#LocalNews
Published_16 June 2022

ရန်ကုန်မြို့သစ်စီမံကိန်း ပြန်လည်စတင်နိုင်ရန် ကော်မတီဖွဲ့စည်း၍ လေ့လာသုံးသပ်နေကြောင်း နစက-ပြောရေးဆိုခွင့်ရှိသူ ပြန်ကြားရေးဒုဝန်ကြီး ဗိုလ်ချုပ်ဇော်မင်းထွန်းက ယနေ့ဇွန်လ ၁၆ ရက်တွင် ပြုလုပ်သည့် သတင်းစာရှင်းလင်းပွဲတွင် ပြောကြားလိုက်သည်။

‘‘ရန်ကုန်မြို့သစ်စီမံကိန်းကိုတော့ ရန်ကုန်တိုင်းအစိုးရက အဖွဲ့ဖွဲ့စည်းပြီး လေ့လာသုံးသပ်နေဆဲ အခြေအနေပဲ ရှိပါသေးတယ်’’ဟု ယင်းကပြောသည်။

ရန်ကုန်မြို့သစ်စီမံကိန်းမှာ ကြီးမားသော စီမံကိန်း ဖြစ်သောကြောင့် ၂၀၂၁ ခုနှစ် ဖေဖော်ဝါရီလ တစ်ရက်နောက်ပိုင်းကစ၍ ဆက်လက်ဖော်ဆောင်မှုကို မပြုလုပ်တော့ဘဲ ရပ်ထားခဲ့ခြင်း ဖြစ်ကြောင်းလည်း သိရသည်။

သို့သော်လည်း ပြီးခဲ့သည့် ၂၀၂၀ ပြည့်နှစ်ကပင် အဆိုပါ စီမံကိန်းအတွင်း အရောင်းအဝယ်ပြုလုပ်ထားပြီးဖြစ်သည့် မြေကွက်များကို ဆလစ်စာရွက်များ ထုတ်ပေးထားပြီး ဖြစ်သောကြောင့် ဒေသခံများအပါအဝင် အခြား ရင်းနှီးမြှုပ်နှံမှု ပြုလုပ်သူများက မြို့သစ်စီမံကိန်းကို အကောင်အထည်ဖော်လိုနေကြကြောင်းလည်း သိရသည်။

လက်ရှိတွင် မပြီးပြတ်သေးသော ရန်ကုန်မြို့သစ်စီမံကိန်း၊ မြေယာပြန်လည်ပေးအပ်ရေး ကိစ္စများကို ရန်ကုန်တိုင်းဒေသကြီးအစိုးရအဖွဲ့နှင့် သက်ဆိုင်ရာ အဖွဲ့အစည်း၊ ဌာနများက လုပ်ဆောင်နေကြောင်းလည်း သိရသည်။

ymg/mt
#Yangon_Media_group

#LocalNews
Published_16 June 2022

ရခိုင်ပြည်နယ်ကျောက်ဖြူမြို့၊ ကန့်ကော်တောဘုရားအနီးတွင် ၂၀၂၀ ပြည့်နှစ်က စတင်တည်ဆောက်နေသည့် သဘာဝဓာတ်ငွေ့နှင့် စွန့်ပစ်အပူသုံးစက်ရုံ ၈၀ ရာခိုင်နှုန်းကျော်ပြီးစီးပြီ ဖြစ်ကြောင်း သိရသည်။

အဆိုပါ စီမံကိန်းကို တင်တည်ဆောက်ခဲ့ခြင်းဖြစ်ပြီး စက်ရုံလည်ပတ်ပါက ၁၃၅ MW ဓာတ်အားထွက်ရှိမည်ဖြစ်ကာ ၁ ယူနစ်လျှင် ၈ ဒသမ ၅၉ ဆင့် နှုန်းဖြင့် ဖြန့်ချိနိုင်မည်ဖြစ်ကြောင်း၊ စက်ရုံလည်ပတ်စဉ်ကာလ ၂၅ နှစ်အတွင်း လျှပ်စစ်ဓာတ်အား ထုတ်လုပ်နိုင်ရေး လုပ်ငန်း(EPGE)မှ အင်ဂျင်နီယာများအား စက်ရုံတွင် ခေါ်ယူတာဝန်ပေး၍ စက်ရုံလည်ပတ်မှု ပြုပြင်ထိန်းသိမ်းမှုဆိုင်ရာ နည်းပညာများအား လွှဲပြောင်းဆောင်ရွက်ပေးသွားမည် ဖြစ်ကြောင်းလည်း သိရသည်။

