#LocalNews

Published_29 March 2022

ကလေးမြို့ မှစာမေးပွဲမေးခွန်းများ သယ်လာသောတပ်မတော်ရဟတ်ယာဉ်တစ်စင်း ဟားခါးလေယာဉ်ကွင်းသို့ ဆင်းသက်စဉ် မတော်တဆမှု ဖြစ်ပွားခဲ့ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက ပြောသည်။

ယနေ့ မတ်လ ၂၉ ရက် နံနက် ၉ နာရီ ကျော်အချိန်က ဖြစ်ပွားခဲ့သော အဆိုပါ မတော်တဆမှုတွင် သေဆုံးသူမရှိခဲ့သော်လည်း တပ်မတော်မှ နှစ်ဦးနှင့် အရပ်ဘက်ပညာရေးဝန်ထမ်း သုံးဦး ထိခိုက်ဒဏ်ရာ အနည်းငယ်စီ ရရှိခဲ့ကြကြောင်း သိရသည်။

"လမ်းပန်းဆက်သွယ်ရေးခက်ခဲတဲ့ နေရာဆိုတော့ စာမေးပွဲမေးခွန်းတွေကို တပ်မတော်ရဟတ်ယာဉ်သုံးပြီးပိုရတာရှိတယ်။ ဒီနေ့မနက် ၈ နာရီ မိနစ် ၅ဝ လောက်တုန်းက ဒီရဟတ်ယာဉ်က စာမေးပွဲ မေးခွန်းတွေထုတ်တော့ ကလေးကနေဟားခါးမှာရှိတဲ့ ရဟတ်ယာဉ်ကွင်းကိုသွားတယ်။ ၉ နာရီ ၂ဝ မိနစ်လောက်မှာ ဟားခါးကိုရောက်တယ်။ တောင်ပေါ်ဖြစ်တဲ့အတွက်ကြောင့် အောက်က လေပင့်အားနဲ့ မိသွားတဲ့အတွက် ရဟတ်ယာဉ်ကွင်းနဲ့ မီတာ ၁ဝဝ လောက်ကွာတဲ့ တောင်စောင်းပေါ်မှာပြုတ်ကျတယ်။ ရဟတ်ယာဉ်အမြီးကျိုးသွားတယ်။နည်းနည်းတော့လန်သွားခဲ့တယ်" ဟုယင်းကပြောသည်။

ymg/mt
Yangon_Media_Group

#LocalNews
Published - 29 March 2022
အိန္ဒိယ - မြန်မာနယ်စပ်မြို့တစ်မြို့ ဖြစ်တဲ့ တမူးမြို့တွင် ရာအိမ်မှူးတစ်ဦး လက်နက်ကိုင်အဖွဲ့တစ်ခု၏ လုပ်ကြံသတ်ဖြတ်ခြင်းကိုခံခဲ့ရတယ်လို့ သိရပါတယ်။

အဆိုပါ ဖြစ်စဉ်ဟာ မတ်လ ၂၈ ရက်၊ နံနက် ၃ နာရီ အချိန်ကဖြစ်ပွားခဲ့ခြင်းဖြစ်ပြီး လက်နက်ကိုင်အဖွဲ့ က အင်အားအများအပြားနဲ့ ရာအိမ်မှူး နေထိုင်ရာ နေအိမ်သို့ လာ ရောက်ဝိုင်းခဲ့ပြီး နောက် သေနတ်နဲ့ပစ်ခတ်ကာ သတ်ဖြတ်သွားခဲ့ခြင်းဖြစ်တယ်လို့ ဆိုပါတယ်။

"ပြောရမယ်ဆိုရင် မြို့ရှောင်လမ်း ဟိုဘက်နဲ့ ဒီဘက်ပေါ့၊ရာအိမ်မှူးနေတဲ့ အိမ်နဲ့ အိန္ဒိယနယ်စပ်နဲ့က ကပ်နေတာပေါ့။ ဘာလုံခြုံရေးမရှိဘူး၊ ဖြစ်တာက နံနက် ၃ နာရီ လောက်မှာဖြစ်တယ်လို့ သိရတယ်။ သူတို့က အိမ်ကိုဝိုင်းပြီးလုပ်သွားတာပေါ့၊ သတ်ပြီးတော့မှ အ လောင်းကို ပြန်လာထားတယ်။ အရင်တုန်းကလည်း သူ့အိမ်ကို မီးလာရှို့ဖူးတယ်။ အိမ်လည်း နှစ်ခါအဝိုင်းခံရဘူးတယ်။ ပထမတစ်ခါက သူကရှောင်နေတယ်၊ ဒီတစ်ခေါက်ကျ သူ့အိမ်မှာ အိပ်နေတဲ့အချိန် မနက် ၃ နာရီ လောက်ကြီး ဖြစ်သွားတာပါ။"လို့ တမူးမြို့ ဒေသခံ
တစ်ဦးကပြောပြခဲ့ပါတယ်။

