#LocalNews
Published _25 September 2022

ရန်ကုန်- မန္တလေးအမြန်လမ်းမကြီး မိုင်တိုင် (၂၁၇/ဝ) ဘေး အနောက်ဖက် ၂ ဖာလုံအကွာရှိ ငလိုက်ကြိုးဝိုင်းအတွင်း တည်ဆောက်ထားသော မြန်မာ့အရှည်ဆုံး တောတွင်းဖြတ်လျှောက်သစ်သားတံတား ကို လေ့လာလည်ပတ်နိုင်ပြီဖြစ်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန က သိရသည်။

အဆိုပါ ငလိုက်ကြိုးဝိုင်းမှာအကျယ်အဝန်း (၅၇၃)ဧက ကျယ်ဝန်းပြီး ဆင်စားကျက် ဧရိယာ (၂၈၈)ဧက ရှိကြောင်း၊တံတားကို ကျွန်းသစ်လုံးတိုင်ပေါင်း (၉၂၅)တိုင်ဖြင့် တည်ဆောက်ထားခြင်းဖြစ်ကြောင်းလည်း အဆိုပါဌာန၏ တာဝန်ရှိသူက ပြောသည်။

လာရောက်လည်ပတ်သူများအနေဖြင့် တံတားတစ်လျှောက် သက်ကြီးကျွန်းစိုက်ခင်း၊ အပူပိုင်းထင်ရှူးစိုက်ခင်း၊ ပိတောက်စိုက်ခင်းများ ၊ အထက်ရွက်ပြတ်ရောနှောတောခြောက်အတွင်း ဒေသမျိုးရင်းသစ်ပင်မျိုးများ၊ ဝါးမျိုးစိတ်များစွာ သဘာဝအလျောက် ရှင်သန်ပေါက်ရောက်နေမှုများကို လေ့လာနိုင်မည် ဖြစ်ကြောင်း သိရသည်။

ယင်းအပြင် တံတားအဆုံးရှိ ငလိုက်ဆည်ကန်ရေပြင်နှင့် သဘာဝဝါးရိပ် ရှုခင်းများကို အပန်းဖြေခံစားနိုင်မည်ဖြစ်ကာ ဆင်သမားဟင်းလျာများကို ဝယ်ယူစားသောက်နိုင်မည့် စားသောက်ဆိုင်များကိုလည်း ဖွင့်လှစ်ထားရှိကြောင်း၊ပြသထားသည့် ဆင်ပြတိုက်အတွင်း ဆင်အကြောင်း ဗဟုသုတများ၊သစ်စိုက်ခင်းများကိုလည်း လေ့လာနိုင်မည်ဖြစ်ကြောင်း အဆိုပါ တာဝန်ရှိသူက ဆိုသည်။

"ဆင်စာကျွေးတာ၊ တောတွင်း ခရီးတို၊ ခရီးရှည်ကို ဆင်စီးပြီး သွားတာတွေလည်း လုပ်နိုင်တယ်"ဟု ယင်းတာဝန်ရှိသူက ရှင်းပြသည်။

လက်ရှိတွင်ယင်းကြိုးဝိုင်းအတွင်း ဆင်အကောင်ရေ (၂၀)ကို ထိန်းသိမ်းစောင့်ရှောက် မွေးမြူထားကြောင်းလည်း ငလိုက်စခန်းသာ ဆင်ထိန်းသိမ်းစောင့်ရှောက်ရေးစခန်း၏ စာရင်းများအရ သိရသည်။

ymg/mt
#Yangon_Media_Group

Published 25 Sept 2022

လေယာဉ်မောင်တစ်ဦးကို ကိုယ်ထိလက်ရောက်ကျူးလွန်ခဲ့တယ်ဆိုတဲ့ စွပ်စွဲချက်နှင့် ပြီးခဲ့တဲ့ ဗုဒ္ဓဟူးနေ့က လော့အိန်ဂျလီ နိုင်ငံတကာလေဆိပ်မှာ  အမျိုးသားတစ်ဦးကို ဖမ်းဆီးထိန်းသိမ်းခဲ့ပါတယ်။ အဲဒီလေယာဉ်ဟာ မက္ကဆီကိုက ပျံသန်းလာတဲ့ အမေရိကန်လေကြောင်းပိုင်လေယာဉ်ဖြစ်ပါတယ်။

အသက် ၃၃နှစ်အရွယ်ရှိ အဲလက်ဇင်းဒါး တွန်ကူးလီဟာ လေယာဉ်မောင်တစ်ဦးရဲ့ ဦးခေါင်းအနောက်ဖက်ကို လက်သီးနှင့် ထိုး ခဲ့တဲ့ ဗွီဒီယိုဟာ ဆိုရှယ်မီဒီယတွေမှာ ပျံ့နှံ့ခဲ့ပါတယ်။ သူ့ကို ပြီးခဲ့တဲ့ ကြာသပတေးနေ့က တရားရုံးထုတ်ခဲ့ပါတယ်။

မက္ကဆီကိုနိုင်ငံ လော့စ်ကာဘို နိုင်ငံတကာလေဆိပ်မှ လေယာဉ်ထွက်ခွာပျံသန်းပြီး မိနစ် ၂၀အတွင်းမှာ လီဟာ  စိတ် အပြောင်းအလဲမြန်မြန်နှင့် စတင်လှုပ်ရှားခဲ့တာဖြစ်တယ်လို့ မျက်မြင်တွေကပြောကြပါတယ်။ သူဟာ သူ့ခုံကနေ ထပြီး လျှောက်သွားလမ်းသလားနေခဲ့ပါတယ်။ ပြီးတော့ လေယာဉ်အမှုထမ်းတွေကို ရုန့်ရင်းကြမ်းတမ်းစွာပြုမှုခြိမ်းခြောက်ခဲ့ ပါတယ်။  အဲဒီနောက်သူဟာ လေယာဉ်အမှုထမ်းတွေက တိုင်လို့ သူဆီလာပြီး အကြိုးအကြောင်းပြောဖို့ကြိုးစားတဲ့ လေယာဉ်မောင်တစ်ဦးကို ဘာမပြော ညာမပြောဘဲနှင့် လက်သီးနှင့်ထထိုးခဲ့တာတွေကို ဗွီဒီယိုမှာ တွေ့နိုင်ပါတယ်။

