Published_ 19 October 2023

မိုခါမုန်တိုင်း ဝင်ရောက်သည့်အခါ တုံ့ပြန်မှုလုပ်ငန်းများကို အချိန်နှင့်တစ်ပြေးညီ အဆင့်လိုက် ဆောင်ရွက်နိုင်ခဲ့၍ ၂၀၀၈ ခုနှစ် နာဂစ် မုန်တိုင်းနှင့် နှိုင်းယှဉ်ပါက သေဆုံးမှု၊ ဆုံးရှုံးမှုများ အဆပေါင်းများစွာ လျော့နည်းခဲ့ကြောင်း အမျိုးသား သဘာဝဘေးအန္တရာယ် ဆိုင်ရာစီမံခန့်ခွဲမှုကော်မတီ ဥက္ကဋ္ဌ၊ နစက ဒုတိယဥက္ကဋ္ဌ ဒုတိယဝန်ကြီးချုပ် ဒုတိယ ဗိုလ်ချုပ်မှူးကြီး စိုးဝင်း က ပြောကြားခဲ့ပါတယ်။

၂၀၂၃ ခုနှစ်၊ အပြည်ပြည်ဆိုင်ရာ သဘာဝဘေးအန္တရာယ် ထိခိုက်ဆုံးရှုံးနိုင်ခြေ လျှော့ချရေးနေ့ အထိမ်းအမှတ်အခမ်းအနားကို အောက်တိုဘာ (၁၈) ရက် နံနက်ပိုင်းတွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗန်းရှင်းဗဟိုဌာန(၂) MICC – II ၌ပြုလုပ်ခဲ့ တာဖြစ်ပါတယ်။

ကမ္ဘာလုံးဆိုင်ရာ ဆန်းစစ်ချက်အစီရင်ခံစာ (၂၀၂၂) အရ ပျက်စီးဆုံးရှုံးမှုများသည့် သဘာဝဘေးကြီးများသည် ၂၀၁၅ ခုနှစ်အထိ (၁) နှစ်တွင် အကြိမ်(၄၀၀)ခန့် ဖြစ်ခဲ့ပြီး ၂၀၃၀ ပြည့်နှစ်သို့ရောက်ပါက (၁)နှစ်ကို အကြိမ်(၅၆၀)ခန့်အထိ တိုးလာနိုင်ကြောင်း သိရပါတယ်။

၂၀၂၃ ခုနှစ်၊ ဖေဖော်ဝါရီလတွင် တူကီယဲနှင့် ဆီးရီးယားနယ်စပ်တွင် အင်အား ၇ ဒသမ ၈ ရစ်ချ်တာစကေးရှိသည့် ငလျင်လှုပ်ခဲ့ပြီး လူ(၅၀,၀၀၀)ကျော် သေဆုံးခဲ့ပြီး အများအပြား ဒဏ်ရာရရှိခဲ့ကြောင်း၊ အဆောက်အအုံ ပျက်စီးဆုံးရှုံးမှုများကလည်း ကြီးမား လှကြောင်း၊ အလားတူ ဖိလစ်ပိုင်တွင် ဇူလိုင်လ က တိုင်ဖွန်းမုန်တိုင်းနှင့် ရေဘေးဖြစ်ပွား ခဲ့ကြောင်း၊ အဆိုပါမုန်တိုင်း၏အရှိန်သည် တရုတ်နိုင်ငံ Fujian (ဖီဂျန်း) ပြည်နယ်နှင့် ထိုင်ဝမ်တို့ကို တိုက်ခတ်ခဲ့ပြီး ပျက်စီးဆုံးရှုံးမှုများစွာ ဖြစ်ပေါ်ခဲ့ပါတယ်။

မြန်မာနိုင်ငံတွင်လည်း မေလ (၁၄) ရက်နေတွင် အင်အားအလွန်ပြင်းထန်သည့် ဆိုင်ကလုန်းမုန်တိုင်း(မိုခါ) တိုက်ခတ်ခဲ့၍ ရခိုင်ပြည်နယ်နှင့် ချင်းပြည်နယ်တို့တွင် ပျက်စီးဆုံးရှုံးမှုများဖြစ်ပေါ်ခဲ့ပါတယ်။

ပင်လယ်ပြင်တွင် မုန်တိုင်းအစပျိုးဖြစ်စဉ်ကတည်းကပင် နိုင်ငံတော်အကြီးအကဲ ကိုယ်တိုင်လိုအပ်တဲ့ စောင့်ကြည့်လေ့လာမှုများ လမ်းညွှန်ပေးခဲ့ပြီး ရေးဆွဲထားပြီးဖြစ်သော သဘာဝဘေးအန္တရာယ်ဆိုင်ရာ စီမံချက်ပါအတိုင်း လိုအပ်သည့် ကြိုတင်ပြင်ဆင်မှုများကို ဆောင်ရွက်ခဲ့တယ်လို့ နစကဒုတိယဥက္ကဋ္ဌက ဆိုပါတယ်။

