#Local_News
Published _ 25 August 2022

တောင်ကိုရီးယားနိုင်ငံတွင် အလုပ်လုပ်မည့် မြန်မာလုပ်သား ၁၄၈ဦး ယနေ့ရောက်ရှိလာကြောင်း ဆိုးလ်မြို့ရှိ မြန်မာသံရုံးမှ သတင်းထုတ်ပြန်ထားသည်။

ကုန်ထုတ်လုပ်သားအဖြစ် အသစ်ဝင်ရောက်လုပ်ကိုင်မည့် လုပ်သားသစ် (၁၄၈)ဦး ယနေ့ သြဂုတ်လ ၂၅ရက်မှာ အင်ချွန်းအပြည်ပြည်ဆိုင်ရာလေဆိပ်သို ရောက်ရှိလာကြောင်း ထုတ်ပြန်ချက်၌ ဖော်ပြထားသည်။

ရောက်ရှိလာသည့် မြန်မာလုပ်သားများကို အလုပ်သမားသံအရာရှိက ကြိုဆိုပြီး အလုပ်သမားတွေ သိရှိလိုက် နာသင့်သည့် အချက်များအား မှာကြားခဲ့ပြီး လိုအပ်တာများကို ကူညီပံ့ပိုးပေးခဲ့ကြောင်း သိရသည်။

သြဂုတ်လ ၂၃ရက်က စိုက်ပျိုးရေးနှင့် မွေးမြူရေးလုပ်သားအဖြစ်အသစ်ဝင်ရောက်လုပ်ကိုင်မည့် လုပ်သားသစ်(၁၀)ဦးနှင့် ကုန်ထုတ်လုပ်သားအဖြစ် အသစ်ဝင်ရောက် လုပ်ကိုင်မည့် လုပ်သားသစ်(၁၃၉)ဦးအပါအဝင် စုစုပေါင်း (၁၄၉)ဦး စေလွှတ်ခဲ့သည်။

ဩဂုတ်လ ၁၈ ရက်က တောင်ကိုရီးယားနိုင်ငံသို့ မြန်မာလုပ်သား ၁၆၈ ဦးကို ထပ်မံစေလွှတ်ခဲ့ကြောင်း သိရသည်။

တောင်ကိုရီးယားအစိုးရက မြန်မာလုပ်သားတွေကို တရားဝင်ပြန်လက်ခံနေပြီး ယခုဩဂုတ်လအတွင်းမှာ မြန်မာလုပ်သား ၁,၀၀၀ကျော်အား တရားဝင်ဝင်ခွင့်ပြုခဲ့သည်။

ymg/NN
#Yangon_Media_Group

#Local_News
Published-25 August 2022

ပြည်တွင်းစက်သုံးဆီဈေးနှုန်းမှာ ဆက်လက်မြင့်တက်နေကြောင်း စက်သုံးဆီအရောင်းဆိုင်များ၏ ထုတ်ပြန်ထားသည့်ဈေးနှုန်းများအရ သိရသည်။

သြဂုတ် ၂၅ ရက်နေ့စက်သုံးဆီဈေးနှုန်းမှာ 92 တစ်လီတာကို ၂၄၉၀ ကျပ်၊ ၉၅ တစ်လီတာဈေး ၂၅၇၀ ကျပ်၊ ၉၇ တစ်လီတာ ၃၀၅၅ ကျပ်အထိ ဈေးမြင့်တက်လာခြင်းဖြစ်သည်။

ယင်းအပြင် သြဂုတ် ၂၄ ရက်နေ့တွင် ဒီဇယ်နှင့် ပရီမီယံဒီဇယ်တစ်လီတာကို ၃၀၈၀ ကျပ်ဖြစ်ပြီး ယနေ့(သြဂုတ် ၂၅) တွင် တစ်လီတာလျှင် ၃၁၃၅ ကျပ်အထိ မြင့်တက်လာကြောင်း သိရသည်။

