#LocalNews
Published_ 23 March 2023

မြန်မာနိုင်ငံတွင် သဘာဝရေအရင်းအမြစ်ကြွယ်ဝသည် ဆိုသော်လည်း အချို့နေရာဒေသများတွင် သောက်သုံးရေအခက်အခဲ မလုံလောက်သည့် ပြဿနာများရှိနေကြောင်း၊ အထူးသဖြင့် အပူပိုင်းအညာဒေသ၊ မိုးခေါင်ရေရှားဒေသတချို့တွင် နွေရာသီကာလ၌ သောက်သုံးရေအခက်အခဲများရှိနေသည်အပြင်အဆိုပါ ကျေးလက်ဒေသများ၏ အဓိကစီးပွားရေးလုပ်ငန်းဖြစ်သည့် စိုက်ပျိုးရေးနှင့် မွေးမြူရေး လုပ်ငန်းများတွင်လည်း ရေအခက်အခဲကြောင့် လူမှုစီးပွားဘဝအဆင်မပြေမှုများရှိနေကြောင်း နစက ဥက္ကဌက ပြောသည်။

မတ်လ ၂၂ ရက်က နေပြည်တော်ရှိ မြန်မာ အပြည်ပြည်ဆိုင်ရာ ကွန်ဗင်းရှင်း ဗဟိုဌာန-၂ (MICC-II)၌ ကျင်းပပြုလုပ်ခဲ့သည့် ကမ္ဘာ့ရေနေ့ ၂၀၂၃ အခမ်းအနားအတွင်း အမျိုးသားအဆင့် ရေအရင်းအမြစ်ကော်မတီဥက္ကဋ္ဌ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က အထက်ပါအတိုင်း ပြောကြားခဲ့ခြင်း ဖြစ်သည်။

ယခုနှစ် ကမ္ဘာ့ရေနေ့ ၂၀၂၃ အတွက် အထူးပြုအကြောင်းအရာ “Theme” မှာ ရေဆိုင်ရာလိုအပ်ချက်များ ဖြည့်ဆည်းရေးကို ရည်မှန်းချက်ထားသည့် “အရှိန်အဟုန်မြှင့်ရှေ့သို့ ကြိုးပမ်းပြောင်းလဲ ဆောင်ရွက်ခြင်း ” “ Accelerating Change ” ဖြစ်ကြောင်း၊ရေညစ်ညမ်းမှုသည် သဘာဝကြောင့် ဖြစ်နိုင်သကဲ့သို့ လူများ၏ ပယောဂ များကြောင့်လည်း ဖြစ်နိုင်ခြင်းကြောင့် သန့်ရှင်းသည့်ရေအရင်း အမြစ်ဖြစ်အောင် ထိန်းသိမ်းကြဖို့နှင့် ညစ်ညမ်းသည့် ရေမဖြစ်အောင် သတိပြုကြရန် အရေးကြီးကြောင်း ယင်းက ဆိုသည်။

မြန်မာနိုင်ငံတွင် မြစ်ချောင်းများ၊ အင်းအိုင်များ၊ သဘာဝရေထွက်များစသည့် ပုံစံအမျိုးမျိုးဖြင့် ရေချိုအရင်းအမြစ်များ များပြားခြင်းကြောင့် တစ်ကမ္ဘာလုံး ရေချိုပိုင်ဆိုင်မှု၏ ၁ ဒသမ ၇ ရာခိုင်နှုန်းရှိသည်ဟု သိရသည့်အတွက် ရေချိုပေါများသော နိုင်ငံဟုဆိုရမည်ဖြစ်ပါကြောင်း၊ အချို့နိုင်ငံများတွင် ရေချိုမလုံလောက်သဖြင့် ပင်လယ်ရေငန်ကို ပြုပြင်သုံးစွဲရတာမျိုး၊ စွန့်ပစ်ရေဆိုးကို ပြန်လည်ပြုပြင်သုံးစွဲနေရခြင်း မျိုးများရှိနေသည်ကိုလည်း ၎င်းက ထည့်သွင်းပြောကြားခဲ့သည်။

