#LocalNews
Published - 2 March 2022

ပုဒ်မ ၅၀၅-က နဲ့ တရားစွဲဆိုခံထားရတဲ့ သရုပ်ဆောင်တွေနဲ့အတူ မူးယစ်ဆေးဝါးအမှုနဲ့ ဖမ်းဆီခံထားရတဲ့ မလေးရှားနိုင်ငံသားပါ ဒီကနေ့ ပြန်လည်လွှတ်မြောက်လာပါတယ်။

မူးယစ်ဆေးဝါးမှုနဲ့ ဖမ်းဆီးခံရပြီး အင်းစိန်အကျဉ်းထောင်တွင် ပြစ်ဒဏ်ကျခံလျက်ရှိတဲ့ မလေးရှားနိုင်ငံသားကို လူသားချင်းစာနာထောက်ထားမှုကို အလေးထားတဲ့အနေနဲ့ ကျခံဖို့ကျန်ရှိတဲ့ ပြစ်ဒဏ်တွေကို လွတ်ငြိမ်းခွင့်ပြုလိုက်ပြီး မတ်လ ၂ ရက်နေ့ ဒီကနေ့မှာ အကျဉ်းထောင်မှ လွှတ်ပေးခဲ့တာပါ။

မလေးရှားနိုင်ငံသား Fariz Azman Bin Zaunul Azman ဟာ ၂၀၁၉ ခုနှစ်၊ ဧပြီလ ၄ ရက်နေ့ မှာ မြန်မာနိုင်ငံသို့ လေကြောင်းခရီးနဲ့ ရောက်ရှိလာတာလို့ သိရပါတယ်။

ဒီကနေ့ အနုပညာရှင် ပိုင်တံခွန်၊ လူမင်း၊ ပြေတီဦး၊ အိန္ဒြာကျော်ဇင်၊ ဒါရိုက်တာဝိုင်း၊ ဘလော့ဂါဝင်းမင်းသိန်း တို့ကို ပြစ်ဒဏ်က လွှတ်ငြိမ်းခွင့်ပေးတယ်လို့ ကြေညာထားပါတယ်။

ပုဒ်မ ၅၀၅- ကနဲ့ တရားစွဲခံရတဲ့ သရုပ်ဆောင် ပိုင်တံခွန်၊ လူမင်း၊ ပြေတီဦး၊ အိန္ဒြာကျော်ဇင်တို့ကို ထောင်ဒဏ် ၃ နှစ်စီချမှတ်ခံထားရတာ ဖြစ်ပြီး မဝင်းမင်းသန်းမှာတော့ ပုဒ်မ ၅၀၅-က အပြင် မတရားအသင်းဆက်သွယ်မှု ဥပဒေပုဒ်မ ၁၇ (၁) နဲ့ပါ တရားစွဲဆိုခံခဲ့ရတာပါ။

ymg/ei
#Yangon_Media_Group

#WorldPolitics
Published 02 March 2022

ရုရှား-ယူကရိန်းနှစ်နိုင်ငံအကြား အပစ်အခတ်ရပ်စဲရေးအကြောင်း မဆွေးနွေးခင်မှာ ရုရှားတို့အနေနဲ့ ယူကရိန်းမြို့တွေကို ဗုံးကြဲတိုက်ခိုက်နေမှုများအား ရပ်တန့်ပေးဖို့လိုအပ်ကြောင်း ယူကရိန်းသမ္မတ'ဗိုလိုဒီမီယာဇဲလန်စကီ'က အင်္ဂါနေ့က အသိပေးပြောကြားလိုက်ပါတယ်။

ယခုတစ်အပတ်အတွင်း ပထမဆုံးအကြိမ်ညှိနှိုင်းဆွေးနွေးရာမှာတော့ အခြေအနေတိုးတက်မှု အနည်းငယ်သာရခဲ့တယ်လို့ ဆိုရမှာပါ။

ရုရှားလေတပ်တိုက်ခိုက်မှုတွေကိုရပ်တန့်ဖို့ ပျံသန်းခြင်းကင်းမဲ့ဇုန်သတ်မှတ်ပေးသင့်ကြောင်း 'ဇဲလန်စကီ'က နေတိုး(NATO)အဖွဲ့ကို တိုက်တွန်းပြောကြားလိုက်ပြီး ဒီလိုသတ်မှတ်ခြင်းဟာ ကာကွယ်ရေးရယူတဲ့နည်းလမ်းသာဖြစ်သဖြင့် ဥရောပမဟာမိတ်အဖွဲ့တွေကို ရုရှားစစ်ပွဲထဲဆွဲထည့်သွားဖို့ မရည်ရွယ်ကြောင်း အင်တာဗျူးတစ်ခုမှာပြောကြားသွားပါတယ်။

ရုရှားတပ်ဖွဲ့တွေ ယူကရိန်းကိုကျူးကျော်တိုက်ခိုက်လာစဉ်မှာ မြို့တော်ကနေထွက်ပြေးဖို့ ကမ်းလှမ်းကူညီမှုတွေကို 'ဇဲလန်စကီ'က ငြင်းပယ်ကာ ယူကရိန်းမှာသာ ဆက်လက်နေထိုင်နေခဲ့တာဖြစ်ပါတယ်။

နေတိုးအဖွဲ့အနေနဲ့ ယူကရိန်းကိုမဟာမိတ်အဖွဲ့ဝင်အဖြစ် မသတ်မှတ်ချင်ပါက တရားဝင်လုံခြုံရေးအာမခံချက်တွေရရှိဖို့လိုအပ်ကြောင်း 'ဇဲလန်စကီ'က တောင်းဆိုထားပါတယ်။

