#LocalNews
Published_ 21 March 2023

ပုသိမ်ကြီးမြို့နယ်၊ အုန်းချော ကျေးရွာ၊ (၁၆)မိုင်ပူးပေါင်းစစ်ဆေးရေးဂိတ်အားရှောင်ကွင်း၍ မူးယစ်ဆေးဝါးများအား LAND CRUISER မော်တော်ယာဉ်ဖြင့် သယ်ဆောင်မည်ဖြစ်ကြောင်း သတင်းအရ ပိတ်ဆို့ရှာဖွေဆောင်ရွက်နေစဉ် မသင်္ကာယာဉ်ရောက်ရှိလာသဖြင့် ရှာဖွေစစ်ဆေးရန်ရပ်တန့်စေရာ ရပ်တန့်စစ်ဆေးခံခြင်းမရှိဘဲ အရှိန်မြှင့်မောင်းနှင်ထွက်ပြေးသွားကြောင်း သိရသည်။

ယင်းနောက် ပူးပေါင်းအဖွဲ့မှ ပိတ်ဆို့ဖမ်းဆီးခဲ့ရာ ညနေ ၃ နာရီခွဲအချိန် ချမ်းမြသာစည်မြို့နယ်၊ ၅၈(A)လမ်းနှင့် ၁၁၀ လမ်းထောင့်အရောက်မှာ အဆိုပါယာဉ်ပေါ်တွင် ဆာလာအိတ် ၂၂ အိတ်အတွင်းမှ ဆပ်ပြာခွက် ၄၈၄၀ ခွက်ဖြင့်ထည့်ထားသော ငွေကျပ် ၁ ဒသမ ၂၁ ဘီလီယံတန်ဖိုးရှိ ဘိန်းဖြူ ၄၈ ဒသမ ၄ ကီလို ဖမ်းဆီးရမိခဲ့ကြောင်းမြန်မာနိုင်ငံရဲတပ်ဖွဲ့မှာသတင်းထုတ်ပြန်ထားသည်။

စစ်ဆေးဖော်ထုတ်ချက်အရ သိမ်းဆည်းရမိဘိန်းဖြူများအား ရှမ်းပြည်နယ် (မြောက်ပိုင်း)မှ မန္တလေးတိုင်းဒေသကြီးသို့ လမ်းတစ်လျှောက်ရှိ ရှာဖွေစစ်ဆေးရေးစခန်းများအား ရှောင်ကွင်း၍ သယ်ဆောင်ခဲ့ခြင်းဖြစ်ကြောင်း သိရှိရသဖြင့် ပြစ်မူကျူးလွန်သူယာဉ်မောင်းအား ဥပဒေအရအရေးယူထားရှိပြီး ဆက်လက်စစ်ဆေးဖော်ထုတ်လျက်ရှိကြောင်းမြန်မာနိုင်ငံရဲတပ်ဖွဲ့မှသိရသည်။

ymg/ynzw
#Yangon_Media_Group

#LocalNews
Published-21 March 2023

မွန်ပြည်နယ် မော်လမြိုင်တွင် ဆေးခန်းလာပြသူ အမျိုးသမီးထံမှ ရွှေဆွဲကြိုးလုဖြတ်ပြေးသူကို ရပ်ကွက်နေပြည်သူများက ဝိုင်းဝန်းဖမ်းဆီးပေးနိုင်ခဲ့ကြောင်း ဘိုဘိုဝင်းအရေးပေါ်ကယ် ဆယ်ရေးအဖွဲ့က သိရသည်။

ဖြစ်စဉ်မှာ မတ်လ၂၁ရက် နံနက်၁၁နာရီအချိန်တွင် မော်လမြိုင် ချမ်းမြေဂုဏ်ဆေးခန်းလာပြသူ ကျိုက်က္ခမီမြို့နေမှ အသက်(၄၀)ဝန်းကျင်အမျိုးသမီး ၂ ဦး ထမင်းဆိုင်ရှေ့ကားစောင့်နေစဉ် ရွှေဆွဲ ကြိုး ၃ ကျပ်သားကို ဖြတ်လုခံရခြင်းဖြစ်သည်။

ယင်းကဲ့သို့ လုဖြတ်ပေးစဉ် ပြည်သူများကလိုက်လံဖမ်းဆီးရာ ဝါဆိုင်ကျော်ရွာထဲတွင် တရားခံအား နပန်းလုံးသတ်ပုတ်ဖမ်းဆီးနိုင်ခဲ့ကြောင်း သိရသည်။

"အဖိုးတန်လက်ဝတ်ရတနာတွေကို ဝတ်ဆင်ထားသူတွေ အသိသတိရှိဖို့ လိုအပ်ပါတယ်။ အတတ်နိုင်ဆုံး အခုခေတ်ကာလမှာ အဖိုးတန်လက်ဝတ်ရတနာတွေ ဝတ်ဆင်တာကို ရှောင်ကြဉ်သင့်ပါတယ်" ဟုလည်း ဘိုဘိုဝင်းက သတိပေးထားသည်။

ဖမ်းဆီးရမိသူကို ရခိုင်ကုန်းအုပ်ချုပ်ရေးမှူးရုံးသို့ ပို့ဆောင်ပေးခဲ့၍ လက်ရှိတွင် သက်ဆိုင်ရာနယ်မြေရဲစခန်းမှ ဖမ်းဆီးခေါ်ဆောင်သွားကြောင်းလည်း သိရသည်။

