#Local_News
Published_ 27 January 2023

ဘင်္ဂလားပင်လယ်အော်တွင်ဖြစ်ပေါ်နေသည့် လေဖိအားနည်းရပ်ဝန်းကြောင့် တနင်္သာရီတိုင်းဒေသကြီးတွင် မိုးရွာသွန်းနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ သိရသည်၊၊

လေဖိအားနည်းအရှိန်ကြောင့် တနင်္သာရီတိုင်းဒေသကြီးတွင် နေရာကွက်ကျားမိုးအနည်းငယ် ထစ်ချုန်းရွာနိုင်ပြီး ရှမ်းပြည်နယ်၊ ကယားပြည်နယ်နှင့် ကရင်ပြည်နယ်တို့တွင် ညအပူချိန်များအနည်းငယ် လျော့နည်းနိုင်သည်ဟု ဆိုသည်၊၊

အဆိုပါ လေဖိအားနည်းရပ်ဝန်း(Low Pressure Area)သည် အနောက်-အနောက်မြောက်ဘက်သို့ရွေ့လျားနိုင်ပြီး၊ ဇန်နဝါရီ ၂၉ ရက်တွင် အားကောင်းသော လေဖိအားနည်းရပ်ဝန်း (Well Marked Low Pressure Area) အဖြစ်သို့ လည်းကောင်း၊ ဇန်နဝါရီ ၃၁ရက်တွင် မုန်တိုင်းငယ် (Depression)အဖြစ်သို့လည်းကောင်း ပိုမိုအားကောင်းလာနိုင်ကာ၊ ဖေဖော်ဝါရီ(၁)ရက်တွင် ဘင်္ဂလားပင်လယ်အော်အနောက်တောင်ပိုင်းနှင့် ဆက်စပ်လျက်ရှိသောသီရိလင်္ကာနိုင်ငံကမ်းခြေအနီးသို့ ရောက်ရှိနိုင်သည်ဟုခန့်မှန်းထားကြောင်း သိရသည်၊၊

#ymg/tthl
#Yangon_Media_Group

#Local_News
Published_27 January 2023

ပြည်ထောင်စု တစ်ဝန်းလုံးစည်းရုံးမည့် ပါတီကြီးတွေအနေဖြင့် ပါတီရန်ပုံငွေ ကျပ်သိန်း ၁၀၀၀ ကို မြန်မာ့စီးပွားရေးဘဏ်တွင် ငွေစာရင်းဖွင့်ထားသည့် အထောက်အထားပြသရမည်ဖြစ်ကြောင်း နိုင်ငံရေးပါတီများ မှတ်ပုံတင်ခြင်း ဥပဒေတွင် ပြဋ္ဌာန်းထားသည်။

ယင်းအပြင် ပြည်နယ်နှင့် တိုင်းဒေသကြီးတွင် အခြေစိုက်စည်းရုံးမည့် ပါတီတွေအနေဖြင့် ပါတီရန်ပုံငွေ ကျပ်သိန်း ၁၀၀ တို့ကို မြန်မာ့စီးပွားဘဏ်တစ်ခုခုတွင် ငွေစာရင်းဖွင့်လှစ်ထားပြီးဖြစ်သည်ဆိုသည့် အထောက်အထား လိုအပ်ကြောင်း သိရသည်။

အလားတူ ပြည်ထောင်စုအဆင့် နိုင်ငံရေးပါတီများအနေဖြင့် ပါတီမှတ်ပုံတင်ခွင့် ခွင့်ပြုသည့် ရက်မှစပြီး ရက်ပေါင်း ၁၈၀ အတွင်း တစ်နိုင်ငံလုံး၏ မြို့နယ်အားလုံးထက်ဝက်တွင် ပါတီရုံးခန်းဖွင့်လှစ်မည်ဆိုသည့် ဝန်ခံချက် ပြုလုပ်ရမည်ဖြစ်ကြောင်းလည်း ဖော်ပြထားသည်။