ရုရှားတို့နဲ့ဆက်လက်ဆွေးနွေးသွားဖို့ သူ့ရဲ့သတ်မှတ်ချက်တွေကို အသိပေးရာမှာ 'ဇဲလန်စကီ'က "အနည်းဆုံးတော့ လူတွေကိုဗုံးကြဲတိုက်ခိုက်နေတာတွေကို ရပ်တန့်ပြီး လက်တွေ့ကျကျတိုင်ပင်ဆွေးနွေးသင့်ပါတယ်" လို့ ရိုက်တာနဲ့ CNN သတင်းဌာနတို့ရဲ့ အင်တာဗျူးမှာ ပြောကြားသွားပါတယ်။

'ဇဲလန်စကီ'ပြောကြားနေစဉ်အချိန်မှာပဲ ယူကရိန်းမြို့တော်မှ ဟော်လိုကော့စ်အောက်မေ့ဖွယ်သင်္ချိုင်းအနီးရှိ တီဗီတာဝါတိုင်တစ်ခုကို ရုရှားဘက်မှဒုံးကျည်ဖြင့်ပစ်ခတ်ခဲ့ရာ အနည်းဆုံးလူ ၅ ဦးသေဆုံးခဲ့ကာ ရုရှားတို့က ခါကိဗ်အရှေ့ပိုင်းမြို့ရဲ့အချက်အခြာဗဟိုကို ပစ်မှတ်ထားတိုက်ခိုက်နေတာဖြစ်ပါတယ်။

ရုရှားတို့အင်ပြည့်အားပြည့်တိုက်ခိုက်လာမှုကို ယူကရိန်းတို့ခုခံကာကွယ်နိုင်ရန် နေတိုးအဖွဲ့ဝင်နိုင်ငံများက စစ်လက်နက်ပစ္စည်းများ ကူညီထောက်ပံ့ပေးထားပါတယ်။

ဒါ့အပြင် အနောက်နိုင်ငံကလည်း ရုရှားစီးပွားရေးအပေါ် ဒဏ်ခတ်ပိတ်ဆို့မှုတွေကို အရှိန်အဟုန်မြှင့်ပြီး ချမှတ်လျက်ရှိပါတယ်။ဒါပေမယ့် ဒီထက်အရေးယူဒဏ်ခတ်မှုတွေပြုလုပ်ပြီး ပျံသန်းခြင်းကင်းမဲ့ဇုန်သတ်မှတ်ပေးဖို့ နိုင်ငံတကာအသိုင်းအဝိုင်းကို 'ဇဲလန်စကီ'က တိုက်တွန်းလိုက်ပါတယ်။

ဒါပေမယ့်လည်း အမေရိကန်သမ္မတ'ဂျိုးဘိုင်ဒန်'က အခုအချိန်ကဒီလိုသတ်မှတ်ဖို့ အချိန်မကျသေးကြောင်း ကိုယ်တိုင်ကိုယ်ကျဖြေကြားလိုက်ပါတယ်။နေတိုးတပ်ဖွဲ့များ အရှိန်မြှင့်ဝင်ရောက်လာဖို့ကိုလည်း ယူကရိန်းက တိုက်တွန်းလိုက်ပါတယ်။

နေတိုးတပ်ဖွဲ့တွေ ဝင်ရောက်လာခြင်းကို ရုရှားတို့ကလုံးဝလက်မခံနိုင်တဲ့အပြင် ဒီကိစ္စကပဲ ရုရှားတို့စစ်ဆင်ရေးပြုလုပ်ရခြင်း အကြောင်းပြချက်တစ်ခုဖြစ်နေပါတယ်။

"မဟာမိတ်အဖွဲ့တွေကလည်း ယူကရိန်းကို နေတိုးအဖွဲ့ထဲလက်မခံနိုင်သေးဘူး။ ရုရှားကလည်း ယူကရိန်းကို နေတိုးအဖွဲ့ထဲ မဝင်စေချင်ဘူးဆိုတော့ ယူကရိန်းအတွက် လုံခြုံရေးဘုံသဘောတူညီချက်ရရှိဖို့ လိုအပ်နေပါတယ်" လို့ 'ဇဲလန်စကီ'က ဆိုပါတယ်။

"ကျွန်တော်တို့ယူကရိန်းနယ်မြေတွေလုံခြုံပြီး နယ်မြေစိုးမိုးရေးပိုင်ဆိုင်ထားဖို့ လိုအပ်ပါတယ်။ အိမ်နီးချင်းတွေအားလုံးနဲ့လည်း ဆက်ဆံရေးကောင်းမွန်ပြီး တရားဝင်လုံခြုံရေးအာမခံချက်ပေးနိုင်မယ့်သူတွေ လိုအပ်နေပါတယ်" လို့ ပြောသွားပါတယ်။

'ဇဲလန်စကီ'ဟာ အသက် ၄၄ နှစ်ရှိပြီဖြစ်တဲ့ ယူကရိန်းသမ္မတဖြစ်ပြီး စစ်တပ်အစောင့်များတင်းကြပ်စွာချထားတဲ့ အဆောက်အအုံတစ်ခုမှာ အင်တာဗျူးဖြေကြားသွားတာဖြစ်ပါတယ်။

Source: Reuters
#Yangon_Media_Group

#DailyNews
Published - 2 Mar 2022

၁။ ငွေကျပ် သိန်း ၁၂၀ ခန့်ဖြင့် စက်မှုဇုန်ထုတ် လျှပ်စစ်ကားများဝယ်နိုင်ပြီ။

၂။ အဝေးပြေးယာဉ်များ အချိန်ထပ်တိုးပြေးဆွဲလာကြ။

၃။ နေ့စဉ်မိုးလေဝသသတင်း။

၄။ အော့စ်ကာဆုပေးပွဲအတွက် ပထမဆုံးအကြိမ်အဖြစ် ဘူတန်နိုင်ငံကရုပ်ရှင် ဆန်ခါတင်စာရင်းဝင်.......အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ်။