မုန်တိုင်းလမ်းကြောင်းတွင်ရှိသည့် ပြည်သူများကို ဘေးလွတ်ရာနေရာသို့ ကြိုတင် ရွှေ့ပြောင်းပေးခဲ့ပြီး သတိပေးချက်များ၊ ဆောင်ရန် ရှောင်ရန် အချက်များကိုလည်း ဖြန့်ဝေခဲ့ကြောင်း၊ သဘာဝဘေးအန္တရာယ်ဆိုင်ရာ စီမံခန့်ခွဲမှုဗဟိုဌာနကို ဖွင့်လှစ်ခဲ့ပြီး လိုအပ်တဲ့ ကူညီကယ်ဆယ်ရေး၊ တုံ့ပြန်ရေး၊ သယ်ယူပို့ဆောင်ရေးများကို ဒေသခံအစိုးရ အဖွဲ့၊ နယ်မြေတာဝန်ခံများနှင့် ညှိနှိုင်းပေါင်းစပ်ပြီး ဆောင်ရွက်ခဲ့တယ်လို့ ဆိုပါတယ်။

တုံ့ပြန်ရေးလုပ်ငန်းများ၊ ထောက်ပံ့ကူညီမှုများ လုပ်ဆောင်သည့်အခါတွင်လည်း မည်သူတစ်ဦးတစ်ယောက်မျှ အကူအညီမရသူမရှိစေရ မူဝါဒထားရှိပြီး ပူးပေါင်း ဆောင်ရွက်ခဲ့မှုများကြောင့် အချိန်တိုတွင်းတွင် မူလအခြေအနေကို အမြန်ပြန်လည် ရောက်ရှိခဲ့တယ်လို့ သိရပါတယ်။
ymg_mnn
#Local_News
#Published_ 19 October 2023
#YMG #Yangon_Times #Yangon_Media_Group

Published 19 October 2023

အီတလီလူမျိုး မော်တော်ဆိုင်ကယ်စီးသူ တစ်ဦးဟာ ဆိုင်ကယ်မှောက်ပြီး ဝှေးစေ့က နေရာလွဲသွားကာ ဝမ်းဗိုက်ထဲသို့ ရောက်ရှိပြီးနောက် အလွန်နာကျင်နေရကြောင်း BMJ Case Reports မှာ ဖော်ပြထားပါတယ်။

အဆိုပါ ရှားပါးဖြစ်စဥ်ဟာ အီတလီမှာ မော်တော်ဆိုင်ကယ် စီးနင်းလာသူတစ်ဦးက အက်ဆီးဒင့်ဖြစ်ပြီး ညာဘက်ဝှေးစေ့က နေရာလွဲသွားခဲ့တယ်လို့ ဖော်ပြထားပါတယ်။

ထိခိုက်မှုကြောင့် ကပ္ပါယ်အိတ်ထဲကနေ ဝှေးစေ့က ထွက်သွားပြီး ပေါင်ခြံအပေါက်ကနေ ဖြတ်သန်းကာ ဝမ်းဗိုက်ထဲ ရောက်ရှိသွားပါတယ်။

ဆေးရုံရောက်ရှိရာမှာ ကပ္ပါယ်အိတ်မှာ သွေးခဲအများအပြား ရှိနေပြီး ဆေးဝန်ထမ်းများ စစ်ဆေးရှာဖွေဖို့ ခက်ခဲနေခဲ့ပါတယ်။

သွေးကျန်တွေ ထုတ်ပစ်ပြီး သွေးရပ်တန့်စေခဲ့ပြီးနောက် အခြားဒဏ်ရာများကိုလည်း ရှာဖွေကြည့်ရာမှာ တင်းပါးရိုး ကျိုးနေတာကိုလည်း တွေ့ရှိခဲ့ကြပါတယ်။

ဆီးလမ်းကြောင်း ထိခိုက်မှုရှိမရှိကိုလည်း သေချာအောင် စစ်ဆေးခဲ့ကြပါတယ်။

ဓာတ်မှန်ဖြင့် စစ်ဆေးခဲ့ရာမှာ နေရာလွဲသွားတဲ့ ဝှေးစေ့ကို ဝမ်းဗိုက်ညာဘက်စွန်းမှာ တွေ့ရှိခဲ့ပါတယ်။

