Published 25 July 2022

ဒရိုပါဒီ မာမူဟာ အိန္ဒိယနိုင်ငံရဲ့ သမ္မတအဖြစ် တနင်္လာနေ့က ကျမ်းသစ္စာကျိန်ဆိုခဲ့ပါတယ်။ မာမူဟာ အိန္ဒိယနိုင်ငံရဲ့ ဘေးဖယ်ခံထားရတဲ့ လူမျိုးစုနွယ်တွေထဲမှာ ပထမဆုံး နိုင်ငံခေါင်းဆောင်ဖြစ်လာသူတစ်ဦးပါ။

ကျောင်းဆရာမဟောင်းနှင့် ပြည်နယ်အုပ်ချုပ်ရေးမှူးဟောင်းတစ်ဦးဖြစ်တဲ့ မာမူဟာ အိန္ဒိယပါလီမန်နှင့်ပြည်နယ်လွှတ်တော်တွေရဲ့ ၆၄ ရာခိုင်နှုန်းထောက်ခံမဲနှင့် အိန္ဒိယရဲ့ အဆောင်အယောင် သမ္မတရာထူးကို ရရှိခဲ့တာဖြစ်ပါတယ်။

ဆန်သာ မျိုးနွယ်စုက လာတဲ့မာမူဟာ အိန္ဒိယနိုင်ငံ ဩရိသပြည်နယ်မှာ မွေးဖွားခဲ့ပါတယ်။ သူမဟာ ကျမ်းသစ္စာမကျိန်ဆိုခင်မှာ အိန္ဒိယလွတ်လပ်ရေးသူရဲကောင်း မဟတ္တမ ဂန္ဒီကို ရည်စူးထားတဲ့ အမှတ်တရနေရာ သွားရောက်ပြီး အလေးပြုခဲ့ပါတယ်။

မျိးနွယ်စုရွာကလေးတစ်ရွာကနေ ကျွန်မရဲ့ဘဝခရီးကိုစတင်ခဲ့ပါတယ် လို့ အသက် ၆၄နှစ်အရွယ်ရှိပြီဖြစ်တဲ့ မာမူက ပါလီမန်မှာ ကျမ်းသစ္စာကျိန်ပြီးတဲ့နောက်  ပြောပါတယ်။

“ကျွန်မလာခဲ့တဲ့ နောက်ခံကိုကြည့်ရင် ကျွန်မလိုလူမျိုးအတွက် မူလတန်းစာသင်ဖို့တောင် အိပ်မက်တစ်ခုပါ” လို့လည်း သူမက ပြောပါတယ်။

“ ဒါပေမယ့် အခက်အခဲအတားအဆီးတွေကြားထဲကပဲ ကျွန်မရဲ့ ဆုံးဖြတ်ချက်ဟာ ခိုင်မာလျက်ရှိတယ်။ ကျွန်မဟာ ရွာကနေ ကောလိပ်တက်တဲ့ ပထမဆုံးသမီးတစ်ယောက်ဖြစ်လာခဲ့တယ်” လို့ မာမူကပြောပါတယ်။

မာမူရဲ့အနိုင်ရမှုဟာ သေချာခဲ့တဲ့ကိစ္စပါ။ ဘာဖြစ်လို့လဲဆိုတော့ အာဏာရပါတီ ဘာရာတီရာ ဂျန်နာတာနှင့် ယင်းရဲ့ မဟာမိတ်ပါတီတွေရဲ့အင်အားကြောင့်ဖြစ်ပါတယ်။

မာမူ သမ္မတဖြစ်လာခြင်းဟာ ၂၀၂၄ ရွေးကောက်ပွဲမှာ ဝန်ကြီးချုပ် နာရင်ဒရာမိုဒီ ပြန်အရွေးခံရဖို့ သူ့ရဲ့ ဆင်းရဲသား မျိုးနွယ်စုအခြေခံအင်အားတွေ ချဲ့ထွင်ပေးလိုက်သလိုဖြစ်သွားပါတယ်လို့ သုံးသပ်သူတွေကဆိုပါတယ်။

“ သူမ  သမ္မတဖြစ်လာတာဟာ အိန္ဒိယ အထူးသဖြင့် ဆင်းရဲသားတွေ၊အပယ်ခံတွေနှင့် နင်းပြားတွေ အတွက် အရေးပါတဲ့ အခိုက်အတန့်တစ်ခုဖြစ်တယ်” လို့ မာမူရဲ့မိန့်ခွန်းအပြီးမှာ ဝန်ကြီးချုပ်မိုဒီက တွစ်တာမှာပို့စ်တင်ပါတယ်။