#ymg/mt
#ဆွဲကြိုးလုပြေး
#Yangon-Media-Group

#LocalNews
Published_ 21 March 2023

မတ်လ ၂၁ ရက်တွင် စက်သုံးဆီပေါက်ဈေး၌ ဓာတ်ဆီ ၁ လီတာလျှင် ၁၉၆၅ ကျပ်အထိ ရောက်ရှိလာပြီး ယနေ့လက်ကားရောင်းချဈေးမှာ တစ်လီတာ ၁၈၆၀ အကျနှုန်းထားဖြင့် ဈေးကျဆင်းလာကြောင်းစက်သုံးဆီတင်သွင်းမှုကြီးကြပ်ရေးအဖွဲ့ PPRD ၏ နေ့စဉ်ဈေးနှုန်းအပြောင်းအလဲများအရ သိရသည်။

ယနေ့ ရန်ကုန်မြို့ စက်သုံးဆီရည်ညွှန်းဈေး၌ အောက်တိန်း ၉၂ တစ်လီတာ ၁၉၆၅ကျပ်၊ အောက်တိန်း ၉၅ တစ်လီတာ ၂,၀၅၀ကျပ်၊ ဒီဇယ်(ရိုးရိုး) တစ်လီတာ ၂၀၀၀ကျပ်၊ ပရီမီယမ်ဒီဇယ် တစ်လီတာ၂,၀၈၀ကျပ်ဖြင့် ရောင်းချလျက်ရှိသည်။

မတ်လအစ၌ ပြည်တွင်း စက်သုံးဆီဈေးကွက်တွင် ဓာတ်ဆီ ၂,၁၀၀ ကျပ်ဖြင့် စဖွင့်ခဲ့ပြီး အမြင့်ဆုံးဈေးအဖြစ် ပရီမီယမ်ဒီဇယ် တစ်လီတာ ၂,၂၆၅ ကျပ်အထိရောက်ရှိခဲ့သည် ။

ဒေါ်လာဈေးအပြောင်းအလဲမရှိသော်လည်း ကမ္ဘာစက်သုံးဆီဈေးကြောင့် ပြည်တွင်းစက်သုံးဆီဈေးများ ပြန်လည်ကျဆင်းလာခြင်းဖြစ်ကြောင်းသိရသည်။

ymg/ppk
#ဓါတ်ဆီဈေး
#Yangon_Media_Group

#LocalNews

Published_ 21 March 2023

ရန်ကုန်သင်္ကြန်ပွဲတော်ကာလအတွင်း ခွင့်ပြုချက်မဲ့ရေဆက်သွယ်မှု ပြုလုပ်ပါက အရေးယူမည်ဖြစ်ကြောင်း ရန်ကုန်မြို့တော်စည်ပင်သာယာရေးကော်မတီ က ထုတ်ပြန်လိုက်သည်။

ယာယီရေဆက်သွယ်ခွင့်လျှောက်ထားရမှာဖြစ်ကြောင်းအဆိုပါကော်မတီမှထုတ်ပြန်လိုက်သည်။

သင်္ကြန်ပွဲတော်အတွင်း စည်ပင်သာယာ ရေပိုက်လိုင်း၊အင်းလျားကန်နှင့်ကန်တော်ကြီးတို့မှရေကို ခွင့်ပြုချက်ဖြင့် ဆက်သွယ်ကစား ရမည် ဖြစ်ပြီး ရေဆက်သွယ်လိုသူများအနေဖြင့်ဧပြီလ ၁၃ ရက်(အကြိုနေ့)နောက်ဆုံးထား၍ ရန်ကုန်မြို့တော်စည်ပင်သာယာရေးကော်မတီ အင်ဂျင်နီယာဌာန (ရေနှင့်သန့်ရှင်းမှု)သို့ ယာယီရေဆက်သွယ်ခွင့်လျှောက်ထားရမည်ဖြစ်ကြောင်းအဆိုပါ ထုတ်ပြန်ချက်တွင် ဖော်ပြထားသည်။

ယာယီရေဆက်သွယ်ခွင့်လျှောက်လွှာများကို စည်ပင်သာယာရေးကော်မတီ ၁၂ ထပ်ခွဲရုံး၊တိုးချဲ့ရုံးသစ်၊ပဉ္စမထပ်ရှိ အင်ဂျင်နီယာဌာန (ရေနှင့်သန့်ရှင်းမှု)ရုံးခန်း၌ အခမဲ့ထုတ်ယူနိုင်ကြောင်းထုတ်ပြန်ချက်အရသိရသည်။

ရေဆက်သွယ်မှုကို မြို့နယ်စည်ပင်သာယာအုပ်ချုပ်ရေးမှူးရုံး အင်ဂျင်နီယာဌာန (ရေနှင့်သန့်ရှင်းမှု) က ဝန်ထမ်းများက ရေဆက်သွယ်သူတို့လိုက်နာရမည့်စည်းကမ်းချက်များနှင့်ခွင့်ပြုပေးမည်ဖြစ်ပြီး စည်ပင်သာယာ ရေပိုက်လိုင်း၊အင်းလျားကန်၊ကန်တော်ကြီးနှင့် အခြားမြေစိုက်ရေကန်များခွင့်ပြုချက် မရှိဘဲရေဆက်သွယ်ပါကအရေးယူမည်ဖြစ်ကြောင်းသိရသည်။
ymg/ynzw
#ရန်ကုန်သင်္ကြန်
#Yangon_Media_Group

#LocalNews
Published_ 21 March 2023

ထိုင်းနိုင်ငံ၊အယုဒ္ဓယခရိုင်တွင် မြန်မာအမျိုးသမီးတစ်ဦး အိမ်သာအတွင်း ခလေးမွေးဖွားမှု မတ်လ ၁၉ ရက်က ဖြစ်ပွားခဲ့ကြောင်း သိရသည်။