တိုင်းနှင့် ပြည်နယ်အဆင့်ပါတီဆိုပါက စည်းရုံးမည့်ပါတီတွေအနေဖြင့် တိုင်းနှင့်ပြည်နယ်အသီးသီးတွင် ရက်ပေါင်း ၁၈၀ အတွင်း အနည်းဆုံး မြို့နယ် ၅ မြို့နယ်၌ ပါတီရုံးခန်းဖွင့်ရမည်ဆိုသည့် ဝန်ခံချက်ပြုရမည်ဖြစ်ကြောင်း ဥပဒေတွင် ဖော်ပြထားသည်။

နိုင်ငံရေးပါတီများမှတ်ပုံတင်ခြင်းဥပဒေကို နိုင်ငံတော်စီမံအုပ်ချုပ်ရေးကောင်စီဥပဒေအမှတ် ၁၅/၂၀၂၃ အဖြစ် ဇန်နဝါရီလ ၂၆ ရက် ရက်စွဲဖြင့် ထုတ်ပြန်ကြေညာထားခြင်း ဖြစ်သည်။

#ymg/sth
#Yangon_Media_Group

#World_Space
Published 27 January 2023

အမေရိကန်စံတော်ချိန် ကြာသပတေးနေ့ညမှာ ဂြိုဟ်သိမ်ဂြိုဟ်မွှားတစ်ခုဟာ ကမ္ဘာဂြိုဟ်အနားကနေ အန္တရာယ်မဖြစ်စေဘဲ ဖြတ်သန်းသွားမှာဖြစ်ကြောင်း နာဆာ(NASA)က ပြောကြားလိုက်ပါတယ်။

နာဆာရဲ့ပြောကြားချက်အရ ဒီဂြိုဟ်မွှားဟာ ရွေ့လျားနေတဲ့ ထရပ်ကားတစ်စီးအရွယ်မျှသာရှိပြီး ကမ္ဘာနဲ့အနီးဆုံးဖြတ်သန်းဖူးမယ့် အရာဖြစ်ကာ တောင်ဝင်ရိုးစွန်းနားကနေ ဖြတ်သန်းသွားမှာဖြစ်ပါတယ်။

အဆိုပါဂြိုဟ်က ကမ္ဘာမြေနဲ့ အလွန်နီးကပ်စွာဖြတ်သန်းသွားမယ်လို့ နာဆာက ဖော်ပြထားတာဖြစ်ပါတယ်။

ဒီဂြိုဟ်သိမ်ဂြိုဟ်မွှားကို '2023 BU' လို့ နာမည်ပေးထားကာ တောင်အမေရိကရဲ့ တောင်ဘက်စွန်းကနေ ဒေသစံတော်ချိန်ည ၇:၂၇ မှာ ဖြတ်သန်းမှာဖြစ်ပြီး ကမ္ဘာ့မြေမျက်နှာပြင်အထက် မိုင် ၂,၂၀၀ ခန့်သာ ကွာဝေးမှာဖြစ်ပါတယ်။

"ဒါဟာ ကမ္ဘာဂြိုဟ်နဲ့ နီးစပ်ခဲ့ဖူးသမျှထဲမှာ အနီးကပ်ဆုံးအရာဖြစ်ပါတယ်" လို့ တောင်ကယ်လီဖိုးနီးယား နာဆာဂြိုဟ်တုလွှတ်တင်ရေးစမ်းသပ်ခန်းမှ လမ်းကြောင်းအင်ဂျင်နီယာ 'ဒေးဗစ်ဖာနိုခီယာ'က ပြောပြပါတယ်။

ကမ္ဘာကိုဝင်တိုက်မှာ မဟုတ်ပေမယ့် တိုက်ခဲ့မယ်ဆိုရင်တောင် မီးလုံးကြီးကဲ့သို့ မြင်ရမှာဖြစ်ကာ ဥက္ကာခဲလေးတွေ ကျလာသလို အစအနတွေသာ လွင့်စင်လာမှာဖြစ်ကြောင်း သိပ္ပံပညာရှင်တွေ အကြိမ်ကြိမ်ဆိုထားပါတယ်။

ဒီဂြိုဟ်မွှားကို အနားကပ်မှ သတိထားမိတာဖြစ်ပြီး ခရိုင်းမီးယားမှ နက္ခတ္တဗေဒပညာရှင်'ဂန်နက်ဒီဘိုရီဆော့ဗ်'က စနေနေ့မှာ တွေ့ရှိခဲ့တာဖြစ်ပါတယ်။

