#LocalNews
Pulished_2 June2022

ကျောင်းဖွင့်ရာသီဖြစ်တဲ့ ယခု ဇွန်လ ၂ရက်နေ့တွင် ရန်ကုန်မြို့တွင်းမှာရှိတဲ့ ကျောင်းသုံးပစ္စည်းအရောင်းဆိုင်တစ်ချို့မှာ ရောင်းအားတက်နေပြီး ကျောင်းသုံးပစ္စည်းများ ထပ်မံမှာယူရာတွင် အခက်အခဲတစ်ချို့ရှိနေကြောင်း ယင်းပစ္စည်းရောင်းချသော ဆိုင်များထံမှ သိရသည်။

"အမတို့ဆိုင်ကတော့ အရင်လတွေက ရောင်းအားကတော့ ပုံမှန်လောက်တော့ ရောင်းရပါတယ်။ အခုကျောင်းဖွင့်ရာသီ ဇွန်လ ၁ရက်နေ့ကနေ ဒီနေ့ ၂ရက်နေ့အထိကတော့ အရောင်းတက်လာပါတယ်။ အရင်ထက်စာရင်တော့ရောင်းအား တက်လာပေမယ့် ပြန်ဝယ်ရတဲ့အခါမှာတော့ နည်းနည်းတော့ အခက်အခဲရှိပါတယ်။ အမတို့ဆိုင်ကတော့ ပစ္စည်းတွေကို ပြည်တွင်းကရော ပြည်ပကရော ၂မျိုးလုံးတင်သွင်းပါတယ်။ အဲ့လိုတင်သွင်းတဲ့အခါ ပြည်ပကနေတင်သွင်းတဲ့ ပစ္စည်းတွေကို အရင်ထက်စာရင် တင်သွင်းခွင့် လိုင်စင်လျှောက်ရတာတွေက ကြန့်ကြာတယ်၊ ပြီးတော့ မှာတဲ့အခါ ၁လလောက်နဲ့ ရောက်ရမယ့် ပစ္စည်းတွေက ၃လ ၄လလောက်ကြာတာမျိုးတွေကြုံရပါတယ်။ ပစ္စည်းလုံးဝပြတ်သွားတာမျိုးတော့ မကြုံရသေးပါဘူး"ဟု ရန်ကုန်မြို့တွင်း ကျောင်းသုံးပစ္စည်း အရောင်းဆိုင်တစ်ဆိုင်မှ သိရသည်။

ယခုကျောင်းဖွင့်ရာသီတွင် ပုံမှန်ထက်ပိုသော ရောင်းဝယ်မှုမျိုးနှင့် ကြုံနေရပြီး ကျောင်းဖွင့်ရာသီမရောက်သေးသည့် ကာလများတွင်လည်း ရုံးဝန်ထမ်းများ၊ သင်တန်းသားများကြောင့် ပုံမှန်ရောင်းအားရှိနေကြောင်း ရောင်းချသူများထံမှ တစ်ဆင့်သိရသည်။

photo credit : facebook

ygm/NN
#Yangon_Media_Group

#LocalNews
Pulished_2 June2022

လက်ရှိပြည်တွင်းမှာ နိုင်ငံတကာရဲ့ ငွေကြေးဈေးနှုန်းအပြောင်းအလဲများ၊ ကုန်သွယ်မှုဆိုင်ရာများနဲ့ကြုံတွေ့နေရပြီး ထိုအခြေအနေကို အခွင့်အရေးတစ်ခုအဖြစ် အသုံးချနိုင်ရေးအတွက် နို့ထွက်ပစ္စည်းများအပါအဝင် မွေးမြူရေးကိုအခြေခံသည့် ကုန်ချောထုတ်စက်မှုလုပ်ငန်းများ ကျယ်ပြန့်စွာပေါ်ထွက်လာရေးကို ဦးတည်နေလျှက်ရှိကြောင်းကို မေလ(၃၀)ရက်နေ့က မိတ္ထီလာမြို့နယ် ညောင်ပင်သာကျေးရွာရှိ ကောင်းထက်စံ နို့စားနွားမွေးမြူရေးခြံ၌ ပုဂ္ဂလိကလုပ်ငန်းရှင်များနှင့်တွေ့ဆုံစဥ် ဒုတိယဝန်ကြီး ဒေါက်တာအောင်ကြီး က ဆွေးနွေးပြောကြားခဲ့သည်။

"အရည်အသွေးမြင့်ပြီး ဈေးကွက်တွင် ယှဉ်ပြိုင်နိုင်သော ထုတ်ကုန်များကို အလေးထား ထုတ်လုပ်ကြဖို့နဲ့ ပြည်တွင်းဈေးကွက်ဝေစု ရရှိရေးသာမက ပြည်ပပို့ကုန်အနေဖြင့် ဒေသတွင်းနှင့် နိုင်ငံတကာဈေးကွက်အထိ ဝင်ရောက်ရန် လုပ်ဆောင်ဖို့လိုကြောင်း" ဒုတိယဝန်ကြီးက ပြောသည်။

စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန အနေဖြင့် ပုဂ္ဂလိကမွေးမြူရေးလုပ်ငန်းများ ဖွံ့ဖြိုးလာရေးအတွက် အားပေးကူညီလျက်ရှိကာ အာဟာရပြည့်ဝပြီး ဈေးနှုန်းချိုသာသော မွေးမြူရေးထွက်ကုန်များကို ပြည်သူများ ပေါပေါများများစားသုံးနိုင်ကြရန် ဘက်စုံကဏ္ဍစုံမှ ကြိုးပမ်းလျက်ရှိပြီး တစ်ချိန်တည်းတွင် ပြည်တွင်းထုတ် နို့နှင့် နို့ထွက်ပစ္စည်းများအပါအဝင် မွေးမြူရေးကို အခြေခံသည့် ကုန်ချောထုတ်စက်မှုလုပ်ငန်းများ ကျယ်ပြန့်စွာပေါ်ထွန်းလာရေးကို ဦးတည်ဆောင်ရွက်လျက်ရှိကြောင်း သိရသည်။

