#Local_News
Published- 25 February 2023

ရခိုင်ပြည်နယ်အတွင်း တိုက်ပွဲများမရှိတော့၍ မင်းပြားမြို့နယ်၊ တိုက်ပွဲရှောင်စခန်းများတွင်နေထိုင်နေကြသည့် အိမ်ထောင်စု ၅၈၈ စု၊ လူဦးရေ ကျား ၁၀၀၈ ဦး၊ မ ၁၃၃၅ ဦး၊ ပေါင်း ၂၃၄၃ ဦးတို့ ဖေဖော်ဝါရီလ ၂၃ ရက်က နေရပ်ပြန်ကြပြီဖြစ်ကြောင်း ရခိုင်ပြည်နယ် အစိုးရအဖွဲ့က သိရသည်။

အဆိုပါ တိုက်ပွဲရှောင်များအား ပြည်နယ်အစိုးရက အိမ်ထောင်စုတစ်စုလျှင် ၅၀၀၀၀၀ ကျပ်နှုန်းဖြင့် ၂၉၄၀၀၀၀၀၀ ကျပ်၊ လူဦးရေ ၂၃၄၃ ဦးတို့အတွက် လူတစ်ဦးလျှင် ၁ ရက် ဆန် ၂ ဗူး နှုန်း ( တစ်ဗူးလျှင် ၁၅၀ ကျပ်နှုန်းဖြင့် တစ်ရက် ၃၀၀ ကျပ်၊ တစ်လ ၉၀၀၀ ကျပ်နှုန်းဖြင့် စုစုပေါင်း ၂၁၀၈၇၀၀၀ ကျပ် )ပေးအပ်ခဲ့ကြောင်း သိရသည်။

ယင်းကို မင်းပြားမြို့၊ ရာမောင်ခန်းမ၌ သက်ဆိုင်ရာတာဝန်ရှိသူများက ပေးအပ်ခဲ့ခြင်း ဖြစ်ကြောင်း၊ လိုက်ပါပို့ဆောင်ရာတွင် တပ်မတော်သားများ၊ မြန်မာနိုင်ငံရဲတပ်ဖွဲဝင်များ၊ ဌာနဆိုင်ရာများလည်း ပါဝင်ကြောင်း သိရသည်။

#ymg/mt #Local_News #မင်းပြား #တိုက်ပွဲရှောင်
#YMG #Yangon_Media_Group

#Local_News
Published-25 February 2023

ရုရှား-မြန်မာဆေးဝါးကောင်စီထူထောင်ရေး နှစ်နိုင်ငံအကြားဆွေးနွေးလျက်ရှိကြောင်း နိုင်ငံတော်စီမံအုပ်ချုပ်ရေးကောင်စီက သိရသည်။

ကျန်းမာရေးဝန်ကြီးဌာနမှ တာဝန်ရှိသူများ၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ တာဝန်ရှိသူ များ၊ ဆေးပစ္စည်းလုပ်ငန်းရှင်များနှင့်ရုရှားအခြေစိုက် "Chemrar" High-Tech-Center Company မှ တာဝန်ရှိသူများနှင့်အဖွဲ့ဝင်များက ဖေဖော်ဝါရီလ ၂၄ရက်တွင် ဗီဒီယိုကွန်ဖရန့်စနစ်ဖြင့် ဆွေးနွေးခဲ့ကြခြင်းဖြစ်ကြောင်း သိရသည်။

ဆွေးနွေးရာတွင် ကိုဗစ်- ၁၉ရောဂါကုသရေးနှင့် ပတ်သက်သည့်ဆေးဝါးများနှင့်စစ်ဆေးနေသည့် စနစ်များကို မြန်မာနိုင်ငံသို့ထောက်ပံ့ပေးရန်စီစဉ် ဆောင်ရွက်မည့်ကိစ္စရပ်များ၊ ဆေးဝါးများမြန်မာနိုင်ငံတွင် မှတ်ပုံတင်ရရှိရေး ကိစ္စရပ်များနှင့် ဆေးဝါးထုတ်လုပ်ရေးနှင့်ပတ်သက်သည့် နည်းပညာပိုင်းဆိုင်ရာ လွှဲပြောင်းဆောင်ရွက်တိုင်မည့် ကိစ္စရပ်များကိုလည်း နှစ်ဦးနှစ်ဖက်အကြားဆွေးနွေးခဲ့ကြကြောင်း နစက ထုတ်ပြန်ချက်တွင် ဖော်ပြထားသည်။