အဆိုပါ တမူးမြို့ တွင် ရပ်/ ကျေးအဆင့် ရာအိမ်မှူး တွေ လုပ်ကြံသတ်ဖြတ်ခြင်းခံရသည်မှာ ယခုအကြိမ်နဲ့ဆိုပါက လူဦး ရေအားဖြင့် (၂၀)ခန့်ရှိနေပြီဖြစ်တယ်လို့ သိရပါတယ်။

"အခုဆိုကျနော်သိရသလောက်ဆို ၂၀ လောက်ရှိနေပြီ၊အသတ်ခံရတာပြောရရင် ဘုရားစာရွတ်ပြီး နေနေရတာ ပေါ့။ အကုန်လုံးကလည်း ကြောက်နေကြပြီ၊ လုံခြုံ ရေးအရ အကာအကွယ်လည်းမပေးနိုင်ဘူး လေ၊ တစ်ဖက်အဖွဲ့ တွေက ဝင်ချင်တိုင်းဝင် ထွက်ချင်တိုင်းထွက်ပြီးတော့လုပ်နေကြတာ ပေါ့။ ပြောရရင် အကုန်ကြောက်ကုန်ပြီ လေ။"လို့ ၎င်းက ဆက်လက် ပြောပြခဲ့ပါတယ်။

အဆိုပါ လက်နက်ကိုင်အဖွဲ့ဟာ အိန္ဒိယနယ်ကို အခြေပြု၍ လှုပ်ရှား နေတဲ့ အဖွဲ့တစ်ဖွဲ့ ဖြစ်တယ်လို့လည်း သိရပါတယ်။"သူတို့က ဒီဘက်လာတယ်၊လုပ်တယ် ပြီးရင် အိန္ဒိယ
နယ်ထဲဝင် သွားကြတယ်။ ဒီဘက်မှာက အသတ်ခံရပြီဆိုတော့မှ အ လောင်းလိုက် ကောက် အဲ့လိုဖြစ်နေတယ်။ ထိထိရောက်ရောက် လုံခြုံရေးလေး ပေးနိုင်ရင် ကာကွယ်ပေးနိုင်ရင် တော့ ပိုကောင်းတာ ပေါ့။"လို့ တမူး ဒေသခံတစ်ဦးက YMG ကို ပြောပြခဲ့ပါတယ်။

ymg/kg
#Yangon_Media_Group

#LocalNews
Published - 29 March 2022
မြန်မာဘုန်းတော်ကြီး ကျောင်းများသို့ တရုတ်သံရုံးက ကိုဗစ်ရောဂါကာကွယ်ရေးပစ္စည်းများကို ပေးအပ်လှူဒါန်းခဲ့တယ်လို့ သိရပါတယ်။

လတ်တလောတွင် မြန်မာနိုင်ငံဆိုင်ရာတရုတ်သံရုံးအနေနဲ့ မြန်မာ-တရုတ် ဗုဒ္ဓဘာသာကူးလူးဖလှယ်ရေးအသင်းမှတစ်ဆင့် စမ်းချောင်းမြို့နယ်အတွင်းရှိ ဘုန်းကြီးကျောင်း (၃၃)ကျောင်းသို့ ကပ်ရောဂါကာကွယ်ရေးပစ္စည်းများဖြန့်ဝေလှူဒါန်းခဲ့ပြီး ဗိုလ်တစ်ထောင်မြို့နယ်အတွင်းရှိ ဘုန်ကြီးကျောင်း (၁၆)ကျောင်းသို့ လည်း ကပ်ရောဂါကာကွယ်ရေးပစ္စည်းများဖြန့်ဝေလှူဒါန်းခဲ့ခြင်းဖြစ်တယ်လို့ ဆိုပါတယ်။

ဒါ့အပြင် ကိုဗစ်-၁၉ ကပ်ရောဂါ ဖြစ်ပွားလာ ကတည်းက တရုတ်-မြန်မာ နှစ်နိုင်ငံသည် အပြန်အလှန်ဖေးမကူညီ၍ တစ်လှေတည်းစီး တစ်ခရီးတည်းသွားကာ အားကောင်းပြီး ထိရောက်မှုရှိသည့် ကပ်ရောဂါတိုက်ဖျက်ရေးပူးပေါင်းဆောင်ရွက်မှုများကို စဉ်ဆက်မပြတ် ဖော်ဆောင်ခဲ့ခြင်းဖြစ်တယ်လို့ လည်း မြန်မာနိုင်ငံဆိုင်ရာ တရုတ်သံအမတ်ကြီး Mr. Chen Hai က ပြောကြားထားပါတယ်။