နာဆာက ကမ္ဘာမြေကို အန္တရာယ်ဖြစ်စေနိုင်တဲ့ အရာတွေကို ရှာဖွေခြင်း၊ ဆန်းစစ်ခြင်း၊ ကာကွယ်ခြင်းတို့ကို အလေးထားဆောင်ရွက်နေချိန်မှာ အခုလို တွေ့ရှိလာကြတာဖြစ်ပါတယ်။

2023 BU ဂြိုဟ်မွှားက ကမ္ဘာ့ဂြိုဟ်ပတ်လမ်းကြောင်းမှ ဂြိုဟ်တုစလောင်းတွေနားတဝိုက် ရောက်လာမှာဖြစ်ပြီး အရင်က နီးစပ်ခဲ့ဖူးတဲ့အရာတွေထက် ၁၀ ဆပိုမိုနီးစပ်စွာ ရောက်ရှိလာမှာဖြစ်ပါတယ်။

Source: npr
#Yangon_Media_Group

#Local_News
Published_ 27 January 2023

တစ်ပတ်တာအတွင်း ထိုင်းပြန်(၁၆)ဦး အပါအဝင် ပြည်ပပြန်(၂၄)ဦး၌ ကိုဗစ်ပိုးတွေ့ရှိရကြောင်း ကျန်းမာရေးဝန်ကြီးဌာန၏ ထုတ်ပြန်ချက်အရသိရသည်၊၊

ဇန်နဝါရီလ(၂၀)ရက်မှ (၂၅)ရက်ခုနှစ်ရက်တာအတွင်း ထိုင်းနိုင်ငံပြန်ဝင်လာသူ(၁၆)ဦး၊ ထိုင်ဝမ်မှ(၃)ဦး၊ မလေးရှားမှ(၄)ဦး၊ ရုရှားမှ(၁)ဦးစုစုပေါင်း (၂၄)ဦးတွင် ကိုဗစ်ပိုးများတွေ့ရှိရခြင်း ဖြစ်သည်၊၊

ပိုးတွေ့ရှိရသည့် ပြည်ပပြန်များနေထိုင်သည့် မြို့နယ်များကတော့ မြဝတီ၊ မော်လမြိုင်၊ မင်္ဂလာဒုံ၊ မရမ်းကုန်း၊ ဒဂုံဆိပ်ကမ်းမြို့နယ်တို့ဖြစ်ကြောင်း ထုတ်ပြန်ချက်တွင် ဖော်ပြပါရှိသည်၊၊

မြန်မာနိုင်ငံအနေဖြင့် ကိုဗစ်ပိုးကူးစက်မှုတွင် ပြည်တွင်းကူးစက်မှုများ နည်းပါးနေပြီဖြစ်သော်လည်း ပြည်ပမှပြန်ဝင်ရောက်လာသည့် ပြည်ပပြန်များတွင် ကိုဗစ်ပိုး positiveတွေ့ရှိမှုများ ပြန်များလာကြောင်း သိရသည်၊၊

ကျန်းမာရေးဝန်ကြီးဌာနအနေဖြင့် လေဆိပ်နှင့် နယ်စပ်ဝင်ထွက်ပေါက်များတွင် ကိုဗစ်လက္ခဏာရှိမရှိနှင့် ကိုဗစ်ပိုးရှိမရှိကို သေသေချာချာကြပ်မတ်ပြီး စစ်ဆေးဆောင်ရွက်ပေးလျက်ရှိကြောင်းနှင့် ကုသမှုများ ဆောင်ရွက်ပေးလျက်ရှိကြောင်း သိရသည်၊၊

#ymg/tthl
#Yangon_Media_Group

#Local_News
Published_27 January 2023

နိုင်ငံရေးပါတီတစ်ခုအနေဖြင့် ပါတီဖျက်သိမ်းခြင်းမခံရစေရန် အနည်းဆုံး မဲဆန္ဒနယ်သုံးခုဝင်ပြိုင်ရမည်ဆိုသည့် အချက်ကို အသစ်ပြဋ္ဌာန်းလိုက်သည့် နိုင်ငံပါတီများမှတ်ပုံတင်ခြင်း ဥပဒေတွင် ပယ်ဖျက်ထားကြောင်း သိရသည်။