အဆိုပါ အမျိုးသမီးမှာ အသက် ၂၉ နှစ်အရွယ်ရှိပြီး ဗိုက်အောင့်ရာမှ အိမ်သာခန်းတွင်းသွားရောက်စဉ် အရေးပေါ်ကလေးမွေးဖွားခဲ့ခြင်း ဖြစ်ကြောင်း၊မွေးလာသည့် ကလေးမှာ မိန်းခလေးဖြစ်ကြောင်း ထိုင်းနိုင်ငံတွင်းရွေ့ပြောင်းမြန်မာလုပ်သားများအရေး ကူညီနေသူများထံမှ သိရသည်။

အဆိုပါ ကလေးမွေးဖွားမှုမှာ ညပိုင်းဖြစ်သောကြောင့်အယုဒ္ဓယလူမှုကယ်ဆယ်ရေးသူနာပြုဝန်ထမ်းများက ကူညီဆောင်ရွက်ပေးခဲ့ရကြောင်း၊ ၎င်း၏ကိုယ်ဝန်သက်တမ်း ၆ လသာ ရှိသေးသည်ဟုဆိုသော်လည်း ကလေးငယ်မှာ ခန္ဓာကိုယ်ဖွံ့ဖြိုးကြီးထွားနေကြောင်း၊ယခုအခါ အဆိုပါ အမျိုးသမီးအား အယုဒ္ဓယဆေးရုံတွင် ထားရှိကာ စောင့်ရှောက်ပေးထားပြီး ကလေးရော မိခင်ပါ ကျမ်းမာကြောင်း သိရသည်။

Photo- Thaitv2 သတင်း
ymg/mt
#Yangon_Media_Group

#LocalNews
Published_ 21 March 2023

ဧရာဝတီတိုင်းဒေသကြီး မြောင်းမြမြို့နယ် ပုသိမ် - ကံကုန်း - မြင်းကဆိပ် - မြောင်းမြလမ်းပေါ်ရှိ အရှည်ပေ ၁၂၆၀ ရှိ ပမ္မဝတီတံတား (မြင်းကဆိပ်) ကို မတ်လ ၂၀ ရက်က ဖွင့်လှစ်ခဲ့ကြောင်း သိရသည်။

ယခင်က တည်ဆောက်ခဲ့သည့် ပမ္မဝတီတံတား (မြင်းကဆိပ်) ကြိုးတံတားဟောင်းမှာ ကြံ့ခိုင်မှု အားနည်းလာသည့်အတွက် မူလကြိုးတံတားဟောင်းကို ဖြုတ်သိမ်း၍ ကျွမ်းကျင်ပညာရှင်များက ခေတ်မီနည်းစနစ်တို့ကို အသုံးပြုပြီးအရှည်ပေ ၁၂၆၀၊ အပေါ်ထည် Steel Box Girder သံကူကွန်ကရစ်ကြမ်းခင်းနှင့် အောက်ထည်အုတ်မြစ် ကို R.C.C Bored Pile ၊ ယာဉ်သွားလမ်းအကျယ် ၂၄ ပေ နှစ်လမ်းသွား၊တံတား၏ခံနိုင်ဝန်မှာ တန် ၆၀ အဖြစ် တည်ဆောက်ခဲ့ခြင်း ဖြစ်ကြောင်း သိရသည်။

ယခုတံတားကြီးကို ဖွင့်လှစ်လိုက်သည့်အတွက် ပုသိမ်မြို့မှမြောင်းမြမြို့နယ်၊ ဝါးခယ်မမြို့နယ်၊ ဘိုကလေးမြို့နယ်၊ ဖျာပုံမြို့နယ်တို့မှတစ်ဆင့် ရန်ကုန်တိုင်းဒေသကြီးသို့ အချိန်တိုအတွင်း အလွယ်တကူဆက်သွယ်သွားလာနိုင်ပြီး ဒေသထွက်ကုန်များကို သယ်ယူပို့ဆောင်နိုင်မည့်အပြင် ပြည်ပနိုင်ငံများအထိ တင်ပို့ရောင်းချနိုင်မည်ဖြစ်ကာ ဒေသခံပြည်သူများ၏လူမှုစီးပွားဘဝများ ဖွံ့ဖြိုးတိုးတက်လာမည်ဖြစ်ကြောင်း ဖွင့်ပွဲသို့ တက်ရောက်ခဲ့သည့် ဧရာဝတီတိုင်းဒေသကြီး ဝန်ကြီးချုပ်က ပြောကြားခဲ့သည်။

ဧရာဝတီတိုင်းဒေသကြီးအတွင်း ပြည်ထောင်စုရန်ပုံငွေ၊ တိုင်းဒေသကြီးရန်ပုံငွေ၊ နိုင်ငံတကာအကူအညီချေးငွေများဖြင့် လမ်း၊ တံတားများကို တည်ဆောက်ပေးလျက်ရှိရာ ယနေ့အထိ လမ်းမိုင် ၁၈၈၅ မိုင် ကျော် ဖောက်လုပ်ထိန်းသိမ်းထားပြီး ပေ ၁၈၀ နှင့်အထက် တံတားကြီး ၁၀၉ စင်းကိုလည်း တည်ဆောက်နိုင်ခဲ့ပါကြောင်း၊ ယခု ၂၀၂၂ - ၂၀၂၃ ဘဏ္ဍာရေးနှစ်အတွင်းတွင်လည်း ပေ ၁၈၀ နှင့်အထက်တံတား ၁၂ စင်းနှင့် ပေ ၁၈၀ အောက်တံတားခုနစ်စင်း စုစုပေါင်း ၁၉ စင်းကို တည်ဆောက်လျက်ရှိကြောင်း သိရသည်။

