#WorldPolitics
Published - 09 March 2022
ယူကရိန်းမှာဖြစ်ပွားနေတဲ့တိုက်ပွဲကိစ္စတွေကို ညှိနှိုင်းဖြေရှင်းပေးဖို့ အတွက် နိုင်ငံတကာအဖွဲ့အစည်းတွေနဲ့ပူးပေါင်းပြီး တက်တက်ကြွကြွလုပ်ဆောင်သွားဖို့ တရုတ်တို့ ဆန္ဒရှိကြောင်း တရုတ်သမ္မတ'ရှီကျင်ဖင်'က အသိပေးပြောကြားလိုက်ပါတယ်။

ဒါပေမဲ့ ဘယ်လိုဆောင်ရွက်သွားမလဲဆိုတာကို တိတိကျကျဖော်ပြသွားခြင်းမရှိသလို ရုရှားနိုင်ငံအပေါ် အနောက်အုပ်စုရဲ့ဒဏ်ခတ်ပိတ်ဆို့ မှုတွေကိုလည်း ထပ်ခါထပ်ခါ ဆန့်ကျင်ရှုတ်ချသွားပါတယ်။

ဂျာမနီအကြီးအကဲအဓိပတိ'အိုလက်ဖ်ရှော့လ်ဇ်'၊ ပြင်သစ်သမ္မတ'အီမန်နျူရယ်မက်ခရွန်'တို့နဲ့ အွန်လိုင်းကနေပြောဆိုခဲ့ရာ ယူကရိန်းအခြေအနေက စိုးရိမ်ပူပန်နေရကြောင်း၊ ဥရောပတိုက်မှာ စစ်ပွဲထပ်မံဖြစ်ပေါ်လာတဲ့အတွက် အလွန်ဝမ်းနည်းပူဆွေးရကြောင်း 'ရှီ'ကပြောကြားခဲ့တယ်လို့ တရုတ်နိုင်ငံခြားရေးဝန်ကြီးဌာနက ဖော်ပြထားပါတယ်။

"တရုတ်အနေနဲ့ ပြင်သစ်၊ ဂျာမနီ၊ အီးယူတို့နဲ့ အဆက်အသွယ်မပြတ်ရှိနေမှာဖြစ်ပါတယ်။ ပါဝင်ဖွဲစည်းထားတဲ့နိုင်ငံတွေရဲ့လိုအပ်ချက်အတိုင်း နိုင်ငံတကာအဖွဲ့အစည်းတွေနဲ့ အတူတကွလုပ်ဆောင်သွားမှာဖြစ်ပါတယ်။ စစ်ရေးပြဿနာဖြေရှင်းနိုင်ဖို့ ကြိုးပမ်းမှုအားလုံးမှန်သမျှကို ကူညီထောက်ပံ့ပေးသွားပါမယ်" လို့ 'ရှီ'ရဲ့ပြောကြားချက်ကို ဖော်ပြထားတာဖြစ်ပါတယ်။

တရုတ်နဲ့ရုရှားတို့ဟာ အနောက်နိုင်ငံကိုစိန်ခေါ်ရာမှာ အကြံတူပူးပေါင်းခဲ့ကြပေမယ့် ယူကရိန်းကိုကျူးကျော်မှုကတော့ သူတို့နှစ်နိုင်ငံရဲ့ဆက်ဆံရေးသဘောထားအစစ်အမှန်ကို စမ်းသပ်ရာရောက်နေပါတယ်။

တရုတ်တို့က ရုရှားရဲ့ကျူးကျော်တိုက်ခိုက်မှုနဲ့ ရုရှားအပေါ် ဒဏ်ခတ်ပိတ်ဆို့မှုတွေကို တိုက်ရိုက်အပြစ်တင်ဝေဖန်ခြင်းတော့ မရှိသေးပါဘူး။တစ်ကမ္ဘာလုံးက စီးပွားရေးပိတ်ဆို့အရေးယူမှုတွေပြုလုပ်ထားတာကြောင့် ရုရှားတို့ရဲ့စီးပွားရေးထိခိုက်လာချိန်မှာ တရုတ်တို့ကအလျင်စလို ကူညီတာမျိုး မတွေ့ရသေးပါဘူး။

တရုတ်ဘဏ်တွေနဲ့ကုမ္ပဏီတွေက ရုရှားတို့နဲ့ပူးပေါင်းဆောင်ရွက်လိုက်ပါက သူတို့ကိုလည်းဒဏ်ခတ်ပိတ်ဆို့ မှုတွေ ပြုလုပ်လာမှာကို စိုးရိမ်နေကြတယ်လို့ သုံးသပ်မှုတွေထွက်ပေါ်လာပါတယ်။