ကမ္ဘာ့မြေမျက်နှာပြင်၏ ၇၁ ရာခိုင်နှုန်းသည် ရေများဖုံးလွှမ်းလျက်ရှိသော်လည်း အဆိုပါရေပမာဏ၏ ၉၆ ဒသမ ၅ ရာခိုင်နှုန်းခန့်သည် ပင်လယ်၊ သမုဒ္ဒရာများ ဖြစ်ပါကြောင်း၊ ကျန်ရှိသည့် ၃ ဒသမ ၅ ရာခိုင်နှုန်းခန့်သာ ရေချို၊ ပြန်လည် ပြည့်ဖြိုးမြဲရေဖြစ်ပြီး ထိုအထဲတွင် ဝင်ရိုးစွန်းများတွင်ရှိသည့် ရေခဲတောင်၊ ရေခဲပြင်များသည် ၆၈ ရာခိုင်နှုန်းနှင့် မြေအောက်ရေ ၃၀ ရာခိုင်နှုန်းခန့် ရှိနေသည်ကို လေ့လာ သိရှိရပါကြောင်း၊ ထို့ကြောင့် မြေပြင်ပေါ်တွင်ရှိသည့် ရေအားလုံး၏ သုညဒသမ ၅ ရာခိုင်နှုန်းလောက်သာ ရေချိုဖြစ်ကြောင်း နိုင်ငံတကာ အချက်အလက်များအရ သိရသည်။

ymg/mt
#Yangon_Media_Group

#World_News
Published 23 March 2023

ကယ်လီဖိုးနီးယားကို ပြင်းပြင်းထန်ထန် တိုက်ခတ်လာတဲ့ ဆောင်းတွင်းမုန်တိုင်းက ဗုဒ္ဓဟူးနေ့မှာ အနောက်တောင်သဲကန္တာရပြည်နယ်များသို့ ပျံ့လွင့်လာပြီး ဆန်ဖရန်ဆစ္စကိုနဲ့အနားတဝိုက်မှာ မုန်တိုင်းကြောင့် သစ်ပင်များပြိုလဲရာမှ အနည်းဆုံး လူ ၅ ဦးသေဆုံးခဲ့ကြောင်း အာဏာပိုင်များက ဖော်ပြခဲ့ကြပါတယ်။

ကယ်လီဖိုးနီးယားမှာ အင်္ဂါနေ့က မိုးရွာခြင်း၊ လေနဲ့ တောင်ဆီးနှင်းများ ကျဆင်းလာခြင်းကြောင့် ဓာတ်အားလိုင်းများပြတ်တောက်ခဲ့ပြီး အိမ်ခြေနဲ့စီးပွားရေးလုပ်ငန်း ၉၂,၀၀၀ ကျော် လျှပ်စစ်မီးများ ပြတ်တောက်ခဲ့ပါတယ်။

ဗုဒ္ဓဟူးနေ့လယ်အထိ ရေကြီးနေတာကြောင့် လူပေါင်း ၁၄,၀၀၀ ခန့်ကို ထွက်ပြေးခိုင်းထားပါတယ်။

မိုးရွာသွန်းမှုကြောင့် ချောင်းများ ကမ်းပါးများ လျှံတက်ခြင်း ဒါမှမဟုတ် မုန်တိုင်းအားလျော့ပြီး ကမ်းပါးပြိုကျခြင်းဖြစ်စဉ်တို့မှာ ပြည်နယ်တစ်ဝန်းရှိ လူပေါင်း ၄၈,၀၀၀ နီးပါး ကုန်းမြင့်နေရာများပေါ်သို့ ထွက်ပြေးရန်အသင့်ရှိနေဖို့ သတိပေးထားကြောင်း ကယ်လီဖိုးနီးယားအရေးပေါ်ဝန်ဆောင်မှုရုံးမှ ပြောရေးဆိုခွင့်ရှိသူ'ဒီယာနာခရော့ဖ်ပယ်လာယို'က ပြောကြားလိုက်ပါတယ်။

မကြာသေးမီက ကမ်းပါးပြိုကျမှုကြောင့် ရေများမြင့်တက်လာခဲ့တဲ့ ဆန်ယော်ကွင်းဗယ်လီက တူလဲကောင်တီဒေသရှိ လူပေါင်း ၁၂,၀၀၀ ခန့်ကို မဖြစ်မနေထွက်ပြေးဖို့ အမိန့်ထုတ်ထားပါတယ်။

မြစ်လေထုဆုတ်ယုတ်လာခြင်း၊ သမုဒ္ဒရာမှ ရေငွေ့သိပ်သည်းလာမှု၊ မိုးနှင့်ဆီးနှင်းထူထပ်ခြင်းတို့ကြောင့် မုန်တိုင်းဖြစ်လာရတာဖြစ်ပါတယ်။
ဒီဇင်ဘာနောက်ပိုင်း အနောက်ကမ်းရိုးတန်းကို ၁၂ ကြိမ်မြောက်မုန်တိုင်းဝင်ခဲ့တာဖြစ်ပြီး မိုးရွာသွန်းခြင်းနဲ့အတူ လေပြင်းများတိုက်ခတ်ကာ အချို့နေရာများမှာ အပျက်အဆီးအများဆုံး ဖြစ်ခဲ့ပါတယ်။