ymg/mt
#Yangon_Media_Group

#LocalNews
Published_ 21 March 2023

နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၂၅ အရ နိုင်ငံရေးပါတီအဖြစ် ဆက်လက်တည်ထောင် လိုသော အမျိုးသားနိုင်ငံရေးဒီမိုကရက်တစ်ပါတီ (DNP)၊ ကချင်အမျိုးသားကွန်ကရက်ပါတီ(KNC)နှင့် ရခိုင်အမျိုးသားပါတီ(ANP) တိုသည် ဥပဒေ၊ နည်းဥပဒေများနှင့်အညီ နိုင်ငံရေးပါတီအဖြစ် ဆက်လက်တည်ထောင်ခွင့်နှင့် မှတ်ပုံတင်ခွင့်ကို ပြည်ထောင်စုရွေးကောက်ပွဲ ကော်မရှင်သို့မတ်လ ၂၀ရက်နေ့တွင်လာျလျှာက်ထားကြောင်းညအဆိုပါရွေးကောက်ပွဲရှင်မကထုတ်ပြန်ထားသည်။

ယနေ့အထိ နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၃ အရ လျှောက်ထားသော ပါတီ ၆ ပါတီ ရှိပြီး၊ နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၂၅ အရ လျှောက်ထားသော ပါတီ ၂၆ ပါတီဖြစ်၍ စုစုပေါင်း ၃၂ ပါတီ အထိရှိလာပြီဖြစ်ကြောင်းထုတ်ပြန်ချက်အရသိရသည်။

ယင်း ၃၂ ပါတီ တွင် ပြည်ထောင်စုတစ်ဝန်းလုံး စည်းရုံးမည့်ပါတီ ၈ ပါတီနှင့် တိုင်းဒေသကြီး သိုမဟုတ် ပြည်နယ်တစ်ခုအတွင်း၌သာ စည်းရုံးမည့် ပါတီ ၂၄ ပါတီ ဖြစ်ပြီး၊ အဆိုပါပါတီများကို တည်ထောင်ခွင့်နှင့် မှတ်ပုံတင်ခွင့်ပြုနိုင်ရေး ပြည်ထောင်စုရွေးကောက်ပွဲ ကော်မရှင်က ဆက်လက်စိစစ်ဆောင်ရွက်လျက်ရှိကြောင်း ရွေးကောက်ပွဲကော်မရှင်မှသိရသည်။

ymg/ynzw
#Yangon_Media_group

#World_Politics
Published 21 March 2023

ယူကရိန်းစစ်ပွဲကြောင့် အနောက်နိုင်ငံတွေရဲ့ ဆန့်ကျင်ခြင်းကိုရင်ဆိုင်နေရတဲ့ ရုရှားသမ္မတ'ဗလာဒီမာပူတင်'က ကရင်မလင်ညစာစားပွဲမှာ သူ့ရဲ့အင်အားအကြီးဆုံးမဟာမိတ်တရုတ်ကို ပြသလိုက်ပြီးနောက် အင်္ဂါနေ့မှာ တရုတ်သမ္မတ'ရှီကျင့်ဖင်'နဲ့ နောက်ထပ်ပြောဆိုဆွေးနွေးမှုများပြုလုပ်ဖို့ စီစဉ်လိုက်ပါတယ်။

နိုင်ငံတကာတရားရုံးက ပူတင်ကို စစ်ရာဇဝတ်မှုဖြင့် တရားစွဲထားတဲ့အချိန်မှာ ရုရှားသို့ ရှီကျင့်ဖင်သွားရောက်ခြင်းကို အမေရိကန်က ရှုတ်ချလိုက်ကာ ဒါဟာ ရုရှားနောက်ထပ်ရာဇဝတ်မှုများ ကျူးလွန်နိုင်စေရန် တရုတ်က သံတမန်အရ ကာကွယ်ထောက်ပံ့ပေးတဲ့သဘောဖြစ်ကြောင်း ဆိုလိုက်ပါတယ်။

တရုတ်သမ္မတရာထူးကို တတိယအကြိမ်မြောက် ရယူနိုင်ခဲ့ပြီးနောက်ပိုင်း ရှီကျင့်ဖင်က ပထမဆုံးနိုင်ငံခြားခရီးစဉ်ထွက်လာတာ ဖြစ်ပါတယ်။

တရုတ်သမ္မတက ယူကရိန်းကိစ္စမှာ ငြိမ်းချမ်းရေးဖော်ဆောင်သူအသွင် ဖြစ်လာစေရန် ပုံဖော်ဖို့ကြိုးစားနေပြီး အနီးစပ်ဆုံးမိတ်ဖက်ရုရှားနဲ့လည်း စီးပွားရေးပတ်သက်မှုကို ပိုမိုဖော်ဆောင်လာပါတယ်။

သူတို့နှစ်ယောက်ဟာ ကရင်မလင်မှာ တနင်္လာနေ့က တွေ့ဆုံခဲ့ပြီး အချိန် ၄ နာရီခွဲကြာမျှ ပြောဆိုခဲ့ကြကာ အင်္ဂါနေ့မှာ တရားဝင်ဆွေးနွေးမှုများပြုလုပ်ဖို့ စီစဉ်ခဲ့ကြပါတယ်။

ရှီကျင့်ဖင်လာလည်ဖို့အကြောင်း ရုရှားဘက်က လူသိရှင်ကြားကြေညာထားခဲ့ရာ ယခုလိုအချိန်မှာ လာရောက်ခြင်းက ထောက်ခံမှုကိုဖော်ပြတဲ့သဘော သက်ရောက်နေပါတယ်။

