#Local_News
Pubblished- 21 September 2022
ဈေးကွက်အတွင်း စားအုန်းဆီဈေးနှုန်းမှာ တစ်ပိဿာကျပ် ၉၀၀၀ အထိပြန်လည်မြင့်တက်လာကြောင်း လက်လီလက်ကားရောင်းချနေသည့် ဆီဆိုင်များမှ သိရသည်။
ပြီးခဲ့သည့်ရက်ပိုင်းအထိ စားအုန်းဆီဈေးနှုန်းမှာ တစ်ပိဿာ ကျပ် ၈၀၀၀ အောက်အထိကျဆင်းခဲ့ခြင်းဖြစ်သည်။ ယင်းအပြင် စက်တင်ဘာလ ၁၉ ရက်မှ စက်တင်ဘာလ ၂၅ ရက်အထိ စားအုန်းဆီအခြေခံလက်ကားရည်ညွှန်းဈေးမှာ တစ်ပိသာ ၄၆၉၀ကျပ်သတ်မှတ်ထားကြောင်း စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက ကြေညာထားသည်။
“စားအုန်းဆီဈေးက ပြီးခဲ့တဲ့ရက်ပိုင်းအထိကို ကျနေသေးတာ။ အခုမှပြန်တက်လာတာ။ ဈေးကမငြိမ်ဘူး။ အမျိုးမျိုးကိုပြောင်းနေတာ။ စားအုန်းဆီဈေးနှုန်းက ပြည်တွင်းကထုတ်တဲ့ ပဲဆီ၊နှမ်းဆီဈေးတွေကို အမှီလိုက်သလိုဖြစ်နေတာ” ဟု လက်လီလက်ကားရောင်းချသည့်ဆိုင်မှ မအေးအေးအောင်က ပြောသည်။
ပြည်တွင်းထုတ် ပဲဆီ၊ နှမ်းဆီဈေးနှုန်းမှာလည်း ကုန်ကြမ်းရှားပါးမှုကြောင့်ဈေးမြင့်တက်လာကြောင်း ၊ လက်ရှိရန်ကုန်ဈေးကွက်တွင် နှမ်းဆီတစ်ပိဿာလျှင် ၁၁၀၀၀ ကျပ်၊ ပဲဆီတစ်ပိဿာလျှင် ၁၃၅၀၀ ကျပ်အထိဈေးရှိကြောင်းသိရသည်။
ပြည်တွင်း၌ စားအုန်းဆီသုံးစွဲမှုမှာ တစ်နှစ်လျှင် တန်ချိန်၁၀ သိန်းကျော်အထိရှိသောကြောင့် နှစ်စဉ်တန်ချိန် ၆ သိန်းမှ ၇ သိန်းကြားကို မလေးရှားနိုင်ငံနှင့် အင်ဒိုနီးရှားနိုင်ငံမှ အဓိထားတင်သွင်းနေရကြောင်းသိရသည်။
ယင်းအပြင် ဈေးကွက်ထဲတွင် ဈေးကစားခြင်းပြုလုပ်သူများကို အရေးယူဆောင်ရွက်သွားမည်ဖြစ်ကြောင်းလည်း ကြေညာထားသည်။
#ymg/STH
#Yangon_Media_Group