ကယ်လီဖိုးနီးယားပင်လယ်အော်တလျှောက် အင်္ဂါနေ့က လေပြင်းများတိုက်ခတ်ကာ သစ်ပင်ပြိုလဲပြီး လူထိခိုက်တာကြောင့် ဆန်ဖရန်ဆစ္စကိုမှာ ၂ ဦး၊ အုတ်ခ်လန်းမှာ ၁ ဦး၊ ကွန်ထရာကော့စ်တာကောင်တီမှာ ၁ ဦး၊ ဆန်မက်တီယိုကောင်တီမှာ ၁ ဦးတို့ သေဆုံးခဲ့ကြောင်း ဒေသတွင်းမီဒီယာများက ဖော်ပြထားကြပါတယ်။

အနည်းဆုံးလူ ၂ ဦးက ကားထဲမှာသေဆုံးခဲ့ကာ တစ်ဦးက တဲထဲမှာသေဆုံးခဲ့တာဖြစ်ပါတယ်။

ယခုဆောင်းတွင်းရာသီဥတုဆိုးကြောင့် ကယ်လီဖိုးနီးယားတလျှောက်မှာ မုန်တိုင်းကြောင့်သေဆုံးသူ ၂၀ ကျော်ရှိခဲ့ပါတယ်။

ကနဦးတင်ပြချက်များအရ ဆန်ဖရန်ဆစ္စကိုမှာ သစ်ပင်ပြိုလဲမှုပေါင်း ၇၀၀ ကျော်ဖြစ်ထားသလို အထပ်မြင့်အဆောက်အအုံတွေမှ ဖန်ကွဲစများနဲ့ အစအနများလွင့်စင်ထွက်လာကြပါတယ်။

လူတွေရဲ့လုပ်ရပ်ကြောင့် ရာသီဥတုအပြောင်းအလဲများဖြစ်ပေါ်လာကြောင်း ကျွမ်းကျင်သူများကဆိုလိုက်ကာ အရင်နှစ်တွေတုန်းက မိုးခေါင်ခြင်းနဲ့ တောမီးလောင်ကျွမ်းခြင်းများ ဖြစ်ပေါ်ထားတဲ့ ပြည်နယ်တစ်ခုမှာ အခုဆိုရင် ရေလျှံတဲ့ဆောင်းတွင်းဖြစ်လာခဲ့ပါတယ်။

မိုးအကြီးအကျယ်ကျခြင်းကြောင့် ရေကုန်ခမ်းနေတဲ့ ရေလှောင်ကန်များ ရေပြည့်လာပြီး တောင်ပေါ်ဆီးနှင်းတုံးများ ဖြစ်ပေါ်လာပါတယ်။

ဗုဒ္ဓဟူးနေ့မှာ မိုး၊ ဆီးနှင်း၊ လေတို့ ပြေလျော့သွားပြီး နီဗားဒါး၊ အရီဇိုးနား၊ ကော်လိုရာဒို၊ နယူးမက္ကဆီကိုနဲ့ ယူတာပြည်နယ်တို့ကို မုန်တိုင်းဖြတ်သန်းသွားပါတယ်။

Source: Reuters
#YangonZ_Media_Group

#LocalNews
Published_ 23 March 2023

Facebook လူမူကွန်ယက်တွင် လူအကြည့်များသည့် Ghost Hunters အဖွဲ့သည် မတ်လ ၂၂ရက်နေ့ ညက ဗိဿနိုးမြို့ဟောင်းကို ဝိဉာဉ်ရှာဖွေရိုက်ကူးရေး လုပ်စဉ်အဖမ်းခံရကြောင်း အဆိုပါအဖွဲ့ ရိုက်ကူးထုတ်လွှင့်နေသည့် ၂၆ မိနစ်ကြာသည့် တိုက်ရိုက်ရုပ်သံမှတ်တမ်းအရသိရသည်။

အဆိုပါတိုက်ရိုက်လွှင့်နေသည့်ရုပ်သံမှတ်တမ်းမှာ မတ် ၂၂ နေ့ည ၁၀ နာရီဝန်းကျင့်ခန့်က ထုတ်လွှင့်ခဲ့တာဖြစ်ပြီး ကြည့်ရူသူ ၁သိန်းကျော် ရှိခဲ့သည်။ရိုက်ကူးထုတ်လွှင့်နေစဉ် ယူနီဖောင်းဝတ်ဆင်ထားသည့် အာဏာပိုင်များက အချက်ပေးခရာများမူတ်သည့်အသံကိုလည်း ရုပ်သံမှတ်တမ်းတွင်တွေ့ရှိရသည်။