ယူကရိန်းမှာတိုက်ပွဲတွေဖြစ်ပွားရခြင်းက ရုရှားတို့ကျူးကျော်ခြင်းကြောင့်ဖြစ်တယ်ဆိုတာကို တရုတ်တို့က ဆက်တိုက်ငြင်းချက်ထုတ်ထားပြီး ဒါဟာ နေတိုး(NATO)တပ်ဖွဲ့ တွေ ဥရောပအရှေ့ဘက်သို့ ချဲ့ထွင်လာခြင်းက ဒီပဋိပက္ခကြီးဖြစ်ရခြင်းရဲ့အဓိကအကြောင်းအရင်းဖြစ်တယ်လို့ တရုတ်အာဏာပိုင်တွေက ရုရှားတို့ ရဲ့အဆိုအတိုင်း ပြောကြားခဲ့ပါတယ်။

ငြိမ်းချမ်းရေးဆွေးနွေးပွဲတွေပြုလုပ်ဖို့ ထောက်ပံ့ကူညီသင့်ကြောင်း၊ စစ်ပြေငြိမ်းရေးရရှိဖို့ နှစ်ဦးနှစ်ဘက်စလုံးဆွေးနွေးပြောကြားကြဖို့ တိုက်တွန်းသင့်ကြောင်း 'ရှီ'ကအလေးထားပြောဆိုခဲ့ပါတယ်။

စစ်ဘေးဒုက္ခသည်များအခက်အခဲမဖြစ်စေရေးအတွက် အင်တိုက်အားတိုက်ကျယ်ကျယ်ပြန့်ပြန့်ဆောင်ရွက်ဖို့ နိုင်ငံတကာအဖွဲ့အစည်းတွေကို တောင်းဆိုလိုက်ပြီး ယူကရိန်းကို လူသားချင်းစာနာမှုဖြင့် ထောက်ပံ့ကူညီသွားဖို့ အဆင်သင့်ရှိနေကြောင်း တရုတ်တို့က အသိပေးလိုက်ပါတယ်။

ဒါ့အပြင် အနောက်နိုင်ငံတွေရဲ့ စီးပွားရေးဒဏ်ခတ်ပိတ်ဆို့မှုတွေက ကိုဗစ်ကပ်ရောဂါကြောင့် ပျက်စီးနေပြီးသားဖြစ်နေတဲ့ ကမ္ဘာ့စီးပွားရေးကို ထပ်မံနှောင့်နှေးစေမှာဖြစ်ကြောင်း ရှုတ်ချလိုက်ပါတယ်။

"ဒီလိုတွေလုပ်နေလို့ ဘယ်သူမှအကျိုးအမြတ်ရှိမှာမဟုတ်ပါဘူး။ ဘက်စုံပူးပေါင်းဆောင်ရွက်ရေးနဲ့ ကမ္ဘာ့လုံခြုံရေးတည်တံ့ခိုင်မြဲဖို့ အတွက် တက်တက်ကြွကြွထောက်ပံ့ဆောင်ရွက်ပေးကြဖို့ လိုအပ်ပါတယ်" လို့ ဖော်ပြထားပါတယ်။
Source: CNN

#WorldHealth
Published 09 March 2022

ကိုဗစ်ရောဂါကို ကုသကာကွယ်နိုင်မယ့် ပဋိပစ္စည်း(antibody)ကုသနည်းကို တီထွင်ထုတ်လုပ်လိုက်ပြီဖြစ်ကြောင်း တရုတ်သိပ္ပံပညာရှင်များပြောကြားခဲ့ပြီး တိရိစ္ဆာန်တွေနဲ့စမ်းသပ်ရာမှာ ထိရောက်မှုရှိခဲ့ကြောင်း တွေ့ရှိခဲ့ကြပါတယ်။

ဒီသုတေသနအဖွဲ့မှာ တရုတ်သိပ္ပံပညာအကယ်ဒမီ၊ မြို့တော်ဆေးဘက်ဆိုင်ရာတက္ကသိုလ်၊ တရုတ်ရောဂါထိန်းချုပ်ရေးစင်တာတို့မှ အဖွဲ့အစည်းများပါဝင်ပြီး Nature Immunology ဂျာနယ်မှာ အင်္ဂါနေ့က ဖော်ပြခဲ့ကြပါတယ်။

ဒီကုသနည်းက SARS-CoV-2 မျိုးဗီဇကွဲအများစုကို ချေဖျက်နိုင်တဲ့စွမ်းရည်ရှိကာ အထူးသဖြင့်ဒယ်လ်တာမျိုးဗီဇကွဲအား ချေဖျက်နိုင်တဲ့စွမ်းရည်ပိုအားကောင်းကြောင်း ပြောဆိုခဲ့ပါတယ်။

ကိုဗစ်ရောဂါမှပြန်လည်သက်သာလာတဲ့ လူနာထံမှ ပဋိပစ္စည်း(antibody)အစုံလိုက်ကိုရယူကာ ပေါင်းစပ်ထုတ်လုပ်ထားတာဖြစ်ပါတယ်။

