#World_Business
Published 18 January 2024

ဆမ်ဆောင်းအီလက်ထရွန်နစ်က ဖန်တီးမှတ်ဉာဏ်တု(AI) လုပ်ဆောင်ချက်များစွာ ပါဝင်တဲ့ နောက်ဆုံးပေါ် ပရီမီယံစမတ်ဖုန်းကို ဗုဒ္ဓဟူးနေ့က ထုတ်ဖော်ပြသလိုက်ပါတယ်။

အဆိုပါ AI လုပ်ဆောင်ချက်တွေထဲမှာ နိုင်ငံခြားဘာသာစကားဖြင့် ဖုန်းပြောဆိုခြင်းအတွက် တပြိုင်နက် ဘာသာပြန်ပေးတာလည်း ပါဝင်ပြီး အက်ပဲလ်စမတ်ဖုန်းတွေကို လိုက်လံယှဥ်ပြိုင်ဖို့ ဆမ်ဆောင်းက ကြိုးပမ်းလာတာ ဖြစ်ပါတယ်။

နိုင်ငံတကာ အချက်အလက် ကော်ပိုရေးရှင်းရဲ့ အချက်အလက်များအရ ၂၀၂၃ မှာ အက်ပဲလ်က ဆမ်ဆောင်းထက် စမတ်ဖုန်းတင်ပို့မှု ပိုမိုသာလွန်ခဲ့ကာ ၂၀၁၀ နောက်ပိုင်း ဆမ်ဆောင်းထက် ပထမဆုံးအကြိမ် အသာရခဲ့တာ ဖြစ်ပါတယ်။

ဒီအတွက် ဆမ်ဆောင်းက ဖုန်းအသုံးပြုသူတွေကို ဆွဲဆောင်တဲ့အနေဖြင့် ပရီမီယံ Galaxy S24 မော်ဒယ်တွေမှာ AI လုပ်ဆောင်ချက်အမျိုးမျိုးကို ထည့်သွင်းလာပါတယ်။

မတူညီတဲ့ ဘာသာစကား ၂ ခုဖြင့် ဖုန်းပြောဆိုတဲ့အခါ ဝင်လာတဲ့ ဘာသာစကားအသံနဲ့ ပြောလိုက်တဲ့ ဘာသာစကားတို့ကို တိုက်ရိုက်ဘာသာပြန်ပေးမှာဖြစ်ပြီး Galaxy S24 က ဒီလိုလုပ်ဆောင်ချက်မျိုး ပါဝင်တဲ့ ပထမဆုံးစမတ်ဖုန်း ဖြစ်တယ်လို့ ကုမ္ပဏီက ဆိုပါတယ်။

ဘာသာစကား ၁၃ မျိုး ရရှိနိုင်ကာ ဆမ်ဆောင်းက ကိုယ်ပိုင် AIလေ့ကျင့်မှုများဖြင့် ဖန်တီးထားတာ ဖြစ်ပါတယ်။

ဖန်သားပြင်ပေါ်က ပုံရိပ်တစ်စိတ်တစ်နေရာကို ဝိုင်းလိုက်ရင် ဂူဂဲလ်မှာ ရှာပေးမယ့် လုပ်ဆောင်ချက်လည်း ပါဝင်ပါတယ်။

မက်ဆေ့ချ်တွေရဲ့ အသံအနေအထားကို ပုံမှန်သံ၊ တရိုတသေသံ၊ စီးပွားရေးအသံ၊ ဆိုရှယ်မီဒီယာအသံမျိုး လိုက်ပြီးပြောင်းလဲပေးတဲ့ လုပ်ဆောင်ချက်တွေလည်း ပါဝင်ပါတယ်။

AI အနှစ်ချုပ်တင်ပြခြင်း၊ အသံသွင်းခြင်းကို ဘာသာပြန်ခြင်း၊ လက်တွေ့မှာမရှိတဲ့ နောက်ခံကို ဓာတ်ပုံတွေမှာ ထည့်သွင်းခြင်း၊ တိုက်ရိုက် ရိုက်ကူးနေတဲ့ ဗီဒီယိုတွေကို အနှေးအသွင်ဖန်တီးပေးခြင်းတို့ ပါဝင်ပါတယ်။