ထို့ပြင် သာစည်မြို့နယ် အောင်သာကျေးရွာ မိုးကြိုချည်မျှင်ရှည်ဝါ အထူးဇုန် ဧက(၂၅၀)စံပြကွင်းတွင် "ချည်မျှင်ရှည်ဝါ တိုးချဲ့စိုက်ပျိုးနိုင်ရေးအတွက် အဓိကလိုအပ်ချက်ဖြစ်သော ဝါ မျိုးကောင်းမျိုးသန့်ပွားများ ဖြန့်ဖြူးနိုင်ရေး၊ ဝါသီးနှံ ဈေးကွက်အလားအလာနှင့် ဝန်ကြီးဌာနက နည်းပညာနဲ့ လိုအပ်ချက်များကို ကူညီဆောင်ရွက်ပေးသွားမည်ဖြစ်ကြောင်း" တာဝန်ရှိသူက ပြောသည်။

အလားတူ ပျော်ဘွယ်မြို့နယ် ဝါသီးနှံမျိုးသန့်ခြံတွင် ချည်မျှင်ရှည်ဝါ စိုက်ပျိုးချိန် အလိုက် ဝါအထွက်နှုန်းအပေါ် အကျိုးသက်ရောက်မှုများ၊ အရည်အသွေးကောင်း ဝါမျိုးသန့်များ ထုတ်လုပ်ဖြန့်ဖြူးပေးနေမှုနှင့် တောင်သူပညာပေးလုပ်ငန်း ဆောင်ရွက်နေပြီး တောင်သူများအနေဖြင့် စီးပွားရေးတွက်ခြေကိုက်သည့် အထွက်နှုန်းနှင့် ဝင်ငွေရရှိစေမည့် ဝါမျိုးကောင်းမျိုးသန့်များ တိုးမြှင့်ထုတ်လုပ်ရန် လိုအပ်ချက်များ၊ ရေမြေရာသီဥတုနှင့် သီးနှံ၏မျိုးဗီဇအရ လိုအပ်သည့် စိုက်ပျိုးရေး သွင်းအားစုများကို အလေအလွင့်မရှိဘဲ အကျိုးရှိရှိထိရောက်စွာ အသုံးချနိုင်ရေးများကို တာဝန်ရှိသူများထံ ဆွေးနွေးမှာကြားခဲ့ကြောင်း နစက သတင်းထုတ်ပြန်ချက်များအရ သိရသည်။

ygm/NN
#Yangon_Media_Group

#LocalNews
Published - 2 June 2022

ယနေ့ ဇွန်လ ၂ ရက်တွင် မြန်မာနိုင်ငံတစ်ဝန်းလုံးရှိ အခြေခံပညာသင်ကျောင်းများ ပြန်လည်ဖွင့်လှစ်ခဲ့ကြောင်း ပညာရေးဝန်ကြီးဌာနလက်အောက်ရှိ အခြေခံပညာဦးစီးဌာနမှ သိရသည်။

ပြီးခဲ့သည့် မေလ ၂၆ ရက်မှစတင်၍ ကျောင်းအပ်နှံမှု လက်ခံခဲ့ပြီး တစ်နိုင်ငံလုံးအတိုင်းအတာအရ ကျောင်းအပ်သူအရေအတွက် ငါးသန်းကျော်အထိ ရှိခဲ့ကြောင်း နိုင်ငံတော်စီမံအုပ်ချုပ်ရေးကောင်စီမှထုတ်ပြန်သည့် စာရင်းများအရ သိရသည်။

ဇွန်လ ၂ ရက် ရခိုင်ပြည်နယ်တွင် အခြေခံပညာကျောင်းပေါင်း ၃,၀၀၀ ကျော်ဖွင့်လှစ်နိုင်ခဲ့သော်လည်း ပဋိပက္ခများနှင့် တိုက်ပွဲများကြောင့် မောင်တော၊ ဘူးသီးတောင်၊ ရသေ့တောင်နှင့် ကျောက်တော်မြို့နယ်တို့တွင် ပိတ်ထားရသည့် စာသင်ကျောင်း ၁၂၂ ကျောင်းကို ပြန်ဖွင့်နိုင်ခြင်းမရှိသေးကြောင်း သိရသည်။

ymg/sth
#Yangon_Media_Group

#LocalNews
Published - 2 June 2022

ပဲမျိုးစုံ၊ ဆီထွက်သီးနှံနှင့် စားဆီတင်ပို့မှုအတွက် ပို့ကုန်လိုင်စင်လျှောက်ထားရာတွင် လွယ်ကူသော်လည်း ၂၀၂၂ ခုနှစ်အတွင်း ပြည်ပပဲတင်ပို့မှုလစဥ်လျော့နည်းလာကြောင်း မြန်မာနိုင်ငံပဲမျိုးစုံ၊ ပြောင်းနှင့်နှမ်းကုန်သည်များအသင်းဥက္ကဌ ဦးထွန်းလွင်က ပြောသည်။

