#LocalNews
Published - 1 March 2022

ကချင်ပြည်နယ် ဖားကန့်မြို့ မမုံရွာ နှင့် မနရွာကြား ၁၁၁ YTT လုပ်ကွက်တွင် မြေစာပုံပြိုကျမှု ဖေဖော်ဝါရီလ ၂၈ ရက် ည ပိုင်းက ဖြစ်ပွားခဲ့ရာ လူ ဦးရေ ၅၀ ခန့် နှင့် စက်ယန္တရား ၅၀ ခန့် ပါသွားကြောင်း သိရသည်။

"လောလောဆယ်ဝင်လို့မရသေးဘူး။အန္တရာယ်နည်းနည်းများလို့ပါ၊ဖြစ်တာက ညက ၁၁ နာရီလောက်ကပေါ့၊အကြောင်းကြားတာကတော့ ဘက်ဟိုး ၅၀ လူ ၅၀ လောက်ပါတယ်ပြောတယ်၊မမုံရွာနဲ့ မနရွာကြားထဲက ၁၁၁ YTT လုပ်ကွက်ကမြေစာပုံပြိုကျတာပါ၊လူတော့ ထိခိုက်မှု ရှိမယ်"ဟု ဒေသခံ ပရဟိတ လုပ်ငန်းလုပ်နေသူ တစ်ဦးက ပြောသည်။

ဖေဖော်ဝါရီ ၂၇ ရက် ညနေ ၅ နာရီ ခန့်ကလည်း ကချင်ပြည်နယ်၊ ဖားကန့်ကျောက်စိမ်းလုပ်ကွက်အတွင်း မနကျေးရွာအနီး လုပ်ကွက်ဟောင်းတစ်ခု၌ နွံကန်ပေါက်ကျခဲ့သဖြင့် လူနေအိမ် သုံးလုံးနှင့် ဆိုင်ကယ်စီး ရေ ၂၀ ခန့် မျောပါသွားခဲ့ကြောင်းမျောပါသွားခဲ့သည့်အထဲမှ ဆိုင်ကယ်အချို့ ကို ပြန်လည်ဆယ်ယူနိုင်ခဲ့ကြောင်း သိရသည်။

ပြီးခဲ့သည့် ဖေဖော်ဝါရီလ ၁၈ ရက်ကလည်း ဖားကန့်ရှိ မနမှော် လုပ်ကွက်ဟောင်းအတွင်းမှ နွံ ကန်ပေါက်ပြီး မြေစာပုံပြိုကျခဲ့သဖြင့် ရေမဆေးကျောက်ရှာသူ ၂ ဦးသေဆုံးပြီး ရေမဆေးကျောက်ရှာဖွေသူ ၃ ဦးထိခိုက်ဒဏ်ရာရရှိခဲ့ကြသေးသည်။

YMG/MT
Yangon_Media_Group

#DailyNews
Published - 1 March 2022
၁။ ရန်ကုန်တိုင်းတွင် ရေဆိုးသန့်စင် စက်ရုံများကို ခရိုင်အလိုက်တည်ဆောက်ရန်စီစဉ်ဆဲသာရှိ။

၂။ ကျန်းမာရေးအသိပညာအားနည်းမှုကြောင့် နာဂဒေသခံများ မသေဆုံးသင့်ပဲသေဆုံးနေရ

၃။ နေ့စဉ်မိုးလေဝသသတင်း။

၄။ ဒေါ်လာသန်း(၂၀)တန်ကမ္ဘာ့ကြေးအကြီးဆုံး ဆော်ဒီဖလားမြင်းပြိုင်ပွဲတွင် 'အမ်ဘလမ်ရုတ်ဒ်'အံ့အားသင့်ဖွယ်အနိုင်ရခဲ့..... အစရှိတဲ့သတင်း တွေကိုတင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 1 March 2022

ကယားပြည်နယ်ဝန်ကြီးချုပ်ဟောင်း ဦးအယ်လ်ဖောင်းရှိနှင့် စည်ပင်သာယာရေးနှင့် လူမှုရေးဝန်ကြီးဟောင်း ဦးအောင်ကျော်ဌေး တို့အပေါ် အဂတိဖြင့် အမှုဖွင့်လိုက်ကြောင်း အဂတိလိုက်စားမှုတိုက်ဖျက်ရေးကော်မရှင်က သိရသည်။

ယင်းတို့နှစ်ဦးအနေဖြင့် နိုင်ငံရေးရာထူးလက်ရှိဖြစ်ခဲ့စဉ် ၂၀၁၇ ခုနှစ်အတွင်း ကာလပေါက်ဈေး ငွေကျပ် ၆၅သန်းကျော် တန်ဖိုးရှိ နိုင်ငံတော်ပိုင်(အစိုးရစီမံခန့်ခွဲပိုင်ခွင့်ရှိသောမြေ) မြေကွက်လပ်ကို နိုင်ငံတော်မှ ချီးမြှင့်သည့် သာသနာရေးဆိုင်ရာ ဘွဲ့တံဆိပ်ရရှိမှုကို အကြောင်းပြု၍ ပုဂ္ဂလိကကုမ္ပဏီတစ်ခုသို ပေးအပ်ခဲ့ကာ အဆိုပါမြေနေရာကို ပြန်လည်အလှူခံရယူခဲ့ကြောင်းလည်း သိရသည်။

