Published 19 Dec 2022

တရုတ်အမျိုးသမီးဟာ သူနှင့် ၁၀နှစ်ကြာလက်ထပ်ထားတဲ့ ခင်ပွန်းဖြစ်သူဟာ ငါးမျှားဝါသနာကြီးလွန်းလို့ ကွာရှင်းလိုက်ပါတယ်။ ခင်ပွန်းဟာ ငါးမျှားတာကို မိသားစုအရေးထက် ရှေ့တန်းတင်ထားတယ်လို့ သူမကပြောပါတယ်။

ရှန်ဒေါင်းပြည်နယ် ဂျုယီခရိုင်ပြည်သူ့တရားရုံးမှာ  ကျန်လို့အမည်ရတဲ့ အမျိုးသမီးက ခင်ပွန်းဖြစ်သူကို ကွာရှင်းခွင့်လျှောက်ထားခဲ့ပါတယ်။ သူမအနေနှင့် ခင်ပွန်းဖြစ်သူရဲ့ ငါးမျှားတာစွဲလန်းနေမှုအပေါ် ဆက်ပြီး စိတ်မရှည်နိုင်တော့ဘူး၊လုံလောက်ပြီလို့ သူမကပြောပါတယ်။ သူမက အိမ်မှုတာဝန်တွေအကုန်သိမ်းကျုံးလုပ်ပြီး ကလေးနှစ်ယောက်ထိန်းနေရချိန်မှာ ခင်ပွန်းက ဆိုဖာပေါ်မှာ စမတ်ဖုန်းတောက်လျှောက်ပွတ်နေပြီး ညစာစာပြီးတာနှင့် သူငယ်ချင်းတွေနှင့် နေ့တိုင်းငါးမျှားထွက်တော့တာဖြစ်တယ်လို့ သူမက ဆိုပါတယ်။

ငါးမျှားတာထက် သူမနှင့်ကလေးတွေအတွက် အချိန်ပိုပေးဖို့သူမက မကြာခဏ ထပ်တလဲလဲပြောခဲ့ပြီးနောက် မရတော့တဲ့အဆုံး “ကျန်”က ရွေးစရာလမ်းမရှိဘဲ ကွာရှင်းခဲ့ရတာဖြစ်ပါတယ်။

“ ကျွန်မ မနက် ၆နာရီဆို နေ့တိုင်းအိပ်ရာထရတယ်။မနက်စာပြင်ရတယ်။ အဲဒီနောက် ကျွန်မ အလုပ်မသွားခင် ကလေးနှစ်ယောက်ကို ကျောင်းပို့ရတယ်။ နေ့တိုင်း ပန်းကန်ဆေးတော့လည်း ကျွန်မ၊အိမ်သန့်ရှင်းရေးလုပ်တာလည်း ကျွန်မ၊ ကလေးတွေကို ကျောင်းသွားကြိုတာလည်း ကျွန်မ၊ပြီးတော့ ကလေးတွေနှင့်အိမ်စာလုပ်ပေးရတာလည်း ကျွန်မ။ ကျွန်မသိပ်ပင်ပန်းပြီ” လို့ ကျန်က တရားရုံးကို လျှောက်တဲ့စာမှာ ရေးသားဖော်ပြထားပါတယ်။

“ ကျွန်မမနက်စာပြင်ပြီးမှ သူက အိပ်ရာထတယ်။ အလုပ်ကပြန်လာရင်လည်း ဆိုဖာပေါ်မှာပဲလှဲလျှောင်းပြီး မိုဘိုင်းဖုန်းတစ်လုံးနှင့်ဆော့နေတော့တာပဲ”  လို့ သူမကဖြည့်စွက်ပြောပါတယ်။” ညစာလည်းစားပြီတာနှင့် ချက်ခြင်းပဲ ငါးမျှားထွက်တော့တာ။ မကြာခဏဆိုသလို ငါးကို တစ်ညလုံးမျှားတာ” လို့လည်း သူမကပြောပါတယ်။

မိန်းမဖြစ်သူရဲ့ ညည်းတွားပြောဆိုသံတွေကို ငြီးငွေ့လာပြီးနောက် “ဆန်း” လို့ခေါ်တဲ့ အဲဒီခင်ပွန်းဖြစ်သူက ကွာရှင်းပေးဖို့ သဘောတူလိုက်ပါတယ်။ (သူ့အနေနှင့် ငါးမျှားဖို့ အချိန်ပိုရသွားပြီလို့ ထင်သွားတာကြောင့်လည်းဖြစ်နိုင်ပါတယ်)။  သူတို့နှစ်ဦးကို တရားရုံးကစေ့စပ်ပေးဖို့ကြိုးစားခဲ့ပေမယ့် မအောင်မြင်ခဲ့ပါဘူး။ တရားရုံးက ကွာရှင်းမိန့်ချလိုက်ရပါတယ်။  အမိန့်ချမယ့်အချိန်မှာ “ဆန်း”က လက်ရှိတရားရုံးအလုပ်ရှိနေတာမေ့နေပြီး ငါးထွက်မျှားနေလို့ဖြစ်ပါတယ်တဲ့။