နေရာမှန်သို့ ပြန်မထည့်ခင်မှာ အောက်ဆီဂျင် ပြတ်လပ်နေတဲ့ဝှေးစေ့ကို နွေးအောင်ပြုလုပ်ခဲ့ပြီး အောက်သို့ပြန်ကျအောင် ကုသပေးခဲ့ပါတယ်။

၆ လအကြာမှာ နဂိုနေရာသို့ ပြန်ရောက်ရှိလာကာ ဟော်မုန်းထုတ်လုပ်မှုတွေ၊ သုတ်ရည်ထုတ်လုပ်မှုတွေ ထိခိုက်ခြင်းမရှိပေမယ့် ကပ္ပါယ်အိတ် ကျယ်လာတာမျိုးတော့ ကံဆိုးရင်ဖြစ်တတ်ပါတယ်။

မော်တော်ဆိုင်ကယ် အက်ဆီးဒင့်ကြောင့် ဝှေးစေ့နေရာလွဲသွားတဲ့ ဖြစ်ရပ်တွေထဲက ၆ ရာခိုင်နှုန်းလောက်သာ ဝမ်းဗိုက်ထဲအထိ ရောက်ရှိခဲ့ပါတယ်။
Source: New York Post
#World_Health
#Published_ 19 October 2023
#YMG #Yangon_Times #Yangon_Media_Group

Published-19 October 2023

ရောင်ပြန်မပါသော တွဲကားများတွင် ရောင်ပြန်များကို ခွင့်တောင်း၍ အခမဲ့ကပ်ပေးရန်အတွက် စီစဉ်နေကြောင်း ပြည်သူ့ကယ်ဆယ်ရေး People Rescue မှ ဦးမောင်က ၎င်း၏ လူမှုကွန်ရက် ဖေ့စ်ဘွတ်ခ်စာမျက်နှာတွင် ရေးသားထားသည်။

“ရောင်ပြန်တွေ ဝယ်မယ်။ ရောင်ပြန်မပါတဲ့ တွဲကားတွေတွေ့ရင် ခွင့်တောင်းပြီး ကပ်ပေးမယ်” ဟု ၎င်းက ရေးသားထားသည်။

ရောင်ပြန်မကပ်ထားသော တွဲကားများကို ညပိုင်းတွင်နောက်ဘက်က ဝင်တိုက် မိသည့် ဖြစ်စဉ်မျိုး မဖြစ်ပွားစေရန်အတွက် ယင်းသို့ စီစဉ်ထားခြင်း ဖြစ်ကြောင်း ၎င်းက ဆိုသည်။

ပြီးခဲ့သည့်ရက်ပိုင်းကပရဟိတလူနာတင်ယာဉ်တစ်စီးက လမ်းဖြတ်ကူးသူအား တိမ်းရှောင်စဉ် ရောင်ပြန်မပါသည့်တွဲကားကို တို မိ၍ ပရဟိတသမား တစ်ဦးအပါအဝင် နှစ်ဦးသေဆုံးကာ လေးဦးဒဏ်ရာ ရခဲ့သည့် ဖြစ်စဉ် ဖြစ်ပွားခဲ့သေးသည်။
Yangon_Times/PP
#Local_News
#Published_ 19 October 2023
#YMG #Yangon_Times #Yangon_Media_Group

Published_19 Oct 2023

“ဝ”ကိုယ်ပိုင်အုပ်ချုပ်ခွင့်ရတိုင်းနယ်မြေအတွင်း Online လိမ်လည်မှုများကျူးလွန်နေသော ချန်ရန်ပန်(ခ)ပေါက် အိုက်ပန်းနှင့် ရှောက်ရန်ပန်(ခ)ဟော်ချွင်ထင်တို့အား ဖမ်းဝရမ်းထုတ်ထားကြောင်း သိရသည်။

အဆိုပါ နှစ်ဦး ကို ရှမ်းပြည်နယ်၊ “ဝ” ကိုယ်ပိုင်အုပ်ချုပ်ခွင့်ရတိုင်းနယ်မြေအတွင်း Online လိမ်လည်မှုများ၊ လူကိုသွေးဆောင်ဆွဲ ခေါ်မှုများ၊ လူပြန်ပေးမှုများ၊ ခြောက်လှန့်တောင်းယူမှုများကျူးလွန်ခြင်း၊ ကျူးလွန်ရန် အားထုတ်ခြင်း၊ အားပေး ကူညီခြင်းများကို ကျူးလွန်နေခြင်းကြောင့် အောက်တိုဘာလ ၁၇ ရက် တွင် ဟိုပန်ခရိုင်တရားရုံးက ဖမ်းဝရမ်းထုတ်ဆင့်ထားကြောင်း နစက သတင်းထုတ်ပြန်ရေးအဖွဲ့က သိရသည်။