အဆိုပါ အချက်ကို ပယ်ဖျက်ခဲ့ပြီးနောက် နိုင်ငံရေးပါတီတွေအနေဖြင့် ပြည်ထောင်စုတစ်ဝန်းလုံး စည်းလုံးမည့် ပါတီဆိုပါက အနည်းဆုံးမဲဆန္ဒနယ်အားလုံး၏ ထက်ဝက်တွင် ဝင်ပြိုင်ရမည်ဖြစ်ကြောင်း ဖော်ပြထားသည်။ အလားတူ ပြည်နယ်နှင့် တိုင်းဒေသကြီးတွင် စည်းရုံးမည့် ပါတီဆိုပါက တိုင်းနှင့်ပြည်နယ်အသီးသီး၌ ပြုလုပ်သည့် ရွေးကောက်ပွဲ၏ အနည်းဆုံး မဲဆန္ဒနယ်တစ်ခုတွင် ဝင်ပြိုင်ရမည်ဖြစ်ကြောင်း ပြင်ဆင်ထားသည်။

ယင်းအပြင် ရွေးကောက်ပွဲကျင်းပပြီးနောက်ပိုင်းမှ ဖွဲ့စည်းခွင့်ရသည့် နိုင်ငံရေးပါတီများကိုလည်း ယင်းနောက်တွင် ကျင်းပသည့် ကြားဖြတ်ရွေးကောက်ပွဲ၌ ဝင်ရောက်ယှဉ်ပြိုင်ခွင့်ပြုမည်မဟုတ်ကြောင်း ပြဋ္ဌာန်းထားသည်။

နိုင်ငံရေးပါတီများမှတ်ပုံတင်ခြင်းဥပဒေကို နိုင်ငံတော်စီမံအုပ်ချုပ်ရေးကောင်စီဥပဒေအမှတ် ၁၅/၂၀၂၃ အဖြစ် ဇန်နဝါရီလ ၂၆ ရက် ရက်စွဲဖြင့် ထုတ်ပြန်ကြေညာထားသည်။

#ymg/sth
#Yangon_Media_Group

#World_Health
Published 27 January 2023

အဆီအနံ့ရှူရှိုက်ခြင်းဖြင့် ကုသနည်းဟာ အလုပ်ဒဏ်ပိပြီး ဖိစီးမှုများခြင်းကို အကောင်းဆုံးဖြေရှင်းနိုင်ဖွယ် ရှိနေပါတယ်။

လည်ပင်းမှာ နှင်းဆီရနံ့ပါတဲ့ ပုလင်းလေးဆောင်ပြီး သွားလေရာပန်းအနံ့ရနေတဲ့ သူနာပြုတွေမှာ စိတ်ဖိစီးမှုလျော့ကျသွားပါတယ်။

ဒီနည်းလမ်းက အလုပ်ခွင်မှာ ဖိစီးမှုကို ထိရောက်အောင်လျှော့ချနိုင်ပြီး ဆက်လက်အသုံးပြုတဲ့အခါ ပိုပြီးထိရောက်မှုရှိကြောင်း အီရန်ရှိကျွမ်းကျင်သူများက အဆိုပြုလိုက်ပါတယ်။

စိတ်ဖိစီးမှုက မြင့်မားလာတဲ့အခါ စိတ်အားအင်ကုန်ခမ်းခြင်း၊ စိုးရိမ်ပူပန်ခြင်း၊ သွေးပေါင်ချိန်တိုးခြင်း၊ အိပ်စက်ရခက်ခဲခြင်း၊ စားချင်စိတ်ပြောင်းလဲခြင်းတို့ ဖြစ်ပေါ်စေပါတယ်။

