#Local_News

Published_ 2 May 2023

ပြည်တွင်းရှိ စားသုံးသူများ အနေနှင့် Online Shopping များနှင့်ပတ်သက်၍ အခက်အခဲ များ၊ မကျေနပ်မှုများရှိပါက စား သုံးသူရေးရာဦးစီးဌာနသို့ ဆက် သွယ် တိုင်ကြားနိုင်ကြောင်း စီးပွားရေးနှင့် ကူးသန်းရောင်း ဝယ်ရေးဝန်ကြီးဌာန၊ စားသုံးသူ ရေးရာဦးစီးဌာနမှအသိပေး ကြေညာချက် ထုတ်ပြန်ထား သည်။

ပြည်သူများအနေဖြင့် Online Shopping တွင် ငွေပေးချေပြီး နောက် ပစ္စည်းပေးပို့မှုမရှိခြင်း၊ ကြော်ငြာထားသော ပစ္စည်းနှင့် လက်ခံရရှိသော ပစ္စည်း၏ အရည်အသွေး ကွဲလွဲနေခြင်းတို့ ကို တိုင်ကြားနိုင်ကြောင်းသိရသည်။

ထို့ပြင် စားသုံးသူထံမှ ငွေကြေးရယူပြီး နောက် သက်ဆိုင်ရာ Online Shopping ဖုန်းနံပါတ်များသို့ ဆက်သွယ်၍ မရခြင်းအပြင် ကုန်ပစ္စည်းများပေါ်တွင် ရိုက်နှိပ် ထားသော အချက်အလက်များ အား ချဲ့ကားဖော်ပြထားခြင်းများ ကိုလည်း တိုင်ကြားနိုင်ကြောင်း စားသုံးသူရေးရာ ဦးစီးဌာနမှ အသိပေးကြေညာထားသည်။

အလားတူ ကုန်ပစ္စည်းများ ကို သဘောတူညီထားသည့် အချိန်အတွင်း ပို့ဆောင်မှုမရှိ ခြင်း၊ Online Shopping ၏ ကုန်ပစ္စည်းပို့ဆောင်ရေး ဝန် ဆောင်မှုလုပ်ငန်းများ၏ ပစ္စည်း လက်ခံပြေစာများကို အတုပြုလုပ် ခြင်း စသည်တို့ကိုလည်း တိုင် ကြားနိုင်ကြောင်း သိရသည်။
စားသုံးသူများ အနေဖြင့် တိုင်ကြားလိုပါက စီးပွားရေးနှင့် ကူးသန်းရောင်းဝယ်ရေးဝန်ကြီး ဌာန၊ စားသုံးသူရေးရာဦးစီးဌာန ၏ Official Website တွင် လည်းကောင်း၊ DOCA Myanmar Mobile Application အား Download ဆွဲ၍လည်းကောင်း တိုင်ကြားနိုင်ကြောင်း စားသုံးသူ ရေးရာဦးစီးဌာနမှ အသိပေးကြေညာ ချက်တွင် ဖော်ပြထားသည်။

ထို့အပြင် Consumer Call Center ၏ Hot Line ဖုန်းနံပါတ် ၁၅၃၅ သို့ ခေါ်ဆို၍ဖြစ်စေ၊ စား သုံးသူရေးရာဦးစီးဌာန၏ Face- book မှတစ်ဆင့်ဖြစ်စေ၊ စားသုံး သူ သတင်းပြန်ကြားရေးနှင့် တိုင်ကြားမှု လက်ခံဆောင်ရွက် ရေးစင်တာ (CICC) တွင် ဖြစ် စေ တိုင်ကြားနိုင်ကြောင်း သိရ သည်။

ymg/ppk
#YMG #Yangon_Media_Group

#Local_News
Published_ 2 May 2023

ကုန်စျေးနူန်းကြီးမြင့်လာခြင်းနဲ့လျှပ်စစ်မီးမမှန်တာတွေကြောင့်ဆံပင်ညှပ်ခတွေစျေးမြင့်လာပြီး အနည်းဆုံး ငွေကျပ်၂ထောင်ကနေ ၃ထောင်အထိ ပေးနေရသည်။

အဲ့ဒီအခက်အခဲများကို ဖြေရှင်းဖို့ရည်ရွယ်ပြီး လက်ရှိမှာအခြေခံလူတန်းစားတွေဆံပင်ညှပ်ခံသက်သာစေဖို့ ဆံသ သင်တန်းသားတွေစုပေါင်း ရန်ကုန်မြို့ရဲ့လမ်းဆုံ လမ်းခွ တွေမှာအခမဲ့ဆံပက်ညှပ်ပေးနေသည်။

ရန်ကုန်တိုင်းအတွင်းအခြေခံလူတန်းစားအများစုနေထိုင်သည့် လှည်းကူး ၊ဒလ စသည့်မြို့နယ်တွေကို သွားရောက်ပြီ အခမဲ့ဆံသပေးနေတာဖြစ်ကြောင်း အဆိုအဖွဲ့ မှလူငယ်တစ်ဦးက YMG ကိုပြောသည်။

ယခုမေလတစ်လလုံး လမ်းဆုံလမ်းခွများတွင် လိုက်လံ ဆံပင်ညှပ်ပေးမှာဖြစ်ပြီး မည်သူမဆိုလာရောက်ဆံပင်ညှပ်နိုင်ကြောင်း အဆိုပါလူငယ်များကပြောသည်။
ymg/ynzw
#YMG #Yangon_Media_Group

