#LocalNews
Published_2 June 2022

နေပြည်တော်ရှိ ကိုယ်ပိုင်ကျောင်းအချို့ အနေဖြင့် နိုင်ငံရေးနှင့်မလွတ်ကင်းသည့် ကိစ္စများဆောင်ရွက်နေသောကြောင့် ကျောင်းများကို ယာယီပိတ်သိမ်းမှုဆောင်ရွက်နေကြောင်း နစက သတင်းထုတ်ပြန်ရေးအဖွဲ့က သိရသည်။

"အဓိကပိတ်ရတဲ့ကျောင်းတွေကတော့ နေပြည်တော်မှာရှိတဲ့ ကိုယ်ပိုင်ကျောင်းတွေဖြစ်ပါတယ်။ ဘာလို့ပိတ်ရလဲဆိုတော့ အချို့ကျောင်းတွေမှာ နိုင်ငံရေးနဲ့မလွတ်ကင်းတာတွေ လုပ်နေတာတွေ့ရပြီး တစ်ချို့ကျောင်းတွေကတော့ ပညာရေးဝန်ကြီးဌာနကနေ ထောက်ခံချက်မရရှိဘဲ ဖွင့်ထားတဲ့ကျောင်းတွေဖြစ်ပြီး အဲကျောင်းတွေကို အဓိကထား ပိတ်သိမ်းတာဖြစ်တယ်" ဟု သတင်းထုတ်ပြန်ရေးအဖွဲ့ တာဝန်ရှိသူက ပြောသည်။

ကိုယ်ပိုင်ကျောင်းများတည်ထောင်မည်ဆိုပါက ပညာရေးဝန်ကြီးဌာနမှ သတ်မှတ်ထားသည့် မူဝါဒများအရ သက်ဆိုင်ရာ ပြည်နယ်နှင့်တိုင်းများတွင် လျှောက်လွှာတင်လျှောက်ထားရန်လိုကြောင်း၊ သတ်မှတ်ထားသည့် အဆင့်၊ စံချိန်စံညွှန်းများနှင့်ကိုက်ညီမှု မရှိမရှိ ကိုယ်ပိုင်းကျောင်းကို ဦးစွာစစ်ဆေးကြောင်းသိရသည်။

ထို့နောက်တွင် စစ်ဆေးပြီးသည့်အခါ ကိုက်ညီမှုရှိသည့် ကိုယ်ပိုင်းကျောင်းများကို တိုင်းဒေသကြီး၊ အစိုးရအဖွဲ့က ထောက်ခံချက်ပေးခြင်းဖြစ်ကြောင်း၊ ယင်းနောက် ပညာရေးဝန်ကြီးဌာနက ခွင့်ပြုချက်ပေးကာ ကျောင်းဖွင့်ရာသီတွင် ဖွင့်ခွင့်ပေးထားကြောင်းသိရသည်။

အဆိုပါ ကိုယ်ပိုင်ကျောင်းများတွင် တာဝန်ထမ်းဆောင်မည့် ဆရာ၊ ဆရာမများ အား ခန့်ထားခြင်းမှာလည်း အဆိုပါ ကိုယ်ပိုင်ကျောင်းများ၏ မူဝါဒများနှင့်သာ သက်ဆိုင်ကြောင်း နစက၏ ပညာရေးဝန်ကြီးဌာနက ပြောဆိုထားသည်။

ymg/NN
#Yangon_Media_Group

#WorldHealth
Published 2 June 2022

အချိုပါတဲ့ကော်ဖီဖြစ်စေ အချိုမပါတဲ့ကော်ဖီဖြစ်စေ သောက်သုံးပေးခြင်းဟာ အသက်သေဆုံးနိုင်တဲ့ အန္တရာယ်ကိုလျှော့ချပေးနိုင်တာနှင့် ဆက်စပ်လျက်ရှိကြောင်း လေ့လာတွေ့ရှိချက်အသစ်မှာဖော်ပြထားပါတယ်။

ကော်ဖီသာမန်ပမာဏလောက်ကို သကြားပါသည်ဖြစ်စေ မပါသည်ဖြစ်စေ နေ့စဉ်သောက်သုံးခြင်းဖြင့် ကော်ဖီမသောက်သူတွေထက်စာရင် အကြောင်းအမျိုးမျိုးကြောင့်သေဆုံးနိုင်ချေကို ၃၀ ရာခိုင်နှုန်းလျှော့ချပေးနိုင်ကြောင်း ယူကေဘိုင်အိုဘဏ်ကိုဟော့မှာ ဖော်ပြထားပါတယ်။