စိတ်ဖိစီးမှုလျော့ကျဖို့အတွက် ယောဂကျင့်ခြင်း၊ အပ်စိုက်ခြင်း၊ တရားထိုင်ခြင်းတို့ ပြုလုပ်နိုင်သလို အခု မွှေးရနံ့ဖြင့်ကုသခြင်းကလည်း နောက်ထပ်နည်းလမ်းတစ်ခုဖြစ်လာကြောင်း ဆမ်နန်ဆေးသိပ္ပံတက္ကသိုလ်မှ သုတေသီအဖွဲ့က ဆိုပါတယ်။

လာဗင်ဒါအနံ့ ဒါမှမဟုတ် နှင်းဆီအနံ့ဖြင့် တစ်နေ့ကို ၂ နာရီမျှရှူရှိုက်ခြင်းဖြင့် သူနာပြုတွေမှာ အလုပ်ခွင်၌စိတ်ဖိစီးမှုကို ထိရောက်စွာလျှော့ချပေးနိုင်ကြောင်း စမ်းသပ်တွေ့ရှိခဲ့ကြပါတယ်။

ဒီနည်းလမ်းက အချိန်ကြာမြင့်စွာ အသုံးပြုတဲ့အခါမှာလည်း ပိုပြီးအကျိုးရှိလာပါတယ်။

ထိရောက်မှုပမာဏက အဆီအနံ့ကနေ ဦးနှောက်နဲ့ အာရုံကြောစနစ်တို့ကို ဘယ်လိုသက်ရောက်နေသလဲဆိုတဲ့အပေါ် မူတည်နေပါတယ်။

ဒီအနံ့တွေကိုရှူလိုက်တဲ့အခါ အနံ့အာရုံကြောကို လှုံ့ဆော်ပေးကာ စိတ်ခံစားချက်တုန့်ပြန်မှုကို ဖြစ်စေပါတယ်။

မိတ်ဆွေတွေ၊ မိသားစုဝင်တွေနဲ့ စကားပြောရာမှာ ဖိစီးမှုကြုံတွေ့ရသူတွေအနေနဲ့ အသက်ရှူလေ့ကျင့်ခန်းတွေ ပြုလုပ်သင့်ကြောင်း NHS က အကြံပြုထားပါတယ်။

အဆီအနံ့ရှူခြင်းအပြင် ဆီလိမ်းနှိပ်ခံခြင်းကလည်း စိတ်ရောကိုယ်ပါ ကျန်းမာစေနိုင်ပါတယ်။

အဆီအနံ့တွေက စိုးရိမ်ပူပန်ခြင်း၊ ဖိစီးခြင်း၊ နာကျင်ခြင်း၊ စိတ်ဓာတ်ကျခြင်းတို့ကို သက်သာစေပါတယ်။

Source: Daily Mail
#Yangon_Media_Group

#Local_News
Published_ 27 January 2023

ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီက နိုင်ငံခြားရင်းနှီးမြှုပ်နှံမှု လုပ်ငန်း ၉ ခုနှင့် မြန်မာနိုင်ငံသားရင်းနှီးမြှုပ်နှံမှု လုပ်ငန်း တစ်ခုတို့ကို အတည်ပြုခွင့်ပြုခဲ့ကြောင်း အဆိုပါ ကော်မတီက သိရသည်။

ပြီးခဲ့သည့် ဇန်နဝါရီလ ၂၅ ရက်က ရန်ကုန်တိုင်းဒေသကြီး၊ ရန်ကင်းမြို့နယ်၊ ကမ္ဘာအေးဘုရားလမ်းပေါ်ရှိ ရန်ကုန်တိုင်းဒေသကြီး ရင်းနှီးမြှုပ်နှံမှု ကော်မတီရုံးတွင် ကျင်းပသော ကော်မတီအစည်းအဝေးအတွင်း လျှပ်စစ်ကဏ္ဍအတွက် နိုင်ငံခြားရင်းနှီးမြှုပ်နှံမှု လုပ်ငန်းတစ်ခု၊ စက်မှုကဏ္ဍမှာ မြန်မာနိုင်ငံသားရင်းနှီးမြှုပ်နှံမှုလုပ်ငန်းတစ်ခုနှင့် နိုင်ငံခြားရင်းနှီးမြှုပ်နှံမှုလုပ်ငန်း ရှစ်ခုတို့ကို အတည်ပြုခဲ့ခြင်း ဖြစ်ကြောင်း သိရသည်။