ပြီးခဲ့သည့် ဇွန်လ ၁၄ ရက်က စစ်ကောင်စီဒုဥက္ကဌ ဒုတိယဗိုလ်ချုပ်မှူးကြီး စိုးဝင်းတို့အဖွဲ့ လာရောက် လေ့လာခဲ့စဉ် စက်ရုံစီမံကိန်း အကောင်အထည်ဖော်မှုနှင့် စက်ရုံလည်ပတ်ချိန်တွင် သဘာဝပတ်ဝန်းကျင် ထိခိုက်မှုမရှိစေရေးအတွက် လုပ်ဆောင်ရန်လည်း ပြောကြားခဲ့ကြောင်း သိရသည်။

ymg/mt
#Yangon_Media_Group

#LocalNews
Published -16 June 2022

နစက၏ ဖိတ်ခေါ်မှုအရ ယနေ့ ဇွန်လ ၁၆ ရက်အထိ တာဝန်ပြန်လည်ထမ်းဆောင်ရန် သတင်းပေးပို့သူ ဆရာ၊ ဆရာမ ဦးရေဟာ ၃၁၅၆ ဦး ရှိနေပြီဖြစ်ကြောင်း နစက သတင်းပြန်ကြားရေးခေါင်းဆောင် ဗိုလ်ချုပ်ဇော်မင်းထွန်းက ယနေ့ကျင်းပသည့် ၁၆ ကြိမ်မြောက်သတင်းစာရှင်းလင်းပွဲတွင် ပြောသည်။

ပြီးခဲ့သည့် ဇွန်လ ၇ ရက်မှစ၍ သတ်မှတ်ရက်အတွင်း သတင်းမပို့နိုင်သေးသော ဆရာ၊ ဆရာမများအတွက် သတင်းပို့ဆက်သွယ်ရမည့်ရက်ကို ဇွန်လ ၁၄ ရက်အထိ ထပ်မံ၍တိုးမြှင့်သတ်မှတ်ပေးထားခဲ့ကြောင်းလည်း နစကမှ အသိပေးကြေညာထားသည်။

ယခင်က စတင်ဖိတ်ခေါ်ခဲ့သည့်မေလအတွင်း မေလ ၃၁ ရက်ထိ သတင်းပေးပို့သူ ဦးရေ ၂၄၈၂ ဦးရှိခဲ့ကာ ထပ်တိုးကာလ ဇွန်လ ၇ ရက်ထိ ၂၉၆၀ ဦး ဖြစ်လာကာ ဇွန်လ ၁၅ ရက်ထိ ၁၉၆ ဦး ထပ်မံတိုးလာသည့်အတွက် ၃၁၅၆ ဦးထိရှိလာကြောင်း သိရသည်။

ခြိမ်းခြောက်အကျပ်ကိုင်ခံရမှုများကြောင့်လည်းကောင်း၊ ငြိမ်းချမ်းစွာဆန္ဒပြမှုများတွင် ပါဝင်ခဲ့မိသောကြောင့်လည်းကောင်း၊ သွားလာမှုခက်ခဲခြင်းကြောင့်လည်းကောင်း စိုးရိမ်ကြောင့်ကြမှုများကြောင့် တာဝန်မှကင်းကွာခဲ့သည့် ဆရာ၊ ဆရာမများနှင့် ဝန်ထမ်းစည်းကမ်းဖြင့် အရေးယူခံထားရသည့် ဆရာ၊ ဆရာမများအနေဖြင့် နိုင်ငံသားမျိုးဆက်သစ်လူငယ်များအတွက် သင်ကြားရေးတာဝန်ကို ပြန်လည်ထမ်းဆောင်နိုင်ရန် နောက်ဆုံး မိမိတာဝန်ထမ်းဆောင်ခဲ့သော ကျောင်းတည်ရှိသည့် မြို့နယ်ပညာရေးမှူးရုံးသို့ဖြစ်စေ၊ နေထိုင်နေသည့် နီးစပ်ရာမြို့နယ်ပညာရေးမှူးရုံး သို့ဖြစ်စေ သတင်းပို့ကြရန် နိုင်ငံတော်စီမံအုပ်ချုပ်ရေးကောင်စီ၊ သတင်းထုတ်ပြန်ရေးအဖွဲ့မှ ထုတ်ပြန်ထားသည်။

ymg/NN
#Yangon_Media_Group

#LocalNews
Published - 16 June 2022

လတ်တလောတွင် ခရီးဝေးရထား(၂၈)စင်း၊ ရန်ကုန်မြို့ပတ်(၂၂)စင်း စုစုပေါင်း(၅၀)စင်းပြေးဆွဲပေးလျက်ရှိပြီး မီးရထားခရီးစဥ်များ တိုးချဲ့ပြေးဆွဲပေးသွားမည်ဟု နစက၊ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းပြောပါသည်၊၊