“ ငါးမျှားတာ မကောင်းတဲ့အလုပ်မဟုတ်ပါဘူး။ ဒါပေမယ့် ဘာပဲလုပ်လုပ် စည်းတစ်ခုတော့ရှိရမယ်လေ။ ခင်ဗျား လက်ထပ်ပြီးပြီဆိုရင် ခင်ပွန်းတစ်ယောက်အနေနှင့် ဒါမှမဟုတ် ဇနီးတစ်ယောက်အဖြစ် ပြီးတော့ မိဘအဖြစ် တာဝန်ယူဖို့လိုတယ်။ မိသားစုရဲ့ရှေ့မှာ ငါးမျှားတဲ့အလုပ်ကိုသွားမထားပါနှင့်” လို့ တရားသူကြီး ဖူဟောင်လျန်းက “ဆန်း”ကိုပြစ်တင်ကြိမ်းမောင်းခဲ့ပါတယ်။ ဒါပေမယ့် “ဆန်း”ကြည့်ရတာ အဲသလိုပြောလို့ နာတဲ့ပုံလည်း မပေါ်ပါဘူးလို့ သတင်းမှာရေးသားထားပါတယ်။

Source:SCMP

#fishing_addiction

#Wife_divorces_husband_of_fishing_addiction

#Strange_News

#LocalNews
Published_ 18 December 2022

ရန်ကုန်-မော်လမြိုင် ညရထားခရီးစဉ်များကို ယနေ့ မှစ၍ယာယီ ရပ်ဆိုင်းလိုက်ကြောင်း မော်လမြိုင် ဘူတာကြီးက သတင်းထုတ်ပြန်ထားသည်။

မော်လမြိုင်ဘူတာမှ အမှတ် (၈၂) အစုန် မော်လမြိုင်-ရန်ကုန် ညရထား ခရီးစဉ်အတွက် ကြိုတင်ဝယ်ယူထားသော ရိုးရိုးတန်း၊ အထက်တန်း လက်မှတ်ခများကို မော်လမြိုင်ဘူတာကြီး လက်မှတ်ရုံတွင် ပြန်လည်ပေးချေနေပြီဖြစ်ကြောင်းလည်း အဆိုပါ ထုတ်ပြန်ချက်တွင် ဖော်ပြထားသည်။

သို့သော်လည်း မော်လမြိုင်-ရန်ကုန် ပြေးဆွဲလျက် ရှိသော လေအိတ် နေ့အမြန်ရထားကိုမူ နေ့စဉ် အစုန်အဆန် ပြေးဆွဲပေးနေမည်ဖြစ်ကြောင်းလည်း သိရသည်။

ymg/mt
#Yangon_Media_Group

Published 18 Dec 2022

မြောက်ကိုရီးယားနိုင်ငံဟာ ကိုရီးယားကျွန်းဆွယ်အရှေ့ဖက်ကမ်းခြေ ပင်လယ်ထဲကို ပဲ့ထိန်းဒုံးကျည်နှစ်စင်း ဒီဇင်ဘာ ၁၈ ရက် တနင်္ဂနွေနေ့က ပစ်လွှတ်ခဲ့တယ်လို့ တောင်ကိုးရီးယားနှင့် ဂျပန်တို့ကပြောပါတယ်။

တောင်ကိုးရီးယား ပူးတွဲစစ်ဦးစီးချုပ် (JCS) ကပြောကြားရာမှာ တာလတ်ပစ် ဒုံးကျည်နှစ်စင်းဟာ ၅၀၀ကီလိုမီတာ အမြင့်ကနေ ပျံသန်းသွားတယ်လို့ ဆိုပါတယ်။

ဂျပန်ဒုတိယ ကာကွယ်ရေးဝန်ကြီး တိုရှီယိုအီနိုကလည်း ‘ ဒုံးကျည်တွေဟာ ဂျပန်ရဲ့ အထူးစီးပွားရေးဇုန်အပြင်ဘက်ကျသွားခဲ့ပုံရပြီး ထိခိုက်ဒဏ်ရာရရှိတဲ့သတင်းတွေတက်မလာဘူး” လို့ ပြောပါတယ်။

“ မြောက်ကိုရီးယားရဲ့ ပဲ့ထိန်းဒုံးကျည်တွေဟာ ခပ်မတ်မတ်ပစ်လွှတ်ခဲ့တာဖြစ်ပြီး အရှေ့ပင်လယ်ထဲကျသွားတယ်” လို့ တောင်ကိုးရီးယားနိုင်ငံ (JCS)က သတင်းထုတ်ပြန်ပါတယ်။

“ တောင်ကိုရီးယားနှင့် အမေရိကန်ပြည်ထောင်စုက ထောက်လှမ်းရေးအဖွဲ့တွေဟာ မြောက်ကိုရီးယားရဲ့ လက်ရှိ ဒုံကျည်တွေပစ်လွှတ်နေတာနှင့် ဆက်စပ်ပြီး ဘာကိုဦးတည်နေသလဲဆိုတာကို  ခွဲခြမ်းစိတ်ဖြာသုံးသပ်နေတယ်” လို့ သတင်းထုတ်ပြန်ချက်မှာဖော်ပြထားပါတယ်။

မြောက်ကိုရီးယားဟာ မဟာဗျူဟာအစ်လက်နက်တွေထုတ်လုပ်ဖို့နှင့် နျူကလီးယားနှင့် ဒုံးကျည်အစီအစဉ်တွေ အရှိန်မြှင့်ဖို့ ကြံစည်နေတဲ့အလျောက် မကြာသေးခင်က မြင့်မားကန်အားရှိ solid-fuel အင်ဂျင်ကိုစမ်းသပ်ခဲ့ပါတယ်။ အဲဒီစမ်းသပ်မှုဟာ ပဲ့ထိန်းဒုံးကျည်တွေကို လျင်လျင်မြန်မြန်ရွှေ့ပြောင်းနေရာချပေးနိုင်ဖို့ အထောက်အကူဖြစ်စေပါလိမ့်မယ်။ အဆိုပါအင်ဂျင်စမ်းသပ်ပြီး ရက်အနည်းငယ်အကြာမှာ မြောက်ကိုရီးယားက  ယခုလို ဒုံးကျည်စမ်းသပ်ပစ်လွှတ်မှုတွေ ပြန်လုပ်ဆောင်လာခြင်းဖြစ်ပါတယ်။

