#Local_News
Pnblished 22 November 2023

မလေးရှားသို့သွားရန်အတွက် ထိုင်းနိုင်ငံမှတစ်ဆင့် ခိုးဝင်ရန်ကြိုးစားသည့်မြန်မာအလုပ်သမား၈ ဦး ထိုင်းနိုင်ငံရနောင်းခရိုင်တွင် အဖမ်းခံရကြောင်း ထိုင်းအာဏာပိုင်များ၏ သတင်းထုတ်ပြန်ချက်အရသိရသည်။

ရနောင်းခရိုင် ကရဘူရီမြို့ နမ်းကျိန့်နွဲကျေးရွာ အုပ်စု ၂ နယ်မြေတွင် ဒေသခံအာဏာပိုင်အဖွဲ့များကင်းလှည့်နေစဉ် တရားမဝင်နယ်စပ်ဖြတ်ကျော်ဝင်ရောက်လာသည့် မြန်မာအလုပ်သမား ၈ဦးတို့ကို ယခုလ ၁၉ ရက်နေ့ ည ၈ နာရီခွဲခန့်တွင် ဖမ်းဆီးရမိခဲ့ကြောင်း ရနောင်းအခြေစိုက်အမှတ် ၂၅ အထူးခြေလျင်တပ်ဖွဲ့၏ သတင်းထုတ်ပြန်ချက်အရသိရသည်။

ယင်းအလုပ်သမားများသည်  ရန်ကုန်မြို့မှ ထွက်လာပြီး ကော့သောင်းမှ တဆင့်ရေလမ်းကြောင်းဖြင့် ဝင်ရောက်လာပြီး မလေးရှားနိုင်ငံသို့ ဆက်လက်ထွက်ခွာရန်စားအုန်းဆီခြံတွင် ကားစောင့်နေစဉ်တွင် အဖမ်းခံရခြင်း ဖြစ်သည်။

မလေးရှားသို့သွားရန်အတွက်  ပွဲစားခအဖြစ် ၈ ဦးအတွက် ဘတ်ငွေ ၇၀၀၀၀ ပေးရကြောင်း သိရသည်။

ဖမ်းဆီးမိသူများအားလုံးကို တရားဥပဒေအတိုင်းဆက်လက်ဆောင်ရွက်ရန် ရနောင်းခရိုင် ပါက်ကျန်ရဲစခန်းသို့ လွှဲပြောင်းပို့ဆောင်မည်ဖြစ်ကြောင်း သိရသည်။

#Local_News #ထိုင်းမှတစ်ဆင့်ခိုးဝင် #မြန်မာအလုပ်သမား၈ဦးအဖမ်းခံရ #YMG/LW #Yangon_Times

#Local_News
Published 22 November 2023

ထိုင်းနိုင်ငံ လရောင်မြို့ရှိ ဆောက်လုပ်ရေးလုပ်ငန်းတွင် လုပ်ကိုင်နေသည့် မြန်မာအလုပ်သမား ၂၀၀ကျော်အတွက် လုပ်ခလစာရရှိရန် ထိုင်းနိုင်ငံရှိ မြန်မာအလုပ်သမားသံရုံးမှဖြေရှင်းပေးနေပြီး စားသောက်ကုန်များကိုလည်း ကူညီထောက်ပံပေးကြောင်း သိရသည်။

အဆိုပါ မြန်မာအလုပ်သမားများသည် ယင်းမြို့နယ်ရှိ ပုဂ္ဂလိကစက်မှုဇုန်တွင် အလုပ်လုပ်နေသည့် ဆောက်လုပ်ရေးလုပ်သားများဖြစ်ကာ အလုပ်ရှင်မှ လုပ်အားခမပေးသည်မှာ နှစ်လနီးပါးရှိပြီဖြစ်ပြီး အလုပ်ရှင်မှ စွန့်ပစ်သွားသောကြောင့် စားသောက်နေထိုင်ရေး အခက်အခဲ ဖြစ်ပေါ်နေသည်ကို ဒေသခံထိုင်း လူမျိုးတွေက သိရှိပြီး ထိုင်းအာဏာပိုင်များထံ အကြောင်း ကြားပေးခဲ့ကြောင်း သိရသည်။

ထိုင်းအာဏာပိုင်များကလည်း လာရောက်ကူညီပေးခဲ့ပြီး သက်ဆိုင်ရာအလုပ်သမားကာကွယ်စောင့်ရှောက်ရေးရုံး (ဆာဝါဒီကန်ရုံး)သို့ တိုင်ကြားထားကာ အဆိုပါ ရုံးမှအမှုလက်ခံထားပြီးအလုပ်ရှင်အား ဆင့်ခေါ်ထားကြောင်း သိရသည်။

မြန်မာသံရုံး အနေဖြင့်လည်း ထိုင်းအလုပ်သမားဌာနများနှင့် ချိတ်ဆက်ဆောင်ရွက်ပေးနေပြီးထိုင်းလူမှု ဖူလုံရေးအဖွဲ့မှလည်း အစားသောက်များကူညီထောက်ပံပေးကြောင်း၊ မြန်မာ အလုပ်သမားသံအရာရှိ ရုံးမှလည်း အဆက်သွယ်မပြတ်ချိတ်ဆက်ကာ လိုအပ်သည့် စားသောက်ကုန်ပစ္စည်းများ ထောက်ပံပေးအပ်ကူညီဆောင်ရွက်ပေးနေကြောင်း သိရသည်။

