#LocalNews
Published -3 June 2022

မျောက်ကျောက်ရောဂါနဲ့ပတ်သက်လို့ ကြိုတင်ကာကွယ်ရေးတွေ ဆောင်ရွက်ထားသလို ရောဂါသံသယရှိပါက ဓာတ်ခွဲစစ်ဆေးပြီးကုသပေးနိုင်ဖို့လည်း ကျန်းမာရေးဝန်ကြီးဌာနက ကြိုတင်ပြင်ဆင်မှုတွေ ဆောင်ရွက်ထားတယ်လို့ ကျန်းမာရေးအသိပညာမြှင့်တင်ရေးဌာနခွဲ၊ ညွှန်ကြားရေးမှူးဒေါက်တာသန်းနိုင်စိုးက ပြောပါတယ်၊၊

#Yangon_Media_Group

#LocalNews
Published_3 June 2022

ရန်ကုန်-မန္တလေး အမြန်လမ်း ၇ မိုင် ၆ ဖာလုံမှာ ဖွင့်ထားတဲ့ သူဌေးကျွန်းအပမ်းဖြေစခန်းကို သွားရောက်လည်ပတ်သူတွေ များနေတယ်လို့ သိရပါတယ်။

#Yangon_Media_Group

#LocalNews
Pulished_ 3 June 2022

ပြီးခဲ့တဲ့ ၅လ လောက်ကစပြီး ပြေးဆွဲလျှက်ရှိသည့် ရန်ကုန်-ပဲခူးယာဉ်လိုင်း Yangon- Bago Smart City Bus Line By Daewoo Bus လိုင်းအနေဖြင့် လာမည့် ဇွန်လ ၁၀ရက်ကစပြီး ပြေးဆွဲမှု ယာယီရပ်နားမည်ဖြစ်ကြောင်း အဆိုပါ ယာဉ်လိုင်းမှ တာဝန်ရှိသူက ပြောသည်။

"အဓိကကတော့ ဆီဈေးရယ်၊ စီးနင်းတဲ့သူ နည်းတာရယ်ကြောင့်ပါ။ ဆီက အသွားအပြန်တစ်ကြောင်းကို ၁သိန်းခွဲနဲ့ ၁သိန်း၃သောင်းလောက် ထည့်ရတယ်၊ ရန်ကုန်ကနေစ ပဲခူးကို အခေါက်ကြီးတစ်ခေါက်ခေါ်တာပေါ့ အဲ့တစ်ခေါက်ကို အဲ့လောက်ထည့်နေရတော့ ကျွန်တော်တို့မှာ ဝန်ထမ်းစရိတ်ရယ် အခြားစရိတ်တွေရယ်နဲ့တွက်ကြည့်လိုက်ရင် မမြတ်တဲ့အပြင် ရှူးနေတော့ သိပ်အဆင်မပြေဘူး။ အဲ့တာကြောင့် ဒီနေ့ကို တာဝန်ရှိသူတွေစုပေါင်းပြီး ယာယီရပ်နားဖို့ မူဝါဒတခုချမှတ်လိုက်တာပါ။ လောလောဆယ်တော့ လာမယ့် ၁၀ရက်နေ့လို အကြမ်းဖျင်းသတ်မှတ်ထားပါတယ်ဟု Daewoo Express ရန်ကုန်ဂိတ်ရဲ့တာဝန်ရှိသူက ပြောသည်။

ပြည်သူများအဆင်ပြေစေရေးအတွက်အရှုံးခံပြေးဆွဲခဲ့ပြီး ယခုအခါမှာ စက်သုံးဆီစျေး ထပ်မံမြင့်တက်လာမှုကြောင့် ယာယီရပ်နားထားသော်လည်း လာမည့် ဇွန်လ ၉ ရက်အထိ ယခင်ယာဉ်ထွက်ချိန်အတိုင်း ပြေးဆွဲပေးမည်ဟုလည်းသိရသည်။

ရန်ကုန်- ပဲခူး(ကလိ) အထိ တစ်ဦးလျှင် ငွေကျပ် ၃၀၀၀နှုန်းဖြင့် အဆိုပါယာဉ်လိုင်းကပြေးဆွဲပေးနေခြင်းဖြစ်သည်။

ymg/NN
#Yangon_Media_Group

#LocalNews
Published -3 June 2022

လွန်ခဲ့သော(၂၄)နာရီအတွင်းက အနောက်တောင်မုတ်သုံလေသည် မြန်မာနိုင်ငံတစ်ဝှမ်းလုံးသို့ ဝင်ရောက်ခဲ့ပြီးဖြစ်၍ မိုးဦးကာလသို့ ရောက်ရှိပြီဖြစ်ပါသည်၊၊