ပြီးခဲ့သည့် လအတွင်းက လည်း မြန်မာနိုင်ငံရှိ “ဝ”ပြည်နယ်အတွင်း ဆက်သွယ်ရေးလိမ်လည်မှုများဖြင့် အဆိုပါ ပြစ်မှုကျူးလွန်သူ လူ ၁၂၀၇ ဦး ကို “ဝ” ပြည်နယ်ရဲတပ်ဖွဲ့က တရုတ်နိုင်ငံရဲ တပ်ဖွဲ့ထံ အပ်နှံခဲ့ကြောင်းလည်း သိရသည်။

၂၀၂၃ ခုနှစ်အတွင်း Online လိမ်လည်မှု ၁၁၉ မှုမှ တရားခံ ၇၆ ဦးနှင့် Online လောင်းကစားမှု ၅၈ မှုမှ တရားခံ ၁၃၄ ဦးတို့ကို ဖော်ထုတ် အရေးယူနိုင်ခဲ့ကြောင်း ယနေ့ အောက်တိုဘာလ ၁ ရက်တွင် နေပြည်တော်ရှိ မြန်မာ အပြည်ပြည်ဆိုင်ရာကွန်ဗင်းရှင်းဗဟိုဌာန-၂ (MICC-2)၌ ပြုလုပ်သော (၅၉)နှစ်မြောက်မြန်မာနိုင်ငံရဲတပ် ဖွဲ့နေ့ အခမ်းအနားအတွင်း က သိရသည်။
Yangon_Times/PP
#Local_News
#Published_ 19 October 2023
#YMG #Yangon_Times #Yangon_Media_Group

Published 19 October 2023

သွေးတွင်း ကိုလက်စ်ထရောလ်ပမာဏ မြင့်မားခြင်းက နှလုံးရောဂါများ ဖြစ်နိုင်ချေ များစေတယ်ဆိုတာကို လတ်တလောနှစ်တွေမှာ လူပြောများလာကြပါတယ်။

ကျန်းမာရေး စစ်ဆေးချက်ပြုလုပ်စဥ် ကိုလက်စ်ထရောလ် မြင့်မားနေတာဟာ မထူးဆန်းတော့ဘဲ အချို့လူနာတွေဟာ သူတို့ရဲ့ ကိုလက်စ်ထရောလ်နဲ့ ဆေးဝါးများအကြောင်းကို စိုးရိမ်လာကြပါတယ်။

သွေးတွင်း ကိုလက်စ်ထရောလ် မြင့်မားခြင်းဖြင့် နှလုံးရောဂါများနဲ့ လေဖြတ်ခြင်းများ ဖြစ်စေနိုင်တာဟာ အမှန်တကယ် ဖြစ်ပါတယ်။

ကိုလက်စ်ထရောလ် ပမာဏမြင့်မားပါက သွေးကြောတွေထဲမှာ အဆီခဲများ ဖြစ်ပေါ်လာပြီး ပေါက်ထွက်တဲ့အခါမှာ နှလုံးဖောက်ခြင်း၊ လေဖြတ်ခြင်းတို့ ဖြစ်လာနိုင်ပါတယ်။

စတက်တင်ဆေးဝါးများဟာ သွေးတွင်း ကိုလက်စ်ထရောလ်ပမာဏကို လျှော့ချနိုင်တဲ့ ဆေးတွေဖြစ်ပါတယ်။

သွေးကြောတွေထဲမှာ အဆီပိတ်ခြင်းကို လျှော့ချပေးသလို နံရံတွေမှာ အဆီများ အနည်မထိုင်လာအောင် ကူညီပေးပြီး သွေးကြောပေါက်ခြင်းများ မဖြစ်အောင် ကာကွယ်ပေးပါတယ်။

ထိုဆေးသုံးစွဲနေရသူများက ဆေးရဲ့ဘေးထွက်ဆိုးကျိုးများအပြင် ကာလကြာရှည်စွာ သုံးစွဲဖို့ လိုအပ်တာနဲ့ ပတ်သက်ပြီး စိုးရိမ်နေကြပါတယ်။

ကိုလက်စ်ထရောလ် ဆေးတွေကြောင့် ဘေးထွက်ဆိုးကျိုး ဖြစ်တာဟာ အလွန်ရှားပါးပါတယ်။

အများဆုံးတွေ့ရတာကတော့ အစောပိုင်း ဆေးသုံးစွဲချိန်မှာ ကြွက်သားနာကျင် ကိုက်ခဲမှုဖြစ်ပြီး ဒါကလည်း အချိန်ကြာတာနဲ့အမျှ သက်သာသွားတတ်ပါတယ်။