ထို့အပြင် တရုတ်နိုင်ငံအစိုးရအနေနဲ့ မြန်မာနိုင်ငံမြောက်ပိုင်းသို့ နောက်ထပ် ယွမ် ၁၀.၅ သန်း တန်ဖိုးရှိ ကပ်ရောဂါတိုက်ဖျက်ရေးပစ္စည်းများ ထောက်ပံ့ပေးဖို့ရှိနေပြီး မြန်မာနိုင်ငံဆိုင်ရာ တရုတ်သံရုံးနှင့် ယူနန်ပြည်နယ်အစိုးရက မြန်မာနိုင်ငံကို ကာကွယ်ဆေးထိုးအပ် ၃ သန်း အရေးပေါ်လှူဒါန်းရန် ဆောင်ရွက်လျက်ရှိတယ်လို့ မြန်မာနိုင်ငံဆိုင်ရာ တရုတ်သံရုံးက ထုတ်ပြန်ထားပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး

ymg/kg
#Yangon_Media_Group

#WorldHealth
Published - 29 March 2022
အိုမီခရွန်ကူးစက်မှုလွှမ်းမိုးတဲ့ကာလအတွင်း ကိုယ်ဝန်ဆောင်အမျိုးသမီးများမှာ ကိုဗစ်ရောဂါကူးစက်နိုင်ချေ ၈ ဆပိုများပေမယ့် အရင်ကိုဗစ်ကူးစက်မှုလှိုင်းတွေတုန်းက ရောဂါခံစားခဲ့ရတဲ့ကိုယ်ဝန်ဆောင်တွေလောက် ရောဂါဆိုးရွားခြင်းမရှိကြောင်း သုတေသနတစ်ခုမှာတွေ့ရှိခဲ့ကြပါတယ်။

တက္ကဆက်စ်မှဆရာဝန်များက ၂၀၂၀ မေလမှ ၂၀၂၂ ဇန်နဝါရီလအတွင်း ကိုဗစ်ရောဂါကူးစက်ခဲ့တဲ့ ကိုယ်ဝန်ဆောင် ၂,၆၄၁ ဦးကို လေ့လာခဲ့ကြပါတယ်။ လေ့လာမှုကာလအတွင်း အပတ်စဉ်ကလေးမွေးဖွားမှုနှုန်း အတူတူနီးပါးဖြစ်ခဲ့ကာ ရောဂါကူးစက်ထားတဲ့အမျိုးသမီးများမှ အပတ်စဉ်မွေးဖွားသူအရေအတွက်ကတော့ ကပ်ရောဂါအစောပိုင်းကာလမှာ ၁၇ ဦး၊ ဒယ်လ်တာကူးစက်မှုကာလမှာ ၁၄ ဦး၊ အိုမီခရွန်ကူးစက်မှုကာလမှာ ၁၃၈ ဦးအသီးသီးရှိခဲ့ကြောင်း ကြာသပတေးနေ့က JAMA ဂျာနယ်မှာဖော်ပြခဲ့ပါတယ်။

အိုမီခရွန်ကူးစက်မှုကာလအတွင်း ဆေးရုံတက်ကုသခံယူရမှုလိုအပ်ခဲ့တဲ့ ကိုယ်ဝန်ဆောင်တွေက ၁ ရာခိုင်နှုန်းအောက်သာရှိခဲ့ပြီး ဒယ်လ်တာကူးစက်မှုကာလတုန်းကတော့ ၁၂ ရာခိုင်နှုန်းရှိခဲ့တာဖြစ်ပါတယ်။

အိုမီခရွန်ကူးစက်မှုက မြန်ပေမယ့် ရောဂါဆိုးရွားခြင်းသိပ်မဖြစ်တာ ကံကောင်းသွားခဲ့ကြောင်း ဒေါက်တာ'အမ်မလီအက်ဒ်ဟီကာရီ'က ပြောကြားသွားပါတယ်။
Source: Reuters

#WorldPolitics
Published - 29 March 2022
ရုရှားသမ္မတ'ဗလာဒီမီယာပူတင်'အနေနဲ့ ဆက်လက်အာဏာတည်မြဲနေနိုင်မှာမဟုတ်ကြောင်း အမေရိကန်သမ္မတ'ဂျိုးဘိုင်ဒန်'က မိန့်ခွန်းတစ်ခုမှာဒေါသတကြီးပြောဆိုခဲ့ပါတယ်။
သူ့ရဲ့ပြောကြားချက်ကို ပြန်လည်ရုတ်သိမ်းသွားမှာမဟုတ်ကြောင်း တနင်္လာနေ့ကထပ်မံပြောကြားလိုက်ပါတယ်။