#Local_News #လုပ်ခမပေးဘဲစွန့်ပစ် #မြန်မာသံရုံးမှဖြေရှင်းပေး #YMG/LW #Yangon_Times

#Local_News
Published_ 22 November 2023

လာမည့် တန်ဆောင်တိုင်ပိတ်ရက် နိုဝင်ဘာ၂၅ ရက် မှ ၂၇ ရက်အထိ ရန်ကုန်မြို့ပြည်သူရင်ပြင်၌ "စက်မှုထုတ်ကုန်ပစ္စည်း၊ စက်ယန္တရားနည်းပညာပြပွဲ၊ တန်ဆောင်တိုင်ဈေးရောင်းပွဲနှင့် မီးထွန်းပွဲတော်"ကျင်းပမည်ဖြစ်ကြောင်း သိရသည်။

အဆိုပါ ပွဲတော်တွင်ရန်ကုန် တိုင်းဒေသကြီးအတွင်းရှိ စက်မှုဇုန်များက လုပ်ငန်းရှင်များ၊ အသေးစား၊ အငယ်စား၊ အလတ်စား MSME လုပ်ငန်းရှင်များ၏ ထုတ်ကုန်အရောင်းပြခန်းများ၊ ဆန်၊ ဆီအရောင်းဆိုင်များ၊ အခြားတိုင်းဒေသကြီး/ပြည် နယ်များမှ လာရောက် ရောင်း ချသော ထုတ်ကုန်ပစ္စည်း အရောင်းပြခန်းများ အပါအဝင် ဆိုင်ခန်းပေါင်း ၄၅၅ ခန်းကျော် ပြသရောင်းချမည်ဖြစ်သည်။

ပွဲတော်ကို နိုဝင်ဘာ၂၅ ရက်မှ ၂၇ ရက်အထိကျင်းပမည်ဖြစ်ပြီး နေ့စဉ်  E-Sport Game ပြိုင်ပွဲများ၊ စတုဒိသာကျွေးမွေးခြင်းများ၊ ရုပ်ရှင်၊ သဘင်၊ ဂီတ နှင့် ဟာသပညာရှင်များ၏ ဖျော်ဖြေတင်ဆက်မှုများ၊ ဆပ်ကပ်၊ မျက်လှည့်၊ Dancer များ၏ ဖျော်ဖြေတင်ဆက်မှုများ၊ မီးရှူး မီးပန်းပစ်ဖောက်မည့် အစီအစဉ် များကို ကြည့်ရှုခံစားနိုင်မည်ဖြစ်ပြီး၊ ပွဲတော်လာပြည်သူများ သွားရေးလာရေးလွယ်ကူစေရန် အကြို/အပို့ကားများ စီစဉ်ထား ရှိပေးထားကြောင်း သိရသည်။

ယင်းပွဲ‌တော်ကိုနိုင်ငံတော်ဝန်ကြီးချုပ်၏ လမ်း ညွှန်ချက်နှင့်အညီ နိုင်ငံတော်၏ စီးပွားရေးကို ဖွံ့ဖြိုးတိုးတက် အောင် စီးပွားရေး ဦးတည်ချက် များချမှတ်ပြီး အသေးစား၊ အငယ်စားနှင့် အလတ်စား MSME  လုပ်ငန်းရှင်များကို လိုအပ်သော ငွေကြေးအရင်းအနှီး၊ နည်းပညာ ရရှိရေး၊ လူစွမ်းအားအရင်းအမြစ် ဖွံ့ဖြိုးတိုးတက်ရေး၊ ဈေးကွက် ရရှိရေး လိုအပ်သော အထောက် အပံ့များ ဆောင်ရွက်ပေးပြီး၊ ပြည်တွင်းထုတ်ကုန်များနှင့်  ပြည်ပသွင်းကုန်အစားထိုးထုတ် ကုန်များကို အားပေးမြှင့်တင်ရန်ရည်ရွယ်ကျင်းပပေးခြင်းဖြစ်ကြောင်း ပွဲတော်ကျင်းပရေးညှိနှိုင်းအစည်းအဝေး၌ ရန်ကုန်တိုင်းဝန်ကြီးချုပ်ကထည့်သွင်းပြောကြားခဲ့ကြောင်း သိရသည်။

#Local_News #တန်ဆောင်တိုင်ဈေးရောင်း #ပြည်သူ့ရင်ပြင်၌(၃)ရက်ကျင်းပ#tthl #Yangon_Times

#World_News
Published 22 November 2023

အိန္ဒိယဟာ တက်စ်လာကုမ္ပဏီနဲ့ သဘောတူညီချက်တစ်ခုရရှိရန် နီးစပ်နေပြီဖြစ်ပြီး အမေရိကန် မော်တော်ယာဥ်ထုတ်လုပ်ရေး တက်စ်လာက လာမယ့်နှစ်မှာ လျှပ်စစ်ကားတွေကို အိန္ဒိယသို့ တင်ပို့ခွင့်နဲ့ ၂ နှစ်အတွင်း စက်ရုံတစ်ခုတည်ထောင်ခွင့်တို့ရရှိမှာဖြစ်ကြောင်း နီးစပ်တဲ့ သတင်းရင်းမြစ်များအရ သိရပါတယ်။