ယင်းအပြင် မြန်မာ-ရုရှားဆေးဝါးထုတ်လုပ်သူများ၊ ဖြန့်ဖြူးသူများ၊ ဆရာဝန်ကြီးများ၊ ကျန်းမာရေးဝန်ကြီးဌာနမှ တာဝန်ရှိသူများနှင့်အာဏာပိုင်အဖွဲ့အစည်းများအကြား ဆွေးနွေးမှု မူဘောင်ကတစ်ဆင့် အပြန်အလှန် ပူးပေါင်းဆောင်ရွက်နိုင်ရန်အတွက် ရုရှား-မြန်မာဆေးဝါးကောင်စီထူထောင်နိုင်ရေး ကိစ္စ ရပ်များကို အပြန်အလှန်အမြင်ချင်းဖလှယ် ဆွေးနွေးခဲ့ကြကြောင်းလည်းသိရသည်။

#ymg/mt #Local_News #ရုရှား-မြန်မာ #ဆေးဝါးကောင်စီ
#YMG #Yangon- Media -Group

#Local_News
Published-25 February 2023

မလေးရှားနိုင်ငံသို့သွားမည့် မြန်မာ ၁၀၀ ကျော်ကို ၁၀ ဘီးကားကြီးအတွင်း ဖေဖော်ဝါရီလ ၂၄ ရက်က ထိုင်း-မလေးရှားနယ်စပ်အနီးတွင် ဖမ်းဆီးမိကြောင်း သိရသည်။

ထိုင်း-မြန်မာ နယ်စပ်ပကျွတ်ခီရီခန်ခရိုင်က တစ်ဆင့်ဝင်ရောက်လာကာ ယင်း ၁၀ ဘီးကားဖြင့် မြန်မာနိုင်ငံသား ၁၀၁ ဦး တင်ဆောင်ကာ ထိုင်း-မလေးရှားနယ်စပ်စဒေါင်မြို့နယ် လမ်းကြောင်းသို့ ဦးတည်လာရာ ထွန်တမ်စောင်မြို့နယ် ဟတ်ယိုင် စုံခလာခရိုင် စစ်ဆေးရေးဂိတ်အရောက်တွင် ဒေသခံများကမသင်္ကာ၍ တိုင်ကြားရာမှ စစ်ဆေးဖမ်းဆီးရမိခြင်းဖြစ်ကြောင်း ထိုင်းနိုင်ငံတောင်ပိုင်း သတင်းများအရ သိရသည်။

#ymg/mt #Local_News #မလေးရှား #၁၀ဘီးကား #YMG
#Yangon_Media_Group

#Local_News
Published_ 25 February 2023

အွန်လိုင်းမှ နိုင်ငံကူးလက်မှတ်ပတ်စ်ပို့လျှောက်ထားပြီး အွန်လိုင်းငွေပေးချေမှုစနစ်ဖြင့် ပေးချေခဲ့သူ (၈၅၂၉)ဦးအထိရှိကြောင်း မြန်မာနိုင်ငံကူးလက်မှတ်ထုတ်ပေးရေးရုံး၏ ထုတ်ပြန်ချက်အရ သိရသည်၊၊

ထုတ်ပြန်ချက်တွင် ရန်ကုန်မြန်မာနိုင်ငံကူးလက်မှတ်ထုတ်ပေးရေးရုံးတွင် နိုင်ငံကူးလက်မှတ်လျှောက်ထားရန် ဖေဖော်ဝါရီ (၂၄)ရက်တွင် Online Appointment System ဖြင့် ရက်ချိန်းရယူခြင်းအား စတင်စမ်းသပ် အသုံးပြုခဲ့ရာ လျှောက်ထားသူ(၈၅၂၉)ဦးမှ ကိုယ်ရေးအချက်အလက်များ ဖြည့်သွင်းပြီး အွန်လိုင်းငွေပေးချေမှုစနစ်ဖြင့် ပေးချေလျှောက်ထားခဲ့ရာ ရက်ချိန်းများရရှိခဲ့သည့်အတွက် ကနဦးစမ်းသပ်ဆောင်ရွက်မှု အဆင်ပြေခဲ့သည်ဟု ဆိုသည်၊၊