#Local_News
Published_ 2 May 2023

ရန်ကုန်တိုင်းဒေသကြီး၊ လှည်းကူးမြို့နယ် မဟာဝိဟာရကျောင်းတိုက် အနီး၊ ရေသန့်ဆည်မြောင်းအတွင်း ရေဆင်းခပ်ရာမှ ကျောင်းနေစာသင်သားကိုရင်းတစ်ပါး ​မြောင်းအတွင်းပြုတ်ကျသေဆုံးမှု ဖြစ်ခဲ့ကြောင်း သိရသည်။

ဖြစ်စဥ်မှာ မေလ၂ရက် နံနက် ၈နာရီ ၂၀မိနစ်အချိန်ခန့်က ရန်ကုန်တိုင်းဒေသကြီး၊ လှည်းကူးမြို့နယ်၊ ကလီထော်အနောက်ကျေးရွာ၊ မဟာဝိဟာရကျောင်းတိုက်အနီး၊ ရေသန့်ဆည်မြောင်းအတွင်း ရေဆင်းခပ်ရာမှ ကျောင်းနေစာသင်သားကိုရင်တစ်ပါးသည် မြောင်းအတွင်းပြုတ်ကျပြီး ပျောက်ဆုံးခဲ့ခြင်းဖြစ်ကြောင်း မြန်မာနိုင်ငံမီးသတ်တပ်ဖွဲ့ကသိရသည်။

အဆိုပါဖြစ်စဥ်ကိုသတင်းရရှိသဖြင့် လှည်းကူးမြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများ ထွက်ခွာဆောင်ရွက်ခဲ့ကြောင်းသိရသည်။

ယင်းနောက် နံနက် ၁၁နာရီ၄၀ မိနစ်တွင် ရေနစ်ပျောက်ဆုံးသူကိုရင်(သေဆုံး)၏ ရုပ်အလောင်းကို ရှာဖွေတွေ့ရှိခဲ့ကြောင်း မီးသတ်တပ်ဖွဲ့၏ သတင်းထုတ်ပြန်ချက်အရသိရသည်။
#ymg/pl
#YMG #Yangon_Media_Group

#Local_News
Published_ 2 May 2023

ရခိုင်ပြည်နယ်၊ဂွမြို့နယ် ရဟိုင်းကွင်းကျေးရွာ ရွှေနန်းခိုင်ဘုရားတွင် တစ်ပါး တည်းသီတင်းသုံးနေသည့် ဆရာတော်ကြီး(ဘုန်းကြီး)တစ်ပါးအား လူတစ်ဦးက ဓါးနှင့်ခုတ်၍ ဖုန်းနှင့်ငွေ(ပိုက်ဆံ)များ ယူဆောင်သွားကြောင်း ဒေသခံပရဟိ တအသင်းကသိရသည်။

မေလ၂ရက် နံနက်၆နာရီအချိန်က ဆရာတော်ကြီးထံ နံနက်အာရုံဆွမ်းသွားပို့စဥ် ဒဏ်ရာများဖြင့်လဲကျနေကြောင်း သိရသည်။

"ဘယ်အချိန်က စဖြစ်တာလဲတော့မသိခဲ့ရပါဘူး။ သိသိချင်း ဆေးရုံကိုပို့ခဲ့ပါတယ်။ ဒဏ်ရာကများတဲ့အတွက် စိုးရိမ်ရပါတယ်"ဟု ကင်းရုံးလူငယ်ပရဟိတအသင်းက သိရသည်။

ဆရာတော်ကြီးကို ဂွမြို့ပြည်သူ့ဆေးရုံကိုပို့ဆောင်ပေးခဲ့သော်လည်း ဒဏ်ရာများသဖြင့် သံတွဲပြည်သူ့ဆေးရုံသို့ လွှဲပြောင်းကုသနိုင်ရန် ညွှန်ကြားချက်ကြောင့် နံနက် ၈နာရီ ခွဲခန့်က သံတွဲ ပြည်သူ့ဆေးရုံသို့ ပို့ဆောင်ပေးခဲ့ကြောင်းသိရသည်။

#ymg/pl
#Local_News #သီတင်းသုံးနေသောဆရာတော် #ဓားဖြင့်ခုတ်၍ဖုန်းနှင့်ပိုက်ဆံလု #ဂွမြို့နယ်
#YMG #Yangon_Media_Group

#World_Economy
Published_ 2 May 2023

အမေရိကန်ပြည်ထောင်စုသမ္မတ'ဂျိုးဘိုင်ဒင်'က ကွန်ဂရက်ထိပ်သီးခေါင်းဆောင် ၄ ဦးနဲ့ အိမ်ဖြူတော်မှာတွေ့ဆုံဆွေးနွေးရန် မေလ ၁ ရက်နေ့က တောင်းဆိုလိုက်ပါတယ်။

အကြောင်းအရင်းကတော့ အမေရိကန်ဟာ ကြွေးမြီကန့်သတ်ချက် မတိုးမြှင့်ဘူးဆိုရင် ဇွန်လရောက်တာနဲ့ အစိုးရဘေလ်များအားလုံး ပေးချေဖို့ငွေသား ပြတ်လပ်သွားနိုင်တယ်လို့ ဘဏ္ဍာရေးဝန်ကြီး'ဂျဲနက်ယယ်လန်'က သတိပေးထားတာကြောင့် ဖြစ်ပါတယ်။

အမေရိကန်ရဲ့ အကြွေးတွေကိုဆပ်ဖို့ ရန်ပုံငွေမရှိဘူးဆိုရင် အကြွေးမဆပ်နိုင်တဲ့ပြဿနာ ရှိလာနိုင်ပါတယ်။