ကော်ဖီထဲမှာ ခရင်မ်အမှုန့်တွေထည့်သောက်သူတွေအတွက်တော့ တွေ့ရှိချက်တွေက သိပ်ပြီးစိတ်မချရနိုင်ကြောင်း ကွမ်ကျိုးတောင်ပိုင်းဆေးပညာတက္ကသိုလ်မှ ဒေါက်တာ'ချန်မောက်'ကဆိုပါတယ်။

"သကြားပါသည်ဖြစ်စေ မပါသည်ဖြစ်စေ ကော်ဖီသောက်သုံးခြင်းက အသက်သေဆုံးနိုင်ချေနည်းပါးစေနိုင်ပါတယ်၊ ကော်ဖီ ၁ ခွက်ခွဲကနေ ၃ ခွက်ခွဲအထိကို အလယ်အလတ်ပမာဏလို စာတမ်းပြုစုသူများက သတ်မှတ်ထားပါတယ်၊ အလယ်အလတ်ပမာဏလောက် ကော်ဖီသောက်သုံးခြင်းဖြင့် ကင်ဆာရောဂါ၊ နှလုံးရောဂါ၊ အကြောင်းအမျိုးမျိုးတို့ကြောင့် အသက်သေဆုံးနိုင်ချေကို လျှော့ချပေးနိုင်ပါတယ်" လို့ Annals of Internal Medicine မှ လက်ထောက်အယ်ဒီတာ ဒေါက်တာ'ခရစ္စတီးနားဝီ'က ပြောပြသွားပါတယ်။

အစောပိုင်းလေ့လာချက်တွေမှာလည်း ကော်ဖီသောက်သုံးခြင်းနဲ့ အသက်သေဆုံးနိုင်ချေတို့ကြား ဆက်စပ်နေကြောင်း တွေ့ရှိခဲ့ကြပါတယ်။

ယူကေဘိုင်အိုဘဏ်မှ နှလုံးသွေးကြောရောဂါနဲ့ ကင်ဆာရောဂါမရှိသူ ၁၇၁,၆၁၆ ဦးကို လေ့လာခဲ့ကြပါတယ်။

သူတို့ကို အွန်လိုင်းမှစစ်တမ်းမေးခွန်းများ ဖြည့်စွက်ခိုင်းခဲ့ပြီး ကော်ဖီဘယ်လောက်သောက်သလဲ၊ သကြားဘယ်နှဇွန်းထည့်သလဲဆိုတဲ့ မေးခွန်းတွေပါဝင်ခဲ့ပါတယ်။

၇၆ ရာခိုင်နှုန်းသောလူတွေက ကော်ဖီသောက်သုံးသူများဖြစ်ကာ ၅၅.၄ ရာခိုင်နှုန်းက အချိုမထည့်ဘဲသောက်သုံးသူတွေဖြစ်ပြီး ၁၄.၃ ရာခိုင်နှုန်းက သကြားတစ်ဇွန်းခန့်၊ ၆.၁ ရာခိုင်နှုန်းကတော့ ခရင်မ်မှုန့်တွေ ထည့်သောက်ကြပါတယ်။

နောက် ၇ နှစ်အကြာ ထပ်မံလေ့လာခဲ့ရာမှာ ၃.၁၇၇ ဦးသေဆုံးခဲ့ကာ ၁,၇၂၅ ဦးက ကင်ဆာရောဂါကြောင့်သေဆုံးပြီး ၆၂၈ ဦးက နှလုံးသွေးကြောရောဂါများကြောင့် သေဆုံးခဲ့ပါတယ်။

ထပ်မံလေ့လာကြည့်ပြီးနောက် ခြုံငုံကြည့်တဲ့အခါ အချိုမပါတဲ့ ကော်ဖီသောက်သုံးသူတွေဟာ ကော်ဖီမသောက်တဲ့သူတွေထက် သေဆုံးနိုင်ချေနည်းပါးခဲ့ပါတယ်။

ကော်ဖီ ၁ ခွက်ခွဲမှ ၃ ခွက်ခွဲသောက်သုံးသူများ၊ သကြားပါပါ/မပါပါသောက်သုံးသူများဟာ ကော်ဖီမသောက်တဲ့သူတွေထက် သေဆုံးနိုင်ချေ ၂၉ ရာခိုင်နှုန်းကနေ ၃၁ ရာခိုင်နှုန်းနည်းပါးတာကို တွေ့ခဲ့ရပါတယ်။

ကော်ဖီသောက်ခြင်းရဲ့အကျိုးကျေးဇူးတွေကတော့ သိပ္ပံနည်းကျဖြေရှင်းနိုင်ခြင်းမရှိသေးဘဲ လူတွေသိချင်နေတာကို အဖြေမပေးနိုင်သေးပါဘူး။