အဆိုပါ Ghost Hunters အဖွဲ့သည် မြန်မာနိုင်ငံအတွင်းရှိ သရဲခြောက်သည်ဆိုသောနေရာများကို သွားရောက်ပြီး ရိုက်ကူးထုတ်လွှင့်နေသည့် အဖွဲ့လည်းဖြစ်ကြောင်းသိရသည်။အဖမ်းမခံရစဉ် လူမူကွန်ယက်တွင် မကျွတ်မလွတ်သေးသည့် သမိုင်းထဲကနာမည်ကြီး ဗိဿနိူးဘုရင်မကြီးနှင့်အစောင့်အရှောက်များဆိုပြီး ၎င်းတို့၏တရားဝင် လူမူကွန်ယက်စာမျက်နှာတွင် ဖော်ပြထားသည်။

အဆိုပါရုပ်သံမှတ်တမ်းကိုကြည့်လိုပါ Ghost Hunters Myanmar Facebook စာမျက်နှာတွင်ဝင်ရောက်ကြည့်ရူနိုင်သည်။
yng/ynzw
#Ghost Hunters Myanmar
#Yangon_Media_Group

#LocalNews
Published_ 23 March 2023

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် နှင့် ရုရှားဖက်ဒရေးရှင်းနိုင်ငံ၊ ရှေ့နေချုပ် H.E. Mr. Igor Krasnov ဦးဆောင်သည့် ကိုယ်စားလှယ်အဖွဲ့တို့ မတ်လ ၂၂ ရက်က နေပြည်တော်ရှိ နိုင်ငံတော်စီမံ အုပ်ချုပ်ရေးကောင်စီဥက္ကဋ္ဌရုံး၊ သံတမန်ဆောင်ဧည့်ခန်းမ၌ တွေ့ဆုံ၍ ဥပဒေရေးရာများကို ဆွေးနွေးခဲ့ကြကြောင်း သိရသည်။

မြန်မာနိုင်ငံနှင့် ရုရှားနိုင်ငံတို့အကြား သံတမန်ဆက်ဆံရေး ဆိုင်ရာ တိုးတက်ကောင်းမွန်မှုအခြေအနေများ၊ ဥပဒေရေးရာကိစ္စရပ်များတွင် ပူးပေါင်း ဆောင်ရွက်မှုများ တိုးမြှင့်ဆောင်ရွက်သွားမည့်အခြေအနေများ၊ မြန်မာနိုင်ငံမှ ဥပဒေ ပညာရှင်များ ရုရှားနိုင်ငံတွင် ဥပဒေပညာရပ်များ သင်ကြားပေးမည့် အခြေအနေများနှင့် ရုရှားနိုင်ငံမှ ဥပဒေရေးရာကျွမ်းကျင်သူများက မြန်မာနိုင်ငံတွင် ဥပဒေနှင့်ပတ်သက်၍ လာရောက်သင်ကြားပေးမည့် အခြေအနေများ၊ စစ်ဘက်ဥပဒေများ သင်ကြားနိုင်ရေးအတွက် မြန်မာနိုင်ငံမှ သင်တန်းသားများစေလွှတ်သွားမည့် အခြေ အနေများ၊ မြန်မာနိုင်ငံတွင် ရုရှားဘာသာစကားသင်တန်းများ ဖွင့်လှစ်လျက်ရှိမှုနှင့် ရုရှားနိုင်ငံတွင် မြန်မာဘာသာစကားသင်တန်းများ ဖွင့်လှစ်သင်ကြားလျက်ရှိမှု အခြေအနေများနှင့် နှစ်နိုင်ငံအကြားပူးပေါင်းဆောင်ရွက်မှုများ ပိုမိုတိုးတက်အောင် ဆောင်ရွက်သွားမည့် အခြေအနေများနှင့်ပတ်သက်၍ ဆွေးနွေးခဲ့ကြခြင်းဖြစ်ကြောင်း သိရသည်။

ယင်းတွေ့ဆုံပွဲတွင် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်နှင့်အတူ ကောင်စီတွဲဖက်အတွင်းရေးမှူး ဒုတိယ ဗိုလ်ချုပ်ကြီး ရဲဝင်းဦး၊ အပြည်ပြည်ဆိုင်ရာပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီး ဦးကိုကိုလှိုင်၊ ဥပဒေရေးရာဝန်ကြီးဌာန ပြည်ထောင်စုဝန်ကြီး ၊ ပြည်ထောင်စုရှေ့နေချုပ် ဒေါက်တာ သီတာဦးတို့ တက်ရောက်ကြပြီး ရုရှားဖက်ဒရေးရှင်းနိုင်ငံ၊ ရှေ့နေချုပ် H.E. Mr. Igor Krasnov နှင့်အတူ မြန်မာ နိုင်ငံဆိုင်ရာရုရှားဖက်ဒရေးရှင်းနိုင်ငံ သံအမတ်ကြီး H.E. Dr. Nikolai LISTOPADOV နှင့် ကိုယ်စားလှယ်အဖွဲ့ဝင် များ တက်ရောက်ခဲ့ကြကြောင်း သိရသည်။