ဆီးချိုအတွက်ဆိုရင် နှလုံးဖောက်ခြင်း၊ လေဖြတ်ခြင်း ခံစားထားရသူတွေ၊ ကိုလက်စ်ထရောလ် မြင့်မားသူတွေမှာ စတက်တင်ဆေးတွေကို သုံးစွဲလေ့ရှိပါတယ်။

စတက်တင်ဆေးတွေဟာ ဆီးချိုရောဂါကို တိုက်ရိုက်အားဖြင့် မဖြစ်စေပေမယ့် ဆီးချိုဖြစ်ချင်နေတဲ့ သူတွေမှာတော့ ရောဂါဖြစ်နိုင်ချေကို အနည်းငယ် မြင့်တက်စေနိုင်ပါတယ်။

ဒါပေမဲ့ ဒီလို ဘေးထွက်ဆိုးကျိုးလောက်က နှလုံးသွေးကြောရောဂါ ဖြစ်နိုင်ချေ လျှော့ချပေးတဲ့ စတက်တင်ဆေးတွေရဲ့ ကောင်းကျိုးကိုတော့ မယှဥ်နိုင်ပါဘူး။

စတက်တင်ကို ပုံမှန်သုံးစွဲနေရင် သွေးတွင်း ကိုလက်စ်ထရောလ်ကို ထိရောက်စွာ လျှော့ချပေးနိုင်ပေမယ့် အသုံးမပြုတော့ရင် ဖြည်းဖြည်းချင်း ပြန်တက်လာနိုင်ပါတယ်။

ဒါကြောင့် ကိုလက်စ်ထရောလ် ပမာဏ ဆက်တိုက်မြင့်မားသူတွေကတော့ စတက်တင်ဆေးတွေကို ရေရှည်အသုံးပြုသွားရမှာ ဖြစ်ပါတယ်။

ကိုလက်စ်ထရောလ်များသူတွေ၊ မိသားစုထဲမှာ နှလုံးသွေးကြောရောဂါရှိသူတွေ၊ ဆေးလိပ်ပုံမှန် သောက်သူတွေဟာ ဆရာဝန်ညွှန်ကြားတဲ့အတိုင်း သောက်သုံးဖို့ လိုအပ်ပါတယ်။

Source: DoctorNDTV
#World_Health
#Published_ 19 October 2023
#YMG #Yangon_Times #Yangon_Media_Group

တရုတ်သမ္မတရှီကျင့်ဖင်ရဲ့ ရေရှည်ဗျူဟာမြောက်နည်းလမ်းများ ဆုံးဖြတ်ချက်ချပုံများကို ရုရှားသမ္မတ ဗလာဒီမာပူတင်က ချီးကျူးလိုက်ကာ တရုတ်သမ္မတဟာ လုပ်ရည်ကိုင်ရည်ရှိပြီး အားထားရတဲ့ မိတ်ဖက်တစ်ဦးဖြစ်တယ်လို့ သတ်မှတ်လိုက်ပါတယ်။
#World_Politics
#Published_ 18 October 2023
#YMG #Yangon_Times #Yangon_Media_Group

#Daily_News
Published_ 18 October 2023

၁။ သီတင်းကျွတ်ပိတ်ရက်တွင် ခရီးစဉ်ဒေသ(၁၄)ခုကို ခရီးထွက်သူများပြား၊ ပုဂံ၊ချောင်းသာ၊ငွေဆောင်၌ ဟိုတယ်ဘိုကင်များပြည့်နေဟုဆို

၂။ ဇီဝဇိုး ဌက်သိုက် ဈေးကောင်း ရရှိတာကြောင့် မွေးမြူရေးခြံများတွင် ငှက်သိုက်ခိုးခံရမှုများရှိလာ

၃။ ရွှေကုန်ကြမ်း ပေါများချိန်ဖြစ်သောကြောင့် ကမ္ဘာ့ရွှေဈေးနှုန်း အတက်အကျနည်းပါးပါက မြန်မာ့ ရွှေဈေးဆက်လက်ကျဆင်းနိုင်

၄။ တရုတ်သမ္မတရှီကျင့်ဖင်သည် လုပ်ရည်ကိုင်ရည်ရှိပြီး အားထားရသည့် မိတ်ဖက်ဟုပူတင်ပြော ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