အိမ်ဖြူတော်ရဲ့ထုတ်ပြန်ချက်အရ သမ္မတက မေလ ၉ ရက်နေ့မှာ အောက်လွှတ်တော်ဥက္ကဌ 'ကီဗင်မက်ကာသီ'၊ ကွန်ဂရက်ဒီမိုကရက်တစ်ခေါင်းဆောင်များနဲ့ အိမ်ဖြူတော်မှာတွေ့ဆုံဆွေးနွေးသွားဖို့ ဖိတ်ကြားလိုက်ပါတယ်။

ဘိုင်ဒင်ဟာ အောက်လွှတ်တော်ဒီမိုကရက်တစ်ခေါင်းဆောင် 'ဟာကင်မ်ဂျက်ဖရီစ်'၊ အထက်လွှတ်တော်လူများစုခေါင်းဆောင် 'ချက်ခ်ရှုမာ'၊ ရီပတ်ဘလစ်ကန်ခေါင်းဆောင်'မစ်ချ်မက်ကွန်နယ်'တို့နဲ့ ကြွေးမြီကန့်သတ်ချက်၊ ဖက်ဒရယ်အသုံးစရိတ်ကိစ္စများ ဆွေးနွေးဖို့ ဖိတ်ကြားလိုက်ကြောင်း နီးစပ်သူတစ်ဦးက ရိုက်တာသတင်းဌာနကို ပြောကြားလိုက်ပါတယ်။

နွမ်းပါးသူများအတွက် ကျန်းမာရေးစောင့်ရှောက်မှု၊ လမ်းပန်းဆက်သွယ်ရေး စတဲ့ကဏ္ဍတွေမှာ ဘတ်ဂျက်ဖြတ်တောက်တဲ့ အလဲအလှယ်အနေဖြင့် ကြွေးမြီကန့်သတ်ချက်တိုးမြှင့်ပေးမယ့် ဥပဒေကြမ်းတစ်ရပ်ကို ရီပတ်ဘလစ်ကန်ဦးဆောင်တဲ့ အောက်လွှတ်တော်က ဧပြီလမှာ အတည်ပြုလိုက်ပြီးနောက် အခုလိုဆွေးနွေးပွဲဖိတ်ကြားလိုက်တာ ဖြစ်ပါတယ်။

ဒီလှုပ်ရှားမှုကြောင့် ရာနဲ့ချီတဲ့ လေကြောင်းထိန်းချုပ်ရေးတာဝါတိုင်များ ပိတ်ပစ်ရနိုင်တယ်လို့ သယ်ယူပို့ဆောင်ရေးဌာနက သတိပေးထားပါတယ်။

ဒါ့အပြင် အမေရိကန်ကြွေးမြီကန့်သတ်ချက် ဒေါ်လာ ၁.၅ ထရီလီယံတိုးမြှင့်ရန် အပြန်အလှန်အနေဖြင့် အသုံးစရိတ်ဒေါ်လာ ၄.၅ ထရီလီယံဖြတ်တောက်မယ့် ရီပတ်ဘလစ်ကန်ဥပဒေမူကြမ်းကိုလည်း အကောင်အထည်ဖော်သွားမှာဖြစ်ပါတယ်။

ဒါပေမဲ့ ဒီမိုကရက်တွေချုပ်ကိုင်ထားတဲ့ အထက်လွှတ်တော်ကို ကျော်ဖြတ်ရန်မလွယ်ကူသလို သမ္မတကလည်း ဥပဒေပြုရေးကို ဗီတိုအာဏာသုံးပယ်ချနိုင်တယ်လို့ အိမ်ဖြူတော်ကပြောကြားထားပါတယ်။

ကြွေးမြီကန့်သတ်ချက် တိုးမြှင့်ခြင်းမရှိပါက ဒါမှမဟုတ် ကွန်ဂရက်မှ ဆိုင်းငံ့ထားပါက အစိုးရအနေနဲ့ အမေရိကန်စီးပွားရေးအပေါ် ငွေပေးချေရန် သိသိသာသာပျက်ကွက်စေမယ့် အန္တရာယ်ရှိနေပါတယ်။

အမေရိကန်က ဇန်နဝါရီလမှာ ဒေါ်လာ ၃၁.၄ ထရီလီယံချေးယူခွင့်ကန့်သတ်ချက်ကို ရောက်ရှိခဲ့ကာ အခုလိုထွက်ပေါ်လာတာဖြစ်ပါတယ်။

ဘဏ္ဍာရေးဝန်ကြီးက တနင်္လာနေ့မှာ ပြောကြားရာမှာ ကွန်ဂရက်အနေနဲ့ ဇွန်လ ၁ ရက်နေ့မတိုင်ခင် ကြွေးမြီကန့်သတ်ချက်ကို မတိုးမြှင့်နိုင်ဘူးဆိုရင် အစိုးရကြွေးမြီကို ကျေပွန်အောင်ဆက်လက်ဆောင်ရွက်နိုင်မှာမဟုတ်ဘူးလို့ အဆိုးဆုံးခန့်မှန်းရကြောင်း ဆိုပါတယ်။
Source: WION.
#World_Economy #အမေရိကန်ကြွေးမြီကိစ္စ #အောက်လွှတ်တော်ဥက္ကဌ #လွှတ်တော်ခေါင်းဆောင်များ #ဂျိုးဘိုင်ဒင်ဖိတ်ကြား
#YMG #Yangon_Media_Group

#Local_News
Published_ 2 May 2023

မြန်မာအလုပ်သမားများ ဟောင်ကောင်အထူးအုပ် ချုပ်ခွင့်ရဒေသသို့လာရောက်၍ကာလရှည်အလုပ်လုပ်ကိုင်ရန်အခက်အခဲရှိနိုင်သည်ဟုဟောင်ကောင်မြို့ရှိမြန်မာကောင်စစ်ဝန်ရုံးမှထုတ်ပြန်လိုက်သည်၊၊

