အယ်နီညိုကြောင့် မွေးမြူရေးငါးများ အောက်ဆီပြတ်ပြီး မသေအောင် ကာကွယ်နည်းစနစ်များ အခမဲ့ပေးနေ

‘ငါးမွေးကန်တွေအတွက် ရေစုဆောင်းနည်းတွေ၊ အောက်ဆီဂျင်မပြတ်အောင် ဂရုစိုက်ပြီးတော့ရေလှယ် ပေးတဲ့စနစ်တွေ ရေလှုပ်ရှားတဲ့စနစ်တွေ၊ ရေပန်းထုတ်တဲ့စနစ်တွေကို ငါးမွေးမြူတဲ့တောင်သူတွေကို ငါးမွေးမြူရေးဦးစီးဌာနမှအခမဲ့ ပေးဝေသွားမှာဖြစ်တယ်’ ရန်ကုန်တိုင်းငါးလုပ်ငန်းဦးစီးဌာန၊ဒုတိယတိုင်းဦးစီးဌာနမှူးဦးတင့်လွင်
Yangon_Times/tthl
#Local_News
#Published_ 21 October 2023
#YMG #Yangon_Times #Yangon_Media_Group

Published_ 21 October 2023

ဂန္ထဝင်တေးသံရှင်ဦးမင်းနောင်၏ဇနီး ဂန္ထဝင်တေးသံရှင်ဒေါ်ရီလေး အောက်တိုဘာလ(၁၉)ရက်၌ ကွယ်လွန်သွားကြောင်း မြန်မာနိုင်ငံဂီတအစည်းအရုံးမှသိရသည်။

ကွယ်လွန်ချိန်တွင်အသက် (၉၁)နှစ်ရှိပြီဖြစ်ပြီးဂန္ထဝင်တေးသံရှင်ကြီးဒေါ်ရီလေးကွယ်လွန်ခြင်းအတွက် မြန်မာနိုင်ငံဂီတ အစည်းအရုံးအနေနှင့်အထူးပင်ဝမ်းနည်းစိတ်မကောင်းခြင်းများစွာဖြစ်ရကြောင်း ဝမ်းနည်းမှတ်တမ်းဖော်ပြထားသည်။

‘‘ဂန္ထဝင်တေးသံရှင်ဦးမင်းနောင်၏ဇနီး ဂန္ထဝင်တေးသံရှင်ကြီးဒေါ်ရီလေးကွယ်လွန်သွားတယ်ဆိုတာဟုတ်ပါတယ် ခင်ဗျာ။၉၁နှစ်ရှိသွားပြီ။ ‘ပင်မြက်ကလေး’သီချင်းကိုသီဆိုခဲ့သူပါ။ဂန္ထဝင်တေးသံရှင်ကြီးဒေါ်ရီလေးကွယ်လွန် သွားတဲ့အထူးဝမ်းနည်းကြေကွဲရပါတယ်’’ဟု မြန်မာနိုင်ငံဂီတအစည်းအရုံးမှတာဝန်ရှိသူတစ်ဦးကYMGကို ပြောသည်။

မြန်မာမှုစန္ဒရားပညာရှင်များလူမှုကူညီရေးအဖွဲ့ဝင်များကလည်းတေးသံရှင်ကြီး စည်သူဦးမင်းနောင်၏ ဇနီး တေးသံရှင် ဒေါ်ရီလေး ( ၉၁ )နှစ် သည် (၁၉.၁၀.၂၀၂၃ )ညနေ ၃ နာရီ တွင် ကွယ်လွန်အနိစ္စ ရောက်ရှိသွားကြောင်း ကြားသိရသည့် အတွက် မိသားစုနှင့် ထပ်တူလွန်စွာမှဝမ်းနည်းရပါကြောင်း နှင့် အဖွားဒေါ်ရီလေး ကောင်းရာသုဂတိလားပါစေကြောင်း ဆုတောင်းအပ်ပါသည်ဟုရေးသားဖော်ပြထားသည်။

ဒေါ်ရီရီမြင့်(ခေါ်)ဂန္ထဝင်တေးသံရှင်ကြီးဒေါ်ရီလေးကို အောက်တိုဘာလ၂၁ရက်နေ့လည်ပိုင်းတွင် အမိုးနီသုဿန်၌ မီးသဂြိုဟ်မည်ဖြစ်ပြီး အောက်တိုဘာလ၂၅ရက်တွင် နေအိမ်၌ရက်လည်ဆွမ်းကျွေးမည်ဖြစ်ကြောင်းသိရသည်။
Yangon_Times/tthl
#Local_News
#Published_ 21 October 2023
#YMG #Yangon_Times #Yangon_Media_Group

