိုပါတယ်။
“ ဒါဟာ ရောဂါကပ်ဘေးနှင့်ဘာမှမဆိုင်သလို ဒါဟာ ပုံမှန်ဖြစ်နေက လျစ်လျူရှုမှုနှင့် တာဝန်ပေါ့ဆမှုလည်းမဟုတ်ဘူး။ ဒါဟာ သေစေနိုင်လောက်တဲ့ အကြီးအကျယ်တာဝန်ပျက်ကွက်မှုဖြစ်တယ်လို့ ဂလိုဗယ်တိုင်းမ်ရဲ့ အယ်ဒီတာချုပ်ဟောင်း မစ္စတာဟူရှီကျင်းက ဝေးဘိုမှာ ရေးသားထားပါတယ်။
Source Straits Times
Page 687 of 777