#Daily_News
Published 11 December 2023

၁။ စားအုန်းဆီဈေးပြန်ကျလာပြီး ကျပ် ၅၀၀၀ အောက်ရောက်ရှိကာ ကျပ် ၄၈၁၅ ကျပ်ဖြစ်သွား၊ ပေပါ(၉)ထောင်နီးပါးရောင်းချပေးထားဟုဆို

၂။ တညင်းကုန်းဈေးရှိ ဈေးရုံ (၅) အတွက် ဆိုင်ခန်းလျှောက်ထားသူများနေကာ  လက်ကားရောင်းချသူများကို အဓိကထားနေရာချပေးရန်စီစဉ်နေဟုဆို

၃။ ဒီဇင်ဘာလအတွက် ဆန်အမျိုးအစားအလိုက်ရောင်းရမည့် ဆန်ဈေးနှုန်းများသတ်မှတ်၊ ဧည့်မထတစ်အိတ်အမြင့်ဆုံး၆သောင်း၈ထောင်ဖြင့်သာ ရောင်းမည်

၄။ ပုံမှန်ထက်ပူနွေးသော ဆောင်းရာသီအပူချိန် ဂျပန်တွင်ကြုံတွေ့နေရ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

#World_News
Published 11 December 2023

အစ္စရေးလ်တို့က ဂါဇာကမ်းမြောင်တောင်ပိုင်း အဓိကမြို့ဖြစ်တဲ့ ခန်းယူနစ်မြို့ဆီ ချီတက်တိုက်ခိုက်လျက်ရှိရာ အစ္စရေးလ်တင့်ကားများက တနင်္ဂနွေနေ့မှာ မြို့ရဲ့ဗဟိုအချက်အခြာသို့ ရောက်ရှိလာကြောင်း ဂါဇာကျန်းမာရေး ဝန်ကြီးဌာနက ပြောကြားလိုက်ပါတယ်။

ဟားမတ်စ် တိုက်ခိုက်ရေးသမား ဒါဇင်ခန့် အညံ့ခံခဲ့ကာ နောက်ထပ်များစွာကိုလည်း အညံ့ခံရန် တိုက်တွန်းထားကြောင်း အစ္စရေးလ်ခေါင်းဆောင်တို့က ပြောခဲ့ပေမယ့် ပါလက်စ်တိုင်း စစ်သွေးကြွအဖွဲ့ကတော့ ဒါတွေဟာ အခြေအမြစ်မရှိတဲ့ သတင်းမှားတွေသာ ဖြစ်တယ်လို့ ဆိုပါတယ်။

တစ်ညလုံး တိုက်ပွဲပြင်းထန်စွာ ဖြစ်ပွားပြီးနောက် တင့်ကားတွေဟာ တောင်-မြောက် အဓိကလမ်းမကြီးကို ရောက်ရှိလာကြောင်း၊ တိုက်ခိုက်မှုနေရာရဲ့ အနောက်ပိုင်းမှာ တိုက်လေယာဥ်တွေ ပစ်ခတ်နေကြကြောင်း ခန်းယူနစ်မြို့မှာ နေထိုင်သူတွေက ပြောပြသွားပါတယ်။

အခြားနေရာတွေကနေ ထွက်ပြေးတိမ်းရှောင်လာတဲ့ လူတွေအများအပြား ရှိနေတဲ့ မြို့ထဲမှာ ပေါက်ကွဲသံတွေ အဆက်မပြတ် ကြားနေရပြီး မီးခိုးလုံးတွေ တလူလူပျံတက်နေပါတယ်။

ဂါဇာမှာ အပစ်အခတ်ရပ်စဲဖို့ကို အောင်မြင်အောင် မတိုက်တွန်းနိုင်ခဲ့တဲ့ ကုလသမဂ္ဂ အထွေထွေအတွင်းရေးမှူး အန်တိုနီယိုဂူတာရက်စ်က မကြာခင်မှာ လူစုခွဲထွက်ပြေးဖို့ အမိန့်ပေးရန်နဲ့ ပိုမိုဆိုးရွားတဲ့ အခြေအနေကြောင့် ကပ်ရောဂါ ဖြစ်ပွားလာမှာတွေ အီဂျစ်သို့ အစုလိုက်အပြုံလိုက် ရွှေ့ပြောင်းဖို့ တွန်းအားတွေ ဖြစ်လာမှာကို စိုးရိမ်ရကြောင်း ပြောကြားလိုက်ပါတယ်။