ဦးအယ်လ်ဖောင်းရှိသည် ၂၀၁၈-၂၀၁၉ ဘဏ္ဍာရေးနှစ် အတွင်း လွိုင်လင်လေးနှင့် နန်းမယ်ခုံရှိ ပြည်နယ် အထွေထွေအုပ်ချုပ်ရေးဦးစီးဌာန လေးခန်းတွဲနှစ်ထပ် ဝန်ထမ်းအိမ်ရာတည်ဆောက်ခြင်း၊ ပြည်နယ်အားကစားနှင့် ကာယပညာဦးစီးဌာန LED Board နှင့် Transformer တည်ဆောက်ခြင်း၊ ပြည်နယ်လမ်းဦးစီးဌာန၊ ရှစ်ခန်းတွဲ နှစ်ထပ်ဝန်ထမ်းအိမ်ရာ တည်ဆောက်ခြင်း လုပ်ငန်းများနှင့်ပတ်သက်၍ တင်ဒါ အောင်မြင်သော ကုမ္ပဏီထံမှ ပေးအပ်သည့် စုစုပေါင်း ငွေကျပ် သိန်း ၁၁၀ ကိုလည်းကောင်း၊ ၂၀၁၉-၂၀၂၀ ဘဏ္ဍာရေးနှစ်အတွင်း လွိုင်ကော်မြို့တွင်းလမ်း Platform ဆောင်ရွက်ခြင်း လုပ်ငန်း၊ Slab Culvert တည်ဆောက်ခြင်းလုပ်ငန်း၊ စိုက်ပျိုးရေးဦးစီးဌာန ပြည်နယ်ရုံးသစ် နှစ်ထပ် တည်ဆောက်ခြင်းလုပ်ငန်းများနှင့်စပ်လျဉ်းပြီး တင်ဒါအောင်မြင်သည့် ကုမ္ပဏီမှ ပေးအပ်သည့် စုစုပေါင်း‌ ငွေကျပ် ၈၂ သိန်းကိုလည်းကောင်း ရယူခဲ့ကြောင်းအဂတိလိုက်စားမှုတိုက်ဖျက်ရေးကော်မရှင်၏ ထုတ်ပြန်ချက်တွင် ဖော်ပြထားသည်။

ဦးအယ်လ်ဖောင်းရှိသည် ၂၀၁၈-၂၀၁၉ ဘဏ္ဍာရေးနှစ်တွင် ကယားပြည်နယ်အစိုးရအဖွဲ့ ရုံးနှင့် ဧည့်ရိပ်သာတို့ အား လျှပ်စစ်မီးအလှဆင်ခြင်းနှင့် လွိင်ကော်လေဆိပ် CCTV တပ်ဆင်ခြင်းလုပ်ငန်းများ ဆောင်ရွက်ရာတွင် နိုင်ငံတော်သမ္မတရုံး၏ ညွှန်ကြားချက်အမှတ် ၁/၂၀၁၇ နှင့်အညီ တင်ဒါ် ခေါ်ယူဆောင်ရွက်ခြင်းမပြုသဖြင့် နိုင်ငံတော်ကရရှိမည့် အခွန်အခနှင့် နိုင်ငံတော်ငွေကြေး သက်သာခွင့်များ နစ်နာဆုံးရှုံးစေခဲ့ခြင်းတို့ ကို စစ်ဆေးပေါ်ပေါက်ကြောင်းလည်း သိရသည်။

ယခုအခါ ဦးအယ်လ်ဖောင်းရှိနှင့် စည်ပင်သာယာရေးနှင့် ဦးအောင်ကျော်ဌေး တို့ အပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရ ကယားပြည်နယ်၊ လွိင်ကော်မြိုမရဲစခန်းတွင် ဖေဖော်ဝါရီလ ၂၈ ရက်တွင်ပထမသတင်းပေး တိုင်ကြားချက်ဖွင့်လှစ်၍ တရားစွဲဆိုအရေးယူနိုင်ရေး ဆောင်ရွက်လျက်ရှိကြောင်းလည်း သိရသည်။

ထို့ပြင် အခြားသော စစ်ဆေးပေါ်ပေါက်ချက်များအရ ကယားပြည်နယ်အစိုးရအဖွဲ့ ရုံးအတွက် ငွေလုံးငွေရင်း ခွင့်ပြုရန်ပုံငွေကျပ် ၁၀၄၀ သန်းဖြင့် တင်ဒါခေါ်ယူ ဝယ်ယူခဲ့သည့် ကယားပြည်နယ်အစိုးရအဖွဲ့ ပိုင် စက်ယန္တရား ၁၈ စီး၏ ငှားရမ်းခ ရငွေများကို ဝန်ကြီးချုပ်ဟောင်း ဦးအယ်လ်ဖောင်းရှိက ကယားပြည်နယ်ဝန်ကြီးချုပ်အဖြစ် တာဝန်ထမ်းဆောင်ခဲ့စဉ်ကာလတွင် စက်ယန္တရားငှားရမ်းခရငွေ ငွေကျပ် ၃၁၁ သန်းကျော်ထဲမှ ငွေကျပ် ၂၃၄ သန်းကျော်ကို ဌာနဆိုင်ရာငွေစာရင်းသို ပေးသွင်းခြင်းမရှိဘဲ ၎င်း၏ အကျိုးစီးပွားအတွက် သုံးစွဲခဲ့ခြင်း၊ ကယားပြည်နယ်နေ့အခမ်းအနားနေ့ ကျင်းပသည့် အစိုးရမြေနေရာ (ကယားဒေးကွင်း)အား တင်ဒါခေါ်ယူခြင်းမပြုဘဲ ကုမ္ပဏီတစ်ခုသို့ မြေငှားရမ်းခွင့်ပြုခဲ့ခြင်းတို့ နှင့်စပ်လျဉ်း၍ တည်ဆဲဥပဒေဖြင့် အရေးယူနိုင်ရေး ဆောင်ရွက်လျက်ရှိကြောင်းလည်း သိရသည်။