ymg/mt
#Yangon_Media_Group

#World_Health
Published 23 March 2023

သဘာဝဘယ်ရီသီးတစ်ခွက်နဲ့ ညီမျှတဲ့ အေးခဲခြောက်သွေ့တဲ့ ဘလူးဘယ်ရီးသီး ၂၅ ဂရမ်နေ့စဉ်စားသုံးခြင်းဖြင့် ကိုယ်ကာယလှုပ်ရှားမှုကို တိုးတက်စေကာ လေ့ကျင့်ခန်းပြုလုပ်စဉ်မှာလည်း ခန္ဓာကိုယ်အဆီကို ပိုမိုလောင်ကျွမ်းစေကြောင်း လေ့လာတွေ့ရှိခဲ့ပါတယ်။

ဘလူးဘယ်ရီသီးက စွမ်းအင်အတွက် ဖက်တီးအက်ဆစ်ဖြိုခွဲမှုဖြစ်စဉ်ကို မြှင့်တင်ပေးတဲ့အကြောင်းအရာနဲ့ ပတ်သက်ပြီး ကယ်လီဖိုးနီးယားပိုလီတက်ခ်နစ်ပြည်နယ်တက္ကသိုလ်နဲ့ ဂွန်ဇာဂါတက္ကသိုလ်တို့မှ သိပ္ပံပညာရှင်များက စမ်းသပ်ချင်ခဲ့ကြပါတယ်။

ဘလူးဘယ်ရီမှာ အန်သိုဆိုင်ယာနင် ဓာတ်တိုးဆန့်ကျင်ပစ္စည်းပါဝင်တာကြောင့် အဆီဖြိုခွဲမှုကို အားပေးတာဖြစ်နိုင်ပါတယ်။

ကျန်းမာသော အမျိုးသားစက်ဘီးစီး ၁၁ ဦးကို ကျန်းမာရေးနဲ့ပတ်သက်ပြီး မေးမြန်းခဲ့ကာ မိနစ် ၄၀ ကြာစက်ဘီးစီးခိုင်းခဲ့ပါတယ်။

စက်ဘီးစီးရင်း ၁၀ မိနစ်ကြာတိုင်း လက်ထိပ်သွေးဖောက်ကာ နမူနာယူခဲ့ပါတယ်။

သူတို့ဟာ အချိန်နှစ်ပတ်တိုင်အောင် နေ့စဉ် အန်သိုဆိုင်ယာနင် ၃၇၅ ဂရမ်ပါဝင်တဲ့ အေးခဲခြောက်သွေ့သော ဘလူးဘယ်ရီအမှုန့် ၂၅ ဂရမ်စားသုံးစေခဲ့ပါတယ်။

မိနစ် ၂၀ ကြာစက်ဘီးစီးပြီးနောက် အဆီဖြိုခွဲခြင်း ၁၉.၇ ရာခိုင်နှုန်းများပြားကာ မိနစ် ၃၀ ကြာပြီးနောက် ၄၃.၂ ရာခိုင်နှုန်း၊ မိနစ် ၄၀ အကြာမှာ ၃၁.၁ ရာခိုင်နှုန်း အသီးသီးမြင့်တက်သွားပါတယ်။

နောက်ဆုံးကောက်ချက်အရ အားကစားသမားတွေဟာ ဘယ်ရီသီးစားပြီးနောက် အဆီပိုမိုလောင်ကျွမ်းသွားပါတယ်။

ဒါ့အပြင် ဘလူးဘယ်ရီဟာ ကြွက်သားကိုပြန်လည်ပြေလျော့စေပြီး ခန္ဓာကိုယ်ကနေ လေ့ကျင့်ခန်းကို ပိုမိုတာရှည်ပြုလုပ်နိုင်အောင် စွမ်းအင်ထုတ်လုပ်ပေးပါတယ်။

အဆီဖြိုခွဲရာမှရတဲ့စွမ်းအင် နည်းပါးသွားတဲ့အခါ ခန္ဓာကိုယ်က ကာဗိုဟိုက်ဒရိတ်ကရတဲ့ ဂလိုင်ကိုဂျင်ကိုအသုံးပြုပြီး ဂလိုင်ကိုဂျင်လျော့ကျလာတာနဲ့အမျှ ပိုမိုပင်ပန်းလာစေပါတယ်။