"လိုင်စင်လျှောက်တာကတော့ အွန်လိုင်းကနေလျှောက်ရတာပေါ့၊ သူကလျှောက်ပြီးမကြာဘူး ချက်ခြင်းထုတ်လို့ရတယ့် အနေအထားရှိတယ်ပေါ့၊ လိုင်စင်ကြေးတွေကလည်း approve ဖြစ်တဲ့အတွက် အွန်လိုင်းကြေးပဲ တစ်တန်ကိုသုံးထောင်လောက်ပဲကျမှာပါ၊ ထူးထူးခြားခြားကြီးတေ့ာ အခက်အခဲ မရှိလောက်ဘူး၊ မှတ်တမ်းတွေအရကြည့်မယ်ဆိုရင်တော့ မတ်လမှာပို့ထားတဲ့ပမာဏထက် ဧပြီလမှာပို့တဲ့ ပမာဏကလျော့သွားတယ် သုံးပုံတစ်ပုံလောက်လျော့သွားတယ်၊ အဲဒီလိုပဲ မေလမှာပို့တဲ့ပမာဏကလည်း ဧပြီနဲ့ယှဥ်မယ်ဆိုရင် ဧပြီထက်ကို ၂၀ ရာခိုက်နှုန်းလောက်လျော့သွားတယ်၊ ဘာကြောင့်လျော့နည်းတာလဲဆိုရင် ပြည်ပကအဝယ်နည်းသွားတာရယ် ဒေါ်လာကန့်သတ်ချက်တွေကြောင့်လည်းပါတယ်"ဟု ဦးထွန်းလွင်ကပြောသည်။

ပို့ကုန်လိုင်စင်လျှောက်ထားရန်အတွက် လိုအပ်သည့် ကုန်စည်များတွင် ပဲမျိုးစုံ၊ မြေပဲ၊ နှမ်း၊ ပဲပုတ်စေ့၊ နေကြာစေ့၊ မုန်ညင်းစေ့နှင့် ဆီထွက်သီးနှံအစေ့အဆံများ၊ ပဲပုတ်ဆီ၊ သံလွင်ဆီ၊ ဆီအုန်း၊ မြေပဲဆီ၊ နှမ်းဆီ၊ နေကြာဆီ၊ မုန်ညင်းဆီနှင့် ဟင်းသီးဟင်းရွက်အဆီစသည့် ဆီအမျိုးမျိုးပါဝင်ပြီး ကြက်သွန်နီ၊ ကြက်သွန်ဖြူ၊ ကြက်သွန်မြိတ်စသည့် ကုန်စည်များပါဝင်ပြီး သြဂုတ်လ ၁ ရက်တွင် စတင်လျှောက်ထားရမည်ဖြစ်ကြောင်း သိရသည်။

မြန်မာနိုင်ငံမှ ပဲများကို အိန္ဒိယနိုင်ငံသို ၇၅ ရာခိုင်နှုန်းထိ တင်ပို့နေပြီး သီရိလင်္ကာ၊ နီပေါ၊ မလေးရှား၊ ထိုင်းနှင့် UAE နိုင်ငံများကိုလည်း ပဲမျိုးစုံတင်ပို့နေကြောင်းသိရသည်။

ymg/sth
#Yangon_Media_Group

#Local_News
Published_ 2 June 2022

မလေးရှားနိုင်ငံမှာ အကြောင်းအမျိုးမျိုးကြောင့် ဖမ်းဆီးထိန်းသိမ်းခံနေရပြီး ထိန်းသိမ်းရေးစခန်းတွေမှာ ရောက်ရှိနေတဲ့ မြန်မာနိုင်ငံသား ၃၁ ဦးကို ဒီကနေ့ (ဇွန် ၂ ရက်) မှာ အပြည်ပြည်ဆိုင်ရာမြန်မာလေကြောင်း(MAI)ရဲ့ ကယ်ဆယ်ရေးလေယာဉ်နဲ့ မြန်မာနိုင်ငံသို့ ပြန်လည်ပို့ဆောင်ပေးခဲ့တယ်လို့ မလေးရှားမှာရှိတဲ့ မြန်မာသံရုံးက ထုတ်ပြန်ထားပါတယ်။

မြန်မာသံရုံးအနေနဲ့ မလေးရှားနိုင်ငံမှာ အကြောင်းအမျိုးမျိုးကြောင့် ပြစ်ဒဏ်ကျခံခဲ့ရပြီး ထိန်းသိမ်းရေးစခန်းတွေမှာ ရောက်ရှိနေသူတွေကို သွားရောက်တွေ့ဆုံပြီး ၎င်းတို့မြန်မာနိုင်ငံကို အမြန်ဆုံးပြန်နိုင်ရေး စီစဉ်ဆောင်ရွက်ပေးနေတယ်လို့ ဆိုပါတယ်။

သံရုံးအနေနဲ့ မေ ၁၉ ရက်တွင် မြန်မာနိုင်ငံသား ၉၃ ဦး၊ မေ ၂၅ ရက်တွင် ၄၀ ဦး၊ မေ ၂၆ ရက်တွင် ၃၉ ဦးတို့ကို ပြန်လည်ပို့ဆောင်ပေးခဲ့ပြီးဖြစ်တယ်လို့ မြန်မာသံရုံးရဲ့ ထုတ်ပြန်ချက်များအရ သိရပါတယ်။

ymg-mnn
#Yangon_Media_Group

#DailyNews
Published - 2 June 2022

၁။ မြေငလျင်များ ခပ်စိပ်စိပ်ပြန်လှုပ်နေ၊ ရန်ကုန်၊ မန္တလေး၊ ပဲခူးဒေသများ မြေငလျင်ကြီးများတစ်ကျော့ပြန်လှုပ်ခတ်မည်ကို သတိပြုရန်လို

၂။ တရုတ်နိုင်ငံဘက်ခြမ်းတွင် ပိတ်မိနေသော ကုန်တင်ယာဉ်နှင့် ကုန်စည်များကို မြန်မာနိုင်ငံသို့ ပိုဆောင်ခွင့်ရ

၃။ နေ့စဉ်မိုးလေဝသသတင်း။

၄။ လောင်စာဆီပြတ်လတ်ပြီးနောက် သီရိလင်္ကာဆိပ်ကမ်းမှ အလုပ်သမားများ စက်ဘီးဖြင့်အလုပ်ခွင်သို့သွားလာနေရ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published_2 June 2022