"ရှင်းရှင်းလင်းလင်းသိသွားအောင် ပြောပြချင်တာပါ။ ပြောပြီးသားကိုနောက်ဆုတ်သွားမှာမဟုတ်ပါဘူး။ အရင်ကလည်းမလုပ်ခဲ့ဘူး၊ အခုလည်းနောက်မဆုတ်ပါဘူး။ ကျွန်တော်ခံစားနေရတဲ့ဒေါသအလျောက် ပြောလိုက်တာပါ။ ကိုယ့်ခံစားချက်အတွက်နဲ့ ဘယ်သူ့ကိုမှတောင်းပန်သွားမှာမဟုတ်ပါဘူး" လို့ အိမ်ဖြူတော်မှာ သတင်းထောက်တွေကိုပြောကြားသွားပါတယ်။

'ဘိုင်ဒန်'ကအဆိုပါမိန့်ခွန်းကို စနေနေ့က ဝါဆောမြို့ရှိ ၃ ရက်မြောက်သံတမန်ရေးရာဆွေးနွေးပွဲအဆုံးသတ်မှာ မှတ်ချက်ပြုပြောကြားခဲ့တာဖြစ်ပါတယ်။

စစ်ရေးပဋိပက္ခဖြစ်ပွားနေချိန်မှာ သမ္မတရဲ့လက်တန်းပြောကြားချက်က အမှားဖြစ်လာနိုင်တဲ့အပေါ် ရီပတ်ဘလစ်ကန်တွေနဲ့ ပြင်ပသုံးသပ်သူအချိုက စိုးရိမ်ပူပန်နေကြပါတယ်။

"ယူကရိန်းကို ရုရှားတို့ကျူးကျော်တာနဲ့ပတ်သက်ပြီး ပူတင်နဲ့တင်းမာမှုမြင့်တက်လာမှာကို မစိုးရိမ်ပါဘူး။ ကျွန်တော်တို့ ဘက်က ဘယ်လိုထင်မြင်ယူဆလဲဆိုတာကို ရုရှားပြည်သူတွေထံ အသိပေးထားပါတယ်။ ပူတင်ဘာတွေကြံစည်လဲ ဂရုမစိုက်ပါဘူး။ သူ့သဘောအတိုင်းသူလုပ်နေပြီး သူဘယ်လိုလူလဲ ဘာတွေလုပ်လဲဆိုတာကို ကျွန်တော်ဝေဖန်ခဲ့တဲ့အပေါ် မကျေနပ်စိတ်နဲ့တစ်ခုခုလုပ်မယ့်လူပါ။ ဆင်ခြင်တုံတရားမရှိတဲ့သူပါ" လို့ 'ဘိုင်ဒန်'ကပြောကြားသွားပါတယ်။

လွန်ခဲ့တဲ့ ၁ လကျော် 'ပူတင်'စတင်ကျူးကျော်ပြီးကတည်းက သေဆုံးသူပေါင်း ၁ သောင်းကျော်ရှိနေနိုင်ကြောင်း ယူကရိန်းအစိုးရကထုတ်ပြန်ထားပါတယ်။

ရုရှားတို့ က ကိဗ်မြို့တော်အနီးအနားကိုတိုက်ခိုက်ခဲ့ရာမှာ အိမ်ခြေပေါင်း ၈ သောင်းကျော် လျှပ်စစ်ဓာတ်အားပြတ်တောက်ခဲ့ရပါတယ်။

လတ်တလော ရုရှားတို့တပ်ဆုတ်လာခြင်းက ယူကရိန်းအရှေ့ဘက်ခြမ်းကို ပိုမိုအားစိုက်လာပုံရပါတယ်။

'ဘိုင်ဒန်'က 'ပူတင်'နဲ့သံတမန်ရေးဆွေးနွေးဖို့ လမ်းဖွင့်ပေးထားပေမယ့် ဆွေးနွေးညှိနှိင်းဖို့သဘောတူမတူကတော့ 'ပူတင်'ပြောချင်တဲ့အကြောင်းအရာအပေါ်မူတည်နေပါတယ်။

"ဆွေးနွေးမယ့်အကြောင်းအရာက ဒီစစ်ပွဲကိုအဆုံးသတ်ပြီး ယူကရိန်းကိုပြန်လည်ထူထောင်ဖို့ အကြောင်းအရာတွေပါဝင်လားဆိုတဲ့အပေါ် မူတည်နေပါတယ်" လို့ 'ဘိုင်ဒန်'ကသတင်းထောက်တွေကို ပြောကြားသွားပါတယ်။
Source: AFP

#WorldHealth
Published - 29 March 2022
ကိုဗစ်ကပ်ရောဂါပထမဆုံးနှစ်အတွင်း ရောဂါကူးစက်ခံခဲ့ရတဲ့သူသုံးပုံတစ်ပုံနီးပါးခန့်ဟာ ခြေလက် အာရုံကြောရောဂါများခံစားနေရကြောင်း ဝါရှင်တန်တက္ကသိုလ်မှာစမ်းသပ်ခဲ့တဲ့လေ့လာမှုကို ဖော်ပြခဲ့ပါတယ်။