မြန်မာနိုင်ငံနှင့်ဟောင်ကောင်အစိုးရအကြား အလုပ်သမားခေါ်ယူခန့်ထားရေးသဘောတူညီချက်လက်မှတ်ရေးထိုးထားခြင်းမရှိသေးသဖြင့် ဟောင်ကောင်အထူးအုပ်ချုပ်ခွင့်ရဒေသသို့လာရောက်၍ ကာလရှည်အလုပ်လုပ်ကိုင်မည့်မြန်မာအလုပ်သမားများအနေဖြင့်အခက်အခဲရှိနိုင်သည်ဟုဆိုသည်၊၊

ထုတ်ပြန်ချက်တွင် ဟောင်ကောင်အထူးအုပ်ချုပ်ခွင့်ရဒေသတွင်သက်ကြီးရွယ်အိုစောင့်ရှောက်ရေးအတွက်အလုပ်သမားခေါ်ယူမည်ဖြစ်ကြောင်း မြန်မာနိုင်ငံရှိအလုပ်အကိုင်ရှာဖွေရေးလုပ်ငန်းအချို့မှ ၄င်းတို့၏လူမှုကွန်ရက်စာမျက်နှာတွင်အလုပ်အကိုင် ကြေညာများထုတ်ပြန်လျက်ရှိသည်ကိုတွေ့ရှိရကြောင်း၊

ဟောင်ကောင်အထူးအုပ်ချုပ်ခွင့်ရဒေသတွင်သက်ကြီးရွယ်အိုစောင့်ရှောက်ရေးအတွက်ပြည်ပနိုင်ငံများမှ အလုပ်သမားခေါ်ယူရန်အစီအစဥ်ရှိသော်လည်း မြန်မာနိုင်ငံနှင့် ဟောင်ကောင်အထူးအုပ်ချုပ်ခွင့်ရဒေသတို့အကြား အလုပ်သမားခေါ်ယူခန့်ထားရေးသဘောတူညီချက် တစ်စုံတစ်ရာလက်မှတ်ရေးထိုးထားခြင်းမရှိသဖြင့် မြန်မာနိုင်ငံမှ အလုပ်သမားများအနေဖြင့် ဟောင်ကောင်ဒေသသို့လာရောက်၍ ကာလရှည်အလုပ်လုပ်ကိုင်ရန် အခက်အခဲရှိနိုင်ပါကြောင်း ဟောင်ကောင်မြို့ရှိမြန်မာကောင်စစ်ဝန်ရုံး၏ထုတ်ပြန်ထားသည်၊၊
ymg/tthl
#YMG #Yangon_Media_Group

#Local_News
Published_ 2 May 2023

ယနေ့ နံနက်ပိုင်းက ရန်ကုန်မြို့ရှိ တာမွေပလာဇာရှေ့က ပလက်ဖောင်းဘေးမှာ အမျိုးသားတစ်ဦး သေဆုံးမှုဖြစ်ပွားခဲ့တယ်လို့ မြန်မာမွတ်စလင်မ်ပရဟိတအဖွဲ့ထံက သိရသည်။

မေလ ၂ရက်နေ့ နံနက်ပိုင်းအချိန်က တာမွေမြို့နယ်၊ တာမွေကြီး(က+ဂ)ရပ်ကွက်၊ သမိန်ဗရမ်းလမ်းရှိ တာမွေပလာဇာရှေ့က ပလက်ဖောင်းဘေးမှာ အသက် ၃၃နှစ်အရွယ်ရှိ အမျိုးသားတစ်ဦး သေဆုံးနေခြင်းဖြစ်သည်။

အဆိုပါသေဆုံးသူသည် တာမွေကြီး(က+ဂ)ရပ်ကွက်၊ ၁၅၆လမ်းနေသူ ဦးဝင်းအောင်ကို(အသက် ၃၃နှစ်)ဖြစ်တယ်လို့ သိရပြီး သေဆုံးသူရဲ့ရုပ်အလောင်းကို သက်ဆိုင်ရာတာဝန်ရှိသူများက စစ်ဆေးမှုများပြုလုပ်ခဲ့ကြောင်းသိရသည်။

သေဆုံးသူရဲ့ရုပ်အလောင်းအား သင်္ဃန်းကျွန်းမြို့နယ်ရှိ စံပြဆေးရုံ ရေခဲတိုက်သို့ ပို့ဆောင်ကုသိုလ်ယူခဲ့တယ်လို့ မြန်မာမွတ်စလင်မ်ပရဟိတအဖွဲ့က ထုတ်ပြန်ထားသည်။

ymg/ppk
#YMG #Yangon_Media_Group

#Local_News
Published_ 2 May 2023

ဧရာဝတီမြစ်အတွင်း ရေဆော့သူ ၊ ရေချိုးလာသူ ၊ အပန်းဖြေသူများ အသက်အန္တရာယ်မဖြစ်စေရေး အတွက် သတိပေး ဆိုင်းဘုတ်များကို ဧပြီလ ၃၀ ရက်က စိုက်ထူခဲ့ကြောင်း ဒေသတွင်းရေနစ်သူကူညီကယ်ဆယ်ရေးအသင်းကသိရသည်။