လီကို လေဆိပ်မှာ လေယာဉ်ဆိုက်ဆိုက်ချင်း အက်ဖ်ဘီအိုင်က ဖမ်းဆီးထိန်းသိမ်းခဲ့ပါတယ်။ဘာဖြစ်လို့လဲဆိုတော့ ဒီဖြစ်ရပ်ဟာ လေပေါ်မှာဖြစ်ပွားခဲ့တာဖြစ်ပြီး လေယာဉ်အမှုထမ်းတစ်ဦးကို နှောက်ယှယက်တဲ့ ဖက်ဒရယ်ပြစ်မှုမြောက်လို့ ဖြစ်ပါတယ်။

လီကို နောင်မှာ အမေရိကန်လေကြောင်းကိုစီးနင်းဖို့ ပိတ်ပင်လိုက်တယ်လို့  လေကြောင်းလိုင်းက သတင်းထုတ်ပြန်ပါတယ်။

လော့အိန်ဂျလိရောက်သည်အထိ သူ့ကို ထိန်းသိမ်းပေးခဲ့တဲ့ လေယာဉ်အမှုထမ်းတွေနှင့် ခရီးသည်တွေကို ကျေးဇူးတင် တယ်လို့လည်း လေကြောင်းလိုင်းက ပြောပါတယ်။

ရုပ်သံကြည့်ရန်

https://t.me/yangonmediagroup/3983

Source: Insider

#American_Airlines

#Alexander_Tung_Cuu_Le

#Punching_a_flight_attendant

Published 25 Sept 2022

မြန်မာနိုင်ငံတွင် ခရိုင်များတိုးချဲ့ဖွဲ့စည်းခဲ့ပြီးနောက် ခရိုင်အချို့တွင် ခရိုင်တရားရုံးများ  ဖွင့်လှစ်ခွင့်ပြုတဲ့ အမိန့်တွေကို  ပြည်ထောင်စုတရားလွှတ်တော်ချုပ်က ၂၀၂၂ခုနှစ် ဩဂုတ်လ(၁၇)ရက် ရက်စွဲဖြင့် ထုတ်ပြန်ပေးခဲ့ ကြောင်းသိရှိရပါတယ်။

အဲဒီအမိန့်များအရ အောက်ပါအတိုင်း  ခရိုင်တရားရုံး (၂၆ )ရုံးကို  တိုးချဲ့ခွင့်ပြုလိုက်တာဖြစ်ပါတယ်။

(၁) ကချင်ပြည်နယ်

               (က)တနိုင်းခရိုင်တရားရုံး

               (ခ) ချီဖွေခရိုင်တရားရုံး

(၂) ကယားပြည်နယ်

               (က) ဒီးမော့ဆို ခရိုင်တရားရုံး

                (ခ) မယ်စဲ ခရိုင်တရားရုံး

(၃)ကရင်ပြည်နယ်

            (က)ကြာအင်းဆိပ်ကြီး ခရိုင်တရားရုံး

            (ခ) သံတောင်ကြီး ခရိုင်တရားရုံး

(၄)ချင်းပြည်နယ်

            (က) တီးတိန် ခရိုင်တရားရုံး

            (ခ) ပလက်ဝ ခရိုင်တရားရုံး

(၅)စစ်ကိုင်းတိုင်းဒေသကြီး

            (က) ရေဦီး ခရိုင်တရားရုံး

            (ခ) ဟုမ္မလင်း ခရိုင်တရားရုံး

            (ဂ) ကောလင်း ခရိုင်တရားရုံး

(၆) တနင်္သာရီတိုင်းဒေသကြီး

            (က) ဘုတ်ပြင်းခရိုင်တရားရုံး

(၇) ပဲခူးတိုင်းဒေသကြီး

            (က) ညောင်လေးပင် ခရိုင်တရားရုံး

            (ခ) နတ်တလင်း ခရိုင်တရားရုံး

(၈) မကွေးတိုင်းဒေသကြီး

            (က) ချောက် ခရိုင်တရားရုံး

            (ခ) အောင်လံ ခရိုင်တရားရုံး

(၉) မန္တလေးတိုင်းဒေသကြီး

            (က)အမရပူရ ခရိုင်တရားရုံး

            (ခ) သပိတ်ကျင်း ခရိုင်တရားရုံး

            (ဂ) တံတားဦး ခရိုင်တရားရုံး

(၁၀) နေပြည်တော်

            (က) ဥတ္တရ ခရိုင်တရားရုံး

            (ခ) ဇေယျာသီရိ ခရိုင်တရားရုံး

            (ဂ) ပျဉ်းမနား ခရိုင်တရားရုံး

(၁၁) မွန်ပြည်နယ်

            (က) ရေး ခရိုင်တရားရုံး

            (ခ) ကျိုက်ထိုခရိုင်တရားရုံး

(၁၂) ရခိုင်ပြည်နယ်

            (က) အမ်း ခရိုင်တရားရုံး

            (ခ) တောင်ကုတ် ခရိုင်တရားရုံး

အဆိုပါအမိန့်ကြေညာစာများကို အမိန့်ကြေညာစာ အမှတ် ၅၄၃/၂၀၂၂ မှ ၅၅၅/၂၀၂၂ အထိဖြင့်  ပြည်ထောင်စု တရားသူကြီးချုပ် ဦးထွန်းထွန်းဦးက လက်မှတ်ရေးထိုး ထုတ်ပြန်ကြေညာခဲ့တာဖြစ်ပါတယ်။

