#World_News
Published 19 March 2026

▪️ အမေရိကန်သမ္မတ ဒေါ်နယ်ထရမ့် အီရန်အပေါ် တစ်ကမ္ဘာလုံးမှ ပူးပေါင်းကြိုးပမ်းအားထုတ်ပေးရန်နဲ့ ဟော်မုဇ်ရေလက်ကြား ပြန်ဖွင့်နိုင်ဖို့ သင်္ဘောများ စေလွှတ်ပေးရန် တောင်းဆိုခဲ့ရာမှာ အမေရိကားရဲ့ အနီးစပ်ဆုံးမဟာမိတ်အချို့က ငြင်းပယ်ခဲ့ကြပါတယ်။

▪️ ဂျာမနီနိုင်ငံ့အကြီးအကဲ ဖရိုင်းဒရစ်မာ့ဇ်က အီရန်အနေနဲ့ အိမ်နီးချင်းတွေကို ခြိမ်းခြောက်ခွင့် မရသင့်ဘူးဆိုတာ လက်ခံပေမယ့် အမေရိကန်-အစ္စရေးလ်စစ်ပွဲနောက်ကွယ်က ကျိုးကြောင်းဆီလျော်မှုကိုတော့ သံသယရှိနေတယ်လို့ လွှတ်တော်အမတ်တွေကို ပြောခဲ့ပါတယ်။

▪️ ဒါကြောင့် စစ်ပွဲဆက်ရှိနေသရွေ့ ဟော်မုဇ်ရေလက်ကြားမှာ လွတ်လပ်စွာ သွားလာနိုင်ရေးအတွက် စစ်ရေးအားဖြင့် ပါဝင်ပတ်သက်မှာ မဟုတ်ဘူးလို့ ပြောသွားပါတယ်။

▪️ ဥရောပခေါင်းဆောင်တွေကလည်း အီရန်အပေါ် အမေရိကန်နဲ့ အစ္စရေလ်း စစ်ဆင်ရေးပြုလုပ်နေတာကို တိုက်ရိုက်ပတ်သက်ခြင်းမပြုဖို့ ငြင်းဆန်ထားပါတယ်။

▪️ ဂျာမနီကာကွယ်ရေးဝန်ကြီး ဘိုရစ်ပစ္စတိုရီယပ်စ်ကလည်း ဒါဟာ ကျွန်ုပ်တို့ စစ်ပွဲမဟုတ်ကြောင်း၊ ကျွန်ုပ်တို့ စတင်ခဲ့တာမဟုတ်ကြောင်း ထောက်ခံပြောဆိုသွားပါတယ်။

▪️ ပြင်သစ်သမ္မတနဲ့ ဗြိတိန်ဝန်ကြီးချုပ်တို့ကလည်း စစ်ပွဲဆန့်ကျင်တဲ့သဘောများ ထုတ်ဖော်ခဲ့ကြပါတယ်။

▪️ စပိန်အစိုးရကတော့ အီရန်တိုက်ခိုက်မှုတွေဟာ တရားမဝင် မထီမဲ့မြင်ပြုရာကျတယ်လို့ ရှုတ်ချထားပါတယ်။

▪️ ဥရောပနိုင်ငံတွေက ထရမ့်ရဲ့ စစ်ပွဲဦးတည်ချက် မရေမရာဖြစ်နေတာကို ဝေဖန်နေပြီး ဒီအခြေအနေတွေ ထိန်းချုပ်နိုင်ဖို့ နည်းလမ်းတွေ ရှာနေပါတယ်။

▪️ ဥရောပသမဂ္ဂခေါင်းဆောင်တွေက စည်းလုံးညီညွတ်မှု ဆက်လက်ထိန်းသိမ်းထားဖို့နဲ့ တည်ငြိမ်ပြီး တင်းမာမှုလျော့ကျရေးတို့ကို ဦးစားပေးသွားဖို့ ရည်မှန်းထားပါတယ်။

Source: Reuters

#World_Health
Published 19 March 2026

■ ပင်ပန်းတဲ့အခါ ဖိစီးတဲ့အခါ မျက်လုံးညောင်းတဲ့အခါ အလိုလိုနေရင်း မျက်လုံးပွတ်မိတတ်ကြပါတယ်။

■ တစ်နည်းနည်းနဲ့တော့ နေလို့ထိုင်လို့ ကောင်းသွားတတ်ပါတယ်။

■ ဒါက ဘေးအန္တရာယ်မရှိဘူး ထင်ရပြီး မျက်နှာပြင်အောက်မှာ နောက်ထပ် ဖြစ်ပျက်တာတွေ ရှိပါတယ်။

■ မျက်လုံးကို ဖိပွတ်တဲ့အခါ မျက်လုံးအိမ်တဝိုက်မှ အာရုံကြောမျှင်တွေ လှုံ့ဆော်ပေးပြီး ဦးနှောက်သို့အချက်ပြကာ မျက်လုံးညောင်းခြင်း၊ ခြောက်သွေ့ခြင်း၊ နေရခက်ခြင်းတို့ကို သက်သာစေပါတယ်။

