#Local_News
Published-31 August 2023

ဂျပန်ကုမ္ပဏီ (၃၀၀)ကျော်က မြန်မာအလုပ်သမားဦးရေ (၁၂၀၀) ကျော်ခေါ်ယူမည်ဖြစ်ကြောင်း ဂျပန်နိုင်ငံ၊ တိုကျိုမြို့ရှိ မြန်မာသံရုံးက ဩဂုတ်လ ၃၁ ရက်(ယနေ့)ထုတ်ပြန်လိုက်သည်။

မြန်မာသံရုံး၊ တိုကျိုမြို့မှ (၂၀၂၃) ခုနှစ်၊ သြဂုတ်လ (၁၆) ရက်နေ့မှ (၃၁) ရက်နေ့အတွင်း စိစစ်ပြီး နိုင်ငံခြားရေးဝန်ကြီးဌာနသို့ ပေးပို့ပြန်ကြားခဲ့သည့် အလုပ်ကမ်းလှမ်းစာ (၃၇၀) ခုနှင့် ပတ်သက်သည့် အချက်အလက် များအား အသိပေးအကြောင်းကြားအပ်ပါသည်ဟု ပါရှိသည်။

အဆိုပါထုတ်ပြန်ချက်အရ ဂျပန်ကုမ္ပဏီ (၃၇၀)က မြန်မာအလုပ်သမား အမျိုးသား (၅၂၀)ဦး၊  အမျိုးသမီး(၆၇၁)ဦး၊ စုစုပေါင်း ဦးရေ (၁၂၀၀)ကျော် ခေါ်ယူမည်ဖြစ်ကြောင်း သိရသည်။

အဆိုပါထုတ်ပြန်ချက်အရ မြန်မာသံရုံး၊ တိုကျိုမြို့အနေဖြင့် အလုပ်သမားဝန်ကြီးဌာနက နိုင်ငံခြားရေးဝန်ကြီးဌာနမှတစ်ဆင့် ပေးပို့လာသည့် အလုပ်ကမ်းလှမ်းစာ (Demand Letter) များကို အချိန်နှင့်တစ်ပြေးညီ စိစစ်ဆောင်ရွက်ပေးလျက်ရှိကြောင်း သိရသည်။

ထိုသို့ စိစစ်ဆောင်ရွက်ရာတွင် ဂျပန်နိုင်ငံရှိ အလုပ်သမားကြီးကြပ်ရေးကုမ္ပဏီနှင့် အလုပ်ခေါ်ယူသည့် စက်ရုံ/ ကုမ္ပဏီများသည် ဂျပန်နိုင်ငံတွင် တရားဝင်တည်ထောင်ထားခြင်း ရှိ/ မရှိ စာရွက်စာတမ်း အထောက်အထားများ စိစစ်ပြီး စိစစ်တွေ့ရှိချက် များ၊ သဘောထားမှတ်ချက် များကို နိုင်ငံခြားရေးဝန်ကြီးဌာနမှတစ်ဆင့် အလုပ်သမားဝန်ကြီးဌာနသို့ ပြန်လည်ပေးပို့လျက်ရှိကြောင်း သိရသည်။

​ြသဂုတ်လ (၁) ရက်နေ့မှ (၁၅) ရက်နေ့အတွင်းကလည်း နိုင်ငံခြားရေးဝန်ကြီးဌာနသို့ စိစစ်ပေးပို့ပြန်ကြားခဲ့သော အလုပ်ကမ်းလှမ်းစာ (၂၈၀) ခုတွင် မြန်မာအလုပ်သမား အမျိုးသား၊ အမျိုးသမီး စုစုပေါင်း ဦးရေ (၉၀၀)ကျော် ခေါ်ယူမည်ဖြစ်ကြောင်း မြန်မာသံရုံး၊ တိုကျိုမြို့က ထုတ်ပြန်ခဲ့သည်။