မေလ(၁၃)ရက်က မြန်မာနိုင်ငံတောင်ပိုင်း၊ မေလ(၁၉)ရက်က မြစ်ဝကျွန်းပေါ်ဒေသ၊ မေလ (၂၅)ရက်က မြန်မာနိုင်ငံအလယ်ပိုင်းဒေသနှင့် ဇွန်လ(၂)ရက်တွင် မြန်မာနိုင်ငံမြောက်ပိုင်းဒေသများကို အနောက်တောင်မုတ်သုံလေဝင်ရောက်ခဲ့ခြင်း ဖြစ်သည်ဟု မိုးလေဝသနှင့်ဇလဗေဒညွှန်ကြားမှုဦးစီးဌာနမှ ထုတ်ပြန်ထားသည်၊၊

"တစ်နိုင်ငံလုံး အနောက်တောင်မုတ်သုံလေဝင်ရောက်ပြီးတာနဲ့ မိုးဦးကာလရောက်ပြီလို့ ပြောလို့ရပါတယ်၊၊ မြန်မာနိုင်ငံမှာတော့ မိုးဦးကာလကို အနောက်တောင်မုတ်သုံလေဝင်ရောက်ပြီးချိန်ကနေ ဇွန်လကုန်အထိ မိုးဦးကာလလို့ သတ်မှတ်လို့ရပါတယ်၊၊ ဒီကာလတွေမှာတော့ မုတ်သုံ အားကောင်းမှု အပေါ်မူတည်ပြီး လေပြင်းတိုက်တာ မိုးသည်းထန်တာတွေ၊ မိုးကြိုးပစ်တာတွေဖြစ်ပေါ်နိုင်တယ်"လို့ မိုးလေဝသနှင့်ဇလဗေဒညွှန်ကြားမှုဦးစီးဌာန၊ ညွှန်ကြားရေးမှူးဦးလှထွန်းကပြောပါတယ်၊၊

မိုးဦးကာလတွင် မိုးသည်းထန်စွာရွာသွန်းခြင်း၊ မိုးသည်းထန်မှုကြောင့် ရေကြီးခြင်း၊ လေပြင်း တိုက်ခတ်ခြင်း၊ လေပြင်းတိုက်ခတ်မှုကြောင့် သစ်ပင်များလဲပြိုခြင်း၊ နေအိမ်များပိခြင်း၊ မိုးကြိုးအန္တရာယ်၊ လျှပ်စစ်အန္တရာယ်များဖြစ်ပေါ်နိုင်သည့်အတွက် အထူးသတိပြုနေထိုင်ကြရန်လိုအပ်ကြောင်း သိရသည်၊၊

ymg/tthl
#Yangon_Media_Group

#LocalNews
Published_3 June 2022

မြန်မာနိုင်ငံအတွင်း ဂျပန်ချေးငွေဖြင့်တည်ဆောက်နေသည့် စီမံကိန်းများ ပြန်လည်စတင်နေပြီဟု ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနက သိရသည်။

"Japan ODA နဲ့ လုပ်နေတာတွေ ပြန်စပါပြီ။ ဂျပန်ရင်းနှီးမြှုပ်နှံမှုတွေ ပိုမိုဝင်ရောက်လာဖို့ DICA မှာ Japan desk ဖွင့်ထားပြီး ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) နဲ့ ဂျပန်ပြည်ပကုန်သွယ်မှု့အဖွဲအစည်း (JETRO)က ကိုယ်စားလှယ်တွေ အနီးကပ်အကူအညီပေးနေပါတယ်"ဟု အဆိုပါ ဝန်ကြီးဌာန၏ တာဝန်ရှိသူက ပြောသည်။

ဂျပန်နိုင်ငံအနေဖြင့် လွန်ခဲ့သော ၂၀၁၃ ခုနှစ်ကတည်းက နှစ်နိုင်ငံ ရင်းနှီးမြှုပ်နှံမှုမြှင့်တင်ရေး၊အကာအကွယ်ပေးရေးနှင့် ဖြေလျှော့ရေး စာချုပ်ချုပ်သည့်အပြင် JICA အကူအညီဖြင့် မြန်မာရင်းနှီးမြှုပ်နှံမှု မြှင့်တင်ရေးနှစ် ၂၀ စီမံကိန်းကိုလည်း ရေးဆွဲထားကြောင်း သိရသည်။