ရက် ၉၀ အတွင်း ဝါရှင်တန်တက္ကသိုလ်ဝင်းကြီးထဲမှာ ကိုဗစ်စစ်ဆေးခဲ့တဲ့လူတွေကို သုတေသနပြုလေ့လာခဲ့ကြတာဖြစ်ပြီး PAIN ဂျာနယ်မှာဖော်ပြခဲ့တာဖြစ်ပါတယ်။
ဒီရောဂါဟာ ခြေလက်တွေက အာရုံကြောတွေကိုထိခိုက်ကာ ထုံကျင်ခြင်း၊ နာကျင်ခြင်း၊ အားနည်းခြင်းတို့ ဖြစ်ပေါ်လာပြီး ခဏတာခံစားရခြင်းဖြစ်နိုင်သလို ရေရှည်ခံစားရတာမျိုးလည်း ဖြစ်နိုင်ပါတယ်။

စမ်းသပ်မှုမှာပါဝင်တဲ့ လူပေါင်း ၁,၅၅၆ ဦးထဲမှာ ရောဂါပိုးတွေ့ရှိခဲ့တဲ့လူတွေကို လေ့လာမယ့်အဖွဲ့ အဖြစ်သတ်မှတ်ပြီး ရောဂါပိုးမတွေ့တဲ့သူတွေကိုတော့ အနှိင်းယှဉ်ခံအဖွဲ့ ထဲသတ်မှတ်ခဲ့ကာ ၁:၂ အချိုးအရေအတွက်ရှိခဲ့တာဖြစ်ပါတယ်။

ရောဂါပိုးတွေ့ရှိထားတဲ့သူတွေခံစားရတဲ့ အာရုံကြောဝေဒနာဟာ နောက်ဆက်တွဲလက္ခဏာ ၁၆ မျိုးထဲကတစ်ခုဖြစ်ကာ ရောဂါကူးစက်ပြီး ၂ ပတ်အတွင်းပေါ်ပေါက်လာနိုင်ပြီး ရက် ၉၀ အထိ ခံစားရနေနိုင်ပါတယ်။

"HIV နဲ့ ရေယုန်တို့ လို ဗိုင်းရပ်စ်ရောဂါအများအပြားဟာ အာရုံကြောတွေကိုထိခိုက်နိုင်တာကြောင့် ခြေလက်အာရုံကြောဝေဒနာများခံစားရတတ်ပါတယ်။ ကိုဗစ်ရောဂါပိုးရှိတဲ့လူနာတွေထဲက ၃၀ ရာခိုင်နှုန်းလောက်ဟာ ရောဂါပိုးတွေ့ရှိတဲ့အချိန်မှာပဲ အာရုံကြောဝေဒနာတွေခံစားနေရပြီဖြစ်ပါတယ်။ ဒီဗိုင်းရပ်စ်က ခြေလက်အာရုံကြောတွေအပေါ် နောက်ဆက်တွဲဆိုးကျိုးများဖြစ်ပေါ်လာနိုင်ပြီး အနည်းဆုံး ၂ ပတ်မှ ၃ လလောက်အထိ ကြာမြင့်တတ်ပါတယ်" လို့ ဝါရှင်တန်တက္ကသိုလ်ဆေးသုတေသနပညာရှင်ကြီး 'ဆိုင်မွန်ဟာရူတူနီယန်'က ပြောကြားလိုက်ပါတယ်။

"ဗိုင်းရပ်စ်ကူးစက်ခြင်းတစ်ခုက အာရုံကြောရောဂါဖြစ်နိုင်သလားဆိုတာကို နားလည်သဘောပေါက်ထားဖို့ အရေးကြီးပါတယ်။ HIV တုန်းကဆိုရင် ရောဂါတွေစဖြစ်တုန်းက အာရုံကြောတွေပါထိခိုက်နိုင်တယ်ဆိုတာကို အတော်ကြာတဲ့အထိ မသိရှိခဲ့ကြပါဘူး။ လူနာတွေအနေနဲ့ အာရုံကြောဝေဒနာခံစားရတာကို မသိခဲ့ကြသလို ကုသခြင်းမခံခဲ့ရပါဘူး" လို့ ဆိုပါတယ်။

ဒီစမ်းသပ်မှုကို တစ်နေရာတည်းမှာပဲပြုလုပ်ခဲ့တာကြောင့် ယုံကြည်စိတ်ချရတဲ့အချက်အလက်ရရှိဖို့ နောက်ထပ်လေ့လာမှုတွေလုပ်ရဦးမှာဖြစ်ပါတယ်။
Source: The Jerusalem Post