ဂူဂျာရတ်၊ မဟာရက်ရှ်ထရာ၊ တမီလ်နာဒူတို့ဟာ လျှပ်စစ်ကားများနဲ့ တင်ပို့ကုန်များအတွက် ဂေဟစနစ်တွေ ကောင်းစွာဆောက်လုပ်ပြီး ဖြစ်တာကြောင့် ထိုဒေသတွေကို အဓိကထား စဥ်းစားနေပါတယ်။

နီးစပ်တဲ့ သတင်းရင်းမြစ်တစ်ဦးရဲ့ အဆိုအရတက်စ်လာဟာ စက်ရုံတစ်ခုခုမှာ ကနဦးဒေါ်လာ ၂ ဘီလီယံခန့် အနည်းဆုံးရင်းနှီးမြှုပ်နှံသွားမှာ ဖြစ်ပြီး အိန္ဒိယမှ မော်တော်ကားပစ္စည်းများ တိုးမြှင့်ဝယ်ယူရန် ဒေါ်လာ ၁၅ ဘီလီယံလောက်အထိ မျှော်လင့်ထားပါတယ်။

တက်စ်လာက အကုန်အကျ သက်သာဖို့အတွက် အိန္ဒိယမှာပဲ ဘတ်ထရီအချို့ ထုတ်လုပ်သွားရန် ကြိုးပမ်းနေပါတယ်။

နောက်ဆုံးပိတ် ဆုံးဖြတ်ချက် မချရသေးသလို အစီအစဥ်တွေ ပြောင်းလဲသွားနိုင်ပါသေးတယ်။

တက်စ်လာ အမှုဆောင်အရာရှိချုပ် အီလွန်မက်စ်က အိန္ဒိယမှာ ရင်းနှီးမြှုပ်နှံမှုကြီးတစ်ခု ပြုလုပ်ရန် စီစဥ်ထားပြီး ၂၀၂၄ မှာ လာရောက်လည်ပတ်ရန် ရည်ရွယ်ထားကြောင်း ဇွန်လက ပြောကြားခဲ့ပါတယ်။

ကမ္ဘာ့လူဦးရေ အထူထပ်ဆုံးနိုင်ငံဖြစ်တဲ့ အိန္ဒိယမှာ လူလတ်တန်းစားတွေကြား လျှပ်စစ်ကား အလိုရှိလာကြပြီး ဒါဟာ တက်စ်လာအတွက်တော့ အခွင့်အရေးကြီး ဖြစ်လာမှာပါ။

ဝန်ကြီးချုပ်မိုဒီရဲ့ အစိုးရကလည်း ပြည်တွင်းမှာ လျှပ်စစ်ကား ပိုမိုထုတ်လုပ်ရန် တွန်းအားပေးနေပြီး သန့်စင်စွမ်းအင်ဖြင့် သယ်ယူပို့ဆောင်ရေး အလျင်အမြန် အသားကျစေရန် အားပေးနေပါတယ်။

ဒါပေမဲ့ အိန္ဒိယမှာ မနှစ်က အိမ်စီးလျှပ်စစ်ကား ရောင်းချရမှုနှုန်းက ၁.၃ ရာခိုင်နှုန်းသာ ရှိခဲ့ကြောင်း BloombergNEF က ဖော်ပြထားပါတယ်။

လျှပ်စစ်ကားတွေရဲ့ ကနဦးကုန်ကျစရိတ် မြင့်မားခြင်းနဲ့ ဘက်ထရီအားသွင်းနေရာများ ရှားပါးခြင်းတို့ကြောင့် လူတွေက လျှပ်စစ်ကားဝယ်ယူရန် တုန့်ဆိုင်းနေကြပါတယ်။

အိန္ဒိယမှာ အခွန်အခ မြင့်မားတာကြောင့် တက်စ်လာက ကားတွေကို တိုက်ရိုက်မတင်သွင်းပါဘူး။

တက်စ်လာက ယခုနှစ်အတွင်း အိန္ဒိယကနေ မော်တော်ကားပစ္စည်း အစိတ်အပိုင်းများ ဝယ်ယူမှုကို နှစ်ဆနီးပါးတိုးမြှင့်ပြီး ဒေါ်လာ ၁.၉ ဘီလီယံအထိ ဝယ်ယူဖို့ စီစဥ်ထားကြောင်း ကုန်သွယ်ရေးဝန်ကြီးက ပြောပြသွားပါတယ်။

နိုင်ငံတကာမှ လျှပ်စစ်ကား ထုတ်လုပ်သူများသာ အိန္ဒိယမှာ တဖြည်းဖြည်းချင်း စက်ရုံများ တည်ထောင်သွားမယ်ဆိုပါက အချိန်ငါးနှစ်တာအတွက် တင်သွင်းခွန်များ လျှော့ချသွားရန် စဥ်းစားသွားမယ်လို့ အိန္ဒိယက ဆိုလိုက်ပါတယ်။

#World_News #အိန္ဒိယ #လျှပ်စစ်ကားထုတ်လုပ်ရေးစက်ရုံ #အမေရိကန်တက်စ်လာ
#Source: NDTV