လက်ရှိတွင် ဂျပန်ရင်းနှီးမြှုပ်နှံမှု စုစုပေါင်းမှာ အမေရိကန်ဒေါ် သန်း ၁၈၀၀ ကျော်ရှိကြောင်းလည်း ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၏ စာရင်းများအရ သိရသည်။

ymg/mt
#Yangon_Media_group

#LocalNews
Published _3 June 2022

နိုင်ငံသားကဒ် e-ID စနစ်တစ်ခုလုံးအတွက် ဒီဇိုင်းပုံစံ Master Plan အား ပြည်တွင်းနည်းပညာအကြံပေး အဖွဲ့များနှင့် ညှိနှိုင်းဆွေးနွေးတိုင်ပင်ကာ ရေးဆွဲထားရှိပြီး နိုင်ငံတကာအဆင့်မီဖြစ်စေရန် ပြည်ပက နည်းပညာအကြံပေးများနှင့် ငှားရမ်းဆောင်ရွက်ရမည်ဟု လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီးဦးခင်ရီက ပြောကြားခဲ့သည်။

e-ID စနစ်လုပ်ငန်းကော်မတီ၏ တတိယအကြိမ်ညှိနှိုင်းအစည်းအဝေး၌ ပြည်ထောင်စုဝန်ကြီး ဦးခင်ရီမှ ယင်းကဲ့သို့ ပြောကြားခဲ့ခြင်းဖြစ်သည်။

e-ID စနစ်အကောင်အထည်ဖော်ရာတွင် Unique ID ကောက်ယူခြင်းနှင့် National ID ဆောင်ရွက်ခြင်းကို အပိုင်း(၂)ပိုင်းဖြင့် ဆောင်ရွက်သွားမည်ဟုလည်း ယင်းအစည်းအဝေးမှ သိရသည်။

"ဒါမှသာ မိမိတို့အသုံးပြုမယ့် Enrollment Kit နဲ့ပတ်သက်တဲ့ အချက်အလက်တွေ ရေးဆွဲထားတဲ့ Master Plan တွေအပေါ် လိုအပ်တဲ့အကြံပြုချက်တွေ လုပ်ငန်းစဉ်အတွက်လိုအပ်တဲ့ သင်တန်းပေးနိုင်ရေးအခြေအနေတွေကို ပြည်ပနည်းပညာ အကြံပေးက သုံးသပ်ဆွေးနွေးအကြံပြုပေးနိုင်မှာဖြစ်ပါတယ်"ဟု ပြည်ထောင်စုဝန်ကြီးကဆိုသည်။

ထို့ပြင် e-lD စနစ်အား နိုင်ငံတော်၏ ဘတ်ဂျက်ဖြင့် ဆောင်ရွက်သွားမည်ဖြစ်ပြီး e-ID စနစ်လုပ်ငန်းအတွက် လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနတွင် အီလက်ထရောနစ်မှတ်ပုံတင်စနစ် ဦးစီးဌာနကို ဖွဲ့စည်းဆောင်ရွက်လျက်ရှိသည်ဟု ၎င်းကဆက်ပြောသည်။

" e-ID စနစ်လုပ်ငန်းနဲ့ပတ်သက်ပြီး လုပ်ငန်းကော်မတီဖွဲ့စည်းပြီးဖြစ်သလို ဆပ်ကော်မတီတွေကိုလည်း ဖွဲ့စည်းထားပြီးဖြစ်ပါတယ် လုပ်ငန်းနဲ့ပတ်သက်တဲ့ ဥပဒေဆိုင်ရာတွေနဲ့ ပတ်သက်ပြီးတော့လဲ ညှိနှိုင်းဆွေးနွေးဆောင်ရွက်နေပြီဖြစ်ပါတယ်"ဟု ပြည်ထောင်စုဝန်ကြီးက ဆိုသည်။

"e-ID စနစ်လုပ်ငန်းဟာ e-Government စနစ်အတွက် အခြေခံကျတဲ့ လုပ်ငန်းတစ်ခုဖြစ်တာကြောင့် နိုင်ငံအတွက်မဖြစ်မနေ ဆောင်ရွက်ရမှာဖြစ်သလို လက်ရှိ နိုင်ငံတော်အစိုးရတာဝန်ယူချိန်မှာ အကောင်အထည်ဖော်ဆောင်ရွက်ဖို့ ဆုံးဖြတ်ဆောင်ရွက်နေပါတယ်"ဟု ပြည်ထောင်စုဝန်ကြီးဦးခင်ရီကပြောသည်။

e-ID စနစ်လုပ်ငန်းသည် နိုင်ငံအတွက် မဖြစ်မနေဆောင်ရွက်ရမည့်လုပ်ငန်းဖြစ်ပြီး အချိန်ကာလ၊ နိုင်ငံတကာအဟန့်အတား၊ နည်းပညာကျွမ်းကျင်မှုစသည့် ကန့်သတ်ချက်များအပေါ် ခြုံငုံသုံးသတ်၍ ဆွေးနွေးခဲ့ကြောင်းသိရသည်။

ymg/NN
#Yangon_Media_Group

#LocalNews
Published - 3 June 2022

မြန်မာနိုင်ငံတွင် အသုံးများသော မိုဘိုင်းဖုန်း App တခုဖြစ်သည့် JOOX Music Myanmar သည် ၎င်း၏ လည်ပတ်နေသော လုပ်ငန်းများကို ၂၀၂၂ ခုနှစ် ဇူလိုင် ၆ ရက်မှစတင်၍ ရပ်ဆိုင်းတော့မည် ဖြစ်ကြောင်း အသိပေး ထုတ်ပြန်ထားသည်။