ယူကရိန်းမှ ကလေးများကို နှင်ထုတ်တဲ့အမှုဖြင့် ပူတင်ကို နိုင်ငံတကာတရားရုံးက ဖမ်းဝရမ်းထုတ်ထားကာ ရုရှားဘက်ကတော့ ဒီကိစ္စကိုငြင်းပယ်လိုက်ပြီး မိဘမဲ့ကလေးတွေကိုကာကွယ်ဖို့အတွက် ခေါ်ယူခဲ့တာဖြစ်တယ်လို့ ဆိုပါတယ်။

"ရှီကျင့်ဖင် ယခုလိုမျိုးသွားရောက်လည်ပတ်တာဟာ ယူကရိန်းမှာ ရုရှားတို့ကျူးလွန်တာတွေကို မဆိုင်သလိုသဘောထားနေတာ ဖြစ်ပါတယ်" လို့ အမေရိကန်နိုင်ငံခြားရေးဝန်ကြီး 'အန်တိုနီဘလင်ကန်'က ပြောကြားလိုက်ပါတယ်။

"ရှုတ်ချစကားဆိုရမယ့်အစား ပြစ်မှုတွေထပ်ကျူးလွန်နိုင်အောင် ရုရှားကို သံတမန်ရေးကာကွယ်ပေးနေပါတယ်"

အိမ်ဖြူတော်ပြောရေးဆိုခွင့်ရှိသူ 'ဂျွန်ကာဘီ'ကလည်း "ရှီကျင့်ဖင်အနေနဲ့ သူ့ရဲ့ဩဇာဖြင့် ရုရှားတပ်တွေ ယူကရိန်းထံမှ ဆုတ်ခွာလာအောင် ဖိအားပေးသင့်ပါတယ်၊ ဒါပေမဲ့ တရုတ်တောင်းဆိုတဲ့ အပစ်အခတ်ရပ်စဲမှုက ရုရှားတပ်တွေ ဆက်ပြီးနေနိုင်အောင် ကူညီသလိုဖြစ်နေတယ်" လို့ ဆိုပါတယ်။

ယူကရိန်းအရေးမှာ ရုရှားကတရုတ်ထံမှ ထောက်ပံ့မှုကြီးကြီးမားမား မျှော်လင့်နေပေမယ့် အခုလည်ပတ်ခြင်းက စစ်ရေးထောက်ပံ့မှုပြုလုပ်ပေးမယ်လို့ မထင်မိကြောင်း နိုင်ငံခြားမူဝါဒဆန်းစစ်သူများက သုံးသပ်လိုက်ပါတယ်။

Source: Reuters
#ပူတင်
#ရှီကျင့်ဖင်
#ယူကရိန်း
#ဖမ်းဝရမ်း
#နိုင်ငံတကာတရားရုံး
#Yangon_Media_Group

#LocalNews
Published_ 21 March 2023

ယနေ့ မတ်လ ၂၁ ရက်နေ့ နံနက်ပိုင်းကမန္တလေးတိုင်း အောင်မြေသာစံမြို့နယ်၊ ဥပုသ်တော်ရပ်ကွက်၊ ၂၆x၇၇ လမ်းထောင့်ရှိ ကျုံးရေပြင်အတွင်းသို့ အမျိုးသား ၁ ဦး ကျူံရေထဲသို့ခုန်ချမှုဖြစ်ပွါးခဲ့ကြောင်းသိရသည်။ 

ယင်းဖြစ်စဉ်ကို အောင်မြေသာစံမြို့နယ်မီးသတ်စခန်းမှ တပ်ဖွဲ့ဝင်များနဲ့ လူမှုကူညီရေးအသင်းသားများဖြင့် ပူးပေါင်း၍ ရှာဖွေကယ်ဆယ်ရေးလုပ်ငန်းများဆောင်ရွက်ခဲ့ရာခဲ့ကြောင်း သိရသည်။ 

နံနက် ၆ နာရီခွဲတွင် ကျုံးရေပြင်အတွင်းခုန်ချသွားသူ၏ ရုပ်အလောင်းအား ရှာဖွေတွေ့ရှိခဲ့သဖြင့် စေတနာမေတ္တာဂရုဏာအသင်းမှ မန္တလေးပြည်သူ့ဆေးရုံကြီး ရင်ခွဲရုံသို့ ပို့ဆောင်ပေးခဲ့ကြကြောင်း သိရသည်။

"ရှာဖွေချိန် နာရီဝက်ကျော်လောက်မှာ သူခုန်ချတယ်လို့ပြောတဲ့နေရာနဲ့သိပ်မကွာတဲ့နေရာမှာတွေ့ခဲ့တာပါ လိုအပ်တဲ့စစ်ဆေးမှုတွေလုပ်ဖို့ ဆေးရုံကြီးရင်ခွဲရုံကိုပို့ပေးခဲ့ပါတယ်"ဟု လူမှုကူညီရေးအသင်းဝင်တစ်ဦးကပြောသည်။

ymg/ppk
#မန္တလေးကျုံး
#ခုန်ချသေဆုံး
#Yangon-Media-Group

Published 20 March 2023

စစ်ကိုင်းတိုင်းဒေသကြီးအတွင်း ပြည်လည်ပြည့်ဖြိုးမြဲစွမ်းအင်ဖြစ်သည့် နေရောင်ခြည်စွမ်းအင်သုံးလျှပ်စစ်ဓာတ်အား ထုတ်လုပ် ခြင်းကိုဆောင်ရွက်နိုင်တဲ့အတွက်  လုပ်ငန်းရှင်များ တစ်ဦးချင်းအနေဖြင့်လည်း နေရောင်ခြည်စွမ်းအင်သုံး လျှပ်စစ်ဓာတ်အား ထုတ်လုပ်ခြင်းကို ဆောင်ရွက်ကြစေလိုတယ်လို့ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်က စစ်ကိုင်းတိုင်းအတွင်းက စီးပွားရေးလုပ်ငန်းရှင်တွေကို တိုက်တွန်းပြောကြားခဲ့ပါတယ်။

နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် မတ်လ ၂၀ရက် နံနက်ပိုင်းတွင် စစ်ကိုင်းတိုင်းဒေသကြီးအတွင်းရှိ တိုင်းဒေသကြီး၊ ခရိုင်၊ မြို့နယ်အဆင့် ဌာနဆိုင်ရာတာဝန်ရှိသူများ၊ မြို့မိ၊ မြို့ဖများ၊အသေးစား၊ အငယ်စား နှင့် အလတ်စားစီးပွားရေး(MSME)လုပ်ငန်းရှင်တွေကို တိုင်းဒေသကြီးအစိုးရ အဖွဲ့ရုံးရှိ ချင်းတွင်းခန်းမ၌တွေ့ဆုံပြီး ဒေသ  ဖွံ့ဖြိုးတိုးတက်ရေးဆိုင်ရာများကို ဆွေးနွေးပြောကြားရာမှာ ဗိုလ်ချူပ်မှူးကြီးက ယခုလိုပြောကြားခဲ့တာဖြစ်တယ်လို့ သတင်း   ထုတ်ပြန်ချက်အရသိရပါတယ်။

“ချင်းတွင်းမြစ်နှင့် ဧရာဝတီမြစ်အတွင်း လျှပ်စစ်ဓာတ်အားထုတ်လုပ်မှုကို ဆောင်ရွက်နိုင်သည့် နေရာအများအပြား ရှိပါတယ်။နေရောင်ခြည်စွမ်းအင်သုံး လျှပ်စစ်ဓာတ်အားကို အသုံးပြုပြီး စိုက်ပျိုးမွေးမြူရေးလုပ်ငန်းများအတွက် လိုအပ်သည့် မြစ်ရေတင်လုပ်ငန်းများကို ဆောင်ရွက်နိုင်ပါတယ်။ရေအားလျှပ်စစ်စီမံကိန်းများကို အကြောင်းအမျိုးမျိုးကြောင့် အကောင်  အထည်ဖော်ဆောင်ရွက်နိုင်မှုမရှိသေးသည့်အတွက် အဆိုပါ ရေအရင်းအမြစ်များကို အကျိုးရှိစွာအသုံးချ နိုင်ရန်လိုပါ တယ်”လို့ လည်း နစက ဥက္ကဋ္ဌကပြောပါတယ်။ ကလေးဝ၊ ကျောက်မီးသွေး ထုတ်လုပ်ခြင်းမှလည်း လျှပ်စစ်ဓာတ်အားထုတ်လုပ်မှု လုပ်ငန်းများကိုလည်းဆောင်ရွက်၍ရတယ်လို့လည်း သူက ဖြည့်စွက်ပြောကြားခဲ့ပါတယ်။

စစ်ကိုင်းတိုင်းဒေသကြီးသည် ဝါးထွက်ရှိမှုနှုန်းအမြင့်ဆုံးဖြစ်တဲ့အတွက် အဆိုပါ ဝါးများကို အသုံးပြု၍ နိုင်ငံအတွက် လိုအပ်သည့် စက္ကူပျော့ဖတ်များကို ထုတ်လုပ်နိုင်တဲ့အတွက် စက္ကူစက်ရုံများတည်ဆောက်လိုပါကလည်း နိုင်ငံတော်အနေဖြင့် ခွင်ပြုပေးမယ်လို့လည်း ဗိုလ်ချူပ်မှူးကြီးကပြောပါတယ်။

အဲဒီအပြင် စစ်ကိုင်းတိုင်းဒေသကြီး ဟုမ္မလင်းဒေသတွင်ရာဘာထွက်ရှိပြီး ရာဘာကိုအခြေခံသည့် မော်တော်ဆိုင်ကယ်တာယာများ၊ စက်ဘီးတာယာများနှင့် လူသုံးကုန်ပစ္စည်းများကိုလည်း ထုတ်လုပ်နိုင်တဲ့အတွက်  ရော်ဘာထုတ်ကုန်ပစ္စည်းများ ထုတ်လုပ်မည်ဆိုပါက လိုအပ်သည်များကို ကူညီဆောင်ရွက်ပေးသွားမယ်လို့လည်း နစက ဥက္ကဋ္ဌက လုပ်ငန်းရှင်တွေကို တိုက်တွန်းပြောဆိုတယ်လို့ သတင်းထုတ်ပြန်ချက်မှာဖော်ပြထားပါတယ်။

စစ်ကိုင်းတိုင်းဒေသကြီးသည် ကျောင်းဖွင့်လှစ်မှုနှင့် ကျောင်းတက်ရောက်မှု ရာခိုင်နှုန်းအနည်းဆုံးဖြစ်နေတဲ့အတွက် မိမိတို့သားသမီးများ၏ ပညာရည်မြှင့်တင်ရေးအတွက် ဝိုင်းဝန်းအားပေးဆောင်ရွက်ကြရန်တိုက်တွန်းလိုတယ်လို့လည်း ဗိုလ်ချူပ်မှူးကြီးကပြောပါတယ်။