YMG/MT
photo- L Phaung Sho
Yangon_Media_Group

#LocalNews
Published -1 March 2022
မဟာဗောဓိမြိုင်ဆရာတော်ဘုရားကြီး တည်ထားကိုးကွယ်တော်မှုသော စစ်ကိုင်းတိုင်းဒေသကြီး၊ ကန့်ဘလူမြို့ နယ်ရှိ မင်းဘိသိက်ခံ မြတ်စွာဘုရား တပေါင်းပွဲတော်အား မတ်လ ၁၆ ရက်နေ့ တွင် ကျင်းပမယ်လို့ နတ်တလူသာသနာပြုစခန်းကသိရပါတယ်။

မဟာဗောဓိမြိုင်ဆရာတော်ဘုရားရဲ့သီလရိပ်သို့ ခိုဝင်လျက်ကပင် မကောင်းမှုကို လွှင့်နှင်ရန်၊ သမာဓိရိပ်သို့ ခိုဝင်လျက်ကပင် ကောင်းမှုကို ပင့်တင်ရန်၊ ပညာရိပ်သို့ ခိုဝင်လျက်ကပင် စိတ်ဓာတ်ကို မြှင့်တင်ရန်အလိုငှာ ပင့်သံဃာ (၁၀၈) ပါးတိုအား ဒါနဝတ္ထုအစုစုတိုနှင့် စာရေးတံမဲများ ဆက်ကပ်လှူဒါန်းသွားမှာဖြစ်တယ်လို့ သိရပါတယ်။

အခမ်းအနားကို စစ်ကိုင်းတိုင်းဒေသကြီး ကန့်ဘလူမြို့နယ် နတ်တလူသာသနာပြုစခန်းတွင်၁၃၈၃ ခုနှစ် တပေါင်းလပြည့်နေ့ နံနက် ၈ နာရီအချိန်တွင် ဒါနဝတ္ထုအစုစုတို့ နဲ့ စာရေးတံမဲများ ဆက်ကပ်လှူဒါန်းသွား မှာဖြစ်သလို နံနက် ၅ နာရီမှ နေ့ ၁၂ နာရီအထိ စတုဒိသာများနဲ့ ကျွေးမွေးဧည့်ခံသွားမယ်လို့ သိရပါတယ်။

ကျေးဇူးတော်ရှင်မဟာဗောဓိမြိုင်ဆရာတော်ဘုရားကြီးသည် ၁၃၈၃ ခုနှစ် ဝါဆိုလပြည့် ကျော် (၁)ရက်နေ့မတ်လ ၁၃ရက်မှစတင်၍ သာသနာ့အကျိုး လောကကောင်းကျိုးအတွက် (၇) ရက်သားသမီးများ၏ ကုသိုလ်အကျိုးငှာ ဆွမ်းခံပြီး အပူဇော်ခံ ကြွပေးနေခြင်းကို ၁၃၈၃ ခုနှစ် ပဉ္စဝီသတိမ (၂၅) ကြိမ်မြောက် မင်းဘိသိက်ခံ မြတ်စွာဘုရားတပေါင်းပွဲတော်ကြီးကျင်းပရန် ရှိနေပါသဖြင့် ၁၃၈၃ ခုနှစ် တပေါင်းလဆန်း ( ၁၂ ) ရက်နေ့တွင် ဆွမ်းခံကြွပြီး အပူဇော်ခံခြင်းကို ရပ်နားမည် ဖြစ်ပါကြောင်း ဝေနေယျ သာ၀ကအပေါင်းတို့ အား သိရှိစေရန် ကြေညာထားပါတယ်။

ymg/hm
#Yangon_Media_Group

#LocalHealth
Published_ 1 Mar 2022

ကျန်းမာရေးဝန်ကြီးဌာနက သူနာပြုသင်တန်းကျောင်းများမှ သင်တန်းပြီးမြောက် အောင်မြင်ခဲ့သူ သစ်လွင်သူနာပြု ၆၈၄ ဦးအား မနေ့က အလုပ်ခန့်အပ်တာဝန်ပေးအပ် ခဲ့ကြောင်း သိရပါတတယ်။