သူမရွေးကောက်ခံရတာဟာ အိန္ဒိယရဲ့လက်ရှိဖွံ့ဖြိုးတိုးတက်မှုရဲ့ နောက်မှာကျန်ရစ်ခဲ့ရသူတွေကို မျှော်လင့်ချက်တွေ ဖြစ်စေတယ် လို့ မာမူက ပြောပါတယ်။

“ ရာစုနှစ်များစွာ ချို့တဲ့နွမ်းပါးခဲ့ရသူတွေအတွက်  ဖွံ့ဖြိုတိုးတက်မှုရဲ့အကျိုးခံစားခွင့်တွေနှင့် ဝေးနေရသူတွေဟာ ကျွန်မအပေါ် အလေးအနက်ထားရှိကြတာကို  ကျွန်မ အထူးပဲ နှစ်ထောင်းအားရဖြစ်ပါတယ်” လို့ သူမကပြောပါတယ်။

အိန္ဒိယနိုင်ငံမှာ ဝန်ကြီးချုပ်ဟာ အုပ်ချုပ်ရေးအာဏာကို စွဲကိုင်ထားပါတယ်။ ဒါပေမယ့် အချို့သောပါလီမန်ဥပဒေကြမ်းတွေကို သမ္မတအနေနှင့် ပါလီမန်ကိုပြန်ပို့နိုင်ပါတယ်။အဲဒီ့အပြင် အစိုးရဖွဲ့စည်းတဲ့ လုပ်ငန်းစဉ်မှာလည်း ကွပ်ကဲကြီးကြပ်သူအဖြစ် ပါဝင်ရပါတယ်။

မာမူဟာ အိန္ဒိယနိုင်ငံမှာ ၂၀၀၇ခုနှစ်ကနေ ငါးနှစ်တာဝန်ယူခဲ့တဲ့ သမ္မတ ပရက်တီဘာပက်တီလ် ပြီးရင် ဒုတိယမြောက် အမျိုးသမီး သမ္မတတစ်ဦးဖြစ်ပါတယ်။

မာမူဟာ  ဟိန္ဒိူဇာတ်ခွဲခြားမှုစနစ်အခြေခံတဲ့ ဒါလစ်လူ့အဖွဲ့အစည်းရဲ့ ဒုတိယမြောက်သမ္မတဖြစ်သူ ရမ်နတ်ကိုဗင်းရဲ့ အရိုက်အရာ ကို ဆက်ခံသူဖြစ်ပါတယ်။

#Source_AFP

#India’s_First_Tribal_President

#Droupadi_Murmu

#India_Politics

#World_Wildlife
Published 25 July 2022

တောင်အာဖရိကမှ တိရိစ္ဆာန်စောင့်ရှောက်ရေးအဖွဲ့တွေက မိဘမဲ့ကြံ့ငယ်လေးတွေအကောင် ၃၀ ကျော်ကို လုံခြုံမှုရှိသည့် ဘေးမဲ့တောထဲသို့ရွှေ့ပြောင်းပေးခဲ့ပါတယ်။

#Yangon_Media_Group

#Local_News
Published - 25 July 2022

ကမ္ဘာ့ရွှေဈေးကျနေပေမယ့် ပြည်တွင်းရွှေဈေးကွက်မှာတော့ ဈေးမကျသေးပဲ ဈေးအမြင့်ပိုင်းနဲ့ အရောင်းအေးနေတယ်လို ရန်ကုန်တိုင်းရွှေလုပ်ငန်းရှင်များအသင်းကနေ အခုလို သိရပါတယ်။

#Yangon_Media_Group

#Local_News
Published - 24 July 2022

လတ်တလောမှာ ရွှေချည်ထိုးဝတ်စုံလုပ်ငန်းတွေ အရောင်းပြန်ဖြစ်နေသော်လည်း ရွှေချည်ထိုးဈေးကွက်တစ်ခုလုံးကတော့ အရောင်းအေးစက်နေဆဲဖြစ်တယ်လို့ ရွှေချည်ထိုးလုပ်ငန်းလုပ်ကိုင်တဲ့ ကိုရဲလင်းအောင် ကပြောပါတယ်၊၊

