#WorldHealth
Published - 16 February 2022

လှုပ်ရှားလေ့ကျင့်ခန်းပြုလုပ်ခြင်းက ခန္ဓာကိုယ်သန်စွမ်းကြံ့ခိုင်စေရုံတင်မကဘဲ ကိုဗစ်ကာကွယ်ဆေးထိုးပြီးတဲ့အခါ ပဋိပစ္စည်း antibody တွေကို တိုးများလာစေကြောင်း အိုင်ယိုဝါပြည်နယ်တက္ကသိုလ်မှ သုတေသီတွေက တင်ပြထားပါတယ်။

လေ့ကျင့်ခန်းပြုလုပ်ပေးခြင်းက တုပ်ကွေးကာကွယ်ဆေးနဲ့ ကိုဗစ်ကာကွယ်ဆေးထိုးပြီးတဲ့အခါ ပဋိပစ္စည်းထွက်ပေါ်လာမှုကို အားပေးကြောင်း၊ ကာကွယ်ဆေးထိုးပြီး လေ့ကျင့်ခန်းပြုလုပ်ခြင်းက ဘေးထွက်ဆိုးကျိုးမဖြစ်စေနိုင်ကြောင်း သုတေသီတွေက Science Direct ဂျာနယ်မှာ ထုတ်နုတ်ဖော်ပြထားပါတယ်။

ကာကွယ်ဆေးထိုးပြီးပြီးချင်း မိနစ် ၉၀ ကြာလေ့ကျင့်ခန်းပြုလုပ်ခြင်းရဲ့ အကျိုးသက်ရောက်မှုကို လေ့လာတဲ့အနေနဲ့ ကြွက်တွေကို ပြေးစက်မှာပြေးခိုင်းပြီး လေ့လာကြရာမှာ ရလာဒ်အတူတူထွက်ရှိလာခဲ့ပါတယ်။

ဗိုင်းရပ်စ်ကိုမှတ်မိသိရှိတဲ့ ပဋိပစ္စည်းတွေထွက်ရှိလာအောင် 'အင်တာဖရွန်အယ်လ်ဖာ'လို့ ခေါ်တဲ့ ပရိုတိန်းတွေရှိနေတာကို တွေ့ခဲ့ရပါတယ်။အချိန်အနည်းငယ်သာ လေ့ကျင့်ခန်းပြုလုပ်ခြင်းကတော့ ပဋိပစ္စည်းတွေများလာအောင် မလုပ်ပေးနိုင်ပါဘူး။

လေ့လာတွေ့ရှိချက်တွေအရ လေ့ကျင့်ခန်းပြုလုပ်ခြင်းဖြင့် ကာကွယ်ဆေးထိုးပြီး ၄ ပတ်အကြာအထိ သွေးရည်ကြည်ပဋိပစ္စည်းတွေ များစွာထွက်ရှိနေနိုင်ပါတယ်။လေ့ကျင့်ခန်းပုံမှန်ပြုလုပ်လေ့ရှိတဲ့ လူလတ်ပိုင်းတွေဟာ ကာကွယ်ဆေးထိုးပြီးနောက် သာမန်လေ့ကျင့်ခန်းပြုလုပ်ပေးခြင်းဖြင့် ကာကွယ်ဆေးကြောင့်ထွက်ရှိတဲ့ ပဋိပစ္စည်း antibody တွေ တိုးများလာစေပါတယ်။

စမ်းသပ်လေ့လာခဲ့တဲ့သူတဝက်နီးပါးလောက်က အဝလွန်တဲ့သူတွေဖြစ်ကြပေမယ့် လေ့ကျင့်ခန်းလုပ်နေစဉ်မှာတော့ ကျန်းမာတဲ့လူတစ်ယောက်ရဲ့ နှလုံးခုန်နှုန်းအတိုင်းထိန်းသိမ်းထားနိုင်ပါတယ်။

အရင်ထုတ်ပြန်ခဲ့ဖူးတဲ့ညွှန်ကြားချက်တွေထဲမှာ ကိုဗစ်ကာကွယ်ဆေးစထိုးတဲ့သူတွေအနေနဲ့ နှလုံးကြွက်သားရောင်ရမ်းခြင်းမျိုး မဖြစ်စေရန် လေ့ကျင့်ခန်းပြုလုပ်ခြင်းကို တစ်ပတ်လောက်ရှောင်ရှားဖို့ ညွှန်ကြားထားခဲ့ပါတယ်။