"မေလ ၂၃ ရက်နေ့မှာ ညီမတို့သုံးစွဲသူတွေကို Joox ကအသိပေးချက် ပေးပို့ထားပါတယ်၊ ပေးပို့ချက်မှာ ဇူလိုင်လ ၆ ရက်စပြီး ရပ်ဆိုင်းတော့မယ်လို့ ပါဝင်ပါတယ်"လို့ Joox သုံးစွဲသူတစ်ဦးက YMG ကိုပြောသည်။

အဆိုပါ အသိပေးထုတ် ပြန်စာတွင် ပြောင်းလဲနေသော ဈေးကွက်အခြေအနေများကြောင့် မြန်မာ့ဈေးကွက်အတွင်းမှ ထွက်ခွာတော့မည် ဖြစ်ကြောင်းနှင့် မြန်မာနိုင်ငံအတွက် လည်ပတ်နေသော JOOX Music App နှင့် ဝဘ်ဆိုက်ဝန်ဆောင်မှု လုပ်ငန်းလည်ပတ်မှုများကို ရပ်ဆိုင်းသွားမည် ဖြစ်ကြောင်း သိရသည်။

“မြန်မာနိုင်ငံတွင် အသုံးပြုနေသော JOOX Music ဝန်ဆောင်မှုသည် ၂၀၂၂ ဇူလိုင် ၆ ရက်တွင် ကုန်ဆုံးမည်ဖြစ်ကြောင်း အသိပေး အကြောင်းကြားအပ်ပါသည်။ သို့ဖြစ်ပါသောကြောင့် JOOX Music App သို့ ဝင်ရောက် အသုံးပြုနိုင်တော့မည် မဟုတ်ကြောင်း” ဟူ၍ ဆိုထားသည်။

မြန်မာနိုင်ငံရှိ JOOX VIP စာရင်းသွင်း ဝန်ဆောင်မှုများကိုလည်း မေလ ၂၃ ရက်မှ စတင်၍ ရပ်နားထားခဲ့ပြီး မေ ၂၃ ရက်ထိ ဝယ်ယူထားသော VIP များ၊ ကျန်ရှိနေသော Coins နှင့် Daimonds များအား JOOX App တွင် ဇူလိုင် ၆ ရက်နေ့ထိ ဆက်လက် အသုံးပြုနိုင်မည်ဟု ထုတ်ပြန်ချက်တွင် ဖော်ပြထားသည်။

Joox Music App တွင် ပြည်တွင်း၊ ပြည်ပ တေးသီချင်းပေါင်း ၄၅ သန်းကျော်ထိ ပါရှိကြောင်းသိရသည်။

JOOX ကို တရုတ်နည်းပညာကုမ္ပဏီ Tencent က ပိုင်ဆိုင်ပြီး ၂၀၁၅ တွင် မြန်မာနိုင်ငံသို့ ဝင်ရောက်ခဲ့ပြီးနောက် လူကြိုက်အများဆုံး အသုံးပြုလာကြသည့် App တခု ဖြစ်ပြီး အဆိုပါဝန်ဆောင်မှုသည် အာရှနိုင်ငံများ၌ပါ အသုံးများသော Music Streaming Application တခုဖြစ်ကာ ဟောင်ကောင်၊ အင်ဒိုနီးရှား၊ မကာအို၊ မလေးရှား၊ ထိုင်းနိုင်ငံတို့တွင် ဆက်လက်လည်ပတ်သွားမည်ဖြစ်ကြောင်း ယင်းကုမ္ပဏီက ထုတ်ပြန်ထားသည်။

ymg/sth
#Yangon_Media_Group

#LocalNews
Published -3 june 2022

လတ်တလောတွင် စုပေါင်းစက်ဘီးစီးခြင်းအားကစားများကို ရပ်နားထားရပေမည့်လည်း လာမည့်ပွင့်လင်းရာသီတွင် အခြေအနေကောင်းပါက ပြန်လည်စတင်နိုင်ရန်မျှော်မှန်းထားသည်ဟု Bicycle Networkမှ တာဝန်ရှိသူတစ်ဦးထံမှ သိရသည်၊၊