အဆိုပါပဋိပစ္စည်းတွေက ကိုရိုနာဗိုင်းရပ်စ်ကို လူသားဆဲလ်တွေနဲ့မပေါင်းစပ်နိုင်အောင် တားဆီးလိုက်တာကြောင့် ဗိုင်းရပ်စ်မဝင်ရောက်နိုင်တဲ့အပြင် ဗိုင်းရပ်စ်မပွားနိုင်တော့ပါဘူး။

ကင်ဆာရောဂါ၊ ရောင်ရမ်းခြင်းလက္ခဏာတွေနဲ့ ဗိုင်းရပ်စ်ကူးစက်ခြင်းရောဂါတွေ ကုသတဲ့နေရာမှာ အသုံးပြုသလိုမျိုး အန်တီဂျင်ပေါင်းစည်းရာနေရာနှစ်ခုကို မော်လီကျူးတစ်ခုတည်းဖြင့် တားဆီးလိုက်တဲ့ပုံစံမျိုးဖြစ်ပါတယ်။

စမ်းသပ်ချက်တွေပြုလုပ်ရာမှာတော့ ကြွက်တွေနဲ့မျောက်တွေမှာ ရောဂါကူးစက်မှုကို ထိရောက်စွာကာကွယ်နိုင်ပြီး လည်ချောင်းနဲ့နှာခေါင်းတို့ဖတ်စစ်ဆေးရာမှာ ဗိုင်းရပ်စ်ပမာဏအနည်းငယ်သာရှိကြောင်း တွေ့ရှိခဲ့ကြပါတယ်။

အခြားပဋိပစ္စည်းတစ်မျိုးတည်းဖြင့်ကုသနည်း သို့မဟုတ် ပဋိပစ္စည်းရောစပ်ထုတ်လုပ်ခြင်းတွေနဲ့ နှိုင်းယှဉ်ပါက ဗိုင်းရပ်စ်သန္ဓေပြောင်းလဲပြီး ခုခံအားရှောင်ရှားခြင်းမျိုး အဖြစ်နည်းသွားမှာဖြစ်ကြောင်း ဆိုပါတယ်။

ဒီကုသနည်းရဲ့ထိရောက်မှုကိုသိရှိဖို့ လူသားတွေနဲ့စမ်းသပ်မှုပြုလုပ်သင့်ကြောင်း အင်္ဂလန် လက်စ်တာတက္ကသိုလ်မှ ဗိုင်းရပ်စ်ရောဂါပညာရှင်'ဂျူလီယန်တန်'က ပြောကြားခဲ့ပါတယ်။

ကမ္ဘာတဝန်းက သိပ္ပံပညာရှင်တွေက ပဋိပစ္စည်းကုသနည်းတွေ စမ်းသပ်ထုတ်လုပ်နေကြပါတယ်။
ဒါပေမဲ့ ပဋိပစ္စည်းတစ်မျိုးတည်းဖြင့် ထုတ်လုပ်ခြင်းက ဗိုင်းရပ်စ်ဆင့်ကဲပြောင်းလဲတဲ့အခါ အသုံးမဝင်တာမျိုးဖြစ်သွားတတ်ပါတယ်။

Source: South China Morning Post.
#Yangon_Media_Group

#LocalNews
Published -9 Mar 2022
မန္တလေးမြို့ပြည်ကြီးတံခွန်မြို့နယ်တွင် ငွေကျပ် ၁ ဒသမ ၈ ဘီလီယံကျော်တန်ဖိုးရှိ မူးယစ်ဆေးဝါးများ ဖမ်းဆီးရမိခဲ့တယ်လို့ သိရပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မတ်လ ၆ ရက်နေ့ မွန်းလွဲ ၁၂ ခွဲအချိန် သတင်းအရ ပြည်ကြီးတံခွန်မြို့နယ်၊ ၆၁ လမ်းနှင့် ၆၂ ကြား၊ ၁၃၄ လမ်းတွင် တင်ဝင်း(၅၅)နှစ် မောင်းနှင် သည့် NISSAN ၁၂ ဘီး မော်တော်ယာဉ်အား စောင့်ကြည့်နေစဉ် အိုက်စံ(ခ)၀င်းဆိုင်(ခ)အားရှန်(၃၃)နှစ် နှင့် ရော်ကျိန်းရန်(ခ)အားခွိက်(၃၂)နှစ်တို့ မော်တော်ဆိုင်ကယ်ဖြင့် ထပ်မံရောက်ရှိလာသဖြင့် ၎င်းတို့အား ထိန်းသိမ်းပြီး ၁၂ ဘီးမော်တော်ယာဉ်အား ရှာဖွေခဲ့ရာ မော်တော်ယာဉ်အတွင်းမှ ဒေသကာလတန်ဖိုးငွေကျပ် ၁ ဒသမ ၈ ဘီလီယံကျော် တန်ဖိုးရှိ စိတ်ကြွရူးသွပ်ဆေးပြား ၁၀ ဒသမ ၃ သိန်း၊ ဘိန်းဖြူ ၆ ဒသမ ၆ ကီလို နှင့် ဘိန်းဆီခဲ ၆၂ ဒသမ ၄ ကီလို သိမ်းဆည်းရမိခဲ့ကြောင်း စစ်ဆေးဖော်ထုတ်ချက်များအရ သိမ်းဆည်းရမိခဲ့တယ်လို့ သိရပါတယ်။