၂၁ အောက်တိုဘာ ၂၀၂၃

ရုရှားနှင့်မြန်မာနိုင်ငံတို့သည် နျူကလီးယားလျှပ်စစ်ဓာတ်အားထုတ်လပ်ရေးစက်ရုံ မြန်မာနိုင်ငံတွင်တည်ဆောက်ရေးအတွက် နားလည်မှုစာချွန်လွှာကို အောက်တိုဘာ ဒုတိယပတ်က လက်မှတ်ရေးထိုးခဲ့ကြတယ်လို့ ရုရှားမီဒီယာများက သတင်းဖော်ပြကြ ပါတယ်။

ရုရှားနိုင်ငံပိုင် အဏုမြူစွမ်းအင်ကော်ပိုရေးရှင်း (Rosatom)နှင့် မြန်မာနိုင်ငံအစိုးရတို့ဟာ မော်စကိုမှာပြုလုပ်ခဲ့တဲ့ မော်စကို စွမ်းအင် ရက်သတ္တပတ်ပြပွဲအတွင်း လက်မှတ်ရေးထိုးခဲ့ကြတာဖြစ်တယ်လို့ ကုမ္ပဏီကသတင်းထုတ်ပြန်ခဲ့ပါတယ်။

“ နှစ်နိုင်ငံဟာ ပြည်ထောင်စုမြန်မာနိုင်ငံတော်မှာ နျူကလီးယားအခြေခံအဆောက်အအုံဖွံ့ဖြိုးတိုးတက်ရေးအတွက် လက်ငင်း လိုအပ်ချက်တွေကို သတ်မှတ်ကြဖို့ စီစဉ်ထားပါတယ်။အဲဒီနောက် မြန်မာနိုင်ငံမှာ သေးငယ်တဲ့ နျူကလီးယားဓာတ်အားပေး စက်ရုံ တည်ဆောက်ရေးစီမံကိန်းတစ်ခု အကောင်အထည်ဖော်ရေးအတွက် အရေးကြီးတဲ့ နယ်ပယ်တွေကို ဦးစားပေးအဆင့် အလိုက် အစီအစဉ်သတ်မှတ်ရေးဆွဲမှာဖြစ်ပါတယ်” လို့လည်း သတင်းထုတ်ပြန်ချက်မှာဖော်ပြထားပါတယ်။

“ နားလည်မှုစာချွန်လွှာအရ နိုင်ငံတကာ အဏုမြူစွမ်းအင်အေဂျင်စီရဲ့ သတ်မှတ်ချက်များနှင့်အညီရော၊ Rosatom ရဲ့ အကောင်းဆုံးလုပ်ငန်းအလေ့အထများအရလည်းကောင်း နျူကလီးယားအခြေခံအဆောက်အအုံကို တည်ဆောက်သွားမှာ   ဖြစ် ပါတယ်” လို့ ကုမ္ပဏီက မြန်မာအစိုးရ သိပ္ပံနှင့်နည်းပညာဝန်ကြီးဌာနနှင့် လက်မှတ်ရေးထိုးခဲ့တဲ့ သဘောတူညီချက်နှင့်ပတ်သက် လို့ ဖြည့်စွက်ပြောကြားပါတယ်။

“ နားလည်မှုစာချွန်လွှာအထဲမှာ လေ့ကျင့်သင်ကြားရေးနှင့် လူ့စွမ်းအားအရင်းအမြစ်ဖွံ့ဖြိုးတိုးတက်ရေးတွင် ရုရှားနှင့် မြန်မာပူးပေါင်းဆောင်ရွက်ရေး၊ အဖွဲ့အစည်းများရဲ့ ဘေးကင်းလုံခြုံမှုဆိုင်ရာ ယဉ်ကျေးမှုကိုမြှင့်တင်ရေးနှင့် မြန်မာနိုင်ငံရဲ့ နျူကလီးယားစွမ်းအင် ဖွံ့ဖြိုးရေးအစီအစဉ်မှာ ပါဝင်ရေးတွေလည်းပါဝင်ပါတယ်” လို့ ကုမ္ပဏီက ပြောပါတယ်။