ပြီးခဲ့တဲ့အောက်တိုဘာလတုန်းက ဖိုင်ဇာကာကွယ်ဆေးထိုးပြီးတဲ့အခါ လေ့ကျင့်ခန်းမျိုးစုံပြုလုပ်နိုင်တယ်လို့ ကျန်းမာရေးဝန်ကြီးဌာနက ထုတ်ပြန်ကြေညာခဲ့ပါတယ်။
ကာကွယ်ဆေးထိုးပြီး နှလုံးရောင်ရမ်းခြင်းဖြစ်နိုင်ချေက အလွန့်အလွန်နည်းပါးကြောင်း အစ္စရေးလ်တို့ ကလည်း ဖော်ပြထားပါတယ်။

"ကျွန်တော်သိသလောက်ကတော့ ကာကွယ်ဆေးထိုးပြီးလို့ လေ့ကျင့်ခန်းမလုပ်သင့်ဘူးဆိုတာမျိုး မရှိပါဘူး" လို့ အစ္စရေးလ်ကျန်းမာရေးဝန်ကြီးဌာနမှ အထွေထွေညွှန်ကြားရေးမှူး ပရော်ဖက်ဆာ'နာ့ခ်မန်အက်ရှ်'က ပြောကြားလိုက်ပါတယ်။
Source: The Jerusalem Post 

#WorldPolitics
Published 16 February 2022

ယူကရိန်းနိုင်ငံအား ကျူးကျော်တိုက်ခိုက်ခြင်းမပြုလုပ်ဘဲ စစ်ပွဲကိုရှောင်ရှားဖို့ ရုရှားသမ္မတ'ဗလက်ဒီမီယာပူတင်'ကို အမေရိကန်သမ္မတ'ဂျိုးဘိုင်ဒန်'က အင်္ဂါနေ့က အလေးအနက်တောင်းဆိုလိုက်ပါတယ်။

ရုရှားတို့ကျူးကျော်တိုက်ခိုက်လာပါက မလိုအပ်ဘဲ အသက်သေဆုံးမှုတွေ ပျက်စီးဆုံးရှုံးမှုတွေ ဖြစ်ပေါ်လာမှာဖြစ်ပြီး 'ပူတင်'အနေနဲ့လည်း နိုင်ငံတကာက ရန်သူအဖြစ် သတ်မှတ်ခြင်းခံရနိုင်ကြောင်း 'ဘိုင်ဒန်'က ဆိုပါတယ်။

'ဘိုင်ဒန်'က ရုပ်မြင်သံကြားမိန့်ခွန်း၌ပြောကြားရာမှာ ယူကရိန်းကို ရုရှားစစ်အင်အား ၁ သိန်းခွဲခန့် ဝိုင်းရံထားတယ်လို့ ခန့်မှန်းရကြောင်း၊ ဒါဟာ အရင်နေ့တွေက ဖြန့်ကျက်ထားတဲ့ စစ်အင်အား ၁ သိန်းထက် ပိုများလာတာဖြစ်ကြောင်း၊ အချို့တပ်ဖွဲ့တွေ တပ်ဆုတ်လာတယ်ဆိုပေမယ့် အတည်မပြုနိုင်သေးကြောင်း၊ ကျူးကျော်မှုပြုလုပ်နိုင်ချေကတော့ အများကြီးရှိနေသေးကြောင်း ပြောကြားသွားခဲ့ပါတယ်။

ရုရှားအနေနဲ့ ဒီအကြပ်အတည်းမှာ ဖြေလျှော့သွားမလား ရင်ဆိုင်သွားမလားဆိုတာကို ရွေးချယ်လို့ရတဲ့ အခြေအနေရှိနေပါတယ်။