စက်သုံးဆီဈေးမြင့်တက်လာမှုကြောင့် အငှားယာဉ်မောင်းများအနေဖြင့် အခက်အခဲများရှိနေပြီး အုံနာခပင်မှန်မှန်မပေးနိုင်ကြောင်း ယာဉ်မောင်းများ၏ ပြောပြချက်အရ သိရသည်။

ရန်ကုန် ၊ မန္တလေး အပါအဝင် နေပြည်တော်၊ တိုင်းဒေသကြီးနှင့် ပြည်နယ်များတွင် ရည်ညွှန်းလက်လီဈေးနှုန်းဖြင့် ရောင်းချပေးနေကြောင်း စက်သုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်မှုကော်မတီမှ သိရသည်။

Ymg/STH
#Yangon_Media_Group

#World_Health
Published 25 August 2022

တီဗီကြည့်ခြင်းက ဦးနှောက်ထိခိုက်ရောဂါဖြစ်နိုင်ချေများပြားပေမယ့် ကွန်ပျူတာအသုံးပြုခြင်းကတော့ ထိုဝေဒနာမျိုးဖြစ်နိုင်ချေကို ကာကွယ်ပေးနိုင်ကြောင်း လေ့လာတွေ့ရှိထားပါတယ်။

သုတေသီများက ယူကေမှ အသက် ၆၀ နဲ့အထက် လူပေါင်း ၁ သိန်းခွဲကို ၁၂ နှစ်တိုင်အောင် စောင့်ကြည့်လေ့လာခဲ့ကြပါတယ်။

အဲဒီမှာတော့ ဦးနှောက်ထိခိုက်ရောဂါဖြစ်လာတဲ့သူတွေက တစ်နေ့ကို တီဗီ ၃ နာရီ ၂၄ မိနစ်ခန့်ကြည့်ရှုတတ်ကြပါတယ်။

ဝေဒနာမဖြစ်သူတွေကတော့ တစ်နေ့ကို ၃ နာရီတီဗီကြည့်ပေမယ့် ကွန်ပျူတာကိုလည်း ၃ နာရီကျော် သုံးစွဲကြပါတယ်။

တီဗီ ၂ နာရီကြည့်တာထက်စာရင် ၄ နာရီလောက်ကြည့်ရှုခြင်းဖြင့် ဦးနှောက်ထိခိုက်ဝေဒနာဖြစ်နိုင်ချေ ၂၀ ရာခိုင်နှုန်းပိုများကြောင်း ကယ်လီဖိုးနီးယားတောင်ပိုင်းတက္ကသိုလ်မှ ပရော်ဖက်ဆာ'ဒေးဗစ်ရေ့ချ်လန်'က ‌ရှင်းပြထားပါတယ်။

တီဗီနဲ့ ကွန်ပျူတာကြည့်ခြင်းလို အထိုင်များတဲ့အလေ့အထက လူကြီးတွေ စိတ်အပန်းဖြေတဲ့အခါ ပြုလုပ်လေ့ရှိပြီး နာတာရှည်ရောဂါများနဲ့ အသက်အန္တရာယ်ဖြစ်နိုင်ချေများနဲ့ ဆက်စပ်နေပါတယ်။

အထိုင်များခြင်းက ဦးနှောက်ထိခိုက်ရောဂါနဲ့ ဘယ်လိုပတ်သက်နေလဲဆိုတာကို သုတေသီများလေ့လာနေကြပါတယ်။

ဦးနှောက်ထိခိုက်ရောဂါဖြစ်နိုင်ချေက တီဗီရှေ့ အထိုင်များခြင်း/မများခြင်းဆိုတာထက် ကြည့်ရှုတဲ့အကြောင်းအရာပေါ် ပိုပြီးမူတည်နေပါတယ်။