မူးယစ်ဆေးဝါးများအား ရှမ်းပြည်နယ် (မြောက်ပိုင်း)မှ မန္တလေးတိုင်းဒေသကြီးသို့ သယ်ဆောင်ခြင်းဖြစ်ပြီး အိုက်စံ(ခ)၀င်းဆိုင်(ခ)အားရှန် နှင့် ရော်ကျိန်းရန် (ခ)အားခွိက် တိုသည် မန္တလေးတွင် လက်ခံသူများဖြစ်ကြောင်း သိရှိရသဖြင့် ၎င်းတို့အား မူးယစ်ဆေးဝါးနှင့် စိတ်ကို ပြောင်းလဲစေသောဆေးဝါးများဆိုင်ရာဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက် စစ်ဆေးဖော်ထုတ်လျက်ရှိတယ်လို့သိရပါတယ်။

ymg/hm
#Yangon_Media_Group

#WorldHealth
Published 09 March 2022

‌ပြီးခဲ့တဲ့ ၂ နှစ်အတွင်း တိုင်းပြည်ဝင်ခွင့်ပိတ်ပင်ခြင်းတွေ၊ သီးသန့်ခွဲနေထိုင်ခြင်းတွေ၊ စီးပွားရေးအခြေအနေဖိအားတိုးလာခြင်းတွေ၊ စိုးရိမ်ပူပန်ရခြင်းတွေနဲ့ ရှေ့ရေးမသေချာမရေရာခြင်းတွေ ကြုံတွေ့ခဲ့ရတာကြောင့် လူတိုင်းရဲ့ဘဝကို အပြောင်းအလဲဖြစ်စေခဲ့ပါတယ်။

ပြီးခဲ့တဲ့ကာလများအတွင်း လူအများစုဟာ သွားလာလှုပ်ရှားမှုနည်းပါးပြီး အစားပိုစားဖြစ်ခဲ့ကြပါတယ်။

ကိုဗစ်ကပ်ရောဂါကြောင့် ကလေးတွေနဲ့ လူငယ်လူလတ်တွေကြား အဝလွန်ရောဂါအဖြစ်များလာကြောင်း အများအပြားရေးသားဖော်ပြခဲ့ကြပါတယ်။

ကိုယ်အလေးချိန်ဘယ်လောက်အထိ မြင့်တက်လာလဲ၊ ဘယ်အရာတွေကြောင့် မြင့်တက်လာရလဲဆိုတာ အခုတော့ရှင်းလင်းသိရှိလာရပြီဖြစ်ပါတယ်။

ကပ်ရောဂါမတိုင်ခင်ကာလ၊ ကပ်ရောဂါဖြစ်ပွားနေတဲ့ကာလနဲ့ ကပ်ရောဂါအပြီးကာလတွေမှာ အမေရိကန်မှလူပေါင်း ၁ သိန်းခွဲကို ကျန်းမာရေးအခြေအနေဆန်းစစ်မှုများပြုလုပ်ကာ လေ့လာခဲ့ကြပါတယ်။

၂၀၂၀ မတ်လကစပြီး ကမ္ဘာတဝန်းကလူတွေမှာ ပျမ်းမျှခြင်းအားဖြင့် ကိုယ်အလေးချိန် ၁၂ ကီလိုဂရမ်တက်လာခဲ့ကြောင်း ဟားဗတ်က ဖော်ပြခဲ့ပါတယ်။

စမ်းသပ်ခံသူ ၃၉ ရာခိုင်နှုန်းက ၁ ကီလိုဂရမ်နဲ့အထက်၊ လူပေါင်း ၂၅ ရာခိုင်နှုန်းက ၅ ကီလိုဂရမ်၊ ၁၀ ရာခိုင်နှုန်းက ၅ ကီလိုဂရမ်နဲ့အထက်၊ ၂ ရာခိုင်နှုန်းက ၁၂ ကီလိုဂရမ်နဲ့အထက် ကိုယ်အလေးချိန်မြင့်တက်လာခဲ့ပါတယ်။

ကိုယ်အလေးချိန်တက်လာချင်တဲ့သူတွေပဲ ဝိတ်တက်လာတာမဟုတ်ဘဲ လူဦးရေအတော်များများမှာပါ ကိုယ်အလေးချိန်တက်လာခဲ့တာဖြစ်ပါတယ်။