ဒါ့အပြင်ဘလူးဘယ်ရီစားပြီးတဲ့အခါ နွမ်းနယ်ခြင်းကိုဖြစ်စေတဲ့ လက်တိတ်ပမာဏလျော့ကျစေပြီး လေ့ကျင့်ခန်းကိုရေရှည်ပြုလုပ်နိုင်ပါတယ်။

Source: NY Post
#Yangon_Media_Group

#LocalNews
Published_ 23 March 2023

မတ်လ ၂၂ ရက် ည ၇ နာရီ ၃၀ အချိန်ခန့်တွင် ရန်ကုန်တိုင်း မင်္ဂလာဒုံမြို့နယ် ပုလဲမြို့သစ် (၁) မြတ်လေးလမ်းတွင် Probox ယာဉ်တစ်စီးကို ငှားရမ်းလာသူ လူ ၅ ဦးမှ လုယက်ယူဆောင်သွားမှု ဖြစ်ပွားခဲ့ကြောင်း ပုလဲ အရန်မီးသတ်တပ်ဖွဲ့မှ တာဝန်ရှိသူတစ်ဦးက YGM သို့ပြောသည်။

အင်းစိန် City Mart ရှေ့မှ ပုလဲအိမ်ရာသို့ လူ ၅ ဦးမှ ငှားစီးသဖြင့် ငွေကျပ် ၁၅၀၀၀ ဖြင့် လိုက်လံပို့ဆောင်ရာမှ ပုလဲမြို့သစ် မြတ်လေးလမ်းအရောက်တွင် ကားနောက်ခန်းထိုင်သူ ၄ ဦးမှ လည်ပင်းကို ကြိုးဖြင့် သိုင်းပြီး ဝိုင်းဝန်း ထိုးကြိတ်ကြသည်ဟု သိရသည်။

ထို့ကြောင့် ယာဉ်မောင်းဖြစ်သူမှ အသက်အန္တရာယ်မပေးဖို့တောင်းပန်ကာ ကားပေါ်မှ ဆင်းပြေးခဲ့ရသည်ဟု ပုလဲအရန်မီးသတ် တာဝန်ရှိသူမှ သူကြားသိရသည်ကို ပြန်လည်ပြောပြသည်။

" ယာဉ်မောင်းက တောင်းပန်တော့ ထိုးကြိတ်ရင်း ကားပေါ်ကနေဆွဲချတယ်ပေါ့။ သူပြန်ပြောပြတာတော့ တက္ကစီယာဉ်မောင်းက ရွှေပေါက်ကံ ၁၁ ရပ်ကွက်မှာနေတာ။ အပြန်ကားအသိမ်းပဲဆိုပြီး သူကလည်း လိုက်ပို့တာမှာ ဖြစ်တာ။ ဓားနဲ့ထိုးတာတွေ ဘာတွေတော့မရှိဘူး။ မျက်နှာ ဖူးယောင်ပေါက်ပြဲ သွေးထွက် ဝမ်းဗိုက်နဲ့ နံတွေ ခါးတွေ အောင့်နာတာ။ အသက်ရှူခက်တာမျိုး စတဲ့ဒဏ်ရာတွေ ရသွားတယ်။ ကျွန်တော်တို့အဖွဲ့ကို အနီးအနားရပ်ကွက်က လူတွေ ဆက်သွယ်ပေးလို့ သွားရောက်ကူညီပေးတာပါ"ဟု ပြောသည်။

လုယက်ခံရသူ တက္ကစီယာဉ်မောင်းမှာ ယခုအခါ မြောက်ဥက္ကလာပ ဆေးရုံကြီးတွင် ကုသမှုခံယူနေပြီး သက်ဆိုင် ရာ ရဲတပ်ဖွဲ့မှလုပ်ထုံးလုပ်နည်းနှင့်အညီ ဆောင်ရွက်လျှက်ရှိကြောင်းလည်း သိရသည်။

ymg/ppk
#Yangon-Media-Group

#LocalNews
Published_ 23 March 2023

မြန်မာကျောင်းသား၊ကျောင်းသူများ ပြည်ပတွင်ပညာသင်ကြားနိုင်ရေးကြိုးပမ်းဆောင်ရွက်ပေးခဲ့သည့် CROWN Education၏ ပဲ့ကိုင်ရှင် ဦးအောင်ကျော်ဆန်း အိန္ဒိယတွင်ကွယ်လွန်သွားကြောင်း CROWN EDUCATION & Royal Academic Institute မိသားစု၏ထုတ်ပြန်ချက်အရသိရသည်၊၊