အခမ်းအနားသို့ တက်ရောက်လာကြတဲ့  အသေးစား၊ အငယ်စားနှင့် အလတ်စားစီးပွားရေးလုပ်ငန်း(MSME)ရှင်တွေက  စက်သုံးဆီလိုအပ်ချက်များအပေါ်ဖြည့်ဆည်း ဆောင်ရွက်ပေးစေလိုမှု၊ ဆန်စက်လုပ်ငန်းများဖွံ့ဖြိုးတိုးတက်ရေးအတွက် လိုအပ်သည့် ရင်းနှီးမြှုပ်နှံငွေများကို နိုင်ငံတော်မှ ပံ့ပိုးဆောင်ရွက်စေလိုမှု၊ အရည်အသွေးကောင်းများကို ပိုင်ဆိုင်ထားသည့် ရွှေဘိုပေါ်ဆန်းကို ရေရှည်တည်တံ့ ခိုင်မြဲစေရေး ဆက်လက်ထိန်းသိမ်းဆောင်ရွက်ရှိမှု၊ စက်မှုလုပ်ငန်းများ ဖွံ့ဖြိုးတိုးတက်ရေးအတွက် အဓိကလိုအပ်ချက်ဖြစ်သည့် လျှပ်စစ်စွမ်းအား လိုအပ်ချက်ကို ဖြည့်ဆည်းပေးစေလိုမှု၊ လေကြောင်းခရီးစဉ်များကို ယခုထက် ပိုမိုပြေးဆွဲဆောင်ရွက်ပေးစေလိုမှု၊စက်မှုဇုန်လုပ်ငန်းများ ဖွံ့ဖြိုးတိုးတက်ရေးအတွက် စက်မှုဇုန်များကို အဆင့်မြှင့်တင်ဆောင်ရွက်ပေးစေလိုမှုနှင့် ခေတ်မီစက်ကိရိယာများ တင်သွင်းရာတွင် ပိုမိုလျှင်မြန်မှု ရှိစေရေး ဆောင်ရွက်ပေးစေလိုမှု၊ တိုင်းဒေသကြီးအတွင်း ကုန်စည်စီးဆင်းမှုပိုမို လျှင်မြန်ချောမွေ့စေရေးနှင့် လမ်းပန်းဆက်သွယ်မှုလုံခြုံချောမွေ့ရေးတို့အတွက် ဆောင်ရွက်ပေးစေလိုမှု၊ စစ်ကိုင်းမြို့ရေလုံလောက်စွာရရှိရေးအတွက် ဆိုလာစနစ်သုံး ရေပေးဝေရေးစနစ် ဖော်ဆောင်ပေးစေလိုမှု၊ ပြည်တွင်းပြည်ပခရီးသွားများ အများဆုံး အသုံးပြုလျက်ရှိသည့် စစ်ကိုင်းတောင်ရိုးလမ်းနှင့် ကမ်းနားလမ်းကို အဆင့်မြှင့်တင်ဆောင်ရွက်ပေးစေလိုမှု၊ မြို့တွင်း၌ယာဉ်အန္တရာယ်ကင်းရှင်းရေးအတွက် စစ်ကိုင်းမြို့ မြို့ရှောင်လမ်း ဆောင်ရွက်ပေးစေလိုမှု၊ ရိုးရာငွေထည်လုပ်ငန်း၊ ကြေးထည်လုပ်ငန်း ဖွံ့ဖြိုးတိုးတက်ရေးအတွက် လိုအပ်သည်များကို ကူညီဆောင်ရွက်ပေးစေလိုမှု၊ ခရီးသွားလုပ်ငန်းဖွံ့ဖြိုးတိုးတက်ရေးအတွက် မန္တလေး-စစ်ကိုင်း-အင်းတော်-ကသာ မီးရထားလမ်း ပြေးဆွဲဆောင်ရွက်ပေးစေလိုမှုနှင့် ဒေသတွင်းစီးပွားရေးလုပ်ငန်းများ ဖွံ့ဖြိုးတိုးတက်ရေးအတွက် အခြား လိုအပ်သည်များကို အသီးသီး တင်ပြဆွေးနွေးခဲ့ကြပြီးသက်ဆိုင်ရာ တာဝန်ရှိသူအသီးသီးက ပြန်လည်ဆွေးနွေးဖြေကြားပေးခဲ့ကြတယ်လို့လည်း သတင်းထုတ်ပြန်ချက်မှာဖော်ပြထားပါတယ်။

နစက ဥက္ကဋ္ဌဟာ ခင်းကျင်းပြသထားတဲ့  သယံဇာတတွင်းထွက်ထုတ်ကုန်များ၊ စားသောက်ကုန်၊လူသုံးကုန်၊ စက်မှုလက်မှုထုတ်ကုန်၊ ရိုးရာလက်မှု ထုတ်ကုန်များ၊ အဝတ်အထည်များ၊တိုင်းရင်းဆေးများ စသည့် ထုတ်ကုန်ပစ္စည်းများ ခင်းကျင်းပြသထားရှိမှုများကို ပြကွက်တစ်ခုချင်းစီအလိုက် စိတ်ဝင်တစားဖြင့် လေ့လာခဲ့ပြီး ဈေးကွက်ရရှိမှုအခြေအနေများကို မေးမြန်းဆွေးနွေးရာ လုပ်ငန်းအလိုက် စီးပွားရေးလုပ်ငန်းရှင်များက လိုက်လံရှင်းလင်းတင်ပြခဲ့ကြတယ်လို့လည်း သိရှိရပါတယ်။