မြန်မာ-ဘင်္ဂလားဒေ့ရှ် နှစ်နိုင်ငံအနေဖြင့် တရားမဝင် နယ်စပ်ဖြတ်ကျော်မှုနှင့် မူးယစ်ဆေးဝါးတားဆီးရေးကိစ္စများကို ဇွန်လ ၁ ရက်က ဆွေးနွေးခဲ့ကြကြောင်း သိရသည်။

မြန်မာ-ဘင်္ဂလားဒေ့ရှ် နယ်နိမိတ်များအတွင်းနှင့် နယ်စပ်တစ်လျှောက် နတ်မြစ်ဖြတ်ကျော် သွားလာလှုပ်ရှား၍ နယ်စပ်ဖြတ်ကျော်မှုခင်းများ ကျူးလွန်မှုများနှင့်ပတ်သက်၍ မြေပြင်သတင်း စုံစမ်းဖော်ထုတ်ရေးနှင့် တားဆီးနှိမ်နင်းရေး၊ ဘင်္ဂလားဒေ့ရှ်နိုင်ငံဘက်မှ မြန်မာနိုင်ငံအတွင်း နယ်စပ်ခြံစည်းရိုးကို တရားမဝင်ဖြတ်ကျော်ဝင်ရောက်မှုများ ထိရောက်စွာတားဆီးပေးနိုင်ရေး၊ နှစ်နိုင်ငံနယ်ခြားစောင့် တပ်ဖွဲများအကြား ပူးတွဲကင်းလှည့်ရေး၊ မူးယစ်ဆေးဝါးတားဆီးနှိမ်နင်းရေးနှင့်ပတ်သက်၍ သတင်းအချက်အလက် ဖလှယ်ရေးတို့ကို ပိုမိုတိုးမြှင့် ဆောင်ရွက်သွားရန်အပါအဝင် အချက် ၁၁ ချက်ကို ဆွေးနွေးခဲ့ကြခြင်း ဖြစ်ကြောင်းသိရသည်။

ရခိုင်ပြည်နယ် မောင်တောမြို့၊ ခရိုင်အထွေထွေ အုပ်ချုပ်ရေးမှူးရုံးအစည်းအဝေးခန်းမ၌ အဆိုပါ ဆွေးနွေးပွဲကို ကျင်းပခြင်းဖြစ်ပြီး မြန်မာနိုင်ငံဖက်မှ အမှတ်(၁)နယ်ခြားစောင့်ရဲကွပ်ကဲမှုအဖွဲ့မှူး ရဲမှူးချုပ် ထက်လွင်ဦးဆောင်သော ကိုယ်စားလှယ်အဖွဲ့နှင့် ဘင်္ဂလားဒေ့ရှ် နယ်ခြားစောင့်တပ်၊ ဒေသကွပ်ကဲမှု ဌာနချုပ် (ကော့စ်ဘဇ္ဇား)မှ ဒေသကွပ်ကဲရေးမှူး ဗိုလ်မှူးချုပ် Najm-Us-Sakib ဦးဆောင်သော ကိုယ်စားလှယ်အဖွဲတိုတက်ရောက်ကြကြောင်း သိရသည်။

အဆိုပါ ဆွေးနွေးမှုများထဲတွင် အစည်းအဝေးတွင် မြန်မာ-ဘင်္ဂလားဒေ့ရှ် နှစ်နိုင်ငံနယ်နိမိတ်မှတ်တိုင်များအနီး အဆောက်အဦ ဆောက်လုပ်မှုများဖျက်သိမ်းရေး၊ နယ်စပ်ဒေသအတွင်း အကြမ်းဖက်သောင်းကျန်းသူအဖွဲ့များ လှုပ်ရှားနေမှု၊ ပစ်ခတ်မှုဖြစ်စဉ်များစသည့် သတင်းများနှင့်စပ်လျဉ်း၍ အပြန်အလှန် သတင်းဖလှယ်ပေးရန်၊ မြန်မာ-ဘင်္ဂလားဒေ့ရှ် နှစ်နိုင်ငံနယ်စပ်ဆက်ဆံရေးရုံး (မောင်တော-တက္ကနာ့ဖ်) လုပ်ငန်းစဉ်များ အကောင်အထည်ဖော်နိုင်ရေး၊ နှစ်နိုင်ငံ နယ်ခြားစောင့်တပ်ဖွဲ့များအကြား ချစ်ကြည်ရင်းနှီးမှု၊ အပြန်အလှန်ယုံကြည်လေးစားမှုတို့ ပိုမိုဖြစ်ထွန်းနိုင်ရေးအတွက် ချစ်ကြည်ရေး အားကစားပြိုင်ပွဲများ၊ ယဉ်ကျေးမှုဖလှယ်မည့် ကိစ္စရပ်များ၊ ချစ်ကြည်ရေးခရီးစဉ်များ ပြုလုပ်နိုင်ရေး နှစ်ဖက်ညှိနှိုင်းဆောင်ရွက်သွားရန်စသည့်အချက်များကိုလည်း ဆွေးနွေးခဲ့ကြကြောင်း သိရသည်။

ymg/mt
#Yangon_Media_Group

#WorldMilitary
Published 2 June 2022

အမေရိကန်အစိုးရက MQ-1C Gray Eagle ဒရုန်း ၄ စီးကို ယူကရိန်းသို့ရောင်းချပေးဖို့ စီစဉ်နေကြောင်း သတင်းနီးစပ်သူ ၃ ဦးထံမှသိရှိရပါတယ်။