#Local_News #ဂျပန်ကုမ္ပဏီ #မြန်မာအလုပ်သမား
#Yangon-Times/PP

#Local_News
Published_ 31 August 2023

သွေးစွန်းနေသော ရွှေထည်ပစ္စည်းကိုတွေ့ရာမှ အမျိုးသမီးတစ်ဦးအား လည်လှီးသတ်ဖြတ်သူဟု သံသယရှိသူ ၃ ကိုဖမ်းဆီး စစ်ဆေးနေကြောင်း သိရသည်။

သြဂုတ်လ ၃၀ ရက်က ရန်ကုန်တိုင်းဒေသကြီး၊ ပုဇွန်တောင်မြို့နယ်ရှိ ရွှေဆိုင်တစ်ခုတွင် အမျိုးသားတစ်ဦးက ရွှေသွားရောင်းစဉ် ရွှေတွင်သွေးစများတွေ့ရှိခဲ့၍ မသင်္ကာဖြစ်သောကြောင့် သက်ဆိုင်ရာသို့ အကြောင်းကြားခဲ့ရာမှ အဆိုပါ သံသယရှိသူများကို ဖမ်းမိခြင်းဖြစ်ကြောင်း သိရသည်။

“ရန်ကုန်တိုင်းဒေသကြီးမှုခင်းအဖွဲ့က တိုက်ရိုက်ကိုင်တွယ်နေတာ ဖြစ်တယ်”ဟု ရဲတပ်ဖွဲ့နှင့် နီးစပ်သူက YMG ကို ပြောသည်။

ရန်ကုန်တိုင်းဒေသကြီး၊ ပုဇွန်တောင်မြို့နယ်၊ အမှတ်(၈)ရပ်ကွက်၊ မြောင်းကြီးလမ်းရှိ အထပ်မြင့်တိုက်(၆)လွှာတွင် လွန်ခဲ့သော ၄ လခန့်က ခင်းပွန်းဖြစ်သူနှင့်အတူ နေထိုင်သော အသက်(၃၂) နှစ်အရွယ်ရှိ အမျိုးသမီးတစ်ဦးအား လည်ပင်းကို ဓါးဖြင့်လှီးကာ ရွှေထည်ပစ္စည်းလုယက်မှု ဖြစ်ပွားခဲ့ခြင်း ဖြစ်သည်။

လက်ရှိဖမ်းဆီးစစ်ဆေးနေသော သံသယရှိသူ ၃ ဦးထဲတွင် ယင်းအထပ်မြင့်တိုက်(၆)လွှာ၌ နေထိုင်သည့်အသတ်ခံထားရသော အမျိုးသမီးတို့ ဇနီးမောင်နှံအနေဖြင့် ပုံမှန်ငှားစီးနေကျ အနှေးယာဉ်လုပ်သားလည်း ပါဝင်ကြောင်း သိရသည်။

#Local_News #သွေးစွန်းနေသောရွှေထည်ပစ္စည်း #သံသယရှိသူ၃ဦး
#Yangon_Times/PP

#Local_News
Published 31-August- 2023

ချင်းတွင်းမြစ်ရေသည် ဟုမ္မလင်းမြို့၏ စိုးရိမ်ရေမှတ်အောက်သို့ ပြန်ကျဆင်းနိုင်သော်လည်း ဖောင်းပြင်မြို့တွင် စိုးရိမ်ရေမှတ်အထက်တွင် ဆက်ရှိနိုင်သည် မိုးလေဝသနှင့် ဇလဗေဒညွန်ကြားမှုဉီးစီးဌာန ယနေ့တွင် အသိပေးထုတ်ပြန်ထားသည်။

