#Local_News
Published_ 12 July 2022

မြန်မာနိုင်ငံရင်းနှီးမြှုပ်နှံမှုကော်မရှင်၏ (၃/ ၂၀၂၂) ကြိမ်မြောက်အစည်းအဝေးကို ဇူလိုင် ၁၁ ရက် နံနက်ပိုင်းတွင် နေပြည်တော်ရှိ ပြည်ထောင်စုအစိုးရအဖွဲ့ရုံး၌ကျင်းပရာ အစည်းအဝေးတွင် ဆောင်ရွက်ဆဲ ရင်းနှီးမြှုပ်နှံမှုလုပ်ငန်း(၁၁)ခု၏ မတည်ငွေရင်း တိုးမြှင့်ခြင်းအပါအဝင် စက်မှုကဏ္ဍ၊ ဝန်ဆောင်မှုကဏ္ဍ၊ စိုက်ပျိုးမွေးမြူရေးကဏ္ဍနှင့် လျှပ်စစ်နှင့် စွမ်းအင်ကဏ္ဍတို့မှ ရင်းနှီးမြှုပ်နှံမှုလုပ်ငန်းသစ် (၁၉) ခုကို ခွင့်ပြုပေးခဲ့ကြောင်း သိရပါတယ်။

လုပ်ငန်းများရဲ့ ရင်းနှီးမြှုပ်နှံမှုပမာဏမှာ အမေရိကန်ဒေါ်လာ ၈၀၇ ဒသမ ၁၅၅ သန်းနှင့် ငွေကျပ် ၃၂၁,၉၄၈ ဒသမ ၇၅၂ သန်းဖြစ်ပြီး ပြည်တွင်းအလုပ်အကိုင် အခွင့်အလမ်းပေါင်း ၃,၁၀၀ ကျော်ကို ဖန်တီးပေးနိုင်မှာ ဖြစ်ပါတယ်။

အဆိုပါ အစည်းအဝေးသို့ မြန်မာနိုင်ငံရင်းနှီးမြှုပ်နှံမှုကော်မရှင် ဥက္ကဋ္ဌ ဒုတိယ ဗိုလ်ချုပ်ကြီးမိုးမြင့်ထွန်းနှင့် ကော်မရှင်အဖွဲ့ဝင်များ တက်ရောက်ခဲ့ကြပါတယ်။

ခွင့်ပြုခဲ့သောလုပ်ငန်းများတွင် ပြန်လည်ပြည့်ဖြိုးမြဲစွမ်းအင် အမျိုးအစားဖြစ်သည့် နေရောင်ခြည်စွမ်းအင်သုံး ဓာတ်အားပေးရုံတည်ဆောက်၍ လျှပ်စစ်ဓာတ်အား ထုတ်လုပ်ခြင်းလုပ်ငန်း (၅) ခုလည်းပါဝင်ကြောင်း သိရပါတယ်။

၂၀၂၂-၂၀၂၃ ဘဏ္ဍာရေးနှစ်အတွက် ယနေ့အချိန်အထိ မြန်မာနိုင်ငံရင်းနှီးမြှုပ်နှံမှု ဥပဒေအရ နိုင်ငံခြားရင်းနှီးမြှုပ်နှံမှုလုပ်ငန်းပေါင်း (၂၀) က စုစုပေါင်း အမေရိကန်ဒေါ်လာ ၈၂၉ ဒသမ ၁၄၆ သန်းဖြင့်လည်းကောင်း၊ မြန်မာနိုင်ငံသားရင်းနှီးမြှုပ်နှံမှုလုပ်ငန်း(၂၁)ခုက စုစုပေါင်းငွေကျပ် ၃၅၀,၉၄၇ ဒသမ ၃၄၇ သန်းဖြင့်လည်းကောင်း ရင်းနှီးမြှုပ်နှံမှုများ ပြုလုပ်လျက်ရှိကြပြီး အဆိုပါလုပ်ငန်းများမှ အလုပ်အကိုင်ခွင့်အလမ်းပေါင်း ၁၃,၀၀၀ ကျော်ကို ဖန်တီးပေးနိုင်ခဲ့ကြောင်း သတင်းရရှိပါတယ်။

ymg-mnn
#Yangon_Media_Group

Published 12 July 2022

ဂျပန်ဝန်ကြီးချုပ်ဟောင်း ရှင်ဇို အာဘေးရဲ့ရုပ်အလောင်းကို တင်ဆောင်လာတဲ့ နိဗ္ဇာန်ယာဉ်ဟာ ဇူလိုင် ၁၂ရက်က ဂျပန်ဝန်ကြီးချုပ်ရုံးအပြင်ဘက်မှာ  အလေးအမြတ်ပြုဖို့အတွက်  ခေတ္တရပ်ပေးခဲ့ပါတယ်။ ဂျပန်နိုင်ငံဝန်ကြီးချုပ် ဖူမီယိုကီရှီဒါနှင့် အဆင့်မြင့်အစိုးရအရာရှိကြီးတွေက သူတို့ရဲ့ ဝန်ကြီးချုပ်ဟောင်း အာဘေးရဲ့ ရုပ်ကလပ်ကို လက်အုပ်ချီကန်တော့ပြီး အလေးအမြတ်ပြုခဲ့ကြပါတယ်။