ဒါဟာ ကြောက်ရွံ့စရာအကောင်းဆုံး ညတစ်ညဖြစ်ကြောင်း၊ ပြန်လည်ခုခံတိုက်ခိုက်မှုက အလွန်ပြင်းထန်ပြီး သေနတ်သံတွေ ပေါက်ကွဲသံတွေကို နာရီအတော်ကြာ ကြားနေရကြောင်း ဂါဇာမြို့မှ ထွက်ပြေးလာပြီး ခန်းယူနစ်မှာ ခိုလှုံနေတဲ့ ကလေး ၄ ယောက်အဖေက ပြောပြသွားပါတယ်။

အောက်တိုဘာ ၇ ရက်နေ့က နယ်စပ်ဖြတ်ကျော်ပြီး အစ္စရေးလ်ကို ဝင်ရောက်တိုက်ခိုက်ကာ လူပေါင်း ၁,၂၀၀ ခန့်သတ်ဖြတ်ခဲ့ပြီး ဓားစာခံ ၂၄၀ ကို ခေါ်ဆောင်သွားခဲ့တဲ့ ဟားမတ်စ်စစ်သွေးကြွတွေကို အစ္စရေးလ်တို့က အမြစ်ပြတ်ချေမှုန်းရန် ဆုံးဖြတ်ထားပါတယ်။

အစ္စရေးလ်တို့ရဲ့ တိုက်ခိုက်မှုကြောင့် ပါလက်စ်တိုင်းဘက်မှ လူပေါင်း ၁၈,၀၀၀ ခန့် သေဆုံးထားပြီး ၅ သောင်းနီးပါး ဒဏ်ရာရရှိခဲ့ကာ ထောင်ပေါင်းများစွာ ပျောက်ဆုံးနေပါတယ်။

ခန်းယူနစ်မြို့ရှိ အဓိကဆေးရုံကြီး နက်ဆာဆေးရုံမှာ သေဆုံးသူတွေ ဒဏ်ရာရသူတွေနဲ့ ပြည့်နှက်နေပါတယ်။

ဂါဇာမြို့ခံအများစုဟာ သူတို့ရဲ့နေအိမ်တွေကနေ စွန့်ခွာထွက်ပြေးနေရပြီး အစ္စရေးလ်တို့က အရပ်သားတွေကို အတတ်နိုင်ဆုံး ကာကွယ်ပေးမယ်လို့ ဆိုထားပေမယ့် ဒီကတိကို မထိန်းသိမ်းနိုင်ဘူးလို့ အနီးစပ်ဆုံးမဟာမိတ် အမေရိကန်ကပင် ဆိုထားပါတယ်။

#World_News #ဂါဇာတောင်ပိုင်း #အစ္စရေးလ်တင့်ကားများ #ခန်းယူနစ်မြို့လယ်သို့ရောက်ရှိ #Source: Reuters

#World_Health
Published 11 December 2023

လေ့ကျင့်ခန်းပြုလုပ်ခြင်းဟာ သက်ရှည်ကျန်းမားခြင်းအတွက် အဓိကသော့ချက် မဖြစ်နိုင်တဲ့အပြင် လှုပ်ရှားမှုပြုလုပ်လွန်းခြင်းဟာ ခန္ဓာကိုယ်ထဲက ဖြစ်စဥ်တွေ အိုမင်းရင့်ရော်မှုကို ပိုမိုမြန်ဆန်စေနိုင်ဖွယ်ရှိတယ်လို့ စကန်ဒီနေဗီးယန်း သိပ္ပံပညာရှင်များ လေ့လာတွေ့ရှိခဲ့ကြပါတယ်။

ယခင်လေ့လာချက် အများအပြားမှာ လေ့ကျင့်ခန်း ပိုမိုပြုလုပ်သူတွေက ပိုမိုကျန်းမာပြီး အသက်ရှည်တယ်ဆိုတာကို အတည်ပြုခဲ့ကြပါတယ်။

ယခုလေ့လာချက်မှာတော့ ကိုယ်လက်လှုပ်ရှားမှု ပြုလုပ်ခြင်းဟာ ဖြစ်စဥ်ကြီးတစ်ခုရဲ့ အစိတ်အပိုင်းငယ် တစ်ခုသာဖြစ်ပြီး အချို့နေရာတွေမှာ ကျန်းမာရေးဆိုးရွားမှုပါ ဖြစ်စေနိုင်တယ်လို့ တွေ့ရှိခဲ့တာဖြစ်ပါတယ်။