ဒီလိုAIလုပ်ဆောင်ချက်တွေက cloud ကိုချိတ်ဆက်စရာမလိုဘဲ လေ့ကျင့်ဖန်တီးပြီးတဲ့အခါ သုံးစွဲသူတွေရဲ့ ဖုန်းတွေဆီကို ဒေါင်းလုဒ်ဆွဲသွားမှာ ဖြစ်ပါတယ်။

Qualcomm နဲ့ ဆမ်ဆောင်းတို့လို ကုမ္ပဏီတွေဟာ ကိုယ်ရေးအချက်အလက်များ ပိုမိုစိတ်ချရတဲ့ အဆိုပါAIစနစ်မျိုးကို အသုံးပြုလာကြပါတယ်။

၂၀၂၄ မှာ တင်ပို့မယ့် စမတ်ဖုန်းတွေရဲ့ ၅ ရာခိုင်နှုန်းလောက်ကသာ AI လုပ်ဆောင်ချက် ပါဝင်မှာဖြစ်ပြီး ၂၀၂၇ မှာတော့ ၄၅ ရာခိုင်နှုန်းအထိ မြင့်လာနိုင်တယ်လို့ ခန့်မှန်းရပါတယ်။

ရေရှည်မှာ သုံးစွဲသူများရဲ့ လိုအပ်ချက်အရ ဖုန်းထဲမှာ AI လုပ်ဆောင်ချက်များ ထည့်သွင်းလာတဲ့ ဖုန်းတွေဟာ စမတ်ဖုန်းဈေးကွက်ကို သိသာစွာ သက်ရောက်နေလိမ့်မယ်လို့ Counterpoint မှ ဂျင်းပါ့ခ်က ပြောကြားလိုက်ပါတယ်။

သုံးစွဲသူတွေအတွက် ပိုမိုကောင်းမွန်တဲ့ အချက်အလက်တွေကို AI လုပ်ဆောင်ချက်တွေထဲ ထည့်သွင်းနိုင်ဖို့ အချိန်ယူရဦးမှာ ဖြစ်တာကြောင့် ချက်ချင်းတော့ သက်ရောက်ဦးမှာ မဟုတ်ပါဘူး။

Galaxy S24 series ကို ဇန်နဝါရီ ၃၁ ရက်နေ့က စတင်ကာ ရောင်းချသွားမှာ ဖြစ်ပါတယ်။

အမေရိကန်မှာ Galaxy S24 ရဲ့ အခြေခံဈေးနှုန်းက ၇၉၉ ဒေါ်လာကနေ ပိုမိုမြင့်မားတဲ့ ဗားရှင်းနှစ်ခုဖြစ်တဲ့ S24 Plus နဲ့ S24 Ultra တို့ကတော့ ၉၉၉ ဒေါ်လာနဲ့ ၁၂၉၉ ဒေါ်လာအသီးသီး ရှိမှာဖြစ်ပါတယ်။

#World_Business #Appleကိုယှဥ်ပြိုင်မည့်Samsung #GalaxyS24စမတ်ဖုန်း #Source: Reuters

#Local_News
Published_ 18 January 2024

ကျောက်ဖြူအထူးစီးပွားရေးဇုန် ရေနက်ဆိပ်ကမ်းစီမံကိန်း အကောင်အထည်ဖော်ရေးအတွက် မြန်မာနိုင်ငံဘက်မှ ကြိုတင်ဖြည့်ဆည်းဆောင်ရွက်ရမည့် အခြေခံအဆောက်အအုံဆိုင်ရာလုပ်ငန်းများ Implementation Plan နှင့် စပ်လျဉ်းသည့်လုပ်ငန်းညှိနှိုင်း အစည်းအဝေးကိုဇန်နဝါရီ ၁၇ ရက်က စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၌ ကျင်းပခဲ့ပါတယ်။