Bicycle Network အနေဖြင့် စုပေါင်းစက်ဘီးစီးခြင်းကို ကိုဗစ်ကာလမှယနေ့ချိန်အထိရပ်နားထားရပေမည့်လည်း ကျန်းမာရေးအရတစ်ဦးချင်းစီးခြင်းမျိုး ရှိနေတယ်လို့ဆိုပါတယ်၊၊

"ကိုဗစ်တွေစဖြစ်ကတည်းကဟု Bicycle Network အနေနဲ့ စုပေါင်းစက်ဘီးစီးတာ တွေရပ်နားခဲ့တာပါ၊၊

အခုချိန်မှာလည်း စားဝတ်နေရေးအခြေအနေတွေကြောင့်ရော၊ လုံခြုံရေးအခြေအနေတွေကြောင့်ပါ စုပေါင်းစက်ဘီးစီးတာတွေကို Bicycle Network အနေနဲ့ရပ်နားထားပါတယ်၊၊ လာမယ့်ပွင့်လင်းရာသီမှာ လုံခြုံရေးအခြေအနေရော အခြားအခြေအနေ တွေပြန်ကောင်းလာမယ်ဆိုရင်တော့ ပြန်စီးမှာပေါ့နော်၊၊ အခုချိန်မှာတော့ အဖွဲ့လိုက်မစီးဖြစ်ပေမယ့် ကျန်းမာရေးအရတစ်ဦးချင်း ပြန်စီးနေကြတာမျိုးတော့ရှိတယ်"လို့ Bicycle Network မှ တာဝန်ရှိသူတစ်ဦးက YMG ကိုပြောပါတယ်၊၊

စက်ဘီးစီးအားကစားဟာ ကျန်းမာရေးအတွက် ကောင်းမွန်ပြီး အစုအဖွဲ့နဲ့စက်ဘီးစီးခြင်းအားဖြင့် ပျော်ရွှင်မှုတွေကို ရရှိစေတာဖြစ်ပါတယ်၊၊

ကိုဗစ်တွေစဖြစ်လာချိန်မှာတော့ Bicycle Network မှ စက်ဘီးစီးသူတွေဟာ ကိုဗစ်ကူးစက်မှုမရှိအောင် စုပေါင်းစီးခြင်းမျိုး မလုပ်ဘဲ တစ်ဦးချင်းစီစီးနေတာမျိုး၊ အဖွဲ့ငယ်လေးတွေ စုပေါင်းစီးနေကြတာမျိုးရှိကာ ရန်ကုန်တိုင်း တိုက်ကြီးမြို့နယ်၊ လှည်းကူးမြို့နယ်နဲ့ မှော်ဘီမြို့နယ်တွေကို သွားရောက်စီးကြသူတွေရှိတယ်လို့ သိရပါတယ်၊၊

ymg/tthl
#Yangon_Media_Group

#LocalNews
Published_3 Jone 2022

ကော့သောင်း-ရနောင်း ရေလမ်းမှတစ်ဆင့် MOU လုပ်သား ၈၀ ဦး ထိုင်းနိုင်ငံသို့ ထပ်မံရောက်ရှိ ခဲ့ကြကြောင်း သိရသည်။

ယင်းအလုပ်သမားများမှာ ပြည်ပအလုပ်အကိုင်အကျိုးဆောင် ပွင့်ဖူးအောင် ကုမ္ပဏီနှင့် စာချုပ် ချုပ်ဆိုထားသူများ ဖြစ်ပြီး ဇွန်လ ၂ ရက်တွင် မင်္ဂလာဒုံလေဆိပ်မှ ကော့သောင်းသို့ လေကြောင်းဖြင့်သွားရောက်ကာ ယင်းမှ တစ်ဆင့် ကော့သောင်း - ရနောင်းဂိတ် ရေလမ်းမှ သွားရောက်ခဲ့ကြခြင်း ဖြစ်ကြောင်း သိရသည်။

အလုပ်သမား ၈၀ ဦးတွင် အမျိုးသား ၄၈ ဦး၊ အမျိုးသမီး ၃၂ ဦး ဖြစ်ပြီး ထိုင်းနိုင်ငံ၊ ပထုံဌာနီမြို့ရှိ food blessing co.ltd ပိုင် source အချည်ရည် စက်ရုံတွင် အလုပ်လုပ်ကြမည် ဖြစ်ကြောင်း သိရသည်။