အဆိုပါ ဒရုန်းတွေကို ရုရှားနဲ့ဖြစ်ပွားနေတဲ့စစ်မြေပြင်တွေမှာ အသုံးပြုနိုင်မယ့် Hellfire ဒုံးကျည်တွေတပ်ဆင်နိုင်မှာ ဖြစ်ပါတယ်။

ဒီဒရုန်းတွေကို General Atomics စွမ်းအင်ကုမ္ပဏီက ထုတ်လုပ်တာဖြစ်ပြီး ရောင်းချဖို့ကိစ္စကို လွှတ်တော်က ပိတ်ပင်တာမျိုး ဖြစ်နိုင်ပါသေးတယ်။

ရောင်းချဖို့အဆိုကို ပင်တဂွန်မှာရက်သတ္တပတ်ပေါင်းများစွာ ဆန်းစစ်နေပြီး နောက်ဆုံးမိနစ်ရောက်မှ အစီအစဉ်ပျက်သွားတာမျိုး ဖြစ်နိုင်ချေရှိနိုင်သေးကြောင်း ထည့်သွင်းပြောကြားခဲ့ပါတယ်။

ဖေဖော်ဝါရီ ၂၄ ရက်နေ့က ကျူးကျော်လာတဲ့ရုရှားတပ်တွေကို ယူကရိန်းတိုက ပိုမိုသေးငယ်ပြီး အကွာအဝေးပိုတိုတောင်းတဲ့ မောင်းသူမဲ့လေကြောင်းယာဉ်အမျိုးမျိုးကို အသုံးပြုတိုက်ခိုက်နေခဲ့ပါတယ်။

ထိုအမျိုးအစားတွေထဲမှာ AeroVironment RQ-20 Puma AE နဲ့ တူရကီထုတ် Bayraktar-TB2 တို့ ပါဝင်ပါတယ်။

အခုရောင်းချမယ့် Gray Eagle ဒရုန်းတွေက နည်းပညာအတော်လေးမြင့်မားနေပြီး သတ်မှတ်ထားတဲ့ တာဝန်ဆောင်တာများအပေါ်မူတည်၍ နာရီ ၃၀ ကျော်ကြာပျံသန်းနိုင်မှာဖြစ်သလို ထောက်လှမ်းရေးအတွက် အချက်အလက်များစွာ စုဆောင်းထားနိုင်ပါတယ်။

Gray Eagle ဒရုန်းက အသုံးများတဲ့ Predator ဒရုန်းကို စစ်တပ်ဘက်ကအသုံးပြုတဲ့ပုံစံဖြစ်အောင်ပြုလုပ်ထားပြီး စွမ်းအားမြင့် Hellfire ဒုံးကျည် ၈ စင်းသယ်ဆောင်နိုင်ပါတယ်။

အမေရိကန်ရဲ့အဆင့်မြင့်နည်းပညာများဖြင့် စစ်မြေပြင်မှာရုရှားတွေကို ထိထိရောက်ရောက်တိုက်ခိုက်နိုင်မှာဖြစ်တာကြောင့် အခုရောင်းချမှုက အတော်လေးအရေးပါနေပါတယ်။

သမ္မတ'ဂျိုးဘိုင်ဒန်'နဲ့အစိုးရအဖွဲ့က လာမယ့်ရက်များအတွင်း ယူကရိန်းသို စစ်လက်နက်များရောင်းချနိုင်မယ့်အရေးကို လွှတ်တော်ထံအကြောင်းကြားဖို့ရည်ရွယ်ထားပြီး အဲဒီနောက်အများသိအောင်ကြေညာချက်ထုတ်ပြန်ဖို့ မျှော်မှန်းထားကြောင်း အမေရိကန်တာဝန်ရှိသူတစ်ဦးကဆိုပါတယ်။

ယူကရိန်းလုံခြုံရေးအထောက်အပြုဒေါ်လာ ၄၀ ဘီလီယံကို အထမြောက်လာနိုင်တဲ့ ရောင်းချမှုနဲ့ ဒရုန်းလေ့ကျင့်သင်ကြားရေးများအတွက် ရန်ပုံငွေအဖြစ်ဖယ်ထားလိုက်ပါတယ်။

"ယေဘုယျအားဖြင့် MQ-1C က Bayraktar-TB2 ထက် ၃ ဆခန့်ပိုလေးပြီး သယ်ဆောင်နိုင်တဲ့တန်ချိန်၊ အကွာအဝေး၊ ခံနိုင်ရည်ရှိမှုတို့မှာ အားသာချက်အသင့်အတင့်ရှိနေပါတယ်" လို့ Vertical Flight Society မှ ဒရုန်းကျွမ်းကျင်ပညာရှင်'ဒန်ဂတ်တင်ဂါ'က ပြောပြပါတယ်။

MQ-1C က Bayraktar-TB2 ထက်စာရင် လက်နက်ဒုံးကျည်မျိုးစုံနဲ့လည်း အသုံးပြုနိုင်ပါသေးတယ်။

ယူကရိန်းရဲ့ Bayraktar က တူရကီထုတ် ၂၂ ကီလိုဂရမ်ရှိတဲ့ MAM-L ဒုံးကျည်များဖြင့် တပ်ဆင်ပြီး Hellfire ရဲ့အလေးချိန်တဝက်ခန့်ရှိပါတယ်။

General Atomics ကသင်ကြားပေးတဲ့ UAV စနစ်လေ့ကျင့်ရေးတွေက လနဲ့ချီအောင်ကြာတတ်ပေမယ့် အတွေ့အကြုံရှိတဲ့ ယူကရိန်းဒရုန်းထိန်းချုပ်သူတွေကိုတော့ ရက်သတ္တပတ်အနည်းငယ်ဖြင့် သင်ကြားပေးဖို့ အဆိုပြုခဲ့ပါတယ်။