ဇွန်လ(၁၆)ရက်ကပြုလုပ်သည့် နစကကပြုလုပ်သည့် သတင်းစာရှင်းလင်းပွဲတွင် ထည့်သွင်းပြောကြားသွားသည်၊၊

ရန်ကုန်-မန္တလေးစုန်ဆန်ရထား(၂)စင်း၊ ရန်ကုန်-မော်လမြိုင် လမ်းပိုင်း(၂)စင်း၊ ရန်ကုန်မြို့ပတ်(၄)စင်းထပ် တိုးချဲ့ပြေးဆွဲပေးရန်ရှိသည် ဟုဆိုသည်၊၊

နစက၏သတင်းထုတ်ပြန်ရေးအဖွဲ့ခေါင်းဆောင်ဗိုလ်ချုပ်ဇော်မင်းထွန်းက
"အချို့လမ်းပိုင်းတွေမှာ မပြေးဆွဲနိုင်တာတွေက အခုထိတော့ရှိတယ်၊၊ မိုင်းထောင်၊ မိုင်းခွဲ လုံခြုံရေးအခြေအနေတွေကြောင့် မပြေးဆွဲနိုင်တာရှိတယ်၊၊ လမ်းပိုင်းအသီးသီးမှာတော့ ခရီးဝေးရထား(၂၈)စင်း၊ ရန်ကုန်မြို့ပတ်(၂၂)စင်း စုစုပေါင်း(၅၀)စင်းပြေးဆွဲပေးလျက်ရှိတယ်၊၊ ရန်ကုန် -မန္တလေးလမ်းပိုင်းမှာတော့လက်ရှိ ရထား(၆)စင်းပြေးဆွဲပေးလျက်ရှိတယ်၊၊ ခရီးသွားတွေ အခက်အခဲ ရှိတယ်ဆိုတာသိတယ်၊၊ ဒါကြောင့်မိုလို့ ပို့ဆောင်ရေးဝန်ကြီးဌာနအနေနဲ့ မကြာမီလပိုင်းအတွင်းမှာပဲ စုန်ဆန်နှစ်စင်းထပ်မံပြေးဆွဲပေးဖို့ ဆောင်ရွက်လျက်ရှိတယ်၊၊ ရန်ကုန်-မော်လမြိုင် လမ်းပိုင်း(၂)စင်းပြေးဆွဲနေတယ်ထပ်ပြီးတော့ ၂စင်းထပ်တိုး ပြေးဆွဲဖို့ရှိတယ်၊၊ ရန်ကုန်-ပြည်လမ်းပိုင်းကတော့ (၆)စင်းပြေးဆွဲနေတယ်၊ ထပ်ပြီးတော့( ၂)စင်းပြေးဆွဲဖို့ ဆောင်ရွက်နေပါတယ်၊၊ ရန်ကုန်မှာလူဦးရေက ထူထပ်နေတယ်၊၊ လက်ရှိမြို့ပတ်ရထား(၂၂)စင်း ပြေးဆွဲနေတယ်၊၊(၄)စင်းထပ်ပြီးတော့ ပြေးဆွဲပေးဖို့ စီစဥ်ဆောင်ရွက်လျက်ရှိပါတယ်"ဟု ပြောသည်၊၊

ကုန်ရထားများ အနေဖြင့် ရန်ကုန်-မန္တလေးပိုင်းတွင်တစ်ရက်ကို(၄)စင်း၊ ရန်ကုန်-မော်လမြိုင်လမ်းပိုင်းတွင် ကျောက်ရထား(၂)စင်း စုစုပေါင်း(၈)စင်း ပြေးဆွဲလျက်ရှိကြောင်းသိရသည်၊၊

ymg/tthl
#Yangon_Media_Group

#LocalNews
Published_16 June 2022

ရန်ကုန်တိုင်းဒေသကြီး ရွှေပြည်သာမြို့နယ်၊ အမှတ်(၄)လမ်းမကြီး၊ Max ဆီဆိုင်ရှေ့မှာ ဖြစ်ပွားခဲ့တဲ့ ယာဉ်တိုက်မှုကြောင့် ၁၄ ဦး ထိခိုက်ဒဏ်ရာရတဲ့အထဲမှာ ဦးခေါင်းထိသူတစ်ယောက်နဲ့ တခြားသုံးယောက်ရဲ့ ဒဏ်ရာတွေ ပြင်းထန်တယ်လို့ သိရပါတယ်။