Source: yahoo news
#Yangon_Media_Group

#Local_News
Published_ 2 June 2022

ရန်ကုန်တိုင်းဒေသကြီး၊ ကြည့်မြင်တိုင်မြို့နယ်၊ မကျည်းတမ်းတောင် အနောက်ရပ်ကွက်၊ ပန်းပင်ကြီးလမ်း၊ အမှတ် ၂၀၊ ပထမထပ်ရှိ နေအိမ်တိုက်ခန်းအား မေ ၃၀ ရက် နံနက် ၈ နာရီ ၁၅ မိနစ်ခန့်က ဝင်ရောက်ဓားပြတိုက်ခဲ့သူ ၇ ဦးအား ဖမ်းဆီးရမိခဲ့ကြောင်း မြန်မာနိုင်ငံ ရဲတပ်ဖွဲ့က သတင်းထုတ်ပြန်ထားပါတယ်။

ဓားပြများဟာ တိုက်ခန်းအတွင်း ကျန်းမာရေးမကောင်းသဖြင့် Wheel Chair ဖြင့် သွားနေရသည့် ဒေါ်ခင်ကြည် (၈၈) နှစ်နှင့် အိမ်အကူဒေါ်အေးစန်း (၅၀) နှစ် တို့သာရှိနေစဥ် ဝင်ရောက်လာပြီးနောက် ဒေါ်အေးစန်းအား ကြိုးဖြင့်တုတ်ကာ ဒေါ်ခင်ကြည်အား ဓားဖြင့်ထောက်၍ ၎င်းတို့ဝတ်ဆင်ထားသည့် ရွှေထည်ပစ္စည်း ၄ မျိုး နှင့် ဘီရိုအတွင်း ထည့်ထားတဲ့ ငွေကျပ် ၅ သိန်းအား ဓားပြတိုက်ကာ ယူဆောင်သွားခဲ့ပါတယ်။

ထို့ကြောင့် ပြစ်မှုကျူးလွန်သူများအား ဖမ်းဆီးရမိရေးအတွက် ကြည့်မြင်တိုင် မြို့မရဲစခန်းက အမှုဖွင့်ကာ လုံခြုံရေးအဖွဲ့ဝင်များနှင့်အတူ အထူးအမှုစစ်အဖွဲ့ ဖွဲ့စည်းကာ စုံစမ်းစစ်ဆေးခဲ့ကြပါတယ်။

ပြစ်မှုကျူးလွန်ရာတွင် အသုံးပြုတဲ့ TOYOTA PROBOX (အဖြူရောင်)ကားအား စစ်ဆေးသိရှိခဲ့ရပြီး ဓားပြတိုက်ခံရတဲ့ နေအိမ်၌ဖွင့်လှစ်ထားသည့် “အောင်” Car Aircon Service လုပ်ငန်းတွင် အလုပ်လုပ်သူ ဒလမြို့နယ်နေ ချစ်နိုင်(ခ)ရာဂျူး(ခ)ကတုံးအား ညနေပိုင်း၌ ဖမ်းဆီးရမိခဲ့ပါတယ်။

ဖမ်းဆီးရမိသူကို စစ်ဆေးချက်အရ ဒလမြို့နယ်၊ ကမာကဆစ်ရပ်ကွက်၊ ကျန်စစ်သား (၄)လမ်း ၊အမှတ်(၂၉၉)နေ အောင်ကျော်ဆန်း(ခ)အန်ကူးပါး(ခ)အငူပါး၊ သာကေတ မြို့နယ်၊ (၁၄)ရပ်ကွက်၊ သလ္လာဝတီ(၂)လမ်းနေ လင်းထက်ဇဏ်(ခ)နွားကြီး(၁၉)နှစ်၊ စက်မြေရပ်ကွက်နေ ခန့်ဇင်လင်း(ခ) ကိုခန့်(၁၈)နှစ်နှင့် မှော်စက်ရပ်ကွက်နေ နိုင်နိုင်(ခ) နိုင်းနိုင်း(၂၀)နှစ်၊ ဒလမြို့နယ်၊ ကမာကဆစ် ရပ်ကွက်နေသူများဖြစ်တဲ့ ဟန်ဝင်းဇော် (၁၉)နှစ် နှင့် ဘိုဘိုမင်းသူ(ခ)ဘိုဘို(၁၉)နှစ်တို့အား ဖမ်းဆီးရမိခဲ့ပါတယ်။