ယင်းကဲ့သို့ အဆင်ပြေခဲ့သော်လည်း Online Appointment System စနစ်ကို လိုအပ်ချက်အနည်းငယ်ရှိပါသဖြင့် ပြင်ဆင်မွမ်းမံမှုများ ပြုလုပ်ရန်ရှိပါသဖြင့် ရက်ချိန်းအသစ်လျှောက်ထားခြင်းအား တစ်ရက်ရပ်နားထားမည်ဖြစ်ပြီး ရက်ချိန်းအသစ်လျှောက်ထားခြင်းကိုဖေဖော်ဝါရီလ(၂၆)ရက်တွင် ပြန်လည်ဖွင့်လှစ်မည်ဖြစ်ကြောင်းဖေဖော်ဝါရီလ (၂၅)ရက်တွင် ဖော်ပြထားသည်၊၊

အချို့သော လျှောက်ထားသူများမှ ငွေပေးချေပြီးသော်လည်း ရရှိမည့်ရက်ချိန်းအတွက် နေ့စွဲနှင့်အချိန်ကို လျှောက်ထားသူထံ အကြောင်းပြန်ကြားချက်များ စနစ်မှထုတ်ပေးမှုကို လက်ခံမရရှိခဲ့သည့်ဖြစ်စဉ်များ ရှိခဲ့ကြောင်း သို့ဖြစ်၍ ရက်ချိန်းအချက်အလက်များကို ပြန်လည်ကြည့်ရှုနိုင်ရန် Website ၏ Home Page ရှိ ရက်ချိန်းစစ်ဆေးရန် ခလုတ်ကိုနှိပ်၍ လျှောက်ထားသူ၏ အမည်နှင့်နိုင်ငံသားစိစစ်ရေးကတ်အမှတ်တို့ကို ဖြည့်သွင်း၍ လျှောက်ထားသူအတွက် စနစ်မှခွင့်ပြုထားသည့် ရက်ချိန်းနေ့စွဲနှင့် အချိန်ကို ပြန်လည်ကြည့်ရှုနိုင်ပါကြောင်းလည်း အသိပေးထားကြောင်းသိရသည်၊၊

#ymg/tthl #Local_News #Passport #Onlin_Booking
#YMG #Yangon_Media_Group

#Local_News
Published-25 February 2023

ရှမ်းပြည်နယ်(တောင်ပိုင်း) ပအိုဝ်းကိုယ်ပိုင်အုပ်ချုပ်ခွင့်ရဒေသ ဟိုပုံးမြို့ တောင်ရပ်ကွက်အတွင်းရှိ နောင်ဘိုကန် သာယာလှပရေး လုပ်ငန်းများအတွက် ၂၀၂၂-၂၀၂၃ ဘဏ္ဍာနှစ် ရှမ်းပြည်နယ် အစိုးရငွေလုံးငွေရင်းရန်ပုံငွေကျပ် သန်း ၃၅၀ ဖြင့် ဆောင်ရွက်ခဲ့ရာ လုပ်ငန်းများ ရာနှုန်းပြည့်ပြီးစီးပြီ ဖြစ်ကြောင်း သိရသည်။

ရှမ်းပြည်နယ်(တောင်ပိုင်း)ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာနက ကွပ်ကဲ၍ ကန်အတွင်းနံရံဘက်တွင် ကျောက်ရိုးစီမြေကာ နံရံတည်ဆောက်ခြင်းလုပ်ငန်းများကို ပြုလုပ်ခဲ့ခြင်း ဖြစ်ကြောင်း၊ အများပြည်သူ အပန်းဖြေနေရာ၊ ကန်ပတ်လမ်း တစ်လျှောက်တွင်လည်း ကျန်းမာရေးအတွက် ကိုယ်လက်လှုပ်ရှားအားကစားပြုလုပ်ရန် နေရာတစ်ခုအနေဖြင့် ဆောင်ရွက်နိုင်မည်ဖြစ် ကြောင်း သိရသည်။