#Yangon_Media_Group

#LocalNews
Published - 16 June 2022

လူမှုကွန်ရက်ပေါ်တွင်ရောင်းချနေသည့် ရေစင်ရေမန်းတွင် FDA (မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာန)ခွင့်ပြုချက်မပါသောကြောင့် သက်ဆိုင်ရာဝန်ကြီးဌာနအနေဖြင့် အရေးယူဆောင်ရွက်ပေးရန် မြန်မာနိုင်ငံရေသန့်စက်ရုံလုပ်ငန်းရှင်များအသင်းမှ တောင်းဆိုပြီးနောက်ပိုင်း ယခုအခါ အရေးယူထားကြောင်း သိရသည်။

"FDA က ဇွန်လ ၁၅ ရက်နေ့မှာ အရေးယူတာပါ။ ဥပဒေအရ အရေးမှုတွေဆက်လုပ်မှာပါ"ဟု FDA (မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာန) ၏ တာဝန်ရှိသူက YMG ကို ပြောသည်။

အဆိုပါ ရေစင်ရေမန်းကို လူမှုကွန်ရက်တွင် ရောင်းချနေသည်မှာ လွန်ခဲ့သည့် ၂၀၂၁ ခုနှစ်ကတည်းက ဖြစ်ကြောင်းနှင့် တစ်နှစ်ကျော်အကြာတွင် နာမည်ရရှိခဲ့ကာ ဝယ်ယူသူများပြားကြောင်း၊ အဆိုပါ ရေစင်ရေမန်းတစ်ဘူးလျှင် ၂၀၀၀၀ ကျပ်ပေးရကြောင်း သိရသည်။

"ကျွန်တော်တို့ဆီကို တိုင်စာတတ်တယ်။ တိုင်စာထဲမှာ နှစ်သောင်းပေးပြီးဝယ်နေရတယ်။ FDA လက်မှတ်လည်းမပါဘူး။ သေချာစစ်ကြည့်လိုက်တော့လည်း FDA ခွင့်ပြုချက်မပါဘူး။ မပါတဲ့အတွက် ကျွန်တော်က မည်သည့်ရေသန့်ကိုမဆို မြန်မာတစ်နိုင်ငံလုံးမှာ ရောင်းမယ်ဆိုရင်တော့ FDA ခွင့်ပြုချက်လိုတယ်။ ဒါကြောင့် FDA လည်းမပါဘူး ဒီဟာကိုအရေးယူပေးပါဆိုပြီး လူမှုကွန်ရက်မှာ ကျွန်တော်ရေးထားတယ်"ဟု မြန်မာနိုင်ငံရေသန့်စက်ရုံလုပ်ငန်းရှင်များအသင်းမှ ဥက္ကဌ ဦးရဲထွဋ်က ပြောသည်။

ymg/sth
#Yangon_Media_Group

#DailyNews
Published - 16 June 2022

၁။ တက္ကသိုလ်ဝင်တန်းအပြင်ဖြေ ဖြေမည့်သူများရှိလာမည်ဖြစ်၍ ပုဂ္ဂလိကကိုယ်ပိုင်ကျောင်းများတွင် အပ်နှံမည့်သူပိုများလာနိုင်

၂။ ဒလတံတားစီမံကိန်းနယ်မြေအနီးရှိ အိမ်၊ ခြံ၊ မြေဈေး မြင့်တက်သော်လည်း ရောင်းအားကျဆင်း

၃။ နေ့စဉ်မိုးလေဝသသတင်း။

၄။ ရာစုနှစ်ဝက်နီးပါးဖွင့်လှစ်ခဲ့သည့် ဟောင်ကောင်မှနာမည်ကျော် ရေပေါ်စားသောက်ဆိုင် ပိတ်သိမ်းလိုက်ရ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published_ 16 June 2022

အိန္ဒိယနိုင်ငံ၊ နယူးဒေလီမြို့၊ Sushma Swaraj Bhawan ၌ ဇွန် ၁၅ ရက်က ကျင်းပပြုလုပ်ခဲ့တဲ့ (၂၄) ကြိမ်မြောက် အာဆီယံ-အိန္ဒိယ အဆင့်မြင့်အရာရှိကြီးများ အစည်းအဝေးသို့ မြန်မာအဆင့်မြင့်အရာရှိကြီးကိုယ်စား အိန္ဒိယနိုင်ငံဆိုင်ရာ မြန်မာသံအမတ်ကြီး ဦးမိုးကျော်အောင် တက်ရောက်ခဲ့ပါတယ်။

အစည်းအဝေးတွင် အိန္ဒိယအဆင့်မြင့် အရာရှိကြီး H.E. Mr. Saurabh Kumar နှင့် အာဆီယံ-အိန္ဒိယဆွေးနွေးဖက် ဆက်ဆံရေး ညှိနှိုင်းရေးမှူးဖြစ်သည့် စင်ကာပူ အဆင့်မြင့် အရာရှိကြီး H.E. Mr Albert Chua တို့က ပူးတွဲသဘာပတိအဖြစ် ဆောင်ရွက်ခဲ့ကြပါတယ်။