ဖင်လန်လူမျိုး ၁ သောင်းကျော်ကို လေ့လာစမ်းသပ်ပြီး သူတို့ရဲ့ လေ့ကျင့်ခန်း ပြုလုပ်ကြာချိန်နဲ့ ပြင်းထန်မှုတို့ကို ခွဲခြားစေခဲ့ပါတယ်။

ပုံမှန်လေ့ကျင့်ခန်း ပြုလုပ်သူတွေနဲ့ယှဥ်ရင် လေ့ကျင့်ခန်းအနည်းဆုံး ပြုလုပ်သူတွေက အသက် ၄၅ နှစ်ကျော်တဲ့အခါ သေဆုံးနိုင်ခြေ ၂၀ ရာခိုင်နှုန်း ပိုများနေပါတယ်။

ဒါကြောင့် အရာရာတိုင်းကို သင့်တင့်ရုံသာ ပြုလုပ်သင့်ပြီး လေ့ကျင့်ခန်း များလွန်းခြင်းနဲ့ နည်းလွန်းခြင်းတို့က ဇီဝဖြစ်စဥ်အိုမင်းရင့်ရော်ခြင်းကို ပိုမိုမြန်ဆန်စေတယ်လို့ တွေ့ရှိခဲ့တာ ဖြစ်ပါတယ်။

လှုပ်ရှားမှုကို ပုံမှန်ပြုလုပ်သူတွေထက် အပြင်းထန်ဆုံး ပြုလုပ်သူတွေက အသက် ၁.၈ နှစ် ပိုကြီးနေပါတယ်။

လေ့ကျင့်ခန်း လုပ်တဲ့သူတွေက ပိုမိုအသက်ရှည်တာမဟုတ်ဘဲ ပိုမိုကျန်းမာစွာ နေထိုင်နိုင်တဲ့သဘောသာ ဖြစ်ပါတယ်။

ဒါပေမဲ့ ကိုယ်လက်လှုပ်ရှားမှုလုပ်ပြီး ထိန်းရတဲ့ BMI ကို စစ်ထုတ်လိုက်မယ်ဆိုရင်တော့ လေ့ကျင့်ခန်းပြုလုပ်ခြင်းရဲ့ အချို့သက်ရောက်မှုတွေကို အနည်းငယ်လွဲချော်စေနိုင်တာကိုတော့ သတိပြုသင့်ပါတယ်။

#World_Health #လေ့ကျင့်ခန်းလုပ်ခြင်း #အိုမင်းရင့်ရော်ခြင်းကိုပိုမိုမြန်ဆန် #Source: New York Post

#World_Health
Published 11 December 2023

ကင်ဆာရောဂါဖြစ်စေနိုင်တဲ့ နေထိုင်စားသောက်မှုပုံစံ အမျိုးမျိုးရှိသလို ကင်ဆာဖြစ်နိုင်ခြေကို ၃၀ ရာခိုင်နှုန်းလောက်အထိ လျှော့ချပေးနိုင်တဲ့ နေထိုင်စားသောက်မှုပုံစံကောင်းတွေလည်း ရှိပါတယ်။

 တစ်နေ့ကို အသားကြီးငါးကြီး ၃ ကြိမ်ထက် ပိုမစားခြင်း၊ အချိုရည်ရှောင်ရှားခြင်း၊ လုံလောက်တဲ့ အမျှင်ဓာတ်ပါဝင်အောင် စားသုံးခြင်း၊ တစ်ပတ်ကို ကိုယ်လက်လှုပ်ရှားမှု ၂ နာရီခွဲပြုလုပ်ခြင်း၊ ကျန်းမာရေးနဲ့ ညီညွတ်တဲ့ ကိုယ်အလေးချိန်ထိန်းထားခြင်း၊ လမ်းဘေးစာလျှော့ချခြင်း၊ အရက်သေစာ လုံးဝရှောင်ရှားခြင်း စတဲ့နည်းလမ်းများ ပါဝင်နေပါတယ်။