အဆိုပါစမ်းသပ်မှုကို မြောက်ကိုရီးယားခေါင်းဆောင်ကင်မ်ဂျုန်အန်ကိုယ်တိုင် ကြာသပတေးနေ့က ဦးစီးခဲ့တာဖြစ်ပြီး ဒုံးပျံအင်ဂျင်တွေနှင့် အကာသပစ်တင်ယာဉ်တွေစမ်းသပ်မှုတွေအပါအဝင် ဒုံးကျည်နည်းပညာတွေ စမ်းသပ်နေတဲ့နေရာဖြစ်တဲ့ ဆိုဟေးဂြိုဟ်တုစခန်းမှာ လုပ်ဆောင်ခဲ့တာပါ။

မြောက်ကိုးရီးယားဟာ  နိုင်ငံတကာကကန့်ကွက်အရေးယူမှုတွေပြုလုပ်နေတဲ့ကြားထဲက ဒီနှစ်ထဲမှာ မကြုံစဖူး ဒုံးကျည်တွေအများအပြားစမ်းသပ်ပစ်လွှတ်ခဲ့ပါတယ်။ အဲဒီအထဲမှာ တိုက်ကြီးအချင်းချင်းပစ်ခတ်နိုင်တဲ့ ပဲ့ထိန်းဒုံကျည်တစ်စင်းလည်းပါဝင်ပါတယ်။ အဲဒီဒုံးကျည်ဟာ အမေရိကန် ပင်မကုန်းမြေကြီးအထိရောက်အောင်ပစ်ခတ်နိုင်ပါတယ်။

ဂျပန်နိုင်ငံကလည်း တရုတ်ကိုတိုက်ခိုက်နိုင်စွမ်းရှိတဲ့ ဒုံးကျည်တွေဝယ်ယူမယ့် အမေရိကန်ဒေါ်လာ ၃၂၀ဘီလျံတန် စစ်ရေးမြှင့်တင်မယ့်အစီအစဉ်ကို သောကြာနေ့ကကြေညာခဲ့ရာမှာ ဒါဟာ ဒုတိယကမ္ဘာစစ်နောက်ပိုင်း အကြီးကျယ်ဆုံးဖြစ်ပါတယ်။

Source:Reuters/CNA

#North_Korea_Launches_two_missiles

#North_Korea_Missile_testings

#Korea_ Peninsula_tension

#Local_News
Published_ 18 December 2022

မန္တလေးမြို့၊ချမ်းအေးသာဇံမြို့နယ်နေ မြို့မငြိမ်း(ဦးညိန်း)၏သားဖြစ်သူ ဂီတစာဆိုမြို့မရွှန်းမြိုင်(ခေါ်) ဆရာကြီးဦးရွှန်းမြိုင်သည် ဒီဇင်ဘာလ(၁၈)ရက် နံနက်ပိုင်းတွင် ကွယ်လွန်သွားကြောင်း မြို့မငြိမ်းတူရိယာများအသင်း-မန္တလေးမှ သိရသည်၊၊

ဆရာကြီးဦးရွှန်းမြိုင်ကွယ်လွန်ချိန်တွင် အသက်(၇၉) နှစ်ရှိပြီဖြစ်ပြီး ဆရာကြီးကွယ်လွန်သွားသည့်အတွက် မိသားစုနှင့်အတူ ဝမ်းနည်းရကြောင်း မြို့မငြိမ်းတူရိယာများအသင်း-မန္တလေးမှ ထုတ်ပြန်ထားသည်၊၊

ဆရာကြီးကို ဒီဇင်ဘာလ(၂၀)ရက်တွင် အေးရိပ်ငြိမ်သုဿန်တွင် သဂြိုဟ်သွားရန်ရှိကြောင်း သိရသည်၊၊

မြို့မငြိမ်း(ဦးညိန်း)၏သားဖြစ်သူ ဆရာကြီးဦးရွှန်းမြိုင်သည် ဂီတတေးသီချင်းများစွာကို ရေးသားခဲ့သူဖြစ်ပြီး ဖခင်ဖြစ်သူ မြို့မငြိမ်း၏သီချင်းများကိုစုစည်း၍ မြို့မငြိမ်းမြန်မာသီချင်းများ အမှတ်စဥ်(၁)စာအုပ်နှင့်မြန်မာ့မဟာဂီတသီချင်းများ စန္ဒရားနှင့် သံစုံတီးဝိုင်းစာအုပ်ကို ထုတ်ဝေခဲ့သည်၊၊

မြို့မငြိမ်းမြန်မာသီချင်းများအမှတ်(၁)စာအုပ်ကို မြို့မငြိမ်း(၁၀၅) နှစ်ပြည့်အဖြစ်အမှတ်တရအဖြစ် ထုတ်ဝေခြင်းဖြစ်ပြီး မြို့မငြိမ်းရေးသားခဲ့သည့်တေးသီချင်းများအကြောင်း ပြုစုရေးသားထားခြင်းဖြစ်ကြောင်းနှင့် မြန်မာ့မဟာဂီတသီချင်းများ စန္ဒရားနှင့်သံစုံတီးဝိုင်းစာအုပ်တွင် မဟာဂီတသီချင်းများ၏စန္ဒယားလက်ကွက်များကို ပြုစုထားခြင်းဖြစ်ကြောင်း သိရသည်၊၊

ymg/tthl
#Yangon_Media_Group

#Local_News
Published_ 18 December 2022

ဧရာဝတီတိုင်းဒေသကြီးတွင်ဆေးရုံ (၁၃၃)ရုံဖြင့် တစ်ရက်ကို ပျမ်းမျှအတွင်း လူနာပေါင်း(၃၀၀၀)ကျော်ကို လက်ခံကုသပေးလျက်ရှိပြီး ကျိုက်လတ်ပြည်သူဆေးရုံတွင်လည်း တိုးချဲ့ကုသဆောင်သစ်ထပ်မံဖွင့်လှစ်လိုက်ကြောင်းသိရသည်၊၊