#WorldPolitics
Published 28 March 2022

ရုရှားနိုင်ငံအပေါ် အမေရိကန်တို့ ဒဏ်ခတ်ပိတ်ဆို့မှုများစွာချမှတ်ပြီး ဒေါ်လာသုံးစွဲခွင့်ခြိမ်းခြောက်နေခြင်းဖြင့် ဒေါ်လာငွေကြေးထိန်းသိမ်းမှုအခြေအနေကို ထိခိုက်လာမှာဖြစ်ကြောင်း အမေရိကန်နာမည်ကြီးစီးပွားရေးပညာရှင်တစ်ဦးက သတိပေးလိုက်ပါတယ်။

#Yangon_Media_Group

#LocalNews
Published 29Mar 2022

ပြည်သူ့ပါတီအနေနဲ့ ယခင်ကတည်းကလည်း သံတမန်ဆက်ဆံရေးရှိပြီး ပြည်ပနိုင်ငံတွေက သံတမန်တွေနဲ့ကိုယ်စားလှယ်တွေနဲ့တွေ့ဆုံရခြင်းမှာ သံတမန်ဆက်ဆံရေးလိုအပ်ချက် အပြင် လတ်တလောနိုင်ရေးအကြပ်အတည်းတွေကို တွေ့ဆုံဆွေးနွေးရေးနည်းနဲ့ အဖြေရှာနေတာဖြစ်တယ်လို့ ပြည်သူ့ပါတီ ဥက္ကဌ ဦးကိုကိုကြီးက ပြောပါတယ်။

#Yangon_Media_Group

#LocalNews
Published_28 March 2022

ထိုင်းနိုင်ငံမှာ MOU စနစ်နဲ့ သွားပြီးတော့အလုပ်လုပ်မယ့် မြန်မာနိုင်ငံက အလုပ်သမားတွေအနေနဲ့ အလုပ်ရှင်နဲ့ စာချုပ်ချုပ်ဆိုနေကြပါပြီ။

#Yangon_Media_Group

#LocalNews
Published - 28 Mar 2022

ရှမ်းပြည်နယ်မြောက်ပိုင်း ကျောက်မဲခရိုင် ကျောက်မဲမြို့နယ်တွင်းနေထိုင်သော ဒေသခံပြည်သူများမှ သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA)အပေါ် အထင်လွှဲမှားစေရန်ရည်ရွယ်ချက်ဖြင့် အမည်မသိ၊ အဖွဲ့အစည်းမသိသူမှ RCSS ထုန်ပြန်ချက်အား အတုပြုလုပ်ကာ တပ်သားသစ်များ လိုက်လံစုဆောင်းခြင်း၊ အခွန်ကောက်ခံခြင်းများ စသည့်လုပ်ရပ်များ ပြုလုပ်နေကြောင်း RCSS က ထုတ်ပြန်လိုက်ပါတယ်။

ထုတ်ပြန်ရာတွင် ကျောက်မဲမြို့နယ်တွင်းဖြစ်ပွားခဲ့ပြီး အမည်မသိ၊ အဖွဲ့အစည်းမသိသူမှ စာအမှတ်စဥ် ၁၃၃/၁၂ တပ်သားသစ် စုဆောင်းရေးရုံးချုပ် နယ်မြေ ၁၀ ဟု RCSS အမည်အား အသုံးပြုပြီး တပ်သားသစ်များ လိုက်လံစုဆောင်းနေခြင်းသည် သျှမ်းပြည်ပြန်လည်ထူထောင်ရေးကောင်စီ (RCSS) နှင့် လုံးဝမသက်ဆိုင်ကြောင်းဖော်ပြထားပါတယ်။

အဆိုပါစာတွင် လူကြီးမင်း၏ဆိုင်သည် ကျောက်မဲမြို့မှ လူသစ်စုဆောင်းရေးစားရင်းတွင် ပါဝင်ကြောင်း၊ လိုက်နာဆောင်ရွက်ပါက အသက်ဘေးဖြစ်စေ ၊ ဖမ်းဆီးခြင်းဖြစ်စေ ကင်းလွှတ်မှာဖြစ်ပြီး လိုက်နာဆောင်ရွက်ခြင်းမရှိပါက ဖမ်းဆီးခေါ်ဆောင်ခြင်း၊ ဖောက်ခွဲခြင်းများ ပြုလုပ်မည်ဖြစ်ကြောင်း စသည့် အကြောင်းအရာများပါရှိသည့် RCSS ထုန်ပြန်ချက်အတုပြုလုပ်ကာ ဖြစ်လိုက်လံဖြန့်ဝေနေကြောင်း သိရပါတယ်။

