#Local_News
Published_ 8 May 2023

ဧရာဝတီတိုင်း၊ လပွတ္တာကျေးရွာနေပြည်သူအချို့ ဘင်္ဂလားပင်လယ်အော်တွင်ဖြစ်ပေါ်နိုင်သည့်မုန်တိုင်းအရှိန်သက်ရောက်မှုမှ ကြိုတင်ရှောင်နိုင်ရန်အတွက် လပွတ္တာမြို့ပေါ်နှင့် မြောင်းမြမြို့ပေါ်သို့သွားရောက်နေထိုင်လျက်ရှိကြောင်း လပွတ္တာမြို့နယ်ရှိလူမှုကူညီရေးအဖွဲ့မှ သိရသည်၊၊

မြစ်ဝကျွန်းပေါ်ဒေသ၊ လပွတ္တာမြို့ အောက်ဘက်ကျေးရွာများမှ မုန်တိုင်းသက်​ရောက်မှုရှောင် ပြည်သူများသည် မေလ(၆)ရက်ကတည်းက လပွတ္တာမြို့ပေါ်သို့ တက်ရောက်လာနေသလိုမြောင်းမြမြို့သို့လည်း အချို့သွားရောက်ကြသည်ဟုဆိုသည်၊၊

လက်ရှိတွင် လပွတ္တာမြို့ပေါ်ရှိ စာသင်တိုက်များ ၊ ဘုန်းကြီးကျောင်းများနှင့်နီးစပ်ရာ မြို့ပေါ်ရပ်ကွက်များသို့မုန်တိုင်းသက်ရောက်မှုမှရှောင်သည့် ပြည်သူ ထောင်နှင့်ချီရောက်ရှိနေပါပြီဖြစ်ကြောင်း လပွတ္တာမြို့နယ်ရှိ Heart laputta နှလုံးသားကျန်းမာရေး စောင့်ရှောက်မှုအဖွဲ့ထံမှသိရသည်၊၊

#ymg/tthl #Local_News #ဧရာဝတီတိုင်း #ကျေးရွာနေပြည်သူအချို့
#Yangon_Media_Group

#Local_News
Published_ 8 May 2023

သူနာပြုဆရာမကြီးတစ်ဦး မီးပြတ်လို့ အခန်းအတွင်းမီးစက်နှိုးထားရာမှ မီးစက်မှထွက်သည့် မီးခိုးငွေ့ရှူရှိုက်မိပြီး သေဆုံးမှု မန္တလေး အမရပူရမြို့နယ်မှာ ဖြစ်ပွားခဲ့တယ်လို့ မြို့ခံများမှသိရသည်။

မန္တလေးတိုင်း အမရပူရမြို့နယ်၊ တောတွင်ကျေးရွာရှိ စိတ်ကျန်းမာ‌ရေးဆေးရုံဝန်းအတွင်း နေထိုင်သည့် အသက် ၅၀ ကျော်အရွယ်ရှိ သူနာပြုဆရာမကြီးသည် မီးပြတ်လို့ အခန်းအတွင်း အဲကွန်းဖို့ရန် မီးစက်နှိုးထားရာမှ တစ်ဆင့် မီးစက်မှထွက်သည့် မီးခိုးငွေ့များ ရှူရှိုက်မိရာမှ သတိမေ့‌မျောပြီး နေအိမ်ဧည့်ခန်းအတွင်း ပြင်ပဒဏ်ရာ တစ်စုံတစ်ရာမရှိဘဲ သေဆုံးမှု မေလ ၇ ရက်နေ့က ဖြစ်ပွားခဲ့တာလို့ လောကပါလလူမှုကူညီရေးအသင်းမှ သိရသည်။

သူနာပြုဆရာမကြီးသည် စိတ်ကျန်းမာ‌ရေးဆေးရုံဝန်းအတွင်း (၆)ခန်းတွဲ လိုင်းခန်းရှိ အခန်းအမှတ်(၁)တွင် တစ်ဦးတည်းနေထိုင်သူလည်းဖြစ်ပြီး မီးပြန်လာချိန် မီးစက်မပိတ်လို့ အနီး ပတ်ဝန်းကျင်နေထိုင်သူတွေက သွားပြောချိန် ခေါ်မရလို့ဆိုပြီး သက်ဆိုင်ရာကိုအကြောင်းကြားလိုက်ရာမှ ရဲတွေရောက်လာ စစ်ဆေးချိန်မှာတော့ ပြင်ပဒဏ်ရာမှမရှိဘဲသေဆုံးနေခြင်း ဖြစ်သည်။