ဧရာဝတီမြစ်အတွင်း ရေဆင်းချိုးရာမှ မကြာခဏ ရေနစ်မြုတ်သေဆုံးသူများ ရှိလာနေသည့်အတွက် ယင်းဆိုင်းဘုတ်များကို ပြည်မြို့ ဘောတံတားအောက်တစ်လျှောက် မြစ်ကမ်းဘေးတွင်အသက်အန္တရာယ်မဖြစ်စေရေးအတွက်ရည်ရွယ်၍ "သတိ-ရှေ့ဆက်တိုးလျှင်သေတတ်သည်" ဟု ရေးသားထားကြောင်း သိရသည်။

"အခု ရက်ပိုင်းအတွင်းမှာ အရမ်းပူနေတာကြောင့် မြစ်ထဲမှာ ရေဆင်းချိုးသူတွေ များနေတယ်။ရေချိုးတာကနေ ရေနစ်တာတွေ ဖြစ်တယ်။ဒါကြောင့် ဒီလို အန္တရာယ်တွေ မဖြစ်အောင် ဆိုင်းဘုတ် စိုက်တာ ဖြစ်ပါတယ်"ဟု ဒေသတွင်းရေနစ်သူကူညီကယ်ဆယ်ရေးအသင်း တာဝန်ရှိသူက ပြောသည်။

ပြီးခဲ့သည့် ဧပြီလ၂၇ရက်ကလည်း ပြည်မြို့ဧရာဝတီမြစ်အတွင်းမိသားစု ၆ဦး ပြည်မြို့ ဧရာဝတီမြစ်အတွင်းရေဆင်းချိုးရာ ၃ဦးရေနစ်ခဲ့သေးကြောင်း၊ယင်းအပြင် ပြီးခဲ့သည့်ရက်ပိုင်းကလည်း ရတနာပုံတံတားအောက် ဧရာဝတီမြစ်အတွင်း အမျိုးသား၁ဦးရေဆင်းချိုးရာမှရေနစ်သေဆုံးခဲ့ကြောင်းသိရသည်။

#ymg/pl
#Local_News ##ဧရာဝတီမြစ် #အသက်အန္တရာယ်မဖြစ်စေရေးသတိပေ #ဆိုင်းဘုတ်
#YMG #Yangon_Media_Group

#World_Health
Published_ 2 May 2023

ပါးစပ်ဖြင့် လိင်ဆက်ဆံခြင်းဟာ ယူကေနဲ့ အမေရိကန်တို့မှာ လည်ချောင်းကင်ဆာဖြစ်စေနိုင်တဲ့ အဓိကအကြောင်းအရင်းဖြစ်လာပါတယ်။

ထိုနှစ်နိုင်ငံမှာ အရင်က သားအိမ်ခေါင်းကင်ဆာက အဖြစ်အများဆုံးကင်ဆာဖြစ်ခဲ့ပေမယ့် ပြီးခဲ့တဲ့ဆယ်စုနှစ် ၂ ခုအတွင်း လည်ချောင်းကင်ဆာ အဖြစ်များလာကြောင်း ပညာရှင်များက ပြောကြားလိုက်ပါတယ်။

ဒါဟာ သားအိမ်ခေါင်းကင်ဆာ အဓိကဖြစ်ပွားရခြင်း အကြောင်းအရင်းဖြစ်တဲ့ HPV ဗိုင်းရပ်စ်ကြောင့်လို့ ဘာမင်ဂမ်တက္ကသိုလ်မှ ဒေါက်တာ'ဟီရှမ်မဲဟန်နာ'က ဖော်ပြခဲ့ပါတယ်။

ဒီဗိုင်းရပ်စ်က ရောဂါပိုးရှိသူအမျိုးသမီးနဲ့ ယောနိ၊ စအို၊ ပါးစပ်မှတဆင့် လိင်ဆက်ဆံခြင်းတို့ကနေ ကူးစက်လေ့ရှိပါတယ်။

ပါးစပ်ဖြင့် လိင်ဆက်ဆံခြင်းကြောင့် အဖြစ်များလာတဲ့ လည်ချောင်းကင်ဆာဟာ အာသီးနဲ့ လည်ချောင်း အနောက်ဘက်တို့မှာ ကင်ဆာဖြစ်ပွားတာဖြစ်ပါတယ်။

ပြီးခဲ့တဲ့ဆယ်စုနှစ် ၂ ခုအတွင်း အနောက်နိုင်ငံတွေမှာ လည်ချောင်းကင်ဆာအဖြစ်များလာပြီး ကပ်ရောဂါလို့တောင် သတ်မှတ်လာကြပါတယ်။

ဒီရောဂါဖြစ်ပွားရခြင်းမှာ HPV ကူးစက်မှုက အဓိကအန္တရာယ်ဖြစ်နေတယ်လို့ အရင်လေ့လာမှုတွေမှာလည်း တွေ့ရှိရပါတယ်။

"HPV က လိင်ကြောင့်ကူးစက်တဲ့ရောဂါဖြစ်ပြီး လည်ချောင်းကင်ဆာအတွက် အဓိကဖြစ်ပွားရတဲ့အကြောင်းအရင်းကတော့ ပါးစပ်ဖြင့်လိင်ဆက်ဆံတဲ့ လက်တွဲဖော်အရေအတွက်ကြောင့်ဖြစ်တယ်" လို့ ဖော်ပြခဲ့ပါတယ်။

ပါးစပ်ဖြင့် မဆက်ဆံတဲ့လူတွေထက်စာရင် လက်တွဲဖော် ၆ ယောက်နဲ့အထက်ကို ပါးစပ်ဖြင့်လိင်ဆက်ဆံတဲ့လူတွေဟာ လည်ချောင်းကင်ဆာဖြစ်နိုင်ချေ ၈.၅ ဆပိုများကြောင်းလည်း ဖော်ပြထားပါတယ်။