ဓားပြတိုက်ရာတွင် လုယက်ယူဆောင်သွားခဲ့တဲ့ ရွှေအလေးချိန် ၁ ကျပ် ၉ ပဲ ၇ ရွေး တန်ဖိုးငွေကျပ် ၂၈၇၇၀၀ဝ ကျပ်၊ ငွေ ၈၃၇၅၀၀ ကျပ်၊ လက်ကိုင်ဖုန်း ၄ လုံးနှင့်နာရီ ၁ လုံးတို့အား ပြန်လည်သိမ်းဆည်းရမိခဲ့ပါတယ်။

ဖမ်းဆီးရမိသူများအား ဥပဒေအရထိရောက်စွာအရေးယူရန် လုံခြုံရေးတပ်ဖွဲ့ဝင်များ က ဆောင်ရွက်လျက်ရှိကြောင်း သတင်းရရှိပါတယ်။

ymg-mnn
#Yangon_Media_Group

#WorldHealth
Published 2 June 2022

လူတွေက ပုံမှန်အတိုင်းပြန်လည်ပြုမူနေထိုင်ချင်လာကြတာကြောင့် အားကစားခန်းမတွေမှာလည်း လူတွေပြန်လည်များပြားလာပြီဖြစ်ပါတယ်။

တချိန်တည်းမှာပဲ အိုမီခရွန်မျိုးဗီဇကွဲက ကိုဗစ်ကူးစက်မှုမြင့်တက်စေလာတာကြောင့် အားကစားခန်းမသွားရတာ ဘယ်လောက်အထိဘေးကင်းစိတ်ချရသလဲဆိုတာ သိထားသင့်ပါတယ်။

စက်ဘီးစီးအားကစားခန်းထဲက အားကစားလုပ်နေတဲ့သူတွေဆီက အသက်ရှူထုတ်လိုက်တဲ့အမှုန်အမွှားတွေ ဘယ်လောက်များပြားလဲ?

အနီးနားရှိ ပြေးစက်ပေါ်ကလူဆီက အမှုန်အမွှားဘယ်လောက်ရှူထုတ်လိုက်သလဲ?

အဆိုပါ အသက်ရှူထုတ်ခြင်းနဲ့လေ့ကျင့်ခန်းများအကြောင်း National Academy of Sciences က လေ့လာချက်ပြုလုပ်ပြီး ဖော်ပြခဲ့ပါတယ်။

လူ ၁၆ ယောက်ကို နားနေတဲ့အချိန်နဲ့ အားကစားလုပ်နေတဲ့အချိန်အတွင်း ထွက်လာတဲ့အသက်ရှူလမ်းကြောင်းမှ အမှုန်အမွှားအရေအတွက်ကို လေ့လာခဲ့ပါတယ်။

လေထုထဲအမှုန်အမွှားတွေက အချင်းမိုက်ခရိုမီတာအနည်းငယ်လောက်သာရှိပြီး အဆုတ်ကထုတ်လွှတ်လိုက်တဲ့အငွေ့တွေမှာ ကပ်ပါလာတတ်ပါတယ်။

တစ်ယောက်ယောက်မှာ ကိုရိုနာဗိုင်းရပ်စ်ကူးစက်ထားတယ်ဆိုရင် အဆုတ်ကထုတ်လွှတ်လိုက်တဲ့အမှုန်အမွှားတွေကနေ တခြားတစ်ယောက်ဆီ ကူးစက်လာတာဖြစ်ပါတယ်။

ငြိမ်သက်နေတဲ့အချိန်မှာ တစ်မိနစ်ကို အမှုန်အမွှားပေါင်း ၅၀၀ လောက်ထုတ်လွှတ်ပြီး လေ့ကျင့်ခန်းလုပ်တဲ့အချိန်မှာတော့ ပျမ်းမျှခြင်းအားဖြင့် တစ်မိနစ်ကိုအမှုန်ပေါင်း ၇၆,၀၀၀ လောက်ထွက်ရှိကြောင်း တွေ့ရှိခဲ့ကြပါတယ်။

ဒါဟာ အလုံပိတ်အားကစားခန်းတွေမှာ ကိုဗစ်ပိုမိုကူးစက်ရတဲ့အကြောင်းအရင်းဖြစ်လာနိုင်ပါတယ်။

၂၀၂၀ ခုနှစ်က တောင်ကိုရီးယားလူမျိုး ၅၄ ဦးဟာ ဇွန်ဘာသင်တန်းတက်ရောက်ရာ ရောဂါကူးစက်ထားတဲ့သင်တန်းဆရာများမှ ကိုဗစ်ရောဂါကူးစက်ခဲ့ပြီး အိမ်သူအိမ်သားနဲ့ အသိမိတ်ဆွေတွေဆီ ကူးစက်ခဲ့ဖူးပါတယ်။