တကယ်လို့ ရုရှားတို့ ယူကရိန်းကိုကျူးကျော်မယ်ဆိုရင်တော့ အမေရိကန်နဲ့မဟာမိတ်အဖွဲ့တွေက ရုရှားတို့ ရဲ့စီးပွားရေးတွေကို ပစ်မှတ်ထားကာ ဒဏ်ခတ်အရေးယူသွားမှာဖြစ်ပြီး တစ်ကမ္ဘာလုံးနဲ့ အဆက်အသွယ်ဖြတ်ဆန့်ကျင်သွားဖို့ ပြင်ဆင်ထားကြပါတယ်။
'ဘိုင်ဒန်'ပြောဆိုခဲ့တဲ့ စကားလုံးတွေက 'ပူတင်'ကို အဓိကထားရည်ရွယ်ထားတာဖြစ်ပါတယ်။

ယူကရိန်းကို နေတိုး(NATO)အဖွဲ့ဝင်နိုင်ငံအဖြစ် လက်မခံဖို့နဲ့ နေတိုးတပ်ဖွဲ့တွေ ဥရောပအရှေ့ဘက်ကို ထပ်မံတိုးချဲ့မလာဖို့ 'ပူတင်'က တောင်းဆိုချက်တွေ တင်ပြထားပါတယ်။
'ဘိုင်ဒန်'က ရုရှားကို အရေးယူဒဏ်ခတ်သွားမယ်လို့ ခြိမ်းခြောက်နေပေမယ့် 'ပူတင်'ရဲ့သဘောထားကိုတော့ ပြောင်းလဲလာအောင် မစွမ်းဆောင်နိုင်သေးပါဘူး။

"အမေရိကန်နဲ့ နေတိုးတပ်ဖွဲ့ တွေက ရုရှားကိုခြိမ်းခြောက်နေတာမဟုတ်ပါဘူး။ ယူကရိန်းကလည်း ခြိမ်းခြောက်နေတာမဟုတ်ပါဘူး။ ယူကရိန်းနိုင်ငံအတွင်း အမေရိကန်နဲ့နေတိုးတပ်ဖွဲတွေရဲ့ ဒုံးကျည်တွေလည်း မရှိပါဘူး။ ထားရှိဖို့လည်း မရည်ရွယ်ထားပါဘူး။ ရုရှားပြည်သူတွေကို ပစ်မှတ်ထားအရေးယူနေတာမဟုတ်ပါဘူး။ ရုရှားနိုင်ငံ မငြိမ်မသက်ဖြစ်အောင် မရည်ရွယ်ပါဘူး" လို့ 'ဘိုင်ဒန်'က ဆိုပါတယ်။

"ရုရှားပြည်သူပြည်သားတွေကို ပြောပြချင်တာက ကျွန်တော်တို့က ရန်သူတွေမဟုတ်ပါဘူး။ ယူကရိန်းကိုတိုက်ခိုက်ပြီး သေကြေပျက်စီးကြရတာကို သင်တို့လည်း လိုချင်မှာမဟုတ်ဘူးလို့ ယုံကြည်ပါတယ်" လို့ 'ဘိုင်ဒန်'က ရုရှားနိုင်ငံသားတွေကို ကြေညာလိုက်ပါတယ်။

ရုရှားအနေနဲ့ ကျူးကျော်တိုက်ခိုက်ခဲ့ရင် လူ့အသက်တွေ ပျက်စီးဆုံးရှုံးမှုတွေ များသွားမှာဖြစ်ပြီး မလိုအပ်ဘဲ သေကြေပျက်စီးမှုတွေဖြစ်စေတဲ့လမ်းကို ရုရှားတို့ ရွေးချယ်ခဲ့တယ်ဆိုတာ ကမ္ဘာကမေ့ပျောက်သွားမှာမဟုတ်ပါဘူးလို့ ဆိုခဲ့ပါတယ်။

ဒါ့အပြင် 'ဘိုင်ဒန်'က အမေရိကန်တို့က ရုရှားနဲ့ထိပ်တိုက်ရင်ဆိုင်မှုဖြစ်အောင် ပြုလုပ်နေတာမဟုတ်ကြောင်း၊ ယူကရိန်းနိုင်ငံအတွင်းမှာ အမေရိကန်စစ်သည်တွေက တိုက်ခိုက်သွားမှာမဟုတ်ကြောင်း၊ ဒါပေမဲ့ ရုရှားတို့က ယူကရိန်းနိုင်ငံအတွင်း အမေရိကန်တွေကို တိုက်ခိုက်မယ်ဆိုရင်တော့ အလုံးအရင်းနဲ့ တုန့်ပြန်သွားမှာဖြစ်ကြောင်း ပြောကြားခဲ့ပါတယ်။
မိန့်ခွန်းမပြောကြားခင် တစ်ရက်အလိုက ယူကရိန်းအနေနဲ့ ဆိုက်ဘာတိုက်ခိုက်မှုတွေ ခံခဲ့ရပြီး ရုရှားလက်ချက်လို့ ယူဆရကြောင်း ပြောခဲ့ပါတယ်။