■ ခဏတာ ပွတ်ပေးလိုက်ရင် မျက်ရည်စီးဆင်းမှု ကောင်းစေသဖြင့် မျက်လုံးခြောက်သွေ့ခြင်းကို စိုစွတ်စေပြီး အမှုန်အမွှားတွေ ဖယ်ရှားနိုင်တယ်လို့ မျက်လုံးအထူးကု ဒေါက်တာ ပူရန်ဒရာဘာဆင်က ပြောပါတယ်။

■ မျက်ခွံနဲ့ တစ်ရှူးတွေကို ညင်သာစွာဖိအားပေးသဖြင့် မျက်လုံးတွေ ညောင်းညာနေတဲ့အခါ ကျေနပ်မှုရစေပါတယ်။

■ မျက်လုံးပွတ်ခြင်းက အဓိကအာရုံကြောမကြီးတွေထဲက တစ်ခုဖြစ်တဲ့ ဗေးဂတ်စ်နာ့ဗ်ကို လှုံ့ဆော်ပေးပြီး နှလုံးခုန်နှုန်းလျော့စေကာ စိတ်တည်ငြိမ်မှု ခံစားရစေပါတယ်။

■ ဒါကြောင့် မျက်လုံးပွတ်လိုက်ရင် စိတ်ခံစားမှုအပိုင်းမှာ သက်သာရာရစေတဲ့ အကြောင်းအရင်း ဖြစ်နိုင်ပါတယ်။

■ ဒါပေမဲ့ မကြာခဏ အားပြင်းပြင်း ပွတ်နေမိရင် မျက်လုံးရှေ့က မျက်ကြည်လွှာ ပါးလွှာထိခိုက်နိုင်ပြီး အမြင်အာရုံ ယိုယွင်းစေနိုင်ပါတယ်။

■ ဒါ့အပြင် သွေးကြောငယ်လေးတွေ ပျက်စီးနိုင်ပြီး နီမြန်းတာတွေ ရောင်ရမ်းတာတွေ ဖြစ်နိုင်သလို လက်တွေမှာ ဘက်တီးရီးယားတွေ ဖုန်တွေ သယ်ဆောင်တာကြောင့် မျက်လုံးရောဂါပိုးဝင်တာမျိုးလည်း ဖြစ်နိုင်ပါတယ်။

Source: Indian Express

#World_Science
Published 19 March 2026

■ ကောင်းကင်နိဗ္ဗာန်ဆိုတာဟာ စကြဝဠာထဲမှာ လက်တွေ့ကျကျရှိတဲ့ နေရာဖြစ်နိုင်ဖွယ်ရှိတယ်လို့ သိပ္ပံပညာရှင်တစ်ဦး အကြံပြုလိုက်ပါတယ်။

■ ဟားဗတ်ရူပဗေဒဆရာဟောင်း မိုက်ကယ်ဂွယ်လန်က နိဗ္ဗာန်ဘုံဟာ အာကာသမိုးကုတ်စက်ဝိုင်းအလွန်မှာ ရှိနေနိုင်တယ်လို့ ဖော်ပြထားပါတယ်။

■ ဒါဟာ ကမ္ဘာကနေ ကီလိုမီတာပေါင်း ၄၃၉ ဘီလီယံထရီလီယံခန့် ကွာဝေးတာဖြစ်ပြီး သူ့ရဲ့သီအိုရီကို အခြားသိပ္ပံပညာရှင်တွေကတော့ လက်မခံကြပါဘူး။

■ ဂွယ်လန်က ဘယ်လိုအကြောင်းအရင်း ချပြလဲဆိုတော့ စကြဝဠာတစ်ခုလုံးဟာ အာကာသမိုးကုတ်စက်ဝိုင်းအလွန်မှာ တည်ရှိပေမယ့် ဒါကို ဘယ်တော့မှ ကျော်ဖြတ်နိုင်မှာ မဟုတ်တာကြောင့် အမြဲတမ်းဖုံးကွယ် တည်ရှိနေတယ်လို့ ဆိုပါတယ်။

■ ဒါနဲ့ပတ်သက်ပြီး ကွန်နက်တီကပ်ကောလိပ်မှ နက္ခတ္တဗေဒပရော်ဖက်ဆာ အဲလက်စ်ဂျီယန်နီနက်စ်က ဆန့်ကျင်ခဲ့ကာ အာကာသမိုးကုတ်စက်ဝိုင်းဆိုတာ လက်တွေ့တည်ရှိတာမဟုတ်ဘဲ လူတွေမှန်းဆနေတဲ့ နယ်နိမိတ်စည်းတစ်ခုသာ ဖြစ်တယ်လို့ ဆိုပါတယ်။

■ မိုးကုတ်စက်ဝိုင်းကို ကျော်ပြီးမမြင်ရတာနဲ့ပဲ စကြဝဠာကြီး အဲဒီမှာအဆုံးသတ်တယ်လို့ ဆိုလို့မရပါဘူး။

■ အလင်းက ကမ္ဘာသို့ရောက်ရှိရန် လုံလောက်တဲ့အချိန်ရှိတဲ့နေရာတွေကိုပဲ မြင်နိုင်တာဖြစ်ပြီး အချို့နေရာတွေဆိုရင် အလင်းဆီကနေ ကွာဝေးလွန်းတာကြောင့် မမြင်နိုင်ဘဲ ဖြစ်နေနိုင်ပါတယ်။