ထုတ်ပြန်ချက်တွင် CROWN Education & Royal Academic Institute ​၏ Managing Director ဦးအောင်ကျော်ဆန်းသည် ၂၀၂၃ ခု မတ်လ ၂၂ ရက် , India စံတော်ချိန် ညနေ ၈ နာရီ ၂၀ မိနစ်တွင် India နိုင်ငံ Hyderabad မြို့, AIG Hospital တွင် Amyloidosis ရောဂါဖြင့် ကွယ်လွန်သွားကြောင်း ကျောင်းသူ/ ကျောင်းသားများနှင့် မိဘများအား အသိပေးကြောင်း၊

ဆရာဦးအောင်ကျော်ဆန်း​၏ ပညာရေးဆိုင်ရာ အကြံပေးကူညီမှုများတွင် အမှားအယွင်း တစုံတရာရှိခဲ့ပါကလည်း စေတနာအမှားအဖြစ် နားလည်ခွင့်လွှတ်ပေးကြပါရန် ဆရာ့ကိုယ်စား တောင်းပန်အပ်ကြောင်းလည်းဖော်ပြထားသည်၊၊

ymg/tthl
#Yangon_Media_Group

#World_Health
Published 23 March 2023

ကျန်းမာရေးကောင်းတဲ့ အိမ်မွေးတိရိစ္ဆာန်တွေဆီထံမှ ဆေးယဉ်ပါးရောဂါပိုးမွှားများဟာ သူတို့ရဲ့ပိုင်ရှင်တွေဆီသို့ ကူးစက်နိုင်တဲ့အပြင် လူသားတွေထံမှ ဘေးအန္တရာယ်ရှိပိုးမွှားတွေကလည်း သူတို့မွေးထားတဲ့ ခွေးတွေကြောင်တွေထံသို့ ကူးစက်နိုင်ကြောင်း The Lancet ဂျာနယ်မှာ ဖော်ပြလိုက်ပါတယ်။

ပိုးသတ်ဆေးယဉ်ပါးရောဂါကူးစက်မှုကြောင့် ၂၀၁၉ ခုနှစ်က ကမ္ဘာတဝှမ်းမှာ သေဆုံးသူ ၁.၃ သန်းခန့်ရှိခဲ့ကာ သေဆုံးမှု ၅ သန်းနီးပါးနဲ့ ဆက်စပ်နေပါတယ်။

ရောဂါကူးစက်မှုဖြစ်စေတဲ့ ဘက်တီးရီးယား၊ ဗိုင်းရပ်စ်၊ မှို စတဲ့ ပိုးမွှားတွေက သူတို့ကိုရပ်တန့်နိုင်မယ့်ဆေးတွေကို ခံနိုင်ရည်ရှိလာတဲ့အထိ ဗီဇပြောင်းလဲလာကာ ဆေးယဉ်ပါးခြင်းအခြေအနေ ဖြစ်ပေါ်လာပါတယ်။

ဒီကိစ္စကိုသိရှိရန်အတွက် သုတေသီတွေက ဆေးရုံလူနာ ၂,၈၀၀ နဲ့ သူတို့ရဲ့အိမ်မွေးတွေကို လေ့လာခဲ့ကြပါတယ်။

ရရှိထားတဲ့နမူနာတွေထဲက ဘက်တီးရီးယားမျိုးစိတ်နဲ့ ဆေးယဉ်ပါးခြင်းမျိုးဗီဇများရှိနေခြင်းတို့ကို ခွဲခြားသိရှိဖို့ မျိုးရိုးဗီဇစီစစ်ခြင်းနည်းလမ်း အသုံးပြုခဲ့ကြပါတယ်။

ဒါ့အပြင် ဆေးယဉ်ပါးခြင်းဖြစ်စေနိုင်တဲ့ လတ်တလောရောဂါကူးစက်မှုများ၊ ပိုးသတ်ဆေးအသုံးပြုခြင်းများ၊ ဆေးရုံတက်ရခြင်းများ၊ သွေးကြောဆီးကြောပိုက်ထည့်ခြင်း၊ အိမ်မွေးတိရိစ္ဆာန်အရေအတွက်၊ ထိစပ်ခြင်းအခြေအနေတို့ကိုလည်း မေးမြန်းခဲ့ကြပါတယ်။

ထိုထဲမှာမှ ဆေးယဉ်ပါးခြင်းပိုးမွှားကူးစက်လူနာ ၃၀ ရာခိုင်နှုန်းတွေ့ရပြီး ၁၁ ရာခိုင်နှုန်းက ခွေးတစ်ကောင်ပိုင်ဆိုင်ကာ ၉ ရာခိုင်နှုန်းကတော့ ကြောင်တစ်ကောင်ပိုင်ဆိုင်ထားပါတယ်။

သူတို့မွေးထားတဲ့တိရိစ္ဆာန်တွေရဲ့ လည်ချောင်းနဲ့ မစင်နမူနာများကို ရယူပေးဖို့ ပိုင်ရှင်များထံတောင်းဆိုခဲ့ပါတယ်။