ပြီးခဲ့သည့် မေလဒုတိယအပတ်မှစတင်၍ လက်ရှိအချိန်အထိ ပြည်တွင်းအလုပ်အကိုင်အကျိုးဆောင် အေဂျင်စီကုမ္ပဏီများမှ ထိုင်းနိုင်ငံသို့ MOU စနစ်ဖြင့် စေလွှတ်ပေးခဲ့သည့် အလုပ်သမားအရေအတွက် ၁၉၂၅ ဦးရှိပြီဖြစ်ကြောင်း သိရသည်။

ymg/mt
#Yangon_Media_Group

Published 3 June 2022

ရိုင်ဖယ်တစ်လက်နှင့် ပစ္စတိုကိုင်ဆိုင်ထားတဲ့ စိတ်ဖောက်ပြန်နေတဲ့ သေနတ်သမားက အိုကလာဟိုးမား ဆေးရုံ အဆောက်အအုံထဲကို ဝင်ပြီး  သူ့ကို ခွဲစိတ်ပေးခဲ့တဲ့ဆရာဝန်ကို ပစ်မှတ်ထား ပစ်သတ်ခဲ့ကာ ကျန်သေဆုံးသူတွေကတော့ သူသွားရာလမ်းမှာ မြင်တဲ့သူကိုသတ်ပစ်ခဲ့တာဖြစ်တယ်လို့ ကြာသပတေးနေ့က  အဏာပိုင်တွေကပြောပါတယ်။

မိုက်ကယ်လူးဝစ်လို့ သိရတဲ့ အဲဒီသေနတ်သမားဟာ တူလ်ဆာရှိ နာတာလီဆေးရုံရဲ့ ဒုတိယထပ်မှာရှိတဲ့ စိန့်ဖရန်စစ် ကျန်းမရေးစနစ်ရဲ့ အရိုးကုသဌာနမှာ ဗုဒ္ဓဟူးနေ့ ညနေ(၅)နာရီခန့်မှာ သေနတ်နှင့်ပစ်ခဲ့တာဖြစ်ပါတယ်လို့ ရဲချုပ် ဝင်ဒဲလ်ဖရန်ကလင်းက သတင်းစာရှင်းလင်းပွဲမှာ သတင်းထောက်တွေကို ပြောပါတယ်။

အသက်(၄၅)နှစ်အရွယ်ရှိ လူးဝစ်ဟာ မတ်စ်ကိုဂီးမြို့ကဖြစ်ပြီး နောက်ကျောနာတဲ့ဝေဒနာကိုကုသဖို့ မေ ၁၉ရက်က ဆေးရုံတက်ခဲ့ပါတယ်။ အဲဒီမှာ ဒေါက်တာ ပရက်စတွန် ဖိလစ်က လူးဝစ်ကို ခွဲစိတ်ကုသပေးပြီးနောက် မေ ၂၄ရက်မှာ သူဟာ  ဆေးရုံကဆင်းခဲ့ပါတယ် လို့ ရဲချုပ် ဖရန့်ကလင်းကပြောပါတယ်။

လူးဝစ်ဟာ သူ့နာကျင်တာမပျောက်လို့ ဆေးရုံကို ကြိမ်ဖန်များစွာ ဖုန်းဆက်သွယ်ခဲ့ပြီး နောက်ထပ်ကုသမှုခံယူဖို့ ကြိုးစားခဲ့ ပါတယ်။ အဲဒီနောက်သူဟာ ဒေါက်တာဖိလစ်ကို အင်္ဂါနေ့မှာ ထပ်တွေပြီး ဗုဒ္ဓဟူးနေ့မှာ ထပ်ပြီး အကူအညီလိုချင်လို့ သူ့ရုံးကို ထပ်ဖုန်းဆက်ခဲ့တယ်လို့ ဖရန့်ကလင်းက ဆက်ပြောပါတယ်။

လူးဝစ်က ဘယ်လိုအကူအညီတောင်းတာလဲဆိုတာတော့ မရှင်းလင်းပါဘူး။

သေနတ်နှင့်မပစ်ခင် တစ်နာရီခန့်မှာ လူးဝစ်ဟာ ဆီမီး အော်တိုမက်တစ် AR-15 ရိုင်ဖယ်တစ်လက်ကို အရပ်ထဲက သေနတ်ဆိုင် တစ်ဆိုင်ကနေဝယ်ခဲ့ပြီး  ဆီမီးအော်တိုမက်တစ် ပစ္စတိုကိုတော့ မေ၂၉ရက်က အရပ်အပေါင်ဆိုင်တစ်ဆိုင်ကနေ ဝယ်ခဲ့ကြောင်းလည်း ရဲချုပ်ကပြောပါတယ်။

အခင်းဖြစ်တဲ့နေရာမှာ ကျည်ဆံအခွံဒါဇင်များစွာနှင့်  လူးဝစ်လက်ရေးနှင့် စာတစ်စောင်ကိုပါ ရဲတွေက ရှာတွေ့ပါတယ်။  ခွဲစိတ်ကုသပြီးနောက် သူဆက်ပြီး နေထိုင်မကောင်းဖြစ်ရတဲ့အတွက် သူဟာ ဖိလစ်နှင့်  သူ့သွားရာလမ်းကမည်သူမဆိုသတ်ဖို့ရည်ရွယ်ခဲ့တာ ထင်ရှားတယ်လို့ ဖရန့်ကလင်းကပြောပါတယ်။