#Yangon_Media_Group

Published 02 March 2022

ရုရှားသမ္မတဗလာဒီမာပူတင်ဟာ မှားယွင်းစွာတွက်ချက်ပြီး အိမ်နီးချင်းနိုင်ငံထဲကို စစ်တပ်တွေကျူးကျော်ဖို့ အမိန့်ပေးခဲ့တယ်။သူဟာ လွတ်လပ်ကမ္ဘာကြီးရဲ့ အုတ်မြစ်တွေကို လှုပ်ခါပစ်ဖို့ကြိုးစားခဲ့တယ်လို့  အမေရိကန်သမ္မတဂျိုးဘိုင်ဒင်က ပြောပါတယ်။

“ ကျွန်တော်တို့ရဲ့သမိုင်းတစ်လျှောက် သင်ခန်းစာတွေရယူခဲ့ကြတယ်။ အာဏာရှင်တွေဟာ သူတို့ရဲ့ ကျူးကျော်တိုက်ခိုက်မှုတွေ အတွက်  တန်ကြေးမပေးဆပ်ကြတဲ့အခါ  သူတို့ဟာပိုပြီး ဖရိုဖရဲဖြစ်ကြတယ်” လို့ ဘိုင်ဒင်က အင်္ဂါနေ့ညက ကပ္ပီတယ်လ်ဟေးလ်မှာပြုလုပ်တဲ့ နိုင်ငံတော်အခြေပြမိန့်ခွန်းမှာ ထည့်သွင်းပြောကြားခဲ့ပါတယ်။

ပူတင်ဟာ အကြမ်းဖက်မှုနှင့်ပရမ်းပတာဖြစ်မှုတွေကို လုပ်ဆောင်ခဲ့တယ်။ သူဟာ စစ်မြေပြင်မှာတော့ အနိုင်ရကောင်းရမယ်။ ဒါပေမယ့် ရေရှည်မှာ သူဟာ တန်ဖိုးကြီးကြီးဆက်လက်ပေးဆပ်နေရဦးမယ် လို့ ဘိုင်ဒင်ကဝေဖန်ပါတယ်။

“ (ပူတင်)က သူ့အနေနှင့် ယူကရိန်းထဲ လှိမ့်ဝင်သွားနိုင်ပြီး အဲသလိုနှင့် ကမ္ဘာကြီးက ပြီးသွားမယ်လို့ သူထင်ခဲ့တယ်။ အဲဒီအစား သူဟာ သူလုံးဝထင်မထားတဲ့ သန်စွမ်းတဲ့ နံရံကြီးတစ်ခုနှင့််တွေ့ခဲ့ရတယ်” လို့ ဘိုင်ဒင်ကဆက်ပြောပါတယ်။

သူက ယူကရိန်းအစိုးရကို ဝါရှင်တန်က မယိမ်းယိုင်တဲ့ ထောက်ပံ့မှုတွေဆက်ပေးဖို့ ထပ်လောင်းပြောဆိုခဲ့ပြီး ငွေကြေးနှင့် စစ်ရေးအကူတွေပိုပေးမယ်လို့လည်း ကတိပြုခဲ့ပါတယ်။ ယူကရိန်းရဲ့မြေပေါ်ကနေ ရုရှားကိုဆန့်ကျင်ဖို့ အမေရိကန်တပ်တွေ လွှတ်ပေးမယ့်စိတ်ကူးကိုတော့ သူကခိုင်မာစွာ ပယ်ချခဲ့ပါတယ်။

“ကျွန်တော်တို့ဟာ အမေရိကန်မြေပြတပ်တွေကို တပ်ရွှေ့ပြောင်းပေးခဲ့တယ်။ လေကြောင်းတပ်တွေနှင့် သင်္ဘောတွေကို  ပိုလန်၊ရိုမေးနီးယား၊လက်တီဗား၊လစ်သူရေးနီးယားနှင့် အက်စတိုးနီးယားအပါအဝင် နေတိုးနိုင်ငံတွေကို ကာကွယ်ဖို့ ဖြန့်ကျက်ချထားတယ်။ အမေရိကန်နှင့်ကျွန်တော်တို့ရဲ့မဟာမိတ်တွေဟာ ပိုင်နက်ကို တစ်လက်မတိုင်းအတွက် ကာကွယ်သွားမှာဖြစ်တယ်။ ဒါဟာနေတိုးရဲ့ပိုင်နက် ၊ ကျွန်တော်တို့ရဲ့စုပေါင်းအင်အားအပြည့်နှင့်အတူရှိနေတယ်” လို့ သူကဆက်ပြောပါတယ်။

အဲဒီအပြင်ဘိုင်ဒင်က ရုရှားလေယာဉ်တွေအားလုံးအတွက် အမေရိကန်လေပိုင်နက်ပျံသန်းခွင့်ပိတ်ပင်ကြောင်းလည်း ကြေညာခဲ့ပါတယ်။ ဥရောပသမဂ္ဂနှင့်အနောက်မဟာမိတ်တွေက ပြုလုပ်ခဲ့ကြတဲ့အတိုင်းဖြစ်ပါတယ်။

 Source Agencies/RT

#LocalNews
Published - 2 March 2022

အထူးဒေသ-၄၊ မိုင်းလား၌ပြုလုပ်မည့် ကိုးကန့်အဖွဲ့ ဥက္ကဌဟောင်း ဦးဖုန်ကြားရှင်၏ ဈာပနကော်မတီတွင်တိုင်းရင်းသား လက်နက်ကိုင်အဖွဲ့မျိုးစုံမှ ခေါင်းဆောင်များပါဝင်ကြောင်း သိရသည်။

ဦးဖုန်ကြားရှင်သည် ဖေဖော်ဝါရီလ ၁၆ ရက်နံနက်က လူကြီးရောဂါဖြင့် ကွယ်လွန်ခြင်းဖြစ်ပြီး ဈာပနကိုမူလက မတ်လ ၃ ရက် မှ ၇ ရက်ထိ ပြုလုပ်ရန် လျာထားခဲ့သော်လည်း COVID-19 စည်းကမ်းသတ်မှတ်ချက်များကြောင့် မတ်လ ၂၉ ရက်သိုပြောင်းရွှေ့လိုက်ကြောင်း သိရသည်။