#World_Health
Published 22 November 2023

တစ်နေ့ကို ဆား လက်ဖက်ရည်ဇွန်း ၁ ဇွန်း လျှော့စားရုံဖြင့် သွေးပေါင်ချိန်ထိန်းဆေးတွေရဲ့ အာနိသင်အတိုင်း ရရှိစေကြောင်း American Medical Associatioin ဂျာနယ်မှာ ဖော်ပြထားပါတယ်။

ဘာမင်ဂမ်မှ သုတေသီများက အသက် ၅၀ မှ ၇၅ နှစ်ကြား လူပေါင်း ၂၁၃ ဦးကို လေ့လာခဲ့ကြပါတယ်။

ပထမတစ်ပတ်ကို ဆိုဒီယမ်နည်းပါးတဲ့ စားစရာများ စားစေခဲ့ပြီး နောက်တစ်ပတ်ကို ဆိုဒီယမ်များတဲ့ စားစရာတွေ စားစေခဲ့ပါတယ်။

သာမန်စားစရာတွေနဲ့ နှိုင်းယှဥ်ပါက ဆိုဒီယမ်နည်းပါးတဲ့ အစားအစာတွေဟာ အပေါ်သွေး ၆ မီလီမီတာမာကျူရီ ကျဆင်းစေပြီး ဒါဟာ သွေးပေါင်ချိန်ထိန်းဆေးတွေရဲ့ သက်ရောက်မှုနဲ့ နှိုင်းယှဥ်လို့ရပါတယ်။

ဆားတစ်ဇွန်းမှာ ဆိုဒီယမ် ၂,၃၀၀ မီလီဂရမ် ပျမ်းမျှပါဝင်ပါတယ်။

ဆိုဒီယမ်လျှော့စားလို့ သွေးပေါင်ချိန်ကျဆင်းစေတဲ့ ပမာဏဟာ သွေးတိုးရောဂါ မရှိသူတွေမှာရော သွေးတိုးရောဂါအမျိုးမျိုး ရှိသူတွေမှာပါ အတူတူဖြစ်ကြောင်း တွဲဖက်ပရော်ဖက်ဆာ ဒီပက်ခ်ဂူ့ပ်တာက ပြောပြသွားပါတယ်။

သွေးထိန်းဆေး သုံးစွဲနေတဲ့သူ ဟုတ်ဟုတ် မဟုတ်ဟုတ် ပါဝင်စမ်းသပ်သူတွေထဲက ၇၀ မှ ၇၅ ရာခိုင်နှုန်းလောက်ဟာ သွေးပေါင်ချိန် ကျဆင်းသွားပါတယ်။

သွေးပေါင်ချိန်ထိန်းဆေး သုံးစွဲနေသူတွေမှာ ဆိုဒီယမ်လျှော့စားခြင်းဖြင့် သွေးပေါင်ချိန် ပိုမိုကျဆင်းစေတာကို အရင်က မသိခဲ့ကြောင်း၊ ဒါကြောင့် သွေးထိန်းဆေး သုံးစွဲနေသူတွေမှာတောင် သွေးပေါင်ချိန် ထိန်းသိမ်းဖို့အတွက် ဆိုဒီယမ်လျှော့ချ စားသုံးဖို့က အရေးကြီးကြောင်း ရောဂါကာကွယ်ရေး ပရော်ဖက်ဆာ နိုရီနာအယ်လန်က ပြောပြသွားပါတယ်။

သွေးပေါင်ချိန်က တစ်ပတ်အတွင်း သိသိသာသာ ကျဆင်းသွားပြီး သွေးပေါင်ချိန် ကျတဲ့ဒဏ်ကို ခံနိုင်ရည်ရှိဖို့ကလည်း အရေးကြီးကြောင်း၊ သွေးတိုးရောဂါက ကမ္ဘာပေါ်မှာ ကျန်းမာရေးပြဿနာကြီး တစ်ရပ် ဖြစ်နေကြောင်း အလာဘားမားတက္ကသိုလ်မှ ပရော်ဖက်ဆာ ကိုရာလူဝစ္စက ပြောပြခဲ့ပါတယ်။

ဆိုဒီယမ်လျှော့စားခြင်းကြောင့် သွေးပေါင်ချိန်အခြေအနေ ကောင်းမွန်လာတာဟာ ဘေးထွက်ဆိုးကျိုးမရှိဘဲ သွေးထိန်းဆေးတွေရဲ့ သက်ရောက်မှုနဲ့ ယှဥ်လို့ရပါတယ်။

နေ့စဥ်ဆိုဒီယမ်စားသုံးမှု ပမာဏဟာ ၁,၅၀၀ မီလီဂရမ်ရှိသင့်တယ်လို့ အမေရိကန် နှလုံးကျန်းမာရေး အဖွဲ့အစည်းမှ အကြံပြုထားပြီး ယခုလေ့လာချက်အရ ထိုပမာဏထက် ပိုမိုလျှော့ချသင့်ပါတယ်။

#World_Health #သွေးပေါင်ချိန်ထိန်းဆေး #ဆားလျှော့ချစားသုံးခြင်း #Source: New York Post

#World_Health
Published 22 November 2023

အစာစားပြီးနောက် သွေးတွင်းသကြားဓာတ် အလျင်အမြန် ကျဆင်းသွားသူတွေဟာ ပိုမိုဆာလောင်တတ်ကြပြီး နေ့ဘက်မှာ အခြားသူတွေထက် ကယ်လိုရီရာဂဏန်းခန့် ပိုမိုစားသောက်မိကြတယ်လို့ သုတေသနတစ်ခုမှာ ဖော်ပြထားပါတယ်။