ယင်းအပြင် ကန်ရေကြောင့် ကန်အနီးသဘာဝပတ်ဝန်းကျင် စိမ်းလန်းစိုပြည်စေကာ နွေရာသီရေရှားပါးချိန်တွင် မီးဘေးအန္တရာယ် ကာကွယ်ရေးလုပ်ငန်းများအတွက်လည်း အကျိုးပြုစေမည်ဖြစ်ကြောင်း၊ ကန်အတွင်းရေသိုလှောင်မှု ပမာဏများပြားကာ ကန်အနီး လူနေအိမ်များရှိ ရေတွင်းများအတွက်လည်း မြေအောက်ရေကို ပံ့ပိုးပေးနိုင်မည်ဖြစ်ကြောင်းလည်း သိရသည်။

#ymg/mt #Local_News #ဟိုပုံးမြို့ #နောင်ဘိုကန်
#YMG #Yangon_Media_Group

#Health

- XBB ဟာ ဘယ်လိုရောဂါလက္ခဏာပြတတ်ပါသလဲ အချို့က ချောင်းဆိုးတာ အဖျားမရှိဘူးလို့ ပြော‌နေကြပါတယ် ဟုတ်ပါသလား

- ဘယ်လိုကာကွယ်နေထိုင်သင့်သလဲ

#Dr.KML #Health #XBB #ချောင်းဆိုးတာ #အဖျားမရှိဘူး
#YMG #Yangon_Media_Group

#Local_News
Published-25 February 2023

YBS ယာဉ်များ CNG ဓာတ်ငွေ့သီးသန့်ဖြည့်တင်းရန် တင်ပြထားမှုအပေါ် MOGE ဘက် မှ အဆင်မပြေဟု ပြန်လည်အကြောင်းကြားလာကြောင်း YRTC တွဲဖက်အတွင်းရေးမှူး ဦးလျန်ကျင့်မန်က ပြောသည်။

CNG အခက်အခဲကြောင့် YBS ယာဉ်များ ပုံမှန်ပြေးဆွဲမှုလျော့နည်းလာရခြင်းနှင့်ကြန့်ကြာမှုကို ဖြေရှင်းနိုင်ရန် YRTC အနေဖြင့် တင်ပြခဲ့ခြင်းဖြစ်ကြောင်းလည်း သိရသည်။

"CNG ဆိုင်ပေါင်း ၄၂ဆိုင်ရှိတယ်။ ဒီထဲက ၃၂ဆိုင်မှာ YBS ယာဉ်တွေ သီးသန့်ဖြည့်နိုင်ဖို့တင်ပြတာ MOGE ဘက်က အဆင်မပြေဘူးလို့ပြောတယ်။ YBSယာဉ်တွေ သီးသန့်ဖြည့်တာက ဆိုင်၂၀ လောက်ပဲရှိတယ်"ဟု ဦးလျန်ကျင့်မန်က ဆိုသည်။

ရန်ကုန်မြို့တွင်း ပြေးဆွဲနေသည့် YBSယာဉ်အစီးရေ ၅၇၅၈ စီးတွင် CNG အသုံးပြုပြေးဆွဲနေသည့် အစီးရေ ၅၀၅၈ စီးရှိပြီး YRTC အနေဖြင့်လျှပ်စစ် မီးပြတ်တောက်မှုနှင့် ဂတ်စ်ဖြည့်စဉ် အချိန်ကြာမြင့်စွာစောင့်ဆိုင်းနေရသည့် အတွက် YBS ယာဉ်များ ပြေးဆွဲမှုလျော့နည်းလာခြင်းဖြစ်သည်။

လက်ရှိတွင် ရန်ကုန်မြို့တွင်းYBS ယာဉ်လိုင်း ၁၁၇လိုင်းမှ ယာဉ်အစီးရေ ၃၀၀၀ ကျော်ဖြင့် ခရီးသည် ၁၃သိန်းကျော်ကို ပို့ဆောင်ပေးလျက်ရှိကြောင်းသိရသည်။