ဒီအလေ့အကျင့်တွေဟာ ကင်ဆာဖြစ်နိုင်ခြေကို အတော်လေး လျှော့ချနိုင်တယ်လို့ လေ့လာချက်အများအပြားမှာ တွေ့ရှိထားပါတယ်။

အင်္ဂလန် နယူးကာဆယ်တက္ကသိုလ်မှ သုတေသီများက ပျမ်းမျှအသက် ၅၆ နှစ်ရှိ လူပေါင်း ၉၄,၀၀၀ ခန့်ကို လေ့လာခဲ့ကြပါတယ်။

လေ့လာမှုအတွက် ပါဝင်စမ်းသပ်သူတွေက သူတို့ရဲ့ စားသောက်မှုပုံစံတွေ၊ လေ့ကျင့်ခန်းတွေ၊ BMI နဲ့ ခါးအတိုင်းအတာတို့ကိုပါ ကိုယ်တိုင်တင်ပြကြပါတယ်။

ဒါ့အပြင် ယင်းတို့ရဲ့ အသက်အရွယ်၊ ကျား/မ၊ လူမှုစီးပွားရေးအခြေအနေ၊ လူမျိုးဘာသာ၊ ဆေးလိပ်သောက်/မသောက် အခြေအနေတို့ကိုပါ ထည့်သွင်းစဥ်းစားခဲ့ကြပါတယ်။

ထိုအခါမှာ ပျမ်းမျှအားဖြင့် ကျန်းမာရေးလမ်းညွှန်ချက် ရမှတ် ၇ မှတ်မှာ ၃.၈ မှတ်ရရှိခဲ့ကြပါတယ်။

လေ့လာချက်အတွင်း ၈ ရာခိုင်နှုန်းသောလူတွေဟာ ကင်ဆာဖြစ်ပွားခဲ့ပါတယ်။

လမ်းညွှန်ချက်များအတိုင်း အနီးစပ်ဆုံး ကျင့်ကြံနေထိုင်သူတွေဟာ ကင်ဆာဖြစ်နိုင်ခြေ နည်းပါးတယ်လို့ တွေ့ရှိခဲ့ကြပါတယ်။

ရမှတ် ၁ မှတ်တိုးလာတိုင်း ရင်သားကင်ဆာဖြစ်နိုင်ခြေ ၁၀ ရာခိုင်နှုန်း၊ အူမကြီးကင်ဆာ ဖြစ်နိုင်ခြေ ၁၀ ရာခိုင်နှုန်း၊ ကျောက်ကပ်ကင်ဆာ ဖြစ်နိုင်ခြေ ၁၈ ရာခိုင်နှုန်း၊ အစာရေမျိုကင်ဆာ ဖြစ်နိုင်ခြေ ၁၆ ရာခိုင်နှုန်း၊ အသည်းကင်ဆာ ဖြစ်နိုင်ခြေ ၂၂ ရာခိုင်နှုန်း၊ သားဥအိမ်ကင်ဆာ ဖြစ်နိုင်ခြေ ၂၄ ရာခိုင်နှုန်း၊ သည်းခြေအိတ်ကင်ဆာ ဖြစ်နိုင်ခြေ ၃၀ ရာခိုင်နှုန်း အသီးသီး လျှော့ချနိုင်ပါတယ်။

BMI ကို ၁၈.၅ မှ ၂၄.၉ မှတ်ကြား ထားရှိခြင်း၊ တစ်ပတ်ကို ကိုယ်လက်လှုပ်ရှားမှု ၂ နာရီခွဲကြာအောင် ပြုလုပ်ခြင်း၊ တစ်နေ့ကို အမျှင်ဓာတ် အနည်းဆုံး ၃၀ ဂရမ်ပါဝင်အောင် စားသုံးခြင်း၊ အသီးအရွက် အနည်းဆုံး ၅ ကြိမ်စားသုံးခြင်း၊ လမ်းဘေးစာ လျှော့ချစားသုံးခြင်း၊ အချိုရည်နဲ့ အရက်သေစာ ရှောင်ရှားခြင်း၊ မွေးကင်းစကလေးများ ၆ လအထိ မိခင်နို့တိုက်ကျွေးခြင်းတို့က ကင်ဆာကာကွယ်ရာမှာ အရေးပါပါတယ်။

#World_Health #ကင်ဆာရောဂါဖြစ်နိုင်ခြေ #နေထိုင်စားသောက်မှုပုံစံများ #Source: The Jerusalem Post