#Yangon_Media_Group

#Local_News
Published _ 25 July 2022

မော်လ်ဒိုက်၌ ဇူလိုင်လ ၁၇ ရက်မှ ၂၁ ရက်အထိ ကျင်းပခဲ့သည့် ၅၄ ကြိမ်မြောက် အာရှကာယဗလနှင့် ကာယကြံ့ခိုင်မှု ချန်ပီယံရှစ်ပြိုင်ပွဲအား မြန်မာနိုင်ငံကာယဗလနှင့် ကာယကြံ့ခိုင်မှုအားကစားအဖွဲ့ချူပ်မှ အမျိုးသား ၃ ဦးနှင့် အမျိုးသမီး ၃ ဦးတို့ ဝင်ရောက်ယှဉ်ပြိုင်ခဲ့ကြောင်း သိရသည်။

ဝင်ရောက်ယှဉ်ပြိုင်ရာ၌ မအေးသန္တာခိုင်မှ အမျိုးသမီး Model Physique (အသက် ၄၀ နှစ်အထက်)ပြိုင်ပွဲ၌ ရွှေတံဆိပ်ဆု၊ ကိုရဲထွန်းနောင်မှ အမျိုးသား(၇၀) ကီလိုတန်းမောင်ပြိုင်ပွဲ၌ ငွေတံဆိပ်ဆုများ ရရှိခဲ့သည်။

ယင်းအပြင် မမီမီကျော်နိုင်မှ အမျိုးသမီး Model Physique (၁၆၀ စင်တီမီတာအောက်)ပြိုင်ပွဲ၌ အဆင့်(၄)၊ မဝတ်ရည်ဖြိုးမှ အမျိုးသမီး Model Physique (Women Athletic Physique)ပြိုင်ပွဲ၌ အဆင့်(၄)၊ ကိုခင်မောင်ကျော်မှ အမျိုးသား(၈၀) ကီလိုတန်း မောင်ပြိုင်ပွဲ၌ အဆင့်(၄)၊ ကိုကျော်မင်းသန်းက အမျိုးသား (၅၅)ကီလိုတန်း မောင်ပြိုင်ပွဲ၌ အဆင့်(၅) အသီးသီးရရှိခဲ့ကြောင်း သိရသည်။

၅၄ ကြိမ်မြောက် အာရှကာယဗလနှင့် ကာယကြံ့ခိုင်မှုချန်ပီယံရှစ်ပြိုင်ပွဲအားဝင်ရောက်ယှဉ်ပြိုင်ခဲ့သည့် မြန်မာအားကစားအဖွဲ့သည် ဇူလိုင်လ ၂၄ ရက်တွင် ရန်ကုန်လေဆိပ်သို့ပြန်လည်ရောက်ရှိလာခဲ့ပြီး မြန်မာအားကစားအဖွဲ့အား ရန်ကုန်မြို့တော်စည်ပင် ဥက္ကဋ္ဌဦးဗိုလ်ဌေးနှင့် ရန်ကုန်တိုင်းအားကစားနှင့် ကာယပညာကော်မတီ ဥက္ကဋ္ဌ၊ ဥပဒေချူပ်ဦးဌေးအောင်အပါအဝင် တာဝန်ရှိသူများ၊ ပြည်သူများက လာရောက်ကြိုဆိုခဲ့ကြောင်း သိရသည်။

ymg/NN
#Yangon_Media_Group

#Local_News
Published - 25 July 2022

(၁)နှစ်ကျော်ကာလအတွင်း ပြည်ပနိုင်ငံတွေက မြန်မာအလုပ်သမားဦးရေ ၃၆,၀၀၀ ကျော် ပြည်ပသို့ စေလွှတ်ခွင့်ပြုခဲ့ကြောင်း အလုပ်သမားဝန်ကြီးဌာနမှ သိရသည်။

အဆိုပါ အလုပ်သမားများကို ၂၀၂၁ ခုနှစ် ဖေဖော်ဝါရီ ၁ရက်မှ ၂၀၂၂ ခုနှစ် ဇွန်လ ၃၀ ရက်အထိ ပြည်ပအလုပ်အကိုင်သက်သေခံကတ် (OWIC) ပြုလုပ်ပြီး စေလွှတ်ခဲ့ကြောင်း သိရသည်။