အဝလွန်ခြင်းဖြစ်လာရတဲ့အဓိကအကြောင်းအရင်းတွေထဲမှာ စိတ်ဖိစီးမှုအပါအဝင်ဖြစ်ပြီး ဦးနှောက်ထဲမှာ ကော်တီစောလ်ဟော်မုန်းထွက်လာစေပါတယ်။

ကော်တီစောလ်ဟော်မုန်းကြောင့် ကာဗိုဟိုက်ဒရိတ်၊ သကြားဓာတ်၊ အဆီဓာတ်၊ ဆားဓာတ်တို ပိုမိုစုဝေးလာစေပါတယ်။

ဒီအချက်တွေအပြင် လှုပ်ရှားလေ့ကျင့်မှုပြုလုပ်ခြင်းနည်းပါးသွားတဲ့အခါ ကိုယ်အလေးချိန်မြင့်တက်လာစေတာပဲဖြစ်ပါတယ်။

ဒီလိုကိုယ်အလေးချိန်တက်လာခြင်းက နှလုံးရောဂါနဲ့ ကြွက်သားထိခိုက်ခြင်းတို့ဖြစ်လာနိုင်စေတဲ့ ဆီးချိုရောဂါဒုတိယအမျိုးအစားဖြစ်လာဖို့ အခွင့်အလမ်းများနေပါတယ်။

အဝလွန်ခြင်းက ရောဂါလက္ခဏာအမျိုးမျိုးဖြစ်ပေါ်လာစေတဲ့ အကြောင်းအရင်းတစ်ခုဖြစ်ကြောင်း တဲလ်အဗစ်မြို့ အဝလွန်ရောဂါကုသရေးစင်တာမှ ညွှန်ကြားရေးမှူး ဒေါက်တာ'ရှိင်းအယ်လ်ဒါ'က ရှင်းပြပါတယ်။

"ဒီရောဂါဟာ ဇီဝကမ္မမျိုးရိုးလိုက်ခြင်းမျိုးဖြစ်ပါတယ်။ အစားအသောက် နေထိုင်မှုပုံစံများဖြင့် ထိန်းချုပ်လိုရပေမယ့် ဝိတ်ချဖို့ကြိုးစားပြီးနောက် အရင်လိုပြန်ဝလာတတ်တဲ့အပြင် အရင်ကထက် နှစ်ဆလောက်ပိုဝလာတာမျိုးလည်း ရှိတတ်ပါတယ်" လို့ ပြောပြသွားပါတယ်။
ဒီအတွက် ကိုယ်အလေးချိန်လျော့ကျစေရန်ခွဲစိတ်မှုလိုမျိုးအပြင် အခြားကုသနည်းများများစားစားရှိမနေပါဘူး။

အသက်အန္တရာယ်ကိုပါထိခိုက်လာစေတဲ့ အဝလွန်ရောဂါမျိုးမှာ အခြားကုသနည်းတွေနဲ့မကုသနိုင်ရင်တော့ ဒီလိုခွဲစိတ်မှုမျိုးတွေ ပြုလုပ်နိုင်ပါတယ်။

Source: The Jerusalem Post.
#Yangon_Media_Group

#LocalNews
Published - 8 March 2022

မြန်မာနိုင်ငံဆန်စပါးအသင်းချုပ်အနေနဲ့ စပါးခွံနဲ့ ဖွဲနုတို့ကနေ တန်းဖိုးမြှင့် ထွက်ကုန်လုပ်ငန်းတွေမှာ ရင်းနှီးမြှုပ်နှံလိုသူတွေ ကာလလတ်၊ နှစ်ရှည်ချေးငွေတွေရရှိအောင် ဆောင်ရွက်ပေးသွားမယ်လို့ ထုတ်ပြန်ထားပါတယ်။

ဒ့ါအပြင် ပြည်တွင်းကုန်ထုတ်လုပ်မှု၊ အလုပ်အကိုင်ဖန်တီးပေးနိုင်မှု၊ နည်းပညာတိုးတက်ရရှိနိုင်မှုနဲ့ စီးပွားရေးအရ အကျိုးအမြတ်ရရှိမှုတို့ကို ဖော်ဆောင်ပေးနိုင်မှာဖြစ်ပြီး ချေးငွေရရှိရေးနဲ့ ခေတ်မီနည်းပိုင်းဆိုင်ရာတို့မှာ နိုင်ငံတကာအဖွဲ့အစည်းတွေ ဖွံ့ဖြိုးရေးမိတ်ဖက်တွေနဲ့ ပူးပေါင်းဆောင်ရွက်နိုင်ဖို့ အသင်းချုပ်က ချိတ်ဆက်ဆောင်ရွက်ပေးသွားမယ်လို့ သိရပါတယ်။