မိုးဇလ၏ အသိပေးချက်၌ ယနေ့ ဩဂုတ်(၃၁) ရက် မွန်းတည့် ၁၂ နာရီ မိနစ် ၃၀ အချိန် တိုင်းထွာချက်အရ ချင်းတွင်းမြစ်ရေသည် ဟုမ္မလင်းမြို့၏ စိုးရိမ်ရေမှတ် အထက် တစ်ပေခန့်သို့ ကျော်လွန်ရောက်ရှိနေပြီး၊ နောက်နှစ်ရက်အတွင်း ယင်းမြို့၏ စိုးရိမ်ရေမှတ်အောက်သို့ ပြန်လည်ကျဆင်းနိုင်သည်ဟု ဖော်ပြထားသည်။

အလားတူ ယနေ့ ဩဂုတ် (၃၁) ရက်တွင် ၁၂ နာရီ မိနစ် ၃၀ အချိန် တိုင်းထွာချက်အရ ချင်းတွင်း မြစ်ရေသည် ဖောင်းပြင်မြို့၏ စိုးရိမ်ရေမှတ် အထက် တစ်ပေခန့်သို့ကျော်လွန်ရောက်ရှိနေပြီး၊ နောက်တစ်ရက်အတွင်း သုံးလက်မခန့် မြင့်တက်လာနိုင်ကာ ယင်းမြို့၏ စိုးရိမ်ရေမှတ်အထက်တွင် ဆက်လက်တည်ရှိနိုင်မည်ဖြစ်ကြောင်း သိရသည်။

ထို့ကြောင့် ဖောင်းပြင်မြို့နယ်အတွင်းရှိ မြစ်ကမ်းနဘေးနှင့် မြေနိမ့်ပိုင်းမေထိုင်သူများအနေဖြင့် အထူးသတိပြုနေထိုင်ကြရန် သတိပေးနှိုးဆော်ထားသည်။

#YMG/MY #Local_News #ချင်းတွင်းမြစ်ရေ #ဟုမ္မလင်းမြို့ #ဖောင်းပြင်မြို့ #မိုးဇလသတိပေး
#Yangon_Times

#Local_News
Published 31 August 2023

ထိုင်းနိုင်ငံအတွင်း အလုပ်လုပ်ကိုင်နေသည့် MOU မြန်မာအလုပ်သမားများ အနေဖြင့်နိုင်ငံကူးလက်မှတ်သက်တမ်းတိုးရန် အတွက်ယခင်လိုရက်ချိန်းယူစရာမလိုတော့ဘဲ လူကိုယ်တိုင် တခါ ထဲ လာရောက်ပြုလုပ်နိုင်ပြီဖြစ်ကြောင်း ထိုင်းနိုင်ငံရှိ မြန်မာသံရုံ(ဘန်ကောက်)၏ သြဂုတ် ၃၁ ရက်က ထုတ်ပြန်ကြေညာချက်အရ သိရသည်။

PJ နိုင်ငံကူးလက်မှတ်ကိုင်ဆောင်ထားပြီး ၃၁-၃-၂၀၂၄ ရက်နေ့တွင် သက်တမ်းကုန်သူများအား စာအုပ်အသစ်ပြုလုပ်ပေးရန်အတွက် ၂၉-၇-၂၀၂၃ ရက်နေ့မှစတင်၍ စနေနေ့တိုင်း လူကိုယ်တိုင် ရက်ချိန်းတိုကင် လာရောက်ယူခြင်းအစီအစဉ်ကို ပြုလုပ်ခဲ့ရာ လက်ရှိတွင်တိုကင်လာရောက်ယူသူနည်းပါးလာတာကြောင့် ၂-၉-၂၀၂၃ ရက်နေ့ (စနေနေ့) မှစ၍ ရက်ချိန်းတိုကင်ပေးခြင်းကို ရပ်ဆိုင်းလိုက်ပြီဖြစ်ကြောင်း သိရသည်။