-ymg/knl

#နစကဥက္ကဋ္ဌဗိုလ်ချူပ်မှူးကြီးမင်းအောင်လှိုင်

#စစ်ကိုင်းSMEလုပ်ငန်းရှင်များနှင့်တွေ့ဆုံ

#YangonMediaGroup

#LocalNews
Published_ 20 March 2023

ညောင်ခါးရှည်စစ်ဆေးရေးဂိတ်မှာ ယာဉ်ကြောတွေပိတ်နေတဲ့အတွက် လူနာတင်ယာဉ်တွေပိတ်မိနေသလို ဆီကားတွေအဝင်နောက်ကျလို့ မုတ္တမနဲ့မော်လမြိုင်မှာ ဒီဇယ်ဝယ်ယူဖို့ခက်ခဲနေတယ်လို့ ဘိုဘိုဝင်းအရေးပေါ်ကယ်ဆယ်ရေးနှင့် လူမှုအထောက်အကူပြုအဖွဲ့ဥက္ကဌ ကိုဘိုဘိုဝင်းထံမှ သိရပါတယ်၊၊

#YMG#Yangon_Media_Group

#LocalNews
Published-20 March 2023

အာဆီယံ-တရုတ် ပူးတွဲပူးပေါင်းဆောင်ရွက် မှု ကော်မတီ (၂၄)ကြိမ်
မြောက်အစည်းအဝေးကို အင်ဒိုနီးရှားနိုင်ငံ၊ ဂျာကာတာမြို့ရှိ အာဆီယံအတွင်းရေးမှူးရုံး၌ကျင်းပခဲ့ရာတွင် မြန်မာအမြဲတမ်းကိုယ်စားလှယ် ဦးအောင်မျိုးမြင့်က ပူးတွဲ ဥက္ကဌအဖြစ် တက်ရောက်ခဲ့ကြောင်း နိုင်ငံခြားရေးဝန်ကြီးဌာနကသိရသည်။

အာဆီယံ-တရုတ် ဆွေးနွေးဖက် ဆက်ဆံရေး ညှိနှိုင်းရေးမှူး တာဝန်ယူထားသည့် အာဆီယံဆိုင်ရာ မြန်မာအမြဲတမ်းကိုယ်စားလှယ် ဦးအောင်မျိုးမြင့်မှ အာဆီယံဆိုင်ရာ တရုတ် အမြဲတမ်းကိုယ်စားလှယ်  H.E. Mrs. Hou Yanqi နှင့်အတူ ပူးတွဲ၍ အစည်းအဝေးဥက္ကဋ္ဌအဖြစ် ဆောင်ရွက်ခဲ့ပြီးအာဆီယံဆိုင်ရာ အမြဲတမ်းကိုယ်စားလှယ်များ၊ အာဆီယံ နိုင်ငံရေးနှင့် လုံခြုံရေးဆိုင်ရာ ဒုတိယအတွင်းရေးမှူးချုပ် Michael Tene တို့ တက်ရောက်ခဲ့ပြီး၊ အင်ဒိုနီးရှားနိုင်ငံဆိုင်ရာ တီမောလက်စ်တေသံရုံးမှ တာဝန်ရှိသူက လေ့လာသူအဖြစ် အစည်းအဝေးသို့ ပါဝင်တက်ရောက်ခဲ့ကြောင်းမတ်လ ၂၀ ရက်တွင် နိုင်ငံခြားရေးဝန်ကြီးဌာနမှထုတ်ပြန်ထားသည်။

ယင်းအစည်းအဝေးတွင် အာဆီယံနှင့် တရုတ်နိုင်ငံတို့၏ ဖြစ်ပေါ်တိုးတက်မှုများနှင့် စပ်လျဉ်း၍ ဆွေးနွေးခဲ့ကြပြီး၊ သက်ဆိုင်ရာ အမြဲတမ်းကိုယ်စားလှယ်များမှ ယခုနှစ် အာဆီယံဥက္ကဋ္ဌ တာဝန်ယူစဉ်အတွင်း ဆောင်ရွက်မည့် ဦးစားပေးအစီအစဉ်များ၊ Initiative for ASEAN Integration (IAI) Work Plan IV အောက်တွင် ဖြစ်ပေါ်တိုးတက် မှုများနှင့် တရုတ်နိုင်ငံမှ ပူးပေါင်းဆောင်ရွက်လျက်ရှိသည့် စီမံကိန်းများ၊ ASEAN Smart Cities Network နှင့် ပတ်သက်သည့် ဖြစ်ပေါ်တိုးတက် မှုများနှင့် စဉ်ဆက်မပြတ် ဖွံ့ဖြိုးတိုးတက်မှုဆိုင်ရာ ကဏ္ဍတွင် ဆောင်ရွက်လျက်ရှိသည့် ကိစ္စရပ်များအပေါ် ဆွေးနွေးတင်ပြခဲ့ကြောင်းလည်းသိရသည်။

ဆက်လက်၍ အာဆီယံ-တရုတ် လုပ်ငန်းအစီအစဉ် (၂၀၂၁-၂၀၂၅) နှင့် ၎င်း၏ နောက်ဆက်တွဲ အစီအစဉ်နှင့် ပတ်သက်၍ အကောင်အထည်ဖော်လျက်ရှိသည့် ဖြစ်ပေါ်တိုးတက် မှုများ၊ (၂၅) ကြိမ်မြောက် အာဆီယံ-တရုတ် ထိပ်သီးအစည်းအဝေးနှင့် အထူးထိပ်သီးအစည်းအဝေးတို့၏ ရလဒ်များအပေါ် ဆက်လက်ဆောင်ရွက်မည့် အစီအစဉ်များနှင့် အာဆီယံ-တရုတ် စိုက်ပျိုးရေး ဖွံ့ဖြိုးတိုးတက်မှုနှင့် စားနပ်ရိက္ခာဖူလုံရေး ပူးပေါင်းဆောင်ရွက်ရေးနှစ်တွင် ဆောင်ရွက်သွားမည့် အစီအစဉ်များနှင့် အမြင်ချင်းဖလှယ်ဆွေးနွေးခဲ့ကြောင်း သိရသည်။
#ymg/mt
#Yangon-Media-Group