#ymg/mt #Local_News #YBS #CNG #MOGE #YMG
#Yangon- Media -Group

#Local_News
Published_ 25 February 2023

စစ်ကိုင်းတိုင်းဒေသကြီး၊ ဗန်းမောက်မြို့တွင် နစက ဆန့်ကျင်သူများ ထောင်ထားသည့် လက်လုပ်မိုင်း ၁ လုံးပေါက်ကွဲခဲ့သောကြောင့် သံဃာတော် ၁ ပါးနှင့် အရပ်သား ၂ ဦး ထိခိုက်ဒဏ်ရာရခဲ့ကြောင်း သိရသည်။

ဖေဖော်ဝါရီလ ၂၂ ရက် နံနက် ၉ နာရီခွဲအချိန်တွင် စစ်ကိုင်းတိုင်းဒေသကြီး၊ ဗန်းမောက်မြို့၊ မြို့မရပ်ကွက်၊ ဗိုလ်ချုပ်လမ်း၊ မြို့နယ်လျှပ်စစ်ရုံးအနီး၌ ပေါက်ကွဲမှုဖြစ်ပွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါနေရာတွင် လက်လုပ်မိုင်း ၁ လုံးပေါက်ကွဲခဲ့ခြင်းဖြစ်ပြီး ပေါက်ကွဲမှုကြောင့် အခင်းဖြစ်နေရာအနီး ဖြတ်သန်းသွားလာလျက်ရှိသည့် စီးမော်ကျေးရွာဘုန်းတော်ကြီးကျောင်းမှ ဆရာတော် ဥူးပဏ္ဏိတ သက်တော်(၄၃)နှစ် ဝါတော် ၂၃ ဝါ၊ ကသာမြို့၊ အမှတ်(၄)ရပ်ကွက်နေ ဦးဇော်နိုင်ဝင်း(၃၁)နှစ်နှင့် မသော်ရီဆွေ (၂၃) နှစ်တို့တွင် မိုင်းစထိမှန်ဒဏ်ရာများရရှိခဲ့ခြင်း ဖြစ်ကြောင်း သိရသည်။

ယင်းကြောင့် ဆေးကုသနိုင်ရေး ဗန်းမောက်မြို့နယ်ပြည်သူ့ဆေးရုံသို့ ပို့ဆောင်ထားရှိကြောင်း၊ မိုင်းထောင်ထားသူများကိုလည်း ဖော်ထုတ်ဖမ်းဆီးရမိနိုင်ရေးနှင့် နယ်မြေတည်ငြိမ်အေးချမ်းရေးအတွက် နယ်မြေခံလုံခြုံရေးတပ်ဖွဲ့ဝင်များက လုံခြုံရေးလုပ်ငန်းစဉ်များဆောင်ရွက်နေကြောင်း သိရသည်။

#ymg/mt #ဗန်းမောက် #Local_News #လက်လုပ်မိုင်း #YMG #Yangon_Media_Group

#Local_News
Published_ 25 February 2023

မွန်ပြည်နယ်၊ ကျိုက်ထိုမြို့နယ်၊ တဂေးချောင်းဖျားကျေးရွာရှိ အခြေခံပညာမူလ တန်းကျောင်း (တဂေးချောင်းဖျား) မှ ကျောင်းအုပ်ဆရာမကြီး ဒေါ်နွယ်နွယ်ဦး အား နစက ဆန့်ကျင်အဖွဲ့က ဖမ်းဆီးခေါ်ဆောင်သတ်ဖြတ်ခဲ့ကြောင်း နစက သတင်းထုတ်ပြန်ရေးအဖွဲ့က သိရသည်။

ဖေဖော်ဝါရီလ ၂၃ ရက်က ကျောင်းအုပ်ဆရာမကြီးနှင့် တခြား ဆရာမ ၆ ဦးတို့ ကျောင်း၌ရှိနေစဉ် နေ့လယ် ၁၂ နာရီ ၁၅ မိနစ်ခန့်တွင် လက်နက်ငယ်ကိုယ်စီကိုင်ဆောင်၍ မော်တော်ဆိုင်ကယ်များဖြင့် ရောက်ရှိလာသော နစက ဆန့်ကျင်သူများက အဓမ္မဖမ်းဆီးခေါ်ဆောင်၍ အဆိုပါကျေးရွာအနီးရှိ တဂေးချောင်းဖျား-ငှက်ပျောတော ကားလမ်းဘေး၌ လက်နက်ငယ်များဖြင့် ပစ်ခတ်သတ်ဖြတ်ခဲ့ကြောင်း သိရသည်။