စပါးခွံမှ လျှပ်စစ်ထုတ်တဲ့ ပြန်လည်ပြည့်ဖြိုးမြဲ လျှပ်စစ်စွမ်းအင်ထုတ်စက်ရုံ၊ ဖွဲနုမှ ဆီကြမ်းထုတ်လုပ်ရေးစက်ရုံ၊ ဖွဲနုဆီသန့်စင်စက်ရုံတို့ကို အကောင်အထည်ဖော်ဆောင်ရွက်သွားမှာဖြစ်တဲ့အတွက် အသင်းဝင်ကုမ္ပဏီတွေ၊ ဆန်စက်များလုပ်ငန်းရှင်တွေအနေနဲ့ တစ်ဖွဲ့တည်းဖြစ်စေ၊ စုပေါင်းပြီးဖြစ်စေ ရင်းနှီးမြှုပ်နှံနိုင်တယ်လို့ သိရပါတယ်။

အဆိုပါ ရင်းနှီးမြှုပ်နှံလိုတဲ့သူတွေအနေနဲ့ မြန်မာနိုင်ငံဆန်စပါးအသင်းချုပ် စပါးခွံနဲ့ ဖွဲနုတို့မှ သုတေသနနှင့် ဖွံဖြိုးရေးကော်မတီကို ဆက်သွယ်ဆောင်ရွက်နိုင်ကြောင်း သတင်းထုတ်ပြန်ထားပါတယ်။

စပါးခွံမှ လျှပ်စစ်ထုတ်လုပ်တဲ့လုပ်ငန်းကို မြန်မာနိုင်ငံမှာ ရှေးပြေးစီမံကိန်းအဖြစ် ကျိုက်လတ်နဲ့ မြောင်းမြ မြို့နယ်တို့မှာလည်းကောင်း ဖွဲနုဆီ ထုတ်လုပ်နိုင်ရေးအတွက်လည်း အသင်းချုပ်ဦးဆောင် ဖွဲ့စည်းထားတဲ့ အများပိုင်ကုမ္ပဏီလီမိတက် (MAPCO) အနေနဲ့ ဆောင်ရွက်နေတာရှိတယ်လို့ သိရပါတယ်။

ymg/ei
#Yangon_Media_Group

#LocalNews
Published - 8 March 2022

ပဲခူးတိုင်းနှင့် ဧရာဝတီတိုင်းတို့မှာ ပန်းခင်းစီမံချက်အရ မှတ်ပုံတင်လုပ်ရာမှာ တိုင်းလုံးကျွတ် လျာထားချက် ရာနှုန်းပြည့်ပြီးစီးခဲ့တယ်လို့ ဝန်ကြီးဦးခင်ရီက ဆိုပါတယ်။

ဒါ့အပြင် နေပြည်တော်အတွင်း ၆၂,၃၉၁ ဦးကို နိုင်ငံသားဆိုင်ရာ ကိုင်ဆောင်ကတ်ပြားတစ်မျိုးမျိုးထုတ်ပေးရေးမှာ လျာထားချက် ရာနှုန်းပြည့်ထက် ကျော်လွန်ပြီးမြောက်အောင်မြင်သွားတယ်လို့ နေပြည်တော်မှာကျင်းပတဲ့ ပန်းခင်းစီမံချက်လျာထားချက် ရာနှုန်းပြည့်ပြီးမြောက်အောင်မြင်ပွဲအခမ်းအနားမှာ အခုလို ထည့်သွင်းပြောဆိုခဲ့တာ ဖြစ်ပါတယ်။

လာမယ့်ရွေးကောက်ပွဲမှာ မဲပေးပိုင်ခွင့်ရှိသူတိုင်း နိုင်ငံသားဆိုင်ရာ ကိုင်ဆောင်ကတ်ပြားတစ်မျိုးမျိုး ကိုင်ဆောင်မဲပေးနိုင်ရေးအတွက် ပန်းခင်းစီမံချက်ကို လုပ်ဆောင်ခဲ့တာလို့လည်း ဆိုပါတယ်။

ပန်းခင်းစီမံချက်ဟာ ၂၀၂၁ ခုနှစ် မေ ၃ ရက်မှ ၂၀၂၂ ခုနှစ် နိုဝင်ဘာ ၃ ရက်အထိ ၁၈ လကြာ ဆောင်ရွက်ရမယ့် စီမံချက်တစ်ခုဖြစ်ပါတယ်။

၂၀၂၀ ပြည့်နှစ် ရွေးကောက်ပွဲကာလတုန်းက နိုင်ငံသားစိစစ်ရေးကတ်ပြားမရှိဘဲ မဲပေးခဲ့သူ ၄ ဒဿမ ၆ သန်းကျော်ရှိတယ်လို့ ဖော်ပြထားပါတယ်။

