#DailyNews
Published - 5 Feb 2022

၁။ ချေးငွေပြန်ဆပ်ကာလ ဖြေလျော့မှုကြောင့် တောင်သူတွေ ရက်ကျော်ဒဏ်ကြေး သက်သာမည်။

၂။ YBS ယာဉ်များ ကတ်စနစ်တပ်ဆင်ရေး ညှိနှိုင်းမှုများစတင်ပြုလုပ်။

၃။ နေ့စဉ်မိုးလေဝသသတင်း။

၄။ ကျူးဘားနိုင်ငံတွင် နွားနို့ ရှားပါးပြတ်လတ်မှုကြုံတွေ့နေရ.... အစရှိတဲ့သတင်းတွေိကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews

Published - 5 Feb 2022

ယနေ့( ဖေ ဖော်ဝါရီလ ၅ ရက် နေ့)အထိ ရောဂါပိုးကင်းစင်သူ(၃၂)ဦး ဆေးရုံဆင်းခွင့်ရရှိခဲ့ပြီဖြစ်တယ်လို့ သိရပါတယ်။

ယနေ့တွင် တမူးမြို့ အ.ထ.က(၂)၌ ထားရှိသောကိုဗစ်ပိုးတွေ့လူနာ(၆)ဦးအား သတ်မှတ်ရက်ပြည့်မြောက်ပြီးရောဂါပိုးမတွေ့ ရှိတော့သဖြင့် နေအိမ်သိုပြန်လည်စေလွှတ်ပေးခဲ့တာဖြစ်တယ်လို့ သိရပါတယ်။

ဒါ့အပြင် ယမန်နေ့ကလည်း တမူးပြည်သူ့ဆေးရုံမှ ကျား/မ(၆)ဦး ၊အ .ထ .က(၂)မှ ကျား/မ(၁၆)ဦး၊ စုစုပေါင်း(၂၂)ဦးဆေးရုံဆင်းခွင့်ရရှိခဲ့တာဖြစ်ပါတယ်။

တမူးမြို့တွင် ယခုကူးစက်ခံနေရသော ကိုဗစ် ရောဂါပိုးမှာ ကူးစက်မှုမြန်သော်လည်း ကူးစက်ခံရသောလူနာများမှာ ကျန်းမာရေးအတွက် စိုးရိမ်စရာမတွေ့ရပါဘဲ အားလုံးကျန်းမာစွာရှိနေတယ်လို့လည်း သိရပါတယ်။

အဆိုပါ တမူးမြို့ တွင်(ဇန်နဝါရီလ ၂၄ ရက် နေ့)တစ်ရက်ထဲမှာပင် ကိုဗစ်အတည်ပြုလူနာ ၅၉ ဦးကို စတင်တွေ့ ရှိခဲ့ခြင်းဖြစ်ပြီး အဲ့ဒီလိုတွေ့ ရှိပြီး နောက်ပိုင်း ၄ ရက်အကြာ(ဇန်နဝါရီလ ၂၇ ရက် နေ့)မှာ ကိုဗစ်အတည်ပြု လူနာသစ် ၂၄ ဦး၊ (ဇန်နဝါရီလ ၂၈ ရက် နေ့)တွင် ကိုဗစ်အတည်ပြုလူနာ ၂၉ နှင့် (ဇန်နဝါရီလ ၃၀ ရက် နေ့)တွင် ကိုဗစ်အတည်ပြု လူနာသစ် ၂၉ ဦးတို့ကို ထပ်မံ တွေ့ ရှိခဲ့တာဖြစ်ပါတယ်။

ဒါ့အပြင် ယခုဖေဖော်ဝါရီလ ၁ ရက် နေ့မှာ တမူးမြို့တွင် ကိုဗစ်အတည်ပြုလူနာ(၆)ဦးကို ထပ်မံတွေ့ ရှိခဲ့ရတာပါ။

ဒါကြောင့် တမူးမြို့တွင် ရောဂါပိုးကူးစက်ခံရပြီးဆေးကုသမှုခံယူနေဆဲ လူနာစုစုပေါင်း(၂၅၉)ဦး အထိ ရှိ နေခဲ့တာဖြစ်ပြီး ယနေ့အထိတော့ ရောဂါပိုးကင်းစင်ပြီဖြစ် တဲ့ ကိုဗစ်လူနာ(၃၂)ဦးက ဆေးရုံဆင်းခွင့်ရရှိခဲ့တာဖြစ်တယ်လို့ သိရပါတယ်။

ဓါတ်ပုံ - တမူးဇွဲမာန်

ymg/kg
#Yangon_Media_Group

#LocalNews
Published - 5 Feb 2022

ရခိုင်ပြည်နယ်မှာ ၂၀၂၂ ခုနှစ်၊ ဇန်နဝါရီလအထိ လျှပ်စစ်မီးကို ၆၀ ရာခိုင်နှုန်းခန့် သုံးစွဲနိုင်ပြီလို့ ထုတ်ပြန်ချက်အရ သိရပါတယ်။