ယင်းကဲ့သို့ဧရာဝတီတိုင်းတွင် အတွင်းလူနာများလက်ခံကုသပေးနေသည့်အခြေအနေများနှင့် တိုးချဲ့ကုသဆောင်သစ်များ ထပ်မံဖွင့်လှစ်လိုက်ကြောင်းကို ကျန်းမာရေးဝန်ကြီးဌာန ၊ ပြည်ထောင်စုဝန်ကြီး ဒေါက်တာသက်ခိုင်ဝင်းက '(၇၅)နှစ်မြောက်စိန်ရတုလွတ်လပ်ရေးနေ့ကို ကြိုဆိုဂုဏ်ပြုသောအားဖြင့် ဧရာဝတီတိုင်းဒေသကြီး ကျိုက်လတ်မြို့ ပြည်သူ့ဆေးရုံ၏ တိုးချဲ့နှစ်ထပ်ကုသဆောင်သစ်ဖွင့်ပွဲအခမ်းအနား'၌ထည့်သွင်းပြောကြားခဲ့ခြင်းဖြစ်သည်၊၊

ပြည်ထောင်စုဝန်ကြီးက ကျန်းမာရေးဝန်ကြီးဌာန လက်အောက်ရှိ ပြည်သူ့ဆေးရုံပေါင်း (၁၁၇၈)ရုံအနက် ဧရာဝတီတိုင်းဒေသကြီးတွင် ဆေးရုံ (၁၃၃)ရုံ ခွင့်ပြုထားရှိကာ အဆောက်အအုံ ဆောက်လုပ်ဆဲနှင့် အဆောက်အအုံမရှိသေးသည့် တိုက်နယ်ဆေးရုံ ရှစ်ရုံမှအပ ဆေးရုံများအားလုံး လည်ပတ်ဆောင်ရွက်လျက်ရှိပြီး တစ်နေ့ ပျမ်းမျှအတွင်းလူနာပေါင်း ၃၀၀၀ ကျော်ကို လက်ခံကုသပေးလျက်ရှိကြောင်း၊ နိုင်ငံတော်စီမံအုပ်ချုပ်ရေးကောင်စီလက်ထက် ဧရာဝတီတိုင်းအတွင်း ၂၀၂၂ ခုနှစ် ဖေဖော်ဝါရီလတွင် ဟင်္သာတပြည်သူ့ဆေးရုံကြီး တိုးချဲ့သုံးထပ်ဆောင်သစ်ကို ဖွင့်လှစ်နိုင်ခဲ့ပြီး ခရိုင်ကုသရေး ဦးစီးဌာနရုံးနှစ်ရုံး တိုးချဲ့ဖွဲ့စည်း ခွင့်ပြုမှုရရှိခဲ့ပါကြောင်းပြောကြားခဲ့သည်၊၊

ဆက်လက်၍ ယခုဖွင့်လှစ်သည့် ကျိုက်လတ်မြို့ ပြည်သူ့ဆေးရုံ၏ တိုးချဲ့နှစ်ထပ်ကုသဆောင်သစ်ကို နိုင်ငံတော်၏ ရန်ပုံငွေမှ ကျပ်ငွေ (၃၉၇)ဒသမ (၇၃) သန်း အကုန်အကျခံ၍ တည်ဆောက်ခဲ့ပြီး ယခုအဆောင်သစ်တွင် လူနာဆောင်များ အဓိကပါဝင်ကာ အောက်ဆီဂျင်ပေး၍ ကြပ်မတ်ကုသနိုင်သည့် (HDU)ခုတင် ငါးလုံး အပါအဝင် စုစုပေါင်း ခုတင် ၅၀ ခန့်အထိ ထားရှိအသုံးပြုနိုင်မည်ဖြစ်ကာ နောင်ကာလတွင် ထပ်မံတိုးချဲ့နိုင်မည့်ပုံစံဖြင့်တည် ဆောက်ထားကြောင်းလည်း ထည့်သွင်းပြောကြားခဲ့သည်။

ymg/tthl
#Yangon_Media_Group

#LocalNews
Published_ 18 December 2022

တွံ့တေးတူးမြောင်းကို ဖြတ် တံတားသစ် တစ်စင်းကို ဆောက်လုပ်ရေးဝန်ကြီးဌာန တံတားဦးစီးဌာက ငွေကျပ်၃၄ ဘီလီယံ ဖြင့် တည်ဆောက်နေကြောင်း သိရသည်။

ယင်းတံတားမှာ ရန်ကုန်တိုင်းဒေသကြီး ဆိပ်ကြီးခနောင်တိုနှင့် ဒလမြို့နယ်တို့ကို ဆက်သွယ်ထားခြင်းဖြစ်ပြီး ပြည်ထောင်စု ငွေလုံးငွေရင်းရန်ပုံငွေဖြင့် တည်ဆောက်ရာတွင် တံတားချဉ်းကပ်လမ်း အတွက် ငွေကျပ် ၂ ဘီလီယံနှင့် တံတားတည်ဆောက်ရေး လုပ်ငန်းအတွက် ငွေကျပ် ၃၂ ဘီလီယံ ဖြစ်ပြီး လက်ရှိတွင် တံတား ၁၉ ရာခိုင်နှုန်းပြီးစီးနေပြီ ဖြစ်ကြောင်း အဆိုပါ ဝန်ကြီးဌာန၏ အချက်အလက်များအရ သိရသည်။