ယင်းသို့စေလွှတ်ရာတွင် ထိုင်းနိုင်ငံသို့ ၁၁,၁၂၃ ဦး၊ စင်ကာပူနိုင်ငံသို့ ၁၀,၅၆၁ ဦး၊ ကိုရီးယားနိုင်ငံသို့ ၂,၀၈၃ ဦး၊ ဂျပန်နိုင်ငံသို ၇,၅၅၈ ဦး၊ မလေးရှားနိုင်ငံသို့ ၃,၂၈၆ ဦး အပါအဝင် ပြည်ပ ၅၇နိုင်ငံကို စုစုပေါင်းလုပ်သား ၃၆,၃၆၅ ဦးဖြစ်ကြောင်း သိရသည်။

ပြည်ပသို့ သွားရောက်လုပ်ကိုင်မည့် အလုပ်သမားများကို တာဝန်ယူစေလွှတ်ရန် အေဂျင်စီ ၃၀၀ ကျော်အား အကျိုးဆောင်လိုင်စင်ထုတ်ပေးထားကြောင်း သိရသည်။

ymg/sth
#Yangon_Media_Group

#Local_News
Published - 25 July 2022

အသက်ဂုဏ်ဝါကြီးပြီး နာမည်ဂုဏ်သတင်းကျော် ကြားသည့်မြန်မာကာတွန်းဆရာကြီးများအား ယခုဇူလိုင်လအတွင်း ဂါဝရပြုကန်တော့သွားမည်ဖြစ်ကြောင်း မြန်မာနိုင်ငံကာတွန်းဆရာများအသင်းမှ တာဝန်ရှိသူတစ်ဦးက ပြောသည်၊၊

ယခင်က အသက်ဂုဏ်ဝါကြီးသည့် မြန်မာကာတွန်းဆရာကြီးများကို မြန်မာနိုင်ငံကာတွန်းဆရာများ အသင်းအနေဖြင့် နှစ်စဉ် ဂါဝရပြုကန်တော့လေ့ရှိပြီး ကိုဗစ်ကပ်ရောဂါဖြစ်ပွားမှုများကြောင့် ဂါဝရပြုကန်တော့ပွဲအခမ်းအနားများ ပြုလုပ်နိုင်ခြင်းမရှိခဲ့ပေ၊၊

ယခုနှစ်တွင်လည်း ကိုဗစ်ဖြစ်ပွားမှုကျန်ရှိနေသေးသည့်အတွက် အခမ်းအနားမလုပ်တော့ဘဲ အသက်ဂုဏ်ဝါကြီးသည့် မြန်မာကာတွန်း ဆရာကြီး(၁၄)ဦးအား ကန်တော့ပစ္စည်းများကို အိမ်တိုင်ရာရောက် ပို့ဆောင်ပေးပြီး ဂါဝရပြုကန်တော့သွားမည်ဖြစ်ကြောင်း မြန်မာနိုင်ငံကာတွန်းဆရာများအသင်းမှ တာဝန်ရှိသူတစ်ဦးက YMG ကို ပြောသည်၊၊

"ကာတွန်းဆရာကြီး(၁၄)ဦးကို ဂါဝရပြုကန်တော့ဖို့ ရှိပါတယ်၊၊ ကန်တော့ပစ္စည်းများကို အိမ်တိုင်ရာရောက် ပို့ဆောင်ပေးပြီး ဂါဝရပြုကန်တော့သွားမှာပါ၊၊ အလှူငွေတွေလည်းလက်ခံနေပါတယ်၊၊ အခုလအတွင်း ဂါဝရပြုကန်တော့နိုင်အောင် ဆောင်ရွက်နေပါတယ်"ဟု
မြန်မာနိုင်ငံကာတွန်းဆရာများအသင်းမှ တာဝန်ရှိသူတစ်ဦးက ပြောသည်၊၊