ဒီကူးစက်မှုတွေက များသောအားဖြင့် အလိုလိုပျောက်ကင်းသွားတတ်ပေမယ့် တစ်ခါတစ်ရံရောဂါပိုးကျန်ရှိပြီး ကင်ဆာဖြစ်စေပါတယ်။

HPV ကာကွယ်ဆေးက ၈၀ ရာခိုင်နှုန်းထိရောက်မှုရှိပြီး ဖွံ့ဖြိုးပြီးနိုင်ငံအများအပြားမှာ ရရှိနိုင်ပါတယ်။
Source: India Today
#World_Health #ပါးစပ်ဖြင့်လိင်ဆက်ဆံခြင်း #ယူကေနှင့်အမေရိကန် #လည်ချောင်းကင်ဆာ #အဓိကအကြောင်းအရင်း
#YMG #Yangon_Media_Group

#Local_News
Published_ 2 May 2023

ရေကြောင်းနှင့် လေကြောင်းလူငယ် အခြေခံသင်တန်းများနှင့် တန်းမြင့်သင်တန်းများကို သက်ဆိုင်ရာ မြို့နယ် အသီးသီးရှိ သင်တန်းစခန်းများ၌ တစ်ပြိုင်တည်း စတင်ဖွင့်လှစ်ခဲ့ကာ လေ့ကျင့် သင်ကြားပေးလျက်ရှိကြောင်း နစက သတင်းထုတ်ပြန်ရေးအဖွဲ့က သိရသည်။

တပ်မတော် (ရေ)က ရေကြောင်းလူငယ်အခြေခံနှင့် တန်းမြင့်သင်တန်းများ၊ တပ်မတော်(လေ)က အခြေခံလေကြောင်းလူငယ်သင်တန်း(အကြီးတန်းအဆင့်)နှင့် အခြေခံလေကြောင်း လူငယ်သင်တန်း(အငယ်တန်းအဆင့်)များကိုလည်းကောင်း တပ်မတော်(လေ)က အခြေခံလေကြောင်းလူငယ်သင်တန်း (အကြီးတန်းအဆင့်)နှင့် အခြေခံလေကြောင်းလူငယ်သင်တန်း(အငယ်တန်းအဆင့်) သင်တန်းများကို သက်ဆိုင်ရာမြို့ နယ် အသီးသီးရှိ တပ်မတော်(လေ) လေကြောင်း လူငယ်စခန်း များတွင်လည်းကောင်း သင်ကြားလျက်ရှိကြောင်း သိရသည်။

တပ်မတော်(ရေ)က ရေကြောင်းလူငယ်အခြေခံနှင့် တန်းမြင့်သင်တန်းများကို တနင်္သာရီတိုင်းဒေသကြီး၊ ကျွန်းစုမြို့ရှိ ရေကြောင်းလူငယ်စခန်းမှ သင်တန်းသား၊ သင်တန်းသူ စုစုပေါင်း ၁၁၅ ဦး၊ မြိတ်မြို့ရှိ ရေကြောင်းလူငယ်စခန်းမှ သင်တန်းသား၊ သင်တန်းသူ စုစုပေါင်း ၄၃ ဦး၊ ဧရာဝတီတိုင်းဒေသကြီး၊ ပုသိမ်မြို့ရှိ ရေကြောင်းလူငယ်စခန်းမှ သင်တန်းသား၊ သင်တန်းသူ စုစုပေါင်း ၅၀ ဦးတို့ကို မေလ ၁ ရက်တွင် သက်ဆိုင်ရာ နယ်မြေအသီးသီးမှ တာဝန်ရှိသူ နည်းပြများက လေ့ကျင့်သင်ကြားပေးနေကြောင်း သိရသည်။

ယင်းအပြင် သက်ဆိုင်ရာမြို့နယ် အသီးသီးရှိ တပ်မတော်(ရေ)ရေကြောင်းလူငယ်စခန်း ၁၁ ၌ သင်တန်းသား၊ သင်တန်းသူ စုစုပေါင်း ၇၁၂ ဦးတို့ကို လေ့ကျင့်သင်ကြားပေးလျက်ရှိကြောင်း၊တပ်မတော်(လေ)က လည်း လေကြောင်း လူငယ်စခန်း ၁၇ ခု၌ သင်တန်းသား၊ သင်တန်းသူ စုစုပေါင်း ၆၈၀ ဦးဖြင့် လေ့ကျင့် သင်ကြားပေးလျက်ရှိကြောင်း သိရသည်။

ymg/pl
#Local_News #ရေကြောင်းနှင့်လေကြောင်းလူငယ် #အခြေခံသင်တန်းများ
#YMG #Yangon_Media_Group

#World_Health
Published_ 2 May 2023

မှောင်မည်းနေတဲ့ မိုးတိမ်တွေက ဆေးယဉ်ပါးဘက်တီးရီးယားတွေကို အကွာအဝေးတော်တော်များများအထိ သယ်ဆောင်လာနိုင်တယ်လို့ ကနေဒါနဲ့ ပြင်သစ်သုတေသီအဖွဲ့က တွေ့ရှိထားပါတယ်။

ဒီဘက်တီးရီးယားတွေက မြေကြီး အရွက် စတဲ့မျက်နှာပြင်တွေမှာ နေတတ်ကြပြီး လေတိုက်ရာကနေ လေထုထဲသို့သယ်ဆောင်သွားကာ မိုးတိမ်အမြင့်လောက်ကနေ ကမ္ဘာတဝှမ်း အဝေးကြီးအထိ ရောက်ရှိသွားနိုင်ကြောင်း ဦးဆောင်စာတမ်းပြုစုသူ 'ဖလော်ရန့်ရော့စီ'က AFP နဲ့အင်တာဗျူးမှာ ပြောကြားခဲ့ပါတယ်။
အဆိုပါတွေ့ရှိမှုကို ပြီးခဲ့တဲ့လက Science of The Total Environment ဂျာနယ်မှာ ဖော်ပြခဲ့ပါတယ်။