တံတားအရှည် ၇၄၀ မီတာရှိပြီး နှစ်လမ်းသွား သံမဏိသံပေါင်ခုံး တံတားဖြစ်ကာ ယာဉ်သွားလမ်းအကျယ် ၂၈ ပေ၊ ရေလမ်းကင်းလွတ် အမြင့် ၄၉ ပေနှင့် အကျယ် ၄၅၉ ပေ ၊ တံတားခံနိုင်ဝန်(ခွင့်ပြုအလေးချိန်)မှာ ယာဉ်တစ်စီးချင်း ၇၅ တန်ဖြစ်ကြောင်း၊ ပင်မတံတား ခန်းဖွင့်အကျယ် ၁၆၀ မီတာရှိ သံမဏိသံပေါင်ခုံး တံတားတစ်ခန်းနှင့် ခန်းဖွင့်အကျယ် ၄၅ မီတာစီရှိ Steel Box Girder နှစ်ခန်း၊ ဆိပ်ကြီးခနောင်တို မြို့နယ်ဘက်ခြမ်း၌ ချဉ်းကပ်တံတားခန်းဖွင့်အကျယ် ၃၀ မီတာ ရှစ်ခန်းနှင့် ခန်းဖွင့်အကျယ် ၂၀ မီတာ တစ်ခန်း၊ ဒလမြို့နယ် ဘက်ခြမ်း၌ ချဉ်းကပ်တံတားခန်းဖွင့် အကျယ် ၃၀ မီတာ ခုနစ်ခန်းနှင့် ခန်းဖွင့်အကျယ် ၂၀ မီတာ တစ်ခန်းစီတို့ဖြင့် တည်ဆောက်နေကြောင်း၊ တံတားအောက်ခံ အုတ်မြစ်များကို သံကူကွန်ကရစ် ဘိုးပိုင်၊ အပေါ်ထည်ပင်မတံတားမှာ သံမဏိသံပေါင် ခုံးတံတားနှင့် Steel Box Girder ဖြစ်၍ ချဉ်းကပ်တံတားများကို PC Girder များဖြင့် တည်ဆောက်လျက်ရှိကြောင်း သိရသည်။

ယခုအခါ ဒလမြို့နယ်ဘက်ခြမ်းရှိ ဘိုးပိုင်တူးဖော်ခြင်း လုပ်ငန်းများ ရာနှုန်းပြည့် ဆောင်ရွက်ပြီးစီးနေပြီ ဖြစ်ကာ Pier (တိုင်)လုပ်ငန်းများ ဆက်လက်ဆောင်ရွက်လျက် ရှိသည့်အပြင် ၂၀၂၂-၂၀၂၃ ဘဏ္ဍာနှစ် ပြည်ထောင်စုငွေလုံးငွေရင်း ရန်ပုံငွေ ငွေကျပ် ၂ ဘီလီယံဖြင့် ဆိပ်ကြီးခနောင်တိုမြို့နယ်ဘက်ခြမ်းရှိ ချဉ်းကပ်ရေလယ်တိုင်များဖြစ်သော တိုင်အမှတ် RP1 ၊ S2 ၊ S3 ၊ S4 နှင့် S5 တို့၏ ဘိုးပိုင်တူးဖော်ခြင်း လုပ်ငန်းများမှာလည်း ဆောင်ရွက်ပြီးစီးပြီဖြစ်ကြောင်း၊ ကျန်ရှိချဉ်းကပ် တံတားတိုင်များဖြစ်သော တိုင်အမှတ် S1 ၊ S နှင့် S7တို့၏ဘိုးပိုင်တူးဖော်ခြင်း လုပ်ငန်းများကို ဆက်လက်ဆောင်ရွက်လျက်ရှိကြောင်း သိရသည်။

ymg/mt
#Yangon_Media_Group

#LocalNews
Published_ 18 December 2022

လျှပ်စစ်သုံးယာဉ်များနှင့် ပတ်သက်၍ ပထမဆုံးအကြိမ် အထောက်အကူပြုသင်တန်းကို ဒီဇင်ဘာလ ၁၇ ရက်က ရန်ကုန်တိုင်းဒေသကြီး အင်းစိန်မြို့နယ်ရှိ အစိုးရစက်မှုလက်မှု သိပ္ပံ(အင်းစိန်)၌ ကျင်းပခဲ့ကြောင်း သိရသည်။

လောင်စာဆီအသုံးပြုမှုနှင့် လောင်စာဆီထုတ်လုပ်သည့် နိုင်ငံများကို မှီခိုရမှုမှ လျှော့ချနိုင်ရေး၊ သဘာဝပတ်ဝန်းကျင် ထိခိုက်မှု အနည်းဆုံးဖြစ်စေရေးရည်ရွယ်၍ လောင်စာဆီသုံးယာဉ်များအစား လျှပ်စစ်သုံးယာဉ်များဖြင့် ပြောင်းလဲအသုံးပြုနိုင်ရန်အပြင် Public Transportation အတွက် ခရီးတိုမြို့တွင်း ပြေးဆွဲသည့် လျှပ်စစ်ယာဉ်များ၊ လျှပ်စစ်ဘတ်စ်ကားများ တင်သွင်းထုတ်လုပ် အသုံးပြုနိုင်ရေးအတွက် ပြည်တွင်း၊ ပြည်ပရင်းနှီးမြှုပ်နှံမှုများ ဖိတ်ခေါ်ဆောင်ရွက်ရန်ရည်ရွယ်ထားသည့်အတွက် မြေပြင်တွင် လက်တွေ့အကောင်အထည်ဖော် ဆောင်ရွက်နိုင်ရေးအတွက် လုပ်ဆောင်ခြင်းဖြစ်ကြောင်း အဆိုပါ သင်တန်း၌ အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေးဦးဆောင်ကော်မတီ ဒုတိယဥက္ကဋ္ဌ၊ စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းကပြောသည်။