ဈာပန ကျင်းပရေးကော်မတီတွင် ဦးပေါက်ယူချန် ၊ဦးရှောက်မင်လျှံ၊ဦးပေါက်ယူယွီ၊ဦးစိန်ဝင်း၊ဦးကျောက်ကော်အမ်း၊ဦးပေါက်ယူလျှံ၊ဦးဝေ့ရွှယွမ်၊ဦးလောရာခု၊ဦးစိုင်းလင်း၊ဦးစန်ပေ့၊ဦးဆန်လူ၊ဦးထိန်လင်း၊ဦးလော်ချန်ပေါက်၊ဦးကြည်မြင့်၊ဦးလီကျင့်လုံ၊ဦးအိုက်ရှဲန်လား၊ဦးခမ်းမောင်၊ဦးစိုင်းတစ်၊ဦးကျန်ယုံနင်၊ဦးအားချိုင်၊ဦးအာလူး၊ဦးအိုက်ပန်း၊ဦးထွန်းမြတ်နိုင်၊ဦးညိုထွန်းအောင်၊တာအိုက်ဘုန်း၊တာခူးလာန်း၊တာကျူတ်ကျား၊တာဖုန်းကျော်။ဂွမ်ထန်ဂမ်ရှောင်၊စဝ်ပန်ဖ၊စဝ်ခေးတိုင်း၊စဝ်ကျော်လ၊စဝ်မောမိန်း၊စဝ်၀င်းအောင်၊စဝ်အောင်လှ၊ဦးဖုန်ကြားယုံ၊ဦးဖုန်ကြားဟွာ၊ဦးဖုန်ကြားကျိန့်၊ဦးဖုန်တဲရင်၊ဦးရန်ဝင်ကျုံး၊ဦးရန်ကျွီကျွင်း၊ဦးဖုန်တဲကျွင်း၊ဦးလီလောက်ပေါက်၊ဦးထွန်းမြတ်လင်း၊ဦးဖုန်တဲရိ၊ဦးလီကော်ရှင်း၊ဦးဖုခဲကျုံး၊ဦးကျင်းရှင်း၊ဦးရန်ကွမ်းဟွာ၊ဦးကျော်ခိုင်၊ဦးဖုန်းဝင်းနိုင်၊ဦးဝမ်ကျီယွီ၊ဦးချာတဲအမ်း၊ဦးလီဖားချောက်၊ဦးကျန်းဟုန်ရင်း၊ဦးရှဲကွမ်းဟွာ၊ဦးကျောက်ကွင်းဖျင်၊ဦးလီဖျင်ယုံ၊ဦးလီရှိကျဲ၊ဦးယောင်ဝေ့၊ဦးကောက်ရှိချီ၊ဦးဖုန်ရှင်းချန်၊ဦးဖုန်ယူရှန်၊ဦးလူကျူမောက်၊ဦးစူးကြားပျောက်၊ဦးဝမ်ကျင့်ချိုင်၊ဦးကျုံးဝင်ကျွင့်၊ဦးကိမ်ဝေ၊ဦးကျုံးကြားဖူး၊ဦးလီကြားခွမ်း၊ဦးရှင်းဟုန်၊ဦးဖုန်ကျင့်အမ်း၊ဦလီရှိချန်၊ဦးဟော်ကွမ်ဒဟိုက်၊ဦးရန်ကြားနိမ်၊ဦးကျန်ဝင်းဟွာ၊ဦးကျန်းဝင်ရှိန်း၊ဦးကျိကော်ချန်၊ဦးကျောက်တဲရှမ်း၊ဦးချိန်ပင်၊ဦးလီကျိမောက်၊ဦးကျန်းလွီဖား၊ဦးဖူမင်ရှင်၊ဦးရန်ဝင်ပေါ်တို့ ပါဝင်ကြောင်း ဈာပနကျင်းပရေးကော်မတီက ထုတ်ပြန်ထားသည်။

ယင်းကော်မတီ၏ အမည်စာရင်းထဲတွင် ဦးပေါက်ယူချန် ၊ ဦးစိုင်းလင်း၊ဦးထွန်းမြတ်နိုင်၊ဦးညိုထွန်းအောင်၊တာအိုက်ဘုန်း၊တာကျူတ်ကျား၊တာဖုန်းကျော်။ဂွမ်ထန်ဂမ်ရှောင်၊ဦးဖုန်ကြားဟွာ၊ဦးထွန်းမြတ်လင်းတို့ မှာ လူသိများသည့် တိုင်းရင်းသားလက်နက်ကိုင်များ ဖြစ်ကြသည်။

ဦးဖုန်ကြားရှင်သည် အများက ကိုးကန့်အဖွဲ့ဟုပြောလေ့ရှိသည့် မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) ကို တည်ထောင်သူလည်းဖြစ်ပြီး ဥက္ကဋ္ဌဟောင်းလည်းဖြစ်ကာ ကွယ်လွန်ချိန်တွင် အသက် ၉၄ နှစ်အရွယ်
ရှိပြီဖြစ်ကြောင်း သိရသည်။

၁၉၈၉ မတ်လ ၁၂ ရက်တွင် ဖုန်ကျားရှင်း နှင့် ဖုန်ကျားဖူးတို့ညီအစ်ကိုခေါင်းဆောင်၍ ဗမာပြည်ကွန်မြူနစ်ပါတီ (ဗကပ) မှ ပထမဆုံးခွဲထွက်ကာ MNDAA ကိုတည်ထောင်ခဲ့ကြကြောင်း သိရသည်။

ဦးဖုန်ကြားရှင်း ၏ ညီ ဦးဖုန်ကြားဖူးမှာ မြန်မာ – တရုတ်နယ်စပ်တွင် အဆုတ်ရောဂါဖြင့် ပြီးခဲ့သည့် ၂၀၁၇ ခုနှစ် ဇွန်လ ၂၀ ရက်က ကွယ်လွန်ခဲ့ကာ ယင်းမှာ ကွယ်လွန်စဉ် အသက် ၈၁ အရွယ် ရှိကြောင်း သိရသည်။