အများစုဟာ တိုးချဲ့ဖွဲ့စည်းလိုက်တဲ့ ခရိုင်အသစ်များအတွက်ဖြစ်ကြပြီး ပြည်ထောင်စုအစိုးရအဖွဲ့က အဆိုပါခရိုင် တရားရုံးတွေရဲ့ ဖွဲ့စည်းပုံကိုအတည်ပြုပေးခဲ့ပြီးနောက် ဖွင့်လှစ်ခွင့်အမိန့်ထုတ်ပြန်ခဲ့တာဖြစ်ပါတယ်။

#District_Courts_Myanmar

#ymg/-knl

#Local_News
Published 25 Sept 2022

မြန်မာနိုင်ငံနှင့် ရုရှားနိင်ငံ နှစ်နိုင်ငံအကြား ငါးလုပ်ငန်းနှင့် ရေထွက်ကုန်လုပ်ငန်းများ ပူးပေါင်းဆောင်ရွက်ရေး သဘောတူစာချုပ်တစ်ခုကို မကြာသေးမီက ရုရှားနိုင်ငံတွင် လက်မှတ်ရေးထိုးခဲ့ကြတယ်လို့ နစကရဲ့ သတင်းထုတ်ပြန်ချက်အရ သိရှိရပါတယ်။

စက်တင်ဘာ ၂၂ ရက်တွင် ကျင်းပတဲ့ အပြည်ပြည်ဆိုင်ရာ ငါးလုပ်ငန်းဖိုရမ်နှင့် ရေထွက်ကုန်ပြပွဲ၌ နစကရဲ့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာအောင်ကြီးနှင့် ရုရှားနိုင်ငံ Federal Fishery Agency of Russia အဖွဲ့အကြီးအကဲ Mr.Ilya Shestakov တို့က မြန်မာ- ရုရှားနှစ်နိုင်ငံအကြား ငါးလုပ်ငန်း ပူးပေါင်းဆောင်ရွက်မှု အကျိုးဖြစ်ထွန်းစေမည့်ကိစ္စများအပါအဝင် ရေထွက်ကုန် အကျိုးဖြစ်ထွန်းစေမည့် ကဏ္ဍတွင် နှစ်နိုင်ငံ ပူးပေါင်းဆောင်ရွက်ရေးဆိုင်ရာ သဘောတူစာချုပ်ကို လက်မှတ်ရေးထိုးခဲ့ကြတာဖြစ်ပါတယ်။

လက်မှတ်ရေးထိုးရာမှာ မြန်မာကိုယ်စားလှယ်အဖွဲ့ဝင်များဖြစ်ကြသော ငါးလုပ်ငန်းဦးစီးဌာန ညွှန်ကြားရေးမှူးချုပ် ဦးဝေလင်းမောင်၊ မြန်မာနိုင်ငံ ငါးလုပ်ငန်းအဖွဲ့ချုပ် အကြီးတန်းဒုတိယဥက္ကဋ္ဌ ဒေါက်တာတိုးနန္ဒာတင်၊ တနင်္သာရီတိုင်းဒေသကြီး ငါးလုပ်ငန်းအဖွဲ့ချုပ်ဥက္ကဋ္ဌ ဦးလှသန်းနှင့် ရေလုပ်ငန်းဆိုင်ရာ ပုဂ္ဂလိကလုပ်ငန်းရှင်များ တက်ရောက်ခဲ့ကြတယ်လို့ သတင်းထုတ်ပြန်ချက်မှာ ဖော်ပြထားပါတယ်။

သဘောတူစာချုပ်ထဲမှာ နှစ်နိုင်ငံအကြား ငါးလုပ်ငန်းနှင့် ဆက်စပ်သော ပင်လယ်ပြင် ငါးသယံဇာတတည်ရှိမှု အကဲဖြတ်ဆန်းစစ်ခြင်း၊ ငါးသယံဇာတ ထိန်းသိမ်းစောင့်ရှောက်ခြင်း၊ ပင်လယ်ပြင်၌ လှောင်အိမ်ဖြင့် ငါးမွေးမြူခြင်း၊ ပင်လယ်ပြင် ရေသယံဇာတ စီမံခန့်ခွဲမှု၊ တရားမဝင်ငါးဖမ်းဆီးမှု တိုက်ဖျက်ရေး၊ ငါးလုပ်ငန်းနှင့် ရေသတ္တဝါ မွေးမြူခြင်းဆိုင်ရာ သတင်းအချက်အလက်များ ဖလှယ်ရေး၊ ရေသတ္တဝါ မွေးမြူရေးလုပ်ငန်းဆိုင်ရာ သုတေသနအဖွဲ့အစည်းများအကြား ပူးပေါင်းဆောင်ရွက်မှု တိုးမြှင့်ခိုင်မာရေး၊ ငါးဖမ်းဆီးခြင်းလုပ်ငန်းအတွက် သင်တန်းများပေးခြင်း၊ ဆွေးနွေးခြင်းနှင့် အခြားသော ငါးလုပ်ငန်းဆိုင်ရာ ကဏ္ဍများ၌ အပြန်အလှန်စိတ်ဝင်စားသော နယ်ပယ်များတွင် ရေရှည်ဖွံ့ဖြိုးတိုးတက်ရန် ပူးပေါင်းဆောင်ရွက်ခြင်းလုပ်ငန်းတွေ ပါဝင်တယ်လို့ သိရှိရပါတယ်။