Source; rigzone

Published_ 21 October 2023

မဲခေါင်-လန်ချန်းပူးပေါင်းဆောင်ရွက်မှုအထူးအစီအစဉ်အဖြစ် မြန်မာနိုင်ငံမှအလယ်တန်းအောင်မြင်သူများကို Bakery and Pastry Training Courseအခြေခံမုန့်ဖုတ်နည်းအခမဲ့သင်တန်းပေးသွားမည်ဖြစ်ကြောင်း ဟိုတယ်နှင့်ခရီးသွားလာရေးဝန်ကြီးဌာနမှ သိရသည်။

အဆိုပါသင်တန်းကို အခြေခံအလယ်တန်းအောင်ထားသည့် အသက်(၁၈)နှစ်ပြည့်ပြီး (၄၀)နှစ်အထက်မကြီးသော သူများတက်ရောက်နိုင်ပြီး သင်တန်းကာလတစ်လပြီးဆုံးအောင်တက်ရောက်ရမည်ဖြစ်သည်ဟုဆိုသည်။

သင်တန်းတွင် နိုင်ငံတကာမုန့်အမျိုးအစား(၄၈)မျိုးသင်ကြားပေးမည်ဖြစ်ပြီး သင်တန်းကာလ ၂၀၂၃ခုနှစ် ဒီဇင်ဘာလမှ ၂၀၂၄ခုနှစ်ဇန်နဝါရီလအထိတစ်လတာကြာမြင့်မည်ဖြစ်ပြီး ရန်ကုန်မြို့ပန်းပဲတန်းမြို့နယ်၊ ဗိုလ်ဆွန်ပက်လမ်းရှိ ခရီးသွားလုပ်ငန်းဖွံ့ဖြိုးတိုးတက်ရေးဗဟိုဌာန၌ဖွင့်လှစ်သွားမည်ဖြစ်သည်။

သင်တန်းအာမခံကြေးကျပ်၅၀၀၀၀ကို သင်တန်းသားအဖြစ်ရွေးချယ်ခံရပါက သင်တန်းမစတင်မီကြိုတင်ပေးသွင်း ရမည်ဖြစ်ပြီး သင်တန်းပြီးဆုံးပါက ပြန်လည်ထုတ်ပေးမည်ဖြစ်ကြောင်း၊ကိုဗစ်ကာကွယ်ဆေးထိုးလက်မှတ်နှင့် အသည်းရောင်အသားဝါ(ဘီ၊စီ)ပိုးကင်းရှင်းကြောင်း ထောက်ခံစာများပါရှိရမည်ဖြစ်ကြောင်းသိရသည်။
Yangon_Times/tthl
#Local_News
#Published_ 21 October 2023
#YMG #Yangon_Times #Yangon_Media_Group

Published 21 October 2023

ဟားမတ်စ်စစ်သွေးကြွများက ယင်းတို့ဖမ်းဆီးထားတဲ့ ဓားစာခံတွေထဲက အမေရိကန် ၂ ဦးကို လွှတ်ပေးပြီးနောက် အစ္စရေးဝန်ကြီးချုပ် ဘင်ဂျမင်နေတန်ညာဟူက ဂါဇာမှာ အောင်ပွဲမရမချင်း တိုက်ခိုက်သွားမယ်လို့ အခိုင်အမာဆိုလိုက်ကာ ပစ်ခတ်တိုက်ခိုက်မှုတွေ ရပ်စဲမယ့်ပုံမပေါ်သလို ဆက်လက်ကျူးကျော်သွားမယ့် သဘောရှိနေပါတယ်။

အောက်တိုဘာ ၇ ရက်နေ့က အစ္စရေးလ်တောင်ပိုင်းကို ဟားမတ်စ်တို့ တိုက်ခိုက်စဥ် ပြန်ပေးဆွဲခံရသူတွေထဲမှာ ပါဝင်ခဲ့တဲ့ အမေရိကန်လူမျိုး သားအမိ ဂျူဒစ်နဲ့ နာတယ်လီရာနန်တို့ကို သောကြာနေ့က ပြန်လွှတ်ပေးလိုက်ပါတယ်။

ဒါဟာ ဟားမတ်စ်တို့ ဝင်ရောက်သောင်းကျန်းခဲ့သဖြင့် ပဋိပက္ခဖြစ်ပွားပြီးနောက်ပိုင်း ပြန်လွှတ်ပေးခဲ့တဲ့ ပထမဆုံးဓားစာခံတွေ ဖြစ်လာကြောင်း နှစ်ဘက်စလုံးမှ အတည်ပြုလိုက်ပါတယ်။