တိမ်ကောင်းကင်နမူနာမှာတွေ့ရတဲ့ ဘက်တီးရီးယားတွေကနေ ပဋိဇီဝယဉ်ပါးမျိုးဗီဇတွေကို ပြင်သစ်အလယ်ပိုင်း လေဗယ်တက္ကသိုလ်မှသုတေသီများက ရှာဖွေခဲ့ကြပါတယ်။

ပင်လယ်ရေမျက်မှာပြင်အထက် ၁.၄၆၅ မီတာရှိ လေထုသုတေသီစခန်းကနေ နမူနာများရယူခဲ့ပါတယ်။

မိုးတိမ်ရေ ၁ မီလီမီတာမှာ ဘက်တီးရီးယားပေါင်း ၃၃၀ ကနေ ၃ သောင်းကျော်ပါဝင်ကာ ပျမ်းမျှအားဖြင့် ဘက်တီးရီးယား ၈ ထောင်ဝန်းကျင် ဖြစ်ပါတယ်။

ဘက်တီးရီးယားတွေက ပဋိဇီဝဆေးတွေကို ထိတွေ့မိပြီး မျိုးဆက်ပြောင်းလဲကာ ဆေးတွေကို ခံနိုင်ရည်ရှိလာတာပဲဖြစ်ပါတယ်။

ဒီပြဿနာက ကမ္ဘာတဝှမ်းမှာ အဓိကပြဿနာကြီးဖြစ်လာကြောင်း ကျန်းမာရေးအာဏာပိုင်များက အကြိမ်ကြိမ်သတိပေးထားပြီး အချို့ဖြစ်ရပ်တွေမှာ ကျန်းမာရေးနဲ့ စိုက်ပျိုးရေးကဏ္ဍတို့မှာ ပဋိဇီဝဆေးအသုံးပြုခြင်းရှိနေသေးတာကြောင့် ကုသလို့မဖြစ်နိုင်တော့ပါဘူး။

လေထုအတွင်း ပဋိဇီဝယဉ်ပါးဆေးဘက်တီးရီးယားများရဲ့ ပျံ့နှံ့မှုနဲ့ပတ်သက်ပြီး ကျန်းမာရေးအကျိုးကျေးဇူးသက်ရောက်မှုများအပေါ် ကောက်ချက်မချနိုင်သေးပါဘူး။

ရောဂါပိုးမွှားတွေရဲ့ ၅ ရာခိုင်နှုန်းမှ ၅၀ ရာခိုင်နှုန်းကသာ အသက်ရှင်လှုပ်ရှားနေနိုင်တာကြောင့် ဖြစ်ပါတယ်။

လေထုက ဘက်တီးရီးယားတွေအတွက် အလွန်ဖိအားများပြီး တွေ့ရတဲ့ဘက်တီးရီးယားအများစုက လူသားတွေကို ဘေးအန္တရာယ်သိပ်မပြုနိုင်ပေမယ့် မိုးရေထဲလျှောက်သွားတာမျိုး မလုပ်သင့်ဘူးလို့ ရှင်းပြထားပါတယ်။

လေထုစောင့်ကြည့်ခြင်းနည်းလမ်းဖြင့် ဆေးယဉ်ပါးဘက်တီးရီးယားပေါ်ပေါက်ရာ အရင်းအမြစ်ကို ထောက်ပြနိုင်မှာဖြစ်ပါတယ်။
Source: India Today
#World_Health #ဆေးယဉ်ပါးဘက်တီးရီးယား #ဝေးလံသောနေရာများအထိသယ်ဆောင်
#YMG #Yangon_Media_Group

Published 1 May 2023

တရုတ်နိုင်ငံ နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး ချင်ကန်ဟာ ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးသံတမန် နိုလင်းဟေဇာကို မေလ(၁)ရက် တနင်္လာနေ့က ဘေဂျင်းမြို့တော်မှာ လက်ခံတွေ့ဆုံခဲ့ပါတယ်။

တရုတ်နိုင်ငံ၏ နီးကပ်သော အိမ်နီးချင်းနိုင်ငံတစ်ခုအနေဖြင့် မြန်မာနိုင်ငံသည် တည်ငြိမ်သောဖွံ့ဖြိုးတိုးတက်မှုကို ရရှိနိုင်မည်ဟု အခြားသော နိုင်ငံများထက် တရုတ်နိုင်ငံ ယုံကြည်မျှော်လင့်တယ်လို့ တရုတ်နိုင်ငံခြားရေးဝန်ကြီး ချင်က ပြောပါတယ်။ ဒါပေမယ့် မြန်မာ့ပြဿနာရဲ့အကြောင်းရင်းဟာ ရှုပ်ထွေးပြီး ပြဿနာတွေကို ခပ်မြန်မြန်ဖြေရှင်းလို့ မရဘူးလို့လည်း သူက ကုလအထူးသံတမန်ကို ဆက်လက်ပြောကြားခဲ့ပါတယ်။