ရခိုင်ပြည်နယ်အတွင်း ကျေးရွာပေါင်း ၃၇၄၂ ရွာရှိတဲ့အနက် ၂၀၂၂ ခုနှစ်၊ ဇန်နဝါရီလအထိ ဓာတ်အားစနစ်၊ ဆိုလာစနစ်၊ ဒီဇယ်စနစ်စတဲ့နည်းလမ်းတွေနဲ့ မီးရရှိပြီး ကျေးရွာပေါင်း ၂၂၄၆ ရွာဖြစ်တဲ့အတွက် ၆၀ ရာခိုင်နှုန်းခန့် လျှပ်စစ်မီးသုံးစွဲနိုင်ခဲ့ပြီး ဖြစ်တယ်လို့ ဆိုပါတယ်။

မနေ့က ဖေဖော်ဝါရီ ၄ ရက်နေ့မှာ နစကအဖွဲ့ဝင်တွေ စစ်တွေမြို့နယ် ဝါဘိုကျေးရွာကို မဟာဓာတ်အားလိုင်းမှ လျှပ်စစ်မီး စတင်ဖြန့်ဖြူးခြင်းဖွင့်ပွဲအခမ်းအနားမှာ သတင်းထုတ်ပြန်ထားတာ ဖြစ်ပါတယ်။

မြန်မာနိုင်ငံတစ်နိုင်ငံလုံးအနေနဲ့ အိမ်ထောင်စုပေါင်း ၁၀ ဒသမ ၉ သန်းကျော်အနက် အိမ်ထောင်စု ၆ ဒသမ ၆ သန်းခန့်ကို မီးရရှိတဲ့အတွက် အိမ်ထောင်စုရဲ့ စုစုပေါင်း ၆၁ ရာခိုင်နှုန်းကို ဓာတ်အားဖြန့်ဖြူးပေးနိုင်တယ်လို့ နစက အတွင်းရေးမှူးက ပြောဆိုထားတာရှိပါတယ်။

သို့ပေမယ့်လည်း လျှပ်စစ်ဓာတ်အားထုတ်လုပ်မှု လျော့နည်းလာတဲ့အတွက် ဓာတ်အားစနစ်အတွင်း ဓာတ်အားလိုအပ်ချက် ၁၄၇၀ မဂ္ဂါဝပ်ခန့်လျော့နည်းရရှိနေတာကြောင့် ရန်ကုန်မြို့အပါအဝင် နိုင်ငံအနှံ့အပြား လျှပ်စစ်ဓာတ်အားပြတ်တောက်တာတွေ ဆက်တိုက်ဖြစ်ပေါ်မယ်လို့ ကြေညာထားပါတယ်။

ပြီးခဲ့တဲ့ ဇန်နဝါရီ ၅ ရက်နေ့က လျှပ်စစ်နှင့် စွမ်းအင်ဝန်ကြီးဌာနက ရန်ကုန်မြို့အပါအဝင် နိုင်ငံအနှံအပြားမှာ နံနက် ၇ နာရီကနေ နေ့လယ် ၁၁ နာရီအတွင်း တစ်ချိန်၊ ညနေ ၅ နာရီကနေ ၇ နာရီအတွင်း တစ်ချိန် မီးပြတ်တောက်မယ်လို့ ကြေညာခဲ့ပါတယ်။

ymg/ ei

#LocalNews
Published - 5 Feb 2022

ယခုကာလတွင် ရန်ကုန်မြို့ မှာ ဖျားနာလူနာတွေ ပြန်လည်များပြားလာပြီး ရာသီဥတုအ အေးဒဏ်ကြောင့် ဖျားနာကြသူများနှင့် ရာသီအကူးအပြောင်းကြောင့် ရာသီတုပ်ကွေးဖြစ်ပွားသူအများအပြားရှိနေတာဖြစ်တယ်လို့ သိရပါတယ်။

ဒါ့အပြင်ယခုကာလတွင်ရန်ကုန်မြို့ အပါအဝင် မြို့ ကြီးအချို့ မှာ ကိုဗစ်အစုအပြုံလိုက်ဖြစ်ပွားမှုနှင့် အိုမီခရွန်ရောဂါပိုး ကူးစက်တွေလည်းရှိနေသည့် အတွက် ပြည်သူလူထုတွေအနေနဲ့ ကိုဗစ်စည်းကမ်းကို အထူးသတိပြုလိုက်နာကြဖို့နဲ့ ကာကွယ်ဆေးထိုးနှံကြဖို့ကိုလည်း ကျန်းမာရေးပညာရှင်များက တိုက်တွန်းထားပါတယ်။

ဒါ့အပြင် အိုမီခရွန်ဗီဇပြောင်း ကိုဗစ်-၁၉ ရောဂါပိုးကူးစက်မှုမှကာကွယ်ရေး အတွက် ကိုဗစ်-၁၉ ရောဂါကာကွယ်ရေး အခြေခံ စည်းမျဉ်းစည်းကမ်းများကို တိကျစွာလိုက်နာကြဖို့နဲ့ သံသယရောဂါ လက္ခဏာရှိသူများအနေဖြင့် နီးစပ်ရာကျန်းမာရေးဌာနသို့ ချက်ချင်းသတင်းပေးပို့ကြဖို့ ကျန်းမာ ရေးဝန်ကြီးဌာနက တိုက်တွန်းထားပါတယ်။