သေဆုံးသွားတဲ့ သူနာပြုဆရာမကြီးရဲ့ ရုပ်အလောင်းကို ဒေသခံ “လောကပါလ လူမှုကူညီရေးအသင်း” က မော် တော်ယာဉ်နဲ့ မန္တလေးအထွေထွေရောဂါ ကုဆေးရုံကြီးကို ပို့ဆောင်ပေးခဲ့ပြီးမြစ်ငယ် ရဲစခန်းတွင် သေမှုသေခင်းအမှတ်စဉ် ၄/ ၂၀၂၃ ဖြင့်ရေးဖွင့်ကာ ဓမ္မတာအတိုင်း သေ ဆုံးခြင်းဟုတ်မဟုတ် စုံစမ်းစစ်ဆေးဆောင် ရွက်နေတယ်လို့လည်း ဒေသခံတွေက တဆင့်သိရသည်။

#ymg/ppk #Local_News #သူနာပြုဆရာမကြီး #မီးခိုးငွေ့ရှူရှိုက်မိပြီးသေဆုံး
#YMG #Yangon-Media-Group

#Daily_News
Published_ 8 May 2023

၁။ မုန်တိုင်းဖြစ်နိုင်ခြေ လမ်းကြောင်းအနည်းငယ်ပြောင်းလဲမှုရှိ၊ ဧရာဝတီနှင့်ရန်ကုန်တိုင်းတို့ထက်ရခိုင်ကမ်းရိုးတန်းဒေသဘက်ဦးတည်နေ

၂။ သဘာဝဘေးအန္တရာယ်ဖြစ်ပေါ်ပါက ပျက်စီးမှုများ မဖြစ်စေရန် တောင်သူများအား ကူညီရေး ဆန်စပါးအသင်းချုပ်က ကြိုတင်စီစဉ်

၃။ ဓာတ်တော်ချိုင့်ရေတံခွန်တွင် ရေဆင်းကူရာမှလူငယ်ဦး ရေနစ်သေဆုံး

၄။ အာဖဂန်နစ္စတန်တွင် ခေတ်အဆက်ဆက် တိုယိုတာကိုရိုလာကားများအားလူကြိုက်များနေဆဲ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

 နောက်ဆုံးရသတင်း
____________
ယခုသတင်းတင်ဆက်နေချိန်တွင် လေဖိအားနည်းရပ်ဝန်းမဖြစ်သေးသောလည်း ယနေ့ မွန်းလွဲ၁နာရီအချိန်ထုတ်ပြန်ချက်အရ လေဖိအားနည်းရပ်ဝန်းစတင်ဖြစ်ပေါ်နေကြောင်း ဖြည့်စွက်သတင်းပေးပို့အပ်ပါသည်