ရုရှားအနေနဲ့ ကုမ္ပဏီတွေ အရေးကြီးတဲ့ အချက်အခြာအဆောက်အအုံတွေကို ဆိုက်ဘာတိုက်ခိုက်မှုတွေ ပြုလုပ်လာမယ်ဆိုရင် တုန့်ပြန်သွားဖို့ ပြင်ဆင်ထားကြောင်း 'ဘိုင်ဒန်'က သတိပေးထားပါတယ်။
Source: Reuters

#LocalHealth
Published_ 16 Feb 2022

ရန်ကုန်တိုင်းဒေသကြီးအတွင်း နေအိမ်တွင်သီးသန့်ခွဲခြား နေထိုင်သော ကိုဗစ်ပိုးတွေ့လူနာများ ဆရာဝန်နှင့် ဆက်သွယ်မေးမြန်းတိုင်ပင်နိုင်မည့် ဖုန်းနံပတ်များကို ကျန်းမာရေးဝန်ကြီးဌာနက ယနေ့ထုတ်ပြန်ပေးထားပါတယ်။

နေအိမ်တွင်သီးသန့်ခွဲခြားနေထိုင်သော ကိုဗစ်-၁၉ ရောဂါ ပိုးတွေ့လူနာများ (Home Isolation) နှင့် မိဘပြည်သူများအနေဖြင့် ရောဂါနှင့်ပတ်သက်၍ တာဝန်ကျဆရာဝန်နှင့် တိုက်ရိုက် ဆက်သွယ်မေးမြန်းတိုင်ပင်နိုင်မည့်(Teleconsultation Program) အတွက် အထူးကုဆရာဝန်နှင့်ဆေးပညာရှင်များပါရှိသည့် Teleconsultation Team များကို ခရိုင်အလိုက် ဖွဲ့စည်းထားရှိပြီးဖြစ်တယ်လို့ သတင်းထုတ်ပြန်ချက်မှာ ဖော်ပြထားပါတယ်။

အဆိုပါပညာရှင်အဖွဲ့ များ၏ ဖုန်းနံပါတ်များသို့ သက်ဆိုင်ရာခရိုင်အလိုက် ဆက်သွယ်နိုင်ပါကြောင်း အသိပေးကြေညာထားပါတယ်။

တောင်ပိုင်းခရိုင် ကိုဗစ်-၁၉ ကျန်းမာရေးဆိုင်ရာ တိုင်ပင်ဆွေးနွေးနိုင်မည့်ပညာရှင် အဖွဲ့ (Teleconsultation Team) သို့ ၂၄ နာရီ ဆက်သွယ်နိုင်သည့် ဖုန်းနံပါတ်များ
၀၉ ၈၈ ၂၅၅ ၃၆၀၆
၀၉ ၈၈ ၂၅၅ ၃၆၀၅

မြောက်ပိုင်းခရိုင် ကိုဗစ်-၁၉ ကျန်းမာရေးဆိုင်ရာ တိုင်ပင်ဆွေးနွေးနိုင်မည့်ပညာရှင် အဖွဲ့ (Teleconsultation Team) သို့ ၂၄ နာရီ ဆက်သွယ်နိုင်သည့် ဖုန်းနံပါတ်များ
၀၉ ၈၈၂၅၅၄၀ ၀၈
၀၉ ၈၈၂၅၅၄၀ ၀၉

အနောက်ပိုင်းခရိုင် ကိုဗစ်-၁၉ ကျန်းမာရေးဆိုင်ရာ တိုင်ပင်ဆွေးနွေးနိုင်မည့် ပညာရှင်အဖွဲ့ (Teleconsultation Team) သို့ ၂၄ နာရီ ဆက်သွယ်နိုင်သည့် ဖုန်းနံပါတ်များ
၀၉ ၈၈၂၅၅၄၀ ၁၀
၀၉ ၈၈၂၅၅၄၀ ၁၁

