#Local_News
Published_ 10 May 2023

တရုတ်-မြန်မာနိုင်ငံတကာ ရထားလမ်းကြောင်းတွင် အင်တာနက်လွှမ်းခြုံမှု စီမံကိန်းစတင်တည်ဆောက်လျက်ရှိကြောင်း မြန်မာနိုင်ငံဆိုင်ရာတရုတ်သံရုံးမှ သိရသည်၊၊

အင်တာနက်လွှမ်းခြုံမှုစီမံကိန်း တည်ဆောက်ပြီးစီးပြီးနောက် အဆိုပါလမ်းပိုင်း၌ ရထားပြေးဆွဲဝန်ဆောင်မှုအဆင့်အတန်းအားများစွာ မြှင့်တင်ပေးနိုင်မည်ဖြစ်သည်ဟု ထုတ်ပြန်ချက်တွင်ပါရှိသည်၊၊

သံရုံးထုတ်ပြန်ချက်တွင် တရုတ်နိုင်ငံ ယူနန်ပြည်နယ်ရှိ တာလီ-ရွှေလီရထားလမ်းသည် တရုတ်-မြန်မာနိုင်ငံတကာ ရထားလမ်းကြောင်း၏ အရေးပါဖွဲ့စည်းပုံအစိတ်အပိုင်းဖြစ်ကြောင်း၊ မေလ ၈ ရက်နေ့တွင် တာလီ-ရွှေလီရထားလမ်း၏ တာလီ-ပေါင်စန်းလမ်းပိုင်း အင်တာနက်လွှမ်းခြုံမှုစီမံကိန်းအတွက် ပထမဆုံးညဘက်လမ်းပိတ်တည်ဆောက်မှုလုပ်ငန်းကိုစတင်ခဲ့ကြောင်း၊

ဝန်ထမ်းဦးရေဆယ်ချီသည် လိုဏ်ခေါင်းအတွင်းဝင်ရောက်၍ လမ်းကြောင်းတိုင်းတာခြင်းနှင့် အပေါက်ဖောက်ခြင်းလုပ်ငန်းများ စတင်လုပ်ဆောင်ခဲ့ရာ တာလီ-ရွှေလီရထားလမ်း တာလီ-ပေါင်စန်းလမ်းပိုင်း အင်တာနက်လွှမ်းခြုံမှုစီမံကိန်းသည် ဘက်စုံစတင်ဖော်ဆောင်သည့်အဆင့်သို့ ဝင်ရောက်နေပြီဖြစ်ကြောင်း ဖော်ပြနေကြောင်း၊

အဆိုပါ စီမံကိန်းတွင် လိုဏ်ခေါင်း ၂၁ ခု စုစုပေါင်းအရှည် ၁၀၃.၆၈ ကီလိုမီတာရှိသည့် China Mobile ၊ China Unicom 4G/5G အင်တာနက် Signal လွှမ်းခြုံမှု၊ ၁၃၃.၆၆ ကီလိုမီတာရှိသည့် လမ်းကြောင်းတစ်လျှောက် ပို့ဆောင်ရေးစီမံကိန်းစသည်တို့ ပါဝင်ကြောင်းဖော်ပြပါရှိသည်၊၊

#ymg/tthl #Local_News #တရုတ်-မြန်မာ #အင်တာနက်လွှမ်းခြုံမှုစီမံကိန်း
#YMG #Yangon_Media_Group

#Local_News
Published_ 10 May 2023

ဘင်္ဂလားပင်လယ်အော်တွင် ဖြစ်ပေါ်နေသည့် မုန်တိုင်းအရှိန်သက်ရောက်မှုကြောင့် နေပြည်တော်၊ ရန်ကုန်၊ မန္တလေးအပါအဝင်ဒေသ(၁၅)ခု၌ မေလ(၁၁)ရက်မှ မေလ(၁၅)ရက်အထိ(၅)ရက်တိုင်တိုင် မိုးကြီးနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနမှ သိရသည်၊၊

အဆိုပါမိုးကြီးမည့်အကြောင်းကို မေလ(၁၀)ရက်နေ့လည်ပိုင်းတွင် ထုတ်ပြန်သော အားကောင်းသောမုန်တိုင်းငယ် သတိပေးချက် အမှတ်စဉ်(၀၃/၂၀၂၃) တွင်ထည့်သွင်းဖော်ပြထားခြင်းဖြစ်သည်၊၊