တီဗီကြည့်တဲ့အခါ ဦးနှောက်သိပ်ပြီးအသုံးမပြုရတဲ့ အကြောင်းအရာတွေကြည့်ရှုခြင်းကို လျှော့ချပြီး ဦးနှောက်အသုံးပြုရတဲ့အကြောင်းအရာတွေကို တီဗီပိုကြည့်ခြင်းက ဦးနှောက်စွမ်းဆောင်ရည်လျော့နည်းလာတဲ့ ရောဂါများမဖြစ်နိုင်အောင် ကူညီကာကွယ်ပေးနိုင်တယ်လို့ မှတ်ချက်ပြုခဲ့ပါတယ်။

Source: Daily Mail
#Yangon_Media_Group

#Local_News
Published_25 August 2022

၂၀၂၂ ခုနှစ်၊ သြဂုတ်လ (၂၅) ရက်၊ နံနက်(၀၄)နာရီ၊ (၁၈)မိနစ်၊ (၀၇)စက္ကန့်အချိန်တွင်စစ်ကိုင်းတိုင်း၊ မော်လိုက်မြို့အနီး အင်အားရစ်တာစကေး(၅.၂)အဆင့်ရှိ မြေငလျင်လှုပ်ခတ်ခဲ့ကြောင်း မိုးလေဝသနှင့်ဇလဗေဒ ညွှန်ကြားမှုဦးစီးဌာန၊ မြေငလျင်ဌာနခွဲ၏ ထုတ်ပြန်ချက်အရသိရသည်၊၊

အဆိုပါ မြေငလျင်သည် တမူးမြေငလျင်စခန်းမှ အရှေ့တောင်ဘက် (၃၄)မိုင်ခန့် ကွာဝေးသော မြန်မာနိုင်ငံပြည်တွင်း (မော်လိုက်မြို့၏ အရှေ့ မြောက်ဘက် (၂၁) မိုင်ခန့်အကွာ) မြောက်လတ္တီတွဒ် (၂၃.၈၄) ဒီဂရီ၊ အရှေ့လောင်ဂျီတွဒ် (၉၄.၆၇)ဒီဂရီ၊ အနက် (၈၅) ကီလိုမီတာကို ဗဟိုပြု၍ လှုပ်ရှားသွားခြင်းဖြစ်သည်၊၊

မြန်မာနိုင်ငံတွင် ယခုနှစ်ပိုင်းအတွင်း မြေငလျင်ငယ်များ ဆက်တိုက်လှုပ်ခတ်နေပြီး မြေငလျင်ကြီးများ တစ်ကျော့ပြန်လှုပ်ခတ်နိုင်ခြေရှိ၍ သတိပြုနေထိုင်ကြဖို့လည်း မိုးလေဝသနှင့်ဇလဗေဒ ညွှန်ကြားမှုဦးစီးဌာန၊ မြေငလျင်ဌာနခွဲက တာဝန်ရှိသူများက သတိပေးပြောကြားထားကြောင်း သိရသည်၊၊

ymg/tthl
#Yangon_Media_Group

#World_Health
Published 25 August 2022

မျိုးမအောင်ခြင်းက အမျိုးသမီးတွေရော အမျိုးသားများမှာပါ တွေ့ကြုံရတတ်ပြီး တစ်ကမ္ဘာလုံးအတိုင်းအတာနဲ့ကြည့်ရင် ကိုယ်ဝန်ရနိုင်စွမ်း တဖြည်းဖြည်းလျော့နည်းလာပါတယ်။

တစ်နှစ်ခန့်ကြိုးစားပြီးနောက် ကိုယ်ဝန်မရခဲ့တဲ့ အမျိုးသမီးတွေမှာ အိုင်အိုဒင်းဖြည့်စွက်စာပေးခြင်းဖြင့် စမ်းသပ်ခဲ့ကြပါတယ်။