နေပြည်တော်အတွင်း ကျေးရွာပေါင်း ၇၉၆ ရွာရှိ နိုင်ငံသားစိစစ်ရေးကတ်ပြား ၆၂,၃၉၁ ကတ်ထုတ်ပေးဖို့ လျာထားခဲ့ရာ ယခုအခါ ၆၇,၁၆၇ ကတ် ထုတ်ပေးပြီးစီးနေပြီဖြစ်ပြီး ရာခိုင်နှုန်းအားဖြင့် ၁၀၇ ဒဿမ ၆၅ ရာခိုင်နှုန်း ပြီးစီးဖြစ်တဲ့အတွက် လျာထားချက် ရာနှုန်းပြည့်ပြီးမြောက် ကျော်လွန်ခဲ့တယ်လို့ သိရပါတယ်။

ymg/ei
#Yangon_Media_Group

Published 8 March 2022

အမေရိကန်ကာကွယ်ရေးဝန်ကြီးဌာနရဲ့ အမိန့်နှင့် ယူကရိန်းရဲ့ပိုင်နက်အတွင်းမှာ ဇီဝဂဓာတ်ခွဲခန်း(၃၀)ကျော်ပါတဲ့ ကွန်ယက်တစ်ခု တည်ဆောက်ထားတယ်လို့ ရုရှားဗိုလ်ချူပ်ကြီးတစ်ဦးက မတ်(၇)ရက်နေ့ကအခိုင်အမာ ပြောကြားလိုက်ပါတယ်။

ရုရှားစစ်တပ်ရဲ့ ဇီဝနှင့်ဓာတုကာကွယ်ရေးတပ်များ တပ်မှူး ဒုတိယဗိုလ်ချူပ်ကြီး အီဂေါကီရီလော့ဗ်က သတင်းစာရှင်းလင်းပွဲပြုလုပ်ရာမှာ ဒီဓာတ်ခွဲခန်းတွေဟာ ဆီ‌လျော်မှုရှိတဲ့ ဇီဝလက်နက်သုတေသနလုပ်ငန်းတွေကို နယ်ပယ်(၃)ခုနှင့်လုပ်ဆောင်နေကြတာလို့ သူကဆက်ပြောပါတယ်။

ယူကရိန်းမှာ အနောက်နိုင်ငံတွေဟာ ဇီဝနှင့်ကူးစက်ရောဂါဆိုင်ရာ စမ်းသပ်မှုစီမံကိန်းမျိုးစုံကို လုပ်ဆောင်ခဲ့ကြပြီး ဒေါ်လာသန်း၂၀၀ကျော်ရင်းနှီးမြှဲပ်နှံထားခဲ့ကြတယ်လို့ သူကပြောပါတယ်။

ယူကရိန်းကျန်းမာရေးဝန်ကြီးဌာနက ဓာတ်ခွဲခန်းတွေထဲက ဇီဝဓာတ်စမ်းပစ္စည်းတွေကို အပြီးဖျက်စီးပစ်ဖို့ အမိန့်ပေးခဲ့တယ်ဆိုတာကို ရုရှားတပ်တွေ သိမ်းဆည်းမိခဲ့တဲ့ ဖိုင်တွေမှာ ပြသနေတယ်လို့ သူကပြောပါတယ်။ ကွန်တိန်နာ ၃၂၀ကျော် ဖျက်ဆီးပစ်ခဲ့ကြပြီးဖြစ်တယ်လို့လည်းဆိုပါတယ်။

Source CMG/MOD Russia

#WorldTransportation
Published 08 March 2022

ကိုဗစ်ကပ်ရောဂါကြောင့် တစ်ကမ္ဘာလုံးရဲ့စီးပွားရေးအခြေအနေ အတက်အကျဖြစ်နေပေမယ့် ဂျာမနီနိုင်ငံ ဒု(စ်)ဘာ့ဂ်မြို့ရှိ တရုတ်-ဥရောပကုန်စည်ပို့ဆောင်ရေးရထားလမ်းကြောင်းလုပ်ငန်းကတော့ အခက်အခဲတွေကိုကျော်လွှားကာ အရှိန်ရနေပြီဖြစ်ပြီး တရုတ်-ဥရောပရပ်ဝန်းလမ်းကြောင်းစီမံကိန်းအတွက် အဓိကမောင်းနှင်အားဖြစ်လာခဲ့ပါပြီ။

#Yangon_Media_Group

#Local_News
Published_ 8 March 2022

ဒီကနေ့ မတ်လ ၈ ရက်တွင် မြန်မာအပြည်ပြည်ဆိုင်ရာလေကြောင်းလိုင်း(MAI)က (၉၉) ကြိမ်မြောက် ကယ်ဆယ်ရေးလေယာဉ်ဖြင့် ဆိုးလ်မြို့မှ ရန်ကုန်မြို့သို့ ပျံသန်းပြေးဆွဲ ပေးခဲ့ကြောင်း သိရပါတယ်။

ကိုဗစ်-၁၉ ကူးစက်ရောဂါဖြစ်ပွားနေတဲ့ကာလအတွင်း မြန်မာနိုင်ငံသို့ ပြန်လည် ထွက်ခွာ/သွားရောက်နိုင်ရေးအတွက် မြန်မာသံရုံး၊ ဆိုးလ်မြို့မှ တစ်ပတ်လျှင်တစ်ကြိမ် ကယ်ဆယ်ရေး လေယာဉ် ပျံသန်းပြေးဆွဲနိုင်ရေး စီစဉ်ပေးလျက်ရှိကြောင်း သိရပါတယ်။