အာဘေးဟာ နာယာမြို့မှာ သေနတ်သမာတစ်ဦးရဲ့ အနီးကပ်ပစ်ခတ်လုပ်ကြံမှုကြောင့်ကွယ်လွန်ခဲ့ရတာဖြစ်ပါတယ်။

ဝန်ကြီးချုပ်ရုံးက အလံတိုင်မှာလည်း ဂျပန်နိုင်ငံတော်အလံကို ဝမ်းနည်းခြင်းအထိမ်းအမှတ် တိုင်တစ်ဝက်လွှင့်ထူထားပါတယ်။

ဒီကနေ့ ဇူလိုင် ၁၂ ရက်မှာ ဝန်ကြီးချုပ်ဟောင်း အာဘေးရဲ့ ဈာပနကို မိသားစုသီးသန့် ပြုလုပ်မှာဖြစ်ပြီး ဂျပန်တစ်နိုင်ငံလုံးက ပြည်သူတွေက ကွယ်လွန်သူ ခေါင်းဆောင်ဟောင်းအတွက် ကြေကွဲဝမ်းနည်းနေကြပါတယ်။

Source AFP

#Japan_Former_PM_Abe_Funeral

#Shinzo_Abe_Funeral

#Japan_Poliitcs

#ရှင်ဇိုအာဘေး

#Local_News
Published 12 July 2022

ရှမ်းပြည်နယ်(အရှေ့ပိုင်း)၊ တာချီလိတ်မြို့၊ မိုင်းဖုန်း(က)ကျေးရွာအုပ်စု ၊ ဝမ်ပုံဆိပ်ကမ်းတွင် လာအိုနိုင်ငံမှ နေရပ်ပြန်မြန်မာရွှေ့ပြောင်းအလုပ်သမား အမျိုးသား အမျိုးသမီး စုစုပေါင်း (၂၆၉)ဦးကို မြန်မာတာဝန်ရှိသူများက ယမန်နေ့က လက်ခံခဲ့ကြပါတယ်။

အဆိုပါနေရပ်ပြန်များကို လာအိုနိုင်ငံ၌ ကိုဗစ်- ၁၉ ရောဂါ ကာကွယ်ဆေး ( ၂)ကြိမ်ထိုးပြီးကြောင်း အထောက်အထားကဒ် တင်ပြနိုင်သူများကို ကျန်းမာရေးစစ်ဆေး၍ ၎င်းတို့၏နေရပ်သို့ နေ့ချင်းပြန်လည်ပို့ဆောင်ပေးခဲ့ပြီး ကာကွယ်ဆေးထိုးနှံပြီးသော်လည်း အထောက်အထား ကဒ်မပြနိုင်ခဲ့သူများကိုပိုမိုစိတ်ချလုံခြုံစေရန် ကျန်းမာရေးစစ်ဆေးမှုကိုပြုလုပ်ပြီး စံလင်းဖြိုး Quarantine Center တွင်(၃) ရက်ထားရှိကာ ကျန်းမာရေးစစ်ဆေးမှု(၂)ကြိမ်ပြုလုပ်မည်ဖြစ်ကြောင်း၊ရောဂါကူးစက်မှုကင်းစင်ကြောင်း အတည်ပြုချက်အဖြေထွက်ရှိမှသာလျင်နေရပ်သို့ ပြန်လည်ပို့ဆောင်ပေးမည်ဖြစ်ကြောင်း သိရှိရပါတယ်။

ထို့နောက် ရွေ့ပြောင်းမြန်မာအလုပ်သမားများကို မြို့နယ်ကိုဗစ်ကော်မတီ ဥက္ကဋ္ဌ ဦးတင်ဦးကျော်နှင့် ခရိုင်/မြို့နယ် ကြက်ခြေနီကြီးကြပ်မှုကော်မတီမှ တကိုယ်ရည်သုံး ပစ္စည်းဖြစ်သော ဆပ်ပြာခဲ၊ဆပ်ပြာမှုန့်၊ဆပ်ပြာခွက်၊စပရေးလက်ဆေးရည်၊နှာခေါင်းစည်း( face mask)တို့ကို ထောက်ပံ့ပေးခဲ့ကြပြီး မော်တော်ယာဉ်များဖြင့် စံလင်းဖြိုး Quarantine Center သို့ ပို့ဆောင်ခဲ့ကြကြောင်းသိရှိရပါတယ်။

ymg/ys-tcl
#Yangon_Media_Group

#Local_News
Published_ 12 July 2022

ကချင်ပြည်နယ်၊ မိုးညှင်းမြို့နယ်တွင် ငွေကျပ်သိန်း ၅,၆၀၀ ကျော်တန်ဖိုးရှိ ဘိန်းဖြူ ၁၆ ဒသမ ၇၂ ကီလိုနှင့် ဘိန်းစိမ်း ၁၂၅ ကီလို ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဇူလိုင် ၉ ရက် မွန်းတည့် ၁၂ နာရီတွင် ကချင်ပြည်နယ်၊ မိုးညှင်းမြို့နယ်၊ နန့်စီးအောင် ပူးပေါင်းစစ်ဆေးရေးဂိတ်တွင် မန္တလေးမှ ဟိုပင်ဘက်သို့ စိုင်းသူရကျော် မောင်းနှင်လာသော ၁၂ ဘီး မော်တော်ယာဉ်ကို သတင်းအရရှာဖွေခဲ့ပါတယ်။