ကန်တော့ခံကာတွန်းဆရာကြီးများကတော့ ဦးမောင်မောင်၊ ဦးရွှေမင်းသား၊ ဦးချစ်ဆွေ၊ ဦးမြင့်သိန်း၊ ဦးတင်အောင်နီ၊ ဦးအောင်အောင်၊ ဦးငွေကြည်၊ ဦးသန်းထွန်း၊ ဦးဖေစန်း၊ ဦးမောင်မောင်လေး၊ ဦးကျော်တင်မြင့်သစ်၊ ဦးသစ်ထွဏ်း၊ ဦးဗချီ၊ ဦးအကိန်းတို့ကို ဂါဝရပြုကန်တော့မည်ဖြစ်ကြောင်းသိရသည်၊၊

ymg/tthl
#Yangon_Media_Group

#Local_News

Published 25 July 2022

ရှမ်းပြည်နယ်(အရှေ့ပိုင်း)တာချီလိတ်မြို့ မြန်မာ- ထိုင်း အမှတ်(၂)ချစ်ကြည်ရေးတံတားပေါ်မှ နေ့စဉ်ကုန်တင်ယာဉ်မောင်းများအား(covid-19)ကာကွယ်ဆေး တတိယအကြိမ်ထိုးနှံပေးခြင်းကိုယမန်နေ့နံနက် ၁၀ နာရီ အချိန်က ခရိုင်ဆေးရုံအုပ်ကြီးဒေါက်တာဝင်နိုင်ဦးစီးပြီးကျန်းမာရေးဝန်ထမ်းများက ထိုးနှံပေးခဲ့ကြောင်းသိရသည်။

နှစ်နိုင်ငံသဘောညီမှုအရ တတိယအကြိမ် ကာကွယ်ဆေးထိုးနှံပြီးသူများသာ တံတားပေါ်တွင် ဖြတ်သန်းမောင်းနှင်ခွင့်ပြုသဖြင့် ယခုကဲ့သို့ မြန်မာယာဉ်မောင်းများကိုထိုးနှံပေးခြင်းဖြစ်ကြောင်း သိရပြီး ယာဉ်မောင်း (၇၀)ဦးကျော်ကို ထိုးနှံပေးခဲ့ကြောင်း သိရှိရသည်။

-ymg/ys-tcl
#Yangon_Media_Group

#DailyNews
Published - 25 July 2022

၁။ ရွှေချည်ထိုးဝတ်စုံလုပ်ငန်းများ ပြည်တွင်း၌အရောင်းပြန်ဖြစ်နေ၊ ပြည်ပဈေးကွက်အေးစက်ဆဲဖြစ်

၂။ ဒေါ်လာဈေး အတက်အကျပေါ် မူတည်၍ ရွှေဈေးကွက်အပြောင်းအလဲရှိမည်

၃။ နေ့စဉ်မိုးလေဝသသတင်း။

၄။ မိဘမဲ့ကြံ့ပေါက်လေးများအား တောင်အာဖရိကသို့ ပြောင်းရွှေ့ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published - 25 July 2022

အစိုးရသစ်လက်ထက်တွင် ကားပါမစ်ပိတ်ခြင်းနှင့် ဒေါ်လာဂယက်ကြောင့် မြန်မာ့ကားဈေးကွက် ထိခိုက်မှုကြီးမားကြောင်း မြန်မာနိုင်ငံမော်တော်ယာဉ်အသင်း(AAM) ဥက္ကဌ ဦးအောင်ဝင်းက ပြောသည်။

"ကားဈေးကွက်က ဒေါ်လာနဲ့ကိုမဆိုင်ပဲ သီးခြားသက်သက်ကြီးကိုဖြစ်သွားတာ။ ကားပါမစ်တွေပိတ်လိုက်တော့ ကားဈေးတွေက မိုးထိုးသွားတာပေါ့။ ဒေါ်လာထက်တောင် ပိုတက်သွားသေးတယ်။ ဒေါ်လာတက်တာနဲ့ ဆိုင်တော့လည်းဆိုင်တယ်။ သူကပိုပြီးတော့ များတာပေါ့။ ကားကျတော့ ဒေါ်လာတက်တာနဲ့ကို မကဘူး။ ပါမစ်ပိတ်လိုက်တော့ တက်တာက ပိုများတာပေါ့။ အကုန်လုံးကရပ်ဆိုင်းတာပေါ့။ ကြီးကြီးမားမားထိခိုက်မှုရှိတာပေါ့။ လက်ကျန်ကားတွေဈေးတင်ရောင်း၊ ဝယ်တဲ့သူတွေကလည်းဝယ်စုပေါ့။ဈေးတက်ဖို့အလားအလာကောင်းတော့ အကုန်လုံးဝယ်လှောင်ကြရင်းနဲ့ ကားဈေးကွက်ကတော့ တက်သွားတာပေါ့"ဟုယင်းကပြောသည်။