ဒုတိယဝန်ကြီး ဒေါက်တာအောင်ကြီးဦးဆောင်သည့် မြန်မာကိုယ်စားလှယ်အဖွဲ့ဟာ ရုရှားနိုင်ငံဖယ်ဒရယ် ငါးလုပ်ငန်းအေဂျင်စီ၏ အကြီးအကဲ Mr. Ilya Shestakov ၏ ဖိတ်ကြားချက်အရ စိန့်ပီတာစဘတ်မြို့ St. Petersburg Exhibition and Convention Center ၌ ကျင်းပလျက်ရှိတဲ့ (၅) ကြိမ်မြောက် အပြည်ပြည်ဆိုင်ရာ ငါးလုပ်ငန်းဖိုရမ်နှင့် ဆက်စပ်လုပ်ငန်းများဆိုင်ရာ ရေလုပ်ငန်းကုန်စည်ပြပွဲသို့ တက်ရောက်လျက်ရှိနေပါတယ်။

Source SAC’s Information

#ymg/knl-

#Myanmar_Russia

#Myanmar_Fishery_Sector

#Federal_Fishery_Agency_of_Russia

#Yangon_Media_Group

#World_Health
Published 25 September 2022

ကိုဗစ်-၁၉ ရောဂါကူးစက်ခံရပြီးနောက် နောက်ဆက်တွဲလက္ခဏာများခံစားရသူတွေဟာ နောက်တစ်နှစ်အကြာမှာ အလိုအလျောက်ကိုယ်ခံအားတုန့်ပြန်ရောဂါ (Autoimmune disease) ဖြစ်လာနိုင်ဖွယ်ရှိနေတယ်လို့ ဗန်ကူဗာ ဗြိတိသျှကိုလံဘီယာတက္ကသိုလ်နဲ့ မက်မာစတာတက္ကသိုလ်တို့မှ သုတေသီများက ဖော်ထုတ်လိုက်ပါတယ်။

အလိုအလျောက်ကိုယ်ခံအားတုန့်ပြန်ရောဂါဆိုတာဟာ ကိုယ်ခံအားစနစ်က ခန္ဓာကိုယ်တွင်းအစိတ်အပိုင်းများကို ကာကွယ်ရမယ့်အစား ကျန်းမာသန်စွမ်းနေတဲ့အင်္ဂါများကို မှားယွင်းပြီး တိုက်ခိုက်မိတဲ့ အခြေအနေဖြစ်ပါတယ်။

ကိုဗစ်နောက်ဆက်တွဲ လက္ခဏာခံစားနေရသူတွေရဲ့ သွေးနမူနာများကို ရယူခဲ့ရာ အလိုအလျောက်ကိုယ်ခံအား တုန့်ပြန်ရောဂါဖြစ်တဲ့လက္ခဏာတွေ မြင်တွေ့ခဲ့ရကြောင်း European Respiratory ဂျာနယ်မှာ ပြီးခဲ့တဲ့လက ဖော်ပြခဲ့ပါတယ်။

ကိုဗစ်နောက်ဆက်တွဲလက္ခဏာခံစားရသူတွေမှာ ပင်ပန်းနွမ်းနယ်ခြင်းနဲ့ အသက်ရှူမဝခြင်း လက္ခဏာများဖြစ်လေ့ရှိပါတယ်။

သွေးနမူနာတွေထဲက ပဋိပစ္စည်းတွေက နောက်ထပ်ဗိုင်းရပ်စ်တွေကို ကာကွယ်နိုင်လားဆိုတာကိုလည်း လေ့လာခဲ့ကြပါတယ်။

WHO အဖွဲ့အစည်းကတောင် ကိုဗစ်နောက်ဆက်တွဲလက္ခဏာတွေကို ကိစ္စတစ်ခုအဖြစ် ထည့်သွင်းလာပေမယ့် ဘာကြောင့်ဖြစ်ရတယ်၊ ဘယ်လိုကုသရမလဲဆိုတာကိုတော့ မသိကြသေးပါဘူး။

၂၀၂၀ ဩဂုတ်မှ ၂၀၂၁ စက်တင်ဘာအတွင်း ကိုဗစ်ကူးစက်ခံရသူ ၁၀၆ ဦးကို ခေါ်ယူခဲ့ပါတယ်။

လူနာတွေကို အဖွဲ့ ၃ ဖွဲ့ခွဲကာ ဗိုင်းရပ်စ်ကူးစက်ခံရခြင်းမှ သက်သာလာပြီးနောက် ၃ လ၊ ၆ လ၊ တစ်နှစ်အသီးသီးကြာတဲ့အချိန်မှာ အသက်ရှူမဝခြင်း၊ နွမ်းနယ်ခြင်းတို့ ခံစားရလာဆိုတာကို မေးမြန်းခဲ့ကြပါတယ်။

တစ်နှစ်ကြာပြီးနောက်မှာတော့ လူတဝက်ကျော်ကျော်လောက်ကပဲ စမ်းသပ်ခံဖို့ ပြန်လာခဲ့ကြပါတယ်။

ဒါဟာ မလာတဲ့လူတွေက သက်သာသွားကြတာကြောင့်လို့ သုတေသီများယူဆခဲ့ကြပါတယ်။

Source: The Jerusalem Post
#Yangon_Media_Group

#Local_News
Published 25 Sept 2022

မန္တလေးတိုင်းဒေသကြီး ပြင်ဦးလွင်မြို့နယ်တွင် ငွေကျပ် ၁ ဒသမ ၁ ဘီလီယံတန်ဖိုးရှိ ဘိန်းဖြူ ၄၄ ကီလို ဖမ်းဆီးရမိခဲ့တယ်လို့ မြန်မာနိုင်ငံရဲတပ်ဖွဲ့က သတင်းထုတ်ပြန်ပါတယ်။

မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့ ပူးပေါင်းအဖွဲ့သည် စက်တင်ဘာ ၂၂ ရက် မွန်းလွဲ ၁ နာရီက မန္တလေးတိုင်းဒေသကြီး ပြင်ဦးလွင်မြို့နယ် ပြင်ဦးလွင်-မန္တလေးသွားကားလမ်း အောင်ချမ်းသာကျေးရွာအနီးတွင် မိုးကုတ်မှ ပြင်ဦးလွင်ဘက်သို့ ထွန်းနိုင်ဦး(ခ)ထွန်းနိုင် မောင်းနှင်ပြီး လှမြင့်လိုက်ပါလာသည့် Canter ၆ ဘီး မော်တော်ယာဉ်ကို သတင်းအရရှာဖွေရာ ဒေသကာလတန်ဖိုးငွေကျပ် ၁ ဒသမ ၁ ဘီလီယံတန်ဖိုးရှိ ဘိန်းဖြူ ၄၄ ကီလို သိမ်းဆည်းရမိခဲ့တာဖြစ်တယ်လို့ သတင်းထုတ်ပြန်ချက်အရသိရပါတယ်။

ဖမ်းမိသူကို စစ်ဆေးချက်အရ မွန်းလွဲ ၂ နာရီတွင် ပြင်ဦးလွင်မြို့နယ် အောင်ချမ်းသာကျေးရွာတွင် ဘိန်းဖြူများသယ်ဆောင်ရာ၌ ပူးပေါင်းပါဝင်သူ မခင်အေးဝိုင်း (ခ)ခင်ဝိုင်းအား ထပ်မံဖမ်းဆီးရမိခဲ့ပါတယ်။ဖမ်းဆီးရမိသူများထံမှ စစ်ဆေးဖော်ထုတ်ချက်အရ သိမ်းဆည်းရမိဘိန်းဖြူတွေကို ရှမ်းပြည်နယ်(မြောက်ပိုင်း)မှ မန္တလေးတိုင်းဒေသကြီးသို့ သယ်ဆောင်ခြင်းဖြစ်ကြောင်း သိရှိရတဲ့အတွက် ထိုနှစ်ဦးအား ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများကို ဆက်လက်စစ်ဆေးဖော်ထုတ်လျက်ရှိတယ်လို့ ရဲတပ်ဖွဲ့က သတင်းထုတ်ပြန်ပါတယ်။

Ymg/knl-
#Yangon_Media_Group

#World_Science
Published 25 September 2022‌

ကမ္ဘာပေါ်မှာ ပုရွက်ဆိတ်ပေါင်း အနည်းဆုံး ၂၀ ကွာဒရီလီယံ (၁ ကွာဒရီလီယံ = ထရီလီယံ ၁ ထောင်) ရှိနိုင်ကြောင်း အမျိုးသားသိပ္ပံအကယ်ဒမီဂျာနယ်မှာ ဖော်ပြလိုက်ပါတယ်။

ဒီပမာဏဟာ အနည်းဆုံးတွက်ချက်ထားတာသာဖြစ်ပြီး သူတို့ရဲ့နေထိုင်မှုပုံစံပြောင်းလဲလာခြင်းရဲ့ အကျိုးဆက်တွေကိုလည်း တိုင်းတာနိုင်ဖို့ အရေးကြီးကြောင်း ဖော်ပြခဲ့ပါတယ်။

သိပ္ပံပညာရှင်များက ကွင်းပြင်မှာရှိတဲ့ ပုရွက်ဆိတ်အရေအတွက်တွေကို လေ့လာမှု ၄၆၅ ခုဖြင့် ခွဲခြမ်းစိတ်ဖြာခဲ့ပါတယ်။

အာဖရိကအလယ်ပိုင်းနဲ့ အာရှတိုလိုတိုက်ကြီးတွေက အချက်အလက်အလွန်နည်းပါးပေမယ့် တစ်ကမ္ဘာလုံးကတိုက်တွေကနေ စစ်တမ်းကောက်ယူခဲ့ပါတယ်။

အင်းဆက်မျိုးကွဲတွေရဲ့ တည်ရှိပုံကြီးကို နားလည်ဖို့ အဲဒီနေရာတွေမှာလည်း အချက်အလက်ရရှိဖို့ အလွန်အရေးကြီးကြောင်း ဖော်ပြထားပါတယ်။

ခန့်မှန်းချက်များအရ တစ်ကမ္ဘာလုံးမှာ ပုရွက်ဆိတ်တည်ရှိမှုက သိသိသာသာမြင့်မားဖွယ်ရှိနေပါတယ်။

ပုရွက်ဆိတ်မျိုးကွဲပေါင်း ၁၅,၇၀၀ လောက်ရဲ့ ၃ ပုံ ၂ ပုံနီးပါးခန့်ဟာ တစ်ကမ္ဘာလုံးမှာ တွေ့ရှိနေရပါတယ်။

ပတ်ဝန်းကျင်ဒေသပေါ်မူတည်ပြီး ပုရွက်ဆိတ်အရေအတွက်ကို ပေါင်းလိုက်ရင် သူတို့ရဲ့အလေးချိန်က ကာဗွန်အစိုင်အခဲ ၁၂ မက်ဂါတန်လောက်ရှိမယ်လို့ ယူဆနေကြပါတယ်။

သတ္တဝါများအပေါ် မှီခိုရသလို အမဲလိုက်ကောင်လည်းဖြစ်နိုင်တဲ့ ပုရွက်ဆိတ်တွေဟာ ဂေဟစနစ်လည်ပတ်မှုမှာ အရေးပါတဲ့ကဏ္ဍကနေ ပါဝင်နေပါတယ်။

Source: WION
#Yangon_Media_Group

Published 25 Sept 2022

မြောက်ကိုးရီးယားက ပဲ့ထိန်းဒုံးကျည်တစ်စင်းကို ယင်းရဲ့ အရှေ့ဖက်ကမ်းခြေပင်လယ်ထဲ ပစ်လွှတ်ခဲ့ပါတယ်။ ဒါဟာ   တောင်ကိုရီးယားနှင့် အမေရိကန်တပ်တွေ လေယာဉ်တင်သင်္ဘောကြီးတစ်စီးပါဝင်ပြီး စစ်ရေးပူးတွဲလေ့ကျင့်ခန်းလုပ်ဖို့ စီစဉ်ထားတာနှင့် အမေရိကန်ဒုသမ္မတ ကမ်မလာဟာရစ် ဒေသကို လာရောက်လည်ပတ်မယ့်ကိစ္စ မတိုင်ခင် ပစ်လွှတ် ခဲ့တာဖြစ်ပါတယ်။