အချို့လူတွေဟာ ကယ်လိုရီထိန်းတဲ့ စားသောက်ပုံစံ စားနေတာတောင် ကိုယ်အလေးချိန် မကျနိုင်ဘဲ ဖြစ်နေကြောင်း တက္ကသိုလ်အများအပြားမှ သုတေသီအဖွဲ့များ တွေ့ရှိခဲ့ကြပြီး လူတွေရဲ့ ကိုယ်တွင်းဇီဝဖြစ်ပျက်မှု ဖြစ်စဥ်များအကြောင်း သိရှိနားလည်ရန် အရေးကြီးပုံကို ဖော်ပြသွားပါတယ်။

လူပေါင်း ၁,၀၇၀ နှစ်ပတ်ကျော်ကာလအတွင်း ပုံမှန်မနက်စာနဲ့ နေ့လယ်စာ ညစာများစားသောက်ပြီးနောက် သွေးတွင်းသကြားဓာတ် တုန့်ပြန်ပုံနဲ့ ကျန်းမာရေး အခြားအမှတ်အသားများအကြောင်း အချက်အလက်များ စုဆောင်းခဲ့ကြပါတယ်။

ခန္ဓာကိုယ်ကနေ သကြားဓာတ်ကို ဘယ်လောက်အထိ ချေဖျက်သလဲဆိုတာကို တိုင်းတာရန် အစာမရှိချိန် သွေးတွင်းသကြားဓာတ် တုန့်ပြန်မှုစမ်းသပ်ချက်ကိုလည်း လုပ်ဆောင်ခဲ့ကြပါတယ်။

စမ်းသပ်ကာလတလျှောက် သွေးတွင်းသကြားဓာတ်ပမာဏကို တိုင်းတာရန် စက်နဲ့ လှုပ်ရှားမှု အိပ်စက်မှုတို့ကို စောင့်ကြည့်တဲ့ စက်တွေကိုလည်း ဝတ်ဆင်စေခဲ့ပါတယ်။

နေ့ပိုင်းအတွင်း ဘယ်အချိန် ဘာစားလဲဆိုတာနဲ့ ဆာလောင်မှု အတိုင်းအတာ၊ နိုးကြားမှုတို့ကိုလည်း မှတ်သားခဲ့ပါတယ်။

အချက်အလက်တွေကို ခွဲခြမ်းလေ့လာပြီးနောက် အချို့လူတွေဟာ သကြားဓာတ် အမြင့်ဆုံးရောက်ပြီးနောက် ၂ နာရီမှ ၄ နာရီအကြာမှာ သိသိသာသာ ကျဆင်းသွားပြီး သတ်မှတ်ပမာဏအောက် ရောက်သွားကြောင်း တွေ့ရှိခဲ့ကြပါတယ်။

သွေးတွင်းသကြားဓာတ် လျင်မြန်စွာကျဆင်းသူတွေဟာ ဆာလောင်စိတ် ၉ ရာခိုင်နှုန်းမြင့်မားပြီး နောက်တစ်နပ်မစားခင် နာရီဝက်လောက်သာ စောင့်ဆိုင်းချင်ကြပါတယ်။

ဒါ့အပြင် မနက်စာစားပြီးနောက် ၃ နာရီ ၄ နာရီအတွင်း ၇၅ ကယ်လိုရီ ပိုမိုစားသောက်မိကာ တစ်နေ့လုံးမှာ ၃၁၂ ကယ်လိုရီ ပိုမိုရရှိလာပါတယ်။

ဒီလိုပုံစံကနေ တစ်နှစ်ကို ပေါင် ၂၀ ခန့် တိုးများလာနိုင်ပါတယ်။

စားသောက်ပြီးနောက် သွေးတွင်းသကြားဓာတ် ကနဦးမြင့်တက်တုန့်ပြန်မှုထက်စာရင် သကြားဓာတ် ကျဆင်းမှုနှုန်းက ဆာလောင်စိတ်နဲ့ ကယ်လိုရီပိုမိုစားမိခြင်းတို့ကို တိုင်းတာရာမှာ ပိုမိုအသုံးဝင်ကြောင်း ကင်းစ်ကောလိပ်လန်ဒန်မှ ဒေါက်တာ ဆာရာဘယ်ရီမှ ပြောကြားသွားပါတယ်။

လူတွေက ကိုယ်အလေးချိန်ချဖို့ ခက်ခဲနေကာ တစ်နေ့တစ်နေ့ ကယ်လိုရီ ပိုမိုစားမိလာပြီး တစ်နှစ်အတွင်း ပေါင်များစွာ တက်လာကြောင်း၊ စားသောက်ပြီးနောက် သကြားဓာတ်ကျဆင်းခြင်းက ဆာလောင်စိတ်အပေါ် များစွာသက်ရောက်နေပြီး ကိုယ်အလေးချိန်နဲ့ ရေရှည်ကျန်းမာရေး ထိန်းသိမ်းရာမှာ လူတွေနားလည်လာစေမှာ ဖြစ်ကြောင်း နော်တင်ဂမ်တက္ကသိုလ်မှ ပရော်ဖက်ဆာ အန်နာဗဲလ်ဒက်စ်က ပြောပြခဲ့ပါတယ်။