၁၈ အောက်တိုဘာ ၂၀၂၃

လွတ်လပ်ပွင့်လင်းသော ကမ္ဘာ့စီးပွားရေးတစ်ရပ်ကို တရုတ်နိုင်ငံက ထောက်ခံမှာဖြစ်တယ်လို့ သမ္မတရှီကျင့်ဖျင်က ဗုဒ္ဓဟူးနေ့က ပြောကြားလိုက်ပါတယ်။ ပွင့်လင်းသော ကမ္ဘာ့စီးပွားရေးရဲ့ စုစုပေါင်းကုန်သွယ်မှုတန်ဖိုးဟာ ၂၀၂၄ခုနှစ်မှ ၂၀၂၈ခုနှစ်အထိ ကုန်စည်မှာ အမေရိကန်ဒေါ်လာ ၃၂ ထရီလီယံနှင့် ဝန်ဆောင်မှုမှာ ၅ ထရီလီယံအထိ ရှိလာမယ်လို့မျှော်လင့်တယ်လို့ ရှီက ဆက်လက်ပြော ကြားပါတယ်။

CCTV+

Published_ 18 October 2023

ရွှေတိဂုံအင်္ဂါထောင့်ရှိ ဗုဒ္ဓခြေတော်ရာနှစ်ဆူအား ကြေးသွန်းလက်ရာခြေရာတော်များအဖြစ် အစားထိုးသွန်း လုပ်ပူဇော်ခဲ့ပြီး ရွှေပလ္လင်ဌာနတိုက်အတွင်းသို့ ဌာပနာပစ္စည်းများထည့်သွင်းပူဇော်ခဲ့ကြောင်း ရွှေတိဂုံစေတီတော် ဂေါပကအဖွဲ့၏ဖော်ပြချက်အရသိရသည်။

နဝလောဟ ရတနာပါဒစေတီ ဗုဒ္ဓခြေတော်ရာ (၂)ဆူအား သွန်းလုပ်ပြီးစီး၍ အောက်တိုဘာလ၁၄ရက်တွင် မန္တလေးမြို့မှ ပင့်ဆောင်လာကာ ရန်ကုန်မြို့ မင်္ဂလာဒုံမြို့နယ် ကျိုက်က္ကလော့ဘုရား၌ ကရဝိတ်ပန်းကားယာဉ် ပေါ်သို့ ပြောင်းလဲပင့်ဆောင်၍ လမ်းတစ်လျှောက်၌ အပူဇော်ခံ ပင့်ဆောင်ခဲ့ပြီး ရွှေတိဂုံစေတီတော်ရှေးဟောင်း ရုပ်ပွားတော်များတန်ဆောင်း၌ ယာယီကိန်းဝပ်စံတော်မူခဲ့သည်။

ရွှေတိဂုံစေတီ ရင်ပြင်တော် အင်္ဂါထောင့်တွင် တည်ထားကိုးကွယ်သော ဗုဒ္ဓခြေတော်ရာ (၂)ဆူအား အစားထိုးသွန်း လုပ်ခြင်းအား ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့၏ ဩဝါဒါစရိယ၊ တိပိဋကရွေးချယ်ရေးအဖွဲ့ ဩဝါဒါစရိယ၊ နိုင်ငံတော်ဗဟိုသံဃာ့ဝန်ဆောင်၊ အဂ္ဂမဟာပဏ္ဍိတ၊ သ.စ.အ ဓမ္မာစရိယ၊ ဝဋံသကာပါဠိပါရဂူ ၊ စေတိယင်္ဂဏပဝရသိရီမဟာဓမ္မဂုရု၊ ပါဠိတက္ကသိုလ် ညောင်တုန်းကျောင်းတိုက် ဦးစီးပဓာနနာယက ဘဒ္ဒန္တနာရဒါဘိဝံသ (လှရတနာဆရာတော်)က ဦးဆောင်၍ မန္တလေးမြို့ ကြေးသွန်းပညာရှင်တမ္ပဝတီ ဦးဝင်းမောင် ထံ အပ်နှံခဲ့သည်ဟုဆိုသည်။

အောက်တိုဘာ ၁၇ ရက်တွင် ရွှေတိဂုံစေတီတော်၌ နဝလောဟရတနာပါဒစေတီ ဗုဒ္ဓခြေတော်ရာ(၂)ဆူထားရှိမည့် ဗောဓိမဏ္ဍိုင် တန်ဆောင်း၊ ရွှေပလ္လင်ဌာနတိုက်အတွင်းသို့ ဌာပနာပစ္စည်းများ ထည့်သွင်းပူဇော်ခြင်း အခမ်းအနား ကျင်းပခဲ့ကြောင်းနှင့် သတ္တဌာန ပစ္စည်းများ ထည့်သွင်းခြင်း၊ ရတနာပစ္စည်းများ ထည့်သွင်းခြင်း၊ ဌာပနာပစ္စည်းများကို အမွှေနံ့သာများဖြင့် ပက်ဖြန်းခြင်းများ ပြုလုပ်ပြီး ဗုဒ္ဓသာသနံ စိရံ တိဋ္ဌတု (၃)ကြိမ်ရွတ်ဆိုဆုတောင်း၍ အခမ်းအနားကို ရုပ်သိမ်းခဲ့ကြောင်းသိရသည်။
Yangon_Times/tthl
#Local_News
#Published_ 18 October 2023
#YMG #Yangon_Times #Yangon_Media_Group