EV Policy ကို ဆောင်ရွက်ရာတွင် အမျိုးသားအဆင့် ဦးဆောင်ကော်မတီ၏ ဦးဆောင်မှုနှင့်အတူ လုပ်ငန်းကော်မတီ ငါးခုဖွဲ့စည်း ဆောင်ရွက်လျက်ရှိပြီး Pilot Project ကာလအတွင်း တင်သွင်းလာသည့် လျှပ်စစ်သုံးယာဉ်များ၊ အားသွင်းကိရိယာများကို တင်သွင်း၊ တပ်ဆင်၊ အသုံးပြုသည့်အခါ ချမှတ်ထားသည့် လမ်းညွှန်ချက်၊ ညွှန်ကြားချက်များနှင့်အညီဖြစ်စေရန်၊ ဘေးအန္တရာယ်ကင်းစေရန် ကြီးကြပ်ဆောင်ရွက်ရမည့် တာဝန်ရှိသူများကို လျှပ်စစ်သုံးယာဉ်များ၏ နည်းပညာဆိုင်ရာ အသိပညာဗဟုသုတများရရှိစေရန်၊ ယာဉ်စစ်ဆေးသည့်အခါတွင် အထောက်အကူဖြစ်စေရန်အတွက် သင်တန်းပြုလုပ်ခြင်းဖြစ်ကြောင်းလည်း သိရသည်။

EV ကားတစ်စီး၏ ဖွဲ့စည်းတည်ဆောက်မှုတွင် ပါဝင်သည့် စနစ်များယုံကြည်စိတ်ချရမှု၊ စွမ်းအင် သိုလှောင်မှုစနစ်၊ မော်တော်ယာဉ်တုန်ခါမှုကြောင့် ရုတ်တရက် Shock Circuit နှင့် Error များကို ကာကွယ်သည့်စနစ်၊ အပူချိန်လွန်ကဲမှုကို ကာကွယ်မည့်စနစ်၊ လူကိုအန္တရာယ်မဖြစ်စေရေး သတိပေးမည့် Alarm System များပါ မပါ၊ Specification များအတိုင်း အမှန်တကယ်တင်သွင်းလာမှု ရှိမရှိ စသည်တို့ကို စစ်ဆေးနိုင်ရန်လည်း သင်တန်းကို ပြုလုပ်ခြင်းဖြစ်ကြောင်းဒေါက်တာချာလီသန်းကပြောသည်။

ယင်းသင်တန်းတွင် လျှပ်စစ်ယာဉ်ပေါ်၌ ပါဝင်သည့် အမှတ်အသားများနှင့် ပတ်သက်သော ရှင်းလင်းချက်၊ စံချန်စံညွှန်းအရ တည်ဆောက်ထားသည့် EV Structure နှင့် High Voltage Battery အသုံးပြုထားခြင်းကြောင့် Insulation ပြုလုပ်ထားမှု၊ Battery အတွက် စမ်းသပ်စစ်ဆေးမှု၊ အားသွင်းစနစ်နှင့် EV ပါ Charging Modes များနှင့်ပတ်သက်၍ လေ့ကျင့်သင်ကြားခဲ့ကြောင်း သိရသည်။

ymg/mt
#Yangon_Media_Group

#World_Health
Published 18 December 2022

အခုနောက်ပိုင်းခေတ်မှာ အမျိုးသားတွေရဲ့ သုတ်ပိုးအကောင်ရေ သိသိသာသာလျော့နည်းလာကြကာ မျိုးမအောင်တဲ့ပြဿနာ အဖြစ်များလာကြပါတယ်။

တဲလ်အေဗစ်ဆူရာစကီဆေးစင်တာရှိ အမျိုးသားကျန်းမာရေးဌာန ညွှန်ကြားရေးမှူး ဒေါက်တာ'စနဲဒက်ကလို'က ဒီလိုဖြစ်ရတဲ့အကြောင်းကို ရှင်းပြသွားပါတယ်။

အရင်တုန်းက စုံတွဲတွေ ကလေးမရဘူးဆိုရင် အမျိုးသမီးတွေကြောင့်လို့ ယေဘုယျယူဆခဲ့ကြပါတယ်။

အခုခေတ်မှာတော့ ကလေးမရခြင်းရဲ့ ပြဿနာအကြောင်းအရင်း ၅၀ ရာခိုင်နှုန်းလောက်က အမျိုးသားတွေကြောင့်လည်း ဖြစ်တယ်လို့ သိလာကြပါပြီ။

ဒီအကြောင်းနဲ့ပတ်သက်ပြီးလည်း အချက်အလက်တွေက ရှုပ်ထွေးလျက်ရှိပြီး သုတ်ပိုးအကောင်ရေက တက်လိုက်ကျလိုက်ဖြစ်နေတတ်ပါတယ်။