‘’ဓားစာခံ ၂ ဦးကတော့ အိမ်ပြန်ရောက်ပါပြီ။ ပြန်ပေးဆွဲခံရတဲ့လူတွေ အားလုံး ပြန်မရမချင်း လက်လျှော့သွားမှာ မဟုတ်ပါဘူး။ တစ်ချိန်တည်းမှာပဲ အောင်ပွဲမရမချင်း ဆက်လက်တိုက်ခိုက်သွားမှာပါ’’ လို့ နေတန်ညာဟူက သောကြာနေ့ညမှာ ကြေညာခဲ့ပါတယ်။

အစ္စရေးလ်တို့က ဂါဇာပတ်ပတ်လည် အနီးတဝိုက်မှာ တင့်ကားများ တပ်သားများ စုစည်းထားပြီ မြေပြင်ကျူးကျော် တိုက်ခိုက်မှုပြုလုပ်ရန် စီစဥ်နေပါတယ်။

ယခုအချိန်အထိ ဂါဇာကို တိုက်ခိုက်ထားရာမှာ ပါလက်စ်တိုင်းလူမျိုး အနည်းဆုံး ၄,၁၃၇ ဦးသေဆုံးထားပြီး ကလေးရာကျော်ပါဝင်ကာ လူ ၁ သန်းကျော် စွန့်ခွာထွက်ပြေးနေရကြောင်း ပါလက်စ်တိုင်းအရာရှိများက ဆိုပါတယ်။

အစ္စရေးလ်ကာကွယ်ရေးဝန်ကြီး ယိုအက်ဗ်ဂယ်လန့်က ပါလီမန်ကော်မတီတစ်ခုမှာ ပြောကြားရာမှာ ဟားမတ်စ်အဖွဲ့အစည်းကို ဖြိုခွဲပြီး ယင်းတို့ရဲ့စစ်တပ်နဲ့ အုပ်ချုပ်ရေးပိုင်း အခြေခံအဆောက်အအုံများကို ဖျက်ဆီးသွားမှာ ဖြစ်ကြောင်း၊ ဒါတွေဟာ လျင်မြန်လွယ်ကူမှာ မဟုတ်ဘဲ တန်ရာတန်ကြေး ပေးဆပ်ရမှာဖြစ်ကြောင်း ဆိုသွားပါတယ်။

ဓားစာခံတွေကို လွှတ်ပေးတာဟာ ကာတာတို့က လူသားချင်းစာနာမှု အကြောင်းပြချက်များဖြင့် ကြားဝင်စေ့စပ်မှုကြောင့် ဖြစ်ကြောင်း၊ ဘိုင်ဒင်နဲ့ ဖက်ဆစ်အုပ်ချုပ်ရေးပိုင်းတွေ အခြေအမြစ်မရှိ မှားယွင်းနေတယ်ဆိုတာကို သက်သေပြချင်လို့ဖြစ်ကြောင်း ဟားမတ်စ်လက်နက်ကိုင်တပ်မှ ပြောရေးဆိုခွင့်ရှိသူ အဘူယူဘိုင်ဒါက ပြောပြခဲ့ပါတယ်။

ဒါပေမဲ့ စနေနေ့အစောပိုင်းအထိ တိုက်ခိုက်မှုတွေ ရှိနေဆဲဖြစ်ပါတယ်။

အစ္စရေးလ်တို့က တုန့်ပြန်တိုက်ခိုက်တဲ့နေရာမှာ စစ်ပွဲဥပဒေများအတိုင်း လိုက်နာနေရဲ့လားဆိုတာကို မေးမြန်းခဲ့ရာ အမေရိကန် နိုင်ငံခြားရေးဝန်ကြီး အန်တိုနီဘလင်ကန်က အစ္စရေးလ်ဟာ ကိုယ်ပိုင်ကာကွယ်ခွင့်ရှိပြီး ဟားမတ်စ်တို့ နောက်ထပ်တိုက်ခိုက်မှုများ မလုပ်လာစေရန် စီမံခွင့်ရှိကြောင်း ဖြေကြားခဲ့ပါတယ်။

ဂါဇာသို့ပေးပို့မယ့် ကူညီထောက်ထားခြင်း ပစ္စည်းများတင်ဆောင်လာတဲ့ ကုန်တင်ကားတွေဟာ နောက်ထပ် ၂၄ နာရီမှ ၄၈ နာရီအတွင်း ရောက်ရှိလိမ့်မယ်လို့ ဘိုင်ဒင်က ပြောကြားခဲ့ပါတယ်။
Source: Reuters.
#World_News
#YMG #Yangon_Times #Yangon_Media_Group