အဆိုပါအစည်းအဝေးတွင် အာဆီယံအဖွဲ့ဝင်နိုင်ငံများမှ အဆင့်မြင့်အရာရှိကြီးများ၊ ကိုယ်စားလှယ်များနှင့် အာဆီယံအတွင်းရေးမှူးချုပ်တို့ တက်ရောက်ခဲ့ကြကြောင်း သတင်းရရှိပါတယ်။

ymg-mnn
#Yangon_Media_Group

#WorldMilitary
Published 16 June 2022

ယူကရိန်းနိုင်ငံအတွက် အမေရိကန်မှ သင်္ဘောပစ်လက်နက်များ၊ အမြှောက်ဒုံးကျည်များ၊ ဟောင်ဝစ်ဇာများ၊ လက်နက်ခဲယမ်းများ အပါအဝင် ဒေါ်လာ ၁ ဘီလီယံတန်ကြေးရှိတဲ့ လက်နက်များ ထပ်မံထောက်ပံ့ပေးရန် အမေရိကန်သမ္မတ'ဂျိုးဘိုင်ဒင်'က ဗုဒ္ဓဟူးနေ့ကကြေညာလိုက်ပါတယ်။

'ဘိုင်ဒန်'က စစ်ပွဲကြားထဲရောက်နေတဲ့ ယူကရိန်းသမ္မတ'ဗိုလိုဒီမီယာဇယ်လန်စကီ'နဲ့ ဖုန်းပြောဆိုခဲ့ရာမှာ လက်နက်အသစ်များ ထောက်ပံ့ဖို့ပြောကြားခဲ့ပါတယ်။

"အမေရိကန်ဘက်မှ ဒေါ်လာ ၁ ဘီလီယံတန်ဖိုးရှိတဲ့ လက်နက်အသစ်များကို ယူကရိန်းလုံခြုံရေးအကူအညီအတွက်ထောက်ပံ့ပေးသွားမှာဖြစ်ပြီး အမြှောက်ဒုံးကျည်များ၊ ကမ်းရိုးတန်းကာကွယ်ရေးလက်နက်များ၊ အဆင့်မြင့်ဒုံးပျံလက်နက်များပါဝင်မှာဖြစ်ပါတယ်" လို့ ၄၁ မိနစ်ကြာဖုန်းခေါ်ဆိုမှုမှာ ပြောကြားခဲ့ပါတယ်။

ဒါ့အပြင် ယူကရိန်းအရပ်သားများကို ကူညီရန်အတွက် ဘေးကင်းစိတ်ချရတဲ့သောက်သုံးရေ၊ အရေးကြီးတဲ့ ဆေးဝါးနဲ့ကျန်းမာရေးစောင့်ရှောက်မှု၊ အစားအစာ၊ ခိုလှုံ့ရာနေရာနဲ့ မရှိမဖြစ်လိုအပ်တဲ့ပစ္စည်းများ ဝယ်ယူနိုင်ရန် မိသားစုများအတွက် ငွေသားများ ပါဝင်တဲ့ ဒေါ်လာ ၂၂၅ သန်း အထောက်အပံ့ကိုလည်း ပေးပို့ဖို့ကြေညာလိုက်ပါတယ်။

ယူကရိန်းအတွက် နောက်ဆုံးပေးပို့မယ့်အကူအညီတွေထဲမှာ ဟောင်ဝစ်ဇာ ၁၈ လက်နဲ့ ကျည် ၃၆,၀၀၀ တောင့်၊ ဟာပွန်းကမ်းရိုးတန်းကာကွယ်ရေးလက်နက် ၂ လက်၊ အမြှောက်ဒုံးကျည်များ၊ လုံခြုံရေးရေဒီယို၊ ညကြည့်ကိရိယာများ၊ လေ့ကျင့်ရေးအတွက်စရိတ်များ ပါဝင်ပါတယ်။

ယူကရိန်းနိုင်ငံခြားရေးဝန်ကြီး'ဒီမစ်ထရိုကူလေဘာ'က အမေရိကန်ရဲ့အရေးပါတဲ့ ထောက်ပံ့မှုများအတွက် ကျေးဇူးတင်ကြောင်း အမေရိကန်နိုင်ငံခြားရေးဝန်ကြီး'အန်တိုနီဘလင်ကန်'ကို ပြောကြားခဲ့ပါတယ်။