အိုင်အိုဒင်းပမာဏနည်းနေတဲ့ အမျိုးသမီးတွေက ပုံမှန်အမျိုးသမီးတွေထက် ကိုယ်ဝန်ရနိုင်ချေ ၄၆ ရာခိုင်နှုန်းနည်းပါးတဲ့အပြင် ကိုယ်ဝန်ရခဲ့ရင်လည်း အချိန်ကြာမြင့်ပြီးမှ ရတတ်တာကို တွေ့ရှိခဲ့ကြပါတယ်။

ထို့နောက် အိုင်အိုဒင်းဖြည့်စွက်စာပေးတဲ့ အမျိုးသမီးတွေတစ်ဖွဲ့နဲ့ ဘာမှမပေးတဲ့ အမျိုးသမီးတွေတစ်ဖွဲ့ကို လေ့လာခဲ့ကြပါတယ်။

အိုင်အိုဒင်းဖြည့်စွက်စာသုံးစွဲခဲ့တဲ့ အမျိုးသမီးတွေထဲက ၈၇.၅ ရာခိုင်နှုန်းက ၁၂ လကြာပြီးနောက် ကိုယ်ဝန်ဆောင်နိုင်ခဲ့ကြပါတယ်။

အိုင်အိုဒင်းမသုံးစွဲတဲ့ အမျိုးသမီးတွေထဲကတော့ ၇၂ ရာခိုင်နှုန်း ကိုယ်ဝန်ဆောင်နိုင်ခဲ့ပါတယ်။

ဒါကြောင့် အိုင်အိုဒင်းချို့တဲ့ခြင်းက ကိုယ်ဝန်ရနိုင်ချေရှိ/မရှိနဲ့ သက်ဆိုင်နေပါတယ်။

အိုင်အိုဒင်းက ရေထဲမှာပါဝင်ကာ အချို့ဒေသတွေမှာ ဆားမပါတဲ့ရေသာ ရရှိနေကြပါတယ်။

အိုင်အိုဒင်းချို့တဲ့တဲ့အခါ ကလေးတွေမှာ ဦးနှောက်ကိုဆိုးဆိုးရွားရွားထိခိုက်စေပြီး သန္ဓေသားဦးနှောက်ဖွံ့ဖြိုးမှုကို ဆိုးရွားစွာသက်ရောက်စေပါတယ်။

ကိုယ်ဝန်ဆောင်ကာလပထမအပိုင်းအခြားဟာ သိုင်းရွိုက်ဟော်မုန်းရရှိရန် အိုင်အိုဒင်းက အလွန်အရေးကြီးပါတယ်။

ကိုယ်ဝန်ဆောင်နေစဉ်နဲ့ နို့တိုက်ကာလအတွင်း အိုင်အိုဒင်းဖြည့်စွက်စာများအသုံးပြုဖို့ အစ္စရေးလ်မိခင်နှင့် ကလေးဆေးပညာဌာနက မှာကြားထားပါတယ်။

လူအသီးသီးအတွက်လည်း ပုံမှန်ကိုယ်အလေးချိန်ရရှိစေရန်နဲ့ ခန္ဓာကိုယ်မှလိုအပ်တဲ့ စွမ်းအင်များရရှိစေရန် အိုင်အိုဒင်းက ကူညီပေးပါတယ်။

အိုင်အိုဒင်းချို့တဲ့ရင် ရောဂါခုခံအားစနစ်ထိခိုက်စေပြီး ကင်ဆာရောဂါအမျိုးမျိုးဖြစ်လာနိုင်ပါတယ်။

နို့ထွက်ပစ္စည်းတွေနဲ့ ကြက်ဥတွေမှာ အိုင်အိုဒင်းပါဝင်ပေမယ့် ကြက်တွေ၊ နွားတွေစားတဲ့ အစာတွေထဲက အိုင်အိုဒင်းပါဝင်မှု ပမာဏအပေါ် မူတည်နေပါတယ်။