အဲဒီပဲ့ထိန်းဒုံးကျည်ဟာ တာတိုပစ်ဒုံးကျည်တစ်စင်းဖြစ်ပြီး မြောက်ပြုံယမ်းပြည်နယ်ရဲ့ တေချွန်ဒေသအနီး  မနက်၇နာရီမတိုင်ခင်လေးတင် ပစ်လွှတ်တာလို့ တောင်ကိုရီးယားစစ်တပ်က ပြောပါတယ်။ ဒုံးကျည်ဟာ အမြင့် ၆၀ကီလိုမီတာကနေ ၃၇၃ မိုင်အထိ  အမြန်နှုန်း Mach 5 ပျံသန်းခဲ့တာလို့လည်း တောင်ကိုးရီးယားစစ်တပ်ဘက်က ပြောပါတယ်။

“ ကိုရီးယားကျွန်းဆယ်နှင့် နိုင်ငံတကာ အသိုက်အဝန်းရဲ့ ငြိမ်းချမ်းရေးနှင့်လုံခြုံရေးကို ခြိမ်းခြောက်ပြီး အလွန်ရန်လိုတဲ့ ဆောင်ရွက်မှုတစ်ခုအဖြစ် မြောက်ကိုးရီးယားဟာ ပဲ့ထိန်းဒုံးကျည်တစ်စင်း ပစ်လွှတ်ခဲ့တယ်” လို့ တောင်ကိုးရီးယား  Joint Chiefs of Staff က သတင်းထုတ်ပြန်ပါတယ်။

ပစ်လွှတ်ပြီးနောက် အခြေအနေတွေနှင့်ပတ်သက်လို့ တောင်ကိုးရီးယား Joint Chiefs of Staf ဥက္ကဋ္ဌ ကင်မ်ဆောင်ကျွန် နှင့် အမေရိကန်စစ်တပ် ကိုးရီးယားစစ်တိုင်းမှူး ပေါလာကင်မရာတို့ဟာ ဆွေးနွေးခဲ့ကြပြီး မြောက်ကိုးရီးယားရဲ့ ဘယ်လိုခြိမ်းခြောက်ရန်စမှုမျိုးကိုမဆို တုန့်ပြန်ဖို့ အဆင်သင့်ရှိကြောင်း ထပ်လောင်းအတည်ပြုခဲ့ကြတယ်လို့ပြောပါတယ်။

ဒီကိစ္စကို တောင်ကိုရီးယား အမျိုးသားလုံခြုံရေးကောငစီက အရေးပေါ်အစည်းတစ်ခုပြုလုပ်ရန်ရှိပြီး ဗြိတိန်၊အမေရိကန်နှင့် ကနေဒါနိုင်ငံတွေကိုလည်ပတ်ပြီး စနေနေ့ ညပိုင်းမှ ဆိုးလ်ကိုပြန်ရောက်လာတဲ့ တောင်ကိုရီးယားသမ္မတ ယွန်ဆတ်ယိုကို ဒုံးကျည်ပစ်လွှတ်မှု အစီရင်ခံဖို့ရှိတယ်လို့ သမ္မတရုံးကသတင်းထုတ်ပြန်ပါတယ်။

ဒုံးကျည်ဟာ  အမြင့်ဆုံး ၅၀ကီလိုမီတာအထိ ပုံမှန်မဟုတ်တဲ့လမ်းကြောင်းကနေပျံသန်းခဲ့တာဖြစ်ပြီး  ဂျပန်ရဲ့ အထူး စီးပွားရေး ဇုန်အပြင်ဖက်ကို ကျရောက်ခဲ့တယ်လို့ ဂျပန်ကာကွယ်ရေးဝန်ကြီး ယာဆူကာဇူဟာမာဒါက ပြောပါတယ်။  ဒါပေမယ့် သင်္ဘောတွေ လေယာဉ်တွေ ပြဿနာတစ်စုံတစ်ခုဖြစ်ခဲ့တယ်လို့တော့ သတင်းမကြားရဘူးလို့ သူကပြောပါတယ်။

အမေရိကန်တပ် အင်ဒိုပစိဖိတ်စစ်တိုင်းက ဒုံးကျည်ပစ်လွှတ်မှုကို သတိမူမိပြီး မဟာမိတ်တွေနှင့် အနီးကပ်တိုင်ပင်နေတယ်လို့ သတင်းထုတ်ပြန်ထားပါတယ်။

Source Reuters

#North_Korea

#Misssile_launch

#Indo_pacific

#Local_News
Published 25 Sept 2022

အိန္ဒိယနိုင်ငံအနေဖြင့် မြန်မာနိုင်ငံ၏ ပဲမျိုးစုံစိုက်ပျိုး ထုတ်လုပ်မှုလုပ်ငန်းများတွင် ရင်းနှီးမြှပ်နှံမှုများပြုလုပ်ကြဖို့ အိန္ဒိယနိုင်ငံပဲမျိုးစုံထုတ်လုပ်သည့် လုပ်ငန်းရှင်တွေကို မြန်မာနိုင်ငံက ဖိတ်ခေါ်ခဲ့ကြောင်းသိရပါတယ်။

အိန္ဒိယနိုင်ငံကို ရောက်ရှိခဲ့တဲ့ မြန်မာ နစက၊ စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးတင်ထွဋ်ဦး က စက်တင်ဘာ ၂၁ ရက်တွင် အိန္ဒိယနိုင်ငံ ပဲမျိုးစုံအသင်း India Pulses and Grains Association (IPGA) ၊ Overseas Agro Traders Association(OATA) နှင့် မွန်ဘိုင်းမြို့ Sofitel Hotel တွင် တွေ့ဆုံဆွေးနွေးရာတွင် ယခုလိုဖိတ်ခေါ်ခဲ့တာဖြစ်တယ်လို့ ဝန်ကြီးဌာနရဲ့ သတင်းထုတ်ပြန်ချက်အရ သိရပါတယ်။