ဗုဒ္ဓဟူးနေ့ကကြေညာချက်မတိုင်ခင်အထိ ယူကရိန်းအတွက် HIMARS ဒုံးပျံ ၄ ခုရရှိနိုင်ပြီး Javelin တင့်ကားဖျက်လက်နက်နဲ့ Stinger လေယာဉ်ပစ်လက်နက်တွေကိုလည်း မဟာမိတ်နိုင်ငံတွေက ကုန်တင်ကားများဖြင့် ယူကရိန်းသိုနေ့စဉ်နီးပါး ပို့ဆောင်ပေးနေပြီး တကယ်အသုံးဝင်တဲ့ လက်နက်များဖြစ်ကြောင်း ပင်တဂွန်ကပြောကြားထားပါတယ်။

Source: Reu
#Yangon_Media_Group

Published 2 June 2022

ဖေ့စ်ဘုတ်( Meta Platforms)ရဲ့စီးအီးအို မတ်ဇူကာဘတ်နှင့်အတူတွဲပြီး ဖေ့စ်ဘုတ်ကို ကမ္ဘာ့အကြီးဆုံးလူမှုကွန်ယက်ကြီး တစ်ခုအဖြစ် စွမ်းဆောင်ခဲ့တဲ့ ဖေ့စ်ဘုတ်ရဲ့ စီအိုအို (လုပ်ငန်းလည်ပတ်ရေးအရာရှိချုပ်) ရှာရီဆန်းဘတ်ဟာ ကုမ္ပဏီမှာ ၁၄နှစ် အလုပ်လုပ်ပြီးနောက် အလုပ်ထွက်လိုက်ပြီလို့ သူမက ဖေ့စ်ဘုတ်ကနေတစ်ဆင့် ဗုဒ္ဓဟူးနေ့တုန်းက ကြေညာပါတယ်။

အဲဒီကြေညာချက်ကြောင့် အစပိုင်းမှာ ဖေ့စ်ဘုတ်ခ်ရဲ့ ရှယ်ယာက ၄ရာခိုင်နှုန်းကျဆင်းသွားပေမယ့် နာရီအနည်းငယ်အကြာမှာတော့ ဆက်မကျတော့ဘဲ တန်းသွားပါတယ်။

“ ၂၀၀၈ခုနှစ်တုန်းက ဒီအလုပ်စလုပ်တော့ ငါးနှစ်လောက်ပဲလုပ်မယ်လို့ ထင်ခဲ့တာ ၁၄နှစ်ကြာသွားတယ်။ ယခုတော့ ကျွန်မဘဝအတွက် ကဏ္ဍသစ်တစ်ခု ရေးဖို့အချိန်ရောက်ပြီ” လို့ သူမကရေးပါတယ်။

ဖွံ့ဖြိုးတိုးတက်ရေးအရာရှိချုပ်(စီဂျီအို) ဂျာဗီးယားအိုလီဗန်ဟာ သူမနေရာကို လွှဲပြောင်းတာဝန်ယူမယ်လို့ ဇူကာဘတ်က သီးခြားဖေ့စ်ဘုတ်ပို့စ်မှာ ရေးသားပါတယ်။ ကုမ္ပဏီရဲ့ လက်ရှိဖွဲ့စည်းပုံအတွင်း ဆန်းဘတ်ရဲ့ အခန်းကဏ္ဏကို သူ့အနေနှင့် အစားထိုးဖို့ မစီစဉ်ခဲ့ဘူးလို့ သူက ထပ်ပြောပါတယ်။

“မက်တာဟာ လုပ်ငန်းတွေအားလုံးနှင့် လည်ပတ်မှုတွေဟာ ကျွန်တော်တို့ထုတ်ကုန်တွေနှင့် ခွဲပြီးဆောင်ရွက်နေတာထက် ထုတ်ကုန်တွေနှင့် လုပ်ငန်းအုပ်စုတွေ ပိုပြီး နီးနီးကပ်ကပ်စုစည်းဖို့ အဆင့်ရောက်ခဲ့ပြီလို့ ကျွန်တော်ထင်ပါတယ်” လို့ ဇူကာဘတ်ကပြောပါတယ်။

အိုလီဗန်ဟာ မက်တာ(ဖေ့စ်ဘုတ်ခ်)နှင့် အလုပ်လုပ်နေတာ ၁၄နှစ်ရှိပြီးဖြစ်ပြီး ဖေ့စ်ဘုတ်ခ်၊အင်စတာဂရမ်၊ WhatsApp  နှင့် မက်ဆင်ဂျာအဖွဲ့တွေကို ဦးဆောင်နေသူဖြစ်ပါတယ်။

ဆန်းဘတ်ထွက်ခွာမှုကို မက်တာခေတ်အဆုံးသတ်မှုလို့ မှတ်ယူရမှာဖြစ်ပါတယ်။ မက်တာဟာ သူ့ပလက်ဖောင်းပေါ်မှာ ကိုယ်ရေးလွတ်လပ်ခွင့် စော်ကားနှောက်ယှက်မှုတွေနှင့် အရှုပ်တော်ပုံအကြောင်းအရာတွေ ပျံ့နှံ့မှုတွေနှင့်ပတ်သက်လို့ နှစ်ပေါင်းများစွာ သိက္ခာကျစရာတွေနှင့် ဖေ့စ်ဘုတ်ခ်သုံးသူတွေ တန့်သွားပြီးနောက် ဟာ့ဒ်ဝဲလ်ထုတ်ကုန်တွေနှင့် တက်တာဗာ့စ်ဆီ ပြောင်းရွှေ့အာရုံစိုက်ခဲ့ပါတယ်။  