အရှေ့ပိုင်းခရိုင် ကိုဗစ်-၁၉ ကျန်းမာရေးဆိုင်ရာ တိုင်ပင်ဆွေးနွေးနိုင်မည့်ပညာရှင် အဖွဲ့ (Teleconsultation Team) သို့ ၂၄ နာရီ ဆက်သွယ်နိုင်သည့် ဖုန်းနံပါတ်များ
၀၉ ၈၈၂၅၅၄၀ ၀၅
၀၉ ၈၈၂၅၅၄၀ ၀၆
ymg-mnn
#Yangon_Media_Group

#WorldHealth
Published - 16 February 2022

အမေရိကန်ပြည်ထောင်စုမှာ ကိုဗစ်ကူးစက်ပျံ့ပွားမှုတွေ လျော့နည်းလာတယ်ဆိုပေမယ့် နှလုံးကြွက်သားအားနည်းခြင်းအခြေအနေလိုမျိုး အဖြစ်များလာတာကို တွေ့ကြုံနေရကြောင်း ဆရာဝန်တွေကပြောကြားထားပါတယ်။

ရုတ်တရက်စိတ်ဖိစီးမှု ဒါမှမဟုတ် စိတ်ပိုင်းဆိုင်ရာအခြေအနေတွေကြောင့် ဖြစ်ပေါ်လာတတ်ကြောင်း ကျွမ်းကျင်ပညာရှင်များက ပြောပြပါတယ်။ဒီလိုအခြေအနေကို အသည်းကွဲရောဂါလို့ ခေါ်ကြပြီး မေတ္တာရေးမှာအဆင်မပြေသူတွေ ဝမ်းနည်းတတ်တဲ့သူတွေသာ ခံစားရလိမ့်ရှိတယ်လို့ ထင်နေကြပေမယ့် တကယ်တမ်းကတော့ စိုးရိမ်ရတဲ့အခြေအနေဖြစ်ပါတယ်။

ကပ်ရောဂါစကတည်းက ဒီလိုအဖြစ်မျိုး ပိုများလာတယ်လို့ ဆရာဝန်တွေကဆိုပါတယ်။
"နှလုံးကြွက်သားအားနည်းခြင်းအခြေအနေက နှလုံးမှာဖိစီးမှုအလွန်များလာတဲ့အခါ ဖြစ်တတ်ပါတယ်။ ဒါတောင် နှလုံးကြွက်သားက အလွန်သန်မာတဲ့အင်္ဂါဖြစ်ပါတယ်" လို့ မစ်ဆူရီ စိန့်လုခ်ဆေးရုံမှ နှလုံးအထူးကုဆရာဝန် ဒေါက်တာ'ထရေစီစတီဗင်'က ပြောပြလိုက်ပါတယ်။

ရုတ်တရက်စိတ်ဖိစီးခံစားရမှုတွေ၊ ဒေါသစိတ်ခံစားရမှုတွေ၊ စိုးရိမ်ကြောက်ရွံ့မှုတွေကြောင့် ဒီလိုအခြေအနေမျိုးဖြစ်တတ်ပါတယ်။ကပ်ရောဂါက လူတွေရဲ့နေထိုင်မှုဘဝကို ပြောင်းလဲပစ်လိုက်ကြောင်း၊ စိတ်ဖိစီးမှု ဝမ်းနည်းမှုတွေကြုံတွေ့လာရင် အခြားလူတွေနဲ့ဖွင့်ဟပြောဆိုသင့်ကြောင်း မစ်ဆူရီကျန်းမာရေးတက္ကသိုလ်မှ နှလုံးအထူးကု ဒေါက်တာ'ပါရမ်ဒိဘာဝီဂျာ'က ပြောခဲ့ပါတယ်။

"ကပ်ရောဂါကာလမှာ ခပ်ဝေးဝေးမှပြောဆိုနေထိုင်မှုတွေ ပြုလုပ်ခိုင်းတာကြောင့် စိတ်ဖိစီးမှုကြုံတွေ့နေရတဲ့သူတွေအတွက် ပိုပြီးခက်ခဲစေပါတယ်"အမေရိကန်နှလုံးရောဂါအဖွဲ့အစည်းရဲ့ဖော်ပြချက်အရ နှလုံးရဲ့အဓိကသွေးလွှတ်ခန်း ကြီးမားလာပြီး ကောင်းကောင်းအလုပ်မလုပ်နိုင်တဲ့အခါ ရင်ဘတ်အောင့်ခြင်း အသက်ရှူကြပ်ခြင်းတို့ ဖြစ်ပေါ်လာနိုင်ပါတယ်။