မြန်မာအထူးစီးပွားရေးဇုန်ဆိုင်ရာဗဟိုလုပ်ငန်းအဖွဲ့ဥက္ကဋ္ဌ၊ ဦးအောင်နိုင်ဦးက ကျောက်ဖြူအထူးစီးပွားရေးဇုန် ရေနက် ဆိပ်ကမ်း စီမံကိန်း အကောင်အထည်ဖော်ရေး မြန်မာနိုင်ငံဘက်မှ ကြိုတင်ဖြည့်ဆည်း ဆောင်ရွက်ရမည့် စီမံကိန်းအထောက်အကူပြု အခြေခံအဆောက်အအုံများနှင့် ပတ်သက်၍ ဝန်ကြီးဌာနအလိုက် ဆက်လက်ဆောင်ရွက်ရန်ရှိသည့် လုပ်ငန်းများကို သတ်မှတ်ချိန်အတွင်း အချိန်မီပြီးစီးအောင် ဆောင်ရွက်ရန်နှင့် ညှိနှိုင်းပေါင်းစပ်နိုင်ရေးမှာကြားခဲ့ပါတယ်။

ဆက်လက်၍ သက်ဆိုင်ရာဌာနအသီးသီးမှ တာဝန်ရှိသူများက ဝန်ကြီးဌာနအလိုက် ဆက်လက်ဆောင်ရွက်ရမည့် ကိစ္စများကို ဝိုင်းဝန်းဆွေးနွေးခဲ့ကြပါတယ်။

အစည်းအဝေးသို့ မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ဥက္ကဋ္ဌ၊ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌရုံးဝန်ကြီးဌာန (၂)ဝန်ကြီး ဦးအောင်နိုင်ဦး၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနဝန်ကြီး ဦးထွန်းအုံ၊ ဒုတိယဝန်ကြီး ဦးမင်းမင်း၊ ကျောက်ဖြူအထူးစီးပွားရေးဇုန် စီမံခန့်ခွဲမှု ကော်မတီဥက္ကဋ္ဌနှင့် အဖွဲ့ဝင်များ၊ ရခိုင်ပြည်နယ်အစိုးရအဖွဲ့မှ တာဝန်ရှိသူများနှင့် သက်ဆိုင်ရာဌာနများမှ တာဝန်ရှိသူများက Online၊ Offline ဖြင့် ပါဝင်တက်ရောက်ခဲ့ ကြကြောင်း သတင်းရရှိပါတယ်။

#Local_News #ကျောက်ဖြူအထူးစီးပွားရေးဇုန် #ရေနက်ဆိပ်ကမ်းစီမံကိန်းအကောင်အထည်ဖော် #Ymg_mnn #Yangon_Media_Group

#World_Health
Published 18 January 2024

အမျိုးသားများ သုတ်ပိုးသန်စွမ်းချင်ပါက ကားထိုင်ခုံတွေကို အနွေးဓာတ်မထုတ်ဖို့ ဆရာဝန်တွေက တိုက်တွန်းလိုက်ပါတယ်။

ထိုင်ခုံတွေမှာ အနွေးဓာတ်လွှတ်ထားခြင်းက ဝှေးစေ့အပူချိန်တက်စေပြီး သုတ်ပိုးထုတ်လုပ်မှုကို ဆိုးရွားစွာ ထိခိုက်စေပါတယ်။

ယခုလိုဆောင်းရာသီအချိန် အပူချိန် ၀ ဒီဂရီအောက် ရောက်တဲ့နေရာတွေမှာ မော်တော်ကားတွေထဲ ထိုင်ခုံတွေကို အပူပေးလေ့ရှိကြပါတယ်။

ကျားအင်္ဂါကနေ သုတ်ပိုးထုတ်လုပ်ဖို့အတွက် အခြားခန္ဓာကိုယ်အစိတ်အပိုင်းတွေထက် ဒီဂရီများစွာ အေးစက်ဖို့ လိုအပ်ပါတယ်။

ဝှေးစေ့ပူနွေးနေပြီး ဘောင်းဘီအကြပ်ဖြင့် ကြာရှည်စွာ ထိုင်နေရတဲ့အခါ သုတ်ပိုးထုတ်လုပ်မှု လျော့နည်းစေတာကို သိရှိခဲ့ပြီးဖြစ်ကြောင်း မန်ချက်စတာတက္ကသိုလ်မှ ပရော်ဖက်ဆာ အယ်လန်ပေဆီက ပြောပြပါတယ်။