အစိုးရသစ်မှ ကားတင်သွင်းခွင့်ပိတ်လိုက်ခြင်းကြောင့် အကျိုးဆက်အနေဖြင့် အလုပ်အကိုင်အားလုံးနီးပါးရပ်ဆိုင်းပြီး ဝန်ထမ်းများအလုပ်လက်မဲ့ဖြစ်ရကြောင်း သိရသည်။

ယင်းအပြင် ပြည်တွင်း၌တပ်ဆင်ထုတ်လုပ်သည့် ဆူဇူကီးအပါအဝင် ကားကုမ္ပဏီတစ်ဒါဇင်ကျော်သည် တင်သွင်းခွင့်ပိတ်ထားခြင်းကြောင့် လုပ်ငန်းလည်ပတ်မှု ရပ်နားထားရကြောင်း သိရသည်။

ymg/sth
#Yangon_Media_Group

#World_Military
Published 25 July 2022

ယူကရိန်းမှ ဆန်စပါးတင်ပို့ရေး သဘောတူညီချက်အရ အဓိကကျတဲ့ယူကရိန်းဆိပ်ကမ်းမြို့ကို ရုရှားတို့ဒုံးကျည်များဖြင့် ပစ်ခတ်တိုက်ခိုက်ခဲ့ရာ အမေရိကန်မှ ထောက်ပံ့ကူညီပေးတဲ့ လက်နက်ပစ္စည်းကို ထိမှန်ခဲ့ကြောင်း ရုရှားတို့က ဇူလိုင် ၂၄ ရက်နေ့မှာ ထုတ်ပြန်လိုက်ပါတယ်။

ထိုအချိန်မှာ ရုရှားနိုင်ငံခြားရေးဝန်ကြီး'ဆာဂျီလက်ဗ်လော့ဗ်'က အာဖရိကနိုင်ငံများသို့ အလည်အပတ်ခရီးသွားလာလျက်ရှိပြီး အီဂျစ်ကိုရောက်ရှိနေစဉ်မှာ ရုရှားဆန်စပါးကို ဆက်လက်ထောက်ပံ့သွားဖို့ အီဂျစ်နိုင်ငံခြားရေးဝန်ကြီး'ဆာမက်ရှောကရီ'နဲ့တွေ့ဆုံကာ အာမခံခဲ့ပါတယ်။

ယူကရိန်းသမ္မတ'ဗိုလိုဒီမီယာဇယ်လန်စကီ'က ရုရှားတို့အနေနဲ့ အိုဒီဆာဆိပ်ကမ်းကို တိုက်ခိုက်တာဟာ ယုတ်မာရိုင်းစိုင်းတဲ့ လုပ်ရပ်ဖြစ်ကြောင်း ရှုတ်ချလိုက်ပါတယ်။

စစ်ဖြစ်နေတဲ့ ၂ နိုင်ငံစလုံးက စက်ရုံများမှ ပို့ကုန်များကိုတင်ပို့ဖို့ သဘောတူညီမှုရယူပြီး နောက်တစ်ရက်မှာပဲ အခုလိုတိုက်ခိုက်ခဲ့တာဖြစ်ပါတယ်။

ထိုသဘောတူညီချက်ကို တူရကီမှ ကြားဝင်ကူညီပေးခဲ့ပြီး ယခုဒုံးကျည်ထိမှန်ခဲ့ခြင်းက ရုရှားတပ်ဖွဲ့များမှာ တာဝန်မရှိကြောင်း ရုရှားရဲ့အာမခံချက်ကိုရရှိထားတယ်လို့ တူရကီက ဆိုခဲ့ပါတယ်။

ဒါပေမဲ့ ရုရှားရဲ့ပစ်ခတ်မှုက ယူကရိန်းစစ်သင်္ဘောတစ်စင်းနဲ့ အမေရိကန်မှပေးပိုထားတဲ့ သင်္ဘောဖျက်လက်နက်များကို ဖျက်ဆီးနိုင်ခဲ့ကြောင်း ရုရှားကာကွယ်ရေးဝန်ကြီးဌာနက တနင်္ဂနွေနေ့မှာ ထုတ်ပြန်လိုက်ပါတယ်။