ယာဉ်ပေါ်တွင် ဘိလပ်မြေအိတ်များဖြင့် ဖုံးအုပ်သယ်ဆောင်လာသည့် ဒေသကာလတန်ဖိုး ငွေကျပ်သိန်း ၅,၆၀၀ ကျော်တန်ဖိုးရှိ ဘိန်းဖြူ ၁၆ ဒသမ ၇၂ ကီလို၊ ဘိန်းစိမ်း ၁၂၅ ကီလို သိမ်းဆည်းရမိခဲ့ပါတယ်။

ကွင်းဆက်ဖော်ထုတ်ချက်အရ ညနေ ၆ နာရီခွဲတွင် မိုးညှင်းမြို့နယ်၊ ဟိုပင်မြို့၊ ရွာသစ်ကြီးကျေးရွာအနီးတွင် မူးယစ်ဆေးဝါးများသယ်ဆောင်ရာ၌ ပူးပေါင်းပါဝင်သူ ဇော်ဇော်စိုး(ခ)ဖိုးလုံးအား ထပ်မံဖမ်းဆီးရမိခဲ့ပါတယ်။

စစ်ဆေးဖော်ထုတ်ချက်အရ သိမ်းဆည်းရမိ မူးယစ်ဆေးဝါးများအားရှမ်းပြည်နယ် (တောင်ပိုင်း)မှ ကချင်ပြည်နယ်သို့ သယ်ဆောင်ခြင်းဖြစ်ကြောင်းသိရှိရသဖြင့် ၎င်းတို့အား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေး ဖော်ထုတ်လျက်ရှိကြောင်း သတင်းရရှိပါတယ်။

ymg-mnn
#Yangon_Media_Group

#Local_News
Published_ 12 July 2022

လက်ရှိတွင်မြန်မာနိုင်ငံတွင် လူဦးရေမှာ ၅၅ သန်းကျော်ရှိပြီး အမျိုးသမီးဦးရေမှာ အမျိုးသားဦးရေထက် ၂ သန်းကျော်ပိုများပြီး အမျိုးသမီးတစ်ဦးသည် ယေဘုယျအားဖြင့် ကလေး(၂)ယောက်နှုန်းခန့်သာ မွေးဖွားနေခြင်းဖြစ်၍ မြန်မာနိုင်ငံ၏ ကလေးမွေးနှုန်းသည် မိဘနှစ်ပါးကို ပြန်လည်အစားထိုးသည့် Replacement level fertility သို့ရောက်ရှိနေပြီ ဖြစ်တယ်လို့ ၂၀၂၂ ခုနှစ် ကမ္ဘာ့လူဦးရေနေ့ အထိမ်းအမှတ်အခမ်းအနားတွင် ဗဟိုသန်းခေါင်စာရင်းကော်မရှင် နာယက၊ နစကဒုတိယဥက္ကဋ္ဌ ဒုတိယဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်းက ပြောကြားခဲ့ပါတယ်။

မြန်မာနိုင်ငံအနေဖြင့် ၂၀၆၀ ပြည့်နှစ် နောက်ပိုင်းတွင် သက်ကြီးရွယ်အိုများပြားပြီး လုပ်သားအင်အား ရှားပါးတဲ့ ပြဿနာကို ရင်ဆိုင်ကြရမည့် အခြေအနေရှိလာမှာဖြစ်တဲ့အတွက် လူမှုကာကွယ်စောင့်ရှောက်ရေး စနစ်အားကောင်းလာစေရန် ကြိုတင်ပြင်ဆင်ထားကြရမှာဖြစ်တယ်လို့ ဆိုပါတယ်။

ယခင်ဆယ်စုနှစ်များက ကလေးမွေးနှုန်းမြင့်မားခဲ့ခြင်း၏ အကျိုးဆက်အဖြစ် လက်ရှိအချိန်တွင် အလုပ်လုပ်နိုင်သည့် လူငယ်လူရွယ်အင်အား များပြားနေခြင်းကြောင့် လူဦးရေဆုလာဘ်ရရှိနေချိန်ဖြစ်ပါတယ်။

မွေးဖွားနှုန်းကျဆင်းခြင်းသည် မြန်မာနိုင်ငံ၏ နေရာဒေသအားလုံး၊ မတူညီသော အုပ်စုများအားလုံးအတွင်းတစ်ပြေးညီ ကျဆင်းနေခြင်းမဟုတ်ဘဲ မညီမျှမှုများ ဖြစ်ပေါ်နေဆဲဖြစ်ပြီး ဒေသအချို့၊ အုပ်စုအချို့တွင် မွေးဖွားနှုန်းမြင့်မားခြင်းနှင့် အတူမိခင် သေဆုံးနှုန်း၊ ကလေးသေဆုံးနှုန်းများ မြင့်မားနေဆဲဖြစ်ပါတယ်။