"ကျွန်တော်တို့အတွက် လက်နက်ကြီးများ ပုံမှန်ထောက်ပံ့ဖို့ အရေးတကြီးလိုအပ်ကြောင်း အလေးအနက်တောင်းဆိုခဲ့ပါတယ်" လို့ တွစ်တာမှာ ဖော်ပြထားပါတယ်။

အမေရိကန်ကာကွယ်ရေးဝန်ကြီး'လွိက်အော်စတင်'က ဘရူဆဲလ်မြိုမှာ မဟာမိတ်နိုင်ငံတွေနဲ့တွေ့ဆုံပြီး ထောက်ပံ့ကူညီဖို့ဆုံးဖြတ်ရာမှာ အမေရိကန် သိုလှောင်ရေးမှ ပိုလျှံနေတဲ့ ကာကွယ်ရေးပစ္စည်းများ လွှဲပြောင်းခြင်းနဲ့ ယူကရိန်းလုံခြုံရေး အထောက်အပံ့အစီအစဉ်(USAI)မှ ငွေကြေးထောက်ပံ့ထားတဲ့ အခြားလက်နက်များဆိုပြီး အကြောင်းအရာနှစ်ခုခွဲခြားထားပါတယ်။

ရုရှားနိုင်ငံဆိုင်ရာ ကုလသမဂ္ဂသံအမတ်ကြီး'ဗက်ဆေလီနီဘန်ဇီယာ'က "အနောက်နိုင်ငံတွေဟာ ရုရှားနဲ့စစ်ဖြစ်ဖို့ သွေးထိုးလှုံ့ဆော်နေကြပါတယ်၊ အနောက်နိုင်ငံတွေက ယူကရိန်းကို လက်နက်ထောက်ပံ့နေခြင်းကြောင့် အရပ်သားများသေဆုံးရခြင်းဟာ သူတို့ကြောင့်ဖြစ်ပါတယ်" လို့ ဗုဒ္ဓဟူးနေ့က အပြစ်တင်ဝေဖန်လိုက်ပါတယ်။

အရှေ့ဘက်ဒွန်ဘတ်စ်ဒေသမှာ ရုရှားတပ်များက အင်တိုက်အားတိုက် တိုက်ခိုက်လာတာကြောင့် လက်နက်များ အလျင်အမြန်ပေးပို့ဖို့ ယူကရိန်းက အမေရိကန်နဲ့အနောက်နိုင်ငံများကို ဖိအားပေးနေပါတယ်။

"နှစ်ပတ်တိုင်း သုံးပတ်တိုင်းပေးပိုနေရုံနဲ့ မလုံလောက်ပါဘူး၊ ရုရှားတွေကိုအနိုင်ရဖို့ဆိုရင် ရသမျှလက်နက်တွေအားလုံးလိုအပ်ပါတယ်" လို့ ယူကရိန်းပါလီမန်အဖွဲ့ဝင်'အိုလက်ဆန်ဒရာအူစတီနိုဗာ'က သတင်းထောက်တွေကို ပြောကြားခဲ့ပါတယ်။

အခုအခါ အမေရိကန်ကပထမဆုံးအကြိမ်အဖြစ် မြေပြင်ပစ်ဟာပွန်းလောင်ချာတွေကို ပေးပို့တာဖြစ်ပါတယ်။

ဘိုးအင်းကုမ္ပဏီက ထုတ်လုပ်တဲ့ ဟာပွန်းလောင်ချာတွေဟာ ဒုံးကျည်တစ်စင်းကို ဒေါ်လာ ၁.၅ သန်းတန်ကြေးရှိကြောင်း စက်မှုလုပ်ငန်းအမှုဆောင်များနဲ့ ကျွမ်းကျင်သူများကဖော်ပြထားပါတယ်။

Source: Reuters
#Yangon_Media_Group

#LocalNews
Published - 16 June 2022

လူမှုကွန်ရက်ပေါ်တွင်ရောင်းနေသည့် ရေစင်ရေမန်း တွင် FDA ခွင့်ပြုချက် မပါသောကြောင့် သက်ဆိုင်ရာဝန်ကြီးဌာနမှ အရေးယူဆောင်ရွက်ပေးရန် တောင်းဆိုထားကြောင်း မြန်မာနိုင်ငံရေသန့်စက်ရုံလုပ်ငန်းရှင်များအသင်းမှ သိရသည်။