"အခုတလော ဖျားနာလူနာ တွေကိုပြန်တွေ့လာရပါတယ်။ သူကရာသီဥတုအအေးဒဏ် ကြောင့်လည်းပါပါတယ်။ ဖျားကြနာကြတာ ၊ တချို့ကလည်း နှာစေး၊ ချောင်းဆိုးပေါ့၊ ပြောရရင် ဒီကာလမှာ ရာသီတုပ်ကွေး ပုံစံမျိုးတွေ ပြန်ဖြစ်နေကြတာပေါ့။ တစ်ဖက်မှာလည်း ကိုဗစ်နဲ့ အိုမီခရွန်ကလည်း ရှိနေတော့ ဒီကာလမှာ ကျန်းမာရေးကိုတော့ ပြည်သူတွေအနေနဲ့ အထူးဂရုပြုဖို့ လိုပါတယ်။"လို့ ရန်ကုန်မြို့ ရှိ ဆေး ပေးခန်းတစ်ခုမှ ဆရာဝန်တစ်ဦးက ပြောပြခဲ့ပါတယ်။

ကိုဗစ်လူနာအများအပြားနှင့် အိုမီခရွန် အတည်ပြု လူနာများကို ပြီးခဲ့သည့် ရက်ပိုင်းတွေ အတွင်းက တမူးမြို့ နဲ့ကလေးမြို့ မှာ စတင်တွေ့ ရှိခဲ့တာဖြစ်ပြီး ပြည်တွင်းကူးစက်မှုတွေလည်း စတင်ရှိလာခဲ့တာပါ။

ဒါ့အပြင် မကြာသေးမီရက်ပိုင်းအတွင်းက ရန်ကုန်မြို့ ရှိ စက်ရုံတစ်ခုမှာ ကိုဗစ် ရောဂါ ဖြစ်ပွားသူ တွေကို အစုလိုက်အပြုံလိုက် တွေ့ ရှိခဲ့ပြီး နောက် ၄င်းတို့ထဲမှ ၁၀ ဦး၏ ဓါတ်ခွဲနမူနာများကို စစ်ဆေးရာခဲ့မှ အဆိုပါ ၁၀ ဦးလုံးတွင် အိုမီခရွန် ရောဂါပိုးကိုတွေ့ ရှိခဲ့ရတာဖြစ်တယ်။

ဒါ ကြောင့် အိုမီခရွန် ရောဂါ ဖြစ်ပွားမှုနှုန်းများပြားလာပါက အချိန်နဲ့ တပြေးညီ ကူညီပေးနိုင်ရန် အတွက် ရန်ကုန်တိုင်းရှိ လူမှုကူညီ ရေးအသင်း တွေက ကြိုတင်ပြင်ဆင်မှု တွေကို လုပ် ဆောင်ထားကြတယ်လို့ သိရပါတယ်။

"ကျနော်တို့အဖွဲ့ တွေက တော့ အားလုံးကို အသင့် အနေအထားနဲ့ပြင်ဆင်ထားပါတယ်။ ကား တွေရော၊လူအင်အား တွေ ရော အားလုံးကို အသင့်ပြင်ဆင်ထားပါတယ်။ ရန်ကင်းကိုဗစ်ကုသ ရေးစင်တာကို အခြေပြုပြီး တော့ အကုန်လုံး အဆင်သင့်အနေအထားနဲ့ရှိနေကြပါတယ်။ နောက်ပြီး ရန်ကုန်မှာလည်း ကိုဗစ်စင်တာ တွေ ၁၀ ခု လောက်အထိ ဖွင့်လှစ်ထားတယ်လို့ သိရပါတယ်။ နိုင်ငံခြားပြန် တွေ အပါအဝင် ပြည်တွင်းမှာ ဖြစ်ပွားလာရင်လည်း ထားနိုင် အောင် ဆေးဝါးကုသ ပေးနိုင် အောင် ကိုဗစ်စင်တာ တွေကိုလည်း ဖွင့်လှစ် ပေးထားပါတယ်။"လို့ YRO ဥက္ကဌ ဦးထွန်းထွန်းဦး က ပြောပြခဲ့ပါတယ်။

ကျန်းမာ ရေးဝန်ကြီးဌာန၏ နောက်ဆုံးထုတ်ပြန်ထားတဲ့ အချက်အလက် တွေ အရလည်း မြန်မာနိုင်ငံမှာ အိုမီခရွန်ရောဂါပိုးကို နိုင်ငံခြားသားရော၊ မြန်မာနိုင်ငံသားအပါအဝင် စုစုပေါင်း ၃၄၈ ဦးထံမှာ တွေ့ ရှိထားတာပါ။

ဒါ့အပြင် ကိုဗစ်ရောဂါပိုးကို တိုင်းဒေသကြီး၊ ပြည်နယ်အနေနဲ့ ရန်ကုန်တိုင်းဒေသကြီးကတော့ ပိုးတွေ့ မှုအများဆုံးဖြစ်နေပြီး ယခုလက်ရှိထိ ကိုဗစ်-၁၉ ကူးစက်ခံရသူ ၅၃၆,၉၀၄ ဦးအထိ ရှိပြီးလည်း ဖြစ်ပါတယ်။ တစ်နိုင်ငံလုံးအတိုင်းအတာအရ ရောဂါးပိုးတွေ့ ရှိမှု ရာခိုင်နှုန်းမှာလည်း မြင့်တတ်လာတာကို တွေ့ရပါတယ်။

ymg/kg
#Yangon_Media_Group

Published 05 February 2022

အရင်က Facebook လို့ လူသိများခဲ့တဲ့ Meta ကုမ္ပဏီဟာ ဖေဖော်ဝါရီ ၃ ရက်နေ့ ကြာသပတေးနေ့ တစ်ရက်တည်းနဲ့ပင် စတော့ဈေးကွက် အကြီးမားဆုံးထိခိုက်ဆုံးရှုံးမှုဖြစ်ခဲ့ပါတယ်။