အဆိုပါရင်းနှီးမြှုပ်နှံမှု လုပ်ငန်းများ၏ မတည်ငွေရင်းပမာဏမှာ ကျပ်သန်း ၆၀၀၀ ခန့် နှင့် အမေရိကန်ဒေါ်လာ ၁၀ သန်းကျော်ရှိပြီး ပြည်တွင်း အလုပ်အကိုင်အခွင့်အလမ်း ၄၃၀၀ ကျော် ဖန်တီးပေးနိုင်မည် ဖြစ်ကြောင်း ရန်ကုန်တိုင်းဒေသကြီး ရင်းနှီးမြှုပ်နှံမှု ကော်မတီ၏ ထုတ်ပြန်ချက်တွင် ဖော်ပြထားသည်။

ယင်း အတည်ပြုပေးခဲ့သည့် လုပ်ငန်းများမှာနေရောင်ခြည်စွမ်းအင်သုံး ဆိုလာစနစ်တပ်ဆင်ပြီး လျှပ်စစ်စွမ်းအင် ထုတ်လုပ်ဖြန့်ဖြူးသည့် လုပ်ငန်း၊ မြေပဲ နှင့် နေကြာများ ကြိတ်ခွဲပြီး ဆီထုတ်လုပ်ခြင်းနှင့်စားအုန်းဆီသန့်စင် ထုတ်လုပ်ရောင်းချသည့်လုပ်ငန်းများ၊ ဆေးဆိုး ပန်းရိုက်အဝတ်အထည်များကို ထုတ်လုပ်၍ ပြည်တွင်း CMP လုပ်ငန်းများကို ရောင်းချသည့်လုပ်ငန်း၊ အီလက်ထရွန်နစ် အစိတ်အပိုင်း အမျိုးမျိုးထုတ်လုပ်သည့် လုပ်ငန်း၊ ထုပ်ပိုးပစ္စည်းများကို ထုတ်လုပ်ပြီး ပြည်တွင်း CMP ဖိနပ်လုပ်ငန်းများကို ရောင်းချသည့်လုပ်ငန်း စသည်တို့ ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published_ 27 January 2023

Black List အေဂျင်စီများ အလုပ်ခေါ်စာအသစ် တင်ခွင့်မရှိသော်လည်း ယခင် စာချုပ်ချုပ်ပြီး အလုပ်သမားများအတွက် ဆက်လက်စေလွှတ်ခွင့်ရရှိကြောင်း သိရသည်။

မြဝတီမြို့တွင် MoU အလုပ်သမားအတွက် နိုင်ငံကူးလက်မှတ်လျှောက်ထားမှုပြုလုပ်ခဲ့သည့် ပြည်ပအလုပ်အကိုင်အေဂျင်စီ ၁၃၃ ခုကို ပြည်ထဲရေးဝန်ကြီးဌာနက ညွှန်ကြားချက်ဖြင့် စစ်ဆေးကာ Black List စာရင်း သွင်းမည်ဟု အေဂျင်စီအမည်စာရင်းများကို စာရင်းပြုလုပ်ကာ အလုပ်သမား ဝန်ကြီးဌာန၊ အလုပ်သမားညွှန်ကြားရေးဦးစီးဌာနထံ အကြောင်းကြားထားပြီးလည်း ဖြစ်ကြောင်း သိရသည်။

ယင်းကြောင့် ပြည်ပအလုပ်အကိုင်ရှာဖွေရေးတရားဝင်(ထိုင်း)လိုင်စင်ရအေဂျင်စီ ၁၃၃ ခုကို အလုပ်ခေါ်စာအသစ် တင်ခွင့်အတွက် လက်ရှိတွင် ပိတ်သိမ်းထားခြင်း ဖြစ်သော်လည်း နဂိုက မပို့ဆောင်ရသေးသည့် MoU လုပ်သားများအား ပို့ခွင့်ပေးထားဆဲဖြစ်ကြောင်းလည်း သိရသည်။