■ နောက်တစ်ချက်က အာကာသမိုးကုတ်စက်ဝိုင်းမှာ အချိန်ရပ်တန့်သွားတယ်ဆိုတဲ့ အိုင်းစတိုင်းရဲ့ သီအိုရီပါပဲ။

■ ထိုအခါမှာ အတိတ်တွေ ပစ္စုပ္ပန်တွေ အနာဂတ်တွေ မရှိတော့ဘဲ နိဗ္ဗာန်မှာ အချိန်ရယ်ဆိုပြီး မရှိတော့တဲ့သဘော ဖြစ်ပါတယ်။

Source: NPR

၂၀၂၆ အသုံးအဆောင်နှင့်လျှပ်စစ်ပစ္စည်းပြပွဲ (AWE2026)ကို ကြာသပတေးနေ့က ရှန်ဟိုင်းမှာ ဖွင့်လှစ်ခဲ့ကာ AI စနစ်သုံး ဖန်တီးမှုများ နည်းပညာများဖြင့် အနာဂတ်ပုံဖော်မှုများကို မြင်တွေ့ရပါတယ်။

#World_Event
Published 18 March 2026
#AWE2026 #ရှန်ဟိုင်း
#YMG #Yangon_Times #Yangon_Media_Group

#Daily_News
Published 18 March 2026

၁။‌ ‎၂၀၂၆ ခုနှစ် တက္ကသိုလ်ဝင်စာမေးပွဲ၌ ၉၄ ဒသမ ၇၄ ရာခိုင်နှုန်းအထိဝင်ရောက်ဖြေဆို

‌‎၂။ ‌‌‌‌‌‌‌‌‌‌‌လာမည့်ဘဏ္ဍာနှစ်တွင် အိမ်ခြံမြေအခွန်နှုန်းထားများကို ယခင်နှုန်းအတိုင်းသာကောက်ခံမည်

‎၃။‌‌‎ ‌‌‌‌‌‌‌‌‌‎နိုင်ငံကူးလက်မှတ်အတုပြုလုပ်ပါက ထောင်ဒဏ်ငါးနှစ်နှင့်ငွေဒဏ်များချမှတ်နိုင်

‎၄။‎ (၂၀၂၆)ကမ္ဘာ့လုံးဆိုင်ရာအိမ်အသုံးအဆောင်နှင့်လျှပ်စစ်ပစ္စည်းပြပွဲကြီး ရှန်ဟိုင်း၌ဖွင့်လှစ်... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

၂၀၂၆ ခုနှစ် တက္ကသိုလ်ဝင်စာမေးပွဲ၌ ၉၄ ဒသမ ၇၄ ရာခိုင်နှုန်းအထိဝင်ရောက်ဖြေဆိုခဲ့တယ်လို့ ပညာရေးဝန်ကြီးဌာနကနေသိရပါတယ်။

#Local_News
Published 18 March 2026
#တက္ကသိုလ်ဝင်စာမေးပွဲ
#YMG/NN #Yangon_Times

လာမယ့် ၂၀၂၆-၂၀၂၇ဘဏ္ဍာရေးနှစ်မှာလည်း အိမ်ခြံမြေ‌ ရောင်းဝယ်ရာမှာ ပေးဆောင်ရတဲ့ ဝင်ငွေခွန်နှုန်းထားတွေ ပြောင်းလဲခြင်းမရှိဘဲ ယခင်နှုန်းထားအတိုင်းသာ ကောက်ခံသွားမယ်လို့ မတ်လ ၁၅ရက်က ဗိုလ်ချုပ်မှူးကြီး မင်းအောင်လှိုင်လက်မှတ်ရေးထိုးထုတ်ပြန်တဲ့ ၂၀၂၆ပြည်ထောင်စု၏ အခွန်အကောက်ဥပဒေမှာ ဖော်ပြထားချက်အရသိရပါတယ်။

#Local_News
Published 18 March 2026
# အိမ်ခြံမြေ‌ #အခွန်အကောက်ဥပဒေ
#YMG/SW #Yangon_Times

မြန်မာနိုင်ငံကူးလက်မှတ်ကို အတုပြုလုပ်ပါက ထောင်ဒဏ်ငါးနှစ်နဲ့ ငွေဒဏ်များချမှတ်နိုင်တဲ့ မြန်မာနိုင်ငံကူးလက်မှတ်ဆိုင်ရာဥပဒေကို အမျိုးသားကာကွယ်ရေးနှင့်လုံခြုံရေးကောင်စီက မတ် ၁၇ ရက်မှာ ပြဋ္ဌာန်းလိုက်ပါတယ်။

#Local_News
Published 18 March 2026
#နိုင်ငံကူးလက်မှတ်အတု #မြန်မာနိုင်ငံကူးလက်မှတ်
#YMG/SW #Yangon_Times

ပြည်တွင်းသို့ အိန္ဒိယနိုင်ငံမှ အရည်အသွေးမြင့်ဝါမျိုးစေ့များ တင်သွင်းမယ်လိံ စီးပွားရေးနှင့်ကူးသန်းရောင်းဝယ်‌ရေးဝန်ကြီးဌာန၊မြန်မာကုန်သွယ်မှုမြှင့်တင်ရေးအဖွဲ့မှသိရပါတယ်။