"ကျွန်တော်တို့ဆီကို တိုင်စာတတ်တယ်။ တိုင်စာထဲမှာ နှစ်သောင်းပေးပြီးဝယ်နေရတယ်။ FDA လက်မှတ်လည်းမပါဘူး။ သေချာစစ်ကြည့်လိုက်တော့လည်း FDA ခွင့်ပြုချက်မပါဘူး။ မပါတဲ့အတွက် ကျွန်တော်က မည်သည့်ရေသန့်ကိုမဆို မြန်မာတစ်နိုင်ငံလုံးမှာ ရောင်းမယ်ဆိုရင်တော့ FDA ခွင့်ပြုချက်လိုတယ်။ ဒါကြောင့် FDA လည်းမပါဘူး ဒီဟာကိုအရေးယူပေးပါဆိုပြီး လူမှုကွန်ရက်မှာ ကျွန်တော်ရေးထားတယ်"ဟု မြန်မာနိုင်ငံရေသန့်စက်ရုံလုပ်ငန်းရှင်များအသင်းမှ ဥက္ကဌ ဦးရဲထွဋ်က ပြောသည်။

လူမှုကွန်ရက်တွင်ရေးသားထားမှုကြောင့် အဆိုပါရေစင်ရေမန်းထုတ်သည့်စက်ရုံမှ မန်နေဂျာဆိုသူက သူတို့အနေဖြင့် လက်ရှိတွင်လည်း နာမည်ကြီးရေသန့်ထုတ်နေသည့်အတွက် FDA မလိုဟု ပြန်ပြောခဲ့ကြောင်း ၎င်းက ပြောသည်။

အဆိုပါ ရေစင်ရေမန်းကို ပြီးခဲ့သည့် ၂၀၂၁ ခုနှစ်ကပင် စတင်ရောင်းချခဲ့ကြောင်းလည်း သိရသည်။

ymg/sth
#Yangon_Media_Group

#LocalNews
Published _ 16 June 2022

ပြည်သူများ ဈေးနှုန်းသက်သာစွာဖြင့် ဝယ်ယူစားသုံးနိုင်ရေးအတွက် စိုက်ပျိုးမွေးမြူရေးလုပ်ငန်းများကို အောင်မြင်အောင်ဆောင်ရွက်၍ အသား၊ ငါးနှင့် ဟင်းသီးဟင်းရွက်များကို အပြည့်အဝထုတ်လုပ်ရန် ရည်ရွယ်ချက်များဖြင့် ညောင်နှစ်ပင်စိုက်ပျိုးမွေးမြူရေးအထူးဇုန် (၁)တွင် ဟင်းသီးဟင်းရွက် လက်ကားဈေး တည်ဆောက်သွားမည်ဖြစ်ကြောင်း ရန်ကုန်မြို့တော်စည်ပင်သာယာရေးကော်မတီမှ သိရသည်။

"စိုက်ဧကတွေ အားလုံး ပြည့်ဝစွာစိုက်ပျိုးပြီး မြေကိုအကျိုးရှိရှိအသုံးချဖို့နဲ့ စိုက်နည်းစနစ်တွေ မှန်ကန်စွာစိုက်ပျိုးဖို့၊ ရေတွေကိုလည်း အကျိုးရှိရှိအသုံးချဖို့၊ အထွက်နှုန်းကောင်းမွန်အောင်ဆောင်ရွက်ဖို့တွေအပြင် မွေးမြူရေးလုပ်ငန်းတွေ ဆောင်ရွက်ရာမှာ စနစ်တကျ မွေးမြူဖို့နဲ့ စိုက်ပျိုးမွေးမြူရေး ဆောင်ရွက်ဖို့အတွက် ခွင့်ပြုပေးထားတဲ့မြေတွေကို ပြည့်ပြည့်ဝဝ စိုက်ပျိုးမွေးမြူဖို့တွေအပါအဝင် စိုက်ပျိုးမွေးမြူရေးနဲ့ မသက်ဆိုင်တဲ့ မြေအသုံးချမှုမရှိစေဖို့ တာဝန်ရှိသူတွေအနေနဲ့ စနစ်တကျ ကြပ်မတ်ဆောင်ရွက်ဖို နိုင်ငံတော်အကြီးအကဲက လမ်းညွှန်မှာကြားခဲ့တာကြောင့် လမ်းညွှန်ချက်နဲ့အညီ မြေကွက်လပ်မရှိစေဘဲ အားလုံးစိုက်ပျိုး၊ မွေးမြူရေးလုပ်ဆောင်ကြဖို့အပြင် စိုက်ပျိုးမွေးမြူရေးလုပ်ငန်းရှင်များ အနေနဲ့ လုပ်ငန်းတွေ အကောင် အထည်ဖော်နိုင်ရေးအတွက် ရန်ကုန်မြို့တော်စည်ပင်သာယာရေးကော်မတီကလည်း လိုအပ်တာတွေ ပံ့ပိုးသွားမယ်" ဟု ရန်ကုန်တိုင်းဒေသကြီး စည်ပင်သာယာရေးဝန်ကြီး၊ ရန်ကုန်မြို့တော်စည်ပင်သာယာရေး ကော်မတီ ဥက္ကဋ္ဌ (မြို့တော်ဝန်) ဦးဗိုလ်ဌေးက ပြောသည်။