#ymg/mt
#Yangon_Media_Group

#World_Health
Published 27 January 2023

လက်သည်းအလှဆင်ရာမှာ အသုံးပြုတဲ့ ခရမ်းလွန်ရောင်ခြည်ပါ လက်သည်းအခြောက်ခံ ပစ္စည်းကိရိယာတွေဟာ ယခင်ကထင်ထားတာထက်ပိုပြီး ကျန်းမာရေးအတွက် စိုးရိမ်စရာဖြစ်နိုင်ပါတယ်။

ဆန်ဒီယေဂို ကယ်လီဖိုးနီးယားတက္ကသိုလ်မှ သုတေသီများက အဆိုပါ ခရမ်းလွန်ရောင်ခြည်ထွက် ကိရိယာများကို လေ့လာရာမှာ ဆဲလ်သေဆုံးခြင်းဖြစ်စေပြီး ကင်ဆာဖြစ်စေတဲ့ ဆဲလ်ဗီဇပြောင်းလဲမှုများ ဖြစ်စေနိုင်တယ်လို့ တွေ့ရှိခဲ့ကြပါတယ်။

ထိုကိရိယာတွေကို လက်သည်းအလှပြင်ဆိုင်တွေမှာ အများဆုံးတွေ့ရပြီး များသောအားဖြင့် ခရမ်းလွန်ရောင်ခြည်ထဲက ၃၄၀-၃၉၅ နာနိုမီတာရှိတဲ့ ရောင်စဉ်တစ်မျိုးကို အသုံးပြုကာ ဓာတုပစ္စည်းများခြောက်သွေ့စေတာ ဖြစ်ပါတယ်။

နေရောင်ကဲ့သို့အလင်းဓာတ်ပေးတဲ့ အိပ်ရာတွေမှာ ခရမ်းလွန် ရောင်ခြည် အမျိုးမျိုးအသုံးပြုထားကာ ကင်ဆာဖြစ်နိုင်တယ်လို့ တွေ့ရှိထားပေမယ့် လက်သည်းနီခြောက်စက်တွေထဲက ရောင်စဉ်တွေကိုတော့ မလေ့လာခဲ့ကြပါဘူး။

စက်ပစ္စည်းတွေကို ထုတ်လုပ်တဲ့နေရာမှာတော့ ဘေးကင်းစိတ်ချရပြီး စိုးရိမ်စရာမရှိဘူးလို့ ရောင်းချကြပါတယ်။

လူ့အရေပြားမှ ဆဲလ်လမ်းကြောင်း ၃ မျိုးကိုလေ့လာရာမှာ အဆိုပါ ခရမ်းလွန်ရောင်ခြည်ပစ္စည်းတွေကို မိနစ် ၂၀ ကြာဆက်ရှင်ခန့် အသုံးပြုခြင်းဖြင့် ဆဲလ် ၂၀ မှ ၃၀ ရာခိုင်နှုန်းသေဆုံးစေကြောင်း ကယ်လီဖိုးနီးယားမှ သုတေသီများတွေ့ရှိခဲ့ကြပါတယ်။

ဆက်ရှင် ၃ ခုဆက်တိုက်ထိတွေ့နေရင်တော့ ဆဲလ်တွေ ၆၅ မှ ၇၀ ရာခိုင်နှုန်းအထိ သေဆုံးနိုင်ပါတယ်။

အရင်ဆုံး DNA ထိခိုက်ကြောင်း၊ DNA အချို့က အချိန်မီ ပြုပြင်နိုင်ခြင်းမရှိကာ လက်သည်းနီခြောက်စက်နဲ့ ထိတွေ့ပြီးတော့ ဗီဇဆင့်ကဲပြောင်းလဲသွားကြောင်း၊ ဒီနောက် ကင်ဆာလူနာတွေမှာ တွေ့ရတဲ့ပုံစံနဲ့ တူညီစွာတွေ့ရကြောင်း ဇီဝအင်ဂျင်နီယာနှင့် မော်လီကျူးဆိုင်ရာ ပရော်ဖက်ဆာ'အဲလက်ဇန်ဒရော့ဗ်'က ပြောပြသွားပါတယ်။