၁၀ ဒီဇင်ဘာ ၂၀၂၃

တောင်ကိုရီးယားနိုင်ငံ မြို့တော်ဆိုးလ်တွင် တနင်္လာနေ့မှစကာ မောင်းသူမဲ့ အလိုလိုမောင်းနှင်ပေးသည့် ညကြီးပိုင်းဘတ်စ်ကားများ စတင်ပြေးဆွဲ လျက်ရှိနေပါတယ်။ ဒါဟာ မီဂါမြို့တော်ကြီးမှာ အလိုအလျောက်ယာဉ်များသွားလာမှု တစ်ဆင့်တက်လှမ်းလိုက်တာဖြစ်ပါတယ်။

ရှေ့ပြေးအစီအစဉ်အရ လောလောဆယ်တော့ မောင်းသူမဲ့ဘတ်စ်ကားနှစ်စီးနှင့်စတင်ပြေးဆွဲနေပြီး လမ်းကြောင်းမှာ ဘတ်စ်ကားမှတ်တိုင်ပေါင်း ၄၀ ရှိပါတယ်။ ဒွန်ဒေးမွန်နှင့် ဟွန်ဒေးတို့လို ဆိုးလ်မြို့တော်ရဲ့ အစည်ကားဆုံးရပ်ကွက်တွေကို ယခုဘတ်စ် လိုင်းက  ၉.၈ ကီလိုမီတာ ခရီးရှိတဲ့လမ်းကြောင်းနှင့် ချိတ်ဆက်ပေးတာဖြစ်ပါတယ်။  အဲဒီဘတ်စ်ကားတွေကို ည ၁၁နာရီခွဲမှ မနက် ၅နာရီ ၁၀မိနစ်အထိပြေးဆွဲနေပြီး ခရီးသည်တွေအားလုံးထိုင်ခုံခါးပတ်ပတ်ပြီးစီးနင်းဖို့လိုအပ်ပါတယ်။ မတ်တပ်ရပ်ခရီးသည်ကိုလည်း ခွင့်မပြုပါဘူး။

ကားစီးရတာညင်သာတယ်လို့ ခရီးသည်တော်တော်များများက သတိပြုပြောဆိုကြပေမယ့် အချို့သော အခြေအနေတွေမှာ အန္တရာယ် တစ်ခုခုဖြစ်မှာကိုတော့ စိတ်ပူနေကြပါတယ်။

“ ရာသီဥတုက ဒီနေ့သာယာတယ်။ အဲဒါကြောင့် သက်သောင့်သက်သာတော့ အတော်ရှိပါတယ်။ ဒါပေမယ့် ဆိုးရွားတဲ့ရာသီဥတုအောက်မှာ ဒီဘတ်စ်ကားတွေ ချောချောမွေ့မွေ့မောင်းနိုင်ပါ့မလားဆိုတာတော့စိတ်ပူမိတယ်” လို့ ခရီးသည်တစ်ဦးကပြောပါတယ်။

မောင်းသူမဲ့အလိုအလျောက်မောင်းယာဉ်တစ်စီးမှာ  ဘေးကင်းရှင်းရေးဆိုင်ရာ အရာရှိနှစ်ဦးအနည်းဆုံးလိုက်ပါရပြီး အဲဒီသူတွေဟာ ခရီးသည် တွေဘေးကင်းရှင်းရေးအတွက် ယာဉ်မောင်းနှင်နေမှုကို အမြဲစောင့်ကြည်ကြည့်ရှုရမှာဖြစ်ပြီး အန္တရာယ်မဖြစ်ခင် ကြိုတင်တုန့်ပြန်မှုလုပ်ရမယ် လို့တော့ တောင်ကိုရီးယားနိုင်ငံ မြေယာ၊အခြေခံအဆောက်အဦနှင့်ပို့ဆောင်ရေးဝန်ကြီးဌာနက စည်းမျဉ်းတွေချမှတ်ထားပါတယ်။

လက်ရှိ ရှေ့ပြေးအစီအစဉ်အရ ညကြီးပိုင်းဘတ်စ်ကားမှာ ခရီးသည်တွေအားလုံးကို အခမဲ့စီးနင်းခွင့်ပြုထားပြီး မြို့အာဏာပိုင်တွေက ဘတ်စ်ကားခပေးစီးနင်းရမယ့်အစီအစဉ်နှင့်လမ်းကြောင်းတွေတိုးချဲ့ဖို့ ကို လာမယ့် နှစ်ပထမခြောက်လတာအတွင်း အကောင်အထည်ဖော်ဖို့ စဉ်းစားနေကြပါတယ်။