ထို့အပြင် ယနေ့ ၂၀၂၂ ခုနှစ် မတ်လ ၂၇ ရက်နေ့ ညသန်းခေါင် ၁၂:၀၀ နာရီတွင် ဆက်သွယ်ဖြေရှင်းရမှာဖြစ်ပြီး မဖြေရှင်းပါက ဆိုင်အား ဖောက်ခွဲခြင်းဖြင့် အရေးယူမည်ဟု ငြိမ်းခြောက်ရေးသားခဲ့ပြီး ဆက်သွယ်ညှိနှိုင်းရန်နှင့် ဖြေရှင်းရန်ဆိုပြီး ဖုန်းနံပါတ် ၀၉၉၈၄၅၆၅၉၃၃ ဗိုလ်ကြီး စိုင်းဘုန်းမောင်ဟု ထုန်ပြန်ချက်တွင်ပါရှိပြီး ယင်းစာမှာ အတုဖြစ်ကြောင်း RCSS က ထုတ်ပြန်ချက်တွင်ဖော်ပြထားပါတယ်။

ဆက်လက်ပြီး ယင်းကိစ္စများနှင့် ပတ်သက်၍ ဒေသခံပြည်သူများမှ RCSS အပေါ် အထင်လွှဲမှားစေရန် ထုတ်ပြန်ချက်တုများ၊ စာရွက်စာတမ်းတုများအား လိုက်လံဖြန့်ဝေခြင်း၊ မဟုတ်မမှန် ကောလဟလ သတင်းများ လိုက်လံဖြန့်ဝေခြင်းများ စသည့် လုပ်ရပ်များအား RCSS အနေဖြင့် အဆိုပါလုပ်ရပ်များအပေါ် ပြင်းပြင်းထန်ထန် ကန့်ကွက်ရှုံ့ချကြောင်းရေးသားထားပါတယ်။

ymg/hm
#Yangon_Media_Group

#LocalNews
Published - 28 March 2022

ကမ်းခြေဒေသနှင့် ပုဂံဒေသသို့ ခရီးသွားဝင်ရောက်မှုတွေများပြားနေပြီး ဟိုတယ်အချို့ ဘိုကင်ပြည့်နေတယ်လို့ သိရပါတယ်။

"ဧည့်သည်တွေကတော့ ပုံမှန်ပါပဲ၊ သူ့အဖွဲ့နဲ့သူတော့ လာကြပါတယ်။ ရုံးပိတ်ရက်ဆိုရင်တော့ ဧည့်ပိုဝင်တာပေါ့။ သင်္ကြန်ရုံးပိတ်ရက်အတွက်လည်း အခုထဲက ကြိုတင်ဘိုကင်တွေ လုပ်ထားကြတဲ့ ဧည့်သည်တွေရှိပါတယ်။ တချို့ဟိုတယ်တွေဆို ဘိုကင်တွေပြည့်နေတယ်။ အရင်ကာလတွေထက်စာရင် အခုကာလမှာ ခရီးသွားတွေ ပြန်ဝင်လာကြတာပေါ့နော်။ ရှေ့လလည်း ပိတ်ရက်တွေရှိတော့ ခရီးသွားတွေ ရှိနေအုံးမယ်လို့ပဲ မှန်းပါတယ်။"လို့ ချောင်းသာကမ်းခြေရှိ ခရီးသွားလုပ်ငန်း လုပ်ကိုင်သူတစ်ဦးက ပြောပြခဲ့ပါတယ်။

ယခုလက်ရှိကာလမှာလည်း သင်္ကြန်ရုံးပိတ်ရက်အတွက် ဟိုတယ်ဘိုကင်ကြိုတင်မှုတွေ ရှိနေတာဖြစ်တယ်လို့ သိရပါတယ်။

"ကျွန်တော်တို့ သူငယ်ချင်းတွေနဲ့ ပုဂံသွားဖို့ပြင်ဆင်နေတာပါ။ ဒါပေမယ့် ဟိုမှာက အဖွဲ့လိုက်တည်းလို့ရတဲ့ ဟိုတယ်က အခန်းတွေ ဘိုကင်ပြည့်နေတယ်ပြောလို့ အခုကျန်တဲ့ တည်းခိုလို့ရမယ့် နေရာကို ကျွန်တော်တို့ရှာနေပါတယ်။"လို့ ရန်ကုန်မြို့မှာနေထိုင်သူ လူငယ်တစ်ဦးက ပြောပြခဲ့ပါတယ်။

လက်ရှိကာလမှာ ပြည်တွင်းခရီးသွားလာမှုက (၅၀) ရာခိုင်နှုန်းအထက်မှာ ရှိနေတာဖြစ်တယ်လို့လည်း ခရီးသွားလုပ်ငန်းလုပ်ကိုင်သူတွေက ဆိုပါတယ်။