ဟာဝိုင်အီမှ စက်ဘီးစီးအားကစားခန်းမှ အဖွဲ့ဝင် ၁၀ ယောက်ဟာ ရောဂါကူးစက်ထားသူသင်တန်းဆရာထံမှ ကူးစက်ခဲ့ပြီး ကြီးကပ်လေ့ကျင့်ပေးသူ၊ လက်ဝှေ့သင်တန်းဆရာထံတို့မှ နောက်ထပ် ၁၁ ယောက်ကူးစက်ခဲ့ပါတယ်။

ဒီလိုကူးစက်ပျံ့ပွားရခြင်းဟာ အလုံပိတ်အားကစားခန်းမတွေထဲမှာ လေဝင်လေထွက်မလုံလောက်ခြင်းနဲ့ အားကစားပြုလုပ်သူတွေရဲ့ အသက်ရှူနှုန်းမြန်ခြင်းတို့ကြောင့်ဖြစ်တယ်လို့ သိပ္ပံပညာရှင်များ တွေ့ရှိခဲ့ပါတယ်။

လေ့ကျင့်ခန်းလုပ်နေချိန်မှာ လေမှုန်လေမွှားထွက်ရှိမှု များပြားမယ်လို့ မျှော်လင့်ခဲ့ကြပေမယ့် လက်တွေ့များပြားလာတဲ့ ပမာဏက သိပ္ပံပညာရှင်တွေအံ့ဩခဲ့ရပါတယ်။

အမှုန်အမွှားပိုများလေ ကိုဗစ်ကူးစက်ခံရသူများထံမှ ရောဂါပိုမိုကူးစက်နိုင်ချေ များလေပဲဖြစ်ပါတယ်။

ဒီလိုအန္တရာယ်တွေကိုလျှော့ချဖို့အတွက် ပြတင်းပေါက်များဖွင့်ပြီး ပန်ကာတွေပါဖွင့်ခြင်းအားဖြင့် လေဝင်လေထွက်ကောင်းစေမှာဖြစ်ကြောင်း ကယ်လီဖိုးနီးယားတက္ကသိုလ်မှ ပရော်ဖက်ဆာ'ခရစ္စကပ်ပါ'က ပြောကြားခဲ့ပါတယ်။

လေ့ကျင့်ခန်းလုပ်တဲ့အခြားသူတွေနဲ့ ၆ ပေကွာနေထိုင်ခြင်းကလည်း အရေးကြီးပါတယ်။

လေဝင်လေထွက်ကောင်းအောင်ဖန်တီးဖို့နဲ့ လူသိပ်မများတဲ့ အားကစားခန်းမကိုသွားဖို့ လိုအပ်ပြီး လေ့ကျင့်ခန်း မလုပ်ဘဲနေဖို့တော့ အကြောင်းမရှိပါဘူး။

လေ့ကျင့်ခန်းလုပ်လို့ရတဲ့ အကျိုးကျေးဇူးတွေက အများကြီးပါပဲ။

Source: yahoo news
#Yangon_Media_Group

Published 2 June 2022

ရိုင်ဖယ်သေနတ်ကိုင်ဆောင်ထားတဲ့ အမျိုးသားတစ်ဦးဟာ အိုကလာဟိုမားပြည်နယ် တူလ်ဆာမြို့က ဆေးရုံတစ်ရုံကို ဇွန်(၁)ရက်က ဝင်ရောက်ပစ်ခတ်လို့ လူလေးဦးသေဆုံးသွားပါတယ်။အဲဒီနောက်သူ့ကိုယ်သူလည်းပစ်သတ်သွားတယ်လို့ ရဲတွေက ပြောပါတယ်။ ရဲအရာရှိတွေဟာ အခင်းဖြစ်ပွားရာကို ချက်ခြင်းသွားရောက်ပြီး လူတွေအန္တရာယ်ထပ်မဖြစ်အောင် ဆောင်ရွက်ပေးခဲ့တယ်လို့လည်းရဲကဆိုပါတယ်။

ဆေးရုံတည်ရှိရာ နာတာလီအဆောက်အအုံ ဒုတိယထပ်မှာသေနတ်သံကြားရပြီးနောက် ဖုန်းနှင့် တိုင်တန်းမှုရရှိပြီးနောက် သုံးမိနစ်အကြာမှာ ရဲတွေဟာ စိန့် ဖရန်စစ်ဆေးရုံကို ရောက်ရှိလာကြပါတယ်လို့ တူလ်ဆာ ဒုတိယရဲမှူး အီရစ် ဒယ်လ်ဂလက်ရှ်က သတင်းထောက်တွေကိုပြောပါတယ်။