ထိုကဲ့သို့ပေးအပ်ရာမှာ နေပြည်တော်၊ မုံရွာ၊ လွိင်ကော် သူနာပြုသင်ကျောင်းများမှ သင်တန်း ပြီးမြောက်အောင်မြင်ခဲ့သူ သစ်လွင်သူနာပြု ၆၅ ဦးအား ကျန်းမာရေး ဝန်ကြီးဌာန၊ အစည်းအဝေးခန်းမ နှင့် သူနာပြု/သားဖွားသင်တန်းကျောင်း ၂၂ ကျောင်းမှ သင်တန်းပြီးမြောက် အောင်မြင်ခဲ့သူ သစ်လွင်သူနာပြု ၆၁၉ ဦးအား သက်ဆိုင်ရာ တိုင်းဒေသကြီး/ပြည်နယ်များ၌လည်းကောင်း သစ်လွင်သူနာပြု ခန့်အပ်လွှာများ ပေးအပ်ခဲ့ပြီး၊ စုစုပေါင်း သစ်လွင်သူနာပြု ၆၈၄ ဦး ခန့်အပ်ခဲ့ကြောင်းသိရှိရပါတယ်။

ဒါ့အပြင် မကြာမီသင်တန်းပြီးဆုံးတော့မယ့် သားဖွားဆရာမ ၁၆၅ ဦးကိုလည်း အမြန်ဆုံးအလုပ်ခန့်အပ် တာဝန်ပေးသွားမှာဖြစ်ပြီး ကျန်ရှိနေသေးသော သူနာပြုသားဖွား သင်တန်း၊ ပေါင်းကူးသင်တန်းများကို ဆက်လက်ဖွင့်လှစ်သွားမှာ ဖြစ်တယ်လို့ ကျန်းမာရေး ဝန်ကြီးဌာနက သတင်းထုတ်ပြန်ထားပါတယ်။

ကိုဗစ်-၁၉ ကမ္ဘာ့ကပ်ရောဂါဖြစ်ပွားနေသည့် ကာလဖြစ်သည့်အတွက် ၂၀၂၀ ပြည့်နှစ်၊ ဧပြီလမှစတင်၍ သင်တန်းကျောင်းများ ပိတ်ထားခဲ့ရပြီး ၂၀၂၁ ခုနှစ်၊ အောက်တိုဘာလမှစတင်၍ ကိုဗစ်-၁၉ ကာကွယ်ထိန်းချုပ်ရေး လမ်းညွှန်ချက်များနှင့်အညီ ပြန်လည်ဖွင့်လှစ် နိုင်ခဲ့ကာ သူနာပြုသင်တန်းသား/သူလေးများရဲ့ မဆုတ်မနစ် ဇွဲ၊ လုံလ၊ ဝီရိယနှင့် ကြိုးစားအားထုတ်သင်ယူခဲ့ကြလို့ သူနာပြု-သားဖွားဒီပလိုမာစာမေးပွဲကို အောင်မြင်စွာဆွတ်ခူးနိုင်ကြတဲ့အတွက် ဝမ်းမြောက်ဂုဏ်ယူပါကြောင်း ကျန်းမာရေး ဝန်ကြီး၊ ပါမောက္ခဒေါက်တာသက်ခိုင်ဝင်း ပြောကြားခဲ့ပါတယ်။

ကျန်းမာရေးဝန်ကြီးဌာနအနေနဲ့ ကျန်းမာ ရေးလူ့စွမ်းအားအရင်းအမြစ်များဖြစ်တဲ့ ဆရာဝန်များ၊ သူနာပြုဆရာ/ဆရာမများ၊ သားဖွား ဆရာမများနှင့် ဆေးဘက်ဆိုင်ရာ ပညာရှင်များကို လေ့ကျင့်မွေးထုတ်ပေးလျက်ရှိရာတွင် ပြည်သူလူထုအား အရည်အသွေး ပြည့်ဝသော ကျန်းမာရေးစောင့်ရှောက်မှုပေးနိုင်ရန် နိုင်ငံတော်ရဲ့ လိုအပ်ချက်နှင့်အညီ နှစ်စဉ်လေ့ကျင့်မွေးထုတ်လျက်ရှိကြောင်း သိရပါတယ်။
ymg-mnn
#Yangon_Media_Group

#LocalNews
Published - 1 March 2022

သီလဝါစက်မှုဇုန်တွင် တန်ဖိုးမြှင့်ငါးစာထုတ်စက်ရုံတစ်ခုကို အမေရိကန်အခြေစိုက် Scoular က ဖွင့်လှစ်ခဲ့ကြောင်း ယင်း၏ တရားဝင် သတင်းစာမျက်နှာတွင် ထုတ်ပြန်ထားသည်။

"အာရှမှာ နောက်ထပ် ရင်းနှီးမြှုပ်နှံမှုတစ်ခုအနေဖြင့် Scoular ရဲ့ ငါးအသားလုပ်ငန်းကို တိုးချဲ့ရတာ ကျွန်ုပ်တို့ စိတ်လှုပ်ရှားမိပါတယ်၊ အရည်အသွေးရှိတဲ့ ငါးအသားထွက်ပစ္စည်းတွေကို အာရှအစာဈေးကွက်တွေကို အချိန်နှင့်တပြေးညီ တင်ပို့ ပံ့ပိုးပေးဖို့ လုပ်ငန်းမှာအချက်အချာ ကျမှာပါ"ဟုလည်း ထုတ်ပြန်ရေးသားထားရာတွင် ဖော်ပြထားသည်။