ကိုယ်ဝန်လိုချင်နေတဲ့ သူတွေအတွက် ကားထိုင်ခုံတွေ လျှပ်စစ်စောင်တွေ ပိတ်ထားဖို့ အကြံပြုသွားပါတယ်။

ခရီးရှည်မှာ မဖွင့်သင့်ပေမယ့် ခဏတဖြုတ် ရံဖန်ရံခါ ဖွင့်တာကတော့ ပြဿနာမရှိပါဘူး။

သုတ်ပိုးထုတ်လုပ်ရာ ပြဿနာပေးတာက အပူတစ်မျိုးတည်းမဟုတ်ဘဲ အလုပ်အကိုင်တွေကလည်း သက်ရောက်နေပါတယ်။

ရုပ်ပိုင်းဆိုင်ရာ လှုပ်ရှားလုပ်ကိုင်ရသူတွေဟာ ရုံးတွေမှာ ထိုင်လုပ်ရတဲ့သူတွေထက် ၅၀ ရာခိုင်နှုန်းနီးပါး သုတ်ပိုးအရေအတွက် ပိုများနေပါတယ်။

ဒါကြောင့် လှုပ်ရှားလေ့ကျင့်ခန်းလုပ်ခြင်းက ကျန်းမာရေးအကျိုးကျေးဇူး များစွာရှိနေပါတယ်။

လုပ်ငန်းခွင်မှာ လှုပ်ရှားလုပ်ကိုင်နေရခြင်းဟာ အမျိုးသားတွေရဲ့ မျိုးပွားနိုင်စွမ်းကို သိသိသာသာ တိုးတက်စေပါတယ်။

#World_Health #သုတ်ပိုးလျော့ကျပစ္စည်းတစ်မျိုး #ဆရာဝန်များသတိပေး #Source: New York Post

တရုတ်ပြည်မှ ရုပ်ရှင်နဲ့တီဗီပရိသတ်တွေဟာ ဇာတ်ကားတွေနဲ့ တီဗီအစီအစဥ်တွေရဲ့ ရိုက်ကွင်းနေရာတွေကို သွားရောက်လိုနေကြပြီး တိုင်းပြည်ရဲ့ ဧည့်ခရီးသွားလုပ်ငန်း အခွင့်အလမ်းသစ်ကို ပုံဖော်နေကြပါတယ်။
Asia_Industry
Published_ 17 January 2024
#ဧည့်ခရီးသွားလုပ်ငန်းဖွံ့ဖြိုးတိုးတက်လာ #ရိုက်ကွင်းနေရာဒေသရှုခင်း
#Yangon_Times #YMG_News #Yangon_Media_Group

၁၇ ဇန်နဝါရီ ၂၀၂၄

ထိုင်းနိုင်ငံတွင် ထောင်ကျနေသည့်  ဝန်ကြီးချုပ်ဟောင်း သက်ဆင်ရှင်နာဝါထရာသည် သူ၏ အသက်နှင့်ကျန်းမာရေး အခြေအ နေကြောင့် လာမည့်လ လွတ်ငြိမ်းချမ်းသာခွင့်တွင် ပါဝင်ရန် အရည်အချင်းပြည့်မီကြောင်း ယနေ့ ဇန်နဝါရီ (၁၇)ရက်တွင် ထိုင်း အကျဉ်းဌာနအရာရှိတစ်ဦးကပြောပါတယ်။

အသက် (၇၄)နှစ်အရွယ်ရှိပြီဖြစ်တဲ့ ဘီလျံနာ သက်ဆင်သည် ထောင်(၈)နှစ်ကျခံရန် ပြီးခဲ့တဲ့နှစ်ဩဂုတ်လတွင်  ပြည်တော်   ပြန်လာပြီး နာရီပိုင်းအတွင်း သွေးတိုးနင့် ရင်ဘတ်တောင့်လာမှုကြောင့် ဆေးရုံတက်ခဲ့ရပါတယ်။ သူ၏ ထောင်ဒဏ်ကိုလည်း ဘုရင်မင်းမြတ်က တစ်နှစ်သို့ လျှော့ချပေးခဲ့ပါတယ်။