အဆိုပါဆွေးနွေးပွဲတွင် အိန္ဒိယနိုင်ငံ ပဲမျိုးစုံအသင်း India Pulses and Grains Association (IPGA) ၊ Overseas Agro Traders Association(OATA) နှင့်အတူ မြန်မာနိုင်ငံ ပဲ၊ ပြောင်းနှင့် နှမ်းအသင်းတို့မှ တာဝန်ရှိသူများလည်း တက်ရောက်ခဲ့ကြပြီး (IPGA) ဥက္ကဌ Mr.Bimbal Kothari ၊ (OATA) ဥက္ကဌ Mr.Shyam Narsaria နှင့် အိန္ဒိယနိုင်ငံဆိုင်ရာ မြန်မာနိုင်ငံသံအမတ်ကြီး ဦးမိုးကျော်အောင်နှင့် တက်ရောက်လာသူတွေက မြန်မာအိန္ဒိယ နှစ်နိုင်ငံအကြား ပဲမျိုးစုံ ကူးသန်းရောင်းဝယ်မှု အခြေအနေနှင့် အိန္ဒိယနိုင်ငံ၏ ပဲလိုအပ်ချက်၊ ပဲမျိုးစုံတိုးချဲ့စိုက်ပျိုးရန် အခြေအနေများ၊ ပြောင်း၊ နှမ်းနှင့် ဆီထွက်သီးနှံများ ကုန်သွယ်မှုအခြေအနေများကို ဆွေးနွေးခဲ့ကြတာဖြစ်ပါတယ်။

မြန်မာနိုင်ငံနှင့် အိန္ဒိယနိုင်ငံရှိ ပဲမျိုးစုံစိုက်ပျိုး ထုတ်လုပ်သူများနှင့် စားသုံးသူများအတွက် ဈေးနှုန်းတည်ငြိမ်မှုရှိစေရေးအတွက် အိန္ဒိယနိုင်ငံ၏ စားသုံးသူရေးရာ၊ အစားအစာနှင့် ဖြန့်ချိရေးဝန်ကြီးဌာနနှင့် မြန်မာနိုင်ငံ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနတို့အကြား မတ်ပဲနှင့် ပဲစဉ်းငုံသီးနှံ တင်ပို့မှုဆိုင်ရာ ကိုဒါသဘောတူစာချုပ်ကို ၂၀၂၆ ခုနှစ်အထိ လက်မှတ်ရေးထိုးထားပြီးဖြစ်တယ်လို့လည်း သိရပါတယ်။

အဲဒီစာချုပ်ထဲမှာ ပဲတီစိမ်းသီးနှံကိုလည်း ထည့်သွင်းရေး ဆောင်ရွက်လျက်ရှိပါကြောင်း၊ အနာဂတ် ပဲထုတ်လုပ်တင်ပို့မှုအနေဖြင့် ယခုတင်ပို့လျက်ရှိသော ပဲမျိုးများအပြင် ပဲနီလေး၊ ပဲဝါလေး၊ ပဲရာဇာ၊ မြေထောက်ပဲများကိုလည်း တိုးမြှင့်ထုတ်လုပ်တင်ပို့သွားရန် လိုအပ်နေတယ်လို့ ဦးတင်ထွဋ်ဦးကပြောပါတယ်။

လက်ရှိအခြေအနေတွင် သွင်းအားစု ဓာတ်မြေဩဇာနှင့် စက်သုံးဆီများ ဈေးနှုန်းကြီးမြင့်မှုကြောင့်၊ ထုတ်လုပ်မှုစရိတ် မြင့်တက်နေသည့်အပြင် သယ်ယူပို့ဆောင်မှုစရိတ် မြင့်တက်မှုကြောင့် သီးနှံ ဈေးနှုန်းတွေ မြင့်တက်နိုင်တယ်လို့ ဝန်ကြီးက ထောက်ပြပြောဆိုခဲ့ပါတယ်။အဲဒါကြောင့် သယ်ယူပို့ဆောင်မှုကုန်ကျစရိတ် လျှော့ချနိုင်ရန် မြန်မာနှင့် အိန္ဒိယနိုင်ငံကြား Coastal Liner ကမ်းရိုးတန်းရေကြောင်းပို့ဆောင်ရေးစနစ်ဖြင့် တိုက်ရိုက်တင်ပို့နိုင်ပါက စားသုံးသူများအတွက် ဈေးနှုန်းသက်သာစေနိုင်တဲ့အတွက် အဆိုပါလုပ်ငန်းများတွင် အိန္ဒိယနိုင်ငံမှ ရင်းနှီးမြှုပ်နှံသူများအနေဖြင့် မြန်မာနိုင်ငံတွင် လာရောက် ရင်းနှီးမြှုပ်နှံကြစေလိုကြောင်းနှင့် ထုတ်လုပ်မှုဆိုင်ရာ လုပ်ငန်းများတွင်သာမက သယ်ယူရေး ပို့ဆောင်ရေးတန်ဘိုးမြှင့် ထုတ်ကုန်လုပ်ငန်းများတွင်လည်း ရင်းနှီးမြှုပ်နှံကြစေလိုတယ်လို့လည်း ဦးတင်ထွဋ်ဦးက ဆက်လက်တိုက်တွန်းခဲ့တယ်လို့ သတင်းထုတ်ပြန်ချက်မှာ ဖော်ပြထားပါတယ်။