သံသယတရားခံဘယ်သူဆိုတာကို သူတို့ကြိုးစားစိစစ်နေတယ်လို့ရဲကပြောပြီး သူဟာ အသက် ၃၅နှစ်နှင့် ၄၀ကြားရှိသူလို့လည်း ပြောပါတယ်။

နာတာလီအအောက်အအုံမှာ ဆရာဝန်ရုံးခန်းတွေနှင့် အရိုးရောဂါကုဌာနလည်းထားရှိပါတယ်။ အသတ်ခံရသူတွေဟာ ဝန်ထမ်းတွေနှင့် လူနာတွေလို့ သူယုံကြည်တယ်လို့ ရဲအရာရှိကပြောပါတယ်၊

ယခုဖြစ်ရပ်ကို သမ္မတဘိုင်ဒင်ထံ တင်ပြခဲ့ပြီး တူလ်ဆာကို အကူအညီပေးဖို့ ပြည်နယ် နှင့်ဒေသရဲတွေပံ့ပိုးထားတယ်လို့ အိမ်ဖြူတော်ကပြောပါတယ်။

တူလ်ဆာဟာ အိုကလာဟိုးမားမြို့ရဲ့ အရှေ့မြောက် မိုင်၁၀၀ခန့်အကွာမှာရှိပြီး လူပေါင်း လေးသိန်းတစ်သောင်းတစ်ထောင်ခန့် နေထိုင်ပါတယ်။

Source Reuters

#WorldDevelopment
Published 1 June 2022

စစ်ပွဲပဋိပက္ခများ အစဉ်မပြတ်ဖြစ်ပွားနေခဲ့တဲ့ လစ်ဗျားနိုင်ငံ ထရစ်ပိုလီမြို့တော်မှာ လူငယ်များအပန်းဖြေဆော့ကစားနိုင်ရန် ပထမဆုံးစကိတ်စီးကွင်းကို ဖွင့်လှစ်လိုက်ပြီဖြစ်ပါတယ်။

#Yangon_Media_Group

Published 1 June 2022

အိမ်နီးချင်းမလေးရှားနိုင်ငံက စင်ကာပူကို တစ်လ တစ်လ တင်ပို့နေတဲ့ ကြက်သားကောင်ရေ ၃.၆သန်းကို  ရပ်နားထားမယ်လို့ ဗုဒ္ဓဟူးနေ့က ကြေညာလိုက်တဲ့အတွက် စင်္ကာပူနိုင်ငံသားတွေ မပျော်မရွှင်နေကြရပါတယ်။

ပြည်တွင်းမလုံလောက်မှုနှင့် ငွေကြေးဖောင်းပွမှုကိုထိန်းသိမ်းချင်လို့ မလေးရှားက ကြက်သားတင်ပို့မှုကို ယခုလိုရပ်နားလိုက်ခြင်း ဖြစ်ပါတယ်။

မျှော်လင့်မထားတဲ့ မလေးရှားရဲ့လုပ်ရပ်ကြောင့် စင်ကာပူမှာ အံ့အားသင့်ပြီး ထိန်လန့်မှုတွေဖြစ်ကုန်ပါတယ်။ နိုင်ငံပိစိကွေးလေးဖြစ်တဲ့ စင်ကာပူဟာ သူ့ထက်ပိုကြီးတဲ့ အိမ်နီးချင်းမလေးရှားကနေ အစားအစာတွေ အများကြီးတင်ပို့နေရတာပါ။ အဲဒီအထဲမှာ ပြည်တွင်းသုံးစွဲတဲ့ ကြက်သားသုံးပုံတစ်ပုံကို မလေးရှားက တင်သွင်းနေတာပါ။

Source AFP

#Point_Of_View
Published -1 June 2022

"အနိဌာရုံတွေကို အမြန်ဆုံးချုပ်ငြိမ်းစေချင်ပြီ၊ ဒါကြောင့် ငြိမ်းချမ်းရေးကို နိုင်ငံရေးနည်းလမ်းနဲ့ဖြေရှင်းတဲ့အပေါ် အားပေးသင့်တယ်"

#Yangon_Media_Group

#LocalNews
Published_1 June 2022

ရန်ကုန်တိုင်းဒေသကြီး ကျောက်တံတားမြို့နယ်၊ အနော်ရထာလမ်းမပေါ် (ဘားလမ်း) ကားမှတ်တိုင်အနီး ပေါက်ကွဲမှု CCTV မှတ်တမ်းရရှိထားသည်ကို မီဒီယာကို နစက သတင်းထုတ်ပြန်ရေးအဖွဲ့မှ ယနေ့ပြုလုပ်သည့် သတင်းစာရှင်းလင်းပွဲအပြီးတွင် ပြသခဲ့ကာ အဆိုပါ ဖြစ်စဉ်တွင် ဗုံးဖောက်ခွဲရန်သယ်လာစဉ် ပေါက်ကွဲခြင်းဖြစ်နိုင်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက သုံးသပ်ပြသွားသည်။