လက်ရှိတွင် မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) တွင် စစ်ဦးစီးချုပ် တာဝန်ကို ဦးဖုန်ကြားရှင်း၏ သားကြီးဖြစ်သူ ဦးဖုန်တာရွှင်က တာဝန်ယူထားကြောင်းလည်း သိရသည်။

ymg/mt
#Yangon_Media_Group

Published 2 March 2022

နစကက ပြစ်ဒဏ်လွတ်ငြိမ်းခွင့်ဖြင့် ပြန်လွှတ်ပေးခဲ့တဲ့ ရုပ်ရှင်သရုပ်ဆောင်တွေထဲက ရုပ်ရှင်သရုပ်ဆောင်နှင့် ဒါရိုက်တာ လူမင်း နေအိမ်ကိုပြန်ရောက်နေပြီလို့  ရုပ်ရှင်လောကသားတစ်ဦးက YMG  ကို အတည်ပြုပြောဆိုပါတယ်။

“ကိုလူမင်း အိမ်ကိုပြန်ရောက်နေပြီလို့ သူ့ဆွေမျိုးသားချင်းတစ်ဦးက ပြောပါတယ်” လို့ အဲဒီသူက ပြောပါတယ်။

ရုပ်ရှင်သရုပ်ဆောင်ဇနီးမောင်နှံ ပြေတီဦးနှင့် အိန္ဒြာကျော်ဇင်တို့လည်း နေအိမ်တွေပြန်ရောက်ခဲ့ကြပြီးဖြစ်ပါတယ်။

နစကက အနုပညာရှင်တွေဖြစ်ကြတဲ့ ပိုင်တံခွန်၊လူမင်း၊ပြေတီဦး၊အိန္ဒြာကျော်ဇင်တို့ကို သူတို့ကျခံစရာရှိတဲ့ ပြစ်ဒဏ်တွေကို လွတ်ငြိမ်းချမ်းသာခွင့်ပြုလိုက်ပြီး Blogger ဝင်းမင်းသန်းကို သူမကျခံဖို့ရှိတဲ့ ပြစ်ဒဏ်တွေထဲက ရာဇသတ်ကြီးပုဒ်မ၅၀၅-က ဖြင့် ကျခံရန်ရှိတဲ့ ပြစ်ဒဏ်တွေကို လွတ်ငြိမ်းခွင့်ပြုခဲ့ကြောင်းနှင့်ဒါရိုက်တာဝိုင်းကိုတော့ သူ့အပေါ်အရေးယူထားတဲ့ ပြစ်မှုကို ပိတ်သိမ်းပေးခဲ့တယ်လို့ နစကရဲ့ သတင်းထုတ်ပြန်ချက်အရသိရပါတယ်။

#LocalNews
Published - 2 March 2022

မြန်မာနိုင်ငံနွေကာလဖြစ်တဲ့ မတ်လနဲ့ ဧပြီလများအတွင်း နေ့အပူချိန်များ တဖြည်းဖြည်းမြင့်တက်လာရာမှ မိုးတိမ်တောင်များဖြစ်ပေါ်နိုင်ပြီး လေပြင်းတိုက်ခတ်မှုများလည်းရှိနိုင်တာကြောင့် ပြည်တွင်းလေကြောင်း၊ ရေကြောင်းခရီးစဉ်တွေအနေနဲ့ သတိပြုဖိ့် မိုး/ဇလ ထုတ်ပြန်လိုက်ပါတယ်။

မိုးတိမ်တောင်များ ရွေ့လျားရာနေရာတစ်လျှောက်တွင် လေပြင်းတိုက်ခတ်တာ၊ လေပြင်းနဲ့အတူ ထစ်ချုန်းတာ၊ မိုးကြိုးပစ်တာ၊ လျှပ်စီးလက်တာ၊ မိုးသီးကြွေတာနဲ့ နေရာကွက်ကျား မိုးထစ်ချုန်းရွာတာ စတဲ့ မိုးလေဝသဖြစ်စဉ်တွေ ဖြစ်ပေါ်နိုင်ပါတယ်။

လေပြင်းတိုက်ခတ်စဉ် မြေပြင်/ ရေပြင် လေဟာ တစ်နာရီ ၃၅ မိုင်မှ မိုင် ၄၀ အထိ တိုက်ခတ်နိုင်တယ်လို့ မိုးလေဝသနှင့် ဇလဗေဒညွှန်ကြားမှုဦးစီးဌာနက ကြေညာထားပါတယ်။

ပြည်သူများအနေနဲ့ နွေကာလဖြစ်တဲ့ မတ်လနဲ့ ဧပြီလများအတွင်းဖြစ်ပေါ်လာနိုင်တဲ့ မိုးလေဝသဖြစ်စဉ်နဲ့ ပတ်သက်ပြီး အထူးဂရုပြုနေထိုင်သွားကြဖို့ သတိပေးထုတ်ပြန်ထားပါတယ်။

နောက်နှစ်ရက်အတွက် ခန့်မှန်းချက်အနေနဲ့ တနင်္သာရီတိုင်းဒေသကြီးမှာ နေရာကွက်ကျား မိုးထစ်ချုန်းရွားနိုင်ကာ နေပြည်တော်နဲ့ အနီးတစ်ဝိုက် အများအားဖြင့် သာယာမယ်၊ ရန်ကုန်မြို့နဲ့အနီးတစ်ဝိုက် တိမ်အသင့်အတင့်ဖြစ်ထွန်းမှာဖြစ်ပြီး မန္တလေးမြို့နဲ့အနီးတစ်ဝိုက်မှာ အများအားဖြင့်သာယာမယ်လို့ သိရပါတယ်။

ymg/ei
#Yangon_Media_Group

Published 2 March 2022

နစကက ပြစ်ဒဏ်လွတ်ငြိမ်းခွင့်ဖြင့် ပြန်လွှတ်ပေးခဲ့တဲ့ ရုပ်ရှင်သရုပ်ဆောင် ပြေတီဦးနှင့် အိန္ဒြာကျော်ဇင်တို့ ဇနီးမောင်နှံသူတို့နေထိုင်ရာအိမ်ကိုပြန်ရောက်ရှိနေပြီလို့ သူတို့နှင့် စကားပြောဆိုခဲ့တဲ့ ရုပ်ရှင်လောကမှ အနုပညာရှင်တစ်ဦးကYMG  ကို အတည်ပြုပြောဆိုပါတယ်။