မနှစ်က အမေရိကန်နှလုံးရောဂါအဖွဲ့အစည်းဂျာနယ်မှာ ဖော်ပြထားချက်အရ နှလုံးကြွက်သားအားနည်းခြင်းရောဂါ အများဆုံးခံစားရတဲ့လူတွေဟာ အသက် ၅၀ နဲ့အထက်အမျိုးသမီးတွေဖြစ်ပါတယ်။

အဆိုပါရောဂါခံစားရသူတွေဟာ ရက်ပိုင်းအတွင်း ပြန်လည်သက်သာတတ်ပေမယ့် အခြားနှလုံးသွေးကြောဆိုင်ရာရောဂါများ ဖြစ်လာနိုင်ချေရှိပါတယ်။

"အများစုက ပြန်ကောင်းသွားကြပါတယ်။ နှလုံးသွေးလွှတ်ခန်းက မူလအတိုင်း ပြန်လည်လှုပ်ရှားနိုင်ပြီး နှလုံးခုန်နိုင်စွမ်း ပုံမှန်ပြန်ဖြစ်လာပေမယ့် အနီးကပ်သေချာစောင့်ကြည့်သွားဖို့တော့ လိုအပ်ပါတယ်" လို့ 'စတီဗင်'က ဆိုပါတယ်။
Source: WHNT. 

#WorldArchaeology
Published 15 February 2022

အယ်လ်ဆာလ်ဗေးဒိုးနိုင်ငံရှိ မိုင်ယာရွာလေးဟာ မီးတောင်ပေါက်ကွဲမှုတွေကြောင့် နှစ်ပေါင်း ၁,၄၀၀ ကျော်တိုင်အောင် ပြာဖုံးလွှမ်းနေခဲ့ရပါတယ်။

#Yangon_Media_Group

Published 15 Feb 2022

သူတို့ရဲ့မျက်လုံးတွေမှာ မျက်ရည်တွေဝဲနေပါတယ်။ ဝတ်ဆင်ထားတဲ့နှာခေါင်းစည်းအောက်မှာတော့ သူတို့ရဲ့အပြုံးတွေကို မြင်ရပါတယ်။ မက္ကဆီကိုနိုင်ငံမှာ တနင်္လာနေ့က ဗာလင်တိုင်း ချစ်သူများနေ့အထိမ်းအမှတ်အဖြစ်စုံတွဲပေါင်း ၆၆၀ကျော်တို့ဟာ အစုအပြုံလိုက် လက်ထပ်မင်္ဂလာပွဲကြီး ဆင်နွှဲခဲ့ကြပါတယ်။

Source AFP

Published 15 February 2022

မြောက်ကိုးရီးယားခေါင်းဆောင် ကင်မ်ဂျုန်အန်ဟာ ဖေဖော်ဝါရီ(၁၂)ရက်နေ့က ပြုံယမ်းမှာကျင်းပတဲ့ ပထမအသုတ် အိမ်ခန်းပေါင်း တစ်သောင်းကို အုတ်မြစ်ချစတင်တည်ဆောက်တဲ့ အခမ်းအနားကို တက်ရောက်မိန့်ခွန်းပြောကြားခဲ့ပါတယ်။

ငါးနှစ်စီမံကိန်းနှင့် ၂၀၂၅နှစ်အရောက်မှာ အိမ်ခန်းပေါင်းငါးသောင်းတည်ဆောက်မှာဖြစ်ပါတယ်။

ကင်မ်တက်ရောက်လာတဲ့ ဗွီဒီယိုသတင်းကို မြောက်ကိုရီးယား နိုင်ငံပိုင်မီဒီယာက ဖေဖော်ဝါရီ ၁၅ရက်မှာ ထုတ်လွှင့်ပြသခဲ့ ပါတယ်။