#Local_News
Published 18 March 2026
#အိန္ဒိယ #ဝါမျိုးစေ့
#YMG/SW #Yangon_Times

#Local_News
Published 18 March 2026

▪️ ၂၀၂၆ ခုနှစ် မတ်လ ၁၆ ရက်နေ့တွင် ရန်ကုန်မြို့၏ ဝန်းကျင်လေထုအရည်အသွေး လေ့လာဆန်းစစ်ချက်အရရန်ကုန်မြို့၏ ဝန်းကျင်လေထုအရည် အသွေးမှာ ကောင်းမွန်လျှက်ရှိကြောင်းပတ်ဝန်းကျင်ထိန်းသိမ်းရေးဦးစီးဌာနက ယနေ့အသိပေးထုတ်ပြန်ထားသည်။

▪️ ရန်ကုန်တိုင်းဒေသကြီး၊ ပတ်ဝန်းကျင်ထိန်းသိမ်းရေးဦးစီးဌာနအနေဖြင့် ရန်ကုန်မြို့အတွင်း တိုင်းတာမှတ်(၃)နေရာဖြစ်သော ဗိုလ်တထောင်မြို့နယ်၊လှိုင်မြို့နယ်နှင့် ကျောက်တံတားမြို့နယ်တို့တွင် Ambient Air Quality Monitoring Station with Mobile Car-(AQMS Mobile Car)၊ Compact Air Quality Monitoring Station- (AQM 65) စက်များကိုအသုံးပြု၍ Particulate Matter 2.5 (PM2.5)၊ Particulate Matter 10 (PM10)၊ Sulphur Dioxide (SO2)၊ Nitrogen Dioxide (NO2)၊ Ozone (O3) နှင့် Carbon Monoxide (CO) စသည့် အဓိက Parameter (၆)မျိုးကို ၂၄ နာရီ ပုံမှန် တိုင်းတာပြီး လေ့လာဆန်းစစ်လျက်ရှိ‌ေကြာင်း သိရသည်။

▪️ ထိုသို့တိုင်းတာရာတွင် လေထုအရည်အသွေးညွှန်းကိန်းမှာ ၀-၅၀ကြားတိုင်းတာရရှိသောကြောင့် လေထုအရည်အသွေးကောင်းမွန်သောအဆင့်ရှိကြောင်း သိရသည်။

▪️ အဆိုပါ လေထုအရည်အသွေးညွှန်းကိန်းမှာလေထုအပူချိန်၊ လေတိုက်နှုန်း၊ လေတိုက်ခတ်ရာလမ်းကြောင်း၊ စိုထိုင်းမှု၊ မိုးရွာသွန်းမှုအခြေအနေ၊ မော်တော်ယာဉ်အသုံးပြုမှုအခြေအနေ၊ ပူပြင်းခြောက်သွေ့မှုကြောင့် ဖုန်မှုန့်ပျံ့လွင့်မှု၊ စက်ရုံများမှ ထုတ်လွှတ်အခိုးအငွေ့များ ထုတ်လွှတ်မှုအခြေအနေနှင့် ဝန်းကျင်လေထုအရည်အသွေး တိုင်းတာသည့်နေရာ အနီးဝန်းကျင်အခြေအနေတို့အပေါ်မူတည်၍ တိုင်းတာရရှိသည့် ဝန်းကျင်လေထုအရည်အသွေးရလဒ်များသည် ပြောင်းလဲမှုရှိနိုင်ကြောင်း လည်း ထုတ်ပြန်ချက်တွင်ဖော်ပြထားသည်။

#YMG/SW #Yangon_Times

#World_News
Published 18 March 2026

■ ဝါရှင်တန် — အီရန်အား ဆန့်ကျင်သည့် စစ်ဆင်ရေးများတွင် ပါဝင်နေသော အမေရိကန်ပြည်ထောင်စု၏ အသစ်ဆုံးနှင့် ကမ္ဘာ့အကြီးဆုံး လေယာဉ်တင်သင်္ဘောကြီး USS Gerald R. Ford သည် သင်္ဘောပေါ်တွင် မီးလောင်မှုဖြစ်ပွားခဲ့ပြီးနောက် ဆိပ်ကမ်းသို့ ယာယီဆိုက်ကပ်ရန်ရှိကြောင်း အမေရိကန်အရာရှိများက အင်္ဂါနေ့တွင် ပြောကြားခဲ့သည်။

■ ယင်းဖြစ်စဉ်သည် တီဟီရန်နှင့် ဖြစ်ပွားနေသော စစ်ပွဲ (၁၈) ရက်မြောက်နေ့တွင် ပင်လယ်နီအတွင်း၌ ဖြစ်ပေါ်ခဲ့ခြင်းဖြစ်သည်။

■ အမည်မဖော်လိုသည့် အရာရှိများ၏ ပြောကြားချက်အရ သင်္ဘော၏ ပင်မ အဝတ်လျှော်ဧရိယာတွင် မီးစတင်လောင်ကျွမ်းခဲ့ခြင်းဖြစ်ပြီး မီးငြိမ်းသတ်ရန် နာရီပေါင်းများစွာ အချိန်ယူခဲ့ရကာ အိပ်စင် ၁၀၀ ခန့် ထိခိုက်ပျက်စီးခဲ့သည်။