စတော့ရှယ်ယာ ၂၆ ရာခိုင်နှုန်းကျဆင်းခဲ့ပြီး ဈေးကွက်တန်ဖိုးမှာလည်း အမေရိကန်ဒေါ်လာ ၂၃၀ ဘီလီယံ ထိုးကျသွားခဲ့ပါတယ်။

ဗုဒ္ဓဟူးနေ့က ကုမ္ပဏီရဲ့ဝင်ငွေ စိတ်ပျက်ဖွယ်နည်းပါးခဲ့ပြီးနောက် အခုလိုဈေးကွက်တန်ဖိုးတွေပါ ထိခိုက်လာတာဖြစ်ပါတယ်။

လူမှုကွန်ရက်အက်ပ်လီကေးရှင်းတွေကို အဓိကထားနေတဲ့လုပ်ငန်းအဖြစ်ကနေ metaverse လို့ခေါ်တဲ့ ဖြစ်တည်မှုပုံရိပ်ယောင်ကမ္ဘာကြီးကို ဖန်တီးဖို့ ပြောင်းလဲအာရုံစိုက်လာကြောင်း အမှုဆောင်အရာရှိချုပ် 'မာ့ခ်ဇူကာဘာ့ဂ်'က ဖော်ပြခဲ့တာဖြစ်ပါတယ်။

အခုအချိန်မှာ Meta ကုမ္ပဏီ ဒုက္ခအကျဉ်းအကြပ်ထဲရောက်နေရတဲ့ အကြောင်းအရင်း ၆ ခုက...

(၁) သုံးစွဲသူအရေအတွက် ဆက်လက်တိုးတက်မှုမရှိခြင်း

- ဖေ့စ်ဘွတ်ခ်သုံးစွဲတဲ့သူ အရေအတွက်တိုးများလာခြင်းက အဆုံးသတ်ကိုကျော်လွန်ခဲ့ပြီဖြစ်ပါတယ်။

- Meta ကုမ္ပဏီရဲ့ အက်ပ်လီကေးရှင်းတွေဖြစ်တဲ့ Instagram, Messenger, WhatsApp တို့မှာ ဗုဒ္ဓဟူးနေ့အထိ အသုံးပြုသူအသစ်တွေ ရှိလာခဲ့ပေမယ့် အဓိကအက်ပ်လီကေးရှင်း ဖေ့စ်ဘွတ်ခ်မှာတော့ ပြီးခဲ့တဲ့လတွေမှာ အသုံးပြုသူ သန်းတဝက်လောက်အထိ လျော့နည်းလာခဲ့ပါတယ်။

- ဝင်တွေကြီးကြီးမားမားမရရှိသေးတဲ့ WhatsApp လို မက်ဆေ့ပို့ဆက်သွယ်တဲ့ဝန်ဆောင်မှုမျိုးမှာ ဝင်တွေရရှိအောင်ပြုလုပ်ဖို့နဲ့ အခြားအခွင့်အလမ်းတွေဆီကနေ ရရှိအောင်ပြုလုပ်ဖို့ အမှုဆောင်တွေက ထောက်ပြထားပါတယ်။

- Meta ရဲ့ အခြားအက်ပ်လီကေးရှင်းဖြစ်တဲ့ Instagram လိုဟာမျိုးက သုံးစွဲသူအမြင့်ဆုံးအနေအထား ရောက်ရှိနိုင်မလားဆိုတာကို ရင်းနှီးမြှုပ်နှံသူတွေက အကဲဖြတ်စောင့်ကြည့်သွားဖို့ ဖြစ်နိုင်ချေများပါတယ်။

(၂) Apple ရဲ့ ကိုယ်ရေးကိုယ်တာအချက်အလက် ပြောင်းလဲပြင်ဆင်မှုများ

- ပြီးခဲ့တဲ့နွေဦးရာသီတုန်းက Apple က သူတို့ရဲ့ စမတ်ဖုန်းလုပ်ဆောင်ချက်စနစ်တွေမှာ  App Tracking Transparency ဆိုတဲ့ စနစ်ကို စတင်ထည့်သွင်းလိုက်ပါတယ်။

- အဆိုပါစနစ်ဟာ ဖေ့စ်ဘွတ်ခ်လို အက်ပ်လီကေးရှင်းတွေက iPhone အသုံးပြုသူတွေရဲ့ အွန်လိုင်းပေါ်ကလုပ်ဆောင်ချက်တွေကို စောင့်ကြည့်ဖို့ iPhone အသုံးပြုသူတွေ ခွင့်ပြုမှာလား ဆိုတာကို ရွေးချယ်လို့ရမှာဖြစ်ပါတယ်။