#Yangon_Media_Group #Daily_News #YMG

Published 8 May 2023
ယနေ့မြန်မာစံတော်ချိန် (၁၂:၃၀)နာရီအချိန် တိုင်းထွာချက်များအရ ဘင်္ဂလားပင် လယ်အော် အရှေ့တောင်ပိုင်းနှင့် ယင်းနှင့်ဆက်စပ်လျက်ရှိသော ကပ္ပလီပင်လယ်ပြင် တောင်ပိုင်းတို့တွင် လေဖိအားနည်းရပ်ဝန်းတစ်ခု ဖြစ်ပေါ်နေပြီလို့ မိုး/ဇလ တရားဝင်သတင်းထုတ်ပြန်ပါတယ်။
ထုတ်ပြန်ချက်အပြည့်အစုံမှာ-
လေဖိအားနည်းရပ်ဝန်းအခြေအနေ
------------------------------------------
(၂၀၂၃ ခုနှစ်၊ မေလ ၈ ရက်နေ့ မြန်မာစံတော်ချိန်(၁၃:၀၀)နာရီအချိန်ထုတ်ပြန်ချက်)
=================================================
(က) လေဖိအားနည်းရပ်ဝန်းအခြေအနေ
----------------------------------------------------
ယနေ့မြန်မာစံတော်ချိန် (၁၂:၃၀)နာရီအချိန် တိုင်းထွာချက်များအရ ဘင်္ဂလားပင် လယ်အော် အရှေ့တောင်ပိုင်းနှင့် ယင်းနှင့်ဆက်စပ်လျက်ရှိသော ကပ္ပလီပင်လယ်ပြင် တောင်ပိုင်းတို့တွင် လေဖိအားနည်းရပ်ဝန်းတစ်ခု ဖြစ်ပေါ်နေပါသည်။ အဆိုပါ လေဖိအားနည်းရပ်ဝန်း(Low Pressure Area)သည် ပိုမိုအားကောင်းလာနိုင်ပြီး၊ (၉.၅.၂၀၂၃)ရက်နေ့တွင် မုန်တိုင်းငယ်(Depression)အဖြစ်သို့ ရောက်ရှိနိုင်ကာ၊ မြောက်ဘက်သို့ ဆက်လက်ရွေ့လျားနိုင်ပြီး (၁၀.၅.၂၀၂၃)ရက်နေ့တွင် ဘင်္ဂလား ပင်လယ်အော်အလယ်ပိုင်းနှင့် ယင်းနှင့်ဆက်စပ်လျက်ရှိသော ကပ္ပလီပင်လယ်ပြင် မြောက်ပိုင်းတို့တွင် ဆိုင်ကလုန်းမုန်တိုင်း (Cyclonic Storm)အဖြစ်သို့ အားကောင်း လာနိုင်သည်ဟု ခန့်မှန်းရပါသည်။
(ခ) သတိပေးနှိုးဆော်ချက်
------------------------------------------
သို့ဖြစ်ပါ၍ မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် (၉.၅.၂၀၂၃)ရက်နေ့မှ (၁၄.၅.၂၀၂၃)ရက်နေ့အတွင်း မကြာခဏ မိုးသက်လေပြင်း များကျရောက်ပြီး လှိုင်းကြီးရာမှ လှိုင်းအလွန်ကြီးနိုင်ပါသည်။ မိုးသက်လေပြင်း ကျစဉ် ရေပြင်/မြေပြင်လေသည် တစ်နာရီလျှင် မိုင်(၇၀)မှ မိုင်(၈၀)ခန့်အထိ တိုက် ခတ်နိုင်သည်ဟု ခန့်မှန်းရပါသည်။ နေပြည်တော်၊ စစ်ကိုင်းတိုင်းဒေသကြီး၊ မန္တလေး တိုင်းဒေသကြီး၊‌ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသ ကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ရှမ်း ပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာနိုင်ပြီး၊ အချို့ ဒေသများတွင် ဒေသအလိုက်နှင့် နေရာကွက်၍ မိုးကြီးနိုင်ပါသည်။
အကြံပြုချက်
----------------------------------
အဆိုပါဖြစ်ပေါ်လာနိုင်သည့် ဆိုင်ကလုန်းမုန်တိုင်း၏အရှိန်ကြောင့် လေပြင်းတိုက်ခတ်ခြင်း၊ မိုးကြီးခြင်း၊ ရုတ်တရက်ရေကြီးခြင်းနှင့်အတူ မြေပြိုခြင်းများ ဖြစ်ပေါ်နိုင်ပါသဖြင့် ကုန်းမြင့်ဒေသ အနီးတွင် နေထိုင်ကြသူများအနေဖြင့် မြေပြိုမှုအန္တရာယ်ကိုလည်းကောင်း၊ မြန်မာ့ကမ်းရိုးတန်း တစ်လျှောက်နှင့် မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှု များ ဖြစ်ပေါ်နိုင်သောကြောင့် ကြိုတင်သတိပြုနေထိုင်ကြပါရန်နှင့် ပြည်တွင်းလေကြောင်း ပျံသန်း ရေးနှင့် မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့ရှိ ကမ်းနီး၊ ကမ်းဝေး ငါးဖမ်း ရေယာဉ်များ၊ သင်္ဘောများအနေဖြင့်လည်း ကြိုတင်သတိပြုရှောင်ရှားနိုင်ပါရန်နှင့် ပြည်သူလူထု အနေဖြင့် မိုးလေဝသနှင့်ဇလဗေဒညွှန်ကြားမှုဦးစီးဌာန၏ အချိန်နှင့်တပြေးညီထုတ်ပြန်ချက်များ ကိုစောင့်ကြည့်၍ လိုအပ်သည့်ကြိုတင်ပြင်ဆင်မှုများကို ဆောင်ရွက်သွားနိုင်ပါရန် အကြံပြုအပ်ပါ သည်။