ဆန်းဘတ်ဟာ  တည်ထောင်သူ ဇူကာဘတ်ပြီးရင် ဖေ့စ်ဘုတ်ခ်မှာ ဒုတိယနေရာမှာ ရှိသူဖြစ်ပါတယ်။ ဖေ့စ်ဘုတ်က သူ့ကို အလုပ်ခန့်တုန်းက သူ့အသက် ၂၃နှစ်ပဲရှိပါသေးတယ်။ သူမဟာ ကုမ္ပဏီမှာ အထင်ပေါ်ဆုံးအရာရှိကြီးတွေက တစ်ဦးဖြစ်ပြီး  မကြာခဏ ဝေဖန်တိုက်ခိုက်ခံရတဲ့ ကြေညာအခြေပြုစီးပွားရေးပုံစံကို ဦးဆောင်တည်ဆောက်ခဲ့သူဖြစ်ပါတယ်။

သူမဟာ ကုမ္ပဏီက ထွက်လိုက်ပေမယ့် မက်တာဘုတ်အဖွဲ့မှာတော့ ဆက်လက်ပါနေဦးမယ်လို့ ဆန်းဘတ်ကပြောပါတယ်။

အလုပ်ထွက်ပြီးနောက်ဘာလုပ်မှာလဲလို့ ရိုက်တာကမေးတဲ့အခါ သူမက “ အမျိုးသမီးတွေအတွက် ပရဟိတအလုပ်ကို အာရုံစိုက်လုပ်ဆောင်မယ်လို့ပြောပါတယ်။

Source Reuters

#LocalNews
Published_2 June 2022

နိုင်ငံတော် စီမံအုပ်ချုပ်ရေးကောင်စီရဲ့ ပန်းခင်းစီမံချက်အရ စတင်ခဲ့သည့် ၂၀၂၁ ခုနှစ် မေလ ၃ ရက်နေ့မှ ယခု ၂၀၂၂ ခုနှစ် နိုဝင်ဘာလ ၃ရက်နေ့အထိ ၁၈ လတာ ကာလအတွင်း မြန်မာနိုင်ငံတွင် ၆/၆၆ ပုံစံ အိမ်ထောင်စုစာရင်းမရှိသူများနှင့် နိုင်ငံသားစိစစ်ရေးကတ်ပြား မရှိသူများ ၃ ဒသမ ၄ သန်းအနက် ၃ သန်းကျော် ရရှိအောင် ဆောင်ရွက်ပေးပြီးပြီဖြစ်ကြောင်း နစကမှ သိရသည်။

ပဲခူးတိုင်းဒေသကြီးရှိ မြို့နယ်အချို့ ရန်ကုန်တိုင်းဒေသကြီး၊ လှိုင်သာယာမြို့နယ်အတွင်း ၆/၆၆ ပုံစံ အိမ်ထောင်စုစာရင်းမရှိသူများနှင့် သဘာဝဘေးအန္တရာယ်များကြောင့် မိသားစုလိုက်နေထိုင်ကြောင်း ထောက်ခံချက်မရှိသူ အများစုရှိနေကြောင်း သိရသည်။

"ပဲခူးတိုင်းဒေသကြီးရှိ မြို့နယ်အချို့နဲ့ ရန်ကုန်တိုင်းဒေသကြီး၊ လှိုင်သာယာမြို့နယ်က နေရာအများစုမှာ ၆/၆၆ ပုံစံ အိမ်ထောင်စုစာရင်းမရှိသူတွေရယ်၊ ပြီးတော့ သဘာဝဘေးအန္တရာယ်တွေကြောင့် မိသားစုလိုက်နေထိုင်ကြောင်း ထောက်ခံချက်မရှိသူတွေရယ် များပါတယ်။ ပြီးတော့ နေထိုင်မှုပုံစံ ၄ မျိုးကိုလည်းတွေ့ရှိထားပါတယ်။ မှတ်ပုံတင်ရှိပြီး ၆/၆၆ အိမ်ထောင်စုစာရင်းမရှိတဲ့သူတွေ၊ အိမ်ထောင်စုစာရင်းရှိပြီး မှတ်ပုံတင်မရှိတဲ့သူတွေ ပြီးတော့ ၂ ခုလုံးမရှိတဲ့သူတွေရယ်ဆိုပြီး တွေ့ရှိထားပါတယ်။ အဲတာကြောင့် နစကအနေနဲ့ ပြီးခဲ့တဲ့ ကာလတွေကလည်း ပြည်ထောင်စုဝန်ကြီးကိုယ်တိုင် ကွင်းဆင်းကြည့်ရှုစစ်ဆေးတာတွေ ပြုလုပ်နေပါတယ်။ နောက်ပြီး လှိုင်သာယာမြို့နယ်ကို အကြိမ် ၅၀၀ ထက်မနည်း ကွင်းဆင်းပြီး ပြုလုပ်ပေးနေပါတယ်" ဟု နစကမှ တာဝန်ရှိသူက ပြောသည်။

ရန်ကုန်တိုင်းဒေသကြီးနှင့် အခြားတိုင်းဒေသကြီးအချို့တွင် စံမံချက်များအပြီး မသတ်သေးဘဲ လုပ်ဆောင်လျက်ရှိကြောင်း၊ လက်ရှိ မြန်မာနိုင်ငံတွင် လူဦးရေ ၅၅ ဒသမ ၆သန်းရှိသည့်အနက် တစ်နှစ်အတွင်း အသက် ၁၀ နှစ်ပြည့်သည့် လူဦးရေ ၄သိန်း၊ အသက် ၁၈နှစ်ပြည့်သည့် လူဦးရေမှာ ၅ သိန်းဝန်းကျင်ခန့် ရှိကြောင်း သိရသည်။

