#Local_News
Published 21 August 2026

■ ဘန်ကောက်၊ ဩဂုတ် ၂၀။ မြန်မာ-ထိုင်း နယ်စပ်ဒေသ တည်ငြိမ်အေးချမ်းရေးနှင့် တရားဥပဒေစိုးမိုးရေး၊ အွန်လိုင်းရာဇဝတ်မှုနှင့် မူးယစ်ဆေးဝါးတိုက်ဖျက်ရေး၊ အကြမ်းဖက်မှုတန်ပြန်နှိမ်နင်းရေးအပါအဝင် နှစ်နိုင်ငံရင်ဆိုင်နေရသည့် နယ်စပ်နှင့် လုံခြုံရေးဆိုင်ရာ ကိစ္စရပ်များတွင် ပူးပေါင်းဆောင်ရွက်ရေးကို ဩဂုတ် ၂၀ ရက်က ဘန်ကောက်မြို့၌ ကျင်းပသည့် (၉) ကြိမ်မြောက် ထိုင်း-မြန်မာ အဆင့်မြင့်အရာရှိကြီးများအစည်းအဝေး (9th Thailand-Myanmar High Level Committee Meeting-HLC) တွင် နှစ်နိုင်ငံ တပ်မတော်ခေါင်းဆောင်များ ဆွေးနွေးခဲ့ကြသည်။

■ ထိုင်းနိုင်ငံက အိမ်ရှင်အဖြစ် Chatrium Grand Hotel တွင် ကျင်းပသည့် အစည်းအဝေးသို့ တပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ရဲဝင်းဦး၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး ကိုကိုဦးနှင့် တပ်မတော်အရာရှိကြီးများ တက်ရောက်ခဲ့ပြီး ထိုင်းဘက်မှ ထိုင်းဘုရင့်တပ်မတော်ကာကွယ်ရေးဦးစီးချုပ် General Ukris Boonta-nondha နှင့် အရာရှိကြီးများ တက်ရောက်ခဲ့ကြသည်။

■ အစည်းအဝေးတွင် နှစ်နိုင်ငံနယ်စပ် လုံခြုံရေးဆိုင်ရာ စိန်ခေါ်မှုများကို ဖြေရှင်းရေး၊ ဒေသဆိုင်ရာနယ်ခြားကော်မတီ (RBC) နှင့် မြို့နယ်အဆင့်နယ်ခြားကော်မတီ (TBC) လုပ်ငန်းများ ဆက်လက်ဆောင်ရွက်ရေးနှင့် နယ်စပ်ဒေသရှိ ပြည်သူများ၏ လူမှုဘဝဖွံ့ဖြိုးတိုးတက်ရေး၊ တည်ငြိမ်အေးချမ်းရေးတို့အတွက် စစ်ဘက်ပူးပေါင်းဆောင်ရွက်မှု မြှင့်တင်ရေးကို အဓိကထား ဆွေးနွေးခဲ့ကြသည်။

■ ထို့ပြင် အွန်လိုင်းရာဇဝတ်မှု၊ မူးယစ်ဆေးဝါး၊ နယ်စပ်ဖြတ်ကျော်တောမီးနှင့် မီးခိုးမြူငွေ့ တားဆီးကာကွယ်ရေး၊ နယ်နိမိတ်နှင့် နယ်စပ်မြစ်များ ရေညစ်ညမ်းမှုတိုက်ဖျက်ရေး၊ ပင်လယ်ရေကြောင်း လုံခြုံရေးနှင့် ဘေးကင်းရေးတို့တွင် ပူးပေါင်းဆောင်ရွက်ရေးကို ဆွေးနွေးခဲ့ကြသည်။ ရေကြီးမှု ကြိုတင်သတိပေးနိုင်ရန် အလိုအလျောက် တာဝေးတိုင်းတာရေးစခန်းများ ဖွင့်လှစ်ရေးကိုလည်း ထည့်သွင်းဆွေးနွေးခဲ့ကြောင်း မူရင်းသတင်းတွင် ဖော်ပြထားသည်။

■ အကြမ်းဖက်မှုတန်ပြန်နှိမ်နင်းရေးအပြင် စစ်ဘက်ပညာရေးနှင့် လေ့ကျင့်ရေး၊ စစ်ဘက်ဆေးပညာ၊ လူသားချင်းစာနာထောက်ထားမှု အကူအညီပေးရေးနှင့် သဘာဝဘေးအန္တရာယ် ကယ်ဆယ်ရေး၊ စိုက်ပျိုးရေးကဏ္ဍ၊ စစ်ဘက်ယဉ်ကျေးမှုဖလှယ်ရေးနှင့် နှစ်နိုင်ငံတပ်မတော်အကြား ချစ်ကြည်ရေးခရီးစဉ်များ ဆက်လက်ပြုလုပ်ရေးတို့ကိုလည်း ဆွေးနွေးခဲ့ကြသည်။

■ တပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ရဲဝင်းဦးက HLC အစည်းအဝေးသည် တပ်မတော်နှစ်ရပ် ပူးပေါင်းဆောင်ရွက်မှု မြှင့်တင်ရန်၊ နယ်စပ်လုံခြုံရေးဆိုင်ရာ ကိစ္စရပ်များ ဖြေရှင်းရာတွင် စစ်ဘက်ပူးပေါင်းဆောင်ရွက်မှုအတွက် လမ်းညွှန်ချက်များ ချမှတ်ရန်နှင့် RBC၊ TBC လုပ်ငန်းများ ဆက်လက်ဆောင်ရွက်နိုင်ရေး ညှိနှိုင်းရန် ရည်ရွယ်ကြောင်း ပြောကြားခဲ့သည်။

■ ထိုင်းဘုရင့်တပ်မတော်ကာကွယ်ရေးဦးစီးချုပ် General Ukris Boonta-nondha က HLC သည် တပ်မတော်နှစ်ရပ်အကြား အမြင့်ဆုံးအဆင့် ပူးပေါင်းဆောင်ရွက်မှုယန္တရားတစ်ခုဖြစ်ပြီး နှစ်နိုင်ငံ နယ်စပ်ဒေသ ငြိမ်းချမ်းရေး၊ တည်ငြိမ်ရေးနှင့် လုံခြုံရေးကို ထိန်းသိမ်းရာတွင် အရေးပါကြောင်း ပြောကြားခဲ့သည်။ တပ်မတော်နှစ်ရပ်အကြား နားလည်မှု၊ ယုံကြည်မှုနှင့် ပူးပေါင်းဆောင်ရွက်မှုမှတစ်ဆင့် စိန်ခေါ်မှုများကို အတူတကွဖြေရှင်းနိုင်မည်ဟုလည်း ဆိုသည်။

■ အစည်းအဝေးတွင် ဇွန် ၂၉ ရက်မှ ဇူလိုင် ၁ ရက်အထိ ကျိုင်းတုံမြို့၌ မြန်မာဘက်က အိမ်ရှင်အဖြစ် ကျင်းပခဲ့သည့် (၃၈) ကြိမ်မြောက် ဒေသဆိုင်ရာနယ်ခြားကော်မတီအစည်းအဝေး (38th RBC) ရလဒ်များကို ရှင်းလင်းတင်ပြခဲ့သကဲ့သို့ ပူးတွဲအတွင်းရေးမှူးအဖွဲ့အစည်းအဝေး (JSM) မှ ဆွေးနွေးခဲ့သည့် တပ်မတော်နှစ်ရပ် ပူးပေါင်းဆောင်ရွက်ရေးကိစ္စများကိုလည်း တင်ပြခဲ့ကြသည်။

■ ယင်းနောက် HLC အစည်းအဝေးဥက္ကဋ္ဌများဖြစ်သည့် နှစ်နိုင်ငံတပ်မတော်ကာကွယ်ရေးဦးစီးချုပ်များက အစည်းအဝေးတွင် ဆွေးနွေးခဲ့သည့် အကြောင်းအရာများကို အတည်ပြုဆုံးဖြတ်ခဲ့ကြပြီး (၉) ကြိမ်မြောက် ထိုင်း-မြန်မာ HLC အစည်းအဝေး သဘောတူညီချက်များကို လက်မှတ်ထိုး၍ အပြန်အလှန်လဲလှယ်ခဲ့ကြသည်။

■ ထိုင်းဘုရင့်တပ်မတော်ကာကွယ်ရေးဦးစီးချုပ်က မြန်မာ တပ်မတော်ကာကွယ်ရေးဦးစီးချုပ်ထံ လေထုညစ်ညမ်းမှုတိုင်းတာသည့် စက်ကိရိယာနှစ်စုံကိုလည်း လွှဲပြောင်းပေးအပ်ခဲ့သည်။

■ ယခု HLC အစည်းအဝေးမတိုင်မီ ပူးတွဲအတွင်းရေးမှူးအဖွဲ့အစည်းအဝေးကို ဩဂုတ် ၁၆ ရက်မှ ၁၉ ရက်အထိ ဘန်ကောက်မြို့၌ ကျင်းပခဲ့ခြင်းဖြစ်ပြီး ယင်းအစည်းအဝေးတွင် အထက်ပါ စစ်ဘက်ပူးပေါင်းဆောင်ရွက်ရေးနှင့် နယ်စပ်ဆိုင်ရာ ကိစ္စရပ်များကို ဆွေးနွေးခဲ့ကြခြင်းဖြစ်သည်။

လာမည့် (၁၀) ကြိမ်မြောက် မြန်မာ-ထိုင်း အဆင့်မြင့်အရာရှိကြီးများအစည်းအဝေးကို ၂၀၂၇ ခုနှစ်တွင် မြန်မာနိုင်ငံက အိမ်ရှင်အဖြစ် လက်ခံကျင်းပမည်ဖြစ်ကြောင်းသိရသည်။