Published 8 May 2023

မြန်မာနိုင်ငံမှာ ဆိုက်ဘာလိမ်လည်မှုအစိတ်အပိုင်းတစ်ခုအဖြစ် လူကုန်ကူးခံခဲ့ရတဲ့ အင်ဒိုနီးရှား နိုင်ငံသား ၂၀ ဦးကို ပြည်တွင်းကွန်ယက်တွေရဲ့ အကူအညီနှင့် အင်ဒိုနီးရှားက ကယ်ထုတ်နိုင်ခဲ့တယ်လို့ အေပီသတင်းဌာနက သတင်းဖော်ပြထားပါတယ်။

အဲဒီအင်ဒိုနီးရှားနိုင်ငံသား ၂၀ ဦးကို မြဝတီမြို့ကနေ ထိုင်းနယ်စပ်ရောက်အောင် စနေနေ့က ကယ်ထုတ်နိုင်ခဲ့တာဖြစ်တယ်လို့  အင်ဒိုနီးရှားသံရုံးကပြောပါတယ်။

ဘန်ကောက်မှာရှိတဲ့ အင်ဒိုနီးရှားသံရုံးက အဆိုပါ အင်ဒိုနီးရှားနိုင်ငံသားတွေကို နေရပ်ပြန်ပို့ပေးဖို့ ထိုင်းအာဏာပိုင်တွေနှင့် အနီးကပ်လုပ်ဆောင်နေပြီလို့လည်း သံရုံးကဆိုပါတယ်။

အလုပ်ခန့်ထားရေးကုမ္ပဏီအတုတွေက သူတို့ကို ထိုင်းမှာ လစာကောင်းကောင်းအလုပ်ရမယ်ဆိုပြီး ညာခေါ်ခဲ့ကြပါတယ်။ အဲဒီနောက် သူတို့ကို မြဝတီမြို့ကို ပို့ဆောင်ပေးခဲ့ကြတာဖြစ်ပါတယ်။ သူတို့ကို မြဝတီမြို့မှာ  ခရစ်ပတိုဝက်ဘ်ဆိုက်နှင့် အက်ပလီကေးရှင်းတွေအသုံးပြုပြီး ဆိုက်ဘာကနေလိမ်ညာတဲ့အလုပ်တွေလုပ်ဖို့ ပို့ခဲ့တာဖြစ်တယ်လို့ အင်ဒိုနီးရှား နိုင်ငံခြားရေးဝန်ကြီးဌာန အရာရှိတစ်ဦးဖြစ်တဲ့ ဂျူဒါနူဂရာဟာကပြောတယ်လို့ သတင်းမှာဖော်ပြထားပါတယ်။

အဲဒီသူတွေထဲက တစ်ဦးက သူတို့ဒုက္ခရောက်နေတဲ့ ဗီဒီယိုတစ်ခုကို ပြီးခဲ့တဲ့လက တင်ပြီးတဲ့နောက် အဲဒီဗွီဒီယိုကို လူတော် တော်များများသိသွားခဲ့ပါတယ်။ သူတို့က အင်ဒိုအစိုးရကို သူတို့ကိုကယ်ထုတ်ပေးဖို့ တောင်းဆိုခဲ့တာပါ။