Published 21 October 2023

ဗာဒံနို့ဟာ နွားနို့အစားထိုး ပစ္စည်းတစ်ခုဖြစ်ပြီး ဗာဒံသီးတွေကို ရေနဲ့ရောကာ အရည်ညှစ်ယူရတာ ဖြစ်ပါတယ်။

ဗာဒံနို့က ကျန်းမာရေးနဲ့ ညီညွတ်ပြီး လက်တို့စ်နဲ့ ကိုလက်စ်ထရောလ် မပါဝင်ကာ ကယ်လိုရီနည်းပါးပါတယ်။

အိမ်မှာပင် ပြုလုပ်နိုင်သလို ဝယ်ယူရရှိနိုင်တဲ့ ဗာဒံနို့သောက်သုံးခြင်းရဲ့ အကျိုးကျေးဇူးတွေကို ဖော်ပြလိုက်ပါတယ်။
 
(၁) ကယ်လ်စီယမ်၊ ဗိုက်တာမင်အီး၊ အိုမီဂါ၃ ဖက်တီးအက်ဆစ်တို့လို အာဟာရဓာတ်များ ပါဝင်ပါတယ်။
 
(၂) ပြည့်ဝဆီနဲ့ ကိုလက်စ်ထရောလ် နည်းပါးတာကြောင့် နှလုံးရောဂါနဲ့ လေဖြတ်ခြင်း ဖြစ်နိုင်ခြေ လျှော့ချပေးပါတယ်။
 
(၃) ကယ်လိုရီနည်းပါးစွာ ပါဝင်ကာ ကျန်းမာရေးနဲ့ ညီညွတ်တဲ့အဆီ ပါဝင်တာကြောင့် ကိုယ်အလေးချိန် ထိန်းရာမှာ ကူညီပေးပါတယ်။
 
(၄) ကယ်လ်စီယမ်နဲ့ ဗိုက်တာမင်ဒီ ပါဝင်တာကြောင့် အရိုးကိုကြံ့ခိုင်စေပါတယ်။
 
(၅) ဗိုက်တာမင်အီးက ဓာတ်တိုးခြင်းကို ဆန့်ကျင့်ကာ ကော်လာဂျင် ထုတ်လုပ်မှုကို အားပေးတာကြောင့် အရေပြားကျန်းမာရေးကို ကောင်းမွန်စေပါတယ်။
 
(၆) ဗာဒံနို့က လက်တို့စ်ကင်းဝေးပြီး အစာခြေရလွယ်ကူတာကြောင့် လက်တို့စ်မတည့်သူတွေ၊ အစာခြေပြဿနာ ရှိသူတွေအတွက် သင့်လျော်ပါတယ်။
 
(၇) သွေးတွင်းသကြားဓာတ်ကို မြန်ဆန်စွာ မတက်စေတာကြောင့် ဆီးချိုလူနာတွေနဲ့ သွေးတွင်းသကြားဓာတ် ထိန်းတဲ့သူတွေအတွက် သင့်လျော်စေပါတယ်။
 
(၈) ကြွက်သားဖွံ့ဖြိုးခြင်းနဲ့ ပြုပြင်ခြင်းအတွက် လိုအပ်တဲ့ ပရိုတိန်းဓာတ်များ ပါဝင်တာကြောင့် ကြွက်သားတည်ဆောက်နေတဲ့ သူတွေ ရွေးချယ်သင့်ပါတယ်။
 
(၉) ဗိုက်တာမင်အီး ကြွယ်ဝတာကြောင့် ကိုယ်ခံအားစနစ်ကို မြှင့်တင်ပေးပြီး ရောဂါကူးစက်မှုများကို တိုက်ဖျက်ပေးပါတယ်။
 
(၁၀) အိုမီဂါ၃ ဖက်တီးအက်ဆစ်က ဦးနှောက်ကျန်းမာရေးကို ထောက်ပံ့ပေးကာ မှတ်ဉာဏ်စွမ်းရည်ကို တိုးတက်စေပါတယ်။
 
အိမ်မှာ ဗာဒံနို့ပြုလုပ်မယ်ဆိုရင်
-        ဗာဒံသီးအစိမ်းကို ရေထဲမှာ တစ်ညခန့်စိမ်ထားပါ။