ယခုအခါ ဖမ်းဆီးသတ်ဖြတ်သွားသူများအား လုံခြုံရေးတပ်ဖွဲ့ဝင်များက လိုအပ်သည့်လုံခြုံရေးလုပ်ငန်းများ ဆောင်ရွက်၍ သက်ဆိုင်ရာတည်ဆဲဥပဒေများနှင့်အညီ ထိရောက်စွာအရေးယူနိုင်ရေး ဆက်လက်ဆောင်ရွက်နေကြကြောင်း သိရသည်။

#ymg/mt #Local_News #Crime #ကျိုက်ထို #နစက #YMG
#Yangon_Media_Group

#Local_News
Published_ 25 February 2023

နိုင်ငံတော်အနေဖြင့် ပြည်တွင်းစားသုံးဆီဖူလုံမှုရှိစေရန် မူဝါဒများချမှတ်ဆောင်ရွက်နေပြီး နိုင်ငံတော်ဝန်ကြီးချုပ်ကလည်း ဆီတင်သွင်းသည့်နိုင်ငံအဖြစ်မှ ဆီတင်ပို့သည့်နိုင်ငံသို့ ရောက်ရှိအောင် ကြိုးပမ်းဆောင်ရွက်ဖို့ လမ်းညွှန်ချက်ပေးထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦးကပြောသည်။ ဖေဖော်ဝါရီလ ၂၄ ရက်နေ့က ကုန်သည်စက်မှုအသင်းချုပ်ရုံးမှာ စားသုံးဆီလုပ်ငန်းရှင်များနှင့် တွေ့ဆုံစဉ်ပြောလိုက်တာဖြစ်သည်။

စားသုံးဆီတင်ပို့နိုင်သည့် အခြေနေရောက်အောင် ပြည်တွင်းရှိစိုက်ပျိုးထုတ်လုပ်သူတောင်သူများ အပါအဝင် ကြိတ်ခွဲထုတ်လုပ်သည့်ဆီလုပ်ငန်းရှင်များနှင့် ပြည်ပဆီတင်သွင်းဖြန့်ဖြူးသည့် ဆီလုပ်ငန်းရှင်များအားလုံးပူပေါင်းပါဝင်ဖို့လိုကြောင်း ပြောဆိုလိုက်သည်။

အစိုးရအနေနဲ့စားသုံးဆီလက္ကားဈေးနှုန်း တစ်ပိဿာကို ၄၄၇၀ ကျပ်ဖြင့် ရောင်းချဖို့သတ်မှတ်ပေးထားပြီး မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းကလည်း ရန်ကုန်မြို့ရှိမြို့အချို့မှာ တစ်ပိဿာ ၄၇၀၀ ကျပ် ဖြစ်ရောင်းချပေးနေသည်။

စားသုံးဆီကို ဈေးကစားဖို့ရည်ရွယ်ချက်ဖြင့် သိုလှောင်ထားပါက ဥပဒေအရအရေးယူဆောင်ရွက်သွားဖို့ သတင်းထုတ်ပြန်ထားသည်။ ပြင်ပစားသုံးဆီဈေးကတော့ တစ်ပိဿာကို ငွေကျပ် ၇၀၀၀ နှုန်းပေါက်ဈေးရှိနေသည်။

#ymg/ynzw #Local_News #Oil_export #YMG
#Yangon_Media_Group

#Local_News
Published_ 25 February 2023

အလုပ်သမားညွှန်ကြားရေး ဦးစီးဌာနအနေဖြင့် ပြည်ပအလုပ်အကိုင်လမ်းညွှန်သင်တန်းနှင့် OWIC ခွင့်ပြုဆောင်ရွက်ပေးခြင်းကို ရုံးဖွင့်ရက် ၂ ရက်မှ ၃ ရက်အတွင်း အမြန်စိစစ်ခွင့်ပြုပေးလျက်ရှိသောကြောင့် ပွဲစားနှင့် အေဂျင်စီများထံ ဝန်ဆောင်ခအဖြစ် ငွေကြေးအဆမတန်ပေး၍ လုပ်ငန်းအပ်နှံခြင်းမပြုဘဲ မိမိကိုယ်တိုင် တင်ပြလျှောက်ထားကြပါရန် အလုပ်သမားညွှန်ကြားရေးဦးစီးဌာနက အသိပေးထုတ်ပြန်လိုက်သည်။