- အခုအခါ ဖေ့စ်ဘွတ်ခ်နဲ့အခြားအက်ပ်လီကေးရှင်းတွေက iPhone အသုံးပြုသူတွေရဲ့ လုပ်ဆောင်ပုံအချက်အလက်တွေကို စောင့်ကြည့်စစ်ဆေးခွင့်ရဖို့ အသုံးပြုသူတွေထံ ခွင့်ပြုချက်တောင်းရမှာဖြစ်ပြီး သုံးစွဲသူအများစုကတော့ ခွင့်မပြုခဲ့ကြပါဘူး။

- Meta ကုမ္ပဏီရဲ့ အဓိကငွေရပေါက်ဖြစ်နေတဲ့ ဖေ့စ်ဘွတ်ပေါ်မှ ကြော်ငြာတွေကို ကြည့်ရှုသူနည်းသွားမှာဖြစ်ပါတယ်။

- ပိုပြီးအထိနာရတဲ့အချက်က iPhone အသုံးပြုသူတွေက ဖုန်းထဲကပေါ်လာတဲ့ကြော်ငြာတွေကနေ ဝယ်ယူသုံးစွဲမှုမှာ Android ဖုန်းအသုံးပြုသူတွေထက် ပိုပြီးဝယ်ယူသုံးစွဲကြသူတွေဖြစ်ပါတယ်။

(၃) အွန်လိုင်းကြော်ငြာလုပ်ငန်းတွေမှာ Google ကယှဉ်ပြိုင်လာမှု

- Meta ကုမ္ပဏီဒုက္ခရောက်နေတဲ့အတွက် ပြိုင်ဘက်ကုမ္ပဏီတွေ အခွင့်သာဖို့ဖြစ်လာခဲ့ပါတယ်။

- Apple ရဲ့ ကိုယ်ရေးကိုယ်တာအချက်အလက်ပေါ်လစီ ပြောင်းလဲမှုက အသုံးပြုသူတွေရဲ့လုပ်ဆောင်ချက်အလိုက် ကြော်ငြာပြသခွင့်ရဖို့ အခွင့်အရေးနည်းလာတာကြောင့် ကြော်ငြာလုပ်ငန်းရှင်တွေက Google လို နေရာတွေမှာ ပြောင်းပြီးကြော်ငြာအတွက် သုံးစွဲလာကြပါတယ်။

- Meta နဲ့မတူတဲ့အချက်က Google က အသုံးပြုသူတွေရဲ့အချက်အလက်တွေအတွက် Apple ကို မှီခိုနေစရာမလိုပါဘူး။

(၄) TikTok ကိုယှဉ်ပြိုင်လာတဲ့ Reels ရဲ့ပြဿနာ

- တရုတ်နိုင်ငံထုတ် TikTok အက်ပ်လီကေးရှင်းမှာ သုံးစွဲသူ ၁ ဘီလီယံကျော်ရှိနေပြီး ဗီဒီယိုအတိုလေးတွေ ရိုက်ကူးအသုံးပြုလို့ရတာကြောင့် စွဲစွဲလမ်းလမ်းအသုံးပြုနေကြပါတယ်။

- TikTok နဲ့ယှဉ်ပြိုင်ဖို့အတွက် Meta က TikTok လို ဗီဒီယိုအတိုလေးတွေ ရိုက်ကူးလို့ရတဲ့ Instagram Reels ကို ဖန်တီးခဲ့ပါတယ်။

- Reels က Instagram သတင်းပို့စ်အသစ်တွေထက် ပိုမိုလူကြိုက်များလာခဲ့ကြောင့် မစ္စတာ'ဇူကာဘာ့ဂ်'က ဆိုပါတယ်။

- ပြဿနာက Reels က အသုံးပြုသူတွေပိုများလာပေမယ့် ဝင်ငွေရရှိမှုမှာတော့ Instagram က သတင်းပို့စ်တွေ Story တွေလောက် မရရှိတာပဲဖြစ်ပါတယ်။

(၅) Metaverse အစီအစဉ်မှာ အလွန်အကျွံရင်းနှီးမြှုပ်နှံထားခြင်း

- metaverse စနစ်က အင်တာနက်လောကရဲ့ နောက်တဆင့်ဖြစ်လာမယ်လို့ မစ္စတာ'ဇူကာဘာ့ဂ်'က ယုံကြည်ထားပါတယ်။

- ဖြစ်တည်မှုပုံရိပ်ယောင်တွေနဲ့ ကမ္ဘာ့အနှံ့ကလူတွေ ဆက်သွယ်လုပ်ကိုင်ကြလိမ့်မယ်လို့ ယူဆထားတာကြောင့် metaverse ကို အကြီးအကျယ်ရင်းနှီးမြှုပ်နှံထားတာဖြစ်ပါတယ်။

- ပြီးခဲ့တဲ့နှစ်က ဒေါ်လာ ၁၀ ဘီလီယံသုံးစွဲခဲ့ပြီး အနာဂတ်မှာလည်း ဒီထက်ပိုမိုသုံးစွဲသွားဖို့ မျှော်မှန်းထားပါတယ်။

(၆) တရားမျှတစွာယှဉ်ပြိုင်ရေးနဲ့ပတ်သက်ပြီး စွပ်စွဲခံရခြင်းများ

- ဖက်ဒရယ်ကုန်သွယ်ရေးကော်မရှင်၊ တိုင်းရှေ့နေချုပ်တွေက Meta ကုမ္ပဏီကို စီးပွားရေးပြိုင်ဘက်အပေါ် မတရားပြုခဲ့လားဆိုတာနဲ့ ပတ်သက်ပြီး စုံစမ်းစစ်ဆေးမှုတွေ ပြုလုပ်နေကြပါတယ်။