နစကက အနုပညာရှင်တွေဖြစ်ကြတဲ့ ပိုင်တံခွန်၊လူမင်း၊ပြေတီဦး၊အိန္ဒြာကျော်ဇင်တို့ကို သူတို့ကျခံစရာရှိတဲ့ ပြစ်ဒဏ်တွေကို လွတ်ငြိမ်းချမ်းသာခွင့်ပြုလိုက်ပြီး Blogger ဝင်းမင်းသန်းကို သူမကျခံဖို့ရှိတဲ့ ပြစ်ဒဏ်တွေထဲက ရာဇသတ်ကြီးပုဒ်မ၅၀၅-က ဖြင့် ကျခံရန်ရှိတဲ့ ပြစ်ဒဏ်တွေကို လွတ်ငြိမ်းခွင့်ပြုခဲ့ကြောင်းနှင့်ဒါရိုက်တာဝိုင်းကိုတော့ သူ့အပေါ်အရေးယူထားတဲ့ ပြစ်မှုကို ပိတ်သိမ်းပေးခဲ့တယ်လို့ နစကရဲ့ သတင်းထုတ်ပြန်ချက်အရသိရပါတယ်။

#LocalNews
Published - 2 Mar 2022

နေအိမ်တွင်း၌ အိပ်နေသူအား ဓါးဖြင့်ထိုးပြီး လုပ်ကြံသတ်ဖြတ်ခဲ့မှု မုံရွာမြို့မှာဖြစ်ပွားခဲ့တယ်လို့ သိရပါတယ်။

"သူက အိမ်ထဲမှာအိပ်နေတာလို့ပြောတယ်။ သူ့အမျိုးသမီးက ကလေးတွေကို စာသွားသင်တဲ့ အချိန်မှာဖြစ်သွားတာ။ သူတို့အိမ်မှာ ဘယ်သူ့မှမရှိဘူး။ သူ့အမျိုးသမီးက နေ့ခင်းပိုင်းလောက်ကသွားတာလို့ပြောတယ်။ သူကတော့ အိပ်နေရင်း အိမ်မှာကျန်ခဲ့တာလို့ပြောတယ်။ ညနေကျ ကျွန်တော်တို့အဖွဲ့ကို လှမ်းဖုန်းဆက်တော့ ကျွန်တော်တို့ သွားတယ်။ ကျွန်တော်တို့ရောက်တော့ ဓါးနဲ့အထိုးခံထားရတာတွေ့တယ်၊ လည်ပင်းကို တစ်ချက်ထဲထိုးထားတာ။ ကျွန်တော်တို့ရောက်တော့ သူကသေဆုံးနေပြီ။

ဘယ်သူလုပ်သွားမှန်းတော့မသိဘူး။ လူမရှိတဲ့အချိန်မှာ ထိုးသွားတာဆိုတော့ ကျွန်တော်တို့အဖွဲ့က သေဆုံးသူကို မုံရွာဆေးရုံကို ကူညီပို့ဆောင်ပေးခဲ့ပါတယ်။"လို့ မြန်မာနိုင်ငံ လူမှုကယ်ဆယ်ရေးအဖွဲ့ (မုံရွာမြို့)၏ ဥက္ကဌဖြစ်သူ ဦးစိန်ကိုကို က ပြောပြခဲ့ပါတယ်။

အဆိုပါ ဖြစ်စဥ်ဟာ ( မတ်လ ၁ ရက်) နေ့က ဖြစ်ပွားခဲ့ခြင်းဖြစ်ပြီး ဓါးထိုးခံရမှုကြောင့် သေဆုံးခဲ့သူဟာ မုံရွာမြို့တောင်ရပ်ကွက်တွင်နေထိုင်သူ အမျိုးသားတစ်ဦးဖြစ်တယ်လို့ သိရပါတယ်။

၄င်းဟာ မကြာသေးမီကာလအတွင်းက စင်ကာပူနိုင်ငံတွင် အလုပ်လုပ်ကိုင်ပြီး ပြန်လာသူတစ်ဦးဖြစ်တယ်လို့လည်း ဒေသခံတွေရဲ့ပြောပြမှုအရ သိရပါတယ်။

ယခုလို မည်သည့်အကြောင်းကြောင့် လုပ်ကြံသတ်ဖြတ်ခဲ့ရသည်ကိုတော့ တိတိကျကျမသိရှိရသေးပါဘူး။

"အချို့ကျတော့လည်း ဒလန်တို့ ဘာတို့ ကြေညာတယ်။ ဒလန်ဖြစ်နေလို့ ဘာလို့ ပေါ့၊ အခုက ဘာမှလည်း မ ကြေညာဘူး၊ မလုပ်ကြဘူး။ အခုလို ဖြစ်သွားတယ်ပေါ့။ သူကလည်း နိုင်ငံခြားက ပြန်လာတာမကြာသေးဘူး။စင်ကာပူဘက်က ပြန်လာတယ်လို့သိရတယ်။"ဟု ဦးစိန်ကိုကို က ဆက်လက်ပြောပြခဲ့ပါတယ်။