တူညီတဲ့ စားစရာကိုပဲ စားသောက်စမ်းသပ်ခဲ့ရာ သကြားဓာတ်တုန့်ပြန်ပုံ ကွဲပြားတာကို တွေ့ခဲ့ကြပါတယ်။

သို့ရာမှာ အမျိုးသားတွေက အမျိုးသမီးတွေထက် သကြားဓာတ် ပိုမိုကျဆင်းလေ့ရှိကြောင်း တွေ့ရပါတယ်။

မိမိနဲ့ ကိုက်ညီမယ့် အစားအသောက်များကို ရွေးချယ်စားသုံးခြင်းဖြင့် ပိုမိုပြည့်ဝစေပြီး နည်းပါးစွာစားမိစေမှာ ဖြစ်ပါတယ်။

#World_Health #လူအချို့အမြဲဆာလောင် #သုတေသီများစူးစမ်းလေ့လာ #Source: DoctorNDTV

၂၁ နိုဝင်ဘာ ၂၀၂၃

မြန်မာနိုင်ငံအစိုးရအနေဖြင့် ရှမ်းပြည်နယ်(အရှေ့မြောက်ပိုင်းနယ်စပ်ဒေသတွင် တရားဥပဒေစိုးမိုးရေး  ဆောင်ရွက် နေမှု၊ရှမ်းပြည်နယ်(အရှေ့မြောက်ပိုင်း)မြန်မာအမျိုးသားရေး ကွန်ရက်မှ ဆန္ဒပြမှုများနှင့်ပတ်သက်သည့်ကိစ္စ၊  လွိုင်ကော်တက္ကသိုလ်မှ ဆရာ၊ဆရာမများအား အကြမ်းဖက်အဖွဲ့များမှ ဖမ်းဆီးထိန်းသိမ်းထားသော အခြေအနေ၊၂၁-၁၁-၂၀၂၃ ရက်နေ့ ရှမ်းပြည်နယ်(မြောက်ပိုင်း)၊ ရခိုင်ပြည်နယ်၊ ကယားပြည်နယ်နှင့် စစ်ကိုင်းတိုင်း တို့တွင် ထိတွေ့တိုက်ပွဲဖြစ်ပွားမှုများနှင့်ပတ်သက်၍ နစက သတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းက ရှင်းလင်းပြောကြားခဲ့ပါတယ်။

အဆိုပါရှင်းလင်းပြောကြားချက်အပြည့်အစုံကို ပြန်လည်ဖော်ပြပေးပါတယ်။

အကြိမ်(၃၀)မြောက် အာရှပစိဖိတ်စီးပွားရေး ပူးပေါင်းဆောင်ရွက်မှုခေါင်းဆောင်များ အစည်းအဝေးတွင် Golden Gate ကြေညာချက်ကျင့်သုံးရန်သဘောတူညီခဲ့ကြ

ဆန်ဖရန်ဆစ္စကိုမှာ ကျင်းပတဲ့ အကြိမ် ၃၀ မြောက် အာရှပစိဖိတ် စီးပွားရေးပူးပေါင်းဆောင်ရွက်မှု (APEC)ရဲ့ ခေါင်းဆောင်များ အစည်းအဝေးပွဲဟာ သောကြာနေ့မှာ နိဂုံးချုပ်လိုက်ပြီး အားလုံးအတွက် ရေရှည်တည်တံ့ခိုင်မြဲရေးနဲ့ ကြံ့ခိုင်တဲ့အနာဂတ် ပုံဖော်ရေးခေါင်းစဥ်ဖြင့် Golden Gate ကြေညာချက်ကို ကျင့်သုံးရန် သဘောတူညီခဲ့ကြပါတယ်။
#World_Economic
Published 21 November 2023
#ဆန်ဖရန်ဆစ္စကို #Golden Gate

#Daily_News
Published_ 21 November 2023

၁။ မြန်မာ့လက်မှုပညာရှင်ကို ထိုင်းမှ‌ပေ ၅၀ ရှိသည့် ဘီလူးရုပ်တုကြီးများထုလုပ်‌ပေးရန် စတင်အပ်နှံလာ

၂။ PNLO အခြေပြုဒေသသို့ ကယားပြည်နယ်မှ  စစ်ဘေးရှောင်လာသူ ၈၀၀၀ကျော်ရှိပြီဟုဆို

၃။ နောင်ချို-ဂုတ်တွင်းလမ်းပိုင်းပြန်လည်ဖွင့်လှစ်ပြီး တိုက်ပွဲရှောင်အများစု နေရပ်ပြန်လည်ထွက်ခွာ

၄။ အကြိမ်(၃၀)မြောက် အာရှပစိဖိတ်စီးပွားရေး ပူးပေါင်းဆောင်ရွက်မှုခေါင်းဆောင်များ အစည်းအဝေးတွင် Golden Gate ကြေညာချက်ကျင့်သုံးရန်သဘောတူညီခဲ့ကြ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News

၂၁ နိုဝင်ဘာ ၂၀၂၃

အစ္စရေးနှင့်ယာယီစစ်ပြေငြိမ်းရေးသဘောတူညီချက်တစ်ခုသည် နီးကပ်လာနေပြီဟု ဟားမာ့စ်ခေါင်းဆောင် အစ္စမေးလ်ဟန်နီယတ်က အင်္ဂါနေ့ နိုဝင်ဘာ ၂၁ ရက်ကတယ်လီဂရမ်မှာ သတင်းထုတ်ပြန်ချက်တင်ခဲ့ပါတယ်။