သူက သူဆက်ပြီး နာကျင်တဲ့ဝေဒနာခံစား နေရတဲ့အတွက် သူက ဒေါက်တာဖိလစ်ကို အပြစ်တင်ခဲ့တယ်လို့ ဖရန့်ကလင်းက ဆက်ပြောပါတယ်။

သေဆုံးသူတွေထဲမှာ ဒေါက်တာဖိလစ်အပြင် ဒေါက်တာ စတိဖင်ဂျေဟူစိန်၊ ဧည့်ကြို အာမန်ဒါဂလင်းနှင့် ဆေးခန်းထဲက လူနာ ဝီလျံ လပ်ဗ်တို့ဖြစ်ကြပါတယ်။

သူတို့က သူသွားတဲ့လမ်းပေါ်ရှိနေလို့ လူးဝစ်ကပစ်သွာတာဖြစ်တယ်လို့ တူလ်ဆာက ထိပ်တန်းရဲတစ်ဦးက ပြောပါတယ်။

အဲသလိုပစ်သတ်ပြီးနောက် လူးဝစ်ဟာ သူ့ကိုယ်သူ သေနတ်နှင့်ပစ်သတ် အဆုံးစီရင်ခဲ့တာလို့ အာဏာပိုင်တွေက ပြောပါတယ်။

လူးဝစ်ရဲ့ အိမ်နီးချင်းဖြစ်သူတစ်ဦးက သူတို့နှင့် အိမ်နီးချင်းဖြစ်တာ ငါးနှစ်ခန့်ရှိပြီး လူးဝစ်ရဲ့ ဇနီးဟာ ဒေါက်တာ အီဒစ် လူဘင်ဖြစ်ကြောင်း၊သမီးတစ်ယောက်ရှိပြီး အမေနှင့်သမီးဟာ ဘုရားရှိခိုးကျေင်းတက်တဲ့ ဘာသာရေးကိုင်းရှိုင်းသူတွေဖြစ်တယ်လို့ ပြောပါတယ်။

“ကျွန်မသူတို့နှင့်စကားမပြောဖူးဘူး။ဒါပေမယ့် သူတို့ဟာ ခပ်အေးအေးနေကြတဲ့ အိမ်နီးချင်းကောင်းတွေပါ” လို့ သူမက ဆက်ပြောပါတယ်။

Source NY Post

အောက်ပုံများ အသတ်ခံရသူများဖြစ်သည့် ဆရာဝန်နှစ်ဦး၊လူနာတစ်ဦးနှင့်ဧည့်ကြိုအမျိုးသမီး

#DailyNews
Published - 3 June 2022

၁။ မျောက်ကျောက်ရောဂါသံသရှိပါကနီးစပ်ရာဆေးရုံ၊ ဆေးပေးခန်းများတွင် စစ်ဆေးကုသနိုင်ရန်ကြိုတင်ပြင်ဆင်ထားဟုဆို

၂။ ပြည်တွင်းတွင် ပန်းချီဈေးကွက်ကို ရင်းနှီးမြှုပ်နှံသူများပြားလာ

၃။ နေ့စဉ်မိုးလေဝသသတင်း။

၄။ တရုတ်နိုင်ငံတွင် ကျေးလက်ဒေသအထိ ပြန်လည်ပြည့်ဖြိုးမြဲစွမ်းအင်များ တိုးတက်ထုတ်လုပ်နေ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#WorldPolitics
Published 3 June 2022

အမေရိကန်နိုင်ငံခြားရေးဌာနက ထိုင်ဝမ်ကျွန်းနိုင်ငံနဲ့ ပတ်သက်တဲ့အကြောင်းအရာကို မွမ်းမံပြင်ဆင်လိုက်ကာ ထိုင်ဝမ်ရဲ့တရားဝင်လွတ်လပ်ခွင့်အား ထောက်ခံခြင်းမရှိကြောင်း တရားဝင်ပြန်လည်ပြင်ဆင်ထုတ်ပြန်လိုက်ပါတယ်။