အားကောင်းသော မုန်တိုင်းငယ်(Deep Depression)၏ အရှိန်ကြောင့် (၁၁.၅.၂၀၂၃) ရက်နေ့မှ (၁၅.၅.၂၀၂၃)ရက်နေ့အတွင်း နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊‌ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်း ဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ရှမ်း ပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နှင့်မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် ဒေသအလိုက်နှင့် နေရာကွက်၍ မိုးကြီးနိုင်ကြောင်း ဖော်ပြထားသည်၊၊

လတ်တလောမေလ(၁၀)ရက်တွင် အားကောင်းသောမုန်တိုင်းငယ်(Deep Depression)၏ လက်ရှိအခြေ အနေမှာဘင်္ဂလားဒေ့ရှ်-မြန်မာကမ်းရိုးတန်းသို့ဦးတည်ရွေ့လျားနိုင်သည့် အခြေအနေရှိပါသဖြင့် လိမ္မော်ရောင်အဆင့်သတ်မှတ်ထားကြောင်း (၁၁.၅.၂၀၂၃)ရက်နေ့ နံနက်ပိုင်းတွင် အားကောင်းသော ဆိုင်ကလုန်းမုန်တိုင်း (Severe Cyclonic Storm)အဖြစ်သို့လည်းကောင်း၊ (၁၂.၅.၂၀၂၃)ရက်နေ့ နံနက်ပိုင်းတွင် ဘင်္ဂလားပင်လယ်အော်အရှေ့တောင်ပိုင်းနှင့် ယင်းနှင့်ဆက်စပ်လျက်ရှိသော ဘင်္ဂလားပင်လယ်အော်အလယ်ပိုင်း၌ အားအလွန် ကောင်းသောဆိုင်ကလုန်းမုန်တိုင်း (Very Severe Cyclonic Storm)အဖြစ်သို့ လည်းကောင်း ရောက်ရှိနိုင်ပါသည်။

ထို့နောက် (၁၃.၅.၂၀၂၃)ရက်နေ့တွင် မြောက်- အရှေ့မြောက်ဘက်သို့ တဖြည်းဖြည်းကွေ့ကာ အားအနည်းငယ်လျော့သွားနိုင်ပြီး၊ (၁၄.၅.၂၀၂၃)ရက်နေ့တွင် ဘင်္ဂလားဒေ့ရှ်နိုင်ငံ အရှေ့တောင်ပိုင်းနှင့် မြန်မာနိုင်ငံ၊ ရခိုင်ကမ်းရိုးတန်းမြောက်ပိုင်းကမ်းခြေကို ဘင်္ဂလားဒေ့ရှ်နိုင်ငံ၊ ကော့ဘဇားမြို့ (Cox’s Bazar)နှင့် မြန်မာနိုင်ငံ၊ ကျောက်ဖြူမြို့တို့ကြားမှ ဖြတ်ကျော်ဝင်ရောက်နိုင်သည်ဟု ခန့်မှန်းထားသည်၊၊

#ymg/tthl #Local_News #မုန်တိုင်းအရှိန်သက်ရောက်မှုကြောင့်မိုးကြီးနိုင်
#YMG #Yangon_Media_Group

#Local_News
Published_ 10 May 2023

ရန်ကုန်တိုင်းဒေသကြီးတွင် မေလ(၁၀)ရက် နေ့လည်ပိုင်းအချိန်တွင် သာကေတမြို့နယ်၊ မြောက်ဥက္ကလာမြို့နယ်၊ တာမွေမြို့နယ်အပါအဝင် မြို့နယ်အချို့၌မိုးများရွာသွန်းခြင်း၊ မိုးခြိမ်းခြင်းများဖြစ်ပေါ်လျက်ရှိကြောင်း သိရသည်၊၊

သင်္ကြန်ကာလမှာရော ကဆုန်လပြည့်နေ့မှာပါ ရန်ကုန်တွင် မိုးရွာသွန်းခြင်းမရှိခဲ့ဘဲ ယခုမှကွက်ကျား မိုးရွာသွန်းခဲ့ခြင်းဖြစ်သည်၊၊

"တာမွေမှာအခုနေ့လည်၁နာရီခွဲလောက်စရွာတယ်၊၊ မိုးဖွဲဖွဲလေးကနေ မိုးပေါက်ပေါက်ရွာတယ်၊၊မိုးတွေတော့ခြိမ်းနေတယ်"ဟု တာမွေမြို့နယ်နေပြည်သူတစ်ဦးက ပြောသည်၊၊

မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရမေလ(၁၀)ရက် ညနေပိုင်းတွင်တနင်္သာရီတိုင်းဒေသကြီး၊ ရှမ်းပြည်နယ်(မြောက်ပိုင်း)၊ ကရင်ပြည်နယ်နှင့် မွန်ပြည်နယ်တို့တွင် နေရာအနှံအပြား၊ ရှမ်းပြည်နယ်(တောင်ပိုင်းနှင့် အရှေ့ပိုင်း)နှင့် ကယားပြည်နယ်တွင် နေရာစိပ်စိပ်၊ နေပြည်တော်၊ စစ်ကိုင်းတိုင်းဒေသကြီးအောက်ပိုင်း၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီးနှင့် ဧရာဝတီတိုင်းဒေသကြီးတို့တွင် နေရာကျဲကျဲ နှင့် ကျန်တိုင်းဒေသကြီးနှင့် ပြည်နယ်တို့တွင် နေရာကွက်ကျား မိုးထစ်ချုန်းရွာမည်ဖြစ်သည်၊၊

နောက်(၂)ရက်အတွက်ခန့်မှန်းချက်အနေဖြင့် နေပြည်တော်၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ရှမ်းပြည်နယ်(တောင်ပိုင်းနှင့် အရှေ့ပိုင်း)၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို တွင် နေရာအနှံအပြားနှင့် စစ်ကိုင်းတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ရှမ်းပြည်နယ်(မြောက်ပိုင်း)နှင့် ချင်းပြည်နယ်တို့တွင် နေရာကျဲကျဲမှ နေရာစိပ်စိပ် မိုးထစ်ချုန်းရွာနိုင်ကြောင်း သိရသည်၊၊

#ymg/tthl #Local_News #ရန်ကုန်တိုင်း #မြို့နယ်အချို့မိုးရွာ
#Yangon_Media_Group

#Local_news
Published_ 10 May 2023

ဝါရှင်တန်မြို့ရှိ ကမ္ဘောဒီးယားသံရုံး၌ မေ ၈ ညရက်တွင် ကျင်းပသည့် အာဆီယံ ကော်မတီ-ဝါရှင်တန်က အမေရိကန် နိုင်ငံခြားရေးဝန်ကြီးဌာနမှ ပညာရေးနှင့် ယဉ်ကျေးမှု ရေးရာဌာန ဒုတိယလက်ထောက်ဝန်ကြီးကိုတည်ခင်းဧည့်ခံသည့် အလုပ်သဘော နေ့လယ် စာစားပွဲသို့ မြန်မာသံရုံးမှယာယီတာဝန်ခံ/သံအမတ် ဦးသက်ဝင်း တက်ရောက်ခဲ့ပါတယ်။

အဆိုပါ အလုပ်သဘော နေ့လယ်စာစားပွဲသို့ အမေရိကန်နိုင်ငံခြားရေးဝန်ကြီးဌာန၊ ပညာရေး နှင့် ယဉ်ကျေးမှုရေးရာဌာန ဒုတိယ လက်ထောက် ဝန်ကြီး Ms. Lee Satterfield ၊ အမေရိကန်-အာဆီယံ စီးပွားရေးကောင်စီ ဥက္ကဋ္ဌ သံအမတ်ကြီး H.E. Mr. Ted Osius ၊ အမေရိကန်နိုင်ငံခြားရေးဝန်ကြီးဌာန၊ အရှေ့အာရှနှင့် ပစိဖိတ်ဒေသရေးရာဌာန၊ နိုင်ငံစုံ ရေးရာရုံးမှ ညွှန်ကြားရေးမှူး Ms. Holly Lindquist Thomas နှင့် သတင်းနှင့်လူထု ဆက်ဆံရေးသံတမန်ရေးရာ ညွှန်ကြားရေးမှူး Mr. Brian Gibel ၊ အမျိုးသားလုံခြုံရေး ကောင်စီမှ အရှေ့တောင်အာရှနှင့် ပစိဖိတ်ကျွန်းနိုင်ငံများဆိုင်ရာ အကြီးတန်း ညွှန်ကြား ရေးမှူး Mr. Edgard Kagan နှင့် ညွှန်ကြားရေးမှူးများနှင့် အမေရိကန်-အာဆီယံ ပို့ချမှုအစီအစဉ်ဆိုင်ရာ ညွှန်ကြားရေးမှူးတို့ တက်ရောက်ခဲ့ကြပါတယ်။