အဆိုပါလေယာဉ်ဟာ အင်ချွန်း အပြည်ပြည်ဆိုင်ရာလေဆိပ်မှ ရန်ကုန်အပြည်ပြည်ဆိုင်ရာလေဆိပ်သို့ ဒေသစံတော်ချိန် ညနေ ၄ နာရီခွဲတွင် ထွက်ခွာခဲ့ပြီး၊ ဘရာဇီးမှ (၃) ဦး၊ ကနေဒါမှ (၁) ဦး၊ အမေရိကန်ပြည်ထောင်မှ (၁၂) ဦး၊ ကိုရီးယားသမ္မတနိုင်ငံမှ မြန်မာ နိုင်ငံသား (၃၆) ဦး၊ စုစုပေါင်း (၅၂) ဦးတို့ လိုက်ပါသွားကြောင်း သိရပါတယ်။

လိုက်ပါသည့်ခရီးသည်များ လေဆိပ်၌ အခက်အခဲ မရှိစေရေးအတွက် မြန်မာသံရုံး၊ ဆိုးလ်မြို့မှ သံရုံးဝန်ထမ်းများသည် လေဆိပ်သို့သွားရောက်၍ လိုအပ်သည်များ ကူညီဆောင်ရွက်ပေးခဲ့ကြကြောင်း သိရပါတယ်။

ymg_mnn
#Yangon_Media_Group

Published 8 March 2022

သီရိလင်္ကာရဲ့ အထွတ်အမြတ် အထားဆုံး ဆင်ကြီးဟာ မတ်လ(၇)ရက်နေ့ အသက်၆၈နှစ်အရွယ်မှာ သေဆုံးသွားရှာပါတယ်။ အဲဒီဆင်ကြီးကွယ်လွန်သွားတဲ့အတွက် နိုင်ငံမှာ ပူဆွေးသောကတွေဖြစ်ကြပြီး သမ္မတက ဆင်ကြီးရဲ့ ရုပ်အလောင်းကို ရုပ်လုံးသွင်းပြီး နောက်လာနောက်သားတွေအတွက် ပြသရန်ထားရှိဖို့ အမိန့်ထုတ်ခဲ့ပါတယ်။

နဒွန်ဂါမူဝါ ရာဂျာလို့ အမည်ပေးထားတဲ့ အဲဒီဆင်ကြီးဟာ ဗုဒ္ဓရဲ့ မြတ်စွယ်တော်ပူဇော်ထားရှိတဲ့ရွှေကြုတ်ကို သူ့တို့ရဲ့ကျောကုန်းပေါ် တင်ပြီး တစ်နှစ်တစ်ကြိမ် ပင့်ဆောင်လှည့်လည်အပူဇော်ခံရမှာ အသုံးပြုတဲ့ ဆင်၁၀၀ထဲမှာ အရေးအပါဆုံး ဆင်ကြီးဖြစ်ပါတယ်။

တနင်္လာနေ့မှာ ကျောင်းသူကျောင်းသားတွေ၊ ဘုန်းတော်ကြီးတွေ၊အဖွားအိုတွေဟာ ဆင်ကြီးရာဂျာကို လာရောက်ပြီး အလေးအမြတ်ပြုကြပါတယ်။ ဆင်ကြီးရဲ့ ကြီးမားတဲ့ အစွယ်တွေကို ထိတွေ့ပြီး ဆုတောင်းပေးကြပါတယ်။

Source AFP

#LocalNews
Published - 8 March 2022

အိုမီခရွန်ရောဂါပိုးစတင်တွေ့ရှိခဲ့တဲ့ အိန္ဒိယ-မြန်မာ နယ်စပ်မြို့တစ်မြို့ဖြစ်တဲ့ တမူးမြို့မှာ အိုမီခရွန်ရောဂါပိုးရှိသူ ကင်းစင်သွားပြီဖြစ်တဲ့ အတွက် တမူးမြို့ရှိ ကိုဗစ်ကုသရေးစင်တာများကို ပိတ်သိမ်းလိုက်ပြီဖြစ်တယ်လို့ သိပါတယ်။

#Yangon_Media_Group

#LocalPolitics
Published - 2 Mar 2022

ပြည်ထောင်စုငြိမ်းချမ်းရေး ဆွေးနွေးမှုပူးတွဲကော်မတီ (UPDJC) ရဲ့ နိုင်ငံရေးပါတီများအစုအဖွဲ့သစ်နဲ့ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ - NSPNC တို့ ယခုလ ၆ ရက်နေ့မှာ တွေ့ဆုံမှုပြုလုပ်ခဲ့ပါတယ်။

#Yangon_Media_Group