သီလဝါစက်မှုဇုန်တွင် လာရောက်ဖွင့်လှစ်ခဲ့သော ငါးစာ တန်ဖိုးမြှင့် ထုတ်လုပ်မယ့် စက်ရုံသစ်ကို ရာခိုင်နှုန်းပြည့် နိုင်ငံခြားရင်းနှီးမြှုပ်နှံမှု အနေဖြင့် Scoular Myanmar Co,. Ltd. က ဆောင်ရွက်နေခြင်းဖြစ်ကြောင်းနှင့် မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) ကလည်း ၂၀၂၁ ခုနှစ် ဇန်နဝါရီလအတွင်းက ခွင့်ပြုခဲ့ကြောင်းလည်း သိရသည်။

မြန်မာနိုင်ငံတွင် ဖွင့်လှစ်လိုက်သော အဆိုပါစက်ရုံသစ်က အမေရိကန်အခြေစိုက် Scoular ၏ အာရှဒေသအတွင်း တိုးချဲ့တည်ရှိမှုအဓိက အစိတ်အပိုင်းတစ်ခုဖြစ်ကြောင်းလည်း သိရသည်။

Scoular သည် ရောင်းအားဒေါ်လာ ၆ ဘီလီယံရှိသော နှစ်ပေါင်း ၁၃၀ သက်တမ်းရှိ ကုမ္ပဏီတစ်ခုဖြစ်ကြောင်း၊ ယင်းထုတ်ကုန်များမှာ ဘေးကင်းလုံခြုံ ယုံကြည်စိတ်ချရကြောင်းနှင့် Scoular ၏ ကမ္ဘာလုံးဆိုင်ရာ ရုံးချုပ်မှာ အမေရိကန်၊ Omaha၊ Nebraska တွင် တည်ရှိကြောင်းလည်း သိရသည်။

ymg/mt
photo-Scoular
Yangon_Media_Group

Published 1 March 2022

ရုရှားနှင့်ဆက်လက်ဖြစ်ပွားနေတဲ့ ပဋိပက္ခတွေကြောင့် အခြေအနေတွေ တင်းမာနေတဲ့ အကျိုးဆက်တွေဟာ ယူကရိန်းနယ်စပ် လုဗျူးနယ်စပ်မြို့ကလေးရဲ့ ဒေသခံတော်တော်တော်များများနှင့် တစ်နိုင်ငံလုံးကို ရိုက်ခတ်နေပါတယ်။

လုဗျူးမြို့က ဒေသခံတွေဟာ ဆီရီယယ်လ်တွေ၊ရေနှင့် အခြားအစားအစာတွေ၊ပြီးတော့ အိမ်မွေးတိရိစ္ဆာန်အစားအစာတွေကို စတိုးဆိုင်တွေမှာ ဝယ်ယူနေကြပါတယ်။ သူတို့ဟာ ဆေးဆိုင်တွေမှာလည်း ဆေးတွေ အမျာကြီးကို ဝယ်ယူနေကြပါတယ်။ ဓာတ်ဆီဆိုင်တွေမှာ ဆီလက်ကျန်မရှိသလောက်ဖြစ်နေပြီး အေတီအမ်စက်တွေမှာလည်း ငွေလက်ကျန်မရှိနီးပါးဖြစ်နေပါတယ်။

ဒေသခံတွေနှင့်စစ်ဘေးရှောင်တိမ်းလာကြသူတွေရဲ့ ကိုယ်တွေ့ခံစားချက်တွေကို ရုပ်သံတင်ဆက်ထားပါတယ်။

Source CMG

#LocalNews
Published - 1 March 2022
ရန်ကုန်တိုင်းဒေသကြီးအတွင်းပြေးဆွဲနေသော YBSယာဉ်များကို ကတ်စနစ်နဲ့စီးနှင်းနိုင်ဖို့အတွက် YPS ကတ်အရောင်းစင်တာတွေကို ပြန်လည်ဖွင့်လှစ်နေပြီဖြစ်ကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီကသိရပါတယ်။

YPS အမှတ်တံဆိပ်ပါသော g&g ဆိုင်များအပြင်YPS ရဲ့ အရောင်းကောင်တာများကို ဆူးလေမှတ်တိုင်၊မြန်မာပလာဇာရှေ့၊ သခင်မြပန်းခြံ(ကမ်းနားလမ်း)၊ယုဇနပလာဇာရှေ့နဲ့စိုက်ပျိုးရေးမှတ်တိုင်အနီးရှိ YPS အရောင်းကောင်တာများတွင် တနင်္လာမှ သောကြာ နံနက် ၈နာရီခွဲ မှ ညနေ ၄နာရီခွဲ အတွင်း၊ စနေနေ့တွင် နံနက် ၈နာရီခွဲမှ နေ့လည် ၁၂နာရီခွဲအတွင်း YPS ကတ်သစ်ဝယ်ယူခြင်း၊ယာဉ်စီးခဖြည့်သွင်းခြင်း၊လက်ကျန်ငွေစစ်ဆေးခြင်း၊YPS ကတ်အခြေအနေစစ်ဆေးခြင်း တို့ကို သတ်မှတ်အချိန်အတွင်းဝန်ဆောင်မှုရယူနိုင်တယ်လို့ သိရပါတယ်။