ဓါတ်ပုံ - မြန်မာနိုင်ငံ လူမှုကယ်ဆယ်ရေးအဖွဲ့ (မုံရွာမြို့)

ymg/kg
#Yangon_Media_Group

#LocalNews
Published - 2 Mar 2022

ရှမ်းပြည်နယ် ( မြောက်ပိုင်း)၊ ကျောက်မဲမြို့ ၊ နားခေါ်ရွာရှိ ဒက်ပါခမ်းရေတံခွန်အနီးတွင် မြေမြှုပ်မိုင်း ပေါက်ကွဲမှု ကြောင့် ဒေသခံပြည်သူနှစ်ဦး အပြင်းအထန် ဒဏ်ရာရရှိခဲ့တယ်လို့ သိရပါတယ်။

အဆိုပါဖြစ်စဥ်ဟာ ယမန်နေ့( မတ်လ ၁ ရက်) နေ့က ဖြစ်ပွားခဲ့ခြင်းဖြစ်ပါတယ်။

"ရေတံခွန်နားမှာ မိုင်း ၂ ယောက်ထိသွားတယ်။မနေ့က ကျွန်တော်တို့အသင်းက သွားကောက်ရတာပါ။ သူတို့က ငါးရှာသွားကြတယ်လို့ ပြောတယ်။ အဲ့နေရာတွေက ဟိုတလောက တိုက်ပွဲအကြီးအကျယ်ဖြစ်တဲ့နေရာတွေပါ၊ တိုက်ပွဲဖြစ်ခဲ့တဲ့နေရာတွေဆိုတော့ တော်တော်လေး မိုင်းအန္တရာယ်ရှိတာပေါ့။ ဒေသခံတွေအနေနဲ့ တောထဲတောင်ထဲသွားရင် အတော်လေးဂရုစိုက်ရမယ့်အနေအထားပါ။ တိုက်ပွဲတွေဖြစ်ထားတဲ့နေရာက သိတဲ့အတိုင်းပဲလေ၊ တော်တော်လေး ဂရုစိုက်သွားရမှာပေါ့ ။ ပြောရရင် မြေမြှုပ်မိုင်းက အတော်လေးကြောက်နေရတယ်။"လို့ ကျောက်မဲမြို့ ဒေသခံတစ်ဦး က ပြောပြခဲ့ပါတယ်။

အဆိုပါ ဒဏ်ရာရ မိုင်းထိလူနာ(၂)ဦးအား ကျောက်မဲပြည်သူ့ဆေးရုံ(OPT)သို့ ဒေသခံ နမ့်ခုံးရှမ်းများပရဟိတအသင်းမှ ကူညီပို့ဆောင်ပေးခဲ့ရတယ်လို့လည်း သိရပါတယ်။

"တစ်ယောက်ကတော့ ဒဏ်ရာအတော်လေးပြင်းတယ်။ သူ့ခြေထောက်က လုံးဝပြတ်သွားတယ်။ စိုးရိမ်ရတဲ့ အနေအထားပါ။"လို့ ၄င်းက ဆက်လက်ပြောပြခဲ့ပါတယ်။

ရှမ်းပြည်နယ် ( မြောက်ပိုင်း)၊ ကျောက်မဲမြို့အနီးတစ်ဝိုက်တွင် ပြီးခဲ့တဲ့လပိုင်းတွေအတွင်းက တိုင်းရင်းသားလက်နက်ကိုင်အဖွဲ့တွေအကြား ထိတွေ့တိုက်ပွဲများပြင်းထန်စွာဖြစ်ပွားခဲ့တာလည်း ဖြစ်ပါတယ်။

Photo - CJ

ymg/kg
#Yangon_Media_Group

#WorldHealth
Published- 02 March 2022

အမေရိကန်မှာ နှာခေါင်းစည်းတပ်ဆင်ခြင်း၊ ခပ်ခွာခွာနေထိုင်ခြင်းစတဲ့ ကိုရိုနာဗိုင်းရပ်စ်ထိန်းချုပ်ကန့်သတ်ချက်တွေကို သိပ်ပြီးမလိုအပ်တော့ကြောင်း အမေရိကန်ရောဂါထိန်းချုပ်ကာကွယ်ရေးစင်တာ (CDC)က ဖေဖော်ဝါရီ ၂၅ ရက်နေ့က စည်းမျဉ်းတွေပြောင်းလဲသတ်မှတ်ခဲ့ပါတယ်။

အလားတူ ပြည်နယ်အများစုမှာလည်း ရောဂါကာကွယ်ရေးလုပ်ဆောင်မှုတွေ ဖြေလျှော့ဖို့ စီစဉ်လာကြတာဖြစ်ပါတယ်။ဒါပေမဲ့ တိုင်းပြည်မျှော်လင့်ချက်တိုးတက်လာရေးနဲ့ ပုံမှန်အတိုင်းပြန်လည်နေထိုင်နိုင်ဖို့ အလျင်လိုနေမှုက အမေရိကန်ပြည်သူ့ကျန်းမာရေးကျွမ်းကျင်သူတွေ စိုးရိမ်နေရတဲ့ကိစ္စဖြစ်ကာ အိုမီခရွန်ကူးစက်မှုပြီးဆုံးခြင်းကို ကပ်ရောဂါကြီးအဆုံးသတ်ခြင်းမျိုး ယူဆလို့ မရနိုင်ကြောင်း သတိပေးလိုက်ပါတယ်။

"အခြေအနေတွေက တိုးတက်လာနေပေမယ့် လက်လွတ်စပယ်နေထိုင်လို့ တော့ မဖြစ်သေးပါဘူး" လို့ ဂျော့ဂျ်ဝါရှင်တန်တက္ကသိုလ်မှ ဒေါက်တာ'လင်းအာရ်ဂိုးလ်မန်း'က ဆိုပါတယ်။

မျိုးဗီဇကွဲအသစ်တွေ ပေါ်ထွက်နိုင်ဆဲဖြစ်ပြီး နိုင်ငံရဲ့ကျန်းမာရေးစောင့်ရှောက်မှုစနစ်က နောက်ထပ်ကူးစက်မှုတွေအတွက် အဆင်သင့်ရှိမနေဘဲ CDC ရဲ့လမ်းညွှန်ချက်အသစ်တွေက ကပ်ရောဂါအခြေအနေနဲ့ လမ်းလွဲသွားနိုင်ပါတယ်လို့ ဒေါက်တာ'ဂိုးလ်မန်း'က ထောက်ပြထားပါတယ်။