Published 18 October 2023

အောက်တိုဘာ ၁၆ ရက်က ထွက်ရှိတဲ့ ထိုင်းထီ ပထမ အမြင့်ဆုံးဆုကို ထိုင်းနိုင်ငံတွင် ရောက်ရှိနေသော မြန်မာအလုပ်သမား လူငယ်လေးတစ်ဦး ဆွတ်ခူး ရရှိခဲ့ကြောင်း ထိုင်းနိုင်ငံရှိမြန်မာအလုပ်သမားအရေးကူညီ ဆောင်ရွက်ပေးသူထံ က သိရသည်။

ထိုင်းထီ မှာ တစ်လ လျှင် နှစ်ကြိမ် ထွက်ရှိပြီး ပြီးခဲ့သည့် အောက်တိုဘာ ၁ရက် က ထွက်ရှိသည့် ထိုင်းထီ ပထမဆု ဘတ်ခြောက်သန်း ကို လည်း ထိုင်း-လာအို နယ်စပ်ရှိ ဆောက်လုပ်ရေး လုပ်ငန်းတွင် လုပ်ကိုင်နေသည့် မြန်မာအလုပ်သမား ဇနီးမောင်နှံ တို့ ရရှိခဲ့ ကြောင်း သိရသည်။

''အခု အကြိမ် လည်း မြန်မာလူမျိုး ပဲ ပေါက်တာ အသက် ၂၆နှစ်ပဲ ရှိသေးတယ် ကောင်လေး က မဟာချိုင် မှာရှိတဲ့ အချိုရည် စက်ရုံ မှာအလုပ်လုပ်နေတဲ့ အလုပ်သမား တစ်ဦးပါ ''ဟု ထိုင်းရောက် မြန်မာအလုပ်သမားတစ်ဦးက ပြောသည်။

ယခုအကြိမ် ထိုင်းထီ ပထမ ဆု ဘတ်ခြောက်သန်း ရရှိသည့် မြန်မာနိုင်ငံသား မှာ ပဲခူးတိုင်းဇာတိ ဖြစ်ပြီး မိဘများ ကို လုပ်ကျွေးနေသူ ဖြစ်ကြောင်း သိရသည်။

အဆိုပါ ပထမ ဆု ဆွတ်ခူး ရရှိသည့် မြန်မာအလုပ်သမား မှ ဆုငွေ ထုတ် ယူရန် အတွက် ထိုင်းနိုင်ငံရှိ မြန်မာအလုပ်သမားအရေးကူညီဆောင်ရွက် ပေးသူများက လုပ်ဆောင်ပေးလျက်ရှိကြောင်း သိရသည်။
Yangon_Times/LW
#Local_News
#Published_ 18 October 2023
#YMG #Yangon_Times #Yangon_Media_Group

Published 18 October 2023

ရန်ကုန်တိုင်းဒေသကြီး လှိုင်သာယာ မြို့နယ် (အရှေ့ပိုင်း) ကစင်ကျေးရွာ အနီး လှိုင်မြစ် အတွင်းရေဆင်းကူးရာမှ လူငယ်တစ်ဦး ရေနစ်သေဆုံမှု ဖြစ်ပွားခဲ့ကြောင်း မေတ္တာပါရမီအသင်း(လှိုင်သာယာ) ထံ မှ သိရသည်။

အောက်တိုဘာ ၁၆ ရက် နေ့လည် ပိုင်း ကစင်ကျေးရွာ ၊ကစင် ဘုန်းတော်ကြီးကျောင်း အနီး လှိုင်မြစ် ကမ်း တွင် လူငယ် သုံးဦး ရေဆင်း ကူးရာမှ တစ်ဦးမှာ ရေနစ်ပျောက်ဆုံး သွားတာကြောင့် လူမှုကူညီရေး အသင်းများ ထံ အကူ ညီတောင်းလာ သဖြင့် ရှာဖွေပေးခဲ့ရာ အောက်တိုဘာ ၁၇ ရက် ညနေ ၄နာရီ တွင် ပြန်လည် တွေ့ရှိခဲ့ကြောင်း သိရသည်။