Source AFP

#LocalNews
Published - 15 Feb 2022

နေပြည်တော်မှာ ပြည်ထောင်စုနေ့အခမ်းအနားနဲ့ ငြိမ်းချမ်းရေးဆွေးနွေးပွဲကို တစ်ပြိုင်တည်းလုပ်ခဲ့တာကြာင့် ငြိမ်းချမ်းရေးဆွေးနွေးပွဲဘက်မှာ အားအေားလျော့စေခဲ့တယ်လို့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST)ရဲ့ တာဝန်ရှိသူ ဗိုလ်မှူးကြီး ခွန်ဥက္ကာက YMG ကို ပြောပါတယ်။

#Yangon_Media_Group

#LocalNews
Published 15 Feb 2022

ရခိုင်ပြည်နယ် မြောက်ဦးမြို့ ကမ္ဘာ့ရှေးဟောင်းအမွေအနှစ်စာရင်းဝင်နိုင်ရေးအတွက် အီတလီနိုင်ငံသားပညာရှင်ရဲ့ ရှေ့ပြေးကွင်းဆင်းမှုကရရှိတဲ့ အကြောင်းအရာတွေကို ပြည်နယ်အစိုးရဆီ တင်ပြဖို့ရှိနေပါတယ်။

#Yangon_Media_Group

#LocalNews
Published - 15 Feb 2022

ထိုင်းနိုင်ငံအနေနဲ့ MOU စနစ်နဲ့ မြန်မာလုပ်သားအရေအတွက် သိန်းနှင့်ချီခေါ်ယူဖို့ ရှိနေတယ်ဆိုပေမယ့်လည်း ကိုဗစ်စည်းကမ်းတွေနဲ့ ပက်သက်တဲ့ လုပ်ဆောင်ချက်တွေအရ တစ်လကို အလုပ်သမား ၇,၅၀၀ လောက်ပဲ ပို့နိုင်ဦးမယ်လို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ၊ အလုပ်သမားညွှန်ကြားရေး ဦးစီးဌာနက သိရပါတယ်။

#Yangon_Media_Group

#LocalNews
Published - 15 Feb 2022

၂၀၂၂ ခုနှစ် ကမ္ဘာ့အိုဇုန်းလွှာထိန်းသိမ်းရေးနေ့တွင် ကျင်းပမယ့် အာရှပစိဖိတ်ဒေသအတွင်း အနုပညာပြိုင်ပွဲကို မြန်မာနိုင်ငံအနေနဲ့ ဝင်ရောက်ယှဉ်ပြိုင်လိုသူတွေက ပတ်ဝန်းကျင်ထိန်းသိမ်းရေးဦးစီးဌာနမှာ စာရင်းပေးသွင်းနိုင်တယ်လို့ ထုတ်ပြန်ထားပါတယ်။

ပြိုင်ပွဲအမျိုးအစားအနေနဲ့ ဓာတ်ပုံပြိုင်ပွဲ၊ ပန်းချီပြိုင်ပွဲ၊ ကွန်ပျူတာပန်းချီနဲ့ ဂရစ်ဖစ်ဒီဇိုင်းပြိုင်ပွဲ တို့မှာ ပါဝင်ယှဉ်ပြိုင်ရမှာဖြစ်ပြီး ပြိုင်ပွဲဝင်လက်ရာတွေကို ပတ်ဝန်းကျင်ထိန်းသိမ်းရေးဦးစီးဌာန၊ နေပြည်တော်ကို ၂၀၂၂ ခုနှစ် မတ်လ ၇ ရက်နေ့ နောက်ဆုံးထားပေးပို့ယှဉ်ပြိုင်နိုင်တယ်လို့ သိရပါတယ်။

ကင်မရာနဲ့ ရိုက်ကူးထားတဲ့ပုံတွေ၊ ပန်းချီမှာဆိုရင် ခဲ/ရောင်စုံ/ရေဆေး/ဆီဆေး တို့နဲ့ ယှဉ်ပြိုင်နိုင်ပြီး ဂရစ်ဖစ်ဒီဇိုင်းကို ကွန်ပျူတာနဲ့ ဖြစ်စေ၊ မိုဘိုင်းဖုန်း application နဲ့ဆွဲသားထားတဲ့ ဒီဇိုင်းတွေ၊ ကွန်ပျူတာပန်းချီမှာ ဆိုရင် dimensional hand-made arts တို့ကို ဝင်ရောက်ယှဉ်ပြိုင်နိုင်မှာ ဖြစ်ပါတယ်။