■ မီးခိုးမွှန်မှုကြောင့် ရေတပ်သား ၂၀၀ နီးပါးကို ကုသပေးခဲ့ရပြီး တပ်ဖွဲ့ဝင်တစ်ဦးကိုမူ ဆေးဝါးကုသမှုခံယူရန် လေယာဉ်ဖြင့် အရေးပေါ်တင်ဆောင်သွားခဲ့ရသည်။

■ သို့သော်လည်း သင်္ဘော၏ တွန်းကန်အားပေးစက်ရုံမှာ ထိခိုက်ပျက်စီးမှုမရှိဘဲ လေယာဉ်တင်သင်္ဘောသည် အပြည့်အဝ ဆက်လက်လည်ပတ်နေဆဲဖြစ်ကြောင်း အမေရိကန်စစ်တပ်က အတည်ပြုထားသည်။

■ ယခုအခါ အဆိုပါ လေယာဉ်တင်သင်္ဘောသည် ဂရိနိုင်ငံ၊ ခရီကျွန်း (Crete) ရှိ ဆူဒါပင်လယ်အော်သို့ ယာယီသွားရောက်ဆိုက်ကပ်မည်ဟု မျှော်မှန်းရပြီး မည်မျှကြာကြာရပ်နားမည်ကိုမူ မသိရသေးပေ။

■ ယခုဖြစ်စဉ်ကြောင့် သင်္ဘော၏ တာဝန်ထမ်းဆောင်မှု သက်တမ်းကြာရှည်နေခြင်းအပေါ် အာရုံစိုက်မှုများ ထွက်ပေါ်လာခဲ့သည်။

■ အဆိုပါ စစ်သင်္ဘောသည် အရှေ့အလယ်ပိုင်းသို့ မရောက်ရှိမီ ကာရစ်ဘီယံဒေသအတွင်း ဗင်နီဇွဲလားအား ဆန့်ကျင်သည့် စစ်ဆင်ရေးများတွင် ပါဝင်ခဲ့ပြီး စုစုပေါင်း ၉ လကြာ တာဝန်ချထားခံခဲ့ရသည်။

■ ဤမျှကြာရှည်စွာ တာဝန်ချထားမှုကြောင့် သင်္ဘောပေါ်ရှိ ရေတပ်သား ၅,၀၀၀ ကျော်၏ စိတ်ဓာတ်ရေးရာနှင့် စစ်သင်္ဘော၏ အသင့်ဖြစ်မှုအပေါ် မေးခွန်းထုတ်စရာများ ဖြစ်လာခဲ့သည်။

■ ဖေဖော်ဝါရီ ၂၈ ရက်တွင် အီရန်အား ဆန့်ကျင်သည့် စစ်ဆင်ရေးများ စတင်ခဲ့ပြီးကတည်းက အမေရိကန်သည် ပစ်မှတ်ပေါင်း ၇,၀၀၀ ကျော်ကို တိုက်ခိုက်ခဲ့ပြီးဖြစ်သည်။

■ Ford သင်္ဘောတွင် F-18 Super Hornet အပါအဝင် တိုက်လေယာဉ် ၇၅ စီးကျော်နှင့် ခေတ်မီရေဒါစနစ်များ ပါရှိသည်။

■ ၎င်းအား မြေပြင်မှလေပြင်ပစ်၊ မြေပြင်မှမြေပြင်ပစ်နှင့် ရေငုပ်သင်္ဘောတိုက်ဖျက်ရေး စွမ်းရည်များပါဝင်သည့် Normandy၊ Thomas Hudner၊ Ramage၊ Carney နှင့် Roosevelt စသည့် ကရူဇာနှင့် ဖျက်သင်္ဘောများက အထောက်အကူပြုလိုက်ပါလျက်ရှိသည်။

#Local_News
Published 18 March 2026

▪️ နှစ်စဉ် မီးခိုးမြူငွေ့မြင့် တက်လေ့ရှိသည့်မတ်လ မှ မေလ အတွင်း Fire Hotspot လျှော့ချနိုင်ရေး လုပ်ဆောင်ရမည့်လုပ်ငန်းစဉ်များကိုဆောင်ရွက်နေကြောင်း မြန်မာ - ထိုင်း နယ်နိမိတ်ဖြတ်ကျော် မီးခိုးမြူငွေ့လေထုညစ်ညမ်းမှု တားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေးကော်မတီ (၁/၂၀၂၆) လုပ်ငန်းညှိနှိုင်းအစည်းအဝေးမှ သိရသည်။

▪️ အဆိုပါ မြန်မာ - ထိုင်း နယ်နိမိတ်ဖြတ်ကျော် မီးခိုးမြူငွေ့လေထုညစ်ညမ်းမှု တားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေးကော်မတီ (၁/၂၀၂၆) လုပ်ငန်းညှိနှိုင်းအစည်းအဝေးကို ယမာန်နေ့မွန်းလွဲပိုင်းက ကာကွယ်ရေးဝန်ကြီးဌာနအစည်းအဝေးခန်းမ၌ ကျင်းပသည်။