ပြီးခဲ့တဲ့ ၁၄ ရက်အတွင်း အမေရိကန်မှာ နေ့စဉ်ကိုရိုနာဗိုင်းရပ်စ်ကူးစက်မှုနှုန်း ၆၃ ရာခိုင်နှုန်းကျဆင်းခဲ့ကာ ဆေးရုံတက်ကုသခံယူရမှုနဲ့ အသက်သေဆုံးမှုတို့မှာလည်း ကျဆင်းလာခဲ့ကြောင်း နယူးယော့ခ်တိုင်းမ်စ်မှ ဖော်ပြထားပါတယ်။

CDC ရဲ့လမ်းညွှန်ချက်ပြောင်းလဲမှုတွေကြောင့် အမေရိကန်နိုင်ငံသား ၇၀ ရာခိုင်နှုန်းလောက်က နှာခေါင်းစည်းတပ်ဆင်ခြင်းတွေ၊ ခပ်ခွာခွာနေထိုင်ခြင်းတွေ၊ လူစုလူဝေးရှောင်ကြဉ်ခြင်းတွေ မပြုလုပ်တော့ဘဲနေသွားနိုင်တယ်လို့ ယူဆလို့ရပါတယ်။

CDC ရဲ့လမ်းညွှန်ချက်အသစ်တွေက သင့်တော်မှုရှိပေမယ့် ဖြစ်မလာသေးတဲ့ကပ်ရောဂါအခြေအနေတွေကို ထည့်သွင်းတွက်ချက်ထားခြင်းမရှိဘူးလို့ ကျွမ်းကျင်ပညာရှင်အများအပြားက စိုးရိမ်ပူပန်နေကြပါတယ်။

အမေရိကန်ဆေးဘက်ဆိုင်ရာအဖွဲ့ အစည်းမှ ဥက္ကဌဖြစ်သူ ဒေါက်တာ'ဂျရဲအီးဟာမွန်'က လမ်းညွှန်ချက်အသစ်နဲ့ပတ်သက်ပြီး တုန့်ပြန်ပြောကြားရာမှာ သူကတော့ လူများရာနေရာတွေမှာ နှာခေါင်းစည်းတပ်ဆင်သွားဦးမှာဖြစ်ကြောင်း၊ အမေရိကန်နိုင်ငံသားအားလုံးကိုလည်း သူ့လိုမျိုးနေထိုင်ဖို့ တိုက်တွန်းကြောင်း ပြောဆိုသွားပါတယ်။

အမေရိကန်ပြည်နယ်များဖြစ်တဲ့ အီလီနွိက်စ်၊ ကွန်နက်တီကတ်၊ နယူးယော့ခ်တိုအပါအဝင် ပြည်နယ်အများအပြားမှာ နှာခေါင်းစည်းမဖြစ်မနေတပ်ဆင်ခြင်းကို အဆုံးသတ်ဖယ်ရှားဖို့ ပြုလုပ်နေကြပြီဖြစ်ပါတယ်။

ကိုလိုရာဒိုပြည်နယ်မှ အုပ်ရေးမှူး'ဂျဲရတ်ပေါလစ်'က "ဗိုင်းရပ်စ်က ရှိနေဆဲဖြစ်ပြီး တသက်လုံးရှိနေတာလဲ ဖြစ်ချင်ဖြစ်နိုင်ပါတယ်။ ဒါပေမဲ့ ကိုဗစ်ကာကွယ်ဆေးအပြည့်ထိုးထားတဲ့ ကိုလိုရာဒိုကပြည်သူတွေအနေနဲ့ ရောဂါကိုကြောက်စရာမလိုဘဲ လွတ်လွတ်လပ်လပ်နေထိုင်နိုင်တဲ့ အနေအထားဖြစ်သင့်နေပါပြီ" လို့ ပြောကြားသွားပါတယ်။
Source: The Straits Times

#LocalNews
Published - 2 March 2022

ပြေတီဦး၊ အိန္ဒြာကျော်ဇင်၊ လူမင်း၊ ပိုင်တံခွန်၊ ဒါရိုက်တာဝိုင်းနှင့် မဝင်းမင်းသန်း တို့ ၆ ဦးနှင့် မလေးရှားနိုင်ငံသားတစ်ဦးတို့ကို ယနေ့ မတ်လ ၂ ရက်တွင် ပြန်လွှတ်မည်ဖြစ်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းကပြောသည်။

"ပုဒ်မ ၅၀၅-က နဲ့ထောင်ဒဏ်သုံးနှစ်စီ ချမှတ်ခံထားရတဲ့ အကယ်ဒမီ ပြေတီဦး၊ အိန္ဒြာကျော်ဇင်၊ သရုပ်ဆောင်လူမင်း၊ ပိုင်တံခွန်၊ မဝင်းမင်းသန်းနဲ့ မကြာသေးခင်က ဖမ်းဆီးခံထားရတဲ့ ဒါရိုက်တာဝိုင်း စုစုပေါင်း ၆ ယောက်ကို လွှတ်မယ်။ခံဝန်နဲ့ပေါ့။နောက်ပြီးတော့ မလေးရှားနိုင်ငံသားတစ်ယောက်လည်း ပါမယ်"ဟု ဗိုလ်ချုပ်ဇော်မင်းထွန်းက YMG ကို ပြောသည်။

ယင်းတို့အား မည်သည့် အထိမ်းအမှတ်အဖြစ် လွတ်ငြိမ်းပေးသည်ကို မသိရသော်လည်း ယနေ့ မတ်လ ၂ ရက် မှာ တောင်သူလယ်သမားနေ့ ဖြစ်ကြောင်း သိရသည်။

ymg/mt
Yangon_Media_Group