ထို့နောက် ကော်မတီအလှည့်ကျ ဥက္ကဋ္ဌ ကမ္ဘောဒီးယားသံအမတ်ကြီး H.E. Mr. Keo Chhea မှ ဦးဆောင်၍ တက်ရောက်လာကြသူများက နှစ်ဖက်ဆက်ဆံရေးဆိုင်ရာ ကိစ္စရပ်များ၊ ယဉ်ကျေးမှုနှင့် ပညာရေး ပူးပေါင်းဆောင်ရွက်မှုဆိုင်ရာ ကိစ္စရပ်များကို အမြင်ချင်းဖလှယ် ဆွေးနွေးခဲ့ကြောင်း သတင်းရရှိပါတယ်။

#ygm_mnn #အမေရိကန် #အာဆီယံကော်မတီ၏နေ့လယ်စာစားပွဲ #မြန်မာသံရုံးယာယီတာဝန်ခံ #YMG #Yangon_Media_Group

#Local_News
Published_ 10 May 2023

တရားမဝင်ကိုင်ဆောင်ထားသည့် လက်နက်ခဲယမ်းများ လိုင်စင်လျှောက်ထားရန်လိုအပ်ကြောင်း နစက သတင်းထုတ်ပြန်ရေးအဖွဲ့က မေလ ၉ ရက်တွင် ထုတ်ပြန်လိုက်သည်။

ထုတ်ပြန်ချက်တွင် "ယနေ့အချိန်ကာလတွင် အကြမ်းဖက်သမားများက အပြစ်မဲ့ပြည်သူလူထုအပေါ် အကြမ်းဖက်သတ်ဖြတ်တိုက်ခိုက်မှုများကြောင့် ပြည်သူလူထုအတွင်း၌ လူပုဂ္ဂိုလ်လုံခြုံရေးကို စိုးရိမ်ကြသည့်အတွက် လက်နက်ခဲယမ်းများကို နည်းလမ်းမျိုးစုံဖြင့်ရှာဖွေကာ တရားမဝင်ကိုင်ဆောင်လျက်ရှိကြောင်း ကြားသိနေရပါသည်။ မူလရည်ရွယ်ချက်မှာ လူပုဂ္ဂိုလ်လုံခြုံရေးအတွက်ဖြစ်သော်လည်း လက်နက်ခဲယမ်းများလက်ဝယ်ရှိနေချိန်တွင် လူ၏စိတ်သည်အချိန်မရွေးပြောင်းလဲသွားနိုင်ပြီး တရားမဝင်ကိုင်ဆောင်ထားခြင်းဖြစ်သဖြင့် တစ်ချိန်ချိန်တွင် တစ်လွဲအသုံးပြုမှုများ ဖြစ်ပေါ်လာနိုင်သည့်အပြင် ဥပဒေနှင့်လည်းညီညွတ်မှုမရှိကြောင်း တွေ့ရှိရပါသည်။ ထို့ကြောင့် တရားမဝင်လက်နက်ခဲယမ်းကိုင်ဆောင်မှုများ လျော့နည်းပပျောက်စေရေးနှင့် လက်နက်ခဲယမ်းများကို တစ်လွဲအသုံးပြုမှုများမဖြစ်ပေါ်စေရေးအတွက် လက်နက်ခဲယမ်းကိုင် ဆောင်ခွင့်မူနှင့်အညီ စနစ်တကျလိုင်စင်ထုတ်ပေးရေးကို နိုင်ငံတော်စီမံအုပ်ချုပ်ရေးကောင်စီက စီမံဆောင်ရွက်ပေးသွားမည်ဖြစ်ပါသည်"ဟု ဖော်ပြထားသည်။

လက်နက်ခဲယမ်းကိုင်ဆောင်ခွင့် လိုင်စင်လျှောက်ထားသည့်သေနတ်မှာ မည်သို့ ရရှိထားသည်ကိုစစ်ဆေးမေးမြန်းသွားမည်မဟုတ်ဘဲ လျှောက်ထားလိုသည့် လက်နက်ခဲယမ်းနှင့်တကွ အပ်နှံလျှောက်ထားရမည်ဖြစ်ကြောင်း သိရသည်။