- အမေရိကန်ရှိ ဥပဒေထုတ်ပြန်သူများက ကွန်ဂရက်မှဆောင်ရွက်ချက်တွေနဲ့ ပူးပေါင်းကာ တရားမျှတစွာယှဉ်ပြိုင်ရေးဥပဒေကို အတည်ပြုနိုင်ရေး လုပ်ဆောင်နေကြပါတယ်။

- Meta က လက်ဝါးကြီးအုပ်ခြယ်လှယ်နေတဲ့ လူမှုကွန်ရက်မဟုတ်ကြောင်း၊ TikTok, Apple, Google နဲ့ အခြားပြိုင်ဘက်များစွာနဲ့ အပြိုင်အဆိုင်ဖြစ်နေကြောင်း မစ္စတာ'ဇူကာဘာ့ဂ်'က ဆိုပါတယ်။

Source: The Straits Times

Published 5 Feb 2022

တရုတ်နိုင်ငံ ဘေဂျင်းမြို့တော်က အမျိုးသားအားကစားရုံကြီးမှာ ၂၄ ကြိမ်မြောက်အိုလံပစ်ဆောင်းရာသီအားကစားပွဲတော်ကြီးဖွင့်ပွဲ အခမ်းအနားကို ဖေဖော်ဝါရီ ၄ရက် သောကြာနေ့က ကျင်းပခဲ့ရာ တရုတ်သမ္မတ ရှီကျင့်ဖျင် တက်ရောက်ဖွင့်လှစ်ပေးခဲ့ပါတယ်။

အဲဒီဖွင့်ပွဲအခမ်းအနားကို ကမ္ဘာ့ခေါင်းဆောင် ဒါဇင်များစွာနှင့်အတူ နိုင်ငံတကာအိုလံပစ်ကော်မတီဥက္ကဋ္ဌသောမတ်စ် ဘက်ချ်နှင့် ကုလသမဂ္ဂအထွေထွေအတွင်းရေးမှူးချုပ် အန်တိုနီယိုဂူတာရက်စ်တို့လည်းတက်ရောက်ကြပါတယ်။

Source CCTV Plus

#LocalNews
Published- 5 Feb 2022

မြန်မာနိုင်ငံမှတဆင့်ကန်ချနဘူရီနယ်စပ်မှတဆင့် တရားမဝင် ဝင်ရောက်လာတဲ့ မြန်မာနိုင်ငံသား၁၃၈ ဦးကို ဖေဖော်ဝါရီလ ၄ရက်နေ့ ၁၂ နာရီကျော်အချိန်တွင်ဖမ်းဆီးရမိခဲ့ပြီး ထိုင်းနိုင်ငံကိုဝင်ရောက်ဖို့ ပွဲစားခတစ်ဦးလျင် ၂၅,၀၀၀ ဘတ်အထိပေးခဲ့ရတယ်လို့ သိရပါတယ်။

တရားမဝင်ဝင်ရောက်လာတဲ့ မြန်မာလုပ်သား ၁၃၈ ဦးကို နယ်ခြားစောင့်တပ် ကန်ကျနဘူရီခရိုင်၊ ကန်ကျနဘူရီမြို့နယ်၊ ဘန့်ကောင်ကျေးရွာအုပ်စုမှာဖမ်းဆီးခဲ့ပီး ဖမ်းဆီးခံရသူများတွင် အမျိုးသား ၈၉ ဦး၊ အမျိုးသမီး ၄၉ ဦးပါဝင်တယ်လို့ သိရပါတယ်။

တရားမဝင်ဝင်ရောက်သူတွေဟာရခိုင်ပြည်နယ်၊ ရန်ကုန်တိုင်း၊ ပဲခူးတိုင်း၊ မွန်ပြည်နယ် စတဲ့ဒေသများမှလာခဲ့ကြသူများဖြစ်ကာ ထိုင်းနိုင်ငံရှိ မြို့တော်ဗန်ကောက်၊ စမွတ်ဆာခွန်၊ ရယောင်း၊ ကန်ကျနဘူရီ စသည့်ခရိုင်များတွင်သွားရောက်လုပ်ကိုင်ကြရန်စီစဉ်ထားတယ်လို့သိရပါတယ်။

ထိုင်းနိုင်ငံပြည်သူ့ကျန်းမာရေးတပ်ဖွဲ့မှ တစ်ဦးချင်းကျန်းမာရေးစစ်ဆေးမှုတွေပြုလုပ်ခဲ့ပြီးဥပဒေအရ အရေးယူဆောင်ရွက်နိုင်ရေးဆောင်ရွက်နေတယ်လို့ သိရပါတယ်။
ymg/hm

Photo: Kanchanaburi News
#Yangon_Media_Group

Published 4 February 2022

တရုတ်နှင့်ရုရှားဆက်ဆံရေးကို ပိုမိုသန်စွမ်းအားကောင်းအောင်ဆောင်ရွက်မယ်လို့ တရုတ်သမ္မတ ရှီကျင့်ဖျင်က ဘေဂျင်းကို ရောက်ရှိနေတဲ့ ရုရှားသမ္မတ ပူတင်နှင့်တွေ့ဆုံစဉ်ပြောကြားလိုက်ပါတယ်။