အိမ်မွေးတိရိစ္ဆာန်ပေါင်း ၄၀၀ ထံမှ နမူနာများရရှိခဲ့ကာ ခွေး ၁၅ ရာခိုင်နှုန်းနဲ့ ကြောင် ၅ ရာခိုင်နှုန်းမှာ အနည်းဆုံး ဆေးယဉ်ပါးပိုးမွှားတစ်မျိုးတွေ့ခဲ့ပါတယ်။

ဒီစမ်းသပ်မှုတွေဟာ မြို့ပြလူနေများထံမှသာ ရယူခဲ့တာကြောင့် ကူးစက်နိုင်ချေများတဲ့ လယ်ယာမွေးမြူရေးတွေတော့ မပါဝင်ခဲ့ပါဘူး။
လူတွေနဲ့ သူတို့ရဲ့အိမ်မွေးတိရိစ္ဆာန်တွေကြား ဆေးယဉ်ပါးရောဂါပိုးမွှား အပြန်အလှန်ကူးစက်နိုင်ချေရှိကြောင်း၊ အိမ်မွေးတိရိစ္ဆာန်နဲ့မဆိုင်တဲ့ ဆေးယဉ်ပါးရောဂါပိုးမွှားကူးစက်မှုကတော့ အနည်းငယ်သာရှိပါတယ်" လို့ ဂျာမနီဘာလင်ချယ်ရစ်ဆေးရုံမှ ကယ်ရိုလင်ဟက်ခ်မန်းက ပြောကြားခဲ့ပါတယ်။

လူနာတွေနဲ့ သူတို့ရဲ့အိမ်မွေးတွေကြား ကူးစက်မှုနည်းပါးပေမယ့် ပတ်ဝန်းကျင်သို့ ဘက်တီးရီးယားဖြန့်နိုင်ပြီး ရောဂါကူးစက်နိုင်ချေများတဲ့ လူတွေထံသို့ ကူးစက်သွားနိုင်ပါတယ်လို့ ပြောကြားသွားပါတယ်။

Source: The Jerusalem Post.
#Yangon_Media_Group

#LocalNews
Published_ 22 March 2023

မတ်လ ၂၀ ရက်နေ့ ညနေ၄:၃၀အချိန် မူးယစ်ဆေးဝါးတားဆီးနှိမ်နင်းရေးရဲတပ်ဖွဲမှ တပ်ဖွဲဝင်များကပြည်ကြီးတံခွန်မြိုနယ်၊ ချမ်းမြသာယာရပ်ကွက်၊ ကျွဲဆည်ကန်(၅)လမ်းတွင် မျိုးကျော်ဦး မောင်းနှင်ပြီး စိုင်းကိုကိုချစ်(ခ)မောင်ကို လိုက်ပါလာသည့် SUBARU SAMBAR အမျိုးအစား မော်တော်ယာဉ်အား ရပ်တန့်စစ်ဆေးရှာဖွေခဲ့ပါတယ်။

#YMG#Yangon_Media_Group

#World_Automobile
Published 21 March 2023

ယာဉ်မောင်းလိုင်စင်ရဖို ငယ်လွန်းသေးတဲ့ အသက် ၁၅ နှစ်အရွယ်'အဲဗယ်လီနာခရစ်ရှန်ဆန်'က ဆွီဒင်နိုင်ငံရှိ ပေါ့ပါးသွက်လက်တဲ့ BMW ကားတွေကို ပျော်ရွှင်စွာမောင်းနှင်နေပြီဖြစ်ပါတယ်။

#YMG#Yangon_Media_Group

#LocalNews
Published_ 22 March 2023

သင်္ကြန်ကာလမတိုင်ခင်အထိ ဆန်ဈေးအတက်အကျမရှိ တည်ငြိမ်နေနိုင်ကြောင်း ဆန်ကုန်သည်များတွေက ပြောပါတယ်။

#YMG#Yangon_Media_Group

#LocalNews
Published_ 22 March 2023

ဝေါမြို့နယ် စစ်တောင်းတံတားအနီး ညောင်ခါးရှည် စစ်ဆေးရေးဂိတ်မှာ ယာဉ်တန်းများပိတ်မိနေတာကြောင့် လူနာတင်ယာဉ်မျာနဲ့ ခရီးသည်များအခက်အခဲဖြစ်နေတယ်လို့ ပရဟိတအသင်းတွေက YMG ကိုပြောပါတယ်။အခုလို ယာဉ်တွေပိတ်နေတာဟာ တစ်ပတ်လောက်နီးပါးရှိနေပြီလို့ ခရီးသွားတွေကပြောပါတယ်။

#YMG#Yangon_Media_Group