နိုင်ငံတကာအသိုက်အဝန်းဟာ မြန်မာနိုင်ငံရဲ့ အချုပ်အခြာအာဏာကို လေးစားသင့်ပြီး မြန်မာနိုင်ငံမှာရှိတဲ့ အဖွဲ့တွေ အားလုံးအကြား ခြားနားမှုတွေကိုပေါင်းကူးပေးကာ  ဖွဲ့စည်းပုံအခြေခံဥပဒေနှင့် ဥပဒေမူဘောင်အောက်ကနေ နိုင်ငံရေးဆွေးနွေးမှုကနေတစ်ဆင့် နိုင်ငံရေးအသွင်ကူးပြောင်းရေးလုပ်ငန်းစဉ်ကို ပြန်လည်စတင်ရေး ထောက်ခံအားပေးသင့်တယ်လို့လည်း ချင်က ပြောပါတယ်။

အရှေ့တောင်အာရှနိုင်ငံများအသင်း(အာဆီယံ)ရဲ့ ဖျန်ဖြေစေ့စပ်ရေးကြိုစားအားထုတ်မှုတွေကို နိုင်ငံတကာ အသိုက်အဝန်းက လေးစားသင့်ပြီး အကြမ်းဖက်မှုတွေချက်ခြင်းရပ်ဆိုင်းရေး၊အဖွဲ့တွေအကြားစေ့စပ်ဆွေးနွေးရေး၊ လူသားချင်းစာနာထောက်ထားမှုအကူအညီနှင့် အဖွဲ့အားလုံးနှင့်တွေ့ဖို့ မြန်မာနိုင်ငံကိုသွားရောက်မယ့် အထူးသံတမန် တစ်ဦးခန့်ထားရေးတွေပါဝင်တဲ့ အာဆီယံရဲ့ ဘုံသဘောတူညီချက်ငါးချက်ကို အကောင်အထည်ဖော်မှု တိုးမြှင့် လုပ်ဆောင်သင့်တယ်လို့လည်း တရုတ်နိုင်ငံခြားရေးဝန်ကြီးက ဆက်လက်ပြောကြားပါတယ်။

တင်းမာမှုတွေအရှိန်မြင့်တက်လာမှာနှင့် မြန်မာ့ပဋိပက္ခပြန့်နှံ့သွားမယ့်အရေးကနေ ဟန့်တားနိုင်ဖို့အတွက် သက်ဆိုင်တဲ့ အဖွဲ့တွေဟာ ချင့်ချင့်ချိန်ချိန်နှင့် လက်တွေ့ကျကျဆောင်ရွက်ဖို့လိုအပ်တာကိုလည်း နိုင်ငံခြားရေးဝန်ကြီးချင်က အလေး ပေးပြောဆိုခဲ့ပါတယ်။ အဲဒီအပြင် ဟေဇာရဲ့ စေ့စပ်ညှိနှိုင်းရေးကြိုးပမ်းအားထုတ်မှုတွေကိုလည်း တရုတ်နိုင်ငံအနေနှင့် ထောက်ခံမှုပေးလိုတဲ့ဆန္ဒရှိတယ်လို့လည်း သူကဆက်ပြောပါတယ်။

မြန်မာ့ပြဿနာ ပြေငြိမ်းရေးဟာ မြန်မာကသာဦးဆောင်သင့်ပြီး မြန်မာပြည်သူတွေရဲ့ဆန္ဒကို လေးစာသင့်တယ်လို့ ဟေဇာကပြောဆိုပါတယ်။

ဆွေးနွေးမှုတွေဟာ အတိတ်ကိုမပြောင်းလဲနိုင်ပေမယ့် အနာဂတ်ကိုတော့ ကွဲပြားခြားနားအောင်လုပ်ပေးနိုင်ပါတယ်လို့ သူမကဆက်လက်ပြောဆိုပါတယ်။  စေ့စပ်ဆွေးနွေးမှုတွေကတစ်ဆင့် မြန်မာနိုင်ငံမှာ ငြိမ်းချမ်းလုံခြုံမှုရရှိရေးနှင့်လူ့အခွင့်အရေးတွေကို ကာကွယ်စောင့်ရှောက်ရင်းနှင့် စေ့စပ်ဆွေးနွေးမှု၊ ဒေသတွင်း ဘုံဖွံ့ဖြိုတိုးတက်မှုနှင့်ချမ်းသာကြွယ်ဝမှုတိုးမြှင့်ရေးတို့အတွက် ကုလသမဂ္ဂက ရပ်တည်ထားပါတယ်လို့လည်း သူမက ဆက်ပြောပါတယ်။

မြန်မာပြဿနာမှာ အာဆီယံက တက်ကြွတဲ့ အခန်းကဏ္ဍကပါဝင်နေခြင်းအပေါ်လည်း ကုလမသဂ္ဂက ထောက်ခံအားပေးတယ်လို့ ဟေဇာက ဖြည့်စွက်ပြောကြားပါတယ်။

မြန်မာပြဿနာ ပြေငြိမ်းရေးတိုးမြှင့်လုပ်ဆောင်နေတဲ့ တရုတ်နိုင်ငံရဲ့ အခန်းကဏ္ဍအပေါ် ချီးကျူးတဲ့ အကြောင်းလည်း ဟေဇာကပြောပါတယ်။ မြန်မာနိုင်ငံရဲ့ ငြိမ်းချမ်းရေး၊တည်ငြိမ်ရေးနှင့် ဖွံ့ဖြိုးရေးတို့အတွက် အပြုသဘောဆောင်တဲ့ ပံ့ပိုးကူညီမှုတွေ တရုတ်က ဆက်လက်လုပ်ဆောင်လိမ့်မယ်လို့လည်း သူမက မျှော်လင့်ယုံကြည်တဲ့အကြောင်းပြောခဲ့ပါတယ်။

Source CCTV+

#တရုတ်နိုင်ငံခြားရေးဝန်ကြီးနှင့်နိုလင်းဟေဇာတွေ့

#မြန်မာ့နိုင်ငံရေး

#YangonMediaGroup