အိုင်အိုဒင်းကို ပင်လယ်ရေမှ အဓိကရရှိတာကြောင့် ရေချိုငါးများထက် ရေငံငါးများ စားသုံးခြင်းဖြင့် အိုင်အိုဒင်းပိုမိုရရှိစေပါတယ်။

သက်သက်လွတ်သမားများအတွက်တော့ အပင်စိုက်ပျိုးရာမြေကြီးထဲမှာ အိုင်အိုဒင်းဘယ်လောက်ပါဝင်လဲဆိုတဲ့အပေါ် များစွာမူတည်နေပါတယ်။

Source: The Jerusalem Post
#Yangon_Media_Group

#Local_News
Published_ 25 Aug 2022

ရန်ကုန်စတော့အိပ်ချိန်း၌ ငွေချေးသက်သေခံလက်မှတ်ကုမ္ပဏီများတွင် စာရင်းဖွင့် လှစ်ထားသူ ဦးရေမှာ ၄၄,၈၀၉ ဦးရှိကာ တစ်နှစ်တိုးတက်မှုနှုန်း ၄ ဒသမ ၁ ရာခိုင်နှုန်း ရှိကြောင်းနှင့် စာရင်းဝင်ကုမ္ပဏီ ၇ ခု၏ ဇူလိုင်လကုန်ရှိ ဈေးကွက်ရင်းနှီးမြှုပ်နှံမှု တန်ဖိုးမှာ ငွေကျပ် ၅၈၁ ဒသမ ၅၁၅ ဘီလီယံရှိကြောင်း သိရပါတယ်။

YSX ၌ စာရင်းဝင်ထားသောအများနှင့် သက်ဆိုင်သည့် ကုမ္ပဏီ ၇ ခု၏ ရှယ်ယာများ ကို ငွေချေးသက်သေခံလက်မှတ်ကုမ္ပဏီ ၆ ခုမှ တစ်ဆင့် ရောင်းဝယ်လျက်ရှိတယ်လို့ ဆိုပါတယ်။

မြန်မာနိုင်ငံ ငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင်၏ (၇/၂၀၂၂) ကြိမ်မြောက် အစည်အဝေးကို နေပြည်တော်၌ ကျင်းပရာ ဝန်ကြီး ဦးဝင်းရှိန်က အရင်းအနှီးဈေးကွက်သည် နိုင်ငံတော်၏ စီးပွားရေးဖွံ့ဖြိုးတိုးတက်ရန် အဓိကအရေးပါသည့် မောင်းနှင်အားတစ်ခု ဖြစ်၍ နိုင်ငံအသီးသီးက အရင်းအနှီးဈေးကွက် ဖွံ့ဖြိုးတိုးတက်ရေးကို ဦးစားပေးဆောင်ရွက်လျက်ရှိကြောင်း ပြောကြားခဲ့ပါတယ်။

ရန်ကုန်စတော့အိပ်ချိန်း (Yangon Stock Exchange – YSX) ကို ၂၀၁၅ ခုနှစ်တွင် ဖွင့်လှစ်ခဲ့ပြီးနောက် ယခုအခါ စာရင်းဝင်ကုမ္ပဏီ (၇) ခု၏ ရှယ်ယာများအား နေ့စဉ် ရောင်း/ဝယ်လျက်ရှိကြောင်း သိရပါတယ်။

တစ်ဖက်တွင်လည်း ငွေချေးစာချုပ်ဈေးကွက် ဖွံ့ဖြိုးတိုးတက်စေရေးအတွက် ဒုတိယဈေးကွက် (Secondary Market) ကို ထူထောင်ဆောင်ရွက်ခဲ့ရာ ယင်းဈေးကွက်တွင် အစိုးရငွေတိုက်စာချုပ်နှင့် ငွေတိုက်လက်မှတ်များကို ရင်းနှီးမြှုပ်နှံသူများက ဝယ်ယူရင်းနှီးမြှုပ်နှံလျက်ရှိသော်လည်း နိုင်ငံ၏အရင်းအနှီးဈေးကွက်တွင် ပါဝင်ရင်းနှီး မြှုပ်နှံသူနှင့် အရင်းအနှီးစုဆောင်းသူများမှာ အခြားနိုင်ငံများနှင့်နှိုင်းယှဉ်ပါက လွန်စွာနည်းနေသေးတယ်လို့ ဝန်ကြီးက ပြောပါတယ်။