▪️ အစည်းအဝေးသို့ မြန်မာ - ထိုင်း နယ်နိမိတ်ဖြတ်ကျော် မီးခိုးမြူငွေ့လေထုညစ်ညမ်းမှု တားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေးကော်မတီဥက္ကဋ္ဌ ကာကွယ်ရေးဝန်ကြီးဌာန ဒုတိယဝန်ကြီး ဗိုလ်ချုပ်အောင်မျိုးသန့်၊ ဒုတိယဥက္ကဋ္ဌ (၁) နယ်စပ်ရေးရာဝန်ကြီးဌာန ဒုတိယဝန်ကြီး ဗိုလ်ချုပ်ဖြိုးသန့်၊ ဒုတိယဥက္ကဋ္ဌ(၂) သယံဇာတနှင့် သဘာဝပတ်ဝန်း ကျင်ထိန်းသိမ်းရေးဝန်ကြီးဌာန ဒုတိယဝန်ကြီးဦးမင်းသူ၊ ကော်မတီဝင်များနှင့်သက်ဆိုင်ရာ ဝန်ကြီးဌာနများမှ ကိုယ်စားလှယ်များ တက်ရောက်ကြသည်။

▪️ မြန်မာ - ထိုင်း နယ်နိမိတ်ဖြတ်ကျော် မီးခိုးမြူငွေ့လေထုညစ်ညမ်းမှု တားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေးကော်မတီဥက္ကဋ္ဌ ဒုတိယဝန်ကြီး ဗိုလ်ချုပ်အောင်မျိုးသန့်က ကော်မတီဖွဲ့စည်းပြီးချိန်မှစတင်၍ လုပ်ငန်းများထိရောက်အောင်မြင်ရန်အတွက် အထူးသဖြင့် မြန်မာ - ထိုင်း နယ်နိမိတ်ဖြတ်ကျော်မီးခိုးမြူငွေ့ လျှော့ချနိုင်ရေးအတွက် လုပ်ငန်းစဉ်များချမှတ်နိုင်ရန် ယခုကဲ့သို့ အစည်းအဝေးများကျင်းပပြုလုပ်ခဲ့ရာ အစည်းအဝေး (၅) ကြိမ် ဆောင်ရွက်ခဲ့ပြီးဖြစ်ကြောင်း၊ ကော်မတီအစည်းအဝေးကို တစ်နှစ်လျှင် (၃) ကြိမ် ကျင်းပပြုလုပ်နိုင်ရေးလျာထားဆောင်ရွက်လျက်ရှိပြီး ယနေ့ပြုလုပ်ရသည့် အစည်းအဝေးသည် နှစ်စဉ် မီးခိုးမြူငွေ့မြင့်တက်လေ့ရှိသည့် မတ်လ၊ ဧပြီလနှင့် မေလများအတွက် Fire Hotspot လျှော့ချနိုင်ရေး လုပ်ဆောင်ရမည့်လုပ်ငန်းစဉ်များကိုလုပ်ဆောင်နိုင်ရန်ဖြစ်ကြောင်း၊Fire Hotspot ဖြစ်ပေါ်မှုသည် ရာသီဥတုပူပြင်းခြောက်သွေ့သည့် နှစ်များတွင်ပိုမိုဖြစ်ပေါ်လေ့ရှိပြီး နှစ်စဉ်ဇန်နဝါရီလမှ မေလအတွင်း မီးခိုးမြူငွေ့ ညစ်ညမ်းမှုများ ဖြစ်ပေါ်လေ့ရှိရာ နယ်စပ်ဖြတ် ကျော် မီးခိုးမြူငွေ့လေထုညစ်ညမ်းမှုသည် နယ်နိမိတ်ချင်းထိစပ်နေသည့် နိုင်ငံများအကြား မကြာခဏ ကြုံတွေ့ရလေ့ရှိသဖြင့် ပွင့်လင်းရာသီမရောက်မီ ထိန်းချုပ်လျှော့ချ ရေးလုပ်ငန်းစဉ်များကို အလေးထားပြီး ဆောင်ရွက်ရမည်ဖြစ်ကြောင်း၊Fire Hotspot လျှော့ချရေးနှင့် နယ်စပ်ဖြတ်ကျော် မီးခိုးမြူငွေ့ညစ်ညမ်းမှုထိန်းချုပ်ရေးအတွက် သက်ဆိုင်ရာတိုင်းဒေသကြီး၊ ပြည်နယ်အလိုက် Fire Hotspot ဖြစ်ပေါ်မှုအရေအတွက်၊ သိပ်သည်းဆပေါ်မူတည်၍ ဦးစားပေးဒေသများ သတ်မှတ်ပြီး ရွှေ့ပြောင်းတောင်ယာ စိုက်ပျိုးခြင်း “အစား” ကုန်းမြင့်လယ်ယာ စိုက်ပျိုးခြင်း၊ စိုက်ပျိုးရေးစွန့်ပစ်ပစ္စည်းများမှ မြေဩဇာပြုလုပ်ခြင်း၊ သစ်တောအတွင်း မီးမဆင်မခြင်အသုံးပြုမှုကို တားဆီးခြင်း၊ ဒေသခံပြည်သူများအား အသိပညာပေးခြင်း၊ Fire Hotspot ဖြစ်ပေါ်မှု အခြေအနေအား စောင့်ကြည့်လေ့လာခြင်း၊ ဝန်းကျင်လေထုအရည်အသွေး တိုင်းတာခြင်း၊ မီးခိုးမြူငွေ့ညစ်ညမ်းမှုဖြစ်ပေါ်လာပါက ဆောင်ရွက်ရမည့်အစီအမံများချမှတ်ခြင်း၊ ဇာတ်တိုက်လေ့ကျင့်ခြင်းစသည့် လုပ်ငန်းစဉ်များကို စဉ်ဆက်မပြတ်ဆောင်ရွက်သွားရမည်ဖြစ်ကြောင်း ပြောကြားသည်။