"သေတဲ့သူကို သတင်းထုတ်တဲ့အခါ အမည်မသိ အသက် ၃၂ နှစ်အရွယ်တစ်ယောက်သေတယ်လို့ ထုတ်ပြန်ခဲ့ပါတယ်။ဒါပေမယ့် ဒီသေတဲ့သူက ကားမှတ်တိုင်ကို ဝင်လာတဲ့ မှတ်တမ်းတွေကို ရထားတာ ဖြစ်ပါတယ်။သူ့မှာ အိတ်တစ်လုံးပါပါတယ်။အိတ်ထဲမှာ ဗုံးထည့်လာပြီးလမ်းလျှောက်လာတဲ့ပုံဖြစ်တယ်။သူက ဘယ်လိုမျိုးလုပ်ထားလဲဆိုတော့ အပေါ်မှာအင်္ကျ ီနက်ဝတ်ထားပြီး ပုဆိုးဝတ်လာတဲ့ပုံစံ ။ပြီးရင် လက်ကိုင်အိတ်ကိုင်လာတယ်။အဲလို မိုင်းပေါက်ကွဲခဲ့တဲ့ သဘောရှိပါတယ်။မဖောက်ခွဲခင် ပေါက်ကွဲပြီး သေတဲ့သဘော ရှိပါတယ်။သူ့ရဲ့ဖုန်းကို စစ်ဆေးတဲ့အခါ သူ့ကို ခိုင်းထားတဲ့ဟာတွေ တွေ့ပါတယ်။PDF အမည်ခံ အကြမ်းဖက်သမားတွေနဲ့အချိတ်အဆက် ။ သူကိုယ်တိုင်လည်း PDF ဖြစ်ပါတယ်။သင်တန်းလည်းတက်ခဲ့တဲ့တစ်ယောက် ဖြစ်ပါတယ်။သူ့ရဲ့ အမည်က အောင်ကြီး(ခေါ်)ထိန်လင်းထွန်း ၂၆ နှစ် အဘ ဦးတင်ထွန်း၊ကျောက်တံတားမြို့နယ်၊ကွန်ပျူတာဆိုင် စိစစ်အလုပ်သမား ဖြစ်ပါတယ်။

ဒါနဲ့ပတ်သက်ပြီး နီးစပ်ရာကိုလည်း အတည်ပြုပြီးဖြစ်ပါတယ်။ဒီသတင်းထွက်လာပြီးနောက်ပိုင်းမှာ ပြည်ဖျက်မီဒီယာတစ်ခုက ဘာရေးတုန်းဆိုတော့ လူစည်ကားတဲ့နေရာဗုံးပေါက်ကွဲတယ်၊စစ်တပ်ကလုပ်တယ်လို့ ရေးထားတာရှိပါတယ်။ကျွန်တော်တို့က သက်သေအထောက်အထားတွေနဲ့ မီဒီယာတွေကိုပေးမှာပါ။သူ့ရဲ့ဖုန်းအဆက်အသွယ်ထဲမှာရှိတဲ့ ချိတ်ထားတဲ့ဟာတွေ ၊ သေသွားတဲ့သူကို စွပ်စွဲတယ်လို့ ဖြစ်နေပါအုံးမယ်။သူ့ဖုန်းကအက်နေလို့ မနည်းရအောင်လုပ်ထားရတာ။CCTV မှတ်တမ်းတွေ ရှိပါတယ်"ဟု ယင်းကဆိုသည်။

မေလ ၃၁ ရက် ညနေ ၃ နာရီကျော်အချိန်ကဖြစ်ပွားခဲ့သော ပေါက်ကွဲမှုကြောင့်(၁)ဦးသေဆုံးပြီး (၉)ဦး ထိခိုက်ဒဏ်ရာရရှိခဲ့ခြင်း ဖြစ်ကြောင်း ၊ လက်ရှိတွင် ဒဏ်ရာရာသူများမှာ ရန်ကုန်ပြည်သူ့ဆေးရုံကြီးတွင် ဆေးကုသမှုခံယူနေကြပြီး စိုးရိမ်ရသည့် အခြေအနေမရှိတော့ကြောင်း သိရသည်။

ymg / mt - sth
#Yangon_Media_Group

#LocalNews
Published -1 June 2022

၂၀၂၂-၂၀၂၃ ပညာသင်နှစ်အတွက် တစ်နိုင်ငံလုံးရှိ အခြေခံပညာကျောင်းများတွင် ပြီးခဲ့သည့် မေလ ၂၆ ရက်မှစ၍ ကျောင်းအပ်လက်ခံခဲ့ရာ ဧရာဝတီတိုင်းဒေသကြီးတွင် ကျောင်းအပ်နှံသူ ၉၁၇၇၂၁ ဦးဖြစ်သောကြောင့် အပ်နှံမှုအများဆုံးဖြစ်ကာ ချင်းပြည်နယ်တွင် ကျောင်းအပ်သူ နှစ်သောင်းကျော်သာရှိ၍ အနည်းဆုံးဖြစ်ကြောင်း သိရသည်။