အဲဒီအပြင် အိန္ဒိယနိုင်ငံ၏ နိုင်ငံတော်ပိုင် မျိုးစေ့ကော်ပိုရေးရှင်း National Seed Corporation (NSC) နှင့် ဆက်စပ်ဆောင်ရွက်နေတဲ့ ICAR-Indian Agricultural Research Institute သို့ သွားရောက်ပြီး မြန်မာနိုင်ငံနှင့်သင့်တော်သော သက်တမ်းအလိုက် သီးပွင့်၍ သက်တမ်းတိုသော ပဲစင်းငုံမျိုးများနှင့် ရောဂါဒဏ်ခံနိုင်ပြီး အထွက်နှုန်းမြင့်မားသော ပဲတီစိမ်းမျိုးများ၊ အလုံးအရွယ်ကြီး၍ အဖြူရောင်ရှိသော ကုလားပဲမျိုးများ ရရှိရေးအတွက် ညှိနှိုင်းဆွေးနွေးခဲ့ကြတယ်လို့ သိရှိရပါတယ်။

ဝန်ကြီး ဦးတင်ထွဋ်ဦးဟာ Mahyco မျိုးစေ့ထုတ်ကုမ္ပဏီ၊ Safal ကုမ္ပဏီနှင့် Metahelix ကုမ္ပဏီတို့မှ တာဝန်ရှိသူများနှင့်လည်းတွေ့ဆုံပြီး ဝါသီးနှံနှင့် ဆီထွက်နေကြာသီးနှံမျိုးစေ့များ မြန်မာနိုင်ငံသို့ တင်သွင်း ရောင်းချနိုင်ရေး၊ စမ်းသပ်သုတေသန လုပ်ငန်းများဆောင်ရွက်ရေး၊ မြန်မာအိန္ဒိယနှစ်နိုင်ငံ၏ မျိုးစေ့ထုတ်ကုမ္ပဏီများ ညှိနှိုင်းပေါင်းစပ်လုပ်ကိုင်နိုင်ရေးဆိုင်ရာများကိုလည်းကောင်း၊ DVC ကုမ္ပဏီမှ တာဝန်ရှိသူများနှင့် တွေ့ဆုံ၍ မြန်မာနိုင်ငံ၏ ဆီသန့်စက်ရုံတည်ဆောက်ရေးလုပ်ငန်းများတွင် လာရောက်ရင်းနှီး မြုပ်နှံနိုင်ရေးဆိုင်ရာ ကိစ္စရပ်များကိုပါ ဆွေးနွေးခဲ့ကြတယ်လို့ သိရှိရပါတယ်။

Source: SAC’s Information

#Myanmar_India

#Myanmar_ Agriculture

#Tin_Htut_Oo

#Yangon_Media_Group

#LocalNews
Published _24 September 2022

ဧရာဝတီတိုင်း၊ ပုသိမ်မြို့နယ်တွင် ရွှေဆွဲကြိုးလုယက်ကာ ၊လူသတ်ခဲ့သူ အမျိုးသားကို စက်တင်ဘာ ၂၃ ရက်က သေဒဏ်အမိန့်ချမှတ်ခဲ့ကြောင်းသိရသည်။

ပြီးခဲ့သည့် ၂၀၂၁ ခုနှစ် ဇန်နဝါရီလ ၁၅ ရက်က ပုသိမ်မြို့၌ နေအိမ်အတွင်းဝင်ရောက်ကာ ရွှေဆွဲကြိုးလုယက်ကာ လူကိုပါသတ်ခဲ့သူဟု ယူဆရသူ အောင်ဇော်ရဲ(ခ)ဇင်ဖြိုးအောင်ကို ရာဇသတ်ကြီးပုဒ်မ ၃၉၂/၃၂၀(၁)(ဂ) များဖြင့် သေဒဏ်အမိန့်ချမှတ်ခဲ့ခြင်းဖြစ်‌ကြောင်း တရားရုံးနှင့်နီးစပ်သည့်အသိုင်းအဝိုင်းက သိရသည်။
‌

ရွှေဆွဲကြိုးလုယက်ခံရပြီး အသတ်ခံခဲ့ရသူမှာ ဒေါ်ဌေးဌေး(ခ)ဒေါ်ဌေးကြည်ဆိုသူဖြစ်ပြီး ဦးခေါင်းရိုက်နှက်ခံရဒဏ်ရာဖြင့် ၂၀၂၁ ခုနှစ် ဇန်နဝါရီလ ၁၈ ရက်၊အခင်းဖြစ်ပြီး သုံးရက်အကြာတွင် သေဆုံးခဲ့ခြင်းဖြစ်သည်။

ymg/mt

#Yangon_Media_Group

#Local_News
Published _ 24 september 2022

အခါကြီးရက်ကြီးတွေနဲ့ သီတင်းကျွတ်ပိတ်ရက်တွေရှိနေပေမယ့် ခရီးသွားလာရေးလုပ်ငန်းတွေကတော့ ပုံမှန်အတိုင်းလည်ပတ်လျှက်ရှိနေပြီး ပိတ်ရက်တွေကြောင့် ထူးထူးခြားခြားအရောင်းသွက်တာမျိုးတွေ မရှိသေးဘူးလို့ ခရီးသွားလုပ်ငန်းလုပ်ကိုင်နေသူတွေဆီက သိရပါတယ်။

#Yangon_Media_Group

#Local_News
Published_ 24 September 2022

ရန်ကုန်တိုင်းအတွင်းရှိ ဆေးရုံတွေမှာ ကိုဗစ်လူနာတွေအတွက် isolation Wards နဲ့ ကုတင်တွေပြင်ဆင်ထားပြီး လူနာဦးရေ(၁၅၀၀)စာ လောက်ကြိုတင်ပြင်ဆင်ထားတယ်လို့ ရန်ကုန်တိုင်းဒေသကြီး၊ ပြည်သူ့ကျန်းမာရေးဦးစီးဌာနမှူး၊ ဒုတိယညွှန်ကြားရေးမှူး ချုပ် ဒေါက်တာထွန်းမင်းက ပြောပါတယ်၊၊

#Yangon_Media_Group