အမျိုးသမီးများ၏ အလုပ်လုပ်ကိုင်မှုနှင့်ပတ်သက်၍ ၂၀၁၉ ကြားဖြတ်လူဦးရေ သန်းခေါင်စာရင်းအရ အမျိုးသမီးဦးရေ(၁၀၀)တွင် (၅၂)ဦးခန့်သာ အလုပ်လုပ်နေခြင်းဖြစ်၍ နိုင်ငံ၏စီးပွားရေးဖွံ့ဖြိုးတိုးတက်မှုအတွက် အမျိုးသမီးများ၏ လုပ်အားကို အပြည့်အဝအသုံးမချနိုင်သေးဘဲ အမျိုးသမီးများ၏ စွမ်းဆောင်ရည် မြှင့်တင်နိုင်ရန် အမျိုးသမီးများ လုပ်ငန်းခွင်ဝင်ရောက်နိုင်ရေး အခွင့်လမ်းများကို ဖန်တီးပေး ကြရမယ်လို့ ပြောကြားခဲ့ပါတယ်။

ymg-mnn
#Yangon_Media_Group

#WorldAstronomy
Published 12 July 2022

ဇူလိုင် ၁၁ ရက်နေ့ တနင်္လာနေ့က အိမ်ဖြူတော်မှာဆွေးနွေးပွဲတစ်ခုပြုလုပ်ရာ အမေရိကန်သမ္မတ'ဂျိုးဘိုင်ဒန်'က နာဆာနဲ့ နက္ခတ္တဗေဒပညာရှင်တွေရဲ့ စကြဝဠာရှိ အနက်ရှိင်းဆုံးမြင်ကွင်းပုံရိပ်တွေကို ထုတ်ဖော်ပြသခဲ့ပါတယ်။

ကမ္ဘာ့အကြီးဆုံး အာကာသအဝေးကြည့်မှန်ပြောင်းဖြစ်တဲ့ ဂျိမ်းစ်ဝက်ဘ်အာကာသတယ်လီစကုပ်နဲ့ ရိုက်ကူးထားတဲ့ပုံရိပ်ထဲမှာ အာကာသကောင်းကင်ပြင်ကြီးမှ သေးငယ်စွာမြင်ရတဲ့ဂလက်ဆီတွေကို ပိုမိုထင်ရှားစွာမြင်တွေ့လာရပုံကို ဖော်ပြထားပါတယ်။

အဆိုပါတယ်လီစကုပ်နဲ့ ပုံရိပ်တွေရိုက်ကူးနိုင်ခဲ့တဲ့အတွက် နာဆာကို သမ္မတက ချီးကျူးစကားဆိုခဲ့ပါတယ်။

"ဘယ်သူမှမမြင်ဖူးတာတွေကို ငါတို့မြင်နိုင်မယ့်အလားအလာတွေရှိနေတယ်၊ ဘယ်သူမှမရောက်ဖူးတဲ့နေရာတွေကို ငါတို့ရောက်နိုင်တော့မယ်" လို့ ဆိုခဲ့ပါတယ်။

'ဘိုင်ဒန်'ရဲ့ကြေညာချက်က အင်္ဂါနေ့မနက်မှာပြသမယ့် အာကာသတယ်လီစကုပ်ပုံရိပ်ပြပွဲအတွက် အကြိုတင်ဆက်မှုဖြစ်ခဲ့ပြီး အဲဒီပွဲမှာ သိပ္ပံပညာရှင်တွေက လွန်ခဲ့တဲ့ ၆ လအတွင်း ဂျိမ်းစ်ဝက်ဘ်ရှာဖွေလေ့လာမှုတွေကို ဖော်ပြသွားမှာဖြစ်ပါတယ်။

စားနပ်ရိက္ခာနဲ့ လောင်စာဆီဈေးနှုန်းများမြင့်တက်လာခြင်းနဲ့အတူ လက်နက်ထိန်းချုပ်ရေး၊ ကိုယ်ဝန်ဖျက်ချခွင့်ရရှိရေးကိစ္စရပ်တွေမှာ သမ္မတရဲ့လုပ်ကိုင်နိုင်စွမ်းကို မေးခွန်းထုတ်လာကြပြီး အသိအမှတ်ပြုမှုလျော့ကျလာတဲ့အချိန်မှာ ဒီလိုမျိုးပုံရိပ်တွေကို ပြသခွင့်ရရှိခြင်းဖြင့် အမေရိကန်တွေကြား ဂုဏ်သိက္ခာပြန်လည်အဖတ်ဆယ်နိုင်ဖွယ်ရှိနေပါတယ်။