-        ရေစစ်ပါ။

-        ဗာဒံသီးတွေကို ကြိတ်စက်ထဲမှာ ရေနဲ့ရောပြီး ညက်သွားတဲ့အထိ ကြိတ်ပါ။

-        အမှုန်ဖတ်များကို ဇကာတစ်ခုခုဖြင့် စစ်ထုတ်လိုက်ပါ။
Source: DoctorNDTV
#World_Health
#YMG #Yangon_Times #Yangon_Media_Group

Published_ 21 October 2023

သိပ္ပံနည်းအရ Digitalis လို့ခေါ်တဲ့ ခေါင်းလောင်းပန်းဟာ ထူးခြားကွဲပြားတဲ့ ပန်းပွင့်မျိုးဖြစ်ပြီး ကျက်သရေရှိစွာဖြင့် ပြွန်ပုံသဏ္ဍာန်ပန်းပွင့်ကာ ဆေးဘက်ဆိုင်ရာမှာ များပြားတဲ့ သမိုင်းကြောင်းတွေ ရှိပါတယ်။

ဥရောပနဲ့ အာရှတို့မှာ အစပြုခဲ့ပြီး တစ်ကမ္ဘာလုံးမှာ နှစ်သက်စွာ စိုက်ပျိုးနေကြပါပြီ။

ခရာပုံသဏ္ဍာန် ပန်းပွင့်နဲ့ ပန်းရောင်၊ ခရမ်းရောင်၊ အဖြူရောင် အမျိုးမျိုးပွင့်တတ်ကာ ဘယ်ဥယျာဥ်မှာမဆို တင့်တယ်မှာဖြစ်ပေမယ့် နှလုံးပေါ်မှာ ပြင်းထန်စွာသက်ရောက်စေတဲ့ ဒိုင်ဂေါက်ဆင်ဒြပ်ပေါင်းတွေ ပါဝင်နေပါတယ်။

ခေါင်းလောင်းပုံပန်းဟာ လူကို နှလုံးဖောက်ခြင်း ဖြစ်စေတယ်လို့လည်း ပြောနေကြပါတယ်။

သူ့မှာ အာနိသင်အလွန်ပြင်းတဲ့ ကာဒီအိတ်ဂလိုင်ကိုဆိုဒ် ဒြပ်ပေါင်းတွေ ပါဝင်ပါတယ်။

ကျန်းမာတဲ့ နှလုံးအင်္ဂါဟာ ခန္ဓာကိုယအနှံ့သို့ သွေးများညှစ်ထုတ်ပေးပြီး ထောင်နဲ့ချီတဲ့ နှလုံးဆဲလ်တွေက အလုပ်လုပ်ပေးရပါတယ်။

ထိုဆဲလ်အမြှေးပါးတွေကနေ ဆိုဒီယမ်၊ ပိုတက်ဆီယမ်၊ ကလိုရိုက်တို့လို အမှုန်တွေကို အိုင်းယွန်းလမ်းကြောင်းတွေနဲ့ ပို့ဆောင်ရေးပစ္စည်းတွေမှ ဖြတ်သန်းစေပါတယ်။

ခေါင်းလောင်းပုံပန်း အမျိုးအစားအားလုံးမှာ ဒိုင်ဂေါက်ဆင်ကဲ့သို့ ကာဒီအိတ်ဂလိုင်ကိုဆိုဒ် အချို့ပါဝင်ပြီး ထိုအိုင်းယွန်းတွေ ညှစ်မထုတ်နိုင်အောင် တားဆီးလိုက်ပါတယ်။

နှလုံးဆဲလ်တွေမှာ ဓာတုဆိုင်ရာ ပြဿနာများ ပေါ်လာပြီး နှလုံးခုန်နှုန်း ပိုပိုပြီးမြန်လာပါတယ်။

နှလုံးစည်းချက်အပေါ် နှောင့်ယှက်မှုဖြစ်ပေါ်လာပြီး ရုတ်တရက် နှလုံးရပ်ခြင်းနဲ့ အသက်သေဆုံးခြင်းအထိပင် ဖြစ်ပွားနိုင်ပါတယ်။

ဒါပေမဲ့ ဒိုင်ဂေါက်ဆင်ဟာ နှလုံးအလုပ်မလုပ်နိုင်တဲ့ လူတွေမှာ ဆေးဝါးဖြင့်သုံးစွဲကြကာ ဆေးဘက်ဆိုင်ရာ အကျိုးကျေးဇူးလည်း ရှိနေပါတယ်။