ကမ္ဘာလုံးဆိုင်ရာ စားနပ်ရိက္ခာကျပ်တည်းခြင်းကို ဖြေလျှော့နိုင်ဖို့ လအတန်ကြာညှိနှိုင်းခဲ့ရပြီး တူရကီနိုင်ငံအစ္စတန်ဘူလ်မှာ လက်မှတ်ရေးထိုးခဲ့တဲ့ သဘောတူညီချက်မှတ်ကျောက်ကတော့ ယခုလိုက်ပစ်ခတ်မှုတွေကြောင့် ပျက်သုဉ်းဖို့ နီးစပ်လာပါတယ်။

စားနပ်ရိက္ခာ အလွန်ကျပ်တည်းလားတဲ့ ကမ္ဘာ့အဆင်းရဲဆုံး အာဖရိကတိုက်မှာ ကုန်ဈေးနှုန်းများ မြင့်တက်နေရပါတယ်။

'လက်ဗ်ရော့ဗ်'က ယူဂန်ဒါ၊ အီသီယိုးပီးယား၊ ကွန်ဂိုဘရက်ဇာဗီးလ်တို့ကိုလည်း သွားရောက်လည်ပတ်ခဲ့ပြီး ဆန်စပါးမှာယူမှုများကို ရုရှားကဖြည့်ဆည်းပေးမယ်လို့ ပြောပြခဲ့ပါတယ်။

အိုဒီဆာဆိပ်ကမ်းကို တိုက်ခိုက်ခြင်းက ရုရှားတို့ကိုယုံကြည်လို့မရကြောင်းထင်ရှားနေပြီး ရုရှားနဲ့ညှိနှိုင်းဆွေးနွေးမှုတွေကလည်း ပိုမိုခက်ခဲလာဦးမယ်လို့ 'ဇယ်လန်စကီ'က မှတ်ချက်ပြုလိုက်ပါတယ်။

တူရကီသမ္မတ 'ရီဆပ်တာယစ်အာဒိုဂန်'နဲ့ ကုလသမဂ္ဂအကြီးအကဲ'အန်တိုနီယိုဂူတာရက်စ်'တို့ ကြားဝင်ကူညီပေးထားတဲ့ သဘောတူညီမှုအရ အိုဒီဆာဆိပ်ကမ်းဟာ ကုန်တင်ပို့ရေးအချက်အခြာနေရာ ၃ ခုထဲက တစ်ခုဖြစ်ပါတယ်။

ရုရှားတို့တိုက်ခိုက်ချိန်မှာ ဆန်စပါးတွေ သိုလှောင်ထားတာဖြစ်ပြီး စားစရာတွေကိုတော့ မထိခိုက်ခဲ့ကြောင်း ယူကရိန်းအာဏာပိုင်များကဆိုပါတယ်။

သောကြာနေ့က လက်မှတ်ရေးထိုးပွဲမှာ ဦးဆောင်ခဲ့တဲ့'ဂူတာရက်စ်'က ထိုတိုက်ခိုက်မှုကို ပြတ်ပြတ်သားသားရှုတ်ချလိုက်ပါတယ်။

ရုရှားရဲ့သဘောတူညီမှု ကတိကဝတ်တွေကိုလည်း ယုံကြည်ဖို့သံသယရှိလာကြောင်း အမေရိကန်က ထုတ်ဖော်ပြောကြားလိုက်ပါတယ်။

တနင်္ဂနွေနေ့ မတိုင်ခင်အထိ ရုရှားဘက်က တုံ့ပြန်ပြောကြားခြင်းမရှိဘဲ တူရကီကာကွယ်ရေးဝန်ကြီးကတော့ ရုရှားတို့က သူတို့တိုက်ခိုက်တယ်ဆိုတာကို ငြင်းဆိုထားကြောင်း ပြောကြားခဲ့ပါတယ်။

တိုက်ခိုက်မှုကြောင့် ထိခိုက်ဒဏ်ရာရရှိသူအရေအတွက်ကို ယူကရိန်းဘက်ကအတိအကျ မထုတ်ပြန်ထားပါဘူး။

ယူကရိန်းကို ရုရှားကျူးကျော်ခဲ့တဲ့စစ်ဘေးဒဏ်ကြောင့် လူပေါင်း ၄၇ သန်းလောက် အငတ်ဘေးဆိုက်ရောက်နေမှုကို ဖြေလျှော့နိုင်ရန် ထိုနိုင်ငံများအကြား အဓိကကျတဲ့ ပထမဆုံးသဘောတူညီချက်ကို လက်မှတ်ရေးထိုးခဲ့ကြတာ ဖြစ်ပါတယ်။