ဒါ့အပြင် ပုဂံဒေသကို လာရောက်ကြမယ့် ခရီးသွားတွေအနေနဲ့ ကိုဗစ်ကာကွယ်ဆေးထိုးပြီးသားလက်မှတ်နှင့် မှတ်ပုံတင်ကို ယူဆောင်လာရမှာဖြစ်တယ်လို့လည်း သိရပါတယ်။

"သင်္ကြန်ရက် ပုဂံကိ လာလည်မယ့် ဧည့်သည်တွေအနေနဲ့ မှတ်ပုံတင် မဖြစ်မနေပါရမယ်။ မြို့အဝင်မှာ ကိုဗစ်လက်မှတ် နေ့စဉ်စစ်ဆေးနေပါတယ်။ကျန်တာကတော့ မလိုပါဘူး။ ကိုယ်ပိုင်ကားနဲ့ လာမယ်ဆိုရင် ကားနဲ့သက်ဆိုင်တဲ့ စာရွက်စာတမ်းပြည့်စုံအောင် ယူလာပါလို့ အကြံပေးပါရစေ။"လို့ ပုဂံဒေသရှိ ဧည့်လမ်းညွှန်တစ်ဦးက ပြောပြခဲ့ပါတယ်။

ကိုဗစ် ၁၉ ရောဂါ ဖြစ်ပွားမှုတွေ လျော့ကျလာခဲ့တဲ့ ပြီးခဲ့တဲ့ ၂၀၂၁ ခုနှစ်၊ နှစ်လည်ပိုင်းမှစလို့ ကမ်းခြေဒေသနှင့် ပုဂံဒေသသို့ ပြည်တွင်းခရီးသွားတွေကို ပြန်လည်ဝင်ရောက်ခွင့်ပြုခဲ့တာလည်း ဖြစ်ပါတယ်။

ymg/kg
#Yangon_Media_Group

#LocalNews
Published - 28 March 2022

ဈေးကွက်အတွင်း ရောင်းချလျက်ရှိတဲ့ အသားလုံး၊ အသားချောင်းအမျိုးမျိုးတို့ကို ဈေးကွက်အတွင်းမှ စစ်ဆေးခဲ့ရာ ယခုနှစ် ဖေဖော်ဝါရီလမှ မတ်အထိ စားသုံးဖို့မသင့်တဲ့ အသားလုံး၊ အသားချောင်း အမျိုးအစား ၂၁ မျိုးကို စစ်ဆေးတွေ့ရှိခဲ့တယ်လို့ သိရပါတယ်။

Benzoic Acid ကို သတ်မှတ်ပမာဏာထက် ပိုမိုသုံးစွဲခဲ့တဲ့ Thailand , PS-Food, Thai Star Barbnd, K& P PS-Food, TSP, B4 New, ဖွန်းစဝမ်း၊ B.B, ကြက်ဘီဘီ၊ JSP Food, TRK, Top GP စတဲ့အမှတ်တံဆိပ်တွေ ပါဝင်ပါတယ်။

ဒါ့အပြင် Sorbic Acid ကို သတ်မှတ်ပမာဏာထက် ပိုမိုသုံးစွဲခဲ့တဲ့ P&J, Al CHENG စတဲ့ အမှတ်တံဆိပ်တွေကနေထုတ်လုပ်တဲ့ မာလာကျက်အူချောင်း၊ ကြက်သားကြက်အူချောင်းတို့ကို မစားသုံးဘူးလို့ ထုတ်ပြန်ထားပါတယ်။

အစားအသောက်တွေကို စားသုံးမိပါက ကလေးသူငယ်တွေ ကိုယ်ဝန်ဆောင်တွေနဲ့ သက်ကြီးရွယ်အိုတွေအနေနဲ့ လတ်တလောမှာ မျက်လုံးနဲ့ အရေးပြားယားယံတာ၊ ပျို့အန်တာ၊ ခေါင်းကိုက်တာ၊ ဗိုက်အောင့်ဗိုက်ဗိုက်နာဖြစ်တာတို့ကို ခံစားရနိုင်တဲ့အပြင် ရေရှည် အစားအိမ်၊ အသည်း၊ ကျောက်ကပ်များ ပျက်စီးနိုင်တာ ကင်ဆာရောဂါတွေ ဖြစ်ပွားစေနိုင်ပါတယ်။

ဖြန့်ဖြူးရောင်းချသူများအနေနဲ့ ထုတ်ပြန်ထားတဲ့ အစားအသောက်တွေကို ဖြန့်ဖြူးရောင်းချမပြုလုပ်ဖို့နဲ့ လိုက်နာဆောင်ရွက်ခြင်းမရှိပါက အမျိုးသားအစားအသောက်ဥပဒေ ပုဒ်မ ၂၈ (က) အရ အရေးယူမယ်လို့ အသိပေးကြေညာထားပါတယ်။

ymg/ei
#Yangon_Media_Group