နစက သတ်မှတ်ထားသည့် စီမံချက် ကာလ ၁၈ လ ကျော်လွန်သွားပြီး မှတ်ပုံတင်မရရှိသူများကျန်နေသေးပါက ဆက်လက်လုပ်ဆောင်ပေးမည်ဖြစ်ကြောင်းနှင့် ပြည်သူများအနေဖြင့် နီးစပ်ရာဒေသများ၊ မြို့နယ်များ၊ ရပ်ကွက်များတွင် နိုင်ငံသားစိစစ်ရေးကတ်ပြား မရှိသူများ တွေ့ရှိပါက အကြောင်းကြားပေးကြရန်လည်း လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနက တိုက်တွန်းထားသည်။

ygm/NN
#Yangon_Media_Group

#Local_News
Published_ 2 June 2022

တောင်အာဖရိကနှင့် မြန်မာနိုင်ငံတို့ကြား နှစ်နိုင်ငံကုန်သွယ်ရေးနှင့်ခရီးသွားလာရေး ကဏ္ဍတိုးမြှင့်ရေးနှင့် ပူးပေါင်းဆောင်ရွက်နိုင်မည့် အလားအလာများကို ဆွေးနွေးခဲ့ကြောင်း သိရှိရပါတယ်။

တောင်အာဖရိကနိုင်ငံ Western Cape ပြည်နယ် ဝန်ကြီးချုပ် H.E. Mr. Alan Winde နှင့် အာဆီယံ ပရီတိုးရီးယားကော်မတီတို့အကြား Virtual Meeting တွေ့ဆုံဆွေးနွေးပွဲအား မေ ၃၁ ရက်နံနက်ပိုင်းက ကျင်းပပြုလုပ်ခဲ့ပါတယ်။

အဆိုပါဆွေးနွေးပွဲသို့ အာဆီယံ ပရီတိုးရီးယားကော်မတီဥက္ကဋ္ဌ မြန်မာသံအမတ်ကြီး ဦးမြင့်ဆွေနှင့် အာဆီယံနိုင်ငံသံရုံးများမှ သံအမတ်ကြီးများ ပါဝင်တက်ရောက်ခဲ့ကြပါတယ်။

တွေ့ဆုံဆွေးနွေးပွဲတွင် သံအမတ်ကြီးဦးမြင့်ဆွေက မြန်မာနိုင်ငံနှင့်တောင်အာဖရိက နိုင်ငံတို့အကြား နှစ်အလိုက်ကုန်သွယ်မှုပမာဏများ၊ မြန်မာနိုင်ငံမှ တောင်အာဖရိက နိုင်ငံသို့တင်ပို့သည့် ကုန်ပစ္စည်းအမျိုးအမည်များနှင့် မြန်မာနိုင်ငံသို့ တောင်အာဖရိကနိုင်ငံမှ တင်သွင်းသည့် ကုန်ပစ္စည်းအမျိုးအမည်များ အကြောင်းနှင့် ကုန်သွယ်မှုတိုးမြှင့်နိုင်ရေး ဆွေးနွေးခဲ့ကြောင်း သိရပါတယ်။

ymg-mnn
#Yangon_Media_Group

#LocalNews
Published - 2 June 2022

ပြည်တွင်းစက်သုံးဆီမှာ ပြတ်လပ်မှုမရှိပဲ ဇွန်လ ၁၆ ရက်အထိ အလုံအလောက်ရှိနေကြောင်းနိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

"စျေးနှုန်းသက်သာအောင်၊ ဆီပြတ်လပ်မှုမရှိအောင် လုပ်ဆောင်ပေးနေပါတယ်၊ စျေးနှုန်းသက်သာအောင်ဆိုတာကတော့ နိုင်ငံတကာစျေးနဲ့ မြန်မာနိုင်ငံတွင်းမှာဖြစ်သင့်တယ့်စျေးနဲ့ရောင်းနိုင်အောင် ထိန်းညှိပေးနိုင်အောင် ဒါပဲလုပ်ဆောင်ပေးနိုင်ပါလိမ့်မယ်၊ စျေးကွက်စီးပွားရေးစနစ်က ဒီတိုင်းပဲဖြစ်ပါလိမ့်မယ်၊ ဆီပြတ်လပ်မှုမရှိအောင် ဇွန်လ ၁၆ ရက်အထိ အရန်ဆီတွေရှိပြီးဖြစ်တယ်၊ ထပ်သွင်းတဲ့ဆီတွေလည်းရှိတယ်"ဟု ယင်းကပြောသည်။

ယင်းအပြင် ကမ္ဘာ့ဆီစျေးနှုန်းသည်လည်း မငြိမ်သက်သဖြင့် မြန်မာနိုင်ငံအတွင်းတွင်လည်း ကမ္ဘာ့စျေးနှုန်းနှင့်အညီ ဖြစ်နေဦးမည်ဖြစ်ကြောင်း သိရသည်။

စက်သုံးဆီတင်သွင်းသူများ အနေဖြင့် မိမိတို့ကြိုက်သည့်နေရာတွင် ဆီကိုဝယ်ယူနိုင်သော်လည်း ဒေသတွင်းနိုင်ငံဖြစ်သည့် စင်ကာပူရှိ MOPE စျေနှုန်းကိုအခြေခံပြီး တွက်ချက်မည်ဖြစ်ကြောင်း သိရသည်။

ဇွန်လ ၂ ရက် ထုတ်ပြန်ကြေညာထားသည့် စက်သုံးဆီစျေးနှုန်းမှာ ၉၅ တစ်လီတာ ၂၂၆၅ ကျပ်၊ ၉၂ တစ်လီတာ ၂၁၈၅ ကျပ်၊ ပရီမီယံဒီဇယ်တစ်လီတာ ၂၄၆၅ ကျပ်၊ ရိုးရိုးဒီဇယ်တစ်လီတာ ၂၄၃၅ ကျပ်ဖြစ်ကြောင်း သိရသည်။

ymg/sth

#Yangon_Media_Group