သောကြာနေ့ညမှာကျင်းပတဲ့ ဘေဂျင်း၂၀၂၂အိုလံပစ်ဆောင်းရာသီအားကစားပွဲတော်ဖွင့်ပွဲမတိုင်ခင် ရှီဟာ ပူတင်နှင့် တွေ့ဆုံ ခဲ့တာဖြစ်ပါတယ်။

၂၀၁၄ခုနှစ်တုန်းက ဆိုချီအိုလံပစ်ဆောင်းရာသီအားကစားပွဲကို ရုရှားတွင်ကျင်းပခဲ့စဉ်က သူတက်ရောက်ခဲ့ပြီး ခေါင်းဆောင်နှစ်ဦးဟာ နောင်ရှစ်နှစ်ကကြာရင် ဘေဂျင်းမှာ ထပ်ဆုံကြမယ်လို့ သဘောတူခဲ့ကြတာကို ရှီကျင့်ဖျင်က ပြန်ပြောင်းပြောဆိုပါတယ်။

Source CCTV Plus

Published 4 February 2022
ကိုလံဘီယာပို့ဆောင်ရေးရဲတွေဟာ ဖေဖော်ဝါရီ (၁)ရက်က ကိုလံဘီယာအနောက်မြောက်ပိုင်း လာပင်တာဒါအရပ်က လမ်းတစ်လမ်းပေါ်မှာ မောင်းနှင်နေတဲ့ လူနာတင်ယာဉ်တစ်စီးပေါ်ကနေ ကိုကင်း ၁၂၀ ကီလိုဖမ်းဆီးရမိခဲ့ပါတယ်။

အဲဒီလူနာတင်ယာဉ်ပေါ်ပါလာတဲ့ သူက သူ့ကိုယ်သူ ဆရာဝန်တစ်ဦးလို့ပြောပါတယ်။ သူက ကိုဗစ်လူနာကို သယ်ဆောင်လာတာလို့ ရဲအရာရှိတွေက မေးမြန်းတဲ့အခါ ပြောခဲ့တာပါ။

Source AFP

Published 4 February 2022

နက်ဖလစ် Netflix ရဲ့ နံပါတ်(၁)ထိပ်ဆုံးကပြေးနေတဲ့ စီးရီးအသစ် "All Of Us Are Dead “ကျွန်ုပ်တို့အားလုံးသေဆုံးခဲ့ပြီ”ကို အဲဒီစီးရီးထဲမှာပါတဲ့  သွေးဆာနေတဲ့ ဖုတ်ကောင်တွေရဲ့မြင်ကွင်းတွေကြောင့် တစ်ကမ္ဘာလုံးကပရိသတ်တွေက နှစ်ချိုက် နေကြပါတယ်။ ဒါပေမယ့် လူငယ်ပရိသတ်တော်တာ်များများအတွက်တော့ အဲဒီမြင်ကွင်းတွေဟာ တောင်ကိုးရီးယားရဲ့ နာကျင်ခံစားရတဲ့  သတိရစရာတွေထဲက တစ်ခုဖြစ်တဲ့ သိပ်မကြာသေးခင်က ဖယ်ရီသင်္ဘောနစ်မြုပ်ခဲ့တဲ့ ကြောက်ဖက်ဖွယ် အကောင်းဆုံးဘေးဆိုးကြီးကို ပြန်ဖော်ထုတ်သလိုဖြစ်နေပါတယ်။

ကိုရီးယားစကားပြော အဲဒီစီးရီးထဲက ဇာတ်ဝင်ခန်းတော်တော်များများဟာ ၂၀၁၄ခုနှစ်တုန်းက လူပေါင်း၃၀၄ဦးသေဆုံးခဲ့ရဲတဲ့ ဆီဝေါင်းဖယ်ရီသင်္ဘောနစ်မြုပ်မှုဘေးဒုက္ခဆိုးကြီးကို နှလုံးကြေကွဲစရာ ပြန်လည်သတိပေးနေတယ်လို့ တွစ်တာမှာ ရေးသားနေကြ ပါတယ်။ အဲဒီသေဆုံးသူ ၃၀၄ဦးထဲမှာ ကလေးငယ်၂၅၀ပါဝင်ပြီး သူတို့လေးတွေဟာ ဆိုးလ်မြို့ဆင်ခြေဖုံးက အထက်တန်း  ကျောင်းတစ်ကျောင်းထဲက ကျောင်းသားကျောင်းသူတွေပါ။

အဲဒီစီးရီးရဲ့ အပိုင်းသုံးပိုင်းကြည့်ပြီးတဲ့အခါ ဖယ်ရီနစ်မြုပ်ခဲ့တဲ့ကြေကွဲစရာဖြစ်ရပ်ကိုပဲ သူတို့ပြေးမြင်နေမိကြပါတယ်လို့ တွစ်တာမှာ တစ်ဦးကပြန်လည်မျှဝေထားပါတယ်။

“ကလေးတွေက အားကိုးတစ်ကြီးရှိခဲ့တဲ့ လူကြီးတွေက ကလေးတွေကို ဘယ်လောက်များလျစ်လျူရှုခဲ့ကြသလဲ” လို့ တွစ်တာမှာ  ငိုယိုနေတဲ့ အီမိုဂျီအရုပ်ကလေသုံးရုပ်နှင့်အတူ ရေးတင်ထားပါတယ်။