ထို့ကြောင့် PJ နိုင်ငံကူးလက်မှတ်အသစ် ပြုလုပ်လိုသူများအနေဖြင့် ရုံးဖွင့်ရက်များတွင် မြန်မာသံရုံး၊ ကောင်စစ်ဌာနသို့ ရက်ချိန်းတိုကင်မလိုဘဲ လူကိုယ်တိုင်လာရောက်ပြုလုပ်နိုင်ပြီး ၃၀-၆-၂၀၂၄ ရက်နေ့အထိ သက်တမ်းကုန်သူများကို ပြုလုပ်ပေးသွားမည်ဖြစ်ကြောင်း မြန်မာသံရုံးမှ ထုတ်ပြန်ကြေညာထားသည်။

#YMG/LW #Local_News #ထိုင်းရောက်မြန်မာလုပ်သား #နိုင်ငံကူးလက်မှတ်သက်တမ်းတိုးခြင်း #Yangon_Times

#Local_News
Published 31 -August- 2023

(၅၅)ကြိမ်မြောက် ကျပ်တစ်ထောင်တန် အောင်ဘာလေသိန်းဆုထီဖွင့်ပွဲနှင့် အောင်ဘာလေအွန်လိုင်းထီဖွင့်ပွဲကို သီးခြားစီ ဖွင့်လှစ်ပေး သွားမည်ဟု ပြည်တွင်းအခွန်များဉီးစီဌာန၊ အောင်ဘာလေသိန်းဆုဌာနခွဲက ယနေ့ ဩဂုတ် (၃၁)ရက်တွင် ကြိုတင် အသိပေးထုတ်ပြန်ထားသည်။

(၅၅)ကြိမ်မြောက် အောင်ဘာလေသိန်းဆုထီဖွင့်ပွဲနဲ့ အောင်ဘာလေအွန်လိုင်းထီဖွင့်ပွဲကို လာမည့် အောက်တိုဘာ (၁)ရက် နံနက်ပိုင်းတွင် ဖွင့်လှစ်ပေးမည်ဖြစ်ပြီး ၊ အောင်ဘာလေသိန်းဆုထီဖွင့်ပွဲကို နံနက်(၈) နာရီတွင် လည်းကောင်း၊ အောင်ဘာလေအွန်လိုင်းထီဖွင့်ပွဲကို နံနက် (၁၀)နာရီတွင် လည်းကောင်း သီးခြားစီ ဖွင့်လှစ် ပေးသွားမည်ဖြစ်ကြောင်း သိရသည်။

မနက်ဖြန် စက်တင်ဘာ(၁)ရက်တွင် (၅၅)ကြိမ်မြောက် ကျပ်တစ်ထောင်တန် အောင်ဘာလေသိန်းဆုထီ အတွက် “က” အက္ခရာမှ “ည” အက္ခရာအထိ ထီစောင်ရေ (၆၇၅၀၀၄၀) စောင်အား စတင်ရောင်းချပေးသွားမည်ဖြစ်ပြီး ၊ ရောင်းချရငွေ၏ (၇၀) ရာခိုင်နှုန်းကို ဆုမဲအဖြစ် ပြန်လည် ခွဲဝေပေးသွားမည်ဖြစ်ကြောင်း သိရသည်။

ထိုအတူ ကျပ် တစ်ထောင်တန် အောင်ဘာလေ အွန်လိုင်းသိန်းဆုထီ အတွက် “က” အက္ခရာမှ “ည” အက္ရရာအထိ ထီစောင်ရေ ( ၂၂၄၉၉၄၀) စောင်ကိုလည်း စက်တင်ဘာ (၁) ရက်နေ့၌ပင် ရောင်းချပေးသွားမည်ဖြစ်ပြီး၊ ရောင်းချရငွေ၏ (၇၀) ရာခိုင်နှုန်းကို ဆုမဲအဖြစ် ပြန်လည် ခွဲဝေပေးသွားမည်ဖြစ်ကြောင်း သိရသည်။