'' ၁၅နှစ် ၁၆ နှစ် ဝန်းကျင် ရှိတဲ့ ကလေးသုံးယောက် လှိုင်မြစ် ထဲ ရေဆင်းကူးကျတာ တစ်ယောက်ကရေနစ် သွားလို့ဆို ပြီး ကျွန်တော်တို့ အသင်း ကို ၁၆ရက်နေ့ ညနေ ၄နာရီ လောက် အကူညီတောင်း လာတယ် အဲ့နေ့ ညနေ ကတည်း က ရှာတာ မတွေ့ဘူး ၁၇ ရက် နေ့ ညနေ ပိုင်းလောက်မှာ ယခင် ကမ်း ပျိုပြီး စေတီ ပါသွားတဲ့ နေရာမှာအလောင်း ပြန်တွေ့တယ် ''ဟုမေတ္တာပါရမီအသင်း(လှိုင်သာယာ) မှ ကိုအောင်ခိုင် က ပြောသည်။

ရေနစ်သေဆုံးခဲ့သည့် လူငယ်မှာ အသက် ၁၆ နှစ် ရှိပြီ ဖြစ်ပြီး လှိုင်သာယာ အရှေ့ပိုင်း မြို့နယ်ကစင်ကျေးရွာ တွင် နေထိုင်သူ ဖြစ်ကြောင်း သိရသည်။
Yangon_Times/LW
#Local_News
#Published_ 18 October 2023
#YMG #Yangon_Times #Yangon_Media_Group

Published_ 18 October 2023

ပြီးခဲ့သည့်(၂၄)နာရီအတွင်း ဒေသ(၁၁)ခု၌မိုးရေချိန်များခဲ့ပြီး အောက်တိုဘာလ(၁၉)ရက်အပါအဝင်လာမည့် ရက်များတွင်ဒေသအချို့မှာတော့ မိုးထစ်ချုန်းရွာနိုင်သေးကြောင်းမိုးလေဝသနှင့်ဇလဗေဒညွှန်ကြားမှုဦးစီး ဌာနမှသိရသည်။

မှတ်သားဖွယ်ရာ မိုးရေချိန်များမှာ ဓနုဖြူမြို့တွင် (၂.၈၀)လက်မ၊ အင်္ဂပူမြို့တွင် (၁.၇၄)လက်မ၊ လေးမျက်နှာ မြို့တွင် (၁.၆၀)လက်မ၊ ဖြူးမြို့တွင် (၁.၅၇)လက်မ၊ ရန်ကုန်(မင်္ဂလာဒုံမြို့နယ်)တွင် (၁.၅၃) လက်မ၊ နမ့်စန်မြို့တွင် (၁.၄၂)လက်မ၊ ဟင်္သာတမြို့နှင့် ကျောင်းကုန်းမြို့တို့တွင် (၁.၂၆)လက်မစီ၊ သာပေါင်းမြို့တွင် (၁.၂၀)လက်မ၊ ဂွမြို့နှင့် ထားဝယ် မြို့တို့တွင် (၁.၁၄)လက်မစီတို့ရှိခဲ့ခြင်းဖြစ်သည်။

အောက်တိုဘာလ(၁၉)ရက်တွက် တနင်္သာရီတိုင်း၌ နေရာအနှံ့အပြား၊ ရှမ်းပြည်နယ်(တောင်ပိုင်း)နှင့် မွန်ပြည်နယ်တို့တွင် နေရာစိပ်စိပ်၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ ကယားပြည်နယ်နှင့် ကရင်ပြည်နယ်တို့တွင် နေရာကျဲကျဲနှင့် နေပြည်တော်၊ မန္တလေးတိုင်း၊ မကွေးတိုင်း၊ ရှမ်းပြည်နယ်(မြောက်ပိုင်းနှင့် အရှေ့ပိုင်း)နှင့် ရခိုင်ပြည်နယ်တို့တွင် နေရာကွက်ကျား မိုးထစ်ချုန်း ရွာမည်ဖြစ်သည်ဟုဆိုသည်။

နောက်(၂)ရက်အတွက်ခန့်မှန်းချက်အဖြစ် ပဲခူးတိုင်း ၊ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်း၊ ရခိုင်ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာကျဲကျဲမှ နေရာစိပ်စိပ် မိုးထစ်ချုန်းရွာနိုင်ကြောင်း သိရသည်။
Yangon_Times/tthl
#Local_News
#Published_ 18 October 2023
#YMG #Yangon_Times #Yangon_Media_Group