အမ်ဗွီ ဆီဝေါင်းဖယ်ရီသင်္ဘောဟာ အင်ချီယွန်ကနေ ဂျေဂျူကို အသွားမှာ ၂၀၁၄ခုနှစ် ဧပြီ၁၆ရက်က နစ်မြုပ်ခဲ့ ရတာဖြစ်ပါတယ်။

ခရီးသည်တွေကို သင်္ဘောထဲဆက်နေပေးကြဖို့ ပြောပြီးတဲ့နောက် သင်္ဘောမာလိန်မှူးအပါအဝင် သင်္ဘောအမှုထမ်း  တော်တော် များများက သင်္ဘောကိုစွန့်ပြီးကိုယ်လွတ်ရုန်းခဲ့တယ်ဆိုတဲ့ သတင်းတွေကြောင့် အဲဒီကြေကွဲဖွယ်ဖြစ်ရပ်ဆိုးကြီးမှာ လူတွေ ဒေါသူပုန်ထခဲ့ကြရပါတယ်။

ကိုးရီးယားရဲ့ ရို့ကျိုးတဲ့ ယဉ်ကျေးမှုဓလေ့ကြောင့် ကျောင်းသူကျောင်းသား အနည်ငယ်ကသာ အဲဒီအမိန့် အပေါ်   မေးခွန်းထုတ်ခဲ့တဲ့အတွက် ကလေးတွေရာနှင့်ချီသေဆုံးခဲ့ရတာပါ။

အဲဒီဖြစ်ရပ်နှင့်ဆင်တူစွာပဲ “ ကျွန်ုပ်တို့အားလုံးသေဆုံးခဲ့ပြီ” ဆိုတဲ့ စီးရီးမှာ  ဖုတ်ကောင်ဗိုင်းရပ်စ်တွေ က ကျောင်းကို သိမ်းပိုက်လိုက်တဲ့အခါ အထက်တန်းကျောင်းသူကျောင်းသားတွေဟာ သူတို့ကိုယ်သူတို့ ကာကွယ်စောင့်ရှောက်ဖို့ ကျန်ရစ်ခဲ့ကြပါတယ်။ကလေးတွေက အကူအညီသွားတေင်းကြတဲ့အခါ သူတို့ရဲ့ဆရာတွေတော်တော်များများဟာ အသုံးမကျ၊ အတ္တကြီးမားနေကြတာကို တွေ့ကြရပါတယ်။

ပြကွက်တော်တော်များများမှာ အဝါရောင်ဖဲကြိုးကလေးတွေကို အသားပေးဖော်ပြထားပါတယ်။ အဲဒီအဝါရောင်ဖဲကြိုးကို ဆီဝေါင်းကြေကွဲဖွယ်ဖြစ်ရပ်ဆိုးကြီးရဲ့ သင်္ကေတအဖြစ် မှတ်ယူထားကြတာဖြစ်ပါတယ်။

နောက်ပြကွက်တစ်ခုမှာ ကျောင်းသူကျောင်းသားတွေက သူတို့ရဲ့မိဘတွေထံ ဗွီဒီယိုမက်ဆေ့ချ်ရုပ်သံသွင်းနေကြတာကိုတွေ့ရ ပါတယ်။ သင်္ဘောနစ်တဲ့အခါ နောက်ဆုံးနှုတ်ဆက်တဲ့ဗွီဒီယိုမက်ဆေ့ချ်တွေပို့ကြတာကို သတိရစရာဖြစ်ပါတယ်။

“ကျွန်ုပ်တို့အားလုံးသေဆုံးခဲ့ကြပြီ” ဆိုတဲ့ စီးရီးကို ပြီးခဲ့တဲ့သောကြာနေ့က နက်ဖလစ်မှာ စတင်ပြသခဲ့တာပါ။  အဲဒီကားဟာ အခုဆို ကမ္ဘာ့နိုင်ငံပေါင်း ၉၁နိုင်ငံမှာ အင်္ဂလိပ်စကားပြောမဟုတ်တဲ့ ဇာတ်ကားများထဲမှာ ထိပ်ဆုံး၁၀ကားစာရင်းမှာ နံပါတ်(၁) ချိတ်ထားပါတယ်။

နစ်ဖလစ်ရဲ့အဆိုအရ ပထမ(၃)ရက်အတွင်းမှာပဲ နာရီပေါင်း ၁၂၄.၇၉သန်းအထိကြည့်ရှုသူများခဲ့တယ်လို့ဆိုပါတယ်။ အခုဆို နက်ဖလစ်ရဲ့ လူကြိုက်များဆုံးစီးရီးဖြစ်လာပါပြီ။

ဒီစီးရီးမတိုင်ခင် စကွစ်ဂိမ်း ဟာ အကြီးအကျယ်အောင်မြင်ခဲ့ပါတယ်။ အဲဒါကြောင့် နက်ဖလစ်ဟာ ၂၀၂၂ခုနှစ်အတွင်း ကိုးရီးယား စကားပြောစီးရီးပေါင်း၂၅ခုအထိ ထုတ်လွှင့်ပြသဖို့ရှိနေပါတယ်။

Source Insider