စာရင်းဝင်ကုမ္ပဏီများ တိုးပွားလာစေရေးရည်ရွယ်၍ ရန်ကုန်စတော့အိပ်ချိန်းတွင် စာရင်းဝင် အကြိုဈေးကွက် (Pre Listing Board – PLB) ကို ဒုတိယဈေးကွက်အဖြစ် ထူထောင်ခွင့်ပြုထားပြီးဖြစ်ရာ အသေးစားနှင့်အလတ်စား စီးပွားရေးလုပ်ငန်းများအတွက် လက်ရှိစာရင်းဝင်စံသတ်မှတ်ချက်များကိုလျှော့ချပြီး အနည်းဆုံးလိုအပ်ချက်များဖြင့် စာရင်းဝင်အကြိုဈေးကွက်တွင် မှတ်ပုံတင်နိုင်ရန် ဆောင်ရွက်ပေးထားပြီးဖြစ်ပါတယ်။

စာရင်းဝင်အကြိုဈေးကွက်မှတဆင့် စာရင်းဝင်ကုမ္ပဏီများဖြစ်လာစေရန် ကြိုးပမ်းဆောင်ရွက်ခြင်းဖြင့် အရင်းအနှီးဈေးကွက်ဖွံ့ဖြိုးတိုးတက်မှုကို အထောက်အကူ ပြုစေမည်ဖြစ်ပြီး နိုင်ငံ့စီးပွားဖွံ့ဖြိုးတိုးတက်မှုကိုလည်း အထောက်အကူပြုစေမှာ ဖြစ်ပါတယ်။

ygm_mnn
#Yangon_Media_Group

Published 25 Aug 2022

ထိုင်းနိုင်ငံရဲ့ အခြေခံဥပဒေခုံရုံးက ဝန်ကြီးချုပ် ပရာရွတ် ချန်အိုချာကို တာဝန်ထမ်းဆောင်ခြင်းမှ ဆိုင်းငံ့ထားလိုက်ပါတယ်။  တပ်ဦးစီးချုပ်ဟောင်းဖြစ်ခဲ့တဲ့ သူဟာ ဖွဲ့စည်းပုံအခြေခံဥပဒေက ပေးအပ်ထားတဲ့ (၈)နှစ် ကာလထက် ကျော်လွန်ပြီး တာဝန်ထမ်းဆောင်နေပါတယ်လို့ အတိုက်အခံပါတီတွေက တရားရုံးကို လျှောက်ထားတဲ့အတွက် ယခုလို တာဝန်မှ ဆိုင်းငံ့ထားခြင်းဖြစ်ပြီး ဆိုင်းငံ့ခြင်းဟာ တရားရုံးက အမိန့်ချမှတ်တဲ့အချိန်အထိ ကြာမြင့်မှာဖြစ်ပါတယ်။

ပရာရွတ်ဟာ တပ်အာဏာသိမ်းပြီးနောက် သူ့ကိုယ်သူ ဝန်ကြီးချုပ်အဖြစ် ဆောင်ရွက်ခဲ့တာပါ။

“ တရားရုံးက ဗိုလ်လျုပ်ပြီး ပရာရွတ်အား ဝန်ကြီးချုပ်တာဝန်ထမ်းဆောင်ခြင်းကို ဩဂုတ် ၂၄ ရက်မှစတင်ကာ တရားရုံးက အမိန့်ချမှတ်သည်အထိ ဆိုင်းငံ့ထားရန်  ၅မဲ၄မဲနှင့် ဆုံးဖြတ်ခဲ့ပါတယ်” လို့ ဩဂုတ် (၂၄)ရက်က တရားရုံးရဲ့သတင်းထုတ်ပြန်ချက်မှာ ဖော်ပြထားပါတယ်။