ဝက်ဘ်တယ်လီစကုပ်ရဲ့ ရည်ရွယ်ချက်တစ်ခုက စကြဝဠာစတင်ပေါ်ပေါက်ခြင်းသီအိုရီတွေ့ရှိပြီး နှစ်ပေါင်း ၁၄ ဘီလီယံပြီးနောက် စကြဝဠာရယ်လို့ဖြစ်ပေါ်လာစေတဲ့ ပထမဆုံးဂြိုဟ်တွေ ဂလက်ဆီတွေကို လေ့လာရန်ဖြစ်ပါတယ်။

ဖော်ပြခဲ့တဲ့ပုံရိပ်က သိပ်ပြီးမသိသာပေမယ့် တယ်လီစကုပ်ရဲ့သိပ္ပံနည်းကျနည်းပညာတွေကနေ နောက်ထပ်တွေ့ရှိလာနိုင်တာတွေကို အထောက်အထားပြုနိုင်မှာဖြစ်ပါတယ်။

လာမယ့်နှစ်တွေမှာ တယ်လီစကုပ်ကသာ နောက်ထပ်အချက်အလက်တွေရရှိမယ်ဆိုရင် အရင်ကမမြင်ဖူးတဲ့ စကြဝဠာအစွန်အဖျားနေရာတွေကိုပါ သိရှိနိုင်တော့မှာဖြစ်ကြောင်း ယေးလ်တက္ကသိုလ်မှ အာကာသပညာရှင်'ပရီယမ်ဗာဒါနာတာရာဂျန်'က ဆိုခဲ့ပါတယ်။

နာဆာကိုဦးဆောင်ဖို့ရွေးချယ်ခံရတဲ့ ဖလော်ရီဒါအမတ်ဟောင်း'ဘီလ်နယ်လ်ဆန်'က တယ်လီစကုပ်ရဲ့အလားအလာနဲ့ပတ်သက်ပြီး ဘာမေးရမှန်းမသိသေးတဲ့မေးခွန်းတွေကိုတောင် ဖြေရှင်းနိုင်တော့မှာဖြစ်တယ်လို့ ပြောပြခဲ့ပါတယ်။

သောကြာနေ့မှာ ဝက်ဘ်ကရိုက်ကူးခဲ့တဲ့အရာ ၅ မျိုးရှိခဲ့ပြီး အိမ်ဖြူတော်မှာတော့ 'ဘိုင်ဒန်'က တစ်မျိုးတည်းကိုသာ ပြသခဲ့ပါတယ်။

ထိုပုံရိပ်ကို SMACS 0723 လို့အမည်ပေးထားပြီး ကမ္ဘာ့တောင်ဘက်ခြမ်းမှမြင်ရတဲ့ ကောင်းကင်ပြင်တစ်ခုဖြစ်ပါတယ်။

နက္ခတ္တဗေဒပညာရှင်တွေက အာကာသတယ်လီစကုပ်နဲ့ကြည့်ရှုရာမှာ အလင်းနှစ် ၄ ဘီလီယံလောက်ကွာဝေးတဲ့ ဂလက်ဆီအစုအဝေးကြီးတစ်ခုဖြစ်ပါတယ်။

ဒီပုံရိပ်က အနက်ရှိင်းဆုံးမြင်ရတဲ့ အနေအထားမဟုတ်ပေမယ့် ထိုတယ်လီစကုပ်ရဲ့အရည်အသွေးကို မြင်သာစေပါတယ်။

နောက်ထပ်တွေ့ခဲ့ရတဲ့ပုံတွေကိုတော့ အင်္ဂါနေ့စင်္ကာပူစံတော်ချိန်ည ၁၀ နာရီခွဲမှာ နာဆာတီဗီနဲ့ ယူကျူ့ဘ်တို့ကနေ တိုက်ရိုက်ပြသသွားမှာဖြစ်ပါတယ်။

Source: The Straits Times
#Yangon_Media_Group

#LocalNews
Published _ 12 July 2022

လက်ရှိတွင် YBS ယာဉ်များ၌ ကတ်စနစ်ဖြင့်ယာဉ်စီးခပေးချေနိုင်မည့် YPS Card ပေါင်း ၁၃၅၀၀၀ ကျော်ကို ခရီးသွားပြည်သူများထံ ရောင်းချထားပြီးဖြစ်သော်လည်း အသုံးပြုနေသော YPS Card အရေအတွက်မှာ ၅၀၀၀၀ ကျော်သာရှိကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေး ကြီးကြပ်မှုကော်မတီ(YRTC)က သိရသည်။

ယင်းကြောင့် YBS ယာဉ်စီးခများကို ကတ်စနစ်ဖြင့် ပေးချေနိုင်ရေးအတွက် ခရီးသွားပြည်သူများအားအသိပညာပေးခြင်းနှင့် YBS ယာဉ်များ ကို စစ်ဆေးကြပ်မတ်ခြင်းလုပ်ငန်းများ တိုးမြှင့်လုပ်ဆောင်သွားမည်ဖြစ်ကြောင်း ယင်း၏ တာဝန်ရှိသူကပြောသည်။