ထိုသဘောတူညီချက်ထဲမှာ ယူကရိန်းဆန်စပါးတွေသယ်ဆောင်လာတဲ့သင်္ဘောများ ဘေးကင်းစိတ်ချစွာသွားလာနိုင်ရေးအချက်တွေ ပါဝင်နေပါတယ်။

Source: CNA
#Yangon_Media_Group

#Local_News
Published _ 25 July 2022

ကိုဗစ်-၁၉ ရန်ပုံငွေလက်ကျန်မှ ငွေကျပ် ၄၀၀ ဘီလီယံကို သီးသန့်ရန်ပုံငွေ တစ်ရပ်ထူထောင်ပြီး နိုင်ငံတော်စီမံအုပ်ချုပ်ရေး ကောင်စီက ချမှတ်ဆောင်ရွက်လျက်ရှိသည့် စီးပွားရေးဦးတည်ချက်များနှင့်အညီ နိုင်ငံစီးပွားရေးဖွံ့ဖြိုးတိုးတက်မှုအတွက် အရေးပါသည့် ပြည်တွင်းစီးပွားရေးလုပ်ငန်းများကို အတိုးနှုန်း သက်သာစွာနှင့် ချေးငွေများ စိစစ်ထုတ်ချေးပေးသွားမည် ဖြစ်ကြောင်း စီမံကိန်းနှင့်ဘဏ္ဍာ ရေးဝန်ကြီးဌာန သတင်းထုတ်ပြန်ချက်အရ သိရသည်။

စိုက်ပျိုးရေးနှင့် မွေးမြူရေးကို အခြေခံသည့်ကုန်ထုတ်လုပ်မှုလုပ်ငန်းများ၊ စက်မှုလက်မှုဆိုင်ရာ လုပ်ငန်းများနှင့် ထုတ်ကုန်များတိုးမြှင့်ထုတ်လုပ်နိုင်ပြီး အလုပ်အကိုင်အခွင့် အလမ်းများ ဆောင်ရွက်ဖော်ဆောင်ပေးနိုင်သည့် ပြည်တွင်းစီးပွားရေးလုပ်ငန်းများကို ထုတ်ချေးပေးသွားမည်ဖြစ်ကြောင်း သိရသည်။

လက်ရှိ မြန်မာနိုင်ငံတွင် ကိုဗစ်-၁၉ရောဂါဖြစ်ပွားမှုအခြေအနေသည် များစွာ ကျဆင်းလာခြင်းကြောင့် ကိုဗစ်ကပ်ရောဂါနှင့် နိုင်ငံတကာဖြစ်ပေါ်ပြောင်းလဲမှုအခြေအနေများအရ ထိခိုက်ကျဆင်းခဲ့သည့် နိုင်ငံတော် စီးပွားရေးကို ပြန်လည်ဦးမော့လာစေရန် ကြိုးပမ်းဆောင်ရွက်မည်ဖြစ်ကြောင်း သိရသည်။

ပြည်ထောင်စုဝန်ကြီးဌာနများနှင့် တိုင်းဒေသကြီးပြည်နယ် အစိုးရအဖွဲ့များသည် ကိုဗစ်- ၁၉ ကာကွယ်၊ ထိန်းချုပ်၊ ကုသရေးဆိုင်ရာအသုံးစရိတ်များကို အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုရန်ပုံငွေထဲမှ ကိုဗစ်-၁၉ ကာကွယ်၊ ထိန်းချုပ်၊ ကုသရေးအမျိုးသားအဆင့်ဗဟို ကော်မတီ၏ခွင့်ပြုချက်ဖြင့် စနစ်တကျစိစစ်သုံးစွဲလျက်ရှိ ကြောင်း သိရသည်။

၂၀၂၂ ခုနှစ်၊ ဇူလိုင်လ ၁၄ ရက် စာရင်းအရ ကိုဗစ် ရန်ပုံငွေလက်ကျန်သည် (၄၉၁ ဒသမ ၉၇၈) ဘီလီယံဖြစ်ကြောင်း ထုတ်ပြန်ချက်၌ ဖော်ပြထားသည်။

ymg/NN
#Yangon_Media_Group