ဆုချီးမြှင့်မှုအနေနဲ့ အငယ်တန်း/ အလွတ်တန်း ပထမဆု ၂ သိန်းကျပ်၊ ဒုတိယဆု တစ်သိန်းငါးသောင်းကျပ်၊ တတိယဆု တစ်သိန်းကျပ်တို့ ရရှိမှာဖြစ်ပါတယ်။

ဒါ့အပြင် နိုင်ငံအဆင့် ပထမဆုရရှိသူတွေရဲ့ လက်ရာတွေကို UNEP မှ ကြီးမှူးကျင်းပတဲ့ အာရှ-ပစိဖိတ်ဒေသတွင်း ဆိုင်ရာ Regional Ozone2climate art contest သို့ ဆက်လက်ပေးပို့ယှဉ်ပြိုင်သွားမှာ ဖြစ်ပါတယ်။

ပြိုင်ပွဲဝင်မယ့်သူတွေအနေနဲ့ အငယ်တန်းဆိုရင် ၂၀၂၁ ခုနှစ် ၉ လပိုင်းမှာ အသက် ၁၅ နှစ် မပြည့်သေးသူနဲ့ အသက် ၁၅ နှစ်အောက်ဖြစ်ရမှာဖြစ်ပြီး အလွတ်တန်းအနေနဲ့ ၂၀၂၁ ခုနှစ် ၉ လပိုင်းမှာ အသက် ၁၅ နှစ် ပြည့်ပြီးသူ ဖြစ်ရမယ်လို့ ကြေညာထားပါတယ်။

ymg/ei
#Yangon_Media_Group

#LocalNews
Published - 15 Feb 2022

AFF U 23 ပြိုင်ပွဲဝင်ရောက်မယ့် မြန်မာလက်ရွေးစင် ယူ ၂၃ ကစားသမားတွေအနေနဲ့ တစ်သင်းလုံးနီးပါး ကိုဗစ်ကူးစက်မှုခံနေရတာကြောင့် ပြိုင်ပွဲကနေ နုတ်ထွက်သွားတယ်လို့ အာဆီယံဘောလုံးအဖွဲ့ချုပ်ဒီကနေ့မှာကတရားဝင်ထုတ်ပြန်လိုက်ပါတယ်။

AFF U 23 ပြိုင်ပွဲကို ပါဝင်ယှဉ်ပြိုင်နေပြီး ဒီနေ့မှာ မလေးရှားနဲ့ ရင်ဆိုင်ကစားရမယ့် မြန်မာ ယူ-၂၃ အသင်းဟာ အသင်းတွင်း ကိုဗစ်ကူးစက်မှုအများအပြားဖြစ်ပွားနေလို့ ပြိုင်ပွဲက နုတ်ထွက်ခဲ့ရတာဖြစ်ပြီး မြန်မာအသင်းမှာ ကစားသမား ၂၃ ဦး လိုက်ပါသွားခဲ့ပြီး ၅ ဦးသာ ကြံ့ခိုင်မှုကောင်းမွန်နေကာ ကျန်ကစားသမားတွေက ကိုဗစ်ကူးစက်ခံထားရပြီး ရောဂါလက္ခဏာတွေ ပြသနေတယ်လို့ သိရပါတယ်။

ကျန်းမာရေးပြဿနာတွေ ဆိုးရွားစွာရင်ဆိုင်နေရတာကြောင့် ပြိုင်ပွဲကနေ နှုတ်ထွက်ခဲ့တာလို့သိရပြီး ဒီအကြောင်းကို နည်းပြပိုပေါ့ဗ်ကလည်း သူ့ရဲ့လူမှုကွန်ယက်ကနေ အသိပေးပြောဆိုထားပါတယ်။

မြန်မာအသင်းဟာ အုပ်စု (ခ)မှာ ကျရောက်နေတာဖြစ်ပြီး မလေးရှား၊ လာအို၊ အင်ဒိုနီးရှားတို့နဲ့ တစ်အုပ်စုတည်းကျရောက်နေပြီး ကမ္ဘောဒီးယားက အိမ်ရှင်အဖြစ် လက်ခံကျင်းပနေတာဖြစ်ပါတယ်။

ymg/hm
#Yangon_Media_Group