ယင်းနောက် လက်နက်ခဲယမ်းကိုင်ဆောင် ခွင့်လိုင်စင်လျှောက်ထားမှုအပေါ် လက်နက်ခဲယမ်းကိုင်ဆောင်ခွင့်မူနှင့်အညီစိစစ်၍ သတ်မှတ်ချက်နှင့်ကိုက်ညီသူများကို လိုင်စင်ထုတ်ပေးသွားမည်ဖြစ်ကြောင်း၊ သီးခြားထုတ်ပြန်ပေးမည့် သတ်မှတ်ကာလအတွင်းလက်နက်ခဲယမ်းအပ်နှံ၍ လိုင်စင်လျှောက်ထားခြင်းမရှိပါက ဖော်ထုတ်ဖမ်းဆီး၍ ထိရောက်စွာအရေးယူသွားမည်ဖြစ်ကြောင်း အဆိုပါ ထုတ်ပြန်ချက်တွင် ဖော်ပြထားသည်။

#ymg/pl #Local_News #လက်နက်ခဲယမ်း #လိုင်စင်လျှောက်ထားရန်လိုအပ်
#Yangon_Media_Group

#Local_News
Published_ 10 May 2023

PDF အပါအဝင် အကြမ်းဖက်အဖွဲ့များအတွင်းရောက်ရှိနေသူများ၊ ဥပဒေပြင်ပရှိ၊ အဖွဲ့အစည်းများအတွင်း ရောက်ရှိနေသူများအနေဖြင့် နိုင်ငံတော်တည်ဆောက်ရေးတွင် ပါဝင်နိုင်ရန်အတွက် ဥပဒေဘောင်အတွင်းသို့ ပြန်လည်ဝင်ရောက်ရန် ဆုကြေးထုတ်၍ ဖိတ်ခေါ်ကြောင်း နစက သတင်းထုတ်ပြန်ရေး အဖွဲ့က ထုတ်ပြန်လိုက်သည်။

ဥပဒေဘောင်အတွင်းဝင်ရောက်လာပါက လိုအပ်သည့်ကူညီပံ့ပိုးမှုများကို ဆောင်ရွက်ပေးသွားမည်ဖြစ်ပြီး လက်နက်၊ခဲယမ်းပါရှိလာသူများအားဆုကြေးငွေ ထောက်ပံ့ပေးသွားမည်ဖြစ်ကြောင်းလည်း ထုတ်ပြန်ချက်တွင် ဖော်ပြထားသည်။

ယင်းဆုငွေများမှာ ရိုင်ဖယ်အုပ်စုဝင်သေနတ် (၁) လက်ပါရှိပါက ကျပ် (၅၀) သိန်း၊ ပစ္စတိုအုပ်စုဝင်သေနတ် (၁) လက်ပါရှိပါက ကျပ် (၂၀) သိန်း၊ပြောင်းချောသေနတ် (၁) လက်ပါရှိပါက ကျပ် (၃၀) သိန်း၊စိန်ပြောင်း၊ လောင်ချာ၊ အာဝီဂျီကဲ့သို့သော လက်နက်များ(၁)လက်ပါရှိပါက ကျပ် (၇၅)သိန်း၊လက်လုပ်ပြောင်းချောသေနတ်၊ လက်လုပ်စိန်ပြောင်း၊ လက်လုပ်သေနတ် (၁) လက်ပါရှိပါက ကျပ် (၅) သိန်း၊လက်လုပ်မိုင်းများ၊ လက်ပစ်ဗုံးများပါရှိပါက ကျပ် (၃) သိန်း၊လက်နက်ခဲယမ်းမှအပအခြားအသုံးအဆောင်ပစ္စည်းများ (ဥပမာ- စကားပြောစက်) ပါရှိပါက ကျပ် (၂) သိန်း။ဗုံးဖောက်ခွဲရေးအတွက် အသုံးပြုနိုင်သော Drone (၁) စင်းပါရှိပါက ကျပ် (၅၀) သိန်း ဖြစ်ကြောင်း သိရသည်။

ဥပဒေဘောင်အတွင်း ပြန်လည်ဝင်ရောက်လာသူများအနေဖြင့် နီးစပ်ရာ ခရိုင်၊ မြို့နယ်စီမံအုပ်ချုပ်ရေးအဖွဲ့များ၊ တပ်စခန်းများနှင့် ရဲစခန်းများသို့ဆက်သွယ်သတင်းပို့၍ ဝင်ရောက်နိုင်ပါကြောင်း နစက ထုတ်ပြန်ချက်တွင် ဖော်ပြထားသည်။

#ymg/pl #Local_News #PDF #ဆုကြေးထုတ်၍ဖိတ်ခေါ်
#YMG #Yangon_Media_Group