သူ့ကျန်းမာရေးကိုဆက်လက်စောင့်ကြည့်ဖို့လိုအပ်တယ်ဆိုပြီး အကျဉ်းဌာနက အကျဉ်းဌာနဆေးရုံမှာ သူဆက်ပြီးနေခွင့် ထပ်မံ တိုးမြှင့်ပေးခဲ့ပါတယ်။

“ သတ်မှတ်ချက်များအရ သက်ဆင်ဟာ အထူးလွတ်ငြိမ်းချမ်းသာခွင့်မှာ  အကျုံးဝင်ပါတယ်” ဟု အကျဉ်းဌာန ဒုတိယညွှန်ကြား ရေးမှူးချုပ် ဆစ်သီ ဆူဆီဗောင်းက ပြောပါတယ်။ ဖေဖော်ဝါရီမှာ သက်ဆင်ထောင်ကလွတ်လာမှာလားဟု သတင်းထောက်များ ၏ အမေးကို သူကဖြေကြားခဲ့ခြင်းဖြစ်ပါတယ်။

သူ့လွတ်ငြိမ်းခွင့်အတွက် ဘန်ကောက်ရမန်အကျဉ်းထောင်ဆီက တရားဝင်တောင်းခံလွှာ မရသေးဘူးလို့လည်း သူက ဆက်ပြောပါတယ်။

Source Reuters

#Daily_News
Published_ 17 January 2024

၁။ ဟိုပုန်းထွက် စတော်ဘယ်ရီများ ရန်ကုန်သို့ရောက်ရှိလာတော့မည်

၂။ တရုတ်နှစ်ကူးနီးလာသဖြင့် ပြည်တွင်းဆိတ်သားသတ်ဈေးကွက် ဈေးမြင့်တက်လာ

၃။ ဗုဒ္ဓဂါယာ ခရီးသွားလာမှု ယမန်နှစ်ထက်ကျဆင်းနေ

၄။ တရုတ်ရုပ်ရှင်ကားများရိုက်ကူးသော ရိုက်ကွင်းနေရာဒေသရှုခင်းများတွင် ဧည့်ခရီးသွားလုပ်ငန်းဖွံ့ဖြိုးတိုးတက်လာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

ပြီးခဲ့တဲ့ ၂၀၂၃ ဒီဇင်ဘာလ ၁ရက်ကစပြီး မြဝတီ-ကော့ကရိတ် အာရှလမ်းပိုင်းမှာ တိုက်ပွဲတွေဖြစ်ခဲ့တဲ့အတွက် မြဝတီ ကျောက်လုံးကြီးစခန်းကနေ ထိုင်းနိုင်ငံသို့ MOU လုပ်သားစေလွှတ်မှုမှာ လုပ်သားဦးရေနှုန်းထားဟာ ယခင်လတွေ ထက်လျော့ကျသွားတယ်လို့ ဆိုပါတယ်။
#Local_News
Published_ 17 January 2024
#မြဝတီကျောက်လုံးကြီးစခန်း #MOUလုပ်သားစေလွှတ်
#YMG/LW #Yangon_Times

#Local_News
Published_ 17 January 2024

မန္တလေးမှ IELTS စာမေးပွဲဖြေဆိုရန် ပြင်ဆင်နေသူများအတွက် ဗြိတိသျှကောင်စီ (မန္တလေး) စာကြည့်တိုက်တွင်ကြိုက်နှစ်သက်ရာ Cambridge IELTS စာအုပ်များကို လာရောက်ရွေးချယ်ငှားရမ်းနိုင်ကြောင်း British Council မှ သိရသည်။

ဗြိတိသျှကောင်စီ စာကြည့်တိုက်သို့လာရောက်ရန် စာကြည့်တိုက်အသင်းဝင်ကဒ်ပြား (သို့) မှတ်ပုံတင် (သို့) ပတ်စ်ပို့ (သို့) ယာဥ်မောင်းလိုင်စင် (သို့) ကျောင်းသားကဒ် ယူဆောင်လာရမည်ဖြစ်ပြီးတစ်ရက်ကြိုတင်ရက်ချိန်းရယူပေးကာ ငှားရမ်းနိုင်သည်ဟု ဆိုသည်။