လက်ရှိတွင် အများပိုင် ကုမ္ပဏီ ၁၀ ခုလက် အောက်ရှိ YBS ယာဉ်လိုင်းပေါင်း ၅၆ လိုင်း မှ ယာဉ်အစီးရေ ၂၀၀၀ ခန့်တွင် Yangon Payment Services (YPS) စက်များ အသုံးပြုနိုင်စေရန် တပ်ဆင်ဆောင်ရွက်ထားပြီဖြစ်သည့်အပြင် နောက်ထပ် YPS စက်အလုံးရေ ၄၀၀၀ ခန့်ကိုလည်း တပ်ဆင်ရန် အဆင်သင့်ရှိနေပြီဖြစ်ပြီး မတပ်ဆင်ရသေးသော YBS ယာဉ်များတွင်လည်း YPS စက်များ တပ်ဆင်အသုံးပြုလာစေရန် လုပ်ဆောင်မည်ဟုဆိုသည်။

Yangon Payment Services (YPS) စက်များ တပ်ဆင်ပြီးသော YBS ယာဉ်များတွင် YPS စက်များ ပိတ်ထားခြင်းမရှိစေရန်လည်း YRTC မှ ယာဉ်စည်းကမ်းထိန်းသိမ်းရေးအဖွဲ့များက စစ်ဆေးကြပ်မတ်နေပြီး YPS ကတ်များကို ခရီး သွား ပြည်သူများတွင်ကျယ်စွာ အသုံးပြုနိုင်စေရန်နှင့် YPS စက်ပိတ်ထားသော မော်တော်ယာဉ်များစာရင်းကိုလည်း သက်ဆိုင်ရာ ယာဉ်လိုင်းကုမ္ပဏီများထံသို့ သုံးရက်တစ်ကြိမ်ပေးပို့ရန် အကြောင်းကြားထားကြောင်း သိရသည်။

#ymg/NN
#Yangon_Media_Group

#LocalNews
Published _ 12 July 2022

ကျန်းမာရေးဝန်ကြီးဌာနမှ ဇွန်လ ၃၀ ရက်တွင် ကိုဗစ်-၁၉ ရောဂါပိုးတွေ့ရှိသူများအနက် ကိုဗစ်-၁၉ မျိုးရိုးဗီဇပြောင်းရောဂါပိုးတွေ့ရှိနိုင်သည့် သံသယဓာတ်ခွဲနမူနာ (၁၆) ခုအား ဆေးသုတေသနဦးစီးဌာန (Department of Medical Research)တွင် စစ်ဆေးခဲ့သည်။

ယင်းသို့ စစ်ဆေးရာ (အိုမီခရွန်)မျိုးရိုးဗီဇပြောင်းရောဂါပိုး (BA.4) ရောဂါကူးစက်ခံထားရသူ တစ်ဦးနှင့် (BA.5) ရောဂါကူးစက်ခံထားရသူ ၅ ဦးတို့အား တွေ့ရှိခဲ့ရသည်ဟု ဇူလိုင်လ ၁၁ ရက်ကထုတ်ပြန်ခဲ့သည်။

ရောဂါပိုးတွေ့ရှိသူများသည် ပြည်ပနိုင်ငံများမှ မြန်မာနိုင်ငံသို့ပြန်လည်ရောက်ရှိလာသည့် မြန်မာနိုင်ငံသားများဖြစ်ကာ ကိုဗစ်-၁၉ ရောဂါပိုး ဓာတ်ခွဲအတည်ပြုစဉ်ကပင် သတ်မှတ်ရက်အတိုင်း သီးခြားထားရှိကုသမှုပေးခဲ့ပြီး ကျန်းမာရေးကောင်းမွန်လျက်ရှိသည်ဟု ထုတ်ပြန်ချက်အရ သိရသည်။

နိုင်ငံတကာလေ့လာတွေ့ရှိချက်များအရ (အိုမီခရွန်)မျိုးရိုးဗီဇပြောင်းရောဂါပိုးများသည် ကိုဗစ်-၁၉ ရောဂါကာကွယ်ဆေး အကြိမ်ပြည့်ထိုးနှံပြီးသူများတွင် ရောဂါလက္ခဏာပြင်းထန်မှုနှင့် သေဆုံးမှုလျော့နည်းကြောင်း တွေ့ရှိရသည်ဟု ကျန်းမာရေးဝန်ကြီးဌာနမှထုတ်ပြန်ခဲ့သည်။

ယင်းသို့ ကျန်းမာရေးဝန်ကြီးဌာနမှ ကိုဗစ်-၁၉ ရောဂါမျိုးရိုးဗီဇပြောင်းရောဂါပိုးစောင့်ကြပ်ကြည့်ရှုခြင်းနှင့် ကိုဗစ်-၁၉ရောဂါ ကာကွယ်၊ ထိန်းချုပ်၊ ကုသခြင်းလုပ်ငန်းများအား ပိုမိုအရှိန်မြှင့် ဆောင်ရွက်လျက်ရှိသည်။