ယင်းတို့ကို လုပ်ဆောင်ရန် လိုအပ်သည့်စာရွက်စာတမ်းအထောက်အထားများ တောင်းခံရာတွင်လည်း အလုပ်သမားများ အလွယ်အကူသိရှိနားလည်ရယူပေးနိုင်သည့် စာရွက်စာတမ်း အထောက်အထားများကိုသာ တောင်းခံခြင်းဖြစ်ကြောင်း အသိပေးစာတွင် ဖော်ပြထားသည်။

ပြည်ပအလုပ်အကိုင်လမ်းညွှန်သင်တန်းနှင့် OWIC လျှောက်ထားမှုများနှင့်ပတ်သက်၍ ပွဲစားများ၊ ပြည်ပအလုပ်အကိုင်အကျိုးဆောင်လိုင်စင်ရအေဂျင်စီများက facebook များ ၊ OWIC နှင့်ပတ်သက်သည့် facebook group များတွင် ဝန်ဆောင်မှုပေးသည့်ကြော်ငြာများ ကြော်ငြာလျက် ဝန်ဆောင်ခအဖြစ် ငွေကြေးများ အဆမတန်ကောက်ယူ၍ ဆောင်ရွက်ပေးနေကြောင်း၊ အချို့အလုပ်သမားများသည် ပြည်ပအလုပ်အကိုင်လမ်းညွှန်သင်တန်း တက်ရောက်ခွင့်နှင့် OWIC ပြုလုပ်ခွင့်များကို ပွဲစားများ၊ ပြည်ပအလုပ်အကိုင်အကျိုးဆောင်လိုင်စင်ရ အေဂျင်စီများထံ အပြီးအစီးလုပ်ငန်းအပ်နှံ၍ ဆောင်ရွက်မှုများရှိနေကြောင်း စိစစ်တွေ့ရှိရသောကြောင့် အထက်ပါအတိုင်း အသိပေးထုတ်ပြန်ခြင်းလည်း ဖြစ်ကြောင်း သိရသည်။

ယင်းအပြင် ပွဲစားများ၊ ပြည်ပအလုပ်အကိုင်အကျိုးဆောင်လိုင်စင်ရ အေဂျင်စီများက ဦးစီးဌာနသို့ အလုပ်လုပ်ကိုင်ခွင့်ပါမစ်အတု၊ ပြည်ဝင်ခွင့်ဗီဇာအတု၊ လေဆိပ်အဝင်တုံးအတု၊ အလုပ်ရှင်ခွင့်စာအတု၊ ပြည်ပအလုပ်အကိုင် လမ်းညွှန်သင်တန်းဆင်းလက်မှတ်အတု၊ ဘွဲ့လက်မှတ် သို့မဟုတ် ကျွမ်းကျင်မှုအသိအမှတ်ပြုလက်မှတ်အတု စသည့်စာရွက်စာတမ်းအထောက်အထားအတုများဖြင့် တင်ပြခြင်း၊ လူပုဂ္ဂိုလ်တစ်ဦးတည်းမှ လက်ရေးမူတစ်ခုတည်းဖြင့် ရေးသားတင်ပြခြင်းများ ဆောင်ရွက်နေသည်ကို စိစစ်တွေ့ရှိရကြောင်းလည်း သိရသည်။

အဆိုပါ ဖြစ်စဉ်များကို လုပ်ဆောင်နေကြသော ပွဲစားနှင့် အေဂျင်စီများကိုလည်း စိစစ်အရေးယူမည်ဖြစ်ကြောင်း သိရသည်။

#ymg/mt #Local_News #ပြည်ပအလုပ်အကိုင် #OWIC
#YMG #Yangon_Media_Group

#World_Health
Published 25 February 2023

လူတွေပြုလုပ်ထားတဲ့ တာရှည်ခံဓာတုပစ္စည်းတွေနဲ့ထိတွေ့ခြင်းဟာ ကလေးတွေရဲ့ ဇီဝဖွံ့ဖြိုးမှုကို ပြောင်းလဲစေပြီး ရောဂါဘယများဖြစ်စေနိုင်ကြောင်း လေ့လာတွေ့ရှိထားပါတယ်။