ညောင်နှစ်ပင်စိုက်ပျိုးမွေးမြူရေး အထူးဇုန်သည် ရန်ကုန်တိုင်းဒေသကြီး လှည်းကူးမြို့နယ်နှင့် မှော်ဘီမြို့နယ်အတွင်း ခရိုင်ချင်းဆက်လမ်း၏ မြောက်ဘက်၊ ရန်ကုန်-မန္တလေး အမြန်လမ်းမကြီးနှင့် ရန်ကုန်-ပြည်လမ်းအကြား တည်ရှိပြီး ရန်ကုန်မြို့တော်နေပြည်သူများ သား၊ ငါး ဟင်းသီးဟင်းရွက် စားသောက်ကုန် ဖူလုံစေရေးအတွက် တစ်ယူနစ်လျှင် ၅ ဧက အကျယ် အဝန်းရှိ မြေနေရာများဖော်ထုတ်၍ စိုက်ပျိုးမွေးမြူရေးလုပ်ငန်းများ ဆောင်ရွက်လျက်ရှိကြောင်း ယင်းမှ သိရသည်၊၊

ညောင်နှစ်ပင်စိုက်ပျိုး၊ မွေးမြူရေး အထူးဇုန်ဖွံ့ဖြိုးရေးတွင် အထူးဇုန် (၁) ၏ အကျယ်မှာ ၃၇၈၀ ဧက၊ အထူးဇုန် (၂)၏ အကျယ်မှာ ၄၉၀၁ ဧက၊ အထူးဇုန် (၃)၏ အကျယ်မှာ ၃၇၇၂ ဧကရှိပြီး ယခုအခါ စိုက်ပျိုးမွေးမြူရေး ဖြစ်ထွန်းအောင်မြင်စေရေးအတွက် ရန်ကုန်တိုင်းဒေသကြီးအစိုးရအဖွဲ့မှ ကြီးကြပ်ဆောင်ရွက်လျက်ရှိကြောင်းလည်း သိရသည်။

ymg/NN
#Yangon_Media_Group

#LocalNews
Published - 16 June 2022

'မရှိ၍ မလင်းသူမရှိစေရ'(မွန်ပြည်နယ်)အစီအစဥ်ဖြင့် ချောင်းဆုံမြို့နယ်က စီစစ်ပြီးခွဲစိတ်ရန် ကျန်ရှိတဲ့ လူနာ(၅)ဦးကိုဇွန်လ (၁၄)ရက်တွင် ထပ်မံခွဲစိတ်ပေးခဲ့ပြီး ဇွန်လ(၂၂)ရက်တွင်လည်းထပ်မံခွဲစိတ်ကုသ ပေးမည်ဖြစ်ကြောင်း သိရသည်၊၊

ချောင်းဆုံမြို့နယ်တွင်းက ကမာမိုကျေးရွာက ဒေါ်ခင်ကြည်၊ ကမာမိုကျေးရွာက ဒေါ်မြင့်မြင့်စိန်၊မုနိုင်းကျေးရွာကဒေါ်မြနွယ်၊ ကော့ဒကဲ့ကျေးရွာက ဒေါ်လွန်းအေးတို့ကိုဇွန်လ (၁၄)ရက်တွင်မျက်စိခွဲစိတ်ကုသ ပေးခဲ့သည်၊၊

မွန်ပြည်နယ်၊ ပြည်သူ့ကျန်းမာရေး/ကုသရေးဦးစီးဌာနမှူး ဒေါက်တာနန္ဒဝင်းဦးဆောင်၍ မွန်ပြည်နယ်ပြည်သူ့ကျန်းမာရေးဦးစီးဌာနက ဆောင်ရွက်ပေးနေတာဖြစ်ပြီးမော်လမြိုင်ဆေးရုံကြီးမှ ဆေးရုံအုပ်ကြီး မျက်စိဆရာဝန်ကြီးများ သူနာပြုဆရာ ဆရာမများက အလှူရှင်များ၏အလှူငွေဖြင့် ခွဲစိတ်ကုသပေးနေခြင်း ဖြစ်သည်၊၊

မွန်ပြည်နယ်အတွင်းရှိမျက်စိဝေဒနာရှင်များ မိမိတို့နီးစပ်ရာ ပြည်သူ့ကျန်းမာရေးဌာနများကို ဆက်သွယ်နိုင်ကြောင်းနှင့် အလှူရှင်များလည်း ဆက်သွယ်လှူဒါန်းနိုင်ကြောင်းသိရသည်၊၊

ymg/tthl
#Yangon_Media_Group