▪️ ၎င်းအပြင် ၂၀၂၅ ခုနှစ်အတွင်း မြေပြင်ကွင်းဆင်းစစ်ဆေးခြင်းများ ဆောင်ရွက်ခဲ့ရာ အဓိက မီးလောင်မှုဖြစ်ပေါ်ရသည့် အကြောင်းရင်းများအနေဖြင့် အများစုမှာ တောမီးလောင်ကျွမ်းမှု၊ တောင်ယာ ခုတ်ထွင်ရှင်းလင်းရန် မီးရှို့မှုနှင့် လယ်ယာထွက်ကုန် ပစ္စည်းများမီးရှို့မှုတို့ကြောင့် ဖြစ်သဖြင့် မြေပြင်ကွင်းဆင်း စစ်ဆေးခြင်းလုပ်ငန်းများကို ဆက်လက်ဆောင်ရွက်သွားရန်ဖြစ်ကြောင်း၊ အဆိုပါဒေသများတွင် မီးလောင်ကျွမ်းမှု ထပ်မံဖြစ်ပေါ်မှုမရှိစေရေးအတွက် တောင်ယာမီးရှို့ခြင်း၊ ရိုးပြတ်များမီးရှို့ခြင်းနှင့် တောမီးရှို့ခြင်းများ ဆောင်ရွက်ခြင်းမပြုစေရေး ကြိုတင်အသိပညာပေး ဆောင်ရွက်သွားရမည်ဖြစ်ကြောင်း၊ Fire Hotspot လျှော့ချနိုင်ရေးနှင့်စပ်လျဉ်း၍ ၂၀၂၆ ခုနှစ်အတွက် ရည်မှန်းထားသည့်အတိုင်း လျှော့ချနိုင်ရေးတို့အား အလေးထား ဆောင်ရွက်သွားရန် လိုအပ်ကြောင်း၊ ဇန်နဝါရီလမှ မေလအထိ ရိုးပြတ်များမီးရှို့ခြင်း၊ ရွှေ့ပြောင်းတောင်ယာစိုက်ပျိုးခြင်း၊ သစ်တောအတွင်း မီးမဆင်မခြင် အသုံးပြုခြင်းတို့ကို ထိန်းချုပ်ခြင်းနှင့် အသိပညာပေးလုပ်ငန်းများကို ကျေးလက်ဒေသများတွင် အလေးထားဆောင်ရွက်နိုင်ရေးနှင့် Fire Hotspot ကွင်းဆင်းစစ်ဆေးတွေ့ရှိခဲ့သည့်ဒေသများတွင် တောင်ယာမီးမရှို့ရေးနှင့် ရိုးပြတ်များမီးမရှို့ရေးတို့ကိုကြိုတင်အသိပေး ဆောင်ရွက်နိုင်ရေးကိစ္စနှင့်မြေပြင်ကွင်းဆင်းစစ်ဆေးရေး လုပ်ငန်းများကို ဆက်လက်ဆောင်ရွက်သွားရန်ဖြစ်ကြောင်း၊ ဒေသအလိုက် Fire Hotspot စောင့်ကြည့်ခြင်းနှင့် လေထုအရည်အသွေးတိုင်းတာခြင်းများလည်း ပုံမှန်ပြုလုပ်၍ သက်ဆိုင်ရာ ဌာနများအကြား ပေါင်းစပ်ညှိနှိုင်းဆောင်ရွက်ခြင်းများလည်း ဆက်လက်ပြုလုပ်သွားရန် လိုကြောင်း၊ တက်ရောက်လာသည့် ကော်မတီဝင်များအနေဖြင့်ပြီးခဲ့သည့် ညှိနှိုင်းအစည်းအဝေးများတွင် ဆွေးနွေးခဲ့မှုများအရပေးပို့လာသည့် လစဉ်လုပ်ငန်းဆောင်ရွက်မှု အချက်အလက်များအပြင် Fire Hotspot ဖြစ်ပေါ်မှုလျှော့ချရေးနှင့် မီးခိုးမြူငွေ့ညစ်ညမ်းမှု ထိန်းချုပ်ရေးလုပ်ငန်းများကို အမျိုးသားရေးတာဝန် တစ်ရပ်အနေဖြင့် အောင်မြင်စွာဆောင်ရွက်နိုင်မည့် နည်းလမ်းများကို ဝိုင်းဝန်းအကြံပြုဆွေးနွေးပေးစေလိုကြောင်း ပြောကြားသည်။