ထိုပန်းရဲ့ မည်သည့်အစိတ်အပိုင်းဖြစ်ဖြစ် မတော်တဆ စားသုံးမိပါက ဆေးရုံဆေးခန်းသို့ ချက်ချင်းသွားရောက်သင့်ပါတယ်။
Source: NDTV
#World_Science
#Published_ 21 October 2023
#YMG #Yangon_Times #Yangon_Media_Group

ကမ္ဘာပေါ်က အကြီးမားဆုံး နည်းပညာပြပွဲကြီးဖြစ်တဲ့ ၄၃ ကြိမ်မြောက် ပင်လယ်ကွေ့ အိုင်တီပြပွဲ(GITEX)ကို ယူအေအီးနိုင်ငံ ဒူဘိုင်းမြို့မှာ တနင်္လာနေ့က ဖွင့်လှစ်ခဲ့ပါတယ်။

၅ ရက်တာကျင်းပတဲ့ပွဲမှာ နိုင်ငံပေါင်း ၁၈၀ မှ နာမည်ကြီး အမှတ်တံဆိပ်များ အပါအဝင် ကုမ္ပဏီပေါင်း ၆ ထောင်ကျော် ပါဝင်ခဲ့ပြီး သူတို့ရဲ့ နောက်ဆုံးပေါ် ပစ္စည်းများကို ခင်းကျင်းပြသခဲ့ကြပါတယ်။
ထိုပွဲသို့ ကမ္ဘာတဝှမ်းမှ လူပေါင်း ၁၈၀,၀၀၀ ကျော် လာရောက်ခဲ့ကြတယ်လို့ ခန့်မှန်းရပါတယ်။
ပြပွဲကြီးမှာ ပြခန်းပေါင်း ၄၁ ခန်းပါဝင်ပြီး ဉာဏ်ရည်တုနဲ့ သက်ဆိုင်တဲ့ ပြခန်းတွေက ၁၀ ခန်းပါဝင်ပြီး အဆိုပါ လုပ်ငန်းကုမ္ပဏီပေါင်း ၃,၅၀၀ ကျော် စုစည်းပြသထားပါတယ်။
#World_Event
#Published_ 20 October 2023
#YMG #Yangon_Times #Yangon_Media_Group

#Daily_News
Published_ 20 October 2023

၁။ မူပိုင်ခွင့်ချိုးဖောက်သူများကို ‘စာပေနှင့် အနုပညာမူပိုင်ခွင့်ဥပဒေ' ဖြင့် တရားစွဲဆိုအရေးယူနိုင်ပြီဟုဆို

၂။ ယခုနှစ် မျှင်ဖမ်းရာသီအတွက် ကုန်ကျစရိတ် ယခင်ထက်နှစ်ဆကျော် ပိုများလာ

၃။ မြန်မာ့ရွှေဈေးကွက်တစ်ခု ဖော်ဆောင်နိုင်ပါက လေပတ်ကားဈေးကွက် ပပျောက်နိုင်

၄။ (၄၃)ကြိမ်မြောက် ပင်လယ်ကွေ့အိုင်တီပြပွဲကြီးအား ဒူဘိုင်းတွင်(၅)ရက်တာ ခင်းကျင်းပြသ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

Published_ 20 October 2023

ဧရာဝတီတိုင်း‌ ဒေသကြီး၊ ပုသိမ်ခရိုင်၊ ငပုတောမြို့နယ်ရှိ မြတ်မော်တင်စွန်းစေတီတော်မြတ်၌ သီတင်းကျွတ်လပြည့်နေ့ အောက်တိုဘာလ၂၉ရက်နေ့တွင် ဆီမီးကိုးထောင်၊ ပန်းကိုးထောင်၊ ကပ်လှုပူဇော်မည်ဖြစ်ပြီး မီးပုံးပျံလွှတ်ပွဲလည်း ထည့်သွင်း ကျင်းပသွားမည်ဖြစ်ကြောင်း မြတ်မော်တင်စွန်းဆရာတော်၏ မိန့်ကြားချက်အရသိရသည်။

အဆိုပါ မြတ်မော်တင်စွန်းစေတီတော်တွင် မဟာမြိုင်တောရနှင့် သဲဖြူဓမ္မရိပ်သာဆရာတော်ကြီးနှင့် တပည့်ဒါယကာများက ၁၃၈၅ သီတင်းကျွတ်လဆန်း ၁၄ရက်နေ့ အောက်တိုဘာလ၂၈ရက်နေ့ညတွင် ဘုရားရင်ပြင်တော်ပေါ်၌ အလှုတော်ငွေပေးအပ်ပွဲကို ကျင်းပမည်ဖြစ်ပြီး အလှုရှင်များကို တရားချီးမြှင့်သွားမည်ဖြစ်‌ ကြောင်းသိရသည်။