စာကြည့်တိုက်အသင်းဝင်လိုသူများအနေဖြင့်လည်း အွန်လိုင်းကတစ်ဆင့် လျှောက်လွှာတင်နိုင်ပြီး စာကြည့်တိုက်မှာ အသင်းဝင်ကြေးပေးချေတဲ့အခါ ငွေသားပေးချေခြင်းကို လက်မခံတဲ့အတွက် ဘဏ်ကဒ်နှင့်ပေးချေခြင်း (သို့မဟုတ်) AYA mobile banking နှင့်ပေးချေခြင်းကိုသာ ပြုလုပ်နိုင်မည်ဟုဆိုသည်။

ဗြိတိသျှကောင်စီ (မန္တလေး) စာကြည့်တိုက်ကိုအခန်း (၈)၊ ၁၁ လွှာ၊ Mandalay Financial Centre၊ လမ်း ၈၀၊ ၂၇လမ်းနှင့် ၂၈လမ်းကြား၊ ချမ်းအေးသာစံမြို့နယ်၊ မန္တလေးမြို့၌တနင်္လာနေ့ မှ သောကြာနေ့ (မနက် ၉ နာရီခွဲ မှ ညနေ ၄:၀၀ နာရီထိ)ဖွင့်ထားကြောင်း သိရသည်။

#Local_News #IELTSစာမေးပွဲဖြေမည့်သူ #IELTSစာအုပ်များငှားရမ်းနိုင် #tthl #Yangon_Times

#Local_News
Published 17 January 2024

ပုဂံဇုန်ဘုရားသန့်ရှင်းရေးလုပ်ငန်းများ ဧရိယာသုံးခုတွင် ၁၀၀ ရာခိုင်နှုန်းပြည့်ပြီးစီးပြီဖြစ်ပြီး ကျန်ဧရိယာများအားဆက်လက်ဆောင်ရွက်‌နေကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန (ပုဂံဌာနခွဲ)မှသိရသည်။

အဆိုပါ ပုဂံဇုန် (၁၁) ခုလုံးရှိ ဘုရားများတွင် ရှင်းလင်းရေးလုပ်ငန်းများကို ၂၀၂၃ ခုနှစ် ဇူလိုင် (၄)ရက်တွင် စတင်ဆောင်ရွက်ခဲ့ပြီး လက်ရှိတွင် ဧရိယာသုံးခုတွင် ၁၀၀ ရာခိုင်နှုန်း ရှင်းလင်းဆောင်ရွက်ပြီးစီးကာ ကျန်ဧရိယာ သုံးခုကို ထပ်မံဆောင်ရွက်နေရာတွင် ၃၀ ရာခိုင်နှုန်းခန့် ပြီးစီးနေပြီဖြစ်ကြောင်း၊ ကျန်ဧရိယာ ငါးခုကိုလည်း ဆောင်ရွက်လျှက်ရှိကာ ၂၀၂၄ ခုနှစ် (၆) လပိုင်းတွင် အပြီးဆောင်ရွက်ရန် မျှော်မှန်းထားကြောင်း သိရသည်။

ဘုရားများအား သန့်ရှင်းရေးလုပ်ငန်းများ ဆောင်ရွက်ရာတွင်၂၀၂၃ ခုနှစ် ဇူလိုင် (၄)ရက်တွင် စတင်ခဲ့ခြင်းဖြစ်ပြီး ဘုရားများအပေါ်၌ ပေါက်နေသည့် ပေါင်းမြက်များ၊ ညောင်ပင်များ၊ လိုဏ်ဂူအတွင်းပိုင်းရှိ ဘုရားဆင်းတုတော်များ၏ သန့်ရှင်းရေးလုပ်ငန်းများကိုပါ ဆောင်ရွက်လျက်ရှိကြောင်း သိရသည်။