ကျန်းမာရေးဝန်ကြီးဌာနမှ ကိုဗစ်(၁၉) ရောဂါမျိုး ရိုးဗီဇပြောင်းရောဂါပိုးစောင့်ကြပ်ကြည့်ရှုခြင်းလုပ်ငန်းများအား မြန်မာနိုင်ငံသို့ ပြည်ပနိုင်ငံများမှနိုင်ငံတကာပုံမှန်လေကြောင်းခရီးစဉ် (Commercial Fight)နှင့် ကယ်ဆယ်ရေးလေယာဉ် (Relief Flight)များ၊ နယ်စပ်ဝင်ထွက်ဂိတ်များမှတစ်ဆင့်ဝင်ရောက်လာသူများထံမှ ဓာတ်ခွဲနမူနာရယူ၍ ဓာတ်ခွဲစစ်ဆေးလျက်ရှိသည်။

#ymg/NN
#Yangon_Media_Group

#WorldHealth
Published 12July 2022

အူလမ်းကြောင်းရောဂါရဲ့ အစောပိုင်းလက္ခဏာများကို လူတစ်ယောက်ရဲ့မျက်လုံးတွေကနေ ရှာဖွေတွေ့ရှိနိုင်ဖွယ်ရှိနေပါတယ်။

မျက်လုံးပြဿနာရှိနေတဲ့သူတွေဟာ အူလမ်းကြောင်းရောင်ရမ်းခြင်းရောဂါတွေဖြစ်နိုင်ချေ ၂ ဆလောက်ရှိနေကြောင်း ဘာမင်ဂမ်တက္ကသိုလ်မှပညာရှင်များက ဆိုပါတယ်။

ဒီလိုအခြေအနေကြုံတွေ့နေရသူတွေဟာ မျက်လုံးရောင်ရမ်းခြင်းကြောင့် အမြင်ဝါးခြင်း၊ မျက်လုံးယားယံခြင်း၊ မျက်စိအပူလောင်ခြင်းနဲ့ အမြင်ကွယ်ခြင်းတို့အထိပါ ဖြစ်နိုင်ချေရှိနေပါတယ်။

မျက်လုံးပြဿနာတွေက အူလမ်းကြောင်းရောဂါဖြစ်နိုင်မယ့် အစောပိုင်းလက္ခဏာတွေလားဆိုတာကိုသိရဖို့ သုတေသီတွေက လူနာပေါင်း ၂ သိန်းနီးပါးကိုကြည့်ရှုလေ့လာခဲ့ပါတယ်။

ဒီအခြေအနေ ၂ ခုကြားဆက်စပ်မှုကို သေချာမသိရသေးပေမယ့် မျိုးရိုးဗီဇကလည်း ပါဝင်ပတ်သက်နေမယ်လို့ ယူဆရပါတယ်။

သိုင်းရွိက်ဂလင်းသိပ်ပြီးအလုပ်မလုပ်နိုင်တာက မှတ်ဉာဏ်ချို့တဲ့ခြင်းရောဂါဖြစ်နိုင်ချေကို မြင့်တက်စေပါတယ်။

လည်ပင်းမှာရှိတဲ့ လိပ်ပြာပုံသဏ္ဍာန်သိုင်းရွိက်ဂလင်းဟာ ခန္ဓာကိုယ်တွင်းဇီဝဖြစ်စဉ်များနဲ့ ကိုယ်အပူချိန်ထိန်းညှိခြင်းတို့အတွက် အရေးပါတဲ့ဟော်မုန်းတွေကို ထုတ်လွှတ်ပေးပါတယ်။

ဗြိတိန်လူမျိုး ၁.၄ သန်းလောက်ဟာ သိုင်းရွိက်အလုပ်သိပ်မလုပ်တာမျိုးတွေ့ရတာကြောင့် ဟော်မုန်းလုံလောက်စွာမထုတ်လုပ်နိုင်ဘဲ ကိုယ်အလေးချိန်တက်ခြင်း၊ နှလုံးရောဂါဖြစ်ခြင်းစတဲ့ ကျန်းမာရေးပြဿနာများ ဖြစ်လာပါတော့တယ်။

သိုင်းရွိက်အလုပ်မလုပ်တဲ့ အသက် ၆၅ နှစ်နဲ့အထက်လူကြီးတွေဟာ သိုင်းရွိက်ပြဿနာမရှိတဲ့ ယင်းတို့နဲ့သက်တူရွယ်တူလူတွေနဲ့ယှဉ်ရင် မှတ်ဉာဏ်ချို့တဲ့ခြင်းမျိုးဖြစ်နိုင်ချေ ၈၀ ရာခိုင်နှုန်းလောက်ပိုများပါတယ်။

ဒါ့အပြင် ထိုပြဿနာအတွက် ဆေးကုသမှုခံယူနေရတဲ့လူတွေဟာ အခြားလူတွေထက်စာရင် မှတ်ဉာဏ်ချို့တဲ့ခြင်းဖြစ်နိုင်ချေ ၃ ဆပိုများနေကြောင်း Neurology ဂျာနယ်မှာ ဖော်ပြခဲ့ပါတယ်။