ရန်ကုန်မြို့အတွင်း ပြေးဆွဲလျက်ရှိတဲ့ YBS ယာဉ်လိုင်းတွေကိုYangon Payment Service(YPS)စနစ်နဲ့ ခရီးအကွာအဝေးအလိုက် ယာဉ်စီးခများ ပိုင်းဖြတ်ကောက်ခံသွားမှာဖြစ်တယ်လို့ YRTC ရဲ့ သတင်းထုတ်ပြန်ချက်အရ သိရပါတယ်။

ပြီးခဲ့တဲ့ ၂၀၂၀ ပြည့်နှစ် ဇူလိုင်လ ၂၁ ရက်နေ့က စပြီးတော့ YBS ခရီးသည်တင်ဘတ်စ်ကားလိုင်းတွေမှာ ငွေပေးချေစနစ်ဖြစ်တဲ့ YPS (Yangon Payment Services) စတင် အသုံးပြုခဲ့ကြတာ ဖြစ်ပေမယ့် တွင်တွင်ကျယ်ကျယ် မဖြစ်သေးတာကြောင့် YRTC အနေနဲ့ ပြီးခဲ့တဲ့ ရက်က Asia Starmar ကုမ္ပဏီ၊ လူထုမိတ်ဆွေယာဉ်လိုင်းအများနှင့်သက်ဆိုင်သောကုမ္ပဏီ ၊ GYCT Public ကုမ္ပဏီ ၊ IGE ကုမ္ပဏီ ၊ uab Bank စတာတွေနဲ့ ဆွေးနွေးခဲ့ကြပါတယ်။

လက်ရှိမှာ YPS ကတ် တပ်ဆင်ထားတဲ့ ယာဉ်လိုင်းကုမ္ပဏီ ၅ ခု ရှိပြီး YPS ကတ်အသုံးပြုနိုင်တဲ့ ယာဉ်စီးရေ ၁၉၀၂ စီးရှိပြီ လို့ YRTC က သိရပါတယ်။

ymg/hm
#Yangon_Media_Group

 #WorldPolitics
Published - 1 March 2022

နယူးယော့ခ်မြို့ရှိ ကုလသမဂ္ဂဆိုင်ရာရုရှားဝန်ထမ်း ၁၂ ဦးအား အမေရိကန်တို့ကနှင်ထုတ်လိုက်ပြီဖြစ်ကြောင်း တနင်္လာနေ့က ကြေညာလိုက်ပါတယ်။ထိုသို့ နှင်ထုတ်လိုက်တဲ့အတွက် အမေရိကန်-ရုရှားသံတမန်ဆက်ဆံရေးကတော့ ပိုမိုဆိုးရွားလာမှာသေချာပါတယ်။
ကုလသမဂ္ဂဆိုင်ရာ ရုရှားသံအမတ်'ဗာဆယ်လီနီဘန်ဇီယာ'က သူ့ကိုနှင်ထုတ်လိုက်ပြီဖြစ်ကြောင်းသိရှိပြီးနောက် တနင်္လာနေ့ကပဲ မီဒီယာရှင်းလင်းပွဲတစ်ခုပြုလုပ်ခဲ့ပါတယ်။

"ရုရှားသံတမန် ၁၂ ဦးကို မလိုအပ်တော့ဘူးလို့ ကြေညာလိုက်ပြီး မတ်လ ၇ ရက်နေ့မှာ နိုင်ငံမှထွက်ခွာသွားဖို့ အသိပေးထားတဲ့စာတစ်စောင်ကို အမေရိကန်တာဝန်ရှိသူတွေထံမှ ပေးပို့လာပါတယ်။ အမေရိကန်အာဏာပိုင်တွေက ကုလဆိုင်ရာရုရှားဝန်ထမ်းတွေကို နောက်ထပ်တစ်ခါမထီမဲ့မြင်ပြုလိုက်တာပါပဲ။ သူတို့ ထုတ်ပြန်ထားတဲ့ အိမ်ရှင်နိုင်ငံသဘောတူညီချက်ကတိကဝတ်တွေကို ပြင်းပြင်းထန်ထန်ချိုးဖောက်လိုက်တာပါ" လို့ 'နီဘန်ဇီယာ'က ပြောကြားခဲ့ပါတယ်။

ဝါရှင်တန်မြို့ ရုရှားသံရုံးမှ ဒုတိယအဆင့်သံတမန်'ဆာဂျီထရီပယ်ကော့ဗ်'ကို အမေရိကန်မှနှင်ထုတ်ကြောင်း ကြေညာပြီးတစ်ပတ်မပြည့်ခင်မှာပဲ အခုလိုနောက်ထပ်ရုရှားဝန်ထမ်းတွေကို ထပ်မံနှင်ထုတ်လိုက်တာဖြစ်ပါတယ်။