ဘုရား၊ စေတီ၊ ပုထိုးများ၏ ပေ (၂၀) ပတ်လည်ရှိ ရှေးဟောင်းအဆောက်အအုံများကို အနှောင့်အယှက်ဖြစ်စေသည့် အပင်များကိုလည်း ခုတ်ထွင်ရှင်းလင်းရန် စီမံဆောင်ရွက်လျက်ရှိကြောင်း သိရသည်။

#Local_News #ပုဂံဇုန်ဘုရားသန့်ရှင်းရေးလုပ်ငန်း #ရာနှုန်းပြည့်ပြီးစီးပြီဖြစ် #YMG/NN #Yangon_Times

#Local_News
Published_ 17 January 2024

တရုတ်နိုင်ငံမှ “နှလုံးသားမှပိုးလမ်းမ” Care for the Future လှူဒါန်းမှုအစီအစဉ်အဖြစ် ရန်ကင်းလေ့ကျင့်ရေးအလယ်တန်းကျောင်းသို့ LED မီး၊ ကျောင်းသုံးနှင့် အားကစားသုံးပစ္စည်းများလှူဒါန်းခဲ့ကြောင်း မြန်မာနိုင်ငံဆိုင်ရာတရုတ်သံရုံးမှ သိရသည်။

တရုတ်ငြိမ်းချမ်းရေးနှင့် ဖွံ့ဖြိုးရေးဖောင်ဒေးရှင်းမှ ကြီးမှူး၍ မြန်မာ-တရုတ် ပူးပေါင်းဆက်ဆံရေး ဗဟိုအသင်းမှ တာဝန်ခံကျင်းပသည့် “နှလုံးသားမှပိုးလမ်းမ” Care for the Future လှူဒါန်းမှုအစီအစဉ်ကို ဇန်နဝါရီလ ၁၆ ရက်တွင် ရန်ကုန်မြို့၌ ကျင်းပခဲ့ပြီး ရန်ကုန်မြို့ လေ့ကျင့်ရေးအလယ်တန်းကျောင်း (ရန်ကင်း) သို့ ဘောလုံး၊ ဘော်လီဘော၊ ကြက်တောင်၊ မှတ်စုစာအုပ်၊ LED မီး စသည့်အားကစားနှင့် စာရေးကိရိယာများ လှူဒါန်းခဲ့ခြင်း ဖြစ်သည်။

တရုတ်ငြိမ်းချမ်းရေးနှင့် ဖွံ့ဖြိုးရေးဖောင်ဒေးရှင်းကို ၂၀၁၁ ခုနှစ် ဇန်နဝါရီလတွင် စတင်တည်ထောင်လာကတည်းက မြန်မာနိုင်ငံတွင် မူလတန်းနှင့် အထက်တန်းကျောင်းပေါင်း ၁၉ ကျောင်းနှင့် ဆေးရုံ ၂ ရုံ စသည့် ပြည်သူ့လူနေမှုဘဝအကျိုးပြုစီမံကိန်းပေါင်း ၂၀ ကျော် ကူညီတည်ဆောက်ပေးခဲ့ပြီး မေတ္တာဖြင့်လှူဒါန်းမှုများကြောင့် လူပေါင်းသိန်းချီက အကျိုးခံစားရစေခဲ့သည်ဟု ဆိုသည်။

ဖောင်ဒေးရှင်းသည်  မြန်မာနိုင်ငံ၌ ပိုမိုများပြားသော ပြည်သူ့လူနေမှုဘဝ အကျိုးပြုစီမံကိန်းများ ဖော်ဆောင်သွားမည်ဖြစ်ပြီး တရုတ်-မြန်မာ ချစ်ကြည်ရေး ပိုမိုနက်ရှိုင်းစေရန်အတွက် တက်ကြွစွာ အကျိုးထမ်းဆောင်သွားမည်ဖြစ်သည်။ 