Source: DailyMail
#Yangon_Media_Group

#WorldTechnology
Published 12 July 2022

ကလေးတွေရဲ့အခြေအနေကိုစောင့်ကြည့်ပေးပြီး အရေးပေါ်ကိစ္စများနဲ့ ကလေးတွေရဲ့ ကြီးထွားဖွံ့ဖြိုးရေးပြဿနာများကို မိဘများထံအသိပေးနိုင်မယ့် ဉာဏ်ရည်တုစက်ပစ္စည်းတစ်ခုကို LittleOne.Care ကုမ္ပဏီက တီထွင်ထုတ်လုပ်နေပါတယ်။

ကလေးမွေးပြီးခါစအချိန်မှာတင်ပဲ ကလေးကိုအနှောင့်အယှက်မဖြစ်စေဘဲနဲ့ ကလေးအနှီးအဝတ်တွေမှာ ထိုစက်ပစ္စည်းကို တပ်ဆင်နိုင်ပါတယ်။

အဆိုပါစက်ပစ္စည်းက ကလေးတွေရဲ့အသံ၊ လှုပ်ရှားမှုတွေကို ဆန်းစစ်စောင့်ကြည့်သွားမှာဖြစ်ပြီး ကလေးရဲ့တစ်နေ့တာဖြတ်သန်းခဲ့သမျှကို ထုတ်နှုတ်အသိပေးသွားမှာပါ။

ရယ်မောခြင်း၊ ငိုယိုခြင်း၊ ဂီတသံကြားရာသို့ ရွေ့လျားခြင်း၊ တစ်ခုခုအားတုံ့ပြန်ခြင်းစတဲ့ ကလေးရဲ့ခံစားမှု၊ လှုပ်ရှားမှုများကို မှတ်တမ်းတစ်ခုအနေနဲ့ စုစည်းဖော်ပြသွားမှာဖြစ်ပါတယ်။

နေ့ကလေးထိန်းကျောင်းတွေမှာ သင့်တော်တဲ့စောင့်ရှောက်မှုမရရှိတဲ့အခါမျိုး၊ ကလေးတွေအနိုင်ကျင့်ခံရတာမျိုး စတဲ့အခြေအနေတွေကိုလည်း မိဘတွေအရေးပေါ်သိရှိနိုင်အောင် အသိပေးနိုင်ပါတယ်။

ပြီးခဲ့တဲ့နှစ်တုန်းက ကလေးတွေအနိုင်ကျင့်ခံရတဲ့သတင်းတွေထွက်လာတာကြောင့် ပိတ်သိမ်းလိုက်ရတဲ့ ကလေးထိန်းကျောင်းအများအပြားရှိခဲ့ပြီး ထိုစက်ပစ္စည်းဖြင့် ဒီလိုအခြေအနေတွေမှာ သိသိသာသာကူညီဆောင်ရွက်ပေးနိုင်မှာပါ။

အခြားအချက်ပေးမှုတွေထဲမှာတော့ ကလေးက တီဗီနဲ့ လက်ကိုင်ဖုန်းဖန်သားပြင်ကို အချိန်ကြာမြင့်စွာကြည့်မိနေတာမျိုး၊ ကားထဲမှာရှိပြီး မိဘတွေသွားလေ့မရှိတဲ့နေရာမျိုးမှာရှိနေခြင်း၊ စက်ပစ္စည်းဖယ်ရှားခံလိုက်တဲ့အခြေအနေမျိုးတွေ ပါဝင်ပါတယ်။

နောက်ထပ်အရေးပါတဲ့အချက်ကတော့ ကလေးကိုကားထဲမှာမေ့ပြီးထားခဲ့မိတဲ့ အခြေအနေမျိုးဖြစ်ပါတယ်။

ဒီလိုအဖြစ်အပျက်မျိုးကြောင့် နှစ်စဉ် ကလေးဒါဇင်နဲ့ချီပြီး သေဆုံးနေရပါတယ်။

အချက်အလက်တွေ ပြန်လည်တင်ပြခြင်းရဲ့ရည်ရွယ်ချက်က ကလေးတွေဘဝရဲ့ အရေးကြီးတဲ့ကြီးထွားဖွံ့ဖြိုးမှုအဆင့်ကာလတွေမှာ မိဘတွေကိုအကူအညီဖြစ်စေပြီး ကျန်းမာရေးဆေးဘက်ဆိုင်ရာအကြံဉာဏ်များ ပံ့ပိုးပေးနိုင်ရန်ဖြစ်ပါတယ်။

Source: The Jerusalem Post.
#Yangon_Media_Group

#AsiaArchaeology

Published 11 July 2022
တရုတ်နိုင်ငံမြောက်ပိုင်း ဟူဘေဒေသ ကျန်ကျာကော်မြို ရွှမ်ဟွာခရိုင်မှာ လတ်တလောကာလအတွင်း ဒိုင်နိုဆောခြေရာအများအပြား တွေ့ရှိခဲ့ရပြီး လွန်ခဲ့တဲ့နှစ်သန်းပေါင်း ၁၀၀ ကျော်က အစောဆုံးခြေရာများဖြစ်နိုင်ပါတယ်။

#Yangon_Media_Group