ရုရှားသံတမန်တွေကိုနှင်ထုတ်ရခြင်းက မော်စကိုရှိ အမေရိကန်သံရုံးမှ လက်ထောက်ဦးစီးချုပ်အား ရုရှားတို့ကအကြောင်းမဲ့နှင်ထုတ်လိုက်ခြင်းကြောင့်ဖြစ်တယ်လို့ အမေရိကန်နိုင်ငံခြားရေးဌာနက အကြောင်းပြလိုက်ပါတယ်။

ပြီးခဲ့တဲ့နှစ်ကုန်ပိုင်းလောက်ကလည်း ရုရှားသံတမန် ၂၇ ဦးနဲ့သူတို့ မိသားစုတွေကို အမေရိကန်ကပြည်နှင်ထုတ်ခဲ့ပြီး ဇန်နဝါရီ ၃၀ ရက်နေ့မှာ နိုင်ငံကထွက်ခွာဖို့ အသိပေးခဲ့ပါသေးတယ်။

အဲဒီအချိန်တုန်းက ရုရှားသံရုံးမှာ ဝန်ထမ်းပြတ်လတ်မှုကြုံတွေ့နေရကြောင်း အမေရိကန်မှရုရှားသံအမတ်'အန်နာတိုလီအန်တိုနော့ဗ်'က ပြောကြားခဲ့ပါတယ်။ထိုအချိန်များမတိုင်ခင် အမေရိကန်မှာအလုပ်လုပ်နေတဲ့ ရုရှားသံတမန်အယောက် ၂၀၀ နီးပါးခန့် ရှိခဲ့တာဖြစ်ပါတယ်။

'နီဘန်ဇီယာ'က သတင်းထောက်တွေကိုပြောကြားရာမှာ အမေရိကန်က အခုနောက်ဆုံးနှင်ထုတ်ခံရခြင်းက ဘာအကြောင်းပြချက်ကြောင့်လဲဆိုတာ မသိရှိထားကြောင်း၊ အသိပေးစာကိုလည်း သူကိုယ်တိုင်မဖတ်ကြည့်ရသေးကြောင်း၊ ထွက်ခွာဖို့ အမိန့်ပေးခံရတဲ့သံတမန်တွေက ဘယ်သူတွေလဲဆိုတာလည်း မသိရသေးကြောင်း ပြောဆိုသွားပါတယ်။

အခုနှင်ထုတ်ခံလိုက်ရတဲ့ ရုရှားဝန်ထမ်းတွေဟာ နိုင်ငံတော်လုံခြုံရေးကိုထိပါးစေသော သူလျှိုလုပ်ငန်းများတွင် ပါဝင်ပတ်သက်နေသည်ဟု ကုလဆိုင်ရာအမေရိကန်သံရုံးမှ ပြောရေးဆိုခွင့်ရှိသူတစ်ဦးက ရိုက်တာသတင်းဌာနကို ပြောကြားခဲ့ပါတယ်။

နှင်ထုတ်ခြင်းတွေပြုလုပ်ဖို့ လပေါင်းများစွာစီစဉ်နေခဲ့တာဖြစ်ပြီး ရုရှား-ယူကရိန်းပဋိပက္ခနဲ့ မသက်ဆိုင်ကြောင်း ရှင်းပြသွားပါတယ်။'နီဘန်ဇီယာ'ကတော့ နှင်ထုတ်ခံရတဲ့အတွက်ဝမ်းနည်းမိကြောင်းနဲ့ အမေရိကန်ဟာ အိမ်ရှင်နိုင်ငံရဲ့သဘောတူညီချက်အပေါ် မလေးမစားပြုမူတာဖြစ်တယ်လို့ ပြောကြားခဲ့ပါတယ်။
Source: RT

#WorldHealth
Published - 1 March 2022

အားပြင်းသည့် ကင်ဆာကုသနည်းများက ကိုဗစ်ရောဂါဖြစ်ပွားနေတဲ့ ကင်ဆာရောဂါသည်တွေရဲ့ အသက်သေဆုံးနိုင်ချေကို ပိုမိုဆိုးရွားစေခြင်းမရှိကြောင်း ယူကေမှ ကိုရိုနာဗိုင်းရပ်စ်နှင့်ကင်ဆာစောင့်ကြည့်ရေးအစီအစဉ်ရဲ့ သုတေသနအချက်အလက်များအရ သိရှိရပါတယ်။

ဓာတုဆေးဝါးကုထုံး၊ ကိုယ်ခံအားမြှင့်တင်ခြင်းကုထုံး၊ ဟော်မုန်းကုထုံး ဒါမှမဟုတ် ကင်ဆာဆေးဝါးများဖြင့် ကင်ဆာရောဂါကုသမှုခံယူနေတဲ့ ကိုဗစ်ရောဂါလူနာ ၂,၅၁၅ ဦးကို သုတေသီတို့က လေ့လာခဲ့ကြပါတယ်။

အဆိုပါလူနာတွေထဲက ၃၈ ရာခိုင်နှုန်းဟာ ကိုဗစ်ရောဂါလက္ခဏာစပေါ်ပြီး တစ်ပတ်အတွင်း ကွယ်လွန်ခဲ့ကြပါတယ်။စမ်းသပ်လေ့လာတဲ့လူနာတဝက်ခန့်ဟာ အသက် ၇၂ နှစ်အထက်လူကြီးတွေဖြစ်ပြီး ခြုံငုံကြည့်တဲ့အခါ အဆုတ်ကင်ဆာ သွေးကင်ဆာခံစားရတဲ့လူနာတွေဟာ အသက်သေဆုံးနိုင်ချေများနေပါတယ်။