ယနေ့ ဇွန်လ တစ်ရက်က နေပြည်တော်၌ ပြုလုပ်သည့် သတင်းစာရှင်းလင်းပွဲအတွင်း နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့ခေါင်းဆောင်ဗိုလ်ချုပ်ဇော်မင်းထွန်းက အထက်ပါအတိုင်း ပြောကြားလိုက်ခြင်း ဖြစ်သည်။

တစ်နိုင်ငံလုံးကျောင်းအပ်နှံမှု စာရင်းများအရ ရန်ကုန်တိုင်းဒေသကြီးတွင် ကျောင်းအပ်နှံသူ ၇ သိန်းခန့် ရှိကာကျောင်းအပ်နှံမှု ဒုတိယအများဆုံးဖြစ်ကြောင်း သိရသည်။

ကျောင်းအပ်နှံမှုကို မေလ ၂၆ ရက်မှ ဇွန်လ တစ်ရက်ထိ သတ်မှတ်ထားသော်လည်း မေလ ၂၆ ရက်မှ မေလ ၃၁ ရက်ထိ ၆ ရက်အတွင်း တစ်နိုင်ငံလုံးတွင် ကျောင်းအပ်နှံသည့် ကျောင်းသားအရေအတွက် ၅ ဒသမ ၂ သန်းရှိနေပြီ ဖြစ်ကြောင်း သိရသည်။

"တစ်နိုင်ငံလုံးအတိုင်းအတာအနေနဲ့ မေလ၂၆ ရက်မှ ဇွန်လ ၁ ရက်နေ့အထိ ကျောင်းအပ်နှံရေးရက်သပ္ပတ်နဲ့ ဆောင်ရွက်လျက်ရှိပါတယ်၊၊ ကျွန်တော်တို့အနေနဲ့ ကျောင်းအပ်နှံတဲ့ စာရင်းတွေနဲ့ ပတ်သက်ပြီး တွက်ချက်တဲ့နေရာမှာ မနှစ်ကကျောင်းဘယ်လောက် အပ်ခဲ့လဲဆိုတာကို မူတည်ပြီး တွက်ချက်ရပါတယ်၊၊ ယခင်နှစ်က အပ်နှံမှု ၅ ဒသမ ၃သန်းအပ်ပါတယ်၊ ဒီနှစ်မှာတော့ ၅ ဒသမ ၂ သန်းရှိပြီး ၉၉ ဒသမ ၂၄ ရာခိုင်နှုန်း ရှိပါတယ်"ဟု ဗိုလ်ချုပ်ဇော်မင်းထွန်းကပြောသည်။

ymg/tthl - sth
#Yangon_Media_Group

#LocalNews
Published_1 June 2022

ရန်ကုန်တိုင်းဒေသကြီး သာကေတမြို့နယ် တိုင်းရင်းသားကျေးရွာနဲ့နီးတဲ့ ပဲခူးမြစ်ထဲမှာ လွန်ခဲ့တဲ့ နှစ်ပေါင်း ၃၀ ကျော် ၄၀ လောက်က စတင်ဖြစ်ထွန်းနေတဲ့ ရေလယ်ကျွန်းကို အပန်းဖြေစခန်းဖွင့်ဖို့ တိုင်းဒေသကြီးကို တင်ပြထားတယ်လို့ မြန်မာနိုင်ငံခရီးသွားလုပ်ငန်းရှင်များအသင်းက သိရပါတယ်။

#Yangon_Media_Group

#LocalNews
Published -1 June 2022

စက်သုံးဆီဈေးကြီးတာ၊ ဝယ်ယူရခက်ခဲတာ၊ ခရီးသည်ရှားပါးတာတွေကြောင့် ရန်ကုန်မြို့ရှိ စက်သုံးဆီသုံး အငှားယာဥ်တက်စီတစ်ချို့ရပ်နားထားတာတွေရှိတယ်လို့ တက်စီယာဥ်မောင်းတွေထံမှသိရပါတယ်၊၊

#Yangon_Media_Group