မြဝတီမရောက်ခင်အထိ လွန်ခဲ့တဲ့ ၈ လအတွင်း သူတို့ဟာ ကုမ္ပဏီတစ်ခုကနေ နောက်တစ်ခုကို တစ်မျိုးပြီးတစ်မျိုး  လွှဲပြောင်းပေးခံခဲ့ရတယ်လို့ သူတို့ကပြောပါတယ်။ ညှင်းပန်းနှိပ်စက်မှုတွေအမျိုးမျိုးခံခဲ့ရတယ်လို့လည်း  သူတို့က ပြောကြောင်း သတင်းအရသိရပါတယ်။

မြန်မာနိုင်ငံရဲ့ လူဝင်မှုကြီးကြပ်ရေးမှတ်တမ်းမှာ သူတို့ဝင်လာတဲ့ အထောက်အထားမတွေ့ရှိရတဲ့အတွက် သူတို့ဟာ မြန်မာနိုင်ငံထဲ လူကုန်ကူးခံရတာဖြစ်ဖို့များတယ်လို့ အင်ဒိုနီးရှားအာဏာပိုင်တွေကပြောပါတယ်။

သူတို့ဘယ်လိုလွတ်မြောက်လာတယ်ဆိုတာ ထုတ်မပြောပေမယ့် သူတို့ကိုခန့်တဲ့ ကုမ္ပဏီနှင့် အပေးအယူညှိနှိုင်းမှုတွေ လုပ်ခဲ့တယ်လို့ အင်ဒိုနီးရှားရဲတပ်ဖွဲ့ကပြောတယ်လို့ အေပီသတင်းအရသိရပါတယ်။

#ymg/knl

#YangonMediaGroup

#လူကုန်ကူးမှု

#အင်ဒိုနီးရှားနိုင်ငံသား၂၀ဦးကိုမြဝတီမှကယ်ထုတ်

#Local_News
Published_ 8 May 2023

မြန်မာနိုင်ငံနှင့် အိန္ဒိယနိုင်ငံအကြား ဗုဒ္ဓဘာသာ သာသနာ အဓွန့်ရှည် ပြန့်ပွားရေး၊ နှစ်နိုင်ငံ၏ ရိုးရာယဉ်ကျေးမှု အမွေအနှစ်များ ပြန်လည်ဖော်ထုတ်ထိန်းသိမ်းရေးတို့ကို ဆွေးနွေးခဲ့ကြကြောင်း သိရပါတယ်။

အိန္ဒိယနိုင်ငံ၊ ပြည်ပရေးရာဝန်ကြီးဌာနနှင့် ယဉ်ကျေးမှုဝန်ကြီးဌာန ဒုတိယဝန်ကြီး H.E. Smt. Meenakshi Lekhi ၏ ဖိတ်ကြားမှုအရ မြန်မာသံအမတ်ကြီး ဦးမိုးကျော်အောင် သည် မေ (၆) ရက်၊ နေ့လည်ပိုင်းတွင် နယူးဒေလီမြို့၊ National Gallery of Modern Art ရှိ ၎င်း၏ ရုံးခန်းသို့ သွားရောက်တွေ့ဆုံစဉ် ဆွေးနွေးခဲ့တာ ဖြစ်ပါတယ်။

ထို့ပြင် ကျောက်မျက်ရတနာ၊ အထည်အလိပ်နှင့် လက်မှုအနုပညာလုပ်ငန်းကဏ္ဍ များ၌ ပူးပေါင်းဆောင်ရွက်မှု တိုးမြှင့်နိုင်ရန် ကိစ္စရပ်များကို ခင်မင်ရင်းနှီးစွာ ဆွေးနွေးခဲ့ ကြပြီး အပြန်အလှန် အမှတ်တရလက်ဆောင်ပစ္စည်းများ ပေးအပ်ခဲ့ကြကြောင်း သတင်းရရှိ ပါတယ်။

မြန်မာနိုင်ငံနှင့် အိန္ဒိယနိုင်ငံတို့ဟာ သမိုင်းကြောင်းတစ်လျှောက် ခင်မင်ရင်းနှီး ခဲ့ကြတဲ့ အိမ်နီးချင်းတွေ ဖြစ်ကြပါတယ်။

#ygm_mnn #Local_News #မြန်မာနိုင်ငံနှင့် အိန္ဒိယနိုင်ငံအကြား #ရိုးရာယဉ်ကျေးမှု အမွေအနှစ်များ #YMG #Yangon_Media_Group