သုတ်ပိုးကျဆင်းရခြင်းအကြောင်းအရင်း များစွာခန့်မှန်းနေကြပေမယ့် စိတ်ဖိစီးမှု၊ အဝလွန်ခြင်း၊ ဆေးလိပ်သောက်ခြင်း၊ ဘောင်းဘီအိတ်ထဲ လက်ကိုင်ဖုန်းထည့်ခြင်းတို့လောက် သေချာမသိကြပါဘူး။

ဒီပြဿနာအတွက် အမျိုးသမီးတွေကို ကုသတဲ့နည်းလမ်းများရှိသလို အမျိုးသားတွေအတွက်လည်း နည်းလမ်းတွေရှိပါတယ်။

သုတ်ရည်လွှတ်လိုက်တဲ့အထဲ ပမာဏ ၁ စီစီမှာ သုတ်ပိုးအကောင်ရေ ၁၅ သန်းရှိသင့်တဲ့အပြင် သုတ်ရည်ပမာဏ၊ သုတ်ပိုးလှုပ်ရှားနိုင်စွမ်းတို့ကိုလည်း အလေးထားရပါမယ်။

လှုပ်ရှားနိုင်စွမ်းကောင်းတဲ့ သုတ်ကောင်ရေ အနည်းဆုံး ၄၀ ရာခိုင်နှုန်းပါဝင်ဖို့လိုပြီး အရည်အသွေးလည်း ကောင်းရပါမယ်။

အမျိုးသားအယောက် ၁၀၀ မှာ တစ်ယောက်နှုန်းက သုတ်ရည်လွှတ်လိုက်တဲ့အထဲ သုတ်ပိုးလုံးဝမပါဝင်တာမျိုး ဖြစ်တတ်ပါတယ်။
ဓာတုကုထုံးများခံယူနေရတဲ့ အမျိုးသားတွေ၊ အကြောင်းအမျိုးမျိုးကြောင့် ဝှေးစေ့မဖွံ့ဖြိုးတဲ့အမျိုးသားတွေမှာ အဖြစ်များတတ်ပါတယ်။
အချို့လူတွေမှာတော့ သုတ်ပိုးထုတ်လွှတ်ရာ ဝှေးစေ့လမ်းကြောင်းမှာ ပိတ်ဆို့နေတာမျိုး ဖြစ်နေတတ်ပါတယ်။

သူတို့မှာတော့ သုတ်ပိုးထွက်ရှိတာဖြစ်တဲ့အတွက် ဝှေးစေ့ကနေ တိုက်ရိုက်ရရှိနိုင်အောင် ခွဲစိတ်နိုင်ရင် ၁၀၀ ရာခိုင်နှုန်းအောင်မြင်နိုင်ပါတယ်။

သုတ်ပိုးကောင်ရေနည်းခြင်း လှုပ်ရှားနိုင်စွမ်းနည်းခြင်းတို့မှာတော့ ကိုယ်အလေးချိန်လျှော့ချခြင်း၊ ဆေးလိပ်ဖြတ်ခြင်း စသဖြင့် နေထိုင်မှုပုံစံပြောင်းလဲပစ်ရပါတယ်။

ယောက်ျားတွေဟာ ဘဝတလျှောက်လုံး သုတ်ပိုးထုတ်လုပ်နိုင်ပေမယ့် အသက်ကြီးလာတာနဲ့အမျှ သုတ်ပိုးအရည်အသွေးကျဆင်းလာပါတယ်။
အခုခေတ်ဟာ မျိုးမအောင်တဲ့ပြဿနာဟာ ကိုယ်တစ်ယောက်တည်းဖြစ်တာ မဟုတ်ဘူးဆိုတာကို သိလာတာနဲ့အမျှ ပိုမိုပွင့်လင်းစွာပြောကြားလာကြတာကြောင့် ကုသမှုခံယူလာကြပါတယ်။

Source: The Jerusalem Post
#Yangon_Media_Group

#World_Health
Published 18 December 2022

ကိုယ့်ကိုယ်ကိုသတ်သေချင်စိတ်ဟာ အချို့လူတွေရဲ့ မျိုးရိုးဗီဇနဲ့ သက်ဆိုင်နေကြောင်း လေ့လာတွေ့ရှိထားပါတယ်။

မိမိကိုယ်ကိုသတ်သေခြင်း ဒါမှမဟုတ် သတ်သေချင်စိတ်ရှိတဲ့ စစ်မှုထမ်းဟောင်းတွေမှာ အတွေ့များတဲ့မျိုးရိုးဗီဇ ၄ မျိုးကို သိပ္ပံပညာရှင်များ တွေ့ရှိခဲ့ကြပါတယ်။

ထိုမျိုးရိုးဗီဇတွေက စိတ်ထိခိုက်ဒဏ်ရာရခြင်း၊ စိတ်ဓာတ်ကျခြင်း၊ စိတ်ကစဉ့်ကလျားဖြစ်စဉ်တို့နဲ့ ဆက်စပ်နေတာကို အရင်ကလည်း တွေ့ရှိခဲ့ကြပါတယ်။

ဒီမျိုးရိုးဗီဇတွေက သတ်သေချင်စိတ်ကို ဖြစ်စေပေမယ့် လူတွေရဲ့အနာဂတ်ကိုတော့ ဆုံးဖြတ်ပေးတာမဟုတ်ပါဘူး။

၂၀၂၀ မှာ အမေရိကန်လူမျိုး ၄၅,၉၇၉ ယောက် ကိုယ့်ကိုယ်ကိုသတ်သေခဲ့ပြီး စစ်မှုထမ်းဟောင်း ၆,၁၄၆ ယောက် ပါဝင်ခဲ့ပါတယ်။