▪️ ထို့နောက် ကော်မတီဒုတိယဥက္ကဋ္ဌ(၁) နယ်စပ်ရေးရာဝန်ကြီးဌာန ဒုတိယဝန်ကြီး ဗိုလ်ချုပ် ဖြိုးသန့်က ယခင်အစည်းအဝေးဆုံးဖြတ်ချက်များတွင်ပါဝင်သည့် အသိပညာပေးလုပ်ငန်းများကို နယ်စပ်ရေးရာဝန်ကြီးဌာနအနေဖြင့် ဆောင်ရွက်လျက်ရှိကြောင်း၊ နယ်စပ်ရေးရာဝန်ကြီးဌာန အောက်ရှိ ရုံးဌာနများ၊ ဖွံ့ဖြိုးရေးတက္ကသိုလ်တစ်ခု၊ ဒီဂရီကောလိပ်နှစ်ခုနှင့် ကျောင်းအားလုံးပေါင်း ၁၀၀ ကျော်တို့တွင် နယ်နိမိတ်ဖြတ်ကျော်မီးခိုးမြူငွေ့ လေထုညစ်ညမ်းမှု တားဆီးကာကွယ်ရေးဆိုင်ရာ အသိပညာပေးလုပ်ငန်းများကို ဖော်ဆောင်ပေးလျက်ရှိသည့် ထိုင်းနိုင်ငံက ပေးပို့သော အသိပညာပေးဗီဒီယိုဖိုင်ကို ပြသခြင်းဖြင့် အသိပညာပေးလုပ်ငန်းများကို ဆောင်ရွက်ခဲ့ကြောင်း ရှင်းလင်းပြောကြားသည်။

▪️ ယင်းနောက်ကော်မတီ ဒုတိယဥက္ကဋ္ဌ(၂) သယံဇာတနှင့်သဘာဝပတ်ဝန်းကျင်ထိန်းသိမ်း ရေးဝန်ကြီးဌာန ဒုတိယဝန်ကြီး ဦးမင်းသူက တောမီးရှို့သည့်ပြဿနာ၊ မီးခိုးမြူငွေ့လေထု ညစ်ညမ်းမှုပြဿနာသည်မိမိတို့ ဒေသတွင်း၌ အင်မတန်အရေးကြီးသည့် ပတ်ဝန်းကျင်ဆိုင်ရာ စိန်ခေါ်မှုတစ်ခု ဖြစ်လာပါကြောင်း၊ ASMC Website ကနေရရှိသည့် အချက်အလက်များအရ ပြီးခဲ့ သည့် နှစ်များအတွင်း မတ်လနှင့် ဧပြီလများတွင် မြန်မာနိုင်ငံအရှေ့ပိုင်းနှင့် ထိုင်းနိုင်ငံမြောက်ပိုင်း ဒေသများ၌ Hotspot များ အများဆုံးဖြစ်ပေါ်နေသည်ကို တွေ့ရသည့်အတွက် လျှော့ချနိုင်ရန် အထူးအလေးထား ဆောင်ရွက်လျက်ရှိပြီး နိုင်ငံဖြတ်ကျော် မီးခိုးငွေ့ပြဿနာကို ထိရောက်စွာ ဖြေရှင်းနိုင်ရန် အားလုံးဝိုင်းဝန်းပူးပေါင်းဆောင်ရွက်ပေးကြရန် ရှင်းလင်းပြောကြားသည်။

▪️ ဆက်လက်၍ ကော်မတီအတွင်းရေးမှူးက မြန်မာ - ထိုင်း နယ်နိမိတ်ဖြတ်ကျော် မီးခိုးမြူငွေ့ လေထုညစ်ညမ်းမှု တားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေးကော်မတီ၏ ယခင်အစည်းအဝေးဆုံးဖြတ်ချက်များအပေါ်ဆောင်ရွက်ပြီးစီးမှု၊ တိုင်းဒေသကြီး၊ ပြည်နယ်များအလိုက် Fire Hotspot ဖြစ်ပွားမှုနှင့်ပတ်သက်၍ စစ်တမ်း ကောက်ယူထားရှိမှု၊ ဆောင်ရွက် ဆဲ၊ မြန်မာနိုင်ငံအတွင်း Fire Hotspot လျှော့ချရေးနှင့် နယ်စပ်ဖြတ်ကျော် မီးခိုးမြူငွေ့ညစ်ညမ်းမှု ထိန်းသိမ်းရေးလုပ်ငန်းများနှင့်စပ်လျဉ်း၍ ဆက်လက်ဆောင်ရွက်ရမည့်လုပ်ငန်းစဉ်များကို ရှင်းလင်း ပြောကြားသည်။

▪️ ထို့နောက် တက်ရောက်လာကြသည့် ကော်မတီဝင်များနှင့် ကိုယ်စားလှယ်များက မြန်မာ - ထိုင်း နယ်နိမိတ်ဖြတ်ကျော် မီးခိုးမြူငွေ့လေထုညစ်ညမ်းမှု တားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေး ကော်မတီ၏လုပ်ငန်းများနှင့်ပတ်သက်သည့် လုပ်ငန်းတာဝန်များကို အကောင်အထည်ဖော် ဆောင်ရွက်မှုအခြေအနေများကို သက်ဆိုင်ရာကဏ္ဍအလိုက် ဝိုင်းဝန်းအကြံပြုဆွေးနွေးတင်ပြကြရာ ကော်မတီဥက္ကဋ္ဌ ကာကွယ်ရေးဝန်ကြီးဌာန ဒုတိယဝန်ကြီးက လိုအပ်သည်များ ဖြည့်စွက်ဆွေးနွေးပြီး နိဂုံးချုပ်အမှာစကားပြောကြားကာ အစည်းအဝေးကိုရုပ်သိမ်းလိုက်ကြောင်း သိရသည်။

#YMG/NN #Yangon_Times