“ ယာယီစစ်ပြေငြိမ်းဖို့ အပေးအယူတစ်ခု ရရှိဖို့နီးစပ်နေပြီ” လို့ ဟန်နီယတ်က ပို့စ်ထဲမှာ ပြောခဲ့ပါတယ်။

အောက်တိုဘာ ၂၇ ရက်က အစ္စရေးရဲ့သမိုင်းမှာ ကို ကြောက်ဖက်ဖွယ် တိုက်ခိုက်ခံရမှုအတွင်းဖမ်းဆီးထားတဲ့ အစ္စရေး ဓားစာခံ ၂၄၀နီးပါးကို ပြန်လွှတ်ပေးမယ့် အပေးအယူတစ်ခုကို စေ့စပ်ညှိနှိုင်းသူတွေက ကြိုးစားနေကြ ပါတယ်။

ဟားမာ့စ်တိုက်ခိုက်ရေးသမားတွေဟာ နယ်စပ်ဖြတ်ကျော် တိုက်ခိုက်မှုတွေအတွင်း အရပ်သားအများစုပါတဲ့ လူပေါင်း ၁၂၀၀ခန့်ကို သတ်ခဲ့ကြပါတယ်။

အဲဒီတိုက်ခိုက်မှုအတွက် အစ္စရေးက မရပ်နားဗုံးတွေကြဲပြီး မြေပြင်ထိုးစစ်တွေလည်း ဆင်နွှဲခဲ့ကြကာ ပြန်လည် လက်စားချေခဲ့ပါတယ်။ ဟားမာ့စ်ကိုဖျက်ဆီးပစ်ပြီး ဓားစာခံတွေလွတ်မြောက်ဖို့ အစ္စရေးက သန္နိဋ္ဌာန်ချထားတာ ဖြစ်ပါတယ်။

ဂါဇာက ဟားမာ့စ်အစိုးရရဲ့အဆိုအရ နှစ်ဘက်စလုံးမှာ လူပေါင်း ၁၃.၃၀၀ခန့်သေဆုံးခဲ့ရပါတယ်လို့သိရပါတယ်။ အဲဒီထဲမှာကလေးတွေ ထောင်ပေါင်းများစွာပါဝင်ပါတယ်။

ဟာမားရဲ့နိုင်ငံရေးရုံးရှိပြီး ဟန်နီယတ်အခြေပြုတဲ့နေရာမှာ ကာတာနိုင်ငံရဲ့ ထက်သန်တဲ့ စေ့စပ်ညှိနှိုင်းမှုတွေ ဆောင်ရွက်နေဆဲလည်းဖြစ်ပါတယ်။

ဓားစာခံတွေလွှတ်ပေးပြီး အပြန်အလှန်အားဖြင့် ယာယီစစ်ပြေငြိမ်းဖို့ကိစ္စဟာ လက်တွေ့ပြဿနာအသေးအဖွဲ ကလေးတွေပဲ ဆွေးနွေးဖို့ရှိတော့တယ်လို့ ကာတာဝန်ကြီးချုပ်က တနင်္ဂနွေနေ့တုန်းကပြောထားပါတယ်။

တနင်္လာနေ့တုန်းလည်း အမေရိကန်သမ္မတ ဂျိုးဘိုင်ဒင်က သူ့အနေနှင့် ဓားစာခံတွေလွတ်မြောက်ရေးအပေးအယူ ကိစ္စအတော်နီးစပ်နေပြီလို့ယုံကြည်တယ်လို့ပြောခဲ့ပါတယ်။

အေအက်ဖ်ပီသတင်းဌာနကို ဆွေးနွေးမှုတွေနှင့်နီးစပ်တဲ့ သတင်းအရင်းအမြစ်နှစ်ခုက ပြောကြားရာမှာ အဲဒီ အပေးအယူကိစ္စမှာ ငါးရက်ကြာ ယာယီစစ်ပြေငြိမ်းရေးပါဝင်တယ်လို့ဆိုပါတယ်။ အဲဒီအထဲမှာမြေပြင်တွင် အပစ်အခတ်ရပ်ပြီး ဂါဇာတောင်ပိုင်းတွင် အစ္စရေးရဲ့လေကြောင်း စစ်ဆင်ရေးတွေ ကန့်သတ်ဖို့လည်းပါဝင်ပါတယ်လို့ သိရပါတယ်။

အပြန်အလှန်အားဖြင့် ဟားမာ့စ်နှင့် အစ္စလမ်မစ်ဂျီဟတ်တို့ဖမ်းထားတဲ့ အကျဉ်းသား ၅၀ ဦးနှင့် ၁၀၀ကြားအတွင်း ပြန်လွှန်ပေးဖို့ဖြစ်ပါတယ်။ လွှတ်ပေးသူတွေအထဲမှာ အစ္စရေးအရပ်သားတွေနှင့် အခြားနိုင်ငံသား အကျဉ်းသားတွေ ပါဝင်ပြီး စစ်သားတွေမပါဘူးလို့ဆိုပါတယ်။