အသက် ၄၅ နှစ်အောက် အမေရိကန်အမျိုးသားတွေမှာ ကိုယ့်ကိုယ်ကိုသတ်သေခြင်းက ဒုတိယသေဆုံးမှုအများဆုံး အကြောင်းအရင်းဖြစ်နေကြောင်း ရောဂါထိန်းချုပ်ကာကွယ်ရေးစင်တာရဲ့ အချက်အလက်တွေအရ သိရပါတယ်။

အမျိုးသမီးတွေမှာလည်း ၅၀ ရာခိုင်နှုန်း အဖြစ်များလာကာ ဆိုရှယ်မီဒီယာတွေကနေ စိတ်ဖိစီးမှုတွေနဲ့ မိမိကိုယ်ကိုယုံကြည်မှု ပြဿနာတွေ များလာတာက အဓိကသက်ဆိုင်နေနိုင်တယ်လို့ ပညာရှင်များက သတိပေးထားပါတယ်။

စစ်မှုထမ်းဟောင်း ၆၃၀,၀၀၀ ပါဝင်တဲ့ ဒေတာဘေ့စ်ထဲက သွေးနမူနာများကို မြောက်ကယ်ရိုလိုင်းနားမှ သုတေသီများ လေ့လာခဲ့ကြပါတယ်။
မျိုးရိုးဗီဇတွေက လူတိုင်းရဲ့သွင်ပြင်လက္ခဏာတွေနဲ့ ဦးနှောက်ဆောင်ရွက်ပုံတို့မှာ ပါဝင်ပတ်သက်နေပါတယ်။

လူတစ်ယောက်မှာ မျိုးရိုးဗီဇအတွဲပေါင်း ၂ သောင်းခန့်ရှိပါတယ်။
ဖခင်ဆီက တစ်ခုနဲ့ မိခင်ဆီက တစ်ခုတို့ဟာ သားအိမ်ထဲမှာပေါင်းစပ်ပြီး တစ်စုံဖြစ်သွားပါတယ်။

မျိုးရိုးဗီဇကွဲပြားချက်အရ လူတစ်ယောက်ရဲ့ ဦးနှောက်၊ အာရုံကြောစနစ်၊ ခန္ဓာကိုယ်လုပ်ဆောင်မှုတို့ဟာ စိတ်ကျန်းမာရေးအပေါ် သိသိသာသာပြောင်းလဲမှု ဖြစ်ပေါ်စေပါတယ်။

စမ်းသပ်ခဲ့တဲ့သူတွေထဲမှာ မိမိကိုယ်ကိုသတ်သေချင်သူနဲ့ သတ်သေဖို့ကြိုးပမ်းခဲ့သူ ၁၂၁,၂၁၁ ဦးရှိခဲ့ပါတယ်။

ထိုလူတွေမှာ အတွေ့အများဆုံးမျိုးရိုးဗီဇ ၄ မျိုးက ESR1, DRD2, DCC နဲ့ TRAF3 တို့ဖြစ်ပါတယ်။

မျိုးရိုးဗီဇတွေက အခြားပြဿနာအန္တရာယ်တွေမှာ သိပ်ပြီးမသက်ရောက်ပေမယ့် သတ်သေချင်စိတ်နဲ့ ပတ်သက်လာရင်တော့ ဇီဝဖြစ်စဉ်လမ်းကြောင်းတွေကို သိထားဖို့လိုပါတယ်လို့ ဒေါက်တာ'‌နသန်ကင်ဘရယ်လ်'က ဖော်ပြထားပါတယ်။

ကိုယ့်ကိုယ်ကိုသတ်သေချင်တဲ့စိတ်ဟာ အချို့လူမျိုး‌တွေနဲ့ ပိုမိုသက်ဆိုင်တယ်ဆိုတဲ့ ပတ်သက်မှုမျိုးတော့ မတွေ့ခဲ့ကြပါဘူး။

Source: DailyMail
#Yangon_Media_Group

#Local_News
Published_ 17 December 2022

အခုရက်ပိုင်းအတွင်း မြန်မာနိုင်ငံတောင်ပိုင်းဒေသတွေဖြစ်တဲ့ ရန်ကုန်၊တနင်္သာရီ၊ မွန်၊ ကရင်၊ ကယားစတဲ့ဒေသတွေမှာ ညအပူချိန်တွေကျဆင်းပြီး အအေးပိုဖို့ရှိတယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာန၊ ညွှန်ကြားရေးမှူးဦးလှထွန်းက ပြောပါတယ်၊၊

#Yangon_Media_Group

#Local_News
Published_17 December 2022

အခုဘဏ္ဍာနှစ်အတွင်းမှာ ပြည်ပကို ပဲမျိုးစုံတင်ပို့မှုပမာဏဟာ တန်ချိန် ၁ သန်းနဲ့ ၃ သောင်း ၈ ထောင်ကျော်အထိ ရှိလာတယ်လို့ စီးပွားရေးနဲ့ကူးသန်းရောင်းဝယ်ရေးဝန်ကြီးဌာနက သိရပါတယ်။

#Yangon_Media_Group

#World_Species
Published 17 December 2022

မျိုးသုဉ်းပျောက်ကွယ်လုနီးပါးဖြစ်နေတဲ့ အာဖရိကကုန်းတွင်းလိပ်အကောင်ရေ တိုးများလာစေရန်ရည်ရွယ်ပြီး လိပ်ကောင်ရေ ၅၀ ခန့်ကို မိုနာကိုကနေ ဆီနီဂေါကို စနေနေ့က ပို့ဆောင်နေပြီဖြစ်ပါတယ်။

#Yangon_Media_Group