ပြီးခဲ့တဲ့လတုန်းက အမေရိကန်နိုင်ငံခြားရေးဌာနက ထိုင်ဝမ်နဲ့ပတ်သက်ပြီး ဝက်ဘ်ဆိုက်ပေါ်မှာ သူတို့ရဲ့အသုံးအနှုန်းကို ပြင်ဆင်ခဲ့ကာ ထိုင်ဝမ်ရဲ့လွတ်လပ်ခွင့်အားမထောက်ခံကြောင်းနဲ့ ထိုင်ဝမ်ကို တရုတ်နိုင်ငံရဲ့တစ်စိတ်တစ်ဒေသအဖြစ် အသိအမှတ်ပြုကြောင်းတို့ကို အမေရိကန်တို့က ပြုပြင်ဖယ်ရှားခဲ့တာကြောင့် တရုတ်တို့အမြတ်ထွက်စရာ ဖြစ်ခဲ့ပါတယ်။

ဒီပြင်ဆင်ချက်ကြောင့် နိုင်ငံရေးမူဝါဒ ပေါ်လစီပြောင်းလဲသွားမှာ မဟုတ်ဘူးလို့ ဝါရှင်တန်ကပြောပါတယ်။

အခုအချိန်မှာတော့ ဒီအသုံးအနှုန်းကို ထပ်မံပြောင်းလဲလိုက်ပြီး ထိုင်ဝမ်ကိုယ်ပိုင်လွတ်လပ်ခွင့်ကိုမထောက်ခံကြောင်း ပြင်ဆင်ထုတ်ပြန်ခဲ့ပါတယ်။

ဒီပြင်ဆင်ချက်ကို ထိုင်ဝမ်တရားဝင် ဗဟိုသတင်းဌာနက သောကြာနေ့မှာ အရင်ဆုံးဖော်ပြခဲ့ပြီး တရားဝင်ထုတ်ပြန်ချက်ရက်စွဲကတော့ မေလ ၂၈ ရက်နေ့လိုယူဆရပါတယ်။

နိုင်ငံခြားရေးဌာနကတော့ ချက်ချင်းဖြေရှင်းပြောကြားခြင်းမရှိသေးပါဘူး။

အမေရိကန်ဘက်က ထိုင်ဝမ်ကိုယ်ပိုင်လွတ်လပ်ခွင့်ကို မထောက်ခံကြောင်း၊ ဒီကိစ္စကိုတစ်ဦးချင်းရော အများသိအောင်ပါ ထပ်ခါထပ်ခါရှင်းလင်းချပြပြီးဖြစ်ကြောင်း အမေရိကန်နိုင်ငံခြားရေးဌာနမှ ပြောရေးဆိုခွင့်ရှိသူ'နက်ဒ်ပရိုက်စ်'က မေလကပြောကြားခဲ့ပါတယ်။

ထိုင်ဝမ်ကျွန်းနိုင်ငံဟာ လက်တွေ့မှာ လွတ်လပ်ခွင့်ရနိုင်ငံဖြစ်နေပေမယ့် နိုင်ငံတကာအသိအမှတ်ပြုမှု အနည်းငယ်သာရှိနေပါတယ်။

ဝါရှင်တန်က ထိုင်ပေနဲ့တရားဝင်ဆက်ဆံရေးမရှိပေမယ့် နိုင်ငံတကာငွေကြေးလက်နက်ထောက်ပံ့မှုတွေမှာ အရေးပါဆုံးနိုင်ငံဖြစ်နေပါတယ်။

မြို့တော်ပေကျင်းနဲ့ တရုတ်ပြည်သူ့သမ္မတနိုင်ငံကိုတည်ထောင်ခဲ့တဲ့ ကွန်မြူနစ်ပါတီက ပြည်တွင်းစစ်ရှုံးနိမ့်ပြီးနောက် ၁၉၄၉ ခုနှစ်မှာ အဆိုပါ ကျွန်းသို့ထွက်ပြေးလာခဲ့တာကြောင့် ထိုင်ဝမ်ဟာ တရုတ်ပြည်သူ့သမ္မတနိုင်ငံအမည်နဲ့ပဲ ဆက်ရှိနေရပါတယ်။

ထိုင်ဝမ်အနေနဲ့ ခွဲထွက်မည်ဟုဆုံးဖြတ်ပါက ပေကျင်းကနေ စစ်ရေးအရအရေးယူရန် ဥပဒေကို တရုတ်အစိုးရက ၂၀၀၅ ခုနှစ်မှာထုတ်ပြန်ခဲ့ပါတယ်။

ထိုင်ဝမ်အစိုးရကတော့ ကျွန်းပေါ်က လူဦးရေ ၂၃ သန်းကသာ သူတို့ရဲ့အနာဂတ်ကို ဆုံးဖြတ်ခွင့်ရှိကြောင်း၊ ငြိမ်းချမ်းရေးလိုလားပေမယ့် တိုက်ခိုက်ခံလာရရင် ကိုယ်တိုင်ကာကွယ်သွားမှာဖြစ်ကြောင်း ပြောကြားလိုက်ပါတယ်။

Source: Reuters
#Yangon_Media_Group