မနက်ဖြန် စက်တင်ဘာလတွင် ဖွင့်လှစ်ပေးမည့် (၅၄)ကြိမ်မြောက် ကျပ််တစ်ထောင်တန်အောင်ဘာလေ သိန်းထီဖွင့်ပွဲတွင် ကျပ်သိန်း ငါးထောင်ဆု (၁)ဆု၊ ကျပ်သိန်း နှစ်ထောင်ဆု( (၁) ဆု ၊ ကျပ်သိန်းတစ်ထောင်ဆု(၁) ဆု အပြင် အခြား ဆုမံ များကို လည်း ချီးမြှင့်ပေးသွားမည်ဖြစ်ကြောင်း သိရသည်။

#YMG/MY #Local_News #အောင်ဘာလေသိန်းဆုထီဖွင့်ပွဲ #အွန်လိုင်းသိန်းဆုထီဖွင့်ပွဲ
#ဌာနခွဲကြိုတင်အသိပေး #Yangon_Times

#Local_News
Published_ 31 August 2023

မလေးရှားနိုင်ငံသို့ရောက်ရှိသည်မှာ လပိုင်းခန့်သာရှိသေးသည့် မြန်မာအမျိုးသမီး ၁-ဦး နေအိမ်ပေါ်တွင်ရေပိုက်ကို ခလုတ်တိုက်မိစဉ် ဦးခေါင်းဒဏ်ရာရရှိကာ သေဆုံးမှုဖြစ်ခဲ့ကြောင်း နှလုံးလှပရဟိတသွေးလှူရှင်များ အသင်း (မလေးရှား)က သိရသည်။

အဆိုပါ အမျိုးသမီးမှာ KL Maluri နေအိမ်ပေါ်တွင် ရေပိုက်ကို ခလုပ်တိုက်မိ၍ (၂)ပေခန့် အမြင့်မှလဲကျကာ ဦးခေါင်းဘယ်ဘက်အခြမ်းထိခိုက်ဒဏ်ရာရရှိခဲ့ကြောင်း၊ အထောက်အထားခိုင်လုံမှုမရှိ၍ ဆေးရုံပြရန် နောက်ကျသောကြောင့် သေဆုံးမှုဖြစ်ခဲ့ကြောင်း သိရသည်။

"ဆေးခန်းသွားဖို့ကျတော့ အထောက်အထားမရှိတာကတစ်ကြောင်း မလေးကိုရောက်တာ လပိုင်းပဲရှိသေးတော့ ဟိုလူစောင့်ဒီလူစောင့်နှင့်အချိန်တွေကြာသွားခဲ့တာကတစ်ကြောင်း ဆေးခန်းရောက်နောက်ကျပြီး သေဆုံးသွားခဲ့ပါတယ်"ဟု နှလုံးလှပရဟိတအသင်းတာဝန်ရှိသူက ပြောသည်။

ကွယ်လွန်သူကို သြဂုတ်လ ၃၀ ရက် ဗုဒ္ဓဟူးနေ့တွင် ချဲရတ်ဂျလန်ကွာလီ သုဿန်သို့ ကွယ်လွန်သူ၏ မိသားစုမိတ်ဆွေသူငယ်ချင်းများနှင့်အတူ ကုသိုလ်ယူပို့ဆောင်ပေးခဲ့ကြောင်း အဆိုပါအသင်းက သိရသည်။

သေဆုံးသူအမျိုးသမီး ( မိချစ်စုရီ )မှာ အသက် ( ၂၃ )နှစ်အရွယ်ရှိပြီး ကရင်ပြည်နယ်၊ ကော့ကရိတ်မြို့နယ်၊ ကျုံဒိုးအနောက်ဘက်ကမ်းကျေးရွာအုပ်စု၊ သရက်ကျေးရွာ မှဖြစ်ကြောင်း သိရသည်။

#Local_News #ဦးခေါင်းဒဏ်ရာရသေဆုံး #မလေးရှား
#Yangon-Times/PP