သီတင်းကျွတ်လပြည့်နေ့ အောက်တိုဘာလ ၂၉ရက်နေ့ နံနက်၆နာရီတွင် မော်တင်စွန်းဘုရားအနီးဝန်းကျင်ရှိ
ကျေးရွာများမှ ကျောင်းပေါင်း၅၀မှ သံဃာအပါးပေါင်း ၁၆၀ကို ဆွမ်းသဃ်န်းနှင့် အလှုရှင်များမှ နဝကမ္မအလှုငွေများ
ဆက်ကပ်လှုဒါန်းမည်ဖြစ်ကြောင်း သိရသည်။

ထို့အပြင် သီတင်းကျွတ်လပြည့်နေ့ညတွင် ဘုရားရင်ပြင်တော်ပေါ်၌ ဆီးမီးကိုးထောင် ပန်းကိုးထောင်ကို ကပ်လှုပြီး မီးပုံးပျံလွှတ်မည်ဖြစ်‌ကြောင်း၊ သီတင်းကျွတ်လပြည့်ကျော်၁ရက်နေ့ အောက်တိုဘာလ၃၀ရက်နေ့တွင် မြတ်မော်တင်ဘုရား၏ မူလဘုရားဒါယကာဇေယျသေန နဂါးမင်းနှင့် နဂါးမျိုးနွယ်များအား နဂါးစာကျွေး မွေးလှုဒါန်းပွဲကိုလည်း ထည့်သွင်းကျင်းပမည်ဖြစ်‌ကြောင်း သိရသည်။
Yangon_Times/NN
#Local_News
#Published_ 20 October 2023
#YMG #Yangon_Times #Yangon_Media_Group

လေဖိအားနည်းရပ်ဝန်းမှ မုန်တိုင်းငယ်ဖြစ်ပြီး ရခိုင်မြောက်ပိုင်းသို့ ရွေ့လျားနိုင်

‘လေဖိအားနည်းရပ်ဝန်းမှ မုန်တိုင်းငယ်ဖြစ်ပြီး အဲဒီ့မုန်တိုင်းငယ်ဟာ ရခိုင်မြောက်ပိုင်းနဲ့ ဘင်္ဂလားဒေ့ရှ် ဘက်သို့ရွေ့လျားနိုင်တယ်လို့ ခန့်မှန်းထားပါတယ်။ မုန်တိုင်းငယ်အရှိန်ကြောင့် ရခိုင်ကမ်းရိုးတန်းဒေသတွေမှာ မိုးသက်လေပြင်းတိုက်ခတ်တာ၊ မြန်မာနိုင်ငံအနောက်ဘက်ခြမ်းဒေသတွေမှာ မိုးရွာသွန်းတာမိုးများတာတွေ ဖြစ်ပေါ်နိုင်တယ်’ မိုးလေဝသနှင့်ဇလဗေဒညွှန်ကြားမှုဦးစီးမှုဌာနမှ ညွှန်ကြားရေးမှူးဦးလှထွန်း
Yangon_Times/tthl
#Local_News
#Published_ 20 October 2023
#YMG #Yangon_Times #Yangon_Media_Group

အိန္ဒိယဝယ်လိုအားနှင့်အတူ မြန်မာ့မတ်ပဲဈေးနှုန်းများ လိုက်ပါမြင့်တက်နေ

' တဖက်က ဝယ်လိုအားကောင်းလို့ ဈေးတက်လာတာရယ်၊ အိန္ဒိယရာသီဥတုကြောင့် အထွက်နှုန်းနဲ့ အရည်အသွေးကျတာကြောင့် ပိုဝယ်လာတာရယ်ကြောင့် ဒီဘက်မှာ ဈေးတက်လာတာပါ ' မြန်မာကုန်သွယ်မှုမြှင့်တင်ရေးအဖွဲ့ ၊ဧရာကုန်သွယ်မှုဗဟိုဌာနမှ တာဝန်ခံဦးနေဝင်းစိုး
Yangon_Times/NN
#Local_News
#Published_ 20 October 2023
#YMG #Yangon_Times #Yangon_Media_Group