Source CCYV

#World_Health
Published 10 December 2023

ဂျပန်တို့ရဲ့ နာမည်ကျော် ဟင်းခတ်ပစ္စည်း ဝါဆာဘီဟာ မှတ်ဉာဏ်ပိုင်းတိုးတက်ရာမှာ အထောက်အကူဖြစ်စေတယ်လို့ သုတေသီများ တွေ့ရှိထားပါတယ်။

ဝါဆာဘီက ကျန်းမာရေးအတွက် အကျိုးရှိစေတယ်ဆိုတာကို သိရှိထားပြီးဖြစ်ပေမယ့် ရေတိုမှာရော ရေရှည်မှာပါ မှတ်ဉာဏ်ပိုင်းကို အကျိုးပြုစေတယ်ဆိုတာကိုတော့ ပထမဆုံး သိရှိလာတာ ဖြစ်ပါတယ်။

ဝါဆာဘီရဲ့ မှတ်ဉာဏ်ပိုင်း တိုးတက်စေမှုကို တိုဟိုကူတက္ကသိုလ်မှာ လေ့လာစမ်းသပ်ခဲ့ပါတယ်။

ဝါဆာဘီထဲက အဓိကပါဝင်ပစ္စည်း 6-MSITC ဟာ ဓာတ်တိုးဆန့်ကျင်ပစ္စည်းဖြစ်ကာ ရောင်ရမ်းခြင်းကိုလည်း ဆန့်ကျင်ပေးပြီး အခြားအပင်တွေမှာ အနည်းငယ်သာ တွေ့ရပါတယ်။

အသက် ၆၀ မှ ၈၀ ကြား ကျန်းမာရေးကောင်းမွန်တဲ့ လူ ၇၂ ဦးကို ခေါ်ယူကာ တဝက်ခန့်ကို ညအိပ်ချိန်မတိုင်ခင် ဝါဆာဘီ ၁၀၀ ဂရမ် စားသုံးစေခဲ့ပြီး ကျန်တဝက်ကိုတော့ အာနိသင်မရှိတဲ့အရာကို စားသုံးစေခဲ့ပါတယ်။

၃ လအကြာမှာ ဝါဆာဘီစားသုံးတဲ့အဖွဲ့က ဦးနှောက်သိရှိမှုစွမ်းရည်၊ ရေတိုမှတ်ဉာဏ်အပိုင်း၊ ရေရှည်မှတ်ဉာဏ်အပိုင်းတို့မှာ သိသိသာသာ မြင့်တက်ခဲ့တယ်လို့ တွေ့ရှိခဲ့ကြပါတယ်။

အပိုင်းအကန့်များပါဝင်တဲ့ မှတ်ဉာဏ်စွမ်းရည်ပိုင်းမှာ ပျမ်းမျှအားဖြင့် ၁၈ ရာခိုင်နှုန်း မြင့်တက်ခဲ့ပါတယ်။

ဝါဆာဘီဟာ မုန်ညင်းမျိုးနွယ်ဝင်ဖြစ်ကာ ပင်လယ်စာနဲ့ တွဲဖက်စားသုံးတဲ့အခါ အလွန်လိုက်ဖက်ပြီး ရောဂါပိုးမွှားဆန့်ကျင်နိုင်တဲ့ အစွမ်းသတ္တိလည်း ရှိပါတယ်။

တိုဟိုကူတက္ကသိုလ်က အခုဆိုရင် ပိုမိုငယ်ရွယ်တဲ့ လူတွေနဲ့ စမ်းသပ်သွားဖို့ ရည်ရွယ်ထားကာ ဒီမန်ရှာရောဂါ ခံစားနေရသူတွေမှာလည်း ဦးနှောက်အသိဉာဏ် ဆုတ်ယုတ်မှုကို လျော့ကျစေနိုင်မလားဆိုတာကို လေ့လာသွားဦးမှာ ဖြစ်ပါတယ်။

#World_Health #ဂျပန်ရိုးရာဟင်းခတ်ပစ္စည်း #ဝါဆာဘီ #အစွမ်းသတ္တိ #Source: WION