ပရာရွတ်ဟာ တာဝန်မှ ဆိုင်းငံ့ခံထားရတဲ့ကာလများအတွင်း ဒုတိယဝန်ကြီးချုပ် ပရာဝတ် ဝေါင်ဆုဝန်က အိမ်စောင့် ဝန်ကြီးချုပ် အဖြစ် တာဝန်ယူမှာဖြစ်တယ်လို့  အစိုးရရဲ့ ဥပဒေပညာရှင်လည်းဖြစ် ဒုတိယဝန်ကြီးချုပ်နောက်တစ်ဦးလည်း ဖြစ်တဲ့ ဝီဆန်နု ကရီနာ နမ်က ပြောပါတယ်။ ပရာဝတ်ဟာဒုတိယဝန်ကြီးချုပ်တွေအထဲမှာ ဝါအရင့်ဆုံးဖြစ်ပါတယ်။

“ ဒီ့အတွက် နိုင်ငံအုပ်ချုပ်ရေး၊ ရုံးလုပ်ငန်းဆောင်ရွက်မှုတွေနှင့် အစိုးရရဲ့ မူဝါဒတွေ အကောင်အထည်ဖော်ရေးတွေ မှာ ဘာမှအကျိုးသက်ရောက်မှာ မဟုတ်ပါဘူး” လို့ ဝန်ကြီးချုပ်ရုံး ဒုတိယအတွင်းရေးမှူးချုပ်နှင့် အစိုးရရဲ့ယာယီပြောရေးဆိုခွင့်ရ ပုဂ္ဂိုလ် အန်နူချာ ဘူရာပက်ချိုင်းဆရီက ပြောပါတယ်။

ဝန်ကြီးချုပ် ပရာရွတ်ဟာ တရားရုံးရဲ့ ဆုံးဖြတ်ချက်ကိုလေးစားလိုက်နာတယ်လို့လည်း အန်နူချာက ပြောပါတယ်။

“ ပြည်သူတွေကို တရားရဲ့ရဲ့ အဆုံးအဖြတ်လေးစားကြပြီး တရားရုံးကို ဝေဖန်ပြစ်တင်ခြင်း ရှောင်ရှားကြပါလို့ ပရာရွတ်က တိုက်တွန်းပါတယ်။ ပြည်သူတွေအနေနှင့် နိုင်ငံရဲ့ ငြိမ်းချမ်းရေးအတွက် သော့ချက်ဖြစ်တဲ့ တရားဥပဒေစိုးမိုးရေးအပေါ် ယုံကြည်မှုရှိကြဖို့လည်း သူကပြောပါတယ်” လို့ အန်နူချာကပြောပါတယ်။

လက်ရှိမှာ ကာကွယ်ရေးဝန်ကြီး ရာထူးလည်းရယူထားတဲ့ ပရာရွတ်ဟာ ဝန်ကြီးအဖွဲ့အစည်းအဝေးတွေကို ကာကွယ်ရေးဝန်ကြီး အဖြစ်တော့ ဆက်လက်တက်ရောက်မှာဖြစ်ပါတယ်။

တပ်ကရေးဆွဲပြီး ဆန္ဒခံယူပွဲနှင့် ပြဋ္ဌာန်းခဲ့တဲ့ ၂၀၁၇ အခြေခံဥပဒေအရ  ဝန်ကြီးချုပ်ရဲ့ သက်တမ်းကို (၈)နှစ် သတ်မှတ်ခဲ့ပါတယ်။ ပရာရွတ်ဟာ ၂၀၁၄ခုနှစ် ဩဂုတ်(၂၄)ရက်နေ့မှာ ဝန်ကြီးချုပ်အဖြစ် ဘုရင်ဘူမိဘော အက်ဘ်ဒူယာဒက်ချ်က လက်မှတ်ရေးထို့းခန့်အပ်ခဲ့တာဖြစ်တယ်လို့ အတိုက်အခံတွေက စောဒကတက်ထားပါတယ်။