ရန်ကုန်မြို့ လေ့ကျင့်ရေးအလယ်တန်းကျောင်း (ရန်ကင်း) မှ ဆရာ၊ ဆရာမများက တရုတ်ငြိမ်းချမ်းရေးနှင့် ဖွံ့ဖြိုးရေးဖောင်ဒေးရှင်း၏ ဂရုပြုမှုနှင့် ကူညီထောက်ပံ့မှုတို့အား ကျေးဇူးတင်ရှိကြောင်း၊ ယခုလှူဒါန်းသောပစ္စည်းများကို အကျိုးရှိစွာ အသုံးချသွားကာ ကျောင်းသားကျောင်းသူများ စာကြိုးစား၍ ကိုယ်ခန္ဓာကြံ့ခိုင်ရေးအတွက် လေ့ကျင့်ရန် အားပေးပြီး မြန်မာ-တရုတ် ချစ်ကြည် ရေးလက်ဆင့်ကမ်းရန်အတွက် ခိုင်မာသောအခြေခံ ချမှတ်ပေးသွားမည်ဖြစ်ကြောင်း ပြောကြားခဲ့ကြောင်း သိရသည်။

#Local_News #ကျောင်းသုံးနှင့်အားကစားသုံးပစ္စည်းများလှူဒါန်း #tthl #Yangon_Times

"ရန်ကုန်တိုင်းအတွင်းရှိ မြို့နယ် (၁၃) မြို့နယ်မှ သီလရှင်ကျောင်း (၆၁၈) ကျောင်း ၊ သီလရှင်အပါး (၉၅၁၃) ပါးတို့ကို  တပါးလျှင်ဆွမ်းဆန် (၁) ပြည် ၊ န၀ကမ္မအလှူငွေ (၁၀၀၀၀) ကျပ်စီနဲ့ အခြားသော လှူဖွယ်၀တ္ထုအစုစုတို့ကို လှူဒါန်းသွားမှာဖြစ်တယ်"ချမ်းမြေ့ရိပ်သာကျောင်း (ရန်ကုန်) ကျောင်းတိုက်
#Local_News
Published_ 17 January 2024
#ချမ်းမြေ့ဆရာတော်ကြီး #ရှစ်ရက်ကြာလှူ
#tthl #Yangon_Times

#Local_News
Published-17 January 2024

၂၀၂၃ -၂၄ ဘဏ္ဍာနှစ် ၂၀၂၃ ခုနှစ် ဧပြီလမှ ၂၀၂၄ ခုနှစ် ဇန်နဝါရီလ ၅ ရက်အထိ ကိုးလကျော်ကာလအတွင်းပြည်ပနိုင်ငံများသို့ မြန်မာ့သတ္ထုတွင်းထွက်ပစ္စည်းများတင်ပို့မှုမှ အမေရိကန်ဒေါ်လာ ၂၁၀ ဒသမ ၁၁၅ သန်းရရှိခဲ့ပြီးဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ သိရသည်။

ထိုသို့တင်ပို့ရာတွင် မြန်မာ့သတ္ထုတွင်းထွက်ပစ္စည်းများကို ပြည်ပနိုင်ငံများသို့ နိုင်ငံပိုင်တင်ပို့ရောင်းချမှုမှ ကန်ဒေါ်လာသန်း ၃၀ နီးပါးနှင့် ပုဂ္ဂလိကပိုင် တင်ပို့ရောင်းချမှုမှ ကန်ဒေါ်လာသန်း ၁၈၀ ဒသမ ၅၉၈ သန်း ကျော်ရရှိထားခြင်းဖြစ်သည်။

အဆိုပါ ပြည်ပနိုင်ငံများသို့ တင်ပို့ရောင်းချလျက်ရှိသည့် မြန်မာ့သတ္ထုတွင်းထွက်ပစ္စည်းများမှာ ကျောက်စိမ်း၊ စိန်၊ ရွှေ၊ ပုလဲ၊ ခဲ၊ ခဲမဖြူ၊ အဖြိုက်နက်၊ ကြေးနီ၊ ငွေ၊ ကျောက်မီးသွေး၊ သွပ်နှင့် အခြားတွင်းထွက်သတ္ထုများပါဝင်ကြောင်း သိရသည်။

#Local_News #မြန်မာ့သတ္ထုတွင်းထွက်ပစ္စည်းများတင်ပို့မှု #ကန်ဒေါ်လာ၂၁၀ဒသမ၁၁၅သန်းရရှိ #YMG/ NN #Yangon_Times