ပိုလီဖလိုရိုအယ်လ်ကိုင်း (PFAS)တွေကို အိမ်သုံးပစ္စည်းအမျိုးမျိုးမှာတွေ့ရပြီး သူတို့က ပြိုကွဲပျက်စီးရာမှာ အလွန်နှေးကွေးကာ လူ့ခန္ဓာကိုယ်ထဲနဲ့ ပတ်ဝန်းကျင်မှာ တိုးများလာနိုင်တာကြောင့် တာရှည်ခံဓာတုပစ္စည်းများလို့ သတ်မှတ်ပါတယ်။

လတ်တလောလေ့လာချက်အရ PFAS တွေဟာ သိုင်းရွိုက်လုပ်ဆောင်ချက်ကိုပါ ထိခိုက်စေပြီး ကလေးတွေအတွက် အလွန်စိုးရိမ်နေရပါတယ်။

PFAS ထိတွေ့ခံရပြီး သိုင်းရွိုက်ဟော်မုန်းလုပ်ဆောင်ချက်အပေါ် သက်ရောက်ပုံက အံ့အားသင့်ဖွယ်ဖြစ်ပြီး ဇီဝဖြစ်ပျက်မှုနဲ့ ကြီးထွားမှုတို့မှာ အရေးကြီးနေပါတယ်။

သိုင်းရွိုက်ဟော်မုန်းတွေက ကလေးတွေအရွယ်ရောက်စဉ်မှာ ဖွံ့ဖြိုးမှုအတွက်အရေးပါပြီး အင်္ဂါတစ်ရှူးတွေကြီးထွားရင့်ကျက်ရာမှာ အရေးပါပါတယ်။

သိုင်းရွိုက်လုပ်ဆောင်ချက်ထိခိုက်တဲ့အခါ ကလေးတွေမှာ ဆီးချိုရောဂါ၊ နှလုံးသွေးကြောရောဂါ၊ ကင်ဆာရောဂါတို့ ဖြစ်နိုင်ချေများလာနိုင်ပါတယ်။

စမ်းသပ်ချက်တွေမှာတော့ ဓာတုပစ္စည်းတစ်မျိုးတည်း ထိတွေ့မိတာမဟုတ်ဘဲ PFAS အမျိုးအစားတွေရောနှော ထိတွေ့ခဲ့ကြတာဖြစ်ပါတယ်။

ဒီဓာတုပစ္စည်းတွေက လူသားတွေရဲ့ကျန်းမာရေးမှာ ဘယ်လောက်အထိသက်ရောက်နေလဲဆိုတာကို စတင်သဘောပေါက်လာပြီဖြစ်ကြောင်း ပြည်သူ့ကျန်းမာရေးသိပ္ပံပရော်ဖက်ဆာ ဒေါက်တာ'လီဒါချက်ဇီ'က ဖော်ပြခဲ့ပါတယ်။

၁၉၃၀ ခုနှစ်တွေတုန်းက တာရှည်ခံဓာတုပစ္စည်းများကို စတင်ထုတ်ဖော်ခဲ့ကာ အိမ်သုံးပစ္စည်းတွေ၊ ထုပ်ပိုးမှုတွေ၊ မကပ်အိုးတွေမှာ တွေ့ရတတ်ပြီး အသည်းကင်ဆာဖြစ်စေကြောင်း တွေ့ရှိခဲ့ကြပါတယ်။

ဒီဓာတုပစ္စည်းတွေက ခန္ဓာကိုယ်မှာ ဂလူးကို့စ်၊ သည်းခြေအက်ဆစ်၊ အမိုင်နိုအက်ဆစ်တွေ ဇီဝဖြစ်ပျက်ပုံကို အဟန့်အတားဖြစ်စေပြီး အဆီဓာတ်များ အန္တရာယ်ဖြစ်စေတဲ့အထိ စုပြုံလာစေပါတယ်။

#Source: New York Post #World_Health #YMG
#Yangon_Media_Group