ဒါပေမယ့် အာဏာရပါတီကတော့ သူ့ရဲ့သက်တမ်းဟာ ၂၀၁၉ခုနှစ်ကမှ အခြေခံဥပဒေနှင့်အညီ ကျင်းပတဲ့ ရွေးကောက်ပွဲကနေ ရွေးကောက်တင်မြှောက်ခံရပြီး စတင်တာဖြစ်တယ်လို့ ပြန်လည်ငြင်းဆိုထားပါတယ်။

Source: Reuters

#Thailand_Politics

#Prayuth_Chan-ocha

#Thailand_prime_minister

#Local_News
Published-24 August 2022

မြန်မာနိုင်ငံဆီကုန်သည်နဲ့ ဆီလုပ်ငန်းရှင်များအသင်းကနေ ရန်ကုန်မြို့တွင်းမှာရှိတဲ့ ဆင်ခြေဖုံးရပ်ကွက်တွေကို စားအုန်းဆီတစ်ပိသာ ၅၀၀၀ ကျပ်နဲ့ လိုက်လံရောင်းချပေးနေတာပဲ ဖြစ်ပါတယ်။

#Yangon_Media_Group

#World_Pets
Published 24 August 2022

ဆိုက်ပရပ်စ်တွင် ကိုဗစ်ကာလအတွင်း မွေးစားထားတဲ့ခွေးများကို အများအပြား စွန့်ပစ်လာကြတဲ့အပြင် ဥရောပသမဂ္ဂမှ ယူကေခွဲထွက်လာတဲ့ အကျိုးဆက်များကြောင့် ဆိုက်ပရပ်စ်ရှိ ခွေးစောင့်ရှောက်ရေးဂေဟာများမှာ ပြည့်လျှံလာတဲ့ပြဿနာတွေ ကြုံတွေ့နေရတယ်လို့ စေတနာ့ဝန်ထမ်းအချို့က ဖွင့်ဟလာကြပါတယ်။

#Yangon_Media_Group

#Local_News
Published _ 24 August 2022

ရွှေအသင်းက ရွှေဈေးနှုန်း သတ်မှတ်မှု တွေလုပ်ဆောင်နေပေမယ့် ဈေးကွက်အတွင်းမှာတော့ ပြင်ပရွှေပေါက်ဈေးနှင့် (၇) သိန်းနီးပါး ကွာဟနေတာပဲ ဖြစ်ပါတယ်။

#Yangon_Media_Group

#Local_News
Published_24 August 2022

ရခိုင်ပြည်နယ် ဘူးသီးတောင်မောင်တောဘက်ကနေ ဘင်္ဂလားဒေ့ရှ်နိုင်ငံဘက်ကို ရွှေ့ပြောင်းပြီးသွားတဲ့ လူအရေအတွက်ဟာ ငါးသိန်းနီးပါး ရှိတယ်လို့ ရခိုင်ပြည်နယ် အစိုးရအဖွဲ့က သိရပါတယ်။

#Yangon_Media_Group

#Local_News
Published-24 August 2022

ယခုရက်ပိုင်းအတွင်းမှာ ကိုဗစ်- ၁၉ ပြည်တွင်းကူးစက်မှု ပြန်ဖြစ်လာတာကိုတွေ့ရှိပေမဲ့ ကိုဗစ်ကန့်သတ်ချက်တွေကိုတော့ လတ်တလော ထုတ်ပြန်ဖို့မရှိသေးဘူးလို့ ကျန်းမာရေးဝန်ကြီးဌာနကနေ သိရပါတယ်။

#Yangon_Media_Group