ဓာတုဆေးဝါးကုထုံးဖြင့် ကိုဗစ်ရောဂါကြောင့်သေဆုံးနိုင်ချေကို မသက်ရောက်စေပေမယ့် ကိုယ်ခံအားမြှင့်တင်ခြင်းကုထုံးကတော့ အသက်ရှင်နိုင်စွမ်းကိုတောင် မြင့်မားစေနိုင်ကြောင်း JAMA Network Open ဂျာနယ်မှာ တနင်္လာနေ့က ဖော်ပြထားပါတယ်။

အစောပိုင်းလေ့လာချက်များအရ ကင်ဆာရောဂါအခံရှိတဲ့ ကိုဗစ်လူနာတွေဟာ အခြေအနေဆိုးရွားလေ့ရှိတယ်လို့ တွေ့ရှိခဲ့ကြပေမယ့် ဒါဟာ ကင်ဆာကုထုံးတွေကြောင့်ဆိုတာထက် အသက်အရွယ်၊ ကျား/မ၊ အခြားရောဂါအခံများနဲ့ ကင်ဆာအမျိုးအစားတို့ အပေါ် ပိုပြီးမူတည်နေနိုင်ကြောင်း သုတေသနအဖွဲ့ က သုံးသပ်သွားပါတယ်။
Source: Reuters

#LocalNews
Published -1 Mar 2022

စစ်ကိုင်းတိုင်းဝန်ကြီးချုပ်ဟောင်း ဒေါက်တာမြင့်နိုင်ကို ဖေဖော်ဝါရီ ၂၈ ရက်နေ့ မနေ့က မုံရွာအကျဥ်းထောင်ရှိ အထူးတရားရုံးမှ ထောင်ဒဏ် ၂၁ နှစ်ချမှတ်လိုက် တယ်လို့ ရှေ့နေအသိုင်းအဝိုင်းကနေသိရပါတယ်။

ဝန်ကြီးချုပ်ဟောင်း ဒေါက်တာမြင့်နိုင်ကို မုံရွာအကျဥ်းထောင်ရှိ အထူးတရားရုံး က အဂတိပုဒ်မ ၅၅ နဲ့ အမှု(၇) မှုအတွက် ထောင်ဒဏ် ၂၁ နှစ်ချမှတ်ခဲ့တာဖြစ်တယ်လို့ အမှုတွေကိုလိုက်ပါဆောင်ရွက်ပေးနေတဲ့ တရားလွှတ်တော်ရှေ့နေတစ်ဦးက ပြောပါတယ်။

“၁ မှုကို ၃ နှစ်စီနဲ့ ၇ မှုအတွက် စုစုပေါင်း ၂၁ နှစ်ချလိုက်တာပါ။ အရင်ကလည်း ပုဒ်မ ၅၀၅(ခ)နဲ့ ထောင်ဒဏ် ၂ နှစ်ချထားသေးတယ်” လို့ ရှေ့နေတစ်ဦးကပြောပါတယ်။

၂၀၂၁ ခုနှစ် မေလ ၅ ရက်က ဝန်ကြီးချုပ်ဟောင်း ဒေါက်တာမြင့်နိုင်ကို အဂတိလိုက် စားမှု တိုက်ဖျက်ရေးဥပဒေ ပုဒ်မ ၅၅ ဖြင့် အမှု (၇)မှု၊ ၅၀၅(ခ)အမှု (၁) မှုတို့ကို မုံရွာမြို့မရဲစခန်းမှာ မေ ၅ ရက်တွင် ပထမ သတင်းပေးတိုင်ကြားချက် ဖွင့်လှစ်ကာ တရားစွဲဆိုခဲ့တာဖြစ်ပါတယ်။

အဂတိ လိုက်စားမှုတိုက်ဖျက်ရေးဥပဒေပုဒ်မ ၅၅ နဲ့ အမှုအမှတ် ၁/၂၀၂၁မှ ၇/၂၀၂၁အထိ အမှုတစ်မှုအတွက် အလုပ်နဲ့ ထောင် ဒဏ် ၃နှစ်စီချမှတ်ခဲ့ရာ စုစုပေါင်းအမှု (၇)မှုအတွက် အလုပ်နှင့် ထောင်ဒဏ် ၂၁ နှစ် ချမှတ်ခဲ့သလိုဝန်ကြီးချုပ်ဟောင်း ဒေါက်တာမြင့်နိုင်ကို မုံရွာအကျဉ်းထောင်တွင်း တရားရုံးက ၂၀၂၁ခုနှစ်ကဒီဇင်ဘာ ၂၀ ရက်က ပုဒ်မ ၅၀၅ (ခ) အမှုအတွက် ထောင်ဒဏ် ၂ နှစ် အမိန့်ချခဲ့တာ ကြောင့်စုစုပေါင်း ထောင်ဒဏ် ၂၃ နှစ်ကို ကျခံရမှာဖြစ်ပါတယ်။

ymg/hm
#Yangon_Media_Group