သူ့ရဲ့ဓာတ်ခွဲခန်းမှ ဒေါက်တာ'မာရီယာဇီဗာဂီ'က အစက လက်သည်းအလှဆင်ခြင်းကို ဝါသနာပါပေမယ့် အခုလို တွေ့ရှိပြီးနောက် အသုံးမပြုတော့ပါဘူး။

တစ်နှစ်တစ်ခါလောက်မှ လက်သည်းအလှဆင်တဲ့သူတွေကကော စိုးရိမ်စရာရှိလားဆိုတာကတော့ စဉ်းစားစရာရှိနေပါတယ်။

သုတေသနအရတော့ ခရမ်းလွန်ရောင်ခြည်သုံး လက်သည်းဆိုးဆေးခြောက်စက်တွေကနေ ထွက်တဲ့ရောင်ခြည်ဟာ လက်မှာကင်ဆာဖြစ်နိုင်ကာ ကင်ဆာအစောပိုင်းဖြစ်နိုင်ချေ မြင့်မားစေပါတယ်။

ခရမ်းလွန်ရောင်ခြည်ပါတဲ့ အခြားအလှကုန်ပစ္စည်းတွေထဲမှာ သွားဖာခြင်း၊ ဆံပင်ချွတ်ဆေးတို့မှာ အသုံးပြုတဲ့ကိရိယာတွေ ပါဝင်ပါတယ်။

Source: The Jerusalem Post
#Yangon_Media_Group

#Myanmar_News
Published 27 January 2023

နိုင်ငံရေးပါတီများ မှတ်ပုံတင်ခြင်း ဥပဒေကို နိုင်ငံတော်စီမံအုပ်ချုပ်ရေးကောင်စီ ဥပဒေအမှတ် ၁၅/၂၀၂၃ အဖြစ် ယနေ့ ဇန်နဝါရီ (၂၆)ရက်ရက်စွဲဖြင့် ထုတ်ပြန်ကြေညာလိုက်ပါတယ်။

ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှု မပြိုကွဲရေးနှင့် အချုပ်အခြာအာဏာတည်တံ့ ခိုင်မြဲရေးတို့ကို ဦးတည်ချက်ထားရှိသော၊ နိုင်ငံတော်၏ကျေးဇူးသစ္စာကို စောင့်သိ ရိုသေသော၊ စစ်မှန်၍စည်းကမ်းပြည့်ဝသည့် ပါတီစုံဒီမိုကရေစီစနစ်ကို လက်ခံ ကျင့်သုံးသော နိုင်ငံရေးပါတီများ ဖွဲ့စည်းနိုင်ရန် ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံအခြေခံဥပဒေပုဒ်မ ၄၁၉ အရ ပြဋ္ဌာန်းလိုက်တယ်ဖြစ်တယ်လို့ ဥပဒေမှာဖော်ပြထားပါတယ်။
ဥပဒေအပြည့်အစုံကိုဖော်ပြလိုက်ပါတယ်။

-ymg/knl
#Myanmar
#Myanmar_Politics

#Local_News
Published_ 26 January 2023

ဗိုလ်တထောင်စေတီတော်ရဲ့ လိပ်ကန်အတွင်းမှ အသက်(၈၀)ကျော်ရှိတဲ့ရှားပါးလိပ်ဘွားဘွားနဲ့ အခြားလိပ်စုစုပေါင်း(၂၅၆)ကောင်ကို လိပ်ပညာရှင်တွေက ကျန်းမာရေးစောင့်ရှောက်မှုတွေပေးခဲ့တယ်လို့ ဗိုလ်တထောင်စေတီတော် ဂေါပကအဖွဲ့ထံမှ သိရပါတယ်၊၊

#Yangon_Media_Group

#World_Fashion
Published 26 January 2023

စကြဝဠာတစ်ခုလုံးကို ခြုံငုံဒီဇိုင်းဖော်ထားတဲ့ အိန္ဒိယဒီဇိုင်နာ'ရာဟူမစ်ရှရာ'ရဲ့ နောက်ဆုံးပဲရစ်ဖက်ရှင်ရှိုးပွဲကို ပြင်သစ်မှာပြုလုပ်ခဲ့ပါတယ်။

#Yangon_Media_Group