အဆိုပြုသဘောတူညီချက်အရ အစ္စရေးအကျဉ်းထောင်ထဲက ပါလက်စတိုင်း၃၀၀ခန့်ကိုလည်း လွှတ်ပေးရပါမယ်။ သူတို့ဟာ အမျိုးသမီးများနှင့်ကလေးသူငယ်အများစုဖြစ်ပါတယ်။အိမ်ဖြူတော်က စေ့စပ်ညှိနှိုင်းမှုတွေဟာ အဆုံးသတ်နေပြီလို့ပြောပြီး အောင်မြင်တဲ့ရလာဒ်ကို ထိခိုက်နိုင်လို့ အသေးစိတ်ပြောဖို့ငြင်းဆန်ပါတယ်။

Source NDTV

ကိုဗစ် ၁၉ရောဂါကြောင့် သုံးနှစ်ကြာမှပြန်လည် ကျင်းပတဲ့ တောင်ကြီးတန်ဆောင်တိုင်ပွဲတော်ကို သက်ဆိုင်ရာကလုံခြုံရေးအတွက် သေချာစွာဆောင်ရွက်ပေးထားပြီး နေ့လွှတ်ညလွှတ် မီးပုံးပျံတွေနဲ့ ဒီကနေ့ည‌နေမှာစည်ကားစွာစတင် ကျင်းပသွားမယ်လို့ ရှမ်းပြည်နယ်တောင်ပိုင်း ရိုးရာမီးပုံးပျံပညာရှင်များအသင်းက သိရပါတယ်။
#Local_News
Published 21 November 2023
#တောင်ကြီးတန်ဆောင်တိုင်ပွဲတော် #ရိုးရာမီးပုံးပျံ
#YMG/NN #Yangon_Times

#Local_News
Published 21 November 2023

ကျောက်ဖြူအထူးစီးပွားရေးဇုန် စီမံခန့်ခွဲမှုကော်မတီကို အသစ်ပြန်လည်ပြင်ဆင်ဖွဲ့စည်းခဲ့ကြောင်း စီးပွားရေးနှင့် ကူးသန်းရောင်းဝယ်‌ရေးဝန်ကြီးဌာနမှ သိရသည်။

အဆိုပါ အသစ်ပြန်လည်ဖွဲ့စည်းလိုက်သည့် ကော်မတီတွင်စီးပွားကူးသန်းဝန်ကြီးဌာနမှ အထူးအရာရှိက ဥက္ကဋ္ဌအဖြစ် တာဝန်ယူဆောင်ရွက်မည်ဖြစ်ကြောင်း နိုဝင်ဘာ (၂၀) ရက် ရက်စွဲပါ အမိန့်ကြော်ငြာစာအမှတ် (၃/၂၀၂၃)ဖြင့် မြန်မာစီးပွားရေးဇုန်ဆိုင်ရာဗဟိုအဖွဲ့မှ ထုတ်ပြန်ကြေညာခဲ့ကြောင်း သိရသည်။

ကျောက်ဖြူအထူးစီးပွားရေးဇုန် စီမံခန့်ခွဲမှု ကော်မတီဥက္ကဋ္ဌအဖြစ် စီးပွားရေးနှင့် ကူးသန်း ရောင်းဝယ်‌ရေးဝန်ကြီးဌာန အထူးအရာရှိ ဦးကျော်ရွှေထွန်း၊ ဒုတိယဥက္ကဋ္ဌအဖြစ် ဦးဝင်းမြင့်၊ ဒုတိယညွှန်ကြားရေးမှူးချုပ်(ငြိမ်း) မြို့ပြနှင့်အိမ်ရာဖွံ့ဖြိုးရေးဦးစီးဌာနတို့ဖြစ်ပြီး အဖွဲ့ဝင်များအဖြစ် ရခိုင်ပြည်နယ်အစိုးရအဖွဲ့ဝင် ဦးစံရွှေမောင်၊ စီမံကိန်းရေးဆွဲရေးဌာန (ရခိုင်ပြည်နယ်) ပြည်နယ်ဦးစီးမှူး၊ ကျောက်ဖြူခရိုင်အထွေထွေအုပ်ချုပ်ရေးဦးစီးဌာန ခရိုင်အုပ်ချုပ်ရေးမှူး၊ မြန်မာ့ဆိပ်ကမ်းအာဏာပိုင် (ရခိုင်ပြည်နယ်) ပြည်နယ်တာဝန်ခံ၊ မြို့ပြနှင့် အိမ်ရာဖွံ့ဖြိုးရေးဦးစီးဌာန (ရခိုင်ပြည်နယ်) ညွှန်ကြားရေးမှူး၊ ကော်မတီအတွင်းရေးအမှူးအဖြစ် ဒေါက်ကျော်ဆန်းဦး၊ တွဲဖက်အတွင်းရေးမှူးအဖြစ် စီးပွားရေးနှင့် ကူးသန်း ရောင်းဝယ်ရေးဝန်ကြီးဌာန၊ မြန်မာ့ကုန်သွယ်မှုမြှင့်တင်ရေးအဖွဲ့၊ ဒုတိယညွှန်ကြားရေးမှူးချုပ်တို့ဖြင့် ဖွဲ့စည်းထားကြောင်း သိရသည်။

#Local_News #ကျောက်ဖြူ #အထူးစီးပွားရေးဇုန် #YMG/NN #Yangon_Times